لحلــــــــقه الخامــــــــــــــــسه
رواية... هل كانَ حُلماً...؟
{ العِراق-المُصغَر ... التوباز }
بقلمي ... لؤلؤة_البِحار ...
___________________•
:- فتحت خط اسمعها شهكت كتلها :-شكووو
كالت بصياح... انباكن الفلوووس
حره... شلووون!
ماما ضلت تدردم... الا تخليهن يمها هاي راحن وهي شنو هالاهمال عايفتهن ورايحه غير تضمهن زين
كالت رتيل... اكيد ابو السباع ماكو غيره والله لاحركه
بجيت كتلها... رتيل شلوون خاف يسجنوج خاف خالتي متوهمه
رتيل... لا كلتلي رجعت من الموكب ماكو شي بالبيت على حاله
كمت ارجف كتله... يارب دخيلك
لبست حجابها كتلها... وين رايحه
رتيل... اروح لبيت خالتي يلا بدلي
حره... مااريد مااروح
كعدت بصفي كالت... لاتبجين كومي وياي
حره... مااريد روحي
رتيل... شلون تضلين وحدج
حره... روحي معليج اسدد الابواب
ماما ضلت تصيح... يلا خلي نروح
تالي رتيل كالت... لتفتحين الابواب لاحد
حره... ماشي
طلعت بعد ضغط عليها كعدت ابجي اخذت موبايلي واني ارجف اتصلت عليه جاوب كتله
:- والله شكد شفت حقراء وصلفين بس مشفت مثلك يااخي مكروه متنطاق وفوك ماجذاب ومحتال ونصاب
بواك فوكاها يعني
سكت كتله... مو دالغي
رشاش... اي كملي
حره... انت البگت الفلوس متاكده.. محجه كتله... الله ياخذك
رشاش... اذا كملتي اسمحيلي احجي
بجيت كال... اهدي
سكت شويه كال... خلينا نلتقي نتفاهم ع كلشي
حره... بعد ماكو شي نتفاهم عليه انت طلعت واحد نذل وحقير واني عبالي مختلف شفت بيك حياة بس تروحلها فدوه
رشاش... طبعا
حره... انت متعمد تستفزني
رشاش... داتبالغين اني مو سيئ لهالدرجه
ضحكت باستهزاء كال... لاتحركين بدمج اكثر خلينا نلتقي و...
قبل ليكمل كتله... مااريد كارهتك مااريد اشوف خلقتك
يمكن لو اشوفك اموتك
ديحجي سديته وگعدت ابجي احساس صعب مرتضى الجنت اكوله ع كل تفصيل بحياتي حتى يواسيني والي جان ساندني بوقت ضعفي
صار غريب عني
شيفيد العتب بعد
مر الوقت ومشى هاليوم ورتيل ارتفع ضغطها من القهر
لان الفلوس انباكت ورتيل متأكده ان الي باك الفلوس هو رشاش ما غيره
مقدام طول هالفتره يلح لازم نطلع من البيت
بس رتيل كلتله... احنا يم خالتي امن واطمئن
وفعلا اغلب وقتي صار بالموكب لليل رحت سبحت وطلعت واحس حراره بحنجرتي من القهر
طبيت للهول شفت رتيل تمسح ع شعر مروه النايمه بفراشها
وماما كاعده بالزاويه تفكر كعدت يم رتيل كتلها
حره... رتيل شلون هسه
هي سكتت ماما كالت... تعالن... وتربعت
تقربنا منها كالت... شوفن العناد والجدل حاليا مامنه فائده
مرتضى الخبل الي الكل جان يضحك عليه
ضحك ع الكل وبسببه اكثر من ١٥ واحد بس بـ منطقتنا نلزمو والعدد يزيد
رتيل باوعتلها كلتلها... شلون يعني منعاند شنو الترديه تنطين توته؟
اميره... لا لازم نكعد كلنا وياه ونجيبه بالمسايسه انو من باب ننطيك توته بس بعد ماتكمل دراستها
رتيل هزت ايدها كلتلها... ترا گلي اجيب سيد واجي اعقد مال يأجلها مستحيل
اميره... هسه نحاول وياه
رتيل... مايقبل وحتى لو مايتزوج اكيد يعقد شبيج يمه
اميره... خلي يعقد
