رواية "هل كانَ حُلماً...؟
(العِراق_المُصغَر)
بقلمي... نورس _قاسم"
________________
(بـ ليلة الاغتيال الساعه 11ليلاً)
اوس :-گاعد بالگهوه بمنطقة الـ**** بـ بغداد وجدامي گاعدين جماعتي الخايسين نتناقش بأمور حرامية الشعب
وبأمور الشعب الي مبتسم للحراميه ومغلس عن وضعه
ابتسمت وانه ادحگ لصاحبي علي وهو يگول... الوضع ماراح يبقى هيج والشعب راح يثور صدگوني وهالثوره راح تبقى تنذكر كأكبر ثوره شبابيه
جاوبه صاحبه قائد... مااتوقع تصير ثوره ولو صارت حتكون ضعيفه لان الشعب يكون عنده اراء مختلفه
كمل علاء كلام قائد... صح بالاضافه ومثل مجاي تشوفون اغلب الشعب يتبع ناس معيينين وايضا كثير منهم هم بجهات معينه متفرقه سواء قانونيه او لا فهالشي صعب
حچيت انه :- وجهات نظر الكل صحيحه بس خلو ببالكم شي
الشعب العراقي يتحمل چثير بس بالنهايه ينفجر باكبر الثورات
ودحگنا شصار بالماضي من بعد صمت طويل الشعب لابد يثور على السلطه الحاكمه الظالمه
گال علي... بالضبط هيج اني افكر
هزيت راسي گتله... بس الثوره على الظالم مامنها فائده لو ماثار على نفسو كِل فرد عراقي اليوم عندو بذرة شر بداخلو لازم ينهيها گبل لاتكبر
لو كِل شخص مننا يثور على نفسو ويفكر اذا هو يتبع الناس الصح ولو الكل يفكر ان البشر ما معصوم من الخطأ
انبياء وغلطو فكيف بينا نحنا
اليوم جاي ادحگ الناس تقدس اشخاص معينين سواء قاده او معممين بغض النظر اذا هذول زينين او لا
بس لو الكل يفكر ان هذول مثلهم مثلنا ما مقدسين وممكن بيوم يغلطون وانتقادهم شي طبيعي تا يرجعون للطريق الصح بوكتها راح نكون بخير
جاوب قائد... شتنتقدهم يمعود غير جماعتهم يخلون طشارنا ماله والي
ابتسمت وگلت بأمل... لابد يجي يوم وكلشي يتغير
حجه علاء... الوضع هنا ماينحمل يعني خريج بكالوريوس ولا دائره تلفيني لا الله ولا انبيائه يقبلون بالدايصير وفوگاها يگولون احنا دوله مسلمه
جاوبه علي... لا بالله بريئ منهم الاسلام
رفعت استكان الجاي اخذت منه رشفه و رن موبايلي دحگت الرقم مكتوب
تاج راسي اخوي
علي كاعد يمي ركز نظرو ع الاسم كال... ها طلعت انت هم عندك تاج راس
ضحكت كتلو... لا يول بس وكلني باجه گبل جم يوم
اسبوع واغيرو لمعفطچي المنطقه
جاوبت على الاتصال گالي... وينك اوس!
گتلو... ببغداد
گال... ادري يول بيا منطقه
گتلو... بـ****اكو شي..؟
گال بارتباك... اي عثمان مجاي يرد على الاتصالات شگني
گتلو... ليش شبيه؟
گال... ماادري روح اتطمن انه جاي بالطريق بعدني بالكسره ببغداد بس السياره عطلت اخاف اتأخر
گتلو... صار خويا انه اروحلو
گال... ما وحدك تاخذ سلاحتك وجماعتك ولاتغفل عينك
گتلو بشك... صاير شي؟!
گال... روح هسه بعدين نحجي
سديت الموبايل وگمت گالو... ها وين
گتلهم... لصاحبي عثمان تجون وياي؟
گالو... اي جايين
مشينا نأشر تكسي او كيه سيارتي جانت بالتصليح وگفتلنا كيه صعدنا دفعت الكروه وگتلو... لمنطقة الـ****
گعدت وگعدو جماعتنا يتناقشون بمواضيع وشخصيات سياسيه
جانو كاعدين وراي
علاء جان مقهور مايگدر ينتقد بلا ما يسب رغم جان يحجي ومندمج گال عن شخصيه وهو معصب... غير جابو من زبالة الدول خرب بدينه
قائد گاله... انجب ولك مسلم
علاء... وانت جاي تشوف افعاله مال مسلم؟ ترا الالحاد واضح عليه والاسلام مو بس حجي؟
هينا شخطت السياره السايق كال... انزلو
گتلو... خير يابه عطلت السياره!
