الحلــــــــقه الرابـــــــــــــــعه
رواية... هل كانَ حُلماً...؟
{ العِراق-المُصغَر...ارواح-مهشمه }
بقلمي ... لؤلؤة_البِحار ...
___________________•
حره :- اتصل رشم فتحت خط كال... عندي الج خبر
حره... شنو من خبر ؟
رشم.... مشعل فطس والحق رجع لاصحابه...
حره... مات؟
رشم... الموته اليستاهلها
حره... شلون؟
رشم... سبع طعنات بگلب هالكلب
حطيت ايدي ع كلبي گتله... وبشر القاتل بالقتل ولو بعد حين
رشم... افتك العالم من شره
حره... انت الي قتلته ؟
رشم... مو قتل هذا القصاص
حره... والبقيه؟
رشم... البقيه مو مهمين والقانون راح يحاسبهم المهم الراس الكبير انقطع
سكتت رجعت كتله... وقاتل حياة؟
رشم... نهايته راح تكون اسوء من حياته
حره... بجيت وسديت الخط حيل انقهرت مجنت متوقعه بيوم نوصل لهالمرحله مجنت متوقعه يجيني واحد يكولي قتلت فلان واكول الحمد لله بس!
بس مشعل شغلته تختلف
مشعل مانهى حياة سمرا وحياة بس
لا اا
هو نهى حياة عوائلهم بعدهم كلشي تدمر
من بعد سمرا وحياة
حياتنا الهادئه المجانت تعجبني صرت اتمناها ولا هذا الخوف الي اعيشه كل يوم
اخاف اعيش اكثر واضل اتعذب واخاف اموت وانقتل
مثل صديقاتي
اخذت صورهن وضليت ابجي دكت الباب رتيل مفتحت اسمعها ضلت تحجي وياي من ورا الباب وتشجعني اتقوى بس الحجي سهل
مو مثل الفعل
جريت المخده وحضنت الصور ونمت كل شوي افز ع صوت ساعه يدكون الباب وساعه افز من كابوس
الى ان فزيت اسمع مقدام يكول
:- مو اخذت المفتاح منو انطاهيا
و سالي تجاوبه... النسخه الثانيه عدها
رجعت غفيت شفت نفسي اني وحياة ع سطحنا جانت الدنيا مغيمه والجو يجنن
كنسنا السطح سويه وفرشنا وكعدنا نسولف ونضحك ونحجي عن احلامنا
كالتلي
حياة... اريد اتزوج رجال كون يخاف الله ومو كلاوجي ميعرف الدين غير الي بمصلحته
لا اا اريده يعرف الاصول ويكون محترم ويحترمني ويحترم النسوان
كتلها... هذا العنصر غير متوفر في بلدك
ضحكت گالت... بكل مكان اكو الزين والشين ماكو مكان يخلى من الخيرين صدگيني
كتلها... والله ماادري بعد
عندج بس اخويه مقدام هيج الله مال ازوجكم
ضحكت كالت... هو ان تكونين حماتي شي كلش حلو بس مقدام باعتبار اخويه او صديقي مو مال يكون زوجي
حره... بس انتو لايكين لبعض اثنينكم تنحطون بالكلب
ضحكت گالت... الله يرزقه
بنت الحلال
حره... امين
باعي حياة اني عن نفسي اريد افتح مشروع بالمستقبل مشروع طبخ او هيج شي
حياة... ان شاء الله
كملت كلامي... واذا بيوم صار عندي بنيه حااسميها حياة
ضحكت كالت... واني حاسميها حره اتفقنا
كتلها... لا محلو اسم حره خطيه تظلميها بيه
كالت... بالعكس يجنن
حره... ما احسه حلو مااحبه
حياة... لا والله حلو
حره... انتي تسويلي واهس ع كلشي.. وضحكنا
فزيت من نومي هالموقف ببالي واني صاحيه اسمع صوتها تكولي بضحك
"لا مو شقه كلشي بيج حلو"
كمت وباذني صوت ضحكاتنا كعدت بالزاويه اتذكر وابجي لحد ما حسيت نفسي اختنكت
كمت فتحت الباب دنيا ليل الكل نايم حسيت نفسي اريد اتقيئ طلعت بالمغسله البرا تقيأت
وغسلت ومشيت
افتر بالبيت
البيت هادئ ضوا القمر كلش قوي بكل مكان هنا الي ذكرى وياها
الي مريت بيه اسوأ فقد انسانه جنت حتى ريوك اتريك وياها هسه نايمه تحت التراب
رحت يم السياج اتذكر هنا جنا نحجي بيتهم اظلم حيل اخاف لما اباوعله مشيت يم الدرج
واحس صدى ضحكنا وسوالفها
كلها باذاني
صعدت للسطح وين فرشنا وكعدنا كعدت هنا مددت بالكاع و اباوع للقمر واحجي
