رواية حمائم تخشى الطيران الفصل الرابع وثلاثون 34 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

تصويت + تعليق بين الفقرات لطفا ...

عندما يتجرد الانسان من انسانيته ويرتدي قلبه ثوب الظلم والطغيان
تهدم منازل وتدفن ارواح كانت تضج بالضحكات

شياطين الانس اقتحمو ارضنا قسرًا
خطفو ضحكاتنا سرقوا حبنا
حرقوا ارواح احبابنا بنار حقدهم و ظلمهم

عماد شاب لم يتجاوز الثلاثين من عمره تم اعدامه بالرصاص بسبب ظلم زوجته واخوه وخيانتهم له

جبران الشاب الثلاثيني
الصيدلاني .. صاحب النخوة والحمية والغيرة
تزوج من محبوبته حتى يصير الها درع يحميها من نار الحاقدين والحاسدين

كان يريد ياخذها للسوك تشتري ملابس لعرس خالته
ظفرلها شعرها گصيبة وگللها كضيها اطلع للباب وارجع اشدها الج
وطلع .. بدون ما يرجع ما لگو اله اي أثر

الشيهانة (سهير) شابة نهاية العشرينات
تزوجت من صديق حبيبها بسبب غدره وغدر اختها
انباعت سنينها وحياتها والثمن مجهول

لگت نفسها ام لبنات ثنين
فاقدتهن .. ما تعرف وين اراضيهن

وفجأة صارت مثل اللعبة بين ايدين "ساحر"
يأخذها يمين وشمال
مثل ما يحب ويريد

فتحت عيونها وهي بحضن هذا الساحر
صارت زوجة له بدون ما تفكر بالعواقب
كله في سبيل تعرف مكان بناتها وتوصل الهن وتلمهن بدفو احضانها
وتسقيهن من فيض حبها
وتروي روحها بريحتهن .. وتبجي دموع الفرح يم نحر كل وحدة منهن ..

عانت منه هواي وانظلمت منه
ومن اختها الحاقدة وابن عمها الطماع

خذاها روج الدنيا لمكان بعيد
مو مكانها
مو ثوبها
من بنت عائلة ثرية ذات مال وجاه واملاك كثيرة

الى سجينة بأحد سجون العراق
محكومة بالسجن المؤبد
والتهمة "انظمامها الى احزاب معارضة للنظام"
ومساندتها الى ابن عمها الضابط عماد
الذي تم اعدامه بالرصاص ظلمًا
مات وهو يلفض اسم زوجته ومحبوبته "هدير" الي كانت سبب بسجنه واعدامه

جر ذيال الخيبة والحزن وامشي لفراشي داخل السجن البارد
لفيت نفسي بالغطاء زين حتى احس بدفو
حسيت عظامي تون من الالم
تقربت ليلى خلت ايدها على گصتي وكالت بخوف وهي تمد ايدها بطاسة الماي تعصر الكمادة

ليلى :- لازمتچ سخونة قوية والعلاج مدا يفيدچ
صميت ايدي خليتها ع حلگي گحيت وباوعتلها بعيون مدمعه من كثر الحرارة
شيهانة :- چا شسوي ما تگليلي بلكي الله للصبح اكعد زينة
ليلى :- الليل طويل وبارد خاف يموتچ

ضحكت ورجعت راسي ع المخدة زين
:- شفت بلاوي وعشت بضروف اصعب
متوقعة صخونة وليل طويل بارد يموتني؟
واذا متت اصلا احسن شو حياتي كلها تدمرت ومكتوبلي اضل بهذا المكان العمر كله

ليلى :- تفائلي يجوز يجي عفو او تتبرئين من هاي التهمة
ضحكت بأستهزاء :- منو يبرئني شو عماد الشخص الوحيد اليكدر يطلعني منا انعدم
هشمو بالرصاص ونهو حياته ظلم

و لو ما تدخل عمار صديق جبران جان اني هم معدومه بس الله ينطي الصحة والعافية سوا المستحيل حتى ما انعدم وما تتصدر املاكي

ليلى :- هههههههه شنو فايدة املاكج وانتي مسجونة
شيهانة :- چا وبيت عمي الگعدو ع الحديدة بسبب عادل وهدير؟
ليلى :- يا خوفي يطلعون كلهم مثل عادل وحتى اذا طلعتي ما تشوفين شي من مالج واملاكج

شيهانة :- يولن الاريد اشوفهم بناتي و وليدي شعلان وجبران اااخ يا جبران
جريت حسرة وغمضت عيني متألمة

ليلى :- اظنه حاله من حالنا مسجون
شيهانة :- ياليت على الاقل لهسه يشم الهوى واذا الله كتب النه نطلع من بين هاي القضبان اگدر اشوفه ويلمني لصدره ويطبطب ع روحي الخاوية

