رواية حليب اسود الفصل السادس 6 - بقلم الكاتبة شمس السعدي

هلا وغلا حبايب ..
مسائكـم سكر 💕
///// البارت السادس /////
#حلـــيـب_أســـود
#الكــاتبة_شـمــس

الفقـدان الحقيقـي هو أن تفقد قطعة منـك ..
من روحـك ، من أنفاسـك ..
وليس الفقدان أن تفقد شيئاً طارئاً عليك مهما علا شأنه ،
تلك خسارة عابرة تعَوَض ..
وليست مثل فقدان الاولاد والاحباب...

شگد حسيت بذل لما تركـني محمد .. ومرات افتقده واشتاق الايامنـا سويـه ..
بس من فقدت اولادي ..
حسيت الدنـيا مابيها طعم دونهـم ..
اتمنيـت اموت قبل ليصيرلـهم شي ..
ضعت .. وانجنيت .. واختنگت بفراقهم ..
فعلا اني بلاهم حياتـي عدم ..

حاضنتـهم واشم بيهم .. بكل قطعة بوجههم وايديهم ..
حضنتـهم الگلبي ..
وودي ادخلهم بي ومااطلعـهم ..

الناس والجيران كلـها واگفه وتبجـي عليـنا .
واني مااحس بوجودهـم ..
اولادي بـس الي موجودين بحياتي ..

ضرغـام .. كافي حور خلينا نفهم وين جانوا ..
حور .. لا ضرغـام مو هسا . خلي اسبحـهم واعشيـهم وبعدين احجوا وياهم ..

كلها تحمدتلـي بسلامتـهم .. وراحت
اني دخـلتهم سبحتهم ..
وكل شويه ابوس بيهم .. وهمه يضحكون عليه .
مرتضى .. ماما احنه خفنا ..
حور .. وين رحتـوا ماما ..
مصطفى .. مانعرفه واحد گللنا امكم دزتنـي اخذكـم للبيت وصعدنا وياه . اخذنا البيت وجابلنا غدا وگال ناموا والعصر اوديكم الاهلكم ..
ودور جـابه قريب ع الشارع ونزلنا گال يله روحوا الامكم واجـينه نركض ..

اني تخبلت من سمعت . منو هذا وشنو مصلحتـه يخطفهم ويرجعهم . وليش ??
اسئلة بقت تدور براسي ..

بدلتلهم وطلعـتهم .. لگيت فرح مسوية العشا .
گعدنا نتعشا كلنا .
واول يوم من اجيت الاهلي هيج اكل براحة وفرحانه ..
واسويلهم لفات وانطيهم .
حتى ماما صارت زينـة بس شافتهم ..

زياد .. وين رحتوا ولكم ..
حور .. زياد مو هيج . اني اسولفلكم بعدين .
حاجاه ضرغـام وسكتة ..

خلصنا عشا .
اخذتهم للغرفه گالوا مانعسانين ماما نمنا هواي اليوم .
گلتلهم خلص ماما هذا موبايلي العبوا بي ولاتطلعون من الغرفه ..

تذكـرت محمد .. اتصلت عليـه وخليت مصطفى يحجي وياه وطمنه وگله زينين .
گلـة انطيني امك .
نطانياه..
ماردت احجي وياه بس اضطريت .
گتله .. شرايد .
محمد .. لاعبالج راح اسكت ع الي صار . اندمـج ياحور على كلشي سويتيه .
حور .. ايدك ومانتطي بعد ماتهمني لان كرهتك وصرت لاشي بالنسبة الي .
سديته بوجهها ورجعت حظرته.
وانطيتهم الموبايل .

طلعت من الغرفـة لگيت خوالي وعمامي جايين .
وضرغـام يحجي وي صديقـة الضابط يگلة لگيناهم وگله اي همه سولف الامهم بس نفهم السالفه اخبرك ..