رتيل فتحت عيونها على وسعهن كلتلها :-عود انتي صدك تحجين؟
اميره... اي احسن مما ناكل خرا
وهو بعد هالسنتين من يشوف توته رافضته هو تلقائيا ينسحب
رتيل هزت ايدها وتأفأفت
امي گلتلها... انتي شو ماراضيه حضرت جنابج يعني برايج شنو الحل شنكدر نسوي ماعدنا غير نحاول نسايسه ونحجي وياه
رتيل... ديري بالج تحاولين تحاجيه خيولي هالنذل لو اموت مانطيه توته والله
مقدام ماغلط من ماقبل
باوعتلها كتلها... بشنو ماقبل
كامت كالت... ماكو شي يلا خنام
سكتت وگمت لفراشي
مرت هالليله مثل القبلها مكدرت اضوك طعم النوم
لثاني يوم الصبح غسلت وبدلت لبست صايه وحجاب
كعدت امي كتلها... وديني لموكب بيت خالتي
اميره... ماشي
كعدت رتيل تسوي ريوك باوعتلي مبدله كالت... وين رايحه؟
حره... للموكب مخنوكه
رتيل... تمام بس ضلي ويا بنات خالتي ديري بالج تروحين منا لو منا
هزيت راسي كالت... وهذا النذل اذا اتصل لتجاوبيه... هزيت راسي
باوعتلي كالت... مو بس تهزين براسج تسمعين كلامي وديري بالج تخابريه وتبجين ديري بالج... ورفعت اصبعها بتحذير
حره... هو كل مااحاجيه انقهر وابجي لا اراديا
رتيل... لهالسبب اكولج لتحاجيه
طلعت امي هي وجنطتها كالت... يلا
اخذت موبايلي وطلعت رحنا لبيت خالتي طبيت بوجهي للمطبخ اساعدهم
جانو مسوين تشريب دجاج وبرياني تلكتني خالتي حضنتني كالت
ام شذر ... شلونها رتيل
حره ... مو بخير
خالتي نرجس كالت... ليش ماشتكيتو ع بوك الفلوس والتهديدات اذا اشتكيتو ينفتح بيه مجلس تحقيقي تصرفاته مو قانونيه
حره... وشنو الدليل هو باك او هو ديهدد
عنده عقد وموقع من اختي منو حيصدكنا ويعوفه؟
خالتي كالت... شوفن اني احسهم مجرد يهددون
... باوعتلها كالت... واضح نيتهم مو اذيه اذا سالي بخير يعني الرجال حابها
ماما كلتلها... المشكله مو بـ عثمان المشكله بابو السباع
كالت خالتي... اي بس ابو السباع لو صدك ناوي يسجن مقدام جان ماخلاه يطلع من بغداد اصلا
بعدين يعني معقوله هسه هو مايعرف مكان مقدام..؟!
حره... يعرفه هو اصلا ديهددني
... شفتن متاكده بس ديخوفج حتى تقبلين
حره... ماادري
طب رجل خالتي كال... يلا صبو الزوار منتظرين
كمنا نصب والتهينا ماما ضلت تحجي ويا خالتي
بقيت اشتغل وافكر من افكر هواي بالموضوع اختنك
حطيت التشريب ع الكاونتر ورحت للحمام غسلت وكعدت ابجي
طلعت شفت موبايلي ع الميز اخذته لكيت رتيل متصله اتصلت عليها
كالت... ها اكلتي
حره... لا مااشتهي
رتيل... اكلي لاينزل ضغطج
حره... بعد وكت
رتيل... مو انتي مامتريكه
حره... من يصبون غده ع الواهس اكل وياهم
رتيل... ماشي
حره... ماتجين؟
رتيل... العصر اجي اني ومروه تعبانه هسه اريد انام
حره... ماشي
رتيل... هذا خوما اتصل عليج
حره... لا
رتيل... لتطلعين ابد
حره... ماشي
رتيل... يلا مع السلامه
حره... هلو.. وسديته شفت رشاش متصل مرتين
تركته رحت داصب رجع اتصل مكدرت ما اجاوبه
طلعت برا جاوبت كال
رشاش... منتظرج برا يم محل الحلويات
حره... مااجي
رشاش... مو من مصلحتج
حره... مااريد اشوفك مطايقتك
رشاش... علمود اختج
