الحلــــــــقه الخامــــــــــــــــسه
رواية... هل كانَ حُلماً...؟
{ العِراق-المُصغَر ... التوباز }
بقلمي ... لؤلؤة_البِحار ...
___________________•
حره :- تقربنا من الولد وشفته من شفته شهكت كلت... سلام قولا من رب رحيم
هو باوعلي مضروب ووجهه مزورك وكوا يحاول يوكف انصدمت من شفته رجل انوار...!
مرتضى باوع ع الجتين ماكو احد جرني ع جهه كال :- هذا الكلب راد يتحارش بيج مو
حره... اي
مرتضى... هاي فرصتج انزعي الي برجلج وعلى راسه
حره.. خاف يموت؟
مرتضى... لتخافين محد يموت من ضرب النعال
رجع باوع ع الجهتين ماكو ناس راح لزمه گله ... شو اوگف اوگف
هذاك نزل راسه وگعد على ركبه ومبين عليه التعب
وكفت كدامه كتله... ياكلب ياحقير تتذكر شلون استضعفتني وتحرشت بيااا ياكلب
يالماعندك شرف
لزمه مرتضى من حنجه ورفعله راسه وباوع بعينه كال... باوع عدل لك سرسري
حره...اباوع لرجل انوار يبجي يسوي... متنعاد متنعاد
مرتضى باوعلي كال ... يلا.. واشرلي ع النعال
حره... صدك نزعته وضربته على ظهره
مرتضى كال وهو يهز ايده... بالله عليج نعال لو ريشه شدي حيلج بويه
رجل انوار كلي... عليج العباس سامحيني
حره... انجب بريئ منك العباس
مرتضى... الج مئة ناقه لو ضربتيه عدل وكسرتي ظهره بضربتج
حره.. عاد صدك ضربته مره ثانيه
مرتضى... عفييييه اضربيه بعد اقوى
حره... اباوعله جنه صرصور مضروب بالنعال استخطيته كتله... هاهيه
مرتضى... شبيج مستخطيته ترا المطي يتربى بالضرب
حره... لا يلا خطيه
مرتضى... بعد بس ضربه لخاطري
حره... صدگ ضربته وشمرت نعالي للكاع ولبسته گال
مرتضى... يلا نروح
حره... وهذا؟
مرتضى... يرجع وحده شبيه قابل مكسر يعني
حره... خاف يموت
مرتضى...لاتخافين العار ميموت
دفعه ولزمه من حنجه كله... خلي هالحادثه تصير عبره الك وجر عدل اليتقوى على بنات الناس مكانه بالمزبله حبيبي... وربت على ظهره وجرني كلي
... يلا
عفناه و مشينا سريع كتله... سباق منو اليوصل للنهايه اسرع..
مرتضى... اوكي يلا... واحد.. اثنين تلاثه...
وركضنا بالبدايه هو سبقني بعدها اني عبرته ووصلت قبله كتله بابتسامه
:- متكدرلي هاهاهاي ومشينا
كال... اي بالله نظره منج تهز وجداني
نزلت راسي كتله ... صدك؟
قبل ليحجي اتصلو عليه فتح خط كله :- حبيبي ابن زهراء ابوس راسك ع هالشغل اليخبل
ذاك مدري شحجه كله... بعدين
وسد موبايله كال... يلا روحي للبيت راح يجي ابن زهراء نطلع
حره... ماشي
مرتضى... يلا روحي
... مشيت للبيت درت وجهي شفته واكف لوحتله بايدي باي هو هم لوحلي وطبيت للبيت
سديت الباب وطبيت اطفر من مكان لمكان فرحانه
احس اخذت حقي
للحظات صابني تأنيب الضمير كلت خاف خطيه مضروب وهم ضربته بعدين كلت لا
كل متحرش لازم يتعاقب بنفس الطريقه خليه يتوب حتى لو ناوي يتحرش بغيري بعد ميتجرأ
طبيت للهول والضحكه شاكه حلكي
رتيل شافتني گالت ... الله يديم هالفرحه
حره... اييي فرحانه كلش
رتيل... ليش
سولفتلها على الي صار شهكت حطت ايدها على صدرها كالت... ليش ولج شلون هيج تسوين
حره... يستاهل هالعار هذا
رتيل... بلا مرتضى مخبل ومعروف حاله انتي شبيج؟
لو شايفج احد شلون؟
وانوب هو مضروب منو ضاربه !
رفعت اكتافي بمعنى ماادري كالت... خاف تبتلين ولج!
