رواية "هل كانَ حُلماً...؟
(العِراق_المُصغَر)
بقلمي... نورس _قاسم"
________________
لتنسون التصويت والمتابعه
+كࢪزاياتي علقو ؏ كل فقࢪه بالقصه خلي تصعد...
_______________
:- اتقربت وانصدمت لما سمعت صوت عمه الجبير يصيح ويگول لابو بكر
:- شني قابل اتشاقه طَلَكهااا ونحن ما ندري جاي اكلك طلگها وهاك دحج
:- لما سمعت عمه هيج يحجي حسيت بفرحه ودهشه بداخلي درت وجهي صحت :-طيبه تعاي
وتقدمت اتسمع ابو بكر يكوله :-ما معقول رشاش يسوي هيج قرار بدون علمي
ابو فيصل عمهم الجبير كاله... وصلتنا هالورقه من المحكمه
ابو بكر اخذ الورقه يقراها وگف يمه اوس كال... عمي الي صار اهو الصح هالحرمه ماتستاهل تبكى اعلى ذمتو
ابو فيصل... الكواين الصارت تنحل يابويه الطلاگ ما حل
اوس... لا بويه الطلاك حل كافي تظلمو خلو يعيش صارلو سنين متحملها لخاطر ماتزعلون بس كافي الواحد تجزع روحو
نتر غفار... ونحن شمسويلو وتجزع روحو
اوس ماباوعله كمل يحجي ويا عمه الجبير وابو كله... عمي انه اكول الجاي يصير بصالحو وبنت عمنا الله يستر عليها هم الها حك تعيش ويا واحد يحبها
ابو فيصل... عجل ووليدنا حمودي وين يبگى غير بحضن عمامو يكبر ويربى بينهم تريد ننطيه لغريب شني بايعين جهالنا نحن
ابو بكر گال... لا طبعا بس يجي رشاش انه احاجيه
اوس گله... حمودي نحن نهتم بيه ونحطو بعيوننا يبقى يمنا ويم امو
ما اعتقد احد راح يحبو كدها ماتحتاج وصيه اعليه
ابو فيصل... خندحگ رشاش بلكي يغير رايو هجي كواين تنحل
اوس... لاتتعبون نفسكم رشاش ضحى سنين لجلكم تا ما تزعلون بس صار الوكت يعيش حياتو
ابو بكر باوع لاوس وكله... انت جنت تدري بهالسالفه بويه
سكت اوس صاح غفار... اكيد يدري وتلكاه اهو الحاط المحامي لاخو
رجع صاح... صلفين صلفين محد يكدرلكم كلو من هاذ ابوكم لو يكسر راسكم مااتصرفون من كيفكم
صاح ابو فيصل... اسكت غفار خنفهم... وباوع لاوس كله... جان لازم تاخذ راينا اوس اخوك نحن نعرفو مايهتم بس جان لازم تكلو يجي ويتفاهم ويانا كبل المحاكم مامتوقعها منك
ديجاوب اوس سبقه غفار حجه... واهو رشاش من شوكت اخذ رايك او راينا؟ طول عمرو ما محشمنا ولا كأننا موجودين
اوس... مايحشمك الك تمشي بس عمامي يحطهم على راسو
صاح غفار... انت شحاسب نفسك وهجي تحاجيني انه عمك غصب عنك تحترمني
جاوبه اوس... والله ياعمي نحن تربينا ما ننطي الاحترام الا لليستاهلو
لزمه غفار من ياخته وكله... شتقصد يول انه مااستاهل الاحترام
جاوبه اوس بصوت عالي وهاي اول مره اشوف اوس هيج ضايج كله وهو يبعد ايديه... والله عاد كلمن هين يعرف قيمتو عدل مايحتاج تسألني ابو حسوني... وغمزله
ودفعه
صاح ابو فيصل... غفار كاااافي
صاح غفار... دحج شلون يحاجيني ترضوها
صاح ابو فيصل... لا مانرضاها بس اهدو
ابو بكر كاله... ابني غلط گلي احاسبو بس ايدك اياك تمدها اعليه
فزيت ع صوت طيبه وهي تگول... دخيل الله شكو شبيهم
باوعتلها بفرح واللمعه بعيوني كتلها...رشاش
باوعتلي باستفهام كالت... شبيه؟
كتلها بضحكه... طلك الحربايه
لزمت ايدي وضحكت بصوت شبه عالي كالت... صدك والله
هزيت راسي اي كالت... واخيرا افتكينا منها
درت وجهي واشوف ابو بكر يكول لاوس... ما هيج الحجي بابا فوت جوا
وغفار يصيح.. قليل ادب اخذت هالجساره من اخوك رشاش
رد عليه اوس... اخذ جسارة اخوي الكسرت خشم ابنك انه افتخر بيها واتمناها
