رواية هل كان حلماً ...؟ (الِعراق_المُصغَر) الفصل الثاني عشر 12 - بقلم Nawras_Qasimᥫ᭡

     الحلــــــــقه الثانــــــيه

          رواية...  هل كانَ حُلماً...؟
     
   {العِراق-المُصغَر...الطين-والكوكب}

بقلمي ... لؤلؤة_البِحار ... 
___________________•

حره :- شفته واكف يم المغسله وديتوضى كمل وضوءه اتصل موبايله
وهو عالشباك فتح خط وفتح سبيكر لان ايده بيها مي

اجانا صوت رانيا تصرخ بصوت رج البيت رج
وتگول بصوت مخنوگ
ومجروح
...  مقدااااااام اختييي حرگت رووووحهااا
اختيييي ماااااتتتت

رانيا تصرخ واني احس الهوه بعد ميدخل الصدري احس بدگات گلبي بدت تخفق والنبض يقل عندي

وعيت ع صوت اخوي وهو يصيح مفجوع

مقدام...  لتبجين لتبجين بس فهميني شكو حوراء شبيها بيا مستشفى انتو ياالله دخيلك يااااااااالله

حره...رتيل اجت تركض على صايحه وگفت يمي وهي تصيح وتبجي
طلعت امي ومروه تركض وراها يشوفن شكو

عيوني على مقدام اباوع عليه مثل الطير المذبوح يتصرف بطريقه هستيريه تالي خلى وطلع

طلع بالكيمونه وشعره مخربط وممشط وعيونه دم وطلع يركض الي يشوفه يبجي ع حاله

اميره... شكو شصاير..؟

حره...بهاليوم وبهاللحظات الي مرت عليه من ابشع الايام بحياتي
حاطه اديه الاثنين على گلبي واسحب نفس بصعوبه
وصدى صريخ رانيا يرن بإذني وهالشي يخنگني اكثر

التفتت عيوني لرتيل گعدت وكامت تلطم تصرخ وتبجي

... دخيييلك ربي ارحمنااااا

حره... باوعت لسالي گعدت بالزاويه وكامت تبجي وتشاهك ومروه من شافت رتيل تبجي گابلتها وگامت تبجي وياها
طفله شمفهمها بالدانعيشه تبجي على بجينا من دون متعرف ليش نبجي...

امي تفتر علينا وتسأل... شكو ولجن منو احترگت ولجن فهمني...

وولا وحده منا جاوبتها گاعدات وبس صوت بجينا الطالع
تتصل على مقدام ماكو ميجاوبها راحت وگفت يم رتيل وحجت بعصبيه..

اميره...ولج شكو فهميني شبيكم..

رتيل...كله منكم الله يلعنكم لو ما انتو ماجان شفنا هاليوم
انتو الشتتونا وماخليتونا
نعيش مثل خلق الله. ... تحجي وتبجي

اميره... دفهميني شصاير شبيجن

سالي...  يمه احنا فقراء كلشي منگدر نسوي مانگدر نحب ناس اغنى منا خطيه اخوي مقدام
حيل خطيه...حجتها بدموع وقهر

اميره... واني شبيدي يايمه من البدايه گتلج مقدام ديمشي بطريق غلط من حب هالبنيه بعدين انتي مو گلتيلي انخطبت البنيه
وصارت على ذمة واحد ثاني بعد  شكو...؟

رتيل... لو باقيه ببيتج يوم بدون طلعه لو گاعده ويانا لساعه وحده جان فهمتي احنا شدا يصير بينا
وشنو الدا نعيشه

جان عرفتي ابنج مانسى حوراء
جان عرفتي ضل يدزلها شيوخ
الى ان مل

جان عرفتي يعيروه لان
لا عنده فلوس
ولا عنده صيت 
ولا عنده اهل يفتخر بيهم

... سكتت ماما صارت سكته شويه بس صوت البجي مسموع

اميره... واني شبيدي يا ماما هو من المسؤول عن فقرنا وسمعتنا السيئه غير اپوجن
من المفروض يشتغل ويجيبلنا اكل غير اپوجن
ليش تلومني على كلشي
اني هم ما شفت شي زين وياه

رتيل... لتمثلين دور الضحيه كافي
انتي مثلج مثله اثنينكم مجرمين متخافون الله

گلتيلي موزين وياج وما شفتي منه الخير ..؟
لعد لييييش خلفتييي هااا احجييي

امي سكتت وضلت صافنه علينا

رتيل... ماا عندج جواب لان انتي هم غلط لو ما جايبتنا احسن
ليش احنا ششفنا من عمرنا هااا

اشو اني تركت طفولتي وضليت اهتم بخواتي المالهن احد
وانظف الخيسه الي بهالبيت
ولو صايره انانيه وتاركتهن
جان كتلهن الجووع مثلي

ومقدام راح يشتغل بوكت الي بعمره يلعبون دعبل وطوبه بالشارع ووكت العطل يرحون للمنتزهات

وحره بهالعمر دتخبز وتسوي كبه
وانذلت للعالم حتى تساعدنا بالمصرف

وهاي سالي گدامج بسبب مشاكلكم اذا انكسر گلاص تخرس وتختل مرعوبه

انتوووو خبلتووووونا
ياااريتنااا مانولدناااا

كملت بصوت مفجوع يمرد الگلب وهي تبجي ... انتي لو صايره مثل خواتج جان عشنا احلى عيشه
انتي هم مثل ابويا هم ماطايقتنا

