رواية "هل كانَ حُلماً...؟
(العِراق_المُصغَر)
بقلمي... نورس _قاسم"
______قراءه ممتعه_____
حره :- اني بسرعه كمت اركض فتحت الباب النسوان كاعدات بالهول صحت هند اجت يمي كتلها... وين البدله؟
هند... هو حطيتها بالغرفه
طبيت للغرفه وشفت البدله ع السرير جريتها وانصدمت النمنم البيها كله مگطع و متطشر بالگاع
صرخت :- هاااي منووو سوااا هييج عمممه
طبن النسوان بالغرفه انملت ويسون... شكو وشصاير شبيها العروس
اجت رتيل شالته تشوفه كالت :-حسبي الله عليجن ليش هيج
اني بجيت وصحت كتلها :- بدلة عرسي تخبل راحت خربت خررب عرسيييي
طيبه دفعت هند كالتلها... شسويتي يولو البدله انتي اخذتيها
هند كالت :- معليه انه عمتي عقيله رادتها وجبتها
عقيله... ياا هند انه شوكت ردتها غير جنت اشتغل بالمطبخ!
وحده من النسوان كالت... اي صح وانه وياج
الثانيه كالت... ليش هيج خطيه صدك ناس حاسده خربتن عرس البنيه
طبت سالي ووراها الحربايات الاثنين ونسوان كالت... شكو
شافتني ابجي كالت... شكوووو ولج!
كتلها... خربن بدلتي
كمت دفعت هند كتلها.... انتي اخذتيها والله لاكول لاخوج عليج عبالج اني اخاف منجن لا والله وحقي اخذه مربع
صاحت عمته ثناء... صوتج يولي وهي شكو بدلتج حطيها يمج واسكتي
شكو جاي تتبلين عليها
سالي نترت بيها... سدي حلكج انتي الحجي ماموجه الج
ورجعت باوعت لـ هند دفعتها كالتلها... هسه تكولين ليش هيج سويتي لان صبري بدا ينفذ وراح امسح بيج الكااع خوووش
بهالاثناء اسمع النسوان يكولن... شكو
و غيرهن يجاوبن خطيه خربن بدلتها..
شلون راح تعيش
وياهن..
ميخافن الله...
واني احس كلبي احترك من القهر هند رجعت دفعت سالي كالتلها :-وخري عني جاي اكلج معليا
عمه عقيله انتي مادزيتي ترديها؟
عقيله كالت... يا شوكت دزيت ليش تجذبين هنددد
هند... مااجذب والله... وباوعت لام احمد كالت... ام احمد انتي ما كلتي عمتج تريد البدله تا ترتبها؟
ليكون انتي سويتي هيج؟
ام محمد بلعت ريك كالت... ولج هنوووود لتجذبيين وتذبيها برااسي
دفعتها سالي ولزمتها من شعرها كالتلها... اني الج تخربين عرس اختتتي يل بلا اخلاق يالرخيصه بس والله اندمج
... وضربتها راجديين
التمن النسوان يفكنها بس سالي موتتها كتل كوا سحبنها منها وعمته ثناء تكوللها
... يا يا يا دحكن الصلافه دحكن وخري عنها
سالي دفعتها كلتلها... صوتج مااسمعه اخلاق سزز
ثناء... تغلطين عليااا اشعل اهلج والله يالادبسز
دفعتها اني كتلها... طلعي براااا ولا تشوفيني خلقتج اصبريلي اذا مااهجج من البيت فلا اسمي حُره
والله لاخلي ابو السباع يخزيجن اني الجن
عبالج ماادري انتي وهالتس هيج سويتن اني الجن
صحت... ياجلبات ياحقيرات
ثناء... ونحننن شكوو جاي تذبين مصايبج علينا
طيبه صاحت... اطلعييي براااا عمه وتجفي الشر والا والله هسه اخابر عمي رعد واخزيج كدامو
ثناء باوعتلها بدهشه كالتلها :-تهدديني يطويبه؟
تصيرين وياها ضدي!
صاحت طيبه... اعرفج انتي شني وشكد عندج حقد ونحاسه والكل هينا يشهدلج
خربتي فستان البنيه واليوم عرسها جان خفتيي الله
سويتيها باختي وهسه جاي تعيديها بس انه الجج طلعيييييي براااا والا اخابر اخوتي وعمامي والله
فـ اطلعي وسدي السالفه وخليها هاليوم يمر على خير
هند... نصي صوتج لاتحجين هجي عمه ويا...