گال... لا والله اصحى من عقولكم انتو شلون تسبون ****ابن **** وتتهمو بالالحاد استغفر الله تاج راسكم هذا
نزل علاء نزلنا كِلنا علاء كالو... بالله لو ادري انت من جماعة تيجان الراس جان ما صعدت وياك لان ما اتشرف
ذاك جاوبه... اني الي ما اتشرف بيك ادبسزز تاج راسك اني وهو تروحلنا فدوا
گال علي... اكرمنا بسكوتك وانطينا كروتنا يلا احنا مانترك حق النا عند احد
ذاك طلع الكروه بنتر وانطاها الهم سديت الباب وطلع گبل التفتت لعلاء وكتله... جم مره كتلك اكو اماكن ثانيه نلغي بيها غير السياره
حجه علاء... وشنو واحد مايعبر عن رأيه غصبا عنه يتقبله
جريت نفس گتلو... ابد ما وكتها منين الگى سياره هسه؟
فتحت موبايلي اتصل على رشاش ماكو شبكه حسيت باحساس ما حلو
الوقت تأخر چثير
سيارات ماكو
شبكه ماكو
ضلينا نمشي والولد ماسكتو وانه بالي يم عثمان
لمحت تكسي ركضت لنص الشارع اشرتلو سحب بريگ گال... خويه مو هيج لو داعمك بلا؟
كتلو... كِلش مستعجل لازم اوصل لمنطقة الـ****
گال :- بس خويه وياي نسوان
وگفت بصف التكسي اكو حرمه جبيره كتلها :-خاله مستعجل اخوي واگع بشده ومحتاجني تسمحين اجي وياكم؟
گالت :-اي يمه تعال مابيها شي
باوعت للسايق گالتله... عادي يمه خلي يجي... ونزلت كعدت ورا يم الحريم
التفتت على الشباب گبل لا احجي گالو :- روح لاتشيل همنا واي شي يصيل خابرنا
هزيت راسي وصعدت گعدت جدام دحگت التليفون الساعه بـ 1 توترت جثير تأخرت ضليت ادحگ ع الطريق دحگت بيت عثمان گتلو... نزلني... وانطيتو فلوس
تشكرت منهم ونزلت..
ركضت يم الباب جانو الحمايه واگفين سلمت عليهم گالو :-الـ**** عثمان
مامتواجد حاليا
گتلهم :- وينو ومنو راح ويا
گالو... راح هو وزوجته ومارافقهم اي شخص من الحمايه
صحت بيه... شنو يعني ما مرافقيهم عجل نحن ليش حطيناكم؟
واحد منهم گال :-هو كاللنا ابقو احرسو البيت لان حماته هنا
الثاني كال :-اكدنا اله ضرورة ان نروح ويا بس رفض
صحت... خررررب.. ومشيت دحكت اكو اشاره ضليت اتصل لا عثمان ولا رشاش يجاوبون
رجعت كتلو... تصرفكم ما صح لو صار عليه شي راح توكع براسكم
اجه يمي واحد منهم گتلو... ماگلك وين راحو؟
گال... اي على هاذ الطريق.. واشرلي...
گال مانبعد
هزيت راسي ومشيت دادخل گتلو اريد دراجة عثمان
گال... المفاتيح مو يمنا
اتصلت على ام سالي جاوبت كتلها... انه بالباب اريد المفاتيح مال الدراجه
طلعت لابسه حجاب كالت... اكو شي ماما
كتلها... لا بس سيارتي عطلت
هزت راسها وكالت... حاادورها
... وراحت تدور
اسمع صوت بنيه تكوللها... هف شهالازعاج بنص الليل
جاوبتها ام سالي... اشش عيب ماما
جاوبتها البنيه... حتصير عندي هالات وتخرب بشرتي على كد ما تگعدوني بالليل رايحه انام...وسمعت خطواتها مشت
نزلت راسي عرفتها اخت سالي... مروه
طلعت ام سالي انطتني المفاتيح اخذت الدراجه وطلعت بسرعه مشيت بالطريق لفتره ما بعيده دخلت باحد الشوارع ودحكت سيارة عثمان اقتربت منها ونزلت جانو جدامي
حمدت الله هم بخير نزلت راسي ادز مسج لرشاش
بهالاثناء سمعت صوت اطلاق النار رفعت راسي دحكت عثمان وبيدو سالي المغطايه بدمها
سحبت سلاحي بسرعه وركضت باتجاه الدراجه الي مشت
بهالاثناء دحكت سياره مشيت وراها لما ركزت عرفتها سيارة رشاش شخطت نزل كسار وانه صعدت ويا رشاش والسياره تمشي
دحكت رشاش ايدو ترجف وطابگ حواجبو وتركيزو على الدراجه قبل لا احجي گال... الا انـ****اعراضهم
ومشى ورا الدراجه بسرعه كبيره
صارو يدخلو بين الافرع لحتى يضيعونا بس ماكدرو خصوصا بعد ما رشاش قطع عليهم الطريق شخطت الدراجه وانگلبت نزل واحد وصار يطفر على البيوت والثاني دايشرد نزل وراه رشاش
نزلت وراه سحب السلاح ورمي تلث رصاصات وحده منهن اصابت رجل الي انهزم والثاني شرد