حره... لا شسالفه جنا بفرع ابو غدير هذول بس وكت العصريات يطلعون قابل مثلنا
رتيل... حره تصرفج هذا مو صحيح وغير مسؤول ثاني مره فكري بالعواقب
فكري قبل اي تصرف خاف تبتلين
حره... ماشي
كمت نفس الروتين خبزت ووديت الخبز لجيرانه صرت كل مااطلع ادوره بلكي موجود بس نادرا مااشوفه تمر ايام يلا اشوفه
بس الصبح وبعدها مموجود طول اليوم
رجعت للبيت ونظفت وطبخت وكعدت اقرا كتاب ونفس الروتين بحيث من يصير الليل بسرعه انام من التعب الاثار النفسيه خفت بس بقت عندي ردود فعل مبالغ بيها
لثاني يوم كاعدين كلنا وقت العصر بالهول اني داكتب بالدفتر الي جابه مرتضى
سالي داتسوي الجاي بالمطبخ والكل كاعدين يسولفون
جابت سالي الجاي ووكع منها الكلاص جنت كاعده اقره مندمجه فزيت مخروعه
حسيت بخوف وهلع ورجفه مو طبيعيه جسمي يرجف واصرخ... بسم الله بسم الله مقدام بسرعه غسلي وماما تقرا على راسي ايات مرت دقايق يلا هديت
سالي كالت... شبيج هو كلاص
رتيل كلتلها... مجانت منتبهه لتخافين حبيبتي
حره... اني هزيت راسي باي وطبيت سبحت ومشى اليوم طبيعي بيبي بهيه تخابرني كل يوم
وكلتلها ان موبايلي ضاع حتى من تتصل ومااجاوب متقلق عليه
لثاني يوم مر ومرتضى مموجود مشه اليوم عادي فتحت الدفتر كتبت
"مرَ هذا اليوم وأنا كـ غيمه وحيده في السماء"
اندكت الباب سديت الدفتر وقفلته وحطيته بالبوفيه وطلعت اسمع صوت مألوف عليه
طلعت شفت ام سمرا شافتني حضنتني وبجت
اختنكت كلتلها ... الله يهون عليج تعالي تفضلي
ام سمرا... لا مو مال كعده بس اجيت على بهيه شو ماهي ملكيتها؟
حره... اي بيبي راحت ويا اخوها
ام سمرا... وين..؟
حره... لاربيل
ام سمرا... ممكن تنطيني العنوان
حره... مااعرف وين بالضبط
ام سمرا... زين رقمها
حره... اي عندي... باوعت لسالي كتلها... جيبيلي موبايلج
كالت... ماشي... وطبت داتجيبه
حره... ليش ترديها
ام سمرا... مااحب اعوف عليه حق واني وياها عشنا نفس الوجع
حره... الله يصبرجن بس شنو ياحق
ام سمرا... ورث الملعون
حره... اي؟
ام سمرا... للمرحومه حق بيه اريد انطيه لبيبيتها
جريت نفس كلتلها... زين تسوين
ام سمرا... ابني الصغير تبريت منه مااريده لادنيا ولا اخره
حره... الله يسود وجهه
بجت كالت... الكلب هو خابر بنتي سمسم من جانت يمكم كللها امي ضربوها رصاص واحنا وحدنا بالبيت ساعدينا واني مجنت موجوده بوقتها
رفعت راسها للسما كالت... ربي متبريه منه وانت اشهد
اجت سالي مسحت دموعي نقلتلها الرقم كالت... يلا لعد اروح
حره... وين ابقي يمنا
ام سمرا... لاا ع غير مره
سلمت عليه وراحت حسيت بخنكه ورا ماطلعت رحت جريت الكانونتر وطحتله غسل وجلفت المطبخ ماخلصت غير لل ٩ سبحت وحطيت راسي ع المخده ونمت
لثاني يوم طلعت ادور على مرتضى وهم مموجود لا هو ولا اخوه
مر اليوم عادي ونفس الروتين للعصر كعدت من النوم بالغرفه فتحت الباب اسمع ماما تحجي تكول لرتيل
اميره... ترا حرام عليكم خلوني اعيش
رتيل كلتلها... واحنا شمسويلج مانعيج من شي قابل اشو حتى بالبيت مدا تكعدين بعد شكو
اميره... هسه انتي كاتلتج كعدت البيت ماما اني كبرت واحتاج الي يسندني
رتيل... اي وع منو تستندين بلا شو الدتحجيلي عنه واحد عطال بطال ويريد يكعد ببيتنا شبيج ماما هو هذا حجي.. !
اميره... مو من حقج تمنعيني اني هم اريد شريك اعيش وياه
يمه باجر انتي وخواتج تتزوجن ومقدام لابد يتزوج
واني شلون اصفى وحدي؟
هذا مو عدل
رتيل... اذا يريد يجي يتزوجج ويكعدج ببيت ماعندي مشكله
قابل ليش حتى ارفض
بس مال يجي يكعد ببيتنا لا هاي مااقبلها
بعدين ترا حتى عيب ياامي شتكول العالم علينا بناتج كبار وتردين تتزوجين واحد لا وفوكاها
عطال بطال.. !!
اميره... والعالم بشنو تفيدنا بلا هاي صارلنا سنين ماكلين تبن منو دك الباب وسأل عن حالنا؟
رتيل... هوايه دكو بس انتي مجنتي موجوده حتى تفتحين الباب
اميره... اهوووو
طبيت كلتلهن... شكووو؟
رتيل... امج تريد تتزوج
باوعت لامي كلتلها ... منو؟
اميره... واحد قريب منا
حره... اي شكد عمره من وين وشنو هو
تقدملج؟
رتيل... لا يختي عطال بطال
اميره... اش انتي اسكتي لتضلين تخربين بخواتج
درت وجهي على امي كلتلها... اي؟
اميره... ماما هو رجال محترم ويخاف الله وشكله هم مقبول
حره... متزوج؟
اميره... لا ارمل
حره... عنده جهال شي
اميره... هي بس بنيه وزوجها
حره... اي؟ وشيشتغل!
