رواية "هل كانَ حُلماً...؟
(العِراق_المُصغَر)
بقلمي... نورس _قاسم"
________________
لتنسون التصويت والمتابعه
+كࢪزاياتي علقو ؏ كل فقࢪه بالقصه خلي تصعد...
_______________
:- شفت الصوره مشگگه رجفت ايدي من القهر وبجيت حطيتهم ع الميز حاولت ارتبهم والزگهم مارجعو مثل قبل
گلت بگلبي ماكو غيرها هالحقيره اكيد هي سوت هيج
لزمت الصوره المشگكه بإيدي وصحت افتكااار
فتحت الباب وطلعت واني اصيح واگوللها... اليوم اگطعج باسناني
وصلت لاخر بايه طلعت طيبه من المطبخ قبل لتحجي دفعتها وطبيت للمطبخ ماشفتها
طيبه اجت گالت... شكو شبيج
كتلها... وينها هاي الجلبه
وطلعت من المطبخ للهول دااطب للاستقبال صارت بوجهي جانت مرتبكه قبل لتحجي صفگتها راجدي ولزمتها من شعرها وضربت راسها بالباب
گامت تصارخ الكل التمو واني اگوللها... ياكلبه انتي منو وتشگگين صورة صديقتي الي تشرف عشيرتج والله اليوم اسحلج
اصيح واحجي هي دفعتني رجعت ضربتها راجدي واسمع عمي يصيح ... يول هيدن
بس اني مااسمع شي العصبيه اكلتني داتضربني دفعتها وگعت بقوه ع الگاع ووگعت عليها وطحتلها راجديات البنات ملتمات يردن يكومني عنها ميگدرن
ملتخها شعرها تسلت بايدي وعمي يصيح والبنات يبعدني عنها
اسمع خالة رشاش من بعيد تصيح :-عوفيها يمه اذا ماذيتج انه اكتلها لاتصيرين بالوجه الاسود
بس ماسمعت ضربتني راجدي رجعت ضربتها ووحده تدفع وتقاوم الثانيه الى ان طب اوس صاح
:-ياالله حدرو دحجو عركة وفزعات يَـ ولِد هنا
سمعت صوت رشاش صاح... حره
وجرني من خصري شالني وبعدني عنها اني دفعته وگتله... لو مو انت اليوم اموتها لهالجلبه
گال... اوكفي بس فهميني شمسويه؟
دفعته كتله... وخرر
وهديت عليها هو لزمني باديه من خصري وبعدني وراه واني ابجي وافرفح
ابو صاح بصوت عالي... صوتجن يول ولا نفس بالقران ما محترمات
باوعلي وكال بنتر وعصبيه... انتي شلون تتعدين على بنت اخوي وببيتي شلون تتجرأين ترفعين ايدج بوجودي اصلا مامحترمه
حره... ماراح اتعلم الاحترام من احد الحمد لله معروفه بادبي واخلاقي وقبل لتجي تحاسبني حاسب هالكلبه ولتصير وياها ع كلشي كافي عاد
باوع لرشاش بخزره وگاله... ماجاي تدحج حرمتك شلون تقلل ادب وياي؟ راضي تحاجيني هيج؟
رشاش گاله... يابه استهدي بالله وخلينا نعرف هاي شمسويه لتوته
افتكار... ماسويت شي والله هي نزلت ضربتني هيج بدون سبب جدام الكل وعمي شاهد مو يعميي... تحجي وتبجي
ابو بكر... تريد تخزينا انت وفوكاها تدلعها خاف حضرتها تزعل؟
ماتعرف تادبها تعلمها الاحترام!
دااحجي رشاش صم حلگي گاله :-حرمتي محترمه يابه ما يحتاج اعلمها انه جايبها من بيت ما من الشارع
ابو بكر... حتى لو ما محترمه ولا محترمه احد هينا
رشاش جاوبه... مااسمحلك هيج تحجي وتتجاوز
كلامك هاذ ما اهانه لحرمتي وبس لا اهانه الي
ابو بكر... عجل الي سوتو ومراددها هاذ شني؟
رشاش باوعلي گال... احجيلي شسوتلج هاي... وياشر على افتكار
باوعت لايدي ماشفت اجزاء الصور بجيت وضليت ادور بالكاع عليهن اجه وراي رشاش گال... فهميني
نزلت الملم بالصوره اوس نزل يلملم وياي گال بهمس :-بردتي گلوب المسلمين
باوعتله واني ابجي گعد بصفي رشاش اوس گال... هسه انه المهن هن شني ذني؟
گومني رشاش مديت ايدي اشوفه الصوره گتله واني اشهك... شوف شمسويه بصورتي اني وحياة الجبتها من بيبي بهيه شگگتها
هو اخذهن وفتح عيونه على وسعهن رجع عليها كاللها بصياح :-هااااي لييييش؟
افتكار... والله ماانه جذابه تتبلى عليه
ابو بكر... انت بدل ما توكف حرمتك عند حدها جاي تصف وياها !
