رواية "هل كانَ حُلماً...؟
(العِراق_المُصغَر)
بقلمي... نورس _قاسم"
________________
اوس :- جاي اسوق وطريقي للمستشفى يمي جماعتي وملامحهم حزن وقهر
هالشي طبيعي لان نحن راجعين من جنازة صاحبنا علي
الي صابه رصاص القناص وتغطى بدمو "بكِل عزه وفخر شيعناه
صفيت السياره وطبيت للمستشفى دخلت للردهه دحگت علاء الجان يبجي مثل الجهال ما هين الي صار اخو مات بين ايدو
كعدت يمو اواسي
بس يا كلمات الي تخفف هيجي الم
يبقى الاخ سند لو ضاع نبقى نحس بالنقص
وانه گاعد ادحگ ملابس الشباب الكِل شايل اثر دم وتعب وحزن،،
رن موبايلي طلعت دحگتو رشاش جاوبتو
گال... وينك يول قلقتني من البارحه نتصل وانت ماكو ماتگول اكو وراي گو**يد يخافون اعليه
سكتت گال... متحجي يول
جاوبته بهدوء... علينا استشهد
جر نفس گال... الى رحمة الله كِلنا على هاذ الطريق
هزيت راسي گتلو بحزن... بدون شك
گال... يول لا تگلبها حزن اعلى نفسك كتالو راح ينكتل اذا مو اليوم باجر بالنهايه ربك بالمرصاد
گتلو وانه واثق من هالكلام... العقاب گريب منهم ان شاء الله
گال... ابوي وحازم كِلش خايفين اعليك ارجع للبيت ياخوي
گتلو... مستحيل
انه راجع وكِلي اثر دم من صاحبي اشلون تريدني ارجع ولا كأن فقدنا روحنا الحلوه ما ارجع الوطن محتاجني
گال... ونحن هم محتاجيك
جريت نفس گتلو... الوطن اولى
جر نفس گال... سبع،، الوطن يقوى بينا نحن الي نعمرو..
ارجعلنا بخير،،
هزيت راسي وسديت الموبايل
رحنا للجنازه نقوم بالواجب طلعنا سمعت قائد گال... سمعت الصار بالناصريه
دحكت گتلو... شصار؟
جر نفس گال... خلصت توابيتهم
هزيت راسي بقهر وصعدت السياره اروح ادحگ عثمان خاف محتاج شي
مريت للمستشفى البيها سالي طبيت دحكت عثمان ماكو
خابرتو جاوب كتلو... وينك؟
گال... ملتحق
گتلو... وانه جيت ادحگ خاف محتاج شي
گال... انجبرت التحق القوانين وانت تعرفها
هزيت راسي گال... اوس اريد اطلب منك تبقى ويا مقدام لبين ماارجع
گتلو... صار بس ليش!
گال... جاي يحاول يوصل للي غدر حرمتي الغضب عاميه ماريدو يتصرف بدون علمنا لا يكتلوه
گتلو ... الافضل يتحاسب قانونيا
گال... انه الاريد اكتلو بس هيج يلا يبرد دمي
هزيت راسي گتلو... لا تحجي هيجي اترك القانون هو الي يحاسبو لو كتلتو يسووا اعليك شريف وتتورط
گال... محد يگدر يورطني انت بس انتبهلي لمقدام لاينغدر
هزيت راسي كتلو... ماشي.. وغلقت الموبايل بقيت ايام بين شغلي ومقدام وساحة التحرير
بيوم رجعت من شغلي گبل للمستشفى دحكت مقدام جاي يطلع من المستشفى وهو مستعجل ركضت وراه لزمتو من ايدو گتلو... وين؟
گال... هيج مستعجل... وصعد
ركضت صعدت بسيارتي ومشيت وراه ضليت وراه لحد ما وگف بمنطقه بالاطراف نزل وبيدو السلاح يركض ويخابر بموبايلو
لما دحگت السلاح فهمت اكو شي غلط جاي يصير
فتحت الجكمجه اخذت المسدس ونزلت من السياره وركضت وراه دنيا الظهر
بقى يدخل بين الافرع وانه وراه وگف جدام باب بيت صحت... مقدام
التفت گال والغضب عامي عيونو... اوس ارجع
جاي يمشي كضيتو من ايدو وگلت... وين رايح يول شجاي تسوي
گال... عندي حساب هنا لازم اصفي
دحگت لسلاحو گتلو... انطيني السلاح.. مديت ايدي اخذو
دفعها گال... اوس داگلك ارجع... ودگ الباب حيل
لزمتو من ياختو گتلو :-يول شجاي تسوي لاتورط روحك
فتح الباب زلمه دحگت ملامحو تذكرتو
هاذ رسول اخو الي قتلتو سالي
وهو نفسو المتورط بحادث اغتيالها
لما كضينا صاحبو وبعد ايام من التحقيق گال ان رسول هو صاحب الفكره باغتيال سالي،،
وذكر انو رسول جان ماينام لان سالي الي قتلت اخو عايشه وگال بيني وبينها ثار لازم انهي وضل وراها لحد يوم الي نفذ بيه الاغتيال..