اميره... هو حسب الرزق يوم يلكه ويوم لا
حره... وعنده بيت؟
اميره... لا اجار
حره... لعد شلون حيتزوجج اذا لابيت ولا شغل
اميره... ندبرها اني وياه
رتيل كالتلها... جان دبرتي امور بيتج كل هالسنين
امي كلتلها... انتي ماتكدرين الى تنرفزيني يعني... وكامت
حره... رتيل على كيفج ويياها
رتيل... نرفزتني حيل
سالي داتلعب بالموبايل باوعتلنا كالت :-يجوز تحبه خطيه
رتيل كلتلها... على شنو هسه غير كون بيه مواصفات وتحبه
سالي... يگولون الحب اعمى
رتيل... هذا مو حب اعمى هذا حب اثول
حره... برئيي خلي امي تقرر حياتها لانها كبرت بالنهايه
واي قرار هي مسؤوله عنه
رتيل... اي واني معندي مشكله خلي تشوف مقدام اذا قبل خليها تتزوج اني شعندي وياها قابل
خليها تتزوج بلكي تركد شويه
حره... كمت سبحت طلعت من الحمام سالي تباوع من الباب وترجع واكو اصوات بالشارع كلتلها واني انشف بشعري... ها شكو
سالي... يكولون حملة اعتقالات
حره... ليش..؟
سالي... بالله عليج لو ادري ليش اضل احوص هيج !
حره... اني ممرتاحه شو
سالي... واني هم احس اكو شي غلط ديصير
حره... اوف الله يكتبلنا الخير
سالي... بهيج مكان مترهم...حجتها وهي تهز راسها باسف
رحت مشطت شعري وكالعاده لبست الطوك والحفايات لليل كاعدين كلنا مقدام كال
:-يمه رائد علي حجه وياي يريد يتقدملج
كالتله امي... وانت شنو رأيك
مقدام... ماانصحج توافقين
اميره... ليش؟
مقدام... رجال لاعنده شغل لاعنده بيت شلون تبقين وياه
اميره... بس هو محترم
مقدام... الله اعلم بالناس بعد مينعرف الزين والشين بيهم
واحب انصحج لتفكرين بيه ابد مسألة زواجج مااعترض عليه بس من الشخص الصح مو واحد حاله حال ابوي
وتاليتها هم تضيعين عمرج ع شنو؟ اني اشوف انتقي اختياراتج افضل
حره... كمت وديت الجاي غسلت الاستكانات ورجعت مددت ضليت افكر ساعه
بـ مرتضى وبـ امي ووضعنا
كمت طلعت كتاب وبديت اقره الى ان غفيت
ثاني يوم فزيت الصبح ونفس الروتين سويت ريوك وعجنت وردت اطلع كالت رتيل... ها وين
حره... هنا برا
رتيل... تعاي توته دااحاجيج
كعدت يمها هي داتخيط كالت... حبيبتي احس غلط تطلعين كل يوم الفجر
حره... ليش غلط
رتيل... خاف تطلع عليج حجايه
حره... بس اني ممسويه شي غلط
رتيل... العالم عليها بالظاهر
حره... لا اصلا فرع ابو غدير ميطلعون غير العصر
رتيل... والله حبيبه احس غلط هالشي
حره... تمام اذا هيج
رتيل... بس هنا بالباب اذا تردين تشترين عادي بس مو من الفجر حبيبه فدوا اروحلج
حره... تمام مثل متردين
وصدك مطلعت نظفت البيت وجلفته وبداخلي اكول اخاف مرتضى هناك؟ وبعدين اكول لاا يمكن مثل البارحه هم مموجود
خلص هو يريد يشوفني يعرف شلون ع شنو كاتله روحي كملت تنظيف خبزت وطلعت داودي الخبز شفته دايجي باتجاه البيت واكو شكم واحد دا يسولفون ببداية الفرع هو اجه مر من يمي باوعلي
اني ابتسمت دااسلم عليه بس هو مشى ولاكأن يعرفني
انصدمت وحيل ضجت ليش هيج سوا درت وجهي عليه... دك موبايله جاوب وهو يضحك ويسولف بصوت عالي كال
... احتركو اهلك ابن زهراء
ومشى وطب لبيتهم صدك ضجت حسيت حانفجر لان تجاهلني رحت وديت الخبزات ورجعت للبيت
واني اگول
... يحلم بعد اشوفه لو اسلم عليه اني هم صوجي كبرت راسه تالي شلون لبسني ولا كان شايفني
الدمعه بطارف عيني واغلي من القهر للظهر كبت العركه بين امي ومقدام ماما تكوله
... هاي حياتي ولتتدخل بيه
وهو يكوللها... مااقبل بيه
وانتهت العركه لمن مقدام طلع من البيت معصب
وماما طبت للغرفه وسدت الباب
رحت سويت جاي شربت لان احس انقهرت وراسي حيل يوجعني
حاولت انام مكدرت وضل هيج الوضع متوتر لثاني يوم هم كعدت الفجر ونفس الروتين
كملت شغل كتلها... رتيل حاكعد بالباب خنك.