رشاش دار وجهه على ابو وكاله :-انه وحريمي لاتتدخل يابه
ابو بكر... لا اتدخل ونص دام بنت اخوي بنص السالفه مااعوفها
رشاش باوعله بعدم اهتمام ورجع باوع لافتكار وگال... انه شكلت؟ مو كلت ممنوع تتعرضين لحرمتي
افتكار... والله مـ....
قبل لتكمل كاللها بنتر... كلتت لو لاا؟؟
افتكار... والله ماسويت شي والله دحج يجوز غيري شاك الصوره
حره... لا تجذبيين شفتج بعيني وانتي تنزلين من الدرج
افتكار... اي وشكو بيها... باوعت لابو رشاش وكالتله... عجل شلون عمي شلون مااصعد فوك؟
كاللها بنتر... لا تصعدين وغصبا ع الكل البيت هاذ بيتج
صاح رشاش... لا عيني ما بيتها هاذ بيتي والي حصه بيه مثلي مثلك بالضبط
فلاتحجي من كيفك وتنطي للي تريدو
ابو بكر... تدور وياي رشاش؟
رشاش ... اذا تبقى هيج تنطي مجال لبنت اخوك والله شني يتيمه اي ادور وياك
ابو بكر... الحرمه واكفه جدامي ماسوت شي شلون تريد ابليها واكول اهي غلط يلا ترتاح
ليش داحكني ما اخاف من الله حتى اظلمها ؟
جاوبه رشاش... تخاف الله من تظلم بنت اخوك بس لما السالفه تتعلق بابنك وحبيبتو ما تخاف الله حتى لو انظلمو ما؟
ابو بكر... ليش انه شمسويلكم تا اظلمكم؟
جاوبه رشاش... تعرف كِلش زين شمسوي
... باوع لافتكار وكاللها... وانتي حضري غراضج وردي لبيت عمج بلكي يعرف يربيج ويعلمج الاصول
افتكار... لا عليك الله انه مالي غيرك وين عايفني
ابو بكر صاح... لا تتوسلين ما تطلعين من هين انتي
رشاش... مالكك شغل بحريمي كلتت
ابو بكر... لا تنحاز لذيج حتى ترضيها جاي اكلك الحرمه ما سوت شي لا تظلمها
رشاش... هو شنو الماسوته هاي... واشر عليها.. شكت صور لبنت شهيده وغاليه على گلبنا بأي حق جاي تكول ما غلطت؟
ابو هدئ وعقج حاجبه گال... شهيده؟
گله... اي
صاحت خالة رشاش... عزا بعينج يا افتكار صخام الصخم وجهج يول مال حرگ شهالصلافه العندج
افتكار كالتلها... يا ماسويت شي لاا تصدگوها
گاللها رشاش... ولا حرف يلا لعند اهلج
ابو بكر... ماتطلع من هين الا على جثتي
رشاش... لا تدخل بيني وبين حريمي الله يرضى عليك
باوع لافتكار وكاللها... يلا عيني
ابو صاح... رشاش كتلك بنت اخوي ماتطلع من هين
رشاش جاوبه... وانه كتلك مااريدها هين بعد
طب بكر كال... خير يااهل الخير شكو فضحتونا اصواتكم واصله لسابع جار
صاح ابو... دحج لهاذ... واشر على رشاش
بكر باوع لرشاش واشرله بعيونه كاله... شكو يول
قبل ليحجي رشاش صاح ابو وكال... حرمتو هجمت على ام احمد ودحج شسوت بيها
بكر باوع لام احمد ورجع باوعلي باندهاش كمل ابو كاله... وبدل مايحاسبها على وكاحتها ويا ام احمد وجسارتها ومراددها الي
راح صف وياها ويريد يطرد ام احمد عجل هو هاذ حجي؟
شني مالو رداد
بكر كاله... اهدى... وباوع لراش كله :-صدك هالحجي؟
جاوبه رشاش بهدوء... ام احمد تجاوزت بجسارتها دخلت لغرفتنا بدون علمنا اولا