:-قبل جنا اني وحياة هنا نكعد ونگول سبحان الخالق
لما واحد يتأمل بالقمر يرتاح جنا نحجي عن عظمة رب العالمين بالي خلقه
جنا نتناقش بكلشي بكل هالامور
اباوع للقمر واحجي
كتله :- ليش مغوش... ومسحت دموعي گتله... هاي دموعي لو انت حزين؟
هاي اول مره اگعد هنا وحدي
حياة راحت ويا سمرا وتركتني
الكل صارو يتذكروها ويزعلون عليها ويوزعولها ثوابات
حتى المره الي لزمتها من اذنها وكلتلها انتي ارهابيه
اجت للعزا وعزتني هالمره الي قهرت حياة وهي طفله
اجت وگالتلي... الله يصبرج
بعد ماجنت اصبرها حتى لتزعل من كلامها
وامها هسه تذكرتها تالي وكت واجت تبجي وتزعل عليها
بعد ما حياة ايست من شوفتها حتى صوره لبنتها ماخلت
واخر شي حياة رسمتها بدفتر حتى من تشتاقلها تشوفها
وهي هسه يلا اجت شفت الانسان يصير عزيز بس من ينفقد
سكتت مخنوكه شويه و بجيت ورجعت احجي وياه واني نايمه واباوعله گتله
:-حياة اخر يوم حجتلي عن الحياة بعد الموت كالتلي الموت حلو واني تدري شكتلها؟
كتلها الانسان يخاف يبقى وحده بس هي كالتلي
... الله وياه ليش حتى يخاف؟ يعني هسه هي فرحانه ومرتاحه ومخايفه لان الله وياها ويمكن لابسه احلى لبس وداتاكل احلا اكل ويمكن طلبت من رب العالمين جناحات مثل ماجانت تتمنى واكيد الله حققلها هالامنيه
بس الخايف هنا وحده
اني الدنيا ظلمه حتى لو يطلع الصبح تبقى ظلمه
اخاف اعيش واخاف اموت
ضليت ابجي واحجي الى ان صفنت ع القمر وبجماله
وهنا حسيت كل شريط ذكرياتي انعاد كدامي
اختنگت وحسيت بتعب ردت اگوم مگدرت حسيت بدوخه قويه حطيت راسي ع الارض وبعدها غفيت ومحسيت ع الدنيا
حسيت بحرورة الجو فتحت عيني الدنيا الصبح
والشمس صايره على عيني اريد اكوم مااكدر
حسيت جسمي مكسر اريد شي استند عليه ماكو لا حايط ولا حجاره
بجيت وحسيت نفسي ضاق عليه
الى ان جبرت روحي
حاولت اگوم بس جسمي يرجف وراسي حيل يأذيني
سمعت سالي كالت... حره ماهيه
مشيت خطوه ووگعت عالارض ضليت اباوع للسماء واني مختنگه وهنا غمضت عيوني وفقدت بعد ماادري شصار وياي
فتحت عيوني باوعت اني بالمستشفى يمي رتيل اول ماصحيت گالت
:- ها شلون صرتي
مجاوبتها احس بتعب باوعت حاطيلي مغذي
حره... دايخه و تعبانه كلش
رتيل... مدا تاكلين الدكتور كال فقدتي وزن بشكل غير صحي سوالج تحاليل خفنا بسبب مرض او شي وقسنالج السكر هم
حره... مبيا شي بس تعبانه
تقربت گعدت يمي كالت... حره ارحمي بحالج الي داتسويه يغضب رب العالمين ودا تخوفينه و تزعلينا حيل عليج
بلعت ريگي يابس حجيت بتعب... هو اني زعلانه على نفسي شلون بقيت هيج
رتيل... احنا يمج لتخافين
حره... شصار مدا اتذكر شي
جرت نفس وتنهدت... كعدنا دورنا عليج ملكيناج اخر شي صعدت مروه للسطح واجت تبجي كالت
حره فوك واكعه
حره... اختنكت البارحه وصعدت للسطح
رتيل... ثاني مره كوليلي لترحين لمكان وحدج
حره... مشعل انقتل... گلتها بدموع
رتيل... صدك والله؟
حره... والعباس
رتيل... منو القتله وشلون؟
حره... مثل ماقتل بنته انقتل
رتيل... الحمد لله الي اخذ بحقهن
حره... الي قتل حياة لسه عايش
رتيل... الله بالمرصاد حياة جانت انسانه خيره واتأكدي اذا عاش راح يعيش اسوء عيشه
حره... مختنگه طلعوني
گالت... ان شاء الله مقدام راح يجيب العلاج لبين ميجي مصطفى
حره... وحدج هنا
رتيل... لا سالي جايه وياي
حره... ووينها هسه
كالت... جاعت راحت تشتري شي ناكله
