رواية "هل كانَ حُلماً...؟
(العِراق_المُصغَر)
بقلمي... نورس _قاسم"
"ملاحضه :-
كࢪزاياتي هنا يحيى يتكلم باكثر من لهجه مࢪه تڕكماني ومࢪه مصلاوي ومࢪه غࢪبيه
بس التࢪكماني مذكࢪناها لان منعࢪف
لـ اللهجه التركمانيه"
كرزايات علقو؏ كل فقره بالقصه وسوولي واهس
يلا حبايب شوفوني دعمكم الحلو
______قراءه ممتعه_____
:- باوعتله جر نفس بقوه وبين عليه القهر فتح الباب رشاش سحب بريك كاله... انت مخبل؟
نزل يحيى من السياره ووكف ع جهه
بسرعه نزل وراه رشاش
هنا حسيت اكو شي فـ نزلت وراه لان تأكدت هو يعرف حياة والسبب صدمته
رحت يمهم وشفته وجهه احمر ويجر النفس بصعوبه حسيته يحاول يمنع دموعه تنزل
گتله وصوتي يرجف... انت تعرفها؟
جر نفس قوي حچه رشاش وهو يحط ايده ع كتفه ويباوع بعيونه گاله... اهدى
ورجع للسياره جاب بطل المي غسله وشربه وجره كعد ع المصطبه بصف السياره
گعد يمه رشاش واني واكفه يم السياره
رشاش گله... حياة نفسها ذيج البنيه؟
يحيى باوعله هز راسه بـ إي رجع رشاش باوع بالفراغ يفكـر وگال... أول مالتقيت بيها حسيت ملامحها مألوفه بس
باوع لـ يحيى وگال بهدوء... بس ماعرفتها
اني گعدت گبال رشاش وبچيت گتله وعيني لحضه عليه ولحضه ع يحيى... عن شنو تحجون فهموني؟
حچه يحيى ركزت بنظري عليه گال بصوت مخنوگ :-حياة چانت
وسكت اخذ نفس مگدر يكمل بهاللحظه حسيت الحچي وگف ببلعومه ورگبته صارت حيل حمره وكأن الحچي الخانگه صار نار ويحرگ بيه
حسيت ع ايد رشاش وهو يمسح دمعتي وجرني گعدني بصفه گال :-رشاش جان يدور على حياة
گتله... لييش؟
منين يعرفها؟
حجه يحيى... من سنين
گتله... شنوو
بلع ريگ گال... حياة جانت دعوة امي الي
وباوعلي گال... بذاك اليوم جان الجو كلش بارد والطلعه وكت الفجر تجمد الاطراف
بيومها امي سوتلي جاي وفتحت قران ولما وصل القارئ لاية
{وَقَالَ رَبُّكُمُ ادْعُونِي أَسْتَجِبْ لَكُمْ}
رفعت ايديها وگالت... يارب اني مالي غير هالولد لو صارلو شي اموت بعدو وانت تدري ياالله طغاة التنظيم زادو قوه بهالارض
وقتلو رفاق ابني الـ ٢٢ شهيد
لاتمكنهم من ابني ياالله واحمي منهم ونجيه منهم بحكمتك ياالله
وبيومها بجت ونزلت دمعتها ولما خلصت دعاء مسحت دمعتها وگالت :-اثق بالله راح يحميك ربنا مايترك عبدو الي دعاه
ودام نزلت دمعتي وانا رافعه ايدي معناها ماكو خوف
ابتسمتلها وطلعت لشغلي بـ***** مثل كل يوم لحد ما صارت الساعه 12 واذن اذان الظهر اجاني اتصال ع مكتبي
جنت اصلي مارديت دك مره واثنين وتلاثه وانا اصلي ببطئ لان مااحب استعجل بصلاتي
ولما خلصت جانت الاتصالات توقفت
اختنگ توقف ع الكلام ضل يباوعلي بحسره جريت نفس گتله... كمل
يحيى... اتصلت ع الرقم وجاوبتني بنيه
گالت :-حضرتك العميد يحيى احمد؟
يحيى... تفضلي
گالت... زاد فضلك بس لازم تعرف اكو جماعه ناوين يقتلوك انت وكريم هشام ومصطفى مبدع
انا هنا نصدمت گتلها... شتحجين انتي؟
گالت... جيرانا
يحيى... شبيهم؟
گالت... يمجدون بتنظيم اسمو القاعده وما بس هيج يحكون انم عيقتلوك انت واصحابك
جرت نفس كالت... ويقتلونا
عدتحكي وسمعت هوسه يمها انا هنا شكيت كمين گتلها... عندج دليل
گالت ... سمعتم يحكون باذني وبيبي وصديقتي خلود هم شهود
يحيى... بس؟
گالت... جيرانا عتقول انم ارهاب مطلوبين وتوصي بنتها ما تطلع برا
يحيى... انطيني اسمائهم
انطتني الاسماء كالت... ساعدنا
يحيى... انطيني العنوان بسرعه
انطتني العنوان جر نفس كال... سألتها كتلها اسمج الكامل
اني ابتسمت كتله بصوت مخنوك :-حيااة؟؟!
