رواية حماتي سكر الفصل الثاني 2 - بقلم جيجي

هديتى بيتك يا زينات عشان توجبى معايا معقول للمرحله دى واصله انتى
زينات… اى ما عملهاش
ساجد… تهدى بيتك بايدك
زينات… شمشون هد المعبد عليه هو واصحابو… قعدتلك واللى يخرجنى يفرجنى…
ساجد… اه لا هو مش شمشون لا.. دا كدا شعنون هديتى البيت يا مجنونه
زينات… جن اما يلخبط كيانك لو راجل بس كلمنى نص كلمه واقول انك كرشتنى من بيتك وتغريد تشوفك الواطى اللى موقفش جمبنا فى محنتنا وتسيبك وترجعلى
ساجد.. لو راجل.. هه دا لو بقى.. هو سؤال بس ليه.. ليه بتعزينى المعزه دى ها ليه…. اكونش خنقت مرات ابوكى وانا ماعرفش
زينات… ستى كانت تقول… ما ينعز على البت الا جوز البت
ساجد…. ياختاااااى…
بس شاف تغريد جايه حضن زينات وقال..
اسم الله عليكى ياختاى.. عين وصابتك كمنك كنتى قموره فى الفرح عين.. عين ما صلت ع النبى يا حبيبتى
تغريد… اه يا ساجد شوفت
زينات… بس دى مش عين وصابتنا.. ده حظ نحس وراكبنا… واحد وش امو فقر علينا… دخل من هنا ودخلت معاه المصيب فوجا مفوجا
تغريد… ماما اى الكلام دا انتى هتصدقى الخرافات دى مافيش حاجه اسمها كدا اصلا
زينات… انا اكدب عينى واصدقك اهيش حاصله قدامى اهى… انا خايفه قوى يا تغريد وتعبانه وعايزه انام هريح حبه هنا على الكنبه دى ولاون عندى الغضروف
ساجد بهمس… الاهى ينطحك خروف
تغريد بهمس لساجد… انت هتسيبها تنام على الكنبه
ساجد… اعمل اى يعنى
تغريد.. تنام انت على الكنبه وهى تنام جوه
ساجد.. الا طب وانتى
تغريد… هنام معاها عادى دى امى
ساجد.. بس يعني هو مش احنا المفروض النهارده هنام سوا عرسان بقى
تغريد.. انت في ايه ولا في ايه مش معايا فى الكارثه اللي انا فيها ما عندكش احساس بيا
ساجد.. انتى اللي ما عندكيش احساس بيا بس خلاص تمام اتفضلي انتى يا حماتي جوه وانا هتلقح هنا
زينات بتمثيل… لا لا يا حبيبي انا هنام هنا انا والله منكسفه جدا منكم ورقبتى اد السستمه ومش عارفه اقولكم اى والله على مجيتى فى ليله زى دى
ساجد… لا ياختى ما تنكسفيش خشى نامى جوه
زينات… طيب تسلمولى انا هحاول احلها وماطولش عليكم
تغريد… اى اللى بتقوليه يا ماما دا انتى هتفضلى معانا هنا مش هنسيبك مش كدا يا سيجو
ساجد… ها اه اكيد
زينات دخلت تنام جوه وساجد قال….