غفار رفع ايده دايضرب اوس دفعه ابو بكر كله... كلو ولا تمد ايدك على اوسي امحيك من الوجود وما احسبك اخوي اقسم بالله
طيبه گالت... هالجبار خوش راح ينغسل غسله
كتلها... اخ لو يطرده ابوج ويريحني
باوعتلهم يتعاركون كالت... ابوي كلو ولا احد يمس اوس بحجايه
ابتسمت كالت... هالمره تدخل اوس صح
كتلها... شلون يعني؟
صاحت ام حازم... والله لو ضرب ابني اوس خلي يشگ حلكو
شبيه ويا بس يريد يتكاون
جيلان كالتلها... يلا بقت على اوس هو متكاون ويا الكل
ام حازم سكتت تباوع لغفار
وهذاك يحجي يكوله... انت قابل ابنك يهينني ببيتك؟
جاوبه ابو بكر... ابني ماهانك وانت الي تدخلت بموضوع مايخصك
صاح غفار... لا يخصني ونص افتكار بنت اخوي
صاح ابو بكر... وبنت اخوي هم لا تسوي روحك بس انت الخايف على امانة اخوك
اصواتهم علت وكام واحد يرد ع الثاني بلعت ريكي درت وجهي ع صوت طيبه وهي تگوله :- وينك رشاش ليش تأخرت
سمعته جاوبها لان جانت فاتحه سبيكر... گريب يم كسار
طيبه... تعال بسرعه
كاللها... صاير شي؟
جاوبته... اي خويه اجو عمامي وتكاونو هين وهاذ غفار بدا يتجاوز على اوس
كاللها بنفاذ صبر... هاذ مايتوب هم حط اخوي بنص السالفه سهله انه اربي
كالتله... استعجل
اسمع صوت واحد يمه عرفته كسار كله :-جيبليا للسجن انعل والديه وحگ هو علي
نسد التليفون سمعت صوت عمهم ابو فيصل وهو يصيح اخر شي خابر اخوته وكال :- الكل بالمضيف يلا
وطبو دارت وجهها عمتي كالت... يمه جاي ومي بسرعه بلكي تهدى النفوس... وعدلت شيلتها
مشيت اني حطيت الجاي ع النار و طيبه تحضر المي
ضليت انتظر لحد ما دا اصب سمعت الباب نطبگت
عفت كلشي ورحت اركض فتحت باب المطبخ شفته رشاش جاي ضحكت دايطب للمضيف صار گبالي اشرلي بعيونه بمعني ادخلي
هزيت راسي وسديت الباب ورجعت صبيت الجاي وانطيته لعمتي اخذته وطبت
جرتني جيلان كالت... الف مبروك يروحي وحضنتني
ضحكت كتلها... شكرا
طيبه كالت... اول مباركه لازم تكون لاوس تلكيه فرح اكثر منج ومن رشاش
ضحكت كتلها... حقه الحرمه ماتنحمل
مشيت باتجاه المضيف لزمت ايدي جيلان كتلها... ها شكو
جيلان... حدري نتغدى
حره... شلون لازم اتسمع
جيلان... كتلني الجوع يولي... وجرتني
رحت دااصب بالتمن واني احوص طيبه داتكلي الدجاج كالت... بالله نحن ماعدنا احساس الاهل يتكاونون ونحن ناكل
ضحكت جيلان كالتلها.. دلع كرشك تنفع نفسك
ضحكنا وصبينا كعدنا ناكل وبالي يم العركه تالي عفت الاكل ع النص وكمت جيلان كالت :-ويين؟
كتلها... بعد مااكدر الفضول كتلني
كامت وراي طيبه غسلنا كتلها... خاف يقنعوه يرجعها
طيبه... لا واضح هالمره رشاش قفل
مشيت بسرعه حطيت اذني ع الحايط اسمع رشاش يكول :-اول شي مامسموحلك تعلي صوتك اعلى ابوي لو واحد من اخوتي ولو ماانت بمضيفي ومعتبرك ضيف جان عرفت شلون اتصرف وياك
ثاني شي وهاذ اخر تنبيه جوز من اوس لا بالله افنيكم واحد واحد
ابو فيصل... ما هيج الحجي ابو السباع
حجو رشاش وعمه بنفس الوقت رشاش كال
:-لا هجي ونص الظاهر غفار مايمشي عدل لو شگد ما تحشمو
غفار گله... شلون تتصرف بلا صعدت رتبه شلت خشمك اعلينا لو اكو دوله براسها خير ما تصعد لا انت ولا امثالك
رشاش كاله... عجل منو اليستحق الرتب ابن الداعشي هاتك الاعراض؟
يولي استحي لسه محشمك لان عمامي كاعدين
ديحجي كله... ابني يشرفـ....
