رواية هل كان حلماً ...؟ (الِعراق_المُصغَر) الفصل الرابع عشر 14 - بقلم Nawras_Qasimᥫ᭡

          الحلــــــــقه الثالثـــــــه

         رواية...  هل كانَ حُلماً...؟
     
   {العِراق-المُصغَر...عنـاق-الارواح}

بقلمي ... لؤلؤة_البِحار ... 
___________________•

حره :-لليل واني كاعده والكتاب بحضني

فزيت مرعوبه على دگت الباب بقوه
طلع مقدام يشوف منو
لحظات وطبت حياة
تبجي مرعوبه... 

گمزنا اني والبنات تلكيناها بالشكو والشبيج

حره...حياة لتخبليني شبيج؟

حياة... مادري والله خابرتني سمرا تبجي تگول حاولو يغتالون رشم..
التفتت لمقدام وگالت بتوسل.. عفيه مقدام وديني لبيت سمرا...

... طبت بيبي بهيه وراها كلتلها...
بهيه... لاتتخبلين والله مااخليج تروحين شبيج اهدي ان شاء الله مابيه شي مستحيل اخليج تروحين الا تخبلت

حياة تبجي دموعها تدير واني لازمه ايدها احاول اواسيها واطمنها بس مااعرف شلون

مقدام... اتصلتو على رشم خلي اشوفه...
حجاها وهو يطلع الموبايل يتصل

حياة... لا ماتصلت رصيد ماا عندي و ماكو احد گاعد...بجت ورجعت كملت بدموع
دخيلك ربي كون رشم مابيه شي سمرا تتخبل والله تموت

مقدام... لتخافين هسه اشوف الوضع شنو... حجاها وهو يتصل

حره... يتصل على رشم ماكو ميجاوب كعدت حياة وگعدت يمها اهدي بيها واكوللها
... مبيه شي ان شاء الله لتخافين

حياة... يارب يكونون بخير... گالتها بحزن

حره... زين اتصل على سمرا بلكي تجاوب...حجيتها واني اباوع لمقدام

مقدام... مسجله رقمها..؟

حره... اي شوفه موجود.

اتصل عليها وهم ماكو مجاوبت اخذت الموبايل دزيتلها مسج كتلها

... وينج سمرا خايفين عليج حياة حتموت من الخوف تخبلت تريد تجيكم جاوبي عليج العباس 

مجاوبت مقدام گال
مقدام... زين بيتهم وين بيبي خلي اخذجن هناك من بعيد اطمئنو واذا اكو شي غريب صاير اكيد اهل المنطقه سامعين نسأل هناك

حره... لا مقدام عفيه لتروحون ابوها مو خوش...حجيتها بخوف

بيبي كالت... لا يمه وين تروحون ذوله ناس مايخافون الله ورشم مو بنفس المنطقه ويه سمرا ممكن محد يدري يمه ننتظر بلكي تجاوب سمرا..

حره... موبايل مقدام بيدي رجعت اتصلت على سمرا رن مره ثنين فتحت خط واخيرا اني بسرعه گتلها

... هاا ولج وينج موتينا خوف

الكل فزوا وكامو
فاتحه سبيكر ماكو احد حجى رجعت گلت...
سمرا الوو وينج ولج.؟

اجاني صوت رجال كال... نعم منو حضرتج؟

اني سكتت متفاجئه اخذه مني مقدام  كال
... الو

بسرعه انغلق الخط
ورا دقايق رجع اتصل جاوب مقدام

...الوو
من سمع صوت سمرا بسرعه انطاه لحياة...

حياة... وينج خبلتيني راح اموت... گالتها بقلق واضح

سمرا... متت خوف حياة حاولو يختالون رشم واجاني اتصال انهم اغتالو فكرته مات ماعرف شصار بيه حتى من خابرتيني ما اتذكر شحجيت طلعت اني وماما دانروح لبيته

بس بالطريق
رشم خابرني وطمني فرجعنا بسيارة ماما وهناك لگينا اخواني تعاركو لان طلعت علمود رشم...تنهدت بحزن

  حياة... يعني رشم بخير؟

سمرا... اي الحمد لله
حياة تعبانه حنام وباجر الصبح اجيج...گالتها بتعب

حياة... ماشي بيباي

حره... غلقت حياة الخط رجعت الموبايل لمقدام  كالت

حياة... اووف الحمد لله متت عبالي بيها شي

بيبي كلتلها... الحمد لله خبلتيهم وياج..

مقدام... يا بيبي شهالحجي احنا عائله وحده

... حياة ضلت تتعذر بيبي گالت
... يلا نرجع لبيتنا

مقدام... لا ابقو هنا واني اطلع اخذو راحتكم البيت الكم

بيبي ماقبلت وضلت تحمد بمقدام وتكوله...
بهيه... فدوا اروحلك يبعد بيتي انته اريد الله يحفظك ويخليك يبو طول الحلو

حره...مقدام نزل راسه مبتسم وبيبي راحت هي وحياة اني من الصدمه ايدي ضلت ترجف..

