الحلــــــــقه الخامــــــــــــــــسه
رواية... هل كانَ حُلماً...؟
{ العِراق-المُصغَر ... التوباز }
بقلمي ... لؤلؤة_البِحار ...
___________________•
قبل ان تبدؤا بقرائة البارت اتمنى من الجميع متابعه هذا الكتاب
لان بيه كتابات حياة ومااريدها تموت لازم يبقى ذكرها
لان كل حرف هو أذى عبرت بيه بالكتابه
وكل وحده تكتب تاريخ وتحاول تعبر مثل حياة عن يوم مؤذي الها
لان كل انسان بداخله اذيه محتفظ بيها لنفسه.. مثل حياة
يوزر البنت الي سوت الكتاب HindAl_Amri
والاهم
اتمنى من الجميع التصويت والتعليق على كل سطر لاني داتعب بالقصه 🤍
_______________________♡
رشم... اني عبالي الباشا بس من رحت سألته طلع لا هو مبلغ عن الي راد يقتل حره ولا على السامر
كله مقدام... زين ماكلولك منين اجت الاوامر من مقدم البلاغ
رشم... عرفت الجهه بس منو الي قدم مدااوصله اخر ضابط كلي اجتني
اوامر ونفذت
مقدام... يعني السامرــ...
قبل ليكمل كله رشم .... تم القاء القبض عليه
مقدام... والله مدا استوعب بلا السامر ممكن عنده عداوات بس الي بلغ عن الي راد يقتل اختي منو؟
رشم... اكيد كلشي راح يتوضح اني راح ابقى ورا هالموضوع
مقدام... زين ماعرفت شلون وصلو للسامر !
رشم... حسب مافهمت متعقبيه من خلال رقم التيلفون
حره... مندمجه اسمع واني صافنه وحايره بأمري محسيت غير رتيل ندستني
نزيت كتلها بصوت ناصي... ها
كالت بهمس... حره عيب تتصنتين يجوز يحجون شي خاص بينهم هم شباب ميصير
اني بلعت ريك وكلبي صار ينبض بسرعه حسيت اكو شي غريب ديصير وممفهوم كامت اشرتلي كومي كمت گالت
رتيل... بعد لتعيديها ماشي
هزيت راسي كالت ... عفيه حبيبتي
رحت طبيت للغرفه وضليت افكر هاي شديصير ضليت متوتره كلت معقوله الي بلغ عن الي حاول يغتالني هو نفسه الي سجن السامر؟
رجعت گلت لا لا يمكن مو نفسه
صفنت شويه ممكن اكو شخص يكره جماعة مشعل وهيج سوا
هزيت راسي كلت... اي ممكن
مندمجه اسأل واجاوب نفسي طبت رتيل كالت... شبيج توته ليش متوتره
حره... لا مبيا شي
رتيل... متاكده؟
حره ...اي
كعدت يمي تتظف بالتمن كالت
:- المدرسه حتبدي مبقالها شي
هزيت راسي باي كالت... لازم ترجعين لدراستج مبقالج شي وتخلصين الاعداديه
... باوعتلها كالت... خلصي هالسنتين
حره... ماادري والله
رتيل... مااكو ماادري ترجعين وهالمره من صدك الزملج النعال احنا مدانلعب
ابتسمت
كالت... لج ياغبيه هي كلها سنتين غمضي عين فتحي عين تخلص ووراها تدخلين جامعه والجامعه حلوه مو مثل المدرسه لتضيعين هالفرص من ايدج
حره... ان شاء الله
رتيل... خير ان شاء الله
طلع رشم اجه مقدام كعد يمنا حسيته مرتاح ووجهه مرتخي اجيت اسأله عن السامر بس تذكرت هو اصلا مكلي السامر نهزم واخاف اسأله ويگولي شمدريج بيه طلع؟
ومال اجذب واكوله رشم گلي مترهم لان هم اصدقاء وكلشي يتشاركون فسكتت
لثاني يوم الصبح طبخت وكملت دا اوديه لبيت مرتضى
خابر مقدام ع رتيل كاللها
... لتودون الاكل من نجي لان مصطفى وياي ومرتضى يتغدا يم اصدقائه
رجعت الگدور ع الطباخ و بداخلي كلت... شكد دايح هالـمرتضى
بالسنه حسنه يلا يكعد شويه بالبيت وهم مو هواي
وبداخلي كلت... جعلني مثله شلون حلوه هيج واحد يفتر وميدري شصاير بالدنيا
خليت اكلهم على جهه ب ٢ اجه مقدام ووياه مصطفى
مقدام انطاه الاكل وضلو يحجون شويه وراح
للعصر ماما مموجوده طالعه دااسوي عشه بالمطبخ
حسيت باب البيت انفتح
وانطبك بقوه
مديت راسي شفت ماما اجت مقهوره ووجهها احمر طبت للهول سالي كاعده ماما نزعت حجابها وشمرته
هايه الفتره گامت تلبس حجاب تحطه على راسها حط
... ماما اكو شي... سألتها واني اباوعلها بقلق
اميره... اخوج وين؟
حره... طالع
اميره... بسيطه
سالي كلتلها... ماما شكو
مجاوبت وطبت للغرفه طلعت رتيل من الحمام اشرتلي.. شكو؟
حره... شو ماما مقهوره ووجهه احمر
راحت رتيل دكت الباب كلتلها... يوم بيج شي؟
اميره... لا خابري اخوج خيجي
رتيل... ماشي بس فتحي الباب
فتحت الباب مغيره ملابسها اني اشرت لسالي... انطيني موبايلج
سالي... معندي رصيد وعلي
رحت اخذت موبايل رتيل واتصلت على مقدام كتله... مقدام وينك؟
مقدام... بالكهوه كاعد يم الشباب ليش؟
حره... تكدر تجي
مقدام... حره اكو شي
حره... اشو ماما ضايجه وتريدك
مقدام...تمام جاي
حره... سديت الموبايل حطيته ع الميز ورحت كلبت التمن وحطيته ع التهدير سمعت صوت الباب انفتح وانطبگ واول ماطب سمعت ماما صاحت بيه تكوله
اميره... مشايفه بصلافتك ولك
مقدام... شكو؟
اني طلعت رحت يمهم امي كلتله
... يعني رجال اجه وخطب على سنة الله ورسوله متريد توافق كول مموافق بس مال تكوله اي تعال وتروح تخوفه لا ترا هاي كلش واكفه .!
