الحلــــــــقه الخامــــــــــــــــسه
رواية... هل كانَ حُلماً...؟
{ العِراق-المُصغَر ... التوباز }
بقلمي ... لؤلؤة_البِحار ...
___________________•
اول ماطبت للهول شهكت كلتله بصياح
رتيل... انت شعندك هنا
ماما كلتلها.. ماما تعالي نحجي بهدوء
رتيل... يا هدوء انتي شلون تفوتيه لهنا
هو كام كللها... جنت منتظرج تجين حتى اكولج انو ماله داعي تتعاملين وياي بهالطريقه بعد
لان اختج... وباوعلي كال.. صارت مرتي
تقدمت علينا كلتله بصدمه... مرتك شنو؟
حط ايده ع رگبتي ولزم كتفي گال :-عقدت عليها.. باوعتله بادلني النظره كال... على سنة الله ورسوله
اجت ررتيل جرتني وراها ودفعته كلتله... عقدت شنو؟
اموت وماانطيك اختي
والله احرگگ انت والي وياك اذا تقربت منا خطوه
اطلع برا يلااااا... ودفعته
اجت ماما لزمتها كلتلها... بس افتهمي يايمه
نترت بيها رتيل وحجت بتهديد كالتلها :-انتي بالذات لاتحجين شكد جنت اشوفج مهمله ومتستحقين تكونين ام
اليوم اكدتيلي انج ماعندج
لا احساس ولا ضمير
وحرامات احنا بناتج
اميره... يا وهو اني شسويت
داتحجي رتيل قاطعها رشاش :-اهدي عيني ترا ماانطتنياها بالحرام
اجه سيد وعقدلنا واختج مرتي
رتيل... من كل عقلك مقتنع بهالزواج
رشاش... كِلش
رتيل... هذا الزواج باطل اختي مجبوره
باوعلي وكللها... لا عيني اختج تحبني
اجت رتيل كلتلي... ولج شلون تسوين هيج بدون علمي... وضربت خدودها بجيت كالت... واني دااصارع علمودجن وحايره شلون اطلك اختج
رشاش... سالي تحب رجلها ومتفاهمين بينهم ما من حقج تطلكيها
واختج
قبل ليكمل كالتله رتيل... انت شلون تحجي بهالصلافه!
عثمان جذب علينا واستغلنا بمساعدتك طبعا
وجاي تكولي متفاهمين!
رشاش... محد استغلكم بالعكس لولانا جان انتو عشتو اسوء عيشه
رتيل... ليش هسه ع اساس معيشينا بالرغد
الي يسمعك يكول اختي لما تتزوجك حتدخل القفص الذهبي
رشاش... البيت الذهبي مااسجن طيوري انه
رتيل... كله بس حجي لو صدك انت جاي ع الخير ماجان اجيت بالتهديد جان مشيت ع الاصول...
قبل لتكمل كللها... اجيت ع الاصول وطلبتها
رتيل... بصفتك مرتضى مو ابو السباع
رشاش... الاثنين نفس الشخص
كلتله بقهر... لا مو نفس الشخص انت استغليتنا وجذبت واحتاليت
رشاش... مالحكت اكعد وياكم حتى احتال حره بس الجانت تحجي وياي وانه نفسي ماتغير مني بس الاسم
كلتله بصراخ... لا استغليتونا واخوي بسببكم... قاطعها
رشاش... اخوج بفضلنا طلع من كثير مصايب
رتيل... لعد ليش هسه اعتقلوا
رشاش... وصيت عليه كسار راح يحقق وياه
رتيل... بعد ما ورطتو جاي داتصير خير براسي
رشاش... صدكيني مافارغ لدرجة اتهم اي احد او اورطه بشي
اخوج متعامل مع ارهابي ولو ماحبيت حره جان انسحل حالو حال البقيه
حطت ايدها ع كلبها وحجت بحرگة كلب... فوك ماذليتنا جاي تصير خير براسنا انت...
قبل لاتكمل سكتت حطت ايدها ع راسها اني ركضت لزمتها وكعت صرخت
كمت ابجي هو كال
رشاش... اهدي لا تبجين
وشالها ركض بيها للسياره ركضت وراه اني وماما الشايله مروه
صعدنا واخذنا للمستشفى الطريق كله ابجي وصلنا لمستشفى خاص دخلوها قاسولها الضغط وسوولها تحاليل
كالو ارتفاع بالضغط حطولها مغذي حجزلنا غرفه بالمستشفى وطلع يجيب علاج
كعدت يمها ابجي كعدت ماما تهدي بيا كالت
اميره... صار عليها ضغط بس تهدا تتفهم الوضع وتقبل
سكتت كعدت رتيل كتلها... ها شلون صرتي
رتيل... راسي حينفجر
حره... اي ضغطج مرتفع
جرت نفس اندك الباب كلتله ماما :-تفضل
فتحها رشاش جايب علاج واكل ومي حطه كدامها ماما كلتله :- ليش زحمت روحك
رشاش... واجبي
رتيل عدلت كعدتها باوعلها كللها :-معافيه بويه ان شاء الله ماتشوفين شر
رتيل... انت شعندك هنا امشي اطلع برا
رشاش... لا مايصير اعوفكم نسيبكم انه
رتيل... لك انت منين جايب هالصلافه
رشاش... ماتذكر من زمان عندي
رتيل نزلت راسها كالت... الله يصبرني
رحت يمه هو يغني بصوت ناصي :-بحبك ياحمار
خزرته كتله... روح اختي داتضوج منك
كال بصوت عالي... ماشي اروح لخاطرج مرتيييي... وركز ع الكلمه الاخيره..