مقدام... لتخافين بويه الحمد لله عدت بسلامه ومابيهم شي... گالها وهو يباوع لرجفة ايدي

حره... الحمد لله... همست براحه

رحت فرشت النا ونمنا
لثاني يوم صار الصبح گعدت گمت طويت فراشي وشلته طلعت من الاستقبال شفت رتيل داتتريك هي ومروه  وسالي مموجوده رايحه للمدرسه

رتيل... ليش مارحتي للمدرسه اليوم؟گالتها وهي خازرتني

حره... تعبانه اليوم... حجيتها واني احط الفراش ع الميز
حطيته و رجعت للهول

رتيل... لتضلين تلكين حجج حتى تسختين حره شگلنا احنا شحجينا وياج...

حره... لا والله مو اسخت بس بسبب البارحه خفت واخذتني نومه

رتيل... كملي وروحي شوفي البنات الي وياج شاخذتن دروس 
خوش...؟

حره... ماشي
غسلت وجهي ومشطت شعري  لبست نعالاتي وحجيت بصوا

...رتيل اني رايحه لحياة...

رتيل... ماتريكتي تعالي اكلي وروحي..

حره... ما اشتهي هسه
گلتها واني اطلع من البيت
انطلقت لبيت حياة لازم افهم شصاير بالتفصيل خوما ابقى هيج طبيت لكيت بيبي وحياة دايتريكن

حره... صباح الخير..

حياة... صباح النور تعاي اكعدي تريگي وياي

گالت بيبي... صباح النور يمه يلا ويانا ع الواهس يلا

حره...اني صدگ مجنت متريگه گعدت وياهن

گالت حياة... البارحه قلقتكم

حره... لا يمعوده عادي بعدين الي يصير عليج يصير علينا

بيبي گالت... فدوا الله يديمجن الله يخليجن ويحفظجن...

حره...امين يارب...باوعت لحياة تباوعلي مبتسمه ابتسمتلها

كملنا ريوگ حياة غسلت المواعين واني كنست المطبخ وياها
گتلها... منخبز اليوم؟

حياة... محد طلب من جيرانا و زاد عندي لباجر فـ مااحتاج

حره...  يلا اليوم استراحه

حياة... الله يرزقنا

حره... امين
شويه واندگت الباب رحت فتحتها طبت سمرا حضنتها ودخلت حضنت حياة وبالسياره رشم
باوعناله من الباب اني وحياة اشرتله بمعنى مرحبا

هو ابتسم ورفع ايده يسلم علينا باوعت الايده مجروحه وملفوفه بشاش رجعت سمرا طلعت حجت وياه شوي حرك وراح وهي طبت للبيت راحت سلمت على بيبي بهيه وگعدنا

بيبي سألتها... شكو شصار ويه رشم البارحه؟

سمرا... البارحه اجاني اتصال اغتالو رشم ومتت خوف وبجي ماما كالت خلي نروح نشوفه فرحنا بسيارتها بنص الطريق اتصل عليه رشم گلي مبيا شي

اني مصدكته الا فتحلي كامره
وگلي... اكو جماعه هاجموني وكسرو سيارتي ولو لا اصدقائي الي جانو ورايه جان متت والله كتبلي عمر جديد

اني من سمعت هيج ارتاحيت وگلت لماما نرجع لان هو كال دنيا ليل مو امان ارجعو من رجعنا لكينا اخوتي هناك
تفاجئت شعدهم هنا هم تعاركو ويانا

گالو... شعدجن طالعات بهالليل وصايرات تدوحن بكيفجن؟

ماما شافتهم هيج كلتلهم... هسه اتأكدت ابوكم هو ورا مسالة اغتيال رشم اني شكد شفت جلاب مثل ابوكم ماشايفه

گللها اخوي... اشش وانتي من شوكت تفضلين الغريب علينا وشدخل ابونا برشم

سمرا... اي دخله اصلا هو قبل فتره هدد رشم يقتله...
اني حجيت هيج وهو جرني من شعري

كالي... وانتي تتواصلين وياه والله اذبحج شنو كواويد احنا بعد لبسينا كرون وخزينا بين العالم

ماما دفعته وتفلت بوجهه كالتله... روح تمرجل على ابوك الي حط روسكم بالطين بسبب افعاله مو جاي تتمرجل ع النسوان يامخنث

هو كللها... اني افتخر بابوي كلي فخر وشرف ان مشعل ابوي بس انتن كحاب ماينكدرلجن

وضل يغلط ويفشر ويصيح اجو خوالي واحد من خوالي گاله

... بالقران اذا اسمع صوتك اگص لسانك يامخنث يلا ولي ودير بالك توصل لهنا بعد

هو گاله... مايشرفني ابقى يمكم وراد ياخذ اخوي الصغير

كله... تعال امشي ويانا

بس امي ماقبلت وگلتلهم...امشو ولو لا بارك الله بيكم

هو خزر امي وراح  هو واخوي الثاني وعافه

حره... يمكن هاي صدفه معقوله ابوج واصل لمرحلة الاجرام...!