حره... شتريد منها
رشاش... تعاي وتعرفين
سكتت وسديت الخط كعدت ع الدرج افكر
كلت خلص لازم اواجهه بلكي نوصل لنتيجه
كلام ماما صح العناد ميفيدني هسه كمت اخذت موبايلي وطلعت مشيت للمكان
شفت السياره المضلله نفسها الي اجاني بيها للمدرسه
مشيت وكفت كدامها ابتعدت عن السياره ووكفت بعيد عنها
فتح الباب لابس شفقه طلع باوعلي درت وجهي عنه
اتصل عليه كتله
... مااصعد السياره
رشاش... حتى نحجي بهدوء خوما نحجي بالشارع والكل يباوع علينا
درت وجهي ع السياره هو واكف فتح الباب وصعد مشيت باتجاهها وصلت فتحلي الباب الكدام
طبكتها ودااصعد ورا قفل السياره فتحلي الباب وباوعلي
صعدت وسديت الباب باوعتله محلق لحيته نزع الشفقه ضليت ساكته واباوعله بزعل
هو هم ماحجه شي كتله
... راح تضل ساكت
ابتسم وباوعلي گال... اريد نتفاهم
حره... ليش انت خليت مجال للتفاهم؟
رشاش... اذا تسمعيني يمكن يتغير موقفج
نزلت دمعتي مسحتها ودرت وجهي ع الجامه
ماتحملت كمت ابجي هو حرك السياره التفتت عليه بسرعه وين مشى
كتله... نزلني
دافتح السياره قفلها كتله بصياح... مرتضى نزلني كلت
رشاش... اسمي ما مرتضى كلتت
درت وجهي عنه موبايلي بايدي فتحته دافتح الرمز جره مني كتله بصياح... انطينيااااه
رشاش... مو قبل ما احجي كِلشي عندي
دخل بطريق هذا اعرفه البيت الصغير الجابني اله خفت كتله... رشاش نزلني ترا والله ميصير خير
مجاوب دالوف الستيرن دفعني كال :-يول هيدي واعقلي
كمل يسوق كال... ماااذيج ولو اريد ااذيج اجتني الف فرصه
وكفنا يم البيت كال... انزلي
هزيت راسي بلا فتح الجكمجه طلع مسدس منه لزم ايدي الترجف حطه بايدي كال... لو حاولت ااذيج ارميني بدون تردد
فتح الباب نزل فتحلي الباب جرني نزلت
فتح باب البيت طبينا دايقفلها كتله :-عوف الباب
مارد عليه قفله وطب للهول طبيت وراه نزع الستره بقى بالتيشيرت نص ردان
عيوني تدمع مسحت الدمع وباوعت ايده بيها وشم
ركزت ع ايده ورجعت باوعت بعيونه تقربت منه
جريت ايده باوعتله بتركيز
عرفتتته...!
اي هو كلمة امي هو نفسه الضربني بوكسي بذاك اليوم
رجعت باوعت بعيونه
ماكدرت اسكت
ضربته راجدي ودفعته كتله ... تفف والله ياحيف ع وقتي الضيعته وياك اصرخ وابجي دامشي جرني ضربته لزمني من اديه كال
رشاش... اهدي خلي...
قاطعته... مااريد عوفنييي حقيييير
جرني كعدني ع التخم غصب وكعد بصفي مسحت دموعي كتله... ابتعد عني ترا والله ارميك
رشاش... اهون عليه من كرهج االي
بجيت كتله... انت جذاب شفتني بحالة ضعف استغليت غياب حياة وخليتني اثق بيك
واحجيلك كل اسراري
وتالي هاي النتيجه اني هم غبيه باوعتله كملت...
وانت نفسك الي اجيت ذاك اليوم بالليل
بجيت كتله... اني غبيه حسيت سامعه صوتك بس اتغاضيت... مسحت دموعي احجي واشهك كال
رشاش... كملي
باوعتله كتله... طلعت مو مثل ماشايفتك طلعت جذاب
مجاوب كتله بصياح... لتسكتتت اعتررررف بغلطك
رشاش... بس انه ماغلطت بشي
باوعتله... انت شنو هالحقاره العندك ها؟
شنو هالنذاله!
لعد شكد صلف وتكول ماغلطت وانت احتاليت علينا!