رسول مطلوب واسمو بكل السيطرات والمطارات تا مايسافر بس السؤال اشلون عرف مقدام مكانو؟
فزيت من شرودي على مقدام وهو يكض رسول من ياختو ودفعو للبيت
كض سلاحو وبدا يطكو اعلى راسو حاولت ابعدو تا مايتورط ويسووه اعلينا شريف لان انه ادري هاذ منتمي لحزب الـ**** يعني عندو واسطات ونفوذ ممكن يگلبون القضيه
اخذت موبايلي ودزيت مسج لرشاش گتلو... نحن بـ منطقة الـ**** ومقدام كض رسول و راح يكتلو دز قوه لهين بسرعه... ودزيتلو الموقع
دحگت رسول وهو يضرب مقدام كضيتو من ياختو وگتلو... يول فوگ شينك ابتعد... ودفعتو وگع على الارض
العالم التمو ويسألون شكو گام وبيدو سچينه وركض على مقدام وصاح... ابن الگو*د انهيك مثل ما نهيت اختك
لزمتو من ايدو احاول ادفعو لبين ما تجي الشرطه ضربني بوكس رجعت ضربتو كض السجينه وحاول يدخلها برگبتي والعالم تصيح بس محد تدخل
بهاللحضه سمعت صوت الرصاص وتكسر الجام الي ورانا
فزيت ودفعتو حيل التفتت مقدام لازم السلاح گتلو... مقداااام
كبل لا اكمل وبهاللحضه اطلق مقدام الرصاصه التفتت على رسول غرگان بدمو
__________________
حره :- رغد تحجي وترجف لزمت ايدها كتلها... لا رغد الله يخليج كولي غيرها شنو سجن شنو قتل
حطيت ايدي على راسي وكلت... دخيلك ياربي دخيلك مابينا نتحمل اكثر
كالت رغد بصوت... والله متأكده من الداكوله الج
كتلها... صوتج صوتج... واباوع ليورا نزلت دمعتي كتلها... يمكن سامعه غلط منو هيج كلج
رغد... سمعت عثمان يحجي ويا اوس على التليفون
كتلها... اشش لتكولين شي كدام احد وبالذات رتيل
ضليت متوتره وخايفه ادعي الله يطلع هالكلام مو صحيح
شويه ورجعت رحت لبيت رتيل لان كل شويه تتصل بيه تريدني ارجع ارتاح ورغد ضلت بالمستشفى يم سالي
ضليت گاعده على نار وممرتاحه اتصل ومحد يجاوب متت خوف وقلق يربي ماناقصنا قهر والله
گمت طلعت للحديقه تفاجئت من شفت رغد واگفه وتطگطگ بإديها
رحت يمها گالت... اتصلي على زوجج شوفيه اذا مقدام بخير واذا صح السمعناه
هزيت راسي وركضت بتوتر طبيت للهول جانت گاعده عمة رتيل گالت... شبيج ماما
هزيت راسي... ماكو شي خاله
اخذت الموبايل وطلعت لبرا رغد واكفه وايدها على راسها اتصلت على رشاش ماكو رد رجعت اتصلت على مقدام هم ماكو بجيت رجعت اتصل على اوس تلث مرات يلا جاوب كتله... اوس وينك وكف كلبي صدگ اعتقلو اخوي
جر نفس گال... للاسف صح
بجيت كتله... ليش
كال... لانه رمى رسول الغدر اختج
كتله... ماات؟
كال... لا لسه بالمستشفى
كتله... اوس شلوون هسه يطلع اخوي منهاا طمني الله يخليك
جر نفس گال... انه هسه بالمركز مااگدر احجي... وسد الخط
بجيت تقربت يمي رغد كالت... هاا
كتلها... الولد عايش ما ميت
كالت... خلي يموت موتت الجلب
بجيت اكثر كتلها... خاف يتورط اخوي
على صوتي طلعت عمة رتيل شافتني ابجي عدلت شيلتها وتقربت مني باوعتلها گالت :-ليش تبجين يمه... وحطت ايدها على كتفي
باوعت لرغد كالتلها... ليش اجيتي يمه لعد منو بقى يم سالي
جاوبتها رغد بحزن... خالاتها هناك
نزلت راسي كالت.. شبيج ماما والله وكفتي كلبي
كتلها... خاله المصايب ما داتعوفنا تعبت... وكعدت بالكاع
كعدت يمي كالت... كولي ياالله بنتي شهالحجي
كتلها... اني بعد مالي طاقه اتحمل خبر سيئ جديد كافي تحملت فوگ طاقتي كافي
اريد مااحس
اريد ماافكر
تعبت... وكمت ابجي بقهر
كعدت يمي رغد تبجي سألتها عمة رتيل... شنو الصار؟
جاوبتها رغد... مقدام انسجن
گالت... نصي صوتج يمه لاتسمع رتيل خطيه توها جايبه ماتگدر تتحرك لاتعذبيها يمه
هزيت راسي گتلها... شسوي خاله
مسحت بايدها على راسها گالت... انتظري يجون الولد وافهمي منهم
گتلها... محد ديجاوب حاتخبل
كالت... خابري رجلج شوفيه
هزيت براسي بجت الطفله كامتلها ام حيدر رجعت اتصل ماكو جواب حطيت ايدي على گلبي وگمت بصعوبه طلعت مروه توها گاعدها من النوم شافتني شهكت واجت وكفت كدامي بجت كالت بفزع... ماتت؟
جاوبتها رغد بسرعه... اسم الله شهالحجي
حطيت ايدي على راسها وهزيت راسي بلا بجت وحضنتني كالت... لعد ليش هيجي تبجين
كتلها... تذكرت الامور الما حلوه الصارت
باوعتلي وكالت... انسيها ماتكدرين؟
هزيت راسي بـ اي وحضنتها باوعتلي رغد كالت... راح ارجع يم سالي اي شي يصير خابريني
هزيت راسي بـ اي عدلت حجابها وطلعت
حسيت نفسي مختنكه صفيت وحدي لا اكدر اكول لرتيل توها جايبه واخاف تتأذى
ولا ادري وين اروح واعرف اخبار اخوي
رفعت راسي للسما وگلت... ربي نحن بامانتك انصفنا،، تعبنا حييل
ابتعدت عني مروه كالت... اريد ملابسي وشغلاتي الخاصه من بيتنا شلون
هزيت راسي كتلها... حااروح اجيبهن
مروه... ماشي اني حاروح العب ويا حياة
هزيت راسي كمت بتعب لبست الحجاب والحذاء اخذت الجنطه وكلت لحماة رتيل... رايحه لبيتنا اجيب غراض
كالت... براحتج
طلعت من بيت رتيل صرت اتمشى بتعب بيدي الموبايل منتظره مكالمه من اي شخص يطمني
طول الطريق اتصل وماكو جواب طبيت للبيت ودخلت للغرفه جانت ظلمه ومابيا افتح الضوا تركته وفتحت الكنتور طلعت ملابس مروه حطيتهن بالجنطه واني دااجمعهن بالي يم الموبايل
شفت ماكو احد دازلي شي شمرته ع الحايط سمعت صوت التكسر مالته حطيت ايدي على رگبتي حسيت نفسي اختنكت نار بحنجرتي مااعرف شلون اتخلص منها
صرت اتنفس بقوا وكعدت اسندت ايدي بالكاع
بجيت بصوت عالي صرت ابجي واشهك احساس بين الخوف والضياع والالم والحيره
كمت ابجي وادعي... يارب لا تختبرني باخوتي مالي غيرهم
سالي شنو ذنبها؟
رادت تعيش ويا زوجها بسلام؟
بشنو غلطت تا تدخل بغيبوبه
كل يوم نخاف من نحجي ويا الدكتور خاف يگول ماتت
زين مقدام بشنو غلط؟
هو بس حاول يحمينا ويعيشنا مثل باقي البنات ليش هيج صار بيه؟
من حيره لحيره،،
زين والنهايه شنو؟
معقوله راح تستمر حياتنا بهالعذاب!
