الحلــــــــقه الثالثـــــــه
رواية... هل كانَ حُلماً...؟
{العِراق-المُصغَر...عنـاق-الارواح}
بقلمي ... لؤلؤة_البِحار ...
___________________•
:- حُره :- اندكت الباب دگه قويه
طلع مقدام ديفتحها
طلعت وگفت بباب الهول
اشوفه منو
فتحها مقدام
باوعت شرطه باوع لمقدام وگالو
... اسمك مقدام شعلان؟
.. اي نعم اني تفضلو
... تفضل ويانه عالمركز
... ليش شكو
... بالمركز تعرف
طلعت رتيل باوعت الشرطي كلتله
:- شكو عفيه فهمنا ليش ماخذيه... گالتها بخوف وقلق
الشرطي... بالمركز يعرف تفضل ويانا
...مقدام باوعلنا :- لتخافون
اخذو مقدام راح وياهم سالي كامت تبجي اجت بيبي تصيح
... شكو..؟
ليش اخذو يربي دخيلك
حره... اول مطلعو حياة بسرعه اتصلت على رشم وكالتله ع الصار
واني حاطه ايدي على گلبي
باوعت جوارينا اجو يسألون
ماما كالت :- شلون خلي نروح للمركز وراهم نفهم ليش اخذو
رتيل... انتظري خنشوف رشم دخيلك ياربي شبينا مايوم مر بدون وجع گلب
حجتها وطبت للبيت
اسمع جيرانا طبت وراها گالت :- خاف متعارك لتخافن هسه يطلعوه قدومي حباب وكلنا ندري بيه
داطب للهول بعد مابيه اوگف سمعت مصطفى كال
مصكفى :- خير شكو صدك اعتقلو مقدام؟
سالي وهي تبجي گلتله :-ميخصك لتتدخل بامور عائلتنا حير بنفسك وبس
مصطفى... شبيج وياي انتي؟
هي سكتت حياة گلتله :-مصطفى اخذو مقدام ومگلولنا ليش اخذوه عفيه انت مو محامي روح شوفه..
هو باوع لسالي وكال... اكيد رايح مقدام صديقي
سالي خزرته وطبت هو شغل سيارته وراح اني رحت للهول اعرج رجلي مجروحه من امشي عليها تاذيني وگلبي وجعني
حياة :- لتخافين ان شاء الله
ماكو شي
حره...ان شاءالله
شويه واتصل رشم على حياة جاوبته
گال... ماكو شي مجرد يحققون وياه
حياة :- بشنو وليش يحققون؟
رشم... من نجي نحجي
حياة... تمام
حره... ضلينا منتظرين على احر من الجمر والناس طابه طالعه تسأل على مقدام
وين للعصر كاعدين بالهول اندكت الباب ركضت رتيل
تفتحها وسمعتها گالت
رتيل... الحمد لله يارب الحمدلله... گالتها وهي تبجي
واسمع مقدام يكوللها :- بخير لتخافين
كلهم كامو يشوفوه اني انسندت ع الحايط داكوم وكعت
انضرب راسي بالحايط
حطيت ايدي على راسي وبجيت وكمت
وصلت للباب مسحت دموعي شفتهم ملتمين عليه ويسألوه شافتني حياة اجت سندتني وصلت يمه حضنته
باوعت واكفين رشم ومصطفى
ومرتضى يباوع من الباب تالي هم طب ويانا وسدت ماما الباب
رحنا كعدنا بالهول كلنا
رشم و يمه مصطفى ومرتضى
ومقدام كاعد بالزاويه ويمه سالي واحنا متسطرين يمه
جيرانا سلمت وسألت :-ع شنو اخذوك للمركز؟
مصطفى كللها :- تعارك ويا واحد واشتكى وهسه انحلت
كالت :- اي الحمد لله
سلمت علينا وطلعت
رتيل وماما ضلو يسألون بمقدام
رتيل... ليش اخذوك للمركز؟
ماما...خو ماكو شي يخوف؟
مقدام... لتخافون مجرد سألوني عن واحد اشتغلت وياه بديالى واني كلتلهم العندي
رتيل... زين ليش شيردون منه
كال مصطفى... هالرجال تاجر مطلوب
رتيل... وخوما ياثر على اخوي خاف يبتلي
مصطفى كللها... ليش هو مو ماله علاقه شلون يبتلي؟
مرتضى كاعد يمه بسرعه التفت على رتيل وضل يباوعلها
سالي :- وليش حضرتك عندك شك ..
هو باوعلها بحده ودار وجهه ع الجهه الثانيه وسكت
مقدام كاعد يمها حط ايده على كتفها كللها
:- لا هو دايطمنكم دامني مامسوي شي فـ لتخافون
رجع باوعلي... شلون صرتي حره؟
حره... بخير..
مقدام.. وجهج اصفر ليش
حياة... اي خطيه لان خافن
هو جر نفس كال... ماكو شي لتخافون
مصطفى گال... اني اترخص اخليكم تاخذون راحتكم يلا مرتضى
گمنا كلنا ماما گلتلهم ... ضلو تعشو هنا اكو واحد يطلع بهالوقت؟
مصطفى... لا والله ما اگدر وهم اريد اجيب العلاج لمرتضى
بهيه... لعد ندزلكم عشى يمه
مصطفى... لا والله بيبي مايحتاج اجيبله العلاج و ناكل برا
كامو دايطلعون سالي گالت
سالي... اي مرتضى اليوم مشفناك ابد حتى من اعتقلو اخويه؟
مرتضى... اي جنت يم حمزه ابن سعاد مصطفى ضربه على علباته وگله
:- شكم مره كتلك لا تناديهم باسماء امهاتهم يجي يوم وادفع فصل من وراك
اميره... لا شدعوه
مصطفى :- خاله اكو مايقبلون
حره... ضلو يحجون شويه وطلعو
وراهم رشم كال
:- يلا اني هم اروح تاخرت
مقدام... لا وين انته متروح
رشم... لا والله ماكدر ابقى
مقدام... لا ماكو طلعه تتعشى هنا
مخلاه يطلع جلب بيه ضل تعشى يمنا كلنا كعدنا ع سفره وحده ايكول هو اخونا
كملنا عشه البنات نگلن الماعين ورتيل گامت سوت جاي
شويه وجابتلهم بس اني مصبتلي باوعتلها
كالت ... عندج فقر دم مو زين الجاي
حياة... اي حره لتشربين جاي هالفتره ابد
اجت سالي جابتلي علاجي ومي اخذته منها شربته
رشم شرب جاي وباوع لحياة وحجه كللها
... ماقررتي؟
حياة... قررت وكتلك قراري
بيبي كلتلهم... شنو شكو قراريش؟
رشم... بيبي كلت لحياة تجي للبيت الي اشتريته حتى
سكت جر نفس بحسره كمل.. اضم المرحومه من اهلها لفتره
حره... ليش صاير شي؟
رشم... اي ابوها مو امان واكيد عنده قطيع يتبعوه اخاف يأذوها
فكلت تجي هي وبيبي تبقى فتره الى ان تخلص المحاكمه
مقدام... هي حياة راح تبقى هنا ببيتنا ماتطلع منه ماكو خطر
رشم... اكو دام يعرفون بيتكم
ف خطر
حياة... لا ما اكدر بعدين متشوف حره لسه ماصارت زينه ماكدر اعوفها
رشم... اكو موبايل وتكدرون تتواصلون وهي هم ختجي وياج اني البيت الكم حطيت عليه حمايه هناك اامن بس خلي تنتهي هالمحاكمه
حره... حياة روحي ليش تعرضين نفسج للخطر؟
حره... لا ياخطر هو مشعل
وانسحل!