سكتت جريت نفس وكتلها... وامي وين
ابتسمت بألم... طالعه
اجت سالي جايبه عصير وكيك ضلن يلحن عليه اكلي مااشتهي حسيت بخنكه لاان اخر مره جانت حياة تقنعني اكل
بالكوه شربت العصير كالت رتيل
:-كومي ابدلج تراكج كله تراب
حره... ماشي
سندتني گمت رحنا للحمامات بالمستشفى
غسلت انطتني التراك ولزمتلي الباب بدلت وطلعت انطيتها ملابسي الجنت لابستها اخذتها مني
ورجعنا للردهه طلعت مشط وطوك من الجنطه مشطتلي شعري قصير حيل لان كصيته
لبستني الطوك
رفعت راسي شفت مقدام واگف وبايده علاكه كال
:- شلون صرتي
حره... بخير
مقدام... يلا خنطلع
سالي كلتله... اجه مصطفى ؟
مقدام... لا عنده شغل عمران جابلي السياره
كلتله رتيل... الله يستر عليهم هذول الاثنين وكفو ويانا
سالي كالت... نردها بالافراح ان شاء الله
مقدام باوعلي وگال... تكدرين تكومين لو اشيلج
حره... لا عادي امشي
لزمني من ايدي ورتيل هم لزمتني مشينا كالت لـ سالي
... الجنطه جيبيها لتنسيها
سالي كلتلها... هاي عندي
وكفنا يم ولد فتح النا المصعد ونزلنا اول مافتح المصعد دنطلع منه شفت بنات صغار وحده شعرها كصير وشكره دايرات وجوههن
كاعدات بالكاع ويلعبن
تفاجئت بالمستشفى وبنص العالم هيج يلعبن
ضليت امشي و تركيزي عليهن لحد ما فزيت من مقدام ندسني كلي
... حره وين بالج
باوعتله كتله ... شو ذني البنات
ودرت وجهي دكمل بس تفاجئت ماكو احد ضليت اتلفت اباوع بس ماكو مقدام جرني كلي
... اسم الله شبيج شنو يابنات
اني ضليت متفاجئه شنو هاي شبسرعه كامن من مكانهن كتله... لا ماكو شي خنرجع للبيت
طلعنا وصعدت السياره دنيا العصر محسيت غير لما وكفت السياره شفت مقدام نزل رجعت حطيت راسي ع الجامه وضليت اباوع منها
من بعد حياة كلشي بعيني غواش ومواضح مدري لان عيوني مدمعه دائما
بقيت افكر بالمستقبل الجنا راسماته وبأحلامنا
اجه مقدام ورجعت السياره تحركت الى ان طبينا لفرعنا باوعت بيه اطفال يلعبون ونسوان يشترن بالمحل
جان هوسه فتحت باب السياره طلعت منها دااسدها شفت نفس البنات يضحكن ويلعبن
دايرات وجوههن مااشوف
غير شعرهن
مرن من كدامي ومشن اني مشيت وراهن اصوات المكان عالي بس مااسمع شي مشيت ورا البنات الصغار تفاجئت مرن من يم بيتنا ووكفن يم بيت حياة باوعت الباب مفتوحه اختنگت
طبن للبيت اني وگفت گدام باب البيت واباوع عليه وعلى حيطانه دخلت وهاي جانت اول مره ادخله من بعد الحادثه
باوعت انوار بالهول شافتني طلعت وكفت كدامي هي ووراها رجال حجت بس ماسمعتها شحجت
درت وجهي ادور ع البنات سمعت صوت ضحك عالي جاي من المكان الي جنا نخبز بيه
مشيت بسرعه اباوع ماكو احد رحت ليم السياج ادور ماكو احد طبيت للهول تذكرت اخر مره اجيت جان الدم بكل مكان
حطيت ايدي ع الارض كلت
:- هنا جان دم حياة هنا طلعت روح حياة هنا
فقدت وگمت ابجي واصرخ
سالي...حطيت ملابس حره يم الباب ورجعت داالزمها باوعت رتيل ومقدام يدورون عليها
خفق گلبي وين راحت
سمعنا صريخها جاي من بيت حياة
ركضنا طبينا
شفتها وتگطع كلبي بمنظرها
تصرخ وتبجي ولما شافتتا طبينا گامت تأشرلنا وتگول
حره... هنا جنا نكعد
ودخلت للغرفه كالت... منا انطتني الدفتر
وطلعت للحديقه وكعدت گالت... هنا كعدنا
تحجي وتأشر ع الاماكن كالت... هنا ضحكنا
هنا اكلنا
هنا شربنا
سالي...اباوعلها وابجي كل الجوارين اجو ع صوت صريخها واكو نسوان كامن يبجن وياها
وبعدها ركضت للسياج وكامت تبجي وتصارخ وتكول...
