رواية "هل كانَ حلماً...؟
(العِراق_المُصغَر)
بقلمي_نورس_قاسم
___________________
حره :- ابتسمت دااخرج دخلت بالغلط ع المحادثه
وهم جانت كلها اتصالات
صابني فضول نزلت وجان اشوف صوره انصدمت بيها
صورة السامر...!!
رعش جسمي وخفق گلبي شتسوي صورته هنا!
رفعت راسي شفته اجه طلعت من المحادثه وحطيت الموبايل بمكانه فتح الباب صعد التفتلي
ابتسم وگال... تأخرت عليج؟
هزيت راسي بـ لا سكتت التفتت للگدام رجعت باوعتله وگلت... صورة السامر شتسوي بجهازك منين تعرفه؟
صفن شويه رجع شغل السياره مشى وگال... اعرفو من زمان هاذ واحد مجرم
سكتت كتله... عنده هواية جرائم مسويها؟
گال... لا مو مجرم كبير ومعروف لاا هاذ مثل الجريذي يمد راسه يسوي شغب ويرجع يخبيه
ابتسمت... طلع يخوف صخم الله وجهه
ابتسم گال... لا اهو مايخوف حتى روكي واحد جبان وشايف نفسو ع الاساس عصابچي واهو اذا روكي نبح بصفه يشرد
عقجت حاجبي... منو هذا روكي؟
ابتسم... چلبي
ضحكت بصوت عالي وهو يتبسم رجعت سكتت گتله... يعني انت الي بلغت عنه بيومها؟
جر نفس گال... من اغمى عليج بيومها اخذت الموبايل وضليت افتش عنو
حره... شلون عرفت مكانه؟
گال... سمعتج تخابريه وضجت منج حيل لان مابلغتي عنو بعتبار مثل الي تسترتي عنو
سكتت... وانت بدورك رحت بلغت عنه؟
كال... اي واهو الصح
... عقج حاجبه وگال... وليش احسج مقهوره عليه!
ضحكت... لا مو مقهوره عليه بس هو ساعدني وجنت اتمنى يتغير ويصير شخص زين عالم الاجرام مايلوگله
هز راسه وكال... ابو طبع مايغير طبعو دام من بدايتو مجرم راح يضل للمات على نفس طبعو والسجن احسن مكان الو
سكتت جريت اللفات واكلنا
ضل الطريق كله يتغزل بيه واني بس اتبسم مااعرف اجاوب ع الكلام الحلو ابد
تنهد وگال... حره
حره... امم
سكت شويه وگال... اذا ماتراهمنا اني واخوج وماحلينا مشاكلنا الي بيننا وصار انج لاسامح الله لازم تختارين واحد مننا ياتضلين يم اخوج وهالشي مستحيل طبعا
اما تختاريني وتجين تعيشين وياي المن راح تختارين؟
سكتت... اشو سألت وجاوبت نفسك؟
.. شلوون يعني؟
حره... گلت اذا اختاريتي اخوج وضليتي يمه هالشي مستحيل؟
هذا سؤال لو تهديد؟
گال... جاوبيني لاتتهربين
جريت نفس... لا سامح الله اذا صار هالشي فـ جوابي معروف
گال... واهو؟
ابتسمت بحزن...اكيد راح اختار الي تعب عليه من صغره حرم نفسه من احلامه في سبيل يوفرلنا احتياجاتنا
حفظنا وصانه وسوه المستحيل لحتى مايقصر ويانه بشي
باوعت لملامحه باهته كملت... الف من رشاش الشخص الي احبه واعشقه والي هو يحبني مراح يعوضوني نضره من اخويه
جر نفس وضحك گتله... لا تزعل مني هايه الحقيقه صح جارحه عليك بس احسن من مااعيشك بوهم
سكت شويه ورجع گال بابتسامه... مازعلت منج بالعكس كبرتي بعيني
الانسانه الي تنكر تعب اخوها وتبيعو ببساطه لاجل شي اسمو حب هاي انسانه ماتستحق المحبه
شلون راح اگدر اامنها گلبي ممكن على ساعه تبيعو مثل ماباعت تعب اخوها
ابتسمت وسكتت وصلني لبيت اهلي صف السياره نزلنا وگفنا يم الباب دگيناها
فتحت الباب رتيل شافتني ابتسمت رجعت باوعتلها گالت من ورا خشمها :- هلا بيكم تفضلو
طبينا للبيت بوستها رشاش گاللها... شلونها اخت مرتي؟
باوعتله صفح وگالت... جنت بخير بس من شفت زوج اختي اتگأبت