كالت بيبي... ولكم يمه راح تجلطيني بالله العناد شيفيدج هسه.
باوعت لرشم... يمه رشم احنا وياك دام البيت ذاك بيه حمايه ف نجي وياك
حياة... بس بيبـــ...
بهيه...اااش ولا كلمه بالله اذا صارلج شي وين اروح وين انطي وجهي ولج انتي ماتفهمين الا تجلطيني يلا ترتاحين
اميره... اسم الله عليج بهيه
باوعت لحياة...
حياة ماما هذا الشي من مصلحتج هم يردون سلامتج خطيه شوفي حالة بيبيتج لتعاندين
حياة... مو حره
حره... لزمت ايدها كلتلها... اهلي يمي واني هم اكيد اجي ازورج يجيبني مقدام
رشم... من تردون تجون اني ادزلكم سياره ذاك البيت مأمن محد يكدر يأذيجن بيه
والمنطقه هم كلها سيطرات ومراكز ف مؤمنه كلش
حياة... اووف تمام لعد
رشم... باجر من الصبح ادزلجن سياره تعالن بيها
حره... لعد ولـ سمرا شوكت نروح؟
حياة... خلي باجر نروحلها
رشم... ان شاء الله من نرجع مترجعون لهنا ترجعون للبيت
بهيه... هاهيه
رشم... يلا اني اترخص
..گام وراح مقدام راح غسل واجه كعد يمنا باوع لـ سالي داتخابر رغد كللها
:- سالي كملي وتعاي دا احاجيج
هي كالت :- يلا رغد بعدين احاجيج
سدته واجت كعدت يمي اني مددت ع المخده مال بيبي انسطرت من العلاج وحياة كامت تفرش بالاستقبال هي ورتيل
سالي... ها مقدام اكو شي؟
مقدام... ماادري بس لاحظتج تنترين
بـ مصطفى واحسج ضايجه منه
سالي... لا مضايجه
مقدام... بس اكثر من مره تحجين وياه بنتر
سالي... مو هيج اني ممرتاحتله كلبي ناغزني منه
مقدام... ليش شفتي شي سيئ منه سمعج حجايه مو حلوه!
سالي... لالا ابد
مقدام... لعد ليش ضايجه كوليلي حتى اذا عنده شي اعرفه
سالي... ماادري حسيته واحد من الداهمو البيت ذاك اليوم
هو صفن تفاجئ كللها :- ليش هيج حسيتي ؟
سالي... صوته حسيت سامعته قبل
مقدام... بس هالشي مستحيل
سالي... ليش مستحيل؟
مقدام... لان الداهمو البيت ممكن تكون جهه حكوميه واذا جان ضابط جنا اكيد عرفنا بس الرجال كرايب جيرانا القديم وجيرانا هو بنفسه گلي
حره... شكلك؟
مقدام... مره من رحت اتسوگ گلي
:- شلونهم ولد خوالي خوش جيران لا
اني كتله:-ورده
گال... خطيه مصطفى اجه لبغداد بامل يعالج اخوه انشلع كلبه
سالي تفاجئت گلتله... منو كلك الدخلو جهه حكوميه ممكن يكونون حراميه؟
حره... بس سالي هم ما اخذو ولا فلس بالبيت حتى يكونون حراميه
سالي... ماادري... كالتها بعدم اقتناع
مقدام... شيلي هالافكار السوده من راسج هم خوش ناس وساعدونا مترهم هيج تحاجيه نتر وخوب مرتضى حالته معروفه خطيه الله يشفيه
حره... امين
وباوعت لـ سالي عينها بالكاع مستغربه
اني بعد متحملت غفيت كعدت على صوت حياة باوعت الفجر گمت غسلت وجهي ورحنا نتريك باوعت
:- شو البقيه مگعدو
حياة... بس احنا ومقدام ورشم
نروح
حره... شعجب وبيبي متروح؟
حياة... رجليها تأذيها ورتيل الخياطات لازم تكملهم بالليل لان صاحبتهم قرب زواجها
حره... تمام لعد
تريكنا واخذت العلاج وكمنا سبحنا وبدلنا دالف الشال اجه مقدام كتله
:- تاخذنا بالتكسي
مقدام... لا رشم كال اني امر عليكم
حره... تمام اذا هيج
طلعت حياة علاكه وخلت بيها كليجه... يا هاي شوكت سويتوها؟
حياة... البارحه اني ورتيل مااجانا نوم فكلنا نسوي بثواب المرحومه
حره... اهاا
شويه واتصل رشم على مقدام ومقدام كال
... يلا
رحنا طلعنا فتحلنا الباب مقدام احنا كعدنا ورا وسدها سلمنا على رشم رد السلام مقدام كعد لكدام يم رشم ورشم موبايله ماسكت كل شوي احد يتصل بيه اخر شي سواه صامت
وحسيته حيل مقهور وتعبان بحيث گوا يحچي
وصلنا للمقبره اول ماشفت القبور گمت ابجي جنت ممستوعبه موتها ابد لحد البارحه اتمنى كل هذا حلم بس للاسف هذا واقعنا
واخيرا وصلنا لقبرها فتحلنا الباب مقدام
طبينا كعدنا يم الكبر كله ورود غسله رشم بمي الورد وشعل البخور واني وحياة ابد ماسكتنا
مقدام واكف شوي عنا يمكن رادنا نبجي براحتنا
واحنا نبجي ونحجي گلتلها حياة
حياة... واخيرا الردتي صار
ضلينا
نسولفلها ع كلشي صار ويانا حتى جرح ايدي كلتلها
:- سمسم هايه لان ردت انهزم وكعت من الدرج حسيت تكسرت
ضلينا بين بجي بين عتب بين الم حجينا كلشي الها الى ان ارتاحينا شكد مر وقت مندري بحيث درت وجهي رشم مو يمنا التفتت خلفي شفته واكف هو ومقدام
حياة كالت... خلي اوزع الكليجه بثوابها
كامت وسندتني اكوم باوعنا للقبر قرينالها دعاء اهل القبور والفاتحه حياة كالت
حياة... والله لو ماادري بيج انتي هسه بحال احسن من حالي والله عوضج عن كلشي ماجنت اكدر اوكف على حيلي بس تبقين عايشه احسن مني
تبجي وتحجي كالت... يلا خلي اوزع