ليلى دارت عيونها تباوع بالفراغ
ورجعت باوعتلي :- ابني شيهانة ابني اريد اشوفه عيني عطشانتله من كون رحتله فدوة

تحسرت ورجعت باوعتلي بعيون تدمع
:- لو ضاله بأيران جان هسه هو بحضني لو يفتر داير مدايري يلعب واسمع صوته وهو يصيحلي ماما شجابني شورطني؟ اااخ من روحي ومن تسرعي

مديت ايدي مسدت ع كتفها :- شنو نسوي هذا المكتوب علينا انتي انحرمتي من ظناج واني انحرمت من ظناي
وانسجنا
حمدي ربج انتي عشر سنين حكمج يعني وراج طلعة الا اني تاليتي هنا اموت حتى لو صگر جاب وليدي للعراق ماراح اشوفه
والبنات ايست من شوفتهن وعيني غسلت روحها بدمعها وفقدت الامل بيهن

هزت راسها وهمست بغصة :- الله كريم داده كلشي بيده هو قادر على كل شيء
يمكن فجأة نفتح العين نلگى نفسنا برة السجن وحريتنا راجعة النه الله

غمضت عيني وهمست :- ونمشي بالشوارع بحرية نشم هوى نظيف ما نسمع صوت السجانات
ما ننضرب لاتفه الاسباب وناكل لگمة نظيفه
شكد حلوة الحرية

ليلى :- ابسط الاشياء الي جنة نتذمر منها هسة صارت بالنسبة النه حلم
حتى الحبسة بغرفتي احلى واجمل بمليون مرة من كعدتي بهذا المكان

شيهانة :- اي والله
صوتي بدأ يختفي بسبب بلاعيمي طبگن كلش تمددت كلش وغمضت
ضلت ليلى تسولف عن بيت ابو محمود اقارب عمامها بايران تكول زينين وابنها "هادي" الي سمته ع اسم ابن عمها الطلعها لايران
ضال يمهم وهي متأكدة هم هسة مدارينه ومتهمين بي وشايلينه على كفوف الراحة

تمنيت ابني وبناتي هم مرتاحين
بناتي هسة اعمارهن 11 سنين تقريبا
وشعلان بعدة صغير يمكن لهسة ما يعرف شي عن هاي الدنيا ولا يعرف عنده ام بعيده سجينة مظلومة تتمنى شوفته وتتمنى تشيله بين ايديها وتلمه الصدرها

فتحت عيني باوعت لليلى :- انسجنتي بال2000
واني وراج بالـ2001
انتي تطلعين بس اني لا اذا الله كتبلي عمر طويل يمكن اموت بال2030
متخيلة وراي 29 سنة يلا اموت

ليلى :- شنو من حساب هذا
شيهانة :- شمدريني بس احس من اوصل نهاية الخمسينات لو بداية الستينات اموت

ليلى :- سدي حلگچ ونامي
غمضت عيوني فترة غفيت وفزيت برودة السجن خلت عظامي تصل شمرت الغطا وكمت مشيت للحمام لمست وجهي حارر فتحت البوري غسلت وجهي بماي بارد ضلن اسناني يطكطكن من البرودة

شلت راسي التفتت ع حركة وراي بظهري شفت السجينة هاجر
حطت ايدها جوة حنكها والايد الثانية ع خصرها وعمصت عينها بتساؤول
هاجر :- درنفيسة شمالچ خاف حبلة؟

ضحكت بأستهزاء ورجعت غسلت وجهي
شيهانة :- ومنين من طر الطوف
هاجر :- ليش عمرچ ما سمعتي بسجينة حامل ولو معذورة ما صارلج هواي بالسجن ما قبطتي السنة

تنهدت وضلت امسح بوجهي بالمنشفة
شيهانة :- ليش اكو سجينات يحبلن؟
هاجر :- ويجيبن بس يا حسرة ع الطفل يروح لحمة حمرة للجلاب تاكله

انمغصت روحي وانمرد گلبي :- ليش؟
هاجر :- اي غير يحبلن من الضباط والمنتسبين منو يعترف بي يصير منا نخنگه منه ونشمره من انسجنت لهسة ثلاث حالات صارت مثل هاي

شيهانة :- هههه وين الحكومة عن هذا الشي
هاجر :- الفوگ يتسترون وتمشي السالفة هسة ما كلتيلي خاف حامل درنفيسة

شيهانة :- لا من دخلت للتوقيف لهسة محد تجرأ يلمس طرف ثوبي
ما حامل جيكي روحج خاف انتي الحامل

