الحلــــــــقه الثالثـــــــه
رواية... هل كانَ حُلماً...؟
{العِراق-المُصغَر...عنـاق-الارواح}
بقلمي ... لؤلؤة_البِحار ...
___________________•
( 22 /3/ 2017 )
:- وراها بيومين بالليل فتحت الباب دخلت للاستقبال ... باوعتلهم گاعدين يسولفون ... رحت گعدت يمهم ...
...باوعت لشكله ابتسمت ... شكله مهموم حيل يوحي للحزن اكثر من الفرح ...
...ملامحه حلوه بس تعبانه كلش والقهر ماخذ حيز كبير منه ... تنهدت بحزن رجعت عيوني التفتت للگاعده گدامي ...
... تبتسم بس اعرف ابتسامتها مزيفه الهموم البيها ما تسمحلها تبتسم شايله همنه ومسؤوليتنه الصعبه من غير الاشغال التشتغلها بس حتى توفرلنه لگمة حلال ... سألته ..
رتيل :- لوين رايح بهاالليل و تاركنه وحدنه ليش متخليها للصبح وتطلع مو احسن ...؟
جر نفس هز راسه وگال ... الشغل الي لگيته زين وبيه فلوس هوايه فلازم اروح اليوم والا اخسره وتعرفين احنه بحاجت الفلس هسه ...
گالت وهي تباوعله بنظرات قلق وخوف ... گلبي ممطمئن ما اعرف ليش وبنفس الوقت احنه شلون حنبقى بنات لحالنه وبمنطقه مثل منطقتنه ..!
شكو سكير وتعبان وازعر بيها ..!
تنهد ابتسم ... امي راح تجي اتصلت عليها وحذرتها ما تتأخر بطلعتها وگالت هي بالطريق راجعه يعني على ثانيه توصل ...
وبعدين لتخافين ماكو شي هي يمجن واقفلي الباب زين و لاتفتحيها لكائن من يكون
حتى لو اني ادگها وتسمعين صوتي واگلج افتحي الباب لا تفتحيها قبل لا تتصلين عليه وتتأكدين ...
هزت راسها ... تمام روح الله وياك ان شاءالله ربي يسهل طريقك ويفتحها بوجهك ...
ابتسم گام دنگ عليها باس راسها رجع التفت الي ابتسم اجه عليه باسني براسي وخدي گال ...
مقدام ... عينج على اخواتج و رتيل لا تتعبيها وتخليها تركض وراجن خطيه ارحمنها ...
..ابتسمت ... هذا الكلام وجهه لحضرت الانسه سالي هي المتعبتنه حيل اني بنيه عاقله وفقيره وماكو مني ...
ضحك ... يالبنيه يالعاقله دربالج عالبيت بغيابي خوش ..؟
ابتسمت .. اي ميخالف
گام مشى خطوتين وگفت رتيل وگالت بصوت ...
... مقداااام ...
وگف دار وجهه عليها ابتسم ... ها خيتي گولي ..؟
رتيل :- مقدام اتذكر دائما ( لگمة الحلال القليله وما تشبع خير بألف مره من لگمة الحرام التشبع ) الله يبعد عنك اولاد الحرام ويدزلك اولاد الحلال ...
.. باوعتله ... ضل صافن بعيونها ثواني ومثل الجسمه تجمد ما عاد يتحرك نزل راسه للگاع رجع رفعه ابتسم شبح ابتسامه گال ...
... ان شاءالله ..
طلع طلعنه وراه ... انفتح باب البيت دخلت امي شافته هزت ايدها ودا تدخل تنهد وگاللها ...
مقدام ... وين جنتي اكو وحده هسه ترجع ..؟
... شمرت جنطتها بعصبيه گالت ... ما دخلك بيه شوكت ما ارجع ارجع احترمني اني امك فاهم ...!
تنهد ... على عيني وعلى راسي ليش اني شنو المصبرني غير بر الوالدين وكلام الله ...
رجع جر نفس بقوه ... دربالج عالبنات لا تعوفيهن وحدهن لحتى ارجع الدنيا مو امان وكلشي يصير لا سامح الله ...
هزت ايدها ودخلت لغرفتها ... تنهد فرك عيونه اخذ جنطته وطلع رتيل كانت شايله سراحية مي شمرتها ورا وگالت ...
رتيل ... تروح وترجع بالف سلامه الله يبعد عنك كل شر ان شاءالله ...
رجعت للغرفه دحست روحي بفراشي و من التعب بسرعه نمت... الصبح ڪعدت على صوت ماما ورتيل يحجن ڪمت فرگت عيوني بنعاس...
طلعت من الغرفه باوعت ماما لابسه ملابسه وتڪول لرتيل...
اميره ... اني طالعه هسه راح اروح لصديقتي وابات يمها دربالج على مروه
رتيل ابتسمت بستهزاء وڪالتلها... ميحتاج توصيني خواتي اني الربيتهن..
:- ماما راحت ورتيل رجعت تشتغل ابتسمت بحزن...
رحت اساعدها بالشغل... للظهر اتصل رقم غريب على رتيل فتحت خط طلع مقدام ڪاللها...
مقدام ... رتيل لتطلعين من البيت نهائياً وعينج عالبنات لتخليهن يطلعن
ڪلتله بخوف... ليش مقداام شكو شصاير..؟
ڪال... بس ديري بالج على خواتي ولا تطلعين من البيت وبليل خلي بيبي بهيه تجي تبات يمچن هي وحياة...
ردت عليه بخوف... بس ڪلي شكو قلقتني حيل...
... راح اروح عندي شغل و سوي مثل ما ڪتلج سد الموبايل باوعتلي بخوف ...
حره ... يمكن عرف ماما طلعت فخاف علينه ونبهنه منطلع لتخافين ماكو شي ان شاءالله...
