رواية حليب اسود الفصل العشرون 20 - بقلم الكاتبة شمس السعدي

اسعد الله اوقاتـكم بكل خير احبتـي 🌹
///// البارت عشـرون /////
#حلـــيـب_أســـود
#الكــاتبة_شـمــس

اخذت الورقـة باوعتلها انصدمت ورفعت راسي بتساؤل القيس ..

-لاقيـس مااقبل !!
همسـلي ..
لاتعاندين وقعـي وبعدين افهمج ..

باوعتـله .. رمشلـي بعينه معناها وقعـي ..
وقعت وانـي اصلا ممقتنعـة ..

كملوا كلشي واني بس صافنـة ومخليـة ايدي ع خذي .
گام الرجال يطلع ..
وطلع وراه قيس وصلـة ورجع ..

اول مادخل ..
گتلـة .. قيس ليش هيج سويت .. اني مااريد اي شي منك .. المهم اعيش بسعـادة وياك ..
مااريد لابيت ولامال ولاجاه ..

قيس .. بس انـي اريد هيج . محد ضامن عمرة حور .
وانـي اريد شي يأمن مستقبلج انتي واولادنا ..

اجيت حضنتـة .. اسم الله عليك لاتگول هيج ..
حسـك بالدنيا يكفينـي .
بس مااريد اولادك او اي احد يتصورنـي جشعه وطماعـة
قيس .. محد راح يحجي لان كلهم مأمن مستقبلهم وبعدين محد يعرف بالبيت بس انـي وانتي وراح يبقى بينا ..
لان من يجون مااريدهم يتقيدون اريدهم يحسـون همه ببيت ابوهم ..

حور .. وراح يبقى بيتك هاي الورقـة ماتغير شي ..
ولو اني اصلا مامقتنعـة . اولادي عندهم ابو يتكفل بيهم ممجبور تفكر بمستقبلهم ..

ضحك ولزم بطنـي .. اولادج هم اولادي . وقصدي مو بس همه لا ..اريد هذي البطن تكرش وتجيبلي جهال يملون البيت ..

حور .. تحجي صدگ !
قيس .. طبعا صدگ ليش استغربتـي ..
حور .. لا مو لان عندك اولاد كبار توقعت ماتريد اطفال
قيس .. الاطفال نعمـة من الله مو من حقي اعترض .
واريد احس بطفل يحبنـي ويريدنـي واحس بالابوة .

اولادي كلهم بعيد عنهم وماحسيت بيهم ولااهتمولـي
ماانكر بعدي هو السبب بس كنت من اجي احير شنو اجيب والعبهم واطلعهم ..
بس كانوا يحبون امهم اكثر .ودايما يحملون سبب مرضها بيه ..
امجد دايما يملي حجي او ابو امجد مايگلي بويه .
ونجلاء هم بعيده عني ..
سعد من تزوج بنت عنه وعاش ويانا يله شويه تعود عليه بس وفاء كانت الي بنت وام واخت ..
من هي صغيره تشوف اخوانها كلهم مجموعين حول امهم وتاركيني وحدي ..
تجي هي تگعد يمي وتواسيني وتسولف وياي حتى مااضوج ..
تقرأ عيونـي من قبل مااحجي .. ومقدرة ضروفـي ..
وهي الوحيده الي تعرف قصتي وي امها وشلون تزوجنـا
بس اولادي خربتهم عليـة خالتهم .. كانت تقرأ براسهم وتگلهم ابوكم مايحب امكم وعنده وحده ببغداد ..
واني الله شاهد ماعندي وحده ..
ولاحبيت وحده بعد ماحملت ام امجد ..
ام امجد طيبه وماتحقد بس اختها اااااه هي الي خربت بيتي وخلت ولدي يكرهونـي ..

كان يجي بألم ووجع .. حضنته قوي وگتله وليهمك حبيبي راح امليلك البيت اولاد بس مو تضوج وتگول مايخلوني ارتاح لو انام ..

