رواية "هل كانَ حُلماً...؟
(العِراق_المُصغَر)
بقلمي... نورس _قاسم"
____________________♡
اخذناها للغرفه وهنا صارت تنزف قوي
وهي تبجي وتصرخ من الوجع
حطيت ايدي على گلبي
خايفه عليها
شهكت وصرخت من شفتها وگعت
ركضت لزمتها وصحت حاولت اصحيها ماكو مغمي عليها
دگ الباب مقدام ركضت رتيل بدلتلها ملابسها وفتحت الباب
طب مقدام بسرعه شالها وركض بيها للتكسي
ركضنا وراه كلنا وصعدنا بالسياره نقلناها للمستشفى القريبه نزلها مقدام هم شافوها جابو سديه ودخلوها للطوارئ
ضلينا منتظرين فتره الى ان طلعت الدكتوره وگالت :-المريضه سقطت الله يعوضكم
مقدام كاللها بخوف... وهي شلونها صحتها؟
الدكتوره... زينه ماعليها خطر راح تبقى اليوم بالمستشفى حتى نضمن سلامتها
رتيل بجت حضنتها كتلها... الله يعوضها اهم شي هي بخير
هزت راسها كالت... زين ليش سقطت
ماما كالتلها... شمدريني هسه هي الدكتوره تركض ركض ولا تخلي الواحد يسأل براحته
مقدام كاللها... يمكن عندها عمليه
هزت راسها طبينا للردهه باوعتلها بعدها نايمه وحاطيلها المغذيات كعدت يم راسها اقره قرآن ضليت هيج فتره الى ان سمعت اتصال لموبايل ماما
باوعتله گالت... عثمان وفتحت خط گالت.. هلاو بيك خاله
سكتت شويه گالتله ... ببغداد انت؟
سكتت تستمع كالتله... تخربطت سالي وهسه احنا بالمستشفى
سكتت تستمع وكالتله... الحمد لله هسه هي زينه
سكتت شويه انطته اسم المستشفى وكالت... تعال وتعرف.. وسدت الخط كالت... راح يجي
رتيل كالتلها... مقدام وينه ليش لسه مااجه
امي جاوبتها كالت... راح يجيب العلاج
گتلها... ماما عندج رصيد
اميره... اي ليش
مديت ايدي اخذ الموبايل مالتها گتلها :-نسيت موبايلي بالبيت واريد اتصل... انطتنياه
رتيل كالت... تتصلين برشاش ؟
هزيت راسي ب إي گالت... ماله داعي تگوليله
حره... خطيه اخاف يقلق اذا اتصل وماجاوبت
هزت راسها بـ إي اتصلت بيه رفضه ورجع اتصل گتله... رشاش
كال... وينج اتصل عليج ماكو؟
حره... اختي سالي تخربطت
گال... شبيهاا؟
حره... تخربطت وسقطت الجنين
رشاش...وين انتي
حره... بمستشفى الـ****
گال... جاي.. وسده
سديت الخط باوعتلهن گتلهن... حيجي
رتيل باوعتلي وگالت... خاف يتعاركون؟
تنهدت... لا ان شاء الله ميصير هيچ گمت دااطلع
رتيل گالت... وين؟
...دا اروح اغسل
اميره...خل اگوم وياج
رحت كدامها طبيت للحمامات العامله جانت تمسح هناك ابتسمتلها وفتحت الحنفيه غسلت وجهي وباوعت بالمرايه
احس ناسيه شي ركزت بالمرايه اجت ماما تغسل تذكرت فتحت عيوني بقلق تنهدت گتلها... ماما طلعت مستعجله ومالبست حجاب شلون حيجي رشاش
اميره... يمعوده حتى اني من الهبطه ماشفت دربي لبست الحذاء بالمگلوبي
سكتت ركزت ع المي كالت... ماعليج كوليله ماشفت دربي
حره... هو هم هيج
كملنا وطلعنا رجعنا للردهه طبيت شفت سالي كاعده ركضت يمها كتلها... شلون صرتي
سالي... بخير
حره... هم تحسين بوجع
سالي...احس بـ دوخه قويه
تنهدت... لان ماماكله شي
جرت نفس گالت... گلتو لـ عثمان ؟
هزيت راسي... إي كالتله ماما
صفنت بالفراغ گالت... جان كلش فرحان بالطفل سوده عليه اكيد راح يزعل
رتيل كالتلها... اسم الله عليج العمر كدامكم تكدرون تخلفون بعد
اهم شي عافيتج
غمضت عيونها وجرت نفس اجه مقدام جاب العلاج وشكله مبين عليه حيل ضايج ومحتقن وگايدته مروه تاكل لفه ورگضت لرتيل
مقدام تقرب باس سالي من راسها گاللها... شلون صرتي
هزت راسها بابتسامه وكالت... الحمد لله
مقدام... لاتزعلين العوض على الله
سالي... ونعم بالله
اتصل موبايل ماما گالت... هذا رشاش
ركضت عليها اخذت الموبايل وجاوبته گال... اني بالمستشفى بيا طابق انتو
گتله ع المكان كال... جاي
وسد الخط
انطيته الماما انتبهت لمقدام يباوعلي كال :-ليش كلتيله
ماما كالتله :-هو ضل يتصل الولد ويسأل
گال :-وشعنده جاي؟
ماما كالتله :- مو زين جاي يقوم بالواجب!