واخذت صور حياة الله يرحمها وشككتها عناد بحرمتي
بكر باوع لام احمد كاللها... لا حول ولا قوة الا بالله شهالحجي ام احمد
افتكار... والله ما سويت شي
جاوبتها بصياح... لتجذبين شفتج بعيني وانت نازله ومحد اله مصلحه يسوي هيج غيرج انتي وهذيج
رشاش كال... حره صوتج
حره... شبيه صوتي ضوجتكم لان صيحت مو
بس لما دخلت لغرفتي وشككت صوري ماضجتو الموضوع عاديي؟... كلتها باستهزاء
بكر كال... لا ما عادي ام احمد حدري هين اعتذري وفكينا
حره... لا تعتذر ولا شي رجلي مارايدها شكو منيميها على كلبه
باوعتلها وكتلها... اذا عندج ذرة كرامه واحساس اطلعي من حياتنا وكافي تلزگين بروحج گوا
جرني رشاش وخرت ايدي بنتر كتله :-هسه تطلكها
خزرني كال... صوتج
سمعت ابو يصيح ويكول... ما من حقج انتي اخذتيه وهو متزوج مالج حق تطلكيهم هسه
حره... الي حق ونص هذا رجلي وانتو لزكتوها بيه كوا
ابو بكر... شني الظرف ما مهم المهم جان متزوج واليوم مالج حگ تطلگيهم
دااجاوبه رشاش حط ايده ع حلگي وگال... تعاي
وجرني صعدني للدرج واني ادفع بيه احس متت من القهر شفت هند وثناء واگفات ع الدرج ويتفرجن خزرتهن وطبيت لغرفتي ابجي وافرفح اول مره احس نفسي هيج معصبه ومخنوگه من القهر
سمعته كال... هيدي يول
گتله... دااحاول اجمع بشكو صوره لحياة واخليها عندي وهالكلبه شگگتها شلون اهدى
لزمني من اكتافي گال... صوتج خلص الرام عند بيبيتج ننسخ غيرها
صحت... حتى هم من اجيبها تشككها رشاش اني ماابقى ولا ثانيه دام هالكلبه عندك
هسه تطلكها اني مااريدها
كال... لو السالفه هيج سهله جان طلگتها من زمان
گتله واني اصيح... سهله صعبه مدخلني تطلگها يعني تطلگها
فرك عيونه وجر نفس وسكت گتله بصياح... دااحاجيك جاوب
نتر بيا گال... صوتججج يووول
كعدت ع الجربايه ابجي كتله
.. ماابقى وهي هنا ليش متريد تطلكها احجي
كال... استغفر الله ياربي انه مااريد؟ يول مجاي تدحكين شكد جاي اعاني انه؟
خلص ارحميني كافي كل حجايتين وخيرتيني هيج
لو الموضوع بيدي جان طلكت من زمان
كتله... محد يكدر يجبرك على شي بس انت عاجبك يكون عندك ثنين نسوان
كال... حره كافي كمتي تمسلتين ليش جاي تدحكيني اعاملها كزوجه!
كتلج مارايدها انه
كتله... لعد ليش لسه هي يمك ليش ماطلكها
ديحجي كتله... ماكو لتكلي مجبور محد يكدر يجبرك على شي
كال... استغفر الله ياربي صبرني گبل لا انفجر
بجيت كتله... ابوك ما جذب انت هم تفكر بيها ويمكن بيوم تتقبلها وليش حتى متتقبلها يعني اشو حلوه وصغيره
اني الحماره الصدگتك وركضت وراك
گال... اسكتي لا انـ***ج الخلفوج هسه اسكتي
كمتي تمسلتين حجايه وحده الزگج هين... واشر ع الكاع
بجيت حطيت ايدي على راسي هو دار وجهه وضل يستغفر شفته هدى رجعت ادردم
گتله... وابوك صاف وياها عليه محد يحبني شفت شلون بهذلني هو اصلا ميريدني
ابوك متأمل تتقـ...
