رواية هل كان حلماً ...؟ (الِعراق_المُصغَر) الفصل الثامن وثلاثون 38 - بقلم Nawras_Qasimᥫ᭡

الحلــــــــقه السادســــــــــــــه

رواية... هل كانَ حُلماً...؟

{ العِراق-المُصغَر ... التوباز }

بقلمي ... لؤلؤة_البِحار ...
___________________•

حره... ضحكت وطبيت واني لازمه بايد رشاش شفت رجال جبير وبصفه مره مبين عليها ملامح الكبر

بعدني مامسلمه نزلت مره حلوه من الدرج وبيدها طفل هي شافتني صرخت

... هااااي منوووو عمووو

والطفل الصغير اجه يركض على رشاش ويكول.

... اجه بابا اجه بابااا

بسرعه انقبض گلبي من هالحجايه واختنكت وباوعت لرشاش
جنت لازمه ايده اول ماحضنه الطفل بعدها عني

باوعتله بصدمه هو شاله يبوس بيه درت وجهي ع المره الي تحجي ويا ابو بصياح وتگوله

... سواها ياعمو سواها وتزوج البغداديه المااحشمت زلمكم ترضااهاا... تحجي وتبجي وتصارخ

... حسيت بطعنه بنص ظهري وتوغلت الگلبي وطعنته مصدومه احاول افهم شديصير وهاي منو؟

فزيت على صوت المره الجبيره وهي تلزم ايديها كالتلها... اهدي يمه

رجعت عيوني التفتت للرجال يباوع لرشاش بعصبيه جرني رشاش من ايدي باوعتله شفته يباوعلي

گتله بهدوء عكس نيران گلبي... هذول منو؟؟

دار وجهه باوع لابو گال... تستقبلنا لو ادورلي بيت جديد!

صرخ الرجال... انت شو مامحشم احد هينا
شلون تتزوج وانه ماادري؟
ولا كأني ابوك لو مخلفلي صايع احسن من خلفتك

رشاش گاله بهدوء... الصايع يروح يگ***د مايتزوج

ابو زاهر  ... انجب سرسري لاتخليني اهينك جدام حريمك

رشاش ... ما جديد هالحچي اعليك احجي الي تريدو محد غريب هينا الاولى وانت گلت باعتبار بنتك
والثانيه بنتي وحرمتي

ابو زاهر ... جاي تعاند يا رشاش ؟ شلون تكسر بحرمتك وتتزوج عليها؟ انه شگلت؟
كلت مااريد هالبغداديه يو لا؟

رشاش... انه الراح اتزوجها ما انت وما من حقك تتحكم بمصيري مرتين

صاح... انه مااريدها تاخذها وتطلع من هينا

وگف حازم يم ابو گال... يابه هدي هالحچي مايصح
الحرمه على ذمة اخوي بعد

تقرب اوس من ابوه... عليش جاي تطرد اخوي الزلمه ماغلط واخذها بالحلال
احسن مما يصخم وجوهنا مثل ابن عمي غفار!

ابو زاهر ... ترضوها يكسر ببنت عمكم؟

رشاش... لاتجيني من هالصوب يرضى عليك الله شني الجديد؟
من سنين وگبل لااعقد كتلها اتزوج والكل شهد وهي وافقت
بعد عليش هالهوسه؟

صاح ابو... انه مااقبل بهالحجي تتزوج وماتكلي

رشاش... يابه هسه اصفالك على بر شني ليش معارض زواجي؟

تقرب ابوه منه كله... انت شني منين جايب هالصلافه

رشاش... ماتذكر من زمان عندي

گاله بعصبيه... اسكت ولا تسمعني صوتك

دايرد رشاش طب واحد نفس هيئة رشاش ڪال... يابه كلش زحمه اصواتكم طالعه

ابوه جاوبه بصياح... دحج هذا شمفين

باوع لرشاش وباوعلي ابتسم ورجع باوع لابو ڪال... بالقران زحمه الحرمه توها طابه بيتنا وتكاونتو
حلوها بالتفاهم..

وحضن ابو دخله للمضيف وصاح :-اخوتي كلكم حدرو هينا

اني واكفه ابجي جرني رشاش كتله :-شمسوي انت؟

رشاش... اهدي هسه كلشي اوضحلج
اني بجيت كال... مسحي دموعج ومد ايده يمسح دموعي

سمعت المره گالت... دحكو بدينا بدموع الحيايه

رفع راسه خزرها هي دارت وجهها وطبت للمضيف بجيت كتله
... مااضل وياك والله مااضل

سمعت صوت الولد الي طب كال :-رشاش منتظريك يولو انت وحرمتك

بجيت كتله... رجعني لاهلي ثانيه مااريد ابقى وياك

ماسمع مني وجرني وطب
طبيت للمضيف واني ارجف
خايفه يطلع صوتي ويكتلوني ومصدومه من الي صار
باوعتلهم شفتهم كلهم يباوعولي بغضب رجفت منهم
رشاش لازم ايدي گعد وجرني اكعد يمه گال اخو الجبير

بكر... دحج يابه لازم الكل يتقبل اخوي تزوج والحرمه صارت زوجتو وجنتنا و محسوبه علينا
نتكاون نتصالح هي من عايلتنا بعد