هزت راسها ونضراتها كولها قلق... ان شاءالله
تمشيت خطوتين شفتها تباوع علينه وتأشر بإيدها...
سالي .. شكو..؟
حجيت... ماكو شي بس مقدام ڪال خلي بيبي بهيه وحياة يباتن يمچن ورتيل ظلت قلقله...
حجت بأبتسامه
سالي ... ماكو شي احتمال متعارك ويه شي واحد ولان هو مموجود خاف علينه نتأذه...
... هزيت راسي.. اي احتمال..
مشت بتجاه سياج البيت ڪالت
سالي... اني حأعبر لبيت حياة منا دام مقدام ميقبل نطلع و هم اشوفها اذا تبات يمنه ...
رتيل ڪالت وهي تدخل للمطبخ... اي خوش.. روحي ساعديها تعبر لتوڪع وتتأذه...
رحت ساعدتها تعبر... بينه و بين بيت حياة سياج وناصي شويه مو عالي حيل اذا احتاجينه شي سالي تعبر منه عليهم...
شويه ورجعت طفرت من السياج رحت عليها ڪالت...
سالي ... اخت حياة سمرا وخطيبها موجودين يمهم...
.. ثواني و مدت راسها حياة من السياج ڪالت...
حياة ... تعالن تغدن يمنه شلون مسويه برياني يممم من هذا الگلبج يحبه...
... ابتسمت... الف عافيه بس مشغولين دا نعزل البيت فمراح نگدر نجي...
حياة ... اي بس تغدن يمنه ورجعن شنو السالفه..؟
..مگدرت اڪوللها مقدام نبهنه منطلع... رفضت ظلت تلح عليه بس مقبلت گالت...
حياة ... لعد اوكفي اجيبلكم برياني واجي...
... راحت شويه واجت جايبه بالگدر برياني اخذته منها گالت
حياة ... سلميلي على رتيل...
ابتسمت... تدللي
خلت وراحت رحنه حضرنه الغده وگعدنه نتغده .. لليل دا اكنس بالصاله رتيل صاحت مروه گالتلها...
... تعالي اعلمج الاحرف... راحت مروه گعدت يمها وگعدت ترسملها بالدفتر الاحرف ترسمه وتگصه وتلونه الها...
سالي کاعده ترسم ومندمجه برسمتها... و رتيل تشجعها عالرسم...
رتيل گالت لمروه ... اذا ضبطتي الاحرف وحفضتيهن وتهجيتيهن صح اخلي حره تسوي كيك وانطيج قطعتين
قبل لتكمل كلامها طرت للمطبخ اسوي الكيك ومروه تگمز من الفرح...
بقيت بالمطبخ اخبط بالكيكه خليتها بالقالب ودخلتها الفرن رحت فتحت الثلاجه ادور على كاكو او شي ازين بيه الكيكه
بس ملگيت غير القشطه طلعتها وتركتها برا حتى تموع وازين بيها الكيكه...
كملت طلعتها من الفرن شميت ريحتها يممم مبينه كلش طيبه وشكلها يشهي...
حطيتها ع الكاونتر جريت القشطه و عصرتها عالكيكه زينت الكيكه بيها جريت سكينه
حطيتها يم الكيكه فتحت الثلاجه باوعت اكو قوطيتين ببسي جريتهن وحطيتهن كلهن بصينيه يم الكيكه اخذتهن ورحت للصاله
گعدنه قسمنه الكيكه وگمنه ناكل طعمها يجنن صار بقينه ناكل ونسولف عن طموحاتنا و احلامنه...
مروه کالت... اني اريد اصير دكتوره حتى اساعد الناس...
سالي گالت بتأمل.. واني اريد اصير رسامه مشهوره ويگومون ياخذون رسوماتي للمتاحف
وهااا افتح صالون همين اكيد اني مبدعه بالرسم فراح ابدع بالمكياج
...
رتيل گالت بحزن... حلمي اشتري بيت كبير واثاث جديد واجمعجن كولجن بيه...
باوعلي وگالن... وانتي شنو حلمج...؟
ابتسمت ... حلمي اممم احلى حلم عندي هو انتن تبقن يمي ولمتجن مغطيتني كلشي ما اريد غيرها...
اكلنه الكيكه وزاد منها گالت رتيل...
:-هايه الكيكه ضميها لحياة شيخلصج منها اذا درت بيج مسويه كيكه ومعايفتلها..
اخذت الكيكه وگمت ضميتها
شويه و اندك الباب البره طلعت رتيل واني وراها وسالي ضلت تحجي ويه رغوده
صاحت رتيل... منووو
.... هو كال بصوت عالي اني مقداام افتح الباب
رتيل باوعتلي... هذا مو صديق مقدام مدري شسمه نسيته
حره... اي اياد هذا اعرف صوته
راحت رتيل من ورا الباب كلتله...خويه مقدام مموجود..
رجع صاح... مقداااام افتح الباب... گالها بصوت عالي
رتيل التفتتلي... شنو صوتي
ممسموع؟
باثناء مدا اجاوبها طفت المولده مال شارع
اتلفتت الجوارين عندهم يعني المولده مال شارع لا فصلت ولا شي طفت من الجوزه مالتنا هي بعيده ع الشارع
لان احنا بيتنا جوه بالافرع
يعني اكو احد طفاها من الجوزه... التفتت خايفه ومفزوعه باوعت لرتيل گالت
... لتخافين احتمال الاولاد ديلعبون بالجوزات وطفوها ماكو شي...