قبل لا تكمل اندارت الها طيبه صفكتها راجدي كالتلها... ولا حرف
داترد هند دفعتها طيبه بأتجاه ام احمد الي صفر وجهها من الخوف كالتلها... ويااهن للبيت يلااا مااريد ادحگجن هين اليوم اخزيجن بالله الكريم
النسوان جرنهن طلعنهن واسمعهن يكولن... روحن وتكفن المشاكل خطيه خرب عرس البنيه
اني كعدت ع الجربايه اباوع للفستان وابجي بصوت عالي رتيل كالت
:- يمه شكد جسرات شلون انطيتج اني يم هالحيايه
باوعتلها ابجي وكمت اركض للغرفه الثانيه اجن ورايه البنات والبيت صار بيه ضجه والنسوان يحجن اخذت الموبايل واني فاحطه من البجي اتصلت على رشاش مرتين ماجاوب
طيبه كالت... هيدي هيدي يولو المكياج خرب
ماما كالت... لتخافين هسه ندبرها نجيب غيرهه
طيبه گالت... خطيه لتكوليلو
مرديت عليها اتصلت عليه للللمره الثالثه جاوب قبل ليحجي كتله واني اصرخ :- شوف شون بيااا خربن بدلتييي مال الزفه خرررب يوم عرسييي... احجي واشهك
كال... هيدي يولو وفهميني
كتله... هذول الحربايات الي ملفيهم ببيتك شككو بدلتيي الحلواا
كال... عمتييي
كتله بصراخ... واختك وام احمد كتلناهن وطردتهن خاف تصير شيخ برااااسي وماتقبل والله اذاااا شفتها اكلها باسناني والله
... احجي واحس نار تحرك بصدري وكعدت ابجي
كال... هيدي شبيج
جرت الموبايل مني طيبه وطلعت برا تحجي وياه واني كعدت ابجي ع الجربايه رجعت طبت كالت :-لتخافين راح يجيب هو البدله اهدي
حره... ذيج البدله تخبل
... باوعت لرتيل كتلها... ماتكدرين تعدليها
كعدت يمي كالت... شاعدل منها غير مفصخاتها
سالي كالت... اذا ماافصخهن فلا اسمي سالي
عمته عقيله كعدت كبالي كالت... خاله بالله انه لاردت البدله ولا شي وتفاجئت مثلي مثلجن
طيبه كالتلها... ادري بيج هذن الجذابات انه الهن
كومتني ماما كالت... هسه لا تتبجبجين خلي نلبسج بدلات الحنه ونرتبلج المكياج لبين ما يجيولج بدلة العرس
وكعدتني كدام المرايه كالت... هي واضح الزفه متأخره اليوم متاخره
طيبه كالت... صح هيدي ولا تخربيها
و كعدت تعدل بمكياجي كتلها واني اشهك... ما ملاحظه شكد متعسر عرسي؟
كلشي دايخرب
طيبه... من عيونهن فكس كون لاتبجين لا تخربين المكياج هيدي... ورجعت تعدل
ماما كالت.. من قهرهن هيج سون ولج وعلى عنادهن اضحكي واطلعي ركصي وذبي لحم
وابو السباع راح يجيبلج بدله جديده خلي يموتن بحركتهن
سالي كالت... اتفق وبشده
اكيد النسوان يوصلن اخبار مثل رغوده خلي تطك مرارتهن
حره... مو بيدي انقهرت
طيبه كالت... اقهريهن اكثر وانتقمي منهن
رتيل كالتلهن... لا تضغطن عليها اكثر عوفنها
عدلن المكياج ولبسني البدله وكعدت بالهول بس العرس كله والنسوان كلها تحجي ببدلتي ويحجن على الحربايات واني حيل قلقت
خاف مايجيبلي بدله لو يتاخر لو شي
الافكار اكلت راسي اكل اجت سالي تركص هي ومروه جرتني وياها كتلها... مااريد ماالي واهس
سالي... انجبي وحرگي گلبها غصبا عليها صرتي تاج راسها واخذتي الي جانت تحلم بيه هالرخيصه اضحكي اضحكي
وقرقرتني ضحكت كتلها... شبيج
اجن ماما ورتيل وعمته عقيله وطيبه ركصنا كلنا سويه وصار واهس فتحن الديجي
طلعو ساجده عبيد
اخذني غيرت البدله ورجعت وهم ركصت وطلعت اغنية
لو بص فعيني مره بس هيحس اوام بشوئي ليه
لو بص فعيني مره بس هيحس باني دايبه فيه
لو ألي تعالي ئلبي دق
سالي تغني وتقلد اشرت على گلبها كملت الاغنيه
"انا اروحلو اوام ماقولش لأ"
رتيل ضحكت گالت... تنطبق
عليج هالاغنيه صدگ كلما اضيعج الكاج يمه... ضحكت بصوت عالي
رحت داغير البدله بدلتها وطلعت رجعت كعدت كالت طيبه... حدري
حره... ولج تعبت
طيبه... انجبي
وجرتني
توني كمت طبت خالة رشاش الرحنالها بتكريت ضحكت بسرعه رحتلها حضنتها هي كالت
... شهالحلا كللووووش وطشت جكليت
حره... تأخرتي
كالت... هاذ ابن الكو***د الجابني ضيع طريقو اجيت اثرمو
ضحكت طيبه جرتها كلتلها... حدري نركص
كالت... انه مالي بهيج ركص الجوبي احلى
المره كالتلها... هالرگصه تلوگ للزلم
كالت خالته... حدري نرگص وسدي حلكج
باوعت للكاعدات كالتلهن... وانتن شني جايبيجن تصفگن مني مايعرف يصفگ كومن يلا
حره... مااعرف خاله