قبل ليكمل رشاش كال بصايح... هو وانت وي هاذ النعال
كمت اسمع اصوات وهوسه العمام كلهم يحجون بنفس الوقت ورشاش وغفار يصيحون وكلشي ماافهم حطيت ايدي ع گلبي وكلت... الله اليستر
اخر شي طلعو العمام برا كمت اباوع من الشباك جان غفار يتوعد لرشاش واثنين يبعدوه عن رشاش
ورشاش واكف بمكانه ويحجي
ابو فيصل حجه وياه بس بصوت ناصي ماسمعته رد عليه رشاش... عمي دامك انت وكل هلي حاضرين خصم الحجي
افتكار ماترجع لو تسووها نبي ولو تتبرون مني انه مارايدها
ولا راح ارجعها الحرمه التتجاوز على ام حازم وعلى حرمتي انه مارايدها ولا اتشرف بيها هاي نقطه
ثناء انه متحلفلها لو دحكتها قريب من بيتي ماكول عمتي لو حرمه جبيره واحشمها مثل سوالف كبل لا بالله ادفنها وين ماتدحكها عيني
... وهاذ واشر على عمه غفار كال... يطلع من هين ويتجفى شري لا بالقران اكعدو بنفس السجن الكاعد بيه ابنو ترا وصلت لهين... واشر على خشمه
غفار كله... انه الاسجنك وادحك يجي يومك
ابو بكر صاح... كافي عاد هدو ولا تتصرفون مثل الجهال
واحد من العمام كله... ابو بكر ابنك جثير اتجاوز
ابو فيصل كله... هاي تاليها يرشاش تهينا ونحن ببيت ابوك
رشاش كله... عمي انت اعلى العين وعل راس بس كافي انه جزعت مامضطر انهي حياتي واعيش مثل مانتو تردون
بس تا ترضون عليه تا لو صارت كوانه توكفون وياي
تردون تساندوني شرف الي وافتخر بيكم تكاونوني علمود حرمتكم براحتكم انه مابعازت احد
انه اسند نفسي والي مايريدني مااريدو
ابو فيصل گله... عجل هاهي دامك ماتريدنا نحن طالعين يلا... وباوع للبقيه
صارت هوسه اسمع رشاش كال... الله وياكم
جره ابو كله... ما هيج يول... وراح ورا اخوته
رشاش ورث جكاره وباوع لاوس حجو بهدوء وبعدها طبو جانو ضايجين حيل رشاش كال... مي
ركضت للمطبخ اخذت بطل المي طلعت شفته كاعد ع التخم وبصفه اوس وبيده الموبايل
صبيت بالكلاص وانطيته شرب وحطه كدامه
ام حازم كعدت بصفه كالت... انه ادري بيهم غلط يمه بس جان خليتهم يحجون لحد مايسكتون شبيدهم يعني لو ماراد اعليهم يمه
كاللها رشاش... هم يردون حجه تا يقاطعوني
... هز راسه كال.. مابعازتهم الحمد لله
ام حازم... لاتحجي هجي هم يبگون عمامك يمه الواحد مالو سند غير اهلو
ابتسم رشاش گاللها... انه غير
انه سندي الله ونفسي وبس
باوعلها كال... ماتذكر بيوم طحت بمصيبه وطلبت مساعدتهم انه احلها بنفسي
حجه اوس وهو يتصل من موبايله... شيساعدون خويه دخيل ربك ليش اهو غفار شكول دواوين
الله وكيلك يكعد بالديوان يعوي ما يحجي والعالم تهد جلابها اعليه وتديح عشيرتنا هالجلب هذا
هنا سمعت صوت حازم جاوب... انجب نعال منو هاذ الجلب
جاوبه اوس... زين عرفت روحك بسرعه
جاوبه حازم... صوتك لتعلي قندره
ام حازم تافات كالت... الا يجلطوني يلا يرتاحون
اوس باوعلها وكال... طيح الله حظك امي ضاجت بسببك شو دولي
حازم... قندره احجي بسرعه شتريد وبلا لغوه لا اعشيك قياس اربعين
ديجاوب اوس رشاش كال... بالله الكريم اذا ماسكتو اثنينكم تباتون برا اليوم خوش
سكت اوس جر رشاش الموبايل منه وسد السبيكر وكله... دزيتلك صورة علاج حمودي جيبه وياك
سكت يستمع كله... لا ماكو شي
صاح اوس... شني ماكو شي غير صارت كوانه شكبرها
ام حازم همست... هسه شكو خابرته خطيه هو بالشغل
كاللها... عجل شني انه انقهر وهو مرتاح شو دكله خيجي
رشاش كله... انجب... ورجع جاوب... كمل شغلك يلا عيني... وسد الخط
باوع لاوس خزره اوس تافاف وكام كالتله ام حازم... خابر ابوك وينو هسه
كاللها... ركض وراهم وينو يعني
رشاش ارتجا ع التخم يدخن رحت كعدت يمه حطي ايدي ع ايده باوعلي ابتسمت ركز بملامحي وابتسم مجامله ورجع يدخن عرفته ضايج حيل
شويه وطب ابوهم وكف كدام رشاش كاله :-ارتاحيت هسه؟؟
كله رشاش... كِلش
جاوبه ابو... اسكت حرف ما اسمع منك انت شلون تتصرف بدون علمي ماسويتلي قيمه ولا حساب جدام عمامك
افرح هسه يروح غفار يفضحنا بين الناس اعلى رشاش طلك بنت عمو وما بلغ لا ابو ولا عمامو
ما جاوب رشاش گله بصايح.... ماتحجي ليش ساكت؟
جاوبه رشاش... غير انت كتلي حرف مااسمع منك
صفن عليه ابو كله... بالله عمامك ماجذبو من كالو الجساره تمشي بدمك
جاوبه رشاش... اذا تحب تتاكد انه حاضر تگدر
قبل ليكمل گله... اش اش اسكت وجفيني شرك كافي عليه السويتو اليوم
سكت رشاش كعد ابو كله... لازم تعتذرون طرد عمامك مايصح زحمه السويتو رشاش
رشاش هز راسه كال... اذا يقبلون بقراري هاذ احطهم على راسي مايعجبهم ماتفرق وياي
وجودهم وعدمو واحد... وكام طلع من المطبخ
ابو ضل يحجي عليه وينتقد تصرفاتهم اني ركضت ورا رشاش دايرفض الاتصال لزمته من ايده دار وجهه عليه جر نفس گال :-دحكي شلون طلعوني كو**د
حطيت ايدي على كتفه كتله... لتهتم الكل يعرف انت صح حتى عمامك
هز راسه كال... ما مهم رايهم القبلو او لا صار سنين وحدي منو فادني منهم؟
ابتسم باستهزاء... محد
اتصل موبايله رفض كتله... وين رايح؟