حره... نطلع نسويها لو شلون؟
رتيل... لا منطلع الجوزه بعيده ع الشارع ومقدام مموجود هسه وتجي الكهرباء
بس هذا وين سمعني وراح اشو من نطفت المولده هو خنس
حره... احتمال سمعج وراح لان صوتج عالي مو مال ميسمعج بس ليش هيج يصيح عبالك عنده مداهمه؟
رتيل... مدري والله يجوز مستعجل شو وين ديروح واجه على مقدام مدري بعد
حره... رفعت كتافاتي بمعنى ماادري وسكتت
طبينا للهول لگيت سالي تدردم لان ماكو كهرباء
وفاتحه لايت الموبايل وتضوي لمروه
لان مروه تخاف من الظلمه
ثواني واجت الوطني ابتسمنا بفرح وكعدنا نسولف شويه
تالي رتيل کومت البنات سالي ومروه نومتهن باجر عندهن دوام
نومتهن وطفت الضويات كولها بقه بس ضوه البره مشتغل اجت گعدت يمي وبقينه نسولف شويه وعاطت
رتيل ... نسيت صداري البنات مكويتهن .. گومي يمي اكويهن...
گمنه للغرفه فتحت الضوه وگامت تكوي بيهن واحنه نسولف تلوم بيه وتحاول تقنعني ارجع لدراستي...
واني رافضه مااحب الدراسه
مو بايدي
كملت علكتهن بالكنتور طفت الضوه و رجعنا للاستقبال مددنه اني وياها ردت باب الاستقبال
وحطت وراها نعل حتى تنسد لان قفلها مكسور ومتنقفل ومكان القفل ضال فراغ على شكل دائري...
توني حطيت راسي عالمخده ورتيل هم حطت راسها والبنات نايمات بصفنه.
سمعنه صوت دبچه عالسطح و كأن واحد يمشي وبنفس الثانيه صار صوت دبچه من جهة باب البيت البراني
رتيل لا اراديا حضنتني وڪالت... بسم الله الرحمن الرحيم
صارت دبچه حيل قويه عالسطح عبالك مثل الاشخاص اليمشون بالسره واحد ورا الثاني...
رتيل گالت... هذا مو صوت اقدام بزون هذا صوت اقدام بشري
... خفت والرجفه سرت بجسمي بنات ولحالنه بالبيت وكلنه زغار ونخاف من اقل طگه مو ادور هذا الدبيج القوي...
ما اعرف منين اجت القوه لرتيل كمزت من الفراش بسرعه جرت التخم وطبگته عالباب... التخم جديد واثنين ميحركو بس يمكن من خوفها گدرت تحركه...
على صوت جر التخم فزن البنات جمعتنه كلنه گعدتنه بزاويه حاطه ايدها على قلبها وتسوي.. بسم الله...
ثواني واندفر الباب طبو ثلاثه ملثمين وممبين منهم بس عيونهم واحد منهم شايل لايت ضوه علينه ورجع شال الضوه ليفوگ مدري شگام يحجي بس بلغه ممفهومه ويه الوياه الي فهمته من كلامه بس كلمتين...
... مقداام وعمران
عمران صديق مقدام
هذول التلاثه وگفو على جهتين وطبو وراهم بعد ثنين واحد منهم ڪال بصوت ناصي
... المكان فارغ سيدي
رجعو طبو بعد ثنين غير هذول واحد منهم يحجي ويأشر بس بلغه ممفهومه
اخر شي ڪله... اكو اثر ل. ع. ن او م. د...؟
جاوبه اليمه... الظاهر انهزم سيدي..
... عيونه صارت على رتيل جرها من ايدها گللها...
... وينو مقدام..؟
حجت بخوف... ما ادري والله...
ضربها راچدي وگللها... منين هربتو احجي...؟
ڪلتله... والله مندري... گامت تبجي وتشهگ...
تدخل شخص ثالث لازم لايت فحص الاستقبال فحص حتى الجوه التخم والوراه رجع باوعلنا بتركيز ممبين منه شي بس عيونه ڪال...
... عوفها واضح هي ما تدري...
... ترك رتيل وضرب ايد بإيد بقوه اشر للجماعته ڪامو ينسحبون وطلعو بقو بس هذول الاثنين ابو الايت ضل فاتح الايت على سالي ويباوع عليها
باوعتلها.. لابسه كيمونه دلعه.. تلبسها من تنام لان تختنگ.. اجه تقدم عليها ديجرها اجه الشخص الوياه دفعه واشرله بمعنى اطلع...
ابو الايت هز راسها واجه جرها وڪال... عوفني وياها بس ليله...
رتيل صرخت الشخص الوياه بسرعه سحب السلاح وجهه عليها وڪلها...
... صووووتج لججج...
دفعته رتيل وهي تبجي گالت.. عوفونا مندري وين مقدام والله...
سالي بجت گالتله بصدق... اي والله عوفونا ممسوين شي احنه
ابو الايت سحب سلاحه گام يمرره على وجهه سالي حتى يخوفها هي تبجي وترجف
الشخص الوياه گاله...
... يلا نمشي...
هز راسه... قبل لا اضوگ الحلاوه مستحيل...
جر سالي واخذها للغرفه رتيل تخبلت گامت تدگ وتلطم دخلو ثلاثه ڪام يأشرون للشخص اليمنه...
اني گمت تقربت منه دفعته گتله بحرگت کلب... لكم مخانيث گدرتگم ؏ النسوان امدا الرجوله اذا عدكم...
محسيت غير بضربة بوكس ببطني من ضربني وسحب ايده شفت بيها وشم كلمة امي الاستقبال ضلمه ومبيه ضوه غير ضوه شباك جيرانه الطال علينه...
گال... صوووتج لججج...
دار وجهه عالوياه وڪال...
... وانته روح صيح ذاك لا اني**** عرضكم
ذاك طلع يركض واحد گله... سيدي گطعت خلفتها
گال... استغفرالله اني تالي وكتي اضرب مره..!