مااحس غير رتيل شالت المغذي وشمرته عليه طاح بكتفه كال... رميه غير موفقه
يلا ع الجايات
دتحجي كتلها... اهدي.. باوعتله... وانت امشي
وجريته من ايده فتحت باب الغرفه طلعنا برا
انتبهت الممر بيه ممرضين و ناس
هو كح باوعتله
باوعلي رجع باوع لايدي لازمته من ايده كال... شني هالاغراءات ترانا بمستشفى
دفعته وضربته بخفه كتله... ترا انت مستفز
رشاش... وكلام اختج ماتشوفيه مستفز
حره... محجت غير الصدگ
رشاش... كلنا صح بوجهة نظرنا
سكتت فتحت الباب مراوي ابتسملها ورجع باوعلي كال... الدكتور كال اختج مابيها شي ومايحتاج تبات تكدر ترجع للبيت يلا اوصلكم
حره... ناخذ تكسي رتيل اكيد متقبل
شال مراوي وباسها من راسها وباوعلي كال... انه و مراوي ننتظركم بالطابق الاول.. ومشى
جريت نفس وطبيت للغرفه رتيل شافتني كالت... من باجر اطلكج منه
حره... طيبي ويصير خير.. باوعت لماما... الدكتور كال نكدر نطلع
كامت ماما شالت الاغراض واني انطيت مي لرتيل وعدلتلها الشال
ماما كالت
اميره... وين مروه
حره... اخذها رشاش بالطابق الاول
خزرتني رتيل كالت... شلون تخليها يمه
.. وكامت
لزمتها نزلنا بالمصعد شفناه هو ومروه منتظرينا يم الباب ومروه منطلقه تسولف وتضحك
رحنالهم
رتيل جرت مروه وكالت لماما... يوم شوفي الحساب
رشاش... مايحتاج دفعت
رتيل... ترجعهن منريد منك شي
رشاش... ترا كِلش زحمه نتعارك كدام خلق الله يعني
هي خزرته وطلعت فتح باب سيارته ماما داتروح كلتلها.. ووين
رشاش... وين يعني ياعيني اصعدي اوصلكم
رتيل... لا عيني ناخذ تكسي
رشاش... تسلم عينج بس ياعيني مايصير تروحون بتكسي وانه موجود لان... كح وكال... اني نسيبج
رتيل خزرته
ماما كالتلها... امشي رتيل امشي
دفعتها كوا صعدتها بالسياره صعدنا ليورا اني ورتيل ومروه
داتصعد ماما فتحلها الباب الكدام
كللها
رشاش... امي انتي تعالي لكدام
ماما كيفت صعدت ليكدام فتح اغنيه
... أحبك طوخ
أنت أول بشر كله أحساس
نص ينگرط نص ينباس
باوع من المرايه گال... هاي لمرتي
رتيل خزرته وباوعتلي بخزره كرصتني گالت... شهالاغنيه التلعب النفس
رشاش... تتدللين هسه اغيرها اهديلج اغنيه؟
باوعتله صفح گللها... شتحبين اطلعلج أغنية اطك روحي بحديد؟
لو اجتك طاير الونه
رتيل... بس اسكت كلش كافي
ضحك وكمل سياقه وصلنا للبيت كال :-اي شي تحتاجو بس اتصلو
فتح الباب رتيل طلعت داانزل وراها دار وجهه عليه وكال... خوش مرتي؟
اني سكتت رتيل جرتني من ايدي طلعتني من السياره وطبكتها بقوه سمعته گال
رشاش... تكسرت نعلاله
رجعت فتحت الباب وطبكتها قوي وجرتني ومشت
طلع راسه من الجامه كللها
رشاش... اتقي الله سيارتي ماالها ذنب
باوعتله كلتله... روح يالناصح بسم الدين امشي
هو حرك وكال بصوت عالي... حسبي الله
طبينا للبيت وكوا حاصره ضحكتي عليهم
واحد يجاكر الثاني
طبت ماما ومروه سدوا الباب باوعتلي رتيل كالت
رتيل... انتي ليش تتصرفين بدون علمي... ونزعت النعال
ركضت اني هي ركضت وراي كالت... لج اني علمود منو اصارع وحضرتج بس غبت شويه رحتي عقدتي والله اكسرج بالنعال اليوم
حره... كسريني بس خناكل الدجاج بالاول
رتيل... يادجاج
مروه كلتلها... رجل اختي حره جابه
رتيل خزرت مروه كلتلها... رجلها شنو منين جايبه هالحجي ولج
مروه... من رجل اختي... وطلعت فلوس من بنطلونها شمتهن وباستهن كالت... بس والله كريم
باوعتلي وكالت... رجلج
رتيل... يبووو حيجلطوني ياالله
ماما جابت الصينيه كالت... تعالن اكعدن نتفاهم