اميره... بس رغم كل هذا اني ماتركتكم
ماشمرتكم ورحت عشت حياتي مثل ابوكم

رتيل... ريتج رحتي ريتج رحتي وخلصتينا حسبي الله عليكم حسبي الله

حره...  ماما ماحجت سكتت باوعت لمروه وگلتلها

... كافي ماما لتبجين ماكو شي گومي

حره...  رتيل من تحجي تقسى من گد مامكتوم قهر وحزن داخلها يطلع بقسوه ويه الكلام

ضلينا لل12 على هالحال ضلت رتيل تتصل بيه واخويه ماكو لاجاوب ولا رجع

بهالليله مانمنا ابد ولا غفتلنا عين بعمري كله مراح انساها
شلون مرت علينا او شلون مرت على اخويه هالليله ماادري

لثاني يوم وهو ماكو ماله اي خبر مخلينا شخص ماتصلنا عليه
وماكو لا عمران ولا هوه ولا رانيا يجاوبون

تدمرت نفسيتنا والدمرني اكثر رتيل نزل ضغطها مددت بالاستقبال وتون من وجع راسها

امي طلعت من غرفتها عاطت... اشو نصبتنها مناحه خبلتنها لمروه كااافي

مجاوبناها راحت طبت للغرفه بدلت لمروه طلعت باوعت لسالي وگالت..

... گومي بدلي خنطلع نغير جو..

سالي نترت بيها ... احنا بيا حال هسه اخويه مندري وينه ووين اراضيه وانتي حايره بالطلعه

اميره...  بكيفجن ضلن نوحن هنا ع الاساس راح يتغير شي من الي صار
لو البجي يغير جان تغيرت حياتي
وعشت احلى عيشه

... اخذت مروه وطلعت  وراها بشويه اندگت الباب گمت رحت فتحتها باوعت حياة وسمرا

حياة... شكو ولج شبيه وجهج...  گالتها بصدمه وهي تباوعلي بخوف

حره... ماتحملت بعد اكتم بداخلي اكثر حضنتها وكمت ابجي.. وهي من شافتني بجيت تخبلت

... ولج حره شكو شبيج لا تخبليني

.. طلعت وراي سالي هم تبجي راحت عليها سمرا گلتلها

... شبيج حبيبتي فهمونا شصاير ليش تبجن والله گلبي وگف

سالي...  حوراء الي يريدها اخوي احترگت... گالتها بدموع وغصه

حياة...  حسبي الله ونعم الوكيل ومقدام وينه هسه شصاير بيه...  حجتها بخوف واضح بعيونها

سالي ... ماكو ماكو اخوي مندري وينه...  گالتها وهي تبجي بهستيريه 

حره...  طبت حياة للاستقبال گعدت يمنا ساعه تهدي بينا وساعه تبجي ويانا وسمرا تباوعلنا وتبجي على بجينا

للعصر ومقدام ماكو رتيل تخبلت گامت و گالت... مستحيل ابقى هيج جيبن حجابي خلي اروح ادور عليه وين صار خاف بيه شي
يمه اخوي راح يروح مني... گالتها بخوف ودموعها تنزل

حره...  رتيل اجي وياج وندور عليه

رتيل... لا ابقي هنا... گالتها وهي تطب للغرفه تبدل

حره...  لا اجي وياج بعد مااتحمل...  رحت هم طبيت للغرفه وطلعت ملابس دبدل اندگت الباب

ركضت سالي وحياة وياها

حياة... ياالله بلكي يطلع مقدام

حره... فتحت الباب سالي واسمع عمران يگوللها

عمران... هاي شصاير بيج

سالي...  عمران اخويه وين

عمران... لتخافين مابيه شي

حره...  طلعنا اني ورتيل واستلمناها اسئله

رتيل...  عمران فدوه الگلبج مقدام وين

حره...  من البارحه لليوم وهو مختفي عفيه وينه شفته هم تندل مكانه

عمران... اهدو اهدو لتخافون هو مابيه شي مجرد ضغطه ارتفع

حره...  باوعت لرتيل داخت لزمت راسها واجت توكع بس سندنها حياة وسمرا

حياة... ووينه هسه بس گوللنا... كالتها بقلق وخوف

عمران...  بالمستشفى...

... رتيل شهگت وكالت بصوت واهن... عمران وشلون تعوفه وحده

عمران...لا مو وحده جماعتنا عفتهم يمه

حره...  عليك العباس اخذنا نشوفه

عمران... يلا ماشي تعالن اصعدن

حره... التكسي مالته يم الباب رحنا صعدنا وحتى حياة وسمرا اجن ويانا ماادري شلون دبرناها بالتكسي كعدنا وحده بحضن الثانيه ورتيل گعدت بالصدر  واستلمت عمران دگ اسئله

رتيل... شصار البارحه وشلون لگيت مقدام

عمران... والله ماادري شگلج بس اني جنت جايكم داجيبلكم اكل مسوين ثواب على روح الوالد

ومن طبيت بـالفرع الرئيسي شفت مقدام يركض ما اتذكر وين شمرت الاكل ولا مستوعب ذيج اللحظه

لان عبالي بيه شي مضروب او احد يلحگه ركضتله واني اصيح

عمران...  شبيك مقدام فهمني

مقدام... راح كلشي من ايدي راح اخذني للمستشفى عمران مااگدر اوكف..