مقدام... اخوف منو شبيج يمه؟
اميره... اي غير انت مخوفه وحتى زواج بطل بعد ميتزوج
اني باوعت لمقدام كللها... يوم وداعت خواتي مو فاهم عن شنو تحجين !
اميره... اش لتسوي نفسك عود مثالي كدام خواتك اني هسه اكتشفت انت اكبر منافق والله..
وكعدت اني رحت كعدت يمها كتلها :-ماما فهمينا شصار بهدوء يمكن سوء تفاهم
اميره... لا لا... وتاشر باصبعها كالت.. اني ادري هو... واشرت عليه... من البدايه ماقبل بس حجت وياه رتيل و ماراد يردها بس والله زحمه...
... كوا تحجي حسيتها هالمره صدك مقهوره ضجت وياها باوعت لمقدام كللها
... شني هو كلج اني مخوفه زين شنو هو طفل ويخاف شبيج
اميره... لا دزلي خبر ويا صديقتي منال بعد مايريدني وراح يشيل من هالمنطقه وكايللها
فكو شركم عني وعوفوني بحالي مثل ماطلبت بطلت
رتيل كلتلها... اي ياماما واخوي شدخله يجوز الرجال هو من نفسه غير رأيه وان شاء الله خير الج
اميره... لا هو كايللها كافي كل يوم تهددون تصلخون وتسجنون اني رجال طلبتها ع سنة الله ورسوله وساعة السوده
رتيل... هي واضحه غير رأيه وكام ينطي حجج
ماما باوعت لرتيل كلتلها... انتي طول عمرج ماتنطين بيه والله ولو تشوفيه بعينج هم ماتنطين بيه
مقدام... صدك تحجين يمه اشايفتني عصابجي واروح اهدد اني لو مااريد اكولج وكتلج ونصحتج مو مناسب بس مال اكوله تعال اخطب واروح اهدده يفسخ كلش واكفه هاي
واذا يكول مهددني
خلي يجي نتواجه!
امي دارت وجهها سالي اجت كعدت يمها كلتلها.. لتضوجين ماما اني دعيت وكلت يارب اذا مبيه خير لتزوجه من امي وطلع مبيه خير شفتي ماما
هزت راسها وكامت طبت للغرفه
مقدام حيل ضاج
طلع للحوش طلعت وراه رتيل اسمعها تكوله
رتيل... لتضوج حبيبي انقهرت يمكن ان شاء الله خير
هو باوعلي اني وسالي ورجع باوعلها كللها... وعلي اني مامرتاحله بس امي اصرت وكلت هي تتحمل نتيجة قراراتها
بس مال اروح واهدد كلش مو سوالفي هاي
رتيل... طبعا حبيبي كلنا نعرفك وحتى امي تعرفك بس تلكاها انقهرت
مقدام... والله اني هم مايهون عليه اشوفها مقهوره بس والله انصدمت... جر نفس كال... ان شاء الله خير
وطلع
لحكته رتيل للباب هم يحجون الى ان طلع دارت وجهها عليه كالت... سوده عليه ضاج
حره... حتى ماما
رتيل... هسه نحجي وياها ونهديها طبينا للمطبخ طلعت موز وكرفس ثرمتها طبت سالي كلتلها
سالي... سوي بدون كرفس حبابه
رتيل... مو ادري بيجن متاكلن كرفس وحده زين الج وجوهجن صفر من فقر الدم ... وشغلت الخلاط اني شفت التمن
كتلها... صار الاكل
رتيل... من يجي مصطفى ياخذه عوفيه وتعاي شربي عصير ونهدي امي يلا
سالي حضرت صينيه وكلاصات وصبتلنا رتيل اخذته وگالت... سالي صيحي مروه وتعاي
سالي... ماشي
طبينا كعدنا يم امي انطيناها عصير كلتلها رتيل... لتضوجين يمه هو دام الله بعده عنج يعني مابيه خير الج ويجوز الله كاتبلج الاحسن
اميره... بهالعمر منو بحالي بعد
طبت سالي كعدت يمنا رتيل گالتلها :-لتحجين هيج شنو منو بحالج هو انتي وين مبينه عندج خمس اولاد غير مبين عمرج بالتلاثين ان شاء الله يجيج الاحسن منه
سالي كلتلها... لتضوجين ماما والله لو خير جان بقى
هي هزت راسها وابتسمت اني كلتلها :-ماما ترا هالرجال يجذب وبعدين ليش من خابره مقدام كله تعال كام يتهرب ويتحجج خلي يولي لتصدكيه لا اجاه تهديد ولا شي
هزت راسها كالت.. عفيه زلم كلكم عارات
جريت نفس رتيل كالت لسالي :-شربيه كله زين الج... باوعتلي... وانتي هم حره
هزيت راسي وشربته وگمت
للمغرب اجه مصطفى اخذ الاكل
اجه مقدام اذن راح يصلي واحنا حضرنا العشا بين ماكمل وتعشينا
شويه وراح كعد حجه ويا امي كللها
مقدام... ترا اني مو عدوج تبقين امي ومااقبل تنظرين
وتعرفين سوالف التهديدات هاي مو من ثوبي اني رجال على كد حالي يادوب الحك اكعد وياكم ساعه واطلع اشتغل
احصل فلسين يعيشونا
صح اني مارتج تتزوجين شلون ماجان والله شنو العمر يمشي وشنو الفائده اذا طلع مثل ابوي
هم تشبعين قهر وتضلين تتحسرين على عمرج !
