«الحلــــــــقه الرابــــــــــعه»
رواية... هل كانَ حُلماً...؟
{العِراق-المُصغَر...ارواح-مهشمه}
بقلمي ... لؤلؤة_البِحار ...
___________________•
حره :-فزيت وگمت وگفت بالحديقه وگلبي يخفق
ضليت اروح وارجع اتصل عليه ميجاوب
الى ان بالگوه يلا مرت الـ٢٠ دقيقه اندكت الباب
حسيت البروده سرت لجسمي رگضت بسرعه فتحت الباب شفت رشم وواحد وياه
تذكرته هذا نفس الشخص الي جاب حياة لما انقتلت سمسم
بسرعه كتلهم بخوف... هلا شكو؟
رشم گلي :- شبيج خايفه ..؟
گتله... لا ماكو شي
رشم ... اجيت اكلج خبر حلو
گتله.. شنو؟
رشم... وصلتنا فيديوهات عن مشعل ومصايبه
كتله... شنوو؟
صديقه كال... شخص مجهول وصللنا فيديوهات عن مشعل واولاده وتدينهم بشكل قانوني
گتله... شنو محتواهم
گال... تعذيب تكسير عظام لاشخاص مدنين وو
كتله... وو شنو؟
رشم كال... وقتل
اني بجيت رشم كال... افرحي كل هالادله راح توديه ورا الشمس
حره... الحمد لله يارب
رشم گلي... بعدنا بالبدايه والبادي اظلم على كل حال خليج على ثقه راح انتقم منهم كلهم وقريبا حتسمعين اخبار تسرج
حره... ان شاء الله تفضلو
كال... لا عندي شغل يلا ابو حوراء
اشرله وصعدو السياره وراحو بسرعه رجعت فتحت موبايلي اتصلت ع الرقم مجاوب دزيتله مسج
... انت منو؟
جاوبني بمسج ... إثنين لتسأليهم هم منو الچذاب والمحتال
كتبلتله... وانت اي واحد بيهم؟
گال ... اني الاثنين
گتله... شتريد وين تريد توصل!
مجاوبني تركته وطلعت احس بخنگه درت وجهي ادور عن مرتضى ملگيته دافوت لبيت حياة بس مااكدر ماتجرأت ادخله
تركته ورجعت للبيت طبيت للغرفه سالي كاعده هي ومروه
اخذت الدفتر ودا اطلع سالي كالت
.. وين رايحه؟
كلتلها... بالحديقه خنگه هنا
گالت... اجي وياج
سكتت ورحنا كعدنا بالحديقه النسوان طابه طالعه الضجه اذتني احس اريد ابقى وحدي بس محد يخليني
الدفتر بايدي
اخاف اعوفه لانه اخر ذكرى من حياة واخاف اقراه وانجرح اكثر
حسيت بخنگه اريد اطلع گتلها
:- اختنگت اريد اطلع
سالي :- لا يمعوده خطر و مقدام وصانا منطلع
سكتت جريت نفس كلتلها... كومي جيبلي مي
كالت... تمام
راحت دخلت للمطبخ گمت بسرعه و طلعت
حسيت بخنگه قويه ماگدر ابقى ضليت اتمشى وبكل خطوه
اتذكر حياة
هنا ضحكنا هنا بجينا
الى ان وصلت بيت ابو حسين وين جنا نلتقي
گعدت بالكاع استندت ع الحايط أحس رجليه متشيلني
باوعت اكو ناس بس مااحس بوجودهم كل بالي شلون راح اكمل طريقي وحدي
الشي الوحيد الي مصبرني ادري بيها مرتاحه بس الفراق صعب
فتحت الدفتر ع صفحات "حياة حره" شفت الورقه الي بصفها ملونه بلون احمر وتحتها مكتوب «٢٠٠٩ /٢٠١٧»
"صديقتي حُره مَاقلتيه صحيح ،، هذهِ الحياة حارقه لاحلامنا البسيطه .. هذا ما تيقنتهُ بعد اتهامي
باني مُرتده ..
وسقوط الموصل ..
واستشهاد حبيبي ..
وهجرتي حيث لاأريد ..
وحرق الشقراء ..
واستشهاد اختي ..
لقد كنا ضحايا ..
نعم نحن الضحايا ..ضحايا الحروب"
اقره بكلماتها وابجي ابجي بقهر ووجع داخلي گلبي
كلشي بهالدفتر بيه معنى بالنسبه الي حتى النقطه
الانسان من يموت تصير ابسط اشيائه عزيزه عند احبابه
ابجي وبداخلي اكول.. شكد تعذبتي يااختي
رفعت راسي باوعت شفت نسوان اثنين واكفات يمي مسحت دموعي المره تقربت مني وگعدت كالت
:- بنتي انتي بخير
اشرتلها براسي اي گالت :- ماما وين بيتكم رجعي الدنيا الظهر ليش وحدج هنا
صفنت گلت بداخلي... شبسرعه صار الظهر.. كتلها... ان شاء الله خاله
هي مسحت ع راسي وراحت رجعت اقره بكتاباتها وبداخلي ركزت على حرق الشقراء
منو الشقراء؟
معقوله تقصد حوراء؟
بس حوراء مو شكره!
