رواية حليب اسود الفصل الخامس والعشرون 25 - بقلم الكاتبة شمس السعدي

اسعد الله اوقاتكم احبتـي 🌹
///// البارت الخامس والعشـرون /////
#حلـــيـب_أســـود
#الكــاتبة_شـمــس

قيس ذولـي منو ??
قيس .. ماجد حاول تسرع وتتلافاهم ..
ماجد .. سيدي يحاولون يعرقلون الطريق عليه ..
قيس .. حور دنگي راسج ..
حور .. لا قيس عفيه لاتخوفنـي ..
قيس .. حور لاتعصبنـي دنگي .. ولزم راسي وسحبه الرجلة ..
طلع مسدسـة من جيبه وسحب اقسام هو والولد الحمايه الي بالصدر ..
ماجد انت انشغل بالطريق ولاتتوتر ..
خليت راسي جو واقرأ آيات وابجي .. ياربي انصرنا ياالهي ماقبل بالظلم وحقق العداله احفظنا بحفظك يارب ..

قبل أسبوع.....
نومت مسرة وبدلت ونزلت ..
شفت قيس بعده بالمكتب. .. ودايحجي وي ضابط صديقـة
من شافنـي طلب اتركة شويه ..
رحت للمطبخ بقيت منتظرة ومتوتر .. ياترى شنو الي مخبيه عليه قيس ..

اجة العندي بعد ماكمل اتصاله ..
باوعتله بعتب .. قيس ليش تخلي الافكار تدمرنـي شكو شصاير ..

سحب ايدي واخذني للصاله . تعالي اگعدي ..
انـي اصلا ماردت اقلقج واتوترج ..
بس لان حسيت بشكج وعبالج اخونج اريد اريحج من هاي الناحيه ..
بس الي اطلبه منج تكونين هاديه ..
حور .. قلقتنـي اكثر شكو .. اولادك بيهم شي .
قيس .. لا كلهم بخير .. الشغله تخص الشغل ..
تعرفين هالفترة عندي قضايا هواي ومن ضمنهن قضيه الشخص مهم .. متهم بالاختلاس والفساد من غير جرائم قتل منسوبـة اله ..
حولوه للتمييز واني المشرف على قضيته ..
اول مرة دزولي صك بي مبلغ كرشوة حتى اتساهل وياهم ..
رفضتها ..
ساومونـي بالاكثر .. طردتهـم ومااستقبلتهم ..
وكم مرة اجلت قضيته حتى ادرسها زين ..
بس طول هاي الفترة ماسكتوا بعد مايأسو من قبولي الفلوس ومبالغهم الهائله ..
گاموا يهددونـي ..

ضربت ع صدري .. شگلت قيس وليش ساكت مااشتكيت .
قيس .. اشتكيت وشتفيد الشكوه . حور ذوله مايتعرفون بالقانون ماتشوفيهم متعودين يشترون الدنيا بفلوسهم وعبالهم الدنيا كلها مثلهم لاذمـة ولاضمير ..

حور .. وهسـا شتسوي . الاحسن اتركها للقضيه حولها ع غير قاضي ..
قيس .. تحجين صدگ حور . شلون اتنازل حتى يگولون يخاف .. وشلون ارضاها احوله على غير قاضي وينطونه رشوه او يهددوه ويبرأهم وهمه اديهم ملطخة بالدم والبوگ والفساد . تحجين صدگ حور .

حور .. قيس لاتخبلنـي فكر بينا .. هاي بنتك الي ماشافت شي منك . بيه اني اموت بلاك قيس اترجاك لاتستهين بيهم ..

قيس .. لاتخافين سويت اتصالاتي . وراح يشددون الحراسه .. واصلا ضفت شغلـة التهديد القضيتهم ..

انهاريت وگمت ابجي .. اخذنـي الحظنه ويهدينـي ..
حور... لو باقيه ع شكي بيك تخونـي احسن من هذا الخبر ..
قيس... ههههههههههااااي هاي قوية .. لج حوريتي افضل اموت ولااخونج ..
حور .. اسم الله لاتگول هيج ..

گدر بطريقته يهديني وصعدنا نمنا بس الليل كلة عينـي ماغمضت من التفكير ..

گطعت اجازتي وداومت حتى ابقى الجانبـة ومااتركة ..
اودي مسره يم ماما ومن نرجع نجيبها هي واخوانها من اهلي ..