سمرا... كلشي توقعي حره
الي يغدر بصديقه الي سانده باصعب اوقاته والي يترك مره وهي حامل والي يعرف بنته بنص الفقر لسنين كلشي اتوقع منه اني دااحس ابوي مات من زمان واحسني مااعرف هالشخص

خصوصا رشم ديسولفلي عنه وعن الصفقات الفاسده الي مسويها حتخبل ... حطت ايدها على راسها وغمضت بقهر

حياة... لتنقهرين خلص كلها تهون... حجتها بحزن

سمرا... مااعتقد احس هالفتره مخنوكه ماادري شبيه خايفه حيل واخوتي صارو مثل ابوي الشر عمى عيونهم
... باوعت لحياة وكالت مرات اسمعهم يحجون عليج وعلى امج

حره... شيكولون؟

سمرا... يكولون هنه مو خوش امها اغرت ابوي وهو رجال وامي زودتها شكو تطلكت عادي الرجال حقه يتزوج ويخلف

حره... لتضوجين حبيبتي هذول عقلهم مو براسهم واگع بغير محل...كلتها باستهزاء
هنه باوعلي وضحكن

بيبي گالت... اي والله صح لاتضوجن يمه الله يعرف الحق ويه منو واحنا ويه الحق فلاتضوجن ولاتخافن دام الله ويانا كلشي بخير

حياة... اي والله 

سمرا... اني المخوفني هذا الحلم هم رجعت اشوفه...گالتها بحزن

بيبي كلتلها... ياحلم؟

سمرا... بيبي من اني وطفله اشوف حفره كبيره واني داوكع ومچلبه بالحافه بايد وبالثانيه لازمتني بنيه ايدها بيضه بس مااشوف شكلها ابد وهذا الحلم يجيني من طفولتي ولحد هاليوم وحيل يخوفني حتى گلت لرشم گال لان تفكرين بيه يتكرر اني بس اتمنى اشوف وجه البنيه...

گلتلها بيبي... انوب من تشوفيه وتكعدين اقري المنام وكولي... اللهم اجعله خير... وان شاء الله مايصيبنا غير الخير...

كلنالها امين
ضلينا نسولف الا ان صار وقت الغده
گامت وكالت

سمرا... يلا رايحه عندي دوام اليوم... باوعتلي وگالت... صدك شو انتي مارايحه؟

حره... گعدت متاخر ومابيه حيل فـ مرحت

سمرا... سوده عليه قلقتكم البارحه...گالتها بخجل

حره... لا بلعكس انتي اختي الي يصير عليج يصير عليه

سمرا... فدوا
حضنتني وبوستنا وراحت اني هم سلمت ع حياة و رجعت للبيت لكيت مقدام  موجود

اول مشافني گال... هاا ليش مارايحه للمدرسه لو بدت الحجج؟

حره...لا بس تعبانه ومرحت ان شاءالله باجر اداوم

مقدام... اقري بنيتي اقري وداومي شهادتج تفيدج الج اني شيطب بجيبي بس غير علمودج اريدلج مستقبل ترتاحين بيه

حره... ان شاءالله من اليوم ابلش اقره... حجيتها بأبتسامه.. ابتسملي وراح يسبح

للعصر رحت اني وحياة للبنيه بصفي اخذت الواجبات ورجعنا بالطريق سألتها

... حياة اريد الدفتر البيه كتاباتج اقراه..

حياة... "يجي يوم وانطيه الج" حجتها بأبتسامه

حره...ابتسمت وصلنه للبيت حياة راحت لبيتها واني طبيت لبيتنا
طبيت للهول باوعت خالتي نرجس وخالتي ام مصطفى يمنا

ابتسمت ورحت سلمت عليهم ماما مموجوده
وخاله نرجس داتعرس ابنها وتريد تروح تخطبله البنيه
كاعدات اني وسالي ورتيل بالهول ونسولف
وياهن

سمعنا صوت الباب
التفتت عليهن وحجيت.... هاي اجت ماما

اجت امي اول ماطبت للهول شافتهن گلبت خلقتها و كالت

اميره... ها شعدجن جايات ببيتي

رتيل... ماما شهالحجي... گالتها وهي تگوم

اميره... اشش لتتدخلين وانتن... باوعت لخالاتي... انتن توجن يلا تذكرتني وتذكرتن عندجن اخت بعد وكت...

نرجس... يا شبيج حبيبه ليش شوكت ناسيج احنا اشو لو اني اتصل لو ماتتصلين واني اكول ميخالف يجوز مشاغل الحياة باعدتها

اميره... اشش ولا كلمه هو انتي منين ذاكرتني والدليل دتتزوجين ابنج واني ماادري

ام شذر... استهدي بالرحمن حبيبتي شهالحجي هو احنا ليش اجينا دنكلج حتى نروح نخطب قابل زوجناه وماكلنا..؟

اميره... اش لاتحجن لاتحجن دتغثني توجن تذكرتني من صرتن بعازتي

ام شذر... والله مو صوجج تبقين طول عمرج عوبه وجاهله وكلشي ماتفتهمين حتى حجي متعرفين تحجين خواتج وجايات يمج هيج تستقبلينا؟

ماما تخبلت من هالحجي وكلتلها
اميره... يلا برا برا مااريد اشوفجن ولا اسمعلجن صوت ابد يلا ميشرفني تبقن ببيتي

طلعن خالاتي زعلانات ورتيل استلمت ماما تحجي عليها

رتيل... صدگ جذب اكو واحد يسوي سوايتج؟
تره عيب هذني خواتج وكاعدات ببيتج شلون تتصرفين هيج وياهن..!

اميره... ما اتعلم منج شاحجي خوش...

عافتها وطبت للغرفه رتيل فار دمها عاطت بيها بصوت عالي

رتيل...  طول عمرج مفشلتنا
خزيتينا...

سالي صافنه على كل الي صار رحنا اني ورتيل بالمطبخ نطبخ اجت يمنا گالت

سالي... اگلجن عود هم يجي يوم وهيج اجي ببيتجن مثلا وتطردني. !