ابو زاهر ... المشكله ما بحرمتو بس اخوك ماحشمني ولا حشم عمامو مشيتنا رجعها ونحن طالعين علمودو تقبلها يتزوج ومايگلي؟

رشاش... لسه ماسويت عرس انه

ابو زاهر... هاك استلم جايب الحرمه ومامسويلها زفه تقبلها؟

رشاش نزل راسه كال... استغفر الله

ابوه صفك بايده كال... مامحترم مامحشمني

بكر... لا يابه ابوه انت والك حگ عليه بس الزلمه حاچيلك گبل

ابو زاهر... حتى لو لزوم يگلي عقدت بعدين شلون بحرمتو احمد؟
عجل مالازم يگوللها!
جايب الحرمه الجديده وداخل علينا ونحن ماندري شني السالفه هو هذا حجي؟
اكو اب مايدري بابنو من تزوج؟

اوس... بالنسبه لام احمد مالك حگ تلومو عليها
من سنين گايلك بقرارو

حجت ام احمد... يعني تقبلوها على بنت عمكم؟
تقبلوها يتزوج عليه ليش انه گصرت وياه بشي؟

حازم گاللها... يشهد الله لو تبقى علينا نحن مانقبل
بس انتي الي رضيتي

گالت وهي تبجي... ها بعتوني هي هيج تاليتها
دحگتوني يتيمه گمتو تاكلون بلحمي
عجل ماكو ابو ياخذ بحگي؟
بعدها ماطبت للبيت غيرتكم عليه

حره... ماتحملت حطيت ايدي على گلبي وبجيت رشاش دار وجهه عليه كال بهمس

... ثقي بالله مامسوي شي غلط افهمي مني ولاتبجين

بكر ... كلش زحمه بجيتو الحرمه باول زواجها 

اوس... غير گبيتو بوجهها

ام احمد صاحت... يعني مستهضمين على دمعتها وانه يمكم من سنين ما تحسون بيا

ابوهم گاللها ... انتي الاصل بويه

رشاش باوعلها وكال... ماكو احد مظلوم هينا
وعلاقتنا حطيت حد الها قبل لايبدا زواجنا
وانتي وهلج تعرفون بهالحجي گبل هلي فبالله عليج ما وكت مشاكلج ولا تسويني الظالم هسه

دار وجهه على بنيه تطلع بعمري كللها :-طيبه اخذي  مرتي لغرفتها ترتاح من تعب الطريق

گامت البنيه اجت يمي لزمت ايدي گمت صاحت ام احمد... ياغرفه وهي منيلها غرفه

طيبه باوعت لرشاش گللها... حره مرتي يعني بدون شك راح تگعد بغرفتي طيبه ابقي يمها

طيبه... بعيني

وطلعنا اسمعها تصيح وتگوله... عمي ماسمعت راح يگعدها بغرفتو

... صعدت الدرج واني ارجف فتحتلي غرفه گالت... فوتي

طبيت الغرفه مال عزابيه كنتور صغير وسرير ابو النفر واثاثها بسيط بس مرتبه گعدت ع السرير ابجي كعدت يمي البنيه كالت

... ليش تبجين انتو ما تحبون بعض؟. شافتني ارجف كالت... انتي خايفه؟

مارديت عليها حاطه ايدي ع گلبي وارجف انربط لساني مااعرف شاحجي ولا افكر زين فكرة اني حكون زوجه لرجال متزوج وعنده طفل موسهله سمعت البنيه گالت وهي تهز راسها

طيبه... فهمت ندمانه لان اخوي تكاون ويا ابوي وام احمد بسببج ؟

باوعتلها واني ابجي كتلها... ماادري اني ماادري والله

طيبه... بشنو ما تدرين؟

... ماادري بيه متزوج وعنده طفل والله.. حطيت ايدي ع راسي كتلها  واني ابجي... والعباس هو ما كلي
رجع وجذب عليه احساس رتيل بمحله
هالرجال خبيث اكرهه

طيبه... گصري حسج يولي ليسمعوج

سكتت كالت... لتحجين هيج على اخوي تكرهينو شني؟
عجل هاي الكوانه كلها علمود مني؟ غير علمودج؟

بجيت كتلها... اني لو ادري متزوج والله اموت نفسي ومااقبل اني اكره الرجال اليخون مرته
مااتحمل فكرة اكون ضره والله مو لنوب لرجال متزوج وعنده طفل

طيبه... يولو انتي كلشي مافاهمه

... راح اموت والله

طيبه... هيدي واسمعي مني

... شنو؟

طيبه... اول شي حمودي ماابن رشاش ابن اخويا زاهر الله يرحمو

مسحت دموعي كتلها... لعد يكوله بابا

طيبه... لكل عمامو يكول بابا ما بس لرشاش

نزلت عيوني افكر كتلها... يعني تزوج مرت اخو الميت؟

طيبه... اي

كتلها بصياح... قرف قرف.. وكمت كلت.. اني شلون حبيته شلون يعني
حط عينه على مرت اخو
الله ياخذك رشاش

جرتني گالت ... صوتج يولي لتدعين على اخويا وافهمي عدل ياغبيه

كمت اشهك كحيت كالت... اسم الله تعالي غسلي وخلي احجيلج

طلعت واني امسح دموعي مشيت بالممر غسلت ورجعت دااطب للغرفه اني وطيبه طلعت كدامي ام احمد تبجي
ويمها وحده شابه هي شافتني لو تخبلت ركضت عليه جرتني من شعري صرخت كالت

