رواية حمائم تخشى الطيران الفصل التاسع عشر 19 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

الشيهانة ..

يبس الدم بعروگي حسيت گلبي راح يوگف من الخوف غطيت وجهي بأيديني وتراجعت خايفة واعيط واسمع البنات يصرخن خايفات عادل تهستر ضرب الباب بكل حيله وكسر القفل وطب للشقة يركض ورا عمي وعمتي والبنات

وكفت مغطية وجهي محتمية بالحايط الصاير بظهري ما اكدر اشيل ايديني عن وجهي اخاف اشوف دم واحد منهم وينكسر گلبي ما اگدر

استغربت من ضعفي الغريب الما كان عندي شي منه
والله ما جنت هيج جنت سباعية وبهيج حالات حتى امي تتخربط من الصدمة واني الافزع بس مهيب ومشاري دمرووني وطمسو شخصيتي وخلوني بهذا الضعف

سمعت عمي يركض ويكول بخوف :- راح اشغل السيارة گوموها لو شيلوها شيل

اصوات البنات خفتت و صرت اسمع صوت عادل يصيح على عماد بغضب
:- احمد ربك لو جاية برگبتها جا ماتت البنية شتگول لربك لخايس ما عدكم تحكم بتصرفاتك مو مال مسؤولية

شلت ايديني من عيوني اباوع جبران يجر بعماد يطلعه من الغرفه وعماد مصدوم متبنج من الصدمة بس فاك عيونه

وطلع عادل شايل هدير شيل وهي مسلهمة روحها تصوبت بمتنهة شلون ما ادري

عمتي ركضت وراهم تبجي مرعوبة ..

عماد حط ايدينه على رأسه وكعد بالگاع يباوع بنظرة ضياع وحزن
زهراء تبچي وتگله بقهر :- ما تستاهل تلطخ ايدينك بدمها ليش هيج سووويت عماد ليششش

ضل يضرب على رأسه متهستر تحول مثل الوحش يصيح ويضرب ع رأسه قيدة جبران بلگوة ورجاء تغسل بوجهه تريده بس يهدأ

ضليت ارعش ميته خوف حسيت رجليني صارن خيوط من الخوف اگول هسة ينجلط ويموت

جان معصب وجهه دم ويضرب بروحه مقهور لمه جبران على صدره يقيد حركته حتى ميضرب روحه وهو انفجر بچي صار مثل الطفل المضيع امه يبچي بگلب ممرود ونحيب

يگول بغصه ونبرة متقطعة من القهر :- كتلتهة بأيدييي ولك جبران كتلت حبيبتي بأيدي من عسى ايدي گطع ولك بسلاااحي كتلتهة طاحت غرگانة بدمها جبران خوووية جبران كتلت هدير بأيدي

جبران :- اشش ما تموت ما تموت الزم روحك علمود نروح للمستفشى نشوفها
رد وهو يشهگ
عماد :- اخذنيي جبران اخذنييي اشوفنهة من كون ايدي تنكطع امداني امداني
ضل يغم بكصته حيل و جبران لازمة بلگوة

رجاء بغضب :- على شنو تدعي على روحك فوك شينها ومصايبها وياك بشيه بشيه
هزت ايدها ما عاجبها

جبران خزرها وزهراء طكتها حيل وهمست بغضب من بين سنونها :- مو وكتها اخونا مصدوم راح يموت من القهر سكتي عاد سكتي

عماد :- ولك جبررران اخذنييي

جبران :- گوم گوم بس بشرط تلزم روحك عيب ضابط واسمك شگدة هيج ضعيف وتنحب صير قوي اذا ما تصير قوي وحك اسد بغداد ما اخذك ولا اخليك تطلع عتبة البيت

عماد باوعله وعيونه يجرن حزن عليها وگاله بحرگة گلب
عماد :- ولك اخذني

تنهد جبران و گومه مقهور باوعلي وتنهد گال :- تمشين؟

عضيت شفتي محتارة وجهي كله دموع خزرني ونتر :- مسحي دموعچ

مسحت دموعي بمتني وهزيت راسي ب اي
رجاء كالتلي :- امشي روحي وياهم عاوني امي عليها والله اني ولا اروح ولا اشتهي اشوفها

لميت شعري ونزلت ورا عماد رجاء كضتني من زندي وهمست يم أذني :- هدير اذا ما سوتلها طرگاعة تشيب الها رؤس الرضع اطلع معتبة انتبهي منها مبينه انتي اول الضحاية