راحت توزع للاهالي الموجودين اليزورون احبابهم اني كمت القبور الي اشوفها اقرالها الفاتحه درت وجهي شفت مقدام
كال... حره اريد اروح لمكان نص ساعه وارجع عادي
... اني بداخلي عرفت وين يريد يروح كتله... اخذني وياك اني هم اريد ازور حوراء
نزل راسه و كال :- ع غير مره خلي ازورها واجي وباس راسي.. كال.. ابقي يم حياة ورشم ابد لتعوفيهم مااطول
كتله... ماشي
اعرف ليش ميريد ياخذني وياه لان ممتعوده اشوفه يبجي او بوضع سيء مقدام ابد ميبجي او يشتكي گدامنا بس كدام رتيل
لهالسبب مااصريت وخليته على راحته راح
اجه رشم حط راسه ع قبرها ويبوس بيه ومدري شيحجي بصوت
ناصي كلش
تركته خليه يبجي ويعبر عن الي بداخله ورحت يم حياة امشي واقرا الفاتحه الهم اقرا التواريخ منهم ب السبعينات والثمانينات وبداخلي اكول
:- شكد قصيره هالدنيا الي يدخل المقبره يحس بهالاحساس يحس شكد الحياة تافهه وماالها قيمه ومجرد توقيت يجي يوم وينتهي والعاقل يتبع دينه وضميره وگلبه بس الانسان مايستوعب هالشي ويحاول يرضي غروره دائما
يوم يجذب
يوم ينافق
يوم يغتاب
يوم ييأس
وممكن يقتل ويزنى ويشرب كل هذا علمود يعيش ايام هو يدري حتنتهي
اجت حياة كعدنا يم كبر سمرا رشم حاط راسه ع كبرها ممنتبه سمع صوتنا مثل الفز
باوع لحياة وكللها
رشم... اني غلطت
حره ... شنوو؟
هو كام كعد كبالنا كال... ماعرفت اقيس الامور ولا احسبها صح
حياة... من ناحية شنو
رشم... ياريتني ماسويت كل هذا لا واجهت مشعل ولا دخلتجن لحياتنا
حياة بجت كلتله... ليش تحجي هيج
رشم... لاني جنت اناني جنت مفكر افضح مشعل بيج
واستخدمج نقطة ضعف اله وادمره وشوفي شصار هو استخدم نقطة ضعفي ودمرني
سكتت كلتله... بالعكس الصح اني عرفت سمرا
رشم... لو ماعارفتها مجان عشتي هاليوم ولا هالوجع ويمكن بدل مااحنا هسه دانزور قبرها يمكن جنا راح نلبس حلقات هنا اني غلطت اني عاندت لو مساير ابوها اخ لو مسايره ريتني مااواجهته
حره... لتحجي هيج رشم ابوها بكل الاحوال جان مراح يقبل بيك لانكم نار وثلج واحد يكتل الثاني
حياة... لو سمسم اختي شافت بيك شبه صغير من ابوي مجانت راح تحبك او تفكر بيك هي حبتك لانك مو ظالم مثله
رشم... ياريتني جنت ظالم ولا اعيش هاليوم... حجاها ونزل راسه يفرك بعيونه
حره... لتحجي هيج سمرا مراح تقبل بهالحجي بالنهايه هي هسه عايشه احسن مننا انت ماغلطت ابدا ابوها الي غلط ليش تلوم نفسك
باوع للفراغ وعيونه حمر تدمع
گال :- هاي ماا جانت اول مره
حره... شنو
رشم... لما طلبتها من ابوها ماحقدت من اول مره اني كلتله والله كلتله علمودها مستعد اتحمل خنگة الدخان طول عمري گتله بس انطينياها والي تريده يصيرلك حتى بعد ما اجيت ودورت عليج
وعرفت ازهار بنته اني رحتله ردت ابني طريق وياه
توسلت بيه خسرت كرامتي بس ماردت اخسرها
وهو شسوه... حط ايده ع عيونه كال.. اني ماحقدت عن عبث لايوم ولا يومين سنين وهو يذلني ويهيني املني بوعد وخلفه اني سويت كل هذا علمود نعيش سويه ببيت صغير ونجيب طفل حلو مثلها
سكتت مخنوگ وكمل... ونبتعد عن كلشي بس هو ماسمحلنا هو گلي من اول يوم رفضت اشتغل وياه گلي راح احرگ گلبك وهاي نفذ فعلا حرك كلبي
حياة... بس هو هم احترك انكشف وانسجن
هو شهك ورفع راسه كال... بعديش بعديش... ومسح عيونه برداناته
حياة... كلامك دايزعل سمرا خلونا نتحمل
سمرا عايشه احسن مننا شهيده وهي اكيد داتنتظرنا بالجنه لازم مانيأس ونسوي افعال خير حتى نروحلها لا اعتراض على حكم الله
رشم انت ماغلطت ابوي يستاهل كل الي صارله
الي سويته كان رد فعل حتى تدافع عن حبك
هو باوع لكبرها وسكت سرح شويه ورجع كال... يارب.. غمض عيونه كال... هي جانت دائما تحجيلي
عن ذاك الحلم
حره ... ياحلم؟
رشم... الحفره والايد الي تلزمها
حياة... اي صح جانت دائما تسولفلي عليه وتتمنى تشوف منو البنيه هاي
هو باوعلها بحسره كللها... انتي
حياة... شنو
رشم... هالبنيه جانت انتي
حياة... شمدريك؟
رشم... قبل لتتوفى بيومين شافت الحلم وهالمره مختلف
حره... شلون يعني؟
رشم... كلتلي شفت نفسي داوكع من الحفره وايد بيضه لازمتني واني جنت خايفه حيل بعدها شفت وجهه البنيه جانت حياة ابتسمتلي ومدتلي ايدها الثانيه دالزمها زلكت ايدي وجريتها حيل ووكعت
ووكعت وراي حياة وفزيت من الحلم
حياة صفنت متفاجئه... سمرا سولفتلك؟
رشم... اي
حياة... لعد ليش مسولفتلي
اشر بكتافه بمعني ماادري وكام يتنفس بصعوبه
حره... رشم انت بخير
باوعلي... لا مو بخير ابد مو بخير وباوع لكبر سمرا كال... مااحسها ميته دا اشوفها وياي