بس كانت عيوني ماتفارگ قيس .. اتعلقت بي زيادة ومااحب اتركة لثانيـة مااعرف ليش صارت روحي بي ..
وكم مرة اتوسل بي يترك القضيـة بس راسـة يابس ..

وبيوم القضيـة !!
وبعد دراسة الادلة والتهم الموجهه للمتهم ..بقوا ع نفس الحكم ومااتغير وهو الحكم بالسجن المؤبد ..
كان عندهم امل يتغيير بس قيس ماقبل يبيع ضمير وذمتة وشرف مهنته ..

واحنـة طالعين من الدوام وكالعـادة نروح نجيب الجهال من بيت اهلـي قبل مانرجع للبيت ..

كانت ويانا حمايـة بسيارة ثانيه بعدنا ووماجد الي يسوق وولد ثاني بالصدر ..
رغم مرتاحة لان القضيه انتهت وراح اخلص بس گلبي بعدة مخنوگ ..

شويه احس سيارتين حاصرتنا ..
خفت من شفتهم وملثمين منين اجو ماعرفنا ..
سيارة الحمايه الي ورانا ماهي معرقلين سيرها ..
وبقينا بس احنـة ..

قيس نزل راسي جوة وماخلانـي اگوم ..
ومااسمع بس كلامهم ..
وعياط قيس وهو يگلـة .. ماجد عينك ع الطريق مالك علاقـة بينا ..

دقايق قليله وصارت اطلاقات ناريه متبادله..
گدروا يصوبون ع الحمايه الي بالصدر ..واحس دمـة ترس جسمي ..
رفعت راسي ..
وگمت اعيط واتهسترت ..
بسرعة سحبني قيس ونزلني جوة ..
احس كتفي خدر وحرارة قويـة ..
بس من الخوف والتوتر ماحسيت بشي ..

الطلقات مثل المطر نزلت علينا ..
قيس يضرب الى ان خلصت الطلقات عندة ..
وماجد فقد السيطرة ع السيارة ..
يمكن تصاوب ..
حسيت السيارة مالت عن الطريق ووگفت ..
قيس كان مغطيني بجسمه ويهدي بيه واديه لازمتني ..
هدأ الوضع وماكو صوت ..
اسمع ماجد يون ..
جسم قيس ثگل عليه ..
اريد ارفعـة مااگدر وكتفي ينزف والالم بدأ يسعر بيه ..

حاولت ارفعـة ماكو ..
بالگوة گدرت .. شفتـة بالگوة داياخذ نفس ..
اخذتنـي الرجفه وجسمي ثلج ..
لاقيس .. لايعمري اروحلك فدوة گلي مابيك شي ..
گمت مثل المخبله ادور بجسمـة مااعرف وين متصاوب بس قميصه احمر من الدم ..

وهو بس يباوعلـي واحس بعيونـة حجي ..
نضراتـة ابد ماانساهن ..
اتهسترت واعيط وماكو واحد ينقذنا ..
الناس التمت واني ابجي واگلهم ..
بعدة عايش حبابين تعالوا ناخذة للمستشفى ساعدونـي .
كلها تتفرج وتخاف محد بيهم اقترب..

احس صوتـي وعياطي سمعتـة كل بغداد ..
لزمت ايدة وابوسهن بيهن ..
اااخ ياقيس اروحلك فدوة لاتعوفنـي منو الي بعدك قييييييس ..
شهگ اخر شهگة وعينه بعيني مافارگن عيونـي ..
وبدأ ينزف من حلگة ..
من شفتـة نزف من حلگـة اتهسترت وگمت اصرخ بعلوا صوتـي ..
الله لاينطيكم راح مني حرام عليكم ليش هيج ..
اديه ثلجن واني حاضنته وابجي واون ..

اجت الاسعاف والشرطه بعد ماانتهى كلشي .
بس احس ماجد يون بعدة ..
#بقلمـي_الكاتبـة_شمس
................................. ..
انشل عقلـي وتفكري كلـة يم قيس ..
اباوعلـة راسـة ع كتفي وحاضنته دمـة ترس جسمي واگعد بي مايگعد ..
بجيت وعيطت وردته يگعد وماگعد ..
حضنته قوي اريد ادفيه بصدري .. جسمـة البارد مايدفيه الا حضني ..
گوم حبيبي من تروحلك فدوة حور .. ليش مو بعدنـي ماشبعت منك .. كلشي ماشفت من حياتي ومن عرفتك عرفت طعم الحياة ..