كالت... انه اعلمج سهله تعاي ولزمت بايدي وركصنا بالاول تعثرت لزمتني گالت... يالفاهيه حتى بهاليوم ماتدبريها
علمتني الى ان ضبطتها وكلنا ع نفس الرگصه وهي لازمه السبحه وتفر بيها والنسوان يضحكن يگوللها ... تذكرين بجويبر من يدبج
اني فرحت وخف قهري شويه لان صدگ صار حلو الكل يركص ويهلهل ويطش جكليت سون دائره جرتني سالي بنص الدائره وگمنا نهز جتف اثنينا نفس الحركات وماما تطش علينا الجكليت
ورتيل تهلهل درت وجهي شفت طيله طلعت
باوعت رتيل كتلها...وين راحت طيبه؟
رتيل... رشاش دز البدله
تذكرت بدلتي انقهرت جرتني خالته
كالت :- هينا عقل لو مطي... وتأشر على راسي... اكو وحده ماتحضر البدلات گبل بيوم شني هسه تجيبيها؟
طلع بيها غلط ارفسج هين هسه؟
حره... خاله جبتها تخبل بدلتي
سالي كملت عني كالتلها... بس عگاربكم خربنها شنسوي احنا
هي باوعت لسالي كالتلها... شني هاللسان اليخبل يولو يحتاج گص
ابتسمت بحزن كتلها... خاله الحيايه خربنها فستاني يجنن
گالت... اشتعل عمك يا رشاش شوكت هالحجي
حره... قبل شوي
كالت... وماشكيتيهن؟
سالي جاوبتها... على بختج خاله مسحت بيهن الكاع وطردناهن وغمزتلها
كالت وهي تاشر على سالي... هاي الحريم التعجبني
وباوعتلي كالت... لاتزعلين وتخربين فرحتج بالقران تخلص الزفه ارجع انخلهن نخل اطلعهن مثل الكمله من الطحين
كالتلها سالي... اي واني كلتلها اضحكي واركصي وقهريهن
خالته جاوبتها وهي تمد ايدها لسالي بمعنى حضن... حدري يولو عجبتيني انه وياج نصير حزب
حضنت سالي
وكالت... حزب الشكاگات التحجي نشگ الخلفوها
سالي ضحكت كالتلها... موافقه
دفعتها كالتلها... انجبي سائلتج عن رأيج انه
ضحكت دارت وجهها... وينها هاي طويبه
طبت طيبه بيدها البدله اشرتلنا طبينا للغرفه گالت... رشاش دزها
طلعتها باوعتلها حلوه بس مو مثل الاولى ذيج نازكه كلش بس شسوي رضيت بيها
لبستها وكلهن كامن يصلن ع النبي
وخالته كالت... واخيرا صرتي حرمة ابو السباع
زرف راسي من الحجي بيج
ضحكت بصوت عالي
ابتسمت وكفت كبالي باست راسي وباوعتلي گالت... اوصيج بوليدي ديري بالج عليه
جرت نفس وكالت "لاتضيعين زلمه مشورب صار يحچي باشتياقو الچ اكثر من امو"
ضحكت گالت... ترا لو سمعتج ماذيتو بالعصا وعلى ضهرج
هزيت راسي حضنتني باوعتلي ماما كالت... اللهم صل ع النبي بنتي بكل الاحوال جنها كمر
ضحكت سالي كالت... ضارة نافعه هالبدله تجنن
كتلها... مو مثل الاولى
طيبه كالت... انجبي تخبل
حضنتني رتيل كالت... اختي وبنتي صارت عروس الكل يغار من جمالها... حضنتها
صاحتني خالته ورحت كعدت الزفه تأخرت حيل لليل يلا اجت جابولي البركع والكل لبسو وطبو
لزم ايدي مقدام باسني من راسي كال... اختي وروح روحي العروسه الحلوه
حط ايدي بايد رشاش وكاله... انطيتك ورده حافظ عليها دير بالك تردها بلون باهت
گاله... وردتك بالحفظ والصون اخليها ببطن عيني
وهنا بدا طش الجكليت على راسي وهو لزم ايدي وطلعنا وصوت الهلاهل والضحك
جان شعور حلو على قلق على توتر احس رافعيلي بدلتي من ورا انفتحت باب السياره وصعدت بيها
صعد من الجهه الثانيه رشاش باوعت بكر السايق خالة رشاش واكفه اجت سالي رادت تكعد بـ
السياره مال الزفه ضربتها خالته على ايدها
سالي كالت... اووختي
كالتلها... انجبي ورحي هناك هاذ مكاني وماابدلو
سالي ... مو اريد اصور حتى اقهر العدو
خالته كالت... شني مستهزئه بيا جيبي
واخذت موبايلي من ايدها كالت :-هسه اخذلها صور شكاكيه روحي هناك
سالي... ترا اني اختها احق منج
جاوبتها خالته... انجبي انه كوا قنعت رتيل
دتجاوب سالي جرها عثمان كاللها :-تعاي خواتج وياي نحن وراهم
وجرها اسمعها تكوله.... لو تدري شصار
كعدت يمي خاله كالت وهي تحرك بالموبايل... خبصني بهالصخام شني قحط صوره
وكعدت
فتح الباب اوس دايكعد جره حازم گال... هذا مكاني
اوس... انجب بعرس بكر انت كعدت هينا
رشاش صاح... اهوووووو
حازم دفع اوس كاله... هاي عليمن انجب
ليش تخليني اهينك
نتر بيه اوس... ما عاش الي يهين ابن ابوي
حازم... وينو عمي رعد خلي يلزمك حدودك
ديجاوب اوس صاحت خالته... يولو شون تاليها سدو حلوگتكم لا احط السجينه بطـ....
