«الحلــــــــقه الثانــــــيه»
«هل كانَ حلماً...؟»
«الطين _و الكوكب»
بقلمي ... لؤلؤة _البِحار ...
________________
حره.. طبت دتبدل هي ومروه.. رحت عليها گتلها... يمه وين رايحين
اميره... دا اروح للمطعم
حره... الله اخذيني وياج
ااميره... هاا لا مو مااگدر
حره... ليش.. گلتها واني اباوع عليها بترجي
اميره... مو ماعندج ملابس حلوه ع غير مره ان شاءالله اخذج
حره... لا ليش عندي بنطلون وقميص حلوات مبيهن شي
اميره... لا يمعوده جنج مجديه بيهن.. .
حره... حيل انقهرت وهالكلمه حزت بداخلي وجهي صار احمر عفتها ورحت امشط
شلت المشط وكعدت امشط بشعري وشفافي يرجفن قهر ع الم على احساس مر وصعب حيل
باوعت سالي داتبدل اجت عليه گالت... شنو مترحين ويانا
حره... لا
سالي... يااا ليش
حره... مجاوبتها اني بطبيعتي من اضوج اسكت حتى لا ابجي ولا احد يحس بيه
سالي... يلا مو مشكله اني اجيبلج وياي اكل
واذا اضطريت اقسم من اكلي واضملج
حره... لا كلشي مااريد بس انتي اكلي زين
ضحكت سالي وطلعت ضليت گاعده بمكاني وگلبي يرجف
شويه واجت امي مثل الي حست انها ضوجتني او جرحتني بكلامها
گالت... حبيبتي على غير مره اخذج خوش
حره.. ماشي
اميره... اني والله اريد اخذج وياي بس مو مقدام يجي بليل وگال سوولي عشى ورتيل ماهيه وانتي طبخج طيب يخبل
حره.. تمام... گلتها بهدوء عكس براكين گلبي التفور
كملن وامي اخذتهن وطلعن اني فتحت باب الحمام
طبيت وسديت الباب ورايه كعدت كرفصت على نفسي وحسيت گلبي لهنا وانفجر...
بجيت بوجع
وألم يذبح
غسلت وجهي وطلعت من الحمام رحت للغرفه فتحت الكنتور باوعت هو صدڪ ماعندي ملابس زينه
عكس مروه وسالي عدهن يخبلن لان هي دائما تشتريلهن ...
تنهدت بحزن سديت الكنتور ورحت تمشيت للمجمده فتحتها مديت ايدي طلعت كبه
احنا انجمدها مجرد اطلعها واگليها.. طلعتها ورحت حطيتها ع الكاونتر شويه واسوي عشى بعد وكت هسه...
انفتح باب البره مديت راسي باوعت رتيل اجت
طبت للمطبخ باوعتلي ضيگت عيونها...
رتيل... هاي شبيج باجيه... !!! حجتها بشك وهي مضيگه عيونها
حره... لاااا...
رتيل.. احجي حره... حجتها بأصرار
حره... لا مباجيه جنت اسبح ودخل الشامبو بعيني
اجت تقدمت عليه لزمت شعري دا تتأكد اذا صدگ سابحه شافته رطب گالت..
رتيل ... ديري بالج انوب من تغسلين غمضي عيونج... گالتها وهي تطب للغرفه.
رتيل... لعد خواتي وين..؟
حره... راحن
رتيل.. وين..؟
حره... ويه ماما للمطعم
رتيل... ياا صدگ
حره... والله اجن صديقاتها وراحن وياهن
رتيل... هاا اذا صديقاتها تمام...
حره.. اي وياهن..
طبت تبدل واني رحت طلعت الطاوه درت الزيت وانتضرته يحمي
گليت كبه ووياها بتيته وطماطه اجت رتيل وگفت يمي وگالت
رتيل... مقدام ما خابر..؟
حره... اي خابر امي وگللها اجي ع العشى
رتيل... هاا تمام لعد... گالتها وهي تفتح الثلاجه.
طلعت طماطه وخيار دتسويها زلاطه وياي
... انفتح باب البيت طب مقدام محمل علاليگ تلگته رتيل كلتله
... الله يساعدك...
واخذت منه الاغراض طبو للمطبخ باوعتله... ها شلونك
مقدام.. زين... باوع للاكل وگال...
يا هاي ليش سويتن...؟
حره... صفنت عليه رجعت گتله.. شنو ...؟
مقدام... مو خابرتها الامج گتلها ليطبخن اليوم اني اجيب اكل وياي...
حره... انصدمت وبنفس الوقت ضحكت بأستهزاء
رتيل... يلا مو مشكله ايجوز نست ماگالت عادي الي يزود نخليه لباجر..
مقدام... ماشي.. البنات وين
رتيل... راحن للمطعم ويه امي
مقدام... ادري غير تگول غير تحجي...
حره... طلع من المطبخ يحجي واسمع رتيل تگله
...عادي هي امهن وهنه هم خطيه خيطلعن
حره... اني بقيت بالمطبخ مختنگه واحضر بالاكل وكل ماتنزل من عيني دمعه امسحها
يمكن العالم تشوفه شي بسيط ان امي تستنكف وتستحي مني ومتحبني مثل خواتي
بس هالشي بالنسبه الي كلش صعب ووجعه ماينحمل
كملنا كلشي ونقلت الاكل للهول وگعدنا تعشينا
بس مگدرت اكل ظليت انقش بالاكل حتى ميحسون اخواني
ومع هذا حسو
القريب من روحك لو نمله تأذيك يحس بيك ويفهمك من النظره
مقدام دائما يگولي اميزج من ملامحج اذا فرحانه او حزينه
فسألني... ليش زعلانه حره
حره.. مبيا شي مزعلانه
مقدام... ماراح تگوليلي ع المضوجج
حره... لا تره مضايجه ومبيا اي شي
مصدگ كلامي لان بسؤاله الضوجه بانت عليه اكثر
حاول يشاقينا ويلطف الجو حتى انسى
كملت عشى ورحت سويت جاي حطيته عالنار وبديت اشيل بالماعين اخذتهن للمطبخ
عزلتهن وحطيتهن بالسنگي فار الجاي طفيته صبيت ورحت وديتلهم رغم شگد احب الجاي وما افوت اي فرصه بشربه بس من خنگتي ماجان على بالي اشرب
ردت اسوي الماعين مخلتني رتيل گالت
... روحي نامي تعبتي هواي اني اسويهن..