قيس .. هههههههه عمي خلي يجون ومااحجي ولااتبطر .

اخذ الجهال وطلع للحديقـة .. واني رتبت المطبخ وانشغلت بالغدا ..
طبخت وكملت ..
دخلوا للصاله ع التلفزيون ..
صعدت سبحت وبدلت ..
اتصلت عليه ماما .. گالت راح نجي العصر الج وام هوار هم تريد تجي ..
حور .. هلا بيكم ماما بأي وقت ..

نزلت .. گلتلهم جوعانين ..
قيس .. الريحة دخلت بخشمي شنو طابخة ..
حور .. مطبگ دجاج ..
قيس .. اوووويلي يله صبي ..

تعاونا كلنا اني اصب وهمه يشيلون بالمواعين والخضرة والزلايط ..

گعدنا .. اولادي راحوا غسلوا وسمو بأسم الله وانتضروا اخليلهم بالمواعين ..

ابتسم قيس واخذ ايدي باسها .. عاشت ايدج ع هيج تربيه هسا اصر اكثر ع الاولاد اذا راح تربيهم هالشكل ..
طبع اولادي هادئين ويسمعون الكلام ..
ولاعبالك ابوهم محمد ..
ولو هو اصلا مارباهم ولاتعب عليهم بگدي ..

گتله حبيبي حتجي ماما وجيرانا ومرت زياد لهنا ..
قيس .. البيت بيتج حوريتي ..اي شي تحتاجيه اكتبي ورقه وادز الولد يجيبوه ..

حور .. شكرا حبيبي ..
كملت ورتبت بسرعه البيت لان غدانا صار حوالي ب 3 الظهر ومابقى شي ع العصر راح يجون ..

صعدت اولادي سبحوا وبدلوا ..
واني دخلت ابدل لگيت قيس بالفراش ..
گتله حتنام حبيبي ..
قيس .. اشو نعست لان بسبب حوريه عندي ماجاي اشبع نوم بالليل هههههه .
حور .. اخذ راحتك حبيبي ..
قيس .. اذا اجو گعديني اسلم عليهم ..
حور .. حبيبي نام ولاتقييد نفسك همه مو غربه ..
قيس .. صدگ حور المدارس مابقالها شي . شوفي مدرسه اهليه زينه حتى انقل الجهال الها ..

صعدت يمـة ع السرير وبوسته ربي مايحرمني منك حتى هاي الشغله .مانسيتها ..
قيس .. هاااااا هسا منو الي يعيل بيه ويهيجنـي ..
مو اهلج ع وصول ليش تخليني احبسج يمي ..
حور .. ههههههه لا گايمـة .

طلعت ثوب قصير مارونـي مخصر والردن مالتـة جرجيت سرحت شعري .. وخليت مكياج خفيف ..

شفت قيس نايم .. طفيت الضوة ونزلت .
اجه صفاوي جايب العلاگة الولد مشتريهن ..

جايب كيك قطع جاهز وعصاير وحلويات وبقلاوة ..
اجو اهلي ..
ماما وام هوار جيرانه وجنتها وايمان واولادها ..

اول مدخلن صلن ع النبي بس ايمان فرت البيت كله وتگول وج حور واخيرا گعد حظج ..
شوف الاثاث ماشايفه منه بس بالمسلسلات الخليجيه ..
بس شو ماكو غرف جوه بس صاله ومطبخ واستقبال وغرفة طعام هاي ..
وحمامات جا وين غرفتكم ..

حور .. اي ماكو غرف جوه بس فوگ اكو اربع غرف وصـالة .. وحمامات ..

ايمان .. خلي اصعد اشوف ..
حور .. قيس نايم خطيه غير مره اشوفج ..
عوجت حلگها ياقحط شبيج مانحسد ..