... بواگة الزلم يابواگة الرياجيل اليوم اموتج

تجر بشعري واني اصرخ وادفع بيها دفعتني ع الگاع وطيبه والبنيه البصفها يبعدنها عني

كمت واني ابجي واگوللها... ماادري والله ماادري

وهي تصارخ وتگول... كيفتي عليه دحكتيه خوش صيده من الله لا يوفقج ويخرب بيتج مثل ما خربتي بيتي

دفعتها طيبه كلتلها... احترمي نفسج وگصري حسج بنتي نحن ماكاعدين بالشارع هذا بيت محترم

ام احمد دفعتها... تدافعين عنها خوش لكيتيلج حليفه انتي وهاي الحيه

... اني گمت اصيح  وابجي كتلها :-اخذي اخذي مااريده
رشااااااش وينكك هسهه ترجعني لأهليييي

طيبه التفتت عليا ... يولو صوتج فضحتينا

ام احمد... تحيليه عليا ياحيه دروبج مفهومه تردين تكوليلو انه فقيره بس انه الج والله اليوم اموتج

وهدت عليا صعد اوس يركض رحتله كتله... اخووك ويين هسه تطلعونا منا

هو بسرعه التفت لام احمد كللها... زودتيها عيني كلنا ما من حقج

ام احمد... زين من مصايبي عرفتني طينة الوادم واولهم انتم

... اني نزلت صار كدامي رشاش دفعته كتله.. هسه هسه ترجعني مااريدك ولا اريد اهلك حسبي الله بيك

لزمني من كتفي... هيدي واسمعي مني

... كلشي مااريد اسمع وخر عني وخررر

رشاش... خلي نحجي..

وجرني صعدني صارت كدامي ضرتي تبجي وتدردم كاللها... يابه انه هذا العندي وهاي حرمتي كدام هلي وعمامي وخلگ الله ان ما عجبج ياام احمد فالباب منا... واشر بايده

ام احمد... سنيني ضاعت وياك حسبي الله بيك

رشاش... محد كلج انتظري

وجرني طبينا  للغرفه قفل الباب والتفتلي وكفت كدامه كتله :-ماابقى والعباس ماابقى

رشاش... بس افهمي مني

كتله واني ابجي واصيح  ... شافهم؟ متزوج مرت اخوك يانذل... ودفعته.. اني شلوون شلون انغشيت بيك؟ شلون حبيتك؟
رغم كلشي سويته بقيت ابررلك كدام اهلي ونفسي والكالك اعذار بس حتى اسامحك
والله العظيم الكالك تبريرات اني مامقتنعه بيها بس حتى اسامحك وتاليتها شنوو؟
تطلع متزووج ومن منووو مرت اخووووك؟

رشاش... يشهد عليا ربي مامعتبرها زوجه

... ليش هي لعبه لو شنوو؟
معقوله هيج كسر مشاعر الناس سهله عندك؟
تتزوجها وتأملها بيك ورا ماشفت غيرها جاي تكولي اني مامعتبرها زوجه؟
وبعد يومين هم تلكى وحده غيري
وتتزوجها وتكوللها اني ما معتبر حره زوجه موو؟

رشاش... جاي تحجين من كيفج وتلوصين بالحجي انتي كلشي مافاهمه

بجيت كتله... اكرهك ماابقى والله ماابقى رجعني الاهلي اكرهككك

رشاش... يشهد عليا ربي من تزوجتها لليوم هذا حالي وياها دحكي غرفتي

باوعت لغرفته كال... هاي غرفة رجال متزوج

مسحت دموعي... هو انت متزوجها بعد

رشاش... افهميني دخيلج... جرني كعدني ع الجربايه وكعد بصفي كال :-كتلج اسمعي مني قبل لاتحكمين هاي زوجة اخوي المرحوم
صح تزوجتها وغلطت غلط عمري ماانكر
بس يشهد عليه ربي صار سنين لليوم ماكعدت وياها بغرفه وحدها
ولا طخيتها حتى

... باوع بعيوني كال... صح جنت ماعرفج بس انه مااكدر شلون اكدر اتقبل اكون زوج لوحده جان يعشكها اخوي
وماصدگ شوكت صارت الو؟
فرحتو ولمعة عيونو بعرسو كلها انه شاهد عليها
انه هم احس حره ما لهالدرجه اوصل واكدر اتقبلها وابدأ وياها من جديد

... لعد ليش تزوجتها؟
ليش ماعفتهاااا؟

رشاش... ماجنت اريدها وداعت عيونج بس من بعد ما مات اخوي ماجانت تكدر تبقى ويانا بالبيت
لان حرام واذا طلعت من البيت لازم ابنها وياها
ونحن بعاداتنا الطفل مايصير يربى عند غريب لازم يبقى بديرة عمامو حتى يعوضو عن ابو

ومن تترمل الحرمه يتزوجها واحد من اخوان زوجها حتى يهتم بيها وبطفلها الي هو من لحمنا ودمنا
بالله الكريم اعرف هالشي غلط والام ماكو احن منها على ابنها 
واعرف كثير زلم ماتتقبل حرمة اخوهم بس هذا تفكير ديرتنا شبيدي انه؟