ضحك وطب طلعت ماما ومروه وسالي سلمو عليه واني بوستهن رحنا گعدنا ورشاش باوع لماما وگال
... اشو گل ماجالج تزغرين ماتكبرين ماتگليلنا ع الخلطه التزغرج حتى نستخدمها
عاد امي گاللها هيج لو طارت گابلته وكامت تمدح بيه
ورتيل طول الكعده تبسمر بيه گالتله ... لتصدگيه يمعوده مثل مجذب علينا قبل هسه اكيد هم ديدگ ناعم
كاللها...افااا انه اجذب على عمتي؟
ماعاش الي يجذب يولو
سكتت وضلت كل شويه تبسمر بيه وهو يرد عليها بالشقى
گتلها... مقدام وين؟
رتيل... مموجد بالشغل
هزيت راسي
گامت تجيب الضيافه لحگتها للمطبخ گالت... شلونج اشو ضعفانه حيل ليش هيج اكيد ممرتاحه مو؟
حره... لا والله بالعكس مرتاحه ودااكل زين
رتيل... كلبي لاعب من هالرشاش هذا اخاف يجذب ولج
حره... بشنو؟
رتيل... بزواجه من مرة اخو اخاف من يضمنج صىتي اله يتمم زواجه منها
حره.. لا والله امني رتيل هم من. زمان متزوجين وهو ابد مطايقها اصلا يگوم ويگعد يهين بيها وهي لازگه بالبيت
جرت نفس... شنو ماعندها كرامه يهينها وگاعده يمه.؟
گتلها بابتسامه... ماكو الكرامه غاسله اديها منها ومبتعده عنها كل البعد
رتيل...اي بس رغم هذا اني ممرتاحه لازم يلكى حل خو ماتضلون هيج؟
جريت نفس...هو گال الگالها حل مااخليج هيج مقهوره بس المشكله يطردها منا عمتها ترجعها منا خبلووونيي
هزت راسها بقهر...لو اعرف حظنا وين نايم بيا مگبره جان رحت طلعته ونعلت والديه
ضحكت رحت تودي الضيافه رحت وراها
كعدت يم سالي ضعفانه حيل ومصفره...شكلج متغير حيل شجاج
سالي...اي من الحمل اووف موتني والله المي حسره عليه اشربه
حره...سوده عليه راح تضلين هنا وبعد مترجعين لعثمان وسولفيلي شعجب خلاج تجين ويه مقدام؟
سالي...من خابرني مقدام وكال دااجيج هو ماقبل بس اني گطعت الاكل ومنا حملي صعب فغديت فدنوب
وضليت مصره ياارجع ويه اخويا يااضل بلا اكل منا لمن اموت
ومن اجه مقدام وتعارك وياه وهو شافني سويتها صدگ وگطعت الاكل وافق ارجع ويه اخويه
وبالنفس الوقت حالة مقدام دمرتني
سكتت شويه وگتلها... ليش شبيه
سالي... شنو ليش شبيه صديقه والي معتبره اخو جذب عليه واخذني وشرد بيه شلون مينقهر هو صح عثمان وگفله من دخل السجن بس هم الغدر مو شويه وهو بعتبار غدره
جريت نفس... هو عثمان كاله بهويته من اول ماخطبج صح ماسولف بالتفصيل عن حياته بس ماخفى كل هويته
اما رشاش شلون وهو جان امثل شخصية الاحدب المجنون!
شلون مقدام راح يتقبلى ويوافق على زواجي منه حايره كلش
داتحجي سالي وطب مقدام
باوعلي وباوع لرشاش گال بعصبيه... شجابك لهنا!
گام رشاش گاله... جبت مرتي تشوفكم وهم حتى نتفاهم ونحل الخلاف الي بيننا بهدوء
مقدام... حلوو!
نحله بهدوء
شوف من الاخير اگللكياها اختي يمي ومااترجع وياك بعد دامك اجيتنا بالحيله واستغفلتنا فـ من سابع المستحيلات انطيك اختي
رشاش... اختك مرتي وانه مامنتظر منك موافقه هي زوجتي وعاقد عليها
صح انه غلطت بس اساس الغلط هو انت
انه مو اجيت وطلبتها منك ليش ماانطيتها الي؟
مقدام... اجيتني بصفتك المجنون وتريدني انطيك اختي؟
حط نفسك بمكاني يجيك شخص مجنون وكل المنطقه تضحك عليه وتگول عنه الاحدب المجنون ويجيك يطلب اختك للزواج راح تنطيهيا؟.