كالت... ماشي شويه وطبي
... تمام
فتحت الباب اول ماطلعت صار مرتضى بوجهي
ردت اسوي بيه مثل البارحه مشيت باتجاهه
هو اجاني وصلت ليمه ولاكان شفته عفته ومشيت
هو شفته ابتسم ورفع حاجب مهتميت رحت لفرع ابو غدير وين جنا نكعد اني وحياة هي النيه جانت اكعد بباب البيت بس بعد مترهم
كعدت ع البلوكه سمعت صوته كال
مرتضى... ها زعلان التوباز
رفعت راسي كتله... لا عيني و اسمي حره
مرتضى... ادري... وكعد
حره... خاف نسيت عود كلت اذكرك
مرتضى... ومنو يكدر ينسى لمعة عيونج
درت راسي عليه ضحك كال... شبيج ضايجه
حره... مضايجه
مرتضى... احجي شبيج
حره... ولا شي
مرتضى... لعد شو ماسلمتي
حره... وشنو يعني الا اسلم
مرتضى... اي احنا اصدقاء
حره... جنا
مرتضى... ليش وهسه؟
حره... لا ذبيت اصحابنا من البارحه
كال بمياعه عود دايقلد ... عزززا اوووي ياقاسيه لييش
متحملت ضحكت على تقليده كتله... بس والله تستاهل ازاعلك
مرتضى... هيج طخت ببالج غير اكو سبب
حره... البارحه مسلمت عليه من شفتني
مرتضى... على هاي؟
حره... اي
مرتضى... جنت ضايج
حره... واني شعليه
مرتضى... هاي بعد اني من اضوج هيج سكتت كال... شلون صرتي؟
حره.. بخير
مرتضى... ديلا فكينا اضحكي الدنيا تنور بضحكتج
ابتسمت... شكرا
مرتضى... اي شنو الاخبار
حره... نفس الوضع... باوعتله كتله... صددك هم تدري ليش صارت هاي الحمله
مرتضى... ياحمله؟
حره.. حملة الاعتقالات
مرتضى... شني ياهو شصاير؟
ضحكت... انت هم متدري
مرتضى... هاي سمعت منج
حره... عبالي تدري
هز راسه بلا كال... تذكرت شغله
حره... شنو؟
مرتضى... باوعي توته تدرين بينا احنا شباب وعايشين وحدنا ولاعدنا مره تساعدنا بفد اكله لو بكوي ملابس فشويه العيشه وحدنا صعبه
ف اني اطلبـ...
قبل ليكمل كتله... لا اني مااتزوج هسه
صفن عليه ابتسم ونزل راسه وبعدين رفعه حك لحيته كال... ماداطلبج للزواج شبيج شطح تفكيرج
اني سمعت هيج حسيت باحراج رهيب بسرعه حطيت ايديا على وجهي خجلت هو ضحك
كال... شبيج ترا عادي تصير تصير
شلت ايدي من على عيني كتله... عبالي...
قاطعني... افهمج خلص
حره... لعد شردت تكول
مرتضى... ذاك اليوم دزيتي برياني حيل حبيته
حره... اي اذا تحب اسويلك اليوم عادي
مرتضى... اي سوي بس...
حره... بس شنو؟
مرتضى... بأجر
حره... شلون يعني؟
مرتضى... يعني بدل ما نشتري من المطاعم انتي تطبخيلنا وننطيج اجر تعب ايدج شتكولين؟
حره... قصدك كل يوم؟
مرتضى... اي نجيبلج المسواك كامل وتعب ايدج تاخذيه
حره... عادي دز اني فارغه اسويلكم عادي شنو اجر شنو هالسوالف !