مقدام كاللها... بس هو...
قطعت كلامه رتيل كالتله... تعال احجي وياك
راح وياها برا يحجون ضليت كاعده يم سالي ع السديه كالت... راح يبقون هيج بمشاكلهم
لزمت ايدها كلتلها... لتخافين كلشي راح ينحل
گالت بتعب... يارب
سمعت صوت رشاش برا الردهه گمت فتحت الباب وطلعت اسمعه يگول
:-الحمد لله على سلامتها ماتشوف شر ان شاء الله
وباوعلي ابتسم
باوعت شايل علاليك مقدام زفر نفس ماجاوبه كالتله رتيل... شكرا الله يسلمك
مقدام لزم ايدي وكال... فوتي يم سالي
هزيت راسي باي شفت مروه طلعت حضنت رشاش
اني طبيت ويا مقدام
وهو طب ورانا گايدته مروه وبيدها العلاليگ وانطت علاكه لامي
ماما كالتله... ليش كلفت نفسك خاله
گاللها... واجبي وراح سلم على سالي وطلع رصيد من جيبه انطاهيا
كالتله... هذا شنو
كاللها... عثمان وصاني اكنكلج ع النت حتى تحاجيه طريقه بعيد
مقدام نتر كاله... لا يحجي ولا يجي
رشاش كاله... مقدام ترا ماوكت المشاكل
مقدام كاله... اهاا يعني مو وكتك انت وين ماتروح تجي وياك المشاكل ابتعد منا واحنا بخير
رتيل... مقدام على كيفك احنا بمستشفى
مقدام... ماتشوفيه يكول ما وكت المشاكل وكأن مو هو الجابها النا من يوم ماتقرب منا واحنا مو بخير !
جاوبه رشاش بهدوء... ولو مبتعد مستحيل تكونون بخير
نتر بيه مقدام... انت شنو تهدد
ماما كالت... ولكم اصواتكم منا مرضى
كاله رشاش... انت مافاهم شي ولا راح تفهم تدري ليش؟
لان انت ماتريد تعرف شي جديد ولا تفهم غير الي فهمته
المهم تكون انت الصح والبقيه كلهم ذنوب
حتى لو جنت انت اساس هالذنب تحب تبرئ نفسك
مقدام جاوبه بنتر... اني بريئ انت شدتحجي
اجه مسؤول الردهات كال... تفضلوا برا داتزعجون المرضى
وطلعوهم برا دااطلع وراهم سالي كالت... حره كنكيلي بسرعه عفيه
كتلها... بس مجايبه موبايلج
ماما كالت... هذا موبايلي و رتيل هم جايبه موبايلها بجنطتها طلعيه
رحت اخذته باوعت لسالي كتلها... خاف ميقبل مقدام
ماما كالت... يقبل يقبل هسه هو معصب بس يهدا يفهم خطيه رجلها يضل باله
سالي كالت... اي اني اعرفه مقدام مو قاسي بس يهدا اني احاجيه
هزيت راسي وعبيت الرصيد وكنكت الها وانطتهيا نزلت واتساب واتصلت على عثمان
باوعت لماما كتلها... ابقي يمها خلي اشوفهم
اميره...اي روحي
ركضت دااطلع صارت بوجهي رتيل جرتني على جهه كالت... خابريه كوليله خلي يروح هسه مقدام كلش ضايج
حره... بس عيب
رتيل... احسن مما تصير مشكله
جريت نفس گالت... خطيه مقدام انقهر على سالي گال هي شگدها وتسقط بهيج عمر مو مال حمل ولا هالمسؤوليات
وحيل ندمان
دمعت عيوني گتلها... بس هي تحب عثمان وراضيه
جرت نفس گالت... هو يشوف ان هي مجبوره
حره... لا ما مجبوره بس هي تحبه
گالت بحيره... زين ليش هيج خافت منه؟
حره... هي سالي هاي طبيعتها مو تدرين
گالت بقلق... مامرتاحه حره مااگدر اخليجن بعيدات عن عيوني
حطيت ايدي على ايدها وگلتلها... لا تفكرين هواي اتركيها على الله والله يكتبلنا الي بيه الخير
هزت راسها وتقربت من سالي جانت تتصل رتيل كالتلها باستغراب... ويامن تحجين؟
جاوبتها سالي... ويا عثمان
رتيل رفعت حواجبها كالتلها... كنكتي
سالي هزت راسها باي صفنت رتيل تفكر اني اخذت موبايل ماما وطلعت برا
اتصلت على رشاش جاوب كتله. وينك
كال... يم اخوج
حره... تعاركتو
كال... لا ما كِلش
جريت نفس كتله... رشاش ارجع للبيت اليوم
سكت كتله.. الو
كال... اي
حره... مو تزعل بس مقدام حيل ضايج ومقهور لبين مايهدا بس
كال... ماشي... وسد الخط
اتصلت عليه ماجاوب حسيته ضاج ضجت وياه ورحت كعدت يم ماما ورتيل
وسالي تتصل على رجلها