بجيت... عندك كومه اخوان ماكدر واحد يتزوجها غيرك يعني

رشاش... بكر جان متزوج وانه الابن الثاني الاكبر وجنت اعزب... جر نفس كال... الي توفى ابن امي وابوي ما ابن مرت ابوي مثل حازم  واوس
وطاحت براسي

سكت ورجع كمل... ماظلمتها ولا ظلمتج هي تعرف كلش زين راح يجي يوم واعشگ غيرها واتزوج
وگلتلها قبل لايصير زواجنا
وهي رضت بأي حگ اليوم اصير انه الظالم؟؟
يشهد علي ربي واهل هذا البيت واحد واحد اسئليهم لو بيوم عاملتها كزوجه الج حك عليه وتاخذينو من هالرگبه... وحط ايده ع ركبته...

... شلون هسه

رشاش... اعتبريها ماموجوده

... بس هي موجوده وانت متزوجها زين اذا كلامك صح وانت ما تحبها ليش هيج تبجي ومحروك گلبها

رشاش... كلو من ايدها

... ليش؟
ديحجي اندگت الباب مسحلي دموعي وگام فتح الباب طلع اخوه الجبير باوعلي و كال

بكر... ها مرت اخوي ندخل

... هزيت راسي باي رشاش كله... تفضل

طب ديسد الباب دفعه واحد باوعت اوس كال... عيب عليكم تجتمعون بدوني

وطب كعدو بالكاع كمت كعدت كبالهم اجه رشاش كعد يمي ديحجي انفتحت الباب
باوعت حازم وطيبه

طيله... وين ماترحون انه وياكم مالي شغل بشلة الزنابير البرا

ابتسم رشاش كاللها... تعاي.. واشرلها تكعد يمه
كعدت بصفه من الجهه الثانيه حضنها وباس راسها

گعد حازم كال.. شني هاي رشاش

قبل ليكمل كله بكر... اسكت لاتبعرها

مسحت دموعي كال  ... اول شي اعرفج انه اخو رجلج بكر وما بس اخو رجلج اخوج ان شاء الله
نحن نحبج على حب رشاش

ابتسمت كال... رشاش حجالي كلشي سوه وانه اعرفو غلط ببعض الامور بس الحظ هم جان عكسو

مسحت دموعي كتله... هو ماكلي هو متزوج

هز راسه كال... لان ماكو داعي
ام التوت اسمعي مني انه اخوج بالله الكريم مااريدلج غير الخير
بس هذا ... واشر على رشاش ... لو تلفين الدنيا كلها ماتلگين رجال يعشكج مثلو

... شنو الفائده وعلى ذمته وحده غيري

بكر... بس بالاسم يابه الحرمه بغرفه وهو بغرفه
ومن قبل لا يتزوج وهذول كلهم يشهدون... واشر ع الكاعدين... انطاها خبر ان هو مايريدها ويحب غيرها وهي شجاوبت؟
باوع لطيبه

طيبه گالت بتقليد ع اساس تبجي... بس استر علياااا وخليني ويا ابني ببيت ابووو
ماريد شي ثانييييي
وجرت اخر كلمه ضحك اوس

كتله... بس من حقي اعرف

باوع لرشاش كال... صح من حقج ورشاش هين غلط بس هم مايصير تلومينو على مسأله منتهين منها من سنين
حتى عمامنا يدرون هو مايريدها

... بس خطيه حرام عليكم داتضيعون عمرها

طيبه... ونحن شكو كلو من ايدها الله يزيدها

بكر... طييبه مايجوز هالكلام

حازم... لا يجوز وصحيح وعاد ابو المثل يگول المايعرف تدابيرو حنطتو تاكل شعيرو

اوس گرصه گله... شني خويا شيعني هالمثل

حازم... انجب ما وكتها

اوس... عود صار متحچي

حازم... شلون يريدني الزكو بالكاع

ديجاوب اوس صاح رشاش... انجبو ثنينكم وسدو حلوگكم خزيتونا

بكر خزرهم ورجع باوعلي كال... نحن ما جبرنها ع الزواج واخوي انطاها كثير فرص قبل الزواج
رادها ترفض ماقبلت وحتى بعد الزواج كاللها اطلكج وهي ماقبلت بعد نحن شلون ظالميها؟

باوعت لرشاش كتله... اذا هيج طلكها

بكر.   ما هيج الحجي ام التوت عجل حمودي وين يبقى؟

... يم امه وين يبقى يعني
ليش شنو انتو احن منها عليه؟

بكر... بس نحن عمامو ونحن مسؤولين عنو ولدنا يكبرون جدام عيونا حتى نضمن ما يمشون بطريق اعوج
الا اذا طلكناها واخذنا ابننا تقبلين الطفل يربى بلا امو؟

كتله بنتر... مو مشكلتي اخي لو تطلكوها لو تطلكوني ما مضطره اتحمل كل هذا اني مستحيل اكون ضره الوحده

طيبه... لتصيرين انانيه اخوي شذنبو

باوعتله شفته مركز بيا كلت واني اباوعله... واني شنو ذنبي حتى اقبل بواحد متزوج؟

رشاش... حره بعد كل السمعتيه ولسه تكولين زواج؟

... اي كدام الكل عمامك اهلك انت زوجها وهي على ذمتك

رشاش وجر نفس كالت طيبه... يولي ياغبيه مايريدها شلون اجيب سماعه عاليه واصيح؟

سكتت حجه رشاش... فكري زين حره لاتدمرين حياتنا بعلاقه انتي تدرين انه ماداخل بيها
هي زوجتي بس بالاسم