گال... صح گالت حياة
وسكتت شويه گالت... انا حياة مشعل
يحيى... هاهيه
گالت... لاتساعد نفسك بس ساعدنا
يحيى... ان شاء الله وسديتو ورحت اتاكد من اسمائهم وبعدها تبين انهم فعلا مطلوبين
بيومها توجهنا للعنوان الي دزتو الي حياة وطوقنا المنطقه لانهم ارهاب
فرك عيونه وكال... مسكناهم بالتعاون مع جهاز مكافحة الارهاب...وباوع
لـ رشاش جر نفس وكال... بيومها لما جانو مقيدين الكلب ابو الاصفا فتحت الباب بنيه جانت شگره وعيونها زرگ
باوعتلهم بشماته وگالت بكل ثقه... دحق اشون تكون نهاية الظالم عفن بالسجن بالكي يعلموك اشون تصيغ غجال
اخو ابو الاصفا صاح... لاتعلين صوتكي
كالتلو... دحقت هالبنت الي ماكانت عاجبتك اشون سحلتكم حتى تتعلم ماتتطاول على بنات العالم يامغفل
يحيى... مامنعناها تحجي لان كلامها جان ع الجرح الي صار بيومها ابو الاصفا هجم عليها فجأه وخنكها
لزمو رجالنا واخذ كتله تليق بيه وهي كالتلو... العلموكم اليقدر على بنت غجال هذول مغفلين لو عندك ذرة شجاعه واجه واحد من جنودنا بدل ما تتختلون بملابس النسوان
فركت ركبتها وكالت... لان تعرفون جنودنا ابطال مايتقاوون ع النساء ولا يحاولون يكشفون سترهن... تفوو
ضحك بقهر كال... وتفلت بوجهو فرحتي بذاك اليوم ما تنوصف لان دحقت بنت شجاعه وعرفت هاي "دعوة امي"
بيومها الكل اعترفو انم كانو حينفذو عمليات سطو مسلح واغتيالات وانا من الي جانو ناوين يغتالوهم
رحت لبيتهم وحجيت وياها وتشكرتها وجان طلبها الوحيد مني احميها هي وجدتها لبين مايقدرو يرجعو لبغداد لانها كانت حاسه بالخوف
جر نفس كال... وفعلا حطيتلم حمايه لفتره من الزمن وكنت دائما اروح ازورهم وادحكها
كالها بحسره كال... والموصل بالفتره لو اكول عنها نار شويه والله سيارتي كد ماانقل بيها اصحابي الشهداء والمجروحين الدم علگ بيها اغسل ومايروح
هنا ماتحمل نزلت دموعه وكام كمنا وراه واني ابجي كال... وبيوم قبل السقوط بايام قليله وصلني خبر بانفجار قريب ع بيتهم
رحت ولما وصلت مالكيت لا حياة ولا بيبيتها ولا خلود
باوع لرشاش كال... وماكلتلي ولا انطتني خبر وين هي رايحه خلتني بقاع جهنم.. بحسباتي
حضنه رشاش كاله... هذا الكاتبو الله
حجه يحيى كاله... ماالومها لان انا ادري من الي دحكتو بحياتي الناس الي تعودت على الحرب دائما ميثقون يحسبون الامان فخ
بجيت وتذكرت حياة من حجتلي باخر يوم بحياتها وكالت عنه :- "يشبه رشم حيل بصفاته"
كال يحيى :- ومن ذاك اليوم انا بين حرب داعش
وحرب ذكراها
كثير دورت عليها بس ضاعت مني
كعدت بالكاع ابجي كعد يمي رشاش كال :- لتسوين هيج اتقوي
.. وكومني
يحيى كال وهو يباوع لرشاش... وانا خليتو يدحق صورتها وملامحها بـعملية الـ ***** سمعت عندو معارف كثير بالمحافظات
كلت بلكي يلكاها ولو صدفه
رشاش كاله... تلث سنين نستني
حره... بهاللحظه تذكرت بيوم الي سويت عوامه وطلعت جانت حياة بصفي وطلع كدامنا رشاش بشكل مرتضى الخبل بيومها صفن عليها وكانه يريد يتذكر شي وحياة بوقتها كالت
" شبيه يباوعلي هيج "
وعبالها ع العوامه
فزيت ع رشاش وهو يحط ايده ع كتف يحيى ويكوله... اعرف صعب وضعك بس ثق بـ الله راح يعوضك
هز راسه يحيى كاله :-شيعوض الزمن انا البارحه جنت بـ ٢٠١٤ شون صحيت بهالسنه شيعوض دم گلبي الهدرتو اليوم وبعد سنين لگيتها بس متأخر كِلش
حط ايده على گلبه وكمل... بدل ماازورها ببيتها راح ازورها بگبرها
كسرته اذتني حيل حاولت اطيب خاطره ولو شوي كتله بهدوء واني ابجي... تدري؟
هي حجتلي عنك قبل اخر ساعات الها
باوعلي بلهفه ابتسم بقهر گال... صدِگ؟
گتله... والله گالت عنك رجال يخاف الله
وگالت الله يسعده اذا عايش
گال... يعني حتى هي جانت ماتدري اذا عايش او لا