قبل لا اكمل كال... دنعل ابوي لا ابو عشيرتي لا ابو الساعه السوده الي تزوجت بيها خوش
بس فكيني يول راسي صدع
كمت دفعته... ها هسه صرت متريدني كول من البدايه ندمان على زواجك مني
اصلا كلبي جان حاسني جنت حاسه بنغزه بس هسه تاكدت طلعت صدك ندمان وبعد متحبني
هو صفن عليه واني مفرفحه ابجي واصيح جرني من شعري وباسني براسي وحضني
بجيت كال وهو يبتسم... اوف يهالهرمونات
حضنته وابجي كتله... مقهوره مخنوكه
كال... اي فهمت السالفه
رفعت راسي گتله... شنو
باسني بخشمي گال... يول بالقران محد تاخذ مكانج انتي محتله گلبي وعقلي
حره... وهاي
گال... لاتسأليني عنها اصلا ماتدحكها عيني بالله
جرني گعد ع الجربايه مسحت دموعي و گعدت يمه حطيت راسي ع صدره گتله... كارهتها
گال... وانه هم.. جر نفس.. اطلگها بس تصيرلي فرصه وعد
حره... محد يگدر يجبرك
گال... جاي تدحكين كلما اطردها يجيبوها عمامي
حره... اطردها ومن يجيبوها هم اطردها
جر نفس باسني من راسي گال... ثقي بيا ولاتشغلين بالج
حره... وشلون هسه مراح تحاسبها
گال ... لاتخافين مااعوف حگج
حره... والصوره
زفر نفس گال... الله يساعدني
دفعته گتله... شبيك
گال.. يول شگد تلحين انتي
حره... عادي تعود شسوي
ابتسم گال... كِلش اكره الالحاح بس احب كِلشي بيج
فمضطر احبو دامو منچ
ضحكت گال... يروحون فدوا عمامي لهالضحكه يَـ دوخة راسي
ابتسمت گتله... صار عندي سكر من حلاوة كلامك
ضحك گال... شكر
باوعتله گتله... ها مرتضى
ضحك ديحجي اندگ الباب گام فتحها طلعت خالته كالتله... ها يمه وديني يم... طبت باوعتلي رفعت ايديها غمتني گالت... امداج ضلي تبجبجي هينا يم الزلمه لبين مايطفش وذيج تحرگ من جوا ليجوا
رشاش ضحك گاللها... يول انه اطفش من بطش الدنيا وانسى بحضنها
مال اطفش من هالحلوا سالفه مستحيله
باوعتله بحب وابتسمت هي صفنت عليه بتفاجئ وباوعتلي گالت... يول شمسويه بالزلمه... وحضنته كملت... يما سوده عليه الوليد راح منا
ضحك وباسها من راسها كال... يول انتي ع الراس
كالتله... وذيج بالگلب والعين ما؟ خوش جاي تقشمرني وخر... ودفعته طبت يمي كعدت كالت... يول بطلي نكد خطيه الزلمه بين عليه القهر من وراج
وضربتني باصبعها على راسي كالت... ولا على كلشي وبجيتي صيري زلمه اقصد اخت زلمه مثلي
ضحك رشاش كاللها... كله ولا تصير مثلج
كالتله... ليش يول
كاللها... غير انوب مااجي للبيت اذا غلطان اخاف تعلسني
گالتله... لا ياگو**د
طگيتها ضحكه كال... صوتج
هي ضحكت وكامت كالتله... يلا عوف
المحاضن هسه ووديني يم عمتك عقيله رايدتني بفزعه يلا
كاللها... جاي
طلعت اجه يمي اخذ الشماغ وكال... بس صيت علينا وانه مطگه منج مامحصل
خجلت حطيت ايديا على وجهي وضحكت وخرت ايدي شفته واكف ع المرايه شد الشماغ على راسه وباوعلي ضحك اجه باسني بخدي وكال... ابقي هين مااتاخر شوي وراجع لاتنزلين تا لا تصير مشكله
حره... عشتو ترا بيتي و...
قبل لااكمل كال... لخاطري لاتعاندين
جريت نفس وهزيت راسي حضني وطلع كمت الجو بارد بس حسيت عركت من العركه
كمت طلعت ملابسي ورحت سبحت ولبست جاكيت وحفايات
طلعت من الحمام واسمع ثناء تصيح على ام احمد
تكوللها... ولي ولا تحاجيني بعد طلعتي جلبه وماتخافين الله
ام احمد كالتلها... شبيج وياي انتي
كالتلها... شني شبيا وياج عجل هاي سوايه تشككين صورة شهيده يول جان خفتي الله
جان خفتي من حوبتها زين مانهدم هالسگف على راسج
يول هاي شهيده شهيده اكلج باسناني هسه
ام احمد كالتلها... انه ما..
