رواية "هل كانَ حُلماً...؟
(العِراق_المُصغَر)
بقلمي... نورس _قاسم"
________________
لتنسون التصويت والمتابعه
+كࢪزاياتي علقو ؏ كل فقࢪه بالقصه خلي تصعد...
_______________
:- صعدت فتحت الغرفه ودااخذ الزيت ثواني و انفتح الباب سمعت صوت عثمان كال... ها رشاش
باوعلي تفاجئ ضحك كال... وينو رشاش؟
كتله... بالحديقه يمكن
دار وجهه دايطلع بهالاثناء انقفلت الباب بسرعه انتبه عثمان وراح يتاكد وكفت وراه گال... انقفل الباب!
غمض عيونه وكال بنرفزه... استغفر الله
وطلع موبايله گتله... شدتسوي
عثمان... جاي اتصل على رشاش يجي يفتحها
وهو يتصل سمعت صوت ثناء يقترب وهي تكول لـ اوس... همزين اجيت محتاجين الطحينه وهاي حره كلتلها جيبيلي طحين وزيت ماادري وين راحت
تدري انه مفاصلي مابيا اشيل ثگل
اني فتحت عيوني وباوعت لـ عثمان گال... اهدي
سمعت طگطگه بالباب مال احد دايفتحها وصوت اوس يگوللها... ليش مقفوله؟
جاوبته... ماادري مني قافلها... وانفتح الباب
بهالاثناء سمعت عثمان يگول...رشاش تعال بسرعه
التفتت عليه شفته حاط الموبايل ع اذنه عرفت يعني رشاش جاوبه اوس باوعلنا متفاجئ
اني باوعت لثناء بحقد عرفتها نذله رادت تورطني
اوس ديحجي بس قاطعه صوت ثناء وهي تصيح... يا يا يا جليلة الحياا يالبلا اخلاق
واجت باتجاهي واني اباوعلها بحقد وبداخلي اتوعدلها شگد كلبه جرتني من ايدي بنتر وگالت... يول يالماعندج اخلاق تتختلين بالزلمه وبنص بيتنا
وركضت يم الدرج تصيح.... تعاال يابو بكرررر تعال ادحك
سمعت صوت طيبه تگوللها... صوتج يول شكو صرعتينا
هي لزمتها من ايدها وجرتها وتكوللها... حدري هين حدري ودحكي حرمة اخوج البهذلتينا علمودها شعدها تتختل بالغرفه ويا الزلمه
طيبه فكت عيونها وذيج تصيح دفعتها طيبه كالتلها...صوتج يول خزيتينا الله لايفوقج
ثناء... شلووون ترديني اسكت على هالقذاره!
وفوكاها واكفه ضدي
تحجي وتصيح لزمت طيبه من ايدها وتكوللها... هي هاي اخلاقج يام الاخلاق والعلم والدين تتسترين لهاي الكلبه وهي تخون اخوج
اوس صاح بيها كاللها... تجاوزتي حدودج يول احترمي والزمي حدودج ديري بالج تحجين هيج ويا خواتي
گالت وهي تصيح وتحجي بحركه... عجل وينها غيرتك على اخوك
كاللها بصياح... صوتجج... وباوع لعثمان
عثمان كله... لتصدك
اوس هز راسه وهي تصيح و على صوتها اجو عمي وعمتي وهند وافتكار صعدت وهي شايله ابنها
ابو بكر... شكو
ثناء.. تعال ادحك فتحنا الباب انه واوس وجان ادحك المصيبه هي وهاذ المعتبرينو ابننا وصاحب رشيش
وحدهم بالغرفه وقافلين الباب
صحت... جذاااابه
ثناء... يول وهم الج عين تحجين لسه مانكسرت عينج يالماعندج اخلاق
كاللها عثمان بهدوء... وليش تنكسر عينها حره محترمه وماكو مثلها
ابو بكر باوع لاوس وكاله... صح هالحجي
بهالاثناء شفت سالي اجت تركض من الدرج اوس جاوب ابو... صح يابه بس سوء فهم متاكـ...
قبل ليكمل كاله... يعني صحيح
وباوع لعثمان كاله... شكد صلف تتختل ويا اخت مرتك هينا ونحن
معتبريك ابننا
امشي منا... ودفعه
ركضت سالي ووكفت يم رجلها وباوعتلي وكالت... شكو
عثمان جاوبه... عمي افهم السالفه شنو يلا تحكم
گاله عمي بعصبيه... شافهم؟
هنا سمعت صوت رشاش كال... خير
ركضت يمه لزمت ايده كتله بخوف.... يتبلن عليا والله
صاحت ثناء... دحج خويه دحج شلون تتمسكن جدام الزلمه تا تگلب السالفه عليه
وهم يطلعني انه الغلطانه ويخلني اعتذر بالمضايف
صاح بيها رشاش... صووووتج نصي
كالتله وهي تاشر... دحج دحج هاي الفضلتها ع المنا وبينا وسويتلها قيمه دحج شعدها تتختل ويا صاحبك
رشاش... سدي حلگج لا انعل الكو**د الجابج هينا
ابو بكر... احترم نفسك بدل ما تحاسب مرتك گدرتك على عمتك
رشاش باوعله باستهزاء وگاله... خنفهم لا تخبصنا
ورجع باوع لعثمان كاله... ها شكو
عثمان... جاي يتهمونا... وباوعلهن بحقد
ديكمل صاح عمي... شلون نتهمكم هاا الكل دحك انت ويا هاي جنتو بغرفه وحده ووحدكم شعدكم فهموني هاا؟
يحجي ويصيح سالي كالتله... ترا واضح هذن الحربايات ورا السالفه رجلي واختي ماكو باخلاقهم لاتصيرون مضحك
وتصدكون كلام هالحربايات ترا وصلت حدها
ابو بكر... هاكم دحجو اخلاق اختها انه من يوم المدت لسانها عليه متر ونص عرفت طينتها وسامحتها لخاطر ابني بس هاذ الي سوتو عليه گطع رگاب
وگعدات عشاير
لا ما ينسكت عنو
رشاش... جاي اكلك فاهم غلط اكف خل اسمع... باوع لعثمان وكاله... كمل
نتر عمي كال... بالله انت مخنث ومابراسك خير جاي تدورلهم حجج
قاطعته ثناء وهي تكول...صدگ زلم ماتمشي عدل ويا الشريفات هاي لو افتكار جان طردها گبل لا يسمعها
بس زلم تموت ع الساقطات
رشاش كاللها بعصبيه... احترمي نفسج يول واعرفي شلون تحجين لا لسانج اكصوو
ابو بكر... رشاش احترم
قبل لايكمل كله رشاش... صوتك نصي لا بالله اهدم هالبيت فوك روسكم الكل يعدل حجيو ويسد حلكو ويلزم حدودو نفس مااريد مفهووم؟
صاح ابو... هاي الي هالحجي؟؟
جاوبه رشاش... اي الك
كاله بصياح... يول ع الاقل خليلك ذرة رجوله شتريد تسوي بعد وتفهم هاي الساقطه ما تناسبنا
بطل تدافع لهيج وحده
رشاش... عمرگ طك فوك الستين ولسه مافهمت الرجوله ما بالضرب والعصبيه انه اعرف احسن الاختيار كلش زين اخوي ومرتي اشرف من الشرف وبلا مااسمع منهم حتى
ادري هم ابرياء والي يحجي عليهم باعتبار حاجي عليا
ابو بكر... اشرف من الشرف شني عجل هاذ الي دحجنا شنو
حجت ام حازم... اصواتكم فضحتونا لحد يسمع شتكول علينا الناس
باوعلها ابو بكر... خلي يسمعون انه ماالفي هالنماذج ببيتي
جاوبه رشاش... نص بالنص الي حگ
بهالبيت مثلي مثلك اليعجبك اهلا وسهلا المايعجبك عادي اقسم البيت هالمنيه هاي بطلها ترا جزعتنا
ابو بكر... بالله اسويها عشاير واخزيك بالله الكريم تستاهل الفضايح طلعت صدگ جبينه
والكل دايس عليك
صاح بيه رشاش... بالله الحكيم لو ماابوي جان عرفتك هاذ الجبينه منوو
ثناء صاحت... يولو تتقاوى على ابوك علمود هاي الماحشمتك ولا حشمت ابوك ولا عمامك
انه شگتلك ياخويه ما كتلك من البدايه هاي معروف اصلها !