اميره... يلا خيولي
مقدام... يوم مسألة زواجج انتي حره بيها
وهذا حقج اني ماالي حق امنعج تتزوجين وتعيشين حياتج
بس هذا الرجال ماجان مناسب الج والله بعده عنج
هي هزت راسها بإي وكالت.. خير ان شاء الله... وشربت الجاي
اتصل موبايل سالي جاوبت.. هلا رغوده شلونج
وكامت تحجي ويه رغد اني تذكرت كتله... مقدام شلون بالخط حركته؟
مقدام... اجيبلج واحد جديد باجر ان شاء الله
رتيل كلتله... وذاك ماتكدر ترجعه
مقدام... اجيبلها جديد احسن
رتيل... خوش لعد
حره... كمت فرشت وحطيت كتاب وكعدت اقرا بيه الى ان غفيت
واني نايمه وكاني دا اوكع من درج بحيث رفعت رجلي وفزيت
الضوا مطفي والبنات فارشات يمي ضليت صافنه اباوع للسكف حسيت بخنكه حطيت ايدي ع ركبتي وجريت نفس
سمعت صوت سمرا كالت ... حره
اني فتحت عيوني متفاجئه
كمت معقوله سمعت هالصوت
لو اني متوهمه!
حسيت بخوف دا اكوم شفت كأن هالمكان صار بيه ضوا
وحياة ع الارض وكلها دم
وبيبي تصرخ
حطيت ايدي ع گلبي و گلت بخوف :-بسم الله بسم الله
وغطيت راسي وعيوني
فزيت ع صوت رتيل شربتني مي كالت :-اسم الله كابوس لتخافين
شربت مي كتلها... شصار
رتيل... ماكو شي وحضنتني...
باوعت مروه وسالي نايمات طب مقدام كال... شبيها
رتيل... شافت كابوس
حره... بيش الساعه
رتيل... ب ٦
كعد يمي مقدام كال... شنو شفتي
حره... ماادري حسيت سمعت صوت سمرا تناديلي
ومن كمت شفت حياة داتموت... حجيتها وبجيت
مقدام... اسم الله ومسح على راسي كال... ليش مترجعين للدكتوره مو احسن؟
هزيت راسي بلا كال... ليش سمعتي حجايه من احد؟
حره... لا ابد
مقدام... لعد ليش ماتردين تروحين
حره... صرت بخير
مقدام... بس هم لازم تتعافين تماما يلا
حره... لا عفيه مااريد
هز راسه كال... يلا تكومين تتريكين ويانا
هزيت راسي وكمت غسلت وكعدنا نتريك كلي... لاتطبخين اليوم الشباب ماموجودين
حره... ماشي
رتيل شغلت قران بالبيت كلتلي... غمضي عيونج واستمعي حاولي لتفكرين بشي
حره... ماشي
شويه و حسيت بدت تنعاد عليه الاحداث
كمت انظف
كالت رتيل... ارتاحي اني انظف
حره... لا اختنك اريد اشغل نفسي ومثل العاده ضليت انظف واشغل نفسي واكتب بدفتر مرتضى
لليل مقدام جابلي خط
حطيته بموبايلي وحطيت رصيد
تذكرت مرتضى اشو طول هالوقت مابين ابد؟
لثاني يوم فزيت على همس مقدام يكول لرتيل... اذا رجعت اليوم من وكت نطلع لمتنزه شي وضع حره معاجبني الدكتوره كالت الاماكن الطبيعيه تفيدها
كلتله رتيل... ماشي لان البارحه هم تحجي وهي نايمه
مقدام... بس لو تقتنع ترجع للدكتوره
جان تحسنت
حره... رجعت حاولت انام مكدرت تالي كمت كعدت
اليوم جيرانه متريد خبز
فضليت اشخبط واكتب سويتلهم اكل تمن ومرك خلصت وانتظرت مصطفى او مقدام ياخذوه
گاعده العب بموبايلي باوعت للساعه ب ١٠
دااگلب بالصور موبايلي اتصال فتحت خط سمعت صوته كال
مرتضى... ياعنبر ممكن النمبر؟
ضحكت... بربك لعد على شنو داتحاجيني؟
مرتضى... لا اني اريد الرقم اني جاي احاجيج ع الخط
حره ... ترا نفس الشي اثنيهن واحد
مرتضى... لا الخط خط والرقم ارقام