... هنا جنا نلتقي
سالي...مقدام راح جرها دايطلعها من البيت هي دفعته كام و شالها
بس هي جانت فاقده ضربته ووكعت بالباب ورجعت تركض لمكان السياج وضلت تبجي وتصرخ
حضنها مقدام مسح دموعه ويقرا ايات ع راسها اني واكفه وابجي
ورتيل اديها على وجهه وتبجي بصوت مااحس غير رشم اجه وبيده دولكة مي شمرها على وجهه
باوعت اختي شهكت وكامت تباوع ع الحايط گام مقدام ودايوگفها اول ماوگفت وگعت واغمى عليها
حره... صحيت واني بالبيت نايمه بالغرفه يمي رتيل
اول مافتحت عيوني كمت بسرعه كالت
... اسم الله وين
وكامت وياي اني اخذت الدفتر ورجعت گعدت اگلب بيه فتحته ع ورقه جانت كاتبه
"ويبقى السؤال إذا كانا الاهل هـم جدار البيت الذي يحمي طفلهما
فماذا سيحدث بـ الطفل الذي يعيش بدون /جدار؟ "
وبعدها بفتره جاره سهم وكاتبه
ج/"يصبح حياة"
وبورقه ثانيه راسمه ورد وملونته بالاحمر والورقه الي بصفها تاريخ ٢٠١٤ وتحته مكتوب
"اكليل الورد ... أصبَح بلا ورد"
اقرا وابجي حسيت ع صوت تليفوني يدگ اخذته شفته السامر مجنت مسجله رقمه بس عرفته من نهاية الرقم
باوعت رتيل كاعده تقرا قران رفضت مجاوبته فتحت الرسايل داز مسج
:- ليش اتصل ومتجاوبين دگليلي عايشه ميته"
رجع دزلي مسج ... جاوبي حره
حسيت نفسي تعبانه مجاوبت كمت توضيت واخذت الجادر مال صلاه لبسته فرشت السجاده ورا رتيل وصليت
كملت ضليت ادعي وابجي ادعي لحياة بالرحمه وادعي الله يصبرني رتيل كعدت يمي تبجي وتحجي
:- حره انتي مؤمنه بقضاء رب العالمين الدتسويه اولا حرام وثانيا ديعذب حياة وميخليها ترتاح
لتنسين حياة جانت تحب تشوفج فرحانه وسعيده وماتحب الحزن
حياة راحت شهيده يم رب رحيم ارحم مننا عليها
خليها ترتاح من ضيم الدنيا وعذابها افرحيلها ارتاحت من بعد عذاب
حاولت تصبرني
بس المي بعد ميفيد الجثه المحترگه
اني هيج حسيت نفسي احتركت هواي من طفولتي لليوم ششفت بحياتي كلتلي
رتيل... يلا كومي تاكلين حتى تنامين
حره... مااشتهي شي اريد اقرا قران هي جرت نفس كتلها ... بيش الساعه
كالت... ب ٢
حره... الظهر
هي باوعتلي كالت.. بالليل
هزيت راسي وفتحت القران اقرا رتيل كاعده يمي مددت ع المخده وتباوعلي ضليت اقرا شويه و رجعت التفتت الها نايمه
رجعت اقرا الى ان اذن گمت صليت كملت
كمت لبست الحفايات والطوگ اخذت موبايلي طلعت برا دنيا الفجر احس كلشي يخنگ
طلعت مشيت بيت مصطفى ومرتضى مسدود والدنيا توه الفجر الضوه مو عالي لسه اشوف ضوا القمر
رحت وين مجنا نكعد اني وحياة كعدت هناك فتحت موبايلي
السامر هواي متصل ودازلي مسجات يسالني بيهن اذا اني بخير؟
لحد بـ ٢:٣٠ هو يتصل اني اتصلت عليه اول ماجاوب گال
... ويين جنتي
قبل ليكمل كتله ... انت شتريد؟ وين تريد توصل؟ وليش لسه داتتوصل وياي؟
هو دايحجي كال... خفت علـ...
