رواية حليب اسود الفصل الخامس 5 - بقلم الكاتبة شمس السعدي

///// البارت الخامس /////
  #حلـــيـب_أســـود
  #الكــاتبة_شـمــس

كـل الاشخـاص ممكـن ان تتغيـر ..
لكـن هنـاك فـرق بيـن إنسـان .. يقـدر معنـى العشـرة وإنسان ينسـى كـل شـئ فـي يـوم واحـد ..
ويخـون العشـرة . ففـي النهايـة كل شخـص يعود لإصله سواء كـان طيب او جاحـد ..!!

فتحـت عينـي ..
شفت نفسـي بمكتب مااعرف وين ..
گمت من مكانـي .. اكو رجـال واگف وداير وجهه ع الشباك ومخلي ايديه بجيب البنطرون .
وللثانيه يدخن بيها ..

من گمت حـس عليه دار وجهه ..
گال حمدا لله ع السلامـة ..
گتـلة شكرا ..
وگمت . مااعرف ليش خفت من شفته .
هو كبير بالعمر بس كلة وقار وهيبة ..

طلعت صار بوجهـي ضرغـام ها شلون صرتـي .
بس خابرنـي المحامي اجيت اركض .
ليش ماجبتي احد وياج ..

حور .. عبالـي شغله روتينيه وتخلـص بسرعـة ..
ضرغـام .. وهذا الحقير خو ماسوالج شي ..
حور .. مايحتاج يسـوي .. كلامـة وكذبـة كافين الجرحي
ضرغـام .. خلي يولي .. لاتحسسيه انتي خايفه صيري قويـة ..

باوعت للمحامي وگتله .. استاذ يعني الجلسة الجايه يطلگوني منه مااريده كرهته شوكت اخلص منه .

المحامي .. اي تتطلگون مادام متفقين . بس تبقى شغلـة الحظانه .. وان شاء الله يحكم الصالحج ..

طلعـنا من المحكمة بس جان اكو خوف بگلبي ..
صـارت عينـي بعين محمد واگـف برة ويحجي وي ولـد مااعرف شمنتظر . او يمكن يحاول يستفزني بنضراتـة ..

راح الولد وهو راد يصعد سيـارة ..
تركـت ضرغـام ورحت اله ..
صاح ضرغـام وراي.  مااهتمـيت ..

هو من شافني تقدمت اله . ابتسم بسخـافه .
اول ماوصلـت يمه گتلـة تـف عليك ياقذر ..
شفـت بحياتي بشر انذال بس مثلك ماشفت .
ضحيت بعمري كله عمودك . واخذت ذهبي وفلوسي وشبابي . وتالي تگول هاملـتني ..
الله ياخذلـي حقـي منك ان شاء الله.

راد يضربنـي لزم ايدة ضرغـام .. گالـة دير بالك تمد ايدك عليها اندمـك والله . ولواها الايدة .

سحبني ضرغـام واخذنـي .
عيوني فاضحاتني ويردن يبجن . مااعرف شلون سيطرت ع نفسي ..ومشيـت بسرعه ..

صعدنـي بالسيارة وگام يحجي علـيه .
انتـي ليش رحتيله . هيج يستقـوي وعبالـة خايفـة منه وج هو الي يريدة يشوفج ضعيفـة حتى يذلـج ..

اني بس ابجـي مالي خلگ بعد احجـي ..
الله ينتقـم منك يـامحمد ..
على كـل دمعـة نزلـت من عينـي بسببـك ..

وصلـنا للبيت..
سلمـت لگيتهم دا يصبون الغدا . بسرعه بدلـت وطلعـت .
رحـت اساعد ايمان مالي خلگ تبقى تحجي ..
سمعـت ضرغـام يسولفلهـم ..

وزياد كـالعادة يذب اللوم بيـة .
صارت عندي عاديـة الكل يلوم بيه . لان اهتميت بي زايد ودللتـة ..
يعنـي الي تدلل زوجها وتحبه تصير غلطـانه .
غير هذا واجـب الزوجة تهتم براحـة زوجها .
لو مامهتمـه مو گالوا الصوج بيها وحقه يعوفـها .
مو گالوا هاملتـة وماتهتم بي ..
يعنـي بالحالتـين يلـومون .

كمـلنا صب . ضرغـام ماقبل يتغـدا گال لازم ارجع للدوام وفرح ماتتغـدا تنتضرني مااگدر اتغدا ..

گعـدنا ع الغـدا . مسوين سمك ..
اولادي مايعرفون يسحبون العضـم من السمك ..