اباوع لرشاش نزل عيونه للگاع سكت شويه ورجع گاله... لا ماراح انطيهيا بس انه لو گايلك على حقيقتي راح توافق؟
اكيد لا!
صاح مقدام... لااا تحكم من كيفكك انت مااجيت وگتلي
ولو گايلي بحقيقتك وانك بمهمة ومالك مجنون جان من عيوني تفهمتك وما ظلمتك
بس انت ماگلت مو صح؟
رشاش... وشنو الفرق!
دامك ماوافقت من البدايه
اكيد ماراح توافق اذا عرفت حقيقتي بالعكس ممكن. تگول هذا شخص محتال جذب علينا مو ؟
حره... واگفه واباوعلهم يتراددون بالكلام وواحد يحاول يطلع الثاني على غلط وهو على حق
جريت نفس بقهر
صعب هالشعور ثنينهم عزيزين عليا زوجي
واخويه
مااگدر اوكف ويه واحد منهم واترك الثاني ينصدم بيه
بتعدت وماتدخلت بينهم واخرتها مقدام تعارك وياه عركه قويه الى ان طلع رشاش
رحت دااوصله كال... ضلي هينا اليوم وممنوع تطلعين بدون اذني
واي شي يصير اتصلي
ترا سالفتج من رحتي لبيبتج لو انعادت مايصير خير
ومااتساهل وياج بعد
حره... لتزعل من اخويه حقه
هز راسه... لاتخافين يقنع ويتفهم الوضع ما اليوم باجر ان شاءالله
تنهدت... ان شاءالله هسه انتَ وين راح تروح
جر نفس... للبيت الي اشتريته
حره... تمام
خله وطلع رحت لمقدام طبيت للغرفه لگيته واگف ايده ساندها ع الكنتور وراسه مدنگه للكاع وحاني جسمه مثل الي يفكر رحت حضنته
باسني براسي گال... شلونج
حره... بشوفتك صرت بخير
تنهد دنگ راسه للگاع وگال بقهر... اسف ماگدرت احافظ عليجن بسببي تأذيتن
جر نفس بقهر... اني مو خوش اخ تمنيت لو ميت ولا شايفجن بهالذل
ابتسمت... اي ذل لتحجي هيج مقدام
جريته من ايده گعدته وكعدت گباله... مقدام رشاش يحبني وعثمان يحب سالي للامانه ابد مااذونه ولا حتى حاولو يأذونا
صح هم غلطو بس جل المايغلط
رفع راسه باوعلي اباوع لعيونه اشوفهن مليانات حيره گتله بابتسامه
مقدام انت اخويه واحب اكون وياك صريحه ومااضم عنك شي
هز راسي بـ اي كملت... من زمان ومن جان رشاش هو مرتضى الاحدب ساعدني هوايه
مجنت اسولف هالشي بس اني بسببه وبفضله طلعت من حالتي النفسيه
هو صاحب افضال عليه هوايه
من هو مجنون اني حبيته جنت احسه قريب مني
ومن اوگع بشده اول الي گوللهم هو
نزلت راسي وكملت بألم... هو شهد على كل اذيه صابتني
واني بحجة هو مجنون سولفتله كل اوجاعي المتعبتني
الي حتى ممسولفتها الكم
وهو جان يسمعني بطولة صبر ومايمل مني
وجان يصبرني ويشجعني اعيش حياتي واتفائل بيها
جان دائما يسولفلي انو ماكو بشر مرتاح ولازم اكو هموم عند كل شخص موجود بهالحياة
جنت اضحك بداخلي اگول الي عنده فلوس شيريد بعد اكثر من الراحه الهوا بيها
فيما بعد اكتشفن انو الفلوس لا شيء لو تملك الدنيا كلها وانت مامرتاح نفسيا او جسديا
وهذا الشفته ويه رشاش
اباوع لمقدام تفاجئ وضل كال...شنو قصدج؟
وليش هو مامرتاح شعنده؟
ابتسمت... هو هم مثلنا متعذب بس الفرق هو عنده فلوس احنا لا
ابوه موجود بس هو مايحس بحبه ولا حنانه
واحنا ابونا تركنا واحنا زغار وهم ماحسينا لا بحبه ولا حنانه
اخته ماتت وامه ماتت وراها والموت للي نحبهم صعب حيل
وهالشي جربته من ماتت حياة
اخوه قتلوه داعش وهم شافه بوضع صعب الراس مهشم والجسم مليان رصاص
جريت نفس... هم ممرتاح مثلنه وبعد هواية امور الى الان دايعانيها
سكتت شويه وكال... الله يرحمهم ابوه ليش موزين وياه
صفنت... ابوه ضغط عليه انو يتزوج مرة اخو الشهيد وهو موافق وجان عاقد على بنت هو حبها
تالي من وره ظهره ابوه وعمامه راحو فركشو الخطوبه وگالو الاهل البنت انو ابنهم راح يتزوج مرت اخوه
گاله بصدمه... يعني هو متزوج!