اكو نسوان واگفات وزلم واگفين يبجون ع صوتي وكلامـي ..
فتحوا الباب الشرطه ..
ويردون يسحبوه منـي ..
گمت ابجي اكثر ..
ع كيفكم وياه ترى متصاوب وجرحة خاف يلجم .. خاف يوجعه جسمـة ديروا بالكم عليه ..

اكو شرطي .. گال اختـي انتي متصاوبه گومي ويانا لايخلص دمج ..

حور .. خلوه يخلص خلوني اموت ولكم شلي بدنيا مابيها قيس .. شلي بهيج حياة .. اخذوني وياه اريد اموت لاتصدگون اعيش بلياه ..

الناس تصبر بيه وتواسـي .. وهمـة مايدرون اني شبه عايشه . الم صوابي مااحس بي بگد الم گلبي وروحي على فراگ قيس ..

غطوا راسه .. بعد مااجت الشرطه واخذوا وهويته ويسألوني عن اسمي وشأصير منه ..
واني ماعندي لاحيل ولاصوت يحجي .. صوتـي اختفى من گد ماعيطت ..

اتوسلت بيهم يصعدونـي وياه ماقبلوا . اخذوه بغير سيارة ..

صعدوني بسيارة الاسعاف ولفوا ايدي عن النزيف ..
اشرت على جنطتي بالسيارة جابها شرطي واجه ..
اول ماصارت عينـي على رقم ضرغـام ..

رفعة بس گال الو ..
گتلـة .. اااااه ياخويه اختك محتاجتك يخويه الحگني ..
-حور شكو فهميني ..
-قيس كتلوه ضرغام اخذوا مني قيس قيس مااااات الحگلي ..

هو اتخبل وبس يصيح يابويه يابويه .. گال انطي الموبايل الاي شرطي ..
انطيته واني شبه ميته .. عينـي تركض ورى السيارة الاخذتة ..
تخبلت من شفتهم اخذوه .. نزلت وگمت اركض وراهم واگلهم اخذوني وياه ماشبعت منه ولكم اموت بلياه لاتاخذوه مني ..

سحبونـي بعد مافقدت وماادري بالدنيا ..
گعدت بالمستشفى ولگيتهم لافين ايدي بشاش وخليلي دم ومغذي .. بس الام قوي بيها .. مااعرف اون من الم ايدي لو مصابي بقيس..
ويمي امي وضرغـام ..
شفت ماما وگمت الطم ع خدي .. وج يوم راح .. بعد ماكو قيس يووووم .
اخذوه منـي الله لاينطيهم .. اااه گتله قيس اترك القضيه قيس لاتتورط ..ماسمع منـي ..

وج يوووم مات بحضنـي وهو بين اديـة وعينـة بعيونـي ويودعنـي .. بس مالحگت اودعـة مالحگت اشمه واشبع منه ..
امي بس تبجي وتحاول تهديني ..

ضرغام .. حور اهدي الي راح اخوي ومااضيع حقه .. گليلي منو همه ..
حور.. اليوم قضيتهم همه ذوله واحد مهم گال ويهددة يترك القضيه لو يصير من جانبهم . بس قيس ماقبل وگال ماخايف ..
ماقبل .. مااتنازل عنها وهاي النتيجه . عافنه وراح . احس روحي هسـا يتيمت يوووم ..

ضرغـام صاح الممرضـة انطتنـي مهدئ .. واني اتوسل بضرغـام يخليني اشوفـة ..
ضرغام اروحلك فدوة لاتدفنوه اذا مااشوفـة ..

ضرغام .. الله كريم حور .. خابرنا ع اهله وولدة خلي يجون بين ماتكمل الاجرآت ونشوف شيقررون ..

احس مفعول الابرة بدأ يسري .. وغفيت ..
گعدت .. وبس ماما يمي وتقرأ قرآن .. باوعتلها داتقرأ سورة يس ..
گمت ابجي .. عبالي اگعد ويطلع كل هذا كابوس .. والگيه گبالي ويمسد ع راسي ..
تالينا نقراله سورة يس ..
وين ضرغام خلي يجي ياخذني اشوفة ..