شتترجى من وحده عايشه بالشوارع واخوها خريج سجون؟
فزيت على صوت رشاش وهو يصيح ويكوللها... سدي حلكج لاااا اشگوووو
قبل لايكمل مااحس غير سالي وهي تهجم عليها دفعتها ولمتها من شعرها وتكوللها... تتبلين على رجلي واختي اني الج
لج انتي منو وجايه تتهميهم
وفوكاها تحجين على اخوي الي قندرته تسواج
ركضن افتكار وام حازم يحاولن يفاككن بينهن بس سالي فقدت كتلتها كتله معدله
وذيج تصيح جرها عثمان كاللها... اهدي
ابو بكر طلع موبايله وكال... الكل هينا راح يتحاسب... وديخابر
ام حازم لطمت على خدودها كالتله... شجاي تسوي
ابو بكر... اخابر اخوتي يتصرفون
رشاش جر الموبايل كله... خليلك شخصيه شويه انت ماطفل كل حجايتين وفزعت اخوتك
جاي اكلك سوء تفاهم
صاح عمي... احجي عدل يول ادبسز
اوس كال... يابه لخاطر الله لا تتسرع وتفضحنا
نحلها بيناتنا مالو داعي ندخل العمام
ابو بكر... لا يجون تا نعرف نتصرف ويا هذول... وياشر علينا اني وعثمان
اوس... يابه اسمع منهم ليش تظلمهم حرام
ابو بكر... شاسمع السالفه واضحه وضوح الشمس
عثمان... لا كِلشي ماواضح
باوع لرشاش وگله... كل السالفه ومابيها اجاني ابنك حمودي گالي رشاش يگلك تعال فوگ علمود اللابتوب
انه صدگ صعدت ورا شويا اجت حره وورا ما طبت بثواني انقفل الباب علينا لهالسبب خابرتك بسرعه
رشاش هز راسه گاله... اثق بيك
دار وجهه على ابو كاله... سمعت ورجع خزر عمته
عمته كالت... يا خوش حجه هاي شلون رتبولهم فيلم والله تستحقون الاوسكار على هالتمثيل
سالي جاوبتها بسرعه... وانتي حتدخلين موسوعة غينيس كاكثر امرأه انسحلت وماعدها كرامه ولسه تلغي
ثناء... صلفه ماكلج غير شي
عثمان غمض عيونه وجر نفس يصبر روحه
رشاش كاللها... سدي حلگچ وانگلعي هناك يلا...
ابو بكر... لا ماتروح الا لما اتاكد اوس روح جيب القران
رشاش... بدون قران انه واثق بيهم
ابو بكر... بس انه ماواثق
رشاش... وثقت او لا ما مهم بالنسبه الي
بهالاثناء شفت جيلان مرت حازم اقتربت وتباوع باستغراب ابو كاله.... غصبا عليك يهمك
قبل ليكمل كلامه جيلان كالت بفهاوه :-ياا هاي شكو
هند غمتها كالتلها... الدنيا انگلبت وانتي نايمه
مشت جيلان وگفت يم عمي لان جان معصب كالتله... شكو بابا شصاير ليش العصبيه
ثناء... دحكي هاي... وتأشر عليا
كملت... الجابها وفضلها على حريمنا شسوت لكيناها متختله بالغرفه هي و عثمان
ونحن الحاسبينو صاحب ابننا يتختلون بالغرف ويقفلون بالبيبان
ديحجي رشاش كالت جيلان بدهشه... يا يا يا عمه خافي الله مقفلين الباب شني
التفتت باوعت لباب الغرفه و باوعت لعمي وگالتله... عمي لاتصدگ انه بعيني دحكت عمه ثناء وهي تقفل الباب ورا ماطبت حره
عمي باوعلها بصدمه ثناء صوتها گام يلعلع... جدابه والله والقران لاتصدگوها
رشاش گاللها... يول ليش ماكلتي لواحد مننا
جيلان... والله عبالي يلعبن ختيلان
غمض عيونه بنفاذ صبر ودار وجهه على ابو كله... هاا سمعتت
ثناء... لا خويه لاتصدكهم متفقين عليه
عمي اشرلها تسكت گاللها.. صدگ هالحجي بويه جيلان لو تردين تتسترين الها ؟
جيلان... على بختك عمي انه اجذب عليك انت تعرفني شيصير بالبيت انقلو الك بالحرف الواحد
صاح اوس... واخيرا لزمنا الجاسوس سهله يـ جويله خل يطلع ابوي ودحكي شسوي بزلمتج
عمي كاللها... تحلفين ع القران
جيلان ڪالتله بثقه... نازله اجيبو
صاح رشاش... عوف القران ماهين على كلشي وحلفت انه واثق بيهم وبجيلان
باوع لاحمد اشرله بايده ثناء كالت... عوف الطفل لا تدخلو بمشاكلنا حرام نفسيتو تتعب
باوعلها بنصر ابتسم ورجع باوع لحمودي وكال... حدر هين بابا
اجاه حمودي شاله كله.. بابا احجيلي الصدگ تا اخذك ونروح لمدينة العاب
تخبل
احمد هز راسه يستمع كاله.. مني كلك روح صيح عمو عثمان؟
حمودي كله... انت ردتو يجي
رشاش گله... اي بس مني گلك روح صيحو؟
حمودي گاله... بيبي ثناء
بلحظتها فزيت على صوت الراجدي الي انطاه عمي لثناء
اوس طفر بيني وبين رشاش وحجه بهمس... بعد ايدي
صاح عمي كاللها بقهر... يول ادبسزز جلبه بنت النعال هيج تخططين وتجذبين هيج تستغفليني
انه الواثق بيج
هي كامت تبجي كالتله... لا خويه ما هيج اعرف الصدك
ابو بكر... ومصره تجذبين... ونزع شحاطته
اوس كال بهمس... عفيه بويا ودك دك دك ع الراس بلكي يشتغل هاذ المزنجر
باوعت لعثمان دار وجهه وعمي كتل ثناء كتله معدله
اني انقهرت من الوضع حسيت اريد استفرغ
ركضت انزل اجى وراي رشاش وسالي
ركضت وكفت ع المغسله تقيأت حسيت برشاش وهو يفتحلي المي ويغسلي غسلت وحضنته وبجيت بصوت عالي كال... هيدي انه يمج
بهالاثناء نزل عثمان كال... يلا سالي التفت عليه رشاش كاله... اعذرني خويه بس مااكدر ابقى اكثر
رشاش حط ايده ع كتفه وكله... تبقى هين الي صار سوء تفاهم
عثمان هز راسه وكله... بس مااكدر ابقى اعذرني... وباوع لسالي
بهالاثناء نزل اوس كال وهو يحط ايده ع رگبة... عثمان ماكو ماتطلع من هين الا وانت راضي
حجه عثمان بضوجه... بعدين
اوس... لا ما على كيفك
وجره للمضيف اني حضنت رشاش وابجي سالي باوعت لرشاش وكالت بعصبيه... شنو السالفه رشاش مگعدها بين حيايه
الله يساعدها لاختي والله
جر نفس كالتله... رشاش طلعها بيت وحدها اخلص من المشاكل هاي
هز راسه كاللها... ان شاء الله
باوعت ليورا ورجعت حطت ايدها ع كتفي وكالت... اشوف عثمان واجيج تمام
هزيت راسي ب اي جرني رشاش طبيت بغرفة حازم كعدت ابجي كتله ... ماابقى هنا بعد رشاش
گال... ولا انه
حره... تعبت باع شدايسوون بيا طول هالوقت جانن يمثلن ع اساس هن تابن باع شلون اتفقن عليه
حضني وباسني من راسي كال... اندمها بس اصبريلي
رفعت راسي كتله... طلك افتكار اني مااتحمل ابقى هيج
كال... اطلكها وداعت عيونج بس اصبريلي قسما بالله لو الها ايد بهالسالفه ماتبقى على ذمتي
حره... هي اكيد الها ايد اكيد متفقه
كال... گتلج اطلگها وحتى عمامي بعد مالهم حگ عليا محد يحجي ويتجرأ يلومني
حره... حجو او لا طلگها
رشاش منو الاولى اني لو عمامك
باوع بعيني وتقرب باسني منها گال
...حره انه لو متحمل ما حبا بيهم
حره... لعد؟
گال... احنا بديرة عشاير وعمام باجر لو صارلي شي منو يوگفلي؟
حره... اني طبعا!