رشاش ركض وراه لحد ما كضو من ياختو ونزل راسو ع الارض رفع اديه ورا ظهرو وكلبجو وشمرو يمي گال.... دير بالك تضيعو... وركض
جريتو من ياختو ضربتو بوكس وحطيتو بصندوگ السياره وغلقت عليه ماگدرت اعوفو تا ما ينهزم وبالي يم عثمان وزوجتو ضليت انتظر لحد ما رجع رشاش وهو يشهگ شفتو بيضه
گتلو... بشر كضيتو
هز راسه بـ لا گال... انهزم ابن المنـ***ج بس سهله اطلعو من جوا الگاع
وينو المگو**ـي الثاني
كتلو... بالجنطه
هز راسو وفتح باب السياره صعد صعدت يمو وحرك السياره طلع موبايلو واتصل على كسار فتح سبيكر حجه رشاش بارتباك... عثمان
جاوبه كسار... بخير بس زوجتو
بلعت ريگ کال... ماتعيش
رشاش ضرب الستيرن گال... بيها نفس؟
گله كسار... اي بس نزفت كثير
رجع شعرو ليورا وگلو... وصلتو للمستشفى
گله كسار... اي مستشفى الـ****
هز راسو وگالو.... جايكم
كسار گالو... كضيتهم؟
جاوبه... واحد بس الثاني نهزم
جاوبو كسار... انيـ*** عرضو تا يعترف وروح امي
سكت رشاش كسار كلو... دزلي موقعك
هز راسو وسد الخط دز الموقع ونحن بالطريق كسرت علينا سيارة سوده عرفتها سيارة السوات نزل رشاش فتحلهم الجنطه اخذو الكلب وراحو
ورشاش صعد بسرعه وصلنا المستشفى لكينا عثمان مشكل كانولا ضغطو مرتفع جثير وام سالي موجوده وتبجي وتدعي وتشهك
دحكنا كسار مشى رشاش باتجاهو گالو بقلق :-ماتت؟
هز راسو بـ لا... بس وضعها جثير خطر
____________________
(ثاني يوم الاغتيال... الانبار... صباحاً)
حره :- كاعده اتريگ اني وعمه عقيله وحمودي حفيدها گلبي ناغزني اليوم
اتصلت على رشاش..و سالي... و رتيل محد جاوب
گمت شلت الريوگ غسلت المواعين ورحت طلعت كتابي حتى ادرس
سمعت صوت الباب اندگ حطيت الشال على راسي وگمت اشوف منو فتحت الباب باوعت حازم لابس الزي العسكري وشكله باين عليه متوتر
گتله... خير حازم بيك شي؟
هز راسه بـ لا وگال... مي اريد مي
گتله... بعيوني تفضل
طب وسد الباب ورحت صبيتله مي بارد بالگلاص وانطيته اله شربه وگال... رشاش خابرني
گتله... من الصبح اتصل وهو ماكو
باوعلي وسكت گتله... حازم رشاش بيه شي؟
گال... لا بس شغل مكثف ااا هو خابرني كال جيبها لبغداد
گتله بشك... لييش؟
اكو شي!
گال... لا بس هو ببغداد... بلع ريگ گال... شغلو يعني فگال جيبها خاف يتأخر انتي يمو
ابتسمت هزيت راسي رغم ماارتاحيت وگلبي واجعني گتله... هسه نروح؟
گال... اي هسه
هزيت راسي گتله... بس ابدل
گال... براحتج
طبيت للغرفه اخذت جنطه مال ملابسنا ولبست الصايه والحجاب جريت الجنطه وطلعت سلمت على عمه عقيله وطلعت ويا حازم
طول الطريق لازمه السبحه بإيدي واسبح ادعي يمر هاليوم على خير
طبينا بغداد وصلنا لبيتنا وگف حازم التفتلي گال... رشاش هين
هزيت راسي گتله... يلا تفضل تغدا
كال... لا عندي شغل
كتله... لا يمعود ميصير وين تروح هسه
گال... على غير مره مااگدر والله
هزيت راسي اخذت الجنطه سديت باب السياره ورحت وفتحت باب البيت بابتسامه سديت الباب وصرت اباوع لزوايا البيت باشتياق
اختفت ابتسامتي من ماشفت احد بالبيت انفتحت باب الهول طلع رشاش جان مبهذل ولابس الزي الاسود ومبين عليه التعب
دمعت عيوني وركضت باتجاهه مشتاقتله حضنته وبسته برگبته گتله... وينك عني
هز راسه گال... انه يمج
گتله... اشتاقيتلك
جر نفس گال... ما بگدي
رجعت حضنته سمعت صوت اوس بالهول يحجي ويگول... هيدي يول مابيها شي تبقى يومين بالمستشفى وترجع توگف على رجلها مثل الحصان
طبيت للهول شفت مروه تبجي شهگت گتلها :-اسم الله شبيج مراوي
هي ركضت حضنتني وتبجي گتلها... شبيج فهميني.. لزمت ايدها مجروحه كتلها... مراوي شلون هيج انجرحتي
باوعتلي وگالت... سالي اختي
انقبض کلبي گتلها... شبيها