رتيل تلطم وتتحسب عليهم... الله ياخذكم عوفونه حرام. عليكم ممسويلكم شي احنا
اباوع مروه انخرطت روحها وفقدت الوعي رتيل حارت بيها وبيه وبسالي
اني مسحت دموعي دا اروح اطلع لسالي
جرني من التشيرت وڪلي
... اڪعدي لججج....
حطيت اديه على عيوني وبجيت سمعته استغفر كال... احنا ماجايين ننتهك الاعراض احنا جايين نحافظ عالامن..
رتيل ڪالتله... لعد واختي من اخذتوها شتسمو هذا..؟
هو دار وجهه عليها كال... عجبتو وهسه يتزوجها...
... اني دفعته كتله... دوخررررر عنيييي الله ياخذككك... النفاضه احنا حاطيها عالميز بس من هوستهم طاحت بالگاع جريتها شمرتها عليه طاحت بكتفه ووگعت بالگاع تفلشت وشضاياها طاحت على اخواتي...
دار وجهه ؏ الاشخاص الواكفين يمه وڪال... طلعت شاطره يولي
اني كُلش انقهرت نزلت دموعي وگتله بصياح.... انتتتتتته وليييي موووو انييي...
التفتت ع الوياه باوعله ورجع باوعلي مثل الرگز بعيوني شويه وصاح.
... يلا يول اشتعلو نادو للگ... د خيجي لا اجي..*****
حره... عيوني عليهم وعلى حركاتهم راح الوياه باتجاه الغرفه شويه واجو اثنينهم وسالي وياهم
ابو الايت الاخذها ملفلها بالبطانيه جابها وگفه يم رتيل
تقرب عليها مدري شهمسلها وابتعد وبعدين نسحبو وطلعو من البيت
حاطه ايدي على گلبي
يرجف من الخوف
كامت رتيل تركض ع دولكة المي حاطيها خاف وحده تكعد عطشانه بالليل لگتها واكعه مندري شوكت بس باقي بيها مي
كامت اخذتها وگعدت يم مروه تحاول تكعدها بيها
ترفع باصابعها مي وترشه بوجهه مروه
الى ان صحت
التفتت لسالي وگالت بخوف ... سوالج شي اذاج احجي؟
سالي... لابس كلي ارجع واخذج يعني اخذج وسألني عن مقدام گتله ماادري وينه
حره...رتيل كامت تلطم حايره بينا وبامقدام بقينا للصبح نبجي ونخاف نطلع من الاستقبال
صار الصبح كمت رتيل لبست حجابها
وگالت... لازم نشتكي لازم انروح هسه للمرگز
حجتها وهي تلبس بحجابها
رحت لزمتها
باوعتلي و كالت... شكو؟
حره... رتيل احس ذوله شرطه مو حراميه..
رتيل... شدتحجين شرطه ويفوتون للبيت بهيج وقت؟
حره... ماسمعتي كله يكولون سيدي وسيدي !
رتيل... ممكن يردون يوهمونا...گالتها وهي تتصل على امي بس ماكز متجاوب اخر شي اتصلت على خالاتي سولفتلهن
وبعدين كالتلهن... ان تريد تشتكي
خالتي ام شذر گلتلها... لايمه لتشتكين خاف ياكلوجن العالم
واخوجن ماهو!
خالتي نرجس گالت... جايتكم ضلو بالبيت لتطلعون..
... ضلينا بالبيت مطلعنا صارت التسعه تقريبا اندكت الباب طلعت فتحتها شفت حياة وسمرا...
حياة... وينج شو اليوم ماكو؟ گالتها بقلق
مروه گلتلها... حراميه طبو علينا
حياة... عزا شنووو... حجتها وطبت جوا سلمت على البنات
سالي بعد الي صار الرجفه ضلت بيدها من الهلع
سمرا... فهمونا شكو؟
حره... كعدنا كتلها... والله ماادري شنو السالفه البارحه نايمين وحسينا حركه ع السطح وحجيتلها كلشي صار
حياة فكت عينها... صدك تحجين وليش ساكتات لهسه !!!
حره... مو خاف يطلعون جيش
حياة... يا جيش صدك تحجين اكو جيش يداهمون هالمكان
بهيج وقت..؟
سمرا باوعتلها كلتلها... كلشي يصير حسب الابلاغ اليجي...
رتيل... ليش حتى يجون احنا ماعندنا شي واخوي هم كلشي ماعنده الرجال من بيته لشغله دخيلك ياربي...
حياة... اني برئيي اشتكي وخلي القانون ياخذ مجراه وحتى لو جيش ماله حق يحاول يعتدي ع سالي
سالي... هو ماضربني كلشي ما سوالي يمكن رادو يخوفون رتيل بس شيردون من مقدام؟
حجتها وبجت حضنتها رتيل
رتيل ... لتخافين كلشي ميصير...
حره... شويه و اجت خاله ام شذر و ورا نص ساعه اجت خاله نرجس
خاله ام شذر ضلت تسأل ورتيل تسولفلها
گالت... خلي اتصل بأدم ونقدم شكوى باسمج تمام؟
كلنالها ... تمام
نرجس... كلتن لمقدام؟
رتيل... لا ماگتله..
نرجس... ليش ماگتله...؟
رتيل... خطيه خاف يقلق ويضل باله يمنا..
نرجس... صدك تحجين خابريه خيجي نفتهم شصاير
اخذت موبايلي واتصلت رتيل بمقدام كالتله...
... تكدر تجي اليوم...؟
مقدام... ليش اكو شي...؟
رتيل... لا بس سالي شويه مريضه واريد اخذها للدكتور
مقدام... صدك شبيها !