عمران...  رگضت بسرعه جبت السياره واجيته اخذته اباوعله جسمه يرجف
رحنا للمستشفى واني مافاهم شي

طبينا للمستشفى وهو ركض للردهه البيها المرحومه ضل مقدام يسأل عن حوراء بس گالولنا

... البنيه توفت ضلت بس نص ساعه تعالج وماتت

اني بسرعه لزمت مقدام لانه داخ اجه يوكع وجسمه يرجف اخذته من دانطلع سمعنا صريخ
رانيا وامها واكو بعد نسوان وياهن بس ما اعرفهن

ركض عليهم مقدام اني كلشي ماسمعت بس صريخ رانيا الهز المستشفى هز
ملخت روحها
حتى اكثر من امها

ورى شويه اجو زلم هذا المطي (ابو حوراء)  نازع عگالها ويمسح بدموعه  مقدام شافهم هد عليهم وكام يصيح

مقدام...  كله منك حسبي الله عليك ليش مانطيتنياها ليييييش

عمران...  انريد نفكه ماگدرنا ومقدام يصارخ ويدفع بيه ويريد يوصله واحنا گوه لازميه

واحد منهم جلب ابن الجلب راح صاح الامن طلعو مقدام بره

وهذا الجلب المطي يهد ويتحلف الا يشتكي على مقدام
وفعلا راد يشتكي وديروح بس الوقفه صريخ رانيا وكلامها

رانيا... والقرءان احرگكم ورا اختي واحرگ رووووحي
والقرءان اطلع دفتركم الاسود كله

عمران... تحجي مفرفحه وتصيح والنسوان يسدن بحلگها وماكو هي تصرخ الى ان اغمى عليها...

حره...  سكت مخنوگ ودموعه نزلت واحنا كل الي بالسياره دموعنا تدير ونبجي تنهد بحزن كمل كلامه

عمران... ذاك الجلب سكت حتى من رحنا للجنازه ماحجه شي بس مقدام ااااخ
الله يساعده كل شويه يگلي

مقدام...  اكتله يعني اكتله

عمران...  اباوعله فقد وجسمه يرجف خفت عليه دارجعه طگ خشمه دم وداخ حيل

اخذته گبل للمستشفى طلع ضغطه صاعد خفت عليه لاينجلط
خابرت الشباب اجو يمه
وگلت اجيب رتيل وخواته بلكي شويه يتحسن

رتيل...  عمران وگف گلبي ليش متجاوبون...  حجتها بحزن ودموعها تنزل

عمران... والله انشدهت ما ادري بنفسي حرت والله حرت

حره...  وصلنا للمستشفى نزلنا من السياره وطبينا للمستشفى نركض وصلنا يم اخويه
الردهه للرجال بس

رتيل...  التستحي لاتطب اني اريد اشوف اخوي
ولحد تبجي گدامه اسكتن

حره... هزينا براسنا طبت واحنا وراها باوعت الاخوي
ساكت وعيونه حمر وشفايفه بيض باوعلنا وهو ساكت

حضنته رتيل هي وصتنه مانبجي بس هي ماتحملت اول ماحضنته بجت
گللها بصوت واهن

مقدام... رتيل اخذي خواتي واطلعي من الردهه اني مابيه شي هسه راح اطلع

حره...  رتيل هزت راسها گامت طلعتنا وطلعت ورانا
كلنا طلعنا ننتظره بره وهو طلع ورانا
كعد عالكرسي وعمران واكف يمه واحنا حاضنيه
ودموعنا تنزل وهو ساكت ابتعدت من حضنه
اباوع لعيونه حمر حيل وجهه اصفر التعب والحزن واضحات بملامح وجهه

شويه ورن موبايل سمرا باوعتلها فتحت خط وسبيكر لان المستشفى هوسه ومتسمع

رشم...  انتو وين اجيت لبيت حياة عليج ومالكيتجن..؟

سدت السبيكر وجاوبته...  بالمستشفى

... لا مابيه شي بس مقدام مريض واجينا نشوفه

حره... هو يمكن ضل يصيح عليه لان سكتت ضايجه وملامح وجهه بين عليها انقهرت

سمرا... بسيطه رشم من تجي اعرف شسوي بيك
احنا بمستشفى ال..*****

سدت الموبايل وهي ضايجه وتدردم
شويه وكملنا كلشي وطلعنا بعدنا بباب المستشفى
وگفت سيارة رشم نزل منها سلم علينا وتحمد المقدام بالسلامه ومقدام من التعب گوه جاوب

سمرا...  خننقسم  السياره زغيره تعالن سالي وحره ويانه بسيارة رشم والبقيه بسيارة عمران

حره... لا حاروح ويه عمران يم اخوي

سالي... واني هم ويه عمران

حياة...  تمام اني وسمرا راح نروح ويه رشم وانتن ويه عمران

حره... صعدن سمرا وحياة ويه رشم
واني ورتيل وسالي ومقدام صعدنه ويه عمران

شويه وصلنا للبيت نزلنا من السياره فتحنا الباب وطبينا للبيت
باوعت امي موجوده بالبيت تلكت مقدام باسته

بس هو ساكت وبلا اي ردود فعل حسيته بعالم ثاني مو ويانا
طب للاستقبال گعد واحنا گعدنا يمه

رتيل تسأل بيه وهو ميجاوب حتى امي حجت وياه

اميره... الله راح ينتقم منهم كلهم حيندمون لتسوي بنفسك هيج يا ابني خلي عندك امل  بربك

مقدام...  ان شاءالله...  گالها وهو صافن

حره... رتيل گامت تسوي اكل وسالي كابلت مقدام وكعدت تلعب بشعره وتحضنه وتبوس بيه وهي تبجي ودموعها تنزل

باوعلي ورجع باوع لسالي سحب نفس قوي باسها من راسها وگال

مقدام... لا تبجين الله يسمع ويشوف ومنتظر رحمته

حره... جابت رتيل الاكل حطت الصينيه گدامه

مقدام... ما اشتهي اكلن انتن

حره... ترا كلنا من البارحه مماكلين وجوعانين حيل

مقدام... ليش ما ماكلات كلجن عدجن فقر دم
يلا اكلن بسم الله

حره...  مد ايده وع الاساس دياكل بس جذب ضل ينقش بالاكل تنقش ومااكل..