باوعتله بتركيز... فكرت كلش زين وكتلك لو اني لو هي

هو باوع لبكر ورجع باوع للكاع يفكر گال :-يعني لو انتي لو امانة اخوي؟

... واني هم امانه عندك من اهلي

باوع بعيوني كال... اثنينهن صعبات

كمت وگفت... خلص فهمت جوابك رجعني لاهلي هسه

كامو وياي كال بكر... ماهيج الحجي خويه ليش تظلمين اخويا بعد كلشي سواه لخاطرج

اوس... الگوامه بينو وبين ابوي وعمامي ماانحلت لسه وتردين تعوفينو؟

طيبه گالت وهي تهفي لروحها... يمه احس نار بصدري تريدين تأذين اخوي ياحماره
راح اسحلج خوش انه هذا الاسلوب الثقافي ماعندي

بجيت كتلهم... مااتحمل والله.. باوعت لرشاش وجهه احمر

هز راسه كال... ماشي اخليج تفكرين هاليومين تعاي

بكر... وين

رشاش... يم عمتي عقيله خليها ترتاح شوي لبين مانحل مشاكلنا

... اريد رتيل وديني الاخواني

جرني كال... يلا

نترت ايدي... وديني الاخواني مااروح لغير مكان خلص لا اريد افكر ولا شي قراري مااتراجع عنه لو اني لو هي

تنهد بقهر... تمام خليج بس يومين اهدئي وارتاحي وفكري زين حره لا تعذبيني دخيلج

طيبه... هاي شلون راح تخليني اسحلها دحگي لو تسمعين الكلام لو اصيح عليج ام احمد واخليها تمرعدج هينا ها شگلتي

جريت نفس اصبر نفسي بيه باوعت لرشاش يباوعلي ووجهه احمر كلش جرني وگال... يلا امشي

طيبه كالت... البس واجي وياكم

وركضت بالجهه الثانيه من الممر لزم ايدي ونزلنا صارت كبالنا المره الجبيره الشفتها بالاول كالتله

ام حازم... يا يمه وين رايحين

رشاش... اخذها لعمتي عقيله ترتاح

ام حازم... ياا يمعودين استهدو بالله ليش تشمتون بينا الوادم

رشاش... بس تهدئ الامور بيني وبين ابوي وعمامي تجي

هزت راسها كالت... الله يهدي النفوس

اجت طيبه تركض كالتلها... يمه رايحه ويا اخوي

ام حازم... خوش يما

مشينا فتح السياره كعدت ليكدام هي صعدت ليورا كالت :-من هسه تفضلها عليه

ضحك كللها... شسالفه

طيبه... والله لو انه مثل شلة الزنابير الي جوا جان كطعتها
... باوعتلي وكالت... احمدي ربج عليا

ابتسمت باوعتله كتله... مااريد اروح لعمتك اريد اهلي

جر نفس ماحاجاني باوعت لطيبه تربعت وگعدت وگالت وهي تأشر بيدها :-اسمعي يولي انه دحگت من خلال عيوني

قاطعها رشاش... واو معلومه تجنن اول مره اعرف التدحك من العين

طيبه... دخلي اكمل يمعود

رشاش... كملي

طيبه... اي فشني احسج تأذين اخويا بكلامج
فاقترح عليج الزمي حدج ويا اخوي ولاتضوجينو
ترا خلگي ضيگ بالقران انه ما مسالمه واليكرب صوب اخوتي افشگو نصين

رشاش... حبيبي نقيب كسار فدوا اروحلك

هي ابتسمت بخجل ونزلت راسها رجعت رفعت راسها
كالتلي وهي تأشر بإيدها... انتبهي مني تراني واگفه لاخوتي دركه وسيف

باوعلي گال... خاف عبالج انه وحيد وتستقوين عليا
لااا عندي اخت تكسر الظهر من صدگ مره

ضحكت تذكرت زعلي درت وجهي كتله... هاي الضحكه لاختك مو الك

ابتسم وكمل يسوق وصلنا كدام بيت مو كلش جبير بس حلو
نزلت راح هو دك الباب
طيبه باوعت من الجهتين كالت :-ماكو احد وخر خلي ادفر الباب

رشاش... يولي زحمه من ولدها

طيبه... ياخويا غير بكد جهالي... ودفرت الباب وطبت

تفاجئت ع الميانه الي بينهم طبيت طب وراي وهو يكول لطيبه... ماخذه اطباع اوس

گالت وهي تمشي وتتمختر... ولو اخوي القدوه هذا

طلعت مرا جبيره بالعمر كالت وهي تباوعلي ومتفاجئه... هلا بنور عيوني هلا.. وتباوعلي باستغراب

حضنت عائشه وبوستها تقرب منها رشاش باسها من راسها شفتها اشرتله بعيونها
ابتسم جرني وحط ايده ع ظهري كاللها :-هاي حرمتي ام التوت

ابتسمت تقربت عليه كالت... اللهم صلي ع النبي.. بوستني كالت... تفضلو تفضلو

طبت طيبه اكو طفل بعمر التسع سنين نايم ع القنفه كالتله :- اكعد يولو اجت بنت خالك رحبو بيا