البارحه كعدت الفجر شفتها بغرفتي داتصلي وفجاه فزيت ع الاذان
نزلت دمعته مسحها كال... اني الميت مو هي
حياة صفنت بالفراغ اني كلت اللهم اجعله خير يمكن تفسر
حلمها وتوفت
حياة صافنه كالت... هذا مجان حلم
اجه مقدام كال... يلا نروح
كلناله.. اي
رحنا للامام زرنا وتغدينا ورجعنا للبيت
رشم... راح ادز سياره عليكم بعشوي اخذو بس الملابس
التحتاجوها لبين متكمل محاكمة مشعل
حياة... ماشي
مقدام ضل يلح عليه... انزل يمنا ارتاح
مقبل كال... عندي شغل والله
وفعلا نحنا نزلنا وهو طلع بسيارته رجعت للبيت نمت شويه وكعدت شفت حياة كاعده وصافنه كمت يمها كلتلها
حره... انتي بخير
حياة... بخير.. باوعت لعيوني وكالت.. كلشي حيكون تمام الله ميكتبلنا غير الخير النستاهله اذا ماحصلناه اليوم نحصله باجر.. وابتسمت
حره... ونعم بالله
طبت بيبي كلتلها... طلعتي الملابس النحتاجها يمه
حياة... اي بيبي طلعتهن..رجعت
باوعتلي كالت... حره ديري بالج على نفسج بغيابي
سكتت شويه وكالت... اني كلش ازعل من اشوفج زعلانه لخاطري ابقي بخير
حضنتها كتلها... طول ما انتي بخير اني بخير
كمنا اني غسلت وهي كعدت بالهول يم ماما وسالي وبيبي ومروه اجيت كعدت يمهم اسمع حياة تكول لسالي
حياة... لعد ليش مرحتي؟
سالي... شلون اروح واحنا ماصارلنا اربعين يوم من فقدنا سمرا تبقى مثل اختي
حياة... بس رغد صديقتج المفروض تروحين دام اليوم عقد قرانها المفروض تشاركيها فرحتها
سمسم جانت حيل تحب الاعراس والحفلات جانت تحب تشوف الفرحه بعيون الناس جانت تكولي اتمنى اشوف بعيونجن هاللمعه
مايصير ننزع فرح غيرنا بسبب حزنا يمكن لو اني خطبت وحره مااجت جنت راح
ازعل حيل
حره... سبق وان انخطبتي بس مكدرت احضر
زعلتي بوقتها؟
حياة... اكيد ضجت بس مازعلت منج لان الفرق الي بينا جان جبير فرق بين بغداد والموصل
بس هسه الفرق
بين سالي ورغد شارع واحد بس
سالي... هي هم كتلج زعلت مني وعاتبتني واني كلتلها شلون اجي وجرح سمرا لسه ينزف
حياة... اعذريها لصديقتج هي معتبرتج مثل اختها لهالسبب عاتبتج ليش مااجيتي
اميره... خطيه اكيد ضاجت واليوم عقدها
سالي... اروحلها باجر
... شويه واندكت الباب گامت ماما فتحتها
ولد لابس زي عسكري صاحت حياة سمعتها سلمت عليه كلتله
... هسه اجي ثواني
طبت كلتلها.. هذا منو؟
حياة... هذا نفسه الي نقل المرحومه ويا رشم
حره... اها الله يوفقه
لفت الشال عدل وبوستني
وكالت :- ديري بالج ع نفسج
حره... وانتي هم
سلمت ع الكل وراحت هي وبيبي اول ماطلعت البيت صار اظلم كلتلهم... حياة الها وحشه
رتيل... اي والله شالت البيت وراحت
اميره... احسن الهن خلي يتحاكم هذا الكلب يلا يطلعن لان هذا مو امان
كتلها... اي صح
ورحت كعدت
باوعت سالي ضايجه كتلها... شبيج؟
سالي... ضميري انبني على رغد كلتلي تعاي ومرحت خطيه خاف اتفشلت كدام اهلها واخواتها لان ليل نهار تحجي بيا وجنا نخطط لعرسها و اجتنا هالمصيبه
حره... خلص لتضوجين باجر روحيلها واعتذري منها
سالي... اي ان شاءالله
للمغرب اجه مقدام ضايج گلتله رتيل
:- حياة وبيبي راحو
مقدام... اي خابرني رشم گلي
... لليل اجه عمران كله ادخل
طبو و كعدو بالاستقبال
اني ضايجه حطيت اذاني يمهم اسمع عمران يكوله
عمران ... صارت حملة اعتقالات هالفتره خرب بس لا نتورط
مقدام... واحنا شكو ونتورط ترا ممسوين شي
عمران... مو هو الشر يعم ياخويه استغفر الله هسه احنا مالكينا غير هالاعوج ناخذ منه فلوس ساعة السوده
مقدام... انوب الكلب هددني ويريد ضعف الفلوس كتله مجان هيج الاتفاق كال لا احنا اتفقنا ترجعهن بضعف
عمران... ايا كلب
حره... لزمت كلبي بس لا هذا الدا تدور عليه الشرطه
دخيلك ربي وين ماكو طاغيه تسلط علينا
جابت الجاي رتيل اني مددت بالهول دكت باب بخفه كلتله
رتيل... خويه الجاي
هو فتحها اخذه وطب ضلو يسولفون شويه وراحو
محسيت غير برتيل تكعدني كومتني لفراشي ونمت
لثاني يوم كعدت خابرت حياة
حره... شلونج مرتاحه هناك
حياة... اي وهنا حراسه والبيت حلو وحديقه وبزازين وبيبي كابلتهم وكعدت
حره... اي احسن تتلهى
سولفنا شويه وسديته للعصر بدلت سالي هي وماما وكالت
سالي... اروح لرغد اباركلها
وفعلا راحو بالليل رجعو كالت
...رغد حيل فرحت من شافتني وفتحتلي الموبايل شوفتني صورها هي وزوجها حلوين
حره... ياعيني الله يسعدها
سالي... امين
اجت عليه جرتني يمها كالت... هذا مصطفى رجعنا وياه بالسياره
حره... شعجب هم مو قريبين علينا
سالي... اني ادري كلتلها لامي بس هو ضل يدك ناعم وخاله وعيني ومن هاللغوه تالي صعدنا