ضحكت كال.. اصدمج بمعلوماتي
حره... وين اشو متبين
مرتضى... موجود بس انتي ماتشوفيني
حره... ليش؟
مرتضى... لانج بالبيت
حره... اي مداطلع هوايه
مرتضى... تكدرين تجين
حره... لبيتكم؟ لاا
مرتضى... ليش
حره... ميصير
مرتضى... ليش مايصير
حره... غلط انتو شباب ميصير ادخل لبيت بيه بس شباب
سكت شويه وكال... رتيل اختج هيج كالتلج؟
حره... اي
مرتضى... معدله والله
صاحتني رتيل كتله... يلا رتيل تصيحني
مرتضى... ماشي
حره... باي
كال... هلا.. وسد الخط
للظهر اجه مصطفى اخذ الاكل واجه اخوي تغدينه
ومر هاليوم بملل وتعب
لليل طبكت الكتاب الجنت اقراه وكمت سمعت اخويه يحجي بالتليفون حاولت ماتصنت كلت عيب بس من سمعته يكول بصوت ناصي... تورطت وياه..
حطيت اذني ع الباب ذاك مدري شحجه
مقدام كله... عمران انت تدري بوضعي من اخذت منه فلوس وساعة السوده... سكت شويه كله... الكلب يريدهن ٦ ملايين كتله هو كل الاخذته مليونين غيرهن ماانطي ضل يهددني
سكت شويه كال... لا وين شفته غير هذا الخرا عود المساعد هو الي يحجي بمكانه...سكت ورجع گال... لا يمعود شاوصله هو كلب اصلا واضح هو المطلوب
لان بالتحقيق سألوني عنه مو تدري سكت يستمع كال... شاحجي ذاك اليوم من حجيت مو ضربوني؟
عمرلان اني عندي خوات خايف عليهن وهذا الكلب يهدد.. رجع حجه كله... والله مدالحك المصاريف كسرت ظهري وهذا الكلب داياخذ هواي
والله ملابس لخواتي ماعندي اشتري
حره... حطيت ايدي على كلبي انقهرت رحت للحمام ورجعت ضليت افكر بالكوا نمت
لثاني يوم فزيت الفجر هم ضايجه ورتيل كالتلي
... اكو شي يوجعج صايره يكول تردين تبجين بنومج
حره... لا مبيا شي
ضلت تنصحني اقرا قران
كعدت بالهول معندي شي اتصل مرتضى كال
... تجين للفرع
حره...رتيل وصتني ماطلع الفجر
مرتضى... دقايق ماكو احد هنا
حره... تمام
رحت لهناك شفته گاعد كتله... هلا شلونك
مرتضى... بخير
كعدت كال... هاي شبيها عيونج
حره... شبيها
مرتضى... شنو ما نايمه؟
حره... لا نمت ليش؟
مرتضى... مبينه تعبانه حره
حره... من هموم الدنيا
مرتضى... بيج شي؟ احجيلي يمكن اساعدج؟
جريت نفس بقهر... اني حياتي اكشن مداتخلو من الهموم تعبت حيل
مرتضى... احجيلي شنو المتعبج
حره... الرجال الي راد امي بطل ميريدها
هو رفع حواجبه وباوعلي ونزل عيونه بعدين طبك حواجبه وهو منزل عيونه كال... ليش
حره... مدري هو الظاهر راد يفلت وكام يتبلى على اخوي
باوعلي كال... شيتبلى
حره... يكول بطلو تهددوني وعوفوني بحالي ومن هاللغوه
هز راسه كال... خيولي ومن هاي ضايجه؟
حره... اوف اخويه حيل ضايجه عليه
مرتضى... ليش شبيه اخوج
تنهدت بحزن... مديون مدايلحك يدفع دينه وفوكاها شغله مدايكفيه
مرتضى... المن مديون؟
حره... ماادري والله
مرتضى... هو شيشتغل
حره... كل يوم شكل ساعه حمال ساعه تكسي ساعه بعلوه ساعه عامل وهيج مدبرها
نزل راسه كال... انطيج فلوسج هسه؟
حره... يافلوس؟
مرتضى... مال طبخج
حره... لا يمر شهر يلا
مرتضى... نفس الشي ترا
حره... لا ميصير
مرتضى... هو حقج شبيج!