باوعتلهة بعيون متروسه دموع وحزن وقهر وهضم
ورديت بغصة :- ورا ما تفض هاي المصيبة اطلع منا بعد ما اكدر واحس المشاكل كبرت من اجيت

رجاء :- لا كبرت ولا شي هي برعه
زهراء :- وعلي ابو الحسنين لو ادري بهاي المصايب ف لا اجي تصخم وجهي بيوم القررت اجي

تنهدت زهراء ورجاء كشت وجهة متألمة هبة جانت واكفة بالباب مال المطبخ تباوع علينه صايرة صفرة من الخوف اجت اخذت رجاء من ايدها كلتلها يمكن ضغطج صعد تعاي ارتاحي

هن مشن للصالة واني طلعت للسيارة بالطارمة عماد كاعد كدام مدنك وجبران راح يجيب سويجة
وباب البيت مفتوح على وسعه الجيران واكفين يتفرجون ومن طلع جبران ضلو يحجون ويا بصوت عالي يسألونه شصاير
جبران گاللهم :- زوجة عماد تلعب بالسلاح و صوبت روحها

طلع السيارة وزهراء سدت الباب ورانه خطية اجن يم اهلهن يغيرن جو تمرمرن من اول يوم

بالطريق جبران كال لعماد :- هو شصار شلون تصوبت
عماد :- ضربتها سحبت سلاحي علي رادت تكتلني ضليت اتلاوة وياها علي ماادري شلون طلعت الرصاصة ما ادري ايدها جانت على الزناد

جبران بصدمة :- رادت تكتلك؟!
عماد :- لا ما تسويها رادت تهدد
جبران :- تهدد كتلي؟ خير ان شاءالله
هز راسه يتوعد وكمل الطريق لمن وصلنه ضلينه ندور عليهم لكيناهم عادل كال مدخيلنها عمليات

وكفت مرتجية ع الحايط مقهورة عماد كعد يم باب صالة العمليات مخلي ايدينا على راسه
واكو شرطي يحجي ويا عمي
عمي كله تلعب بالسلاح ماتعرفله وصوبت نفسها
كاله الشرطي من تطلع من العمليات لازم نعرف الصاير منها عمي كله ان شاءالله بس خليها تطلع سالمة وعدنا شهود يثبتون كلامي
كاله الشرطي نطلع ع بيتكم وناخذ شهادتهم كلهم

وراح اجة عمي جر جبران وكله بصوت ناصي روح بسرعة خابر ع البيت وانطي خبر للبنات خاف تطلع دورية على بيتنا خلي يكولن تلعب بالسلاح وصوبت روحها ما تعرف

جبران همس بغضب :- وصيت رجاء قبل لا اطلع بس هي من تكعد وصيها واذا كالت غير حجي اخليها تطلع من المستشفى تدخل سجن وقد اعذر من انذر

عمي رد بهمس :- لا ما تكول غير حجي وغير اخوك مصوبها زين ما موتها
جبران :- ست الحسن رافعه سلاحه علي وهو متلاوي وياها عبالك هو رايد يكتلها والله فقير انته ما ادري تسوي روحك ما تعرف سوالف هدير وعرامتها

عمي صفگ ايدينا متحسف وهز راسه بخيبة امل

مر الوكت وخلصت عمليتها كالو زينة بس لازم تضل تحت المراقبة فترة تنهدت وباوعت لعمتي كتلها طالعة اشم هوى اختنگت

درت وجهي امشي مكتفة ايديني وعيوني يجرن بقهر طلعت برة الحديقة امسح بوجهي واشهگ طلع وراي جبران غطيت وجهي عنه ورحت امشي ليغاد مخنوگة

بيده ماي تقرب مني فتحه صب بأيده وغسل وجهي تبللت كذلتي وخرها بأيده خلاها ورا اذاني وضل يسفط بشعري براحة ايده وهو يباوع لوجهي مبتسم واني عيوني كلها دموع
همست بغصة :- تضحك علي؟
هز راسه لا و تنهد :- لا تبچين وحگ اسد بغداد روحي تطلع ويا كل دمعة تنزل من عينچ

شيهانة :- انتَ ليش مهتم؟ مو گتلي بلسانك انتي طلعتي من روحي وگلبي بعد على شنو مهتم لامري وتضوج من ابچي

