رواية حمائم تخشى الطيران الفصل الثامن عشر 18 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

البارت غير مراجع اعتذر 🚫 تفاعلكم فضلا ..

هبة .

اركض وراهم احجي ويا الضابط محترگ دمي افور
هبة :- ما يصير سيدي تجي تاخذها هي مريه واحنه هم ناس معروفين وتجار وصيتنا واصل الاخر الدنيا مايصير نسوانه تدخل السجون

گال بتفهم :- اختي العزيزة انا اتفهمچ بس مو بيدنا الاخت هدير راضي قدمت شكوى ضد سهير راضي گالت محاولة تقتلها
رجاءً لا تعطلينه القانون قانون ما بي استثناءات

نترت بوجه هدير :- هديررر سوي شي تنازلي بسرعة راح ياخذونها لتباوعين وانتي ساكته شوكت رادت تقتلج اتقي الله انتي عثرتي و وكعتي من الدرج

الضابط رد :- على ركبتها جرح محاولة تضربها بالسجين

فتحت عيني بتعجب ورديت بأستنكار :- لا ما سوت هيج حرام هاي تهمة باطلة اني اشهد لان جنت موجودة سهير ما لمستها حتى ، هدير تهجمت عليها وطعنت بيها اني جبت سهير يمي خفت عليها من هدير

الضابط رفع اكتافه بقلة حيله و رد :- بالمركز تنحل وين زلم البيت؟
هبة :- مموجودين سيدي

:- هاي هي ناخذها لحد ما تتنازل هدير عن اختها

باوعت لسهير ساكته متحچي كأن لسانها انبلع تباوع لهدير والحزن غازي عيونها تريد توكع دمعتها ولازمتها گوة تكابر وترفع رأسها حتى متنزل دمعتها وتنهز صورتها

تبلع غصتها ولازمة روحها عن البچي گوة ولازمة شهگتها گوة ..

اخذوها ضليت الطم ركضت للبيت بسرعة بدلت واخذت جنطتي خليت هدى يم جارتي جانت بالباب واكفة تريد تعرف الصاير ، ولحگتهم للمركز عمي والولد كلهم طالعين وما ردت اخابر احد من الاقارب هاي مشاكل عائلية عيب نخليهم يتورجون عليها والله اني علمود الشيهانة اذا على هدير جان خابرت حتى الاقارب بالبصرة وشهرتها وخزيتها الصلفة

نزلت اركض سألت گالو مخلينها بغرفة الضابط استغربت راح الشرطي دخل وراها اذنولي ادخل لكيتها كاعدة كباله منصية راسها وهو ورا مكتبة يحجي وياها يگللها

:- انتم عائلة مرموقة ومعروفة انا اشوف لو يجون زلمكم ويدخلون ويحلونها مو حلوة بحقج وبحقهم تدخلين للسجن

هي ما ردت حجيت من يمي :- اي والله سيدي ابد مو حلوة رحمة على روح والديك شنو الحل شلون نطلعها

هز رأسه بأسف :- هدير لازم تتنازل چا هيه تگول سهير رادت تموتني وركبتها بيها جرح ورجلها تعرج
انتي صدك شامرتها من الدرج؟ شو انا ما مصدگ بس شبيدي؟

شيهانة بغصة :- لا ما دفعتها هي تهجمت علي وطعنت بيه وعاركتني جانت تحجي علي وعثرت وركبتها مابيها شي الطايح من الدرج تنشگ ركبته؟ هسة لو راسه بيها باب وجواب

باوعلي الضابط اكدت ع كلامها :- سيدي اني اشهد طعنت بيها هواي والا شوية جان ضربتها اني كلت اخذها يمي لبيتي حتى متصير مشكله خفت ع سهير من هدير

الضابط :- اذا متهجمة عليچ وطاعنه بيچ تگدرين تشتكين عليها

هزت رأسها ب لا گالت بغصة :- ما اشتكي على اختي اني سيدي ما اشتكي على اختي الشالتنه اني وياها بطن وحدة هاي اختي شلون اشتكي عليها؟

هز راسه بأسف زلم شفايفه وصاح :- صالح

دخل گله :- الاسمها هدير وين جيبها دخلها

صالح :- تأمر سيدي

طلع وسد الباب باوعلها الضابط وگال :- بس هدديها كليلها راح اشتكي وانه أأيدج خليها تخاف وتسحب شكوتها واطلعچ منا زحمة بنية بيت حجي حامد تبات بالسجون

شيهانة :- اريد ابات بالسجن لا تتنازل
فك عينه متعجب طاحت دمعتها غفل مسحته بظهر ايدها بسرعة وگلتله :- اريد گلبي يجوز منها كلش واشوف حقدها اتجاهي لأي مرحلة واصل

هبة :- بعد شنو تشوووفين اكثررر هدديها خليها تتنازل غصب عنها وهاي هيه وضحت الصورة الج شتكول سيدي؟

:- اي والله وضحت بعد شنو تنتظرين التجي تتبلى على اختها وتذب براسها مصيبة هاي عدو مو اخت مثل ما گـالت الاخت ..
هبة :- هبة سيدي
:- مثل ما گالت الاخت هبة الصورة وضحت