حره... يمر شهر يلا اني مجرد دافضفضلك بس مااريد فلوس
مرتضى... بس احنا اصدقاء صح؟
حره... حتى لو عفيه لتحرجني سكت طلع من جيبه جكليت انطانياه كتله... هاي شنو
ضحك كال... مو عندج نقص شكر هذا جكليت عوضي مصطفى كال يفيدج
ضحكت... ياشكر سكر
مرتضى... نفس الشي.. سكت شويه كال... هاي عود شلون يصير؟
حره... هو يصير بسبب نقص السكر بالدم
مرتضى... يعني دمج بيه شكر واني اكول كل هالحلاوه منين
ضحكت... بكل الناس موجود
مجاوب اتصلت رتيل كمت كتله... يلا اروح
مرتضى... اوكي
لوحتله باي ورجعت نفس الروتين للظهر كعدنا اكلنا مقدام كال لامي... يوم لتطلعين و بعشوي حضرو روحكم نروح لكورنيش ال*****
كالتله... ها حلو
حره... مبيا حيل اليوم
رتيل... انجبي انتي
حره... والعشى مال جيرانا شلون
مقدام... اني اخابرهم اكوللهم
سكتت كملنا رتيل سوت اكل كالت :-احسن من اكل المطاعم
سبحت ومشطت كعدت كتلها... رتيل معندي ملابس طلعه سود شلون..؟
سالي... اني عندي فستان
گامت رتيل طلعتلي القميص مالتها كالت...هاج جربيه بلا
لبسته مبهذل عليه كالت... سوده عليه شكد ضعفانه
حره... قبل جنا نتلابس اني وياها بس هسه جسمي ضعف حيل امي كلتلها :-مابيه مجال يتخصر؟
رتيل... لا راح اروح لام الاقساط اجيبلها قميص وهم اجيب احذيه
وصدك لبست شالها وراحت جابتلي قميص نص ردان وبنطلون وحذاء وكعدت تجرب على شعري تسريحات وتحجي وياي
حسيتها داتغيرلي جو ب ٤اجه مقدام جاب التكسي طب بدل وطلعنا
رحنا فترينا هناك وسالي تمشي وتصور تكول اشوف رغوده ومروه تمشي وتسوي
... هذا حلو هذاك لا محلو... وتنطي ملاحظات لماما
صار المغرب اتصل موبايل مقدام فتح خط كله
... هلا مصطفى...
اي والله حبيبي احنا بالكورنيش
اي اذا قريب تعال هنا نتعشى سويه هلا هلا بيك...
حجه وسده كال...مصطفى قريب منا فراح يجي
فرشنا السفره اجه بس مصطفى تفاجئت لعد وينه مرتضى بس مكدرت اسأل
تعشينا وضلو يسولفون والاجواء حلوه مصطفى كال...
... مقدام اني اجت ببالي فكره بس تعرف اني موضف ماالحك فاتمنى تساعدني
كله مقدام... تدلل شنو الفكره
مصطفى... اريد افتح محل موبايلات واريدك انته تديرلياه والنص بالنص وشوي شوي نطوره
اني ابتسمت مقدام گله... اي والله الله وايدك
مصطفى... حلو محل وعندي محل بشارع الـ****
مقدام... موقع حلو
مصطفى... باقي بس التجهيزات اسبوع يكملن
ماما كالت ... خير وبركه ان شاءالله
كملنا وجابولنا عصاير حسيته يوم حلو ورتيل كل شوي ساعه تجيبلي عصير ساعه حلويات ساعه جكليت
لل ١١ رجعنا وويانا مصطفى كال
... سيارتي اخذها صاحبي
مقدام... لعد مرتضى وين مااجه وياك
مصطفى... مرتضى تلكاه يفر بالمنطقه خبلني مايكعد بالبيت
مقدام ضحك كله ... خليه شتريد منه
مصطفى... مو خاف يسويلي مشكله شي وهو مريض
مقدام... لا مرتضى مو عدواني لتخاف عليه
مصطفى... عنده مشاكل نفسيه ومرات تجيه حاله هستيريه يصيح ويكسر هالفتره صار احسن وبدا يهدا
حره... هو ليش هيج حالته
مصطفى... هاي من جنا ببيتنا القديم جان بناء جديد ووكع من فوك على راسه وظهره لهالسبب صارت بيه حدبه وصارت عنده مشاكل نفسيه
سالي... خطيه
مصطفى... قبل جان كلش حاله مو تمام جانو يصيحوله خبل وتأزمت حالته لهالسبب انتقلنا
سكتت اتصل موبايل مصطفى جاوب كله... هلا
ذاك مدري شحجه
مصطفى ضل ساكت ويهز برجله كله... مو يمي
سكت شويه جر نفس كله... يم مرتضى سكت كله... من ارجع يلا هلو
سد الخط ضحك كال... اي شي مفقود يم مرتضى اخوي
ضحك مقدام كال ... اي حتى موبايل توته لكاه مرتضى
ابتسم مصطفى
ووصلنا للبيت اول مرجعت نمت من التعب لثاني يوم اخويه مموجود كعدت سالي كاعده كتلها
حره... ها كاعده اليوم من وكت
سالي... مو رغوده محضرتلي اخبار والبارحه ملحكت تكولها فخابرتني اليوم
حره... شنو اخبار عن منو ؟
سالي... السته الي اعتقلوهم قبل فتره
حره... اي؟