ضحكت وهزت ايدها :- عگبيش احبل ورا ما كطعت
شيهانة :- كطعت وما تبتي وسوالفچ خايسة لو بعدها تجيج شتسوين

هاجر :- راح امدج هنا واعضج بزردومج

شيهانة :- ما حاجية شي غلط هذا واقعج هاجر انتي بنص السجن وبنص الضيم بالوقت الي لازم اتوبين بي جاي تسوين منكر وتشتغلين بالدعارة والمخدرات
بيا وجه تواجهين ربچ من تموتين؟ وهنا ما تعلمين بيا ساعة يدسون وحدة تكتلچ

تحسرت ولمعت عيونها :- ما نصفني من زغري عشت بيتم وجوع واذية انجبرت اسلك هذا الدرب
اصلا الدرب السلكته احسن شي لانه ما انطاني شي

شيهانة :- واني عشت شبعانة وعايشة برفاهية وهسة ويني وياج بنفس المكان ومحكومات مؤبد
هم اجي اكول ربي الطلعني من العز وخلاني بالذل اعصي بالعناد؟

لا طبعا ، كلشي اله بي حكمة وارادة يمكن سجنج جان فرصة الج حتى تشوفين درب رب العالمين بس انتي ما تعجبج كاعج تضل نظيفة تحبين روحج من تكثر بكاعج ايدين الفلح

عفتها وراي تباوع بالفراغ وكفت تحسرت ورجعت كتلها
شيهانة :- الله يهديچ وينور دربچ ترة السجنوج نفسهم يتمتعون بيج ونفسهم راح ينهون حياتج اذا رادو انتي مثل اللعابة بين ايديهم منو اليسوى تصيريله وعاء يفرغ شهوته بيج
منو اليسوى يا هاجر والفلوس التحصلينها شنو فايدتها وانتي عمرج ماراح تشمين ريحة الحرية

رجعت لفراشي تحسرت وغمضت عيني
غفيت واني اتصارع ويا البرد فتحت عيني الصبح مرضي زايد ما ناقص والاذية اكبر
جسمي كله يون عليه من الالم

جنت اشرب حليب ورفعت عيني صارت بعين هاجر
عيونها حمر شحت نظرها عني تاكل الصمونه حسيتها مهضومة گوة تلوچ اللگمة

ليلى انتبهت لنظراتي وباوعتلها ورجعت باوعتلي
:- هاجر مادري شبيها
:- يمكن حست بوصاختها وگعد ضميرها النايم

راحت للحمام فتحت ايدها وذبت بيها اللگمة كمت وراها بدون ما يحسون وفتت للحمامات مشيت للباب المسدود حطيت راسي ع الباب اسمع شهيقها ورجفة صوتها

تحجي بغصة مختنگة :- ردني اليك ردًا جميلاًا يالله ردني اليك ردًا جميلاً
طهرني من ذنبي واغفرلي ياااالله
انتَ القادر تحيي العظام وهي رميم احييت ضميري الميت ..

عفتها ومشيت ماردت اتطفل واستمع الها وهي شاردة من هذا الجمع للحمام حتى تطلع نار گلبها وتخاطب ربها

بعد نصف ساعة من كعدتها بالحمام دكت عليها وحدة من السجينات الباب ما فتحت
ضلت تنتظر بالباب بعدين اخذت ملابسها ورجعت

مشيت اني دكيت الباب وحجيت بصوت ناصي
:- هاجر صارلچ ساعة بالحمام فتحي الباب يلا اريد اسولف وياچ .. ما ردت
رجعت دگيته اكثر من مرة بقوة

تجمهرن السجينات حسيت گلبي رجف
ضلت وحدة منهن تضربة قوي وتصيح عليها بس تنطينا صوت حتى نعرف بيها زينة

اجت السجانة وصار تجمهر قوي يم باب الحمام
جانت السجانة ضخمة صاحبة بنية جسدية قوية
هي ووحدة من البنات كدرن يكسرن الباب

انفتح على وسعه واذا بهاجر متمددة ع الارض لامة رجليها لصدرها ، عيونها مفتوحة وحلگها ابيض شكلها ما بي روح
تقربت منها السجينة لمست نبضها والتفتت النه مقهورة
:- انا لله وانا اليه راجعون ، توفت

غمضت عيني وطلعت امشي بهمه رجليني يرجفن كعدت بفراشي مقهورة ليلى واكفة يم الباب تباوع عليهن
مخلية ايدها على حلگها ، دارت وجها واجت يمي گالت مقهورة
:- الله يغفرلها ذنبها

....

