رواية حليب اسود الفصل الرابع 4 - بقلم الكاتبة شمس السعدي

///// البارت الرابع /////
  #حلـــيـب_أســـود
  #الكــاتبة_شـمــس

حياتـي أشبـه بالخريـف أراهـا .. جـرداء ..
إذ لـون الـربيع جفاهـا ..
جـرداء ..مذ هم الشباب مفارقـا ..
روحي وجسمي ما يكاد تباهـا ..
لون الشباب بجسمي باق لـم يزل ..
لكنما روحي المشيب دعاهـا ..
ودعاني مهموما وليس أمامـه ..
غير التمني أن يمر شتاهـا ..
…………………………

العلاقـة بين آدم وحواء
أشبه بفصول السنـة .. متقلـبة .
واجمـل فصولهـا الربيـع والشتاء .. ففيهم يزهو الحب وتزهر اوراقـه ..

الا علاقتـي بمحمد .. كانت محايدة مابين الصيف والخريف ..
تارة حار جاف ..
وتارة اخرى تتساقط الاوراق ويذبل الحب الي بينا ..

لكن رغم كل هذا بقيـت محافظة عليـه وكلي امل .
يحل علينا الشتـا ..
ويحيـا حبنـا من جديد ..

لكـن قطعـت الامل نهائي ..
من اجـة ضرغام وخبرنا . انه محمد رفع دعوه عليـة
وعساس اني خاطفـة اولادة ومااخلي يشوفهـم ..
وماخذتـهم من غير علمـة .
ودا احـاول اهربهم خـارج البلد ..

بقيـت مصدومـة سويـت نفسـي مامهتمـة .
لان ماما جابوها حالتها كلش ..
ومااريـد اقهرهـا اكثـر ..

نامـت ماما ..
وگعدنـا بالاستقبال اني وفرح وضرغام .
الجهـال فرشتلـهم ونيمتهم كلهـم ..

ضرغـام .. حور . العلاقه بينكم شبه انتهت بعد ماوصلت بي الجرئة يشتكي على زوجته بالمراكز .
لهنـا وكـافي .
قدمـي دعوة واخذي حقوقج كلها منها .

حور .. انـي اصلا الي كرهتـة ومااريـدة . وبس يطلـع زياد اقدم دعوه ماانتضر بعد ..

فرح .. زين تسوين . واي شي تحتاجيه احنه حاظرين ..
تشكـرت منهم ودخلت للغرفه ..

تغطيت جوة البطانيـة وگمت ابجي بصوت مكتـوم .
مااريد ماما تسمعنـي واولادي هم نايمـين ..

ليش ولك .
مو جنت ماانام اذا مااشبع من شوفتك واباوع الوجهـك .
حافظة كل ملامحمـك .
ع گـد مااباوعلك ..
حتى شيباتك حافظة اماكنهن .
كنت احبهن لان زايداتك حلاة ووقار ..
بس طلعت مراهق ونذل وخاين العشـرة ..

ثانـي يوم الصبح ..
ضرغام راح يطلع زياد بكفاله ..
وانـي شغـلت روحي بالبيت والطبـخ والطارمـة .
ماردت اگعد وي احـد واسمع حجايـة ..

گمت اتعب نفسـي واهلكها . حتى من انام . اغفـى بسرعة وماافكـر ..

للظهر اجـة ضرغام وزياد وعمامي ..
سلمت عليهم .
اجيـت اسلم على زيـاد دار وجهه ..

گال عمي ابو ضرغام .
اگعدي بويـة .
انتي شناوية على هذا النذل .
گتلة خلص مااريدة بعد .
زياد .. جا هم عوزج ترجعيله . بعد سوايته وج يگلهم مرتي حرضته عليه وخلتيه يضربني ..
اسمعـي يحـور.
اذا قشمرج بحجايتين وهددج بجهالج ورجعتي ماتلومين الا نفسج .
اتبرى منج وبعد ماتشوفين واحد منا فاهمة ..

اني سـاكتة ومااحجـي ..
بس گلبي يريد يطگ من قهرة ..

رحت للغرفه وهمه بقوا يسولفون ..
اجه مصطفى.  گال ماما شوكت نداوم ترى ضجنا .
شوكت نرجع البيتنا ..

من گال هيج عصبت .. رجعه ماكو انسوا وحتى مدرسه ماكوا . ابوكم عافنا راح يتزوج خلص انسوا ذاك البيت .
والي يگول بابا لو نرجع ميلوم الا نفسه ..
هو دمعت عينه وطلع ..