مرتضى... لا لو تاخذين اجر لو لاتسويلنا
حره... ماادري والله... حجيتها بحيره
مرتضى... فكري زين احنا نستفاد وانتي تستفادين
هزيت راسي ب اي كتله... عزاا
مرتضى... اوووي يمه
ضحكت كتله... لتقلد يلا هسه اختمر العجين
مرتضى... اوكي روحي
رجعت للبيت ونفس الروتين لليل كاعدين بالهول اندكت الباب طلع مقدام فتحه
سالي دارت وجهها كالت... اجه مصطفى
... گمت طبيت للغرفه ماما ضلت كاعده بالهول فرشت فراشي وكعدت اقرا كتاب اجت سالي كتلها... مرتضى ماجاي؟
سالي... لا هو هذا وين ينشاف
حره... اي ينام من وكت
سالي... واو علاقتكم متطوره
حره... مثل علاقتج ويا مصطفى
سالي... بلا مصطفى بيه مواصفات الا مرتضى شبيه اشو خبل ومريض
حره... والله ماكو خبل غيري شايفه كلامه ع الجرح
بعدين ترا هو مو خبل هو مريض نفسي
سالي... العالم يكولون خبل
حره... اي هو اي مريض نفسي يكولوله خبل قلة فهم هايه
سالي... هم حبابين الله يستر عليهم
حره...اي امين
ورجعت اقرا الكتاب ورا فتره طبو مقدام وامي باالغرفه اجت وراهم رتيل جابت عصير انطتنا مقدام باوعلي وگال
مقدام... مصطفى كلي يريد حره تطبخلهم وينطيها فلوس شغل ايده
حره... اي مرتضى هم كالي
مقدام... عوفيها لتعبين نفسج
حره... لا اني حابه اسويلهم هم افيدهم وافيد نفسي
مقدام... لا تعبين نفسج اني ادبر كلشي
حره...ماكو تعب بالموضوع اني احب الطبخ
ماما كلتله... خليها تطبخلهم مبيها شي الشغل مو حرام وهم هي هوايتها بعد
مقدام... اذا هي تريد اني ماعندي مشكله
ضلينا نسولف كامت سالي فرشت للكل ومددو
حسيت بضوجه وبشوق جبير لحياة من بديت افكر بيها حسيت بخنكه الكل نام الا اني
استغفرت الله وكمت توضيت وكعدت اصلي واقرا قران وادعي اشوفها بمنامي
ان تشتاق لشخص ميت احساس اصعب من كسر الايد
قريتلها قران ودعيتلها لحد مااذن صليت وحسيت نعسانه بس مكدرت انام عجنت وكعدت اكلب بالصور كعدو مقدام ورتيل
سوت رتيل ريوك تريكنا ومثل العاده طلع اخويا للشغل مطلعت اليوم حسيت تعبانه
خبزت وسبحت ودزيت مروه تودي الخبز وطبعا التوصيله بفلوس انطيتها الف بمكان التوصيل
نظفت البيت للظهر بعد متحملت نمت فزيت ع صوت بالاستقبال
باوعت دنيا الليل
سالي يمي كتلها... بيش الساعه؟
سالي... ب٩
حره... حييل كل هالوقت اني نايمه
سالي... اي ردت اكعدج ع العشه مقبلت رتيل كالت البارحه منامت
هزيت راسي باي كتلها... منو يمنا؟
تقربت مني كالت... هذا الاعوج الي يريد امي
حره... لج لتتنمرين حرام
ضحكت... اشاقه شبيج
حره... شيريد
سالي... عود دايحجي ويا مقدام على امي
هو العصر خابره ومقدام رفض وهسه هم اجه
حره... زين شلون دايتزوج اذا لاشغل ولابيت كلش ماراهمه السالفه
سالي... اي هي مارهمه صح بس امي رايدته اني برئيي اذا تريده خلي يتزوجون بلكي تصير مسؤوله
حره... جان صارت مسؤوله من اول زواج
سالي... اكو فرق اذا هي حابه هالرجال بينما ابوي جانت كارهته فاكيد واحد يهمل الثاني
حره... الله يكتب الي بيه الخير
وكمت غسلت وصبيت اكل وكعدت اكل بالهول
راح الولد مقدام كال
... يمه اذا يدبر بيت وشغل ماعندي اعتراض بس شني ماعنده بيت خوما اكعده ببيتي؟
اميره... عادي منو مايمر بظروف مثل ماهو فقير احنا فقراء بعدين هذا البيت شوسعه وهو مثل ابوهن
مقدام... لتخبليني مال يجي ببيتنا كطنه وشيليها من اذنج والله هو هذا الناقص
حجاها وخله وطلع مر هاليوم لثاني يوم مشفت مرتضى ابدا الثالث الرابع يوم نفس الشي اطلع بحجة اشتري او اودي خبز بس ابد مشفته بليل خابر مصطفى على مقدام
... كله قبلت حره ؟
مقدام كله... اي قبلت
كله... خوش باجر اجيب مسواك وخلي تطبخلنا غده وعشه
مقدام... تمام
ثاني يوم كعدت الصبح نفس الروتين ب ٩ دزو مسواك سويتلهم فكرت اروح اودي الاكل
بعدين كلت لا مااوديه ع شنو اهتمله وهو ممهتملي لو يريد يكدر بالف طريقه يشوفني بس هو ممهتملي مثل مااني مهتمتله
وتركت الاكل موديته تالي اجه مقدام الظهر ودا الاكل الهم
