الحلــــــــقه الثالثـــــــه
رواية... هل كانَ حُلماً...؟
{العِراق-المُصغَر...عنـاق-الارواح}
بقلمي ... لؤلؤة_البِحار ...
_________________•
جنت مفكره وحاسبه حساب كلشي
الا الموت.
مجنت حاسبه حسابه
مجنت متوقعه بيوم اگعد الصبح واروح لبيت حياة
بس الگه البيت فارغ
مجنت متوقعه يجي يوم ومااشوف ابتسامتها الحلوه
يگولون اصعب شي بالدنيا هو انتزاع الروح
بس اني شفت الفراگ اصعب من انتزاع الروح
انتزاع الروح يدوم لدقايق
او ساعه او حتى ليوم
بس الفراگ يدوم
لحد مايجف دمع العين
ولحد ماتصير الحياة بنضرنا مره ودنأديها كواجب مجبورين عليه
ويدوم لحد مايگضي العمر
حره :-طبيت لبيت حياة واني اردد بداخلي ... يارب كله ولا حياة يارب رحمتك
يمكن هي ٦٠ ثانيه بس اجت ببالي الف حسبه والف فكره
دخلت للهول جان هوايه ناس ادفع بيهم واطب بيناتهم
حسيت اختنگت
شفت دم وبنصه حياة واكعه وبيبي يمها تلطم
حطيت ايدي على رگبتي حاولت ابعد الشي الخنگني بس مگدرت غمضت عيوني وبعدها كلشي محسيت
فتحت عيوني احسها ثگيله وگوه فتحتها
باوعت اني بالمستشفى رفعت ايدي توجعني شفت بيها مغذي
اسمع صوت بجي درت وجهي استوعب شصاير؟
شفت سالي وشذر يمي گمت بسرعه گلتلها
.. سالي شفت كابوس
حياة وين وينها
وشلت الكانولا من ايدي بلا مااحس كام يطلع دم طاح ع السديه وگامت الممرضه اليمي اجت باتجاهي
حجت
بس مااتذكر شحجت لزمتني من ايدي الي بيها دم وصاحت باسم بنيه دفعتها
شذر تريد تهديني بس اني محاسه ع نفسي اسمع سالي تبجي دفعتهن وطلعت اركض وصلت لباب المستشفى الامن الي جانو ع باب المستشفى هناك وگفوني
واجه الحارس سألني... شبيج خيتي
رادو يكعدوني مقبلت كتله.. حياة حياة عفتها كلها دم عوفوني
اريد اروح
سالي...اباوع لحره وابجي فاقده ومحاسه بشي گامت تدفع بالضابط وتصرخ بصوت
...خلوني اروووووح
سالي... طب مصطفى من الباب جان شايل علاگة ادويه وگام يحجي ويه الحارس
باوعت لحره لزمتها شذر هي والممرضه تحاول تهديها وهي تصرخ تگوللهن
... مبيا شي بس خلوني اروح داشوف حياة داكوللكم شفت كابوس لازم اتطمن عليها
سالي... ركضت لمصطفى گتله.. خلينا نرجعها
مصطفى... مداتشوفين حالتها وين ترجع
سالي... لعد شلون
اباوع الاختي وروحي راحت ترافس مثل الطير المذبوح تحاول تفلت منهم وتطلع بس مديخلنها
اسمع الحارس يسوي... لاحول ولاقوة الا بالله.. وحچه باللاسلكي
... گلتله مصطفى الله يخليك خابر مقدام شلون هسه شسوي هنا شلون خنرجعها
گلي... اهدي...
ديكمل كلامه قاطعته حره
... ليش مترجعوني فهموني ليش متردوني ارجع والله اروح وغصبا عليكم
ابجي اريد اطلع وسالي ومصطفى يرجعوني والحارس
... گال بس خلي يجيكون وضعج اذا بخير اطلعي بويه
اسمع واحد يسوي.. لاحول ولاقوة الا بالله
اغلب الكلام مامركزه بيه لان جنت فاقده
كل الحاسه بيه اني اصرخ اصرخ بقوه لدرجة اجو الناس يشوفون واكو واحد جبير گال
.. هاي شنو البنيه معنفيها شبيها تصارخ
لان سالي وشذر والممرضات لازميني حتى مااطلع
الحارس گله... لا بويه البنيه بحالة صدمه
ضليت اصرخ واحاول اطلع وهم مقيديني الى ان اجو شباب لابسين لابكوت ابيض
لزموني وانطوني ابره وبعدها هديت الى ان غمضت عيوني و فقدت
فزيت ابجي صار الشباك كدامي الدنيا
ظلام
يم راسي رتيل تبجي كالت :- اهدي حره اهدي
اسمع نساء بالردهه كالن... اسم الله
اكو مره گلتلها... يمه انطيها مي لاتتخبل
باوعت لباب الردهه شفت مقدام اجه باوع من الباب ركض طب بباوعلي بحوف وقلق واضح بعيونه
اجه وراه مسؤول الردهات كله... تفضل برا عيني الردهه للنساء مايصير تدخل
مقدام... لعد انت مو زلمه وهنا بس اشوفها واطلع
