رواية هل كان حلماً ...؟ (الِعراق_المُصغَر) الفصل الثاني وثلاثون 32 - بقلم Nawras_Qasimᥫ᭡

الحلــــــــقه الخامــــــــــــــــسه

رواية... هل كانَ حُلماً...؟

      { العِراق-المُصغَر ... التوباز }

بقلمي ... لؤلؤة_البِحار ...
___________________•
حره :- وصلت للبيت واول مانزلت شميت ريحة الدخان ويا هوى الجو البارد
الضوا مال سيارة الاطفاء صار بعيني ركضت شفت الناس ملتمه
دفعتهم ودخلت من باب البيت

چوتني لانها حاره بس ماهمني
ولاهمني البيت والاثاث ولا غراضي كل بالي يم اخر شي تركته الي حياة "الدفتر"

أسوء شي ممكن يصير للانسان الفقد ومن شخص عزيز يترك عندك اخر ذكرى وتضيع منك
هنا تحس گلبك يحترگ
بذاك اليوم النار الي اكلت البيت اكلت گلبي

ركضت اريد اطب للغرف لزمني عثمان طلعني سمعته كال :-العوض على الله تعاي لاتشوفين هالمنظر

دايطلعني مقبلت اسمع سالي ورتيل يبجن
بس كل نظري على الغرفه والهول اباوعلهم متدمرين
كعدت اصرخ  واكوللهم... الدفتر راااااح الدفترررر

حسيت بناس تلزمني جرتني رتيل وهي تبجي طلعتني برا البيت گتلها :- رتيل بس اريد اشوف دفتر حياة بلكي مااحترك

حضنتني وهي تبجي اباوع لبيتنا واسمع الناس الكل يگول
:-الله يعوضكم والحمد لله بالمال ولا العيال

كمت كتلها واني اصرخ... شلون شلون صار هيج شلون احترررك

كال عثمان... بسبب الكهرباء

رتيل كالت... دخيلك ياربي

هو هز راسه جيرانه كالت... خطيه الولد بسرعه طفو الكهرباء عنكم  وماكدرنا نطفيه بالمي الى ان اجت الاطفاء والحمد لله مانتشر

رتيل ... دخيلك ربي ليش هيج صار

جيرانه كالت... الحمد لله يمه بالمال ولا العيال
الحمد لله محد بالبيت

كتلهم... والدفتر شلون

رتيل... الحمد لله حره اهم شي احنا مابينا شي

خالتي اجت كالت... كومن هسه كومن البجي ميفيد

رتيل كالت... امشن يلا

سالي جانت واكفه تحجي ويا خطيبها اني اريد اكوم مااكدر جسمي يرجف رفعت راسي شفت مرتضى حاط ايديه بجيوبه وواكف بعيد
وملامحه متعبر عن اي مصيبه
جان هادئ
بس عاكد حواجبه
ومنزل عيونه للكاع ويباوعلي ويرجع يدير وجهه

تفاجئت ليش مااجه ليش واگف بعيد عني ولا تدخل ولااجه لهنا
حزت بخاطري
سندتني رتيل وصعدت بالسياره صعدن خواتي اجه عثمان من الجامه كال لرتيل

... سالي نزل ضغطها وكليها شي
مالح

رتيل... ماشي

عثمان...  رتيل لتكولين لمقدام ع الي صار

رتيل... يا شلون لعد!

عثمان... باجر نشوف حل لاتقلقيه هسه دنيا ليل خطيه

هزت راسها وبجت كللها... عوض الله اكبر

رتيل... الحمد لله اهم شي خواتي بخير

عثمان... الحمد لله

مشت السياره رجعنا لبيت خالتي وهناك صارت هوسه والتمن خالاتي وامي ضلت تدردم تكول

اميره ... اكيد عفتن الثلاجه مفتوحه واجيتن مهملات

سالي هزت ايدها خالتي نرجس  تعاركت ويا امي كلتلها.... هامله الدنيا كلها مخليتها على رتيل مابيج حظ شكو تزوجتي

اميره... الي صار صار شسوي مثلا ترديني ابقى بالبيت حتى احترك لو اطفي النار اني؟

نرجس... اسكتي ولتحجين حجي زايد انتي دايحه شكو تزيدين هم البنات ترا روحي وصلت لهنا... واشرت على خشمها... حجايه زايده انسى انتي اختي

ماما ضلت ترادد وتعاركن اني كمت اسيل كلتلي
... تعاي لغرفتي ارتاحي... واشرت لسالي...