ضلينا كل وحده صافنه وتفكر الى ان فزيت على صوت سالي من تكوله
:- بخير اني انت وينك وين وصلت؟
سكتت تستمع كالتله :- لا ما يحتاج هي ليله احتمال باجر اطلع
سكتت شويه كالتله :-كالو الدكتوره باجر الصبح تجي
وضلت تحجي باوعت لرتيل كلتلها :-مقدام وينه
رتيل... برا اجه صديقه
حره... ليش مايطب؟
رتيل... وين يخلوه
حره... يمكن رشاش ضاج من خابرته وكتله روح... باوعتلها كتلها... المفروض ماا سوي هيج مو؟
سكتت رجعت گالت... يبتعد لبين ما تهدا الامور افضل
سكتت مر وقت نمت شويه ع السديه فزيت على صوت عثمان كمت شفته طب حضن سالي وضل يسألها شلون صرتي وشصاير بيج ليش هيج شفايفج بيضه مااكلتي شي
كالتله... مااشتهي
طب مسؤول الردهات كله... بسرعه الردهه للنساء مايصير رجال يطب هسه
عثمان كله... انتظر ترا ماصار دقيقه
طلع الولد وعثمان كعد انتبهت بس اني ورتيل لعد امي وين تقربت كتله :-شلونك عثمان
انتبهلي كال... الحمد لله
باوعت لرتيل كتلها... امي وين
رتيل... رجعت هي ومروه
حره... ومقدام؟
رتيل... برا ميخلوه يفوت
عقجت حاجبي... لعد وعثمان شلون دخلوه؟
اشرتلي باصابعها بمعنى.. فلوس ابتسمت كام عثمان كاللها... ليش سقطت هم عرفتي
رتيل... اي جرثومه
رجع طب الولد كاله... استعجل اذا شافوك هنا اتعاقب
عثمان نتر بيه كاله... رجال يريد يشوف زوجته شلون يعني؟
ذاك كله... هاي القوانين
هز راسه كله... اكو جناح خاص؟
الولد كله... اي
هز راسه عثمان وباوع لسالي كاللها :- راح انقلج خاص الا هيج يلا ناخذ راحتنا
سالي.... ماشي
خله وطلع كعدت يمها مر وقت واجو نقلو سالي للجناح الخاص واحنا يمها كعد عثمان يحجي ويا سالي كاللها :-لاتخافين راح اعالجج ونجيب كثير اطفال وحتى اخوج اصالحه ونعيش احلا عيشه
اني كاعده كدامهم كالتله رتيل... تحجي بغدادي كلش زين
ابتسم كالتله... ولا كأن انت انباري
كاللها... ومنو مايعرف يحجي بغدادي؟
رتيل... اي بس اللهجه تغلب هسه مثلا رشاش يحجي كلمه بغداديه وكلمه انباريه
ضحك كال... اي رشاش اصلو هناك انه اصلي بغدادي
رتيل... اها
سالي كالتلها... امه اصلها من الـ***** هسه تطلع خالتي تعرفها
ابتسمت رتيل كالتله... ها هسه فهمت
هز راسه طب مقدام بيده علاكة اكل ما حجى ويا عثمان ولا تعارك بس نظرات الغضب جانت واضحه بعيونه عرفته مايريد يضوج سالي وهي مريضه
كعدنا ناكل كلنا كمل مقدام كام يغسل اني كمت وراه غسل ورجعت دااطب صار كدامي عثمان مد ايده بيها الموبايل كتله... شنو
عثمان... رشاش
اخذت الموبايل منه وجاوبت قبل لا احجي كال... تكدرين تنزلين جوا؟
حره... ليش؟
رشاش... انه هناك
حره... واخواني شلون
رشاش... دبريها
كتله... تمام جايه
انطيت الموبايل لـ عثمان كال... روحي اني الهي اخوج
هزيت راسي ورحت نزلت بالمصعد للطابق الاول اول مانفتح باب المصعد شفته كدامي كال... تعاي
مشينا لبرا كعدنا الجو بارد كتله... ضجت مني ذيج الساع؟
كال... لا
حره... مامبين هيج
رشاش... حقچ تخافين على اخوج
هزيت راسي باي كتله... لان مقهور جان
قطع كلامي كال... ادري... وجر نفس
حره... شوكت اجيت
ضحك كال... مارحت
حره... يا والله؟
لعد وين جنت
رشاش... هنا ضليت
حره... بارده عليك
جر نفس گال... متعود
ابتسمت كتله... وگفاتك هايه مراح انساها
ابتسم گرصني من خدي گتله... تعبت وياي ان شاء الله اردها الك
ركز بعيوني باوعت بعيونه كال... ضحكه منچ تنسيني كِل تعبي
ابتسم گال
"أسكَر بيچ "
ابتسمتله ارتبكت من نظرته نزلت عيوني هزيت راسي كتله... لهالدرجه تحبني
ضحك گال... ولسه تسألين؟
نزلت راسي گتله... اثق بيك
جر نفس كال... ما لابسه الحجـ...