كتله... شنو هالصلافه الي عندك فهمني انته جنت وياهم انت هم شاركت بتعذيبي انت تسترت على جريمة سمرا حالك من حالهم خطفتني جنت اتوسل بيك طلعني متقبل
بجيت كتله... وجاي هسه تريد تسوي نفسك خوش انسان وفضحت مشعل وانطيت ادله عليه ترا حتلو انطيت بس انت مو خوش انسان انت نذل حالك من حالهم ليش هسه داتسوي نفسك ع اساس صحى ضميرك لو تريدني اتنازل عن الشكوى؟
هو سكت كتله... احجي ليش ساكت
كال... اني ماتسترت على سمرا ولا ادري بموضوعها
اني بجيت كتله... كافي جذب كافي تعبت وين تريد توصل فهمني
كال... لاتبجين حره بس خلي نحجي
حره... وهاي حجينا شستفاديت
سامر... خلينا نلتقي
حره... ولا تحلم اني مااريد اشوف خلقتك ولا اي شي يذكرني بيك بسبب تصرفاتك الوحشيه وياي اني لسه داتعالج بسببك انت والكلاب الي وياك جنت راح اتخبل او يمكن تخبلت
سامر... بس ماجنت اقصد ااذيج
حره... بس اذيتني
سامر... خلينا نلتقي ونتفاهم
حره... ع شنو تتفاهم؟ بعدين انت متخاف ابلغ عليك وتنلزم؟
سامر... متسويها ولو سويتيها يوصلني خبر
حره... حياة لما بلغت عن ابوها ماوصله خبر شمدريك مااسوي مثلها
سامر... لا هذيج حياة وانتي انتي
حره... وشنو الفرق
سامر... الفرق ان حياة وراها الباشا ورشم
واكثر من ٢٠ضابط يكرهون ابوها انتي منو الج
حره... رشم
سامر... هذا العار الـ....
قبل ليكمل كتله ... تاج راسك
سامر... تيجان قوم عند قوم قنادر
حره... اسمع هاي اخر مره تتصل والا قسما بالله اشتكي ابتعد عني احسنلك
ديحجي سديت الخط بوجهه وكعدت ابجي
حطيت الموبايل ع جهه درت وجهي فزيت حطيت ايدي ع كلبي من شفته كتله
... وكفت كلبي
هو ضحك كعد يمي كال... انتي كلما تضيعين هنا نلكاج
كتله واني امسح دموعي... احب هالمكان
كال... ادري بيج... ابتسم كال... هسه فهمت ليش تجن لهنا دائما لان ماكو احد يجي بهالمكان
حره... اي ميطلعون بس وقت العصر
هو باوع لعيوني كال... ليش تبجين
حره... ولا شي ابتسم نزل راسه كتله... جنت تسوي رياضه
كال... لا ادري بيج تجين لهنا هسه باوع بعيوني وكال... تركت كلشي علمودج
حره... ليش روح سوي رياضه حتى تتحسن
هز راسه بلا كال... شفتج من بعيد تبجين وتخابرين
حره... اي صديقتي
كلي ... لعد ليش تبجين
حره... لانها اذتني
كال... ها عبالي
حره... شعبالك؟
كال... عبالي حبيبج
حره... شهالحجي ويني ووين الحب
كال... اي.. باوع لشعري ورجع ركز بعيوني
اني نزلتهن كتله... شلون هيج تباوع
... شلون؟
حره... من تحجي تباوع بالعيون
... شكو بيها
حره... اني من احجي ويا واحد ماكدر اباوع بعيونه
... ليش
حره... ماادري
ضحك كال... باوعي عادي متطيحين
حره... وين اطيح... سكت دار وجهه اخذ دفتر وردي مغلف انطانياه كتله... هاي الي
... اي كتبي بيه كلشي ياذيج
حره... شاكتب يعني
... اي شي بداخلج فرغيه بهالدفتر باعي هذا بيه قفل
باوعت الدفتر وردي وبيه قفل صغير حيل ومفتاح مصارله هوايه من نازل ومن ينفتح اوراقه مزغرفه كلش حبيته ابتسمت كتله ... فرحت بيه شكرا
... ابتسامتج حلوه
باوعتله يباوع لملامح وجهي وشعري كتله... شبيك
كال بهدوء... البارحه شسويتي
حره... شسويت
... ماتدرين؟
حره... ماتذكر غير لما طبيت لبيت حياة
هو جر نفس كتله... سولفلي شسويت
... بجيتي واخذوج للبيت
كتله... بس
اشر براسه اي باوعلي كال... نفسج غاليه لاتسوين هيج بنفسج
حره... تعبانه حيل
... بيه ولا بيج
حره.... خلينا نحجي
... ماشي
حره... اريد انسى احجيلي عنك
... شاحجي
حره... اهلك وين
... والدي دايتعالج
حره... خطيه شبيه
... كثير امراض دايتعالج بالخارج
حره... ووالدتك وين
باوع بعيوني كال... توفت
حره... الله يرحمها شلون
... جانت مريضه وتوفت
حره... شلون عشت من بعدها
... عشت ماكو انسان يموت بعد انسان
حره... بس صعب
... الموت حق ولازم نرضى بيه مثل ما توفت امي يجي يومي واتوفى لازم الانسان يصبر بالنهايه هو ابتلاء