باوعلـي عمي ابو ضرغـام ..
گال .. ها حور شگالولج .
حور .. عمي همه ميعرفوه . اجاهم گللهم امكم متگدر تجي ودزتني اخذكم .
وبعدين ماخذهم البيت وجايبلهم غدا ومنومهم . ويگول للعصر كلش گعدنا .
وجايبهم منزلهم بعيد عن الشارع وگالهم روحوا ..

ضرغـام .. سالفه ماتدخل بالعقل . اكيد وراهم لعبـة .
زياد .. محمد ماكو غيره .. لازم يحققون وياه .
ضرغـام .. اني هم شكيت . بس وقت الحادث هو بالجامعه .ومانگدر ندينه ..
بس كلفت واحد صديقي يخترق خطه ..
وبعد نشوف اذا متصل او متفق وي احد .
زياد .. اخخ لو يطلع عليه شي الا اموته جوه ايدي ..
عمي .. الحمد لله من رجعوا . ديري بالج عليهم بنيتي وروحي دور قبل مايخلص الدوام وجيبيهم .
ونبهي الامن ماينطوهم الغيرج ..

حور .. اي عمي باجر مااوديهم . خليها على عگب باجر واروح وياهم واحجي وي المديره .
بس الي قالقني نومتهم الطويله اذا اني مو يمهم مينامون اخاف مشربيهم شي ..

ضرغـام .. شي طبيعي حتى خاف يبجون او يعيطون نوموهم ..
حور .. يممممه خاف يأثر عليهم .
ضرغـام .. لا مايأثر . بس اكيد محمد وراه لعبة من كل هذا والا ليش رجعهـم ..

بقوا النص الليل يحللون ويردون يعرفون سالفه محمد شنو ..
واكيد حصلت ملامة ووين لگيتيه وشنو شفتي من واحد مثل هذا .
ملعب وخاين ..

بس همه مايعرفون اني ماحبيت هذا الشخص .
اني حبيت محمد الي شفته اول مره وعشگته .
محمد الي غمرني بحبه وخلاني اسعد وحده ..
محمد ماكان لااناني ولا غدار ..
شلون تعلم فنون الغدر ماادري ..

محمد كان مثل المرجوحة بحياتي ..
طيله ذيج الفترة مطيرني بسعاده وهو يأرجحني بيها ..
وفجأه قطع حبلها ووگعني منها للگاع ..

كل واحد راح البيته . واني حضنت اولادي ونمت .
اول مره احس بطعم النوم هيج ..

فزيت الصبح واني ادورهم يمي ماكو ..
طفرت برى الغرفـه .
لگيتهم گاعدين وي ماما يتريگون .
ارتاح گلبي وابتسمتلهم ..

ماما .. اني اخذتهم يمي لان شفتج تعبانه ونايمه .
حور .. ليش هسا ببيش الساعه .
ماما .. بالعشرة ونص ..
حور .. اوووه شگد نمت ولاحسيت .. لعد ايمان والجهال ماكو .
ماما .. راحت الاهلها معزومه والجهال من المدرسه ياخذهم زياد يوديهم ..
حور .. يعني اليوم وحدنا .. شأسوي غدا .
ماما .. بكيفج .
حور .. راح اسوي مقلوبة مشتهيتها من زمان .واشويلج دجاجة
ماما .. لا اكل وياكم اني هم مشتهيتها ..
حور .. ماما والضغط .
ماما .. ياامي والله مليت من المشوي اخذ حبايه واكل مايأثر ..
#بقلمي_الكاتبة_شمس
................................................
سويت مقلوبه تخبل وزلاطه وگعدنا ناكل ونضحك وكأنه مامر علينا كل الي صار ..
شگد تمنيت عندي فلوس .. وااجر بيت واخذ امي يمي ونبقى احنه الاربعه سويه ..
بس تخلص شغلة محمد .. اشوف شغل واشتغل واطلع وحدي ماابقى عاله ع احد ..