مااهتميت الها ورحت للمطبخ اجت وراي ..
شافتني اجهز بالضيافـة ..
#بقلمي_الكاتبة_شمس
..........................................
گالت اساعدج ..
وتخلي بالمواعين وتاكل .. اي هذا العز شوف الحلويات كلها من هاي الغاليه ..
عود انطيني بحافظه منهن الزياد يحبهن خطيه ..

حور .. صار من عيونـي ..
اخذنا الضيافـة
ورحنا يم ماما .. احس البيت انگلب وهوسـة وجهال .
اخجزر بأولادي منطلقين وي ولد خالهم ..
واستحيت من قيس نايم خطيه وهمه صعدوا فوگ ..

گلتلها ماما خلي اجيبلج الصور ..
شافتهن ماما وصلت ع النبي ..

ايمان .. وج شنو هاي يخبلن واني حجيت عليه گلت حتى بالجذب مااخذلها صور عبالك واحد بايگ بوگـة ..

ماما گالت خلينا نروح ..
ايمان .. بعد وكت خلينا ..

نزل قيس مبدل .. سلم عليهم ..
وايمان حسيت عيونها ماشلتها عنه .. متت بدمـي ..

قيس .. وين رايحين عشاكم هنا اليوم ..
ماما .. لا غير مره زياد وحدة بالبيت ..
ايمان .. شعليه قابل .
گرصتها امي وگالتلها يله ..

طلعوا اتذكرت حافظهرالحلويات ..
جبتها واجيت وراهن .. گلتلها هاج ايمان هذي الزياد ..

ايمان .. يا شنو هالزحمـة ليش كلفتي روحج ..
استغربت .. مو هي الي گالتلي اعزلي الزياد ..

قيس خله واحد من الحمايه يوصلهم ..
وگال عندي شغله مااتأخر ..
اروح وارجع ..
وعازم جماعه بس لاتسوين شي انتي .. اني وصيت ..

حور .. ماشي حبيبي وبوستـة واشرلي ادخل لان يريد يطلع السيارة ..

صعدت بدلت ونزلت رتبت الببيت والهوسـة الي صارت وحجيت على اولادي لان تخبلوا وياهم ..
ووعدوني ميسون بعد ..

ساعـة ورجع قيس ووياه العشا ..
تلگيته ..
قيس .. رحمتك ياربي وين جنت ووين صرت ..
جنت بذاك بيت المجمع ادخل واطلع مثل اليتيم ..
وهسا مريتي واولادي يتلگوني ..
هو حيل اتعلق بولدي هالفترة ..

حور .. حبيبي وين ارتبلكـم العشا بالاستقبال ..
قيس .. لا بغرفـة الطعام .
رتبناهـا اني وياه واتفاجأت من جايب بيتزا ومقبلات وصاج وكنتاكي ..
معقولـة قضاة وكبار يحبون هيج اكلات ..

شويـة واتصل الحمايه عليه ..
قيس .. دخلهم دخلهم ..

گتلـة لعد راح ادخل للمطبخ وشتريدون گلي ..
قيس .. لا انتضري هنا . بالاول راح ادخلـهم للاستقبال .

شويـة وصاحني .. حور تعالي ..

استغربت .. هذا شبي قيس يصيح بأسمي وگدام جماعته
فتح الباب ..
وصارت بوجهي فرح وضرغام وبناتهم ..
طرت من الفرح ..
رحت حضنتهم واعاتب بقيس ..
وهو يضحك عليه ..

ماتوقعت جيتهم ..
سواها مفاجأة الـي ..

گعدنا تعشينا وتونسنا ..
وسهرنا سويه لليل كلش يله راحوا ..

هاي الفترة كلها خطار وصديقاتي اجو عزمتهم ..
مافرغنا ابد ..
خلصت اجازاتنا وداومنا ..
والكل بارك النا .. وقيس جايب عصير وكيك وزع الهم ..
كان دوامـي وي قيس حلو ..
اني وياه نروح ونرجع للدوام ..
وام احمد هاي مرت الفلاح قيس يحبهم ويثق بيهم ..
تجـي للبيت تگعد يمهم الى ان نجي ..
تطبخ وتنضف بالاضافـة للحمايه الموجوده ..