تيغو انا اسف لو ضايقتك حقك عليا
تغريد.. انا ما زعلتش من كلامك انا كمان كنت بحلم باليوم اللي هكون فيه ليك والبس الفستان الابيض واعيش معاك بفرحه كبيره ونبنى بيتنا خطوه خطوه… بس ما اعرفش ليه فرحتى مش بتكمل… عارف البيت اللي وقع ده مش مجرد بيت دا كان اخر ذكرى ليا من بابا الله يرحمه انا مش مش عارفه اقولك ايه على البيت ده انا بابا اتوفى منى صغير اتخطف خطف ما عرفش لى
ساجد بص للاوضه اللى فيها زينات وقالت… انا عارف دا عمرو تقصف يا كبدى عليه.. احم قصدى يعنى اقدار دى اقدار وبعدين اذا ابوكى راح هتمسكي في البيت
تغريد.. كنت بلاقي فيه ذكريات بابا كنت بحس بوجودو
ساجد… انا معاكي هعوض غيابه ان شاء الله في حياتك ونبنى ذكريات حلوه قوي زيها لاولادنا انا وانتى اما ربنا يسهل يعني وامك تحن علينا.. قصدى لما ربنا يسهل ومامتك تروح مكانها يعني
تغريد.. على فكره ماما مش وحشه يا ساجد
ساجد… اه ما انا عارف انتى هتقوليلي
تغريد.. هى بس مش متخيله ان انا اسيبها وانت عارف انا بنتها الوحيده وهي ما عندهاش غيري انا صاحبتها واختها وبنتها
ساجد.. انا مش بلوم اي حد يمسك فيكي ولا يعمل اي حاجه علشانك واي حد يحبك انا شخصيا بحبك ومستعد اعمل اي حاجه في الدنيا عشانك ان شاء الله حتى اقتل امك.. قصدي يعني ان شاء الله حتى اقتل
تغريد.. بتحبنى
ساجد.. ايه السؤال البايخ ده يا بنت بقولك اعمل اي حاجه علشانك تقولي بتحبني… حبي اكبر من انه يتقال عليه كلمه حب اصلا… بحبك قوي انا عاشق انا مغرم انا متيم انا مسحور بيكي بجد انا مبسوط قوي ان انتى في حياتي يا روح قلبي… انتى عارفه انا فعلا زي ما امك بتقول نحس
تغريد.. ايه الكلام اللي انت بتقوله ده
ساجد.. لما تبقي قدامي كده وتلبسيلي روب زي ده واقعد قعدت الحزينه دى ابقى منحوس.. ومشيها منحوس عشان تتبلع اصل لو حاجه تانيه هيبقى منظرى زباله قوى
تغريد… بس بقى قولتلك بتكسف
ساجد… افضلي اتكسفي بقى ما احنا كنا هنكسر الكسوف لحد ما جات امك والغضروف
تغريد.. انا هروح انام هتوحشني
ساجد.. ماشي
تغريد.. ايه اللي ماشي ده مافيش انتى كمان
ساجد.. بصراحه انتى مش هتوحشيني انا ما تعودتش اكذب عليكى… ما انا لما بنام مش بسيبك ببقى معاكي في الاحلام لحد ما بصحى ما بتسيبنيش ثانيه واحده
تغريد بحب.. طب تصبح على خير
ساجد.. تصبحي في حضني انا يا بنت قلبي
تغريد جريت على جوه وساجد قال…
الله يخرب بيتك يا زينات.. يا رب انت قادر ومقتدر… خذ حماتى اخذ عزيز مقتدر..
ونام في صباح يوم جديد كانت تغريد بتحضر فطار ساجد حضنها من ورا وقال…
صباح الهنا …على عيون حبيبي انا… بتعمل ايه يا جميل
تغريد.. بعملك فطار
ساجد.. يا لهوي احلى فطار ده ولا ايه
وحط شعرها ورا ودانها وقال بهمس…
عارفه ان ده بقى احلى صباح في حياتي بوجودك يا حياتي
تغريد.. بصراحه انت من ساعت ما ظهرت في حياتي وانا كل يوم في حياتي بيبقى احلى يوم في حياتي علشان بتبقى انت فيه
ساجد.. ايه ده ايه ده احنا هنعلي على بعض ولا ايه يا بنت
تغريد.. ايه ما انت عمال تقولي كلام حلو من ساعه ما جيت وانا ما قلتلكش حاجه فقلت اقولك انا كمان حاجه حلوه
ساجد حط ايدو فى الدقيق وبقى يرسم قلب على خدها وتغريد قالت..
بس بتعمل ايه
ساجد.. بعمل قلب بدل قلبى اللى اخدتيه يا حرامية القلوب
تغريد.. تؤ بس بقى
وبقى يعمل معاها العجينه على شكل قلب ويزينوها سوا
زينات كانت بتراقب من بعيد وقالت… تغريييد
تغريد.. ماما ابعد.. ايوه يا ماما جينا اهو…
وقعدو يفطرو سوا وساجد قال….
بقول اى يا قلبى تيجى نطلع سوا هغديكى بره
تغريد.. اى دا بجد نطلع
ساجد.. اه نخلص فطار وننزل نلف لحد الغدا نتغدا ونيجى
تغريد.. تمام
وخلصو فطار ولبسو وساجد قال..
اى الجمال دا بينا يا قمرى
تغريد.. بينا
بس لقو زينات لبست وقالت..اهو انا جهزت
ساجد… جهزتى ليه
زينات.. اى

مش طالعين
ساجد.. اه طالعين احنا
وشاور عليه هو وتغريد وزينات قالت..
ايوه احنا طالعين اهو جهزت
ساجد.. لا احنا انا وتيغو
زينات اصطنعت الحزن وقالت..