رتيل... تعال وتعرف
مقدام... ماشي جاي
سدت الموبايل وانطتنياه
صار الظهر واحنا لا غده ولا ريوك و حياة ويانا كالت
حياة... شويه واجيجن بنات... باوعت لسمرا كلتلها... تروحين للدوام؟
سمرا... لا مالي واهس
حياة... خوش تعاي وياي
سمرا... ماشي
... راحن طفرن من الداير ورا ساعه تقريبا طبت بيبي بهيه ووياها حياة وسمرا وجايبين كداري تمن ومرك ودجاج مشوي
رتيل... يا هاي ليش عذبتي نفسج والله منشتهي هسه شويه ونسوي...
سمرا...عذابيش يمعوده يلا ويانا ع الواهس تعالو..
حطينا الاكل بالمطبخ وبيبي ضلت تسلم ع البنات وخالاتي
رحنا اني وحياة وسمرا نصب الاكل بالمطبخ
حياة... لتضوجين حره كلشي حيبين ويكون تمام
حره... ان شاء الله...
حطينا الغده وتغدينا ورحنا هم نغسل المواعين واني كل بالي يم الي صار البارحه اخر شي
باوعت لحياة...حياة تذكرت شغله
حياة... شنو؟
حره... الرجال الي سأل على مقدام..
حياة... اي شبيه؟
حره... يمكن سوري..!
حياة... صدك والله..؟
حره... اي اغلب كلماته سوريه
حياة... يعني شلون؟
حره... يعني ماكال مثلنا وينه مقدام كال وينو
هي صفنت عليه كالت... وبعد..؟
حره... هو هيج يحجي بالو وينو وهالسوالف مال السوريين
باوعتلي بتفكير... لا مو ضروري يكون سوري هذا الرجال اما من الموصل لان احنا هيج نحجي وينو وشلونو او من الغربيه
حره... يعني انتو هم هيج تحجون؟ لعد شو متحجين هيج انتي...؟
حياة... لان اني تربيت بمناطق الوسط اخذت على لهجتكم بس بالموصل اكيد احجي مثلهم
حره... زين من الموصل شعنده
يمنا؟
حياة... والله حرت منو هذوله وليش جايين !!
حره... اني هم محتاره... حجيتها بحيره وخوف
كملنا المواعين ورحنا كعدنا يم خالاتي بيبي بهيه كالت
بهيه... اني اترخص اروح للبيت لان فارغ
رتيل... اخذي راحتج بعد كلبي ماقصرتي
وضلن يسولفن شويه وبعدين راحت هي وحياة وسمرا
ضلينا احنا وخالاتي گاعدين ونسولف وهنا يهدن بينا ويطمننا ان ماكو شي لوقت العصر طبت امي
استلمتها خالتي رزايل كلتلها
ام شذر... ماكو هيج ام انتي احساس ماعندج تاركه البنات وحدهن بالليل ولج انتي شنو
اميره... ماتعلميني شسوي اعرفي حدودج وياي بعدين شصار كلها ليله غبتها
خالاتي ماقبلن ضلن يحجن عليها بعدين هي كلتلهن
اميره... اني مو كلت بعد متطبن
بيتي؟
نرجس... والله لو ما البنات فلا يشرفني ادخل لمكان انتي بيه
حجت هالكلام وگامن طلعن اثنينهن بعدما شبعنها رزايل هي من طلعن كالت
اميره... شكو ذن شبيهن هدادات
رتيل... مالج علاقه باللي يصير بينا لتتدخلين ولتسئلين كلش ماطايقين الحجي وياج...
اميره... احجي عدل ادبسز
اني امج
رتيل... صلوات توج تذكرتي شو دوخري عني وخري... وطبت للاستقبال
امي ضلت صافنه راحتلها مروه
كلتلها... الحراميه اجونا بالليل وضربو اختي حره
واختي ضربتهم هيج بالنفاضه... وتاشرلها عود هيج ضربتهم كملت كلامها... واني تعورت بسببها باعي
... وتشوفها بكتفها..
اميره... ماما مروه مو كتلج كافي بطلي سالفة الجذب مال حرامي وشرطي تعاي شو هايه منو ماذيج...
اني باوعتلها صفح وطبيت يم رتيل سمعتها تحجي ويه سالي وسالي سولفت الها الصار
شويه وطبت كالت... غير تخابروني تكلولي..؟
حره... شوفي موبايلج كم مكالمه من عندنا
اميره... ماوصلن
حره... جيد لعد لتحجين...
اميره... انتن شو طولان لسانجن !!
رتيل... لعد شتردين تدوسين ببطوننا ومنگول اخ؟
اميره... هسه احجن عدل ولازم نروح نشتكي هالوضع ميرهم هيج يلا رتيل انتي اكبرهن امشي وياي نشتكي
رتيل... لا الله يسلمج يجي مقدام ونقرر..
اميره... نفس الشي ليش
نضيع وقت
رتيل... اني ما اطلع من البيت الا لما يجي اخوي
... ضلينا كاعدين وماما كل شوي تجيها مكالمه تطلع برا وتجي الى ان اجه مقدام واخيرا
كلنا تلكينا هو اول ماطب
كال لرتيل
مقدام... ها شلونج شبيها سالي...
وراح كعد يم سالي
حره... مبيها شي الحمد لله
رتيل... مبيها شي بس البارحه صار ويانا حادث...
وكف كللها... شننووو شصار..
رتيل... اكو جماعه طبو لبيتنا البارحه من السطح ومن الابواب حاصرو المكان سألو عليك
مقدام... صدك تحجين؟
رتيل... والله
مقدام... اذوجن سوولجن شي حجو وياجن شي غلط
سالي ... لا ابد بس سألو عليك ومن مالكوك راحو بس هم دوروا البيت حتى تحت التخم وملابس الكنتور كلها طشروها
مقدام... متاكدات مابيجن شي رتيل العباس عليج احجي...