رتيل... راح تخبلوني ع شنو نتفاهم شلون تخليهم يعقدوون
كسرت خبزه كالت... اكلن
رتيل... مااكل شي هو جايبه
اميره... اكلي اذا مااكلتي تضرين نفسج
اخذت خبزه كتلها... رتيل اكلي اني كاتلني الجوع
اخذتها مني كالت... انجبي لتحجين وياي
اميره... رتيل فكري بمنطقيه شويه هالرجال عنده نفوذ وغني
يكدر يسوي كلشي
رتيل... ومحتال ومكار هذني الاهم لتنسيهن
اميره... المهم نستفاد منه
رتيل... تكومين تزوجيه من حره
يوم احنا مانعرف عنه شي لا اصل لا فصل
اميره... احنا اشترطنا عليه تكمل دراسه يلا يتزوجون
رتيل... وانتي صدكتيه؟
يومين اذا مااجه ايدي كصيها منا ... واشرت ع بداية ايدها
اميره... اهم شي يطلع مقدام
رتيل... مااقبل انطيه توته هذا ينخاف منه
اميره... فكري بعقل هسه احنا كدامنا خيارين اذا صرنا ضده اخوج ينسجن وانتي تنسجنين
رتيل... مااعتقد مر شهر كامل ومارفع دعوه مثل ماهدد
اميره... يمكن داينطيج مجال
رتيل... مااعتقد حتى احس ان مااكو عقد جذب
باوعتلها كتلها... ليش هيج تكولين
رتيل... لان اصلا ماشفت عقد وماادري اذا اكو هيج شي او لا
وماعندي فلوس حتى استفسر من محامي
صفنت كتلها... بس هو دزلي صوره ذاك اليوم
رتيل... صورتيش؟
حره... مال عقد بينج وبينه واكو بيه شهود
رتيل... شوكت شو بلا كومي جيبي الصوره
كمت غسلت هي هم غسلت واجت وراي فتحت الواتساب كالت... هاي شوكت ومنيلج نت
حره... قبل لااشوفه دزلي رصيد حتى اكنك
رتيل... كل هذا واني ماادري؟
سكتت دورت ع الصوره لكيته حاذفها من الطرفين كتلها... يا حاذفها
رتيل... ماينطي على روحه لزمه
سكتت دورت بالاستوديو ماكو كالت
رتيل... زين شفتي بيها ختم محكمه شي
حره... ماادري اني ركزت ع التوقيعات بس ماتذكر شفت ختم
سكتت كالت... اوف ياراسي
اجت ماما كالت... اسمعن مني زين باجر اجيبه لهنا ونحجي ونتفاهم
رتيل... ماانطي توته
اميره... اي دخلي اكمل
... سكتت كلتلها... يجي نحجي وياه نكوله توته تكمل سادس يلا
واصلا اني كتله بهالموضوع
رتيل... هو يجذب مو..
قبل لتكمل ماما كلتلها... ادري بيه يجوز باجر يجي يريدها
بس احنا الا يطلع مقدام
ومن يطلع مقدام هو يتصرف وحتى سالي نطلكها ونشوف
باوعتلي وكالت.. بعدين يجوز نيته مو اذيه وتوته تحبه هم خننطيه فرصه
رتيل... مستحيل
سكتت ماما كالت... ماكو غير حل
رتيل... زين ماشي بس شلون اذا راد يعقد عليها محكمه
اميره... اي خيعقد
رتيل... صدك تحجين!
شلون نطلكها بعد؟
اميره... تخلعه عادي... باوعتلي وسكتنا
لثاني يوم كعدتني رتيل الصبح كالت :-كومي بدلي حيجي ابو السباع حتى نتفاهم
كمت بدلت وغسلت ماما كالت... تعاي امشطلج
انطيتها المشط كالت... اسمعي من يحجي وياج سايريه وتدلعي عليه
عقجت حاجبي كتلها... ليش
اميره... حتى يسمع منج ومايعاند وهم حتى تستفادين منه
رفعت راسي كتلها... شلون استفاد
اميره... هذا ***** بالجيش يعني يعطس فلوس
حره... اي واذا؟
اميره... استفادي من فلوسه دامج ع ذمته
خزرتها... يا ماما ميصير
اميره... انجبي ميصير شنو بعدين هو باك ١٠ ملايين من اختج
هذا حقج
حره... بس لتنسين هو دفع لهالبيت ٣٠ مليون
واذا اخذ فهذا حقه ويبقى يطلبنا ٢٠
اميره... لا ذاك عثمان الدفع
حره... لا هو الدافع عثمان بس صار بالوجه
اميره... حتى لو هو غلط وياج خليه يعوضج
حره... بس مو هيج مو بهالطريقه
اميره.. شو انتي تدافعين عنه شبيج يمه ليش هالخوف ترا مراح يخلص فلوسه عليج لتخافين
حره... مو قصة ادافع بسـ...