ضل نايم شالت الغطا كالتله :-امداك اي والله... وهزت ايدها وكعدت ع القنفه

رحت للجهه الثانيه كعدت يمها باوعت لرشاش ماطب العمه ضلت تحجي برا ويا
همست... طيبه اشو احس الكل ماطايقني

طيبه... دنجبي هو اهم شي رجلج وذاك يحجي وعينو عليج

حره... واضح يحترمج و يحبج

طيبه... طبعا ليش انه انكره

ابتسمت كتلها... عفيه اقنعيه

باوعتلي بجديه كتلها... بلكي يرجعني لاهلي

هزت ايدها كالت... بالله انتي ما تفتهمين

داجاوبها طب هو وعمته كالت :- ياهلا وچثير الهلا
والله اليوم اسويلكم احلى غده خلي مرت رشاش تعرف شون طبخي يخبل

ابتسمت الها كالت وهي تأشر :-خاف تردين تبدلين ترتاحين اخذي راحتج يولي البيت بيتج واي شي تردينو من هالعين... واشرت على عينها

حره... تسلم عيونج يعمري

تقدم رشاش يم الطفل كله... الله بالخير ابو شهاب

فتح عيونه الطفل وحضنه كله :-اشتاقيتلك وحك امي

ضحك رشاش كعد يمه كله... سمعت مازين بدراستك

... جاي احاول ادورلي على شغل

رشاش... ليش مقصر وياكم انه لو اخواني؟

... لا بس هم لازم اساعد بيبيتي خوما اكعد بالبيت

حره... ابتسمتله بقهر تذكرت اخوي مقدام شلون جان يحير بينا ولليوم هو حاير
اختنكت واني اباوعله واتذكر
حسيت شكد مشتاقه لاخوتي

باوعلي الطفل ابتسم وفتح عينه متفاجئ باوع لرشاش

رشاش گله... مرتي

ضحك كلي... شلونج.. وكام... اعذريني مادحكتج

واجه كعد بصفي كال... بس حيل حلوين ويا بعض انتو 

طيبه... اي بالله بس غير شلعت كلبو لاخوي 

ضحك رشاش كاللهم الطفل... خوب عمي غفار لهين.. واشر على كصته كال... لهين واصله عينو ومضغوط

ابتسمت كتله... من شنو؟

رائد... لان خذاج ابو السباع

حره... ليش هو  ميقبل؟

صاح  ... حقير من يوم يومو

رشاش... لا بابا عيب هالحجي عوفك من هالسوالف وحدر هين

گام رائد راح يمه كله... اكعد
گعد وضل يحجي وياه ع الدراسه كمت كتلهم
... اريد اغسل

اشر لـ طيبه كامت وياي طلعنا برا اغسل واگوللها... عفيه اقنعيه يوديني لاخواني

طيبه... انجبي افهمي وعرفي شلون تتصرفين

نشفت وجهي دارجع ادخل انفتحت الباب وسمعت صوت رجال صاح

... ام نبأ

درت وجهي عليه شفته واحد لابس دشداشه وعگال ومبين معصب طب وسد الباب باوعت لـ طيبه مبين وكانها ضايجه 

طيبه... هلا عمي

اشرلها بايده هلا ووگف گبالي طلع رشاش ابتسمله گله... هلا بعمي... طلعت وراه عمته

غفار... انت صدك تحجي؟
.. باوعلي كال... جايب حرمه ماندري منين وجايبها بنصنا لاحس ولا خبر هو هاذ حجي؟

عقيله... طبن جوا

طبت طيبه وجرتني واسمع رشاش يكوله :- حياتي وانه حر اسوي الي يعجبني

طبت للغرفه وقفلت الباب كتلها :-هذا منو؟

طيبه... المصخم غفار

حره... ليش هيج تكرهو

طيبه... لانو حقير... ورفعت راسها بالسما وكالت.. عسى الله ياخذ حگنا منو

حره... ليش رافض زواجي من اخوج؟

طيبه... يحب يمشي كلمتو وعلى اساس هو الكل بالكل اختو هم هيج مثلو
اي فمن اخوي رجع المشيه خرب عمامي على اهلج

حره... يامشيه طيبه؟

كعدت يمي گالت... اخويا خابر عمامي واولاد عمي حتى يجونكم ويخطبوج كدام العلن ويصالحوه ويا اخوج
ومن طلعو ومشت سياراتهم اخوي خابرهم كاللهم ردو

اني فتحت عينوني متفاجئه باوعتلي كالت... انه اعرف انتي انهزمتي بيومها بس عمامي مايدرون رشاش اخوي كاللهم عندي شغل ومااكدر اليوم فـ ارجعو
فـ عمي غفار هذا النذل ضل يحجي عليكم گدام عمامي وكال ماعندهم اصول وواضح اهل الحرمه هم الي ردو مشيتنا وماحشمونا
وبلغو رشاش مانريدهم والا ليش حتى يردنا رشاش  ونحن جايين ومكلفين نفسنا
ولهالسبب لا ابوي ولا عمامي قابلين بيج

نزلت راسي بالكاع كلتلها... بس هو ماكال حااجيب مشيه!