قبل لتكمل صاحو... هوب هوب لسانج
كالت... يجبروني افشر وبعدين يكولون لتفشرين كو**يد
اجه ابوهم كعد كاللهم... يلا روحو وطردهم
كال حازم وهو يسد الباب ... استلم ضلينا مثل الجلاب
جاوبه اوس... لو مكعدك بحضني ومتحمل ريحتك الخايسه اشرفلي
حرك بكر السياره واسمع حازم
يصيح... ياخايس انه ريحتي خايسه
ومشت السياره كالت... هذول الكو**يد هم تعاركو هسه لو اشگ طيا**هم يبطلون هالسالفه
ضحك رشاش كاللها...ولا تلزمين لسانج ابد
گالتله... اصعب منها ماكو
طلعت الموبايل كالت... خلي اشوفكم تصوري
وطكتلي صور شافتني مرتبكه كالت... عدلي البركع
وشالته وعدلته كالت... احضنها يولو تراها حرمتك
ضحك بكر كاللها... لا تحرجيهم يولي
كالتله... سد حلكك انت اذكرك بعرسك شسويت اجيت تاكل حرمتك
دتحجي كاللها رشاش... ابوس راسج بس اسكتي بالله راح تخرب اخلاق حرمتي
ضحكت وصورت وشوفتنا الصور عباره عن خشوم ولون ابيض مال البدله كاللها رشاش... يابويه شهالصور التخبل مال تصيرين فوتو غرافي
كالتله... اللهم ان كان سحرا فاابطله
ابتسم كاللها... مصور يعني
كالتله... اي احجي بالعربيه لا تصير جنك اوس تلزك كلمات انكليزيه
ضحك كاللها... صار
خذونا للفندق واخذنا صور وصعدنا للفندق ودعني خواتي ووصني وتركن غراضي تقربت عليه خالته حضنتني وكالت بهمس... رايحه اخرب خلقهن اكثر من خراب خلقتج بالتصوير الصورته الج
ضحكت مجامله حسيت بقهر لان خربن عرسي ذاك الفستان حبيته كلش كالت... لاتزعلين
وبوستني وطلعو
تقرب رشاش شال البركع وباسني بعيني كتله... هالحربايات الملفيهن ببيتك خربلي عرسي وفوكاها ينترن ويصيحن ماشفت بصلافتهن
هز راسه كال... متعود على سوالفهن
حره... بس اني مامتعوده ولا اقبل بهالشي
كال... احاسبهن وعيونج وباسني بعيني
كتله... رشاش طلكها
باوع بعيوني كال... احاول
حره... تحاول شنو انت كتلي تطلكها
كال... اكيد يجي يوم وتتطلك
حره... وشوكت من اعجز؟
ضحك كال... نعجز
حره... اني مااتحمل هالوضع طردهن من البيت وهاي تطلكها شنو انت تضحك عليه؟
هسه داتكول احاول؟
كال... انه ما كلت هيج
بجيت كتله... انقهرت
رفع راسي مسح دموعي گال... حقچ اخذه منهن وعد والحرمه ماتبقى على ذمتي بس يحتاج صبر
حره... البدله جانت حلوه احلى وحده بالسوك
كال... اعوضج والله
مسحت دموعي كتله... تطلكها
جر نفس كتله... ماتصير بينا علاقه الا تطلكها
هز راسه كتله... شيضمنلي حتتطلك يمكن هم ماتكدر تطلكها وابقى اني بحيرتي
كال... ماتبقين وعد
جر نفس كال... يجرالج الي ترديه مااجبرج ع شي مامقتنعه بيه
رفع راسي كال... مااخذج الا ادحك لمعة حبي بعيونج
مسح دموعي كال... كافي لا تخربين هاليوم
حره... هو خرب اصلا
گال... انجبي ماخرب
حره... لا المكياج ولا البدله صارن عليه
گال... بس انه هين.. جر ايدي كال :-انه اجيت وصرت الج
ضحكت كال... اخ يابويه شهالضحكه شگت نص گلبي
حره... طالع حلو
گال... وياچ
ابتسمت رفع راسي باسني من حنچي گال ... إذا لگيتي اليعشگج مثلي عاتبيني...