خالتي باوعتلنا كالت... روحن ماما روحن ارتاحن والله يعينجن شاكدر اكول غيرها

صعدت لغرفة اسيل لفيت روحي بالفرشه واهز برجلي احس النار اكلتني اكل
المرايه كدامي وجهي ورگبتي حمر وعيوني دم

اجت اسيل كعدت يمي كالت :-لتتوقعين يصير شي بدون اراده واذن من الله

باوعتلها كالت... كلشي ديصيرلج صعب
اعترف اني حياة مجنت مقربه عليها بس لما
لما توفت حسيت شكد هالحياة تافهه الناس الزينه تتعذب ويصيبها الاذى ويموتون
واحنا... واشرت على نفسها... احنا السيئين الي نستغل العالم بخير ليش هيج؟ 

سالي كلتلها... بس انتي مو سيئه

اسيل... وياج بس حقيقتي سيئه العالم يمكن تشوفها قوه بس قوتي هاي بسوء ماكو بنيه عاقله تأذي حتى تثبت نفسها
اعترف اذيت الي اذوني بس اني مااحب الجذب ومااحب اجذب على نفسي
باني ملاك... باوعتلي وكالت... حره.. وحطت ايدها على ايدي كالت... انتي محظوظه لان صادقتي وحده مثل حياة
جنت اتمنى اكون مثلها واقتنع بالي عندي بهالدنيا بس مگدرت

حره... اني دااموت... حجيتها بألم احسه نايم بين ضلوعي

اسيل... كلشي صعب يقويك كل ضربه تصيبج اليوم باجر ماتأثر بيج

جريت نفس بصعوبه كتلها... راح اخر ذكرى الها الدفتر راح وياريت لو دفتر عادي... بجيت كتلها... كل مشاعر حياة بيه

اسيل... ماادري شاكولج اني مو شاطره بالمواساة بس صيري مثل حياة وتقبلي هالواقع
واي شي تتذكري من اخر ذكرى الها كتبيه بدفتر ثاني

بجيت حطت ايدها على كتفي كالت :- الله يعينج

اني مددت هي جرت نفس كامت سدت الضوا
ضليت ابجي الى ان نمت
لثاني يوم فزيت الظهر باوعت ماكو احد بالغرفه بس اني
كمت نزلت حتى قبل لا اغسل وجهي دااسال رتيل عن الي صار البارحه
اريد اتأكد هاي حقيقه
لو  هم رجعت اتوهم وهذا مجرد حلم انزل من الدرج واكول... يارب حلم وين نروح هسه شراح يصير بينا يارب

سمعت صوت عثمان ورتيل جاي من الاستقبال وخالاتي فتحت الباب وطبيت تفاجئت مرتضى وعثمان كاعدين

مرتضى شافني طبيت فتح عيونه ورجع باوع لعمو ابو شذر هم جان كاعد
حجيت... شلونك مصطفى

عثمان... بخير الحمد لله شلون صرتي

هزيتله راسي كتله... زينه
باوعلي مرتضى راد يحجي وسكت ونزل راسه
كعدت يم رتيل مسحت ع راسي كالت... لتخافين كلشي حيكون تمام

حره... رتيل اني مو فاهمه شي شلون احترك بيتنا
اني اتذكر طفيتي كلشي شلون صار تماس كهرباىي مدا استوعب والله !

عثمان كال... مو شرط ممكن تكون اسلاك قديمه وسببت التماس ولان مااكو احد موجود حتى يطفيه كبر الحريق

حره... خاف واحد حارك البيت ! باوعلي مرتضى وبداخلي اكول... اخاف الهددو اخوي هم الحرگو

عثمان كال... لا مبين تماس كهرباىي من الريحه

هزيت راسي كتلهم... كلتو لاخوي

ماما كالت... اي كلتله خلي يجي نشوف شنسوي بهالمصيبه

كمت كالت رتيل... وين رايحه

مجاوبتها احس اختنكت طبيت للحمام سبحت ولبست تراكي  وكعدت ابجي بالحمام
شلون باخوي وبداخلي اذم امي... شلون تكوله!
معندها احساس؟!
اكيد هسه محتار شيسوي وهو بعيد عنا
وخاف يرجع ويعتقلوه

مسحت دموعي وطلعت رحت للغرفه مشطت ورجعت نزلت
طبيت للاستقبال اسمع رتيل تكوله :-شلون هيج مصطفى ماترهم

هو كللها... هسه انتي قابل راح تاكليهن اني راح اسحب قرض وانتو سددوه كل شهر وهيج تكدرون تعيدون ترميم البيت

رتيل... ماادري

مصطفى... مقدام عنده شغل... حجاها وركز بنظره علينا... ومستحيل يكدر يرجع هسه
كعدت كال... واني اخوجن وزوج اختجن شنو المشكله

رتيل هزت راسها كالت... اشوف اخوي ونردلك خبر

مصطفى... خير ان شاء الله.. وكام 

ومرتضى طلع الموبايل من جيبه واشرلي بيه وهو يباوعلي عرفته يقصد ع موبايلي باوعت لاهلنا محد
يباوعلنا عثمان دايحجي وياهم  ويحاول يقنعهم

وماما تكوله... اي خوش فكره واحنا نقسط كل شهر هم احسن... وضلت تسأله عن السلف الحكوميه الى ان طلعو