هزيت راسي... بس كلمن بغرفه وهو مطايقها وداايطرد بيها بس عمامها يرجعوها وهي هم بلا كرامه رغم داايگللها مااريدج لازكه بيه
كال بحيره... ماادري شاكلج بس حتى بزواجه جذب علينا
واني مامرتاح لهالشي لو يطلگها ويختارج لو يختارها ويطلگج
اني مو اناني بس مااتحمل اشوفج تتعذبين اكثر
حجيت بحزن... هو وعدني راح يلكالها حل ويطلگها... سكتت.. مقدام اني احبه فدوه مااريده يتأذه اكثر اني احبكم ثنينكم لتخلوني بموقف صعب
انته اخويه وابويه
وهو زوجي وحبيبي
هز راسه وسكت...
باوعتله... مقدام شنو التهمه الي نسجنت بيها؟
طبت سالي كعدت يمنا جر نفس گال... تتذكرين لما رحت لديالى اشتغل..؟
هزيت راسي...اي اتذكر
كال... اني وعمران جنا بامس الحاجه للفلوس لان ام عمران مريضه جانت ومن اشتغلنا التقينا بتاجر هو صاحب المكان
وكاللنا اعرف فلان ينطيكم فلوس كدين
بس لازم تجيبون الجناسي وشوية اوراق
وفعلا التقينا بيه وحسيت بيومها بشي غلط بسبب الحراسه الشديده والمكان المعزول
بس من شفت تعامله حزرت و كلت تاجر واكيد يخاف على فلوسه واخذت منه بس مليونين
واتفقنا ارجعهن بس بفائده يصيرن ٢ونص
تنهدت سالي كالت... يصيرن ربا
هز راسه وكمل... اي و اعرف غلطت بس جنت محتاج وبعد فتره لما اجيت ودانطيهم فلوس تفاجئت ان هو يريد ٦بدل ال٢
وهذا جان مبلغ خيالي بالنسبه الي
فـ تعاركت وياهم وبيومها هددوني انو يكتلوني بس ما ستجابيت وكتلهم راح اشتكي عليكم
ومن وقتها بدو يهددوني بيجن ويكولون نكتلهن
لو ناذيهن لو لو وحجي ماتحمله عقلي
ولما انسجن يلا عرفت ان هالشخص مطلوب
صرت من احس نفسي مراقب اغير طريقي حتى لا احد يعرف بيتي
ردت ابعدهم عنكم باي طريقه
والبيت ماجنت اكدر ابيعه لان ماكو فلوس
فضليت مره ابتعد عن البيت ومره اتفق ويا اصدقائي حتى اذا سئلو مايعرفون البيت
وبقيت ع هالحاله الى ان اجه عثمان وحجيتله كلشي
ونصحني ابتعد عنهم
وبعدها بفتره فتحنا المحل والباقي تعرفيه
جريت نفس... الرجال الي تواصلت وياه مساعد ابو مصعب وهذول دواعش
گال بقهر... غلطت حيل غلطت بس ماجنت ادري
واني هم ممنون لعثمان ببعض الامور وحتى رشاش
للامانه ساعدني ووصى عليه من جنت بالسجن
باوعلنا وگال... بس الي سووا بيجن واستغلالهم الي هذا الشي لايمكن اقبل بيه
حره...بس هو ماضربني ولا اذاني ابد فدوه سامحه لخاطري
جر نفس گال... بس هو متزوج
حره... كتلك انجبر مو بيده وميحبها وهي بغرفه وهو بغرفه
جر نفس كتله.. خلي يجي لهنا باجر وتفاهمو
سكت شويه وكال... اني مااكدر اخليج وياه بالانبار اذا يريد يعيش هنا اقبل بس بالانبار كلش بعيده حره
اباوعله خصم الحجي هنا هزيت راسي وكمت رحت خابرت رشاش وكتله على كلام اخوي
گال.... حجيت ويا عمامي وراح يجون بمشيه
حره.. هاا؟
وشلون قنعتهم!