معقوله حياة شافت حرگ بنيه بالموصل؟
حطيت ايدي ع گلبي حتى من اتنفس اتأذى كلبت الصفحه الثانيه من الدفتر مكتوب عشوائيات سنين وكلمات
ورد..
وجع..
حب..
اشتياق..
وتحت مكتوب
" ٢٠١٧ كانت أصعب مِن حيـرتي في تجميع نقود الـدواء لـجدتي"
اقره وابجي... لعد شگد جنتي تعانين ياحياة معقوله جنتي تحتارين بعلاج بيبي لهالدرجه
بجيت همست... يارب صبرني
رفعت راسي شفت مرتضى واكف يباوعلي فزيت مخروعه گتله
:- شعندك هنا؟
اجه كعد بصفي گال :- ليش هيج تسوين
گتله :- شنو؟
گال... باوعي حالچ وباوعلي من فوگ لجوه. كال.. دتتصرفين وكأنج مو ويانا اذا ضليتي هيج تتخبلين
كتله... ياريت بلكي انسى لما افقد عقلي
هو گال... حياة ترضى بهيج حجي؟
اشرتله... لااا
گال.. لعد ليش هيج تحجين
كتله... تعبت
گال... كلنا تعبانين بس كل واحد يعيش وجعه بطريقته
الهشاشه الي ظهرت لكل الناس هسه تضرج متنفعج
كتله.. شلون يعني لكل الناس
كال... هوايه يحجون عنج ويكولون راح تتخبلين اذا بقيتي هيج
گتله... مو بايدي احس دافقد الوقت ماادري شلون يمر مرات فجأه الكه نفسي بمكان وماادري شلون وصلتله احس بخنگه حيل قويه..
هو باوع بعيوني كال... الدنيا متوكف على احد كلنا مات النا عزيز وشصار تمر سنين وتتعودين
عودي نفسج
انتي بمكان مؤقت والموت حق علينا
كتله... دا اختنگ... گلتها بألم
گال... احس بيچ
سحب نفس گال... خليچ قويه اذا ما علمودچ علمود اخوانج
باوعتله متفاجئه كتله... الكل يكول عنك مخبل ومتفهم شي بس داشوف شي مختلف منك
ضحك كال... المخبل هو اكثر واحد فاهم الدنيا
گتله... شلون يعني؟
گال... نضحك ع كلشي لان ندري ماكو شي يستاهل نبجي علموده
گتله... الي ماتت صديقتي
گال... للمره الثانيه استشهدت ما ماتت الفرق شاسع
وبالنهايه ماكو واحد مايروح لدار حقه
نزلت راسي گتله... اريد التهي شلون داختنگ مااتحمل ابقى هيج
حاتخبل
گال... صيري سباعيه
باوعت لعيونه رجعت باوعت للگاع كتله... انت مخبل مو؟
متصير صديقي
باوع بعيني ابتسم باوعتله كتله... انت تحفظ السر؟
گال... اي اعرف اسرار كل اهل المنطقه مثلا احمد ابن سمر يحب وحده وكل يوم يلتقي بيها وماحجيت
وهم سلمان ابن زينب باگ من ابوه ١٠٠ الف وهم ماحجيت
وهم محمد ابنـ...
قبل ليكمل كتله... هاي انت تحفظ السر وهيج خرطتهم گدامي
هو هز راسه گال... بس كدامج لانج حبابه ماتحجين
گتله... تمام يلا احنا اصدقاء.. وشبكت اصابع اديه ببعضهن
هو كال.. ماشي.. ومدلي اصبعه ينطيني اصحابه
كتله... لا حرام انت ولد ميصير تلزم اصبعي
كال... لا مخبل عادي
باوعتله باستغراب بهالاثناء سمعت مقدام و مصطفى وسالي اجو باتجاهنا وسالي تخابر اسمعها تكول
... هايه هايه لكيناها
اجه مقدام جرني گال... شلون تطلعين ومتكولين..