گالت... كُلها دم شعرها، ووجهها،
شهگت گالت... كتلوووها
شعوري بهاللحظه ماينوصف سبع سچاچين بالگلب اهون من فراگها
مابجيت ولا گدرت انطق اي كلمه بس گمت واحس الدنيا افترت بيا
لزمني رشاش من ايدي
گال وهو يمسح على خدي.... عايشه عايشه لاتخافين
مجاوبته بعدت ايده عني وطلعت ماادري شدا اسوي وشأريد احس ماواعيه لزمني رشاش من ايدي وصعدني للسياره صعدو اوس ومروه وراي
غمضت عيوني واتنفس بصعوبه وصلنا للمستشفى نزلو نزلت وراهم بصعوبه لزم ايدي رشاش ودخلنا المستشفى جان خاص امشي وادور بالوجوه وينها اختي الصغيره؟
دانمشي وگفنا شفت اهلي كلهم هنا هنا استوعبت ان هذا مو حلم شفت رتيل جانت كاعده وحالتها حاله بطنها جبيره وتبجي تفرفح واخوي مقدام گاعد بصفها وايده على راسه
التفتت لرغد تمشي على طول الممر وتبجي ويمها امها تواسي بيها وعثمان جان بحاله يرثى لها
حسيت بدوخه لزمت ايد رشاش باوعتله گتله بصوت مبحوح... م م ماتت؟
گال... لا اسم الله لسه عايشه
شهگت وگعدت بالگاع ابجي بحرگه حسيت بيه وهو يمسح على راسي وگال... لا تخافين الله راح يسندنا
حطيت ايدي على کلبي وگتله... مااگدر اتحمل بعد گلبي يوجعني.. وبجيت
سمعت صوت رتيل گالت... حره
رفعت راسي شفتها اجت باتجاهي وحضنتني وتبجي اثنينا نبجي من نفس الالم گومني رشاش وگعدني على الكرسي ويمي رتيل گتلهم... شديصير... بجيت گتلهم... شوصلنا لهيج حاله
گالت رغد وهي تبجي وتشهك... اخو الولد الي قتلته سالي رمى عليها تلث طلقات
جريت نفس گتلها... بس شلون
بجت كالت... صار وخلص... كعدت بالكاع يمي كالت... الطفل مات طلعو من بطنها كامل
بجيت كالت... راح دفنه عثمان... شهكت كالت... سالي ما لازم تموت بعد منو يكعد وياي ويسمعلي بعد ويامن احجي واتنمر على الناس
بجت كالت... منو الي غيرها
... امها تهدي بيها
شهكت باوعت لرتيل كتلها... اريد اشوفها وينها
كالت... بالعنايه
كتلها... اريد اشوفها راح اموت
كالت... مايقبلون
هزيت راسي بلا وباوعت لرشاش كتله.... كوللهم خلي اشوفها الله يخليك... لزمت ايده كتله... عفيه احجي وياهم سوي اي شي بس خليني اشوفها
كعد يمي كال... مايصير حبيبتي هالشي يضرها مايدخل اي شخص غير المنتسبين تا يعالجوها
بجيت كتله.... مشتاقتلها
حضني وكال... انتظري ان شاء الله تتحسن وتطلع من العنايه
هزيت راسي وبجيت كلت... يارب بس طلعني من هالشده يارب اني طمعانه بكرمك علينا يارب لاتعوفنا
ضلينا مده بين البجي والحسره رفعت راسي باوعت لرتيل كتلها... ماما وين؟
كالت... بالردهه تحت
كتلها...لييش بيها شيي؟؟
هزت راسها كالت بتعب... ارتفع ضغطها
مسحت دموعي وگمت لزمت ايد مروه من جهة اليمين ورشاش من جهة اليسار ومشينا واحد يسند الثاني وصلنا للردهه دخلت رشاش گال... شوي واجيج
هزيت راسي والتفتت على ماما جانو مشكليلها مغدي تقربت منها نايمه وتهذي بكلمات منها
سالي بنتي..
دم..
سوده بوجهي
تنطقهن بصعوبه ضليت يم راسها اباوعلها وابجي فزت شافتني يمها كعدت تبجي عيونها حمر حييل حضنتها وبجينا كالت :-راحت من ايدي راحت
كتلها واني اشهك... لا تحجين هيج بعدها عايشه
هزت راسها كالت... اني شفتها ورفعت ايديها الترجف الدم مغطيها تلث رصاصات ماتعيش ماتعيش... ولطمت على وجهها
بجيت وحضنتها گلتلها... ما يعوفنا الله
گالت... شلون نمت البراحه وبنتي داتموت شلوون اووف ياوجع گلبي
گتلها... لا تحجين هيجي انتي شمدريج هيجي راح يصير
هزت راسها بلا گالت... لا اني مهمله من يوم يومي مهمله اني الخليت بناتي يتسربتن بالشوارع كله مني... ودگت على گلبها
مسحت دموعي وهي تبجي وتحجي والندم كاتلها بس بعد شيفيد؟
ماسكتتها خليتها تحجي الي بگلبها شگد جانت ندمانه ومحترک گلبها... شهگتها لسه بإذني...