گال... عندي شغل كسار منتظرني
هزيت راسي كتله... تتأخر
گال... اي.. باوع بعيوني كال... اصعدي لغرفتج وادرسي زين واذا حجه ابوي حجايه وحده ماتردين اعليه خوش
ابتسمت كتله... بعيني
تقرب باسني براسي وطلع ضليت اباوع عليه وگلبي يدگ سريع ابتسمت وكلت بداخلي... اني شسوي بدونه
جريت نفس ومشيت صعدت الدرج
استوقفني كلام ام حازم تكوله... عجل جنت ناوي ترجعها وهي تهجمت اعليا بنص بيتي وطكت چنتنا
زين منها ماكالت لاهلها هاي السالفه عليها كعدات
هند كالتلها... ما بس هيجي بابا غلطت اعليك هم وامي تشهد
ابو بكر جاوبها... ما جنت راح ارجعها لهين ياام حازم انه هم تبت منها بس انو يطلك ومايگلي ويحطني بهيجي موقف جدام اخوتي
هاذ الانه ماراضي عليه
جريت نفس وطبيت لغرفتي فتحت كتبي وكعدت ادرس ربع ساعه واتصل موبايلي اخذت الجهاز شفت المتصله اختي سالي فتحت خط وكلتلها... ياهلا شلونج
سالي... مو زينه ابد
حره... ليش ولج؟
سالي... حره كلبي يوجعني
حره...ياا ليش
سالي... اليوم فتحت موبايل عثمان
صحت بصوت... عزا خانج؟؟؟
سالي... لا لا مو هيج
حره... لعد؟
سالي... حره تليفونه عباره عن تهديدات ويوم عن يوم تزيد
حره... يمه هاي شنو!
سالي... وعلي والبارحه هم قريت واحد دازله تهديد كله صدناك وانت النچر گِل لصاحبك يحفر كبرك يومك ماهو بعيد
حره... دخيلك ربي شنو هاي!
سالي... خايفه عليه حيل حره
حره... زين وهو شيكول؟
سالي... ما مهتم يكول متعودين ع هيجي تهديدات بس اني كلبي واجعني
حره... واني هم والله
جريت نفس وحسيت باحساس مو حلو كتلها... مو ع اساس ترحون لبغداد؟
سالي... ابوه مريض ماهان عليه يعوفه
حره... وابو شلونه وياج؟
سالي... مايباوع بوجهي
حره... ادري كاتله ابو ليش هيج يسوي!
سالي... هاي بعد شسويله واني ساكته علمود عثمان
... جرت نفس كالت... حيل يحب ابوه رغم السواه بيه لسه يحن لوجوده ودائما يذكره رغم ابوه ابد مازين وياه بس من يريد فلوس لو مسواگات يذكره
حره...ميخالف تحمليه لخاطر عثمان
سالي... هو هم هيج
حره... يبقى ابوه بلكي يجي يوم ويصير خوش انسان
سالي... ان شاء الله يلا اروح ادرس باجر عندي امتحان
حره... بالتوفيق.. وسدت الخط
ضجت من بعد هالمكالمه شفت الكتاب مفتوح كدامي صفنت شويه وطبگت الكتاب وكمت كلت اروح يم طيبه نغير جو وصلت لغرفتها فتحت الباب بهدوء جانت كاعده بالكاع وحاطه البوم صور بحضنها رفعت راسها باوعت لعيونها حمر وبيها لمعه واضح انها باجيه
سديت الباب وتقربت كعدت يمها كتلها بخنگه لان هاي اول مره اشوفها تبجي حجيت :- شبيج طيبه ليش تبجين؟
گالت وهي تباوع للصور... مشتاقه لامي
نزلت عيوني ع الصور جانت الصوره قديمه لمره جبيره بصفها بنيه شابه والثانيه تطلع اكبر من اختي مروه انتبهت هاي طيبه كتلها :-هاي انتي مو؟
هزت راسها گالت :- وهاي امي وهاي... واشرت ع الشابه نزلت دمعتها گالت :- اختي
گتلها... شلون ماتت؟
طيبه... احترگت
فتحت عيوني بصدمه كتلها :-لا اله الا الله
طيبه... حرگو گلبها وروحها واخر شي... نزلت دمعتها كالت... احتركت
بجيت وياها احس بوجعها كتلها... احجيلي عنها
طيبه... جانت تحب مهنة الطب لما كملت الثالث ابوي كال ماتكمل جان رشاش بين شغلو وبيننا
اتذكر خابرته وكالتله ابوي مايقبل اكمل وادرس للرابع وبوكتها كبت الكوانه بين ابويا ورشاش
حره... وبهالوقت زاهر الله يرحمه جان عايش مو
طيبه... اي
حره... يعني هم من زمان هيج مشاكلهم؟
طيبه... هو رشاش من صار عمره عشرين بدت التفرقه تأثر بيه
گتلها... شلون يعني
طيبه... اهلي جثير يفرقون بين اخواني ابوي عندو اوس وبكر الكل بالكل وماما جانت تميز زاهر الله يرحمو جثير عن الكل وحازم بذاك الوكت بامريكا
وهملو اخوي جثير لدرجة ماجانت تدري بيه ياكل لو لا
وابوي مايدري بيه وين وصل بدراستو وهو كلما يكبر كلما يحس بهالتفرقه اكثر
جرت نفس متحسره گالت... اتذكر مره من جان يدرس يجيب كلو ممتاز فابويا بوقت الامتحانات كال للولد كلهم اذا نجحتو وجبتو درجات ترفع راسي واكدر اتباهى بيها لكل واحد اجيبلو موبايل جديد جانت هستوها طالعه السلفه الحكوميه مالتو والامتحانات گربت تنتهي
جرت نفس كالت... وفعلا جت النتائج وجان حازم مازين مكمل واوس تفوق ورشاش تفوق من جا ابوي ودحك حازم زعلان كله تتعوض وضل يواسي هو واوس ومابارك لرشاش
اتذكر بوكتها اتغدى وطلع وي جماعتو لليل اجه متاخر دحك عمي وابوي كاعدين وابوي بيدو تلث موبايلات ابتسم ابوي انطه واحد لبكر گالو هاي لان نكسر موبايلك مايهون اعلي اجيب لاخوتك وانت تضل
وطلع الثاني انطاه لاوس والثالث انطاه لحازم ورشاش يباوعلهم من بعيد بدون اي ردة فعل عمي كال ببسمه... عجل موبايل رشاش وين؟
ابتسم مجامله رشاش وباوع لابوي منتظر الرد ابوي كله... رشاش عندو شلو بيه باوع لرشاش وكله... ع السنه الجايه اجيبلك يخبل انت بيا صف صرت
اختفت بسمة رشاش وكال بهدوء وهو يرفع حواجبه... صف؟؟!!