ضلينا اني ورتيل وحده تباوع للثانيه هم مااكلنا مالنا نفس شلت الصينيه وغسلت الماعين سويت جاي ووديته الهم يشربوه

جريت المخده مددت شويه احس جسمي يرجف والهبطه مال البارحه لسه بيا
لليل اجت حياة

حره...  ليش مااجيتي لهنا انتي وسمرا عبالي حتجن

حياة...  مااجيت لبيتكم  گلت خلي مقدام ياخذ راحته
شلونه شلون صار

حره...  مدري شكلج بس الحمدلله على كل حال

حياة...  الحمدلله... گالتها بحزن رجعت باوعتلي...  حره اني لازم اروح بيبي مريضه وما اگدر ابقى اكثر

حره...  سلامتها شبيها ليش مريضه

حياة...  تعبانه والله صحتها بالنازل والضغط والسكر مشكلات عندها... حجتها بحزن بان على ملامحها

حره...  الله يشفيها ويعافيها الج

حياة... امين الله يسمع منج

حره...  خلت وراحت لبيتهم
من يوم الحادث مقدام ماعاد مقدام الاول
مامرت ليله مافزيت من نومي ولگيته نايم يبقى سهران الليل كله ينامله لو ساعه لو ساعتين

صح كمل حياته بشكل عادي يروح للشغل ويرجع هنا ياكل ويرجع يطلع شويه
بس اكو اختلاف وكسره بعيونه

بهايه الايام اشوفه هوايه يقرالها قرءان ودائما
يگوللنا... اقرن الها قرءان خطيه
وحتى ثواب يثوبلها

مرت ايامنا بس هالحادثه مامرت من ذاكرتنا
للحظه مانگدر ننساها
وبالذات من نشوف حالة مقدام
وتغيُره السلبي اتجاه الحياة

بهاية الفتره ضليت لا اشتغل ولا اخبز لان تعبانه نفسيا وبنفس الوقت بداية دوام
اروح للمدرسه كتأدية واجب لا اكثر حتى قرايه مالي واهس اقره
ومدري شلون انجح
بالدفرات احصل 100/50

عكس سالي تحب تدرس وشاطره حيل

گاعده وصافنه على عمري الي دايمر گدامي بنفس الروتين وبلا اي فائده
اندگت الباب گمت عدلت تراكي
ورحت فتحته
باوعت مريه جوارينا جبيره بالعمر

دائما تخيط يم رتيل ابتسمت.. هلا خاله تفضلي

... يزيد فضلج يمه... حجتها وهي مبتسمه
طبت للبيت باوعتلي وگالت..

... رتيل موجوده

.. اي خاله جوه بالاستقبال تعالي... حجيتها واني اطب للاستقبال رتيل دتخيط من شافتها كامت رحبت بيها

... هلا خاله ام حيدر تفضلي  اكعدي

... يزيد فضلج يمه اليوم ماجايبتلج خياط اجيت احاجيج بكلمه

رتيل...  تفضلي خاله خير خو ماكو شي

ام حيدر...  لا يمه ماكو شي كل خير ان شاءالله...  كالتها وهي تكعد وتعدل عباتها

شوفي يمه رتيل خل اطبلج بالموضوع گبل

رتيل... اي خاله كولي

ام حيدر...  ابني حيدر دزني عليج يريد يجي يخطبج واني والله يمه طرت للسما فرحت حيل وين الگه مثل رتوله مريه لوليدي

حره... ابتسمت التفتت عيوني لرتيل دنگت راسها بخجل
رجعت رفعته وگالت بخوف وقلق واضح

... اعذريني خاله انتي عزيزه عليه حيل ومقدره جيتج وفرحتج بس حاليا ممفكره اتزوج

ام حيدر...  شوفي يمه ماراح اسألج ليش الرفض وليش ماتوافقين لو شبيه ابني ويرفض
لاا بس اكلج فكري زين حبيبه ابني شاريج واني هم اريدج جنتي
فكري براحتج ولاتستعجلين
وان شاءالله مايصير غير المكتوب

حره...  رتيل سكت وام حيدر ترخصت وگامت رغم رتيل لحت عليها تبقى شويه بس تعذرت وگالت ديجوهم خطار

وصلتها للباب طلعت وسديت الباب وراها
ام حيدر مريه حبابه حيل وتحب رتيل ودائما تجي يم رتيل ومرات تسألها اذا محتاجه شي اولا
حالتهم الماديه زينه والولد حباب ومعروف بالمنطقه باخلاقه

رحت رجعت للاستقبال شفتها گاعده وصافنه جريت نفس وغلست ع الموضوع ماسألتها ليش رفضتي