قبل لا يكمل كتله... من الخوف على اختي مادريت بالدنيا شلون طلعت
هز راسه كال... كالتلي امج
ضحكت كتله... شوكت
رشاش... انه وصلتهم للبيت
حره... واني ماادري
رشاش... غير نايمه بنص هالظروف
ابتسمت... لعد شسوي غير نعست
ابتسم جر العلاگه گتله... هاي شنو
گال... حجاب
اخذته حطيته ع راسي گال... ياالله لبستيه بدون تدردم
ضحكت كتله... اي تعودت عليه
كال... الحمد لله
جريت نفس كال... شبيج
حره... هالمستشفى تذكرني بيوم فقدت حياة
ركز بعيوني كتله... جابوني لهنا بوكتها
گال... وضربتي الحارس
باوعتله... شمدريك؟
رشاش... كلشي ادري
تنهدت بحزن... ماجنت بوعيي
رشاش... ادري بيچ
مسحت دمعتي گال... حياة تركت بيج اثر
حره... شنو هو
گال بهدوء... ملامحچ
حره... شبيها؟
سكت شويه وگال :-كِلشي مكتوب ومقدر باوعلي گال... يمكن لو لا وفاتها ماجنتي راح تكونين حرمتي اليوم
حره... ليش
گال وهو يباوع بالفراغ... ماجنت راح اتقرب هيچ واوگع.. باوعلي وگال... ويمكن انتي هم؟
حره... ليش؟
رشاش... نهاية حياة جانت بدايتنا
مسحت دمعتي گتله... ليش ماجنت راح تتقرب مني لو حياة عايشه؟
رشاش... لان ماجنتي راح تحتاجين احد تشكيله حتى يواسيج او يسندج
لو وگعتي عندچ حياة
نزلت دمعتي مسحها گال... اول يوم شفتج بيه بعد استشهداها ماشفت حره
حره... لعد شنو شفت
رشاش... شفت نفسي قبل سنين... ابتسم گال... نفس النظره ونفس الكسره
جر نفس... بذاك الوكت جنت احترگ وحدي
باوع بعيوني گال... ولان اعرف احساسج شلون من تحتركين وحدج بقيت وياج
حره... اشتياقي الها ديزيد يوم عن يوم
گال بهدوء... انه هم
ابتسم گال... بس الحياة تستمر واكيد يجي يوم ونلتقي بيهم
حره... يمكن هم المنتظرينا هسه
كال بابتسامه... ممكن
باوعت بعيونه وضحكت گال... ضلي ضحكي ..
ضحكتح حلوه
سمعت صوت رتيل وهي تصيحني درت وجهي واكفه بعيد شويه عني اشرتلي تعاي گال... روحيلها
باوعتله... وانت وين تبقى
رشاش... راح اطلع عندي شغل
حره... تمام.. وگمت گتله.. تصبح على خير
رشاش... ان شاء الله اصبح على شوفة عيونج
ضحكت لوحتله بايدي بيباي هو هم لوحلي بايده ورحت باتجاه رتيل وكفت كدامها گالت... اني هذا الرجال ماستلطفه بس الي يخليني اتغاضى هو انتي
ركزت على وجهي بتسائل گالت... كلما تضيعين الگاج يمه حره
حره... لان واثقه منه
رتيل... بعد كلشي سواه؟
حره... كلنا نغلط بالنهايه احنا بشر خوما نبقى نحقد على بعض بسبب اغلاطنا معناها ماكو احد يحب احد اذا هيج
التسامح مطلوب هوايه بالحياة
ابتسمت كالت :-هو ماحاول يبرر لنفسه مثل مدا تبرريله
حره... لاني عرفته هو مو سيئ دايحاول يلگى راحته بس
هزت راسها گالت بابتسامه... لهالسبب كالو الحب اعمى؟
يلا نروح
رحنا يم سالي سألني مقدام وين رحت
رتيل كالتله... جانت داتشتري ولكيتها تحجي ويا بنيه وانشغلن بالكلام
اقتنع هو مر اليوم لثاني يوم الصبح سجلولها خروج ورجعنا للبيت مقدام جاب مسواكات وطلع عنده شغل
واني نظفت ورحت كعدت يم سالي عثمان جان يمها سمعته كاللها
عثمان... عادي انه ما متوقع منه خير
كعدت يمهم سالي كالتله... وهسه وين نعيش
عثمان... اشوف ابو السباع عنده بيت هنا اذا باعه الي هناك نعيش
حره... هذا البيت الصغير؟
عثمان... الي بالـ*****
حره... اها
سالي... شايفته؟
كتلها... اي رايحتله
ااتصلو بعثمان فتح خط استمع شويه وفجأه تغيرت لهجته بشكل تام كاله :-دحج كسار شجاي يسوي