ومر هاليوم عادي ع نفس النمط لثاني يوم حسيت مخنوكه وضايجه كملت الاكل بالعشره كلت خلي اوديه واكلب خلقتي عليه كلت لرتيل
... رايحه اودي الاكل
رتيل... ليش خلي يجي مقدام يوديه
حره... مو البارحه تاخر لل ٢ خاف فشله
رتيل... تمام وديه وارجعي لتضلين ببيتهم ميصير
حره... ماشي
رحت دكيت الباب مافتحو
الباب بيه حبل بس اجره ينفتح وطبعا موجود بكل البيوت العراقيه
فتحته طبيت اسمع صوت تلفزيون تقدمت شويه دادك باب الهول اسمع صوت تلفزيون عالي وصوت بعيد
مصطفى كال... هسه شلون ابويه مريض ماترهم ابقى لبعد شهر
سمعت صوت مرتضى يكوله... مارجع بدون راس الحيه
ذاك ابن الڪح....ه حاجيه اذا قبل يبقى بمكانك ارجع
دكيت الباب فتح الباب مصطفى ابتسم كال... هلا توته
حره... دكيت الباب هوايه
مصطفى... الصوت عالي ماسمعنا
حره... تفضل
انطيته الاكل كال
... عاشت ايدج طبخج يخبل
حره... بالعافيه يلا عيني اترخص
مصطفى... براحتج
داطلع سمعت صوت مرتضى كال... ها ام التوت شلونج
اشرتله براسي كتله... بخير
ومشيت داطلع
كال... شبيج
حره... مبيا شي
مرتضى... ماشفتج اليوم
حره... موجوده بس انت متشوفني دايرد طلعت وسديت الباب وراي رجعت للبيت رتيل
كالت... شو تاخرتي
حره... اي ضليت ادك بالباب
رتيل.. ها
حره... للعصر هم تعاركو امي ومقدام
انقهرت و بداخلي اكول شبيها امي اشو حتى متفكر بينا شنو تريد تجيب رجال غريب بنصنا
صرت حيل اتنرفز وكمت اضوج واختنك لان امي بس تدردم وتتعارك لليل رتيل كعدت تحجي ويا مقدام كلتله
رتيل... مقدام امي تريده لهالرجال
مقدام... بس امي داتغلط
رتيل... هي جبيره وواعيه تتحمل المسؤوليه
مقدام... بربج ياوعي هذا رجال لاشغل لاعمل وتريد تتزوجه شنو تريد تجيبه عاله ع كلبي
رتيل... لا انت مدخلك بيه هم رايدين يتزوجون خليهم يتزوجون ليش تمنعهم
مقدام... رتيل اني ممعارض فكرة الزواج بالعكس هي حقها تتزوج وتعيش حياتها
بس غير بشخص يكدر يتحمل مسؤوليه
خوما هم تتزوج واحد مثل ابوي وهم يشوفها الويل
ترا كلش ماراهمه باجر عكبه هو لابيت لافلوس شنو يجي يكعد ببيتي بس هذا الناقص والله
رتيل... لا انت كوله تريد تتزوجها تشوفلك بيت اجار وتتزوجون وانت تشيل مسؤوليه ومصاريف ماتقبل ضلو بدون زواج
مقدام... والله ماادري
رتيل... خليها تتزوج بلكي تهدا وتعقل وهم ماريد باجر عكبه تكول وكفتو بطريق سعادتي
هز راسه كللها... الله كريم
لثاني يوم طبخت ورحت داودي الاكل الباب مفتوحه شويه مبينه الحديقه مرتضى كاعد ع الدنكه دكيت الباب ماتحرك
دكيتها مره ثانيه مافتحها
رغم هو قريب فتحت الباب كتله
... ترا دادك بالباب
باوعلي كال... ترا تركتها مفتوحه الج ليش تدكيها؟
طببت الاكل وسديت الباب برجلي كتله :-تفضل هذا الاكل
مرتضى... خلي هنا وتعاي دااحاجيج
نزلته يمه... لا مستعجله دروح
مرتضى... شبيج ليش ضايجه
حره... مبيا مضايجه
مرتضى... احجيلي شبيج من البارحه مو ع بعضج ضايجه من شي؟
حره... لا
مرتضى... اكعدي
حره... مستعجله دروح
مرتضى... دقايق اشتاقيت للحجي وياج
كعدت باوع بعيني كال... كلامج مو صحيح البارحه
اني دائما اشوفج كدامي حتى لو ماجنتي يمي
حره... ليش
مرتضى... ماادري
نزلت راسي كال... ليش زعلانه
حره... مزعلانه
مرتضى... مبين عليج الزعل سولفيلي
حره... لا بس مشاكل بالبيت
مرتضى... لعد احجيلي
جريت نفس وگتله... امي تريد تتزوج واحد
مرتضى... مابيها شي حقها
حره... مو هذا الرجال لاشغل ولاعمل ويتوسل بـ مقدام حتى بيت معنده
رفع حواجبه كال... اها
حره... اي وماما تريده ومشاكل هي واخوي
هز راسه باوع للزرع شويه كال :-احجيلج قصه صغيره ؟
حره... اي احجي
مرتضى... هاي زمان جان اكو واحد جذاب
حره... اي
مرتضى... ونصاب
حره... اي
مرتضى... ومحتال
سكتت كال... كولي اي
حره... اي
مرتضى... المهم هذا انتقل لقريه جديده سكن بينهم
فـ كال للناس رايح لمغاره بيها ذهب واحجار كريمه
ونشر هالخبر بين الناس وضل ايام وهو جذب كاعد بالغابه