اميره... عوفي البسبسه واسمعي مني لتصيرين غبيه... دتحجي اندكت الباب كالت... هاي اجه ابو السباع.. وكامت
كمت لبست الطوك والحفايات وطلعت شفته واكف بباب الهول بيده مروه ويحجي ويا ماما يكوللها
رشاش... ادخل الي الامان؟ وباوعلي ابتسم
اميره... اي فوت فوت يمه البيت بيتك
طب كعد مروه كاعده يمه تحضن بيه وتسولف وتتشاقه طلع فلوس انطاها باوعتلي وگالت
مروه... تعالي گعدي يم رجلج.. ورجعت باوعتله
هو ضحك ومسح على راسها ماما كالت
اميره... تعاي توته كعدي
كعدت طلعت رتيل من المطبخ بيدها الماي هو باوعلها باستغراب ونزل عيونه يفكر انطته مي كاللها
رشاش... خاف مسموم؟
رتيل... لتخاف احنا منذب سمنا ع العالم مثل غيرنا
ضحك كللها... اندك بالعظم بسمارج وشرب المي
باوعتلي وكالت... كومي جيبي الضيافه
كمت جبتها حطيتها كدامه وداكعد يم رتيل كلي
... تعاي كعدي يمي
باوعت لرتيل جرتني كعدتني يمها وابتسمت مجامله
ماما كلتله... شوف ابو السباع احنا ناس نحب السلم
كلنا نتفاهم ع كلشي من البدايه ونكسر الشر
رشاش... وانه وياكم
رتيل... باختصار عدنا شروط واسئله
ابتسم مجامله وجر نفس كللها.. اي عيني كولي
باوعتله بتركيز كلتله...اولا
رشاش... بسم الله
رتيل... شكو؟
رشاش... نززتيني
رتيل خزرته ماما ابتسمت كلتله... اول شي توته تكمل دراستها
رشاش... وانه كلت قبل ماعندي مشكله
رتيل... العرس مو هسه ورا ماتخلص دراسه
رشاش... اي بس نعقد
رتيل... مو عقدتو
رشاش... نعقد محكمه
حره... اي هو قبل لتتزوجون عود اعقدو
رشاش... لا عيني.. باوع لماما... الاتفاق ماجان هيج ام مقدام
اميره... اني كتلك تعقد بس موـ...
قبل لتكمل كللها... كتلج اعقد عليها محكمه وسيد وكلتي هاهيه
رتيل... عقدت سيد بعد شكو
رشاش... لا عيني اعقد عليها محكمه وقبل ليطلع اخوج هم
رتيل گلتله بنتر... لتتأمر
رشاش... لاتعلين صوتج... حجاها بحده
ماما كلتلهم... اهدو شبيكم اهدو
سكتو ماما كلتله... هاهيه هسه سهله العقد بس بقية الشروط
رشاش... عيوني شنو هنه
اميره... مثلا المهر شكد تسجله بالمحكمه الذهب
وين تعيش
رشاش... اي.. باوعلي وكال... شكد تردين مهرج
اميره...٢٥ بـ ٣٥
رشاش... ماشي
اميره... وبيت وحدها وببغداد
رشاش... لا مااكدر
اميره... ليش
رشاش... اهلي بالانبار شلون اعيش ببغداد؟
رتيل... لعد من صارلك ٧ اشهر ماكلت اهلي
رشاش... اي لان عندي شغل ولابد ارجعلهم
بس مال اتزوج هنا لا ماترهم
رتيل... واختي لعد شلون نشوفها
رشاش... سهله كلما اجي لبغداد اجيبها
رتيل سكتت
ماما كلتله... لعد تسجل بيت ببغداد باسمها حتى تضمن حقها
رشاش... اي حق عندها مؤخر... وباوعلي گال... الا اذا جنتو ناوين تطلكوها!
اميره... لا طبعا بس محد دايم لاحد
دار وجهه حسيته تنرفز رتيل كالت :-هسه بعدين نحجي بهالموضوع اهم شي اخوي مقدام
رشاش... يطلع هالاسبوع... باوعلي وكال... بعد مانعقد محكمه ان شاء الله
اميره... هاهيه زين والذهب والحلقات
رشاش... ماعندي مشكله شوكت ماتريد توته تجهز الذهب نجهزو
اميره... هاهيه
باوعلي كال... ترا العرس عرسج ماناويه تحجين شي؟
حره... شاحجي
سكت حسيته متنرفز كتله... اهلك
رشاش... شبيهم
حره... ما يجون
رشاش... اكيد يجون واسوي عرس كِلها تحجي بيه
واذا تسوين حفل للمهر هم اجيبهم
رتيل... لا منسوي هسه
رشاش... العرس مو الج حتى تقررين
رتيل... العرس لاختي واني اعرف هي متريد
باوعلي كلي... ليش ماتردين
حسيته ضاج حيل ارتبكت كتله. مو هذا
رتيل... بحداد ع حياة المرحومه
جر نفس كال... ماشي
اتصل موبايله جاوب كال... ها عيني سكت شويه... شني هم تعاركتو
سكت شويه كال... يول بالقران طلعتوها لروحي شني اضل وراكم جهال انتو
سكت كله... انجب انت الثاني
.. استمع شويه باوع لساعته كله... عجل انطيه خبر ينتظرني
هو قريب مني
سكت كال... هلو هلو وسد الخط
باوعلنا كال... اترخص عندي شغل
اميره... هلا بيك
وصلنا للباب ورجعنا ماما كلتلها :-ياحماره جان خليتيني اقنعه يسجل بيت باسمها
رتيل... الي يسمعج يكول صدك حنزوجهم يمه
اميره... ليش تظلميه مبين نيته مو اذيه
رتيل خزرتها كلتلها.. تحجين هيج ع فلوسه مو؟
سكتت ماما كالت... والله لو نزوجه توته نعيش ملوك
رتيل... ماازوجه توته لتحلمين.. سكتت شويه كالت... شوفو شراح نسوي.. باوعتلي كالت... بس يطلع مقدام ينتهي الخطر
هزيت راسي كالت... اوديج يم بيبي بهيه
حره... يا بس شلون
رتيل... ماكو غير حل لبين منطلكج
حره... مو خاف يسوي مشكله لاخوي
رتيل... شيكدر يسوي بعد هو طلع
حره... والعقد الي بينكم
اميره... احجي وياه واطلبي منه يلغي
حره... ماشي بس...