بجيت كتله... يارب دخيلك ارحمنا
بوسط شهگتي انفتح الضوا حسيت ايد على كتفي رفعت راسي شفت رشاش مسح دموعي بسرعه حضنته ادور ع الامان
حضني وصار يمسح على راسي وظهري گال
... لاتخافين انه وياچ
رفعت راسي واني اشهگ گال
... اسم الله
باس راسي گال... كلشي يهون وحگ عيونچ
گتله... خايفه رشاش اوس گال اخوي انسجن
هزيت راسي گتله... واني مااعرف شااسوي محتاره ومختنگه
گال... هيدي يبعد عيوني اسم الله عليچ من الحزن يولي من شنو خايفه ما انتِ تدرين انكم على حگ
گتله... خاف يدينوه
گال... مايگدرون يولي اكو شهود وهالكلب اصلا مطلوب
شهگت گال... اشش لاتخافين انه هين
حطيت راسي على صدره گتله... تعبت حيل رشاش احس بجبل فوگ صدري
رفع راسي بايده گتله... شوكت نرتاح؟
گال... كِل ما صعبت المحنه تكون الفرحه الجايه اكبر هيدي وثقي بالله
هزيت راسي كتله... ونعم بالله... لزمت ايده حطيتها على گلبي گتله... حتساعدو شگد ما تگدر مو؟
ابتسم هز راسه بـ اي گال... مااحتاج وصيه هزيت راسي وحضنته
ابتعد باس راسي وگام مدلي ايده وگال... يلا
تمسكت ايده وگمت اخذت الملابس حطيتهم على التخم بالهول وطبيت للمطبخ غسلت ورجعت اخذت الجنطه وحطيت ايدي بايده ورجعت لبيت رتيل بقيت شويه ورحت وياه للمستشفى
طلبت منه يخليني اروح اشوف اخوي
بس ما قبل كال... اصلا تحقيقات ماتگدرين حاليا
بقيت بين المستشفى وبين البيت تلث ايام مرت ورتيل متدري وكلما تسأل رتيل اكوللها... عنده شغل او صديقه بالمظاهرات ومتصاوب
اشكال الحجج طلعت الها بس صارت تشك
وعلى طول تگولي... گلبي ناغزني، اخوي بيه شي؟
واني گوا متماسكه تا ما ابجي
لثاني يوم اني ببيت رتيل
اندگت الباب گامت ام حيدر فتحتها
طبت كالت... اجو رشاش واوس
فتحتلهم الاستقبال وطبو كعدو وسلمو وضلت رتيل تسألهم عن سالي
واني گلبي نار اريد اسألهم عن مقدام بس مااگدر گدام رتيل
وشويه وترخصو گامو طلعو اني طلعت وراهم كتلهم... طمنوني على اخويه گلبي نار عليه يطلع لو حيبقى بالسجن لو شنو فهموني دخيلكم
اوس گال... يطلع بالله العظيم اشگ اخوي حازم اذا ما طلع... حجاها بابتسامه
رشاش گال... السالفه تطول بس وعيونج يطلع منها
اوس هز راسه وگال بهدوء... هو ما سوا شي،، نحن ويا
هزيت راسي وكتله... إي شي يصير ولو بسيط كولولي تمام؟
اختي كلش خايفه وحاسه ان مقدام بيه شي
نزلت دمعتي گتلهم... زين اني لشوكت ابقى اجذب تعبت حيل
رشاش حط ايده على كتفي گال... مابقى شي وينتهي هالتعب
اتصلو عليه فتح خط وطلع هو واوس سديت الباب والتفتت اشهگت وانصدمت من شفت كدامي رتيل
تقربت مني تمشي بثگل گالت... حره شبيه مقدام..!