هز راسه... اكيد متعرف منو جان يتوقع انا اطلع عايش من حرب الموصل
رشاش كاله... بس عشت
جاوبه... وَهـِم
رشاش باوع بعيونه وسكت شفت يحيى نزل راسه وجر نفس كال... دنيا فانيه لااعتراض على حكم الله
... دك موبايله رفضه كال... لازم اروح
رشاش كاله... وين؟
جر نفس كال بصعوبه... يحتاجوني
رشاش... ويامن تروح
جاوبه... تكسي... وركز بعيونه
رشاش حط ايده ع كتفه كاله... اتحمل واصبر
اعرفك سبع
هز راسه وحضنه وراح يأجر تكسي وعيون رشاش عليه گتله واني دموعي ماتوقفت... ليش خليته يروح
گال... خليه وحدو ماجان جاهز ينهار گدامنا
خلينا ورجعنا للسياره والطريق كله اباوع للصور وابجي هذا جزء صغير كلش من الي عاشته حياة بالموصل ومتأكده الاشياء المخفيه كانت اكبر بهوايه
رشاش يواسيني بكلماته ويطيب جرحي
بس ماگدرت اطفي النار الي بگلبي تجاهها ابدا
حطيت راسي ع الشباك وغفيت واني افكر شفت حلم حياة تخبز ببيتها القديم تقربت منها انطتني خبز وگالت :-وزعي اخذته منها وفزيت ع صوت رشاش يخابر يكول
... بالله الكريم اذا رجعت اسحلها لبيتهم
سكت شويه يستمع كال... بكر انه كلت الي عندي... وسد الخط
فزيت كتله... شكو
گال... ابوي وسوالفو
حره... شبيه؟
گال... يلح يريد يرجع ام احمد للبيت
حره... ليش هي وين؟
گال... طردتها لبيتهم
حره... يا شوكت
گال... ورا ما خابرتيني
حره... عفيه زين تسوي لتردها... هز راسه گتله... ترا عمتك واختك هم مشتركات بالسالفه
گال... اختي؟
حره... اي هي اجت اخذت البدله
جر نفس گال... شبيها هند تخبلت
حره... يجوز
گال... خالتي هناك اكيد حاسبتهن
جريت نفس كتله... رشاش لازم تحطلهن حد ترا باجر عكبه لو سون شي اني مضطره ارد
واني وكت العرايك لساني طويل وايدي تشتغل
ترا مامتعوده اسكت عن حقي خليها ببالك
حتى باجر عكبه اذا كتلت وحده منهن ماتلومني
ابتسم وهز راسه كال... ادري بيج وگتلج احاسبهن... باوعلي وكال... وانتي البسيهن صيري اذكى منهن ولاتضيعين وقتج بالجر والعت وياهن
حره... صدكني ميشرفني احاجيهن بس اذا هن بدن لا هنا فتحن ابواب جهنم عليهن
گال... حقج انه اخذو منهن وان شاء الله ماتصير مشاكل بعد
هزيت راسي كتله... ان شاء الله
نزلنا يم مطعم اكلنا وطلعنا كبل للانبار بنص الطريق خابر اوس جاوبه رشاش
وفتح سبيكر
كال اوس... وين انتوا؟
كله رشاش اسم المنطقه اوس كاله... مر عليه انه قريب عليكم بـالـ*****
كاله رشاش... تمام وسده
رحنا لنفس المكان صعد اوس گال... ها شلونهم المعاريس
ضحكنا كتله... بخير
وحرك السياره رشاش كال اوس... فاتكم اكشن يابه جعل كِل الافلام هيج
گتله... شنو شصار
اوس... غير صارت كوانه شكبرها ورا عرسكم بفضل خالتي حفظها الله ورعاها
لو تدحكون شون دفرت الباب مثل گليندايزر وعبايتها بظهرها وكضت عمتي رزايل ممزوجه بالفشار والغلط لدرجة انه انقهرت على عمتي رحت اهفيلها بالنعال
خطيه احترت والجو بارد
ضحكت بصوت عالي رشاش كال بضحك... اششش
كمل اوس... وهي عمتك الله يسلمها ماعندها غير نتفة كرامه فبعد هالسحله كرامتها اختفت
ضحكت كتله... حيييل تستاهل
اختفت ضحكته كال وهو يباوعلي بجديه... يول مااسمحلج هاي عمتي
باوعله رشاش كاله... منين اجتك هالمحبه
مني الجان يدعي تنگلع من بيتنا گبل لا يكتل روحو؟
جاوبه اوس... لا احبها وحتى ناوي اطلگها من رجلها وازوجها لصديقي الامريكي
گتله... هااه
گال... والله شني مامصدگه
رشاش گله... هو لازم نطلگها نكسب برجلها ثواب
گاله اوس... غير اجه يبوس بالقنادر طلگوني وحصلو بيا حسنات يخاف يحجي كدامها لا تجينو بالتفگ
رشاش گال... خطيه كاسر خاطري صارلو سنين شبـع قنادر
ضحكت بصوت عالي باوعلي رشاش كال بهدوء وهو يبتسم... صوتج يول