ضلت تبجي وتحجي لحد ما تعبت حضنتها ونزلت دمعتي گالت... وانتي
باوعت بعينها گالت... س سامحيني
هزيت راسي گتلها... واني مسامحتج
جرت نفس براحه وبست راسها وگفت مروه يمنا گالت وهي تبجي... شنو يعني سالي حتموت؟؟
هزيت راسي بلا ماما حطت ايدها على راسها وگالت.... اخخ ياراسي اخخ
گتلها.... اسم الله شبيج
گالت... دخيلك ياربي... وتبجي
مسحت دموعي اجت الممرضه ضربتها ابره وقاستلها الضغط شفتها فتحت عيونها بخوف گتلها... هااا
كالت... ضغطها كلش مرتفع لا تنضرب جلطه
كتلها واني احضن مروه... لا اسم الله
هزت راسها وكامت كالت... الله يشيفها
باوعت لامي نايمه رحت لسالي نفس الوضع مايخلوني اشوفها لليل رحت يم امي طلبت مني اجمع اخوتي واجيبهم هزيت راسي وخابرت مقدام گتله... ماما حيل مريضه تعالو شوفوها
گال... ماشي
گعدت يم راسها ابتسمتلها مجامله گتلها :-حيجون هسه
اباوعلها گوا تفتح عينها وشفتها بيضه التفتت شفت مقدام لازم ايد مروه ويمهم رتيل طبو للردهه وگفو جدامها گاللها مقدام.... شلون صرتي؟
گالتله... مو بخير
گالتلها رتيل... لا تسوين بنفسج هيج ماما الله مايعوفنا
جرت نفس گالت بصعوبه
بين بجي وحسره ووجع وندم كلهن شفتهن عليها بذاك اليوم كالت :- اني ومن زمان غلطت بحقكم،،
كلكم هملتكم وخليتكم للشارع..
باوعت لرتيل وكالتلها... حملتج مسؤولية اخوتج وانتي بعمر الورد ما شفتي شي من عمرج
باوعت لمقدام وكالت... وانت حرت بعيشتك وعيشت خواتك بدل ما تلعب طوبه ويا الجهال
باوعتلي گالت... وانتي اعتمدتي على الخبز والكبه انتي والمرحومه
وسالي بجت كالت... تحسرت بكل عرس تشوف بيه لبس البنات
نزلت دمعتها كالت... جان المفروض اني اتكفل بهذا كله
اني الاطبخ واشتغل والبسكم وانتو تدرسون وتكملون
باوعتلنا كلنا گالت... كل هذا ماجان راح يصير لو ما اني جنت غبيه لو جنت خوش ام جان لا تركت رتيل دراستها و لا انسجن مقدام ولااضطرت حره تخبز بحر الشمس ولا...
شهكت كملت... ولا جانت سالي هنا اليوم كله مني..
من بعد سنين الرصاصات الدخلن جسم بنتي صحن ضميري ووجعن گلبي
جرت نفس گالت... اريدكم تسامحوني على كلشي سامحوني
باوعتلها ونزلت دمعتي وهنا تأكدت
ان صوت الضمير جان اعلى من صوت الرصاص
حاوطناها كلنا وكلنالها مسامحيج تبقين امنا ونحبج والي صار الله كاتبه ولا اعتراض على حكم الله
مقدام كاللها... اصحي وارجعيلنا حتى نستند على بعض
غمضت عيونها وبلعت ريگ وگالت بصعوبه... الله المعافي
مرت هايه الليله واذن الفجر واحنا بالمستشفى صليت وكمت باوعت من الشباك طلعت شمس جديده بس كلشي اختلف بهاليوم..
كاعده على الكرسي اقرا قرأن بالموبايل رتيل ومروه يم ماما
اجت ممرضه كالت... وينه مقدام شعلان ؟
التفت الها مقدام كال... اي اني
كالتله... انزل للردهه البيها والدتك
كمت كتلها... ليش شبيها
ما ردت ركضنا دخلنا للردهه ما جانت موجوده سألت الممرضات گالن... ضربتها جلطه واخذوها يستلاحگوها
حطيت ايدي على گلبي وركضت لمكانها شفت رتيل ومروه يبجن
رتيل كاعد ركضت عليها حضنتها وخايفه من الجاي
فتره وطلع الدكتور وگال... البقيه بحياتكم
توفت امي؟
صعقني هالخبر ضليت واكفه لااخذ ولا انطي واني اسمع اصوات البجي ارتفعت واني افكر بداخلي
كلش بعد وكت،،
جان المفروض نسند بعض ونطلع من هالمحنه سويه ونرجع لبيتنا فرحانين بنفس اللمه،،
ماينقص منها احد..
حطيت ايدي على گلبي وغمضت عيوني
صح ماما ماجانت تهتم بينا
وصح جانت على طول بعيده عنا
حتى واحنا بنفس البيت بس وجودها جان يحسسنا بالامان،،
جنا على الاقل محتمين بيها من كلمة يتامى
بس بالنهايه الموت حق علينا والانسان مايبقاله غير الذكرى
رغم اهمالها بس جانت احسن من ابوي على الاقل بقت ويانا وماتركتنا حتى لو بس بالاسم..