دخل صالح ويا هدير وطلع بس دخلت تباوعلنا بحقد تمنيت اكطعها تكطع قهرتني حقارتها باوعت للضابط ورجعت باوعت النه بحقد وتعالي النذلة گبل نتر بيها الضابط خلاها تفك عيونها مصدومة وحتى نفسها قطعته

:- اختججج قدمت عليج شكوى تهجم وطعن وتهديد والاخت هبة شاهدة راح تنورينه اليوم وتباتين ويا اختچ بالتوقيف

هدير :- جذااابة جذااابة غسلت عقللللك مثل غيرك اني ما مسوية شي الها والله ممسوية ما حجيت شي وياها هي تهجمت علي

نتر بغصب :- لج احترمي نفسسسج شنو غسلت عقلك طفل كدامج وتصيحين بوجهه صاااالح صااالح

صالح :- نعم سيدي
:- صيح لهناء واخذوها للتوقيف .. اشر برأسه عليها هي ضلت تلطم وتبجي وتتوسل بي بس ابد ما خضعت گدام شيهانة عبالك عدوتها هيج حقد ما شايفة

الضابط نتر بوجهة وصاح :- لساااانچ .. اخذوها يلااااا

اخذتها هناء للتوقيف ضليت صافنة شو هذا سواها صدگ من طلعو فرك وجهه وكال بضيق نفس كاش وجهه
:- عجيبة مو بنية ضيم اسود بلاء هاي جرة أذن الها حتى ما تتجرأ وتعيدها نوبة الثانية
اريد اكسر شوكتها واخليها تبطل رعونية وصلافة

شيهانة :- واني سيدي؟

:- خليج شوية واجيبها غصبا ماعليها تتنازل وتطلعين تكدرين هسة تنتظرين هنا انتي والاخت هبة عندي كم شغلة اكملهن منا لذيج اللحظة تكون هدير تابت وعضت الاصابع ندم اجيبها تتنازل وتطلعن سوية للبيت

گام حط مسدسه بالكراب وطلع كعدت كبالها گتلها بقهر :- والله بلوة كون ميرجعون لحد منطلع منا
شيهانة :- ان شاءالله
هبة :- بس منسكت نگللهم كل شي خليهم يحطولها حد سايبة مالها رداد هاي بعد يومين تسجن العائلة كلها

شيهانة :- من الصدمة احس لافين عليه سلاسل ومربطيني ما ادري شنو صار بيه لساني انعقد فد نوب ما كدرت حتى ادافع عن روحي

هبة :- شنو تدافعين اني اجيت اوگع كل شوية تفتر بيه الدنيا ومصدومة لشتي كلها ترجف

شيهانة :- فلك طر عمرها ..

سكتنا ثنيناتنا وعيني وكفت ع الساعة تقريبا نص ساعة وطب الضابط ورا سهير وجهة احمر وعيونها يصبن مورمات بأيديها كلبجات لميت ضحكتي ع شكلها تباوع لشيهانة بحقد وغل حسيت اذا هسة يفتحونها ويكلولها سوي باختج التردي تحرگها وهي عدلة!!!

الضابط ضل يحجي وينتر بيها وبعدين هناء فتحت ايديها وخلاها تتنازل بالغصب كللها اختج ما تتنازل عنج اذا متتنازلين
وهيه خافت وخضعت صاح الهم يجيبون جنطتها انطوها الها شالتها ايديها يرجفن وطلعت تمشي قبلنا مكسورة باوعتلها بمشاته طلعنا وراها رحم الله روح والديه هذا الضابط وكف ويانه وعرف الحق من الباطل شريف ونزيه

لگيناها برة واگفة تنتظر طلعتنا اجت تركض علينا وضلت تحجي :- لا تحجن شي گدام عماد وعمامي والله يطلگني وبذمتچن

شيهانة :- ما اريد لسانج يطخ ع لساني وبالبيت نتفاهم مو بالشارع

هدير :- ماعندي تفاهم وياچ ولا اريد احجي وياچ واسولف بس اطلب منچ طلب لا تحچين گدام عمامي وعماد علمود ما اتطلگ اني اختچ لتدمرين حياتي مالي احد مثلج مسفطة العالم جوة ايدچ حتى الضابط فريتي عقله

شيهانة نترت بغضب :- ولچ شگد صلفة هاي حاجتچ يمي وهيچ تحچين انتي شنو من بشر ما تنكسر عينچ؟ فهميني من شنو طينتچ والله نجسة

هدير بغضب :- حياتي مو مثل حياتج ولا حظي مثل حظج طول عمرج وشما غلطتي كلها خاضعة جوة رجلينج جدي وابوي يموتون عليج ، من غير هسة رجعتي مطلكة من ثنين والله يعلم شملعوب بيچ واستقبلوج بالاحضان ويموتون عليج يتلوگون الج لواگة مو مثل حظي الاغبر من عمت عين حظي الخلاچ اختي