ابوي ناسي انه موجود !
عمي احمد كاله... لا بويه هههههه يتقشمر وياك بس هذول اخر موبايلات وانت موبايلك حديث وهاي دحج حتى زاهر ماجابلو
فـ كل يوم يمر رشاش يبتعد عن البيت بحجة دوام وشغل ودراسه اكثر واكثر تجيه اوقات ماينزل غير خمس ايام بالشهر ولو مايخابر اهلي مايسألون الا مرات امي من تشوفو ماتصل وتسمع بانفجار تكوللهم خابروليا
نزلت دمعتي كتلها... ياعمري كل هذا عايشه رشاش
طيبه... وييي والاكثر عجل مره صارت كوانه بينو وبين واحد من منطقتنا ورشاش اهو جان الصح ومن اجو للديوان ابوي طلع الغلط برشاش
حره... بس ليش هيج يسوي؟
كالت وهي تهز راسها... يمكن قلة فهم
حره... ورشاش شسوا
طيبه... طلع من البيت تلث اشهر يلا رجع
كتلها... خطيه
تنهدت بحزن... هو من يختنك يبتعد مايعتب حتى من جانو اهلي يهملو مايعاتبهم يتركهم ويبتعد يريدهم يحسون ويسألون بس اهلي ولا جان يمهم الموضوع لحد ما دحكتي انتي رشاش شلون صار ويا ابوي
جرت نفس گالت... جانت اختي الله يرحمها هي تنظفلو غرفتو وملابسو وهو يحبها جثير وتكاون بس تا تكمل دراستها وصدگ كملت بطلاع الروح
حره... احجيلي عنها ليش تكولين دائما هي متعوبه
جرت نفس وكالت... الله يرحمها جانت تعالج الجرحى الي يجيبهم اخوي ويا بس بدون علم ابوي لان اهو بذاك الوكت مايريد احد من ولدو يتگرب من مذهب ثاني
كالت... ما يكرههم بس جان يخاف لان بوكتها المدينه گبت نار والسيطره الي تمرين من يمها تتشاهدين وماتدرين تعبريها عايشه لو ميته
كتلها... يمه
طيبه... هين بهالمدينه اندفنت جثير امور توجع گلوبنا
گتلها... ياعمري الله يساعدج
طيبه... بيوم من الايام رشاش جاب جريح اسمو جعفر
فتحت عيوني بدهشه كتلها... حجالي عنه
هزت راسها كالت... فـ اختي راحت عالجته بس لا ابوي ولا عمامي يدرون اخواني لزكو السالفه
كتلها... اي
طيبه... واختي حبتو... جرت نفس كالت... والولد ماغلط اجاها من الباب وطلب ايدها
... هزت راسها وكملت... وابويا مثل عادتو مشى ورا كلام عمامي شني تنطيها لغريب لا وفوكاها بالناصريه نحن اولى خلي نزوجها لابن عمها احمد الي هو اخو حسنين المصخم
والله شني تا نقوي روابط علاقتنا
حره... صخام
طيبه... رفضو جعفر واجو عمامي يطلبون ايدها رفضت هين هم تخبلو ليش تا ترفض ابن عمها عندو نقص يعني؟
وضلو عمامي يضغطون اعليها جانو اخوتي كلهم ماراضين وكالو لو ماتقبل ماننطيها بس ابوي رافض جعفر تماما ويريد ينطيها لابن عمي
وطبعا الحربايات هين الهن دور كبير يكومن يكعدن يذمن بالمذهب الثاني وبجعفر لا وما بس هيج جانن يلمحن لابوي ان اختي عندها علاقه بجعفر وعاشكتو وخلت ابوي يتخبل عليها
حتى للمستشفى ماخلاها تروح لحد مارجع رشاش
جرت نفس كالت... بوكتها رشاش تلث اشهر هو ما بالبيت ولا دحكناه من اجه ولكاهم رافضين جعفر صاحبو ويردون ينطوها لاخو حسنين تخبل من اجا سألها كالتله انه الزلمه جعفر قابله بيه بس اهلي رفضو
وبوكتها صارت كواين كثار الى ان بيوم رشاش راح لعمي الجبير ابو فيصل واخذ وياه شيوخ وسألهم جدامو اذا الزواج هاذ لو تم والحرمه ماموافقه حلال؟
وجان كلام الشيوخ لا يجوز والحرام عليهم وهين عمي اقتنع وصار ويا رشاش وهيجي قنعو الكل
جرت نفس كالت... وجعفر ماخله سيد وشيخ ماجابو وهم طلعت روحو لاخوي يلا وافقو اعليه وهذن الحربايات ماخلن شي ماسونه بس تا مايصير هالزواج
كتلها... ليش هيجي يسون؟
طيبه... حقاره... اي وبيوم عقد القران هم سون بفستانها مثل ماسون ببدلتج
كتلها... سود الله وجوههن
طيبه... واختي كالت لامي هن سون هيجي وامي سكتتها كالتلها مانريد فضايح ولزكولها فستان مدري شلونو ومشى العقد
كتلها... ياعمري صخم الله وجوههن
رفعت راسها كالت... امين جرت نفس كالت :-اليوم الي احتركت بيه اختي الله يرحمها جان يوم عرس صديقتها قمر فاختي راحت هي وصديقتها الثانيه الكلش مقربه نبأ الي هي اخت عثمان