گمـت اسويـلهم لفـات وانطيهم ..
ماما تجيب وتخلـي گدامهم تگول خطيـة ماتريگـوا لان انتي مموجودة ..

زيـاد .. اي خليها تدللهم مثل مادللت ذاك الكلب وتالي يشمروها من تكبر مثل ماشمرها ..

مااتحمـلت .. گتلـة زياد انت اخويه لو عدوي .
ليـش دايمـا احسـك تحب تغثني وتسمعنـي حجي .
اولادي ممعلمتهم ع الغلط .
ومااقبل اي احد يتجاوز ع ابوهم گدامهم حتى لو كان مثل ماگلت ..
اولادي تربات ايدي ..
وابوهم ماربيته اني . اذا نكر العشره وماغزر بي التعب فيطلع على اصله وتربات اهله ..

زيـاد .. ماقصرتي والله ماطلع السانج عليه وهو فضحج بالمحكمـة .
حور .. استغلنـي وفضحني لان مالگة احد وياي مالي سند . رحت وحدي مثل اليتيمـة ولو فعلا اني يتيمـة ومالي احد ..

ماما .. ياامي غير اخوج عنده دوام . وردت اروح وياج اني گلتي انتي مريضه وماقبلتي ..

حور .. هاهي ماما ماردت اعتب او الوم احد . بس اتركوني بحالي .هذا مصيري واني اتحمله لحد يلوم بعد الي صار صار . قابل ارجع الزمن واغيره ..

ايمان .. والله… . وقاطعها زياد . لاتتدخلين غدي جهالج والغرفتج مااريد صوت ..

سكتنا كلنا . اني ماخليت لگمة بحلگي . غديت جهالي واخذتهم غسلتلهم ونيمتهم .
ورحت نضفت المطبخ وغسلت المواعين ..

رجعت حضنت ولدي ونمت ..
وعيني ع الحلقـة اني شعنـدي لابستها لسا .
خلي ابيعـها ع الاقل اصرف منها الي والجهالـي ..

نمت للعصـر لگيت ماما داخلـة بصينيه عليـنا ..
ماما .. اگعدي حور انتي ماتغديتي . دزيت على لفات وبيبسي .. گعدي الجهال ..
ابتسمتلها .. فعلا كنت جوعانه ولاريوگ ولا غدا .

گعدت الجهال وگعدنا ناكـل ..
لفات گص . العشق مالي. 
لسا اتذكـر بابا . كلما يروح للسوگ يجيبلنا لفات گص اني وفرح يدري بينا نحبها .
وهسـا ماما ذكرتـني . يعني مانست الاكلـة الي احبها .

كملنـا اكل درست اولادي ..
اجة هيبت گال عمه عندي امتحان انگليزي تدرسيني ..
لان اني دارسه لغات ..
فكنت كلش قويه بالانگليزي ..
گعدت ادرسه ..
ايمان من شافتني ادرس هيبت . ماگالتلي ع العشـا هي سوتة ..

استمر الوضع عادي ..
كل يوم الصبـح اخذ جهالي للمدرسة واجيبهم الظهر.
وشغل ودراسـة وخطار .
هيج گدرت اشغل نفسي شويه وماافكـر ..

بيوم من الايام ..
رحت اريد اجيب جهالي من المدرسـة ..
انتضرت انتضرت وماكـو .

الطلاب اغلبـها طلعت ..
دخـلت للادارة .
گالت المديرة ماكـو كلها طلعت الطلاب ..

صرت مثل المخبـله ..
اركـض منـا واروح منـا ..

مااعـرف شـأسوي ..
افتريت الصفوف كلـها ماخليـت مكان حتى بالحمـامات .
والمديـرة والامن والمعلمات وياي يدورن ..
گعـدت بالگاع وابجي .
لاياربـي لاتمتحنـي بأولادي كلشـي ولا ولدي ..
#بقلمي_الكاتبـة_شمس
………………………………………
اتهسترت بيومها . گلت للمديره انتو شنو شغـلكم هنا اني مأمنـة ولدي عنـدكم وين ..

المديـرة .. حقج عيني . بس الاولاد كلـها توگف هنا بالانتضار والاهل يجون ياخذوهـم خاف ابوهـم اخذهـم اتأكدي

معقولـة محمد اخذهـم حتى يحرگ روحي ..
اي يسويها ..
گمت كلشي اتوقع منـة ..
مسحـت دموعـي ..

فتحت جهازي . شلت الحظر عنه واتصلت ..
بقى هواي يرن يله رد ..