سكتت لزمت ايديه گالت وهي تبجي... ولج احجي اخووي شبيه بشنو جنتي تجذبين احجي؟
بجيت بقهر هنا ضربت على خدودها كالت :-يممه سودا بوجهي يممه مقدامي ضاع من ايدي... وكعدت بالكاع لزمت ايديها وهي تلطم وتبجي وتحجي
دخيلك ربييي صبرلي خلص وبعد ماالي طاقه
ربي كافي تمتحني باخواني كافيي
تبجي وتلطم وتصيح... سوده عليه يمقدااام جبتها قهررر بقهررر
ولكم اخوووي ضاااع مني ضاااع
ضليت ابجي وياها اجت ام حيدر كعدت تهدي بيها وتسكتها بس ماكو اخر حيل وطاقه عندها خلصن حسيتها مو حمل شي بعد
لليل توسلنا بيها تتعشى بس ماقبلت لا تتعشى ولا تاكل شي
گمت اخذت الطفله وانطيتها ممه تا تسكت شربتها وشويه و نامت
نومتها بسريرها وطلعت
لكيتها كاعده برا جريت نفس ورحت كعدت يمها وضلينا اثنينا نبجي
وهي لاول مره حجت وبجت وشكتلي من الماضي
رتيل... شسولف وشاشتكي اسولف على مقدام من جان ينكل الطحين وهو صغير من جان يون من الم ظهره بس مايشتكي كدامي حتى مااضوج
لو اني من اول مره استخدمت الابره حتى اخيط القميص جنت صغيره حيل قميصي مشگوگ وامي ماخيطته الي جكيت اصبعي وقميصي صار كله نقاط دم
لو مره سويت اكل لابوي وجانت الطماطه محترگه شال الماعون وشمره عليه و تكسر بايديه
شاسولف عن ياقهر وضيم عشنا ولج حرره زين ومنا لسه عايشين
زين ولسه نشتم الهوى وماميتين
تعذبنا حيييل تعذبنا
وتالي العذاب ضل ملاحگنا حتى من كبرنا مارتاحينا
حره... تسولف وتبجي ويه كل كلمه تحجيها تشهگ شهگه احسها طالعه من نص گلبها بجيت على بجيها
يمكن هالتفاصيل صغيره بس هي مؤذيه حيل النا
الليل كله گاعده وعيوني عليها خفت
خاف هم تروح وتعوفني
اباوعلها گاعده وعيونها مورمه من البجي رغم شگد حاول زوجها يهديها وعمتها تصبرها بس هي منهاره حيل وكل الكلام مايشفي جروحها
لثاني يوم كاعده بالمستشفى مثل العاده وكوا مفتحه عيوني جنت
نعسانه بس مااكدر انام
جوعانه بس مااشتهي اكل
مخنوكه بس اني دااتنفس!
ولا جبت موبايل حتى اخابر رشاش اسأل عن اخوي
بقيت حاطه راسي على الحايط وافكر شسوا بينا الزمن
نفسي تلعب حيل ودوخه قويه
بقيت بين الوعي واللاوعي
حسيت على ايد تندسني حركت راسي بثگل شفتها بنيه لابسه اللابكوت گالت... حبيبتي بيج شي؟
حسيت لساني ثگيل مكدرت احجي هنا تقربت رغد كالت... حره شبيج ؟
مجاوبتها مگدر البنيه لزمت مرفق ايدي وسمعت النبض باوعتلي وكالت... انتي بخير؟
هزيت راسي بلا باوعت لرغد وكالتلها... ساعديني ناخذها للردهه خلي اقيسلها الضغط والسكر
سندني واني كوا امشي طبيت للردهه نمت ع السديه واجت قاستلي الضغط والسكر گالت.... ضغطج نازل درجتين بس سكرج طبيعي ارتاحي شويه
هزيت راسي خلت وراحت شويه واجت الدكتوره فحصتني كتبتلي ورقه كالت... سوي هاي التحاليل
استندت على رغد وكمت وياها للمختبر سويت التحاليل ورجعت حطولي مغذي ونمت
فزيت على صوت رشاش وهو يكوللها
... شبيها؟
شكالت الدكتوره؟
رغد كالتله... سوت الها تحاليل
كاللها... اي وشبيها؟
كالتله... ماجبت التحاليل لسه بس يمكن لان مااكلت
كال وهو يباوعلي... كافي حره ارحمي بحالج
نزلت دمعتي مسح على راسي كال... رايح اجيبهم
باوع لرغد كاللها... انتبهيلها
اشرتله على عيونها وراح
رجعت غفيت لما فزيت دنيا ليل حسيت نفسي احسن
باوعت رشاش كاعد يمي بتعب مركز بالفراغ تحركت شويه فز باوعلي وابتسم
دنگ باس راسي گال... شلون صرتي؟
لزمت ايده وهزيت راسي... بخير دام انت يمي اني بخير
ضحك ولمعت عيونه جر نفس كال... الله نور طريقنا بعد ما جان اظلم
ضحك وكال بابتسامه وعيونه تلمع
:-راح يجينا طفل حلو مثلج
كمت بحماس لزمت ايده بقوه ضحكت كتله :- صدك والله
حطيت ايدي على بطني كتله... قصدك اني حامل؟
هز راسه بلا كال... لا حبيبتي انه الحامل وحط ايده ع بطنه
ضحكت بصوت عالي وضربته كتله... لا تستهزء
ضحك وباوع بعيوني گال... احبج
ضحكت وحضنته حاوطني ايديه وهو يبوس راسي گال :-الله يديمج الي يا فرحة گلبي،،
باوعتله گال... احبچ
گتله... واني هم كلش احبك
ابتسم باس خشمي غمضت عيوني طبت الممرضه ابتعدنا بسرعه حطتلي ادويه بالمغذي وطلعت
بقيت لثاني يوم يلا تحسنت وبقيت نفس الروتين بين سالي ورتيل الي تدمرت على مقدام
والدراسه متوقفه لان اضراب وهالشي فادني نوعا ما لان وضعي مو مال دراسه ابد
گاعده وعيوني تتجول بين رتيل ورغد خوفي على سالي وحيرتي بتفسير حلم حياة اكلني
سالي مشت عالجسر وفزيت وكل المشو على هالجسر استشهدو
معقوله اختي هم راح تلحگهم؟!