حره... دنجبي قابل احنا مثل امي

سالي... هو اكيد متطرديني غير اسحلج ترا مو هينه اني

كلتلها... دمشي منا بس لسان حجايه تخليج تخنسين

سالي... دجربي بالمستقبل ونشوف...كالتها وهي تهز ايدها

ضحكت رتيل كلتلها... لا طبعا احنا مو مثل امي احنا غير
ولو ترجعين للواقع ترا خالاتي مثلنا ويحبنا ويحبن امي بس غير هي الله يهديها
لان حتى ويانا ممقصرات
ومرات حتى ملابس يريدن يدزن
واني مااقبل نعتمد على نفسنا احسن حتى محد يتمنن علينا
الله يوفقهن

حره... امين
مر اليوم وكعدت بالليل اقره انفتح باب البيت طب مقدام اجه للاستقبال شافني اقره

مقدام... واخيراااا... گالها بضحكه..

رتيل...يراد نطكلها هلهوله اليوم

مقدام... اي والله...گالها بضحكه

اني ضحكت ورجعت ادرس
لثاني يوم الصبح بدلنا وطلعنا   للمدرسه اني وسالي
بالگوه يلا خلص الدوام

حلينا للاهل رجعنا نمشي وصلنا لبيتنا سمعت هوسه وعركه ببيت جيرانا بباوعت لسالي باوعتتلي ورفعت كتفها بمعنى ما ادري

طبت للبيت وطبيت وراها باوعت رتيل وامي ومروه كاعدات بالهول باوعت لرتيل

حره...رتيل شكو.؟

رتيل... هذا خطيه جيرانا يردون اخوته ياخذون منه البيت شافوه رجال جبير...

سالي كلتلها... بس هم مايردوه ببلاش رادوه بفلوس

رتيل... اي بس ديكسرون بسعره حرام عليهم

سالي...اي يردوه ب ٢٠ مليون وهو المفروض من ٤٥ فما فوق بس هم جلاب

باوعتلها رتيل بصدمه ... يا وانتي شمدريج؟

سالي... غير رغوده جاسوسة المنطقه لمتلي كل الاخبار

ضحكت كتلها... والله الجن خلك

سالي... لعد وين نروح بوقت الفراغ نكعد نحجي بهيج مواضيع متخصنا وتافهه مثلنا

حره... رحم الله امرء عرف قدر نفسه...گلتها بضحكه..

سالي... قدر لو قبق...حجتها بضحكه

حره... جفجير اكسر عظامج بيه ولي شكد تافهه

سالي ... تفاهه لو برتقاله...گالتها وضلت تضحك

وامي ورتيل يضحكن وياها ومروه مربوطه ع التوالي تشوفنا نضحك تضحك
تشوفنا نبجي تبجي تشوفنا معصبين تجي تضربنا راشديات شنو السبب محد يدري

لـ الليل گاعدين ع العشى
مقدام ... باجر اروح لمشية ابن خالتي نرجس... گالها وهو ياكل

اميره... خيولون لاتروح... گالتها بضوجه

مقدام... بطلي هالسوالف عالم ماشفنا منهم إلا الخير نروح نشاركهم بافراحهم بلا مشاكل وها اها...

اميره... والله لو اني گايلتلك روح جان ماقبلت

اميره... وليش ما اروح رجال ماعندي شي وياه وعلاقتنا طيبه واني ابن خالته لازم اقوم بالواجب اذا امي ماتعرف بيه مو لازم اصير مثلها

حره... امي ماعجبها الكلام گامت غسلت وراحت لغرفتها
كملنا عشى كمت غسلت المواعين
سالي سوت جاي

وراها بايام گاعدين بالاستقبال
اني ورتيل والبنات اتصل موبايل رتيل شالته گالت... خالتي نرجس تتصل

رتيل فتحت خط وفتحت السبيكر
...الوو هلا خاله شلونج

... هلا رتوله حبيبتي باجر تعالن للعرس معزومات

رتيل... نجي ان شاء الله...

خالتي گالت... انتن ماعليجن بامجن والله اني احبجن مثل بناتي وما ارتاح اذا ما اشوفجن بالعرس لازم تجن..

رتيل... واحنا هم نحبج ان شاء الله نجي..

حره... سولفت ويه خالتي شويه وختمت المكالمه ...

گمنا كل وحده طلعت الفلوس الي مجمعتها جبناها حطيناها يم رتيل گالت

... العصر يجي مقدام ونروح نشتري ملابس

كلنالها... تمام
رحنا اني وسالي نظفنا ورتيل سوت الغده  اجت امي ومروه جانن طالعات ماما طبت سبحت

وراها طب مقدام رتيل صبت غده رحت لامي بالحمام
... ماما استعجلي دانتغده

اميره... متغديه اني اكلو بالعافيه

سكتت و رحت لرتيل اساعدها صبينا غده وگعدنا داناكل

رتيل التفتت لمقدام ... مقدام ودينا للسوگ العصر باچر عرس ابن خالتي نرجس فشله عزمتنا

مقدام... ان شاء الله بس انام شويه وبعدين اخذكم...

كملنا اكل دنشيل الصينيه اجت امي گالت
... شعندجن بالسوگ؟

سالي... نجيب ملابس باجر عرس كرار ابن خالتي

اميره... شنو تروحن شو انتن ماتحترمن اني مو متعاركه ويه خالتجن

مقدام... انتي متعاركه احنا شكو شدخلنا؟

اميره... شنو مادخلكم
متروحون.