جبران :- الروح تطلع وانتِ ما تطلعين

نصيت مقهورة :- ما افيدك جبران روح عني اني طريقي متعب وشاق وطويل

جبران :- امشي وياچ لو ينفرش دربچ جمر امشي خلي احترگ فدوة الچ

شحيت نظري عنه اتحسر باوعلي مقهور ومدلي الماي
:- شربي نشف ريجچ

اخذته من ايده شربته
جبران :- اذا دست الجمر التارس دربچ وجبت ابنچ حطيته بحضنچ تاخذيني؟

فكيت عيني مصدومة :- تشاقة؟ جبران شنو لعبة كدامك لو شفت السواه بيه مشاري وتريد تعيده

عقد حاجبة بغضب :- شنو شايفتني ناقص مثل مشاري ولا تقارنيني بواحد خسيس مرة ثانية

:- شنو فرقك عنه هم كلي تزوجيني وارجعلج بناتج
:- هو جان جذاب وانه صادق وياج وفرقي عنه اجيبلج ابنج كبل ما نعقد اذا مايصير ابنج بحضنج ما نعقد
واضل ادورلج بناتج لحد ما الكاهن شگلتي؟

باوعتله بتفكير وغصيت بعبرتي :- تجيبلي ابني بالمقابل تاخذني؟! شكد تعبت من هذا الشي شكد تعبت ليمته تضلون تساوموني وتستغلون نقاط ضعفي بالاخير تاخذوني كاملة وتذبوني عظم

مسح وجهة لم شفايفه يكبح جماح غيظه و گال ينهي الامر :- هاي هيه انسي كلشي سمعتي مني واعتبريني ما حچيت شي وانه جلب ابن سطعش جلب ، و اذا عدت هذا الحچي شاربي ازينه

:- وخر خليني ادخل

:- امشي بس لا تبجين اشلع عيونج واحطهن بأيدج اذا بجيتي

هزيت راسي ب اي ودخلت ضليت كاعدة برة مر الوكت وبعدين طلعونه ضلينه واكفين برة بس عمتي يمها گال جبران
:- امشي نرجع للبيت نامي ارتاحي ما تستاهل تضلين هنا مسلوبة راحتج علمودها

باوعتله بخزرة :- تضل اختي ترا

رفع طرف حاجبة ما عاجبه باوعلي بنص عين گعدت على صفحة مكتفة ايديني تعبانة نزع سترته خلاها على اكتافي ولفني بيها باوعتله مستغربة
جبران :- الجو بي برودة تتمرضين

هزيت راسي بدون جواب وغمضت بتعب كعد بصفي وعمي رجع للبيت يم البنات وعادل رجع ضلينا هنا اني وجبران وعماد وعمتي

حسيت من كد التعب راح يغمة علي وبديت اغفى مد ايده ميل راسي خلاه على كتفه
همس :- نامي يلا عساها عيونچ ما تغفة وترتاح الا على متني

ضليت مغمضة بدون رد لان ما جنت استوعب كلشي،  غفيت

فززني صوته وهو يهمس يم أذني :- سهير گعدي سهييير بنية عمي
فتحت تك عين منعسه مد ايده لزمني من زندي وكمل كومي بسرعة امشي وياي

كمت بدون شعور امشي ويا صعدني بالسيارة خليت راسي ع الجامة كملت نومتي حسيته رجع يحجي وياي
جبران :- سهييير وصلنة فتحي عينچ بس دقيقة لحد متوصلين للغرفة ورجعي نامي
أنيت بنعس وسويت جج

تنهد ورجع يحجي وياي ما استوعب اليحجي من كثر التعب صرت مثل الميته حسيته حط ايدينه وحدة جوة ظهري والثانية جوة رجليني وشالني فزيت مخروعه وحوطت رگبته بأيديني خايفة
همست نعسانة :- ليش شايلني وين موديني راح تذبني بالبير؟

جبران :- لا سألقي بك بالوادي لتأكلك الضباع والذئاب

شيهانة :- والله انتم سواقيط ولد عمي حميد واحد صوب اختي وانته تريد تذبني بالوادي

جبران :- احرگچ هسة
شيهانة :- ليش؟
جبران :- مثل ما حرگتيني

غمضت وكتله بدون وعي :- سافل انته

حسيته نزلني على الفراش وغطاني سمعت حسرته وبعد ما حسيت غير الدنيا نهار شلت راسي لكيت روحي بغرفتي ونزهة نايمة بالكاع يمي بالغرفة استغربت باوعت للساعة بل10 لا صلاة لا شي واني شجابني شوصلني مو جنت بالمستشفى