ضربت گصتي .. اوووف حـور غبية الطفل شنو ذنبـة .
طلعت وراه .
لگيته ع الحديقه ..
گتله ماما لاتزعل بس اني تعبانه .

مصطفى..  ماما حياتنا حلوه احنه وبابا . لاتعوفونا .
حضنتـه وبجيت . گتله حبيبي مو بيدي . هو بابا اختار يتركني ويتزوج ..

مصطفى..  يعنـي بعد مايحبنا ..
حور .. لا اكيد يحبكـم . بس اني وياه بعد مانعيش سوه وانتو شوكت متردون شوفوه ماامنعكـم ..
مصطفى.. بس احنه مانريد نعيش هنا . خلينا نرجع البيتنا .

اوووف مصطفى ماما لاتضغط عليه.  ذاك بعد مو بيتنا .
بس اوعدكم بس اشتغل واحصل فلوس .
نشيل بيت اني وياكم ونعيش سوه وحدنا .

مصطفى..  والمدرسه ماما ..
حور .. كـم يوم واني اخذكم واجيبكم . وهالفتـرة ندرس بالبيت ..

حسيـته شويـة اقتنـع ..
طلعوا عمامي .. سلمت عليهم وراحوا ..

زياد متجنب الحجي وياي . لاجل ماما لان مريضـة .
وانـي هم ارتاح شويـة من الزن والحجي .

فرح وزوجهـا راحوا بعد الغدا ..
الظهـر نايمين . اجـت رساله ..

محمد .. اريد اشوفج . لازم نتفاهم واذا مااجيتي اندمـج
ارتعبت من رسالتـة ..
شنـاوي هالمـرة يامحمد .
شتريـد ..??

دزيتلـة .. مااگدر اجي . وماعنـدي حجي وياك .
اني راح اقدم دعوة طلاق واخـذ الجهال .
وكل واحد بطريقـة ..

رجع دز .. هههههه بأحلامج ..

خفت من كلامه ويحجي بثقـة ..
بقيـت اتگلب ومانمت .
ومااگدر احجي الاحد .
ادري راح يلوموني ويگلولي ليش رديتي عليـه ..
حذفـت الرسائل .. وحـولت انام ..

شويـة واتصل عليـة رقم غريب .. استغربت
مارديـت .
بس من شفتـة الح بالاتصـال طلعت برة ورديـت .
صوت بنيـه ..

گلتلها منو ..
گالت .. انتـي حور .
-اي بلي منو حضرتج .
-اني خطيبـة محمد ..

من گالت هيج . احـس نار تطلـع من گلبـي ..
گلتلها .. اي وشرايـدة ..
حاولت اصير قويه او اتصنع القوة ..

گالت .. اتركينا بحالنا . واطلعي من حياتنا ..
محمد يحبني والدليل خطبني . وراس الشهر زواجنا ومااريده يتأجل بسبب دلالج الي ماله داعـي .
اذا عنـدج كرامـة .. اتركيه احسن مما هو الي يتركج .

فعلا استفزتني بكلامها ..
وحرگت دمـي .. بدل مااني الي اوجهلها هالكلام .
وبعد مااخذت محمد من بيته وجهاله .
جايه تحاسبني ..

گلتلها .. لازم ماواثقـة من حبـة الج وهيـج تسوين ..
اصلا محمد طلع من گلبي من زمان ومابحاله .
الي يهمني اولادي وبس .
بس اريد انطيج نصيحة . لاتأمنين بي مثل ماباعني يجي يوم يبيعج .
قبل هم قتل نفسه عليه وسوه المستحيل واخذني .
وتالي ماغزر بي وباعني ..
فلا تفرحين كلها سنه زمان ويشوف غيرج .
هااااا .. ولاتتصلين بعد لان اصلا راح احضرج انتي وخطيبج النذل ..

غلقته بوجهه ورغم ردي الها .. بس حسيت بذل وقهر طگيت من البجي وگمت اشهگ .

واعيط .. محمد الله لاينطيك محمد اريد اشوف يوم بيك انت وياها . عساكم ما تتهنون ..
#بقلمي_الكاتبة_شمس
………………………………………
گعدت بالگاع وابجي ..
دزيت رساله لمحمد . گتله طلگني مااريدك
وحتى فلوسي الي عندك وذهبي وورث ابوي خليه الك مااريد شي بس اعتقني .
لان كرهتك . خلينا بحالنا وعيش حياتك ..

دزيت الرساله وحظرت رقمه ورقم خطيبته ..
اجت ماما ..
شبيج حور ماما ليش هنا بره .
وشبيج تعيطين .
هم خابرج هالنذل ..