سالي... البارحه طلعو عدا واحد
حره... اها واحنا شدخلنا
سالي... هو مدخلنا بس لازم نتناقش بالموضوع اني ورغوده
ضحكت شويه واجتها رغوده وكعدن يتناقشن بهالموضوع ويحللن ليش هالواحد ماطلع؟
عفتهن ورحت كعدت ارسم ومر هاليوم هم بشكل عادي لحد ثاني يوم طلعت اودي الخبز الصبح شفت مرتضى طلع ابتسم
اشرتله هلاو ردلي نفس التاشيره وديته ورجعت من داطب للبيت شفت بعتبة بيتنا كلاده مكتوب عليها حرف (R) وتحته مثل الخنجر رفعته كلت بكلبي... هاي شنو ذهب؟
طبيت صحت رتيل... رتيل هاي بعتبة بيتنا لكيتها
شافتها كالت... يا هاي ذهب خطيه خاف واكعه من واحد
سالي ركضت كالت... الله تخبل
رتيل...خلي نوديها للجامع
حره... اي بس خنسأل واذا ملكينا صاحبها نوديها
سالي كالت... الله خلي البسها
رتيل كلتلها... لا ميصير حرام وحطتها بالجرار
للظهر ورا الغده دااقره كتاب خطر ع بالي مرتضى كلت اساله يجوز مالته او يعرف صاحبها اتصلت رفضني ورجع اتصل جاوبت كال
... هلا
اسمع يمه اصوات سيارات كتله... بالبيت؟
مرتضى... اكو شي؟
حره... لا بس لكيت كلاده ذهب بباب بيتنا كلت اخاف الك
مرتضى... لا ماعندي كلاده ذهب
حره.. تمام اذا تعرف احد ضايعتله كلاده ذهب بيها حرف R ومثل الخنجر تحته كولي
اسمع اصوات يمه كال... تدللي
حره... اخذ راحتك خاف مشغول
دايحجي سمعت صوت واحد كله ... المكان مُطو...
قبل ليكمل كله بنتر... اسكِت... وسد الخط
حسيت بفشله كلت يمكن مشغول رتيل سألت عن الكلاده ملكت صاحبها لليل ورا العشى اتصل كلي
... الظهر جنت يم اصدقائي
حره... اي عرفتك مشغول
مرتضى... شنو هاي الكلاده
حره... مدري لكيتها يم الباب
مرتضى... ذهب؟
حره... اي
مرتضى... حلو بيعيها بفد عشرطعش مليون تستفادين منها
حره... لا حرام ميصير مو النا
مرتضى... لا هو انتي لكيتيها بعد
حره... لا خطيه يجوز صاحبها يدور عليها
مرتضى... ممكن
حره... ان شاء الله نلكاه
مرتضى... اذا مالكيتي صاحبها اخذيها الج
حره... لا نوديها للجامع
مرتضى... ماشي
حجينا شويه وسد الخط ضلينا يومين ندور ع صاحبها ملكيناه اكو ضايعه الهم بس مو نفس الوصف بيوم سالي جانت معزومه يم رغد
ضلت تتوسل برتيل انو خلي البس الكلاده اتفيك بيها كدام صديقاتي مسوين جمعه
رتيل مقبلت كلتلها ... حرام مو النا
بس سالي ماقتنعت ضلت تلح الى ان قبلت رتيل وكلتلها... تديرين بالج عليها كلش زين من تجين نوديها للجامع مناقصنا ذنوب
سالي... ماشي
وصدك راحت سالي
للعصر طلعت برا ضايجه مرتضى مموجود ابد هالايام ولا شفته مرت ام حيدر الي خطب رتيل شافتني كالت
... ها ماما كاعده هنا
حره... والله شو ضوجه
ام حيدر... تعاي احجي وياج شويه
حره... ماشي مشينا شويه طبينا لبيت بنتها استقبلتني احسن استقبال ووجوهن بيها راحه غريبه حيل حبابات
كعدن يحجن وياي ام حيدر كالت
... حبيبه هاي شكد صارلنا نطلب ايد اختج وماتوافق ليش
حره... هي رافضه فكرة الارتباط حاليا
ام حيدر... وابني هم يكول لو رتيل لو مااتزوج
اني ابتسمت كالت... ماتكدرين تقنعيها حبيبه
حره... ماادري والله
ام حيدر... شوفي اني ادري هي ماتريد تتزوج علمودجن بس حبيبه هي هم لازم تشوف حياتها
حره... اني ومقدام حجينا وياها بالهموضوع
ام حيدر... اي يمه حبيبه حاجيها واني مثل امجن قابل غريبه خليها تتزوج وعسى ماتكعدن وياها شكو بيها انتن خواتها
ضحكت ... لا خاله شلون
ام حيدر... اي يمه اني احبها لرتيل لان حنينه عليجن وصاينتجن ودايره بالها عليجن
هاي خوش بنيه دره مال الله مو مال تنعاف
بنتها كالت... اي والله رتيل المنطقه كلها تحجي بيها خوش بنيه حبابه يا شفايتلنا وتصير من نصيب اخوي
حره... ان شاء الله احاجيها اليوم
گالن اي حبيبه ضلت تحجي شويه وكمت وصدك فكرت رتيل تعبت خلص لازم تستقر والرجال محترم ورايدها على سنة الله ورسوله
رجعت للبيت اول ماطبيت تلكتني رتيل لازمه الموبايل بايدها كالت