واگفة گبال الطباخ عيني تترقب الچاي انتظره يخدر
رفعت عيني ع صوت تكات الساعة باوعتلها صارت الساعة بالثنتين الفجر

تنهدت ورجعت نصيت جوة الجاي حضرت الاستكان خليت بي شكر
ورجعت طفيت القوري ، ركضت فتحت باب الكاونتر وكفت ع اطراف اصابعي اخذت كعك
خليته بصحن صغير

اجاني صوته من الغرفه يحثني استعجل وبنبرته اكو تذمر
:- ديلا علوية وين صرتي وراي كعدة بعد ساعتين

تنهدت ورديت بهدوء :- اجيتك

صبيت الچاي وطلعت اله يفرك بجبينه دايخ باوعلي عيونه حمر وباوع للصينية
:- ماله داعي الكعك الجاي كافي

:- بس انتَ مماكل شي ودتضغط ع نفسك هواي بالشغل والحوزة

فرك عيونه واخذ استكان الجاي يخوطه
خليت الصينية على صفحة وكعدت يم رجلينة افركهن اله
كال برفض :- لا عوفيهن نامي انتي تأخر الوقت

:- اني ماعندي شي ولا مسؤولية مثل العندك اكدر اكعد اصلي واكمل نومتي الا انت!؟

:- شسوي علوية الشغل يريد لازم اكون نفسي و اوكف ع رجليني
هزيت راسي وعيوني راحت تراقبه وهو يشرب الچاي

جريت حسرة وكتله :- سيد اتوقع اني حامل

باوعلي وحسيت الچاي وگف مينزل من بلعومه
ارتفعت حواجبه ورجع نزلهن بسرعة
:- الحمدلله خلي عمتي تاخذج للدكتورة حتى تتأكدين اذا اكو حمل لو لا

:- هاي مگدور عليها بس اني عندي حجي ثاني مجاي الگى وقت نحجي بي اني وياك
طول النهار مشغول وحتى بالليل مـ دا اشوفك

:- حقچ علي بس شنو بأيدي عاجبج نضل هيج لازم اكون نفسي ونطلع منا يصير عدنا بيتنا الخاص تعبت احس حتى هدومي العلي ثگال واذا هسة اجة طفل معناها المسؤولية تزيد ونصير ثگال اكثر

:- الطفل يجي ويجيب رزقه ويا واذا ع الثقل ترة محد مستثقلنا انت تحس بهيج شعور من وحدك

درت وجهي بزعل نزل استكان الجاي الفارغ وكال
:- الواحد اذا ما يحس هيج ما يحرك روحه ويركض حتى يستقل
هزيت راسي وهمست :- صحيح

باوعلي لحظات لم شفايفه للداخل وگال :- احجي شنو ردتي تسولفين
:- نام ارتاح من يصير عندك وقت نحجي
رد :- لا احجي اريد اسمعچ لا تضمين بگلبچ

تنهدت حطيت ايديني بحضني افرك ايد بأيد
وحجيت مقهورة
:- سيد انتَ هم نسيت ليلى؟ شو احسك ما ناسيها وطاريها يخليك تصفر وينقلب لونك

غمض عينه جر نفس وزفره :- علوية الجرح يحتاج وقت يلا يطيب ويختفي اثره اني مو كتلج من اول ما عقدنا وانتي قبلتي تضلين وياي لحد ما يبرأ جرحي

تنهدت وجريت نفس رفعت صبعي مسحت دمعتي النزلت بسرعة
:- بس گلبي ديأذيني الغيرة حرگتني حرگ واحسك دوم متهرب مني

مد ايده مسح على شعري وگال :- ماكو هيچ حجي علوية نامي لا تفكرين هيج افكار بعد

تمدد اخذت الاستكان غسلته وضميت الكعك ورجعت باوعتله مخلي ايده جوة راسه وحواجبه معقودات صدره ينزل ويصعد بسرعة مال واحد متألم

طفيت وتمددت بالصفحة الثانية رفعت الغطا خليته ع حلگي وغمضت عيني مقهورة احس نار مشتعلة بنص صدري

اصعب شعور ممكن تعيشه المرة من تحط راسها يم رجل گلبه وروحه يم بنية ثانية

التفتت باوعت الظهره حجيت بنبرة مكسورة
:- قيس انتَ تحبها ما دا تنساها ابد لو تنساها حياتنا تمشي طبيعي وما نضل اسبوع مثل الغرب ويوم يلين كلبك وتحاجيني حجايتين حلوات وترجع تحسسني اني غريبة عليك مو مرتك

كعد يباوعلي لام شفته للداخل بعيونه حيرة
:- اسمها ما يتكرر ع اذني وذكرها گبالي قليل من تذكرونها تفززون جروحي