قاطعتها وكالتلها... انجبي وبعد لسانج ما يطخ لساني ولي من هين... وطبت للمطبخ وام احمد تلحگ وراها
خزرتني وطبت للمطبخ هم اني رغم تفاجئت بس هزيت ايدي ع صلافتها وصعدت لغرفتي امشط اجت يمي طيبه جابت ماسكات وغسولات وهالسوالف وبدت تحجيلي عن العنايه والماسكات والبخار صارلي واهس سويت وياها ارتاحيت
عدلت فراشي ونمت حسيت بخنگه والم بظهري غفيت للمغرب فزيت ما مرتاحه ابد
گمت وهنا عرفت جايتني الشهريه مكدرت انزل رمشت لطيبه شويه وصعدتلي
طلبت منها احتياجاتي صدك ما قصرت راحت جابتلي واجت
كعدت يم الصوبه بس الم يذبح ومزاج متعكر فهمت شبيا اليوم وليش هالضوجه
طب رشاش بيده علاكه اخذتها جباسه وكاكو كتله... لعد شو مجايب اندومي
كال... نسيتو
حره... شنو نسيت شلون تنسى شي احبه اني
باوعلي هز راسه كال... تدللي بعشوي اطلع واجيبو بعد؟
حره... ليش احس كلامك بنتر؟
ابتسم گال... يابه والله ماجاي انتر عليج
دااحجي جرني عليه صار ضهري على كتفه حضني كال وهو يبوسني من راسي... احبج
باوعتله وابتسمت كرصني من خشمي كتله.. انت ليش هيج متحملني
گال... لان احبج
ابتسمت طلعت الجبس فتحته واخذت جبسايه گسمتها بالنص وانطيته نص واكلت الثاني وهيج كملنا ضلينا نسولف ونضحك ونتشاقه الى ان صاحونا ع العشه گتله... مااريد
گال... حره ارد احجي وياج بمسأله
حره... شنو
گال... مااريدج تعلين صوتج على ابوي
جريت نفس گتله... هو قهرني لان دافعلها هواي وهو يدري بيها غلط واحسه دائما يذكرني هي مرتك
باوعتله گتله... هالشي يقهرني
هز راسه كال... افهمج ماگلج ابوي
زين وياي او دعمني مثل ما جاي يدعم اخوتي هسه
صح انه وياه طال الخلاف بينا بس هاذ الشي مايعني انه اقبل حرمتي تعلي صوتها عليه او تتجاوز هالشي مامقبول نهائيا
نزلت راسي گتله... بس هو غلط
كال... وان يكُن انه يمج ارد الغلط بحقج واحاسبو انتي لا تحجين شي هو راح يحبج ويعتبرج بنتو انه متأكد اليوم وضعج وطريقة كلامج ماعجبتني
حره... ما جنت بوعي
كال... وانه ادري بس هم مايدرون.. جريت نفس كال... اعتبريه ابوج هو يبقى رجال جبير والو احترامو
هزيت راسي كتله... اعتذر منه
ابتسم گال... ابوس راس الربتج صدگ بنت اصول
ضحكت كتله... ماراح انطيها فرصه تاخذ مكاني
اني الجنه هنا غصبا عليها
ابتسم كال... كله علمود تغيضيها
نزلت عيوني بتفكير كتله... وهم حسيت بالذنب
ابتسم كال... يلا كومي
نزلنا باوعت عمي كاعد ع التخم والبنات ينقلن بالاكل رحت كعدت يمه بست راسه هو تفاجئ كتله... اسفه عمو
باوعت للولد كاعدين يمي ومبتسمين رجعت باوعتله كتله... بلحظه عصبيه عليت صوتي وغلطت بحقك سامحني وان شاء الله ماتتكرر
هو حسيته فرح حيل كال... بنتي انه ماعندي شي وياج حالج حال طيبه وهند وماافرق بين بناتي وجنايني ابد بس الصار اليوم غلط بويه
تغلط بحقج ام احمد تعاي وكليلي وانه اعاقبها
ابتسمت كتله... هو هم هيج... باوعت لام احمد وكتله... من اليوم راح اكولك لان ادري بيك تحاسبها
ضحك كال... يلا بويه حدري اكلي غاديه عظم
گعدنه وكمت اتلوكله ويتلوكلي وتعشينا كملت صبيت جاي وكعدت يم رشاش اشرب جاي واسولف واضحك وياه
وام احمد عيونها وخشمها صارو حمر درت وجهي مااهتميت
كملت حسيت بملل كتله... حااصعد اخابر رتيل
كال... اوكي
كمت كلي... اوكفي هاج... وانطاني موبايله كال... حطيه ع الشحن
حره... تمام
اخذته وصعدت حطيته ع الشحن وكعدت ع الجربايه خابرت رتيل جاوبتني حجينا
كالت... سالي ما تريد تسوي حفله كتلت روحها على اربيل
حره... بعشوي اخابرها
رتيل... اني ماقابله غير زفه
حره... اتركيها على راحتها
رتيل... بس ما ترهم
حره... هي تكول عدنا عيد زواج نحتفل بيه
رتيل... والله مدري شلون تفكر سالي
حره... شتسوي رجلها وابو وعمامه علاقتهم مو شي
رتيل... الله كريم اكلج ام حيدر هم اجت خطبتني
ضحكت كتلها... وافقي رتيل لتضيعين هالولد الذهب من ايدج