رتيل باوعتلي كتلها... خايفه احس دانغلط
رتيل... مابيدنا شي حره بعدين هو البدا
ماما كلتلها... واحنا شيصير بينا اذا انهزمت حره باعتبار ضحكنا عليه اكيد يأذينا
رتيل... هو هم ضحك علينا
اميره... بس خطر الدتسويه اني اكول لو تنطيه فرصه
رتيل... يافرصه ماما رجال مانعرفه لا وفوكاها يريدها تعيش بالانبار شبعدها عنا صدك تحجين يمه؟
اميره... مامرتاحه لهالسالفه
حره... اني هم خايفه زين خاف ياذيكم بشي لو..
قبل لا اكمل كالت... لتخافين كلنا نبيع ونترك هالمكان بس يطلع اخوي كلشي يكون تمام
و ابو السباع بعد ميشوف خلقتنا بس ناخذ سالي بالاول اوف يسالي كسرتي ظهري
اني حسيت بالخوف وباني داسوي شي غلط كتلها... رتيل خلي ننطيه فر...
قبل لا اكمل كالت... مستحيل حره مستحيل
حره... هو بسبب شغله هيج سوا وهم...
رتيل... ولج من كل عقلج حابه هذا
حره... مو عن حابته بس..
رتيل... لج حره هالرجال مو مرتضى استوعبي
.. سكتت كالت... هالرجال متعرفين عنه شي لا اهله لا اصله لا فصله حتى لهجته نص كلماتها ماتنفهم
مسحت دمعتي كالت... خايفه عليج منه والله
حره... هو يحبني
رتيل... مو اكثر منا احنا اهلج... شفتيه شسوا بيج وبينا؟
حتى لو جان يحبج فهو يحب نفسه اكثر لدرجة اذاج
بجيت كالت... ليش تبجين
حره... مقهوره حيل
حضنتني كالت... لتخافين احنا يمج
حره... ماادري شسوي
رتيل... اسمعي مني زواجج منه غلط ولازم ينتهي
كامت تنظف اني رحت بالغرفه قفلت الباب وضليت ابجي
واسبح
حايره شاسوي ومحتاره بمشاعري ضليت افكر اريد اوصل لحل يقنع عقلي وكلبي
كلما اشوفه مقهور ومتنرفز اضوج وياه
رغم كلشي سوا ماكرهته زعلت منه وانكسرت
بس ماكرهته ابد
ومااريد اكسر خاطره بشي من حجالي عن شغله
عذرته ببعض الامور
وحسيت ان الي سواه يدل على انه متقن لعمله ويستاهله
الي جان قاهرني استغلاله الي رغم هذا عذرته
بس مابيدي مااكدر ااذيه
حبه الي متاكده منه واني احبه
بس محتاره
اني بين نارين اخواني ميرضون بيه واني محتاره بيا طريق امشي
كمت باوعت لروحي بالمرايه حسيت وكأني شفت حياة بجيت كتلها... وينج لو انتي موجوده اكيد جان خففتي عني ونصحتيني
اه ياحياة راح تبقين غصه بكلبي طول عمري
كلما اباوع بمرايتي اشوفج
اتصل موبايلي شفت المتصل رشاش فتحت خط كال
:- شلونج
حره... الحمد لله
رشاش... شبيه صوتج
حره... داتبجين؟
سكتت كال... احجي
حره... مقهوره
رشاش... ليش
حره... منك
رشاش... بس انه مااقصد ااذيتج
حره... بس اذيتني وذليتني اني واخواتي
رشاش... حره انتي كلشي ماتدرين بجيت كال... لاتبجين دموعج تحرگ گلبي
حره... مخنوگه كلش
رشاش... اجي نطلع؟
حره.. وين نطلع
رشاش... لاي مكان
فكرت بيني وبين نفسي متقبل رتيل اكيد گتله... لا تعبانه
رشاش... ما مشكله اقنعها لرتيل
حره... لا مو علمودها بس تعبانه
رشاش... احجيلي شنو الي متعبج
حره... انتَ
رشاش... يمكن ضغطت عليج بأخر فتره بس صدكيني راح اعوضج عن كلشي
سكتت شويه كتله... خايفه
رشاش... من شنو
حره... منك
رشاش... بس انه احبج مااذيج بعد
حره... انت تحب روحك وبس
رشاش... اكيد لان اشوفج بيها
ابتسمت كتله... شلون يعني
رشاش... يعني احس روحي متعلقه بيج
حره... انت شاطر بالكلام
ضحك كال... صدگيني كل مااباوع بالمرايا ماادحك نفسي
حره... شنو مفهمت
رشاش... مااشوف نفسي اشوفج
حره... كلامك غريب مااعرفه
رشاش... شنو الماتعرفيه كولي اعلمج
حره... ذاك اليوم گتلي عِجل هذا الينوكل
طكها ضحكه بصوت عالي كتله... شبيك
رشاش... عجل مو عِجِل
حره...و شنو الفرق
رشاش... عجل بمعنى لعد
حره... وشنو ادحك
رشاش... اباوع
حره... اها
رشاش... هسه تتعلمين وتكومين تحجين احسن مني
حره... لا ابقى احجي ويايه بغدادي.. ضحك كتله.. احجيلي عن اهلك
رشاش... يرادلي كثير حجي
حره... ليش
سكت كال... دحكي
حره.. اي
رشاش... والدتي متوفيه
حره.. الله يرحمها
رشاش... والدي عايش ومتزوج اثنين
شهكت كتله... عزا
رشاش... ها شبيج
حره... ميخاف الله يتزوج اثنين
رشاش... هاي بعد گلب الرجال كوستر
حره... تعترف يعني
رشاش... اي
حره... شنو تقصد ليكون ببالك تتزوج
رشاش... هو انه الكى مثلج واتزوج
... ابتسمت كال.. اي عندي اخوان اثنين من امي واخوان اثنين من مرة ابويه
حره... وعلاقتكم شلونها
رشاش... تخبل واحد يفهم ع الثاني صح من تدخلين البيت احتجاجات ونعل تتطافر بس علاقتنا حلوه
ضحكت كتله... يعني شنو تتعاركون
رشاش... لا انه ماالحك بس اخ من تطبين بيتنا تدحكين
ضحكت كتله... اي وبعد
رشاش... اخويه الي من امي متوفي
حره... ياا الله يرحمه... جر نفس كتله
:- شلون
رشاش... جاي يـ...