گمت من فراشي طلعت غسلت وطبيت للمطبخ لكيت رجاء وزهراء يتريگن صبحت عليهن باوعلي مصدومات

خفت صاير شي كتلهن بخوف :- شكوو هدير بيها شي لو عماد؟ شصاير

رجاء بلعت اللگمة بصعوبة وهي تباوعلي بصدمة
زهراء :- لا سالمين وهدير زينه وكالت العب بالسلاح ما عبالي بي طلقة وصوبت روحي وكلشي انحل

رجاء :- شلون صرتي؟
قلصت عيوني اباوعلها بشك ورديت :- زينة

باوعن وحدة بوجه الثانية ورجعن باوعلي خلني استغرب روحي غسلت كوب وكعدت اتريك
رجاء كالت :- شيهانة تذكرين لصار الفجر

ضحكت :- اي جابني جبران بس شنو نايمة يكعدني مااقبل اكعد وضليت اغلط علي هسة من غسلت يلا تذكرت الصار شكد عيب ضروري اعتذر منه

رجاء :- الصريخ الصرختي ما تذكرينه؟ الغلط والسب

بهت وجهي وكفت اللكمة بحلگي تذكرت كلشي صار بيه من جنت يم مهيب هيج جانت حالتي يومية الصبح يكلولي ماتذكرين الصاير بالليل? وانصدم نفس هسه

رجاء شبكت اصابعها ببعض وجرت نفس وراها حجت
:- ترة من جابج جبران ورا فترة ضليتي تصرخين وتسبين باهلج وبينه فاقدة كلش متنة من الخوف حتى لطم ع روحج هم لطمتي

بهتت روحي ضليت ارجف واعصر بعقلي كون اذكر الصاير ما تذكرت شي رجاء كملت تحجي
رجاء :- جنتي مصدومة وتعبانة ويمكن تتحلمين ضليتي تصرخين جبران لا تحرگني وانتي نايمة

حسيت بخطواته وراي التفتت شفته يفرك بعيونه وكال بصوت مبحوح :- سهير كعدت

شال ايده شافني باوعلي عيونه حمر سحب الكرسي وكعد كال
:- تحسين بشي تذكرين؟

هزيت راسي مبهوته لا
باوعلي مقهور بنظرة شفقة شحيت نظري عنه ما احب نظرات الشفقة اقرف من روحي

جبران :- تريگي واخذي علاجچ التزمي بي علمود تطيبين سهير ترة ماكو شي يخوف سمعتي الطبيب شگال

هزيت راسي ردت اكوم حسيت حتى رجليني ما يعينني ما ادري شلون جبرت روحي اكلت لكمتين اريد اوهمهم اني طبيعية ايدي ترجف ما اكدر اوصل اللگمة لحلگي تطيح وارجع الزمها زهراء ورجاء كامن طلعن من المطبخ بسرعة

جبران :- طلعن البنات هاي هيه عوفي الاكل عيشي مشاعرچ لا تكبتين بداخلچ

جريت حسرة وعيوني ضلن يجرن
باوعتله بقهر :- تذكر من سولفتلك
هز راسه متحسر غمض عينه بتعب وگال
:- اخذج لغير طبيب بس تمر هاي الازمة هسة التزمي بعلاجچ خوش مو تعوفينه

هزيت راسي مقهورة باوعلي عيونه حمر كال
:- لا تبجين كتلج لا اشلع عيونج

مسحت وجهي وطلعت للحديقة مختنگة محد حاجاني شي بعد خفت من روحي كلش ما اعرف شسوي معقولة اضل هيج بهذا الجنون والخبال خاف اسوي شي محرج اكثر لو اوكع روحي بمشكلة

مليت من روحي دخلت اخذت علاجي وبعد ما طلعت من الغرفة لحد ما جابو هدير باوعتلي بحقد عماد جان لازمها وهي مجلبة بأيده دارت وجهة عني صعدوها فوگ وبعد ما شفتها وما تقبل احد يخدمها غير نزهة