بيوم گال قيـس .. حور راح يجون اولادي البغداد اريدج ترتبين امورج ..
وراح اخذلج اجازة الخميس عمودهم .. ووياها الجمعـة والسبت عطله وهمـة ميطولون يومين ويرحون ..

كنت متوترة ومااعرف ليش .. بس من سمعت وفاء تجي وياهم فرحت ..
بس نجلاء گال ماتگدر لان حامل ..

البيت نضيف .. بس جهزت كبة برغل اني وام احمد .. وسويت دولمـة وضميتها ..

وصار يوم الخميس .. وصلوا النا الظهر يعنـي ع الغدا ..
اني سويت تمن احمر وسمك شوي ودولمـة ومقبلات ..
وحلاوة نوعين تفننت بالاكـل ..

صعدت سبحت ولبست گلبية خليجيه مرتبه ولفيت الشال واكتفيت بكحله وحمره فاتحة اللون ..
وصيت اولادي يكونون هادئين ويلعبون وي اولادهم بهدوء مو بهوسـة ..

شفت انفتحت الباب انخطف گلبـي ..
بس من شفت وفاء ارتاحيت ..
دخلت بوستني وباركتلي وجايبـة اولادها وياها بوستهم .
دخلوا وراها هدى وسعد سلموا وباركوا .. ولان شايفتهم من قبل ماتوترت ..
بس من دخل امجد ومرتـة .. حسيت گلبي خفق ..
كانت ملامحة حاده وحواجبه بيهن ثخن .
وهو طويل .. شكله وتصرفاته يخوفن وعبالك جاي المصارعـة ..
مرته اسمها اصيل سلمت وباركت ..

شفت امجد دخل للمطبخ گلتله اهلا وسهلا تفضلوا ..
امجد .. طبعا اتفضل غير بيت ابوي .. ويرفع حاجب وينزل لاخ ..
انصدمت من جوابه وردة فعله ..
سكتت .. سعد وفاء رادوا يغيرون الكلام ..
گالوا .. ابوي لسا مااجه ..

حور .. لا هسـا على وصول تفضلوا انتو ..

گعدنا بالصالـة .. واني التوتر زاد ومااعرف شنو احجي ولو ما وفاء تسولف وتضحك اني جان اغمـى عليه ..

نزلوا اولادي سلموا ..
رفع حاجبه وبصوت خشن .. ذوله منو
حور .. ولدي مصطفى ومرتضى ..
سلموا ماما گلتلهم ..

امجد .. ههههههه يعنـي ابوي الربحان طلع .. مرة وجهال ماخذ هم احسن ممايتعب ويخلف وهو بهذا العمر وين لاگيها ..

صدگ نرفزنـي كلامـة وضجت بس ماردت ابين لان عبالك يحاول يستفزنـي ..
سعد كل ساعة يخزره ..
ووفاء تبرر الة وتگول هو هذا امجد يحب يتشاقة ..

سمعت الباب انفتحت وصوت سيارة..
ماصدگت قيس رجع حسيت روحي رجعتلـي ..
وكأنه كنت ضايعـة وادور عليه ..

استأذنت وگمت استقبله ..
بس اريد اگوم ..
...........................................
اني شفته حضنتة وشميتة .. اااااه ياريحـة هلي .
ضحك قيس .. هاي شبيج حبيبي صاير شي .
هزيت براسي .. لا ماكو شي بس اشتاقيتلك كل يوم اني وياك سويه ومنتفارگ واليوم منرالصبح لسـا ماشفتك ..

حسيت بصوت ورايه ..
گواك الله ابو امجد ..
شني نسيت احنه جوه هذا كله استقبال ..

قيس .. جا شني مخلي عينك على ابوك ..
امجد .. لا حاشا ..

دخلوا جوه وسلم ع ولده واحفادة .. گال الاكل جاهز ..
حور .. كلشي جاهز راح اصب ..