فاطمة :- ضل ضل بوضعك هذا بالاخير تخسرني وتعض اصابعك ندم

قيس :- منو گلچ اني اريد اخسرج لو مستعد لخسارتج يا فاطمة اني اريدج واريد اكمل وياج حياتي للممات صيري قوية وسنديني هاي الفترة فدوة رحتلچ

فاطمة :- اريد اجيب بنية واسميها ليلى

شمر الفراش وكام متضايق :- هسة هاي هم سالفة جديدة
فاطمة :- لا مو جديدة انتَ لازم تتعود ع هذا الاسم ماريد اشوف وجهك اصفر وروحك مطعونه كل ما تنذكر بنيه اسمها ليلى گبالك

تأفأف وطلع شوية ودخل يمسح بأيدينا متوضي
مد سجادته و وگف يصلي ركعتين واني كاعدة انتظره يكمل
طبگ سجادته وگال
:- انتي ليش تردين تسمينها ليلى

فاطمة :- اريدك تتعود على هذا الاسم اريد اذنك تتعود علي ما تضل تفز كل ما تسمع اسم ليلى

قيس :- بعدين تكولين قيس سماها ليلى لان يحبها وما ناسيها واطلع بالوجه الاسود گدام الاهل

فاطمة :- ايدني انتَ واني اگللهم اختاريت الاسم

قيس :- هسة خل تجي الطفلة بالاول وراها الله كريم

لم سجادته وتمدد حضني خله راسي بصدره وباسه
ادري بي يكابر وما ينساها بس اوهم نفسي
وجاي يجبر خاطري بهذا الحضن بس ما فاتتني رجفة گلبه واني مخليه راسي بصدره ولا حرورة انفاسه وتنهيداته وهو يتذكرها ..

كعدت ع صلاة الفجر صليت وخليتله ريوك ورجعت نمت
جنت متضايقة ومختنگة كلش لل9 الصبح فزيت سبحت ونزلت جوة لگيت خالتي بالمطبخ تدگ ثوم بالهاون
شافتني عافته وضلت تباوعلي بأستغراب وحواجب معقودة

ميقات :- ليش هيچ وضعچ شوكت تنزلين مرتاحة وبوجهچ ضحكة

فاطمة :- من يحبني ابن اخوچ وينسى ليلى
ميقات :- البنية تطلگت وراحت شبيج تلطمين متگليلي؟ انتي تنكدين وتضيگيها ع روحچ

فاطمة :- لا خالة ابد مو هيچ هي تطلگت صدك بس ما راحت موجودة
موجودة بدعائه بگلبه بعقله بروحه حتى بدمعته التنزل بجوف الليل وهو يناجي ربه ويتوسله حتى ينساها

ميقات :- گلتيلها حتى ينساها ياماما انتم جيل غريب كلش عبالك الدنيا تمشي بالحب
مادري منو زرع بداخلكم هذه الافكار الغريبة
ضحكت ورجعت تدگ ..

كعدت گبال الباب حطيت ايدي جوة خدي
:- الحب قوة تنافس العادات والتقاليد والمجتمعات وتنتصر دائما
بس انتم الماجاي تقتنعون

ما عجبها كلامي ردت معترضة وضلت توبخني وتطلب مني ما اذكرها گدامه واخلي ينساها واتقرب منه واتودد اله حتى ينسى الماضي والحب

طلبت منها تاخذني حتى اتأكد من حملي
هزت راسها وگالت :- اركب الجدورة واخذج للقابلة تفحصچ

ضليت مختنگة احس بنار بنص صدري رفعت طرف ثوبي مسحت بي دموعي
وينها هسة وين اراضيها هم موجودة بايران يمنه
لو راحت لغير مكان؟ نسته لقيس لو بعدها هايمة بعشقه وغرامه مثل قبل
البعد خلاها تنساه لو كبرت ثورة الحب بداخلها ومستعدة تسوي المستحيل حتى ترجع تاخذه مني

ساعة وخالتي كالت بدلي ونزلي صعدت لبست جواريبي وعبايتي ونزلت روحي خاوية
محتارة
خايفة
اذا طلعت حامل هذا الطفل راح يصير حبل يطلعني من بؤسي وحزني لو يزيد علي الهم همين

طلعنا نمشي رفعت راسي للسما ونخيت الله يبرد گلبي ويفك ازمتي
اريد ارتاح اريد اشارة تخليني متمسكة بهذا الزواج

واحنة بطريقنا للقابلة گلت لخالتي الكلام الكان يدور بيني وبين نفسي
:- زواجي من قيس هو لمصلحتهم مو اكثر هم رادو يفشلونه ويكلوله شوف ترة اختيارك لليلى غلط احنه هسة اختارينه الك الصح اخذها حتى ترضينا