ارتاحيت من شفتها رجعت لخبالها وجسارتها عرفتها زينه ما بيها شي

واني سيطرت ع روحي من ارتاحيت تحسنت اوضاعي حتى نومي صار عادي مو مثل اول ما احس بروحي ويحاجوني اغلط عليهم هسة شمالني اغلط عليهم شگد مسودنه

رجاء كالتلي خلينا نروح نجيب حلويات ونرجع لبست هدومي وطلعت ويانه نزهة شافها صلوحي
رجاء كضت ايدي خايفة وكالت مرعوبة وهي تباوعله
:- اخاف منه هذا شافط

صلوحي :- اووو شبيج جايبة وياج نسوان ثنين استحي ابوسج كبالهن كبر كطعتن رزقي روحن ردن للبيت ردن

شال عصته رفعها علينا اني ورجاء وركض علينا ما تشوفون بس غبارنا ورانه رجاء لابسة شحاطة بيها كعب ضلت تركض مشولخة وهي يركض يصيح ردن ردن كطعتن رزقي

رافع گلابيته الوسخة مخليها جوة باطة ويركض واحنة نصرخ ونزهة نزعت نعالها تركض تهدد بي

نزهة :- ولك عوفهن لا وحك الحسين اكتلك بالنعال اكطعة على راسك عوفهن

وگف كللها هاي لخاطرج صلوحة

نترت بغضب وهي تهددة بالنعال :- ولك الاجرب يمته بايسني من كون عمت عيني اذا اخليك تبوسني
شني خلصت الزلم واضل معوزة لبوستك

ركض عليها وهي تكتل بي بالنعال
صلوحي :- الا ابوسج حبيبتي صلوحة غير انتي مرتي انه ماهرج كيلوين تمر خستاوي

نزهة :- بالحسين اذا تبوسني اغسل وجهي بتيزاب ولي لحد يشوفك عباله مصاحبتك وتنگطع قسمتي

طلع رجال من محله اجة فكة واخذه صاحت علينه بنتر وهي تلبس نعالها
:- المايعات امشن يلا نروح لابو طالب

خذتنا الدرب كله تدردم اخير شي ضلت تبجي من صدك وتمسح عيونها بطرف شيلتها وتكول :- هاي تاليتي يحبني واحد خبل من امداني وعمت عيني ضاله لا الي ولد لا عندي والي المراه تنهضم من تشوف رويحتها وحيدة ومالها احد

كسرت خاطرنة صدك نزهة ماعدها احد وهم بعدها صغيرة تكدر تتزوج وتستقر وحتى تخلف الها طفلين يلمون كبرتها ..

اشترينا ورجعنة كعدنا شوية وهدير صاحت على نزهة كلتلها اريد احجي ويا شيهانة استغربت وكلهن كالن دخيلك ربي المصايب جاية

كمت غسلت ايدي وعمتي انطتني ماعون حلويات عازلته الهم كالت اخذي بيدج وصعدت

سلمت عليها تباوعلي عيونها مدمعة حطيت الصحن على الميز التمست الحزن بنظراتها رحت كعدت كبالها

كالت بهدوء :- شلونج اخيتي

اختنكت من كالت اخيتي وتجمعت لغصة ببلعومي شلون طلعت وكتلها زينة ما ادري
ضلت تدمع وتهز راسها مقهورة لزمت ايدي بايدها استغربت اكثر بلعت غصتي وكتلها انتي شلون صرتي

هزت راسها وكالت :- زينة خية زينة ليش ما صعدتيلي شفتيني شلون صرت ليش ما سألتيني عن حالي اول ما اجيت حتى ما حاچيتيني

تنهدت مقهورة نصيت راسي بحزن :- انتي الكارهتني وما ترديني هدير نظرتج الي كلها حقد وغل واني ما مسويتلج شي تعرفين كلش زين معزتج عندي من جنة صغار لهسة ولا مرة شلت بكلبي عليج بس انتي كل ما اجالج تزيدين

ضحكت بقهر ومسحت دموعها :- صح من جنة صغار وكسرت المواعين خفتي انكص ركضتي علي حافيه وتشككن رجلينج حتى

ضحكت بقهر واني اتذكر :- اي لحد هسة اذكر الالم مال الخياط ولا جنتي تكعدين شعوذة جنتي