قبل ليكمل سمعت انفتح باب كللهم :-هلا بالسباع فخري وعزوتي
سمعت اصوات شباب سمعته گال :-بالقران اطشرهم
اسمع ضجه مجان مفهوم شي غير كلمة الموقع شويه وسد الخط حتى بدون ميحاجيني
كمت غسلت وطلع ماما كاعده برا ويمها مروه كتلها
... رتيل وين؟
اميره... راحت تجيب شكم فلس من امهات الاقساط
كعدت يمها كالت... شوفت عينج ماعدنا ناكل
جريت نفس كتلها... الله يهونها
اميره... خطيه رتيل سوده عليه هوايه طلبت من امهات الاقساط خاف يفشلنها
باوعتلها كالت... اني صديقاتي جبت منهن ٣٠٠ وشو هم خلصن المصروف مايلحك عليه
انقهرت حيل كالت... وهاي مروه هم لازمها صدريه وحذاء خطيه البارحه شبعت بجي لان صديقتها مشتريه ملابس جديده
باوعتلها... صدك والله
اميره... والله
حره... سوده عليه
ماما التفتتلي وكالت... بس لو تصيرين شاطره شويه جان ساعدتينا ورفعتينا
حره... شلون
اميره... من خطيبج
حره... يا مو عيب اطلب فلوس
اميره... لا هو رجلج باعتبار مصروفج هذا
حره... لا ماما ميصير اطلب منه
اميره... بس اختج من تنذل وتطلب من امهات الاقساط متكولين ميصير
سكتت كالت... هو اذا يريد ينطيج فبرضاته وبالحلال واصلا هو رجلج ياماما مابيها شي اذا ساعدنا وبعدين الا تكوليله محتاجين كوليله مثلا حابه اشتري ذهب حلقه شي
اني سكتت كالت... اووف يالفهاويه هاي منين جايبتها
ولج ماما اذا ضلينا هيج ناكل تبن خطيه اختج مروه دايكتلها الجوع تقبليها
هزيت راسي بلا كالت... وامهات الاقساط بعد مينطن وشوفت عينج لازم ندفع للمي وللمولده وللكهرباء ومصروف هم منين ناخذ ياحبيبه
سكتت كتلها... احس عيب
اميره... لا عيب ولا شي رجلج هو اذا ماصرف عليج عليمن يصرف
... وكامت كالت... رايحه اسوي لفة خيار كتلني الجوع
ضجت حيل هو فعلا احنا جنا معتمدين بالمصروف ع مقدام وخياطة رتيل
والبيت من احترك راحت المكينه واخويه معروف حاله
جريت نفس ورحت اقرا شويه
باجر لازم اداوم رجعت رتيل وجانت كلش محتاره
لليل گليت طماطه وتعشينا طبيت للغرفه لكيت رشاش داز مسج
... من تكملين اتصلي
رمشتله اتصل عليه كتله... ذيج السا عـ...
رشاش... اي زاروني ولدي
حره... ولدك؟؟
رشاش... اي جنودي باعتبار ولدي
حره... وكف كلبي
كال بهدوء... ليش؟
حره... عبالي عندك ولد ومتزوج
سكت كال... لو صار هيج شتسوين؟
حره...غير امحيك من حياتي
سكت شويه كال... لا انه اعتبرهم ولدي
حره... الله يحفظهم
رشاش... امين اسمعي
حره... شنو
رشاش... باجر نروح للمحكمه
حره... ليش
رشاش... حتى نعقد
حره... لعد غير تكول لاختي
رشاش... كلت لامج وانطتني الاوكي
سكتت كتله... سكتت كتله والعقد الي بينك وبين رتيل
رشاش... ياعقد
حره... مال التدين
رشاش... ها اي شبيه
حره... غير تلغيه
رشاش... باجر بعد مانعقد الغيه
حره... ماشي بس عندي مدرسه باجر
رشاش... ما مشكله اخذلج اجازه
حره... ماشي
ضلينا نحجي شويه الى ان غفيت كعدت الصبح
رتيل ضايجه كتلها... يريد نعقد
رتيل... كلتلي امي البارحه كلبي مامرتاح بس مضطرين
رحت بدلت وطلعت كتلها... رتيل تجين
اشرتلي ب لا... مااطيق اشوفه ماما حتجي وياج
كملت طلعت ماما برا تخلي مكياج وكفت يمها كالت... توته اليوم حاجيه
حره... بشنو
اميره... خينطيج فلوس
حره... مو...