حره... هزيت راسي بأي ورحت ع الاساس انام بس
هيهات اذا گدرت
ورا ساعه تقريبا سمعت مقدام يتصل ويسأل على سالي
وصوت امي وهي تگوله... جايين بالطريق
حره... دائما لما اغطي راسي بالبطانيه احلم بعالم ثاني لو افكر وابجي لو اهون على نفسي
بحياتي ماحطيت راسي ع المخده ونمت بسرعه اذا متجي الف حسبه وفكره ببالي فهاي مو اني
حاطه ايدي جوه راسي ودموعي مستمره تنزل بهدوء
سمعت مقدام يحجي ويه رتيل
مقدام... بلا هسه شأحجي امج ماعندها عقل ماتفكر هسه احنا كبار بلا وگمنا مانهتم على سوالفها
بس ما تگول هاي حره بنتي بعدها زغيره الفرق بينها وبين سالي بس سنه اكيد تنقهر لما تشوف امها تهتم بخواتها الاصغر منها وهي لا
يعني والله عيب اني ابنها افتهم اكثر منها
رتيل... تعودنا بعد شنسوي
مقدام... مو مسألة تعويد رتيل اكو امور من تصير تبقى حسرتها بذاكرة الشخص طول العمر
ويبقى يتمناها طول عمره هالشي مو سهل
رتيل اسأليني الي اني الي تمنيت عندي اب زين وام زينه من يوم وعيت وهاي اني بعمر 21 وضليت اتحسر ع واقعي عبالج هالشي سهل...؟
رتيل... لا طبعا مو سهل بس اذا راح انضل نفكر هيج مراح نرتاح ابد
مقدام... ولا تفكرين بيوم نرتاح يا رتيل
لا تفكرين بيوم تنسي هالايام حتى لو مرت تبقى بالذاكره... حجاها بحسره ووجع طاغي
رتيل... والله ماادري شگولج غير الله يعوضنا
حره... ساكته واسمع كلامهم شويه وسمعت هوسه اجت امي والبنات
غمضت عيوني وغفيت رحت لعالمي عالم الخيال
ثاني يوم الصبح گعدت گمت من فراشي نفضته سفطته واخذته للغرفه رتبته عالميز
طلعت تمشيت للمغسله فتحت المي وغسلت وجهي باوعت لوهي بالمرايه شاحب وعيوني ذبلانه
جريت نفس اهدئ جروحي واطمنها ان باجر كلشي يهون وكلها تصير ذكريات
حتى لو ذكريات مره بس المهم راح تعدي وتصير ماضي
باوعت رتيل دا تخيط وسالي لسه نايمه امي ماادري اذا بغرفتها او طالعه مثل عادتها
رحت حطيت الجاي ع النار طلعت بيضه طگيتها حضرت الريوگ و گعدت اتريك
كملت شلت الصينيه غسلت الماعين ورحت غسلت مشطت شعري لبست نعالي وطلعت من بيتنا
رحت لبيت حياة فتحت الباب وطبيت شفت بيبي بهيه واكفه ترش بالطارمه
صباح الخير بيبي
بهيه... صباح النور بنيتي
حره... ابتسمت وطبيت للمطبخ حياة واگفه دتغسل اماعين الريوگ باوعت شفت نجانة العجين مدثره يعني عاجنه
حياة ... ها حره اليوم جايه من وكت شعجب
حره...ماعندي شي وكبه عدنا مجمدين...
حياة... اي صدگ ام مصطفى رادت تشتري الها ولجناينها...
حره... ان شاءالله الظهر انوديه...
حياة... تمام
حره... ضلينا نسولف اني وياها
مر الوقت وسمرا ماكو مااجت باوعت لحياة
... وين سمرا خو مبيها شي اشو مااجت اليوم...؟
حياة... لا مبيها شي بس راحت ويه امها الاربيل
حره... اهااا
حياة.. اي
حره... مشت هالايام عليه بسرعه وكل يوم يروح من عمري بتعب وحسره عليه وعلى عمرنه الديضيع منا
مر اسبوع بيوم دا اروح لحياة العصر اشوفها لبست نعالي وطلعت لبيتهم
طبيت لگبت حياة مدده رحت گعدت يمها
هي تگلب بموبايلها واني مدده بصفها واباوع وياها شويه وانفتحت الباب
رفعنه راسنا باوعنه سمرا طبت
ابتسمنه عدلنا نفسنا وگمنا سلمنه عليها..
.. شلونج
سمرا.. الحمدلله حره انتي شلونج
حره... الحمدلله.. گلتها واني ابتسم...
ابتسمت مدت ايدها عليه لازمه بيها علاكه گالت..
... هاج حره هايه الج..
... عقجت حاجبي اخذت منها العلاكه دشوف شنو بيها مدت ايدها الثانيه لحياة وهم انطتها علاكه مثلي
فتحت العلاگه بيها جنطه كلش حلوه ابتسمت باوعتلها بأبتسامه
... ليش تعبتي نفسج شوفتج احلى هديه..
سمرا... وين التعب بالموضوع اذا مااجيب هدايا لاخواتي لعد المن اجيب..
حره... ابتسمت حياة فتحت علاگتها جايبتلها حذاء طلعته ونزلته ع الگاع گدرته ع گدها ابتسمت
حياة... يخبل تسلمين
سمرا... الف عافيه...
حره... گالتها ورحعت صفنت علينا واحنا هم ممفتهمين السالفه حياة سكتت باوعتلي ورجعت باوعت لسمرا وطگيناها بضحكه سمرا كالت
... يااااا كبر مدري شجاني عود دااگلج ملبوس الهنا گتلج بالعافيه... گالتها بضحكه وهي تهز بإيدها
حياة... عادي غلسي يمعوده... گالتها بضحكه...
حره... ضلينا نضحك ونسولف طلعت شيله حلوه ومن الزينات انطتها لبيبي بهيه..