رشاش... هذا شغلي
حره... شغلك تحتال ع الناس؟
رشاش... شغلي اطلع الشين واحط راسه بالطين
حره... وانت شايف نفسك ملاك ترا انت حالك حال هذول المجرمين الي ع اساس انت ضدهم بعدين ملكيت غير اخوي تدور وراه
وتسوي كل هذا بس حتى تدمره
رشاش... صدكيني اخوج مايهمني ولو بشعره والي سويته ما علموده ولاعلمود اسجنو
ماعندي عداوه وياه انه
حره... لعد ليش هيج سويت
باوع بعيوني كال... انتظري هسه اوضحلج كِلشي
كام من مكانه طب للغرفه باوعت المسدس بصفي اخذته وكمت وراه وكفت بالباب
باوعت اكو جنطه سوده جبيره ام الاكتاف
جرها فتح السحاب وطلع رام ولابتوب كعد كال
رشاش... تعاي
مشيت كعدت يمه فتح اللابتوب مجنت اعرفله بس انتبهت ع الشاشه والتطبيقات كلها انكليزي
دخل شوفني صوره كال
رشاش... شوفي هذا
باوعت صوره لواحد سجين شكله يخوف شايل بايده ورقه كبيره ومكتوب عليها وموجهه
ع الكامرا كتله ... منو هذا؟
رشاش... هسه تعرفين
خرج شفت هوايه صور مال سجناء دخل لتطبيق ثاني حط رمز بسرعه وفتح التسجيلات نزل كال
رشاش... شوفي هذا التسجيل..
واشرلي على واحد
حره... شبيه
رشاش... اقري الترايخ
حره... ٢٠١٦
رشاش... حلو ضغط ع التسجيل كال :-لحظه
تقدم بالتسجيل هواي الى ان وصل مكان ضغط على تشغيل جان صوت واحد كال
... ومنو انطاك اوامر الاغتيال
الثاني گله... من ابو مصعب
رجع الولد سأله يمكنه المحقق كاله :-التقيت بيه شخصيا
الداعشي ... لا
المحقق... اذا كيف تلقيت الاوامر منه؟
الداعشي ... كان عندي صديق التقى مع ابو مصعب في معركة الـ *****في الموصل
وهو الكان حبل الوصل بينا وامرنا باغتيال الضباط السبعه
هنا رشاش وقف التسجيل باوعتله جريت نفس كتله... مو فاهمه شي
قدم التسجيل كان المحقق يسال :-ومنين اكثر نفوذ ابو مصعب؟
الداعشي جاوب... من خلال المخدرات واساسا من ٢٠٠٨ بداية تنظيم القاعده كان يبيع مخدرات الى افراد التنظيم وانا كنت شخصا منهم
ولهذا تبدا المعركه وتنتهي انا بعد ايام يلا اصحى فعليا
ومن هنا كانت بداية نفوذه وطبعا بالاضافه الى بيع النساء
التجاره باجسامهم
واكو نساء كثير انباعن لدول عده ومنهم ايزيديات
باثناء سقوط الموصل
هنا غلق التسجيل باوعتله بحيره كال :-بـ ٢٠١٦ صدنا هذا الكو***د
هزيت راسي باي كال... من بعد عملية اغتيال لسبع ضباط من اخوتي اغلبهم كانو من سكنة الـ***** وطبعا تم اغتيالهم لانهم منتمين لقوات الجيش العراقي
عدلت كعدتي وباعتله بتركيز كال... ومن يومها بدت التصفيات للضباط كثير خسرنا شباب بسبب هالنماذج شكد جنا نصيدهم
بس حتى لو جانت تتوقف الاغتيالات لمده معينه
يرجعون ويغتالون تاج راسهم الى ان وصلت عمليات الاغتيال لاكثر من ٢٠ ضابط بسطاله يسوا التنظم كِله
ومن يومها استلمت هالمهمه جان المفروض ألزلم هالكلب باي طريقه ومن خلال التحقيقات وصلنا لطرف خيط
فتح الحاسبه بحث بالصور شوفني صورته كال ... هذا
حره... شبيه
رشاش... جان يصاحب بنات ومنهم بنات عوائل
ولما يعزمهم ع اكله يحطلهم بيها المخدرات
ويسوي العمايل وبعدها يبدي يبتزهم ويلكى ضحايا غيرهم وهيج تكثر فلوسه
وطبعا هالشخص جان مسنود من عصابات ويتقاسمون الارباح طبعا
باوعتله كتله... بس شدخله
رشاش... من خلال التحقيق وياه توصلنا لعناصر يشتغلون بتمويل المخدرات
بيع وشراء
ابتزاز واستغلال جنسي
وبدا واحد يجر الثاني
الى ان وصلنا
باوعلي كال... لعلي
حره... منو هذا
رشاش... علي احمد بمنطقتكم
جان يسهر هو وجماعه ويا اخوج بوقت الليل
حره... اي اصدقاء بينهم
رشاش... لما اعتقلناه وبعد التحقيق ذكر ان الكل وياه حتى اخوج وكال كل يوم بالليل يشربون ويكبسلون
ومن بعد تكتيكات ومراقبه
داهمنا البيت للتأكد
وهم حتى نلزمهم لزمة يد... باوعلي وكال... وبذاك اليوم شفتج
هزيت راسي كتله... وضربتني
جر نفس كال... اجت ببالي فكرة انو احتمال كبير انتو البنات تشتغلون وياهم
بس ماردت اضلمجن لهذا انسحبنا
حره.. بس ليش هيج سويت مثلت بس حتى تحبس اخوي
رشاش... ارجع واكولج اخوج مايهمني ولو بمقدار شعره
كل اليهمني ابو مصعب
وشلون اصيدو
حره... وليش اجيت بالذات يمنا واستغليت اخويا
رشاش... ماجان احد من منطقتكم حالته زينه ناوي يبيع بيته غير جيرانكم
والبقيه بيوتهم مهدمه واني جنت اريد ابين للعالم اني غني وعندي فلوس اني واخوي
سكت كال... حتى تلزم اي مجرم قوي لازم تبدي بمسانديه الاضعف وهم هذول الي راح يوصلوك اله
والصبر نهايته حلوه
حره... وانت شفت مقدام ضعيف واستغليته وجذبت طول هالفتره
... باوع بعيوني كتله...