... عيني هاي القوانين مو بكيفي
مقدام خله وطلع والمسؤول طلع وراه
حره... اني اصرخ ... اريد اشوف حياة
وكمت داطلع رتيل لزمتني و گالت
:- بس خلي يصير الصبح اهدي
حره... مااريد بس اخذوني لحياة بس اخذوني
رتيل... والله نطلع بس خلي يطلع الفجر هسه ميقبلون تطلعين
حره... گعدت بالگاع ابجي اكو مره جبيره اجت كعدت يمي حطت ايدها ع راسي وگامت تقرا قرأن
رتيل گالت للممرضه ... نگدر نطلعها هسه؟
كلتلها... لا خليها يجي يشوفها الدكتور يلا تطلع
المره گالت... يمه حرام عليج الدتسويه هذا الي الله كاتبه حرام عليج تسوين هيج
يمه الموت حق
اني باوعتلها كتلها بصراخ ... شنووو شدتحجون انتو شدتحجون شنو موت باوعت لرتيل... فهميني حياة ويييين شنو مووووت ليش مااجت لهنا تشوفني
طلعوني ماريد ابقى طلعووووني
رتيل كعدت يمي تبجي وتهدي بيا ماادري شلون مر الوقت جنت تقريبا فاقده مااتذكر هواي صار الصبح اجه الدكتور واخيرا گال اطلعو
صدگ طلعنا اخذنا تكسي ورجعنا واني بهالوقت ساعه افقد ساعه ارجع
لما وصلنا الفرع انصدمت من شفت المكان كله سوات لابسين اسود واقنعه وميخلون احد يتقرب من البيت مال حياة
واسمع اصوات اللاسلكي وسيارات عاليه سوده
عاد هنا تخبلت ردت ادخل للبيت مقبلو طببني مقدام لبيتنا اني كمت اصرخ كتلهم
... شديصير حياة وبيبي وييييييين
جرتني ماما ورتيل طببني
رتيل كالت... حره لتسوين هيج حياة اذا درت تزعل والله
ماما گالت...حره الموت حق ولااعتراض على حكم الله وهي ان شاء الله بالجنه
گمت اللطم على وجهي وابجي واصارخ... مستحيل هي كالتلي لبين ماتضمين الدفتر اجي
وينها وينهااااا
تذكرت الدفتر.. گمت ادور عليه بالبيت كلتلهن... وينه الدفتر وين
طبيت للهول ادور ماكو گمت ادور بالغراض من ماالكه الدفتر اكسر الغراض جرني مقدام گال
مقدام... اهدي حره شبيج اهدي
سالي كالت... هذا الدفتر هذا
واجت انطتنياه اني ركضت للغرفه ضميته بالبوفيه خليته تحت الملابس وكمت
مسحت دموعي وافتر بالغرفه
وكل شوي اباوع لبرا منتظره حياة تجي بس مااجت
رتيل جابت مي غسلتلي گالت... بس اصحي حره اصحي
حره... وينها هذا الدفتر ضميته ليش مااجت اتأخرت حيل اتأخرت صيحيها ختجي مو امان عليها تتاخر هيج
مقدام... سالي جيبي العلاج بسرعه
جابته گعدتني رتيل وهو اجه انطاني العلاج وبعدها غفيت
صحيت اسمع اصوات برا فارشيلي بالغرفه الضوا مالتها مفتوح
گمت فتحت البوفيه واخذت الدفتر وگعدت
فتحته شفت بدايته رسم مخربط كلبت ع الصفحه الثانيه
راسمه بنت عندها شامه
كبيره بخدها
وعيونها ملونه بازرق
حضنته وكمت اشوف شصاير
ماكو احد يفهمني شصار
وحياة وين هسه معقوله ماتت!
گمت طلعت الكل كاعدين بالهول يحجون بس مااسمع اصواتهم او يمكن بالي مو يمهم
باوعتلهم كلهم وطلعت برا للحوش تفاجئت من شفت الدنيا الفجر
معقوله نمت يوم كامل!
احس مثل الفقدت ذاكرتي كلشي مدااستوعب وصلت لباب البرى طلعت وسديتها وراي باوعت ماكو شرطه
رجعت باوعت لبيت حياة
اظلم الحوش مالتهم بيه تخطيطات باللون الابيض وعلامات اكس
خفت ادخل لجوه
طلعت امشي ماحسيت غير على مقدام يجرني ويگول
:- وين حره امشي وياي وين رايحه
اني مقبلت كعدت بالكاع
باوعت هاي كل اهلي ملتمين تفاجئت شو ما شفتهم قبل شويه
الدفتر بيدي امسح بيه
اسمع مقدام يگول
:- حره لتسوين هيج بنفسج گومي بويه
حره... فهمني حياة ماتت؟
گالت خالتي ... هذا الكاتبه الله ماما
حره... منو سوا هيج؟
مقدام نزل راسه اسمع الجيران تسوي :-خطيه البنيه تخبلت
حره... بيبي وين؟
سالي... بالمستشفى
... حطيت ايدي على كلبي گمت افتر اباوع بالبيوت مادري شادور الفرع فارغ بس اصواتنا بيه گلتلهم
... شنو اني بحلم!