گعدنا نسولف الا ان صار المغرب كلش سمرا اجه رشم عليها واني رجعت لبيتنا
ثاني يوم العصر اجتني حياة گعدت يمي وگالت
حياة... باجر عرس انوار وعزمتنا شنو رئيج نروح..؟
حره... لا مااروح
حياة... ليش...؟
حره... ماادري اشو تعبانه وملي خلگ
حياة... دنجبي خنروح حبابه
حره... لا والله ماا اگدر تعبانه... جذب اني اتمنى اروح بس ما عندي ملابس شسوي واستحيت اڪول گدام حياة..
واني وانوار مو كلش صديقات هي صديقة حياة بس اني وياها علاقتنه طيبه
حياة... يلا بكيفج بس باعي اذا خابرتج اليوم سمرا لتگوليلها عندي عرس
حره... ليش...؟
حياة... مو بس اگوللها تروح تجيبلي ملابس فشله منها داتنطيني من مصروفها
حره... سكتت افكر بيني وبين نفسي.. هذا مصروفها ..؟
ملابس
مكياج
احذيه؟
ضحكت بأستهزاء
حياة... شبيج تضحكين...؟
حره... مصروف سمرا اليومي بالنسبه النا راتب شهري
حياة... الحمدلله على كل حال يمكن بالنسبه الها مو كافي
حره... شلون...؟
حياة... باعي حره كل شخص يتعود على شي خاص
مثلا اني وياج تعودنا نقتصد ونحاول منصرف حتى نوفر
وتعودنا ع مصروف خمسمية دينار باليوم
يمكن هي متعوده ع مصروف 25 الف باليوم
او اكثر واذا اخذت اقل تزعل لان هم اغنياء وتبقى بنت عز ومدلله
حره... الله يوفقها..
حياة.. امين
حره... ثاني يوم حياة من راحت للعرس راحت بملابس بسيطه مو مال عرس
بنطلون وبدي عاديات صح سمرا دائما تجيبلها
بس مو مال اعراس لا ملابس عاديه حياة جانت عندها عادي متهتم باللبس مثلي
لا اني جنت اختلف نفسي تضل بهواية اشياء ما مقدره الي بذاك الوقت اضل ما انام افكر بيها
وباللحظه الي تصير عندي هالاشياء وبفرحتي جنت بين الامل والحسره لهواية اشياء ضلت نفسي بيها
بس لما صارت وتقدرت الي
اني مالي نفس بيها بعد
طلعت من عيني هالاشياء البسيطه الي اي بنيه تگدر تسويها
وره مراحت حياة للعرس رحت دا اودي الخبز لبيت جيرانا دگيت الباب ماطلعو
طبگت سياره يمي نزلت سمرا ووياها رشم اجو سلمو عليه
بأثناء مداجاوبهم جيرانه فتحت الباب واخذت الخبز مني گالت
... مشكوره حبيبه اوكفي خلي اجيبلج الفلوس
حره... اني هنا وجهي صار احمر وحسيت بأنحراج بس صبرت روحي وگتلها
يلا الحمدلله على كل حال احصل الفلوس احسن مما اگدي بالشوارع
درت وجهي والتفتت لسمرا من سألتني..
سمرا... حره شو حياة مموجوده بالبيت وين راحت...؟
حره.. اي راحت للعرس
سمرا ... يا عرس...؟
حره... عرس انوار صديقتها..
سمرا... يااا لعد شو مگلتلي
حره... اشرتلها بمعنى ماادري اجت المره انطتني الفلوس اخذتها ودرت وجهي داروح
بس وقفني صوته.
رشم... حره
حره.. هاا
رشم... انتي وحياة اني مثل اخوجن اي شي ترديه گوليه وبعيني
حره... شكرا نريدك سالم... حجيتها بأبتسامه
سمرا... وين عرس انوار عفيه اريد اروح
حره... بيتهم بالفرع الثاني بس تلوفين ع ايدج اليمنى تلگين باب بيضه ام الطلاگتين
هم هذوله..
سمرا... شكرا حره... گالتها بأبتسامه
حره... العفو... ابتسمتلها هي راحت للعرس لحياة واني رجعت للبيت
فتحت الباب وطبيت
باوعت مقدام والبنات سالي ومروه يزرعون بالحديقه رحت للغرفه طبيت طلعت القوطيه الاضم بيها الفلوس ضميتهن رجعتها لمكانها وطلعت
رحت كعدت يمهم بالحديقه مقدام ورتيل يسولفون عن انواع الورد والاشكال الهمه يحبوها
حديقتنا بيها ورد جوري اني گعدت يم الورد وكل شويه جاره الورد. واشمها عطرها طيب
صار الليل واحنا ضلينا كاعدين اني وياه ورتيل نسولف وهو گعد يحجيلنا عن حبيبته حوراء
يحجي ويلمعن عيونه بطاريها واضح اعجابه بيها وابتسامته وعيونه فاضحاته
رتيل... تحبها..؟
مقدام... اي والصراحه حتى هي مبين عليها تحبني لان دائما تلمحلي بس تردين الصدگ رتيل داحاول اخلي حدود بينا... حجاها بحزن طاغي ومبين ع ملامحه
رتيل... وليش تحاول تخلي حدود بينكم اذا انته تحبها وهي هم..؟ حجتها بتساؤل
مقدام... رتيل شجاب السما ع الگاع...
رتيل... شلون يعني...؟
مقدام... هي واهلها ناس اغنياء بنت عز وجاه المدلله
هي وين واني وين...؟
رتيل... عادي المهم انت حباب واهلها يعرفوك ويحبوك ويحترموك
مقدام... يحترموني كـ سايق الهم بس كـ نسيب هالشي مستحيل يقبلون بيه
يبقون ناس يردون يأمنون مستقبل بنتهم شلون يقبلون...؟
رتيل... الله كريم ان شاءالله يفتحلك ابواب رزقه وتگدر تاخذها الحلال بجاه النبي... حجتها بأمل
مقدام... ااااه الله يسمع منج... گالها بترجي وعيونه ع السماء
حره... اني گاعده بينهم بهايه اللحضه اني المتفرجه ع كل الاماني الي متأملين تتحقق بيوم من الايام..
يوم بعد يوم بديت احس مقدام بلش يتغير اهتمامه بنفسه صار واضح ابتسامته متفارگه ابد
بديت احس اكو نبض جديد بأخويا اكو شي تغير
اكو لمعه جديده بعيونه
يمكنها الحب...