وكفت خالتي تلهث وكالت متضايقة
:- وانتي مو قليلة. فطوم تحبينه وعاشگته ما صدكتي خالج كال يريدج لقيس لميتي جنطتج واجيتي لايران لو رافضته محد حط ع رگبتچ سيف بس انتي ردتي تصيرين العوض اله وتسدين مكان ليلى

سمعي فطومه ليلى مكانها جبير بگلب هذا الولد ومن راحت عافت مكانها خالي
السباعية وبنت ابوها تكدر تسده وانتي اختاريتي تكونين هاي السباعية يا تكملين للنهاية وتاخذين مكانها يا تنسحبين من حياته وتخلي يرجعها عاد هو والله يريد الحجة بس حتى يرجعها على ذمته

رديت معترضة :- اموت وعلي غير اتنفسه ويا الهوى اذا رجعها اموت بناري
ميقات :- جري عدل اذا هيج عاشگته لا تبزعينه وتطفرينه منج اني حسب الشفته والاعرفه ليلى جانت سباعية ودلوعه وبنفس الوكت مرة قوية
ماخذه عقله وماكله كلبه لازم تصيرين مثلها

فاطمة :- شلون اصير مثلها ماعرف

ميقات :- لبسيله تكشخيله تدلعي احجي ويا تگلبي بحضنه خلي يتعلق بيچ

هزيت راسي اي وكفنا كبال باب القابلة دكته خالتي وطلعت بنتها النه سلمن ع بعض
وكعدت بالغرفة جابتلي شرشف ما استنضفته تغطيت بعبايتي وخليتها تفحصني

باوعت لخالتي وضحكت :- انطيني لبشارة
خالتي مدت ايدها لطرف الشيله فتحتها وطلعت الها البشارة
ميقات :- بالمبارك فطومة الله يثبته الچ

لميت روحي وكتلها بنبرة ضياع :- الله يثبته ويجيبه سالم

طلعنا نمشي ورجعت ضايعة اكثر من جيتي
وكأن الحمل زاد ابطئت خطواتي وخالتي سابقتني بالمشي
رفعت راسي نزلت دمعتي ع خدي يارب لا تكتبلي بنية ابد اريد بس ولد

اني حلفت يمين من تصير عندي بنية اسميها ليلى
بس احس روحي مو گدها اخاف تجي ليلى ويحبها اضعاف واني انركن بالزاوية واصير منبوذة اكثر من هسة

دخلت غسلت وجهي لكيت بنت خالتي تثرم زلاطة
خالتي بشرتها بحملي باركتلي وكالت شو ما احسج فرحانة
فاطمة :- طايرة من الفرح بدون جناح

صعدت فوگ لبيتنا الصغير
بيت خالتي وهي متزوجة ابن عمها
عدهم فوك بيت صغير كعدنا بي اني وقيس من زواجنة الي كان قبل شهور

شهور ويا ما يوم حسيته يحبني ولا حسيت عنده مشاعر اتجاهي شگد ما حاول يتقربلي ويتوددلي بس احس بيناتنا حاجز ما ينشال بأي شكل من الاشكال

رجع الساعة ب3 صبيتله غدة كعد ياكل وحده لاني متغدية ويا خالتي
جنت اباوعله ياكل بهدوء وباله مو يمي ولا يم الاكل
كتله قيس
رفع عينه وكال ها

فاطمة :- اخذتني خالتي للقابلة طلعت حامل
وكفت اللگمة بحلگه جر نفس وابتسم
:- الحمدلله شگد الج حامل

فاطمة :- شهرين سيد
قيس :- ديري بالج على روحج فاطمة انتبهي لصحتج ولا تجهدين نفسج بأي شي اني اساعدج
اذا الشغل يتعبج تركي من ارجع اني اسوي

فاطمة :- لا الشغل ما يتعب سيد بس وجع الگلب يأذي

غمض عينه بقلة صبر ونطق بجزع :- فاطمة!!!

فاطمة :- ما جاي احس بحبك ما احسك تريدني
قيس :- شلون تحسين؟ ها فهميني شلون تحسين شسوي حتى تحسين اني اريدج واريد اكمل حياتي وياج

منو هذا المثل الكلب يشتغل شغلتين حتى يلم نفسه ويحطلج بيت ويساويج ويا باقي النساوين؟

منو الدايس ع روحه حتى يرضيج ويسمع منج اشكال الحجي والتذمر وساكت

اريد مرة وحدة ارجع اشوفج تضحكين تستقبليني تگليلي الله يساعدك من نفس راضية ماكو
وبكل ليلة لازم تتذكرين ماضيي وتبجين

فاطمة اني ما جبرتچ تاخذيني انتي الردتي ورضيتي بگاع بيها زرع غيرچ

نفض ايده وكال الحمدلله والشكر وگام

عيني ضلت تجري مقهورة منه كلش اتمنى اموت نفسي واموته واموت ويا ليلى ..