ضحكت وحضنته كال... نزلي البركع خلي ننزل
حره... وين؟
گال... للسياره
حره... ليش
مارد نزله وطلعنا وقفل الباب جرني ويشيل ببدلتي طلعنا بالمصعد كتله :-رشاش وين
كال... بالسياره اريد انه اسوق وياج اهلي حرجوني واجو بسيارتي بالزفه
ضحكت طلعنا صعدنا بالسياره اخذت موبايله ادور اغنيه مشت السياره وطلعت اغنية
يهنيالي ويا هنيالي.. حبيبي يمي هنيالي
ضحك و جر ايدي باسها عليت الصوت واني كمت اغني ويا الاغنيه بصوت عالي
اوعدني ابد لتروح عن عيني ولا لحظه
كال :- تأكدتي انه واصل لاقصى درجات الحب؟
ضحكت كتله... شلون؟
گال... متحمل صوتج وانتي تغنين
ضربته حيل ع كتفه وضحكت كال :-اخخ اشتعلو
فرك كتفه كال... تستقوين عليا شفتي خالتي ما هين
ضحكت كتله... اي
ورجعت اغني
يحسدوني ويحسدوني.. على حبك يحسدوني
كال... اخخ يابه
حره... والدليل السونه اليوم هالجلبات
ضحك بصوت عالي وباس ايدي كال... ولا يهمج يسون الي يسونه.. انه وياج اليوم وكِل يوم باقي مايبدا نومي الا بشوفة عيونج
ضحكت كرصني من خدودي طبكت حواجبي وغمضت عيوني كتله... اااي
ضحك گال... بنفسي من زمان
ابتسمت واخذت الموبايل صرت اطلع بالاغاني واغني الجو بارد والدنيا ليل وبس اني وياه اجتاحني شعور حلو
جمال الاجواء نساني كلشي حسيت اليوم يلا بدت حياتي
انتهى كل وجعي الفقر والحزن والحيره
باوعت لرشاش وابتسمت كلت بداخلي... صار الي سند ارتچي عليه بدون خوف
احجيله المخوفني والي مزعلني لان متأكده هو حيبقى وياي ويسندني
سواء بعلمي او لا مثل ما جان مرتضى المخبل
ضحكت ورجعت اغني بصوت عالي جان يضحك سكتت كال... كملي ليش سكتي
حره... مو مو حلو صوتي
گال... اي ويدوخني
حره... لعد اسكت احسن
گال... غني يااحلى دوخة راس
ضحكت ورجعت اغني صعدنا من الجسر كتله :- خلي ننزل نتمشى يم المي حبااب
گال... حتى تجيتين بالمي انتي وبدلتج
ضحكت كتله... لا والله بس حلو احب اسمع صوت المي
باوع كال... زلم يولو
حره... من الجهه الثانيه
گال... هسه كلش ماترهم انتي وبدلتج
حره... حباب نكعد
ضحك كال... ماشي ادحكلي مكان فارغ
ضل يدور الى ان وكف سيارته ونزلني كال... اوف منج يا وجع راسي
ضحكت ووكفت ماتقربت كثير حتى ماتتدمر البدله الجو بارد الهوا يخبل
حسيت نفسي بوسط فيلم رومنسي
باوعلي كال... تتذكرين السفره
ضحكت كتله... ماانسى هاليوم خلي نعيده
ابتسم واشر على عيونه لزم اديه كال... ذاك اليوم تأكدت من حبي الج
ضحكت كتله... شلون
گال :- اجيتج رماد من الحرگ رجعت مترمم وبگلبي نبض...
ضحكت كتله... صدگ؟
گال... وعيونج الاحساس الي حسيته بذاك اليوم رجع لهفتي للحياة ..
دمعت عيوني من الفرح گتله... واني بهاليوم حسيت بفرح
ضحك گال... وليش؟
حره... شنو ليش كل الاشياء الي احبها موجوده المي والبالون غزل البنات و..