بهاليوم تيتمنا وبعد مانسمع صوت امي ماتت بحسرتها
مرت تلث ايام العزا ببيتنا طول هالوقت ونحن بين المستشفى والعزا خايفين..
خايفين تطلع جنازه ثانيه من بيتنا
الشي الوحيد الجان مصبرنا هو سندنا لبعض والامل بالله انو راح يستجاب لدعائنا..
سالي بقت بالعنايه متأملين بولو استجابه بسيطه منها لحتى ترجع للحياة..
كاعده عـ الكرسي مقابيل رغد الي حاطه الشال على راسها وايدها على خدها التفتت اي احنا بالمستشفى مثل العاده ننتظر ولو خبر بسيط عنها
ننتظر خبر يطمنا ويمحي خوفنا
جريت نفس بثگل حسيت نفسي اختنگت حيل
گمت من مكاني رفعت رغد عيونها عليه ورجعت تباوع للفراغ بحزن
نزلت دمعتي تذكرت حياة هيج جانت تسندني وكت الشده
مسحت دمعتي ومشيت للحمامات فتحت المي وغسلت وجهي التفتت اكو بنيه داتغسل وجه ابنها الصغير نشفته باوعلي ابتسمتله بادلني بالابتسامه
جرته امه وطلع من الحمامات
شفت المكان فرغ ماتحملت انفجرت بالبجي،،،
سمسم وحياة وامي
منو التالي؟
ولشوكت راح نعيش هالاختبار؟
تجي ايام على الانسان يحس وكأنه شايل ١٠٠ سنه على ظهره
اني مثل الي يحس نفسه عجز وهو بالعشرين،،
اني الي عديت النهر عطشانه وماگدرت الوح الماي،،
سمعت موبايلي يرن غسلت وجهي ونشفته بالشال رفعت التليفون شفته رشاش فتحت خط گتله... الو
گال... جاي تبجين؟
هزيت راسي بأي وگتله... تعبانه كلش
گال... بيا ولا بيج
گتله... عفيه شوكت تجي محتاجتك كلش
گال... اكمل شغلي واجيج ان شاء الله العصر انه يمج
هزيت راسي كتله... لا تتأخر عني
گال... لا تبقين وحدج روحي يم رغد واختج
گتله... رتيل راحت للبيت تسبح وترجع ومقدام طلع ما ادري وينه
دااحس مخنوگه
گال... ابقي يم رغد اوس راح يجيكم
هزيت راسي وسديته وطلعت رجعت يم رغد شويه و اجه يمنا اوس جاب غدا تغدينا وراها اجت رتيل كالت لرغد... روحي للبيت ارتاحي
رغد مقبلت رجعت رتيل كالت... انتي وتوته روحن اسبحن ونامن شويه وتعالن
رغد كالت... مااريد اروح اريد ابقى يمها
امها كالتلها... راح تتمرضين ولو صحت سالي وشافت حالتج راح تزعل باوعي عيونج شلون صايره
لزمت ايدها كتلها... تعالي وياي نرتاح شويه ونجي
هزت راسها بـ اي رتيل التفتتلي كالت... مقدام وينه؟
كتلها... ماادري طلع من الصبح
هزت راسها كالت... خلي اوس يوصلجن واني راح اخابر مقدام
لزمت ايد رغد وطلعنا وكدامنا اوس واحنا دانمشي طب شاب وهو يركض لاف الشماغ حوالين رگبته بلا ماينتبه انضرب برغد
رغد عاطت... ولكك عمى متشووف
اوس التفت يشوف شكو
الولد مادار وجهه عليها وكمل يركض لداخل المستشفى
كتلها... ممنتبهلج
رغد... ايي اعمى مينتبه كسرلي كتفي الغبي
كتلها واحنا نمشي... يمكن هو مثلنا وواحد من احبابه بهالمستشفى
رغد... بس مو اسوء من حالتنا احنا ماضربنا الناس لان متأذين خلي كل واحد يحير شلون يلملم باوجاعه بعيد عن غيره... تحجي بحرگه وعصبيه
عرفت من قهرها هيج تحجي
صار ضغط جبير عليها وتلفت اعصابها
لو نكوللها بز تبجي
التفتت لاوس واكف يستمع بدون ردة فعل جر نفس وكال... يلا صعدو
رجعنا للبيت واوس راح سبحت وطلعت انشف شعري طبت وراي رغد تسبح مشطت ورحت اقرا قرأن شويه وسمعت صوت الباب يندك كمت بازار الصلاة كلت.. منو؟
مجاوب باوعت من الزرف شفته رشاش فتحتله الباب وتخصرت كال... دخيل الله شكو بويه
كتله... انوب من اكول منو كول اني
ضحك كال وهو يطب... ان شاء الله
كتله... هاي المره المليون الي تكول ان شاء الله وترجع تعيدها
جرني من خصري بعدته بسرعه كتله... يول رغد بالبيت
لعب بشعره وكال... مي بسرعه
كتله... بعيني
وطبيت للمطبخ هو وراي
صبيتله مي شرب
طبت رغد الشال على راسها سلمت عليه كالت... شوكت نروح للمستشفى
باوعت لرشاش كال... اوديكم هسه