بقينا اني والجهال ماما نامت ..
اتفرجنا ع التلفزيون .. وبعدين گعدنا ندرس ..
للعصر . سويتلهم كيك ..
دخلوا بيت زياد ..
گال الله شنو هالريحة .. من زمان ماضايگين كيك حور ويضحك .
تعجبت هذا زياد لو غيرة !!

ايمان .. هاي شنو بسرعه بعتني ..
زياد .. لا انتي الروح شلون ابيعج بس الصراحة كيك حور لايعلى عليه ..
طبعا اني بس مصدومة هذا شغيره .

طلعت الكيكة وقطعتها ..
زياد دز هيبت جاب بيبسي ..
وگعدت ماما وسوالف وضحك .
طلع من جيبه خمس الالف اثنين .
انطة وحده المصطفى ووحده الرضاوي ..
گالهم هاي الكم اشتروا بيهن .
فرحوا خطيه ..

گالوا ماما اخذينا للمول نشتري السيارات الي شفناهم
وي خاله فرح ..
گلتلهم مو هسا ماما باجر ..

مر اليوم عادي وكنت فعلا مرتاحة بهذا اليوم ونفسيتي مرتاحة..
ثاني يوم اخذتهم بأيدي للمدرسه .
ووصيت المديره والامن ..

وطلعت . اتصل بيه ضرغـام ..
گال حور شفت مكالمات محمد مابيها اي شي مشبوه .
هم عنده خط ثاني .
حور .. ماادري والله هو بس هذا خطة عندي ..

سديته وحايره منو وليش خطفهم ..
بطريقي رحت للصايغ بعت حلقتي ..
جابت 235 الف .
ع الاقل مصرف الي والجهالي ..

اتصلت ع فرح ..
-هلو حبيبتي شلونج .
-هلو فروحة وين انتي .
-بالدوام ..(فرح معلمـة)
-ها ولو راح اخذ من وقتج
شنو هالحجي احنه اخوات گولي .

حور ..اگلج فرح استحي احجي وي ضرغام . متگليله يشوفلي شغل حتى اذا بعقد .
تعرفين اني لغات وافهم كلشي بالحاسبه .
اي شي بس كون اشتغل وماابقى هيج ..

فرح .. بعيني اگله . اگلج عادي اذا بالوزارة يمه .
حور .. بعد احسن حتى هو يمي ..
فرح .. خوش يروحي اني اگله وارجعلج خبر وانتي اي شي تحتاجيه فلوس غير شي گولي وخليتلج مبلغ يم ماما ولو قليل .
حور .. لا فرح مااريدهم عندي بعت الحلقه .
فرح .. وج قابل اني غريبه . عود اعتبريهم دين من تشتغلين رجعيهن ههههه .
حور .. هههههه ربي مايحرمني منج .
فرح .. ولامنج يروحي ..

سديت الموبايل ورحت للسوگ اخذت احذيـة للجهال
واخذت فستق ابو العظم الماما تحبه .
واشتريت جبن ومستلزمات للبيتزا .
ورجعت ..

ماما .. اتأخرتي حور بقى بالي يمج . وشنو هاي الي جايبته.
حور .. للجهال احذيه وهاي مشتهين بيتزا اسويلهم بالليل وهاي الج .
فتحته .
گالت ليش هيج ماما انتي شعندج ..
حور .. عندي ماما بعت الحلقه اليوم .
ماما .. غير تخليهم الجهالج لاتبذرين بيهم .
حور .. تحجين صدگ ماما ممصدگة لازمـة بإيدي فلوس اول مره اصرف براحتي ..
ماما .. اووووف ياامي الله يفتحها بوجهج ويريح بالج .
صدگ نسيتيني هاي 250 الف خلتهم فرح الج .
حور .. خليهم عندج ماما من احتاج اگلج ..

سويت الغدا ورحت من وكت جبت الجهال ..
واخذتهم للمول بطريقي اشتروا السيارات الي يردوها .
رجعنا تغدوا وناموا .
واني العصر سويت العجينه وحظرت المواد ..