ضليت الم المواعين وابجي غسلتهن وغسلت وجهي دخلت لكيته متمدد تعبان بسته بكتفه وكتله
لا تزعل اوعدك وعد شرف راح اتغير وما اغار ولا اذكر الماضي
لزم ايدي باسها وخلاها جوة خده

قيس :- نامي يمي علوية

تمددت ايده مخليها جوة خده ومغمض غفه شوية وعيني ضلت ع الساعة لازم اكعده يروح لشغله
صارت الساعة بال4 ونص كعدته تمغط وكام يغسل

حضرتله ملابسه لبسهن جاي يطلع حضنته وبست خده
:- راح اشتاقلك

ابتسم برضا ومسح ع راسي :- احطلج بيت واتفرغلج حتى ما تشتاقيلي ديري بالج ع روحج و ع البذرة الي ببطنج علوية

ابتسمت دار وجهه وطلع سديت الباب ورا ومديت سجادتي صليت وقريت قرآن ودعيت الله اكون حامل بولد ودموعي تسبق الكلمات ..

.....

مؤمن :- دنيتي ويـنچ

مديت ايدي بيها المنشفة :- تفضل حبيبي

اخذ المنشفة من ايدي ينشف بوجهه وايدينه اخذتها من ايده واني امشي ورا واحچي

دنيا :- مؤمن
باوعلي مبتسم :- خاف تتأخر بروحتك والله اشبع بچي لحد ماتجي
مؤمن :- شسالفة علويتي؟ كله شهر اكمل شغلي وارجع هاي هيه الاردن شمرة عصا حتى مو بعيده

ميلت راسي :- شمرة عصا كتلي ؟ دشمرني هاي الشمرة خليني اكون يمك

مؤمن :- ما ترهم اخليچ شهر ببلد غريب واني اشتغل وانشغل عنج هواي علويتي

گلبت عيوني متضايقة ومديت بوزي
كال :- تكورن الشفايف نقطة ضعفي هاي

ضحكت ورفعت اكتافي بجزع
دنيا :- شوكت تروح هسة اريد موعد اكيد
مؤمن :- بعد اسبوع
دنيا :- خاف تشوف الاردنيات وتحب منهن وتنساني

ضحك ورفع رأسه :- الاردنيات مايحبن ابو عمامه علويتي
دنيا :- اي زين خليك انت وعمامتك الي
نصة بهدوء باسني جوة أذني عفست وجهي
باوعلي ما قابل رفع تك حاجب غمض عينه وميل رأسه باس طرف شفتي وهو يلف ايده حول خصري ويسحبني لصدره

ارتخن رجليني لزمته من صدره ، شال راسه وهمس
علويتي.. دنيتي
أنيت بدون شعور

باس راسي وضمني لصدره حيل
مؤمن :- بعدني ما رحت واشتاقيتلچ دنيتي

غورگت عيوني ضل يبوس بوجهي بشكل عشوائي ويحضني لصدره

ابتعد عني ع صوت الباب مسحت وجهي وفتحته شفت طوعة واكفة وابنها بأيدها شايلته

طوعة :- عمتي سميرة (ام قيس) جوة

هزيت راسي ومشيت غسلت وجهي بالحمام جان يمشط ويضحك بمكر
دنيا :- راجعتلك سيد

نزلت اعدل بحجابي سلمت ع امي بس هي چانت تلوب وضعها غريب
رفعت راسي شفت طوعة بالمطبخ وعمتي لحگتها
امي لزمتني من ساعدي وقربت راسها من يمي همست

سميرة :- دنية اجيت ابلغچ بشي سمتعه اريدج تنقلي لسيد مؤمن حتى يستفسر ويشوف النه الوضع

عقدت حاجبي مستغربة
حسيت بطني لوتني خايفة ، همست :- خوفتيني يوم
سميرة :- هيه السالفة تخوف شلون ما كان راح تنصدمين وتخترعين مثلي

قربت روحها اكثر وهمست :- ابن حماة عمتج نرجس ضابط گبل كم يوم كايل كدام عمتچ نرجس طليقة قيس بالسجن

شهگت حطيت ايدي ع حلگي مصدومة :- يااا شلون شلون مو طلعو لايران سوية

مسحت وجهه بعبايتها فحطانة وكالت بحيرة
:- ولج يوم ما ادري تكول عازمينة والولد كايللها جنة اخوج المعارضة الشردت لايران هسة بالعراق مسجونة
بعد طشت سالفتها من شردت وهل عرفها هذا الولد