ساعه خبل
ساعه احدب
ليش هيج جذبت
رشاش... انتي تدرين المخدرات تستخدم لتسكين الالم
باوعتله باهتمام هزيت راسي... وشدخل
رشاش... نشرت خبر بكل المنطقه ومن اول وصولي اني اعاني من امراض كثيره
منها مزمنه ومنها الكسور بالفقرات الي سببتلي حدبه
وحاله نفسيه سيئه
... هزيت راسي باي كال... ولهالسبب جان سهل اخلي اي مروج للمخدرات يصدكني لو طلبت منه
وفعلا هذا الي صار ولما صار موعد ان ينطيني كمية مخدرات
تم القاء القبض عليه بالمكان المتفق عليه
ومنا بدت الاعتقالات ومن الصغير للاكبر
صفنت بالكاع كتله... يعني قصدك مقدام جان وسيله حتى توصل لهذاك الجبير
... هز راسه باي كتله... لعد ليش هيج سويت انت وعثمان
رشاش... وانه هم بعد ماقبلت بالي سواه عثمان وخصوصا لما ذكر ان اسمه عثمان وصارت حزازيات لانه تصرف بدون ماينطيني خبر
وصرت امام الامر الواقع
حره... بس ع الاقل حجه الصدك وطلبها من اخوي مااجه بالتهديدات
رشاش... اهاا رحم الله والديج هالحجي بالذات لاتكوليه الي تررحين تسألين اخوتج عنو
حره... مفهمت؟
سكت دار وجهه كتله... احجي شأسالهم
رشاش... باليوم الي لزمنا بيه ابو مصعب طلبتج من اخوج وهو رفض وحجه وياه عثمان وهم رفض
والسبب كال ان توته ماتريد تتزوج وتريد تكمل
سكتت معقوله مقدام ماكلي كتله :-مقدام يكولي لو احد خطبني
رشاش... وانه كلتله ماعندي مشكله تكمل دراستها ومجرد خطوبه وهو هم رفض
واني اعرف ان الدراسه مجرد حجه... سكت شويه وحجه كال... برأيج لو عرفو اخوتج اني جذبت عليهم بغض النظر عن شنو السبب راح ينطوج الي؟
سكتت كال... اعرف ماينطوج
حره... بس لحظه شوكت لحكت تحجي وياي هو انت اخذت الارقام الظهر الفجر طلع اخوي من بغداد
رشاش... لا اعتقلنا ابو مصعب قبل لا اخذ الارقام منج... ضحك كال... اكيد ماراح اعتمد ع محادثات اخوج
حره... لعد ليش طلبتهم مني
رشاش... ردت اشوف اخوج ويامن متعامل
حره... واني طول هالفتره عايشه بذنب اني سويت شي غلط لاخويه
سكت باوعلي كال... وهسه عرفتي كل القصه
هزيت راسي كتله... هذا مايعني انك ماغلطت انت استغليتني واذا انت جاي علمود شغلك شكو تقربت مني؟
رشاش... السالفه ما بيدي
حره... ومو بس هيج ورطت اخواني
رشاش... اخوج متورط من كاعه ويكون بعلمج انه الطلعته بس علمودج والا مستحيل اخلي احد تعامل ويا مجرم حر طليق
حره... لعد شكو تهدد تريد تسجن اخوي
رشاش... مااسجنه اكيد... باوعلي كال... لو قبلتي نتزوج
حره... واختي رتيل
رشاش... شبيها
حره... العقد الي بينكم
رشاش... ينلغي اكيد
... سكتت كال... ولو شفتيني ما خوش رجال الج حق تتطلگين
سكتت حطيت ايديا ع راسي وكمت كتله. تشوشت مدا استوعب
كام كال... حقج.. وسكت
حره... شلون اقبل بيك احس وكاني مااعرفك
بجيت طلعت بالهول لزم ايدي تقرب مني
رشاش... حتى لو جذبت باسمي وبمرضي وبشغلي بس ماجذبت بمشاعري تجاهج ابدا
كلشي شفتي مني حقيقي
بجيت لزمني من ايدي ومسح دموعي بايده الثانيه وبقى يتلمس خدي حسيت تشوشت كال... ثقي بيا
حره... مااكدر.. جرني عليه كتله... وخر
لزم شاربه كال... لو اذيتج بتصرف غلط الج حق تتطلكين وراح اساندج
حره... اخواني مراح يقبلون
رشاش... انتي الراح تتزوجين ما هم
كعدت كتله... انت هم مدري شلون تحجي
منين اصلك انت
وابن منو و..