مر هالاسبوع وام حيدر يوميه حيدر يدزها يخطب رتيل ورتيل على نفس كلامها ورفضها

اني طگت مرارتي رحت عليها... رتيل ليش داترفضين مبين الولد حابج ورايدج شفتي هذا الاسبوع كله يوميه يدز امه عليج رغم هو يوميه ديحصل نفس الرفض

سكتت شويه دنگت تنهدت بقهر رجعت باوعتلي ابتسمت... حره ما اگدر اعوفحن هيج ما اگدر الا اضمن مستقبلجن خايفه عليجن اذا وافقت تتيهن وتتطشرن

حره...  شيلي هالكلام من بالج احنا كبرنا وماعدنا زغار ومقدام فوگ راسنا اطمئني ووافقي حيدر مبين حيل حبج وهو خوش انسان والمنطقه كلها تعرف اخلاقه
لتضيعين عمرج اكثر من الي ضاع علمودنا
شوفي حياتج رتيل ارتاحي
صار لازم ترتاحين

رتيل...  راحتي بسعادتجن وتأمين مستقبل الجن وسعادت مقدام وياجن
سعادتي مو بالزواج بيجن انتن

حره...  تنهدت بحزن اعرفها قافله عالرفض ولو احجي وياها من الصبح لليل متوافق

وره يومين كاعدين بليل اجه مقدام طب سلم علينا وگعد يم رتيل

...  رتيل

رتيل...  ها حبيبي

مقدام...  قبل شويه اجه حيدر حاجاني بخصوصج يريد يتقدملج بس انتي دترفضين

هو سألني اذا اني موافق او لا يعني اذا رفضج بسببي

رتيل...  وشنو گلتله..؟

اني گتله ... اني ابد ماعندي مشكله اذا تقبل اختي افرحلكم والله بس هي بعد بكيفها

رتيل الرجال الرايدج على سنة الله ورسوله ليش متوافقين..؟

رتيل...  مقدام ما اكدر هسه

مقدام...  ليش شنو المانعج..!

رتيل...  انتَ وخواتي... 

مقدام...  اني كبرت وخواتي بهالرگبه... حط ايده على رگبته

ماما گلتلها...  رتيل وافقي دامه خوش رجال

بس رتيل هم رفضت مقدام من شاف رفضها سكت ما حجه شي

بهالفتره مقدام نومه قليل واكله قليل حتى جسمه ضعف
صار يسهر هوايه وحتى ويانه مو هوايه يگعد مثل قبل

جنا قبل من نگعد ع السفره نحجي ونسولف ونضحك
هسه لا كلشي اختلف بيه
صح يسألنا شتريدن شمحتاجات واكثر من مره صاحني يحجي عليه لان ماادرس
بس مو مثل قبل مقدام قبل ابتسامته متفارگه رغم التعب البيه
هسه الحزن ميفارگ وجهه ابد

سوينا العشا اني وسالي وانتظرناه يجي
طلعت رتيل من الحمام باوعتلنا وگالت

رتيل... صبن شمنتظرات..؟

حره... مقدام مااجه لسه

رتيل... مايجي گلي راح اتعشى يم صديقي

حره... خوش هسه اصب... رحت صبيت الاكل ووديته للهول كعدنا واكلنا
بعدها شلنا السفره وغسلنا الماعين سويت الجاي وشربنا

سالي گعدت ترسم واني ورتيل مددنه ونباوع للتلفزيون
لليل وبوقت متأخر كلش ومقدام ماكو مااجه
نامن البنات وضلينا اني ورتيل منتظراته بره بالبيت
اجه بوقت متأخر كلش گال

مقدام...  ها شو مانايمات..؟

رتيل... منتظريك خفت عليك لاتجاوب على اتصال لا تدز خبر
طبينا للاستقبال گعدنا

مقدام...  لا والله بس الولد عزموني واخذتنا السوالف

حره...  جوعان ضمينالك اكل...؟

مقدام... لا بس تعاي دسولف وياج

حره...  تقربنا عليه اني ورتيل گلي

مقدام...  اليوم رحت لمدرستجن سألت عليج انتي وسالي
سالي زينه بس انتي لا ليش

حره... والله مالي واهس ودرس وحيل اكرهه المدرسه

مقدام...  لتصيرين غبيه فكري بعقل اذا ماعندج شهادتج محد بحالج

حره... لا عادي الگى شغل

مقدام... شتشتغلين تبيعين كبه؟
لو تحصليلج عشره بالاسبوع لو ماكو لو تحرگين وجهج حرگ يم التنور
وتالي هم ماتحصلين شي؟

حره...  بس هذا واقعنا... گلتها بقهر

مقدام... وانتي تردين تبقين هيج..؟

حره... طبعا لا

مقدام... لعد شلون..؟

حره... ادورلي على شغل

مقدام... ومنو يشغلج انتي وانتي ماعندج شهاده؟

حره... اكو هواي شغل

مقدام.. لو اكو جان لگيت شغله براسها خير
اني هاي صارلي سنين لو حمال لو اشتغل عامل و شحصلت؟
زين اني من مكسور ظهري هيج
على منو؟

مو علمودجن غير اريدجن تكملن حتى مابيوم اعض  ايدي واگول قصرت بحقجن..؟
اني شبقالي بهالدنيا شباقي مني..