ابتسم وگرصني من خدي وباسني ابتعد عني كال... يول اقصد فزعات وگعدات زلم
جر نفس گال... اكيد عمامي هم اليوكفولي
حره... اني مااتحمل هيج طلكها وشيصير خلي يصير واذا زعلو كم يوم ويرجعون
گال... انه مااحب اخلي عليه لوم
حره... على هالحجي مراح تطلگها
گال... وعيونج اطلگها بس خلي تطلع الها ايد بهالسالفه اسحلهن قسما بالله
نزلت راسي ابجي كال... هيدي يولو انه يمج
كتله واني احضنه بقوه... خفت حيل شيصير لو ما مصدگني جان صارت مصيبه
گال... اعرفج اكثر من روحج مو غشيم انه حتى اصدگ
حطيت راسي ع صدره گال... ابقي هين اروح ادحج سالفة عثمان وابوي
هزيت راسي گتله... لتتأخر عليه
ابتسم وكام فتح الباب وطلع حطيت راسي ع المخده وبجيت انقهرت حيل سمعت الباب انفتحت طبت طيبه باوعتلي اجت حضنتني كالت...
... لتزعلين يولو اوف شتسويلهن هالكـ***ب ميتوبن بس الله بالمرصاد يجيهن يوم
حره... شكد سيئات شفتي وين وصل بيهن الحال
والله مامتوقعه هيج يسون تفاجئت
طيبه... هاي الكلبه ثناء كلشي توقعي منها حسبي الله عليها
حره... افتكار اكيد وياها
طيبه... ممكن بس افتكار ماهيج خبيثه
قاطعتها كتلها... لا بالله بعد كل السوته؟
طيبه... يولي خلي اكمل هي خباثتها ما بعقل شلون افهمج يعني بالعاميه تصرفاتها تصرفات مزعطه بس هيج خطط مدبره تصرفات الكلبه عمتي
حره... طيبه اني بعد مااتحمل الوضع كمت افكر اذا مايطلكها ارجع لاهلي
طيبه... انجبي بعد كل السواه علمودج ترجعين وتعوفيه هينا وحدو
حره... على الاقل علما يطلكها
طيبه... خوب سانديه واوكفي وياه لبين مايطلكها ترا الموضوع أصعب عليه منج
هو يحس نفسو مخنوگ
حره... اني هم والله
طيبه... يولي لاتصيرين غبيه ترا رشاش حابج وشاريج واليوم حتى لو غلطتي ماراح يدحك خطأج وراح يسامحج لانه حابج وصابر عليج بس انتبهي هو يتحمل الضربه مره مرتين بس بالنهايه ينفجر
وبعد مايسامح لاتغلطين بحقو وتتركين الكل يتشمت بيه هينا وهو وكف بنصهم دافعلج
هزيت راسي گالت... بالله عليج لو غير رجال ما يطلع سلاحو ويريد يكتلج لان هاذ شرف ما شي هين ونحن بمجتمع شرقي ماكو رجال يتحمل يشوف مرتو بغرفه ويا غيرو
ابتسمت كالت... بس رشاش يحبج لهالسبب وكف وياج ضد الكل
جرت نفس وكالت... لاتكسريه الحب مواقف سانديه ولا تأذيه اكثر
ابتسمت هزيت راسي كتلها... خايفه طيبه
حطت ايدها على ايدي وگالت... رشاش وياج لو الكل هينا وگف ضدج حتى لو كنت انه ضدچ مامهم المهم رشاش وياج ويحبج
ابتسمت كتلها... خايفه يضيع مني اخاف تاخذه وحده غيري
طيبه... هو ما لعبه وتكدر تاخذو غيرج واذا قصدج على افتكار فتأكدي هي مابعينو ولو يريد جانت يمو من سنين مادحج بيها
يول ثقي بيه مثل ما هو يثق بيج صدگيني راح يطلكها واخذيها من هالاظفر
جريت نفس كتلها... واني هم احبه واثق بيه
طيبه... الله يديمكم ويسعدكم
حره... طيبه اكو شي مفهمته واستغربت منه
طيبه... شنو؟
حره... مرت حازم معقوله مشتركه وياهن وبعدين خافت وحجت
فتحت عيونها بصدمه كالت... يا ليش هيج تكولين؟
حره... ماسمعتيها شايفتها من قفلت الباب عليه وماكالت متحسين هالشي مو طبيعي لا و تكول عبالي يلعبن ختيلات
زفرت نفس كالت... اوف يحره انتي كلشي متدرين يول مرت حازم ماكو منها لا تظلميها
حره... واني هم ماشفت منها شر بس استغربت
طيبه... حقج بس مرت حازم مريضه نفسيا وجاي تتعالج
حره... عزا ليش
طيبه... عمامها ما زينين جانو يعذبوها
فتحت عيوني بصدمه كتلها... واهلها وين!
طيبه... متوفين بحادث
انقهرت عليها كتلها... ليش هيج يسوون عمامها
طيبه... لان كو**يد مثلهم
مثل ثناء هسه انتي ماذيتها بشي؟ بلا ذيج افتكار ممكن نكول انتي ضرتها الا هاي الحيه
حره... لا والله من يوم الاجت عادتني
طيبه... لان كـ***ـه اخ منك يلساني مااريد افشر
ضحكت كتلها... تحجين مثل رشاش
طيبه... الكل هيج يكولي اخذ كلام رشاش
ابتسمت كلتلها... انتي قريبه منه
طيبه... اكيد انه اختو ويدري بيا احبو واحفظ اسرارو
حره... هند مو مثلج
هزت راسها كالت... شكول غير الله يهديها
حره... امين
سمعنا اصوات برا كالت... تعاي ندحك شصاير
حره... روحي انتي واني ارجع انام مااريد
جرت نفس كالت... ماشي... وطلعت
مر وقت هوااي وطبت سالي مبتسمه كتلها... ها شكو
سالي... كومي لتزعلين.. وبوستني كالت... يول رجلج مسح بكرامتها الكاع وطردها من البيت
ضحكت كتلها... والله
سالي... والعباس اجو عمامكم وكلهم حجو عليها وهانوها وعمج اعتذر من رجلي وكال نجيبلك مشيه نراضيك
ابتسمت كتلها... الحمد لله... باوعتلها... وافتكار؟
سالي... حلفت تكول ماالي ايد بالسالفه والكل صدكها
ضربت على رجلي كتلها بعصبيه... لييش
سالي... لان هالكلبه ثناء كالت افتكار معليها وهم ابو رشاش يكول جانت كاعده يمي فاكيد هي ما سوت شي بس ثناء
زفرت نفس كالت... المهم انهانت وعرفت حدودها
سمعت صوت عثمان يكوللها... يلا سالي
حضنتني كالت... يلا عمري اروح هم يلا ادرس عندي امتحانات
هزيت راسي وبوستها كتلها... مع السلامه
طلعت صار بوجها رشاش سلمت عليه وطلعت مدلي ايده كالي... تعالي نروح لغرفتنا
هزيت راسي وصعدت وياه واحس الم بظهري وبطني فضيع طبينا للغرفه حضني من ظهري وباسني باذني كال :-لاتخافين من شي وانه وياج
درت وجهي عليه كتله... ماخايفه دامك يمي اني بامان
ابتسم ودنك باسني بحنجي ابتسمت سمع خطوات ع الدرج ابتسم ابتعد وفتح الباب طلع بوجهه اوس كاله :-بععععع
رشاش كاله... عفيه حبيبي تخبل بعد تخبل
جاوبه اوس... تخبلت من الفرحه ههههااي
ضحكت كتله... راحت ضرتك
اوس.... ايي اخخ سفن ونزل بمعدتي
ضحكت كتله... معدتك شعليها
اوس... جنت كلما ادحك خلقتها تصير عندي عسر هضم وحموضه تصعد
ضحك رشاش كاله... وهسه خفت مو عبرلي عن فرحتك ؟
اوس... اخخ ياخويه ايگول حرمه طولت طلوكتها لسنين واليوم جابت
طكيتها ضحكه بصوت عالي رشاش گاله وهو يضحك... لا ياادبسز
باوعلنا كال... خربيكم شكد تحجون يلا ابويا يريدكم
باوعتله بضوجه كاله رشاش... جايين
نزل اوس رشاش باوعلي كال... يلا
حره... مااريد انزل
كال... لخاطري
حره... رشاش هالرجال اتهمني