اني سكتت سالي گالت :- ليش هيج تسوين وكفتي گلوبنا
مقدام كال :- استغفر الله.. ورجع باوع لمرتضى كله... الله يسامحك انت هنا وتدري بينا ندور عليها
مرتضى گال... مو مايصير اگوللكم يصير غش
مصطفى كله ... ليش؟
كله... مو دتلعبون ختيلان شلون اكوللكم مكانها
مصطفى هز ايده وباوع لمقدام
مقدام قبل ليحجي مصطفى اشرله بمعنى ادري
وحط ايده ع كتف مرتضى گله
مقدام... ريتني مثلك
سالي گالتلي... امشي
اني شلت الكتاب ومشيت رجعت للبيت تلكتني رتيل حضنتني وبجت گالت
:- حره الله يخليج كافي تسوين بنفسج هيج
حره... اشرتلها ب إي ودخلت شفت بيبي كاعده بالهول رحت حضنتها وگعدت يمها حطيت راسي ع رجلها هي ضلت تمسح على راسي
اجه مقدام عيونه حمر گعد يمي گال :-حره ليش طلعتي
گتله... ما ادري
مقدام... شنو ما تدرين
حره... محچيت اغلب تصرفاتي اني مجنت واعيه فجأه الكه نفسي برا شوكت طلعت ماتذكر مثل الفاقده تقريبا
جابت رتيل الاكل ليمي گالت... اكلي
كلتلها... ماا شتهي
گالت... لا لازم تاكلين مو بكيفج
جرتني
كتلها... مااشتهي والله
رتيل... اكلي حتى تاخذين علاجج شوفي شصاير بحالج بقيتي جلد وعظم
سوتلي لفه اكلت منها شويه ولعبت نفسي ركضت للمغسله تقيئته اجت رتيل وراي غسلتلي ومقدام شربني الدوه گال
مقدام ... لازم ترتاحين نامي شويه وشالني وداني للغرفه گاعدات سالي ورغد
اسمع سالي تكول... شبيها
مقدام كال... تعبت خلي ترتاح
رغد كالت... سوده عليه حره ليش هيج تسوين بروحج
سمعت بيبي بهيه صاحت سالي راحتلها اسمعها تكوللها:- شبيها حره؟
سالي كلتلها... لا مبيها شي يمكن من التعب
طلعت رغد ورتيل سدت الضوء ومقدام عدل البردات بقيت صافنه بالسكف وافكر بكل هذا الي صار وشلون بـ ٣ اشهر انقلبت حياتنا احس وكأن واحد خانگني حتى النفس اخذه بصعوبه
اني أكثر وحده عانت بصغرها غطيت راسي وضليت ابجي زعلانه على نفسي حيل
واحس الحياة بدون حياة متسوى ضليت افكر
اني نايمه بالغرفه
وحياة بالگبر
اختنگت ضليت ابجي واتحسر الى ان غفيت
گعدت على صوت رتيل گالت ... كعدي تعشي
حره... مااشتهي شي
رتيل...بس شويه اكلي حتى تصيرين زينه
حره..مااشتهي فدوه عوفوني
حجيتها ورجعت نمت
غفيت وشفت نفس الشريط بحلمي
لما حياة رادت تروح تسد الابواب كلتلها
... اجي وياج
كالت... لا علما تضمين الدفتر ارجع
فزيت ابجي سمعت مقدام كال... اسم الله شبيج
شلت المخده ادور ع الدفتر البيت هدوء وسالي و رتيل نايمات كمت هو كام وياي كال :- شبيج حره
كتله... الدفتر وينه
احجي وابجي
كال... بالبوفيه مالتج خلته سالي
حره... ركضت اطلعه حاضنته وابجي بصوت عالي
گعدت رتيل خايفه مقدام جابلي مي
گتلهم... الدفتر مضموم ليش لسه مااجت لييش
رتيل كالت... شهالحجي حره انتي انسانه مؤمنه وتعرفين الله وتخافين لتحجين هيج الموت حق علينا كلنا الي صار لا بايدي ولا بايدج الله رايد هالشي
... مارديت عليها حضنتني ضليت ابجي الى ان غفيت وانعاد عليه شريط لما جنا صغار بوقتها جان ابويه وامي طالعين والدنيا شتى
وجوعانه لا اكل لا فلوس
وقت العصر رحت من السياج
شمرت حجاره غلفتها بورقه لحياة كتبتلها
... اريد اجي يمج عادي
هي اجت وجانت لابسه تنوره رصاصيه وقمصله حمره
اني ضليت اراقبها من السطح هي باوعتلي ضحكت
اشرتلي تعاي
اني كيفت طفرتلهم من السياج
گالت... لعد ابوج وين؟
گتلها... طلع
گالت... خاف يدري انتي هنا
كتلها... خلي يدري تعبت منه شيسوي خيسوي هي سكتت كتلها... ضوجه تعاي خلينا نلعب
كالت... تمام شنلعب
گتلها... غميضان اشدلج عيونج وع الصوت لازم تلزميني
حياة... لج هايه اللعبه مال هوايه بنات مو وحده
كتلها... لعد شنلعب
كالت... غميضان انتي غمضي وعدي من واحد للعشره ولازم تدوريني وتلكيني
كتلها... ماشي اني فعلا رحت غمضت وبديت اعد من الـ1 للـ 10 خلصت كلت "حلال"