اوف كلشي مافاهمه باوعتله دفعته كتله... ماعندي ثقه بيك رجعني للبيت يلا
رشاش... فكري زين
كعدت كتله... تمام نتزوج بس مو هسه
عكد حاجبه كال... لعد؟
حره... من اكمل سادس
رشاش... خو كملي سادس يمي شنو المشكله؟
حره... لا مااريد اريد اكمل دراسه
رشاش... ها حلو تردين الغي العقد واطلع اخوج مو؟
.. سكتت كال... تمام موافق
باوعتله جريت نفس كال... بس اعقد عليج سيد ومحكمه
حره... لااا
رشاش... اي
بلعت ريك كتله... ترا محرم شنو..
قبل لااكمل كال... جايه فرحة الزهره
سكتت كتله... رجعني لاهلي افكر وكمت
تقرب مني ابتسم كال... حلو الحجاب عليج
درت وجهي عنه اخذ السويج وكال... يلا
اخذت السلاح مد ايده انطيتهيا وطلع كدامي
شعور بداخلي مو حلو خوف بقلق بتشوش مااعرف منو الصح ومنو الغلط
بديت اتعب من التفكير كلشي مداافهم غير ان اكو راحه بداخلي
لان رشاش شرحلي الاسباب
واكو شي بداخلي مأذيني
وكان نزاع بين طرفين
يعذره عن الي سواه ويعتبر الي سواه نصر وذكاء كونه من المصلحه العامه
ويرد عليه منازع ثاني يكول لا هو استغلني وعيشني بخوف واستغل اخواتي
وصلني لبيتنا داافتح الباب كال :-موبايلج.. ومد ايده ينطينياه
اخذته ضل يباوع بعيوني نزلت يم باب بيتنا طبيت للبيت فارغ فتحت موبايلي شفت اتصالات من رتيل وماما عرفتهن لاحظو غيابي
اتصلت ع رتيل كالت... وينج حره
حره... بالبيت
رتيل... جايه
سديت الخط وكنكت ع الرصيد شفت مسجات من سالي كاتبتلي
... ها كنكتي
اتصلت عليها جاوبت كتلها... شلونج
سالي... تمام وانتي
حره... مو تمام مشوشه مااعرف شاسوي... حجيتلها كلشي
سالي... حره احجيلج الصراحه عثمان داير باله عليه مثل المي بالصينيه ورشاش دائما يجي لهنا هو وكسار
حره... لبيتج
سالي... اي يكعدون يحجون ويا رجلي بسوالف شغل
حره... اها
سالي... اي والبارحه سمعت رشاش وعثمان يحجون وعثمان يكوله حقهن لو حقدن بس من اتزوجها ويشوفن معدني يختفي هالحقد
وكله اني احب حره ورايدها شريكه عمر لايوم ولايومين
حره... خايفه سالي
سالي... اني هم اول يوم موتت روحي بس عثمان زين وياي حتى صرت متاكده مياذيني
لهالسبب تشوفيني هاديه
حره... انتي شنو رأيج
سالي... من كلتيله ورا مااخلص سادس نتزوج شكلج
حره... قبل بشرط يعقد
سالي... خلي يعقد عليج وبعد سنتين تزوجو واذا شفتيه مو زين تطلكي ولتنسين هيج حيرجعلنا مقدام هم محد يكدر علينا بعد
حره... هيج تكولين
سالي... اي هم حتى نضمن ميأذينا لان هذا ابو السباع ماكر كلشي يسوي علمود يكسب
وانتي شفتيه لعب بالمنطقه لعب ومحد يدري ولا احد حاس
حره... اي
سمعت صوت الباب كتلها... اجت رتيل يلا باي
سالي... هلاو
وسديته اجت رتيل شمرت الشال كالت :-ولج وين رحتي.. باوعتلي.. بس لا شفتيه لذاك النذل
هزيت راسي باي كالت... انتي تخبلتي خوما سوالج شي
حره... لا مسوا شي
ماما كالت... حره غير تكوليلنا
كعدت كتلهن... حجه وياي رشاش
رتيل... شحجيتو
حره... كتله نخلص سادس يلا نتزوج
ماما بسرعه كالت... وقبل؟