طول سنة ال2015 وهم يتواصلون دائما من اصعد ع السطح لو من افوت من يم الحمام اسمع مقدام يسولف وياها عالموبايل
وحوراء واضح عليها تعلقت بأخويا حتى اكثر من تعلقه بيها
ب2016 ماكو يوم ولا ساعه ولادقيقه ولا لحضه تمر وهم بعاد عن بعض
لا لو يتخابرون لو يلتقون يحبون بعض ومتعلقيين ببعض بشكل رهيب هو اعترفلها وهي هم اعترفت بحبها الها
دائما من يكون مقدام بالبيت هي تتصل وتطلب تحجي ويه رتيل وفعلا تحاجي رتيل وبعدين اني وبعدين سالي وحتى مروه تحجي وياها وتضل تسأل علينا
بيوم العصر هو گاعد يتغده واني وسالي كاعدات بالحديقه شويه وهو اجه
گطع ورده جوري من الحديقه اخذها اشتمها باوعلنا ابتسم واخذ الورده وطلع
باوعت للورد بأبتسامه. اتمنى الكه هيج حب مثل الحب الداشوفه بعيون اخويا خوفها عليها وقت مرضها
وفرحته الها وقت نجاحها
لليل هو اجه اتعشى ودايشرب جاي اتصل موبايله
رفع باوع عليه ابتسم وعيونه لمعت بفرح
باوع لرتيل... رتيل حوراء دتتصل اكيد عليج حتى تحجي وياج
حره... راحت رتيل تاخذ الموبايل منه حتى تحاجيها واني وسالي گمزنه ورحنه يمها
فتحت خط ومقدام فتحلها سبيكر
رتيل.. الو
.حوراء... هلاو رتوله شلونج
رتيل... حبيبتي الحمدلله انتي شلونج شخبارج
حوراء... الحمدلله اني بخير تدرين رتيل اليوم تعلمت شي وحيل فرحانه بيه گلت افرحج وياي
رتيل... شنو هو..؟
حوراء... تعلمت اطبخ حتى من نتزوج اني ومقدام انتي تنعفين من المطبخ وادور الطبخ كله عليه... گالتها بضحكه
حره... ابتسمت لضحكتها رتيل ضلت تسولف وياها واني رحت فرشت حتى انام
امشي ومبتسمه ويه روحي وادعي الله يوفق حبهم وميحرمهم من بعض رغم همه عندهم مساعدين ينظفون البيت ويطبخون بس تعلمت الطبخ علمود اخويا
فرشت وكملت مددت بفراشي ومثل كل يوم ماانام بسهوله اضل افكر بمستقبلي شلون راح يكون وراح يكون للافضل لو للاسوء
اجه مقدام كعد يم رتيل جر نفس وگال بقهر واهن
... رتيل شلون اذا مقبلو اهلها ينطوها الي شلون بيا وين اروح وشأسوي..؟
اني بدونها ما اگدر اعيش هي تبقى بالنسبه الي السند الي يقويني
والحلوه الي اتمنى ابقى وياها هي رتيل كل مااشوفها واباوع بوجهه اشوف سالي بيها نفس البرائه ثنينهن ويحبن الحياة
روحهن مرحه ومتفائلات دائما هذا الشي يخليهن مميزات عندي حيل
حره... شمرت الغطا عني وحجيت بعصبيه... شنو قصدك تحب سالي لانها مرحه واني لا...
مقدام... لا طبعا انتي الحنيه كلها انتي بس شوفت عيونج بيها احلى امان بالعالم بس انتي ماتفرقين عني وعن رتيل هم متعوبه مثلنا وهم ملامحج مابيها ملامح فرح
كلها ملامح حزن اعرف انتي داتتأذين من وضعنه وادري انتي كـ بنيه هم يكون بنفسج حياة مثل بقية البنات بس
جر نفس بيه حسره متألمه... حاولت اوفرلجن كل هذني بس ماگدرت
انتي عكس سالي
سالي طفوليه وماخذه الدنيا كلها بضحكه
انتي واعيه والي يشوف همج ينطيج اكبر من عمرج
فهمتي قصدي
حره... صفنت بعيونه متألمه گمت من فراشي رحت عليه گعدت يمه لزمت كف ايده بأيدي...
لتگول هيج انت االي احتويتنه وكبرتنه انت الضحيت بمستقبلك لاجلنا انت شلون ماگدرت توفرلنا شي
بالعكس انت وفرلتنا هواية اشياء هي مو واجبك واجب الي يتسمون اهلنا
مقدام كون انتَ بخير وكلشي منريد من هالدنيا غيرك
انتَ سندنه الي لو لاسامح الله مال شويه كولنا نطيح ونروح بالرجلين
... مد ايده لوجهي مشى أصابعه على بشرتي يتحسسها ابتسم وتنهد بحزن...
ثاني يوم اجه مقدام الظهر طب للبيت ووجهه احمر من العصبيه اني گاعده الف بالكبه ورتيل دتمسح بالهول
من شفنه حالته گمنه ثنينه رحناله حجت رتيل..
... شبيك مقدام شعجب جاي هسه وليش هيج وجهك احمر وعيونك حمر...؟
مقدام... خابرتني حوراء تبجي... گالها وهو يفرك عيونه بقهر
رتيل... اسم الله شبيها ليش تبجي..؟
مقدام... تكول اهلها ناوين يزوجوها
جر نفس بحزن وكمل بقهر... رتيل خابرتني منهاره تگولي تصرف سوي اي شي بس لتعوفني
بدونك مااگدر اعيش... گالها بألم
رتيل... استغفرالله يربي ادري شنو هو الزواج غصب واهلها ناويين يزوجوها هي بنيه لو لعبه بإيدهم
زين وهسه شراح تسوي... گالتها بحيره
مقدام... رحنا اني وعمران حجيت ويه شيوخ اعرفهم سولفتلهم الموضوع وگالو ابشر احنا اليوم العصر يم اهلها
رتيل... يا الله بلكي يوافقون ينطوها....