مقدام جرني طببني للبيت گتله... الله يخليك اريد اشوف حياة
گال ... باجر
... وبيبي
مقدام... تخربطت بالجنازه وهسه بالمستشفى
حره... وديني لبيبي
مقدام... مو هسه حره
اني كمت داطلع كتله... اروح وحدي
هو گام لزمني من ايدي كال... يلا هسه اخذج بس اهدي انتظريني بس ابدل باوع لسالي گال
... الزميها بسرعه ابدل
وطلع موبايله يخابر
اني كعدت يم الحديقه ومخنوكه حيل بلكوه اجر النفس بيومها حسيت بفراغ فضيع بداخلي ولليوم احس بيه طول هالوقت والدفتر بيدي اسمع خالاتي يحجن عن الطب العدلي وان حياة ماتت بالرصاص افقد وارجع احاول استوعب
بحيث ماادري شلون وصلت للسياره وببالي ان هاي سيارة عمران صديق مقدام تفاجئت من شفت السياره لمصطفى
ومنتبهت الى من نزلنا للمستشفى
دخلت للردهه ماما واگفه بالباب اول مشافتني حضنتني گالت :- شلون صرتي؟
حره... فتحت الباب اكو هوايه نسوان كبار بالعمر نايمات و بيبي نايمه وحاطيلها مغذيات
گعدت يمها صافنه كلشي محجيت ضليت شويه
الى ان اختنكت حيل
طلعت من الردهه
نزلت تحت وطلعت برا اهفي لروحي اريد اتنفس
ماما اجتني كالت :- اسم الله شبيج وغسلتلي
گعدت بالگاع ماما كالت :- وين ماما وين كعدتي كومي خلي يقيسولج الضغط
حره... مااريد وخرو عني
مقدام... حره الله يخليج كافي تعذبين نفسج
گتله... ودوني لحياة
هو باوع لامي ماما كالت :- مو هسه شوفي بيبيتج اسمهان بلكي تصير زينه من تشوفج
ولتبجين هيج كبالها ترا تموت قهر حرام يلا ماما لخاطر حياة كومي
اغسلج وجهج
اني حطيت الدفتر ع جهه واخذت بطل المي اغسل ورشيته كله ع راسي واهفي لنفسي اريد اتنفس
گمت سندني مقدام
ومشيت دخلت للمستشفى رحت يم بيبي ضليت كاعده يمها
الى ان صحت اول ماشافتني حضنتني وتبجي وتنعى تكولي
:- ولج حره ضاع تعب سنيني سنين اربي واتعب تالي يجي واحد ابن زنا يدمر تعبي الله اكبر ع الظالم
تبجي وتصرخ اني هم حضنتها وابجي وهي هم تبجي وترجع تسكت وتنام ماادري شلون مر الوقت صار الظهر اجه رجال جبير ابيض وعيونه زرگ طب احس شايفته
بس وين مااتذكر اجه باتجاه بيبي اول ماشافها حضنها وبجى
اني تذكرت هذا اخو بيبي اني شفتهم كمت ابجي
حضنت الدفتر وطلعت برا دانزل الدرج لزمني مقدام جان واكف يمه مصطفى كال
:-ها وين حره
گتله... بعد ماكدر اختنگت طلعوني... اجت ماما ورايه هو كللها
:- رشم راح يجيبلج رتيل اني راح اطلع حره لاتتخبل انتبهن لاتطلعن من المستشفى
كلتله... ها خوش
... طلعنه مصطفى فتح السياره دخلت كتلهم... اخذوني لحياة
مقدام باوع المصطفى وهز راسه ومصطفى كلي
:-صار حنروح لحياة
شغل ومشت السياره فتحت الدفتر جانت اغلبها مكتوبه عشوائيات الدفتر جان ورقه مخططه للكتابه والثانيه مال رسم دفتر عادي
بس الي بيه مجان عادي
بالنسبه الي
شفت مكتوبه بيه تواريخ گلبت بيه شفت
ورقه بيها تورايخ ورسم ورود وبنص الصفحه مكتوب
" جدار بيتنا القديم .. هُدِم " ومكتوب بصفه تاريخ ٢٠١٤/٤
فزيت ع صوت السياره لما وگفت نزل مقدام يم محل مال شالات اني اباوعله من الجامه مال سياره اشترى شال اسود واجه انطانياه كال
:- لبسيه
اخذته حطيته ع راسي وحضنت الدفتر وضليت اباوع للطريق الى ان وصلنا للمقبره وبداخلي اكول ... اخر مره اجيت جانت حياة ويايه واليوم جايه حتى اشوفها..