هزيت راسي كال... ماشي
طبينا بدلنا واخذنا احتياجاتنا ورحنا للمستشفى دخلنا باوعت مقدام موجود رشاش سلم على الكل وكال... مقدام
باوعله مقدام واشرله بعيونه بتعب بمعنى... شكو؟
كله رشاش... حدر هين اريد احجي وياك
كام مقدام رشاش حاوط بأيده على رگبته وكتفه ومشو وهم يحجون
رحت كعدت يم رتيل كتلها... شلونج اليوم
هزت راسها كالت... احسن
كتلها... راح يخلص شهرج التاسع وانتي ما والده
رتيل... شسوي غير مداتصير عندي طلوگه
گتلها... خلي اخذج لدكتوره تفحصج
هزت راسها بـ لا كالت... لتخافين مبيا شي... جرت نفس گالت... خلي تطيب سالي واني بخير
هزت راسها وكالت... عندي ثقه بالله اكيد راح يطيبها... باوعتلي وكالت... موو؟
هزيت راسي كتلها... ان شاء الله بحق هالشهر صفر شهر الامام الحسين عليه السلام
صار الليل ورشاش يمنا گتله... عفيه حاجيهم اريد اشوفها
هز راسه وگال... ماشي... وراح
ورا شويه اجه گال... يلا.. ومدلي ايده
لزمتها ومشينا قبل لا ادخل وكفوني وانطوني ملابس خاصه ومعقمه انتظرني رشاش برا ودخلت اني
المكان هدووء وبس اصوات الاجهزه تشتغل مشيت بحذر وهدوء وشفت سالي
لا اراديا نزلت دمعتي
اباوعلها بس تتنفس وعلى الاجهزه
بشرتها شاحبه
تقربت شوي منها وكتلها... تحملي لخاطرنا كلنا منتظريج لو ضعتي نضيـع وياچ مسحت دمعتي وگلت... حاربي حتى تعيشين علمودنا انتي قويه راح تتحملين
انتبهت حاطين لرگبتها مثل الكانولا بس شكلها بيه شويه اختلاف خفت من المنظر وانقهرت
شويه واجت البنيه كالت... ميصير تطولين
هزيت راسي وودعت سالي وطلعت..
اول ماطلعت شفت كدامي رشاش منتظرني لزمت ايده وصرت ابجي حط ايده على ظهري وصار يحجي يحاول انه يواسيني
مشينا وكلتله... حاطيلها مثل الكانوله بس جبيره شو وبركبتها خطيه اكيد داتاذيها ليش ما حطولهيا بأيدها مو اهون... احجي وابجي
گال... قسطره
كتله... شنو هاي
گال... الكانولا لازم تتغير كل يومين وماتنفع لمرضى العنايه الي يبقون لفتره طويله لان هيج تتزرف ايديهم فيخلون الهم قسطره وريديه ينطوهم العلاجات منها
كتله بقهر... سوده عليه وهاي اكيد اصعب
گال... الي اعرفه يسويها جراح او تقني شاطر كِلش مو اي شخص
... لزم ايدي ومسح دمعتي گال... كافي دموع ما مليتي؟
كتله... رشاش مخنوگه اختي جوا داتصارع الموت دموعي وحدها تنزل مو بأيدي
هز راسه كال... افهمج بس خلي املج بالله جبير اذا تيقنتي بيه ماراح يردج خايبه
رفعت راسي باوعت بعيونه گتله
:-ادعي الله بس خلي تطيب سالي مااريد بعد اي شي
كال :- لاتكولين هيج الله كريم ومايرد العبد خلي هالشي ببالج من تردين تطلبين شي منو كولي انه اعرف بكرم ربي لانو واسع العطاء واطلبي منو الي ترديه وتيقني انو راح يصير
ابتسمت كتله :- ياارب
مسح على خدي وكال... روحي يم اختج هسه انه عندي شغل اكملو وارجع
هزيت راسي كتله... ترجعلي بالسلامه
ابتسم وباس ايدي مشيت رحت لرتيل گعدت يمها
مرت ايام متشابهه بهالفتره صارت ثوره مليونيه سموها "ثورة اكتوبر او تشرين"
نترقب الاخبار كثير مأساويه
عن المتظاهرين وطبعا اوس واصدقائو من الاوائل الي طلعو بهالثوره
لثاني يوم گاعدين اني ورغد ومقدام
طب اوس ووياه صديقه اجو يشوفون عثمان الي محاوطه الحزن وحالته مو احسن من حالتنا
گعدو يمنا رغد گالت لمقدام... اول ماتصحى سالي وتطلع من شدتها الى انزل اتظاهر
مقدام شجعها ضلت تسولف وياه وهو يشجع بيها
صديق اوس باوع الاوس وگال بهمس... منو هاي؟
جاوبه اوس... هاي مرت اخوي رادتها تصير حرمتي
الولد كله... بالخير والبركه
جاوبه اوس... ياخير يمعود هاي لو اگِلها رجعي ليورا تكضني وبالقندرا اعلى راسي
خويه اخاف منها اكثر من القناص وحگ علي