اوس كله... خليها تضحك ياخوي بعشوي اذا دحگت الوجوه تگلب خلقتها اعليك وتحير بيها
رشاش گاله... تنگلب خلقتها شكو غير بنص بيتها ويم زلمتها
گاله... هو انه الزلمه ومن ابوي ماخله عمتي تطلع من البيت عود زعلانه كضيت القندره وطگيت راسي بيها تريد هالحرمه تتحمل التلوث البصري والسمعي كِل يوم
التفت عليه وكال... الله يساعدج
رشاش گاله... جاي تخرب بصوره غير مباشره
جاوبه اوس... هو اليسوي خير تجيه هيج اتهامات
رشاش كله... ههه واضح
شويه وصاح اوس ... يول بالقران من صوتها ماكدرت انام بالليل مابگالي غير درب " عمتي العِزيزه"
وهو ان ازوجها من صديقي الامريكي
گاله رشاش... بس لا جون
اوس كال... خرب شني نايم بعقلي انت
ضحكو بصوت وطگو ايد بايد گتلهم... دفهموني جون منو
گال اوس... هذا جون قاتل امريكي.. وضحك كال... شتردون بعد اشمرها بامريكا وماترجع
واذا فكرت ترجع يكتلها جون
كتله... عزا وانت ترافق قتله
ضحك كال لرشاش... دحج حرمتك وين تركز يول ماتفرحين تخلصين من عمه ثناء؟
كتله... اي افرح بس انت هم ينخاف منك
ضحك كال... لا يول هذا درس وياي بامريكا والجلب كتل حرمتو وانسجن ومن يومها قطعت علاقتي بي
وهسه ناوي ارجعها علمود عمتي
من يوم سمعت يردون يطلعو وانه افكر
ضحك رشاش گاله... اسكت يول افكارك تجيب العيد
ضحكت ضلو يسولفون ووصلنا للبيت اول ماطبيت استقبلتني خالته بالهلاهل والجكليت بوستها وطب رشاش باسته من راسه وتگوله... عرس المبارك
دگ موبايله فتح خط گال... جاي حبيبي
سده وگلي... انه شوي واجي
وباوع لخالتي گاللها... عينج عليها لبين مااجي
گالتله... روح يبعد چبدي ولا تخاف
طلع واني وخالتي طبينا للهول سلمت على مرت ابو وهند جانت واكفه اجت دتسلم درت وجهي وبوست طيبه هي انزعجت وابتعدت
سلمت ع الكل وكعدنا نسولف ونضحك سمعت صوت اوس وحازم يتعاركون
اوس يگول لحازم... يول يامطي هاي حاسبتي من سمحلك تطخها بغيابي هسه توصخت نعلعلا
وحازم يجاوبه... انجب وصخ هاهيه صارت وحده بوحده لبست حذائي انه استخدم حاسبتك
اوس كاله... ردت اخذك وياي وماميزت بينك وبينو
وكبت بينهم كامت خالتي كمت وراها دفرت الباب وطبت وكالتلهم... ولا صوت
هم اثنينهم سكتو وابتعدو عن بعض جر نفس اوس وهز ايده گال... ياحيف الزلم تخاف من حرمه
گالتله خالته... غصبا عليك خوش
اوس... اي هو انه جاي اكول امداك يحازم اذا ماتخاف من خالتك
حازم كال... شلون يريدني اسحلو
اوس كله... تكدر تحجي اطيح حضك
دايجاوب اوس كالتلهم... اثنينكم برا البيت يلاا من تصيرون خوش اوادم يلا ترجعون
انه هاللغوه مااقبل بيها
حازم گال... اموت ومااحجي ويا هالخايس رايح اتعلل يم صاحبي احسن مما اكابل هالوجه
كالتله... لا حبيبي اثنينكم ترحون تعزلولي المخزن الورا البيت يلا طويبه اطيهم ماسحه ومكناسه اريدو يلمع اليوم
اوس گال... احلفج بالله لاتسويها خاله انه بشاربج
حازم كله... ياحمار هاي حرمه خاله نحن بحاجبج لا تظلمينا
ضحكت حازم باوعلي وكال... بدت ضحكات الشمات تتعاله
اوس گله... شمات لو نظرات
اثنينهم ضحكو وطگو ايد بايد اوس كله... يول اليوم ورقت... وطلع فلوس من جيبه
حازم كاله... هلا عشاي عليك
جاوبه اوس... شرط تغسلي سيارتي
حازم كله... انه راضي بهالذله
خالتي هزت ايدها كالت... لو الزم النعال هسه تلوموني
هزيت راسي بـ لا رجعنا كعدنا علاقة اوس وحازم غريبه حيل بعد عركه طوويله بلحضه يتصالحون ولا كانهم يتعاركون قبل ثواني
شويه وصعدت لغرفتي من التعب جريتها نومه للمغرب كعدت باوعت رشاش ماكو
غسلت ونزلت صارت كبالي خالته كتلها... لعد رشاش وين
كالت... التحق
حره... شنوو شلون يلتحق ترا بعده عريس!