هزيت راسي بقوه حتى افرغ الافكار السيئه الاقتحمتني وضلت تاكل براسي
جريت نفس بقهر.. يارب انت اعلم بحالنا يارب برد گلوبنا على اختنا واخونا دخيلك يارب
رفعت عيوني والتفتت صارو گدامي ابو رشاش وعمامه تفاجأت من شفتهم
وصلو ليمنا وسلمو علينا
ردينا السلام وگامت رتيل وخالاتي تلگنه بالسلام والهلا والمرحبا
ابو رشاش باوعلي متفاجئ وبعدين ابتسم
اعتقد عرف اني مموصله لرتيل شي من العركه الصارت
ولا من الكلام الگاله بحقي وحق اخواني
رغم ضايجه ومقهوره منه بس رحبت بيهم دامهم مقدريني وجايين مو حلو افشلهم واستقبلهم بوجه ثگيل
گال عمهم الجبير... نحن نعتذر على تأخيرنا بس بسبب الوضع والجاي يصير اتأخرنا... التفت لرتيل وكمل... شلون صارت الحرمه ماستجابت للعلاج؟
رتيل هزت راسها وگالت بحزن... لا والله لسه ماستجابت وبس النفس يصعد وينزل
تنهد وگال... لاتخافين بويا ان شاءالله تستجاب للعلاج وتصحى وترجعلكم احسن من قبل ومعافيه
گالتله رتيل... الله يسمع منك عمي.. تنهدت بحزن وكالت... ان شاءالله ماكو شي صعب على رب العالمين
عمي تقرب مني وگال... شلونج بويه
هزيت راسي وگتله... الحمدلله
گال... الحمدلله... بويه محتاجه شي تردين اجيبلج شي گولي لاتستحين انه مثلج ابوج
كتله بهدوء... رحمه الله والديك ماتقصر
هز راسه وگال...عجل اي شي تحتاجو انه موجود بس گولو
ابتسمت وهزيت راسي وكتله...ان شاءالله رحمه الله والديك
ابتسم و اندار يحجي ويه رتيل ضلو شويه وترخصو وراحو رجعت گعدت
للعصر گاعدين اني ورغوده
رتيل اتصلت بيه راحت تزور مقدام
ومراوي هي وحياة يم ام حيدر
كاعدات وحده بصف الثانيه
باوعتلي رغد زفرت نفس بقهر كتلها... شبيج
كالت... مقهوره و كاتلني الجوع اكو اسوء من هيج؟
كتلها... اسم الله عليج يولو هسه اكوم اجيبلج شي من الكافيتيريا
رغد... لا ماريد خفايف اريد مندي
فتحت عيوني بصدمه كتلها... يااا
رغد... وجعا شبيج انصدمتي اني كلما اتكأب اكل كومي انتي هم حامل كومي
وجرتني كتلها... وين اكو واحد يسوي مندي هنا
رغد... نشوف حوالين المستشفى بلكي نلكى اذا كلش نوصي
حره... خلي ادحك رجلي خاف مايقبل
رغد... ماعندي رصيد والله
جريت نفس ومشيت وياها اخر مره كسرت موبايلي والتهينا وحتى هو ماجابلي غيره دانطلع من المستشفى بهالاثناء اجه واحد يركض وضرب كتف رغوده
التفتت داترزله فتحت عيونها وكالت بغضب :-هاي المره الثانيه التضربني وتمشي يعيوني انتبه هاي عيونك استخدمها للنظر
التفت باوعلها كال وهو يجر نفس رجع خطوتين باتجاهنا وكال وهو يمسح وجهه بالشماغ :-اعتذر بس كِلش مستعجل
رغد:-ترا كلنا مستعجلين بس ماكسرنا اكتاف الناس مثلك ض
هو يباوع للكاع ويحجي... لا تبالغين عزيزتي كتلج مو عن قصد
داترد رغد لزمت ايدها باوعتلي خزرتها والولد ما رفع عيونه بعينا كتله... خلص اخي ما صار شي
كال... خيتي والله اخويه انصاب بالتحرير وجبنا هنا وضليت بينه وبين اصحابي اعتذر مره لخ
رغد عرفته من جماعة الثوره كام ترمش بعيونها كالت... ااااا لا احنا النعتذر لان ماقدرنا ظروفك الغلط منا عادي عادي تصير... وهزت راسها
فكيت حلكي بابتسامه وباوعتلها باوعتلي وكالتله... الله يحفظكم الله ينصركم
وهو يجاوبها... تسلمين الله يرزقج اضعاف هالدعوه... ومشى
باوعت لرغد عيونها عليه باوعتلي وكالت :-طلع رجال من اهل التحرير
ضحكت كتلها... غير جنتي راح تاكليه
جرتني من ايدي ومشت كالت :-اي ضجت بس خطيه الولد طلع مشدوه الله يعينهم الاخبار ماتسر
رحنا لمطعم قريب من المستشفى طلبت مندي وكعدت رغد تاكل واني اباوعلها كالت :-يختي مدي ايدج
كتلها... عوافي مااشتهي
رغد... ليش يخبل
هزيت راسي بلا وشربت العصير مالتي كملنا ورجعنا للمستشفى
لثاني يوم كاعده بالكافتيرا مال مستشفى وحاطه ايدي على خدي والدمعه بطارف عيني مختنكه من وضعنا مقدام باقي بالسجن ودائما تتأجل المرافعه مالته بسبب وضع العراق الحالي
وسالي نفس وضعها
ورتيل كوا توكف على رجليها وضغطها دايما معلگ
فزيت على صوت سحب الكرسي التفتت شفته رشاش ابتسمت بحزن گتله... انت اجيت
گال وهو گوا مفتح عيونه... لا بعدني برا
ابتسمت گتله... ابقى يمي لا تروح
هز راسه گال... وحگ عيونج لو بيدي مااعوفج لحظه بس مابيدي
هاذ جيش والو قوانينو منو انه تا اعارض
نزلت راسي كتله... تعبانه حيل
گال... ارجعج للبيت؟