مقدام... لا نروح وبطلي هالسوالف ترا عيب كبرنا مو صغار احنا وشغله ثانيه عيب تصرفاتج ابن اختج هايه الحفله من عمره هم سويتي مشكله ومتردين تروحين؟

اميره... والله صلفين... گالتها وطبت لغرفتها وسدت الباب
گامت وراها مروه تسويلها

مروه... شفتي شكد وكح مو مثلي كتلج مو حبابين مثلي... گالتها وهي تطب لغرفة امي

مقدام... العصر اخذنا للسوگ
وگفنا يم الجسر
گلتله رتيل... روح جيب ملابس الك ونلتقي هنا

گللها... لا واعوفجن وحدجن
مترهم...

رتيل... يا شكبرني صرت مو صغيره اي شي يصير اخابرك وهم ترا بعد متلحك روح واحنا هم نروح للملابس مال حفلات حتى نلحك

مقدام... يلا ماشي هم حتى تاخذن راحتجن

گلتله تمام طلع فلوس دينطينا مقبلت رتيل لزم ايد سالي وخلاها بيدها

گللها... اشترن الي يعجبجن مو ما تشترن

سالي... ماشي

بالطريق سالي انطت فلوس مقدام لرتيل گلتلها ... ضميهن باجر حفله خاف يحتاجهن

رتيل اخذتهن... ضمتهن رحنا نفتر بس  الملابس غاليه مو مال المبلغ الجايبه

حره... خلي نجيب اجار مهما يكون ارخص

رتيل...  ماشي

سالي... لا ماكدر اتقبل اكو هوايه غيري لابساته اجرن الجن
واني وراجن ادور

صدك رحنا عاملنا ع فساتين واجرناهن بقت سالي ندور ندور وماكو عجبها فستان سعره فوك ال ١٠٠ واحنا حاسبين ب ٢٥ او ٣٠ اقصى شي

من عاملنا وطلع سعره 120 سالي مثل الضاجت 
رتيل انتبهت عليها كلتلها... هاي فلوس مقدام  خلي اجيبه الج

سالي... لا ابد لتطلعيهن ضميهن اله يحتاجهن خطيه

رتيل... معليج بعدين اني ادبر

سالي مقبلت تالي راحت اشترت بنطلون وقميص شلون ماجان رتيل توسلت بيها خلي اجيبه وسالي مقبلت ابد

من رجعنا التقينا ب مقدام
كال... ها اشتريتن.؟

كلناله.. اي رحنا للكراج صعدنا سيارة عمران ورجعنا بالطريق مقدام يسوق رتيل انطت الفلوس لمقدام باوعلها

مقدام... ليش ماشتريتن بيهن؟

رتيل...مو كتلك عدنا والله

مقدام... بس الملابس غاليه؟

رتيل...لا الحمدلله كفن

باوعلنا من المرايه... كلجن اشتريتن؟

گلناله.. اي
هز راسه وسكت رجعنا للبيت ومشى اليوم وماما كالبه الخلقه

ثاني يوم الصبح كعدنا رحت لحياة طبيت لبيتها لگيتها بالمطبخ

... حياة تعاي حفيلنا اليوم الحفله..

حياة... هلا هلا اليوم اطلعجن عرايس

وصدگ ماجذبت خبر اجت وياي وكعدت تحفلنا كلنا وحده وره الثانيه عاكسه المخده وگاعده عليها

والخيط لافته برگبتها ولازمته بإديها وتحفلنا وكل شويه گايمه مفتره وراجعه
تگول... مقعدي خدر من الگعده

كملنا وهي لبختني لبخ وكل شوي وعاطت

..شكووو

حياة... اوووكفي نسيت الحمره اجيبها واجي

طفرت من السياج لبيتهم تجيب الحمره 
جابتها واجت حطتلي عاطت

... شنسيتي بعد..؟

حياة... الكحل ولج خلي اجيبه واجي هم راحت تركض طفرت لبيتهم جابته واجت
حطتلي ولبختني لبخه معدله

اجه مقدام بسيارة عمران دياخذنا بوست حياة ودعتها  وراحت طفرت من السياج على بيتهم
اخذنا ورحنا للعرس اول ماطبينا تفاجئنه بالاجواء حلوه

والاحلى اللمه وفرح وناس
واني  لابسه فستان حلو تمنيت لو كل حياتنا حفلات
والقاعه مختلطه والعروس والعريس يجننو حيل حبيت الاجواء

لاحظت اخو العروس ضل يباوع  لسالي وامه كل شوي تجي تسالنا عليها وتسال خالتي نرجس اسمعها تسالها وين بيتهم؟ شمكمله؟ شكد عمرها؟ اهلها ينطوها؟

وهالاسئله المعتاده خلصت الحفله ودنرجع للبيت مقبلت خالتي بس رتيل گلتلها

... والله منگدر نبات سالي تستاحش البيت..

ضلت تبررلها الى ان قبلت خالتي ورجعنا ويه مقدام بالليل بالسياره

مقدام كال.... شلونها الاجواء حلوه؟

حره... تخبل... حجيتها بابتسامه

ضحك كال... الله يسعدهم لايكين لبعض

سالي... انوب خوات العروس يجننن احلى منها

حره... لا منين يمعوده..