حره... اي
مرتضى... فمن رجع طلع بين الناس وهو لازم حجر بيديه الاثنين وحط ايد على ايد... وقلدلي الحركه كال... بحيث محد يشوف بداخل ايديه شنو
حره... اي؟
مرتضى... وضل يصيح لكيت احجار كريمه ووكف يم بير ف اجوه اثنين شباب اغنياء كللهم عندي حجر كريم كلوله نشتريه
منك كللهم مجاني للي يكدر يطلعه من هالبير
وشمر الحجر بالبير كدامهم فهم بسرعه عافو اغراضهم وواحد مد حبل والثاني نزل للبير يدور ع الحجر هنا الجذاب بسرعه اخذ فلوسهم وغراضهم وشرد
وتعيشون وتسلمون
حره... ياا خطيه
مرتضى... اي شتعلمتي من القصه؟
حره... لازم منثق بشخص غريب ومنثق بشي اذا منشوف حقيقته
وانت شتعلمت؟
مرتضى... من انزل للبير اخذ فلوسي وياي
ضحكت بصوت عالي كال... اش فضحتينا
حره... وانت ليش تنزل
ابتسم ونزل راسه كمت كتله... يلا تاخرت اروح للبيت
مرتضى... ماشي... وكام وراي طلعت سد الباب وراي
رجعت للبيت كعدت ابتسم كالت رتيل :-شبيج تتبسمين
حره... مرتضى حجالي قصه
وسولفتلها
رتيل... هذوله اغبياء
حره... اي
رتيل... اتاخرتي شنو طبيتي لبيتهم
حره... اي شويه سولفنا اني ومرتضى
رتيل... لا حره لتعيديها حبيبه مترهم تدخلين لبيت بيه بس شباب اولا غلط وميجوز
ثانيا الناس تتهمج وانتي ممسويه شي ليش تخلين نفسج بهيج موقف
حره... والله متاخرت
رتيل... لا عمري ميصير
حره... ماشي لعد مثل متردين
رتيل... صدك نسيت اكلج
حره... شنو
رتيل... رجل انوار شال من المنطقه
حره... صدك والله!
رتيل... والله اجر بيت بغير منطقه
حره... حيل افتكينا من اول عار
رتيل... اسكتي مقدام سالني ذاك اليوم
حره... على شنو
رتيل...گال ليش بيبي بطل
بطلت تبيع البيت؟
حره... اي؟
رتيل... كلتله هي فجاه خابرت حره كلتلها مامرتاحه ومااريد ابيعه الهم
حره... واقتنع؟
رتيل... اي اقتنع
... مر هاليوم طبيعي لليل مقدام كعد ويا امي كللها ... زواجج ماعندي مشكله بيه
بس انتي تتحملين المسؤوليه عن اي شي يصير وتكعدون ببيته مو ببيتنا واي شي يصير لو يصفى بالشارع انتي تجين هنا ببيتج وهو مااله مكان بهالبيت يجي ضيف اهلا وسهلا بس مال يستقر لا
واني ماقابل ع هالزواج
بس حتى باجر عكبه ماتكولين اولادي حرموني من ان اكمل حياتي والنهايه انتي جبيره وانتي تتحملين نتائج قراراتج
امي سكتت
لثاني يوم نفس الروتين الصبح رتيل مموجوده راحت تجيب مسواك دااكنس بالحوش سالي اجتني توها كاعده من النوم وبجامتها صاعده لنص رجلها وكوا مفتحه عينها انطتني موبايلها كالت
سالي...هاج هذا مرتضى
ذبيت المكناسه و اخذت الموبايل كتله :-هلو عيني
مرتضى... هلا فارغه؟
حره... اي ليش
مرتضى... تعاي منتظرج
بفرع ابو غدير
حره... تمام
رحت غسلت ومشطت وطلعت شفته كاعد كتله... هلو
مرتضى... هلا اليوم ماكو
حره... اي رتيل كلتلي بعد لتطلعين الفجر
مرتضى... احسن
حره... اي
اتصل موبايله رفض كعدت كال... اليوم لتسوين غده
حره... ليش
مرتضى... راح اروح للدكتور اني واخوي
حره... ماشي
رجع اتصل موبايله وهم رفض انتبهت لابس الساعه
بايده اليمنى كتله... يا ليش لابس ساعتك بايدك اليمنى
باوع للساعه كال... عادي شكو بيها
ضحكت... لا ميصير
مرتضى... ليش؟
حره... مدري بس الساعه لازم تنلبس باليسرى مو باليمنى
مرتضى... طلعت مستعجل ونزع الساعه
اتصل موبايله رفض رجع لبسها باليسرى كال... ها وهسه
حره... اي هيج احسن
ابتسم اتصل موبايله فتح خط كال... ترا شكيتني
ذاك مدري شحجه جاوبه... مو وكتها هسه بعدين...
يلا هلو هلو وسده كال... هذا ابن زهراء لزكه
ضحكت كال... لسه ضايجه؟
حره... مقدام كال لامي براحتج شتسوين سوي
مرتضى... ها
حره... اي محجه شي
مرتضى... مايصيرلج غير الخير
حره... ان شاء الله...
ضايجه اريد اغني
مرتضى... غني
كحيت وكلت ... يلا بسم الله
مرتضى... الملائكه حارت شتسجل
ضحكت وصفكت ايد بايد كال... اش صوتج
كمت اغني بديت هو فز وحط ايده ع اذانه غنيت
مابيه حيل طيبي تعب حالي..