كالت... يول شني ماشبعتي حضن ترا صار هواي متزوجين انتو بس علنتو زواجكم هالفتره
:-نزلت راسي ضجت حيل عفتها وطبيت للمطبخ باوعت طيبه ومرت حازم دايسون اكل
اجت وراي خالته كالت... خاب شبيج ضايجه ترا الزلمه هم ماراد يروح بس المكو***ـيه لحو عليه شبيدو يعني
باوعتلي طيبه كالت... لتضوجين بلكي يرجع هاليومين
كتلها... متحسين غلط يعوفني واني عروس؟
ترا ماصار يومين من تزوجنا رسمي كدام العالم لو عرف احد هو ملتحق شيكول؟
خالته ضربتني ع ضهري وكالت... وانتي شعليج بالعالم شتكول
عليج بزلمتج يولي الحجو والما حجو ينفعون يضرون
العايشه ويا الزلمه منو
باوعتلها كالت... انتي فانجبي ولا تتحججين
حره ... خاله حتى ماگلي من راح
گالت... اي ما حب يزعجج ما زين؟... جريت نفس وسكتت كالت وهي تاخذ خاشوگه تضوگ التشريب... هو هم خطيه وليدي منين يتلكاها منج من هذول الكو**يد الكل شويه دازين عليه
حره... خلي اخابره
گالت... نكد على زلمتنا مانريد ولو نكدتي اسحلج مثل ما سحلت ام احمد
ضحكت طيبه ابتسمت اني هزيت راسي بـ اي صعدت فوك وصلت للغرفه باوعت من الباب شفت خالتي ماكو قفلت الباب واخذت الموبايل اتصلت عليه
رن الجهاز مرتين وجاوب قبل ليحجي گتله
... شلون تروح بدون متگولي بعدين شنو ملتحق هسه ترا تكدر تكوللهم عريس مبيها شي
گال... هيدي يول اكلتيني بلسانچ
حره... شلون تلتحق وعرسنا ماصارله يومين لا وفوكاها حتى ماتكولي
گال... المفروض تدرين
حره... غير جنت نايمه
گال بضحكه... نوم العافيه يبعد گليبي
ابتسمت گتله... لا تغير الموضوع بكلامك الحلو هذا
گال... يول ماگدر مااجي السالفه هينا كِلش داچَـه
حره... شلون يعني
گال... شغلي هاذ عوفچ منو
جريت نفس گتله... ضوجتني والله
گال... انه عسكري وهذا شغلي ثقي انه هم ضجت مثلچ بس مضطر التحق
سمعت اصوات يمه گال... بعدين نحچي.. وسده
جريت نفس وكمت فتحت الباب شفت خالته ببداية الممر گالت... مدام ساده الباب يعني نكدتي
ابتسمت مجامله ونزلنا تعشينا وكملنا وكعدنا نسولف وعمته الحربايه تعشت وعود طبت لغرفتها ع اساس زعلانه اني كملت العشه وشربت جاي وصعدت لغرفتي حجيت ويا رتيل كالت
... باجر جايين... سالتني اذا صارت مشكله اوشي
كتلها... لا ابد وسولفتلها ع كلشي صار وسديته لكيت رشاش متصل دكيت عليه رفضه ورجع اتصل كال
... ويامن جنتي تحجين
حره... ويه رتيل
گال... هاي سوت مشكله
حره... لا تاكل وتروح لغرفتها
كال... احسن
حره... رشاش مدرستي شلون
كال... باجر يروح اوس يكمل النقل
حره... هواي فاتتني دروس وامتحانات خاف ارسب
كال... لا تنجحين انتي سباعيه
حره... يم عمتك وسوالفها مااعتقد
كال... ما عليج بيها انه يمج ثقي بيا
حره... اثق بيك
حجينا شويه وسدينا عدلت المخده داانام حسيت عطشت درت وجهي ع المي شفته خلصان
باوعت للساعه بـ 1:00
تأفأفت لازم انزل اخذت الدولكه ونزلت البيت هدوء الكل بغرفهم حطيت مي ودااصعد سمعت صوت مرت ابو رشاش تحجي بهدوء بالمضيف
كلت يمكن مسويات لمه اروح يمهن ضوجه من تقربت سمعتها تكول :- ما من حقك الزلمه حابها ويريد يعيش براحه وياها ليش تضلمو اتركو يقرر مصيرو
ابو بكر كاللها... وانه كاضو من ركبتو گايلو عوف حرمتك؟
بس ياام حازم زحمه الحرمه ولو غلطت تبقى بنت اخوي المرحوم وامانتو
ام حازم... ورشاش هم امانه من والدتو المرحومه
ابو بكر... اليسمعج يگول انه ماخذ ابني للمشنقه شبيج ترا رشاش ابني وان طال بيننا الخلاف
ام حازم... وانه مااشك بحبك الو بس كافي الزلمه تعب واختار الحرمه التعجبو ما من حقنا نجيب ام احمد وندخلها لحياتهم ونجيبلهم وجع الراس
خلاص نطلكها منو ونخلص
ابو بكر... لا مستحيل عجل وابننا احمد وين يبقى؟
ام حازم... ان عاش ويانا او ويا امو ماكو فرق بالحالتين افتكار عايشه بديرة عمامها
ابو بكر... لا مستحيل اقبل يطلگها