سالي... والله يخبلن تمنيتني بجمالهن...

رتيل... لا ترا انتي احلى منهن

سالي... وانوب لبسهن يما يجنن وكله يحجن بالدولارات...

حره... يوم الالنا وهيج نكوم
نحجي..

سالي... شوفي البطرانه وين عايشه هو الفساتين اجار وكوه نزل اسعارهن..
مقدام باوعلنا

گالت ... احنا فقراء وراح تبقى هالبصمه لازگه بنص جبينا...گالتها  وضربت بايدها على جبينها

عيوني على مقدام من حجت تغيرت نظرته ...
كالتلها رتيل... شهالحجي سالي كولي الحمد لله بعدين انتن تخبلن طلعتن حتى ام العروس رادت تخطبج لابنهم...

مقدام باوع لرتيل ومركز ع الحجي كلتلها سالي... اي بس من درت اني من ال**** وشافت لبسي غيرت الموضوع للكيك وطگتها ضحكه

عيوني بمقدام ساكت ابد ما انطه ردة فعل بس ركز بطريقه

وصلنا للبيت واول مطبيت وقبل لا ابدل  ركضت للسياج وشايله بإيدي الايت صحت

... حياااااة تعااااي اجيييت

اجت ترگض و هم لازمه اللايت وبيدها حب كعدت ع البرميل ووخرت الجادر كالت
... فكي ايدج

.. فتحتها حطتلي حب

حياة... يلا غردي شصار ماصار

عدلت گعدتي وحطيت اول حبايه بحلگي ومن بعدها خرطتلها كلشي من الالف للياء

ضلينا نكرز حب ونسولف الى ان صاحتني رتيل

رتيل... لاتلسعن ولجن لاحكات ع السوالف اجلنها لباجر... گالتها بضحكه

ضحكنا وصدگ ودعتها ورحنا دانام طبيت لگيت سالي لازمه الموبايل وحطت رقم وتصلت

جاوبت صديقتها كلتلها...رغوده ضايجه لميلي كل اخبار المنطقه وسولفي

هذيج ضحكت وضلن يسولفن الى ان اتصلو على مقدام راحت انطت الموبايل لمقدام

بـ 2017 بشهر الواحد نص بيه
كاعدين كلنا دنحجي باوعت امي جايبه موبايل جديد الها

كتلها... الله شوكت يصير عندي موبايل مثلج

اميره... ماما بعدج صغيره كملي السادس واني اجيبلج موبايل كهديه...گالتها بضحكه

حره... خلي اطلع من الخامس بالاول راح انفصل من الغياب

هي ضحكت... لا يمه شدي حيلج

مقدام... اني براس الشهر اجيبلج موبايل

حره...لا اتشاقه خلي اخلص الاعدايه وعود اشتريلي

مقدام... لا مترهم ماكو وحده بكدج ماعدها..

وصدك براس الشهر جابلي
موبايل اني طرت
بيه هو باوع لسالي

مقدام... انتي براس الشهر اجيبلج...

سالي... ماشي

مقدام... هو الموبايل من الجبير للصغير اليوم حره وبراس الشهر اجيبلج وعد مو تضوجين...گالها بتقنيع

سالي... لا عادي هو استخدم موبايلها اذا كلش..

مقدام.. اي عفيه

حره... رحت حطيته ع الشحن واني حايره بيه اجت ماما شافت الموبايل ع الشحن

اميره... هاي مالتمن الموبايل؟

حره... مالتي

اميره... حلو منيلج؟

حره...  مقدام جابه الي

راحت باوعتله كالت حلو بالعافيه

كلنا كاعدين بالهول باوعت لمقدام كلتله
اميره... لعد وسالي ماجبتلها؟

مقدام... براس الشهر ان شاء الله اجيبلها...

اميره... لا ميصير هو لو تجيب للاثنين لو تسكت جان اجلتها

باوعت لسالي... خوما ضجتي ماما؟

سالي.... لا عادي هو اصلا حره كلتلي استخدمي موبايلي...

اميره... ولا يهمج اني اجيبلج ميصير خواتج عندهن وانتي لا

سالي...  لا هو مقدام شوكت ميصير عنده يجيبلي... حجتها وهي تباوع لمقدام بابتسامه

مقدام...  تدللي عيوني الج... گالها وهو مبتسم

حره... ضليت صافنه على امي وبگلبي اسوي شنو هالتفرقه وبعدين اكول يلا تعودت..

بالليل رحت من الداير احجي ويا حياة وشوفتها الموبايل

...شوفي مقدام جابه الي..

حياة...بالعافيه حلو يخبل

حره..جانت سمرا بايته يمها وهاي اول مره تبات يمها فضلينا نسولف من الداير الى ان اندگت الباب طلع مقدام

الداير الي التقي بيه اني وحياة صاير ليورا يعني اليدخل ميشوفني بس اني اشوفو
كلتلهن  ... شويه واجي اشوف منو جاينه..