كال... لان مايعرفج... جر نفس كال... مشكلة ابوي كثير يثق باخوانو وما بس هيج الموقف يجبر المايعرفك يصدك
حره... بس مو مبرر هيج يتهمني
كال... حره اخذي الموضوع من جانبه هو مايعرفج زين هو مايعرفج مثلي
نزلت راسي كتله... قهرني
كال... وانه هم كثير انقهرت منو بس يبقى رجال جبير نداري عمرو ونتحمل
هزيت راسي بلا كتله... مااريد اشوفه
كال... لخاطري
باوعتله شويه وابتسمت كتله... بس علمودك راح انزل والا اني مطايقته
ابتسم لزم ايدي ونزلنا كعدت يم عمي اجه باس راسي وكال... اعذريني بويه انه غلطت وتسرعت الوضع الي
دحكتو عصبني وخلاني ماافكر زين سامحيني
باوعت لرشاش هز راسه بمعنى اي وابتسم كتله... الله يسامحك عمي
ابو بكر... بنت حلال وهالمصيبه علمتني جثير الثقه العمياء ماتفيد
جر نفس كال... ماجنت متوقعها من اختي بس هيهات بعد اصدك حجايه منها
هزيت راسي ضل يتلوك ويحجي واني ضايجه وكالبه خلقتي بس كاعده علمود رشاش تعشينا وصعدت لغرفتي طلعت الكتب حاولت ادرس ما كدرت سديتهن وكلت باجر اقرا
طب رشاش شاف الكتب مطشره باوعلي هزيت راسي كتله... مداافهم شي
وكمت الملم بيهن اجه شال الكتب وياي كال... باجر عطله انه اقريج
راح نام وفتحلي حضنه نمت على صدره وبقيت احجيله عن اوجاعي نمت واحس يوم عن يوم حبه بگلبي يزيد
بالرغم من كل ظروف رشاش وواوضاعه السيئه
بس جان مميز وياي بكل تصرفاته ويثق بيا ويدافعلي هالشي جان يوم عن يوم يخليه يكبر بعيني
جان يحب يشوفني ناجحه والي احترام وقيمه كدام الكل جان يحبني
لثاني يوم كعدت متاخر ولزمت الكتب وهو وياي وضل يدرس بيا كل شويه نقطع نسوي شي ناكل او نضحك او نسولف وبعدها هم يرجع يدرسني ويشجعني ولما يحجي متاكد اني مو بس ناجحه اخذ درجات عاليه هالثقه جانت تحفزني كلش
لليل يلا كملت الامتحان خابرت رتيل وحجيتلها عن كلشي وسالتها عن صلاة الاستخاره كالت انها شافت رؤيا حلوه وحتوافق لانها فكرت زين وبنص السنه الخطوبه حتى نخلص امتحانات
لثاني يوم داومت وفعلا جاوبت بكل الي اعرفه وتركتها على الله الاسبوع المر كله امتحانات ورشاش التحق واني التهيت بدراستي
١٥ يوم مرت وهو بالدوام نحجي قبل لاننام كل يوم ونفتح كاميرا
خلصت امتحاناتي الشهريه وبدت امتحانات نص السنه ورشاش وياي بكل خطوه الانكليزي كلمه كلمه يترجملي حرفيا ساعدني بكلشي ولولاه اني ولا طگه
خلصت امتحانات نص السنه على خير وجنت فرحانه خلصت من ضغط جبير لان اخر فتره تراكمت عليا المواد
بيوم كاعده ع التلفزيون وهو حاط راسه ع رجلي ويباوع سمعنا اصوات جوا كمنا اثنينا نركض باوعت عمامه جايين وابو يدور على عكاله ومشدوه بسرعه يمشي ويرتب
رشاش كال... خير؟
ابو بكر ... عمتك خطيه وكعت وانكسرت رجلها
رشاش... انت ماتتوب؟
عمه غفار كاله... ما وكت هالسوالف رشاش
رشاش... انه ما موجه كلامي الك عمي
ابو بكر... خطيه اروح ادحك شبيها واجي ماترهم اعوفها تبقى اختي... وطلع هو واخوته
التفتت طيبه على رشاش كالتله... بس لو اعرف ليش يحب اخوته لهالدرجه راح اتخبل
جر نفس رشاش كاللها... مابيدو يحبهم
حره... امشي نكمل المسلسل ضل بالي يمه
طيبه... جايه وياكم
صعدنا فوك نكمل المسلسل لليل اجه عمي مخنوك ومحتقن يكوللهم... تبجي كثير بالمستشفى وطلبت مني السماح بس ما سامحتها
اوس كله... زين سويت يابه عجل ليش هيج مقهور؟
ابو بكر... تبقى اختي صعبه عليه
مرت يومين وعمي محتقن على اخته الى ان بيوم بالليل اجو العمام كلهم اجتمعو وجابوها تبجي وطاحت على رجل عمي انو سامحني
اني كاعده بالغرفه واسمعهم يحجون سمعت بيه سامحها لو تخبلت صعدت للغرفه طبگت الباب حيل وكمت الم بغراضي طب رشاش كال... يول شدتسوين
حره... ماابقى هنا هسه توديني لاهلي
كال... حره اهدي
حره... شـأ هدئ فوك السوته بيا تقبل ترجع هنا رشاش فوك البلاوي الحطتها براسي
كال... اشترطت على ابوي لو رجعت اطلع بيت وحدي وهو قبل ماباقي شي ونطلع اني وياج ونخلص من هالشكول
رحت حضنته واني ابجي كتله... رشاش مااتحمل اشوفها هنا الله يخليك اطردها
كال... وعيونج كتلهم تكعد بغرفتها وماينسمعلها حس ولا ندحك خلقتها وهي قبلت المهم ابوي يسامحها
حره... مدا اتقبل اعيش وياهن نفس البيت
رشاش... ولا انه بس دحكتي ابوي شلون زعل بغيابها
الحل الامثل نطلع بيت ونخلص من هالاشكال والفرصه اجت ليمي
حره... رشاش استعجل شوفلك اي بيت خلي ننتقل بسرعه
گال... اعرف بيت كلش حلو صاحبه دايشيل غراضو راح اتفق وياه على السعر وهالفتره نجهز اغراض البيت شتكولين
هزيت راسي باي باوعت بعيونه كتله... وهاي الحقيره شلون اتحمل اكعد وياها على سفره وحده
كال... ماتكعدين وياها تتسمم بغرفتها
حره... رشاش رغم هذا مامتقبله وجودها
كال... اعتبريها ما موجوده كلها فتره ونخلص منها انتي بس اصبري وعد انسيج كل الي صار
فرصة هالبيت جنت اتمناها من الله وصارت
ابتسمت كال... اوف يهالضحكه الهدت حيلي ودنك باسني بعيوني حضني ونمنا
لثاني يوم فتحت عيوني بنعاس باوعت للساعه بــ 8 وربع
نهضت روحي وگعدت مطيت اديه
اجت عيوني عليه نايم ع القنفه مدد وذاب روحه بالنوم
تفاجأت هذا ليش يعوفني ويروح ينام هناك؟
گمت على كيف عدلت شعري لبست نعالي ونزلت تحت
اسويله ريوگ طبيت للمطبخ طلعت تلث بيضات لان هو ياكل تلث بيضات حطيتهن ع السنگ
طلعت الطاوه حطيتها ع النار ودرتلها زيت شويه
رحت طلعت نص راس بصل وطلعت شوية كرفس
غسلتهن وحطيتهن ع السنگ
طلعت التخته ثرمت البصل ناعم حيل
ودرته للطاوه حمسته حيل وطگيت عليه الـ تلث بيضات
اگلي وادردم بگلبي
... هالتلث بيضات جنا نتريگ بيها اني وخواتي ابو بطن ابو كرش
لااا ويتنعوص الافندي عيني يريد اگليله البيض بطريقه ثقافيه مياكله هيج مثلنا
لا عيني لازم نضيفله ملح وكرفس وفول سوداني
واني يم اهلي عبالي الفول السوداني هذا الفلفل الحار
بس مستورديه من السودان وشكله اسود
خرررب حضي ... گليت البيض وضفتله ملح وفلفل اسود صارت باجه مو بيض شلون يگدر ياكل هيج من الصبح...؟
طلعت بيضه الي وسلگتها اجاني صوته
:- صباح الخير
حره... باوعتله صفح
:- بسم الله شبيج من الصبح.