شلون حظ هو وتالي رجعتي كعدتي وياي بالبيت على گلبي .. حجت بحقد وغل ودارت وجهة مشت

هزيت ايدي واختها باوعتلي گالت بصدمة :- سمعتي الاني سمعته؟ تتحسدلي ع حظي يا حظ من امداني لو عندي حظ چا هسة ابني وبناتي بحضني وگاعده مرتاحة اميرة

هبة :-عوفيهة وامشي للبيت

شيهانة :- برايج هسة راجعين

هبة :- تدرين بيهم اذا طلعو ميرجعون للساعة 12 لتشيلين هم هسة منلگاهم
سكتت صعدنة بالتكسي كتلهة بهمس :- احجيلهم خليهم يربونها والله تبليج بلوة اكبر وتذبج بسبع داهيات مو داهية وحدة

شيهانة :- واذا عماد طلگها شلون شتسوي وين تروح؟
هبة :- تدبر شبيچ انتي وعساها تتطلگ وهنيال عماد يرتاح من همهة والله زلمة معدل وشحلاته جنة وردة ماخذ هدير مظلوم بيها السمانية
هدير البعير

شيهانة ... سكتت ما رديت ضلت حسبة تاخذني وحسبة تجيبني رجعنة للبيت لكينة سياراتهم بالباب وجبران واگف متخصر نزلت هدير قبلنا من التكسي واحنة وراها
طلع عادل من باب بيتهم وطلع عماد من بيت عمي عاقد حواجبه بغضب نزلنة اني وهبة عماد نتر وين جنتي بوحدج بالليل

هدير ردت وهي تبجي وتلطم على وجهة :- تلاغيت ويا الشيهانة وراحت بلغت عليه واخذوني الشرطة حطوني بالتوقيف ما طلعوني لحد ما اجت للمركز وتنازلت عني

فلت شالها تراوي ركبتها :- شوف بالتوقيف طگوني وشگو ركبتي بتحريض منها

عادل وصل لهبة يزمخ بغضب :- وين جنتن هدى وين؟
هبة :- اعصابك يم جارتي هسة اجيبها واحجيلكم الصار

راحت وياها عادل وعماد عيونه صارن بهامته وجبران يعض ايده وينتر بغضب :- طبووو. داخل بالبيت نحجي ونفتهم الصاير

مشيت للبيت مصدومة والمشكلة ماادري شبي لساني من واحد يظلمني ينعقد وما اكدر ادافع عن روحي هاي الحالة صارت وياي من يوم طلعت اركض ع الحدود هايمة ع وجهي يمكن انضريت لو دست گاع بيها عمل شيطاني
ما ادري من الغرفة الحبسني بيها مشاري وخبلني خلاني انضر

جبران نتر اوگفيي التفتت باوعتله عيونه صايرات بگصته محتقن
جبران :- مسويتها صدگ؟
رفعت حاجبي :- شنو تگول اسويها وادخل اختي للتوقيف جا تلاغينه سوية؟
عمي صاح من باب البيت هااا اجن وين جانن ولج يبا شيهانة وين جنتن انمردت روحي مرد وراح حيلي من وراچن

عفت جبران ومشيت اله :- سالفة طويلة عمي
حميد :- وين هدير هبة؟ مو وياج

طبت هدير وراي عماد لازمها حاضنها تبچي بصوت عالي ومسوية نفسها راح تموت
عمي فزع خايف عليها سوة الطارمة الكبيرة خطوتين من خوفه عليها تلاكني عمتي والبنات يسكتن واني ارد هسة تفهمن

تجمعنة بالصالة كل العيون تترقبنة دخلت هبة جايبة بنتها وياها عادل الولد كلهم اعصاب ومحتقنين الا شوية يلزمونة ويكتلونه كتل

عادل نتر :- سولفن هسة احجن كلشي
هدير ردت وهي تبجي وحجت نفس حجيها الكالته برة تهمتني اني مشتكية عليها لان متلاغيات سوية و ع اساس معذبينها بالتوقيف وجارحين ركبتها بالتهديد

بينما اني وهبة حجينة كلشي صار بالحرف الواحد

هدير ضلت تبجي اكثر وتگول :- بالعقل اني المتعذبة ومتروسة دم ورجلي هاي مورمة ما اكدر امشي عليها
رفعت تنورتها طلعت رجلهة زرگة من طيحة الدرج
استرسلت بالكلام :- بالعقل مبين منو الظالم ومنو المظلوم

هبة عاطت بيها :- كفاية جارتي تشهد شافت الشرطة وهم ياخذون اختچ وشهدت ع كلشي والمركز موجود يگدرون يرحوله ويطلعون كذبتچ

عماد :- شسم الضابط؟ اروحله بنفسي

علياء :- من عزة العزاچ هديررر عزة العزاچ ولچ اختتتج اختج بنت امج وابوج تبلغييين عليهااا تردين تسجنينها ماعندج مستحة من عم من عمة من الله الفوگچ حتى ضغطي صعد راح اموت

هدير وهي تنشغ :- جذب جذب غير هيه منسقة ويا والله العظيم حتى خلته يعذبني تلگاهة اتفقت ويا ضدي
حميد :- ماكو هيچ حچي انه هم اروح وياك عماد نسأل ونتأكد واطلع الجذابة منجن