حره... كال اي شرط نعقد
رتيل... مستحيل شبيه تخبلت وانطيج اله لو اموت
باوعتلها كتلها... رتيا هو طلبني من مقدام.. باوعتلي وسكتت كتلها.. احجي عليج العباس
رتيل... اي
حره... ليش مكلتولي
رتيل... مقدام رفض بنفس اللحظه
حره... بس كان المفروض تسألوني مثل ماسألتو سالي
رتيل... صح وكلتله لـ مقدام بس هو كالي شلون انطي اختي لواحد مريض نفسي وجسدي وماعنده غير راتب رعايه ماترهم...
اني سكتت ماما كالت... واني شنو رجل كرسي وماكلتولي؟
رتيل كامت كلتلها... ردنا نكولج بس ملكيناج بالبيت
اميره... اي انتي هاي الاسطوانه تكوليها بكل عركه
هزت ايدها رتيل
ماما كالت... يعني الرجال جاييكم بالحسنى وانتو ماقبلتو
رتيل... وبينا بخت ماقبلنا هو اني سالي ودااعض باصابيعي ندم
ماما كلتلي... عوفج منها هاي ام خشم اليابس واسمعي مني
كعدت يمي كالت... خليه يعقد عليج بفرحة الزهره ونكوله ورا ماتخلصين سادس تتزوجين
عاد يصيرلنا مجال ياماما
كلتلها رتيل... مستحيل شلون تردين تزوجيها لواحد كلشي متعرفين عنه
لا اصل لا فصل
باوعتلي وكالت... ابد لتفكرين بالموضوع
ضلت ماما تحجي شكل وهي شكل دخت حيل تالي كمت سبحت ونمت فزيت دنيا فجر كعدت صليت وكلت :-يارب قدم الي بيه الخير
مر الوقت والايام وخلص صفر واجت فرحة الزهره
ومقدام بدا يسال اكثر عن سالي وبدا يلح انو شعجب عثمان مااجه ولا شاف سالي
وبدا يشك بالموضوع
وكل شويه يتصل بانو انطوني سالي ورتيل تتعذر
ساعه بالحمام ساعه يم رغد ساعه داتتعلم الطبخ
ونفس الشي من يتصل ع سالي
وبيوم كعدت الصبح حتى اروح للمدرسه بدلت وكملت اخر مره سالي لبست صدريتي وراحت وياها
وضليت كوا الزك بلبسي تنوره وقميص والمرشده كل يوم مرزلتني مشطت وشربت حليب وطلعت رحت للمدرسه وكملت ومر اليوم طبيعي
رجعت للبيت اول ماطبيت مروه كاعده بالحديقه هي وصديقاتها تبجي
فتحت الباب كتلها
حره ... مروه شبيج ليش تبجين؟
اجت حضنتني كالت... اخوي مقدام اخذو الشرطه
اني هنا جمدت من الخوف كعدت كبالها كتلها... شنو شصار
مروه... رتيل طلعت تبجي كالت لزمو اخويه بالسيطره
حطيت ايدي ع كلبي كتلها. وامي وين؟
مروه... طالعه
حره... وهي رتيل وين راحت؟
مروه... ماادري
اخذت الموبايل اتصل برتيل وامي محد يجاوب
كعدت ابجي بالهول وادعي يارب ساعدني بقيت اسبح واستغفر الى ان اجه ببالي رشاش
اتصلت عليه اول مكالمه ماجاوب الثانيه رفض ورجع اتصل دااحجي كال
رشاش... وصلني خبر اعتقلو اخوج
كتله واني ابجي... عفيه شلون لازم تساعده
سكت كتله... الو
رشاش... خلي افكر
بجيت كتله... والله شتريد اسوي بس طلعه من السجن عفيه لتخليهم يعذبوه
سكت كال... اجيب شيخ يعقدلنا؟
حره... شوكت
رشاش... هسه
سكتت كتله... وشوكت تطلع اخوي
رشاش... ايام قليله
حره... ليش التاخير
رشاش... اجراءات
جريت نفس كتله... رشاش شلون بدون علم اهلي
رشاش... خابري امج كوليلها
حره... متقبل
رشاش... لا تقبل
جريت نفس كتله... واكمل للسادس يـ
..