سكت شويه يستمع كاله... ما شغلي روح لابو السباع بلغو لاتكره بيا الجنود
سكت شويه كاله... يفگع راسو مايفگعو انه شكو السالفه يمو
سكت شويه جر نفس كاله... انت وين؟
سكت يستمع باوع لساعته گاله... عجل جايك
وسد الخط كال... سالي رايح هسه عندي شغل من تحتاجين شي اتصلي بيا.. وكام
سالي... شوكت تجي
عثمان... العصر
حجت بتهديد... دير بالك تنسى الاندومي واصحابه
ضحك كاللها... اوكي.. وطلع
مر هاليوم عادي لحد ما بليل طبيت اسبح ونمت بالغرفه فزيت داطلع اشرب مي سمعت صوت برا لزگت اذاني ع الحايط حتى استمع جانت رتيل تگوله
... اي خلي يجون هلا بيهم
مقدام كاللها... اني مامرتاح رتيل ناس مااعرف عنهم شي شلون انطيهم اختي ولا كأن صار شي؟
رتيل... هي تحبه وهو يحبها لا تحرمهم من بعض وبعدين رشاش مو مؤذي مجرد يريد يعيش مرتاح البال ويا توته بعد ليش نمنعه ياخويه
مقدام... خايف اخطي خطوه غلط هالرجال باعتبار غريب مااعرف عنه شي
هسه عثمان حتى لو جذب بس جان يحجي وياي ووكفلي بكثير امور اما رشاش شااعرف عنه زين شين؟
كلشي مااعرف كضاها تفرفر بالمنطقه بحجة خبل
الى ان گلبها وخبلهم وطلع
رتيل... بس هم جان زين بس هو مايظهر نفسه يحط عثمان بالصوره
مقدام... شلون يعني؟
رتيل... تتذكر من اجه عثمان وكالك نفتح محل؟
مقدام... اي؟
رتيل... المحل والاغراض الي بيه وكلشي هذول لرشاش
وحتى الفكره انك تشتغل وياهم فكرة رشاش
مقدام... ليش؟
رتيل... راد يساعدنا
مقدام... شمدريج بهالحجي؟
رتيل... عثمان حجه لسالي
كاللها بهدوء... سوا كل هالامور علمود حره
رتيل... علمودك او علمود حره نفس الشي
بالنهايه انتو واحد
مقدام... ماادري شكلج
رتيل :-فكر زين ولاتظلمهم وتذكر انت بيوم من الايام هم حبيت وعانيت
مقدام... لاتخافين ماراح اخلي واحد يعاني مثلي
ابتعدت وبداخلي حسيت بفرحه جبيره رجعت لفراشي وافكر رشاش شكد جان مهتملي
وحاول يساعدني بس اني ماادري
الصفه الحبيتها بي اغلب الاشياء السواها الي بالسر مااجه يتباها بيها كدامي
لااا اني اكتشفتها بالصدفه وهذا جان احلا شعور يحسسني اني اهمه كلش
ضليت افكر الى ان غفيت كعدتني الصبح رتيل كالت :- كومي نجلف البيت جلف راح يجيب مشيه رشاش
فزيت كتلها... اليوم؟
رتيل... اي
حره... لعد شو ماكلي؟
رتيل... من البارحه كال لـ مقدام
هزيت راسي وكمت تريكت وجلفنا البيت ورتيل ماخلت زوايه ماغسلتها وجلفتها كالت... لازم ما نترك ثغره علينا خلي الكل بالمشيه يمدحنا حتى كدام عيالج
وفرشت ورتبت الاستقبال مقدام اجه جايب كومه علاليك للضيافه رحنا يمه وبدينا نحضر الضيافه كملنا وطبيت اسبح
دامشط شعري اندگت الباب
گال مقدام... اجو
خفق كلبي وبردت اطرافي قلق وتوتر وفرح مشاعر مختلطه اباوع من الشباك طبو زلم هوايه ترسو البيت وكلهم معگلين ولابسين دشاديش
وبيدهم سبح
طببهم مقدام للاستقبال ورحنا اني ورتيل حضرنا المي والضيافه وانطيناه لـ مقدام
واني متوتره اكل باظافيري
اجت سالي يمي كالت... رجلج عنده هواي عمام
هزيت براسي اي كالت... خطيه لعد عثمان وحده
هم تلث عمام ومدري شلونهم
حره... الله يهديهم
سالي... الله يبعد شرهم
ضليت احوص طلعت من الغرفه داستمع كالت رتيل... تعاي لج لا يشوفوج
حره... لازم اتسمع مااتحمل
رتيل... انجبي لج متستحين؟
اوكفي اطلع قبلج شنو بس انتي
ركضنا بهدوء حطينا اذانا ع الحايط وحده ورا الثانيه اني ووراي رتيل ووراها سالي
اسمع صوت واحد جبير يگول :-انت ابننا ان شاء الله ماا غريب يشهد الله