يارب صبرك احس بنار بگلبي شلون تطفى يربي شلون
طبينا للمقبره اباوع للقبور والتواريخ من بعيد شفت قبر هذا لسمرا اتذكره فتحت الباب قبل ليوگفون سمعت مصطفى گال
:- هوب هوب
وسحب بريك
نزلت اركض للقبر انضربت رجلي ماادري بشنو ما انتبهت لان كل همي اوصل ماادري شلون وصلتله حضنت القبر وگمت ابجي واحجي لسمرا گلتلها
:- سمرا اجتج حياة ديري بالج عليها وادعيلي باعي تركتلي هذا الدفتر گالتلي ضميه وارجع
ضميته بس مارجعت
سمرا بقيت وحدي شلون بيا
مقدام... حضني گلي... حره ذاك قبر حياة
باوعت صاير مباشرة ورا قبر سمرا مشيت يمها وبهاللحظه استوعبت ان حياة خلص ماتت
اني شفت الاسم گمت ابجي واصرخ واعاتبها گتلها
:-قبل ايام انتي هنا توزعين كليجه بثواب سمرا شلون تعوفيني اجي وحدي هسه
ضليت وياها فتره طويله كلما يگولي مقدام خنرجع ما اقبل اگله :- متعوده كل يومي ويا حياة ما اعوفها
ضلمت الدنيا گلي مقدام...حره خنرجع
حره.. ماعوفها خاف تخاف ظلمه اضل يمها هنا
مصطفى گلي بهدوء... حره الميت يشوف ويسمع والي داتسوي راح يعذبها
حره... لا احنا متعودات كل يومنا سويه
گال... حياة ماتقبل تعذبين نفسج هيج هي شهيده هسه بالجنه كافي لاتزعليها منج من الصبح لسه لا اكلتي ولا شربتي وباوعي حالج حرام عليج هيج تسوين لو حياة موجوده تقبل هيج تسوين؟
حره... بس هي هسه مموجوده
مقدام كال... موجوده وياج بس انتي ماتشوفيها شهيده خلصت من هالدنيا عايشه احسن مني ومنج يلا گومي حره
كتله... ما اريد خلوني يم حياة ماروح
ضل يلح مقدام وكوا شالوني من گبرها ودعتهن ومشيت للسياره وكفو بالطريق نزل مصطفى جاب مي ولفات مقدام انطاني كال
:- يلا اكلي
حره... كلشي مااريد
مقدام... مايصير هيج تبقين مر يومين وانتي بلا اكل ارحمي بحالج
.. درت وجهي ع الطريق ماحسيت بالوقت الا لما وصلنا نزل مقدام اول مادك الباب فتحتها سالي بجت كالت
سالي... وين عفتوني
مقدام... خالتي هنا
سالي... اي خفت عليكم
طبينا حضنها كال... مابينا شي لتخافين.. رجع باوع لمصطفى كله... يلا تفضل تعشى
مصطفى... لا ما اريد داشوف اخويا وحده بالبيت
سالي... وديتله اكل دكيت الباب مفتح تالي غلفت الاكل وخليته يم الدرج عود شوفه اخاف مااخذه
مصار نص ساعه من حطيته
مصطفى... ليش تعبتي نفسج
حره... اني مشيت اسمع مقدام يگوله :-لا والله احنا التعبناك
طبيت للغرفه قفلتها وگعدت اجه مقدام ورايا دگ الباب مفتحت گلي
:-حره فتحي الباب ليش غالقتها
حره... عوفوني وحدي
گال... دتخوفينا عليج لتسوين هيج
حره... والله مبيا شي بس عوفوني
مقدام... تمام بس فتحي الباب واگعدي وحدج محد يزعجج
مافتحتها ضل يحجي مجاوبته سكت وراح ضليت وحدي ابجي گمت باوعت لروحي بالمرايا
وفهمت ليش الكل جان لما يشوفني عبالهم بيا شي
جان شكلي ابد مو تمام ومبهذله وشعري مكفش وعيوني حمر وخشمي حيل بحيث الي يشوفني عباله معنفه او شارده
كمت اباوع لروحي واحجي اگول... يحره شگد تحملتي وانقهرتي بهالعمر ولشوكت راح تضلين هيج تحترگين وحدج
ضليت وحدي ابجي واسولف واسمع سالي كل شويه تدك الباب تگولي
سالي...حره شبيج خوفتينا ويامن تحجين
اسمعها ومبيا حيل اجاوب ولاعندي قدره احجي ويا احد اريد بس ابقى وحدي درت وجهي باوعت للدفتر رحت فتحته شفت عنوان بالدفتر مكتوب بخط جبير "حياة حُره" والصفحه مال رسم ملونه بلون خشبي سمائي والصفحه الي بعدها مكتوب بيها
"اكبـر شيئ مشترك بيني وبينها"
فظاعة الأحداث التي شهدناه
بقيت هيج افتر واحجي وحدي وابجي انوب كمت دامشط شعري امشط وابجي
حسيته ميتمشط گمت جبت المگص وگصيته
هو جان طويل يوصل لخصري
گصيته صار جزء مستواه لرگبتي واصل
والثاني لخصري انوب من شفته جمعته يمي وكمت ابجي
مددت شويه و الدفتر بحضني فتحته ع ورقه بنهاية صفحاته جانت شبه مطويه بداخله فتحتها لگيتها ملزگه بصمغ باوعتلها مكتوب
بيبني وبين الحب فقر بعيد
من نعمة المال وجاه الاب
يااهتي كفي ومت يانشيد
شتان بين الطين والكوكب
ومكتوب فوگ ع الدفتر ٢٠١٦/٢٠١٧