حـور .. لا ماما مابيه شي مختنگة شوية .. وطلعت اشم هوا ..
دخلتها ودخلنـا ..
كنت اتجنب زيـاد ومااطلع من الغرفـة الا اذا هو مموجود ..
للعصر طلعـت سويـت جاي وكعك ..
اندگـت الباب ..
راحوا الجهال فتحوا ..
اجت ام هوار هو وجاراتنا يشوفن مـامـا ..

سلمت عليهن ورحت اسويلهـن جاي وكعك .
اسمعهـن يسولفن ..
ويحجن ويندعن ع محمد ..
وجيرانا ام علي .. تگلها مو اني خطبتها العلي وماانطيتوها بحجه صغيرة ودا تدرس .. والله لو شايفين علي شلون مدلل مرته .

ماما .. كلشـي بالقسمـة دادة . وبنتي هاي قسمـتها .
ام علي.. ياقسـمة دادا . شمسوي بيها تگول طالعـة من الگبور .وضعفانه وشحالها ولاعرفتها من شفتها ..

بقيت اباوع الوجهي بالمرايـة .. صدگ اني هيج ..
اي صحيح ضعفانـة بس مو كلش زينـة ..

جبت الصينيـه سكتن ..
وكتفن بالسؤال ع صحت ماما . الي ماذكرنها اول ماگعدن ..
اني هـم ماردت اگعد يمهن .
بس ام هوار سألتني ..
وهسا شراح تسوين خاله ..

حور .. اكيد اتطلگ خاله مابيها مجال ..
ام علي .. يايخاله . عبالج الي تتطلگ تعيش مرتاحـة لو الناس تخليها ترتـاح .
اشرطي بيتج وحدج عنها ومالج دخل بيها وعيشي وربي جهالج ..
والله اذا تطلگتي تعيشين مذلوله اكثر . ومحد يحمل الثاني بهالوكت .
امج هالتشوفيها مريضه ..
والاخو . اخو مرته بهذا الوكت . منو الي الج والجهالج

حـور .. خالـة وكرامتي وين . وگلبي الي كرهه ومايتقبلـة بعد ..
وبعدين انـي عندي شهاده واشتغل بأي مكان واعيشهم مابعازت واحد ..

ايمـان ماعجبها الحجي . تركتنا وگامت ..
ام هوار .. خاله هي وينها التعينيات بالعراق . هالتشوفين بالالف يتخرجون بالسنه وگاعدين ومصفطين ماكو تعيين . مهندسين ويشتغلون عماله علمود عيشتهم .

ماما .. عندي راتب ابوها ومااخليها بعوز ان شاء الله
ام علي .. يا هو كل شهرين ينطون وهي عدها اثنين ويلاد شيكفي ..

حسيت روحـي اختنگت من حجيهـن .. اتعذرت وگمت للغرفـه درست الجهال حتى مايفوتهم شي ..
وگلت امر للمدرسه باجر اخذلهم اجازة كم يوم على ماتصفى ..

مر كم يوم ومحمد ماكو خبر عنة ..
وقضيته وي زياد انتهت بالتنازل من الطرفين بعد مالقاضي حاجي عليهم وگالهم انتو اهل وعيب ..

جهالي خلصت اجازتهم . ورحت وديتهم للمدرسه ورجعت
لگيت شرطي بالباب ..

گاله تفضل خويـة شرايد ..
گال هذا تبليغ من المحكمه ..
وقعت واخذته ..
باوعـت محمد رافع عليـة دعوة طلاق .. وحضانه مال اطفال ..

هنا حسيت الدنيـا دارت بيـة وعبالك راح يغمى عليه ..
بالگوة اتكيت ع الباب ودخلت ..
عيوني تجري دموع ..
اووووف ياعين زين وماعميتي لسا على هالبجـي ..

تلگتنـي ماما ..
هاحور شبيـج ..

ابجي واحجي . هاج ماما شوفي ..
نطيتها الورقه..
گالت ماما خلي يولي مايگدر يسوي شي ..
اجت ايمان اخذت الورقه من ايد ماما ..
قرأتها وگالت ..
خاف هذا بجيج علمود الطلاق مو ع الجهال ..

باوعتلها .. گلتلها حرام عليج ارحميني ليش هيج تسوين شسويتلج ..

ايمان .. على كيفج شحجيت اني ..
حور .. وج تخيلي حياتي بين ليلة ويوم تنقلب راسا على عقب .. وزوجج يتركج وبيتج ينهد وفوگ هذا كله يريد ياخذ اولادج منج ..
اولادج الي حملتيهم تسع اشهر وطلگتي بيهم ووصلتي الموت . وسهرتي عليهم وربيتيهم وكبرتيهم .
وانتي تنتضرين يوم يوم حتى تشوفيهم ناجحين ومتفوقين وهو يجي ع الجاهز ياخذهم منج .
شتسوين گوليلي تكرهيه لو بعدج تحنين عليه ..
گولي ..