حره... ترا شنو هالتطلبات هي بيضه سويها وانجـ.... قطعت كلامي قبل لا اجفص
لان داگوله انجب من گد مااخذني الواهس سكتت رجعت گتله... اكلها واسكت
طگها ضحكه وگال... شتضيفين وياه الله وايدج
حره... حاضيف بهارات ونومي بصره و صاص وكجب هاا شتگول
:- لا ترا هاي كلش واگفه
حره... واگفه لو گاعده... گلتها بضحكه
:-الله يعيني على هالتفاهه... حجاها بابتسامه
حره... حطيت الصينيه وحطيت بيها البيض الطگ
وبيضه الي سلگ
ومن گد مايدقق وينگنگ صرت ارتب بالاكل
قسمت البيضه السلگ وحطيتلها ملح وكرفس ناعم وفلفل اسود صارت تخبل
گعدنا ناكل هو يباوع الاكلي وگوه مخبي ابتسامته
:- شهالاكل بطن عصفور هاي مو بطن بشر
حره... تعرف الي ياكلون مثلك شنگول عن بطنه؟ گلتها واني اباوع الاكله
:- يگولون بطن ثور... گالها بضحكه
حره... نزلت الجاي وطگيتها بضحكه وصلت للجيران
:- بالقرءان راحت الهيبه... گالها وهو يباوعلي مبتسم
حره... الله ذب عليه الضحك اريد اوكف ماكو حلگي من وحده يضحك
گال... يول اسكتي كافي انطيتج مجال هواي ترا... گالها وهو گوه لازم نفسه وبس اكتافه تهتز
دنحجي فاتت الحربايه ضرتي وابنها شافتنا ناكل ونضحك گلبت خلقتها وگالت
الحربايه... عجل شجاج ليش ماسويتيلنا وياج انه وابني مامتريگين... حجتها وهي تخزر بيا
حره... ماادري بيج ممتريگه شفت الكل كاعد عبالي تريكتي وياهم
افتكار... لا عيني تدرين كلش زين بس هاي نحاسه منج
هو گللها :- كافي يول هسه شصار عندج ايد وهذول بيض روحي طگيهم...
گالها وهو يأشر الابن اخو يجيه يگعد يمه
افتكار... ادري هو غير يصير بيننا تعادل
عجل انه من اكعد الصبح واسوي ريوگ
گمت اسوي للكل ليش هي ماتسويلي
وذاك اليوم من ماسويتلها صحت بيا وزعلت
انته تحلل عليها وتحرم على غيرها انته تفرق بيننا
گاللها... لاحول لله ام احمد ترا هي ماتدري انتي بعادتج تكعدين من وكت وتتريگين ويه عمتي
شمدريها انتي مامتريگه ترا السالفه مامستاهله بالقراءان كبرتيها...
حره... الحربايه ماتسكت شلون تسكت غير تموت راحت شغلت الطباخ وهي تدردم باوعتلي
افتكار... دحگي من اليوم ورايح من اسوي انه الريوگ انتي ماتنحسبين ويانا خوش
انه طول عمري اتصرف وياج عن حسن تعامل وطيبة گلب
بس انتي طينتج مبينه شلونها
حره... اوكي لتسويلي بس فكينا وسدي حلگج صرعتينا اووي
شبيج مشايفه؟
هي كلها على بعضها بيضه
هاج هايه مالتي اكليها واسكتي
التفتت على گرصته الي باوعتله اشرلي بحواجبه بمعنى فكينا
هي سمعتني حجيت هيج لو تخبلت گامت تصيح وتگول
افتكار... اني اكل من فضلاتج يول بالقرءان اذا هنتيني اسحلج سحل انوب افتهمتي
حره... وكفت مقابيلها وگلت بصوت عالي... اول شي خففي من صوت جبار هذا زرف اذنا
بعدين شنو مداتشوفين مره ورجلها گاعدين ياكلون؟
متعرفين الا تسمميهم بطلي هالغيره الي عندج يا حربايه
على صوتي اجت عمته ومرت ابوه هو گال بأنزعاج
:- كافي الخاطر الله فكونا حره خلص بويه روحي لغرفتج... گالها بترجي وعيونا عليه
حره... لا مااروح وابقى هنا واكمل اكلي وانته هم تبقى وخليها تموت من الغيره هالحربايه
هي هنا انفجرت داتجرني من شعري هو دفعها وعاط
... كااااافي ترااا مصختيهاااا
ثناء گالت... انته ماتشوف مرتك شلون لسانها اطول منها
گللها... عمه لو تسكتين لو تصيرين محضر خير... گالها بعصبيه
ثناء... وشلون الي يصير محضر خير لازم يدافع عن هاي
:- عمه البارحه نزلت مو مال مشاكل لخاطر الله فكينا... باوعلي... وانتي حره يلا لغرفتج... گالها بحده وهو يباوعلي
... اني باوعت هذول التس تجمعو خلي اروح مو مال مشاكل خاف من يلتحق يكتلني
هو مو خوف بس مااريد كرامتي تنسحل..
عاد لازم اقهرها قبل لا اصعد باوعتله وكتله عناد بيها..
... هايه الخاطرك حبيبي ابو جهالي راح اسكتلها لخاطرك
هو صفن بوجهي متفاجئ درت وجهي ورحت اغسل ومااسمع غير صريخها وتدردمها
ابتسمت بنصر غسلت وصعدت فوگ واسمعه يگوللها
:- كافي يابه مو مستاهله السالفه ساعة السوده من تريگنا طلعتيه سم علينا
اسمع عمته تگوله:- ترا انته تفرق وهذيج مرتك ماتستحي
حره... اني وكفت كلت ارجع اهد عليها طلعت من غرفتي دانزل وقفني صوته
:- عمه انتقي كلماتج الحجايه التنگال عن مرتي تنكال عني
وما اسمح لا الج ولا اكبر واحد هيج يحجي گلتلج مره واعيد وهاي اخر مره تتدخلين بينهن
لا تزودين الفتنه الله يرضى عليج
وهسه يلا كل وحده تكمل شغلها نفس ما اسمع بالقرءان الي اسمع حسها اطردها من البيت
و انعل الساعه الشفتكم بيها
حره... كلهن خنسن واني طمئنيت رجعت لغرفتي ركض قبل ليصعد
گعدت ع الجربايه
هو اجه ورايه مغسل جر المنشفه نشف وجهه ورجع علگها التفتلي
:- بويه تجفي الشر ليش هيج تكبرين السالفه
حره... وانيي شكو مو انت گاعده وشفتها
:- اي بويه شفت بس تجاهليها البسيها مالج علاقه بيها تحجي تحجي وتسكت
زين انه اليوم هنا ومحد يگدر يأذيج من التحق شلون.؟
حره... والله ما ادري مشكلتك وانت حلها اذا اهلك جلاب اني شسويلك
هو خزرني
:- حره لاتجفصين واعرفي شلون تحجين
حره... سكتت ودرت وجهي
گال... اي طلعتي سباعيه ومحد يگدرلج
وساكته علمودي مو علمود ابو جهالج...گالها بأبتسامه
حره... مجاوبت نزلت راسي وابتسمت... لا هيج دا اغيضها
:- ادري بيج عجل هم الجهال منين يجون وانه نايم ع القنفه
حره... اني ادري.. كلتها وضحكت هو شمر عليه المخده وضحك راح طلع ملابسه التفتلي
:- ابقي هنا لا تنزلين انه طالع للغده يلا اجي
حره... ليش تخاف انزل اكتلهن..