وتحته مكتوب "الا لعنة الله على الظالمين "
والصفحه الي بصفها ملونه باللون البرتقالي والاصفر تذكرت هايه الورقه والخط خط مقدام تفاجئت من وين الها هالورقه
بعدين تذكرت ورجع بيا الزمن من نظفنا هايه الغرفه وجانت داتكنس حياة
گمت افتر واكول اي هنا جانت واگفه رحت اجيب السطل وجانت هنا وبوقتها طوت ورقه وحطتها بالحمالات
رجعت باوعت للورقه بداخل الدفتر واباوع لزوايا الغرفه حتى هذا الترتيب يذكرني بحياة رتبنا الاثاث اني وياها كعدت ابجي حطيت الدفتر وبقيت بين ذكرياتي
كل شوي يجي واحد يدك الباب واكولهم... بخير عوفوني الى ان بدت تهدا الاصوات وكلها نامت الا اني بقيت احترگ بهدوء
گمت شلت الدفتر و سندت نفسي ع الحايط دوخه مو طبيعيه فتحت الشباك مال الغرفه توه طالع خيط الفجر
اجتني نسمة بردوه واسمع اصوات العصافير
بقيت فاتحته وسانده راسي عليه اتنفس احس الهوا انقطع عني ماعرف شگد مر وقت
مشيت بهدوء فتحت الباب وطلعت من الغرفه بالهول مقدام واخو بيبي نايمين
تفاجئت شعنده هنا رحت للاستقبال نايمات البنات ومن ضمنهم بيبي سألت نفسي شوكت اجت؟
حطيت ايدي ع كلبي واني اتذكر اخر مره جنا اني وحياة نايمات بهالمكان
اختنگت
طلعت للحوش واگول بداخلي.. اخر مره بيبي ما اجت وحدها
طلعت برا وين اريد اروح وشنو الي اريده مااعرف كل الي اعرفه اختنكت والغصه وصلت لبلعومي
مشيت ادور بالفرع انطخيت بواحد باوعت مرتضى
هو باوعلي متفاجئ وبين عليه الخوف والقلق ضل يباوع لملامحي غمض عيونه ورجع باوع بعيوني گال
مرتضى... حره انتي بخير
حره... انت شتشوف
مرتضى... اهلج مايدرون انتي طالعي مو
باوعتله سكتت وتركته ومشيت هو لزم ايدي گالي بهدوء :-وين رايحه حره ارجعي انتي مو بوعيج دنيا فجر وين طالعه
حره... وخر عني
مرتضى... تمام زين وين داتروحين گليلي
حره... ميخصك وخر عني
دفعته ومشيت
هو اجه ورايه گال :- اخابر اخوج اكله؟
حره... انت شدخلك وتگوله عوفوني بحالي اريد اتنفس
مرتضى... زين اجي وياج
حره...لااا ما اريد
مرتضى... بس اني اريد
سكتت مشينا شويه وصلنا للمكان الي چنا نلتقي بيه اني وحياة گتله... باوع هنا جنا نلتقي اني وياها
گال ... انتي ومنو؟
حره... اني و حياة
مرتضى... لهالدرجه تحبيها
حره... جانت روحي
مرتضى... وهسه
باوعتله... ماتت دفنتها
مرتضى... الروح ماتموت
حره... بس مراح اشوفها بعد
مرتضى... تگدرين تحسين بيها مثل ماهي تحس بيج
گعدت بنص الشارع دايخه مابيا اوگف هو كعد يمي گال :- ليش هنا تلتقن
حره... نخاف
مرتضى... من شنو؟
حره... من بابا
مرتضى... هو وينه؟
حره... راح
مرتضى... وين راح؟
گتله... تركنا وسافر
هو جر نفس گال... ليش تخافين منه؟
حره... مجان يقبل احجي ويا حياة
كال... ليش؟
حره... جان يگول عنها سنيه
مرتضى... وشنو الفرق ؟
حره... هو يكرهها يكره السنه
مرتضى... جان يضربج؟
حره... اي لما جان يدري ملتقيات يضربني ويخوفني
گال بصوت ناصي... مخنث
ورجع باوع بعيوني گال... وانتي ليش هيج ضليتي مصره تشوفين حياة
حره... لان يومي ميكمل بدونها
مرتضى... اليوم يمر ويكمل سواء ردتي او لا انتي بنفسج تگدرين تخليه مر او حلو
كتله... شلون؟
مرتضى... حسب تفكيرج
حره... شلون يكون حلو وحياة ماتت
مرتضى... لا ماماتت استشهدت اكو فرق
حره... شلون
مرتضى... الشهيد عايش
نزلت راسي كتله... كلامك هذا ماينفعني دامني مااكدر اشوفها
مرتضى... فكري بيها انتي تحبيها صدگ كـ اخت وتتمنين سعادتها المفروض تتقبلين هالواقع وبلا ماتسوين بنفسج هيج
اني باوعتله گال... انتي قارني وافترضي هي لسه عايشه جان گعدت بهيج وقت تعجن وتخبز وتتحمل هالحر حتى تبيع للناس وتتحمل كل هالقسوه بحياتها
بينما هسه هي گاعده بقصر بالجنه ومرتاحه هي واختها وانتي زعلانه رغم تدرين بيها مرتاحه
لو ضليتي هيج زعلانه وتأذين بنفسج هنا انتي انانيه
گتله... اني انانيه؟
مرتضى... اي لان ترديها وياج هنا رغم تدرين هي ممرتاحه
گتله.. مشتاقتلها حيل