حره.... تخيل واحد يجيب عمره كله بالضيم وتاليها يدخل جهنم لان ماصبر
... الله ارحم الراحمين
حره... نيالكم انتو الاغنياء عدكم كلشي سهل ويهون
... بس الحياة بيد الانسان يكدر يسهلها ويصعبها
حره... شلون سهله بلا
بجيت كتله ... حقك انت نولدت وبحلكك خاشوكة ذهب
... لزمت دفتر حياة بايدي كتله.. انت ماتعرف صعوبة ان بنيه تقارن سنة الموت بصعوبه تجميع فلوس لعلاج لبيبي بهيه
او ان تشوف اخوك الي عمره ١٢ سنه يشتغل حمال حتى يجيبلي صدريه حتى اروح امتحن.. بجيت كتله... انت كلشي ماتفهم
طلع منديل كلي... اش اهدي لتبجين
... جريته منه وامسح دموعي كال... اخوج يشتغل بعمر ال١٢
حره... اي
... وابوج؟
حره... اوو شدتحجي يمعود غير سكير اشرتله... بس لتكول... اشرلي ب اي بجيت كتله... جان يصاحب بنات ويروح يتسمم برا ويجي للبيت واحنا كاتلنا الجوع
تخيل مره صعدت ع السطح اتوسل برب العالمين ينزللنا دجاجه من الجنه لان سمعت نزل للحواريين بدعاء عيسى عليه السلام اكل
هو ركز بعيني كال.. بس متدرين يمكن الله يعوضج برجال يخاف الله بيج ويعوضج عن هالايام كلها
حره... بعد مالي نفس بشي
... الله كريم
سكت رجع كال... ومقدام ؟
حره... شبي؟
... ذاك اليوم سجنو
حره... لا مجرد تحقيق
... ليش حققو وياه ؟
حره... يدورون على واحد
... ها وهو يعرفه ؟
حره... لا وين
... اي هو حباب مقدام
حره... اي وين اكو مثله اخوي
... مرات اشوف اصدقائه وياه يحجون برا
حره... اي هايه قبل
هو ركز عليه كتله... هم جانو يجون ببيتنا بس بعدين اختي مقبلت
... بشنو ماقبلت؟
حره... انو يجون للبيت لان احنا بنات هسه شتكول العالم فكام يكعدون برا من يجون واصلا اكو فتره بعد مااجو
هو ديحجي انتبه للموبايل بيه ومضه اتصلت على موبايلي رتيل جاوبتها كتلها
... هنا اني جنت اتمشى
كالت... حره صدك تحجين دشوفي شكم مره متصله عليج
حره... صامت والله
كالت... تعاي للبيت وكعتي كلبي
كتلها... مبيا شي لتخافين
سديته حطيت الموبايل بصفي بيني وبينه واخذت الدفاتر ع الجهه الثانيه اجاني اتصال هو گلي
... رقم غريب يتصل عليج
اخذته شفته السامر متصل اربع مرات والموبايل صامت كتله ... هاي صديقتي
... الي اذتج
حره... اي هي
... تستاهل لاتسجلين رقمها
جريت نفس وكمت كتله... تجي وياي
... لا اروح اجيب صمون
وطلع موبايله دايتصل
حره... ماشي
اخذت الدفاتر ومشيت رجعت للبيت حسيت نفسي احسن من البارحه تلكتني رتيل نزعت النعال شالته و كالت
:- وتاليتها وياج
حره... شبيج مختنگه وطلعت برا
رتيل... حرام عليج كل يوم هيج مفززتني انام ساعه اكعد مالكاج... نزلت النعال وحضنتني كالت... حره داتخوفيني عليج
حره... لا لتخافين اني بخير
شافت الدفتر بيدي كالت
... هذا شنو
سالي كالت... واوو هذا الدفتر حلو واغلى من حياتي
حره... شسالفه
سالي... والله شو خلي اشوف بيه قفل
اخذته وضلت تفتح وتقفل كتلها... لتكسريه
سالي... منو انطاجياه
حره... مرتضى
رتيل كالت... فدوا الله يحفظه رغم مريض بس گلبه طيب
حره... اي والله
رتيل... يلا اليوم لازم تاكلين جرتني كعدت يمها جابت سالي الريوك كعدت تسويلي لفات كتلها
:-مقدام وين
رتيل... من البارحه طلع
حره... وين راح
رتيل... ماادري والله كلي اجي ع الغده
سكتت اكلت وكمت غسلت حسيت نفسي احسن اليوم
كعدت شويه وحدي بديت اتذكر طفولتنا
كلت خلي اشغل نفسي والتهي مثل ماكال مرتضى
كمت يم رتيل داتطبخ سويت وياها شغلات بسيطه وهي هم من شافتني كيفت كل شوي تسويلي لفه
اجت سالي يمنا حاولت تلطف جو وتضحك وكل شوي كالت... امداك يا مصطفى جان صرت مثل اخوك وجبتلي دفتر شي امداك وامداني
رتيل باوعت لسالي كلتلها... اي ام الحسن شو علاقتج متطوره عيني مو جنتي ماتطيقيه
سالي... هو شكله ماينطاق من كثر ماحلو
ضحكت رتيل كلتلها... لا عيني لاحظت كل شوي سائلج وسائلته شكو عيني
سالي... لا والله ماكو شي بس غير نلحگ ورا هاي الخبله...