مقدام... الله يسمع منج... گالها بخوف وقلق واضح بعيونه
حره... ضليت افكر بأخويا الي اخذ البيت رايح راد بيه وادعيله كون حوراء تصير من نصيبه ويرتاح
للعصر كلش اتصلو بيه وگلوله ابوها رفض ينطيها وگال ماكو نصيب
هنا مقدام تخبل
رجع ثاني يوم هم دزهم وهم ابوها رفض
مره مرتين وابوها ديرفض وهي متخبله ومقدام متخبل
اخر شي گال... اروح اني احاجيه احسن شي
حره... راح مقدام يحجي ويه ابوها واني ورتيل گاعدات ع نار حتى ادينا متاخذ ع الشغل..
لهناك واجه مقدام محترگ وعصبي حيل سألناه
... ها بشر شگالو
مقدام... الحقير ابوها حجيت وياه وگتله احبها واريدها
يگولي... انت صدگ تحجي..؟
اني انطي بنتي لواحد مثلك بابا شني نسيت نفسك سايق تكسي..؟
مقدام... واذا سايق تكسي الشغل مو عيب واهم شي شغل شريف وحلال احسن من الحرام
وبعدين ياعمي اني جاي وطالبها ع سنة الله ورسوله وشتطلبون اني حاضر
ابو حوراء... لا عيني الشريف والحلال مايهمني وبنتي مو الك يلا تفضل اطلع بره بيتي...
مقدام... طردني الگو... د طلعت من بيتهم بالطريق وخابرتني رانيا اخت حوراء گالت
رانيا... من بعد ماطردگ ابوي من البيت حوراء تخبلت وتعاركت ويه ابوي وهددته تحرم نفسها من الاكل والشرب وتموت نفسها اذا ميوافق عليك
مقدام... وهو شگاللها...؟
رانيا... اووف يگوللها اذبحج وما انطيج والمشكله حتى الموبايل اخذه منها
من تريد تحجي وياها او هي تريد. تحاجيك راح تتوصل وياك من موبايلي
وانت اي شي تريد اوصله الها تدلل
مقدام... ماادري هسه شسوي رتيل راح اتخبل
رتيل... اهدئ حبيبي نحاول وياه شويه شويه الا ان ينطيها وبلكي من يشوفها امتنعت من الاكل يحن ويوافق
مقدام... هذا شخص شكله يوحي لابليس مو للبشر اي رحمه ماكو بوجهه خايف يضل رافض وخايف حوراء يصير بيها شي اذا ضلت ممتنعه عن الاكل والشرب..
حره... ضلت رتيل تهدئ بيه وهو ساكت ويفرك براسه بقهر...
وره يومين گاعدين ع التلفزيون نباوع للمسلسل اتصلت رانيا ع مقدام فتح خط گالتله
... مقدام حوراء تقدملها رجال جبير بگد ابوي بس هو غني وابوي وافق ينطيها لمصالحه الشخصيه...
واليوم جابو المشيه وهي مقابله بس ابويا واخواني يهددون بيها ويگولولها لمصلحتج
مقدام اختي حتموت من القهر راح تروح من ايدي ابوس ايدك تصرف..
حره... كلام رانيا خله مقدام يتخبل بسرعه بدل وطلع مندري وين راح
شويه ورجع يفتر بالبيت مثل الطير المذبوح
حره ... شسويت مقدام وين طلعت وهسه يلا رجعت...؟
مقدام... مابيدي شي اسويه حره ما بيدي راح اتخبل هسه رجعت تنخيت الشيخ يروح يرجع يحاجي ابوها وخطيه مگال شي
حره انتي گلبج طيب وفقير ادعي الله يجعلها من نصيبي اتخبل اذا تزوجت وراحت لغيري والله اتخبل...
حره... يحجي بقهر وعيونه حمر دم دعيت الله من كل وگلبي انو يجعلها من نصيب اخويا ويفرحه ويعوضه عن الايام العاشها بقهر وحرمان..
لليل كلش اتصل الشيخ باخويا وگاله..
... ابني اهلها هم رفضو ينطوها وگالو بنتنا نخطبت
مقدام ضل مفرفح والليل كله يفتر بالبيت حتى اني مجاني نوم وضليت مراقبه حالته وخايفه عليه حيل
ثاني يوم الصبح هو مطلع للشغل كعدت حطيت الجاي عالنار داسوي ريوگ
اتصل موبايل مقدام.. فتح خط اخت حوراء
رانيا... مقدام الحگ اختي سممت روحها لك اختي حتموت حتروح من ايدي..
مقدام... وينكم رانيا باي مستشفى انتم هسه..
رانيا... بمستشفى...****
حره... مقدام تخبل بدل وگال..
... رتيل حره بسرعه بدلن ترحن وياي للمستشفى حتى خاف يطردوني اهلها انتم ع الاساس صديقاتها مو خواتي حتى تطبن تشوفنها وتطمنني
رتيل... يلا خوش بس انتظر ثواني..
حره... بدلنا بسرعه وطلعنا وياه وصلنا للمستشفى طبينا طلع موبايله اتصل على رانيا اجت حتى تاخذنا الاختها گالت
... الحمدلله اهلي مموجودين بس اني وامي بسرعه مقدام شوفها قبل ليجون
حره... مقدام هز براسه بإي وراح سلم على امها ردت السلام وهي تبجي هو طبلها للغرفه واني وكفت على جهه اراقبهم
باوعت الامها ضلت تبجي وتحجي ويه رتيل ورتيل تهدي بيها
امها واختها يحبن مقدام ويردنا يتزوجها بس ابوها واخوانها يعبدون الفلوس فحبو يتاجرون ببناتهم
التفتت ع طيور الحب اباوعلهم يبجون ويتعاتبون سوه هو يگوللها
مقدام... لا تسوين هيج بنفسج وبيا
حوراء... مقدام لتعوفني والله اموت
حره... بهايه الاثناء اجه ابوها واخوانها شافتهم رتيل طبت تركض لمقدام گلتله اجو
هو مااهتم ضل يصبر بحوراء ويوعدها انو ميعوفها ابوها لما شاف مقدام طلب من ولده يضربوه ويطردوه
وفعلا ضربو مقدام واني ورتيل تخبلنه ندفع بيهم طلعنونا من المستشفى ورجعو للداخل
رتيل... خلي نروح نشتكي عليهم... گالتها بعصبيه وقهر
مقدام... لا خاف يعندون اكثر وبعد مينطوها... حجاها بتأمل
حره... رجعنا للبيت ومن بعد موضوع التسمم الصار ويه حوراء اختها جابتلها موبايل بالسر لحتى تتواصل بيه ويه مقدام
دائما وعلى طول اسمعهم يحجون طول الليل وادعي الله يكونون لبعضهم
مدنگه اكنس وببالي مليار فكره وفكره التفتت مفزوعه على صرخة سالي
فتحت عيوني مصدومه من شفت رتيل واگعه
ركضت عليها نهضتها... شبيج رتيل
رتيل... دخت حيل يمكن لان صارلي هوايه اشتغل خلي انام شويه
حره... نهضتها اگومها وسالي ركضت للشارع تصيح..