حره...شبيج وياه انتي
سالي... والله ماادري ماارتاحيتله
حره...بس ماشفنا منهم الشين
سالي... اي للامانه هم زينين ويانا
حره...لعد بعد شكو خايفه
سالي... احساسي يكولي اكو شي ديصير غلط
حره... ماادري بعد الله يكتبلنا الخير
سالي... امين
لليل اجه مقدام هم تعيشينا وكملنا دايشربون جاي اتصل موبايل مقدام حجه كله
... هلا رشم شلونك
بخير الحمد لله
بعدين سكت
كله... ليش اكو شي؟
بعدين كام وكال بصوت عالي لك صدك تحجي؟
خرب بالساعه السوده شهالمهزله شلون يعني سجين ينهزم
وضل يحجي ويفتر واحترك حرك وكل شويه كال خرب بالكو.***يد سد الخط
سألته رتيل... شكو شصاير
هو حط ايديه على راسه ديحجي باوعلي كللها
:- ماكو شي بس معتقل حقير اعرفه انهزم
حره... منو بس لا مشعل؟
مقدام... لا ماتعرفوه لاتخافون
وضل حاير كل شوي يتصل اسمعه يغلط ويرجع يسكت
لثاني يوم الصبح سالي دتجيب بيض هو كال
حره... لتطلعن بدون متكللي باوعلي كال... حره هالكلام بالاخص الج ممنوع تطلعين بدون علمي
حره... ليش صاير شي؟
مقدام... ماصاير بس الوضع لسه خطر وانتي الج سوابق تطلعين وماتكولين
حره...اني هنا شكيت كتله... منو انهزم الله عليك احجي
... صفنت كتله.. بس لا السا.... قبل لا اكمل كلي
... ماتعرفيه حره
حره... سكتت يمكن مااعرفه ولو طلع السامر فعلا جانت عرفت ع الاقل حياة وكلتلي
مشى اليوم عادي لوقت الغدا اجه مقدام كلتله :- اريد اروح لحياة
مقدام... مو اليوم عندي شغل العصر
حره... لعد خلي اخابرها هي تجيني
باوعلي و كال... لا اا
حره... ليش؟
مقدام... الوضع خطر هسه خليها بذاك البيت بأمان لبين ما يتحاكم مشعل
حره... بس مشعل انسجن ليش هيج خايفين منه شيكدر يسوي وهو بداخل السجن؟
مقدام... هو بداخل السجن بس اكو يعبدوه برا
خفق گلبي كتله... يعني شنو؟
مقدام... بس نخلص من سالفته وينحكم حتى الي جانو يشتغلون عنده راح يتركوه لان بعد ما الهم لا سلطه ولا فلوس بس تكمل محاكمته كلشي يكون بخير
حره... ان شاء الله
وبهاليوم مارحت لحياة خابرتها العصر ضلينا نسولف وسألتها كلتلها
... رشم اتصل على مقدام واكو واحد طلع من السجن ومقدام خاف هم تعرفيه؟
حياة... لا والله معندي خبر
حره... خفت عبالي ابوج او السامر
طلع
حياة... لا شلون يطلعون ومثبته عليهم ادله لتخافين خلص ورقتهم احتركت وبعد ميطلعون منها
حره... ان شاء الله ياخذون جزائهم
... سمعت هوسه برا كلتلها... حياة شويه واجي
حياة... ماشي
...سديته و طلعت برا شفت سالي لازمه مروه وتحجي ويا المره وبنتها تكوللها
سالي... خاله ميصير هيج تتعاركين علمود طفله عادي تصير اطفال يتعاركون ويتصالحون خوما ترديني اخليج تكتلين اختي والله شنو كتلت بنتج ليش هي شسوتلها قابل
جيرانا كلتلها... شنو شسوتلها داگولج ضاربتها خشمها طك دم تقبلن انتن بهالشي
سالي... لا خاله منقبل وهسه نحاجيها وان شاء الله متنعاد
كالت... مو بس حجي اكتلنها ربنها
سالي... لا عيني اسلوب الهمج احنا منتبعه
جيرانا كلتلها... شقصدج اني همجيه؟
سالي... وانتي شكو اخذتي على نفسج اني قصدت اليضرب طفل همجي الطفل يتقشمر ليش هي اختي شكدها وترديني اضربها
كلتلها... اي اتركنها هيج حتى تطلع لسانها اطول منها مثلج
سالي... اذا تشوفين ان من الاخلاق اتصرف بهمجيه فهالاخلاق هاي متفيدني عزيزتي
اخذي بنتج ويلا منا
ذيج كام تصيح... شنو هاللسان هذا وربو بنتكم اضربوها وووو
سالي... عزيزتي انتي شتردين كلتلج بنتنا نحاسبها بطريقتنا يلا عيني الله وياج
مروه واكفه ورا سالي وتاشر للطفله بنت جيرانا بمعنى بسيطه اني جريتها كلتلها
:- خاله لتكبريها وهي صغيره احنا جيران خوما نتعارك علمود جهال..
كالت... لا والله اني احبجن واعزجن بس هاي اختج لسانها طويل وىـ
قبل لتكمل كتلها... اني وخواتي الحمد لله معروفات بادبنا واختي محجت شي غلط بنتنا احنا نحاسبها خلص عيني
هي هزت ايدها اني جريت بنتها بستها وكلتلها... مروه تعاي اعتذري
مروه.. ماااا
حره... اعتذري خطيه اذيتيها يلا
مروه مدت اصبعها حتى يتصاحبن تذكرت سوالفي اني وحياة من جنا صغار هم هيج نتصاحب
تحاضنن والمره اخذت بنتها وطبت لبيتهم
من دا ندخل للبيت شفت مصطفى منتجي ع الباب مال بيتهم ويباوع لسالي ومبتسم
سالي دارت وجهه شافته كلتله... شكو عيني مضيع شي
مصطفى... لا
سالي... لعد شكو تباوع؟
مصطفى... احب العرايك
ابتسمت كلتله... راح تشوف عرايك هواي بهذا الحي وصدگني الي يدوسلنا ع طرف نكسر رجله احنا منسكت عن حقنا
مصطفى... عفيه بالسبعه
كالت بصوت ناصي... سبعه لو ثمانيه
اني ضحكت هو كال...