:- لا اخاف تنزلين ويكتلنج انتي بس نفخ
ضحكت وهو ابتسم راح بدل شال سويجه كال..
... محتاجه شي اجيبلج شي وياي..؟
حره... لا سلامتك... خله وطلع
واني ضليت بالغرفه رحت كشخت ورتبت نفسي
فرحانه شغل وما اشتغل لان هو گال ابقي هنا يوم السعد عندي
للظهر كلش اجه فتح باب الغرفه وطب باوعلي ابتسم
.. يلا بويه انزلي صار الغده
حره... تمام
نزل ونزلت وراه والتس يخوزرن بيا طبيت للمطبخ رحت لمرة ابوه گتلها
... ها عمه اساعدج بشي
افتكار... بعد وكت توج جايه
مرة ابوه داتحجي هو صاح
:- حرررره
حره... هااا
:- تعالي بويه
حره... رحت يمه گاعد بالمضيف يم ابوه واخوانه گعدت يمه گال ابوه
ابو بكر:- ها عمو ماشفناج اليوم
قبل لا احجي هو گله... تعبانه واني كتلها ترتاح
ابو بكر... خيرج بويه شيوجعج
حره... لا مبيا شي بس عندي شوية نحول
ابو بكر... اي بويه ماتاكلين اكلي هو ماكو شي حلو بالعراق غير الاكل دكلي تفيدين نفسج
اوس گال... اي والله مرت اخوي اكلي الاكل صحي ونعمه من الله
والله فضل عليكي بان طبخكي جيد جدا
فانا اقول لو صرتي زينه نريد دولمه للعشى لان طگ گلبي عليها
حازم گاله... ها يول شو نگلبت تحجي جنك داعشي
اوس... انجب يول لتدخل
حازم لزمه من رگبته... اني انجب؟
حره... توه دايتعاركون ابوهم نزع العگال وگال
ابو بكر... بالقرءان خلي اسمع نفس الا اگطعو عليكم وبعدها اشمركم بالشوارع
حازم گله... لا اني ماتگدر تشمرني مرتي ساتره عليه
حره... ابتسمت لكلامه جابن السفره ونكلن الاكل وكلهن مگلوبه الخلق
كملنا اكل وكمنا نشيل الصحون
الحربايه مسويه جاي اني داخلي الصحون بالسنگ
ويمي ام حازم كالت ضرتي
افتكار... انه بعد ماعليه المطبخ عليجن..
حره... گلت اعاند ومااسويه داطلع ام حازم گالت
ام حازم... يمه سويهن اعتبريها بمكاني ظهري يوجعني مو مال يطيحن براسي
هذن اليوم اضطرن ونظفن
والا هن لو يخيس البيت ماعليهن
حره... وهنه فعلا اني شايله الشغل عنهن لو يضل البيت لل11 ماينظفن ينتظرني اني انظف
سكتت صدگ هي مره جبيره عيب وزحمه هي تغسل المواعين رحت اني
وگفت داغسل بالمواعين اجه وراي وگال
:- مو كلنا مريضه شكو جاي تشتغلين..؟
حره... يلا عادي خلصت مبقى شي
:- كملي ولحگيني للغرفه
طلع طب ابوه باوعلي
ابو بكر... ها بويه مو مريضه ليش انتي تغسليهن
حره... لا عمو احس احسن
ابو بكر... بويه اذا تحسين باي تعب عوفي كلشي من ايدج
حره... لا عمو الحمدلله اني بخير
ابو بكر... الحمدلله
كالها وشرب مي وطلع
كملت وصعدت للغرفه فتحت الباب طبيت
گتله... هاا ليش كتلي تعاي خوماكو شي
:- لا ماكو شي بس اريد انام تعالي لعبي بشعري
حره... رحت كعدت وهو حط راسه بحضني كتله... والله عمي مسعد
:- شلون مسعد بلا شطالب منج
غير منيمتني ع القنفه
حره... اهوووو ساعة السوده لو نايمه اني ولا انته گرعتني
وبعدين اشو انته نصاص الليالي وتتشرد للقنفه شسويلك؟
:- اني اكثر واحد متساهل وياج بهالبيت
حره... هذا كله ومتساهل... كلتها بتعجب
:- اي بالقرءان انه شمقصر وياج غير محد يگدر يحاجيج بالقرءان ماكو مثلي
انه التتزوجني المفروض تبوس ايدها وجه وكفه ناس غافله عن النعمه
ضلي هيج ضلي لشوف تاليتج شنو
منيمتني ع القنفه
بالقرءان تتحاسبين عليها هالكسرة الظهر الا اشتكي لله
حره.. اهوووو عمي نام ع الجربايه بس فكني
:- اي عفيه من البدايه وصيري هيج بس لازم تعرفين اذا انام ع الجربايه تصير هواية امور.
حره... مثل شنو..؟ كلتها بتسائل
:- بالليل تعرفين من ننام... حجاها وهو يغمزلي
حره... شنو ننام انت ع الجربايه واني ع القنفه
صفن عليه وكال
:- مال اجيب عگال ابوي وعلى ظهرج وهم مايشفى غليلي
حره... ضحكت... لا بلا ديلا نام نام
:- اني انام شوكت ما اريد
خزرته كلي... تهدديني؟
حره... نااام... حجيت واني ع الاساس خازرته وگوه لازمه ضحكتي
كال... خوش راح انام بس اذا نمت هذا الشي مايعني خايف منج... ويأشر ع الاساس ايده ترجف
صفن شويه وغمض عيونه سكتنا ثواني وطگيناها ضحكه
ضل يضحك شويه وسكت
باوعلي
تنهد وكال... بالقرءان زلم ماتگدرلي بس انتي هديتي حيلي
حره... استحيت وسكتت معرفت اجاوب نزلت راسي خجلانه رفعه بأيده
صارت عينه بعيني
گال... ااااخ بس شوكت گلبج يحن عليه
حره... وشمسويتلك اني
:- مامسويتلي بس شگيتي گلبي ونمتي بيه
حره... عاد اكو غطى الجو بارد
صفن عليه وكال... بالقرءان مو مال رومانسيه صديقي اركان من يسمع هالكلام يذوب وانتي عود يسموج انثى حجر كلشي ماكو
حره.. ضحكت وهو ابتسم ضل يحجي ويتغزل الى ان نام بحضني
رفعت راسه بهدوء وحطيته ع المخده
داگوم هو جرني عليه وحضني كتله.. بس خلي اگوم
كال... عليج بداعت العباس الي تحلفين بيه لا تخربيها عليه
خننطمر سويه
حره.. سكتت مبتسمه كال
... نامي مو شگيتيني...
حره... ضحكت ونمت بحضنه
للمغرب نايمه على ايده وحسيت بيه يلعب خده بشعري فتحت عيوني ناسيه عبالي الفجر گتله
... ها صباح الخير
... صباح النور يلا گومي سويلنا ريوگ...