باوعتله وابتسمت كال... وانه
هزيت راسي بـ اي ضحك وباوع لعيوني واني لازمه البرگع لافته ع ركبتي
اجت بنيه وابنها الصغير يضحك وضام ايديه ويباوعلنا بفرح وهي تباوعلنا وتضحك
باوعت لرشاش باستغراب وباوعتلها تقربت علينا كالت... الف مبرووك تتهنون بزواجكم ان شاء الله
جاوبناها... امين الله يخليج
كالت... ابني يريد ينطيكم شي... واشرت لابنها جان صغير حيل بعمر الخمس سنين
ضحك رشاش كله... تعال يابطل ليش واگف بعيد... وتقربله
الطفل فتح ايديه صفطهم مع بعض جانت كلها جكليت ضحكت باوعت لامه كالت... يحب العرسان وتاكدو حبكم كثير لان ماينطي جكليتاتو الا للي يحبهم
شاله رشاش وبوسه وطلع ٢٥ انطاهه اله كله... شسمك
گله الطفل... صگر
ضحك كله... ادعيلي الله يرقني ويجيني ولد هيج حلو مثلك
ضحك الطفل ورفع ايديه يدعي اخذته امه وراحت باوع للجكليت الي بيده وضحك وباوعلي كال :-دحكي نحن شكد حلوين سويه حتى الطفل حبنا
ضحكت وهزيت راسي بـ اي كتله :-والحلو دعالنا
هز راسه كال... يلا نروح
حره... خنبقى شويه
كال... لا الجو برد خلي نروح نتعشى
حره... وين بالفندق؟
گال... هسه تعرفين
وفتحلي الباب صعدت ومشت السياره وكفها يم مطعم كال... هسه اجي... ونزل
شويه ورجع كال... يلا
فتحلي الباب وساعدني كال... استري روحج هينا زلم نزلي البركع
حره... ماشي
مشينا كال... للطابق الثاني
حره... ليش
مجاوب صعدنا وكف كدامي شال البركع ابتسملي باوعت المكان فارغ ضحكت مشيت باوعت لجوا شفت الكاع طريق من الورد وبنهايته كتابه
مشيت اشوفها شنو
جان مكتوب.. توبازي
ضحكت وباوعتله كتله... شنو التوباز
ابتسم لزم ايدي وكال... حجر كريم يصنعون منو المجوهرات الغاليه مثلج
ضحكت كال... لمعتو حلوه كِلش مثل لمعة عيونج
ضحكت ونزلت راسي كتله... ماجنت اعرفه
كال... وهاي عرفتيه
باوعت بعينه كتله... هيج تشوفني حلوه مثل التوباز؟
ضحك كال... واحلى بكثير
ابتسمت كال... تعاي
وجرني من ايدي كعدت ع المائده جانت يم الشباك نشوف المنظر جانو محضرين اكل وحلويات ومرتبيه احلى ترتيب
ضحكت كتله... عدنا بالفندق
كال... حبيت اطلع عن الروتين التقليدي واسوي اليعجبني بهاليوم
ضحكت وكعدنا ناكل ونسولف ونتشاقه ماحسيت ابد بخجل او تقييد منه
بالعكس كملنا ورجعنا للفندق اول ماطبيت شمرت حذائي كتله
... كسر رجليه
ضحك كال... انزعي وارتاحي
حره... هو هم هيج
ضحك بصوت عالي كتله... ها شكو
كال... ماكو شي روحي
اني كوا مفتحه عيوني طبيت سبحت ولبست تراك وطلعت مشطت شعري وظفرته طلع من الحمام كتله... نعيما
كال... ينعم عليج
تقرب مني باوع ع الميز جان اكو مكياج وحمر اخذ حمره و جرني من خصري عليه ابتسمتله كال :-تذكرين من اجيتج بالنجف
هزيت راسي بـ اي كال وهو يحط من الحمره على شفتي على كيفه گال... بذاك اليوم جنتي حاطه هاللون على شفتج
حره... مجنت واعيه
گال... ادري جنتي يگول ماكله مرگه
ضحكت بصوت عالي گال... صوتج يولي
حره... اي
رجع الحمره ع الميز وعدلي الحمره گال... بس رغم هذا حبيت اللون عليج
باوعت بالمرايه مجان حاطها عدل عدلتها باوعتلها كال... اي هيج
حره... بذاك اليوم اجيت بسرعه صدگ جنت قريب مني
ضحك گال... اي
حره... اها صدفه حلوه
گال... لا ما صدفه انه حددت موقعج من الرقم
حره... والله؟
هز راسه كال... من كالولي مختفيه رحت وسألت وبيومها السايق كلي اكو بنيه جانت حالتها صعبه ووضعها غريب ماجانت شايله كروه وجانت راح تنطيني موبايلها بس انه رفضت
حره... اي
كال... عرفت انتي بالنجف بس خفت تكونين ضيعتي طريقج فـ طلعت موقعج دام الموبايل عندج
ابتسمت كتله... كل هذا صاير واني ماادري
باسني من راسي وكال... ما ضروري
تعرفين كلشي الضروري تثقين بيا وبس