... شنو شكلتي؟
سالي... ماكو شي يلا مروه نفوت
طبينا وسدينا الباب ورانا سالي اول مطبت كالت
... مروه هاي اخر مره تضربين طفل حرام الله بعد ميدخلج للجنه ولا يحبج لان خطيه
مروه... هي غلطت عليه
سالي... حتى لو اليغلط عليج كوليله عيب عليك ماا عندك اخلاق واتركيه مو تضربيه
مروه... لا والله ماضربتها
حره... لعد شسويتي؟
مروه... كفشتها من شعرها وشو هي وكعت
ابتسمت كلتلها... لو رتيل هنا تلزملج النعال
رتيل مموجوده طلعت تودي الخياطات والاقساط
مروه كالت... يلا بعد مااضربها حرام اريد اكل دجاج بالجنه
سالي... ايا ام بطن... وضحكت باوعتلي وكالت
... تذكرت نفسي من جنت صغيره جنت ادعي لما انام واني جوعانه انو يارب اخذني للجنه اكل
وبعدها رجعني
حره... لتذكريني بذيج الايام...حجيتها بألم
سالي... نفس هالايام متفرق بشي
حره... لا اهون
كامت وهي تمشي للمطبخ كالت... لا والله نفس الطاسه ونفس الحمام لسه اذا يريد اخونا يجيبلنا دجاج يقطع من مصروفه...حجتها وطبت للمطبخ
... جريت حسره وكلت بداخلي... يارب افرجها علينا..
صار الليل تعشينا واخذت علاجي لگيتها اخر حبايه لازم باجر اجيب علاج كملت و اتصلت على حياة حجينا شويه ونمت
لثاني يوم الصبح كعدنا نتريك
كلتله... مقدام اليوم اريد اروح يم حياة
مقدام... ان شاء الله من ارجع
... هزيت راسي باي
كمل ريوگ غسل ومشط وطلع
للظهر اجه كلتله... تاخذني لحياة
مقدام... ماشي
للعصر بدلت اني وسالي ورتيل ورحنا اخذنا بسيارة عمران ضلو يخابروه يدلوه الى ان وصلنا لمنطقه بيوتها حلوه وراقيه
وكفنا يم بيت برا بيه حراس اثنين ومبين بيه زرع يطل ع الحايط شكله حلو
وكفنا الحارس كال... انتو منو؟
مقدام... احنا نعرف رشم
الولد كله... لحضه خابر رشم كله.. تم وفتحلنا الباب كال... تفضلو
طبيت البيت حلو والعجبني بس اباوع للحديقه جريت حسره يمكن لو سمسم عايشه جان حيكون هذا بيتها واطفالها
يلعبون بهالحديقه
طلعت حياة حضنتني كلتلها... لعد بيبي وين؟
حياة... نايمه جوا فوتو
طبينا وسالي كالت... ابقى هنا اخذ صور
وسوت جلست تصوير بالبيت
حياة ضيفتنا اني هنا تذكرت كلتلها
... حياة
حياة... هااا
حره... المرحومه ماعندها صور؟
حياة... عندها
حره... وينهن؟
حياة... عند رشم مو بس هي حتى الي جنا ناخذ صور والكامرا مالتها عند رشم
حره... عفيه اريدهن
حياة... ان شاء الله اخذهن منه واسوي نسختين
... ضلينا نسولف شويه وكعدت بيبي واستلمت مقدام اسئله وسوالف لوقت المغرب كال مقدام
مقدام... يلا نروح
مقبلت حياة كالت... ضلو تعشو
هو مقبل كللها... على غير مره ان. شاءالله
حياة... لعد خلي حره يمي
مقدام... لا والله مااكدر على غير مره ان شاء الله
سكتت سلمنا وطلعنا بسياره و سالي تصور بالشارع
باوعت لورا شفت سياره مضلله ورانا رجعت اسولف وياهم مر وقت وهم درت وجهي وشفت نفس السياره ورانا اني بسرعه كتله
... مقدام هاي شنو السياره لاحكتنا؟
مقدام... ياهي
حره... البيضه
هو باوع لورا يشوفها رتيل
كلتله :- لتسوي حادث
هو ضل تركيزه عليها
عين عليها وعين ع الشارع
اني لزمتني رجفه كالت رتيل
... عادي خاف نفس طريقنا لتخافين
مقدام... هسه اعرف غير طريق طب لغير فرع مشت السياره لكدام مالحكتنا
رتيل كالت... شوفي متوهمه راحت
اني حطيت ايدي ع كلبي كلت... الحمد لله متحلكنا
رجعنا وصلنا لمنطقتنا اتصل عمران كله... عفيه جيبلي السياره
مقدام.. تدلل
هو بيت عمران صاير قبل بيتنا رتيل كلتله :- انطيهيا واحنا ننزل نتمشى حتى هم ناخذ علاج حره من الصيدليه
هو كالي... حره تكدرين تمشين؟
حره... اي عادي
نزلت يم بيت عمران خابره طلعله عمران سلم عليه وكله
... تفضل تعشى
مقبل كاله... ع غير مره
وتسالمو واجه مقدام مشينا كلنا سويه وسالي ع اساس مسويه فلوك تصور وتضحك وتشاقه وكل شوي كالت
سالي... باع النفخ تفشلت الذاكره مال موبايلي خلصت
وكف مقدام جاب العلاج واجه
وصلنا لبيت مرتضى ومصطفى
كالت سالي... ملاحظين مرتضى مموجود هالفتره
مقدام... ديتعالج
سالي... من شنو؟
مقدام... مريض
سالي... وااو شهالمعلومه اول مره ادري المريض يتعالج
هو ضحك طبينا للبيت كال... الحدبه الي بظهره تاذيه
سالي... صدك
مقدام... اي والله مصطفى كال يوجعه ظهره حيل اخذته للدكتور انطاه علاجات ووصاه يلبس مشد
حره... هو ليش هيج ظهره احدب؟
مقدام... ماادري والله
رتيل كالت... الله يشفيه خطيه حباب
مقدام كللها... كلش حبابين
سالي كالت... الله يرزقهم على كدا نواياهم
طبينا ماما هنا سوتلنا رتيل اكل واكلنا ونفس الروتين اخذت العلاج واتصلت على حياة
لثاني يوم جان عادي
مقدام من الصبح طلع لشغله وقت الظهر
رتيل داتكلي اني كاعده يمها ع الكرسي بالمطبخ
اندك الباب راحت سالي تفتح الباب سمعتها صاحت
....يماا هاي شبيك ..