واشرت عليه اجت مروه جابتلي الكرسي حطته يمي كعدت شاورتني كالت
... تكول عليج خبله تقبلين تكول عليج هيج؟
رجعت لزمتني من وجهي وحطت وجهها كبالي كالت... ياحيف الشخصيات
ومشت بعصبيه داتطلع
سالي كلتلها :- كلبه شيطانه تحرضين اختي عليه
مروه وصلت للباب باوعتلها هزت ايدها وراحت ابتسمت كتلها... شبيها مروشه
سالي... شافت عندي الف كتلت روحها عليه انطيتها خمسميه منه ضلت تعد وتصف عليه لسان دلاله عدها
ضحكت رتيل كالت... مصيبه هالمروه
طب مقدام كال... ها الشمس كاعده هنا اليوم
حضنته سالي رتيل كلتله... هلا بيك
هو اجه يمي باسني من راسي وكعد كبالي كال... شلون صرتي
حره... بخير
كال... الحمد لله
كلتله رتيل... لعد شو تاخرت ياخويه
مقدام... والله رحت لديالى كملت شغله ورجعت
اجت مروه حضنته وتباوع صفح لسالي باسها كال
... واحتمال اروح باجر هم
رتيل... ليش شعجب
كام وشال مروشه كللها... لكيت شغل هناك بالبساتين يومين تلاثه احصل فلوس وارجع
رتيل بسرعه باوعتلي هو كال ... اشوف وضع حره يلا
حره... مبيا شي اني روح الله يسهلها عليك
هو باوع لرتيل كللها... لعد امي وين
كلتله... طلعت
هو هز ايده ومشى كال... رجعت حليمه لعادتها القديمه
اسمع مروه تكوله... سالي موتتني كفشتني من شعري وكسرت ايدي
وهو يكوللها... صدك
اني حسيت بضوجه كمت داطلع رتيل كلتلي... لتكعدين بالغرفه ضلي بالهول باوعت لسالي كلتلها... ضلي يمها
اني رحت مددت بالهول وغفيت كعدتني رتيل اتغدا مقبلت ضلت تلح كمت اكلت وياهم ورجعت نمت فراشي بصف الحايط فتحت عيوني صارت كبالي رغد وسالي كاعدات يسولفن على كيفهن
اسمع رغد تكوللها... وهاي كل اخبار المنطقه
باوعت لفوك كالت... اللهم لاتحسبها غيبه
سالي هم كالتله... ربي احنا والله بس ضايجات
اني ابتسمت درت وجهي غمضت رجعت فتحت عيوني شفت مساحه كلش جبيره مال بيت وبنصه نافوره بس مثل الاظلم شفت البنات الصغار نفسهم يلعبون
ولما دارت وجهها البنيه الشكره تفاجئت هاي
حياة والبنيه الثانيه اني!