ورحت ادور عليها طبيت للهول بيبي كاعده وتباوعلي وتبتسم شاورتها كتلها :-وين حياة؟
كالت... لا الغش ممنوع
طبيت للمطبخ شفت تنورتها طالعه شويه من ورا الباب فتحته وكتلها
:- لزمتج وضحكنا
فزيت ابجي رتيل يمي تقرالي ايات
گتلها... رتيل انطيني مسكن جسمي يوجعني
رتيل... خاف ميصير
حره... انطيني ومعليج
صدگ راحت جابتلي اخذته وبقيت بين النايمه والكاعده
بهايه الفتره جنت بغير عالم غمضت عيني واول ماغمضت تذكرت من كام يقرا قرآن وصعدنا نحجي ع السياج تذكرتها بوقتها گتلها
:-اني لكيتج انتي ملكيتيني
هي ضحكت كالت... اكلج سر؟
حره... شنو؟
گالت... اني عمدا طلعت طرف من تنورتي
حره... ليش؟
كالت... گلت خطيه تخسرين
حره... ضحكت
سمعت ابويه اجه ركضنا اثنينا نزلنا شافني دانزل گال
:- هاي جنتي يم حياة
كتله... لااا
لزمني من شعري گال... لتجذبين وضربني راجدي
هنا فزيت وگعدت بسرعه باوعت ماكو احد يمي بجيت واني اگول.. بعد مااريد انام بكل الاحوال ممرتاحه حطيت الدفتر يمي واحس بدوخه قويه ووجع براسي وعيوني
هوسه برا والوقت تاه عليه فتحت الدفتر اكلب بيه عشوائيا شفت مكتوب بورقه
" انتِ سنينچ مورّدات وانه سَنيني مَحترگة"
صفنت افكر عن منو تحجي انتبهت اكو تاريخ تحته
٢٠١٧/٣ ضليت افكر شصار ويانا بشهر الثالث؟
تذكرت اليوم الي رحنا بيه لبيت ابو حياة ولبيت سمرا بوقتها حياة انقهرت ودمعت عيونها معقوله جانت تقارن روحها بسمرا ؟
شفت جاره سهم من هالشعر وكاتبه تحته
"الورده ضاعت والسنه صارت رماد"
ضليت مختنكه وابجي عرفت حياة جانت حاسه بهاليوم حاسه هي حتموت
گلبت بالدفتر شفت كاتبه
تاريخ وبصفه
"أنا الكلمات الموجـعه التـي يكتبها ذاك الـذي ينوي الانتحار حرقاً"
سديت الدفتر بعد ماگدرت اكمل طلعت برا بالهول بيبي گاعده من يوم الي راحت حياة وهي متحجي شي لو تبجي لو تسكت
رحت گعدت يمها حطيت راسي ع رجلها كلما اشوفها
اتذكر حياة عيونها حيل تشبه عيون حياة
مسحت على راسي طلعت رتيل من المطبخ گالت
:-ها كعدتي خلي اجيبلج اكل
گتلها... مااشتهي شي
بيبي گالت... لا يمه اكلي
حره... ما اگدر
گالت... ضلي بخير علمود حياة
اني بجيت هي بجت وياي اجت يمنا رتيل تبجي كالت :- الله يصبرنا
بيبي گالت ببجي وقهر... اه يتعب سنيني الضاع بلحظات
ريتني اني ولا انتي حياة
راح ضوه عيوني علمودج يمه
جانت بس شوفت ضحكتج تسوى الدنيا عندي يمه
شصار وهيج رحتي وعفتيني بهالدنيا المفروض انتي تحضرين جنازتي وتدفنيني
ليش صار العكس
رتيل گلتلها... شهيده بالجنه
بيبي گالت... والله گالتلي من جنت بالموصل گالتلي المرحومه گالت مرة اخوي... حجتها وبجت
كتلها... شنو شگالت
بهيه... جانت مرة اخوي المرحومه مريضه وحياة ضلت تعالجها وجانت المرحومه مرة اخوي تحجي وتگول ماحصلنا شي من الدنيا وانها تعبت وبذاك الوكت حياة گالتلها
... الحمد لله على كل حال والدنيا مو للناس الزينه هي مجرد وكت وتعدي والدار الاخره هي الحق
وضلت تحجي وياها وتقنعها ان المؤمن مُبتلى وبيوم الفجر گعدت لگيت مرة اخوي المرحومه تباوع لحياة وهي تصلي الفجر وگالتلي
"الي مثل حياة ميبقون بهالدنيا كلامها يذكرني بشهيد"
گالتها وبجت بيبي اني اختنكت بعد مااكدر گمت احس بدوخه قويه كتلهن... رايحه اغسل
ورحت للحمام ضليت ابجي شويه ودكت الباب رتيل كالت
:- هذول ملابس ومنشفه
اخذتهم منها وسبحت طلعت شفت رتيل حاطتلي الاكل بالغرفه گعدت وهي گعدت يمي اكلت شويه
سالي كاعده يمي تذكرت الرقم كتلها :-وين موبايلي يمكن عفته ع التلفزيون داكوم اجيبه
سالي... اگعدي اني اجيبه
راحت جابته واجت بسرعه اخذته فتحت الرسائل لگيته دازلي مسج قبل يومين مجاوبني على سؤالي من كتله... شتريد وين توصل
دازلي... "فاعل خير "
والبارحه دازلي مسج ... سمعت انج مو بخير ابدا اتمنالج الصبر ..