صعدت للغرفه فتحت الموبايل لكيته دازلي مسجات هوايه منها

... دمعتج تچوي گلبي ياجفن عيني لاتزعلين وتأكدي بيتج الي احترگ الله كاتبلج بمكانه قصر

دزيتله مسج... مخنوگه

مجاوب شفت جهات الاتصال لكيت بيبي هوايه متصله اتصلت عليها جاوبتني كالت

... يمه راح حيلي... وبجت

حره... لتبجين بيبي

بهيه... عبالي صارلجن شي والله حسيت راح تصيبني جلطه

حره... لتخافين كلنا بخير الحمد لله كلنا جنا طالعين

بهيه... وشلون هسه شلون ببيتكم

حره... ماادري هو حنرممه

بهيه... الضرر هواي

حره... اي بيبي كله احترك.. بجيت... حتى دفتر حياة

بهيه... لاحول ولاقوة الا بالله... وهسه وين راح تروحون؟

حره... ماادري

بهيه... اسمعي حره تكعدين ببيتنا لبين ما ترممون البيت

حره...لا مااكدر اطب للبيت بيبي

بهيه... اني هم متشوفين ردت ابيعه... ضلت تنعى وتبجي ضلينا نحجي شويه وسدته
شفت مرتضى متصل ودازلي مسج

مرتضى... ويامن تحجين

اتصلت رفضني ورجع اتصل كتله :-جنت احجي ويا بيبي

مرتضى... تمام وشلون صرتي هسه

حره... مخنوگه

مرتضى... احمدي الله وشوفيه شلون لطف بيج

حره... شلون والبيت والدفتر وكلشي
احترگ

مرتضى... بس انتي واخوانج بخير

مسحت دموعي... مقهوره ع الدفتر

مرتضى... دفع الله ماكان اعظم
يحترگ دفتر احسن مما يتأذى واحد من اخوانج
مو صح؟

حره... اكيد

مرتضى... فشفتي الله شلون بعدكم عن هاي المصيبه

حره... الحمد لله

مرتضى... اخوج شكال

حره... عن شنو

مرتضى... عن اقتراح مصطفى؟

حره... ماادري كاعده وحدي بالغرفه

مرتضى... لا لاتكعدين وحدج تتكأبين

حره... هو اني مخنوكه

مرتضى... اجيج؟

حره... وين تجي

مرتضى... هنا يم الجسر

حره... لا متخليني رتيل اطلع
سكت كتله... متدري شصار بموضوع اخوي؟
هم ذكرو اسمه

سكت كال.. بصراحه ماادري عن هالموضوع شي

حره... مرتضى بس لا راح يروح بيها اخوي

مرتضى... لا ثقي اذا بريئ مايمسه اذى

حره... هو اكيد بريئ

طبت اسيل داتاخذ الملابس گتله... يلا بعدين نحجي

مرتضى... اوكي

حره... سديته ونزلت كعدت يمهم ماما تكول لرتيل... هو احنا ماعدنا حل ولج منين نجيب فلوس شلون نكعد بالشارع

رتيل... ماادري كلبي واجعني شلون مصطفى يدفعلنا خاف باجر عگبه يعير سالي ويكوللها اني انطيت لاهلج كلشي يصير

سالي... لا ترا مصطفى مو هيج وهو كلش يحب مقدام
متاكده حتى لو مجنا مخطوبين جان حيتصرف نفس التصرف

رتيل... ماادري

حره... مقدام شكالج

رتيل... انقهر سوده عليه عود كلتلها لتكوليله... وباوعت لامي..

ماما كالتلها... لعد شلون غير هو رجال البيت يجي ويشوف شلون نتصرف

رتيل حطت ايدها ع راسها كتلها... وشكال بموضوع عثمان

رتيل... ديفكر

حره... وشلون نبقى هنا

خالتي كالت... اي ابقو لعد شكو بيها البيت بيتكم اطلع وتبقون هنا

رتيل... متقصرين حبيبه

مروه كاعده بالكاع تاكل كالت... اني هم اريد ابقى هنا يمكم..

اسيل كرصتها كلتلها... ضلي ضلي غير ونستنا بالبيت انتي

سالي... شلون بالمدرسه

حىه... بيبي بهيه خابرتني

رتيل... اني هم

حىه... اي و كلتلي ضلو ببيتنا

اميره... اي هم خوش

باوعتلها رتيل كلتلها... لا مو خوش ورجعت باوعتلي وسكتت...