هدير :- اي روحو وسألو واذا طلعت متفقة ويا الضابط ضدي؟ وهبة ويا جارتها وتشهدها ضدي
اني الاروح بيها واطلع ظالمة بس الله يعرف اني مظلومة ما يهمني نضرتكم عندي اهم شي الله يعرفني

جبران :- سهير ما تسويها وتشتكي عليچ منظرج هذا ما يثبت برائتج بالمركز يتوضح كلشي نص الضباط بالمركز نعرفها وعماد يعرفهم حق المعرفة بس انطني اسم الضابط

هبة :- شفت مكتوب اسمه طلال
عماد :- طلال سعيد البصرارووي؟!! ولجن هذا اعرفه الولد صاحبي غضب على روسجن نسوانه جانن يم صااااحبي بالمركزززززز

هبة :- بزود مرتك عماد محد يمها ولا حواليها تهجمت على اختها وبلغت عليها

قبض ايده ضرب رجله بغضب وكام جر السويج من المعرض وطلع هدير ردت وهي تبجي منهارة

هدير :- انتم لو تشوفون شيهانة حاطة حبل بركبتي تخنگني واعالج جوة ايدها وتگللكم جنت البسها گلادة تصدگونها وتجذبون عيونكم

نهت كلامها وصعدت عمي وجبران راحو ورا عماد سوية وعمتي ضلت تندب بحظها وتصيح
ربي ابني شنو مسوي ومجازي بهيج زوجة من عزا العزاها وعمة عينها تسجن اختها الصلفة

هبة :- والله عمة والله كفاية تشهد اجة حطو الحديد بأيدين هاي المسكينة واخذوها للمركز ردت اوكع من الصدمة
علياء :- ادري بيها صلفة
رجاء :- من دون كل بنات عمي راضي هدير طلعت مسمومة وحقودة حية رگطة جانن شحلاتهن اذكر اختج ام حنين تجي من عيالها طايرة وتحضن بينه وتبوس ومشترية النه الهداية من جنتو بالكويت وهي هنا حتى ممحسستنة انتم بعيدين

علياء :- وملاك؟ ملاك جانت اسم على مسمى من تمر يم المريض يطيب
يمة شحلاتها لا طلع صوتها لا نترت بوجه عمها لا نترت بوجهي ويموتون عليها من كد ما زينه وشيهانة بعد كل صفات حجي راضي وحجي حامد بيها من اخلاق وطيبة وحنية

شيهانة :- مشكورة عمة .. تنهدت ونصيت راسي

كاللي امشي ارتاحي وعادل اخذ هبة وراحو البيتهم عبرو بعدني متمددة افكر وجاي اغفة وسمعت صوت جبران يصيح
جبران :- اوگف عمااااد لا تتهور كلشي ينحل بس لا تتهور ما يخسر واحد غيرك

حميد :- الله عليك لا تأذيها تريد طلگها بس حرام يتيمة ومالها غيرنا لا تأذيهااا

طلعت بسرعة شفت عماد يركض ع الدرج وجبران يركض ورا وعمي من جوة يصيح ويتوسل بعماد ميأذيها

جرنه بناته گعدنه ع القنفة ضل يلهث غسلله وجهه ضليت اباوع اله بخوف خفت يصير بالزلمة شي بسبب مشاكلنا تالي نصير مكروهات

حسيت هدومي صارن ثگال علي وانهضمت من روحي رغم كلهم وياي ومحد حاچاني وشايلين همي
بس انهضمت اخاف بگلوبهم يحچون علي

نزل جبران باوعله عمي گله جبران قفل باب الشقة شسويله خلي يربيها ناقصة التربية هذي تستاهل شنو هل صلافة والعرامة والگوة تشتكي على اختها باطل

شافني جبران وگال :- الضابط طلال گاللنه الصدگ وطلعلنه شكوة هدير وتوقيعها حسبالهة تمشيهن علينة الادبسزز

تنهدت بضيق رجاء كالت :- تعاي كعدي فرفحنا من وراهم ولا مرة اجيت وارتاحيت كون يصير شي من جوة راسها ويسممنه والله ولا اجيكم بعد اني اجي ارتاح لو اشبع ضيم وقهر

بهاي الاثناء گب العياط بيناتهم صوتها وصوته وصلن السابع جار ما تدخلو وعمي گال ما اتحمل اموت دز رجاء ركضت لبيت عادل يجي ياخذه يطلعه من البيت

عادل من سمع عياط هدير گال :- راح يموتها هذاااا

صعد يركض يريد يفاككهم اني گلبي حسيته طاح ويا كل عيطة تطلع منها مبين جاي يضربها

ما تحملت اكثر ضليت ابجي وصعدت ورا عادل ادگ بالباب واصيح بقهر :- عوفها اني مسامحتهااا عوفها عماد فدوة رحتلك لا تأذيها عمااااد عاااادل اكسر الباب اكسره

عادل ضل يدفر بالباب جان كلش قوي كلش ومتين ما ينكسر صعد عمي كوة وعمتي تبجي وتصيح علي عوفها ماماا فدوة رحتلك ليصير بيها شي حرام مو هيج تنحل الامور مو هيچ

بنص خوفنه وفزعنه وصياحنا ثارت طلقة من داخل شقتهم وسمعنه صيحتهم ثنينهم بنفس اللحظة ، عم السكون لحظات واختفت الاصوات من داخل الشقة وصريخنا اني والبنات گلب البيت گلاب ........