حره... مقدام كلشي مسوو ولا حجو بس سألو عنك وعن عمران
مقدام... خره بيهم... وضل يمسح على راسه.. كال.. شيردون زين باكو فلوس شي.؟
رتيل... لا والله الفلوس بالكنتور وهم الملابس خوب مطشريها منتفيها تنتف بس الفلوس لكيتها مطشره ويه الملابس وماماخذين منها ولا ربع
يعني مجايين يبوكون مدري شيردون منك ياخويه
اميره... خلي نروح نشتكي ملازم نسكت...
التفتلها بعصبيه... وانتي وين اني مو كلت لا تعوفين خواتي انتي شنو ماعندج احساس!
بنات شلون تعوفيهن وحدهن بالليل صارلهن شي بلا وين انطي وجهي اني
اميره... لتدورلك حجه ترمي اللوم عليه واني شبيدي يعني صديقتي تمرضت ورحت يمها بالمستشفى شاكدر اسوي...
هو ضل يغلط ويفشر وفارت اعصابه كل شوي يتصل بصديقه عمران ويرجع يسالنا وهم يتصل ويحجيله
اخر شي بالليل كال
مقدام... مترهم هالمنطقه مو امان لازم ادبرلي شكم فلس ونطلع منها اني اختنكت دتطلع روحي
رتيل... اسم الله لتحجي هيج ان شاء الله كلشي يكون تمام زين خلي نشتكي؟
مقدام... ان شاء الله باجر.
صفن شويه ورجع گال... صدگ عليمن انتضر لباجر خلي اتصل بابو رائد صديقي
هو مو ضابط اتصل بيه واشوفه شنو يگول
حره... طلع موبايله واتصل بابو رائد
وابو رائد گله بليل اني يمكم
وصدگ لورى العشى
اندگت الباب طلع مقدام
واني ورتيل لملمنا الاستقبال وطلعنا نركض..
شويه ومقدام طببه للاستقبال وگعدو يسولفون
واني ورتيل نفتر بالهول نريد نسمع حجيهم بس ماكو صوتهم ناصي حيل
شويه وطلع مقدام وجهه ينطي الوان
باوع لرتيل
مقدام... رتيل بلا تعالي شويه ابو رائد يريد يسألج شوية اسأله
رتيل... عن شنو الاسئله..؟
مقدام... عن المداهمه الصارت البارحه..
حره.. راحت رتيل لبست حجابها وطب وياه لااستقبال بقت الباب مفتوحه رحت وكفت اتسمع
... بنتي هم شفتي زيهم الابسيه؟
... لا والله عمو الدنيا ظلمه بس هم كانو مقنعين وكولشي ممبين منهم غير عيونهم
.. اهااا زين عمو هم گالو كلام غريب يعني مثل الالغاز؟
... اي امم حجو يعني واحد منهم كاله سيدي مموجود ع-ن و م-د
هيج جان كلامهم..
... تمام بنتي اخذي راحتج بويه
حره... گامت رتيل اترخصت منهم وطلعت اجت وكفت يمي وضلينه نتسمع للكلام
ابو رائد... مقدام ابني الشكوى ماراح تفيدك بشي
مقدام.. ليش عمي ماتفيدني غير هم داهمو بيتي؟
ابو رائد... اي هم داهمو صح بس الظاهر داهمو البيت بأمر
اعتقد وحسب وصف اختك هذول بوات خاصه
او استخبارات
مو جيش ولا ارهاب
هم جايين عليك وعلى صديقك عمران ومن مالگوك انسحبو
وهم ما مأذيين البنات يعني هذول قوات
بس اي جهه مااعرف لو رتيل شايفه لبسهم جان گلتلك من هم ومن اي جهه
مقدام... زين القوات او الاستخبارات شنو يردون مني ومن عمران؟
وليش يداهمون بيتي؟
وشمعنى المداهمه بليل؟
ليش مااجو القو القبض علينا بالنهار او داهمونا بالنهار
واني شمسوي حتى يداهموني؟
ابو رائد... هاي الاسئله المفروض توجهه لنفسك وتشوف السبب
اما هم ليش مااجو بالنهار او من انته موجود
المداهمه تصير حسب البلاغ عليك
مقدام... يعني شنو مافهمت؟
ابو رائد... يعني يجي بلاغ شاكين بيك او متأكدين من شي عليك
واستطلعو انو انت بالبيت فـ يجيهم امر بالمداهمه
يعني هم مو مخططين لهالشي بس اجاهم بلاغ عليك وطلعو
مقدام... المحيرني اني ماعندي شي ومن شغلي للبيت ومن البيت لشغلي وحتى اخر فتره كمت من ارجع من الشغل اضل بالبيت والشباب اصدقائي من منطقتي يجون يسهرون يمي
بس ماعدنا شي مجرد اصدقاء وولد منطقه نسهر مع بعض
ابو رائد... ماادري والله ابني اني هم احتاريت ع العموم بويه هسه انته لا تشتكي لان ماكو فايده بالشكيه
هم اجو بامر من الدوله
فـ الشكوى عليهم مامنها فائده
واني راح احاول ابحث عن هالموضوع واشوف اذا اكو كاميرات بالمنطقه راح تفيدني بالبحث
واذا لزم الامر واتكرر هالشي اني اشتكي وارفع بيهم دعوه وانشوف منو هم وشيردون بالضبط..