رتيل ركضت برا اني كمت بسرعه اسمعه يكوللها :- ماكو شي اهدي
طلعت ومن شفته لا اراديا صرخت وجهه كله دم مبين مضروب وقميصه مشكك وعينه زركه
كمت ابجي
طلعت ماما تهدي بينا رتيل ركضت تجيب الگطن سألته :- شبيك شصار وياك
هو كال :- مابيا شي سويت حادث بالسياره وعدت سلامات
رتيل صاحت :-يمه سوده بوجهي
مقدام... مابيا شي لتخافين
ضلت ماما تسأله كلتله... ضربت سياره واحد خاف يشتكون عليك؟
مقدام... لا اني انصدمت بالعامود محد تاذى
كلتله رتيل... عينك لازم تروح للمستشفى
مقدام... لا ميحتاج مبيها شي
ضلت تلح رتيل وهو مصر ميروح للمستشفى
رتيل عقمتله جروحه وهو سبح وغير ملابسه وكال :- بس انام
نام شويه وراحت سالي تلمسته لگته صخن حيل كالت... لازم يروح للمستشفى مترهم هيج يبقى
كعدته رتيل كلتله...گوم خناخذك للمستشفى
هو مقبل كللها... بخير مابيا شي
سويناله كمادات وبقينا فوك راسه لليل كعدناه ياكل
شويه خفت حرارته كملنا وشربنا جاي دانفرش حتى ننام اندكت الباب اجه عمران صديقه ماما تلكته سلمت عليه وضلت تساله عن الحادث وهو يجاوبها بارتباك
شويه وطلعت تركتهم
سوتلهم رتيل جاي رحت حطيت اذاني احاول اسمع مسمعت شي اصواتهم ناصيه شويه وعمران راح
لثاني يوم تريكنا وكملنا شغل كعدنا سمعت سالي تلعب بالموبايل كالت
:- عزا هاي شنو
حره... شنو؟
سالي... السياره البيضه صدك جانت ورانا من طلعنا باوعن
مقدام سحب الموبايل منها بسرعه وكلتله... باوع الطريق هذا صورته بالروحه وباكثر من فيديو طالعه
اني كلبي وجعني
رتيل كالت :- معقوله خاف صدفه..؟
مقدام... صدفه روحه ورجعه
اني حطيت ايدي على كلبي كتله... هذا منو
هو باوعلي كال... لا لتخافين يمكن صدك صدفه او مو نفس السياره
سالي... لا هاي نفس السياره
هو كللها... لعد اكيد صدفه ماكو شي ماكو شي
حسيت عليه ارتبك حيل
حره ... اخاف واحد من الخطفوني
مقدام... لا لا لتخافين مو هم
اني بقيت اركز بالفيديوهات بهالاثناء اتصلت حياة جاوبتها
مقدام كام طلع لبرا يخابر سولفنا كلتلها ع السياره كالت
حياة... عزا منو هذول
كلتلها... مااعرف
حياة... لتطلعين وحدج حره
حره... مدا اطلع والله
سكتت كتلها كلبي يوجعني
حياة... لا لتخافين كلشي ماكو هاي من الضوجه اني هم ضايجه باجر اجي
حره... خاف خطر عليج
حياة... لا يمعوده شكو قابل هو مشعل وانسجن
حره... مو جماعته برا
حياة... ميشتروه بفلس بعد فلوس وماعنده
سولفنا شويه وغلقنا طلعت دااروح للتواليت سمعت مقدام يخابر بصوت ناصي يكول
:- مادري معقوله هم الضربوني
دار وجهه شافني كال :-السياره كملتها وغير الموضوع
اني ضل ببالي الموضوع شنو اخويه انضرب لو سوا حادث دخيلك ربي لثاني يوم الصبح اجتنا حياة بس حيل ضايجه طبت سلمت علينا هي وبيبي خابرها رشم يحجي عليها اسمعها تكوله
:-اختنكت اريد اطلع احس شي نايم ع كلبي
اخر شي كلتله:- لا اليوم اريد ابات هنا
هو وصاها كللها... لعد لتطلعين
كلتله... ماشي
كعدنا سولفنا شويه وكالت :- عندي غراض ببيتنا تعاي وياي ناخذهن
كلتلها... تمام
رتيل... انتظرن البس اجي وياجن
حياة... ميحتاج حنطفر من السياج خمس دقايق ونجي
رتيل... ماشي
... صدك حياة طفرت من السياج ومدتلي ايدها طفرت نزلت لبيتهم صاير تراب هي فتحت باب الهول وطبت للغرفه هم فتحتها تباوع لزاويا الغرفه وكالت
:- الله شكد احب هالبيت كل ذكرياتي الحلوه بيه
وضلت تباوع بكل زوايا البيت وتمشي كعدنا بالحديقه الورد ميت كالت :- صدگ الدار گبر بلا اصحابه باعي الورد يابس
حره... اي مع الاسف شكلهن جان حلو
كعدنا بالحديقه باوعتلي لابسه اسود كالت... حره مااحب الاسود
حره... ليش
حياة... مااحب الاسود احسه يرمز للحزن
حره... وااحنا حزينات على سمرا
حياة...ويمكن سمرا حزينه علينا
حره... ليش حزينه علينا
حياة... هي بالجنه واحنا لسه بالطريق ماكو احد خطيه غير العايشين باوعتلي وكالت... الميتين ارتاحو
حره... مو كلهم
حياة... طبعا احجيلج عن الناس الطيبه ابتسمت كالت. مثلنا.. ورجعت باوعت للورد كالت... لتفكرين الموت شي سيء بالعكس حلو كلش هم تعيشين بس بمكان ثاني وحياة احلى هناك تلكين العداله الي ممكن متلكيها هنا
ماكو ملامح حزن هناك
ولا ضجه
كلشي نحبه نلكاه ورا الموت
حره... اسم الله ليش هيج تحجين؟
حياة... بس فكرت ليش العالم تخاف من الموت
حره... نخاف نبقى وحدنا بلا اهلنا
حياة... بس الله ويانا وهو ارحم بينا من امنا سكتت رجعت كملت... حتى الدانعيشه هسه الله
حيجازينا عليه متاكده
كلما صبرنا
كلما بنالنا قصور هناك
حره... ان شاء الله
سكتنا كلتلها... حياة
حياة... هااا
حره... شمدريج ان الي قتل سمرا ابوها وابن عمها واخوها ليش جنتي واثقه كلش من تحجين
هي جرت نفس وكالت... لما وصلت لبيت سمرا جانت لسه بيها نفس وكالتلي ابوي واخوي والشيطان هيج سوو وباخر شهكه كالت لتضيعون حقي
حره... الشيطان؟
حياة... اي جانت تكول عن ابن عمها شيطان لانه يسكر ويزنى وكدام العالم يتعبد
حره... الله يلعنهم ويحرك كلوبهم مثل ماحركو كلوبنا
صفنت شويه كالت... طول هالسنين افكر بالحكمه الي اخذتني للموصل ورجعتني منها بعد دخول التنظيم
شفت هوايه دم بذيج السنه
... جرت نفس كالت :-الموصل راح تبقى امنيه بداخلي دائما
حره... تحبيها؟
حياة... كل الخير بيها شلون مااحبها..دمعت عيونها كالت... جان كلشي صعب
اول رهبه...