مابيه حيل راحه ماكو ببالي
مرتضى... حقج اني هم لو عندي هالصوت اتعب تلقائيا فششش
خزرته وكملت كلت
... ماعندي صاحب زين واشكيله .. لاحب صدك يسوى اوافيله
مرتضى... لو مطي كاعد يمج جان قدرتي مشاعره
ضحكت ورجعت اغني..
ياجرح روحي المحد يشيله
مرتضى... حقها روحج بعد متشيل جروح اذا هي شايله هالصوت
خزرته كتله... لتقاطعني دااغني
مرتضى... ارحميني واسكتي ساعة السوده الكتلج بيها غني
خزرته كال... هاي انتي كلما تضوجين تغنين
حره... اي
مرتضى... اذنج اجرها اجر مجاهده
حره... احلا من صوتك ع فكره
ضحك كال... اتشاقه
ابتسمت دارجع اغني كال... لا عليج الله
طكيتها ضحكه هو ضحك وياي كتله :-صوجي اسمعك صوتي
ضحك باوع لشعري كال... يوم تتحجبين وعشره لا
جريت نفس... بعد الله ماهداني للحجاب
مرتضى... مقدام مايكوللجن لبسن حجاب
حره... لا هو شعري قابل شعره
مرتضى... اي بس حلو من تغطيه
حره... لا حاره
مرتضى... وين الحر ترا الجو بيه بروده اليوم راح يجي الشتا
حره... لا مااحبه
مرتصى... اي كولي مااحبه بس تدرين
حره... شنو
مرتضى... المحجبات اعتبرهن اقوى
حره... ليش
مرتضى... لان ماكو بنيه ماتحب تطلع شعرها
بس المحجبات يحاربن رغبتهن علمود الحجاب لانه فرض
حره... لا اكو نساء هم يحبن الحجاب
مرتضى... هسه مثلا لو الحجاب مو فرض شفتي وحده تحجبت؟
حره... ماتوقع
مرتضى... لهالسبب كتلج يحاربن
حره... حياة تحجبت باخر فتره الها الله يهديني
مرتضى... امين
كمت كال... ها وين
حره... رايحه اخبز
مرتضى... ماشي
داروح كال... لحظه... درت وجهي مد ايده طلع من جيبه موبايلي كال... موبايلج
جريته كتله... ايي الحمد لله واني عبالي ضاع
مرتضى... لا لكيته واكع تحت الكشن بالسياره
ضحكت... الحمد لله
ابتسم كال... ضلي اضحكي
هزيت راسي ب اي وكتله.. يلا
بيباي ولوحتله بايدي هو هم لوحلي رجعت فرحانه وصلت للبيت طبيت للمطبخ اگمز كالتلي رتيل
... ها وين جنتي
شوفتها الموبايل كتلها ... تيرارا
رتيل... اييييي هذا وين لكيتيه
حره... جان عند مرتضى
رتيل... شلون؟
حره... اي واكع بالسياره مال اخوه
رتيل... هاا لعد الحمد لله
حره... اي
رتيل... فتحتيه شفتيه
حره... اي مبيه شي يشتغل
رتيل... خوش
... رحت حطيته ع الشحن للظهر اجه مقدام جنت دالعب بالموبايل كال
... ها لكيتي موبايلج
حره... اي
مقدام... شلون
حره... مرتضى انطانياه
هو عكد حاجبه كال... شعنده يم مرتضى
رتيل بسرعه كلتله... هو مرتضى لاكيه واكع وضال يسال عليه واليوم سألنا وكلناله هذا الحره
مقدام... اهاا خوش الحمد لله
... كملنا غدا وكالعاده شربنا جاي ونظفت ومددت اقره كتاب صار وقت العصر اندكت الباب فتحها مقدام طلع رشم سلم ودخل بالاستقبال
ماكو احد بالبيت بس اني ورتيل
رتيل راحت تحضر الضيافه واني كعدت اقرا كتاب بالهول سمعت اسم السامر
بسرعه نزيت وخليت اذني يم الباب سمعت رشم يكول
رشم... اني عبالي الباشا بس من رحت سألته طلع لا هو مبلغ عن الي راد يقتل حره ولا على السامر
كله مقدام... زين ماكلولك منين اجت الاوامر من مقدم البلاغ
رشم... عرفت الجهه بس منو الي قدم مدااوصله اخر ضابط كلي اجتني
اوامر ونفذت
مقدام... يعني السامرــ...
قبل ليكمل كله رشم .... تم القاء القبض عليه ... يتبع ...
______________________
هوايه دايطلبون شبهه للابطال واني دا ادور بس مدا الگه
لگيت شبه لحياة الله يرحمها ونزلته قبل
وهسه لگيت شبه لمقدام
بقية الابطال داابحثلهم واول ماالگه انزله الكم
وحره لگيت بس يعني مو حيل فداابحث عن وحده تشبهه اكثر
☹️
بطلنا مقدام
ممبين مو؟
ان شاءالله اجيبلكم صوره اضبط🥲💔
لتنسون التصويت والمتابعه
قراءه ممتعه فراشاتي ❤
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!