رتيل... مو
حره... لا مو ولا شي صارله سنين منتظرج حرام
رتيل... ومروه
حره... يمها اخوي بعدين خوما تحرمين نفسج من الزواج على مودنا؟ بالنهايه مروه لابد يجي يوم وتتزوج ومقدام هم
انتي هم من حقج تعيشين رتيل
جرت نفس كالت... محتاره
حره... صلي استخاره وامشي ورا اشارة ربج
رتيل... خوش فكره يلا رايحه اصلي
ابتسمت كتلها... رديلي خبر
رتيل... ان شاء الله... وسدته
رجعت ردت اخابر سالي بس معندها نت رجلها ملتحق وخطها اسيا اخذت موبايل رشاش لان عنده خدمه ع الاسيا خابرت سالي كتلها... ليش ما تسوين عرس
سالي... اسافر بفلوس الزفه احسن
حره... بس رتيل ماعاجبها الوضع
سالي... اي لان تشوف ضروري اسوي زفه بس اني محابه هالشي حتى ما ينحرج عثمان تدرين بمشاكله هو وابو
حره... مالان گلبه عليه
سالي... يمعوده ارهابي
حره... انجبي ولج
ضحكت كالت... والله حره يعني هو منو يفكر بشيعه وسنه بهالسنه غير الوهابي؟
ترا الطائفيه انتهت من زمان خلص انتهى الجهل بس الوهابيه مالاحهم فكر السلام لحد الان
حره... يارب يقبل بيج
سالي... شيقبل يمعوده حتى مايكول اسمي
كل حجايه وكال ابني فضل الرافضيه عليه وعثمان ماطايقه
حره... ليش
سالي... مجان خوش رجال ومجان زين ويا امه واخته جان يضربهن ومن يتعارك عثمان يضربه ويطرده من البيت
حره... صخام بوجهه هذا مصخم جنه ابوي
سالي... ايع لتذكريني بذاك
سكتت كالت... والله عثمان لسه برجله اثر مال تعذيب
حره...حيل لهالدرجه
سالي... اي جان يطفي كطوف الجكاير برجله لان عثمان من جان صغير وكح ويضرب الجهال الي بمنطقته فهيج يحاسبه
حره... يمه شگد كلبه قاسي
سالي... اي والله لعد هو طفل مو هاي مراوي جانت تكتل الجهال قابل نطفي الجكاره برجلها
نفهمها وهي تبدا تستوعب الضرب ميفيد
حره... الله يهدي زين شلون وين حتعيشون
سالي... هنا نبقى لبين ما نشوف شغل عثمان يردون ينقلوه وبعدين نحدد وين نستقر
حره... الله كريم
سالي... خلي رجلج يعزمنا اريد اجيكم قبل لا نروح لاربيل
ضحكت كتلها... تدللي
حجينا شويه وسدته من الضوجه كعدت اكلب بموبايله دخلت لمحادثته ويا عثمان اخر محادثه قبل اسبوع عثمان داز لرشاش
... هم يجي هالاسبوع الي ماالتحق بيه
مجاوبه رشاش... طيـ***ك مكشف غطيه وارجع نام
راد عليه عثمان... حبيبي والله
دااكلب سمعت صوت رشاش حذفت التطبيقات الحديثه بسرعه ورجعته طب للغرفه كال... يلا كتبج
حره... لا مبيا حيل.. ونمت ع الجربايه
كال... انجبي وكومي
حره... والله باجر مااداوم
كال... بدينا تسخيت
حره... لا تعبانه والله
جر نفس كال... اول واخر يوم الغيابات هاي اضوج منها
هزيت راسي كال وهو يطلع اللابتوب والموبايل... رغم هاذ باجر من الصبح تكعدين تقرين
حره... ماشي
كال... نامي ارتاحي
ماجذبت خبر تغطيت ونمت فزيت عليه وهو يشيل راسي ويحطه ع ايده تغطيت اكثر ونمت
حسيت عليه وهو يلعب بشعري ويشمه باس خدي وحط راسه بركبتي ونام
فزيت الفجر على نفس نومتنا بعدت راسه عن ركبتي وكمت
غسلت وبدلت كعدت ع الدرج البس الجواريب
نزل اوس كال... ها صباح الخير
حره... صباح النور
اوس... ها ترحين للمدرسه
حره... لا اليوم مااروح
اوس... عفيه كلش احترم الناس المسختين مثلج
ضحكت كتله... لا بس مابيا حيل
اوس... مااحتاج تبريرات يول انه ابويه بزماناتو حتى التنكه گطعها عليه وضليت مصر ماطلع من الدور الاول
ضحكت كتله... بس صرت
اوس... علوم سياسيه وبالعراق هيهيهي
ضحكت كتله... ليش زين
اوس... رحت علمود الكشخه رحت اصير مميز بين ولد العم كلهم دكاتره يكول درزن مواعين ماخذيه واجب لوحده جايبه
طكيتها ضحكه كال... فـ انه ردت اطلع كسر
ضليت اضحك عليه كمت كتله... اسويلك ريوك
اوس... لا هناك اكل
هزيت راسي شويه وطلع ضليت افتر بالحديقه ضايجه الجو مغيم وبارد كعدت ع الكرسي وحطيت دفتر وصرت اكتب الاشياء التجي ببالي.. تاريخ..
وقت..
عشوائيات..