مرتضى... اقريلها قرآن وصبري روحج انتي تدرين بيها عايشه ولابد يجي يوم وتلتقن بالجنه
حره... شني الضمان اروح للجنه
مرتضى... اكيد اذا تحملتي وصبرتي ع هذا كله الله مراح يضيع تعبج مو صح؟
حره... انت تحجي مثل حياة
مرتضى... يلا گومي روحي لاهلج
حره... اريد اتنفس
مرتضى... شنو ببيت اهلج ماكو هوا
حره... الهوا بس يم قبر حياة هنا كلشي يخنگ حتى الهوا
هو نزل راسه گال ... كومي نتمشى
حره... ما اريد
مرتضى... زين احجيلي بعد عن حياة
كتله... جنا نكعد يم بيت ابو حسين تعرفه
مرتضى... المحمداوي ؟
كتله... اي جان بـ ٢٠٠٩ مكامل بنائه لسه جنا نگعد ع البلوكات هناك ونگعد نسولف ووحده تصبر الثانيه
مرتضى... ليش انتي شگد عمرج
حره... بعدني ١٧ سنه
مرتضى... ومن ٢٠٠٩ تصبرون بعض؟ ع شنو
... ضحكت وبجيت بنفس الوقت گتله... مشفت شي من حياتي
هو ضل ساكت گال... كوني على ثقه الله راح يعوضج عن كل يوم سيئ عشتيه
گتله... شوكت
گال... مو بعيد هاليوم
كتله... بس تعبت
گال... وتعبتيني
گتله... ليش
سكت گال... يلا ترجعين لبيتكم
گتله... لا اريد اروح لحياة
گال... حياة اذا شافتج بهالحاله تزعل لازم تاكلين وتغيرين ملابسج.. وباوع لشعري وجر نفس ونزل عيونه رجع حجه... اذا ماتردين تزعلين حياة
اما اذا يهون عليج زعلها فبراحتج
كتله... لا طبعا مااقبل تزعل
كال... لعد يلا گومي
اني گمت وهو دنك انطاني الدفتر ومشينا نرجع للبيت
ببداية الفرع شفت مقدام وسالي شافوني اجو يركضون عليه
مقدام كال... وين رحتي حره
سالي حضنتني كالت... وگعتي گلبي ولج
مقدام سندني گال.. ها مرتضى وين لگيتها
گال مرتضى... جانت مخنوگه وباوعلي ورجع نزل راسه
مقدام گلي... شبيج ممتوازنه امشي هسه تتريگين
سالي گالت... يلا راح اسوي ريوگ
مقدام گال... يلا مرتضى تعال تريگ
مرتضى... لا تريگت بيض يخبل.. ويأشر باصبعه عود توب
گاله مقدام... بالعافيه
وطبينا سالي گالت لمقدام... وين نصبتو الفاتحه...
گال بجادر.. تريكنا وكعدو كلهم اني رحت نمت على رجل بيبي وهي فاقده كلما تفز تكوم تبجي وترجع تمسح ع راسي
واني اخذت العلاج وبعد ماادري بالدنيا شكو
نسوان يمنا هوايه وفاتحه وقهر فتحت عيني شفت حياة تمسح ع شعري وتبتسم
اني ابتسمت وغمضت من رجعت فتحت عيني هي ماكو
كمت ادور هي ماكو اكو مره كالت... اسم الله وين رايحه يمه
وكامت وياي
اني رجعت كعدت
رتيل اجتني تحجي وياي بس مااستوعب شتكول
اخذت الدفتر ورجعت طبيت للغرفه ضليت اقرا بيه رجعت لصفحات حياة حره جانت كاتبه بيه
من أكثر الامور المؤذيه التي قد شهدتها أثبتت لي قساوة هذا العالم
خطيبي وكلماته
جدتي وأمراضها
سمرا وأحلامها
مقدام وحسراتـه
حُـره وعيناها
سالـي وبرائتها
رتيل وحيرتهـا
الموصل والشقراء
أنا و ماشاهدتـه
گلبت بالصفحات الاخيره جانت كاتبه
٢٠١٧
الجـسر الذي مشيت عليه كاد يسقط قبل سنين .. لولا امر ربـي
لهنا وسمعت صوت عالي وكأن عركه فتحت الباب وطلعت بسرعه شفت مره شگره عيونها ملونه ممحجبه
تبجي وبيبي تضرب بيها وتتحسب گلبي وجعني
هايه هم عندها شامه بخدها بسرعه ربطت بينها وبين رسمة الدفتر رغم بالدفتر الرسم مو شي لكن مبينه هايه العلامات وهي المره تبجي ملخت روحها
اسمع بيبي تگوللها... هسه تذكرتي عندج بنيه حسبي الله عليج و على ذاك الكلب
اني حطيت ايدي ع گلبي حسيت هالمره ام حياة وهي تبجي وتسوي
... وين دفنتوها
وبيبي ماادري منين اجتها القوه كتلتها و طردتها من البيت اني كعدت بمكاني كمت ابجي ام حياة هسه يلا جايه بعديش جايه
اجت رتيل كومتني راحت للغرفه طلعتلي تراك وباوعت لشعري بجت كالت... ليش هيج سويتي ولج
مجاوبت مسحت دموعها كالت... راح اعدله الج وجابت المگص وگصتلي الباقي صار لركبتي كالت... لتخافين يرجع يطول حااجيبلج علاج
اني ساكته محجيت انطتني التراك گالت... يلا اسبحي باعي شصاير بحالج
كتلها... تمام
صدك رحت سبحت وطلعت هي مشطتلي ولبستني طوگ اسود وحفايات
اخذت الدفتر وطلعت شفت رشم برا ماحاول حتى يباوع بعيوني يمكن مقهور اجه گلي...