تنهد... وافق عمي محمد وقنعهم كاللهم مانعذب ابنا اكثر
الزلمه كبر ويحتاج حرمه ودامو عقد عليها فهي حلالو
و ذنب علينا لو عارضنا ومنعناه عنها خلي يدحگ دربو كافي
جريت نفس براحه... الحمد لله
سكت وگال... احل كلشي وعد
حره... اثق بيك
گال... يلا مرتي بعشوي اخابرج عندي شغل
ابتسمت... تمام مع السلامه
سد الموبايل وراح
لليل كاعدين سالي گالت ... مقدام خلي نروح لمطعم نتعشى
كال مقدام...بعيوني يلا امشو اخذكم
حره... تمام
كمنا دنبدل اني قبل لاابدل خابرت رشاش كتله
كال... لا ممنوع
حره... ليش؟
كال... انه اخذج غير مره
حره... بس اريد اروح ويه اخواني
گال... گتلج غير مره انه اخذج واعوضج والله
ضليت الح عليه ماقبل زعلت وسديت الخط طلعت لاخوي كتله... مااروح
مقدام... ماقبل مو؟
حره... ها لا
مقدام... لا ادري بسببه ماداترحين مو بكيفه مايقبل بدلي يلا
حره... لا والله تعبانه غير مره اطلع وياكم
مقدام... حره كتلج بدلي ماكو غير مره يلا
حره...والله مبيا خليها غير مره فدوه
مقدام... ترا مااكو احد يبقى بالبيت اذا ماتجين تخرب الطلعه
سكتت كتله... خلي افكر
مقدام... قصدج تسأليه
نزلت راسي ابتسم كال... مسحوره لو شني
حره... مو حرام ميصير
هز راسه وراح يشسور شعره الكيرلي رﺟـعت خابرته گتله... شلون ابقى وحدي بالبيت ماترهم خلي اروح
جر نفس كال... ماشي بس الحجاب ماينزل عن راسج
حره... ماشي
گال... و لبس محتشم
حره... صار تدلل
رشاش... عفيه مرتي
سد الخط لبست وطلعت انصدمت سالي ملابسه حجاب كتلها... يا ولج رجلج مو ميقبل؟
سالي... شمدريه يختي
حره... مو حرام ولج
سالي... هاي منو يحجي عيني
حره... لج مو رجلج مايقبل فـ حرام
سالي... اني اريد البسه بقناعتي لـ ربي مو لرجلي
حره... ماادري بعد
واخذت الجنطه فتحتها شفت الگلاده مالته مال الخنجر لبستها
صاحتنا ماما رحنا طلعت
باوعت مروه بكامل اناقتها وحاطه ايدها ع اساس موبايل وتصور عود هي بلوكر
وهي صدك يلوكلها
طلعنا واحنا بالسياره دز رشاش مسج كال... يا مطعم رايحين؟
باوعت لمقدام... مقدام يامطعم حنروح
كال... قريب من بيت خالتي مطعم الـ****
اني دزيت مسج لرشاش كتله... اسم المطعم الـ*******
شافه دز.... انتبهي لروحج
دزيتله... تمام
وصلنا للمطعم طبينا گعدنا وطلبنا اكل واكلنا وسالي تصور
گامت گالت لمقدام
...مقدام تعال نتصور
...اي اوكفي اعدل شعري
كام عدل شعره وراح وگف يمها وكام ياخذون صور
واني كاعده اباوع عليهم ومبتسمه
(وبيومها تندمت مااخذت صور وياهم )
كملنا سوالف وشقى وضحك تغيرت نفسيتي وكمت دااغسل واكفه ع المغسله رشاش دز مسج
... تطگين بالگاع يـ هنيالي بيج
ابتسمت اتصلت عليه كال... يَـ هنيالي بيچ
ضحكت گتله... وين شفتني بلا
گال... قريب منج انه
حره... وينك؟
گال... شني هاي گلادتي حلوه لو حلت بيج؟
ضحكت كتله... لتحرجني بكلامك الحلو مااعرف اجاوب
ضحك گال... ادخلج دورة تعليم
ابتسمت گتله... لحظه شمدريك لابسه الگلاده
گال... كاعد وراكم انه... وضحك
حره... يا صدك؟
كال... وعيونج
ضحكت كتله... جايه