ام حازم... اسمع مني يابو بكر رشاش اول وتالي يطلگ ام احمد فصير وياه حتى ماتزيد نار الخلاف بينك وبينو
ابو بكر... لا مايطلگها لا بد يجي يوم ويحبها ويرضى بيها الحرمه حلوه ومعدله وماناگصها شي
ام حازم... صارلو سنين مادحگ بوجهها
ابو بكر... لان جان ملتهي بس دامو تزوج راح يتفرغ
ام حازم... بس يحب حرمتو
ابو بكر... عادي انه هم حبيت ام بكر وحبيتج انتي هم شني المختلف؟
ام حازم... هو مامثلك انه متأكده لو صار خيار بيننا وبين حرمتو يختارها
ديجاوب ابتعدت وحسيت بضوجه وخنگه حسيت وكأني بمنافسه وقلق رهيب
شنو يعني ابو بكر ناوي يرجعها بعد السوته بعرسي؟
لا مستحيل اقبل صعدت لغرفتي وضليت افكر كوا نمت لـ ثاني يوم الصبح كعدت مكيجت ولبست فستان ونزلت هواي نسوان اجن واهلي هم اجو
ومر هاليوم عادي والحربايه هم مالها حس مر اسبوع على نفس الاوضاع ونفس الروتين ماكو شي جديد غير اشتياقي لرشاش يزيد يوم عن يوم وتزيد الخنگه لانه مو گدام عيني
دااقره كتاب وقت الظهر مندمجه انفتحت الباب رفعت راسي وانصدمت برشاش وهو يفوت
فرحت وركضت لحضنه هو حضني وحط راسه برگبتي گال... افييش هسه يلا اشتميت الهوا
ابتعدت باوعتله عيوني جانت مدمعه صارت بعيونه گال... هم تبجي ياالله
ابتسمت گتله... اشتاقيتلك
گال... وانه اكثـر يَـبعد الشوگ وهلهه... وتقرب باسني بعيني وتقرب ع اذني همس... جوعان لو تعوفيني دقايق زياده اكلج
ابتسمت گتله... من عيوني هسه اسويلك اكل
ضحك كال... اوف يهالغباء المتعبني وهز راسه
گتله... شنو
گال... كثري ملح ع الاكل
گتله... تمام ونزلت سويت اكل ودااصعده صار بوجهي
كال... ناكل بالمطبخ
گتله... متغديه اني
گال... تغدي وياي مااحب اكل وحدي
ابتسمت كعدنا ناكل ونسولف سويه كملت سويتله جاي شرب وصعدنا هو نام اني ضليت اقره بالكتاب لشوي نعست طبگت الكتاب وحطيت راسي ع صدره ونمت
فزيت المغرب هو ماكو نزلت سمعت صوته بالغرفه شفته كاعد ويا حمودي يلعبون بلاي ستيشن رحت كعدت يمهم
گالي... صح النوم
كتله... اعذرني مادري شجاوب
ضحك كعدت يمه كتله... خنلعب وياكم
كال.. اوكي
ضلينا نلعب لحد ما صاحونا ع العشه گمنا رحنا اني وياه وحمودي جانو كلهم مجتمعين گعدنا حچه ابو
... گواك الله
رشاش ما باوعله بس هز راسه ابو گاله... مادحكناك اليوم من شغلك لغرفتك عجل نحن مالنا حق عليك
ضحك رشاش باستهزاء ومد ايده ياكل مجاوبه دايحجي ابو كح بكر وضل يحجي بالشغل والبيوت وهالسوالف كملنا اكل صعدنا بغرفتنا كعد بصفي گال... باجر تداومين ان شاء الله
حره... حلو مشتاقه للمدرسه
ضحك كال... والله زمن
كتله. حلوه تغيير جو احسن من كعدة البيت
كال... رايحه تدرسين لو تخلصين من البيت
ضحكت كتله... الاثنين
كال... وماتشتاقيلي
ضحكت كتله... عادي انت مو تعوفني وتروح ايام
كال... بس انه اشتاقلج كِلش وينهد حيلي علما اجي
ضحكت كتله... والله؟
گال... دحج الفطيره لسه تسأل
ضحكت نزلت راسي رفع راسي كال :-شبيج
كتله... ابوك ناوي يرجع ام احمد
هز راسه گال... يريد يصير الاخ الوفي ع حساب ابنو
گتله... اني مااقبل هالبنيه خربت عرسي شكو تجي بعدين انت مو متحبها
گال... لاتسأليني هالسؤال بعد لان اقرف من نفسي جاي احاول اتناسى الي صار وغبائي وكت عقدت عليها
گتله.. لا حشاك
گال... هاي غلطة عمري
لزمت ايده گتله... هو ميگدر يجبرك عليها اذا ضليت ع موقفك
جر نفس ومسح ع خدي گال... لو صارت گدامي عيني ماتدحگها صوتج معلگه هين... واشر ع راسه
گال... لا تشغلين بالج بيها انسي وجودها
نزلت راسي رفعه گال... صدگيني ضحكتچ تسوا عشر حريم مثل ام احمد
ضحكت گال... اضحكي، اضحكي ياتعب گلبي ودوخة راسي
گتله... والله اني دوخه راسك؟
ابتسم گال... واحلى دوخة راس وتقرب يبوسني
فزينا ع صوت خالتو وهي تصيح... هذا الكو**د من شغلو لحرمتو
ضحك وكام فتح الباب كلتله... ولك كو**د ما شبعت نـ....