ضحكت وهزيت راسي كتله... واني اثق بيك هوايه... وحضنته
مرت هالليله ونمنا لثاني يوم الصبح كعدني كال... بدلي وخنطلع
حره... وين؟
كال... مفاجأه
بدلت ورتبت الحجاب وطلعنا طول الطريق اسأله وين؟ ميجاوب گتله... لعد اهلك شلون
گال... گتلهم طالع لاتجون
حره... يا شلون هيچ
گال... رتبت كِلشي لاتخافين
حره... زين وين ماخذني
محجه تاخرنا هوايه بالطريق واني مافاهمه شي الى ان شفت لوحه مكتوب عليها "الموصل ترحب بكم"
فزيت وباوعتله متفاجئه كتله... احنا بالموصل؟
هز راسه بإي كتله... ليش؟
ابتسم كال... هسه تعرفين
لزمت ايده كتله... حباب كولي حباب
ضحك كال... بيبيتج بهيه رادت تشوفج وماكدرت تجي
باوعلي كال... وعدتها اخذج الها
ضحكت وبجيت بنفس الوقت كال ... ليش تبجين
حره... ما جنت متوقعه اجي بيوم لهنا وحياة ماموجوده
مسح دمعتي كال... دموعج غاليه لاتبجين ع كلشي
هزيت راسي وكف يم بيت كتله
:-هذا بيت بيبي؟
گال.. لا هذا بيت صديقي
حره... لعد ليش هنا وكفنا
كال... بيبيتج ابعد نرتاح شوي يمو
حره... تمام
ونزلنا دگ الباب فتح الباب واحد شاب شاف رشاش ضحك وحضن رشاش وحجه كلام ممفهوم استغربت رجع حجه وياي
... اهلا وسهلا تفضلو
طبينا كعدنا اجت امه استقبلتنا احلى استقبال جان بس هو وامه عايشين والي فهمته هم من اصل تركماني
بس ساكنين هنا من فتره طويله
كعدو اثنينهم يحجون ويسولفون رشاش كاله... اي يحيى شلونو شغلك
جاوبه يحيى... شگلك ياخوي انشمرت ع الحدود
رشاش... ليش؟
يحيى ... غير هذا الكلب شد وياي
گله رشاش... سهله مايطول هالوضع ان شاء الله
يحيى ... ان شاء الله
گاله رشاش... شني الا انه اسئل واجي ماتعرف تجي تزورني الا صدگ ماتستحي
گاله يحيى... لا بالله ماالحگ دحق رجلي اليوم يلا كدرت امشي عليها
رشاش... الحمد لله على سلامتك يابطل
گال يحيى... الله يسلمك
حره... ليش شصار وياك
جاوبتني امه... محاولات اغتيال يابنتي مايخافو الله
هز راسه كتله... انتو تشتغلون سوا؟
يحيى كال... لا مرت اخوي اني بالاتحاديه
حره... اها الله يحفظك
رشاش باوعلي كال... هذا بطل الو مواقف صارت بالسقوط لهسه القاده تحجي بيها
ابتسمت جاوبه يحيى كاله... حبيبي السبع ابو السباع
ضلو يحجون وامه جابت غده واحلى ضيافه الي فهمته قبل السقوط جان عايش بـ******لما صفنت وركزت هذا جان يداوم بنفس المنطقه الجانت عايشه بيها حياة!
غمضت عيوني بقهر وكلت... الله يرحمها ويوفقه
كملنا وطلعنا قبل لا نطلع يحيى كال لرشاش
... استودعتك الله
رشاش حط ايده ع صدره بمعنى الامتنان وصعدنا بالسياره مشينا وقت ووكفنا يم بيت باوعتله
ابتسم كال.. هذا بيت بيبيتج بهيه
نزلت بسرعه ولهفه واحس بفرح دكيت الباب بلهفه وحماس فتح الباب رجال سلم عليه رشاش بهالاثناء سمعت صوت بيبي
طبيت بسرعه هي شافتني كالت.... حره يممه... ومدت ايديها تحضني
ركضت باتجاهها وحضنتها ونبجي حضنتني وتبجي وتصيح... هلا بيج ياريحة حياة
هلا بيج يا لشاهده على تعب سنيني
هلا يلي بنص روح بنتي.. حياة
تحجي وتبجي واني لا اراديا ابجي وابوس بيها كالت... اشتاقيتلج يمه مثل اشتياقي لحياة
اشتاقيتلج
بست ايدها كتلها... واني هم والله بستها من راسها وحضنتها كتلها... اشتاقيت لكل ايامي وياكم حتى الماجنت راضيه بيهن
تقرب رشاش باسها من راسها حضنته وكالت... اروحلك فدوا يايمه
باسته من راسه وكالتله... وليدي انت لا تحرمني من حره
كاللها... من عيوني دائما اجيبها الج وعد
مسحت دموعها وضحكت كالت :-فوتو فوتو
وطبت كوا تمشي اباوع ع البيت صغير طبيت وراها اجه كعد الرجال يمنا جان ابن اخوها
ضليت يمها هاليوم كله
سوينا الغده سوا..
لفينا الكبه سوا..
كعدنا واكلنا سوا..