... شلون صرتي
حره... منو كتلها
رشم... راح نلگاه وقسما برب الكعبه انتقم منهم كلهم
حره... منو هو
رشم... كلب من حي***
گتله... قريب علينا... بجيت كتله.. ليش هيج سوا
گال... لانه كلب تابع الهم
گتله... لزمتوه
گال... لا انهزم
كتله... شمدريكم هو؟
گال... اكو مره شافته طالع وبيده سلاح وع قميصه دم ولما داهمنا بيته لكينا السلاح عنده بس هو هارب
حره... لازم تلكوه لازم ميروح دمها
لزم شاربه وگال... ازينه والله اذا مااخذ حقها
درت وجهي شفت مرتضى يباوعلنا شافني اجه علينا
رشم گله... شلونك مرتضى
گله... هلا.. ورجع باوعلي گلي... شلون صرتي
حره... بخير
رشم گال... ديري بالج على نفسج لخاطر حياة وسمرا
گتله... الزمو الكاتل واني بخير
هو كال... ان شاء الله
مشيت شويه سمعت صوت بنيه درت وجهي نفسها ام حياة اول مشفتها بجيت عيونها تشبه حياة هي هم جانت تبجي لزمتني من اديه گالت
... الله يوفقج دليني ع قبرها راح اموت قهر ع بنتي والله
گتلها... وين جنتي كل هالسنين
هي بجت گالت... والله جنت اسأل عليها
... شنو الفائده وضلت بحسرتج
هي ضلت تبجي دليتها ع مكان القبر گالت... اخر طلب سويلياه
كتله... شنو
گالت... اريد صوره لحياة
... ماشي اجيبها الج بس مو اليوم
هي شالت ايدي باستها اني جريت ايدي حضنتني وراحت طبيت للبيت رجعت للغرفه اخذت موبايلي اشوف صورت حياة
ضليت اباوع واقرب بالصوره وابوس بيها
شفت جاياتني هوايه رسائل من انوار ومن رتيل قديمات دخلت ع الاشعار مال الرسائل شفت رقم غريب جان دازلي رساله قبل يومين
بيوم مقتل حياة كاتبلي الصبح
:-شلونها الحلوه
وراها الصبح ب ١٠ دازلي :- شنو رئيج البسج حلقه؟
وبعد مقتل حياة كاتبلي :- سمعت الخبر وزعلت.. البقيه بحياتج
دزيت رساله... منو؟
بس ماوصلت معندي رصيد
تركته ونمت لليل صحيت ع صوت اهتزاز الجهاز جان بصف راسي فتحته مسج ثاني جان كاتبلي
:- اليدوسلي ع طرف اكسر رجله شنو رأيج اكسر رجل مشعل؟
اني بسرعه فزيت كلت منو هذا طلعت دا اجيب رصيد وگفني مقدام گلي
:- وين رايحه
كتله... دااجيب رصيد احجي ويا صديقتي
كال... اني راح اجيب ابقي
صدك راح جابلي عبيته واتصلت ماكو مجاوب
دزلي مسج :-هيج مستعجله تسمعين صوتي
دزيتله ... انت منو؟
کال ... اتركج مني تردين تشوفين نهاية مشعل ؟
دزيتله ... جاوب ع الاتصال
گال ... مو هسه
دزيتله ... شلون يعني تجيب نهاية مشعل؟
گال ... الصبح تعرفين
دزيتله ... احجي هسه
ماكو مجاوب اتصلت مغلق
ضليت اتصل ماكو
لهناك حسيت بدوخه قويه وراسي الم مو طبيعي مددت وغفيت لصبح كعدت باوعت رتيل فارشه يمي ومسويتلي كمادات
فزيت شفت الموبايل ماكو مداز رساله كمت صليت وكعدت اقرالها قران هي وسمرا وادعيلها بالرحمه
شويه وكعدو البقيه اني رجعت مددت صاحوني ع الريوگ بس كلشي مااشتهي جابتلي رتيل الريوگ يمي مقبلت اكل ضلت تلح اخر شي ملت وگامت
اسمع سالي تكوللها... هسه شنو بيبي حتروح
اني فزيت كتلها... وين تروح؟
سالي... ويا اخوها
حره... ليش؟
رتيل كالت... لعد وين تبقى مابقالها شي هنا
اني بجيت كتلها... والبيت
رتيل... انوار تريد تشتريه
اني حطيت راسي ع المخده وبجيت رتيل گعدت يمي وضلت تمسح ع راسي كالت... الله يبرد گلبج
شويه واجاني اشعار فتحت الموبايل شفته دازلي مسج
:- اتعلمي الصبر عزيزتي
وبهالاثناء دزلي رساله ثانيه :- الهديه بالطريق حتوصل بعد ٣٠ دقيقه او اقل
اني فزيت وگمت وگفت بالحديقه وگلبي يخفق ضليت اروح وارجع اتصل عليه ميجاوب
الى ان بالگوه مرت ٢٠ دقيقه اندكت الباب اني حسيت البروده سرت لجسمي
بسرعه رگضت فتحت الباب وشفته... يتبع....