طيبه... كال لخواتج ولاخوج من طلع من السجن

حره... هاي شوكت وانتي شمدريج

جرت نفس... انه بير اسرار لاخوتي

حسيت اني غلطت من نهزمت تندمت بس بعديش؟
بعد ميفيد الندم
اسمع اصواتهم يتعاركون وعمه يكوله:-

غفار... ما عرف يربيك ابوك من يومك تتصرف من راسك

جاوبه رشاش... عمي حير بتربية ابنك وعوف اخوانك بالله الكريم جزعتنا تحب اذكركم بتاريخكم الاسود

وذاك يصيح  باوعتلي كالت... امداج دحگي شلون تعارك ويا الكل علمودج وانتي تردين تعوفينو... وتقلد عليا بحلكها

نزلت راسي دااحجي كالت... يولو حرام عليج بالقران اخويا انشلع كلبو من يومو مظلوم لاتصيرين انتي والدنيا عليه
ترا بالله ماتلكين واحد مثلو يحبج ويحترمج ولو لفيتي الدنيا
مااكلج هيج لانو اخوي لا بس انه حافظتو وشاهده على كل عذابو

حره... طيبه هو متزوج اني مااتحمل هالشي ولا اگدر اتقبله
ولا اگدر اظلم نفسي ولا اظلم زوجته

طيبه... اخ يابه طلعتي شيب براسي يولي حرام عليج لا تظلمينو اخويا شذنبو
ترا ماتدرين بكلشي انتي ابويا شلع كلبو وصار ضغط عليه واضطر انو يعقد عليها

وتشرط عليها رادها بس تكول لعمامي مااريدو وهي رادتو
فلفلت على فلوسو بعد شبيدو عليها؟
رجال يحبج وحارب اهلو كلهم علمودج شلون تعوفينو وتشمتين بيه اليسوا والمايسوا!

حره... شلون اذا بيوم فكر يروحلها اني شيصير بيا؟
اتخبل والله!

طيبه... يروحلها شني هو غير عاشگج ومايدحگ لغيرج
ولو نفترض ما عاشگج تراه رافضها لانو يعتبرها مثل اختو
قبل لايعرفج بسنين متزوجها وهو بغرفه وهي بغرفه
وكايللها مليون مره اتزوج وهي قابله ليغرنج دموعها هي تحب تسوي درامه عجل اكو وحده عدها كرامه تقبل؟

هزيت راسي بلا كتلها... خايفه اظلمها وانظلم

طيبه... ماتنظلمين اخوي حابج وبعدين تظلميها شني غير هاي مسمومه اوف سوت شلعت كلبها  للمرحومه

التفتت الها كلتلها... يامرحومه؟

جرت نفس بحزن... اختي

حره... عندج اخت متوفيه؟

هزت راسها كالت... نحن ولد امي وابوي مخيم علينا الموت

التفتت الها كلتلها... انتي اخت رشاش من امه وابو؟

طيبه... اي

حره... مو ع اساس امه ميته؟

طيبه... اي صح

حره... والمره الناديتيها بيمه؟

طيبه... هاي مرت ابوي

حره... حبابه؟

طيبه... للامانه مابيوم كصرت وياي لو حسستني انه ما بنتها
تعاملني حالي حال هند

حره... هند منو؟

طيبه... بنتها

حره... اي؟

طيبه... صح مرات ع تقسيم الشغل تضوج وتصيح بس عادي حتى الامهات هيج

حره... الحمد لله

ابتسمت... لاتخافين منها عندها خوف من الله

هزيت راسي كتلها... ماشفت هند

طيبه... ليش هاي الفاككتج من الحيه ام احمد

حره... اها

طيبه... اي

حره... وحبابه؟

طيبه... اذا حبتج فتصير وياج مثل الورد

حره... هم زين

حطت ايدها ع ايدي كالت... لتخافين انه وياج

حره... طيبه انتي من شوكت تدرين بموضوعي؟

طيبه... من زمان صار اشهر كلي اخوي شفت خوش مره ما منافقه تناسبني

ابتسمت كتلها... واخوانج

طيبه... اخواني كبل فتره بلغهم وهم حجو ويا اخوج

حره...صح كالتلي رتيل

انفتحت الباب طب رشاش وعمته كالت طيبه... راح هذا؟

گللها ... اي... وباوعلي

عمته كالت... يلا كومن اكلن.. واشرتلي

كمت كعدت يم رشاش ونقلن هن السفره واني متوتره كلش
تغدينا وعمته كلش مرحه حتى ماتقيدت ولا خجلت منها
وطيبه هم تتصرف كأنما تعرفني من سنين
وحتى لما تحجي وياي متتقيد

لاحظت رشاش كلش ضاج من بعد مااجه عمه ومااكل شي واول ماخلص غدا طلع حتى قبل لا يشرب جاي

حطيت راسي ع المخده وافكر شأسوي خايفه ومحتاره  اخاف امشي بطريق غلط
من جهه اشوفه هو الصح ومابيده شي ومن جهه ثانيه استحقره لان ماكالي هو متزوج

طيبه ضلت تحجي وياي وتقنعني مااعوفه واشمت بيه احد
خفت اخطي خطوه غلط او ارجع لاهلي وهو محارب اهله كلهم وعمامه على مودي  حسيتها انانيه وكلت