بين ماقيس صعد يسبح ويصلـي ..
اجن البنات وياي يصبن ..
وتخبلن من شافن الدولمـة ..
گالن تشهي ..
كملت صب ..
الجهال صبينالهم ع طاوله المطبخ كلهم ..
واحنه گعدنا بغرفـة الطعام ..

اجه قيس وگعدنا كلنا ..
گال عاشت ايدج ام مصطفى مبين كلشي طيب ..

مااعرف ليش نضراتي اخذتني القيس ونضراته الحادة .
گال .. مو اطيب من اكل امي الله يرحمها ..
بس هي كلمن وحظه ..

حسيت اللگمـة بالگوة تنبلع ..
قيس .. امجد بطل سوالفك مو وكتها ..
امجد .. ليش حرام امدح بأكل امي .. الي ماتت وهي مكسورة خاطر ..

كنت ساكته ومااحجي ..
عم السكون ع السفرة والكل كان ياكل بهدوء ..
قيس .. حوريتي كملت معاملتج مال تثبيت بقى بس يطلع الامر خلال هذا الاسبوع ان شاء الله..
امجد .. ها ابو امجد انگلبت شباب وتدلع وتتدلع ..
سعد .. هو ابوي من يومـة شباب .. الي يشوفـة يگول اخونا مو ابونا ..
قيس حسيته ضاج وامجد عبالك جاي ناوي ع الشر ..

كملنا سويتلهم جاي .. والبنات واني بسرعة رتبنا المطبخ ونضفناه ..
گال قيس .. حور رتبتي الغرف ..
حور .. كلشي تمام ..
قيس باوع الولدة وگال .. اصعدوا كل واحد بغرفته ارتاحوا وللعصر نطلع عشاكم برة ..

صعدوا غراضهم ..
وفاء گالت اني راح افرش بغرفـة الجهال ..
جبتلها فراشات هي واولادها ..
گلت الصفاوي ورضاوي ينزلون عن فراشاتهم بس وفاء ماقبلت ..
گالت اولادي متعودين ينامون بحضني ..
نزلت اغسل الاستكانات مال جاي ..

شفت خيال وراي ..
باوعت هذا امجد وراي .. اتقدم بهدوء الي ويهمس ..
باعي لج اعرفج جايه عن طمع ولان شفتي ابوي وحيد وجبير استغليتي والله يعلم شلون اغريتيه وانتي تداومين بالمحكمه ومعروفة شنو الي تداوم هناك ..
بس اذا ابوي تقشمر اني مااتقشمر ..
وروح امي الي انقهرت وماتت بسببج الا اندمج واخليج تاخذين ولدج وتولين منا ..

احس اطراف رجلي جمدن . ومااگدر اتحركت ..
حسيت بي مايحبنـي وماطايقني ..
بس مااتصورت هيج راح تكون ردة فعلـة ..
او هيج يحجي وياي ..
راح ورجع ..
لزم ايدي عصرة وحسيته تقرب حيل مني ..
توترت وحاولت ادفعه ..
گال ايانـي واياج اسمعج تگولين الابوي لان لاتصدگين يسويلي شي ..
بس حجايه مني اگلبه عليج .وبتهمـة وحده اطيرج منا .

بلعت ريگي ..
شفت احد خطف من يمنا وراح ..
التفت هو ماشاف احد . تركنـي وراح ..

اني من الهبطة ماشالتني رجلي گعدت بالگاع وبس دموعي ينزلن ..
ليش ياالهي دايما تطلع العثرات گبالي ..
هذا مبين ناويلي على شر وماراح يرتاح الا اذا فرقنا ..
#بقلمي_الكاتبـة_شمس
يتبع......
....................................... ..

حبايبي ومتابعيني ..
لي رجاء عندكم ..
اريدكم تتابعون وتقرأون هذي القصص لكاتبة مبتدئة ومبدعة ..
اتمنى تشجعوها وماتخجلونـي ..