مقدام... تمام عمي راح اعوفها وراك ومراح اشتكي وان شاءالله نعرف منو هم
ابو رائد... ان شاءالله يلا بويه اني ترخص
حره... وصله مقدام للباب ورجع يمنا ضلينا گاعدين وحايرين بأمرنا
كال
مقدام... هايه الفتره لاتطلعن ابقن بالبيت لبين ماانشوف شنو السالفه
والي تريد تطلع الامر مهم تگولي يلا
حره... بعد هالحادثه مقدام قلل طلعاته وطلعاتنا احنا هم منطلع لراس الفرع الا نگله ولازم وقت اكو هوايه عالم بالشارع
حيدر رجع دز امه تخطب رتيل ورتيل هم رفضت... خطيه انقهرت عليه شگد انرفض هالرجال هذا ومع هذا مصر يرجع يخطبها الا توافق
ورا الحادثه باسبوع گعدت الصبح طلعت لبيت حياة رحت يم البنات طبعا غلست نهائي ع المدرسه ويه كل هالمشاكل
وسمرا هم جانت تغلس على ايام بس هم تداوم نوعا ما احسن مني اني غلست فدنوب ماا الي واهس بالدراسه ابدد
رحت يم البنات كاعدات نسولف ونكرز حب سمرا كالت
سمرا... ابد مدارتاح هالفتره احس شي نايم على كلبي وابويه وتصرفاته كلش مضوجتني
حياة... اني هم ممرتاحه ابد
حره... اسم الله ليش شكو شبيجن؟
سمرا... ابويه هالفتره يهدد ويكولي بطلي تتواصلين ويا رشم لااصير مو خوش وانوب اخوتي صايرين احقر من ابوهم هالشي قالقني
قبل يومين داناكل فهذا اخويه تعارك ويا امي الكلاص كزاز بيده
شاله و شمره على امي اتاذت بكتفها
حره... حطيت ايدي على كلبي... صخام الصخمه...
سمرا... اي والله
حياة... وانتو شسويتو؟
سمرا... خابرت خوالي اجو سحلو بيه الكاع
حره... الحمد لله خوالج زينين..
سمرا... اي الحمد لله بس
الخلفه كشره
حره... الله يهديهم
سمرا... امين
باوعت لحياة ... وانتي؟ شبيج مزعوجه
حياة... ولا شي شفت حلم مزعج
حره... اي سولفيه؟
حياة... انسي مو حابه احجيه... الا گولي ماعرفتم منو الداهموكم؟
حره... ماكو اي خبر ولافهمنا شصار نتركها على الله..
حياة... يجي يوم وكلشي يتوضح
حره.. اي اكيد
طلعت من البيت شفت جيرانا دايحجي ويه شاب
باوعت للشاب لابس شفقه ضلو يسولفون بينهم
واخر شي الشاب رفع ايده بيها سويج داس بيه دگمه نفتحت السياره وصعدو ثنينهم وتحركت السياره
من راحو خليت ورجعت للبيت لثاني يوم گعدت الصبح باوعت مقدام مرايح للشغل
صبحت عليهم ورحت طويت فراشي وشلته رتيل حضرت الريوگ گعدنا تريكنا داطلع صار بوجهي كال
مقدام... سلامات
حره... ها شنو؟
مقدام... خوب غلستي فد مره ع المدرسه؟
حره... مداكدر ادرس نهائيا
مقدام... والله ماادري شكولج بس داتدفرين النعمه بايدج البنات تتمنى تدرس وانتي تتبطرين
اني سكتت
مقدام... وين رايحه؟
كتله... يم حياة
مقدام... ماشي لتتاخرين
حره... صار
رحت لبيت حياة بس ملكيت سمرا
حره... وينها سمسم شو ماكو اليوم؟
حياة... مدري كالت ما اجي اليوم
حره... ليش شعجب؟
حياة... كالت دانطلع اني وماما
حره... اها حلو شوكت نطلع اني وياج مطاعم
هي ضحكت كالت... مو الا مطاعم امشي نتمشى بالشوارع
ضحكت... خاف ميقبل مقدام
حياة... نلبس حجابات منو يعرفنا
حره... يا صدك تحجين؟
حياة... والله اريد البس حجاب
حجتها وراحت جابت حجاب لفته عليها يخبل
حره... اني ما احبه
حياة... هسه تحبيه لان شكله حلو
حره.. اوك حطيته شلون ماجان على راسي
راحت حياة كالت لبيبي
حياة... بيبي طالعين اني وحره
بهيه... ماشي والعلاج؟
حياة... اجيبه وياي من ارجع..
بهيه... خوش يمه
طلعنا بالمنطقه نفتر ولازمات ايدين بعض
ضلينا نسولف باوعتلها وحجيت
...صدگ سولفيلي الحلم ...