رتيل...  اسم الله خويه ليش هيج تحجي

مقدام... غير دحجي الصدگ يارتيل
اني اذا باقي لليوم واگف على حيلي
فوگفت علمودجن علمود مايجي
يوم تتحسرن مثلي على اللگمه

باوعلي وگال
مقدام... انتي ماتدرين شگد صعبه من واحد يعيرك بشي انته جنت تتمناه
اني هذاك الجلب من رحتله على حوراء

گلي المن انطيها الك؟
سايق تكسي والتكسي اصلا مو مالتك؟
انتي تعرفين شحسيت بذاك اليوم؟

شتردين حره تردين بيوم احد من اهل رجلج يعيرج يگولج انتي جنتي تبيعين كبه

حره... اني بجيت گلي

مقدام... ليش تبجين حره كليلي مقصر وياج بشي اني

حره... لا والله

مقدام... لعد ليش ماتدرسين؟

حره.. ما ادري احس ماكو فائده

مقدام...  لا اكو انتي بس خلصي هالسنتين بس ادخلي كليه

حره... ان شاءالله

مقدام... حره اني ادري بيج شاطره ولو تقرين تنجحين وتطلعين الاولى
بس هسه دتسختين
اريدج تشدين حيلج

حره.. صار... حجيتها واني اهز راسي

مقدام... يلا روحي نامي باجر وراج دوام.. حجاها بأبتسامه

حره... لا باجر عطله... گلتها بضحكه

مقدام... هاي شني طلعت متيه

حره... ضحكنا وضلينا نحجي شويه ونمنا

للصبح گعدنه باوعت لفراشه بعده نايم گمت غسلت وجهي ورجعت گعدته

... مقدام مقدام تروح للشغل..؟

مقدام...  لا العصر اطلع

حره... تمام عبالي تطلع
يلا اني داطلع

مقدام... وين رايحه

حره... يم حياة

مقدام... هم تخبزن..؟

حره... سكتت اباوعله

مقدام... حره عوفي الخبز والكبه

حره.. ليش

مقدام.. عوفيهن واهتمي بدراستج

حره...  لا عادي من اكمل اجي ادرس

مقدام... لا لا تعبين نفسج اكثر اني ادبرها ما اريدج تبيعين كبه

حره... ليش؟  تستنكف؟

مقدام... شهالحجي حره الشغل مهما جان موعيب المهم مامدينا ايدنا للناس بس؟

حره... بس شنو؟

مقدام... بس  العالم ماتفكر مثلنا حره..

حره... مو مهم تفكير العالم المهم تفكيرنا بنفسنا

مقدام... لا اني هم ما اريدج تتعبين

حره... ما اتعب والله عادي واصلا
بكل الاحوال حياة تخبز
وبكل الاحوال اروح يمها واساعدها

مقدام... لو هيج الصداقه لو متنراد... حجاها بضحكه

حره.. لعد شعبالك.. حجيتها واني مبتسمه

مقدام...  يلا روحي يمها وامانه اذا تحسين بتعب اتركي كلشي

حره... ماشي... تركته وطلعت رحت لحياة
صباح الخير

حياة... صباح النور بشري مقدام شلون صار

حره...  وضعه مو مثل قبل والبارحه هم حاجاني عالدراسه ووو سولفتلها الگاله مقدام

حياة... وهو الصح وانتي لو تفكرين عدل بكلامه مضبوط

حره... لعظ ليش مكملتي انتي

حياة... اني اختلف اني مالي غير بيبي وهي مره جبيره بالعمر 
بس انتي اخوانج سانديج
ودايحاولون يوصلوج
اني من اروح للمدرسه ابقى افكر ببيبي
انتي لا متفكرين باي شي لان عندج ثقه برتيل

حره...  بس حمل المسؤوليه صعب ما اريد ازيد عليهم

حياة... انتي داتزيدين عليهم من ترسبين وهم يشتغلون ويتعبون ويتأملون بيج

اذا كملتي انتي وسالي وتوضفتن راح تشيلن اخوانجن
وهاي راح تكون ثمرة التعب

حره...  ان شاءالله راح اقره اليوم

حياة... عفيه شدي حيلج

حره... ومثل كل يوم خبزنا وودينا الخبز
ورجعت للبيت يوم عادي رتيل تخيط واحنا وسالي نظفنا البيت لان عندنا عطله وماما نايمه

كملت الشغل ورحت اخذت الملابس حطيتهن بالغساله وشغلتها
طلعت للطارمه رشيت مي عالحديقه اجت سالي

سالي...حره خنروح يم حياة ضايجه

حره... يلا ماشي
راحت سالي كالت لرتيل

... احنا رايحين يم حياة

رتيل... تمام بس مروه بره كل شويه شوفنها خاف تكتللها طفل

سالي... ميخالف

حره... ابتسمت مروه عمرها 6سنوات وكحه حيل وعندها ميزه تحفظ الكلام وتنقله
من نسولفلها شي ونگولها وصليه لحياة تروح توصله بالحرف الواحد

طلعتها بره تلعب ويه الجهال واني وسالي رحنا يم حياة
دنسولف اني وحياة
وسالي لازمه سمرا وتسولفلها على بطولاتها بالمدرسه

سالي... هاي مره بالمدرسه وگع القلم السلابي مالتي بالگاع دااشيله دنگت بنيه وياي تريد تاخذه

گلتلها... هذا الي

صبا.. لا هذا مالتي لتجذبين

اجت صديقتي رغد هي الهدتني القلم
گلتلها...  ايااا حربايه هذا قلم سالي واني هديته الها يلا نطيهيا