تحسرت وضلت تمسد ع ايدي لزمت ايدها خليتها بين ايديني
:- اني احبج وماعندي احد غيرچ هدير احجيلي ليش تصرفتي وياي بكره اذا احد حاجيلج شي حتى يفتن بيناتنه كولي والله اروح ادوس راسه دوس بس احجي

ضلت تبجي بحركة كلب وكالت بحقد :- اكرهم ماريدج تضلين يمهم اكرهم اني صابرة ومتحملة بس انتي ما عندج شي مامجبورة تضلين

باوعتلها بعطف وحجيت بهدوء :- شمسويلچ احجي؟ ليش تكرهينهم
ردت بغصة :- ما مسوين شي بس جبران مسوي واني اكرهم لان اهل جبران

عقدت حاجبي مستغربة صفنت لحظات بتفكير ورديت :- جبران شمسوي؟ احجيلي اسمعج

سحبت ايدها مسحت دموعها حيل وگالت بشهگة :- جبران حرگ اهلي سهيرر ما حجيتلج من اجيتي ماردت تلطخين ايدينج بدمه ادري بيج ما تسكتين ، ما ردت اخسرچ بسبب نار حقد والانتقام ....

....
.....

ليلى ...

الضابط شاف جوازاتنا وباوع بوجهي لحظات ورجع باوع بوجه قيس سد الجوازات وگال وهو يضحك تك خد كأنه اسد لگة فريسته :- اخذوهم للتفتيش وحضرو السيارات السيد وزوجته صارو بأيدينا ..

قيس رد بهدوء .. ليش سيدي احنة سوينه شي؟ اكو غلط بجوازاتنا

رد ...ورا التفتيش نحجي

ضليت ابلعم اخذونا كل واحد اني نسوان فتشني نزعني حتى ملابسي وشعري فتشنه ونبشو الجنط نبش ما لگو شي خلوني كاعدة وطلعو

مر الوقت واني بغرفة التفتيش وحدي اسمع صوت تكات الساعة واعصابي ترجف هنا العراقيين يشتغلون بالسفارة وحتى يشتغلون بالمطار بتعاون ويا امن المطار بهاي الدولة

عبالي بطلعتنا من العراق وجيتنا لهنا حتى نسافر معناها انتهى كل شي طلعو جماعة البعث هم ورانة

حسب العرفته هنا جماعتنا يشتغلون كدبلوماسيين واليدخل للسفارة يتعذب وينلعب بي لعب هنا بالمطار الوضع افضل لان يخافون تخرب ويا امن هاي الدولة

فقدت اعصابي من الانتظار كانوا يتعاملون ويانة بطريقة نفسية ويضغطون اعصابنة طرقهم خبيثة وتعذب البشر تخلي ما يعرف مصيره

گاعدة بغرفة التفتيش ارجف انتظر اعرف مصيري ومصير قيس

مرت الدقايق مثل الساعات حسيت بكل دقيقة جاي اموت لحد ما اجو طلعوني ولگيت قيس ينتظرني يمه الضابط

شكل قيس جان يطمن تنفست براحة واجيته
گال يلا لتروح علينا الرحلة حبيبتي

الرجال باوعله وگله :- نشوف النة يوم من نجي للعراق ونزور الوالد نسلم علي

قيس رد بكل هدوء وراحة :- يا هلا بيكم نحطم على رؤسنا والله وشرط ما نقبل بس سلام غداكم يمنه

گاله ان شاءالله ومشينه ركبنا الطيارة يلا تنفست براحه شاورته :- يعرفون اهلك

قيس همس :- لا يردون يخوفوني عبالهم عندي انتماء لحزب الدعوة
ليلى :- ليش فتشونة؟
قيس :- عرفو عن طريق لقبي اني سيد وعندي سفرات متكررة صار عدهم شك لتخافين حبيبتي الماعنده شي ما يخاف احنة الحمدلله كافين خيرنا شرنا

تنفست براحة وضليت متوترة وكاعدة على اعصابي وبعدين صابني غثيان بس هبطت الطيارة تقيئت ونلعب بأعصابي وروحي فد نوب

لزمني قيس بقوة لاف ايده ع خصري يخاف اوكع ويجر بالجنطة
گال باهتمام وخوف :- اذا حسيتي روحج ماتكدرين تمشين احجي كولي حتى نوگف