-شـرايدة ..
-محمد جهالي وين ?.
-شنو وين غير عندج .
-محمد لاتحرگ روحي بجهالـي .اجيت للمدرسه ماهمه اكيد انت الي اخذتهم مايرحون وي غريب همـة ..

-انتي شتحجين . انـي بالدوام ومااخذتهم باعـي حور اذا صار شـي الاولادي ماتلومين الا نفسـج .
والله اجرجركـم بالمراكـز كلكم ..

-گمت ابجـي .. وسديتة بوجهه ماتحملت عياطه .
رجع اتصل ..
مارديت .
اتصل مره ثانيه ..
-رديت .. الي بيه كافيني مالي خلگ اهاناتك .
-انتي وين هسـا .
-بالمدرسـة .
-جايج هسـا انتضـري ..

گومتني المديره وانطتني كرسي وجابولي مي ..
واني گلبي يفرفح ع جهالـي ..

ردت اتصل ع زياد وخفت . اكيد راح يلومني لو يرزلني .
اتصلت على ضرغام ..
وگتلة ولدي ماهمه .
-گال دقايق يمج اني ..

شويـة واجة ضرغـام ووياه زيـاد يمكن .. ضرغام گلة ..
ضرغام گام يستفسر من المديرة واتصل بمعارفـة .
زياد معصب ..
گال من البدايه گتلج انطيهم الابوهم .
هسـا منو يتحمل المسؤولية اذا دروا اهلهم ..

بهـذي اللحظة دخـل محمد ..
زياد .. هذا النذل منو گـلة . وباوعلي ويخزر ..

محمد اول مادخل شكله معصب .. گال هذا اهمـالج ست حور اخذتيـهم منـي وهاي تاليتهـا ..

زياد .. لاتعيـط منو يگول ماانت ماخذهـم حتى تحرگ گلبها ..
محمد .. هههههه ولك لو ماخذهـم جا هسا اني هنا .
زياد .. لاتگول ولك .. ولي منا .
محمد .. انت شعندك هنا همه ولدي.
ضرغام .. كافي جهال انتو . بدال ماتفكرون بيهم وين راحوا ومنو اخذهـم .
اني بس ابجي وهمه يتعاركون ..
طلع محمد وگف بالشارع وهو يتوعد الي ..
ويگلي اذا مالگيتهم احملج المسؤولية ..

خبرنا الشرطة .. وبدوا يحققون .. وي المديرة والمعلمات والامن بيومـها بقينا ل 3 الظهر ..
محمد بقى ويانا للعصر .. والشرطـة اخذت اقوالنا وارقام تلفوناتنا ..

الى ان يأسوا .
گالوا خاف يطلبون فديه ارجعوا الاهلكـم ..

كلها طلعت وسدوا المدرسـة ..

زياد .. يلة گومي نرجـع .
حور .. ماارجع انتضرهـم هنا خاف يرجعون ..
زياد .. گومي ولاتعاندين مالي خلگ التهي بيج . خلينا نرجع ومن يجيهم خبر يگلولنا ..
حور .. انت شدتحجي . شلون اگوم ذولي ولدي قطعه من گلبي . مااعرف هسـا وين جوعانين لو شبعانين منو اخذهم وشسوو بيهم .. كل هذا مااعرفه .
وانتو تردوني اروح وانتضر خبر ..

بالگوة ضرغـام قنعني واخذوني ..
رجعت واني مكسـورة ..
گابلتني وفرح وماما حضنوني ويبجون ..
گلتلها يوووم ولدي راحوا مااعرف وينهم .
اريد ولدي ماما ليش اخذوهم شنو ذنبهم ..
يوووم گمت ادور بين الوجـوه بلكي اشوفهم ..
وماشفتهم فص ملح وذاب ..

ماما .. ياامي گولي يالله ان شاء الله يرجعـون ولو اني متأكدة هذا رجلج الناقص هو واهلـة ورى السالفه ..

هدأت ومسحت دموعي ..
منو يگول هو هم شفته شلون ضايج ومقهور عليهم ..
فرح .. وانتي تغرج حركاته وخوفه ..هذا صاحب وجهيين ويگدر يمثل عليج ضايج وهو فرحان بداخله من شاف قهرج ..
وج عيني منو اله مصلحة ياخذهم غيرة . ولدج ويانا يخافون يطلعون اذا مو انتي وياهم ..
بعد شلون يرحون وي غريب ..