ضلينا هيج للعصر كاعدين بالهول اتصل موبايل رتيل كالت... هذا مقدام

جاوبته... ها حبيب
سكتت كلتله... لا البنات زينين الحمد لله
سكتت كالت... اي هم خابرتني وكتلها لا

سكتت شويه كلتله... هاهيه اذا هيج تشوف يلا ماشي
سكتت شويه كلتله... الله وياك انتبه على روحك يبعد اختك
وسدت الموبايل

حره... ها شكو

رتيل... يكول مصطفى صديقي وثقه خليه يرمم البيت بغيابي واني اسددله الفلوس

حره... خير ان شاء الله
والمدرسه شلون بعيده منا

سالي كالت... مصطفى كلي لليل اردلكم خبر صديقه يودينا ويرجعنا

حره... الصداري والكتب كلها راحت

رتيل... ينطوجن غير كتب

اسيل... عندي صداري كومه

سالي... اني مصطفى يجيبلي

اسيل باوعتلها مبتسمه وباوعت لامها كلتلها... زوجوني

ضحكت خالتي كلتلها... ليش مقصرين وياج

اسيل... لا بس هم زوجوني

... ابتسمت كمت كالت رتيل
... وين

حره... اريد انام

رتيل... ماشي

رحت للغرفه حاولت انام مكدرت دااتصل على مرتضى اجت اسيل فتحت كنتورها كالت

... تعالي خلي اشوفج الصداري

حره... مع الاسف صدريتي تجنن

اسيل... تعالي عندي كومه 
طلعت اربع صداري كالت... اختاري سمنت وصارن ضيگات وانتي صايره اضعف مني

كعدت اقيس بس وحده حلوه عليه نيليه طلعتلي قميص ابيض ورتبت كلشي للمدرسه
لاحظت عمو خطيه ميكعد بالبيت يريدنا ناخذ راحتنا تذكرت اخويه مقدام جان هيج من تجينا المرحومه

لليل اجه مصطفى سالي كلتله... تفضل

ماطب كللها... مستعجل
باوع لرتيل گال... باجر ابدا باجراءات سحب القرض بس احتاج منج توقيع

رتيل... ليش

مصطفى... علمود الاجراءات واني گلت لمقدام هم

رتيل... ماشي

بيده علاكه كال لسالي... هاي ملابس للمدرسه

سالي... اوكي خلي اشوفهم

مصطفى... باجر يمر عليكم صديقي ياخذجن ويرجعجن الموبايل وياجن تاخذنه اي شي يصير تتصلن عليه ماشي

سالي... ماشي

ترخص وطلع طبت سالي تقيس الملابس
حسيت رتيل ضايجه كتلها... ليش ضايجه

رتيل... والله مقبوض كلبي

حره... لتفاولين ان شاء الله كلشي يكون تمام

رتيل... مشتاقه لمقدام هسه وحده سوده عليه... حجتها بخنگه وقهر

حره... الله ميعوفه ولا يعوفنا

رتيل...امين يارب
وطبينا للهول كالتلي... روحي نامي باجر وراج دوام لازم تكعدين من الصبح المدرسه بعيده منا

حره... ماشي
طبيت للغرفه طلعت سالي كبالي لابسه صايه ضحكت كتلها... لايكتلج ماحجت شي جانت حيل معصبه لزمت موبايلها كتلها.. حتتعاركين مو؟

مجاوبت كتلها... عليج العباس فتحي سبيكر ضايجه

اتصلت جاوبها مصطفى يمه هوسه كلتله
... لو جايب عبايه خطيه ليش هيج صايه

اسمعه كللها... والله ياريت من باجر اجيبلج

سالي... شلون دبرتها صايه واني ممحجبه

مصطفى... بسيطه لبسي حجاب

سالي... تحلم

مصطفى... تحاجيني وكاني عدوج

سالي... اني كتلك صدريه هاي شنو جايبها؟

مصطفى... الموديلات كلها تبرز الجسم

سالي... بس باجر اروح بهالصايه لان مضطره بس والله ماابقى عليها

مصطفى... خير ان شاء الله

سمعت صوت مرتضى كله... يلا عيني مو وكت حبجيات

ضحك مصطفى كال... مضغوط

مرتضى... لو ما فشله من مرتك جان عرفت شاكولك

سالي كلتله... مرتضى هيج كون اريدك ترزله وتبرد كلبي

مرتضى... ولو سهله هاي

سمعت واحد حجه صوته بعيد اسمع مرتضى كله... مابقى شي

مصطفى كللها... يلا بعدين نحجي
وترخص وراح

رحت نمت لثاني يوم كعدنا من الصبح بدلت ولبست ملابس اسيل وماخذت جنطه لان معندي لاجنطه ولاكتب
نزلت رتيل كاعده وخالتي تسوي ريوك  كعدنا تريكنا ورتيل توصي بينا كالت