حياة ... انتي متنسيلج شغله... گالتها بابتسامه
حره... ابد ماانسه يلا سولفي
حياة... عوفج من الحلم المحلو البارحه شفت حلم حلو
حره.. شنو؟
حياة... شفت جسر طويل وكله ورد والمنطقه خضار مثل الجبال والجسر كله ورد
مرو ع هالجسر ناس اعرفهم
ومن ضمنهم خطيبي
وبعدها شفت سمرا تلعب وكالت هناك مكان حلو خلي نشوفه لان المكان يجنن ايكول جنه
وراحت مرت بسرعه ع الجسر صحتها كتلها لتوكعين ما ردت عاد اني هم لحگتها
حره... ياا واني وين؟
حياة...مدري مشفتج
حره.. هاي خيانه ترا
ضحكت كالت... هو حلم شبيج
حره... حتلو المفروض حتى بالحلم اكون وياج دام احنا بالدنيا منتفارگ ابد
المهم اي كملي
حياة... مشيت ع الجسر واحسني اشتم الهوا النقي يخبل بعدها سمعت صوت سالي صاحتني
درت وجهي شفت لعبتها القديمه السوتها رتيل هي وفستان سالي
حره... اي لسه موجودات
حياة... اي شفته مرمي ع الجسر واجت سالي داتاخذو مشت شويه من الجسر وفزيت
من النوم
حره... صفنت... احسه حلو هالحلم
حياة... اني هم حبيته حيل
وصلنا للصيدليه اخذنا العلاج ورجعنا للبيت وكضيناها سوالف
للمغرب رجعت لبيتنا
لليل ورا العشى كاعدين كلنا ع الموبايلات
سالي بصفي اتصل موبايلها
باوعتله رغوده نيوز
سالي فتحت خط و حاجتها شويه وكالت
سالي... ياااحح شنو باع بيته
اول تالي
اني انتبهت عليها
هم سكتت شويه وكالت
سالي... يعني شنو منطيه ضعف السعر؟
ورا شويه كالت
سالي... يا والله زين ميجون يشترون بيتنا
وبعدها انتقلن يحجن ع المنطقه كلها الى ان كلتلها سالي
سالي... كافي يمعوده احنا شدخلنا بالعالم نحير بنفسنا وبس
وسدت الموبايل
التفتت علينه وحجت
... ولكم ماتدرون
حره.. شكو؟
سالي... رغوده تكول جيرانا باع بيته لناس جدد غير اخوته
صفن مقدام كللها... منو جيرانهم؟
سالي... لا جيرانا احنا مو اني ورغوده واحد فمن تكول جيرانا يعني جيرانا احنا... واشرت باتجاه نفسها
رتيل... شعجب مو اخوته يردونه
سالي هزت ايدها كلتلها... لعد انتي متدرين..
رتيل... شنو؟
سالي... ولو يعني اني مدخلني بس يلا احجي
اخر شي سمعته انو اخوته... وتاشر بايدها
هذوله مو خوش فهو هددهم كللهم راح اشتكي ... واشرت باصبعها على راسها ورفعت حواجبها ...
حره... وانتي شبيج متشمته...
سالي... مااحبهم
رتيل... هو انتي وين شايفتهم؟
سالي... هاي بعد كلبي حسني
مو زينين
كتفت ايدها والثانيه حطتها تحك بحنجها وتباوع لفوك وگالت
رتيل... يگولك حسب اخبار رغوده نيوز هو البيت ب ٤٥ المفروض وهم مشريه ب ٧٢ يعني هذوله شكد خسرانين
كتله... قصدج شكد عدهم فلوس
سالي... اي مو من نسبة خسارتهم نقيم شكد عندهم
مقدام ضحك كللها... وانتي ولج شنو هالسوالف شدخلج بيها عيب بابا
سالي... الفراغ وما يفعل
هو هز ايده ورجع يباوع بموبايله
لثاني يوم الصبح
هم داطفر لبيت حياة
داطلع شفت سيارات جبيره محمله وينقلوب بالاغراض
خليت و رحت لبيت حياة لگيت سمرا هناك ضايجه
... شكو سمسم شبيج؟
سمرا... الجلب ابن عمي نهى عليه
وماما وخوالي من تعاركو
وياه ابن عمي كال ابوها كلي اخذها بثوبها
والبارحه ابويه هداه بيت
شفتن الحقاره كله علمود يقهر رشم گالتها بحزن
ضلينا نهدي بيها وحياة كلتلها
... لتخافين ماكو شي يتم بدون رضاج بالنهايه هذا زواج مو لعبه
ضلينا نسولف ورجعت للبيت مسوين حملة تنظيف ع المطبخ
ساعدت البنات
لثاني يوم طلعت هم سيارات جايبين غراض للبيت سالي واگفه بالباب
گتلها... شكو؟
سالي... خنشوف جيرانه الجدد
حره... والله فارغه
سالي... اي والله
رحت لحياة لگيتها دتخبز رحت ساعدتها واگفين هي تخبز واني اشلع الخبز
گالت
حياة... خايفه على سمرا حيل
حره... ليش شكو؟
حياة... ذوله اخوتها جلاب البارحه مخابرها ابن عمها وهي مرزلته وجاي الكلب اخوها يهد عليها وجارها من شعرها يكوللها
... شنو تكولين لابن عمج مااريدك غصبن عليج حجاياتنا متصير ثنين وهم امها وخوالها طردوه
حره... دخيلك ربي شنو من نماذج هذوله
حياة... اي والله الاخوه طلعي منهم بس سمرا البقيه صايره تلعب نفسي منهم
حره... خليها على ربج اكيد يحلها
حياة... ان شاء الله انوب رشم نقلوه
حره... يا وين؟
حياة... ناقليه ل****
حره... حطيت ايدي على خدي مصدومه... عزا هنا كلها دواعش
حياة... اي والله مااكول غير حسبنا الله
حره... يارب تطلع حوبتجن باقرب وقت..
حياة... امين
كملنا خبز صفطناه وحطت شال على راسها كتلها
حره... هاي شنو عود صدك تحجبتي
حياة... اي
ضحكت كتلها... نيالج الله يهديني وهم اتحجب
حره... اميين
طلعنا دنودي الخبز
شفنا شاب نزل من سياره مبينه فخمه اسمها لاند گروز
لابس شفقه ورجع فتح الباب الجهه الثانيه
ونزل منها واحد احدب
ضل يتلفت ويباوع للمكان المحل وبيتنا وبيتهم
الى ان باوعلنا
نزل راسه بسرعه
وبعدها عدل الشفقه مالته
ورجع دخل للبيت.... نهاية البارت....
__________________
مرحبا فراشاتي
فراشات المشاهدات ع البارتات داتوصل للالف
بس التصويت والتفاعل قليل كلش
ليش.. القصه حلوه ومماخذه استحقاقها
قبل لتقرون اضغطو ع ال⭐
لتنسون التصويت والمتابعه
قراءه ممتعه فراشاتي 🦋
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!