الي يناسبنا يصير حالو من حال ولدنا
نحن اخوه متكاتفين اهم شي عدنا ولدنا ما ينجرو للغلط والحرام
مقدام گاله... والنعم منكم
صوت واحد ثاني گاله... ابني معارضتك لزواجهم ما صحيحه ما اكلك ما من حقك لا بالله الزلمه المعدل هو الي يخاف على اختو ويريدلها قسمه زينه
بس وليدنا رشاش حابها لحرمتكم المستوره الله يحفظها الك
كول امين
مقدام... امين
كمل الرجال... فيابني نحن كلنا اليوم جايين من الانبار لهين وداگين باب بيتك
لان دحگنا شگد انتو ناس صاحبة اصول
وكلها تشهد باخلاقكم ها نريد نفك الزعل الي بينكم ونصالحكم انت ووليدنا
مقدام كاله... والنعم منكم عمي تاج ع الراس انتو
وجيتكم من الانبار لهنا تعنيلي الكثير اتشرف بيكم اني
بس انتو تعرفون ابنكم غلط
بحقي
جاوبه الرجال الجبير گله... ونحن مانگول رشاش معصوم
لا هو حالو حال اي انسان مامعصوم يغلط بس نحن خوما ندحج بس للغلط ونترك باقي محاسنو
الزلمه شاريها للحرمه ويحبها ويحترمها وكال كل الشروط اليطلبها اسويها بعد شتريد اكثر من هاذ
فزيت على صوت امي تكول :-هذا الرجال خوش متحجي شسمه
درت وجهي لكيتها حاطه اذانها ع الحايط وتسمع كتلها... يمه خرعتيني
اميره... دنجبي وعوفي هالحجي بس شوفيلي هذا الرجال الخوش يحجي متزوج لا
حره... اي هم يتزوجون اثنين اثنين
اميره... عادي اصير الثالثه
خزرتها رتيل ضحكت كالت... جلبات ولا تعرفن واحد يتشاقه وياجن قابل صدك اريده
هزت ايدها وحطت اذانها تستمع ضلو يحجون هوايه وبررو
لـ رشاش من كل النواحي
اخر شي صار خصم الحجي رشاش يكمل كل الاصوليات يسويلي حفلة مهر والذهب وعرس وزفه
والكل وافقو على هذا الشي
مقدام كاللهم... وهنا يعيش
كاله واحد... لا بويه كلش ماراهمه
مقدام كاله... كلش بعيده عليه الانبار
العم كاله... ماراهمه الزلمه يجي يسكن هين ويعوف اهلو وديرتو وعمامو
هسه انت لو ردت تتزوج حرمه وكالولك اهلها تروح لفلان مدينه بعيد عن اهلك تقبلها
سكت مقدام العم كله... لا لان صدك ماراهمه
تالي مقدام وافق وكال... اختي تبقى بامانتكم
قبل ليكمل العم گله... بهالرگبه
ضلو يحجون شويه وانتهت هالمشيه وطلعو
اجه مقدام سولفلنا وكال... اني ماردت اكون ظالم لوحده منجن حتى لو باجر صار شي تكولن اخونا منعنا
ماريد خواتي يعيشن نفس حرگة الكلب الي عشتها
ولو عارضت فـ بس لان حسيت بخوف عليجن
بس دام هيج واثقات بازواججن فما من حقي امنعجن
حضنته باس راسي كال... ممنوع تقبلن اي اهانه وشوكت ماتريدن باب هالبيت تبقى مفتوحه الجن تعيشن يمي معززات مكرمات
حره... الله يخليك النا
كمت لكيت رشاش هواي متصل بهالاثناء اتصل فتحت خط گال :-گتلج امشي بطريقي وماتندمين
ضحكت كتله... ليش مااجيت وياهم
كال... التحقت
حره... والله؟
گال...اي و من ارجع نكمل كلشي
حره... ان شاء الله
ضلينا نسولف شويه وسده طلعت برا لكيت رغوده وسالي يحجن وسالي مقهوره
كعدت يمها كتلها... شكو
رغد كحت كالت وهي تعلج :-مو رجلي طلكني سيد
حره... يا والله
رغد... والله
حره... وشلون هسه شحتسوين
رغد... حاطلكه بالمحكمه ههههههااااي
حره... شو مازعلانه
رغد... وشكو ازعل يمعوده هو يلكى مثلي وبعدين ابو المثل يگول اليوم المايشوفني نور بعينه ماالبسه نعال برجلي
بلعت ريك كتلها... الله يهدي النفوس ويعوضج
كالت وهي تضحك... عفيه رغد عقلج وين جان مالكيتي غير هذا تتزوجين شلتيه من الزباله
ولبستيه حلقه ليش؟
سالي كالتلها... هي قسمه ونصيب لاتلومين بنفسج