هزيت راسي بـ لا گال... حره لا تأذين نفسج لا تنسين ببطنج طفل لا تتشائمين ثقي بـ الله
گتله بتعب... مامتشائمه والله
ادري الله راح يجبر خاطرنا بالاخير
الله مايعوف عبده مكسور
باوعت بعيونه گتله... الحياة هيجي علمتني
جر نفس گتله... لما حسيت نفسي انكسرت بمصيبة حياة الله دزك الي تا تسندني ومتأكده هالمره هم ماراح يعوفنا
ابتسم گال... احسچ كِلش متغيره
گتله... من اي ناحيه؟
گال... گبل ما جنتي هيج
جنتي تبجين هواي وتتشائمين
ابتسمت گتله واني اشبك اصابع ايدي بايده هزيت راسي كتله... فعلا اني تغيرت هواي
باوعت بعيونه وگلت... انت الغيرتني،، خليتني مااركز بالظلام بس
لا خليتني اركز على النور الموجود بالزوايا حتى لو ضعيف المهم موجود
اني تغيرت جنت حره الوحيده هسه صرت حرمة رشاش وجزء من روحه
ضحك وضغط على ايدي كال... ما جزء، انتِ كِل روحي
ابتسمت اله كتله...رشاش
گال... عيونو
حره... ممكن تاخذني لعند حياة
گال... ان شاء الله هاليومين اخذج
حره... عندك شغل اليوم؟
گال... لا
كتله... لعد اخذني هسه عفيه
گال... تعبان كِلش
گتله... نبات هناك عفيه الله يخليك
جر نفس گال... ماشي بس ارجع للبيت اخذلي غفوه لا اگلب السياره صار تلث ايام ماغافي
كتله... سوده عليه لهالدرجه تعبان
كال وهو يضحك... بالله لو بيدي افرش هين وانام
ابتسمت كتله... تمام اجي وياك للبيت انت نام و اني هم اريد اسبح واصلي
هز راسه كال... كومي
لزمت ايده وكمت شفت رغوده كتلها... حاروح ويا رجلي اي شي يصير خابريني
هزت راسها كالت... ان شاء الله
طلعنا من المستشفى ورحنا لبيت اهلي طبينا جان فارغ محد بيه جريت نفس بقهر طب رشاش للمطبخ شرب مي وبعدها للغرفه شمر الفراش والمخده ومدد تا ينام
ابتسمت رحت سبحت ولبست تراك مشطت وتعطرت وتوضيت ورحت لبست ازار الصلاه وكعدت ارتل القرأن صار المغرب وهو نايم ما كعدته كلت خطيه اذن صليت وكعدته تا يصلي
كام سبح ورجع صلى واني مددت بفراشو
هو سلم وباوعلي كال... ياحراميه هاذ مكاني
ضحكت كتله... عادي كِلشي الك هو الي
ضحك گال... يولي صايره تحجين مثلي كِلش متطوره
ضحكت كتله... شاسوي اخذت عليكم بعد
شال السجاده خلاها على الميز واجه مدد بصفي رفع راسي حطه على ايده وجرني عليه من خصري باسني من راسي گال :-أحبچ، يالتيهت روحي من لگيتچ
ابتسمت وحضنته بسته برگبته وگتله
:-اني هم احبك يالنسيت روحي القديمه وياك
رفعت عيوني التقت بعيونه گال... مشتاقلج يابعد روحي... ونزل باس حنچي
ابتسمت حضنته وبقينا سويه طول هالليله
لثاني يوم فزيت الصبح على صوت موبايل رشاش
گمت رشاش ما موجود اخذت الموبايل شفته رقم رتيل كاتب عليها "مقدام 2"
جاوبت گالت... وينج توته خوما بيج شي
گتلها... لا عمري بخير ليش
رتيل... مو مالكيتج مو من عادتج
كتلها... تعبت ورجعت
رتيل... ابقي ارتاحي اني اليوم يم سالي
كتلها... تمام اني داشوف رشاش بلكي ياخذني للنجف
رتيل... اذا رحتي شديلنا علگ بلكي تنحل مصايبنا
گتلها... ان شاء الله اي شي يصير خابريني
رتيل...ماشي ديري بالج على روحج
كتلها... تمام وانتي هم
سديت الخط وجريت ملابسي لبستهم وكمت ادور رشاش ما موجود اخذت ملابسي وطبيت اسبح طلعت انشف بشعري صار كدامي
فزيت كال... اسم الله
كتله... خوفتني يول وين جنت؟
كال... جبت گيمر يَـ گيمر
ابتسمت كتله... ناسي موبايلك
كال... لا انه تركتو گلت خاف تتصل اختج
كتله بابتسامه... وهي صدگ اتصلت،،، خلي اسوي جاي
هز راسه شلت شعري ورحت حضرت الريوك وكعدنا ناكل باوعت للساعه ب ١١ كتله :-تاخذني للنجف؟
كال... بس يجي كسار ينطيني شغله وبعدها نطلع
كتله... خاف يتأخر
كال... لا حدو للـ 2
هزيت راسي كتله... ماشي
گمت عزلت البيت ومددت لحد ما اندكت الباب كام طلع بقى تقريب النص ساعه برا رجع دخل وبيدو فايلات كتله واني اباوعلهن :-هاي شنو سوالف جيشيه؟
ضحك كال... إي لا تدوخين نفسج يلا جهزي نفسج
هزيت راسي وكمت بدلت ولفيت الحجاب حطيت واقي شمس ومرطب وطلعنا ايد بإيد صعدنا بالسياره وگبل للنجف نزلنا يم القبور
مشينا تا نوصل لقبر حياة صرت كلما اقترب يضيق نفسي لحد ما وصلت يمها
نزلت دمعه خاطفه من عيني لا اراديا مشيت يمها ومسحت بايدي على قبرها
وكلتلها :-ايامي البدونچ مَرت مُره
الفرحه دائما ناقصه
والحزن مخيم بعيوني
يعيوني انتي
شلونچ حياة..