بلا وعي اتصلت بسرعـة عليـه ..
محمد عليك القرآن اذا جهالي عندك گول لاتفرفح گلبي خليهم عندك بس طمني وگلي بخير ..
محمد .. لا انتي خبله . همه جهالي والي حق اخذهم بأي وقت بعد ليش اخطفهم وابهذلهم ..
اذا اريد اخذهم منج بالقوة ومحد اله حق يمنعني . وخاصه اخوج خو يفرح اخذهم وگلي كم مره اخذ جهالك وطلگها ولاتراوينا وجهك ..

من سمعت كلامـة فار دمـي ..
سديت الموبايل بسرعه وگتله .. انت من شوكت صرت هيج قاسي ..
من شوكت صرت ظالم واناني .
كنت تبجي ع بجينا .
وتضحك الضحكنا ..
انت وحيدنا هيج تسوي بينا .
همزين لعد ماعندي اخوان هواي ..

زياد .. شبيج انتي تخبلتي . شلون تحجين هيج وياي .
راد يضربني لزمة ضرغام ..

حور .. لا ضرغام اتركة خليه يضربني . خلي يطلع الحقد الي جواته عليه . من يوم الي تزوجت هو حاقد عليه وشايل بگلبه مني ..
بالطالعه والنازله يرزل بيه .
وماكفاه اهاناته وظلمه .. هسا يتفق وي محمد ينطيه الجهال .. بأي حق تنطيهم جهالي .
تقبل احد ياخذ ضناك ..

زياد .. اي اني مااتحمل عمري كله اربي جهال محمد واگعدهم ببيتي ..
حور .. اي بيت هذا متگلي اي بيت .
هذا بيت ابويه الي ضحكت عليه بخمس ملايين وخليتني اتنازل بس حتى ترضى عليه ..

ماما .. خمس ملايين شنو واي تنازل ..

زياد .. اي همزين مانطيتج اكثر جان راحن مثل ذنيج الجيب محمد .. متگليلي وين وديتيهن ..
محمد راكب سيارة احدث موديل وبيت اله كله منج ومن ذهبج . وتالي من غبائج طلعتي فاشوشي كلشي ماكو .
رجعتي بس بهدومج ..

ماما .. كااافي وفهموني . تنازل شنو وشوكت تنازلتن .
فرح باوعتلي وخزرتني .
اني سكتت ..
وزياد گالها يوم من وحدهن هنه تنازلن ماجبرتهن .
#بقلمي_الكاتبة_شمس
…………………………………………
ماما .. حسافه ع البطن الشالتك . مو گلك ابوك البيت نص الهن ونص الك . شلون تساومهن ..
البيت مو گلك يبقى مثل ماهو الى ان اموت اني وبعدين تقاسموا .
ولك بعدني عايشه وانت تفكر بالبيت شلون تاخذه ..
وانت مو تدري انه البيت نصه بأسمي ..
يعني هسا انت اخذت حقك .
وحصتي راح تتقسم على بناتي ..

من سمع زياد هذا الكلام انصدم ..
وگام يعيط .. 
وخزرني .. بسيطة يحور . انسي بعد عندج اخو
امي تخربط وانشغلنا بيها ..

من العياط والبواجي . الجيران كلها عدنا .
وخاصه بعد ماسمعوا جهالي مخطوفين ..

مااتحمـلت اسمع لوم الناس الي ..
ليش طلعتي من بيتج . لو باقيه مصار هيج.
واذا تزوج . جان بقيتي عمود جهالج ومايتشتتون بعيد عن اهلهم ..

هذا الكلام كـلة خناجر تطعـن بروحـي ..
دخلت للغرفـة وسديت الباب وعيوني وگلبي يبجون على اولادي ..
ااااه يحور بعد شنو الي مصار بيج من مصايب ..
اي يدنيا ..
كومي مصايبج عليه وحده ورى الثانيه ..
لاتقصرين بعذابي ..
شگد متريدين عذبيني ..
بس خلي يرجعون جهالي الحظني .
راضية بكلشي علمودهم ..

بين دموعي وونيني وحاظنه صورهم للمغرب..
اندفرت باب الغرفه ..
وفرح تگلي ..
اولادج رجعوا .
ذولي اجوا ..
من الفرحـة.
والصدمة .
احس رجلي ماتشيلني .
گمت امشي واوگع واخر شي گمت ازحف واخذتـهم الحظني وابجي .
واني گاعده وكلها داير مدايري .
ويبجون ع حالي ..
#بقلمي_الكاتبة_شمس
يتبـع…..
…………………………………
هلا وغلا حبايب ..
ا

عتذر ع التأخير .
بس النت دمرني ..
واول مارجع كملتها ونزلتها الكم ..
تحياتي 🌹