كتلها... اي؟
طيبه... فمن صارت الزفه مال قمر ضلت ام قمر تبجي عليها لحد ماوجعها راسها فـ نبأ كامت داتسويلها جاي وبهالوقت جان الغاز متسرب واول ما شعلت النار احتركت نبأ
شهكت كالت... اختي من خوفها وهلعها جابت بطانيه مال طفل رادت تطفيها بس ماكدرت ولاحتها النار
حره... دخيلك ربي
هي بجت حضنتها وبجيت كالت
:- تسممت من الحرك وماتت
مسحت دموعها كالت :- وهاي قصة اختي باختصار
كتلها... الله يرحمها
طيبه... اما رشاش وعثمان التقو بجنازة خواتهم وصارو اصدقاء
كتلها... واثنينهم حالهم مو احسن من بعض سولفيلي لقاءهم هم تعرفين شلون التقو؟
هزت راسها وگالت...سولفلي اوس كال طلعنا من الردهه وجان رشاش رافع الموبايل بإيدو الترجف
ادحگله يگلب بالارقام يحاول يطلع رقم الطبيب الامريكي
رشاش من سافر الامريكا تعرف عليه فـ حتى يتصل بيه
فگال بوقتها التفتنا ع صوت انين مكتوم ومخنوگ
درنا وجهنا دحكنا شخص گاعد ع الارض ايد حاطها ع حلگه يمنع صوت البجي ان يطلع
والايد الثانيه يضرب بيها الگاع بقوه
يكول ماهتمينا للمنضر الگدامنا لان جان كل همنا نتصل بالطبيب
عسا وان يلگه علاج للجريحه النايمه تأن متألمه جوه الردهة
يگول رشاش اتصل ع الطبيب
بس گطع اتصالو صوت بكر المخنوگ...
.. يول الحگ امي حالتها تدهورت
راحنا نركض ويه اخونا وصلنا لردهة الطوارئ راح رشاش فتح الباب وراح عليها
دحگ عليها وانه ورا
دحكتله دمعه خطفت من عيونو ونزلت بس بسرعه رفع ايدو ومسحها بكم قميصو
نزل راسو وطبع بوسه خفيفه ع جبينها...
وجهه اصفر لان ماصارلها غير كم شهر من طابت من الخبيث وفرحنا بيها
بس للاسف فرحتنا ماتمت
ادحكله گعد ع الكرسي لگدامو وحط راسو بين اديه يحاول يسكن جرحو الينزف بس مو گادر ولا عارف شلون
يسكنو
شويه ورفع راسو للسماء وصاح بصوت واهن... ياااااااالله اااااارحمني دخيييلك
گام من مكانو وطلع وانه وراه ورجع لردهة الحروق وگفنا بباب الردهة لان ممنوع الدخول حتى المريضه متتلوث
دقايق معدودات ويه اذان الفجر گاعدين وحسنا صارت حركه مريبه بردهة الحروق راح رشاش دحگ من شباك الغرفه
وانه دحگت وياه الدكتور متوتر ووضعو متخربط ويحجي ويه الممرضين الانخبصو وگامو واحد يتلاطم بالثاني
دحكت على اخوي بخوف التوتر بان ع ملامحه حسيتو خايف مثلي حط ايدو على گلبه وبده النفس يثگل عندو
وكال بهمس مخنوگ... شنو الصار وليش انخبصو
سكتت لاني مثلي مثله ماعرف ليش نخبصو ولانگدر ندخل للعنايه خوف ع المريضه لاجسمها يتلوث وتموت
لان بوقتها الحروق نسبتها 65٪ واقل تلوث يقتل المريضه
ثواني وجان ينفتح باب الردهه طلع الطبيب وگف گبالنا نزل راسه بأسف وكال... للاسف المريضه توفت جسمها تسمم لان الحروق بليغه وقويه
بوقتها هالخبر نزل علينا مثل الصاعقه رشاش ماتحمل دحكته ثنى على ركبه حط اديه ع راسو وصرخ بصوت مكتوم
انه كل هاذ وصافن مامستوعب الجاي يگوله الطبيب شويه والتمو اخواني بكائهم وصريخهم فجع المستشفى بأكملها
للصبح واحنا على فد ونه
تالي اخذنا الجنازه لازم نقوم بمراسيم الدفن
من بعد ماصلينا الصلاه ع الميت وكملنا مراسيم الدفن
انه ضليت واكف يم رشاش خفت لان حالتو ماتبشر بالخير هو ما مثلنا ماصرخ ولابجه ضل كاتم بداخلو وهالشي مازين فخفت اعليه
واگف بحزن ومنزل راسو وعيونو متركزه على قبرها
نسمع صوت المُعزين الورانا يحجون ويكولون
:- حتى الماحسابيلو حساب اذا كاتبو الله يصير غصب عن كل العباد
الثاني يردو :- لا حول ولاقوة الا بالله رفيجات من المهد لـ اللحد
رجع الاول گال :- دحگ التعب بوجهه الضابط عثمان
هنا انه ورشاش رفعنا راسنا حتى ندحگ عالشخص المقابيلنا
دحگت النقيب كسار ووياه نفس الشخص الدحكناه بالمستشفى الي اسمه الضابط عثمان
تقدم النقيب كسار ووياه الضابط عثمان وگفو مقابيل رشاش
وحجه النقيب كسار ...