ماما .. اهدي يمه اجو اهلة وولدة وانخبص المستشفى عشيرته كلها هنا ..

خابريلي ضرغام خلي يجي .
دخل زياد باس راسي واني ابجي . زياد اروحلك فدوة خليني اشوفة ..

زياد .. المستشفى مگلوبه وين تشوفيه .
حور.. ولكم شبيكم ماعندكم رحمة .. روحي طلعت وي روحة شلون تردون تتدفنوه مت غير مااودعـة ..

زياد .. هسـا اشوف وارجعلج خبر ..
رجع گال مطلعين الرصاص من جسمـة .. ومخليه بالثلاجه الى ان تكمل الاجرات وياخذوه ..

ماما .. كم رصاصه ..
زياد .. اثنين وحدة بكتفه والثانيه بظهرة ومخترقـة گلبه ..

من سمعت صحت اااااااه بويه .. شگالت روحك يعمري من طلعت .. ماونيت ولاگلت ااه بس عيونك تراقبني حتى وروحك تطلع تفكر بيه لااضوج لو اخاف ..
ريتني اني بمكانك يبعد كل عشيرتي ..

اجه ضرغام گمت اتوسل بي يخليني اودعـة ..
گال الامي لفيها بعباتج .. وراح اجيب عربانه واجي ..

جابلي عربانه واجه ..
گال تغشي .. جان الممر مليان رجال معگلة وشيوخ وغير الضباط والشرطه ..
جا وين جنتوا من راح حبيبي .. وهو وحده يماطل ويقاتل سيارتين مسلحة ..

بعدنـي ماوصلت للثلاجات ..
صار گبالي المايخاف ربـة ..
شعندج ولج ماكفاج فگرتي واخذتي منا ..
سحبه سعد وهو يبجي ..
امجد مو وكتها ..
امجد .. لا وكتها .. انتي السبب وج جابها عمر يشتغل بهاي الشغله محد تعرضله من اجيتي انتي وبنتج الفگر جبتله النحس ..

واني ابجي .. امجد شتحجي احجي بس خلونـي اودعة اريد اشوفة الاخر مره ..

امجد .. الا احرگ روحج وماتشوفيه ولاتحضرين فاتحته ولااخليج تندلين گبرة اعذبج مثل ماعذبتينا ..

حور .. حرام عليك تاخذه هسا تدفنه راح يصير الليل لاتدفنوه بالليل وحشـة عليه تصير .. ولك انت حتى دمعه مانازله من عينك عليه هذا ابوك .. لاتعذبه وهو ميت .
اترجاك ابوسك اديك خليني اشوفه ..

ضرغام .. ولك متشوفها تريد تموت خليها تشوفه وترتاح ..
بيومها تعاركوا زياد وضرغام وامجد .. وكلها تدخلت بينهم بس هو عاند مااشوفة ..
حرمنـي من شوفته . ردت بس اودعه ولكم ياناس روحي هذا اخوي وابوي واهلي كلهم...

وفعلا اخذوه وماشفته .. وماخلونـي اروح وياهم احظر دفنته وفاتحته ..
اتهسترت وملخت روحي الى ان فقدت ..

گعدت واني اون بأسم قيس ..
گلتلهم طلعونـي مااريد ابقى ..
اخذونـي البيت قيس اريد اصلي الوحشـة . ولكم كل يوم نايم بحظني اليوم بوسط التراب ..
ياابو طول الحلو ماتلوگلك تراب المگابر ..

اخذنـي وياك حلوة وياك الگبور ..
دوگف أخذني وياك...... ....لاتخليني.
يابعد كل العمر وأيامي...... وسنيني.
خلافك الدنيا أصبحت ظلمه.... بعيني.
شلون أعيش خلافك ........يابعد عيني.
#بقلمـي_الكاتبـة_شمس
يتبع........
الاغنية واقع حال حور .. بعد استشهاد قيس ..

.......................................
حبايب القصة بعدهي ماانتهت لاتعتبرون نهاية قصـة حور بموت قيـس ..
حياة حورمع حليب اسود مستمرة ..
واسفة اذا البارت حزين جدا ..
لكن هذي مشاعر حور والي صاربيها وقيس مات بحضنها لهذا ماگدرت اتجاهلها واختصرها ..

ملاحظه .. احب اشكر المتابعه الي صممت الفيديو لان فعلا رائع .. يسلمو قلبي .. R--o--n--a--k