سالي.. اني مانتظرتها جريت القلم منها هي صايره ورا رحلتي

شالت الكتاب وضربتني على ظهري وگالت

صبا... اياا نحسه

سالي... باوعت لرغد وندارينا عليها كفينا الردن وكفشناها من شعرها
اني لزمت راسها ولزگته بالرحله

صارت هوسه وگوه فكوها مننا اجت المدرسه صديقة رتيل
اول مطبت اني كمت ابجي
ورغد الله يسلمها الفت قصه للمعلمه

رغد... ست تحجي علينا وتگول يجيبن مكياج وموبايلات
احنا نجيب مكياج؟
ست ليش احنا مو حبابات

المدرسه... لا طبعا ورده انتن

سالي... تالي المدرسه رزلت صبا
وصبا كعدت مقهوره وبهيج اني اخذت ثاري منها

حره... ضحكنا على سوالف سالي ورغد.. عطت مفزوعه
ولجن نسيت الملابس بالغساله اروح اكملهن واجي..

حياة... هبطتيني عبالي شو شبيج يلا روحي

حره.. ضحكت وطلعت من البيت لگيت حيدر الي خطب رتيل ورفضته واكف ويه مروه
ومروه مكتفه اديها وتباوعله بتركيز من يحجي وبيدها فلوس
من شافوني هو باسها وگلي

... ها شلونج حره

حره... هلا بيك
ابتسم وراح باوعت لمروه... تعاي مروه حيدر شكلج..؟

مروه... انطاني فلوس 

حره... وبعد؟

مروه... لا وصاني اگول لرتيل مو الج..

كالتها وركضت لرتيل رحت وراها سمعتها تگول لرتيل

مروه... هذا يگول كولي لرتيل اني منتظرها شوكت ما تستعد للزواج اتشرف بيها... تحجي وتجر بالكلام جر

رتيل ابتسمت ولمعت عيونها رحت گتلها.. رتيل مبين يحبج

رتيل...  الله يكتبلنا البيه الخير هو ابن اوادم

حره... اي والله خوش رجال

مروه تشمشم بالفلوس وتگوللها... اي والله حوباب حيدر حوباب

حره... ضحكنا اني ورتيل على شكلها ورحت كملت الملابس وشريتهن
ورحت سويت الغده
ورا شويه اجت بيبي بهيه وسالي

سلمنا عليهم كتلها... لعد وين سمرا..؟

بهيه... راحت عدها امتحان باجر

حره... تمام..

بهيه... جبنا غدانا وكلنا نتغده هنا

حره... ماما تخبلت ومقبلت كلتلها... ليش جبتي احنا نسويلج التشتهي يبعد عمري صدگ جذب بلا
ماما بالملگى لسانها حلو

بهيه... لا والله ماتقصرون بس مو سويت دولمه وتذكرت قدومي يحبها اكثر من مره گالي ع الدولمه
يگولي دولمتج طيبه
والله اليوم يلا گدرت اسوي وگلت نجي يمكم شو ضوجه

اميره... هلا بيكم كل الهلا تفضلي

طبت حياة بيدها الگدر مال دولمه وراحت للمطبخ هي ورتيل اني دااطب اجه مقدام طب وگال

مقدام... ها منو هنا

حره... بيبي بهيه وحياة

مقدام خوش خلي اجيبلكم غده

اجت رتيل يمنا گلتله... لا مقدام بيبي جايبه دولمه

مقدام... الله دولمة بيبي ما تتفوت باوع لرتيل... مع هذا هم خلي اجيب غده شتردون دجاج كباب

رتيل... جيب دجاج شوي واحنا مسوين تمن ومرگ

مقدام... صار..

حره... طلع مقدام اني رحت للمطبخ ويه رتيل اثرم زلاطه شويه واجه محمل علاليك

حطهن عالكاونتر وطب سلم على بيبي وگعد يمها
وحياة اجت تصب ويانا رتيل گالت لحياة

... عادي ناكل كلنا سويه لو تستحين من مقدام؟

حياة... لا عادي اني بوقت الاكل جبار ما استحي من احد.. حجتها بضحكه

ضحكنا صبينا كلنا سفره وحده وبهاليوم مقدام تقريبا فرح
بهاليوم تأكدت مقدام يفرح بابسط الاشياء
وفرح لان بيبي سألت عليه وسوتله دولمه
وفرح اكثر باللمه

كملنا گمنا اني وسالي نغسل مواعين وحياة ترتب ويانا ورتيل تسوي جاي
كملنا ودت الجاي رتيل وكعدنا نشرب

اجت سالي شايله دفتر رسوماتها وگعدت يم بيبي تشوفها رسوماتها

حياة... هذا دفترج حلو ورسوماتج هم حلوه
اني عندي دفتر ورقه مال رسم وورقه مال كتابه اكتب بيه

سالي... اي هذا الدفتر يخببببل

حره.. شتكتبين بيه

حياة... اكتب بيه الاشياء الاضوج منها الاشعار الي احبها الامور الي تقهرني... گالتها وهي تباوع لمقدام.. مثل الي تريد تگوله عبر عن حزنك بالكتابه

باوعت لمقدام يباوعلها وصافن عليها...گلتلها

.. شو مگايلتلي عنه

حياة...  مو هوايه اكتب مره بالشهر واكثر شي اكتب بالفصحى

حره.. اذا هاي انطينياه اقراه

حياة... يجي يوم وانطيه الج

للعصر مقدام كام وگال... اترخص منكم بس عندي شغل

بهيه... اخذ راحتك ييمه

حره... ابتسم وطلع وره شويه هنا هم طلعن وراه
لوقت العشى اجه اخوي صبينا العشى وتعشينا
كملنا كعد يباوع ع التلفزيون

مقدام...  بنات عندجن دفتر ماتريدنه..؟

سالي...  اني عندي كومه..