ضحكنا وبجينا مثل قبل بالضبط
الوحيد الجان يختلف هو نقص حياة.. وغصتها البقت بكلوبنا الي كلما نذكر شي من الماضي نبجي لا اراديا لان مابيه حياة
حتى لو جان مؤلم وجودها جان يخفف الامي
صار الليل واحنا كاعدين كلنا ع الصوبه والدنيا ضلمه ومطلعين صور حياة
جانت اكو صوره اني وحياة بيها اثنينا كصايب مسويات ونهاية كصايبنا مشدوده
الصوره جانت قديمه من جنت صغيره وابوي موجود
رشاش سأل بيبي گاللها... هاي ليش هيج شاداتها
گالتله وهي تباوعلي... جان شعر حره يوگع كثير لان عندها فقر دم حاد بسبب قلة الاكل
مسحت دمعتي كملت بيبي كالت :-فحياة جانت توصيني اضيف اكلها لحره حتى تاكل زين ولان ماجانت الفلوس تكفي اجيب اكل زياده
جانت حياة تكولي اني مااكل غير الخبز الحار والجاي لان احبه
باوعتلي وكالت... وحتى بعد ما اكلتي من اكل حياة ما توقف تساقط شعرج
فـ حياة اجتها فكره تربط شعرها بشعرج
حتى بلكي يزيد نمو شعرج مثل شعرها
وباوعت لرشاش كالت... واني انطيتهن ع كد عقلهم وربطت شعرهن
ابتسمت كتلها... بيبي اريد هالصوره حبابه
بهيه... اخذيها
حره... اخذت ثانيه لحياة كتلها... وهاي هم
كالت... اخذي عندي بالرام اسحبهن بعدين
مر الوقت وفرشنا حتى ننام بس شلون يجي النوم والغصه تجرح ببلعومي
حضني رشاش واني حاضنه صور حياة كتله... شفت شكد جنا مقربات
باوعتله كتله... روح بروح
باس راسي ومسح دموعي كال :-روحج حياة ماتقبل تاذين نفسج
حره... مااكدر انساها
كال... ولا هي نستج بس اكيد جاي تدعيلج بالخير هناك
مسح باصبعه على رمشي كال :-البجي ما حل صيري مثلها وادعيلها مثلها ماتدرين يمكن جاي تتسهل امورج من دعائها
هزيت راسي حضني وضل يمسح على شعري ويواسيني الى ان نمنا لثاني يوم خابرو رشاش كال... لازم نرجع
ودعت بيبي واخذت الصور وطلعنا وبالي يمها شلون عايشه؟
شلون وهي مره جبيره وماجان الها غير حياة؟
باوعت للسما وكلت... يارب احميها
وكف السياره رشاش بنص الشارع ونزل فتحلي الباب كتله... شنو
گال... راح يجي يحيى عندو شغل ع طريقنا زحمه يكعد ليورا
هزيت راسي كعدت ليورا اباوع لصور حياة
هو رجع كعد ليكدام شويه واجه يحيى سلم علينا وضلو يسولفون ويتشاقون
وبالي مو يمهم
صار الظهر وكف رشاش يم مطعم كال... نتغدا
فتحت الباب ونزلنا عدلت جنطتي وكعت صورة حياة
جان وراي يحيى شالها ومن شافها انصدم وتغيرت معالم وجهه
وضل صافن بالصور
مديت ايدي اخذها وهو ولا يمه رشاش ربت بايده ع ظهر يحيى وكله... من شوكت نحن ندحك بصور الحريم؟
يحيى باوعله بتوتر وبلع ريك هز راسه بلا وانطاني الصوره انتبهت لايده بيها رجفه
رحنا للمطعم اكلنا وانتبهتله ولا ااكل
هو ابيض بس ركبته ووجهه صار احمر
اثنينا انتبهنا انو هو مااكل كاله رشاش... يحيى انت بخير
هز راسه ب اي كاله... ليش مااكلت ؟؟
جاوبه... مااشتهي
رشاش جر نفس وباوعلي كملنا ورجعنا للسياره مشت شويه وهو ضل يغير بمكانه ويتحرك الى ان باوعلي من المرايه وكال بلهفه
يحيى... تعرفين هالبنيه؟
هزيت راسي بـ إي جر نفس وشبه الي ابتسم كال... وتعرفين هسه وينها؟
اني بسرعه بجيت بقهر وحضنت الصوره سمعت رشاش گاله... يم الي ارحم مني ومنك.. شهيده
باوعتله جر نفس بقوه وبين عليه القهر فتح الباب رشاش سحب بريك كاله... انت مخبل؟
نزل يحيى من السياره ووكف ع جهه
بسرعه نزل وراه رشاش
هنا حسيت اكو شي فـ نزلت وراه بسرعه باوعتله شفته... يتبع...
__________________
ويحيى شيگول...؟
(و ياديره التلمني وانه المعلعل)
لتنسون التصويت كرزاياتي
والاهم ارائكم للقصه
تصبحون على ماتتمنون 🍒♡
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!