... وين رحتي حره انشغل بالي
حره... هنا
رتيل... صار ساعه اتصل عبيج وماكو
حره... موبايلي صامت مدري بيه
رتيل... عبالي شو وين رحتي
حره... لتخافين اني هنا
كعدت شويه بالهول كتلها... رتيل ليش رافضه فكرة الزواج
رتيل... ماكدر اعوفجن الا اامن مستقبلجن
حره... بس احنا كبرنا
رتيل... لا بعدجن صغار
حره... مقدام يمنا انتي هم لازم تشوفين حياتج
رتيل... الله كريم
حره... حيدر يحبج لتخسريه... همست مبتسمه
رتيل... اذا الله كاتبه الي لو تمر سنين يبقى
حره... بس هو دايطلبج للزواج وافقي
رتيل... قبل لا اضمن مستقبلجن مستحيل
دااحجي كالت... يلا وياي نسوي العشا سكتت گمت وياها حضرنا العشا وتعشينا
لليل كلنا نايمات بالغرفه كاعدات بس اني ورتيل طب مقدام بهمس كللها :-رتيل تعالي
اني فزيت كتله... واني
ضحك... وانتي هم تعاي
كمنا كعدنا بالاستقبال رتيل كلتله... اكو شي
مقدام... اي
رتيل... شنو
مقدام... مصطفى طلب ايد اختي سالي مني
اني حسيت فراشات بكلبي طارن فرحت حيل ومكدرت اخفي ابتسامتي لان اختي هم واضح معجبه بيه
رتيل... وانت شنو رأيك
مقدام... والله ماادري هو اهم شي اختي سالي اريدجن تسالنها خاف تريده
هو مصطفى ورده وماكو منه
الصراحه
واني اتشرف بيه بس بعد راي سالي هو المهم
باجر رتيل تكعدين وياها وشوفيها واذا معاجبها الله يوفقه
هو كلي اذا تقبل حتى اجي اخطبها
رتيل ابتسمت... ان شاء الله بيها الخير
لثاني يوم كعدت فرحانه خبزت ورحت اودي الخبز من رجعت شفت مرتضى واكف بالباب
رحت سلمت عليه جان مبين عليه التعب عيونه حمر وهالات تحت عيونه لابس شفقه سوده
اول محجيت كال
... سالي وافقت
ابتسمت كتله... والله لسه مكلنالها
مرتضى... ليش
حره... البارحه اخوي كال لرتيل حاجيها
مرتضى... ها خوش.. باوع كال... تعاي لفرع ابو غدير هنا كلش مامرتاح
حره... ماشي مشينا لهناك كعدنا
مرتضى... لكيتي صاحب الكلاده
حره... لا ملگيناه
مرتضى... لعد متلبسيها
حره... لا حرام ميصير
مرتضى... هاا عجل سالي مو حرام؟
حره... شنو؟
كح وضحك كال... داتعلم لهجات جديده براسج
حره... شنو يعني عجل؟
مرتضى... هذا العجل الينوكل شبيج
حره... يا.. وضحكت... شجاب هاي على هاي
ابتسم مجامله كال... شنو رأيج تبيعيها بفد عشرطعش مليون وتشترين بيها بيت
ضحكت... وين اكو هيج رقم
مرتضى... كِلشي اكو يمي اني افكر اشتري بيت بغير مكان ونعيش اني وياج سويه شتگولين؟
صفنت ليش هيج يحجي ابتسمت وكتله... لا ميصير شلون حرام
هز راسه وضحك كال... لا وما على المجنون من حرج
استغربت... بس انت مو مجنون
مرتضى... كلها تكول هيج
حره... لا يجذبون يولون لتصدكهم
مرتضى...بس عندي مشاكل
حره... ومنو معنده مشاكل نفسيه اني هم عندي
مرتضى... يعني تقبلين نشتري بيت بيوت.؟
صفنت وضحكت باستغراب كال... رؤية الاسنان علامة الرضا
حره... يا شبيك
مرتضى... ليش مداتجاوبين؟
حره... شبيك اليوم
مرتضى... متشوفين مرتضى مناسب للزواج؟
حره... بالعكس انت ماكو منك ليش حتى متتزوج يعني الله يرزقك بنت الحلال
هز راسه ونزل الشفقه حيل وتافاف كتله... بيك شي
هز راسه بلا وكام كتله... احسك تعبان
مرتضى... مكدرت انام البارحه
حره... ليش؟
سكت جر نفس كال... لان... رفع عيونه يباوع لفوك رجع باوعلي ضحك كال :-شربت كهوه فضليت سهران
حره... روح نام هسه
هز راسه كال... يلا روحي
حره... ماشي يلا باي
دامشي
كال... حره
حره... هااا
مرتضى... اسف
حره... ع شنو
نزل راسه كال... ولا شي
رجعت يمه كتله... بيك شي؟
باوع بعيوني ونزل عيونه كال... لا اتصل موبايله جاوب... جايك
سد الموبايل كال... اشوف صديقي وارجع انام
حره... ماشي بيباي
ورجعت للبيت تلكتني سالي تخصرتلي كتلها... ها شكو
سالي... ياخاينه من البارحه تدرين بيه خاطبني وماحجيتي
حره... كللنا بوقت متاخر
سالي... عسى ما بـ 1 جان كلتيلي حتى اشغل ساجده واركص واهز
ضحكت... تقبلين بيه