قبل لتكمل لزم حلگها كاللها... يستر على عرضج لزمي لسانج
ضحكت وحضنته گاللها... غير انتي ماكو
گالت... اي جنت يم عمتك اعقيله حدر يمه لاحگ على ع الحرمه ننزلل نتعلل ندحك خلقتلك شويه
ضحكت كالت... وانتي هم عدلي حمرتج ولحگينا
اني هنا ياگاع انشگي وطميني مسحت الحمره كلها ونزلت وراهم
كعدنا كلنا بالهول نسولف ونضحك جمعة اهل شويه وكلي رشاش
... تأخر الوقت گومي نامي باچر وراچ دوام
ابو التفت بسرعه گاله.. دواميش.
حجت خالة رشاش...غير عدها مدرسه
كال بنتر... مدرسه شني لا ماكو اذا هي تدرس عجل كل حريمنا هم لازم تدرس
رشاش گال... وخلي يدرسن... والتفت ع البنات... اكو وحده حابه ترجع لدراستها؟
گام ابو گاله... وشني نحن نمشي اعلى مزاجك انه كلت مدرسه ماكو
كام رشاش گاله... وانه ماجاي اخذ رأيك
گاله بصياح... شو انت مامحشمني اسمع يول تحجي وياي عدل مثل الاوادم والا اعرف شلون اتصرف وياك
رشاش كاله بهدوء... صوتك لاتعلي الجدامك ما طفل
ايام التأمر والتنتر انساها انه كبرت
باوعلي گال... صعدي نامي بويه يلا
بلعت ريگ جرتني طيبه واسمعهم واحد ينتر بالثاني ابو يكوله... انت ما محشمني
ورشاش يكوله... ما خصك بحرمتي
اخر شي سمعت واني اصعد الدرج حازم كاله... هم اشترطو علينا تكمل ونحن وافقنا زحمه نتراجع عن كلمتنا جدام الناس والعمام
واوس يگوله... ما جنت متوقع راح اگول هالحچي
بس هالمره كلام حازم صحيح
طبيت للغرفه ويمي طيبه كتلها... ابوج شبيه وياي
طيبه ... مابيه
حره... لا دااحس ابد ما حابني
طيبه... لا انتي ما الج بالسالفه شيلي هالافكار من راسج بس هو و رشاش مختلفين ودايما يتكاونون فعادي
كتلها... خاف ميقبل على دراستي
طيبه... دام رشاش گلج تكملين يعني تكملين
انتي العليج تسويه هسه تسميعن من هين... واشرت ع اذنها... وتطلعيه من هين... واشرت ع الاذن الثانيه
هزيت راسي وجسمي يرجف گعدت يمي ترتل القران شويه وهدأ الجو كالت.. فكت.. وكامت
كتلها... وين
طيبه... اروح انام نعسانه كلش
كتلها... تصبحين على خير
طيبه... وانتي من اهلو.. وطلعت
ضليت كاعده افكر شويه وطب رشاش اجه مدد بصفي كعد كدامه كتله... تعاركتو بسببي
كال... ما بسببج عادي نحن دايما نتكاون
حره... ليش؟
گال... هو دايما عكس قراراتي چنت اكول ابويا وحقو بس خلص جزعت وانه اضيع فرص من ايدي بسببو كلشي الو حدود حتى هو
حضنته كتله... لتضوج الله يهديكم على بعض
مارد ضل يفرك بشعري ضليت افكر كلي... لاتهتمين نامي وراج مدرسه
ابتسمت غمضت عيوني براحه ونمت لثاني يوم الصبح كعدني وهو يضربني راجدي خفيف ع خدي
فتحت عيوني كتله... ترا مو هيج اليكعد والله
ضحك كال... مثل ماتردين انوب اكعدج ببوسه
كتله... بس اني مكلت هيج
گال... هو شنو عكس الراجدي
ضحكت كتله... والله عليك سوالف
ابتسم كام كال... يلا نصلي ونتريك حتى اوصلج
هزيت راسي وكمت صليت ونزلت دااسوي ريوك اجه وراي كال... دحكي البيض انه مااكلو هيج
كتله... عجل شلون؟
ضحك كال... يامحلى العجل بلسانج
ابتسمت علمني شلون اسويله البيض سويت وتريكنا لبست صدريه هو جان جايبها الي واسعه ومستوره
رتبت حجابي ووكفت كدامه كال
... هي صدريتج واسعه بس شو هم مغريه
ضحكت ضربته ع كتفه كتله... لا مبيها شي مستوره لا تعرضلي
كال وهو يباوع لصدريتي... مايقبلون صايه للمدرسه
كتله... اهو لاتعقدني