جاوبه الولد وهو يضحك... انجب انت مو سني ايها الكافر علي مالتنا... حجاها بمعنى الفكاهه
جاوبه اوس... خنطلع الا اشمرك جدام الشغب ايها الرافضي
... وضحكو وطكو ايد بايد
ابتسمت لكلامهم بعدها بكم يوم المدارس كلها اضربت عن الدوام
والمظاهرات ماخلت من الزي الابيض.. الحملات الطلابيه،،
الي عجبني بهالثوره وفاجئني هو ثقافة الشعب وافكار وابداعات الجيل
الرسومات كانت على كل الحيطات رسومات معبره ورائعه والكتابات ومنها "نريد وطن"
حملات التنظيف والتشجير
هذول جانو اكبر اثبات ان شعبنا مايريد شي غير يعيش بحريه
شعبنا يحب الحياة،،
بيوم مثل باقي الايام نزلنا اني ورتيل من سيارة اوس الجان موصلنا و طبينا للمستشفى بعد ما سبحنا بالبيت وغيرنا ملابسنا
اباوع لاختي رتيل تمشي بصعوبه ورجليها مورمات كلش حملها حيل متعسر
اول ما دخلنا تلكتنا رغد وهي تبجي انقبض كلبي ورتيل حطت ايدها على بطنها من الخوف كتلها... شكووو
ضحكت وهي تبجي كالت وهي ترجف :-الدكتور كال اكو استجابه من سالي للعلاج يعني اكو امل تصحى... تبجي وتحجي
حطيت ايدي على كلبي وكلت :-يارب الحمد والشكر الك
هنا ماحسيت غير على رتيل وهي كاعده بالگاع ايدها على بطنها وتبجي وتضحك وتشكر بالله نزلت دااسندها كامت تتنفس سريع كالت... حره بطني يمااا راح اولد
ركضت رغد تنادي للمرضات وهن ماقصرو اجو ركض فحصتها الدكتوره كالت... عندها ولاده
دقايق ودخلوها للعمليات خابر زوجها كالتله رغد... زوجتك داتولد جيب ملابس للبيبي وتعال... وسدت الخط
ورا فتره طلعوها من العمليات وكالت الممرضه... ولدت بنت
ابتسمت وانطيتها اكراميه نقلوها للردهه ضلت تحت تأثير البنج فتره ولما صحت كالت... شفت امي واكفه يم راسي
ابتسمت وحطيت ايدي على ايدها وكلتلها... ولدتي بنوته
ابتسمت اجو مقدام وزوجها وعثمان
الي طول هالمده هو يم سالي مافارقها لحضه
يطلع يكمل شغله ويرجع للمستشفى
جابو الطفل وكفو حتى يسموها وكفت يم زوجها حيدر كتله... شحتسموها؟
باوع لامه وبعدها باوع لرتيل وابتسم گال... انتي شتردين تسميها
ابتسمت گتله... يعني عادي اسميها؟
كال... متفقين على اسمها من زمان ولان اعرف شنو هو الاسم هاج... وانطانياها بحضني كال... شحتسميها؟
ابتسمت وباوعت للطفله نزلت دمعتي كلت وعيوني تلمع ..."حياة
نزلت دمعتي وگلت بهمس... بس ان شاءالله حظج احلى من حظ حياة توأم روحي
ضليت بين رتيل وسالي لثاني يوم طلعت رتيل من المستشفى ورجعت للبيت واخذت حياة الزغيره وياها
ماگدرت اروح واعوف سالي ضليت يمها غسلت اديه ووجهي وطلعت امشي وصلت يم رغد اباوعلها ملامحهه متوتره ومشدوده
حجيت بخوف... شبيج رغد؟
رفعت عيونها الي وگفت باوعتلي بقلق ورجعت بلعت ريگ وگالت بفزع... حره اعتقلو مقدام!
فتحت عيوني مصدومه بلعت ريگ وگلت بخوف...شنووو
رغد...يگولون طاعن الغدر اختج اخذ بالثار قتل الي قتل سالي..! ... يتبع ...
________________
شلونكم كرزاياتي
طبعا كلش اسفه ؏ التأخير وخجلانه منكم هوايه
ان شاءالله باجر الاحداث البقيه كلها اكتبها ببارت واحد حتى لو يصير طويل كلش
اعتبرو كـ تعويض لان انشلع گلبكم باخر بارتات ويايه
شكرا لدعائكم للابطال ولحمايه
والي يسألوني عن حمايه شلون صار طبعا هو استفاق من الغيبوبه بس حالته ممستقره. عنده ارتجاج بالدماغ
من گعد لهسه ممستقر ساعات يضل يضحك وحده بلا ميدري ليش وساعات ينتبه ومبيه اي شي
الدكتور يگول لان عنده ارتجاج يتأخر يلا يستقر
الحمدلله ؏ كل حال اهم شي استفاق ورجع بخير وسلامه
اما اوس فالبارحه رجع الحمدلله هم بخير
يلا كرزاياتي لتنسون التصويت
ورئيكم للبارت
وتوقعاتكم للبارت الاخير
تصبحون ؏ الف خير 🍒🫂
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!