... يارب عليك انت حلها اني خايفه بيا طريق امشي انطيني اشاره

ضليت افكر الى ان غفيت فزيت من نومي على صوته حسيت نفسي كلش مشتاقتله وشعور غريب بداخلي كعدت باوعت الغرفه ظلمه وبس اني بيها
كلما اتذكر ان هو متزوج تخنكني العبره
حطيت ايدي على راسي وبجيت وكلت.. يارب شاسوي

حسيت صوته اقترب من الباب مسحت دموعي ورجعت نمت طب على كيفه وسد الباب واجه كعد يمي حسيت عليه وهو يمسح شعري ويتلمس رموشي
حسيت بنبضات گلبي بدت تضطرب
باسني من عيوني وحط راسي على ايده سمعته وهو يگول

... ليش تسوين نفسج نايمه

فتحت عيني باوعتله صارت عيني بعينه گتله... مااريد اشوفك

گال... لهالدرجه كارهتني

كعدت كعد كبالي حسيت بقهر كتله :-جبت طريقك وياي كله جذب بجذب

كال... كلشي جان ضدي الوكت وهلي وانتِ

بجيت كتله... هذا مو مبرر

لزم ايديا كال... جاي تدحكين انه شكد اعاني بس حتى احافظ عليج... جر نفس وكال... هالمره انت سنديني

گتله... مااكدر اكون زوجه ثانيه

كال... انت الاولى بعيني وبگلبي وام احمد هي مرت اخوي ماعتبرها زوجه ويجي يوم واطلگها
بس تصيرلي الفرصه

مسحلي دموعي باوع بعيني كال :-انطيني فرصه بس هالمره انسيج كل العشتيه وعد

نزلت عيوني افكر كتله... خايفه

كال... انه يمج سندج وبظهرج لو بيوم دحكتج راح تتأذين انه ابعدج عني

باوعت بعيونه كال... بس هالفرصه

هزيت راسي كتله... هاي اخر فرصه

جر نفس كتله... بس اتاكد لو عرفت انت مجذب عليه بشي بعد ماراح اسامحك
هز راسه باي كتله... ولو حاولت تتقرب منها خطوه وحده بعد ماتلمح حتى ضلي

باوع بعيوني كتله... اني لو اريد اعوفك بعد ماتلكاني لو تحفر بسابع ارض وتدور عني

باسني براسي وكال... اعوضج عن الي عشتيه.. هزيت راسي كال... لازم نرجع للبيت

كتله... اهلك يخوفون

كال... لاتخافين انه يمج وخواتي واخواني دحكتيهم شلون يحبوج

هزيت راسي باي كال... عجل يلا كومي

كتله... خلي نبقى هنا

كال... مااخذ راحتي

كمت كتله... صالحت ابوك

كال... ان شاء الله تنحل

طلعت غسلت وبدلت ورجعنا لبيتهم اول ماطبينا طيبه دورت على ابوها باوعت  لاختها وكالت

... عجل ابويا وامي وين؟

هند... راحو لبيت عمي

تقربت عليها كالتلها بهدوء... وام احمد بشري ماطفشت؟

هند... لو صمغ ع الجلد جان انشلع بس هاي... باوعت لفوك وكالت... احساس ماكو

رحت وكفت يمهن كالت... انه هند المصايب الجبتيها وياج مالحكت تعرفني بيج

رشاش خزرها و كاللها... هندد.. واشرلي اروح للغرفه

رحت لغرفته طب وراي كال :-تحملي اليوم من باجر اشدلي غرفه جديده

هزيت راسي كتله... رشاش اريد اسبح

كال... اسبحج

حره... عيب عليك

ضحك كال... ترا حرمتي

كمت كتله... تموت ع السوالف المكسره اني قصدي وين الحمام

جرني كال... دحكي ذاك
واشرلي عليه

طلعت ام احمد من غرفتها خزرتني ومشت من الممر باوعلي كال... البسيها

درت وجهي واخذت تراك حتى البسه انطاني منشفه ورحت للحمام دااطب طلعت من الحمام ام احمد صارت كدامي كالت

... لتفرحين هواي اطلعج منا سحل... ومشت

هزيت ايدي وطبيت للحمام فتحت الدوش ووكفت تحته
شفت الشامبو كدامي اخذته وحطيته ع شعري وغمضت عيني
جريت نفس اصبر نفسي بيه

فتحت عيني باوعت انصدمت واني اشوف الارض حمرا
وجسمي احمر

بسرعه تذكرت لما شفت حياة مقتوله لا اراديا وقبل لا استوعب صرخت... يتبع...

_____________________

شلونكم حبيباتي

بنات اكثركم دايگوللي رابط  القناه ميفتح
حاولت البارحه اخليه بالوصف ماكو ميصير
نشرته ع المنصه هم مينشر كلت الاختي تنشره هم مصار

ومااعرف ليش حيرني
باعو انتو روحو للبحث ع التليگرام واكتبو
👇🏻

اسم القناة...   يـ سࢪ ليـلي "

داانزللكم سكرين للقناة بس النت ضعيف ومدايحمل

وهسه ارائكم وتوقعاتكم للمستقبل

ولتنسون التصويت والمتابعه

حسابي الفيس بوك
Nawras_qasim

يوزر الانستا
nawras_qasim_22

تصبحون ع الف خير فراشاتي ♕

#احبكم♡