ضل يباوع للصدريه ويفكر كتله... ترا تاخرنا
هز راسه وكال لازم الگى صرفه لهالصداري... وشال الجنطه عني ونزلنا
رحنا للمدرسه باوعت مدرسه اهليه للبنات حلوه ونظيفه
دخلنا اثنينا للمديره كعد حجه وياها وفهمها ع وضعي واني فايتني دروس وامتحانات وهي گالت
... ما مشكله اوصي المدرسات يهتمن بيها ويركزن عليها باثناء الشرح بس هاا... وباوعتلي كالت... كون تقرين ترانا ما نحب الكساله
ابتسم رشاش كاللها... لا ست الكدامج سباعيه وشاطره رغم الظروف ماتركت دراستها
ضحكت المديره وكالت... ان شاء الله التفوق
سلم وكام ضل يوصي بيا ما تحرك خطوه بدون علمه تركت الموبايل عليه اسمي عند المديره
اجت المدرسه عرفتنا وكالت... عندكم رياضيات وهاي مدرستكم روحي وياها لصفج
ابتسمتلها وهي بادلتني الابتسامه ورحت لصفي جان تعاملهن ويا الطلاب حلو وشرح زين دك الجرس طلعت اشتري طلعت جيزداني من الجنطه وفتحته باوعت بيه فلوس خير الله
ابتسمت بحزن ورجعت بيه ذاكرتي للماضي للحظات حسيت نفسي بمدرستي القديمه
واني كاعده اباوع ع الاطفال يشترون واني لازمه معدتي من الجوع وماعندي اشتري حتى اكل
ابتسمت وكلت بداخلي... رغم كل الي صارلي الله عوضني برشاش
رحت اشتري اجت بنيه وكفت بصفي كالت... انتي جنة بيت ابو بكر؟
هزيت راسي باي كالت... انه جيران عقيله اختو دحكت بعرسج شسون ببدلتج خطيه
البنات الي بصفها كالن... شصار
جاوبتهن... خطيه شككن بدلتها بيوم العرس... وضلت تحجيلهن
اني محجيت اي شي عني وعن حياتنا رغم كثير سالني ع رشاش وعلاقتي بيه جنت اكتفي بابتسامه وكلمة الحمد لله
مر هاليوم والمدرسات حددلي ايام امتحاناتي الشهريه واخذت الموبايل من المديره وطلعت
شفته واكف بالفرع من شافني طلعت نزل واجاني
گادني وصلني للسياره وضل يسألني عن المدرسه وحجيتله كلشي من الالف للياء
رجعنا للبيت تغديت وحجينا اني وخالتي وطيبه وسبحت ورحت نمت للعصر فزيت ع اصوات تحت
غسلت ومشطت ولبست حفاياتي ونزلت سمعت صوت خالتي وطيبه بالمطبخ
يسون كيك رحت يمهن حضرت وياهن وكعدنا ناكل
شويه وطب رشاش شايل حمودي واوس طب وراه
حمودي يمنا كل اليوم بس من يريد ينام يم امه
هو شاف الكيك كام يصفك واجه حضن طيبه
اني تدنيت سويت مكان لرشاش كعد اوس كال... مال اكعد فوك الكيك واحرمكم منها
عجل شني نافيني انه محد يسويلي مكان تدنو... ودفعهم وكعد
ضحكنا رشاش حط ايده ع كتفي وكال... كضيتيها نوم شوكت تقرين
كتله... بالليل
دتحجي خالته كاللها... احلفج بروح ابو شهم اسكتي
ضحكت كالتله... شبيك ماافشر تبت انه
كاللها... هاا
كالتله... اي
قاطعها حمودي وهو يوكع البيبسي عليها كالت... دنعل عمامك الكو**يد المگحب**يه خووش
ضحكنا كاللها اوس... واضح تبتي
دانحجي ونسولف اندكت الباب كامو الولد
سمعنا هوسه وكلام كامت طيبه گالت... عمامي اجو
اسمع رشاش يكول... ترا كِلش زحمه هالتصرفات شني ماكو احساس
وصارت هوسه والحديقه مالتهم انترست
كلبي وجعني رجعت داالملم الكيك والبيبسي سمعت الباب نفتحت
وحمودي يمي كال بفرح
.... هيييييي ماماااا... يتبع...
____________________
اسفه ياصاحبة اسم طيبه
لعبت طوبه باسمج وقبل شويه يلا عرفت
طيبه ❌
طيله ✅
اسمج من اليوم ورايح طيله خووش😭👀
كرزاياتي لتنسون التصويت والمتابعه
تصبحون ؏ ما تتمنون... ♡
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!