هزيت راسي بدون رد من رحنا للفندق فتت للحمام منهارة ضليت ابجي من الخوف اعصابي انهارت فد نوب لشتي كلها ترجف
غمضت عيوني الهث واكول بصوت خافت الحمدلله الحمدلله كل المعلومات خلوني انقلها على ذاكرتي وما انطوني قرص مرن لو اوراق الحمدلله جان هسة اني بغرفة التعذيب وقيس تورط بسببي

دك باب الحمام وفتحه فات شافني منهارة اجة ساعدني كومني ولبسني ملابسي
قيس :- بسم الله عليج يا عيني اخذج لاقرب مستفشى بس جمعي قوتج حتى نكدر ننزل

هزيت ايدي ب لا وشحيت نظري عنه كتله لا مابيه لعبت روحي من هبطت الطيارة
طلعني كعدني على السرير وخله ايده ع معدتي يمسح عليها بهدوء ويقرا سورة الفاتحة سبع مرات حتى اطيب

كمل گال وهو يعدل المخدة :- ارتاحي خاتون نازل اسألهم على علاج لتگومين خاف توگعين وتتأذين

هزيت راسي باوعلي بنظرة شك وگال .. ضامة شي عني ليلى احجيلي

بجيت خايفة غطيت وجهي ضليت ارجف كعد لزم ايديني شالهن من وجهي ومسح دموعي
:- احجي ليلى شكيت بشي من رد فعلج
همست خايفة: شنوو

قيس .. عندج شي ضد الدولة لو حاجية كدام احد على النظام احجي اريد اعرف ليش توترتي كلش بالمطار صرتي صفرة لدرجة من فتشوني بس يسألون عليج وكل شوية يكلولي ليش مرتك توترت وصارت تنكط عرگ

بقيت خايفة كمل كلامه .. زين مو بفد مطار من مطارات العراق جان هسة احنة بالهاوية هناك ع الشك يسجنون اتوقع اسمائنا راح توصل للامن بالعراق وراح نصير مراقبين

هزيت راسي لا واني ادمع ... خفت لان بالتفتيش ضلو يضغطون علي يردوني اعترف بشي ممسويته

قلص عيونه بشك .. متأكدة؟

.. ايي

... خير ان شاءالله هز راسه وراح طلع ورا شوية اجالي جابلي علاج اخذته ونمت

من كعدت لگيته نايم غسلت وجهي ولبست كلت انزل اخابر من تلفون الفندق واذا سألني وين نزلتي اكله خابرت خالتي

طلعت ع اطراف اصابعي خليت الرقم حافظته وخابرت اجاني صوت بنية
:- هلوو عمري اني ليلى صديقة بنت خالتج
ردت ... ياا هلاا شلونج

...زينة الحمدلله اسأل عليج .. وعندي الج مفاجئة صرت يمج واريد التقي بيج اشوفج
...صدك؟ شوكت اجيتي
...اليوم

...ممم اني باجر العصر فارغة انتي نازلة يم اقارب لو بفندق
...لا عمري بفندق تكدرين تجيلي
...سهلة اكدر طبعا انطيني اسمه ..  انطيتها اسم الفندق ونهيت المكالمة لازم نلتقي وانقل الها كل العلومات والاسماء حتى ينشرون كلشي عبر الانترنت

كمت اريد اصعد لگيت قيس وراي واگف ومقلص عيونه بشك وجهة احمر
ما گال غير كلمتين ونطقهن بطريقة كأنه يعرف الاجابة

قيس ... ويامن تحجين؟

..
دنيا ..

عبد الرحمن .. لو بس افهم شعنده مسافر اخوكم مو طبيعي مصطفى مرتضى هاشم انتم تلاثتكم من يرجع اخوكم اريدكم تفتحون عيونكم علي وتراقبونه
تشوفونه منين يجي وين يروح اني خااايف

هاشم :- شسالفة يابة ليش هذا الخوف؟

:- اخاف قيس مشة بدروب مو زينة ولكم كلبي ناغزني علي خايف يوكع روحة بمشكلة داحلم بي احلام تغث

مرتضى ...اكلك شي يابة وما تزعل؟
رفع حاجبة
مرتضى نصة خجلان وكمل ... خراب قيس اجة منك اعذرني بس هذا الصدك الولد عشك وهام وراد البنية وهو كفلها لو قابل ورايحين سائلين عن اهلها وشفنه وضعهم شنو وحطينا شروطنا عليهم ثنينهم