سالي... عيب عليج تساليني هالسؤال
حره... يعني نردله جواب
سالي... لا
حره... شنو
سالي... افكر زين بالاول
حره... انتي مو ترديه
سالي... رغم هذا مااتسرع وهم خليه ينشلع كلبه يلا
ضحكت وطبيت
مشى هاليوم على نفس النمط
اسبوع مر ومرتضى لا اتصال ولا شفته وكأنه اختفى
اليوم من كثر ماضجت رحت اوديلهم الاكل اني وهم جان مموجود انقهرت كلش هذا وين يختفي؟
ورا هالاسبوع مقدام دز خبر لـ مصطفى بان احنا موافقين ويكدر يجي يطلبها
ثاني يوم الصبح رتيل انطت الكلاده لمقدام كلتله... وديها للجامع بطريقك
وصدك اخذها وراح للعصر اجت رغد كالت... فهمت ليش صارت الاعتقالات
كلنالها... ليش
رغد... اكو شبكه يبيعون مخدرات يردوهم وهواي من منطقتنا متورطين بس لسه ماثبت عليهم شي فطلعو
سالي... عزا
رغد... والممول هذا الجبير مالتهم
سالي... اي؟
رغد... هذا هو الي يردوه لانه داعشي وتورط باغتيال ضباط ومنتسبين عراقيين
كزبر جسمي كلت... الله يلعنه
رغد... ويكولون اكو ضابط دك صدره وكال اطلعه من جوا الكاع وماخله بيت مشبوه مادخله ويكولون عليه داهيه بلكي يلزمه
حره... هم داعشي وهم يشتغل بالمخدرات صخام بوجهك
رغد... بلكي يلزموه
حره... ان شاء الله
بليل اجى مصطفى ومرتضى وجان باين على مرتضى ان حالته مو تمام ومعصب وبلكوه يبتسم ويجامل
كعدنا كلنا وياهم كال
مصطفى... اني جاي اتفاهم وياكم بشكم شغله قبل لا اجيب مشيه
ماما كلتله... اي يوم نتفق بيناتنا هيج اضبط
مصطفى... ماشي راح اسال سالي كدامكم اذا عندها شروط حتى الكل شاهد
سالي... اي اول شي اكمل دراستي
مصطفى... ماشي
سالي... وابقى شوكت مااريد ازور خواتي
مصطفى... تمام
سالي... وحجاب ماالبس الا بقناعتي
هو رفع حواجبه كال... بس هذا ذنب عليه
سالي... ليش
مصطفى لاني راح اكون مسؤول عنج اطلعج مفرعه كدام العالم؟
مقدام... سالي مامقتنعه بالحجاب واذا لبسته فراح تلبسه علمودك مو علمود الله وهالشي غلط
وماكو فرق كانما ملابسته
خليها تقتنع يلا
هو ركز شويه كال... تمام وان شاء الله تقتنيعين وبعد
سالي... هاهيه هذول شروطي
مصطفى... موافق عليهن
حره... اني ممنتبهه عليه كل تركيزي يم مرتضى وهو ماحط عينه بعيني
سالي... وانت شنو شروطك
مصطفى... ابويه رجال مريض وباي وقت يرجع ويعيش ويانا فيعني بيت وحدج مترهم تكوليلي
سالي... حقك اني هم مااقبل تعوف ابوك
باوع لمقدام كله... واريد نعقد بسكته حاليا لبين ميرجع ابوي يعني ببينا ومن يرجع نسوي حفل ضخم اتمنى هالشي منكم
مقدام... اكيد مراح نسوي حفل لان حياة... وباوعلي جر نفس كال... مصارلها هوايه من نقتلت
... كمت اجر نفس بصعوبه ودمعت عيني
مصطفى... بس ضروري اعقد محكمه بهالاسبوع
ماما كلتله... ليش هالسرعه
مصطفى... علمود يضيفولي مخصصات الزواج
مقدام باوع لسالي كللها... شنو رايج
سالي... وراك
مقدام... ماشي
ابتسم براحه كله... واكو شي مهم اتمنى يبقى بيننا ك عائله
كلنا انتبهنالها ونستمع اله كال... من حقكم تعرفون اني جنت سني وصرت شيعي قبل ٦سنين فحبيت اغير اسمي لـ مصطفى لاني استشيعت
مقدام... ماكو فرق سني ولا شيعي اهم شي اخلاقك مشهودتلها
مصطفى... حبيبي والله بس اريدكم تعرفون اسمي بالجنسيه مو مصطفى
حره... هنا مرتضى باوعلي بتركيز وجر نفس
مصطفى... اسمي عثمان.... يتبع...
______________________
اليوم حره دزتلي نسخة حياة الله يرحمها
الفرق هو لون الشعر وبس
اما حره فلگيت شبيهتها
بس حره عيونها اوسع من هايه البنت
وان شاءالله البقيه بس الگالهم شبه انزلهم الكم ❤
الصبح ان شاءالله اقره كتاب حياة واريد الكه تعليقاتكم الحلوه عليه
+والاوجاع الي صارتلكم او الاحداث السيئه المريتو بيها
اعتبرو كتاب حياة هو مرايه گدامكم وداتفضفضون الي بداخلكم گدامها
قراءه ممتعه فراشاتي
تصبحون على ما تتمنون ❤
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!