رتيل... المديره حاجيتها راح تنطيجن كتب

هزيت راسي كملت كمت اغسل خالتي كالت... هاي الصدريه مطلعتج باربي

حره... صدك

كالت... والله

ماما كالت... هي توته تخبل بس غير الظروف عكسها

ابتسمت رتبتلي شعري ودك الهورن كالت سالي... يلا هذا السايق

طلعت فتحت الباب تفاجئت هذا مصطفى صعدت سالي لكدام واني ورا كالت

... هايه انت اجيت

مبين عليه التعب كال... اي ماعندي شغل اليوم

سالي... حلو

باوعلها كاللها ... لو لابسه حجاب تطلعين توب

سالي... لا عيني داصير مثل الخلجيات

مصطفى... الخليجيات يلبسن حجاب ترا

مجاوبته بعدين كلتله... مااعتقد يخلوني ادخل المدرسه بهاللبس

مصطفى... يخلوج يخلوج ماعليج

قريب مدا نوصل كالت... الله متعزمني

مصطفى... بعيني خلصو من الدوام ونروح بمطعم

سالي... ممحضرات واجبات خلي نطلع دام معندك شغل

حره... والمدرسه؟

سالي... ع باجر نداوم

حره... لا هوايه غبت اني

سكتت ضلت تتافاف ومبيها تداوم مصطفى كال... اوصل اختج ونطلع اني وياج شتكولين

سالي... اي تمام

.. فهمت سالي متريد تداوم بالصايه لان معاجبتها بداخلي كلت شلون نسيت الملابس رغم حضرتهن هن والدفاتر بس مجبتهن ونسيتهن صدك ضجت وبعدها كلت يلا الحمد لله  نزلت ودخلت للمدرسه بوجهي للمديره انطيتها الموبايل وانطتني كتب نصهن من العام ومشككات بس كلت امشي حالي بيهن

مشى اليوم وخلص الدوام وطلعنا اخذت الموبايل وشايله الكتب بايديه طلعت اباوع ع الجهتين وين سيارة مصطفى؟؟  فتحت موبايلي دااتصل على مصطفى
اتصل مرتضى جاوبت كال

... تعاي اني بالسياره السوده الي على ايدج اليسرى

باوعت كتله...جايه
مشيت باتجاه السياره باوعتلها مضلله فتح الجامه  لابس شفقه ضامه نص وجهه رفع وجهه ابتسمت دااكعد ورا فتحلي الباب الكدام طبيت كتله.. هاي شنو سيارة منو؟
وخليت كتبي ورا

ابتسم... سيارتي
عدل شفقته خلاها بالعكس  وحرك

حره... صدك والله؟

ضحك كال... اتشاقه سيارة صديقي

حره... ع اساس اخوك دايجي

مرتضى... دز صديقه الي هو صديقي وهاي سيارته

حره... ويدري بيك انت الي داتسوق

مرتضى... طبعا لا

ضحكت... لتسوي حادث

مرتضى... دامج يمي فـ لاتخافين

حره... مخايفه
ابتسم مشى بغير طريق كتله... وين رايح

مرتضى... هسه تعرفين

اباوع للطريق مشايفته كتله... وين ماخذني مرتضى!

مرتضى... لطريق كلبي

حره... احجي صدگ كال هسه تعرفين وگف يم بيت صغير كال... تعالي وياي

حره... يا وين

مرتضى... شنو ماتثقين بيا؟

حره... طبعا اثق

مرتضى... لعد يلا.. ونزل من السياره نزل شفقته ع وجهه نزلت وراه طلع مفتاح من جيبه

حره... ليش هيج تسوي

مرتضى... لان شمس وعيوني تتحسس.. فتح الباب كال... فوتي

حره... مرتضى رتيل اكيد متقبل

مرتضى... بس هالمره

طبيت سد الباب
البيت حيل صغير حتى ممر مابيه طبيت للهول مؤثث بيه تخم بس بسيط بس قنفتين نزع شفقته شمرها ع التخم كعدت كتله... ليش جبتني لهنا

مرتضى... بالاول كومي شوفي البيت

طبيت للمطبخ فارغ وصغير كلشي مابيه باوعت اكو غرفه هم فارغه واكبر من المطبخ كتله... مكتلي ليش جبتني

مرتضى... دزيتلج مسج ذاك اليوم... ابتسمت نزلت راسي كال... قريتيه واضح

هزيت راسي اي كال... تبادليني نفس الشعور؟

كلبي كام ينبض بسرعه مكدرت اباوعله رفع راسي كال... باوعيلي رفعت عيوني كال... اريد جواب منج هسه

حره... شنو

مرتضى... تحبيني مثل مااحبج؟
بلعت ريكي كال... احجي

جان واكف قريب كلش مني جريت نفس كتله... وترتني شبيك

ابتسم... شنو ماكلج؟ هو سؤال بس كولي اي او لا

ضليت اطكطك باصابيعي وافكر شاكوله كتله... ماادري الصراحه

مرتضى... شنو ماتدرين

حره... ماادري شاحس اتجاهك صداقه لو حب ماادري متشوشه

هز راسه... فكري براحتج مااحب اضغط عليج بس حتى احطج بالصوره
جرني من ايدي ومشى للبيت كال... بمجرد ماتكولين اي راح نتزوج

حسيت فراشات بكلبي طارت مكدرت اخفي ابتسامتي رفع راسي كال...