مقدام...  خوش انطيني واحد واريد قلم هم

حره... اني اجيبلك قلم

سالي... ليش شلك بيهن

مقدام... هيج حاب اشخبط

سالي.. تمام

حره... جبناله القلم والدفتر اخذهن خلاهن يمه ورجع يباوع ع التلفزيون

رتيل... يلا گومن نامن وراجن دراسه باجر يلا

حره... كلمن راحت لمكانها تنام اني هم نمت كعدت بالليل مقدام اخةيه كاعد رجعت نمت
گعدت من الصبح قبل سالي

گمت داسوي ريوگ واكعدها باوعت الدفتر بنصه القلم ومطبوگ يم راس اخويه
وهو نايم بعده

رحت شلت الدفتر فتحته كـ فضول شفته كاتب بالورقه

بيني وبين الحب فقرُ بعيد
من نعمة المال وجاه الاب

يا آهتي كفي ومت يانشيد

شتان بين الطين والكوكبِ

حره... انقهرت حيل وگلبي انعصر... سديته ورجعته لمكانه رحت سويت ريوگ

هو گعد ورايه عنده شغل حضرت كلشي واخذته للهول راح هو گعد سالي واجينا كلنا تريگنا

كملنا كمت لملمت الماعين اجه هو انطانه فلوس وراح لشغله
واحنا بدلنا قبل لا اطلع رحت لفراشه اشوف الدفتر
ملگيته بمكانه يمكن شايله

اخذت الجنطه وطلعت لمدرستي
كملنا دروس بالف ياالله حتى خلصت من طلعنا اني وسالي ورجعنا للبيت

اني بوجهي لبيت حياة لكيت سمرا توها داتطلع
بوستها كتلها... ابقيى

سمرا... لا دوامي مسائي لازم اروح للمدرسه

حره.. تمام اباوعلها عيونها حمر مثل الباجيه

سمرا بعمر حياة الفرق البينهن 3اشهر سمرا اكبر من حياة ب3اشهر
بس سمرا راسبه باكثر من سنه اني بالخامس وهي وياي رغم هي بعمر حياة

طبيت لگيت حياة... حياة شبيها سمرا ليش عيونها حمر مثل الباجيه؟

حياة... مقهوره بسبب مشاكل رشم وابوها
گالت ابوها ضل يهدد رشم يموته لان شافه بشارعهم
واجه لبيت ام سمرا وگللها اذا التقيته بيه بعد اكسر راسج

وخوال سمرا وامها متعاركين ويه ابوها وصايره هوسه

حره... هي لسه عايشه ويه امها ومرجعت الابوها

حياة... لا ومراح ترجع لان كارهته حيل تكول هذا شيطان مو بشر

سكتت صفنت شويه وگالت بألم... ابوها مخابرها بالليل ومحاجيها بهدوء گللها

مشعل... رشم يريد يخرب بينا ويريد يخربلي حياتي ونجح بهالشي
ولا تفكريه يريدلج الخير من وصلج لبنتي ازهار

هذا يريد يفضحني اني صح غلطت بس اني انسان ومو معصوم
ودائما اروح اشوف بنتي ازهار من بعيد واسأل عليها
بس مااگدر اقترب للن سمعتي مهمه شتگول العالم

سمرا... لو فعلا تحبها ما تعوفها هيج وجان دريت بنتك اسمها مو ازهار

مشعل...  ادري اسمها حياة اني مو غشيم بس هذا الاسم ازهار اني احبه وراح ابقى اناديها بيه

اني ادري بيج تروحين تشوفين بنتي ازهار بس بطلي هالزيارات لا ننفضح

حره... تحجي بخزن والالم واضح عليها حطيت ايدي على ايدها...
لتضوجين فدوا

حياة... لا صدگيني تعودت الحمدلله على كل حال..

حره... ضليت اساعدها بالخبز رغم هي مقبلت بس ماعفتها وحدها

للعصر رجعت للبيت وكعدت بالاستقبال اقره بعد ماطلعت
لليل واني كاعده والكتاب بحضني

فزيت مرعوبه على دگت الباب بقوه
طلع مقدام يشوف منو
لحظات وطبت حياة
تبجي مرعوبه...

... نهاية البارت ...

__يتبع__

مرحبا فراشات
اسفه هالايام صارت لخبطه بنشر البارتات
كله بسبب الارهاب ااقصد الضيوف ع گولت حره

اعتذر منكم هوايه
وان شاءالله من اليوم نرجع للالتزام بالبارتات

وانتو حددو يوم نشر ويوم استراحه

لو يومين نشر ويومين استراحه

حتى نرجع نلتزم بالنشر والتنزيل دام الحمدلله والدي صحته زينه والخطاطير بعد ميجونا

احب اشكر البنوته المتفاعله دائما بالقصه      user95794729

وع هالتفاعل الحلو
تگدرين تطلبين طلب واحققه الج
بس الطلب بخصوص القصه

مثلا سوؤال او مشهد او فلاش باك او شي ثاني انتي تختاريه بكيفج بعد 💕

وهسه فراشاتي شاركوني توقعاتكم للقصه وللاحداث القادمه

ولتنسون التصويت والمتابعه

قراءه ممتعه 🌺🦋