گعدوا ولد زياد .
وفرحوا لان حنسوي بيتزا ..
وكلهم گعدوا گبالي ويباوعولي وفرحانين .
حور .. هههههه شبيكم مشايفين ماما تسوي بيتزا.
مهمين .. لا ماما ماتسوي نشتري جاهز .

كملنا .. وكل واحد راد بوحده .
وجبنا كولا .
والي استغربته زياد متغير ويضحك . ولاعبالك نفسه الي هددني وگال ماعندج اخو بعد . من ماما حجت وياه ع الورث .
جائز تندم وغير طريقه معاملته وياي ..
المهم يضحك ويسولف وياي كلشي مااريد ..

بقوا الاولاد يلعبون بالسيارت وفرحانين .وولد زياد وياهم .
الجيران اجتنا بالليل وجايبين شوكلاتة وهدايا للجهال بمناسبه رجعوهم ..
كانت اجواء حلوه .
كنت ضايجة. وبس ابجي بسبب غدر محمد الي .
بس بعد ماانخطفوا اولادي ورجعولي..
نسيت كلشي وحياتي تجددت بوجودهم ..

بعد يومين الجلسة مال المحكمه ..
رحت اني وضرغام وزياد والمحامي لگيناه قبلنا ..
ومحمد جاي هو وامه وابوه واخوانه ..

جان وجوده لاشي بالنسبه الي وكنت اتمنى تنتهي الجلسة بسرعه واتطلگ منه ..

صاحوا اسمائنا ودخلنا بس اني وياه والمحامين..
گال القاضي بعدكم مصيرين ع الطلاق ..
گتله اي استاذ مااريده ..
باوع لمحمد . گاله اني هم مااريدها وخاصه بعد ماجهالي انخطفوا بسببها .
القاضي عفس وجهه گال خطف شنو .
المحامي مالته قدم اوراق التبليغ والخطف ..
واتهمني بالاهمال .
ودخلوا اهله شهود ..
وامه تگوله تنام للظهر واولادها ع گلبي اربي وادرس وكلشي اسوي اني .
الابو . گال دايما مشكالها والسانها طويل وماتحترم .
واخوانه نفس الحجي .

كنت اني بدوامه من الكذب والخداع والافتراء ..
دخلوا اخويه وضرغام .
وگالوا انه هو ياخذ فلوس منها وماينطيها مصرف وهاملها ..

بس القاضي حسيته ترك كلشي وركز ع شغلة الخطف .
منو ووين وشلون .
محمد .. استاذ الله اعلم يمكن همه الي خططوا الهاي الشغله حتى يتهموني بخطفهم .
لان ابن عمها هو الي خبر جماعته واكو ضابط صديقه هو الي تكفل الشغله ..
.تهجموا عليه بالمدرسه واتهموني واكو شهود امن المدرسه واكفين ودزوا عليهم واتأكدوا ..
#بقلمي_الكاتبة_شمس
.................. ...................... ..

اني صافنه عليه .. هذا شنو من بشر . شلون يربي انخدعت بي ..
گتله استاذ يمكن هو الي مخطط الكل هذا حتى ياخذهم مني ..
كلمه منه وكلمه مني .
ضرب القاضي ع الميز حيل ..
كافي احترموا شنو زعاطيط انتو گاعدين ببيتكم وهيج تتعاركون هاي محكمه ..
والله الي اشوفه اثنينكم ماتستحقون تربون الاولاد .
بس مضطر اشوف الانسب .
گالي انتي عندج وضيفه .. گتله لا .
وين گاعده حاليا .. ببيت اهلي .

باوع لمحمد .. محمد گام يفتخر عندي وضيفه وبيت وسياره وحالتي الماديه زينه .
ولاعبالك البيت والسياره الي جابهم مني ..

گتله استاذ البيت اني بنيته بذهبي . والسياره من ورث ابويه .
محمد .. ياورث هذا همزين اخوج ضحك عليجن واخذ البيت .
القاضي .. كافي سويتوها مهزله ترى ..