مصطفى .. صحيح يابة ليش وكفت عارض بطريق حبهم؟ انته تكول لان عامية هاي اني ماخذ عامية شمعنى شنو الفرق بيناتنا اكيد تحز بنفس قيس ويضوج

هز رأسه ورد ..انت يوم الخطبنالك عامية خطبنة بنية بت عايلة متدينة وملتزمين من الصغر ابوها شيخ وامام جامع وصيتهم وسمعتهم الزينه سابقتهم من ردنه نخطبها واستخرت ارتاحت روحي وهاي زواجكم صلاوات على محمد وال محمد مستقر وحلو

بس هاي البنية حسب العرفته مو مثل جنات مرتك ومن استخرت انضكت روحي ولا ارتاحيت وكتله بهذا الحجي بس ما اقتنع يكول اخطبها الي وادعيلي ارتاح وياها!! شلون ترتاح وياها يا ابني وهي البنيه شر عليك؟ ما يقتنع

والله ولا اخذها اله لو تضل اخر بنية كلبي ما مرتاح الها

تعبت نفسيتي من هذا الامر وضجت كلش ضليت كاعدة على اعصابي لحد ما والدي دخل ينام صعدت للغرفة بدلت ملابسي بثوب خفيف وطفيت الاضوية تمددت

باوعت للشباك وتعوذت الشيطان غطيت راسي ورا دقايق وبدون تفكير نزلت رجليني من الجرباية وكمت شلت شوية من الستارة وفتحت الشباك فتحة صغيرة وباوعت بأتجاه غرفة سيد مؤمن

مثل كل يوم گدامه كتب كبيرة مشغل الانارة ويقرأ ومرات يكتب
مندمج ، يلبس كله كلابيات سود نص ردن ولحيته طويله شوية شعره ناصي كلش وايده بيها خواتم كبار يثيرن فضولي واريد اعرف احجارهن شنو سيد مؤمن اسم على مسمى .. وجهة وقور وبي نور الايمان
ما يباوع بأتجاه بيتنا ولا حتى بنظرة وحدة مثل كل ليلة اضل واگفة اراقبه بفضول لحد ما سد شباك غرفته ونام ..

مرن الايام كل ليلة تاخذني رجليني بفضول للشباك بس اريد اعرف شنو قصته ليش مايتزوج ورا مرته الماتت وشعجب لهسه حزين عليها
وشنو يكتب؟ شنو تفاصيل حياته وشنو تغير بي بعد دراسته بلندن

هواي نقاط بمؤمن اريد اعرفهن بس استحي اسأل اخته عنه خاف تظن بيه سوء وحسبالها اريد اتزوجة والله اني ما اريد اتزوجة بس احب اعرف عن حياته
عندي فضول اتجاهه كبير ..

اندگ باب بيتنا بيوم من الايام وقبل رجوع قيس من السفر طلع اخوي ورجع بسرعة يكول تحجبن تسترن تفتيش لبسنة عبينا وغطينه وجوهنا وكعدنا بالمطبخ دخلو يفتشون البيت ويدورون بالكتب عن شي ضد النظام بس ما لكو

وحتى المطبخ فتشو
باب المطبخ مفتوح على الصاله والضابط واكف بهيبتة وجبروته يم والدي بس الحق يقال كان محترم جدا وكله يكول لابوي سيد سيد

وشوية ودخل الضابط الثاني الحقارة مبينة على وجهه سألهم شنو لكيتو وضل يكلب بالكتب ويامرهم يفتشون مرة ثانية كأنهم سامعين شي علينا وجايين متعنين ..

الضابط الحقير ..
باوع لوالدي عاقد حاجبه وگاله بنبرة تساؤول ...جماعتنا قبل كم يوم فتشو ابنك بمطار وحدة من الدول مسافر طيران

ابوي رد بثبات ...خير ان شاءالله
الضابط ...شتگول شنو عنده ابنك قيس وشعنده مسافر

...زيارة عائلية وهم يغير جو ماعنده شي ولدي يمشون بصف الحايط الحمدلله

هز رأسه ...خوش حجي الحمدلله

عبد الرحمن ...اذا تريد سيدي من يجي اجيبه الكم تحققون ويا خاف عدكم شك ماعندي مشكلة

...لا ما يحتاج حققو ويا هو وزوجته ......للحكاية بقية 🖤

رايكم بالقصة يهمني 🖤 ...