السجانة :- سهييير ليلى كومن يلا گومن

ليلى :- اهوو كطعت سالفتنة يلا بعدين نكمل خل نروح نسوي واجباتنة ونرتاح من الهم والغم

شيهانة :- امشي

ليلى :- مشيت ماخذة سطل الماي والتايت اغسل بالحمامات وشيهانة تنظف بغير مكان كان اكو فتحة صغيرة مثل ما مزراب الماي يدخل منها الضوة ويضرب بالحايط يسوي دائرة من الضوء حلوة
تذكرني بالحرية الجنت عايشتها برة الزنزانة
اليوم ماكو ضوة عبالي غيم تنهدت بضيق
وعيني انملئت دموع على حزني وخيبتي وسجني وحبي وكل شي راح مني ..

ضليت ابچي بصمت واتذكر ايام زواجنا
اذكر حسيت صار عندي سند ما حسيت بالامان الا من حطيت راسي على صدره ونمت
حسيت بالانتماء والسعادة وحياتي انملأت
هسة وحيدة روحي مهجورة وسقطت اوراق روحي بخريف السجن وانداست بأقدام الحزن

اجة خيط ضوء من الفتحة باوعت الها مستغربة مسدودة بشي غريب تقربت شفت حمامات بيض صغار ثنين ضحكت جبت تخته خشب صعدت عليها ومديت ايدي بصعوبة لزمت الحمامة بأيدي مسدت على ريشها الابيض وتحسرت
ليلى :- شجابچ؟ انتي مو مثلي اني سجينة انتي حرة فردي جناحاتچ وطيري حلقي لتضلين هنا السجن ما ينراد

رجعتها بالفتحة ومديت ايدي ادفع بيهن لبرا طلعن طارن وصار الضوء الشمس بعيني باوعت من الفتحه ضلن يحلقن ورجعت للفتحه

دموعي نزلن على خدودي مديت ايدي اطرد بيهن واحجي بقهر :- طيرررن لا تجن للسجن انتن مو مثلنا احنة نخاف نطير لان جنحانة مكصصة انتن مو مثلنا

شيهانة بخوف :- ياااا شبيج

ليلى :- الحمامات عايفات الحرية وجايات للسجن ما اريد يضلن هنا اريدهن يطيرن ليش يجن للسجن ليش ليش

لزمتني من ايدي تزلتني وكالت اهدي .. اهدي
تنهدت وياي بحسرة گالت :- خنگتني روحي

رديت بضعف ودموعي تنزل :- اريد قيس اريد حضنه روحي خالية وكلبي ممرود اريد احضنه وابجي على صدره ويمسح على راسي
يگلي خاتون اني يمچ ما اخلى الحزن يمر على اعتابچ

حطيت ايديني على وجهي ورجعت بذاكرتي لأحلى ايام عشتها ويا ايام الحب والغرام والراحة
اوگف گبال المراية الصبح بتنورتي الطويلة الساترة وقميص وبيدي الربطة ما اعرف البسها ياخذها من ايدي يخليها على رأسي وهو يضحك وغمازاته يطلعن اخلي اصابعي بغمازاته واضحك
ليلى :- اريد طفل عنده رصعات مثلك اذا ما عنده مرجوع ما اريده

ضحك وهو يلبسني الربطة گال :- يجي ان شاءالله شايل حسن امه ما اريده ياخذ وجهي
ليلى :- انت هم حلو
قيس :- بس انتي احلى

شدلي الربطة وعدل اطرافها بأيده باوعلي برضا وگال :- بس انتبهي ليطلع شعرچ منها خاتون
ليلى :- ان شاءالله
لبسته ساعة ايده وبست خده

طفينة اضوية البيت لزمني من ايدي واخذني صعدت بالسيارة قفل البيت واجة وصلني للجامعة نزلني وراح للشغل ويا اخوته

مشيت ادور ع دلال شافتني وباوعتلي بصدمة فكت حلگها واجت تباوع مستغربة
دلال :- ياا غياب اسبوع وراها جايتلي محجبة يا يمة صدمتيني

حضنتني بوستني وهمست بأذنها تزوجت
ضلت تباوعلي بصدمة واني اضحك
دلال :- تزوووجتي بدون متعزميني
حطيت السباب ع شفايفي وكتلها :- اشششش بدون زعل وعتب تزوجنة بدون علم اهله وما حجينة لهذا السبب

عقدت حاجبها وبعدت صبعي كالت :- خذيتي سيد قيس؟
هزيت راسي بفرح ضحكت ودمغتني :- فرحتج ولمعة عيونچ تخلي الواحد غصب يفرح وميزعل المفروض هسة ادير وجهي واروح زعلانة