عدلت شالي وطلعت شفته كاعد كدامنا ضحكت وضليت اباوعله كام مقدام يخابر
اجه النادل حط حلويات كدامنا كتله :-بس احنا ماطلبنا
شاف الرقم مال المائده كال :-لا لهنا الطلب... وحط العصاير
كلتله رتيل... عيني احنا ماطلبنا
وصلني مسج منه... انه الطلبت اكلي وانجبي
ضحكت باوعت للنادل كتله... اي الطلب النا
باوعتلي رتيل كتلها... رجلي طلبه اكلن بخيره
رتيل... ياااح
شافتني اباوع لمكان دارت وجهها كالت :-ايا جلبه هذا من شوكت هنا
حره... من اجينا
مروه كالت... فلوس فلوس... ومدت ايدها تشرب العصير كالت... امممحح يخبل
ضحكت ماما كالت... اكلن بالعافيه
كلت مروه من الحلويات كالت... الله اكلت طيب
باوعتلي كالت... رجلج عنده اخو بكدي
ضحكت كتلها... ليش؟
كالت وهي تاكل... اريد اعرس
ضربتها رتيل على راسها... انجبي شكدج انتي وتردين تعرسين
مروه ضحكت وسوت حركه بوجهها تقلد بيها
اجه مقدام وسالي ضلو يطكطكون صور
كعد شاف العصاير والحلويات كال :-هذا منين.؟
قبل لا تحجي رتيل كتله... مسوين عرض ويا الاكل الطلبناه هذا مجاني
مقدام... حلوو.. وكعد ياكل
كلت لرتيل بهمس... لو عرف هذا من رشاش مراح يقبل
هزت راسها كمل وكام يدفع جرتني مروه كتلها... ها
مروه... سكوتي هذا موو ببلاش... وتاشرلي باصابيعها بمعنى فلوس...
ماما كالتلها بابتسامه... والله انج بنت امج
ضحكنا كملنا ورجعنا للبيت
شويه و خابرني رشاش ضلينا نحجي كال
... رحت لمدرستج اسويلج نقل للانبار فاتتج الامتحانات الشهريه بس تتعوض
فرحت كلش ضلينا نسولف لحد ما نمت لثاني يوم الصبح طلعت اشتري بيض دااطب طبت وياي رغوده كالت
:- اليوم ريوكي يمكم
حره... هلا بيج
طبينا وسوينا ريوك وهي تسولف وتسأل كتلها... رغوده شخبارج عيالج شلونهم وياج
رغد... مصخمين ساعة السوده القبلت بيك يغازي
ضحكت كتلها... ليش
رغد... حضينة الماما
ضحكت بصوت عالي سالي كالتلها :-و لايهمج دادورلج على عرسان جدد من هسه
اني شهكت كتلها... عيب ولج بعدين لو يسمع هالحجي رجلها نديح
سالي... دخيولي متاكده يتطلكون
ماما كالتلها... ولج لاتفاولين اسكتي
سالي... اني عندي حدس وتشوفون
رغوده كالت بهدوء... اني هم
اشوف نهايتنا هيج احنا ابد مامتفاهمين
حره... شنو مشكلته كعدو تفاهمو يمكن تنحل اسمعي منه وخلي يسمع منج بلكي حيتغير رايكم وتعذرون بعض
جرت نفس... لا يختي الي بيننا منتهي من زمان حتى حب بكلبي اله ماكو... باوعتلي وكالت.. لج عيني ماعنده شخصيه لو يمسحن بكرامتي الكاع يضل ساكت
الحمد لله اني مااسكت والا لو وحده فقيره بمكاني جان كطعنها باسنانهن
جرت نفس كالت... هي الوحده شتريد من رجلها غير يسويلها قيمه ويحترمها ويدافعلها
... رفعت اكتافها وكالت... اشياء بسيطه بس هو ماموفرها
ابتسمت لما تذكرت رشاش شلون يدافعلي كتلها... ربي يكتبلج الخير
حطت رتيل الريوك وتريكنا اشتغلت وياهن وحجينا اني وسالي ورتيل عن الحربايات
شويه وخابرت بيبي بهيه
...شلونج يمه
...الحمدلله بيبي انتي شلونج
..اووف شلوني بعد..جرت نفس كالت...وينج ماكو يمه خو مابيج شي