اميره... لتضلين تطلعين اعذار خايفه عليه لو شنو
دك هورن كالت... طلعي هسه اجي
طلعت فتحت السياره كعدت ليورا كال :-شلونج
حره... تمام
اجت ماما صعدت ضل يتشاقه ويتغزل بماما
بالطريق ماما خابرت صديقتها ضلت تسولف ومن غلقت باوعتلي وكالت
:- تروحون وحدكم؟
اني خزرتها كتلها... ليش
اميره... مو صديقتي مريضه ولازم ا..
قبل لتكمل كتلها... عوفي صديقتج اليوم يمه
كال رشاش... لا مايصير لازم تروحين روحي خاله وانه هنا يم بنتج سهله الاجراءات
كالت ماما.. اي عفيه نزلني هنا
رشاش... خلي اوصلج
مقبلت كلتله... تتاخر
تالي نزلها واجرلها تكسي وانطاه الكروه ورجع فتح الباب كلي... صعدي لكدام
صدك صعدت حرك السياره ومشى لزم ايدي باسها باوع لاصابعي تلمس الاصبع الثاني كال
:- ناقص الحلقه
سكتت وصلنا للمحكمه وعقدنا حيل ارتبكت كدام القاضي كملنا طلعنا دانطلع بباب المحكمه كتله
... اكولك لحظه
رشاش... ها شنو
حره... اختي غير تلغي العقد
ابتسم كال... ياعقد
صفنت عليه... مال الدين
رشاش... ها تعاي وياي
صعدنا بالسياره كتله... والعقد
قفل الابواب وكال ... ماادري شلون افاتحج بالموضوع
حره... شنو ياموضوع
حك كصته كال... الصراحه ماكو عقد قانوني
فتحت عيوني مصدومه كتله... شنووو لعد والصوره!
رشاش... كلاوات موحقيقيه
ضربته بكتفه وحطيت ايديه ع وجهي وبجيت كلي
...لحظه اهدي
حره... اسكت ولا حرف
رشاش... هسه ليش جاي تبجين هو المفروض تفرحين
ضربته ع صدره كتله... طول هالوقت تضحك علينا
رشاش... لان متاكد رتيل ماتقبل... مسح دمعتي كال... ما ااذيكم انه
بجيت حط ايده ع خدي كال... لاتبجين كافي
وحرك السياره حيل ضجت من الي سواه بس اطمئنيت
اخذني لمطعم وطلب احلى الاكلات من شفتهم تذكرت خواتي ضجت مكدرت اكل هو كاعد يمي كلي
رشاش... شبيج
هزيت براسي... ماكو شي
ضل يسال ويلح كتله.. خواتي ميكدرون ياكلون هيج اكل... بجيت كتله... ماعدنا مصدر رزق
رشاش... خلص اهدي كلشي راح يكون تمام
هزيت راسي باي كملنا ورجعنا للبيت قبل لاانزل طلع فلوس حطهن بايدي عزت عليه نفسي رجعتهم كتله... لا
مااريد
ضل يلح اخذتهم دخلت للبيت شافتهم ماما بايدي اخذتهم مني حسبتهم كالت :-٥٠٠ الف
رتيل كلتلي... ليش اخذتي منه
حره... هو ضل يلح عليه... وطبيت للغرفه
اجت يمي رتيل ضلت تسألني كتلها ع كلشي وع العقد كالت
رتيل... ايا محتال شلون ضحك علينا
هزيت راسي كالت... رحت ليوم زرت مقدام
ضحكت كتلها... والله
رتيل... اي لزمت ايدي كالت... حيل انقهر من عرف بموضوعج
نزلت راسي كتلها... رتيل اني..
رتيل... اسمعي قررنا نبعدج
باوعتلها كتلها... شنووو
رتيل... عمران لسه هارب ومقدام باجر يطلع اكيد لان مو بس رشاش يريد يطلعه عثمان هم
حره... مفهمت
رتيل... عثمان رايح لمقدام وزايره وكايله اطلعك منا
حره... اي؟ مفهمت شدخل عمران ؟
رتيل... اتفقت وياه باجر من الصبح ياخذج وتروحون لبيبي بهيه
رجفت كتلها.. لا مستحيل
رتيل... شبيج لتخافين عمران ثقه صديق مقدام عمر لا يوم ولا يومين
حره... لا رتيل خطيه رشاش يزعل
باوعتلي بزعل كالت... لسه خايفه ع مشاعره
سكتت كالت... لج حره اصحي
بجيت كتلها... غلط هالشي
رتيل... ترا حتى زواجج منه حرام
باوعتلها باستغراب كالت... لان تزوجج تحت الضغط والتهديد
حره... بس رغم هذا...