ليلى :- شسوي والله الظرف حكم لتحجين كدام احد لا امج ولا اي شخص من عائلتج يعرفني مثلا خالج الضابط لتحجين گدامه هو الثاني

دلال :- لا صم بكم لتخافين بس لو كايلتلي قابل راح اروح لبيت اهله اگللهم تعالو ابنكم تزوج ليلى والله جان حفظت السر

ليلى :- فهميني فدوة والله الوضع صعب كلش صعب
دلال :- خالتج تدري مو
هزيت راسي كالت يلا مسامحتج لان ظرفكم حكم وما راح ازعل واعزمج بخطوبتي وحنتي وعرسي

گعدنا ندردش مر واحد من الامنية شافني واجة سألني شنو انتي تحجبتي
كتله اي
كالي شعجب شنو احد حجبج جبر
عقدت حاجبي وكتله ليش حتى يحجبوني غصب لا تحجبت بارادتي الحمدلله
كال انتي منين
كتله من الـ ... هز راسه برضا وراح

دلال ضحكت باستهزاء وكالت فلك طرهم حتى التتحجب ما تسلم من البعث ومن شكوك البعث

ليلى :- دعوفي يمعوودة اكلج صدك شخبار الاخوان
كرصتني وهمست :- اليوم اني وياج نروح لمجمع تجاري نتسوق
ليلى :- قبل الطلعة ترة زوجي يجي ياخذني ونرجع سوية للبيت

ضحكت وضربت كتفي :-لج زوجي وزوجي شي جديد ممتعودة علي لتخافين قبل لنطلع المكان قريب نروح ونرجع ويضل وقت

هزيت راسي اخذنة محاضرة وحدة وطلعنة رحنة لمجمع تجاري صار اجتماع سريع صغير وبكلام مشفر والاشارات ..

هذا الوضع هيج يتطلب كلشي بالسر وحتى المكان الننجمع بي غريب وكل مرة شكل
والناس منعرف شي عنهم حتى في حال واحد انسجن وتعذب مايعرف معلومات الاشخاص الويا ويشمرهم كلهم بالسجن

من جاي نطلع شفنه ثنين شكلهم مريب شواربهم كثيفة لابسين رسمي وعيونهم علينا اني ودلال سوينه نفسنه طبيعيات ونضحك ولا خليناهم ببالنه حتى نبعد الشكوك ، انتهى اليوم اجة قيس اخذني رجعنا سوية للبيت

طلعت الاكل من الثلاجة وتوضيت صليت صلاة الظهر وخليت الاكل على الميز صحتله :- حبيبيي سيد كملت السفرة تعال اكل

طلع من الغرفة بأيده سبحته يسبح خلاها بجيب گلابيته وگعد
قيس :- اني نيتي من هذا الميز كشخة للمطبخ ومن تثرمين زلاطة تفيدچ مو مال اكل ما اشبع عليها وحگ ذاك ابن البدوية

صفنت شوية :- ها قصدك اخليلك الاكل بالگاع
قيس :- اي والله شحلاتها كعدة الكاع بنصنا الصينية نكعد كعدة مرتبة حتى نشبع

ضحكت :- ان شاءالله حبيبي على الجايات اخلي الاكل بالگاع
صفنت بتفكير وكملت :- منو ذاك ابن البدوية تعرف واحد امه بدوية؟

هز رأسه ب لا مبتسم :- تعرفين الامام العباس؟
ليلى :- طبعا اعرف سيدنا العباس ابن الامام علي
قيس :- هوَ نفسه ابن البدوية

هزيت راسي ب اي ..
قيس :- شكد وتخلصين بعد؟
ليلى :- بس الامتحانات ان شاءالله

هز رأسه وضحك :- ورا الامتحانات نسافر نغير جو ونتونس يعني شهر عسل مثل ميسمونه الجماعة

فتحت عيني بفرح وطفرت حضنته ابوس بخده :- كول والله اخيرا راح يتحقق حلمييي واسااااافر وين راح تاخذني؟

قيس :- دولة ولا بالاحلام .. حلوة وبيها اماكن تجنن رحتلها مرتين مرة رحلة علاج ويا الوالد سوا عمليه ومرة للاستمتاع وزيارة لاحد اقاربنا هناك
حجيت بانزعاج يعني دولة عربية
قيس :- لا مو عربية ابد وبعيده

ضليت اخمن واحترك من الحماس للعصر اني افتر واگله الله عليك سيد گولي وين نروح ترة والله ما ادرس وارسب وننحرم من السفرة

وهو يضحك علي بعد ما اخذ ثمن الاجابة انطانياها وبرد گلبي وخلاني اتحضر من هاي اللحظة .. واحسب حساب للسفرة وشلون راح نقضي وقتنا ونستمتع هناك

......

دنيا ...