حره... لا بيبي الحمدلله مابيه شي
... الحمدلله
وضلت تسال عليه وعلى صحتي شويه وبجت كالت...حلمت بحياة ااااخ يمه شگد مشتاقه لعيونها البارحه اجتني فرحانه ومبين عليها الراحه
زين اني شوكت ارتاح؟
بجيت گتلها...اني هم كل مااحلم بيها مبين عليها مرتاحه
هذا يعني انها مرتاحه هناك اكثر
بجت گالت... اكيد يمه ترتاح يم ربها اكثر ليش هي بالدنيا هم ارتاحت الله يجازيها باخرتها ويجعل الجنه مقامها ودارها الابدي
حره..امين... ضلينا نسولف شويه وسدته
للظهر اجه مقدام جاب غده كال... حره صدك ام حياة اجت قبل فتره وسألت عليج ووصتني حتى اذا اجيتي تشوفج
حره... ياريت اشوفها صور حياة احتركو وهي عندها
مقدام... اخابرها عندي رقمها؟
حره... اي خابرها عفيه
صدگ دك عليها وانطانياها سلمت عليها وكالتلي... ردت ارجعلج نسخة الصور
حره... ياريت والله تجينا ل بيتنا الجديد؟
ام حياة...وصفيليا بلا
حره...وصفتلهيا
كالت... تيهت تعاي لبيتنا القديم اخذيهن
كتلها... تمام
للعصر رحتلها اخذتهم منها من اباوع لعيونها اتذكر حياة لااراديا تدمع عيوني رجعت
شويه و خابر رشاش كال... ساعه اتصل وانتي ماكو وين؟
فتحت عيوني مصدومه نسيته وماكتله من رحت
حجيت... رحت شفت ام حياة
رشاش... وين شفتيها؟
حره... بفرعنا القديم لان ماندلت تجي لهنا
كال بصياح ... شلوون شلوون ترحين لهناك وليش ماحجيتي
كتله... مو مستعجله
كال... انعل الكو****يد اشعلهم هسه منو سمحلج ترحين لهناااك
سكتت كال بنتر :- هم حسيتي باحد يراقبج شفتي احد يلحگج
حره... لا ماشفت احد
خله و زعل سد الخط بوجهي
سكتت ورحت ويه رتيل اساعدها بالعشى
صار المغرب طبيت للغرفه باوعت سالي تبجي ركضت يمها كتلها... يا شبيج تبجين؟
سالي.. عثمان بهذلني ورزلني ويريد يجي
حره... يا ليش شكو
سالي... عرف طلعت بدون حجاب
حره... عزا شمدريه؟
سالي...ماادري هسه شلون خايفه خاف يجي وهم تصير عركه
حره... لا تخافين
كعدت تبجي اجت رتيل وهم حجت وياها وحاولت تهديها بس هي ماكو بس تبجي
خابرت عثمان مجاوبها لحد الليل كلش صخنت حيل وكامت كل شويه تتقيئ كالت... اريد اطب اسبح
حره... ماشي
وكفتلها بالباب سبحت وطلعت حاطه ايدها على بطنها كالت... وجع ببطني اخخ
حره... يممه خاف من الحمل وصحت... رتيل
مشت شويه وكام تصيح من الالم اني شفتها هيج تخبلت و خفت كمت اصيح.. رتيييييييل يمممممااا
اجت ماما ورتيل ومقدام يركضون كال مقدام...خلي اخذها للمستشفى
واتصل بتكسي يجينا
اخذناها للغرفه وهنا صارت تنزف قوي
وهي تبجي وتصرخ من الوجع
حطيت ايدي على گلبي
خايفه عليها
شهكت وصرخت من شفتها وگعت... يتبع...
__________________
مرحبا كرزاياتي
اعذروني اليوم البارت قصير
بس داانطلع للزياره ب12 ومكدرت اعوفكم بلا بارت
ان شاءالله لباجر انزللكم بارت طويل وحلو
لتنسون التصويت والمتابعه
والاهم ارائكم
وشكرا لـ كرزاياتي المُتفاعلات ويه القصه شكرا حبيباتي
قراءه ممتعه🍒
تصبحون على ماتتمنون 💚💜
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!