اى يعنى هتطلعو انتو سوا وتسيبونى انا لحالى هنا خلاص مش مشكله روحو انتو
تغريد.. لا ياماما هو بيهزر اكيد هناخدك معانا
ساجد بهمس لتغريد.. اهزر اى انا عايز اطلع معاكى لوحدنا زى اى راجل ومراتو يا تغريد هتنطلنا فى البيت والخروجه كمان امال احنا طفشانين من مين
تغريد.. اش وطى صوتك يا ساجد عيب كدا دى ماما يعنى لو كانت مامتك كنت هتقول كدا
ساجد.. انا امى مش بتعمل كدا عندها دم
تغريد.. اش لتسمعك تزعل ماما حسساسه جدا على فكره
ساجد.. حساسه اه انتى هتقوليلى ما انا عارف احساسها احساس مرهف
تغريد… ساجد
زينات…. فى اى هو جوزك مش عايزنى اخرج معاكو ولا ايه لو متضايق عادى حبيبتى بلاش
تغريد.. لا يا ماما ابدا تعالى يلا هنطلع
وراحو عند العربيه وساجد فتح الباب وقال.. اركبى
زينات… لا معلش اركب انا جمبك
ساجد.. انا عايز مراتى هى اللى تركب جمبى
زينات… اه معلش اصل انا عندى الغضروف هى تركب ورا عادى
وقعدت جمبو وساجد اتنهد بضيق وطلع وكان بيبص على تغريد كل شويه فى المرايه… تغريد ابتسمت وهو ابتسملها ولفو شويه واتغدو سو وكانت زينات قعدالهم خازوق وفضلو على الحال دا شهر مش عارف حتى يكلمها لوحدهم وفى يوم كان بيتكلم فى الفون وبيقول….
اه يا ماما لسه عندى قاعده ومش باينلها مشيه اصلا انا متلقح هنا وتغيو نايمه معاها جوه
امو… حماتك حماتك هي حماتك دي مش عايزه تتكشح من عندك ليه بقالك شهر قاعد نفس قعدتك دي وهي ولا تحس ولا تتكشح من مكانها
ساجد.. ما انا اما بتكلم مع تغريد في الموضوع بتزعل وانا مش عايز ازعلها انتى عارفه ان انا بحبها
امو.. يقطع الحب اللي يجبلك حربايه زي دي تتحكم فيك اقولك على حاجه انت خليك قاعد زي ما انت هى مش مراتك بتقول ان المفروض انت ما تتكلمش ولو ما كانش في حاجه كبيره ما كانتش مامتها هتيجي تقعد القعده دي خلاص انا هحلهالك
ساجد… بتتكلمي بجد تحليها ازاي
امو.. عيب عليك وانا عمري قلتلك حاجه وما عملتهاش
ساجد.. بصراحه كتير يا ماما
امو… خلاص عشان لو ما قدرتش احلها ما بقاش كذبت عليك سلام يا قلب امك..
ساجد.. قالت قلب امك ربنا يستر
تغريد جات وقالت… كنت بتكلم مين
ساجد… بكلم ماما ما مش انتى الوحيده فى الكوكب اللي عندك ام
تغريد.. شوف هو انا عايزه اقولك حاجه ما تزعلش مني بس انت عارف ان دي امي ان انا ما اقدرش ازعلها علشانك ودا مش معناه ان انا مش بحبك لا والله العظيم انا بحبك وبموت فيك ولو خيروني ما بينك وما بين روحي هختارك انت.. دى بس ماما وما اقدرش اقولها لا انا مش عارفه والله اعمل اى حط نفسك مكاني
ساجد… على فكره انا حاطط نفسي مكانك انا لو دي امي كنت دخلت اتكلمت معاها قلتلها ما ينفعش اللي انت بتعمليه ده انا مبسوطه مع ساجد وعايزه افضل معاه او انا مبسوط مع تغريد يعني وعايزها بغض النظر.. انتى مش بتتكلمي معاها ومش بتبينيلها اصلا ان الوضع مضايقك فهي طبيعي تقعد وتبرطع
تغريد.. انت عايزنى اقولها يا ماما انا عايزاكى تمشي من بيتي
ساجد… لا ما تقوليلهاش كده تقوليلها ان ده غلط هي مش المفروض تفضل هنا
تغريد.. البيت وقع يعني هي مش جت بمزاجها على فكره لو مش واخد بالك
ساجد… مامتك اصلا هي اللي هدت البيت هددته علشان تيجي تقعد القعده دي
شوفنا ام الزوج نشوف ام الزوجه بقى… قولولى توقعاتكم تغريد هتصدقو ولا هتبقى خناقه لرب السما