الجو متكهرب .. قلق ..توتر
وضع قيس سوا مشاكل بالبيت الكل يريد يعرف شصاير ويا و وين مختفي ضلينا ما نشوفه بس اخواني يطمنونه ويكولون جاي يجي ويشتغل ويانه طبيعي ومن يخلص من شغله ويانه يروح لشغلته الثانية حارس بمعمل واكد ابو ناصر صديقه لوالدي ان قيس موجود يمهم يشتغل بالمعمل ودايقضي معضم وقته ويا قيس

تبرد كلوبنا شوية وترجع تحترگ لان والدي ممرتاح ابد ويكول دائما "داحلم بي احلام مو حلوة كلبي گارصني على هذا الولد"

امي تشب وتطفة من القهر والشوق لاخوي قيس ، تحب قيس حب عجيب وتشيل همه وتخاف من تصرفاته
ورغم قيس اخوي بالصغر كان اكثر واحد هادئ وعاقل هو يكبرني بسنتين حتى ربانا اني وسيد هاشم

وكان يقويني خصوصا بعد فسخ خطبتي من ابن خالتي سيد حسن وتركه البلد وسفره لأيران تارك كلبي متقطع وروحي مجروحه
ايدين سيد قيس احتضنتني وحنيته خلتني انسى كل حزني واكول خليني يم اهلي هيج اهل مينعافون ابد ..

اوف يا قيس اوف شعلتي كلبي شعل من عمت عيني عليك يا حبيبي ونظر عيني

وبعز توترنا وقلقنا من المقابلة الجاية .. اندك الباب
ركض ابن مصطفى اخوي للباب كلبي انعصر
ابوي موصي اخواني يجيبون قيس وياهم وبعد فراق استمر 3 اسابيع اليوم اللقاء والمواجهة

دخلو اخواني الشباب وراهم قيس بالسرى سلموا على والدي وامي باسو ايديهم امي حضنت قيس تشم بي وتبوس بصدره
:- اويلي يوم اويلي كلبي تكطع عليك ليش هيج تسوي بأمك يا نظر عينها

باس راسها وايدها اكثر من مرة عيونه مغورگة وگللها
:- اني هيج مرتاح يوم

باوع لابوي وتقرب بخطوات ثقيلة نصة باس ايده ابوي اختنك كلش عيونه صارن حمر گله شلونك يابة

قيس رد مختنك :- الحمدلله ..وهو منصي ما رفع عينه وخلاها بعين ابوي

كعد ع صفحة مرتبك يهز برجله عبالك داخل تحقيق مو لقاء ويا والدي

كاله ابوي :- يابة قيس شكد محتاج فلوس اني انطيك واترك هذا الشغل اهلكت نفسك هلاك ما يصير يابة

قيس :- ممحتاج يابة اني رايد الهي نفسي حتى انسى خساراتي الكثيرة اولها دراستي واخرها محبوبتي ليلى

سيد رحمن :- العوض موجود يابة انتَ بس كول اريد نجيبلك العلوية فاطمة ونخلها بغرفتك تراها زينه البنات وردة مفتحه حسنها يلوگ الحسنك ومفصله ع گدك

العلوية :- ابو مصطفى سد الموضوع هسة الله يخليك هوَ رافض الزواج لتخلي يتضايق اكثر

ابوي هز رأسه وكال :- انتظر صوابه يطيب والله كريم ..

ضل قيس كاعد ع اعصابة لليل وراح يكول شغلي ما اريد اتركه البيت كله متوتر ويا توتره وتوتر الوالد خايفين تصير مشكلة ومن طلع قيس كلنا تنفسنه براحة

ما نريده يبتعد عن البيت بس بهاي الفترة بعده افضل حل لازم يطيب جرحه ويرجع بعدها

صعدت لغرفتي جانت تجمعني اني وخواتي بس كلهن تزوجن ضليت بس اني بيها .. من يجن هنه وجهالهن يسكننها
تقربت من شباك الغرفة شلت الستارة وفتحت الشباك الغرفة تخنك
باوعت لبيت عمي عبد الصمد اضويتهم مطفاية الظاهر نايمين

عمي عبد الصمد عنده ولد ثنين الكبير اسمه (مؤمن) والصغير (ابا ذر) وبنيه وحدة بعمري اسمها (طوعة) وما تزوجت لهسه تنتظر ابن عمي عبد الصبور اسمه (فاضل) ديدرس بلندن يكمل دراسته ويرجع حتى ينخطبون ويتزوجون محجوزين لبعض من الصغر

رجعت افتح ربطتي وافل شعري مشطت واني كاعدة وباوعت لنفسي بالمراية ناسية تحذيرات امي وابوي (لا تباوعين هواي بالمراية) شفت وجه ابيض ضعيف عيون باهته شاحبة وحواجب مرفوعه من المنتصف توحي بالحزن حتى بفرحي ابين حزينه

تنهدت ، وصارت عيني على الشباك الهوى يضرب الاغصان ويطلع صوت صفير الهوى كل شوية كمت بروح باهته حزينه اريد اسد الشباك ولمحت ضوة من بيت عمي عبد الصمد و شخص كاعد كبال الشباك ع مكتبه مشغل الانارة ومنصي رأسه گباله كتاب يقرأ بي

جريت الستارة وخليت فتحه صغيرة كلش باوعت منها كان مندمج بالقراءة ويقلب بالصفحات ويكتب شعره ناصي جدا صاحب لحية سودة كثيفة و وجه وقور
لابس بايده خواتم باحجار كبيرة ، توقف فجأة وراح بغير اتجاه لحظات ورجع بيده كتب كبيرة خلاهن وكعد يقرا
لابس كلابية نص ردن سودة لانه حزين على زوجته ماتت قبل سنتين ولهسه حزين عليها وما تزوج والكل مستغرب ليش ما نساها ودور مرة ع الاربعين

ضليت اباوعله مستغربه مؤمن غرفته بغير جهة معقولة غير غرفته وصار شباكه مقابل لشباك غرفتي؟ ما اذكر اكو احد گاعد بهاي الغرفة من قبل ..