حره... ماشي.. بعدت الغطى داگوم صفنت تذكرت احنا الظهر سولفنا ونمنا
باوعتله هو يمي كاعد ضحك
:- متيهه انتي دگومي بويه دنيا المغرب
حره... شمرت عليه المخده... غير انت گلت كومي سوي ريوگ
گام وكف... احب انطيج انطيج على گد عقلج
حره... شتقصد عقلي زغير هااا؟
ضحك.. يلا گومي نصلي
ابتسمت كمت رحنا صلينا وكملنا داننزل
كتله... ياااا
:- شكو
حره... فشله اوس راد دولمه ومسويتها...
:- عادي على باجر سويها
حره... خاف فشله..
:- لا عادي هو اصلا يتشاقى وياج لتهتمين
حره... سكتت نزلت باوعت اوس توه مخلص صلاة كتله
... دااسويلك دولمه ونسيت عزا فشلانه منك
اوس... يولو جنت اشاقه صدگ تحجين على راحتج... كالها بضحكه
حره... لا والله باجر اسويلك نسيت اليوم
اوس... ان شاءالله
حره... نفس الروتين تعشينا والحربايه صبت جاي وكالت
... انه مااسوي المطبخ مو عليه
حره... تركتها تحجي اخذت جاي الي والرجلي وصعدت للغرفه
هي من شافتني صعدت تفاجئت لان قبل اني انظف هالمره انجبرت هي تسوي المطبخ
و هو اصلا عليها لان العشى سوته مرت حازم
صعدت لكيته بالصاله رحت نطيته الجاي ورحت للغرفه كعدت ع الجربايه جريت الموبايل اشوفه لكيت سالي متصله عليه
اتصلت عليها.... شلونج سالي
اجاني صوتها ما اعرف شبيه بس مثل الخايفه گلتلي ...
سالي... حره انتي وحدج؟
... اي ليش
سالي... حره خايفه حيل
حره... من شنو اكو شي شبيج سالي..
سالي... شوفي سمعت عثمان ورجلج يحجون
حره... اي شنو يحجون؟
سالي... يحجون عن البيت الي احترگ!
حره... داجاوب طب هو گال
... حره حضريلي الدشداشه.. من شافني لازمه الموبايل صفن رجع كلي
... ويامن تحجين؟
حره... احجي ويه اختي سالي
:- ماشي... گالها وهو يباوعلي
كتلها... سالي دقايق واتصل عليج
سالي... تمام منتظرتج
حره... گمت طلعت الدشداشه وكويتها علما هو سبح كمل واجه اخذها ديلبس
... وين رايح
:- يم عمامي رايحين اني واخوتي ابقي هنا لا تنزلين ولاتسوين مشاكل واي شي يصير اتصلي بيا خوش
حره... ماشي... بدل وكمل لبس ساعته التفتلي...
... محتاجه شي..؟
... لاا سلامتك
خلى وطلع رجعت بسرعه شلت الموبايل واتصلت على سالي
حره... قلقتيني شكو سالي
سالي... حره اني ما اريد ابقى هنا بعد...
حره... ليش شكو؟
سالي... هذوله يخوفون
حره... اي بس دفهميني شصاير قلقتيني
سالي... شوفي اليوم اجه رجلج يمنا
حره.. اي؟
سالي... وديتلهم الضيافه انطيتها لرجلي ورحت انظف المطبخ كملت ماعندي شي فارغه
صار عندي فضول اتسمع شيحجون
جانو يحجون بصوت ناصي وعثمان يكول لرجلج
عثمان... احنا كلش غلطنا بحق البنات مرات ماانام بالليل بسبب هالشي
رشاش... ليش اذيتها لسالي؟
عثمان... لاا بس احس طريقتنا الي وصلنا بيها للبنات وصخه
رشاش... البنات بأمان ويانا ماعذبناهن ولا اذيناهن وكلشي صار من مصلحتهن قبل مصلحتنا
لو باقيات جان صار بيهن مثل البقيه
عثمان... اي مانكر هالشي بس احنا غلطنا كلش غلطنا اني متندم
خصوصا ع البيت
حرگناه رغم هالشي حرام
اني حيرت اختهم بذاك اليوم يمكن شورت بيا
رشاش:- هسه انته ليش تفتح ابواب قديمه؟
عثمان... ماادري ديأنبني ضميري اكثر شي على حرگ البيت والفلوس وو
قطع كلامه رجلج من گله... كااافي سد حلگك وانسى السالفه واعتبر ماصارت
اذا احنا غلطنا فصححنا الغلط ومنعنا غلط اكبر انو يصير
حره... شنو يعني هم السبب
سالي... اي
هذول كلشي يسوون احسهم مجرمين ما ماريد ابقى
اريد ارجع يم رتيل
حره... الدفتر هم احترگ بيومها والصور وكلشي
طلع هو المسؤول عن كل هذا !!!
بذاك اليوم النار الي حرگت البيت حرگت گلبي... گلتها بألم ودموع..
سالي... خنرجع لبغداد حره ما اريد ابقى هنا
حره... ومنو يخلينا نرجع..؟
سالي... مو الا يقبلون خلي نشرد
حره... ومراح يوصلولنا وهم يعرفون بيتنا ببغداد؟
سالي... مقدام ياخذنا ونشرد ميعوفنا خايفه والله... كالتها بشهگه وصوت متقطع
ضلينا نحجي وسالي حاولت تقنعني ننهزم لان من صوتها مبينه كلش خايفه...
سالي... اني خايفه حتى نوم ماكدر لا انام ولا ااكل عفيه حره خلي نروح
حره... وين نروح ولج منندل الطريق
سالي... لا اني اندل بس خلي نروح... گالتها وبجت
حره... زين وين نروح؟
سالي... خلي نوصل لبغداد وبعدها نهددهم نشتكي يتحاسبون ع هالفعل قانونيا
حره... اني سكتت كالت.
سالي... لتصيرين جبانه خلي نروح اذا مااجيتي وياي باجر اطلع وحدي
حره... لا اكيد متطلعين وحدج اني وياج
سالي... تمام وين انتظرج؟
حره... اني اجي ببيتكم من ارمشلج توكفيلي يم الباب ابد لتتحركين بدوني
سالي... قبل صلاة الفجر نطلع؟
حره... لا باجر زوجج يلتحق؟
سالي... لا؟
حره... لعد خليها ورا الصلاه قبلها الدنيا شتا بارده وضلمه مو مال نطلع قبل الفجر الدنيا مو امان...
سالي.... ماشي
حره... جيبي الجنسيه مالتج لتنسين
سالي... تمام وحتى فلوس حضرت
حره... اني صدگ سديت الخط وطلعت جنطه صغيره خليت بيها الذهب وفلوس والجناسي وتراكات اثنين
كلشي مااخذت وياي.
بس اريد اخلص
اني صح كلبي واجعني من هالتصرف بس اختي كالت حتى لو متجين انتي اطلع وحدي
واكيد مااخليها وحدها لازم اني وياها..
خليت الجنطه جوه الجربايه وغيرت الفرشه خليت وحده اطول حتى مينتبه اذا اجه
كعدت افكر واني خايفه حيل وضليت بين المقهوره والخايفه من تصرفنا لان حسيت بحجم الشي الدنسويه هو اذا مو وياه مااطلع مو انوب اطلع وحدي ومن الصبح
گلبي خايف حيل ويرجف
لوقت متاخر اجه هو طب للغرفه
گال... ها شلونج..
اني ماباوعتله ضليت اباوع بالفراغ ومكتفه ايديه ضايجه
هو حس اجه كعد يمي كلي بصوت ناصي
... شبيج حره؟
حره... مبيا شي...
حط ايد ع كتفي
وكال... احجي الصدك
اني باوعتله وگوه صبرت نفسي ماابجي گتله...
انته احجي الصدگ
:- شنو...؟
حره... انك ما جذبت عليه بشي
:- سابقا جذبت عليج بكلشي بس هسه انه كتاب مفتوح گدامج
حره... اكو اوراق بهالكتاب خافيها عني؟
باوع بعيوني وسكت... گتله... احجي..