رحت تقربت اباوع منو اسمعت صوت عمران صديقه واگف بالباب 

مقدام... تفضل عمران دطب لجوه

عمران... لا مااكدر بس حبيب دبرتلي الفلوس

مقدام... تدينت الك من سيد علي جيرانا واني عندي ٣٠٠ ودبرها هاليوم بلكي نگلى شغل والله يفرجها

عمران... حبيب انطينياهن بسرعه مو عفت امي وحدها بالمستشفى

مقدام... صار

راح للغرفه وعمران واكف بالباب اني طبيت وراه شافني كال

... ها حره

حره... ها خو ماكو شي؟

مقدام... لا كلشي ماكو
اخذ الفلوس وراح انطاهياه وطلعو سويه اني رجعت كملت سوالف ويا البنات الى ان صاحتني رتيل
ورحت نمت

وبعدها بدا مقدام هوايه يطلع وهلك نفسه بالشغل واكثر شي بديالى يشتغلون
وهم يادوب تكفينا الى ان اجه بيوم محمل علاليك تلگيناه اني ورتيل

رتيل... الله يزيد ويبارك منين جبتهم حبيب..؟

مقدام... لكيت شغل بديالى وهذا الرجال الي اشتغل عنده محترم الله ينطيه العافيه حيل مداريني اني وعمران

رتيل... ياالله الحمد لله

لثاني يوم طب مقدام  كال لرتيل... خلي نجيب تخم للبيت..؟

رتيل...مقدام  عوف الفلوس ضمهن الك خاف تحتاج لاتستعجل

مقدام... لا هو شويه شويه دام عندي خلي نرتب البيت هم شويه ترتاح نفسيتنا

رتيل  ...  يلا بكيفك انروح ونجيب..

ع الغده كاعدين دناكل
مقدام باوع الامي... يمه العصر اني ورتيل  نروح نجيب تخم
تجين ويانا؟

اميره... اي حلو بس اذا تريد تجيب تخم هم شنو رئيك نصبغ الاستقبال؟

مقدام... اي هو هيج راح اسوي بس خلي نجيب تخم
حتى نرتبه ويا اللون

ضلو يتناقشون للعصر راحو جابو تخم كلش حلو  اني وسالي نكعد عليه ونطگطگ صور

لثاني يوم الصبح صبغو الهول والاستقبال اني اختنك من ريحته گلتلهم...  طالعه يم حياة  ...

بهايه الفتره گضيتها كله غيابات من المدرسه ناويه ابطل وامقدام  ميجي هواي ميدري عني ورتيل  ملت اخر شي لان مالي اي واهس بالدراسه

رحت يم حياة لگيت يمها سمرا ضلينا نسولف
وهم قبل ال ١٢ خابرت سمرا امها

سمرا...ماما تعالي عليه عندي دوام ورشم عند شغل و ميكدر يجي

سدته ورا شويه اتصلت عليها امها اعتقد سألتها ع المكان وين بالضبط لان ضلت تدلي بيها ووصفتلها البيت والفرع
شويه وسمعنا صوت هورن طلعنا شفت مره لابسه نظارات وحاطه حمره حمره والشال ع النص بس كلش انيقه

نزلت من السياره لابسه كعب طلعنا كلنا وكفنا بالباب تقدمت سمرا عليها هي باوعتلنا اني وحياة

رحنا سلمنا عليها هي ابتسمت
كالت... منو منجن حياة؟

سمرا كلتلها... هاي.. وحاوطت بايدها حياة
ابتسمتلها حياة

كلتلها... ماشاء الله صدگ حلوه عبالي سمرا تبالغ

حياة... شكرا جمال عيونج

سمرا اجت يمي جرتني كلتلها... ماما وهاي حره صديقتنا الروح بروح نحبها حيل...

امها ضحكت كلتلي... هلا بيج حره

اني ابتسمتلها كالت لسمرا... يلا ماما حتتاخرين ع المدرسه
باوعتلنا گالت... اترخص منجن بنات

ابتسمنالها صعدن بالسياره وراحن
بعدها رجعت للبيت ورتبنا  وصدك تغيير البيت بيه راحه نفسيه ارتاحينا شويه

وراها بايام مقدام جاب لسالي موبايل وسالي طارت بيه الفرحه ماسايعتها تمشي وتبوس بالموبايل
وگمت كلما اطب الكاها تخابر رغوده

گاعده ع التلفزيون رن موبايل سالي وهي بالحمام  گمت اشوف منو
رفعت الموبايل شفته رقم رغد وهي مسجلته  رغوده نيوز

ابتسمت خلص الاتصال رجعته لمكانه من تطلع هي تخابرها

وره شويه طب مقدام رتيل گاعده تلكط تمن بباب المطبخ راح عليها
ثنى گبالها طلع علبه
فتحها وانطاها لرتيل

كمت رحت يمه.. باوعت محبس ذهب يخبل رتيل شهگت اخذته منه فرحانه
باوعتله...

... هذا الي..؟

.. اي الج... گالها بابتسامه..

... يخببببل.. بس! 
منيلك فلوسه مبين غالي!

مقدام... عندي مجمعهن الج لتهتمين المهم عجبج..

... مقدام حبيب اني راحتكم عندي تسوه الدنيا
فلوسك اجمعها الك حبيب لتصرفها

مقدام... وشلي بيهن اجمعهن اني غير دشتغل الجن وبعدين الله يدبرها لا تهتمين

حره... ابتسمت اخويه حنين حيل وعنده اهم شي راحتنا
دعيت الله يحفظه النا من كل مكروه وشر
ويبعد عنه اولاد الحرام

بشهر الثاني بنهايته اجت سالي من المدرسه طبت گالت باستغراب

سالي... هاي شكو...
تحجي وتهز بيدها

رتيل... ها شكو؟

سالي... رغوده اليوم سولفتلي يكولون ذاك الاسبوع معتقلين واحد محاصرين بيته هذوله سوات ومعتقليه واحنا بنفس الفرع وكلشي مندري... وضربت ايد بايد وطكتها ضحكه...