باوعت للغيوم ضفت للدفتر غيوم سمعت صوت رشاش قريب مني وهو يكول... ضيفي يمها حُب
باوعتله ضحكت باسني بخدي كال... ياريت يومي مايبدا بدون هالضحكه
ابتسمتله وكتبت... غيوم
كال... شبيج كتبي يمها حُب
ضحكت وكتبت غيوم وحب كال... اي هيج احلى
ضحكت ورفعت راسي باوعتله كتله... اصلا كلشي وياك حلو
ضحك كال... هيج برأيج؟
حره... اي
گعد بالگاع تركت الكرسي وگعدت يمه گال... انه هم هيج ادحگ كِلشي وياچ مميز
ضحكت گال... يجي يوم واموت من ورا هالضحكه
حطيت ايدي على حلگه كتله بخوف... اسم الله ليش هيج تحچي
گال... مِن ادحگ هالضحكه گلبي يخفق جثير لدرجة احسو راح يوگف
حطيت ايدي على گلبه گتله... يومي قبل يومك
ضحك باسني بحنجي گتله واني اباوع بعيونه... اني ما حسيت بالحياة الا لما شفتك هنا
حتى فهمت الي بس يتنفس مو عايش اكو اشياء اهم
ابتسمت گتله... اذا رشاش ما موجود اني هم مالي وجود
اني انتهي بدونك
تلمس خدي گال... ماكو شي ينهيج انتي قويه وسباعيه الي تتحمل كل هالحوادث وهي طفله ما ينخاف عليها
ابتسمت گال... وراح تصيرين اقوى بالمستقبل و تصيرين قدوه للي يعرفوج لان راح يعرفون شگد عانيتي ورغم هاذ ما طلعتي عن الطريق
ضحكت گتله... اني بدونك ابقى ضايعه مااشوف كل هذا النور
ابتسم ومسح على خدي گال... انتي الاسستي هاذ الطريق وتگدرين تكمليه بدون ماتعتمدين على احد
ابتسمت گال... وانه وياج ظهر وسند مايبعدني عنج غير الموت وانتي
ابتسمت گتله... الله لايفرق بينا
ضحك وباسني من عيني گال... اوف
يَـ سر ليلي شگد احبچ
ضحكت وحضنته باوعنا للغيوم ضلينا نشبه الغيوم بالبيوت والبشر واتناقش وياه بيهن ورغم هذا جان يسمعلي ويحسسني انه مهتم بادق التفاصيل الي احبها اني
هالشي الي جان دائما يخليني انجذب اله اكثر ويكبر حبه بداخلي دائما ما حسينا بالوقت الا لما اجت مرت حازم كالت
جيلان... يلا تعالو تريكو
رحنا نتريك غسلت المواعين طلعنا من المطبخ صاحني عمي طبيت للمضيف واكفه ضرتي يم عمي وكفت يم رشاش باوعتله بتساؤل وهو يبتسملي
عمي گال... ام احمد ماگدرت تنام الليل كله وقررت انها نتهي هالخلاف وتعتذرلج
باوعلها واشرلها بمعنى روحي وكفت كدامي كالت... سامحيني لو غلطت بحقج ساعة شيطان والله يحب التوابين
وصدكيني ماراح تشوفين مني شر بعد ابد
باوعت لعمي وهزيتلها راسي كتلها... سامحتج
حضنتني كالت... شكرا
عمي كال... عفيه هم ذوله جنايني
وضل يمدحنا كعدنا نسولف شويه ورشاش كال... الساعه ب ٢ امتحنج يلا ع الدراسه
اني هم كمت جبرت نفسي اكعد وادرس وصدك بـ ٢ امتحني وصححلي كل اخطائي
لليل كتله... رشاش اعزم عثمان وسالي حباب خلي يجون كلش مشتاقه لاختي
ضحك كال.. وانه هم مشتاگ لصاحبي وطلع الموبايل گله... يول باجر معزوم على برياني وسمج يخبل من ايد حرمتي
ضحك كاله... اتشرف والله
شويه وكاله... ليش وكسار وينو عنهم
سكت شويه كاله... ما مشكله انه اتصرف من التحق
جر نفس كله... اوكف اجيب اللابتوب
راح دياخذ اللابتوب اني دامسح بالاخشاب كال.. وين اللابتوب
حره... اخذته طيبه
گال... اشتعلو... وطلع
فتحت التلفزيون وضليت اباوع حسيته تاخر ب ١٢ وهو ماكو كمت اشوفه وينه طبيت لغرفة طيبه نايمه صفنت هذا وينه
سديت الباب على كيف ورحت داشوفه جوا
انصدمت من سمعت صوته درت وجهي غرفة افتكار مفتوح الضوا وصوت رشاش طالع منها
وكف كلبي وركضت لزكت اذاني يم الباب سمعته يكوللها