رتيل... اسمعي مني حره مقدام راح يطلع واكيد حيتعاركون هو ورشاش ومستحيل يقبل بـ رشاش بعد الي صار
حره... بس هو ماغلط هذا شغله
باوعتلي باستغراب ضربتني خفيف على خدي كالت... لج هذا سحرج لو شنو مداتشوفين الاذيه السببها الج؟
حره... طبعا مقهوره منه
رتيل... حره لتفكرين تكملين وياه شيلي هالموضوع من بالج
مسحت دمعتي كالت... اني متاكده هسه انتي من الضغوطات تفكرين ان زواجج منه بيه امل
بس حره هالرجال منعرفه ولا نعرف اهله
اجه جذب علينا وسوا نفسه مخبل وخبلنا وطلع شلون نثق بيه؟
سكتت كالت... زين اسمعي مني.. باوعتلها كالت... روحي يم بيبي لبين مايطلع مقدام واذا تفاهم هو ورشاش ترجعين وهم حتى انتي تفكرين زين واذا ماتفاهمو نطلك سالي ونبتعد عن بغداد خوش
سكتت كالت... باجر تروحين مقدام اصر وحلفني اطلعج منا
لان احتمال باي وقت يغدر بينا ويجي عليج
لان عقدتو محكمه بعد
شافتني مجاوبت حضنتني وكالت... الله يعيننا... وكامت طلعت
ضليت افكر الليل كله مكدرت انام حسيت غلط هالشي ساعه اكول يمكن ينقهر خطيه
وافكر باخويه مراح يقبل اكيد
ضليت الليل كله ابجي ب ١ اتصل عليه جاوبته كتله
... هلو
رشاش... هم تبجين
سكتت كال... ليش حره
بجيت كتله... محتاره
رشاش... بشنو محتاره؟ ماترديني؟ ... سكتت كال... تمام خلينا نتفق
حره... ع شنو
رشاش... منا لحد ماتكملين السادس تقريب السنه ونص
كتله... اي
رشاش... بهالسنه ونص اذا ماتفاهمنا وماردتي نكمل اطلكج... سكتت كال... بسنه ونص تكدرين تقررين يا ابقى يا انسحب من حياتج
بجيت كتله... اخواني ميردوك
رشاش... اكو فرق بين انو انتي ماترديني او اخوانج
حره... شنو الفرق بكل الاحوال ماارتاح
رشاش... لا اخوانج يقتنعون اذا مو اليوم باجر اني وياج نقنعهم
... بجيت كال... كافي والله چويتي گلبي
حره... انت غلطت لو مامهدد مجان كرهوك
رشاش... انتي ماتدرين بشي
كتله... بشنو ماادري
سكت شويه كال... حره اخوانج ماجانو راح يقبلون بكل الاحوال خصوصا بعد ماعقد عثمان على سالي وجذب عليهم لهالسبب انه ماقبلت عثمان يخطب سالي
جان ببالي ينتهي هالشغل ونوضح موقفنا ونخطب
لان اخوج اساسا متفهم بس عثمان بعرها لما خطب سالي
اكيد اخوج فكر بان عثمان استغله وجذب عليه
اني سكتت شويه وكال... ها سكتتي
حره... نعسانه
رشاش... متاكده
كتله... والعباس
رشاش... لاتسديه وترحين تبجين
كتله واني كوا احجي... لا والله نعست
رشاش... تصبحين ع خير
كتله... انت من اهله
رشاش... احبج
حره... شكرا
رشاش... انجبي... وسده
لثاني يوم الصبح كعدتني رتيل كالت :-يلا لازم تروحين
كتلها... رتيل مااريد
رتيل... شأتفقنا البارحه روحي يم بيبي ومن يجي مقدام عود يجي واتفقو كومي
كتلها...رشاش وعدني ينطيني مهله سنه ونص اذا ماقبلت...
قبل لا اكمل كالت ... وانتي صدكتيه لج هذا مو نفسه الجان مسوي نفسه خبل ويضحك على عقلج يالهبله يلا بسرعه بدلي
حره.. ومدرستي
رتيل... اخذلج اجازه يلا
حره... رتيل احس
رتيل... ولا كلمه امشي... وجرت البنطلون والقميص كالت... بدلي
رحت سبحت اسمع امي تدردم وماقابله بدلت ومشطت وكملت كلشي جسمي كام يرجف الدنيا فجر كتلها... رتيل والله دانغلط
حضنتني كالت... كلشي حيكون تمام لتخافين... ولبستني جنطه كالت... حضرتلج اغراضج... ولبست حجاب
حره... وين رايحين
رتيل... لجوا الجسر هناك عمران منتظرنا طلعنا
امي تدردم گالت رتيل... امج تدور فلوس ومصلحتها
وصلنا يم عمران سلم عليه وكال... يلا استعجلي
ودعت رتيل وصعدت ورا ومشت السياره ضليت اسبح الطريق كله لل ١١ اتصل رشاش نزيت مجاوبته ضل يتصل مجاوبت
ورا نص ساعه اتصل موبايل عمران رفض ماجاوب
ضلو يتصلون بيه تقريب ال ١١ مره الى ان وصله مسج قراه وكف السياره وكال
عمران... لحظه من رخصتج
كتله... اخذ راحتك اباوعله من الجامه يخابر ومرتبك ويباوعلي ويرجع يكمل الى ان كمل حجي مشينا كال
... اكو مطعم قريب نتغدا هنا كلش جعت
حره... ماشي
صدك وصلنا للمطعم طبيت كتله... اكولك هذا بيه اعمال ترميم ماكامل
عمران... شو بلا... طب كال... لا اجيت لهنا
دقايق اسئل واجي
باوعت المكان بعده بناء واكو درج ليفوك ومبين الفوك كامل التفتت داكوله خاف الفوك كامل ملكيته خفت رجعت كعدت بمكاني منتظرته
شويه وحسيت ايد تضغط ع كتفي بقوه
رفعت راسي فتحت عيوني على وسعهن
تجمدت وانصدمت بـ رشاش... يتبع...
____________________
من البارحه نيتي انزللكم بارت
وداناخذ احداث وجان يطير النت ويختفي
وماارجع غير اليوم وبوقت متأخر وهسه يلا كملته 😭💔
لتنسون التصويت والمتابعه
قراءه ممتعه فراشاتي
احبكم ♡
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!