اطلعوا برة يله ساعتين ونرجع للحكم ..

طلعنا واني مختنگه . عيوني بس دموع .
طلع وراي هو . رحت عليه . الله لينطيك ياكذاب ربي ينتقم منك . حرامي مخادع .

سحبني زياد وعاط بيه . كافي وج فضحتينا ..
وانت حسابك بعدين ..
غصب ماعنك ترجعلها كل الي اخذته منها ..

محمد .. بحالها اني ارجعهن بس بالتقسيط ههههه .

شگد نذل ماشفت انذل منه بحياتي ..

ساعتين مرن عليه عبالك سنتين ..
اباوع لمحمد يحجي وي شخص والشخص دخل الغرفه القاضي وطلع ..
وبعدين سلم ع محمد وراح ..

بقيت بتوتر طول هذي الساعتين ..
بس صاحوا اسمنا حسيت رجلي صارت خيوط وبالگوه امشي ..

اني لازمـة گلبي .. اول ماحجة القاضي .
گال حكمنا بالطلاق للطرفين ..
وبعد الشهود والادله .. الاطفال وحسب الضروف المناسبه الهم حكمنا الحظانه الوالدهم ..
ومراعاة للام الها يومين بالاسبوع تاخذهم .
يعني تاخذهم الجمعه ترجعهم السبت ..

من گال هيج وگعدت بالگاع بجمود مابدر مني اي شي لادموع لا عياط لاانفعال ..
بس ممصدگة الحكم ولا متوقعته ..
بس صارت عيني ع القاضي وگتله .. يجي يومكم ياظلام

القاضي .. احترمي المحكمه اگدر هسا اخليج بالسجن لان تعديتي ع مسؤول بالدوله ..

تركته وماحجيت .. اي دوله الي تاخذ جهال من امهم وتنطيهم الابوهم الي مايعرف شيحبون او يكرهون شياكلون او شنو يشربون ..

طلعت من الباب .
زياد .. ها حور .. بعد ماكمل .
حضنته وابجي .. هو حظني حيل وبقى يمسد ع راسي ..
كنت محتاجه حظن ابجي بي وافرغ همومي ..
گتله زياد اخذو ولدي .
زياد حرموني منهم ..
اي دولع هاي وين عايشين احنه ..
ضرغام راح اله ولزمه من قميصه . عرفتك راح تلعب لعبه وسخه وتاخذهم .
مو عبالك ماادري كل ساعه دازلك واحد ..
بس خلي اگلك الظلم مايدوم ..

محمد .. ماعندكم شي عندي . طلگتها وكلمن راح بطريقه وجهالي الي . وماانطيهم الها لو تموت .
حتى تشوف شلون ماسمعت كلامي من گلتلها ارجعي وربي جهالج ..

باوعت وعيوني ورامات .. گتله محمد جهالي يرجعولي يرجعولي بس انت لو تموت ماارجعلك ..

صارت عيني بعين الشخص الي كنت بغرفته المره الي فاتت .
كان يباوع ويتصل بالموبايل ..
بس طول مايتصل هو عينه علينا عبالك يعرفنا ..

گلتلهم طلعوني منا بعد مااتحمل ..
رحت بوجهي للمدرسه مالتهم .
طلعتهم من وكت واخذتهم البيتنا .
ردت اشبع منهم .. اشمهم .
گاعده بالسياره وبس احظن وابوس بيهم ودموعي تجري
وهمه بس يباوعولي وصافنين عليه ..

عبالي ارتاحيت من محمد وراح اعيش وي جهالي وابدي حياتي ..
مااتوقعت محمد يطعني بظهري للمرة الثانيه ..
#بقلمي_الكاتـبة_شمس
يتبع.................................... .

حبايب التفاعل قليل والتصويت اقل ..
اذا القصه معاجبتكم گولوا ..