گمت وگفت يم گبر سمرا گتلها...
من دخلتي لحياتنا تركتي بينا اثر جبير
لو لاج ما جانت حياة راح تقوى وتوگف بوجه ابوها
انتِ الشراره الي نورت طريق حياة
جريت نفس كلت... صح اني هنا زعلانه واحس بفراغ جبير بدونجن... نزلت دمعتي وكلت... بس يبقى الي سويتنه انتن هو الصح ،،،
وگفتجن ضد الباطل شجاعه جبيره وشي لازم افتخر بيه على طول
اشتاقيت لبرائتج سمسم
حطيت ايدي على قبر حياة وحسيت بإيد على كتفي رفعت راسي وابتسمت رشاش يمي گتلها... شوفي حياة هذا الخبل الجنا نخاف على مشاعره طلع اصحى منا ضحكت ودموعي تنزل كتلها... صار رجلي وسندي
لزم ايدي بقوه كتلها... كلشي تغير من بعدج
حره الضعيفه ذيج ماتت وياج
اني اليوم انسانه مؤمنه بقضاء الله وقدره
بطلت اخفي مشاعري وابجي وحدي لان لكيت الرجال اليفهمني ويحس بيا
اني اليوم عايشه حياة حلوه
ابتسمت كتلها... عائلتي متشتته حياة
ماما ماتت اكيد استقبلتيها انتي وسمسم
ادري بيج صاحبة واجب
ومقدام انسجن
ونورت بيتنا حياة الجديده
حطيت ايدي على بطني... ويمكن اولد سمسم
وسالي لسه معلگه ع الجسر
بجيت وكلت... الجسر الي شفتيه جان جسر لنهاية الحياة يا حياة
هزيت راسي بـ لا وگلت... هذا ما جان حلم
هاي جانت رؤيا
ويمكن تنبيه من ربنا
مدااتصور شلون حياتنا كلنا اتفسرت بحلم مدته ثواني
سمرا وانتي وسالي
الشي الوحيد الي اتمناه
تبقى سالي يمنا،،، بعد وكت كلش مو جاهزه حتى تموت
بجيت وكلت واني اباوع لقبورهن
... ادعولنا عفيه
حضني رشاش وكومني قريتلهن الفاتحه ودعاء اهل القبور ورحت يم ماما
سلمت عليها وكلتلها :- نحنَ مسامحيج على كلشي ونحبج هوايه ونتمنى انتي هم ترضين علينا وتدعيلنا نطلع من هالشده
لتخافين،، ماننساج
انت امنا الي نحبها... ودنگت ابوس القبر
كمت اخذت كليجه اشتريتها من الطريق وصرت اوزع ثواب بعدها حطيت ايدي بإيد رشاش ودانمشي وصلت للمكان الي ضعت بيه ابتسمت وباوعتله كتله... تتذكر من ضعت هينا... واشرتله ع المكان
گال... اخخ بويه شسويتي بيا بذاك اليوم؟
ابتسمت كتله... شسويت
گال... طلعتي طيـ**ي صفح
حطيت ايدي ع وجهي وكتله... يولو صوتك... وضحكت بهدوء
گال... اخخ بويه بذاك اليوم سمعت من سالي انج ما موجوده ولما دورت واحد من السياق گالي
كتله واحنا نمشي... شكالك؟
گال... صعدت ويايه بنيه حالتها جانت صعبه وماجانت شايله كروه ونزلتها بفلان مكان ولما وصفج عرفتج هاي انتي فرحت لكسار تا اطلع موقعج
كتله... واني خابرتك بيومها
گال... انه جنت بطريقي الج وكتها
ابتسمت باوعت بعيونه كتله... احبك وانت مرتضى وانت رشاش
ابتسم گال... وانه اعشگچ
مشينا للسياره وتوجهنا للامام جان دنيا المغرب توضينا وصلينا وبعدها دخلنا للامام هو ويا الرجال واني ويا النساء
حسيت براحه حلوه جان ازدحام كلش دخلت بينهن وبصعوبه حتى كدرت الزم الشباك
ولما لزمته صرت ابجي وادعي
:-يارب بجاه وليك علي انقذنا
يارب نحن باصعب ايامنا
يارب تعبنا،،
نجينا من هالمصايب،، ياالله
بقيت ادعي وابجي والنسوان يدفعن ما حسيت الا واندفعت بعيد حطيت ايدي على گلبي وحسيت براحه مسحت دموعي واخذت تربه ووكفت صليت بالصحن بعدها قريت دعاء كميل
كملت وطلعت برا شفت رشاش منتظرني ابتسمت لزمت ايده ودانمشي
بهالاثناء اتصل موبايله رفعه كال... اختج
انطانياه اخذته وسمعت صوت رغد تبجي وتحجي لما سمعت الخبر حسيت كلبي كام يدك سريع ونفسي اسرع باوعت لرشاش ودموعي تجري
باوعلي متفاجئ گال... شبيج حره
ضحكت واني ابجي وهلهلت واني بمكاني جرني بقوه رشاش كال... يولو صوتج
كمت اصفك واضحك كتله... رشاااش رشااش سالي سالي صحت
ابتسم كال... الحمد لله بس صوتج
اني اكمز واصفك ومو حاسه على نفسي سمعت وحده كالت... هاي شبيها البنيه شهالخفه
البنيه كالتلها... شبيج خيه قابل جاي تركص اكيد سمعت بشاره حلوه
مااهتميت جرني رشاش بهدوء كال... حبيبتي الله يديم هالفرحه بس هيدي ماهيج الزلم جاي تدحك اعليج
ابتسمت وعيوني تدمع كتله... احس كلبي حيطير من الفرح هالبشاره اني منتظرتها من زمان
اختي رجعت للحياة ابجي واضحك