رتيل... يا ليش..؟

نزعت الجنطه كالت... اكيد مصخم وجهه اهله...

رتيل... لتحجين هيج الله اعلم
شصاير...

سالي... اليوم هم دانمر شفت قوات سوات هنا
لابسين اقنعه يكول افلام رعب بس بيني وبينجن حلوين

حره... هم لابسين اقنعه شلون عرفتي حلوين..؟

سالي... كلبي حسني

حره... شعدهم بالمنطقه؟

سالي... علمي علمج بعشوي اخابر رغوده واسالها

لليل خابرت رغوده كلتلها... ها ولج متدرين ليش اعتقلو الولد...؟

رغد ... للاسف ماعرفت هواي معلومات غير ان هالولد متورط وهم دايدورون على واحد ثاني
مو همه وهذول الي اعتقلوهم يعرفوه متشوفيهم طلعو

سالي... منو هذا الواحد؟

رغد... مادري بالضبط شنو بس لو تاجر لو تاجر وارهابي لو يهرب سلاح...

سالي... ياااا

رغد... اي والله

حره... دنتعشى اتصل موبايل مقدام فتح خط وسبيكر
اجه صوت عمران..
... مقدام تعال ببيتي الشباب متجمعين نتعلل

مقدام... لا ما اگدر اعوف خواتي وحدهن بالبيت

عمران... لعد نجي يمك عادي؟

مقدام.. هلا بيكم..

حره... شويه واجو گعدو بالحوش البره يسولفون ويضحكون لل12 يلا يرحون
تكرر هالوضع وگامو يوميه يجون

مقدام وعمران وثلاث اشخاص وياهم 
گامو من يجون يگعدون بالحوش ماكدر اروح اسولف ويه حياة من الداير وياني يوم حياة تگوم تعد وتصف عليهم

لمدة اسبوعين يوميه يجون يضحكون ويسولفون واصواتهم مزعجه وعاليه كلش
رتيل ضاجت من الوضع...  خلي يجي مقدام لازم احجي وياه يبطل يجيبهم لهنا احنا هنا بنات وميصير يجيبهم

وصدگ من اجه مقدام گلتله رتيل...مقدام والله مااحب اضوجك وماعندي مشكله يجون بس خاف الناس تفهم غلط واحنا ناس على كد حالنا الحجايه تضرنا يحبيب

مقدام... بعيني هاي اخر مره بعد مايجون طمئني... حجاها بابتسامه..

وراها بيومين ورا العشى اندك الباب البره طلعت رتيل واني وراها وسالي ضلت تحجي ويه رغوده

صاحت رتيل... منووو

.... هو كال بصوت عالي اني مقداام  افتح الباب

رتيل باوعتلي... هذا مو صديق مقدام مدري شسمه نسيته

حره...  اي اياد هذا اعرف صوته

راحت رتيل من ورا الباب كلتله...خويه مقدام مموجود..

رجع صاح... مقداااام افتح الباب... بصوت عالي

رتيل التفتتلي... شنو صوتي
ممسموع؟

باثناء مدا اجاوبها طفت المولده مال شارع
اتلفتت الجوارين عندهم يعني المولده مال شارع لا فصلت ولا شي طفت من الجوزه مالتنا هي بعيده ع الشارع
لان احنا بيتنا جوه بالافرع

يعني اكو احد طفاها من الجوزه... التفتت خايفه ومفزوعه... نهاية البارت

قراءة ممتعه

_______________

مرحبا فراشات شلونكم

هوايه يسألوني عن المشهد
ان شاءالله ببارت القادم حيكون المشهد

وهوايه يطلبون نشر يومي
باعو اني راح اسردلكم يوميه وانزله بس احتمال يتأخر عليكم

لان حسب السرد واذا كملته من وكت انشره الكم
وباليوم الي ماالحگ بيه ماانشر
لان عندي بيت واطفال وزوجي كلهم يحتاجوني فمااگدر اعوفهم

ف ان شاءالله اليوم الي اسرد بيه واكمل السرد انزله الكم بعيوني اما اذا ملحكت فينزل يوم ثاني

شكرا للفراشات المتفاعلات بالقصه
وشكرا التشجيعكم الحلو

وهاا بهذاك المشهد اكو فراشات گالن حرگتي الاحداث

اطمئنو فراشاتي المشهد النشرته 10 بال100 من االاحداث الموجوده بالقصه فمابيه حرگ

هوايه طلبن حساب حره ف حاانزللكم حسابات الانستا والواتباد
طبعا نزلته بعد مااخذت موافقتها ع هالشي

حساب الواتباد
AL_hura

يوزر الانستا.  alhurwah

نسيت شلون ارجع الواتباد القديم قصدي التحديث القديم
جان من يغدر بيه النت انزل البارت عالبيانات
بس من اتحدث الواتباد بعد مينزل عالبيانات

النت اني وياه هالفتره مثل الضراير
يروح هو يجي اني اجي اني يروح هو خبلنيييييي

#تعديل
هايه صورة الانستا تبع حره