.. مقداااام الحگ رتيل وگعت
هو واكف ويه صديقه عمران بره يسولفون
سالي بعادتها تخاف حيل وماعدها شي بسيط تهول بالامور
طب مقدام يركض وعمران راح يركض للتكسي ماله شغله وحضره حتى ياخذون رتيل للمستشفى عباله اغمى عليها هي صح داخت ووكعت بس صاحيه..
رتيل گالت... يمكن ضغطي نزل لتخافون بس انام اصير بخير...
حره... اندكت الباب طلعت سالي ووراها مقدام شويه ورجعتلنا بس سالي
كلتلها ... وين مقدام
سالي... راح يجيب لبن الاختي
حره... ومنو بالباب
سالي... عمران جاب سيراته عباله اختي اغمى عليها
حره... هزيت راسي وسكتت ضليت اباوع لرتيل بخوف الجوه عيونها صاير اسمر من التعب ووجهه شاحب
جريت نفس المفروض امي هي التتعب علينا وتشيل همنا ومسؤوليتنا بس وين خلي تگعد بالبيت بالاول وتدري بينا وين الله خلقنا يلا ساعتها تشيل همنا
شويه وطب مقدام بإيده بطل لبن جاب كلاص صب بيه لبن وشربه لرتيل شربته ومددت
گام جاب مخاديد سطرهن ورفع رجليها عليهن
شويه وهي نامت واحنا هم فرشنا ونمنا بس مقدام اجاه اتصال وضل يخابر وكل شويه يجي يشوف رتيل ويرجع يخابر
حتى من بعدما غفيت كل ماافز الگاه يم راسنا يتفقدنا
للفجر سمعت طگه فزيت باوعت لرتيل على نومتها
باوعت مقدام مو بفراشه گمت اسويله ريوڪ اكيد راح يروح لشغله
طلعت من الاستقبال باوعتله ديبدل شافني كال..
... ارجعي نامي مااريد ريوگ
حره... لا شبعت نوم ولازم تتريگ لتخليني اگعدلك رتيل تزفك... گلتها واني اروح للمطبخ.. مخنوكه وممرتاحه ابد
طلعت القوري سويت جاي وطلعت البيض والخبز
جبت عمري كله مخنوگه واعاني من هواية اشياء منها الكتمان
من كبرت شويه وبعد رجوع حياة من الموصل
صح جانت صديقتي المقربه حيل اني وياها كلمة روح بروح قليله علينا
بس هم مجنت اگللها عن الاشياء الي تأذيني
من كبرت حسيت ان كل واحد بينا عنده هموم كثار وماله داعي ازودها عليهم
اجه وراي وهو يسأل... شلونها رتيل شلون صارت
حره... زينه هسه لباجر تتحسن
اگول مقدام
مقدام... گولي
حره... البارحه سمعتك تخابر..
مقدام... اي ويه حوراء
حره... هي مو ماعندها موبايل
مقدام... اختها انطتها واحد من دون علم ابوها..
حره... اوووف ربي ييسرها وتصير من نصيبك ..
رفع راسه للسما وگال
مقدام... الله يسمع منج ادعيلي حره انتي بريئه وماعندج اخطاء هواي
يمكن اني غلطت بحياتي
والله مدا يستجابلي
ادعيلي بلكي يستجاب
حره... والله انته متغيب عن بالي ودائماا ادعيلك
مقدام... الله كريم ميصير غير الكاتبه الله... حجاها وهو يتنهد بحزن
حضرت الريوگ وثنينه مااكلنه بس شربنا جاي
كام غسل اجه وكال..
... حره هاج هذا موبايلي خليه يمج واي شي يصير خابريني ادزلكم عمران ولتخلين رتيل تشتغل او تخيط ديربالج عليها
حره... اخذت منه الموبايل... تمام
خله وطلع لشغله وفعلا شويه وكعدت رتيل تريد تشتغل بس مخليتها اني وسالي اشتغلنا بالبيت
سويت الغده وكملته
اندگت الباب وطبن حياة وسمرا
وكفن بباب الهول رحت سلمت عليهن گالت حياة
حياة... اشو مالج حس اليوم خو ماكو شي..؟
حره.. اختي مريضه ومگدر اعوفها واطلع
سمرا... اخابر رشم ناخذها لدكتور زين اني اعرفه خوش دكتور
حره... لا ميحتاج بس ضغطها نازل شويه وتتحسن
رتيل... تعالن بنات ليش بره طبن تعالن..
حره... طبن سلمن عليها وگعدنا ضلينا نضحك ونسولف ونتشاقه
سمرا حيل حبابه وهادئه
وتندمج يگول تعرفك من سنين
بفتره قصيره صارت بالنسبه النا مثل حياة
شويه وطلعن للعصر اجه مقدام صبيتله الغده تغده وطلع ويه عمران
لليل گاعدين اجه اتصال لمقدام بدل وراد يطلع
هو ميطلع بليل الا اذا امي موجوده يخاف علينا وميأمن يعوفنا وحدنا
التفت على امي... يوم لتطلعين
اميره... ما انتظر اذن منك
مقدام.. مو عناد هو عندي شغل وراح اطلع خو ما البنات يبقن وحدهن
اميره... اي خوش
حره... طلع ولحگناه اني ورتيل گلتله
رتيل... وين خو ماكو شي
مقدام... لا ماكو بس اليوم حوراء طالعه ويه اختها وامها وهاي فرصه حتى اشوفها
رتيل... لا حبيب ما مرتاحه لهالروحه ابقى هنا خاف يورطوك لو يصير شي موزين
مقدام... لا يمعوده شيصير اسوء من العايشه
رتيل... مقدام والله ممرتاحه اخاف عليك
اذا شافوك تطلع انته وهي بلا اخلاق مو اهلها العالم ماتدري باليصير داخل البيوت
مقدام... بس الله يدري... !!