اتصلت عليه الجهاز مغلق دزيتله :-ماناوي تكولي منو انت؟
انتظرته يجاوب مجاوب طلعت برا يم بيبي اسمعها تگول لرتيل :- لا اني ارجع يم اخوي مابقى شي ويعلنون تحرير الموصل
رحت گعدت يمها كتلها... بيبي شهالحجي وين تروحين وتعوفيني
هي مسحت على راسي كالت... والله يمه مااكدر ابقى هنا كلشي يذكرني بحياة
بجيت كتلها... والموصل متذكرج بيها
كالت... هسه ابقى يم اخوي باربيل وبعد تحرير الموصل الله كريم
اني بجيت هي حضنتني كالت... لا يمه لا تبجين
رتيل كالتلي... حره خلي بيبي تسوي الي هي ترتاحله لتعذبيها
گلتلها... زين وبيتكم
گالت... انوار تريد تشتريه هي ورجلها
مسحت دموعي گتلها... الله يريح بالج بيبي
باست راسي گمت گتلهم... اريد انام ورحت اخذت العلاج وفاليوم
رتيل كالت :- هالايام داتاخذين العلاجات عامي شامي
مجاوبتها شربت مي ورحت للغرفه الدفتر جوه مخدتي والموبايل بصفي كل شويه اشوف اذا جايتني رساله ضليت اتگلب الى ان وصلني مسج
... عادي نلتقي؟
دزيتله.. انت منو؟
دزلي... من نلتقي تعرفيني
گتله... تمام وين نلتقي
انطاني اسم المنطقه تفاجئت هايه نفس اسم المنطقه الي انخطفنا منها اني وحياة وجانت اغلب بيوتها ماكامل بنائها اني خفت گتله
:- شمعنى هالمنطقه؟
دزلي... ميخصج تعالي وبس
دزيتله... لحضه انت سامر الهادي ؟
مجاوب ورا دقايق اتصل بسرعه فتحت خط گلي :- شلونج
گتله... انت شنو هدفك وليش تسوي
كل هذا وليش ساعدتني وانت خطفتني وليشـ...
قبل لااكمل كال :- اوكفي شبيج اكلتيني بكشوري
كمت على كيفي سديت الباب كتله :-احجي ليش هيج سويت
السامر... خلينا نلتقي واكولج
حره... لا منلتقي
السامر... ليش؟
حره... مااثق بيك
السامر... هالشي طبيعي اني عادةا محد يثق بيه
حره... وين تريد توصل؟
السامر... لشارعكم
كتله.. شنو؟
السامر... انسي
حره... مدافهم عليك ليش دزيت الفيديوهات لرشم
السامر... سمعت محاضره دينيه من شيخ وكمت استحرم فسويت هذا
حره... شسويت؟
السامر... سمعت ساجده عبيد
حره... هاي تستحرم وهيج
السامر... لا كمت استحرم استمع لهذا الشيخ
حره... الله يسود وجهك الي مبيه رحمه
السامر... انتي اكثر وحده شفتي رحمه مني مالج حق هيج تحجين مهما يكون اني احسن من مشعل
حره... بعد كل السويته واحسن منه؟
السامر... صح اني كو... د وعركجي ونسونجي بس مو ماعندي شرف
حره... لا واضح هالشي
السامر... لعد شعبالج
حره... ضليت تلوف بلحجي ومكتلي ليش دزيت الفيدوهات وانت واحد منهم
السامر... مو منهم اني
حره... لعد شنو؟
السامر... تحقيق هو لو شنو گرعتيني بأسألتج!
حره... بس لحضه انته مو جنت مسجون شلون هيج
هو ضحك كال... نايمه ورجليج بالشمس احجيلج من اشوفج
وسد الخط
اني صفنت هذا ليش هيج يسوي ليش وكف وياي وهو يشتغل ويه مشعل زين شلون طلع من السجن يربي مدا افهم شي اتصلت عليه الموبايل مغلق شويه ودزلي مسج
... تأكدي ماناوي ااذيج ولو ناوي مو صعبه عليه اجيبج
اتصلت رن الجهاز مجاوب اتصلت مره ثانيه غلقه حرت شسوي اروح اكول لمقدام بس هو ساعدني وخاف اكول لمقدام ويروح يبلغ عنه
بقيت حايره وخايفه
شسوي وهالسامر منين طلعلي
وهو وياهم لو ضدهم لو شنو
ضليت الف حسبه تاخذني وتوديني نمت بفراشي بقيت اتذكر هو شسوا بيا طول فترة الخطف انقهر وابجي بودي اكله
ومن اتذكر هو ورط مشعل يبرد كلبي ناحيته
ضليت هيج الى ان غفيت ومثل العاده لما اغفى اتذكر اشياء وحوادث من الماضي وافز وارجع اغفى
وابقى بين النايمه والما نايمه
بحيث اكعد من النوم شي كابت على نفسي شعور كلش صعب
الله لا يشوفه لاحد
اخر شي قريت الفاتحه الها ونمت شفت حلم مزعج رجعتلي ذاكرتي وقت مقتل حياة وسمرا فزيت واني ابجي
اسمع هوسه برا فتحت الباب ع كيفي شفت انوار وزوجها يمنا دايحجون ويا بيبي على بيع البيت
رجعت الباب و قفلتها وكعدت وحدي ساعه ابجي ساعه اسكت
اجت رتيل دكت الباب
مفتحتها ضلت تحجي وياي
رتيل... افتحي الباب حره لتسوين هيج بروحج