:- سيدي اعرفك على الضابط عثمان
الضابط عثمان رفع ايدو حتى يتصافح وياه
رشاش رفع ايدو لحتى يرد السلام
كال النقيب كسار ... ضابط عثمان اقدملك الثعلب
عثمان :- حبيبي والله
الثعلب :- عصر ايدو المصافح بيها ايد الضابط عثمان وگال
... على راسي
حره... صفنت كتلها... الثعلب..!
هزت راسها كالت... رشاش بذاك الوكت انعرف باسم الثعلب
حره... ليش هيج يسموه؟
طيبه... لان يحتال ع العدو يعني توقعي رشاش يصادق عدوه ويلعب باحوالو وطب فش ينلزم عدووه
ابتسمت تذكرت حركاته من جان مسوي نفسه مخبل كالت... ام عثمان انجلطت وماتت بنفس الشهر من القهر لان بنتها تفحمت
وامي جرت نفس كالت... ضلت تعالج الورم الى ان توفت الله يرحمها
سدت الالبوم مسحت دموعها كالت...
"ورا كل صوره بألبوم دمعه وحچايه وخنگه مادحگها حتى المصور "
حضنتها كتلها واني ابجي... رشاش ماجذب من كال كل واحد يعيش همو بطريقتو منو يصدك انتي متاذيه لهالدرجه
هزت راسها كالت... الحمد لله على كل حال
سمعت صوت رشاش كمت كتلها... خلي اشوفه واجي
هزت راسها كالت... وانه حنام
سديت الضوا وطلعت صار بوجهي وهو يصعد الدرج شافني استغرب تقرب مني كال :-ليش باجيه... وسحب ايدي دخلنا للغرفه
باوعت بعيونه گال وهو يمسح على خدي :-شبيج
گتله:- ولا شي بس احبك
ابتسم جرني من خصري حط راسو بركبتي كال... كلو لان طلكتها؟
ضحكت كتله واني الزم وجهه بايديه واباوع لعيونه... احبك بكل الاحوال
ضحك كتله... لان ادري انت تحبني
ابتسم كال... اعشگچ يا..
گتله... سِر ليلي
ضحك وتقرب يبوسني ضلينا مع بعض لليل كعدت اقرا وهو كاعد ع اللابتوب شميت ريحة المطر كمت دا انزل كال... وين
حره... بالحديقه
كال... حدري هين يول الجو بارد
حره... حتى لو اريد اطلع
لبست الكبوس باوعلي گال... عجل جاي وياج
لزمنا ايدين بعض ونزلنا اوس يدخن اركيله بالهول وحازم ممدد طلعنا للحديقه وكفت تحت المطر هو واكف يمي كتله... تعال نركص هين
ضحك كتله... شبيك دتعال
كال... يول ثگلي هاي ماغرفتنا
حره... شبيك محد يطلع دتعال
كال... انجبي
حره... زين خلينا هيج بس نلزم ايدين بعض ونتمشى اريد اعيش اجواء الافلام
ضحك لزم ايدي ومشينا والمطر ينزل علينا كال... اذا تمرضتي باجر اسحلج سحل للمدرسه
ضحكت كتله... ماتمرض بسبع ارواح اني
لزمت ايديه ووكفت كدامه باوعت على ملامحه كال... صايره جريئه يولو نظرات وحبشكلات
ضحكت گتله... غير رجلي وحلالي
كال... هاه لو ادري مطلكها من زمان
ضحكت حطيت ايدي ع صدره رفع راسه كال... الله يديمها
ضحكت فزينا ع صوت اوس التفتتنا واگف بنص الحديقه وحاط الريمونت على اساس مايكروهفون كال... من البدايه اخذو بشوري وطلگوها واليرحم والديكم شكيتوني وانه ببيتي دحجو... وباوع للمطر... حتى الله رضى علينا ومطرها باول ما طلگتها
صاح رشاش... مبروك حبيبي خلصت من اكبر همومك
اوس... اي بالله هسه اكدر انام وانه مرتاح ما مثل كل مره اضل شايل هم خاف حيه تلدغني منا ولا منا
فتح الباب حازم كال... شني حبيبي تخاف تلدغ روحك؟
باوعله اوس كله... دحج لخلقتك زين بالمرايه متوهم بيني وبينك
قبل ليجاوب حازم كال رشاش... المايسكت انعل والديه خوش؟
اثنينهم سكتو وواحد باوع للثاني اوس كال :- اروح انام احسنلي من هالشكول وغم حازم
حازم نزع نعاله وشمره اوس ركض طاح النعال بالباب فتح الباب اوس وكال
game over baby
(انتهت اللعبه حبيبي)
وطبگ الباب قوي
طب وراه حازم باوعلي رشاش گال :-ها صدگتي من كتلج النعل تتطافر
ضحكت كتله... اي والله صدكت
ضلينا برا نسولف شويه وطبينا للغرفه لثاني يوم الصبح كعدنا سويه سويت ريوك بدل واني لبست صدريتي دا ارتب شالي حضني بقوه وحط راسه بركبتي كال ... احبج
لعبت بشعره كتله... واني هم كلش احبك
ضحكت دنك باس خشمي گال... انتبهي لنفسج ... وطلع فلوس انطاني وباس راسي گال...