اول دگة گلب
لما اسمع صوت الانفجار..
الخوف بالعيون البريئه..
واخر نظره
كلها جانت صعبه صعبه حيل
النار والدم والتجاعيد والصراخ العالي
جنت اسأل يارب ليش عشت كل هذا
وباليوم الي وصلت يم سمرا ومسحت الدم من على وجهها عرفت الجواب
حره... اني بجيت هي نزلت دمعتها كالت... كله مقدر من يوم نولدت لاني جنت اخاف من ضلي الله مهدلي
وقواني حتى اتحمل اشوف هالمنظر گتلج گبل وارجع اگول
"كُلشي الله كاتبه بيه حكمه النا"
حره... انتي محجيتيلي شي عن الموصل
حياة... ولا راح احجي
حره... ليش؟
حياة... هيج جروح احتفظ
بيها لنفسي
حره... بس احب اشاركج بيها
حياة... الحجي مراح يفيد بشي شكد مااحجي محد حيفهم الي عشته لانه ماعايش وياي
لاسمع صراخ
ولاشاف الدم
ولا اشتم ريحة الحرك
ولاحس بغصة انسان
لهالسبب الحجي ميفرق احتفظ بهالجروح لنفسي كل
شخص عنده همه
حره... زين وجيرانج شصار بيهم ابتسمت كالت:- اشتكيت
كلتلها... يا شو مكايلتلي..
حياة... مااحب احجي عن الموصل
حره... شلون اشتكيتي
حياة... مو كتلج جانو يحجون حتى يقتلون ضابط
كلتلها... اي
حياة... بلغته عنهم وهو بدورو
سحلهم
حره... وصدكج؟
حياة... اي لان هم اصلا كانو هاربين
حره... عزا طلعتي مو هينه
ابتسمت كلتلها... ومنو هالضابط
حياة... رجال يخاف الله.. باوعت للورد ابتسمت كالت... ساعدني هوايه جرت نفس وكالت... الله يذكره بالخير اذا عايش
حره... امين
حياة... يشبه رشم حيل بصفاته
حره... الله يوفقه
فزت من الشرود كامت كالت:- تعالي وراي
رحت وراها فتحت الكنتور طلعت دفتر كالت
:- خليه يمج
حره... شنو هذا
حياة... الدفتر هذا بيه تواريخ من حياتي خليه عندج
ابتسمت
فتحت اول ورقه رسم عادي كالت :- بعدين اقريه يلا نرجع
حره... تمام
دنرجع نعبر من السياج كالت :-خلي نطلع من الباب ضوجه
حره :- تمام
فتحت الباب ووگفت كدام بيتنا قريب المحل صفنت وضلت تباوع ع المكان وعلى زوايا وكأن تريد تحفظه كالت بصوت هادي
حياة... حره
كلتلها... هااا
حياة... تتذكرين من جنا صغار هنا التقينا وبوقتها هيج تصاحبنا... ومدتلي اصبعها
كلتلها... اي... ومديتلها اصبعي وشبكناه كلتلها... اتذكر اجيتي داتدافعين عن سالي
ضحكت مشت شويه لكدام وركضت للفرع رحت وراها كالت... وهنا جنا نلتقي لما ابوج مجان يقبل
ضحكت كلتلها... اي جنت حيل اخاف منه ليضربني
هي ابتسمت كالت... من صغرنا نخطط.. مشت لمكان كالت... هذا بنوه تتذكرين قبل جان بلوكات ونكعد هنا نشكي ونبجي
حره... اييي...
هي ضحكت ورجعت سكتت باوعتلي عيونها مدمعه كالت... العمر يمشي بسرعه
حره... اي والله
محسينا ع الوقت
كالت... يلا نرجع
مشينا عثرت بحجر ووكعت وكع الدفتر مني اجت كالت
:-اسم الله
اني بسرعه اخذته نفضت عنه التراب كلتلها... رجلي وجعتني سندتني ورجعنا للبيت يمنا خالتي ام شذر وشذر يتعشون
الدفتر بيدي طبينا بيبي كاعده هي وخاله وماما شافتها حياة كالت
... ياا نسيت ملابس بيبي مجبتهن ولا قفلت البوب
حره... اوكفي اجي وياج
حياة... لا ميحتاج خمس ثواني اسدهن واجي
بيبي كالت... لا يمه لاتروحين وحدج
حياة ايدها بايدي مشت كالت ... ماتاخر دقايق وارجع
لزمتها كلتلها. خلي اجي
حياة... رجلج يمعوده علما تضمين الدفتر اني ارجع
حره... تمام
شفتها عبرت السياج وكفت ع البرميل واشرتلي بيباي وسوتلي گلب بايدها
اني رجعت اخذت علاجي جان منطيني مسكنات من اتنفس عندي وجع
كعدت ع القنفه والدفتر بيدي جنت مسطوره مددت وغمضت عيني
سمعت بيبي كالت... خلي اشوف حياة
كامت طلعت واني رجعت غمضت جنت بين الصاحيه وبين النايمه ماادري شكد مر وقت سمعت صوت صراخ صوت بيبي
فزيت وكع الدفتر ع ورقه مكتوب بيها حياة بخط جبير
ركضت الناس متجمعه برا وهوسه
حسيتني بحلم سمعت بيبي كالت بصراخ مرعب
هد حيلي
وحطم گلبي
وهي تگول.... ضااااااااع تعب سنييييني....يتبع....
_____________________
ااااخ يربي متدرون هالبارت شگد موتني قهر
اكتب وايدي ترجف ودموعي تدير
يربي رحمتك 💔💔😭
بنات حياة اسمها الحقيقي نفسه حياة
اقرولها الفاتحه
حياة بنت ادم وحواء
الله يلعن كل ظالم 💔
سمسم انولدت قبل حياة ب3اشهر
سمسم ماتت قبل حياة ب3اشهر
💔
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!