ايمان .. يممممه برد شرج بيش مفاولتلي ..
ماما .. ايمان كافي اتركي حور بهمها المرة الثانيه اذا سمعتيها حجي تفاهمي وي زياد ..

تركتنا ودخلت غرفتها ..
واني بس ادگ والطم . همزين الجهال ماهمه ويشوفوني بهيج حالة ..
اتصلت ع فرح وگلتلها فدوه مااگدر احجي وي زياد .
ماتشوفين ضرغام بلكي يعرف محامي زين .
گالت بعيوني ..

زياد من گالتله ماما .. ردت فعله عاديه . بس گال همزين طلعت منه خلينا نخلص من هيج حثاله ..
انقهرت بداخلي عبااالي
يسندني ويگلي خويه اني وياج ومااتركج واولادج راح يبقون بحضنج ..

ضرغام شاف محامي صديقة ..
وصارت يووم المحكمه ..
رحت وگلبي محمل اشكال هموم ..

لگيته جاي قبلنا وعيونه تنط شرار ..
اني من رحت رتبت نفسي ماردت يشوفني مكسوره .

كان واگف مسافه عنا ..
بس ماشال عينه عني .. نضراته كره . او ندم . او شي ثاني مااگدرت افسرهن ..

ماادري ليش كلما ادور وجهي عنه ..
عيونه تخوني وترجع تباوعله ..
يمكن تعودن ع شوفته ..
ومايگدرن يفارگنه ..
كافي ياعيني عوفيه .. الي تحبيه راح وي الريح..
غدر بيج وبگلبي ومايستاهل نضراتج واشتياقج ..
#بقلمي_الكاتبة_شمس
………… ..................
صاحوا اسمنا دخلنا ..
احس اطرافي ثلجن . وگلبي تسارعت نبضاته ..
القاضي عينه عليه وع محمد ..
گال بعدكم صغار شنو سبب الطلاق .
ليش تريد تطلگ . وجه سؤاله لمحمد .

محمد .. استاذ . تاركتني صار فترة وهاملتني . وماتنطيني حقوقي .
وصوتها يعلى عليه .وتتجاوز .

اني مصدومة من كلامه .. هذا شديحجي تكيد تخبل .

رديت بلاوعي .. استاذ والله جذاب هو الي تاركني وراح خطب من غير ماادري ..

القاضي گال .. لاتردين وحدج . اني من اوجهلج السؤال ردي ..

محمد گال هاي وحده من تصرفاتها استاذ .. تنفعل بسرعه وتتعصب بلا سبب ..

حسيت راح يغمى عليه بعد مااتحمل ..
خليته يحجي كل الي بداخله .
وكرهت روحي ساعتها لان حبيت هيج انسان .
شلون كنت عميه الهاي الدرجه  ..
هذا وجهه وين مخبيه ..

سألني القاضي .. ماعرفت احجي بس اتذكر گتله . مااريده بعد طلگني منه ..

تأجلت الجلسة وطلب شهود يحظرون ..
اني ابد مو واعيه الكلام القاضي شنو .
بس كلام محمد بأذني ..
هاملتني وهامله جهالها .

اني حور الي ضيعت شبابي علمود اهتم بيك وببيتك واولادنا . طلعت مهمله وماناطيتك حقوقك ..
اااااخ ياتعب السنين ..

طلعت من الغرفه مال قاضي ..
بعد ماحسيت ع روحي بس افترت الدنيا بيه ووگعت

..روحـي متعبـة ..
كـأنـي أركـض مـذ ولـدت ولـم أصـل!!
#بقلمي_الكاتبة_شمس
يتبع…..
………………………………………… .
هلو حبايب ..
الاغلبيـة ديگولون . القصه حزينـة ولو ندري ممتابعين

حبايب هذا واقعنا .
ومايصير دايما نذكر قصص الحب والعشق .
وتاركين حياة انسانه معذبه مثل حور ..
حور انثى ..تمثل النساء المضطهدات .
من المجتمع ومن الحياة ومن اقرب الناس لهن ..

بالنسبة الي اروع قصه اجتني هي هذي القصه
رغم كميه الحزن الي بيها ..
الا انها تحمل دروس وعبر كثيره ..

اتمنى تكونون سند الها وتدعولها الله ينصرها ع كل شخص ظلمها ..

تحياتي احبتي 🌹
وتصبحون على ماتتمنون 🌹