... انه مااريد اضلمج انتي بعدج شابه من حقج تتزوجين رجال يحبج ويهتم بيج
اسمعها تبجي تكوله... عمامي ياخذون ابني انه مااكدر اعيش بلاه
رشاش... ماعليج بيهم انه اتكفل بالسالفه ومحد يكرب صوب حمودي
افتكار... رشاش انه ما حلوه؟
ناگصني شي؟
رشاش... ليش
افتكار... ليش ما تدحگ بخلقتي
رشاش... لان ماحاسبج غير اخت
افتكار... بس انه حرمتك
رشاش... ع الورق بس
افتكار... انه هم الي حق عليك مثلي مثل حره ليش هي الاصل وانه نافيني حرام عليك انه منين اتلكاها؟
منك لو من عمي
والله مايقبلون اتطلك
رشاش... اذا انتي طلبتي يقبلون
افتكار... رشاش انه ماكدر اخاطر بابني
رشاش... ابنج يجي يوم ويتزوج ويعوفج انتي وين تصفين؟
انه مالج نصيب من حبي الى متى تقبلين تبقين وتحسين نفسج منبوذه؟ انتي هم الج حگ على نفسج هم لازم
تعيشين
افتكار... تحجي هيج علمود ماتزعل حره والله والله اصير خدامه عندها بس اقبل بيا
انه شاريد منك غير دلال وحب
رشاش... استغفر الله
افتكار... حرام انه ماافرق عنها بشي
رشاش... تفرقين اكيد حره صح انه جبتها بتعب
بس تستاهل بنظره وحده منها محتلي تعب سنيني السببتيه انتي وعمامج يابنت الحلال انه العليه انصحج نصيب بحبي ماالج
تردين تبقين بهالذله هاذ قرارج وانتي تتحملين مسؤوليتو... وكام
اني ركضت لغرفتي اركص واگمز شلت البطانيه وتغطيت واني فرحانه اجه سويت نفسي نايمه بدل واجه نام بصفي وبعدها اخذتني النومه
كعدت الصبح لكيته نايم بالكاع بدلت وكعدته
كال... صباح الحب
حره... صباح النور ليش هنا نايم
ابتسم نزل راسه كال... احسن.. وكام
تفاجئت هذا شبيه كمت حتى اطبخ وانظف علمود اختي
شويه وخابرت سالي كالت... انتي تطبخين اكل منهن مااكل استنكف اذا متطبخين انتي كولي حتى مااجي
ضحكت كتلها.. اكيد اني اطبخلج
سالي... اي عفيه يلا خلي امكيج... وسدت الخط
واني رحت اطبخ برياني اجت ثناء وهند وطيبه وضرتي كلهن يمي كلبن البيت تنظيف وابو رشاش ومرته كل شويه يجيب شغله واضح كلش يحترمون الضيف
ثناء هي التوجهه لان مرت ابو رشاش مفاصلها تاذيها فمعتمده عليها داسوي البرياني حطيت الغطى
اندكت الباب
طلعت اسلم عليهم واستقبلتهم حضنت اختي وكعدت يم رجلها
كالت... عيب خلي اصير هادئه بعد الغدا عود اتخبل
ضلينا نحجي الى ان كتلها... اروح اكمل الدجاج
سالي... اوكي
كمت يمهم رشاش اجه للمطبخ ضل يحجي ويا طيبه اتصلو عليه طلع بالحديقه يخابر
كملت الدجاجه اجت ثناء كالت... تعرفين تسوين حلويات الولد ما لكو ابو ماجد معزل شنطيهم ورا الاكل زحمه
هزيت راسي كالت... شتعرفين
كتلها... عوامه
ثناء... لا مزعجه بالاكل حلاوه جكليتيه تعرفين؟
كتلها... لا
ثناء... انه اعرف هسه اسويها سهله بس الشكر والزيت بالغرفه الفوك هاج... انطتني المفتاح كالت... جيبيلي بطل زيت وشكر
مفاصلي توجعني ماكدر اصعد
حره... ماشي
صعدت فتحت الغرفه ودااخذ الزيت ثواني و انفتح الباب سمعت صوت عثمان كال... ها رشاش
باوعلي تفاجئ ضحك كال... وينو رشاش؟
كتله... بالحديقه يمكن
دار وجهه دايطلع بهالاثناء انقفلت الباب علينا... يتبع...
_____________________
اسفه ؏ التأخيࢪ بس النت ضعيف كُلش موتني
تصبحون ؏ ماتتمنون ♡🍒
####يمصگوعات يمدوهنات غلسن ؏ السحگ وبسرعه سولي تاك من تشوفني ساحگه
لاننكتل وننطرد والقصه تتوقف يمصگووووعاااات
بجيت خررره بيكم يالفاسدين 🫂💔
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!