بسرعه فزيت بشهكه رغد كالت... اسم الله
اني حطيت ايدي على راسي حيل دايخه احس صرت مااميز بين الحلم والواقع بجيت
سالي جابتلي مي شربتني
كمت غسلت سمعته يقرا قران توضيت ورحت اصلي واقرا قران صاحوني ع العشه ما اشتهي شي حاولت وياي رتيل بس مااكلت
اجو كلهم كعدو يمي بالغرفه مقدام كال... باجر اروح لديالى اني وعمران اي شي تحتاجوه خابروني و مصطفى موجود هو بحسبة اخوي
كلتله رتيل... ماشي
ضلو يحجون اني طلعت الدفتر وكمت ارسم واكتب اشعار حلوه واحبها ورا شويه مددت وغفيت
كعدت على صوت رتيل ومقدام باوعت بالخمسه الفجر
ضليت بفراشي مابيا اكوم اسمع مقدام يكوللها
... وضع حره ماعاجبني اذا بقت هيج اخذها لدكتور نفسي
رتيل... لا ان شاء الله مابيها شي هي اليوم احسن
مقدام... لا اغلب وقتها احسها مو ويانا سكت رجع كال... والله حياة كسرت ظهورنا
رتيل كلتله... والله هواي مفتقدتها كل يومها جان هنا ماجنت اتصور يجي هاليوم وتموت
مقدام... الله يرحمها خلصت من الدنيا
حره... غمضت عيني وحطيت المخده على راسي احس مااريد اسمع شي اريد ماافكر بشي تعبت
طلعت الموبايل مكالمات هوايه ع الموبايل
مااهتميت طلعت الصور وضليت اباوعلهن وابجي بسكوت
سمعت رتيل شغلت المكينه
ورا شويه طلعت فتحت الباب على كيفها
اني غمضت عيني اخذت الشال والصايه ورجعت سدتها سمعتها سدت باب الهول
كعدت غسلت فكرت كلت كل يوم اكعد الفجر ويا مرتضى احس من احجي الحمل يخف عني خطيه خاف راح ومالكاني
غسلت ورجعت يم الموبايل كعدت اكلب بالصور شويه واتصل عليه رقم رفضت وصلني مسج مكتوب
... عفيه افتحي اني ام حياة
ورجعت اتصلت اني كمت برا وجاوبت هي كالت
... شلونج
حره... بخير
ام حياة... كلتيلي ع صور بنتي
حره... اي عندي
ام حياة... عفيه اريدهن
حره... تجين لهنا
ام. حياة... ماشي باجر الصبح اجي
كتلها... تمام ضلت تدعيلي وتبجي وسدت الخط اني كمت ابجي طلعت برا باوعت للسياج ماكو احد بالبيت صعدت من السياج طفرت عليهم وبداخلي اكول
... هالبيت ماعاد لحياة خاف ميصير افوت وارجع اكول لا هو البيع لسه ما تم من يتم انوب اخذ اذن انوار
رحت كعدت بالحديقه الزرع كله ذابل اباوعله وابجي الباب مال البيت مقفوله كمت
افتر بالبيت وابجي
طبيت للهول تفاجئت رجل انوار كاعد هو كال
... ها توته الحلوه هنا اليوم
حره... اسفه مجنت ادري انت هنا وطلعت دامشي لزمني من ايدي وخرت عنه بسرعه
كال... شبيج عيني شبيج خايفه ضحك كال... شنو راح اكلج
سكتت كال... والله هضيمه هالعيون الحلوه تبجي
حره... احجي مثل الاوادم لا افلش وجهك ترا لا عبالك اني هينه والله الي يحاول يحجي وياي حجايه غلط اسحله هو والخلفوه خاف عبالك
كال... فدوا لـ الله هاي مره والعندي مره خرب حضي شو انتي حلوه هاي اول مره انتبه
حره... اتادب لك حيوان جرني من ايدي ضربته راجدي خزرني وجرني عليه طبكني ع الحايط وحط ايده ع حلكي
اني ادفع بيه بس مااكدر الكلب ضل يتلمس جسمي وركبتي اني اصرخ بس مينسمعلي صوت ضربته برجلي بس ماكو فائده
كمت ابجي شرمخته وعضيت ايده داطلع لزم ايدي لواها ورا ظهري ولزمني من شعري وحط ايده على وجهي ورجعني عليه عض اذاني
انـــــ. ... يتبع ...
___________________♡
شلونكم فراشاتي
هوايه اعتذر منكم هايه الايام النشر دا يتأخر عليكم
بس انتم تعرفون السبب
مااگدر اضغط ع حره الان هوايه داتتأذه خطيه
ان شاءالله باجر هم انزللكم بارت واعوضكم عن ايام التأخير
اكو هوايه ديگولن دخلت شخصيات جديده للقصه وانلاصت علينا
ان شاءالله اذا لحكت هسه انزللكم ببارت ثاني جميع شخصيات وابطال القصه حتى تفهموهم زين
واذا ملحكت ع باجر ان شاءالله
هسه اريد ارائكم عن القصه
ولتنسون التصويت والمتابعه
قراءه ممتعه الكم 🦋❤
#Nawras
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!