مرتضى... واني مو موظف مثل اخوي وانتي
تدرين

... هزيت راسي باي

مرتضى... هذا بيتي مثل ماتشوفيه صغير وع كد حالي صارلي سنين اجمع يلا كدرت اشتريه هم يادوب الحك ع راتب الرعايه واخوي راح يتزوج اكيد مايحير بيا

هزيت راسي

مرتضى... ف اذا تشوفيه مايليق بيج الج حق ترفضين

ابتسمت... شهالحجي مرتضى

مرتضى... كل وحده تتزوج تتمنى واحد غني وعنده قصور وطبعا...

قبل ليكمل كتله... ع فكره الزواج هو مشاركه صح الفلوس مطلوبه بس الحب والتفاهم بالنسبه الي اهم..ابتسمت... وانت تفهمني

ضحك تقرب عليه... يعني تحبيني

هزيت راسي اي حسيت جفصت  كتله... لا اقصد اي

ضحك... هي شنو حزوره

حره... مو كتلك مشوشه

مرتضى... واضح

تقرب خطوتين عليه... ترا والله داتوترني

مرتضى... يعني مقتنعه بهالبيت؟

حره... حبيته يذكرني ببيت حياة... ابتسم ضل يباوع لتفاصيل وجهي كتله... شبيك

مرتضى... ملامحج

حره... شبيها

جر نفس... حلوه يمكن بحلاة روحج

ابتسمت نزلت راسي... شكرا

تقرب عليه يمكن بيني وبينه بس شبر رفعت راسي عليه
رفع ايده يتلمس خدودي ورموشي

مرتضى... مكانج بعيد عني ليش بكل وقت اشوفج... ابتسمت... صار سبع اشهر شگد حاولت اشيلج من راسي ماگدرت
بالليله الشفتج بيها گلبي ضل يرفرف عليج احساس الحب كِلش مختلف وياج

ابتسمت... ليله؟

ابتسم ونزل راسه... اي

حره... بس احنا التقينا الصبح؟

مرتضى... انتِ كلشي ماتدرين

حره... ماادري بشنو؟

جر نفس قوي قرب راسه من اذاني گال... اتذكر العوامه

ضحكت... قصدك بهاليوم ليلتها
غمض عيونه وابتسم كتله... مو دقيق بالمواعيد انت

مرتضى... شلون

حره... من شفتني مصار 7 اشهر

مرتضى... لعد

حره... اقل

مرتضى... لا اجيت قبل 7اشهر وشفتج

حره... شوكت شو مااتذكر

مرتضى... انتي ماشفتيني

حره... اي والله مااتذكر شعندك اجيت

همس باذاني... علمود البيت

حره... يا ولا شفتك

هز راسه كال... مو كتلج... وباسني من راسي

حره... لا ميـ... قبل لااكمل باس عيوني

مرتضى... كولي اي وهالعيون ماراح تلمع غير من الفرح
باسني بحنجي دفعته

كتله... ميصير.. ودرت وجهي ابتسم كتله واني اعدل بشعري واباوع بالكاع  ... اتاخرنا مرتضى

مرتضى... يلا اوصلج

هزيت راسي كال... حره صدريتج

حره... شبيها

كال وهو يباوع لخصري... شبيها بعد

دفعته كتله... لتباوعلي هيج

مرتضى... لاتلبسين ضيك حتى مااباوع

حره... غض بصرك 

مرتضى... من هاي واشر على عينه بس انتي هم لتلبسين هيج خوما تصبين زين ع النار وماتريدين النار تزيد؟

سكتت كتله... مو ذيج صدريتي نسيتها بلبيت رغم حضرتها... جريت نفس كتله... احتركت

رفع راسه وايديه بمعنى الدعاء وكال... الشكر لله

حره... يااا

مرتضى... والله صدك كلشي بيه خير

حره... والله انت حقير ترا احبها

ضحك كال... واني هم حبيتها

حره... لعد ليش فرحت

مرتضى... احبها كدام عيني مو لغيرها

حره.. مفهمت

مرتضى... احب غبائج

خزرته كتله واني ااشر ع نفسي... انيي غبيه؟؟

مرتضى... ماتشوفيني ماخذ راحتي بالحجي وياج

حره... ياا

ضحك كتله... ترا انت معقد اني شكو وهم مدري شلون تحجي

مرتضى... شلون احجي

سكتت كتله... شوف هو اني مو غبيه بس يعني هيج يحتاج وقت حتى استوعب

ضحك ودايجرني من خصري ضربت ايده وابتعدت كتله... يا شبيك وخر

ضحك كال... والله كوا لازم روحي

حره... يا ترا تصرفاتك عيب

مرتضى... ادري يلا نروح لان هذا واشر على راسه كِلش جاي يتعبني

حره... ليش

مرتضى... من وراج اخذ الشفقه ونزلها على وجهها كال... يلا

دانطلع كال... قبل لنطلع

حره... شنو

جر نفس كال... ادري بيج هواي تأذيتي ومااتمنى اكون جزء من هاي الاذيه

حره... وانت ممأذيني ليش هيج تحجي

مرتضى... كل المشاعر الي بداخلي ماجذبت عليج بيها ولو اهلگد... واشر باصبعه.. هزيت راسي كال... عيونج هاي مااريدها تبجي بسببي