رغد... تهون درس وتعلمته
لليل دانتعشى اندك الباب طلع مقدام شافه عثمان كاله... تفضل وطبو للاستقبال
سالي سوت الجاي وطبت كعدت يمهم كالعاده حطيت اذاني اسمع عثمان يكول لاخوي
... انه ماعندي عمام حتى اجيبهم متبري منهم ومتبرين مني
وابويا مشاكل وياي
بس جاي انه حتى ارجع مرتي لبيتها والي تريده اني جاهز
سالي مرتي وحملت مني واذا بقيت على زعلك هذا تاثر حتى على اختك
ونفس الشي مقدام اشترط بعرس وحفله جبيره ومهر وهو اصلا جان عاقد عليها
فـ عثمان كله... صار اسوي عرس ونروح لاربيل فتره بعطلة نص السنه
كاله مقدام... الدراسه تكملها
عثمان... ماشي
واتفقو بيناتهم وطلع عثمان اجت سالي تركص لان حتروح لاربيل مرت الايام ورجع رشاش واجو هنا واتفقو ع المهر وانطانا تجهيزات العرس والذهب ورحنا جهزنا سويناها بيومين
حتى على راحتنا اول مره اشتري هيج مكياج وعطور وملابس وكلشي يجي على بالي اشتريه
وهم اشترينا ذهب وكملنا كلشي واجه يوم العقد مال القران خابرت بيبي بهيه كتلها... بيبي عود تعالي
كالت... مريضه مااكدر
حره... شلون اسوي عقد وانتي مموجوده؟
بهيه... على يوم عرسج اعوضها هسه صدك مااكدر
جريت نفس گتلها... تمنيتج انتي وحياة وياي
تنهدت... حياة وياج اكيد وتدعيلج بالخير وانه اعوضج بس اصير احسن
سديت الخط وكعدت ابجي بحياتي ماتخيلت اتزوج وحياة مو وياي مسحت دموعي وكمت غسلت واكلت حتى اروح للصالون
كملت ورحنا للصالون مكياج وتسريحه ولبست فستان احمر
باوعت مكياج العيون حلو بس حلكي مصغرته ماعجبني ردت امسحه رتيل ماقبلت كالت... حلو لا تخربيه
رجعت للبيت اول ماطبيت طلعت كدامي طيبه كالت... سبرايز
ضحكت وحضنتها طبينا جوا باوعت جايه مرت ابو واخته هند وعمته التس
ومرت حازم بس مرت اخوه المرحوم ماجايه
طيبه كالت... يولي هاي شني حلكج ليش هيج
حره... مو حلو مو ابد ماحبيته
طيبه... ولا اني مسحيه خلي احطلج غيره
رتيل كالت... ليش ترا حلو
طيبه كالتلها... لا كلش مصغره حلكها طالع نشاز العيون حيل مكبرتهن والحلك حيل مصغرته
غير تسوي تناسب لملامح الوجه
وجابت كلينكس مائي ومسحته بعدين حددتلي شفتي وحطتلي حمره حمره باوعت بالمرايه اي هيج احلى
باعتلي رتيل كالت... صح هذا احلا
كملت وكمت كعدت يم وحده جيرانه القديمه تسأل بماما... هي بنتج مو تزوجته وعاشت ببيته
كالتلها ماما... لا جانت يم بيبيتها بهيه
المره كالت... لعد شوف الناس شلون تالف استغفر الله
بلعت ريك وطيبه فاتحه تصور بيا اجت كعدت مروه بحضني
لحد مااجه الشيخ وعقدلنا ووافقت وهالمره بكامل ارادتي
بدون اي تردد
كلت انطيه وانطي نفسي فرصه نعيش مع بعض يمكن ننجح؟ اي ليش لا
كاعده وصاحو راح يدخل العريس وكامن البنات يلبسن ويسترن نفسهم انفتح الباب وطب باسني من راسي وجابو الحلقات لبسني ولبسته
كطعنا الكيك سويا وشربنا بعضنا العصاير
جابت امي الذهب حتى يلبسنياه لبسني الترچيه وسدها و گال :-تعلگي هيج بيا
ابتسمت گال...وانه ماراح اكسرچ وعد... وباسني من راسي
خالتي كالتله... هاا ابو السباع مستعجل
ضحك كاللها... حرمتي تراا
خالتي كالتله... حتى لو بنتنا ما نسمحلك
ضحك باسني براسي مره ثانيه وجر الترجيه الثانيه لبسنياها
ضل كاعد شويه وكام والبنات يمي ذبن لحم
خصوصا رغوده يمكن رادت تبين للكل ان طلاگها شي عادي ومامقهوره بالمختصر طز
عمته ثناء كاعده وساعه تعلق ع الاكل ساعه ع لبسي ساعه ع الذهب كل شويه وكالت :-ماحلو منين جبتي ...