كتلها... عوفوني وحدي عفيه
هي كالت... ع الاقل اكليلج شي
كلتلها ... كلشي مااريد بس عوفوني
تالي عافتني وراحت ضليت بس مكابله صورها وابجي تذكرت كلتلي اني وسمرا عدنا صور يم رشم اخذت التليفون خابرته جاوب كلي
... هلا حره شلون صرتي
كتله... بخير
رشم... محتاجه شي
كتله... حياة كلتلي عندك كاميرا لـسمرا وبيها صورهن
رشم... اي صح المرحومه حياة هم كلتلي رادت الصور
اختنگت كتله... اريدهن
كال.. ماشي ان شاء الله اذا فرغت اجي اليوم مكدرت على باجر
كتله... تمام
وسديته رحت شفت رقم سامر الهادي ماكو مدازلي مسج ولا شي ضليت افكر الى ان غفيت
فزيت ع صوت دك الباب واسمع مقدام يصيح
:- حره فتحي الباب
كتله... عوفوني مااريد اشوف احد
مقدام... بس افتحيها نشوفج هسه احنا شمسويلج وهيج معاقبتنا
كتله... مااريد اشوف بشر الله يخلك عوفني
مقدام... راح تموتين اذا ضليتي هيج لا اكل لا شرب ارحمي بحالج شويه
كتله... مابيا شي من اجوع اني اطلع اكل
هو محجه شي اسمعه يكول لرتيل
:- وين نسخة المفتاح الثانيه
لليل طلعت رحت للحمام ورجعت لثاني يوم هم اجو دكو الباب مفتحت حسيت ما اريد احجي ويا احد او اشوف احد
حتى بيبي اجت كالت... افتحيها مقبلت حبيت ابقى وحدي بس بهالفتره بعد مااكدر حتى اكوم
دوخه ونظري حسيته قل
لان اكلي كلش قليل
وايام مااكل نهائيا بقيت بين الصور والدفتر
واكثر شي ركزت عليه بالدفتر كاتبات عشوائيات وكلام
منه كلمة اغنيه وجاره يمه خطين
وتحته مكتوب " اين الاصحاب وايام السعد القديمه"
اختنگت اريد اسمع الاغنيه بس معندي نت حتى افتح واشوف هالاغنيه شنو ولمنو
ضلت ببالي اريد اسمعها
شويه واتصل رشم
كال :- جبتلج الصور
طلعت دا اخذهن دخت وانسطرت گمت استند ع الحايط وامشي شافتني سالي اجت سندتني
كالت... شكو وين رايحه؟
حره...رشم بالباب جابلي الصور
فتحت الباب شفت رشم هو شافني تفاجئ حيل
كتله... تفضل
هو من الدهشه صفن تفاجئت شبيه رفع راسه ليفوك وكالي
رشم... جبتلج الصور
باوعت خالهن بظرف اني استندت ع الباب واخذتهن سالي منه هو تركيزه عليه حسيت وجهه صار احمر گلي
:-حره انتي بخير؟
هزيت راسي كتله... اي
كال... مقدام وين
سالي كلتله ... بالشغل
رشم... تمام من يجي كوليله يجيني اتصلت عليه وماكو
كلتله سالي... ماشي
هو كال... يلا اترخص وصعد سيارته وراح
قبل لا اسد الباب شفت مرتضى اجه من الفرع اشرلي بايده بمعنى هاي اني هم اشرتله هو شافني استغرب اجه باتجاهنا
سالي ممنتبهه رادت تسد الباب كتلها :-لحظه اجه مرتضى
سالي... ها مشفته
هو اجه سلم وهو يضحك گال... شلونكم
كالتله سالي... احنا بخير وانت
كللها.. زين زين.. صفن شويه كللها.. زين لو اسيا.. وضحك
سالي ضحكت كالت... عزا عندك نفس تفاهتييي
هو كللها... تفاهه لو..
اثنينهم كالو... برتقاله.
وطكوها ضحكه
اني مشيت دااطلع بالشارع سالي تضحك كعدت برا
هم اجو يمي حاولو يلطفون جو ويضحكوني
هو يكول... اكو ليمونه راحت للدكتور ليش؟
سالي... ليش ؟
كللها... لان وجهه اصفر
وضحكو رادو يلطفون عليه الجو بس مكدرو
رفعت راسي شفت مقدام ومصطفى اجو بالسياره نزلو يمنا كال مصطفى
:- ها شنو هالضحك اليوم
سالي... تقلد عليه وتكول دبلوم تفاهه دباع اخوك ماجستير تفاهه
حره... اني ساكته ماحجيت شي كعدت اكلب بالصور كعد كبالي مقدام
كال :- شلون صرتي؟
كتله... بخير
مقدام... ليش كاعده هنا
حره... تعبانه مبيا اوكف
مقدام... اكيد مااكلتي شي حره وضعج دايخوفنا
حره... بخير لتخافون
مقدام... شلون وانتي فقدتي وزن كلش هواي ولا دا تاكلين لازم ناخذج للدكتور
كتله... ماا دريد اريد بس انام وارتاح
مقدام... اشيلج تكومين تنامين؟
كتله... مااكدر حجيتها وبجيت
هو حضني كال
:- اش احنا يمج
وشالني اسمع مصطفى يكول لسالي
:- اختج لسه ع وضعها
كلتله... اسوء بعد
كعدني بالهول كعدت يم بيبي نشوف الصور ونبجي الى ان اجت رتيل اخذتهم كالت
:-كافي عوفيهم راح تموتن نفسجن
كلتلها... ليضيعون انطينياهم