ما حسيت غير تمغط شوية وغلق الكتاب سد شباك غرفته وسد الستارة ، سويت مثل ما سوا بس كلبي كان يخفق طفيت الضوا ولفيت نفسي بالغطا بسرعة خايفه لا يكون شافني او لمحني اراقبه ..

ليلى ..

مرت الايام كنت خايفة من شي واحد خاف صهيب يعرف بزواجي رغم خالتي گالت لهسة ما يعرف وهم زين عنده شغل وملتهي
ومن يروح لخالتي تگله ليلى نايمة لو تدرس وللجامعة ما اجة ملتهي بشغله اجت هاي السالفة من صالحي ..

بأخر امتحان عقدنه اجتماع سريع وسري جدا انطوني معلومات طلبو مني انقلهن لشخص من الحزب بنفس الدولة لراح اسافر الها بعد ماعرفو راح اسافر طبعا

المعلومات كانت مهمة تخص التعذيب بالسجون وابادة السجناء او اعتقالهم بدون علم اهلهم فقط يوصلون خبر لأهلهم ابنكم تم اعتقاله بدون ميذكرون السبب ومرات ميوصلون خبر
وصلت النه اخبار تخص هذول المعتقلين بعضهم مصابين بامراض خطيرة مجاي تتم معالجتهم والبعض الاخر يعدمون وبعضهم يتعذبون بأقسى الطرق

والمشكلة نصهم ابرياء تمامًا ما عندهم اي انتماء لاحزاب معارضة او جرائم .. الى اخره

من اول دخولي لهذا الحزب من اول كتاب .. من اول اجتماع وبكل جلسة يتم تجنيدي وتعليمي بشكل دقيق حتى صرت متحكمة بردات فعلي واعرف شلون اتصرف وشنو لازم اسوي ..

حزمنة الامتعة بعد تجهيز كلشي من جوزات وغيرها سافرنه لغير دولة عن طريق البر ومناك نسافر للوجهة المنشودة كلشي جان صعب بس مر واجة يوم السفر .. طلعنة على وقت للمطار

قيس لازم ايدي ويسحب جنطة السفر بالايد الثانية
گال يحذرني :- انتبهي لاغراضج بالجنطة ليضيع شي خاتون
ليلى :- ان شاءالله ..

بعدنه هسة داخلين للمطار صار گدامنه ثنين من الامن باوعو علينه وكأنهم يعرفونه وضلو مركزين علينا

بلعت ريكي بتوتر وتماسكت ، صار صدري يصعد وينزل بشكل واضح جريت نفس عميق سيطرت ع نفسي وتصرفاتي

مر الوقت بسرعة وخطواتنا صارت سريعة
اخذو جوازاتنا كأجراء روتيني وعادي باوعو على جوازاتنا و واحد باوع بوجه الثاني بلعت ريگي بخوف ومسحت قطرات عرق صارت على جبيني بمنديل

باوعت للولد بنظرات ثابته رغم الخوف حسيت رجفة صارت باطرافي
قيس باوعلي يهداني وهمس ماكو شي اجراء روتيني

هزيت رأسي وبلعت ريگي ما كنت متوقعة الوضع بالواقع يخوف اكثر من الخيال كنت محسبة حساب لكل شي بس من صارت واقع حسيت سجاجين تكطع بروحي ورجفة تسري بكل جسمي

حاولت ما التفت ولا احسسهم بشي مريب اتجاهي حتى يمر كلشي بخير وسلامة وارتاح

دزو ع الضابط بسرعة صار موجود وكفونه ع صفحة قيس لزم ايدي يهدأني ورجع كال صبري يمكن اكو غلط لو شي لتخافين حبيبتي

الضابط شاف جوازاتنا وباوع بوجهي لحظات ورجع باوع بوجه قيس سد الجوازات وگال وهو يضحك تك خد كأنه اسد لگة فريسته :- اخذوهم للتفتيش وحضرو السيارات السيد وزوجته صارو بأيدينا ...........للحكاية بقية 🖤

رأيكم بالقصة يهمني 🖤..

بنات اريد نشر وتصاميم تخص الرواية حتى تصعد 😊

🚫 ارجع اكرر الدول المذكورة مو نفسها بالحقيقة مغيريها بنات انتبهو رجاءً

🚫تنبيييه مهم بنات الاحداث ما واصلتني بشكل دقيق جاي اعتمد ع نفسي ويساعدني استاذ رابح ف رجاءً من تشوفون اخطاء نبهوني حتى اتاكد واسأل عن المعلومة الصحيحة واعدلها