رتيل لا تعرضيلي الله يخليج هي نص ساعه اشوفها وارجع
والمكان عام لا مطعم ولا شي
حره... خله وطلع ورتيل ضلت تفرك بإديها وتفتر بالبيت لوقت متأخر يلا رجع
اني نمت من التعب محسيت بشي بعد ثاني يوم رحت خبزت ويه حياة وسوينا كبه
ورحنا نوديها للجيران همه عاده يطلبون يلا نسوي
من رجعنا جوارينا بالحي الثاني طلبو منا خبز رجعنا اني وحياة
لگينه العجين مختمر حياة شنگت واني رحت اانضف التنور
كملت شنگ اني شغلت التنور ووكفنا نخبز
حره... سمرا اليوم ماكو ما اجت..
حياة... اي مو راحت للدكتور
حره... ياا شبيها
حياة... لا مبيها شي راحت على بشرتها هي دائما تروح للدكتور على بشرتها وشعرها...
حره... الله شوكت عندي فلوس والنوب هيج اسوي
حياة... ميحتاج تروحين للدكتور هو انتي من غير شي تخبلين غير تسطرين الشباب على باب بيتكم
حره... ضحكت وضلينا نسولف اني وياها الا ان كملنا وورحنا ودينا الخبز والكبه للي طلبو منا
من رجعنا رجعت للبيت طبيت لگيت مقدام هستوه طاب للبيت
حره... جاي من وكت اليوم
مقدام... مارحت للشغل رحت لحوراء...
حره... ليش شبيها
مقدام... مابيها بس داخاف عليها واليوم راحت للاسواق فرحت وياها دام ابوها هون عليها وبعد مايطلع وياها بعد استغليت الفرصه
حره... تنهدت بحزن و سكتت لليل نايمه وكعدت على صوت مقدام ورتيل يحجون اسمعه يگوللها
مقدام... اني ما اتحمل هيج رتيل لازم الگى حل
رتيل... والله داتعذب بنفسك وبس اهلها مراح ينطوها افضل حل تبتعدون عن بعض نهايتكم مراح تتزوجون
ليش تحرگون رواحكم وتاليتكم متتزوجون
مقدام... رتيل ليش تحجين هيج
رتيل... والله مايهون عليه ااذيك بحجايه بس اريدك تصحى شوف شصاير بيك
تعبت حيل واني خايفه عليك
مقدام... واني خايف عليها وعلى حبنا وعلى مستقبلنا لتگوليلي مايقبلون اهلها
ماكو هيج حجي لازم اسوي اي شي اتصرف بس لازم يقبلون
والله ماكو شي مافكرت بيه بس دا احاول
حتى فكرت اخذها وانهزم بس انتن وگفتن بعيني مايهون عليه ابتعد عن المكان البيه اخواتي
والله مدااحس بالراحه اريد فديوم احط راسي ع المخده واغفى ماكو مااگدر
حره... استمع لكلامهم وابجي جوه البطانيه
هنا فهمت مو بس اني الي اتعب من التفكير قبل النوم اخواني هم...
ثاني يوم الصبح رتيل راحت تودي الخياطات وامي ومروه طالعه
وسالي يم صديقتها
رحت صحت حياة من الداير... بس اكمل شغل البيت واجي
حياة... تمام براحتج علما تختمر العجينه
حره... تمام
رحت شغلت الموطور جريت الصونده شكلتها بالرئيسي وگمت اغسل بالبيت مدنگه اغسل
اندگت الباب
واني مدنگه باوعت من تحت الباب شفت كعب عالي
ابتسمت هاي اكيد سمرا ماكو غيرها تموت ع الكعب
رحت سديت الصونده
ورحت للباب افتحتها باوعتلها
بنيه ما اعرفها منو
... انتي منو..؟
... اني رانيا اخت حوراء
حره... هلا حبيبتي تفضلي
رانيا... لا مااگدر هسه مستعجله بس عفيه مقدام وين..؟
حره... مموجود والله ليش رانيا صاير شي... حجيتها بخوف
رانيا... اوووف شيصير اكثر بعد
حره... جريتها وحجيت.. فوتي مااكو احد بس اني
رانيا... بس لحضه كوليلي انتي منو من خواته
حره... اني حره
رانيا... اسمعي حره اختي لگو عندها الموبايل البارحه وسحبو منها
حره... عزااا
رانيا... اي والله ورادوها تفتحه بس اختي مفتحته لان بيه رمز حتى محد يگدر يشوف لا لاتصالات والا المحادثات
ورادو ياخذو ع التصليح حتى يفتحو بس اختي كسرته وسوته طشار
حره... عزا واختج شلونها هسه...؟
رانيا... مو بخير ابد مو بخير حددو زواجها من هالحيوان المصغر نفسه وحاط عينه ع وحده بگد بنته
واختي تخبلت لان حددو زواجها وتالي گاموو وحبسوها وهي تبجي وصريخها رج البيت رج
بس ماكو رحمه بگلوبهم
خايفه يصيرلها شي
خايفه....