رتيل... لا لتخافين حاخليهم بالغرفه محد يحركهم واجت كالت... يلا لازم تسبحين
كتلها... دايخه
سندتني كومتني للحمام طبت وياي
كتلها.. لا اسبح وحدي
رتيل... اساعدج مبيها شي اني مو بس اختج وامج هم
كتلها... لا والله اكدر عادي
ضلت تصر مقبلت الى ان طلعت كالت :-واكفه ورا الباب اي شي ترديه صيحيني
كتلها... ماشي
وهم سبحت وبدلت طلعت استند عليها مشطتلي شعري صار حيل كصير
مقدام صب اكل واجه كعد يمي
رتيل كلتله... سوده عليه ليش تعبت روحك
كللها... لا تعبيش هو كلشي جاهز بس صبيت يلا حره وياي ترا كاتلني الجوع
حره... مااشتهي
مقدام... اذا مااكلتي مااكل
رتيل هم كالت... اني حيل جوعانه اذا مااكلتي مناكل
تنهدت كعدت وياهم بيبي نايمه رادت تكعدها رتيل مقدام مقبل كللها
:- خليها خطيه كوا نامت
كامو يسوون لفات ويوكلوني اجت سالي كعدت يم مقدام تاكل كلتله
:- اكلك رشم كال خيحاجيني
من يجي
مقدام... اي خابرني
... اكلت وكمت داطب للغرف طب قبلي مقدام اخذ المفتاح من الباب كتله
... ليش اخذته
مقدام... انو تقفلين الباب على روحج مو حل هذا
كتله... تعبانه
مقدام... والي داتسويه يزيد تعبج
تركته ورحت مددت ونفس كل يوم نمت ولما نمت انعادت عليه الذاكره شفت حلم مرعب كلش
جنت بين القبور اشعل شموع وينطفن واصرخ على حياة وهي ماكو غمضت عيني فتحتها شفت حياة مطعونه بنفس المكان الي نقتلت بيه
اريد اصرخ بس صوتي ميطلع
فزيت مرعوبه باوعت خواتي يمي اخذت الموبايل و طلعت برا خنكه استند ع الحايط وامشي حطيت بلوك بباب البيت وگعدت اباوع لبيت حياة اريد ادخل واحس ماا عندي القوه جان خيط الضوه توه طالع
بقيت اباوع للسما واسال نفسي
دنيا فجر لو المغرب؟
هالفتره اسوء فتره بحياتي
عشت اثار الصدمه والاكتئاب لدرجة گام يصير عندي فقدان ذاكره وقتي شصار وياي مااتذكر
شويه واجه مرتضى من الفرع شافني اجه كعد يمي كال :-شعندج هنا دنيا الفجر؟
لاحظته من يحجي يباوع بعيوني
اني مرات مااكدر اثبت نظري بعيون اي شخص فانزل راسي
كتله... انت شعندك گاعد من الفجر
ابتسم كال... اسوي رياضه
... هسه تسوي؟
كال... اي زينه الي وهم اني متعود انام من وكت واصحى من وكت
.... هممم
كال... اي شلون صرتي
... احسن
كال... اني هم جنت تعبان مثل حالتج بس تخطيت هالمرحله
... شلون تخطيتها
كال... سولفي لتكتمين بداخلج اكتبي وحاولي تملين يومج اضحكي وغني الدنيا ماتسوا
... صوتي محلو
كال... مامبين هيج
... انت مخبل مو.؟
ضحك كال ... اي
كتله... لعد تعال احجيلك قصة حياتي
هو كال.. يلا اسمعج
حره... بس اذا حجيت لاحد عن هالاسرار تدري شسوي!
كال... شتسوين…؟
... باع هايه الكاع هنا اسحلك
كال... لا امني سرج بگهوه
خزرته ضحك كال... ثقي بيه احجيلي شنو الحمل المتعبج لهالدرجه
هو گال هيج واني عاد هنا مقصرت خطرتله حياتي من الطفوله وصلت من سافرت حياة للموصل انتبهتله يباوع بعيوني كتله
:- اكلك
كال... كولي
:- ليش يكولون عنك مخبل
كال :-لان اضحك ع كلشي
:- بس انت مامبين مخبل شو تفتهم
كال... اي طبعا.. وضحك
... حياة مره كالتلي عنك مبين بريئ كلش
راحت الضحكه من وجهه كال... صدگ؟
... والعباس
گال... مو اكثر منج
... شلون يعني
ديحجي انفتحت الباب شفت سالي هي حطت ايدها ع كلبها كالت
:- عبالي دكيتي الناقصه وطلعتي باوعت لمرتضى سلمت عليه
كتلها... لا هنا كاعده
سالي... تمام تطبين للبيت
... لا هنا دنحجي
سالي... اوكي حااسوي ريوك
... اوك هي راحت كتله...مرتضى
كال... كولي
... عندكم نت؟
كال... اي ليش؟
حره... اريد اطلع اغنيه
هو طلع موبايله كال... شسمها؟
كتله... حياة كاتبه جزء بالدفتر اين ايام السعد بلا ابحث
كتب طلعتله اغنيه فتحها كال... هاي تركمانيه صديقتج تركمانيه؟
حره... لااا
كال... لعد؟
حره... المرحوم خطيبها تركماني
كال... اها
حره... انقلياها
كال... ماشي خلي انزلها بالاول
وفعلا نزلها واخذ موبايلي ينقلها هنا اتصل رقم كلي