حره... داتخوفني ليش هيج تحجي

سكت كال... ولا شي بس اريدج تعرفين اني احبج

تحمست ردت اكوله اني هم بس سكتت ماحبيته يكول هاي خفيفه رغم ادري بي هو ميفكر بيا بسوء كتله... شكرا

مرتضى... الاحبج جوابها مو شكرا بس يلا هم نعمه

ضحكت فتحلي الباب طلعنا قفل باب البيت اني صعدت للسياره هو هم اجه صعد
السياره كال... شنو رايج نروح لمطعم

حره... لا يمعود تأخرت هسه رتيل تقلق... هز راسه وشغل السياره كتله..  اذا درت اجيت وياك للبيت تضوج مني

مرتضى... اذا عصبت تكتلج؟

حره... لا يا هي رتيل وين اكو منها هي صح تلزم النعال بس مجرد تهدد

مرتضى... لاتكوليلها

حره... اكيد مااكوللها

مرتضى... سؤال

حره... جواب

مرتضى... من تطلعين من البيت ومثلا لابسه هالصدريه او ذيج الصدريه اخوج يشوفج

حره... طبعا هو اصلا اشترالياها

مرتضى... ها

حره.. ليش

مرتضى... هيج ولوف

طلع موبايله واتصل على واحد مجاوب انتبهت جديد ايفون اسود ابتسمت كتله... شنو مبدل موبايلك

ابتسم هز راسه باي كتله... يشبه موبايل المرحومه سمرا بس ذاك اصغر

مرتضى... الله يرحمها

اتصل موبايله عيني ع الاسم شفته مسميه الكسار  جاوب كله... وينك

سكت شويه وگله... ها وينك

ذاك مدري شحه كله... خوش

سكت شويه كله... لتلح مو وكتها
سده باوعلي گال

... شنو بيتكم راح ترمموه لو شلون

حره... اي حانرممه

... خوب اشترو جديد

حره... ومنيلنا فلوس

مرتضى... بيعو هذا البيت وفلوس القرض واشترو بيت ثاني بغير منطقه 
احسن الكم

حره... والله ماادري

مرتضى.. اوكي

صف السياره كال... اكعدي ليورا راح يجي صديقي يوصلنا

نزلت كتله... ماشي رحت كعدت ورا

حرك وباوعلي من الجامه كال... مصطفى مايدري اني سقت باوعلي وابتسم... مو تكولين

حره... ماشي

وكف يم شخص باوعت نفسه كسار صعد بمكان مرتضى وهو الكام يسوق ومرتضى يدليه بالطريق اتصل موبايل كسار جاوب حجو شويه بموضوع ملفات وارقام وسجناء وكلشي مفهمت سمعته كال

... السالفه مو يمي يمي الـ***** رْشاش

سكت شويه وكال...  اوكي وسده 

وصلني لبيت خالتي نزلت كتلهم... تفضلو تغدو
مقبلو ومشت السياره اول ماطبيت رتيل بالباب كالت

رتيل... تاخرتي قلقتيني

حره... اي ازدحام بسبب المواكب بدو ينصبوها

رتيل... خفت انوب مصطفى طلعله شغل كال دزيت صديقي

حره... اي صح اجه اخذني

رتيل... تعاي تغدي

صبت غدا وكعدنا كلتلها..  تغدو البنات

رتيل... اي بقينا اني وياج

حره... شصار ماصار

رتيل... اجه عثمان مستعجل علمود القرض خبصني

حره... ليش

رتيل... اخذ توقيعي ع الاجراءات مدري شلون

حره... غير تقرين شمكتوب

رتيل... والله ولا لحكت يكول مستعجل وبالسياره صديقي

حره... ها

رتيل... اي باجر ينطيني الفلوس

حره... شكد

رتيل... ٣٠ مليون

حره... عزا هواي

رتيل...اي متشوفين كلبي مقبوض

حره... هو شكد يكلف البيت

رتيل... ماادري والله هو كال الفلوس عندج تبقى

حره... ليش مانشتري بيت غيره مو احسن

رتيل... ومنو ينطينا بيت ب ٣٠

حره... نبيع هذا البيت ونجمع وناخذ بيت بغير منطقه

اجت سالي گالت ... اتفق وبشده

سكتت رتيل كتلها... احسن النا والله

رتيل... ماادري كلش متوتره

سالي كالت... اشوف عثمان يدور النا؟ ترا الترميم هوايه يحتاج وقت خو ما نبقى هنا

رتيل كالت... هم صح جيبيلي موبايلي اشوف مقدام

حره... كملت غسلت ورحت بدلت ورجعت نزلت رتيل كالت

رتيل...مقدام كلي عثمان هم كلي هيج واني تدرين بيا هالمنطقه مااطيقها فدافكر بالموضوع
سألت صديقي ديبيع بيته نشتريه منه وهم بغير منطقه لليل يردلنا خبر