اوس راح يوصلج للمدرسه
هزيت راسي وحضنته كتله... ترجعلي بالسلامه
ابتسم وباسني من حنجي لوحتله بايدي بمعنى بيباي وكتله... في امان الله
لوحلي بايده وكال... في امان الله
... وطلع
لفيت شالي ونزلت وصلني اوس لمدرستي اسبوعين مرو ورشاش مو يمي كمت احس بفراغ جبير بدونه وميحاجيني هواي باليوم كمت بس اريد الايام تمشي حتى يجي واشوفه
بعد اسبوعين تقريبا واكفه داارش الحديقه وتفكيري بيه وينه وليش ميحجي وياي هواي
جريت نفس وكلت مشتاقتلك حس بيه واني بتفكيري فزيت ع صوت الباب رفعت عيوني شفتها انفتحت وطب رشاش ضحكت شمرت الصونده وركضت حضنته بادلني گتله... ابن حلال
كال... ليش
حره... جنت داافكر بيك
ابتسم وكرصني من خدي وطب سلم على اهله وصعد فوك صعدت وراه اخذ خاولي وطلع يسبح كتله... تحتاج شي
ابتسم بتعب كال... سلامتج... وفات للحمام
تفاجئت وضجت حسيته مامشتاقلي مثل مااني مشتاقتله صبيتله اكل طلع من الحمام كتله... نعيما يلا تعال ناكل
كال... لا مااشتهي بس اريد انام ... وصعد فوك
كتله... مو صبيت
ما جاوب رجعت الاكل وصعدت لكيته ديخابر
كال... اطلعو واجيبو من جوا الكاع ما عاش الي يوگف بدربنا
سكت شويه يستمع گاله... نقيب سهير شني انعل والديه ووالدين الخلفو خلي يطلع منها لا اعرف شلون اتصرف وياه
طبيت للغرفه وهو ضايج وينتر لحد ما سده باوعلي وماهتم حط راسه ع المخده وحط ايده على عيونه ونام وتليفونه كل شويه يرن تطلع بيه ومضه مسويه صامت
كعدت ع السرير اباوعله بهدوء تاكدت منه نام
كمت طلعت كتبي وكعدت ادرس بليل هم نفس الشي ضايج وحتى ما مهتملي كاعده افكر الساعه بـ ٣ بليل ليش هيج متغير عليه جريت موبايله اشوف شكو لكيتو مغير الرمز
كلبي كام يدك سريع كعدت بصفه حطيت ايدي ع كتفه كتله... رشاش اكعد
فز باوع للساعه ورجع باوعلي كتله... شوف اني مااحب اللف والدوران بس اني احسك متغير عليه
رمش رمشتين وفرك عيونه ورجع يباوع للساعه باوعتله كتله... صاير ماتحبني اني دااحس بهالشي
كال... يول الساعه بتلاثه
حره... مو مهم الوقت المهم اني كشفت الحقيقه
كال... يا حقيقه؟
حره... انك ماتحبني
جر نفس وجرني من شعري بخفه حط راسي ع صدره حضني وكال... يول غير انتي هين.. وحط ايده ع كلبه وجرني
نمت بصفه گتله... بس متغير عليه
حط راسه بركبتي گال بتعب... شعلو الخلفوني والله
حره... شنو؟
ماجاوب حطيت ايدي ع شعره كتله... رشاش
ما جاوب عرفته نام واني هم استسلمت ونمت لثاني يوم الصبح وصلني للمدرسه وراح من طلعت شفت الجاي عليه اوس ضجت اكثر
رجعت للبيت بدلت وكعدت اتغدى اوس كاعد ياكل
اجاه اتصال فتح خط كال... ها حبيبي
سكت شويه وبعدها تغير ملامح وجهه وصاح... شلوون هاجمو اخووي!!
... يتبع ...
___________________
بهذا البارت وضحتلكم حياة رشاش والي جراله حتى تتعرفون عليه اكثر
شسمه اذا لگيتوني ساحگه باسم شي سوولي تاك بسرعه
حتى اعدله قبل لا العدو يهاجمنا 👀🔪
لتنسون ارائكم للبارتات الاخيره
وشنو تتوقعون حيصير
هوايه بنات سالن عني بالانستا ومجاوبتهن
اسفه حبيباتي تعبانه كلش والله افتح الواتباد اسردلكم وارجع اغلق الموبايل لاني تعبانه وملي واهس بشي ابد
واكو اسأله متكرره عندي القصه بيها بعد موت؟
اي نعم بيها موت
قراءه ممتعه ❤
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!