... ديتصلون عليج
حره... ارفض
رفض سمعت صوت مسج هو صفن شويه وانطانياه كال :- نقلته الج على البلوتوث
شويه وكال... لازم اروح يم ابن ساميه عازمني
حره... ماشي
هو كام باوعلي وكال... حره اني وياج صرنا اصدقاء حيل مو
حره... اي ليش
كال ... لعد لتضمين عليه شي ولتخافين اني احفظ السر
حره... ماشي
راح هو اني طبيت للبيت ماتريكت مااشتهي
فتحت موبايلي لكيت جايتني رساله من سامر كاتبلي
... انتبهي زين حره ناوين يقتلوج
كلبي خفق اتصلت عليه مجاوب
دزيتله :- منو بلغك بهالكلام
ورا شويه اتصل ... مصدر موثوق انتبهي زين
كتله... انت ليش داتساعدني
مجاوب كال... يلا عيني وسد الخط
حسيت كلبي حيوكف منو يريد يسوي هيج بقيت ادعي واهدي بنفسي سمعت صوت بيبي واخوها طلعت يمهم كالت
... لازم اروح
اني حضنتها وودعتها وراحت
للعصر كلت لمقدام... ضايجه حيل ومختنكه
سالي ... حتجي رغد ونكعد برا
مقدام كال... ليش مو بالحديقه تكعدن
كتله... مخنوكه كلش
مقدام... خطوتين ماتبتعدن تمام
سالي كلتله... تمام
اني كمت طلعت برا كعدت ع البلوكه ويمي رغد وسالي حسيت بحركه غريبه بالمنطقه وناس مااعرفهم يفترون
خفت كتلها ... سالي كلبي يوجعني خندخل
كالت.. ليش؟
حره... معليج امشي يلا ورغد وانتي هم
طبينا جوا كعدنا بالحديقه واحس برجفه بجسمي ضليت افتر وين لليل سمعت اندكت الباب بقوه
فتحت الباب سالي ورتيل ماما مموجوده
اجه رشم ومقدام ووياهم ضابط طبو للبيت اني كمت كتلهم
... شكو
رشم جان مبين ع ملامحه الراحه كال... رغم حاس اكو شي غريب بس اكو خبر حيفرحج
كتله ... شنو
مقدام كلي... القاتل انلزم
اني ضحكت وبجيت بنفس الوقت كعدت بالكاع كلت... ياارب الحمد لله كتله.. وشلون لزمتوه
رشم باوع لمقدام
صديقه كال... اجانه ابلاغ اكو تنظيم عملية اغتيال.. باوع لمقدام وكال... الج جانو ناوين يقتلوج واجانه امر من فوك ان لازم نمنع تصير هالحادثه
اني صفنت بداخلي كلت... معقوله سامر الهادي هيج سوا كتله... اي
كال... ولزمنا الي جان ناوي يقتلج يصير ابن عم هالمجرم وهو الي دلانه عنه
كتله... الحمد لله
رتيل حضنتني كالت... ليش شيردون من اختي ليش يردون يقتلوها
مقدام كال... تصفيه رادو يصفون شكو واحد اذاهم ولتنسين قضية خطف حره هم ضرتهم
حره... حمدت الله وشكرته ان القاتل نلزم شويه وترخصو الجماعه وراحو اول ماسد الباب مقدام كال
... طفح الكيل ضروري اشوفلي بيت بعيد عن هالمنطقه الوضع هنا مو امان
سالي كالت... اتفققق وبشدة
رتيل كلتلها... انتي بس تتفقين لتفاولون الله يحمينا
مقدام باوعلي حضني كال... لتخافين كلنا يمج محد يكدر ياذيج
... بس ماعرفتو منو بلغ عن المجرم
مقدام... لا والله وهذا الشي الي حيرني منو عنده علم وشلون اجت الاوامر
رتيل كالت... اكيد ابن حلال دزه الله عرف بنيتهم ومنعهم
حره... اي صح
طبيت للغرفه رتيل كالت
... وين رايحه
... انام
رتيل... اكلي ولج
كتلها... مااشتهي
اخذت الموبايل عود داتشكر سامر الهادي
لان ماكو غيره البلغ فتحت لكيته دازلي
... حره انتي بخير؟
اني تفاجئت اتصلت عليه جاوب كال
... انتي بخير
حره... اي بخير
السامر... وصلني الخبر الرجال انلزم
كتله.. اي صح
السامر... منو ساعدج؟
كتله.. بشنو
السامر... بهالموضوع؟
كتله.. محد
كال... لعد شلون لزموه
حره...تره مفهمت
السامر... رشم الكو... د وكف وياج؟بلغتيه عن الي ناوي يقتلج
حره... هنا اني انصدمت كتله... يعني مو انت البلغت؟
كال... شنو تغشمين نفسج؟
اني سديت الخط لان احس كلشي مفاهمه اذا مو سامر بلغ لعد منو البلغ عن القاتل !
ضليت افكر للصبح ولاكدرت انام ضليت اعيد بالاغنيه مال حياة مختصره كل معاناة الشعب العراقي للصبح مكدرت انام صارت ال ٨
اتصل رشم فتحت خط كال... عندي الج خبر
حره... شنو من خبر ؟
رشم.... مشعل فطس والحق رجع لاصحابه... يتبع...
_______________♡
قراءه ممتعه فراشاتي...
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!