حره... يارب خير

لليل خابر مقدام كال... صديقي قبل كتله انطيك مقدمه ٣٠ مليون ومن ينباع البيت انطيك الباقي كال. هاهيه

رتيل... بعد الاحسن

مقدام ...رتيل  اريد اجي اختنكت

رتيل مقبلت ضلح يلح كلتله... والله اذا اجيت وصارلك شي اشمر روحي من السطح
اني مااتحمل مصايب بعد

حره... ضلو يحجون صاحتني اسيل كالت... باجر تروحين للمدرسه

حره... اي

اسيل... تعاي اسويلج حواجبج

حره... لا ولج ميصير صفر

اسيل... يا شدخله بالحفافه

حره... لا خاف مكروه

اسيل... هو اصلا بالملقط بس انظفهن حواجبج يخبلن دتعاي خلي اسويهن

وصدك كعدت نظفتلياهن كمت باوعت بالمرايه كلت... هاي الحواجب شكد يغيرن بالشخص حتى عيوني بينت اوسع

ضلينا نضحك ونسولف وحيل ارتاحيت اليوم لثاني يوم  جان عادي وداومت ورجعت ووصلنا عثمان وبالرجعه صديقه جابنه

ومرتضى بعد لا شفته ولا سمعت عنه خبر
مرت ايام واشترينا البيت ومرتضى ماكو
گمت اختنك من مااسمع عنه خبر وحتى سالي لاحظتها ضايجه ومن سألتها كالت... عثمان ميحاجيها غير خمس دقايق باليوم

اسبوع مر وعثمان ميجينا يدز صديقه وشكد تعاركو هو وسالي وكل يوم شكل
ساعه اخوي ساعه شغل  وكثير اعذار

انتقلنا لبيتنا الجديد وغسلنا وجلفنا جلف ومجان بيه اثاث بس دبرناها فراش واغراض المدرسه هم اهم شي بالوقت الحالي
لثاني يوم العصر اجتنا رغد وكالعاده بدت تنقل اخبار المنطقه والي خوفني هو كلامها كالت

رغد... صار اسبوع الاعتقالات ماتوقفت مو بس بحينا بكل الـ***** وحتى احداث ماخذين

حره... شنو يعني

رغد... يعني صغار تحت سن الـ 18

بلعت ريكي كلتلها... ليش؟ 

رغد... ماادري وواحد يجر الثاني ويعترف عليه والثاني يعتقلوه وهكذا

خفت هوايه بيومها وحسيت اكو مصيبه جايه
الليل كله اتصل على مرتضى وهو ماكو حيل انقهرت وكعدت ابجي حسيته نساني وحسيت رخصت من روحي من رحت وياه للبيت

بدت الافكار السوده ببالي وكلت لازم افهم ليش ميجاوب ولا يجي  لثاني يوم اتصل على مرتضى وهو ماكو رحت للمدرسه رجعت نزلت بمنطقتنا القديمه كلت لازم اعرف شبيه ليش هيج ابتعد معقوله بعد ميريدني معقوله نساني؟
شنو ديلعب عليه هذا؟

وصلت لبيتهم دادك الباب وقت الظهر ماكو احد يفتح طلع جيرانه ضاوي الاخرس اشرلي تعاي
تفاجأت احنا مابينا ميانه ليش صاحني

تقربت منه هو يباوع للفرع ماكو احد ضل ياشر ع بيت عثمان ومرتضى ويحجي
مفهمت شي عليه
كتله... ضاوي مداافهم عليك عفيه شلون هسه

ضليت افكر حسيت بضوجه لان ميكدر يحجيلي اشرلي  بايده بمعني... انتظري

جر نفس اشر على بيت مصطفى كتله... اي شبيهم مصطفى ومرتضى؟ 

سوا مثل الحدبه بظهره كتله... الحدبه

اشر.. لا

كتله... قصدك مرتضى...؟

هز راسه... اي

كتله... شبيه مرتضى!

كال... لا.. بايده

كتله... مرتضى مو...

اشر اي ونزل ظهره مثل الاحدب

كتله... مرتضى مو احدب!!

هو اشر بايده وراسه.... اي اي... يتبع...

______________________

اسفه ع التأخير فراشاتي

لتنسون التصويت والمتابعه

وارائكم للقصه

بنات انضمو لگروبي ع الفيس بوك

گروب فراشات العراق تلگوه بوصف الواتباد

حسابي ع الفيس بوك
Nawras_qasim

حسابي ع الانستا
nawras_qasim_22

بنات هوايه طالبين من حره تنزللهم اغنية حياة

نزلت رابطها ع استوري الانستا
ردت انزلها هنا بس النت كلش ضعيف ومحملت
حاانزلها ع استوري الانستا الكم ان شاءالله

قراءه ممتعه فراشات🦋