گالتها بحزن ودمعه خاطفه نزلت منها
حره... حطيت ايدي على گلبي وجعني عليها وعلى اخويا
رانيا... اني حاروح هسه الكلام هذا لازم تگوليه لمقدام لازم يسوي شي
اختي مالازم تتزوج هالرجال
تموت اني اعرفها
كالت اخر كلمه بخوف وبجت تقربت عليها حضنتها اهون عليها بس شحجي..؟
الكلام هنا جف وماكو كلمه تعبر عن داخلي
هي راحت سديت الباب وراها ورحت للحمام
كعادتي من اختنگ الحمام ملجئي
گعدت ابجي على اخويا وعلى حظنا المانصفنا بيوم
ابجي لان ادري هالمقاومه وامنيات اخويا مراح تفيد
ضليت ابجي الا ان ارتاحيت غسلت وجهي وگمت طلعت نشفت المي كملته خليت ورحت لحياة
لگيتها هستوها مشغله التنور وسمرا يمها تساعدها سلمت عليهن ورحت وياهن
حياة تخبز واني اشلع وسمرا ترتب بالخبز ضلن يسولفن واني بالي مو وياهن حيل ضايجه ومختنگه
كملنا الخبز حجيت... حياة ودي الخبز انتي وسمرا عادي...؟
حياة... اي ماشي بس شبيج مو على بعضج
حره... لا مبيا شي بس احس بتعب اريد انام
حياة... تمام لعد. روحي نامي اني اودي الخبز
حره... هزيت راسي ومشيت رجعت للبيت اول مطبيت لگيت رتيل باوعتلي وگالت
... شبيج...؟
شبيها عيونج شنو باجيه..؟
حره... لا مبيا شي
رتيل... اني اعرفج حره شبيج حبيبه هالفتره احسج مو على بعضج ليش داشوف التعب بعيونج
حره عوفي الخبز والكبه بس لاتعبين نفسج وربج تدبر كلها لاتظلين تفكرين ترا الرزق على الله
حره... لا والله مو على الخبز والطبخ تعرفيني احب اطبخ
رتيل... لعد شبيج..؟
حره... مقدام وحوراء ووضعهم حيل تعبني اني داتفرج على كل هالاماني الي بعيون اخويا والي ادري بيها مراح تتحقق... حجيتها بحزن تعبني
رتيل... لتفاولين ليش هيج تحجين..
حره... رانيا اجت اليوم وو
سولفتلها الگالته رانيا
هي بنص السالفه وگامت تبجي
رتيل... يربي رحمتك والله بعد مابينا نتحمل اكثر دخيلك حلها... گالتها بدموع وترجي
..رحت عليها حضنتها اهدي بيها و المشكله ماكو حجايه بحلگي حتى اگدر اواسيها
اني هم محتاجه احد يواسيني هم محتاجه ابجي بس ماسويت
هالشي...
شويه واجه مقدام رحت سولفتله الگالته رانيا هو خلى وطلع من البيت ضلينا اني ورتيل ننتظره على نار
لليل وبوقت متأخر يلا اجه طب للهول گاعدين اني ورتيل ننتظره
طب گال
... اني وحوراء ننهزم اذا اضطرينا واخذجن وياي
مااگدر بدونها واللهة
الله مايرضى هيج يسوون
حاولت اتواصل وياها ماكو ماگدرت حتى رانيا ميخلوها تفوتلها للغرفه
شاسوي وهم حددو العرس للواحد
بعد گدامي شهرين ادز شيوخ اذا ماقبلو اخذها وانهزم
مابيدي شي ماسويته لابد بيوم يسامحوها
ونگدر نعيش حياتنا طبيعي
رتيل... هذا مو حل مقدام حبيبي حاول بعد بلكي يقبلون..
مقدام... ان شاءالله هالمره يقبلون ان شاءالله..
حره... واگفه وگلبي ممرود على اخويا. واني اشوف امنياته واحلامه دتضيع من ايده
الليل كله مانمنه كلمن مدد بفراشه ويفكر بهمه وقهره بهالدنيا
لثاني اليوم الصبح گعدنا شغل وتنضيف نفس كل يوم
للعصر مقدام رجع من شغله
راح سبح وبدل ماقبل يتغده مستعجل يريد يطلع گلتله
... مقدام وين دتروح
.. راح اروح الشيخ علي الي بمنطقتنا احجي وياه يروح الاهل حوراء
حره... گال هالكلام وطلع من البيت ضلينا اني ورتيل وحده تباوع للثانيه كعدنا ننتظره للمغرب رجع
گمنه تلگيناه رتيل كلتله
.. هاا بشر
مقدام... حجيت ويه الشيخ گال ماشي اروحلك الاهلها واعرف شيخ من بكربلاء هم اطلب منه يروح ويانه بلكي يكسر عينهم ويوافقون دام البنيه ماموافقه على هذاك الرجال
حره... يارب يوافقون يارب... ضلينا بنار واحنا نباوع لمقدام متوتر وحاير ولا اكل ولاشرب
الشيوخ باجر العصر يرحون الاهلها لليل صبيت العشى وحطيته بالهول رحت صحت رتيل ورجعت طلعت اصيح لمقدام
شفته واكف يم المغسله وديتوضى كمل وضوءه اتصل موبايله
وهو عالشباك فتح خط وفتح سبيكر لان ايده بيها مي
اجانا صوت رانيا تصرخ بصوت رج البيت رج
وتگول بصوت مخنوگ
ومجروح
... مقدااااااام اختييي حرگت رووووحهااا
اختيييي ماااااتتتت
... نهاية البارت ...
________________
مرحبا فراشاتي
كل عام وانتم بالف خير ينعاد عليكم بالصحه والعافيه
وتحقيق الاماني ان شاءالله
بالاول حابه اعتذر منكم هوايه هايه الفتره مانشرت شي وحتى البنات السألو عليه مگدرت اجاوبهم
اعتذر منكم حبيباتي
ابويا اسم الله عليكم مريض وحالته بهذني الايام سائت حيل
واني من الخوف والقلق مكدرت اكتب كلمه وحده
بالي يمكم والله بس مالي نفس افتح شي ابد فالذالك مگدرت اجاوبكم
اول البارحه العصر شويه تحسن وصار احسن گعدت اكتبلكم گلت لليل انشره كتبت بارت 4الاف كلمه
اشو لليل وابني تخربط عليه وهم ضليت حايره بيه وگلبي وگع بين اديه هذا الشهر ابد موزين علينا يوم اخويا ويوم ابويا والبارحه ابني 😢
فخليت النشر عاليوم وكتبتلكم بارتين ودمجتهن ببارت واحد
التمس منكم العذر حبايب تحملوني هالكم يوم
شكرا من الگلب للبنوتات الي كل شويه يسألن عني ضل بالهن ويايه
حبيباتي انتن
نرجع للقصه هذا البارت بالتحديد من كتبته متت قهر بيه والقهرني اكثر اعرف المستقبل شنو
مقدام اكثر شخصيه تعمقت بيها بالبدايه لانه انسان مظلوم ومتعوب
ومن بعد هالحادثه الي تعرضلها مقدام راح تنقلب كل الموازين عليه وعلى اخواته البريئات
وقريبا جداً راح ندخل بسنة الكوارث
قراءه ممتعه فراشات 🦋
#Nawras
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!