___________________
مواجعنا باتت خسارة
هانت الدنيا علينا وعند الله لا نهون
الا لعنة الله على من سلب حياةَ من الحياة
اليوم درسونه درس
گالوا الصحبان الصدگ لا ما يفرقهم دهر
ارفعت اديه وحضرت
كتلة يأستاذ الدهر يكسر بالأصحاب الظهر
إنكسر ظهري بفرگتج..
من الگبر واسمع ضحكتج
عيني يجويها الدمع لمن اشوفج بالصور
گوومي..
گوومي طحت مثل الورگ
لميني يا أجمل غصن طاح وكسر گلب الشجر
الگبر ما يدفن ورد
دفنوووج ليش بهالگبر؟؟؟
يا وسفة وجهج بالترب
والليل وحشة بلا گمر
مو گلتي ابد ما نفترگ؟؟
يالكلهن عيونچ عشگ
صيحلي (حُرة) وأنطفي
گووومي انا بروحي جمر
اشعجب يمج وانتحب؟
وانتي ولا رفلج گلب؟
فتحيلي گبرج خلي اطب
واحچيلج شسوة الدهر
الآااااه ما تنفع بَعد
والونه ما تنفي البُعد
بس اني لا ما ايست
لسه ترجعيلي انتظر
من الموت اخاف شكد جنت!
هسه انتي من امشيتي
صرت انتظر.. الگة الگبر
ويصير داري وبيتي
جنتي العمر
اااه يالعمر .. يعني انتي لو متي صدك معناها انا العمرري گصرر
نامي نامي وارتاحي باللحد
ياريت ميتة ولا اشوفج هالوضع
ينزف اللي بنص گبر فاگد ضلع
صوتي لمن فرفحت لا ما طلع
على گبرج ورد آثاره الدمع
يااگبر سلم عليها
ادري بيها مو باديها
بعد جم يوم واجيها
لمن يموت الصبر... 💔💔
بقلمـ... الشاعره rasoleui
motanafes
فراشاتي سوو متابعه للحساب ع الانستگرام.
الحساب جميل وينشر تصاميم وتصوير. للطبيعه... ❤
من ماتت سمم كلتلكم تحملونا هالفتره لانها فتره صعبه على حره
هسه. هم حااطلب منكم تتحملونا لان هالفتره كلش صعبه عليها
وبالذات حياة توؤم روحها لحره وانتو شفتو علاقتهن شگد قويه
لاحداث الموصل مااتذكر بالضبط باي بارت ذكرت انو حياة جانت عندها صديقه بالموصل وهايه الصديقه مااعرف شمسويه لحياة لدرجة حياة كرهانتها ورايده تشتكي عليها اذا تتذكرون
البنيه كلت اسمها يمكن حميده بس اسمها الحقيقي خلود
اتمنى من خلود اذا قرت القصه وكانت موجوده تتواصل وياي
او ويه حره
بعض من كتابات حياة عن خلود
٢٠١٤/٧/٨
رأيت في المنام شجرة بيتنا في الموصل تحترق.. اخبرني حَدسِـي انها فتنة خلود
وبعدها بسنين رجعت كتبت
- ٢٠١٧/٥/١
الشَـجره المُحترقه في بيتنا القديم الذي كُـنت اراها في منامي
لم تكُن خـلود
كانت انا
وبعد هوايه عن خلود اتمنى اذا خلود قرت القصه تتواصل ويانا وهي اكيد حتتعرف على حياة لانو اسم حياة هو اسمها الحقيقي
وكلشي صار بالموصل حتى حادث زوجة خال حياة خلود شهدته
وهسه اتركم ويه القصه
قراءه ممتعه فراشاتي....
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!