قبل لااكمل كال... عادي
سديته خابرت امي متجاوب ل ٢ جاوبت كتلها... تعاي ضروري
اميره... مو وكتها حره متشوفينا حايرين
حره... رشاش كال اني اطلعه بس يريد نعقد
اميره... يا شوكت تعقدون
حره... اليوم حيجيب شيخ ويعقدلنا.. سكتت كتلها... شلون هسه
اميره... جايه
ضليت انتظرها سويت اكل لمروه طلعت برا دااصيحها شفت ماما واكفه ويا رشاش
لابس شفقه ويحجون اني بلعت ريكي صار عندي فضول اعرف بس ماكدرت اتقرب
ضلو هوايه يحجون شافتني ماما اجت باتجاهي كلتله
اميره... تعال ابو السباع
اجه وراها طبت كلتله... تفضل طب للبيت..
باوعلي اني درت وجهي على امي كالتله... اولا حره تكمل دراستها
رشاش... هاهيه
اميره... والاهم لو انمست شعره منها باذى نطلكها منك
رشاش... حقكم
اميره... وسالفة مقدام ورتيل
رشاش... اعتبريها انحلت
كلتله امي... هاهيه
هو باوعلي ماما كالت... هاهيه حره مو
حره... و رتيل
اميره... تقتنع بعدين
رشاش... راح اجيب الشيخ والشهود وطلع من البيت
اني صابتني رجفه كعدت يمي امي كالت... لتخافين يطلع اخوج من السجن ونطلكج منه
حره... احس دانغلط
اميره... ماكو حل يمه شبيدنا
هزيت راسي كالت... كومي لبسي يلا
حره... وين
اميره... راح يجي الشيخ يعقد الكم
كمت ورجعت كعدت من الخوف صارت رجفه بجسمي سندتني امي طبيت للغرفه البس وابجي وهي تهدي بيا باوعت لوجهي بالمرايه تذكرت حلم حياة كالتلي اذكري الله ضليت اذكر الله واستغفر
اندكت الباب اجى هو والسيد والشهود قبل لانعقد سألته امي كلتله
... سيد هو سني وهي شيعيه شلون بالزواج
كللها... الزواج نفس الشي عند المذهبين لكن الطلاق فيه اختلافات
سمعت رشاش حجه بضحكه كله... بعدنا ماتزوجنا لاتجيب سيرة الطلاك
وهنا بدا السيد وعقدلنا وكمل العقد وطلعو رحت للغرفه كعدت ابجي اجت ماما كالت
... شبيج يمه لتبجين ولتخافين اي شي يصير احنا وياج وهو حلف يدير باله عليج
وضلت تهديني سمعت صوته يحجي ويا مروه طلعت ماما كللها
رشاش ... وينها
اميره... بالغرفه
اني كمت طلعت كتله... وهاي عقدنا لازم تطلع اخوي
هز راسه كال... صار
وكعد بالهول يحجي هو وامي شويه وطبت رتيل جانت حيل مقهوره اني انقبض كلبي متاكده مراح تقبل بالي صار
اول ماطبت للهول شهكت كلتله بصياح
رتيل... انت شعندك هنا
ماما كلتلها.. ماما تعالي نحجي بهدوء
رتيل... يا هدوء انتي شلون تفوتيه لهنا
هو كام كللها... جنت منتظرج تجين حتى اكولج انو ماله داعي تتعاملين وياي بهالطريقه بعد
لان اختج... وباوعلي كال.. صارت مرتي... يتبع...
________________
مرحبا فراشاتي
وهايه هديه لعيونكم الحلوه
حابه اشكر البنوته الحلوه user36158386
ع تفاعلها الحلو للقصه
وهسه فراشاتي لتنسون التصويت والمتابعه
والاهم ارائكم هي الي تشجعني وتدعمني
حسابي الانستگرام
nawras_qasim_22
حسابي الفيس بوك
Nawras qasim
قراءه ممتعه ❤🦋
تصبحون على ماتتمنون فراشاتي 😘
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!