:- لاا ماخافي شي عنج
حره... متأكد..؟
:- شنو الشي التردين تسمعيه حره
يحجي ويباوع بعيوني
حره... احسك ضام شي عليه
:- مهما غلطت او ارتكبت اخطاء بحقج خصوصا وبحق خواتج بشكل عام وحتى لو اذيتج بدون قصد الحقيقه الوحيده الي انه والكل لاحظها ماعداج
هو انه مخبل بيج اليوم اليمر بدونج اتعذب بيه حره انه سويت المستحيل حتى اجيبج واگعدج ببيتي وبنص غرفتي
لتفكرين سهل عليه من سويت كل هالاخطاء بالماضي انه غلطت مو بس بحقج بحق حتى الرتبه الي على كتفي بس اقنع نفسي واكول جاي اعوضج او احاول اعوضج
حاربت اهلي والدنيا كلها علمودج من يوم ماجيتي قصرت وياج بشي؟
حره... نزلت راسي
كال... احجي اذيتج بحجايه؟ مديت ايدي عليج؟ حجه احد عليج ومارديته؟
لو نفترض تركتج تروحين بذاك اليوم لو نفترض ماجبتج لهنا
اعترف جبتج بالقوه بس شلون عاملتج؟
لو متزوجه من واحد غيري هيج يعاملج.؟
حره... باوعت بعيونه و سكتت
:- ليش ساكته جاوبي هاي اذا كدرتي تتزوجين واحد ثاني
حره... شتقصد..؟
:- الي مثل اخوج ويغلط يدفع الثمن غالي حتى لو بعائلته...
حره... شنو انته دتهدد؟
:- انتي لسه مفاهمه شي ولا راح تفهميه
بس خلي هنا شغله وحده ... واشر باصبعه على راسي ودكها مرتين ... هايه الحركه دائما يسويها
اني اذيتج بس بنفس الوقت نقذتج
واذا انتي اليوم معززه مكرمه بعد ماجبتج لاتتوقعين يصير هالشي لو تاركج...
حره... مفهمت.؟ گلتها بتساؤل
:- لاتفهمين احسن ويلا ع النوم
حره... راح ديبدل اني عيوني عليه افكر بكلامه بس اكو خوف بداخلي
هو نزع الدشاشه ورجع باوعلي
:- مضيعه شي..؟
حره:- مضيعه اشياء مو شي...حجيتها بأستهزاء
ابتسم واجه گعد يمي
:- سولفي اسمعج اعتبريني مخبل وسولفي
حره... ميحتاج تصبح على خير...
هو تنهد وكال.... وانتي من اهل الخير
حره... نمت ع الجربايه هو دينام ع القنفه كتله...
... عادي تكدر تجي تنام هنا.. حجيتها ودرت وجهي عنه من الجهه الثانيه داانام
اني مااريده ينام ع القنفه لان صايره مقابيل الباب
خفت من اخذ الجنطه او افتح الباب يحس
اجه نام يمي بس ضل يتكلب كل شوي
سويت نفسي نمت جرني عليه حضني ونام
صار الفجر فزيت قبل الصلاة هو حاط منبه اني طلعت الجبه والجنطه خليتها بالحمام بالزاويه لان هو يكعد الفجر يصلي ويرجع ينام
وماعند دوام حتى يسبح ومن يتوضى ع المغسله فحطيتهم بالحمام حتى بسرعه البس واخذها واروح
الولد ميكعدون الفجر بس حازم من عنده دوام يكعد وهو باجر ماعنده دوام
واوس ويه الفجر يگعد يصلي ويطلع
بس اوس بالطابق الاول اني بالثاني والثاني بيه حمام والاول كذلك
توضيت ورحت اقره قران وابجي خايفه ومتوتره
الا ان اذن
هو كعد ع المنبه شافني اجه كعد يمي
لابسه ازار الصلاة مسح دموعي
:- بيج شي حره؟
احد اذاج احجي
حره... مبيا شي بس
:- بس شنو
حره... مشتاقه لحياة...
هو سكتت ورجع گال... حياة شهيده يم ربها وراح تزعل اذا بجيتي عليها صليلها ركعتين افضل من البجي وهي هسه اكيد مرتاحه اكثر مننا
هزيت راسي ومسحت دموعي وكمت اصلي هو راح يتوضى
شويه واجه وگف گدامي يصلي
هو مكتف ايد واني لا
صليت كملت
گلي... تقبل الله
حره... منا ومنك
رجع دينام اني طبكت المصلى وحطيته بمكانه داطلع
اجاني صوته... وين رايحه؟
حره... اروح للحمام
... تمام
حره... اني رحت طلعت موبايلي لكيت سالي دازه مسج
... ها كعدتي
اتصلت عليها رفضتني
حره... كتبتلها... سالي عوفي هالسالفه
سالي... من البدايه كتلج اذا متطلعين وياي اطلع وحدي اني اروح مابقى ويا اخاف
رجعت دزت ... خلص انتي ابقي اني رايحه
حره... ماشي جايه وياج
سالي...ماشي اني راح ابدل
حره... تمام والبسي حجاب لتنسين
سالي... ماشي
حره... فتحت الباب على كيف هو نايم نزلت تحت اكو استكان جاي للنص وبيض
باوعت سيارة اوس ماهي بالكراج يعني طالع
رحت تفقدت الكل نايمين
بسرعه صعدت اخذت الجبه ام السحاب ولبستها
وحطيت الشال عليك ياالله يمكن بدقيقتين كملت اخذت الجنطه وطلعت رجعت باوعتله
ورحت
نزلت من الدرج على كييف ويه مانزلت تذكرت الحذاء ماعندي
ضربت راسي بقهر مو مال اصعد خاف يفز نومه خفيف
طلعت شفت مرت حازم عايفه حذائها برا ويه باقي الاحذيه مرات تعوف الشحاطات مالاتها والاحذيه بره بالحافضه مال الاحذيه
اخذت واحد ولبسته بسرعه وفتحت باب البيت ع كيفي طلعت اخذت تكسي لبيت سالي
هم ع الشارع كلت نازل ودزيت مسج لسالي طلعي
بسرعه طلعت اجتني تركض
لزمت ايدها
سالي... نخابر مقدام يجينا
مشينا بسرعه وكتلها... لا لتقلقيه ميلحك يجينا لازم نروحله هسه
ابتعدنا عن بيت عثمان واخذنا تكسي وكلناله يذبنا يم الـ****
وصلنا لهناك السايق راح ورجع
كال... بابا شنو متيهات انتن.؟
كتله... نريد نوصل لبغداد
السايق...اصعدن انه اوصلجن
حره... باوعنا ثنينا بوجهه بعضنا تالي صعدنا وياه لان مضطرين
سالي شويه وعاطت....عزاااا تليفوني ماكو..
والمحادثات مال الصبح موجوده..
حره... فتحت موبايلي
لكيت الرسايل والمكالمات محتركه حرك منه
:-جاوبي
اشتعلو اهلج
لج جاوبي يول وينج
احترگو اهلج
اخر شي كاتبلي
:- اليوم احط تيزاب واحرگج مو اشتعلو اهلج
حره... دب الخوف داخلي وگلبي وجعني... يتبع...
_____________
التجي وتگول البارت قصير اذبحهااا خوش
وشي ثاني
غلسن ؏ الشحگ تمام😒
واذا شفتني ساحگه باسم بطل لو بطله سوولي تاك عليه حتى اسوي تعديل
مو تغلسون؟
استروني ان الله يحب الساترين🥲💔
تصبحون ؏ ماتتمنون كرزاياتي
حساب الانستا
nawras_qasim_22
حساب الفيس بوك
Nawras_qasim
بنات سوولي متابعه للفيس بوك خلي يقوه
# لاڤيوو نفر نفر 🫂🍒
###ملاحضه بنات
حره من رجعت ثناء للبيت طردت رشاش وگام ينام ؏ القنفه
نسيت مذكرت هالشي البارت صار كلش طويل والاحداث هوايه
فـ نسيت هالحدث
واخاف اروح اسرد وينحذف البارت
هو مبيه هوايه بس طردته وخلص 😭😂
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!