مايستاهل سعره
بس من لبسناها رجعت لحجمها مرت الايام واجه يوم عرسي اتفقو يصير ببيت عمته عقيله الي رحنالها اني وهو وطيبه بالانبار ومن سألته عن السبب
كال... لان صعبه زفه تطلع من بغداد للانبار
گال الاهلي وقبلو بهالشي واتفقنا هي زفه هي حنه وفعلا رحنا كلنا يم بيت عمته واستقبلتنا احسن استقبال بالهلا والمرحبا
رحنا اختارينا البدلات
اختاريت بدله ام النمنم جانت كلش حلوه وهادئه من فوك مابيها تعاليك ولا شي والتصميم مال الصدر بيه نمنم ابيض هو الي محليه وفوكاه شال
احنا نرتبه كفيكه
اخذته اباوع للفستان كلش فخم ومروه هم اشترت بدله بيضه اخذتها ورجعنا لبيت عمته
شوفتها البدله كالت
... تشك شك وين حصلتيها
حره... بعد ماصارت رجليه خيوط
لليل خابرني رشاش كتله... اشتريت بدله تجنن
كال... لبسيها وفتحي فيديو
حره... لا
كال... ليش؟
حره... باجر شوفها احسن
ضلينا نسولف ونمنا لثاني يوم كعدت من وكت دانروح للصالون عمته كالتلي... ام الصالون عدها ظرف اليوم واعتذرت ان ماتكدر تمكيجج
حره... ياا لعد شلون
عقيله... مابيدنا حل غير نجيب وحده للبيت
لبست حجابها كالت... هنا بالمنطقه وحده اروح اجيبها ما نلحك بعد
وفعلا راحت جابتها ومكيجتني بالبيت وكام يجن النسوان وثناء وام احمد وهند كلهن اجن
والي تمكيجني جان ماعندها اغلب المكياج الي يناسبني خربتلي المكياج
حيل تندمت بسببها الكحل منزلته ليجوا وسمرتني حيل والايشادو صار يلعب النفس
من شفته كتلها... يا هاي شنو طلعت اخزي
واحترك كلبي لان تاخير هي كامت تجامل... ها لا حلو والله حلو
بجيت لان صدك حسيت خرب هاليوم معسر طيبه كالت... انجبي ولتتبجبجين لحضه
وكامت غسلتلي وجهي بغسول وحطتلي مرطب وطلعت... نورس ستار... ع اليوتيوب وكام تطبق وتسويلي
هي شاطره بالمكياج سوتلياه باوعت لوجهي اي هيج يلا كمت اتنفس صح ماجان مناسب كـ مكياج لعروس
بس المهم حلو ومرتب
داتحطلي اضائه ورتيل دتعدل بشعري طبت هند كالتلها... طيبه وين البدله
طيبه بسرعه التفتتلها... ليش شلج بيها؟
هند... ما اني عمتي تكول عندي شذر اسوي الشال بيه
رتيل كالتلها... هي وين
هند... بالغرفه الثانيه
طيبه... خلي تجي لهنا تسويها
هند كالتلها... مدري كالتلي ذيج الغرفه فارغه
رتيل كالتلها... تمام لعد وديها
وصدك خذتها وطلعت نص ساعه وطبت عمته عقيله كالت... ها كملتي يلا لبسي البدله خلي ارتبها
كلتلها طيبه... ليش هي مو يمج؟
عقيله... شنو يمي؟
رتيل كالتلها... غير انتي اخذتيها عمه
عقيله... لا يمه هو انه دحكت دربي جنت بالمطبخ اشتغل
اني بسرعه كمت اركض فتحت الباب النسوان كاعدات بالهول صحت هند اجت يمي كتلها... وين البدله؟
هند... هو حطيتها بالغرفه
طبيت بالغرفه وشفت البدله ع السرير جريتها وانصدمت النمنم البيها كله مگطع... يتبع...
______________
اسفه ع التأخير كرزاياتي
لتنسون التصويت والمتابعه
والاهم ارائكم
اذا لحگت انزللكم بارت بخصوص الدجاجه😂😂😂
الي متابعيني ع الانستا حيعرفون قضية حره والدجاجه
هواي بنات ع الانستا طلبن مني انزله كـ بارت واثبته 😭😂
اذا لحگت اتدللو
كرزاياتي متابعه للحسابات فضلا وليس امرا
mr0_z1
rasoleui
NoorSabah005
تصبحون على ماتتمنون ♡
_________________
تعديل// رااااح النت😭😭😭
ولج يمصكوعات يمدوهنات كملته بالوحده ونص
وصدمني النت من طار 😭😭
وهاي احنا عود بليل جددنا الاشتراك
والوقت متأخر ومعندي رصيد اشترك. ع البيانات 💔🫂
وللخمسه انتظرته بلكي يرجع تالي مرجع غير قبل شويه
اما بخصوص التهجم فـ تهجمو براحتكم واذامعجبكم نضامي عوفو القصه لتكملوها ولتقروها
روحو اقرو قصص عمالقة الواتباد مجابرتكم على قصتي
الي يقهر.. لامتابعين
.. لاتصويت
.. لا ارائ
مجرد من ماانزل البارت يتهجمون وهاهيه
قبل لتتهجمون انطو القصه حقها وبعدين اتهجمو حتى اگول حقهم
واخيرا... قصة الدجاجه العصر احتمال انزلها لو الظهر بس خلي يقوه النت حتى انزل السكرينات اذا الانترنت ضعيف ميحملن
بليل اكو بارت... ♡
قراءه ممتعه كرزاياتي 🍒💜
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!