ابتسم ولزم ايدي ومشى والنسوان اسمعهن يسألن شبيها التفتت كلتلهن... اختي اختي رجعتلي اختي الصغيره طلعت من حلگ الموت... احجي وابجي
والنسوان بيهن الي تبارك وبيهن الي تذم لان هلهلت
بس مااهتميت تمسكت بإيد رشاش وكتله :-وديني الها عفيه
هز راسه ومشينا للسياره بالطريق خابر عثمان باركله وعثمان الفرحه ما سايعته كوا يحجي حرف ويتنفس وكأنه يركض من سنين تا يكمل الطريق واليوم وصل اليوم يلا حس بالفرح
فتحت الجامه وطلعت راسي منها وابجي واكول... ياارب شكراا شكراا لان ماتركتنا،، رجعتلنا سالي
بقى بس مقدام يرجع ويرجع فرحتنا وياه
لزم ايدي رشاش التفتتله كال... يرجع وعيونج لاتخافين
حطيت ايده على گلبي كتله... طول ما انت يمي ما اخاف من اي شي احتمي بضلك
ابتسم وباس ايدي وصلنا للمستشفى ونزلت اركض لزمني رشاش من ايدي كال... انتبهي يول لاتسقطين
واني اكمز ما اكدر اثبت صعدنا بالمصعد ومشيت الممر طبيت شفت الكل مجتمعين رتيل ورغد وامها ومراوي وعثمان
واوس واكف برا
والدكتور يرفع برجلين سالي ويتفحصهم ويسألها تحسين وهي تأشر ماتحجي
طبيت واني ابجي واضحك باوعتلي ابتسمت بصعوبه ركضت عليها حضنتها وصرت ابجي الدكتور كال... لا لا لا تضغطون عليها ما يصير اهدو كلشي تمام
ابتعدت ومسحت دموعي مسحت على راسها كتله... لتخافين من شي سالي نحنا كلنا يمج صيري زينه تمام
غمضت عينها بتعب وابتسمت رجع فحصلها ايديها وطلع بعدها دز على عثمان والي فهمته كال... تحتاج علاج فيزيائي حتى ترجع تتحرك بشكل طبيعي وايضا علاجات تستمر عليها
بس هذا كله يهون المهم هي رجعتلنا المهم انتهى خوفنا من ان الموت يخطفها منا
مرت الايام ورشاش بيني وبين الشغل وحيل يخاف ويوصيني ع الطفل وسالي بقت فتره تتعالج بالمستشفى ونحن كل يوم يمها نتناوب منو يبات
ودائما تطلب تشوف حياة الصغيره ومراوي
وسبحان الله حياة الصغيره حيل تنحب دمها حلو مثل حياة بالضبط
كم يوم وطلعت سالي من المستشفى ورجعت لبيتنا والحمايه تشددت على بيتنا وخالاتي ورتيل وعمتها على طول يمنا خوب رغوده ما تركت سالي لحظه
"بقينا بس بحسرة مقدام ووجوده يمنا"
رشاش جابلي كتبي من الانبار وصرت احاول ادرس ع اليوتيوب ونظمت وقت احاول اقرا بيه
بيوم خالاتي وبناتهن يمنا دا امسح الكاونتر سمعت صوت الغساله رحت طفيتها وطلعت الملابس حتى اشرهن
اخذتهن وصعدت اشرهن نزلت اكمل المطبخ شويه واندكت باب المطبخ حطيت الشال وفتحت الباب شفته رشاش بإيده علاليك ابتسمت وحضنته
باسني من راسي وكال... هاج يولي الكيك والعصاير
اخذته وكتله... عاشت ايدك
باسني من ركبتي كال... مشتاقلج
كتله... واني هم
رجع باسني بخدي واتصلو عليه كال... خرب بالكو***يد هذول ناجـ***ـي باتصالاتهم
ضحكت ورحت احضر الكيك والعصاير وهو يخابر التفتت باوعلي كال... لازم اروح
هزيت راسي كتله... تعال بالليل مو ما تجي
هز راسه كال... ان شاء الله
حضنته باسني بعيني وكال... انتبهي لنفسج ولطفلنا
كتله... بعيني
طلع وسد الباب واني رحت قدمت الضيافه لخالاتي وضلينا نسولف ونضحك صار المغرب واخذتنا السوالف تذكرت الملابس صعدت شلتهم ونزلت
بهاللحظه انتبهت حمامه بيضه على شباك السطح
رفعت راسي وابتسمت شكلها كلش حلو رجعت نزلت راسي وبهاللحظه حسيت نفسي ممتوازنه
وانكلبت من الدرج... يتبع...
________________
شلونكم كرزاياتي
ع الاساس هذا البارت الاخير
بس اسرد والاحداث بعدلها هوايه والبارت صار كلش طويل مترهم اسرد بيه اكثر اخاف يتقيد من الواتباد
فـ خليت بقية الاحداث انزلهم ببارت اضافي للبارت الاخير
بس اليوم ماانزله لان تعبنا كلش
فـ ان شاءالله باجر انزله الكم ونختم القصه
حتى بعدها انزللكم توضيح ع اسماء القصه لان هوايه گالو نريد نفهم ليش اسم القصه هل كان حلما
والعراق المصغر
فـ ان شاءالله باجر اشرحلكم كلشي
رئيكم وتوقعاتكم للبارت القادم
ولتنسون المتابعه والتصويت
وبوسه االكم
وبوستين لمتابعاتي المتفاعلات
لاڤيو نفر نفر 😘
تصبحون على الف خير ❤🫂
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!