دنيا :- زين شنو اكول لمؤمن
سميرة :- هو مو مسافر خلي يحاجي قيس اخوج يروح لاقارب ليلى الكاعدة يمهم يشوفها بحجة يسلم ويسأل عن الاحوال

سكتت درت وجهي باوعت لللدرج ورجعت حجيت وياها
:- خاف صدك وقيس يسويها ويرجع للعراق علمودها وينسجن خلينا نسكت يوم الله يخليج
اذا مسجونة احنة مابيدنا شي لو نوظف العالم كله حتى يطلعونها ماتطلع

ضربت ع رجلينها مقهورة :- احبها هاي البنية كلبي نار عليها ما مرتاحة

لزمت ايدها وحجيت :- يمة ليلى اذا مسجونة صدك ماتطلع
خلينا ساكتين وما نحجي لا يروح قيس يتهور ويرجع للعراق وينسجن نسيتي الجاي يصير يومية الامن جافتين يفتشون عنه يردون يلگونه ويسجنونه هاي اذا ما عدمو

سميرة :- عود ردت يستفسر
دنيا :- لا يا استفسار قيس اذا سمع ليلى بالعراق مسجونة يعوف ايران ويجي وهو هسة بركبته مرة شنو ذنبها اذا انسجن لو انعدم وضلت؟

هاي اذا ماطلع هذا الضابط كذاب يريد يجر لسان عمتي حتى يعرف معلومات عن قيس

سميرة :- هيج كولتج
دنيا :- هيج اكول اني هذا رأيي يوم لا تحجين كدام احد انتي ضمي السمعتي بگلبج حتى لو صدك ليلى مسجونة والله ماتطلع ولا بيدنا شي نسوي الها غير الدعاء

هزت راسها مقهورة كامت وهي تعدل عبايتها ع راسها وتنزل البوشية
سميرة :- خليني ارجع للبيت عازمين اصحاب ابوج عفت البنات وحدهن واجيت عليج
دنيا :- منو هذول
سميرة :- شيوخ من كربلاء يلا يمة اودعتج وهاي هيه لا تحجين كدام مؤمن ضمي السالفة اني ادعيلها الله يفك اسرها اذا مسجونة واذا بأمان وحرية ادعي يدوم الها

دنيا :- الله يفرج عنها كل هم وغم ويحل مشاكلها

طلعت من البيت وكفت كبال الباب مخليه ايدي جوة حنجي وافكر بحجيها
وبالشي السامعته عن ليلى
فززني صوت مؤمن وهو يعبر من يمي
مؤمن :- شو ما رجعتيلي دنية
ضحكت ومديت ايدي لفيتها حول زنده وكرصته

دنيا :- بعدين سيد

غمزلي وطلع راح ..

....

فاطمة ... تمر ايام حملي يوم بعد يوم وشهر وراها شهر
الى ان وصلت لشهري الاخير واني اخاف اعرف شنو بيه ولد لو بنية

باخر ايام من شهري كاعدين نفكر بأسماء للطفل اذا كان بنية لو ولد شنو نسمي
قيس گال هو حاب اسم حيدر اذا صار ولد بس اذا بنية محتار ومفكر يسميها جنة

باوعتله وكتله :- اذا بنية نسميها ليلى اني حالفة يمين

گلب عيونه ورفع ايدينه متضايق
:- انتي شنو تردين وين تردين توصلين فاطمة

:- ما اريد اوصل هو مجرد اسم انته مو تكول ما تهمني ليش ضايج وماتريد نسمي بنتنه ليلى

قيس :- لا عادي ما يهمني الاسم علمودج اني
فاطمة :- اني اريد اذا بنية ليلى

قيس :- هوا انتي ماقابلة ونفسج ماراضية بس الشغلة شغلة عناد وحلف
بعدين منو سمحلج تحلفين وحدج ترة اني الي الحق باختيار اسم المولودة وياج

فاطمة :- بعد صارت شسوي وحلفت هسة انت ليش ضايج
قيس :- كيفج والله ماضايج

وخر من يمي نزع محبسه خلاه ع الميز وگال :- جبت قماش العمامه ان شاءالله بهذه الايام البسها

فاطمة :- مبارك سيد ردتها ونلتها تستاهل العمامة

ضل يباوع بالفراغ
رجع التفت كال بحيرة :- فاطمة انتي من كل گلبج تردين تسمين البنية ليلى؟
فاطمة :- اذا بنية اي ليلى

سكت ودار وجهه ما جاي يفهمني ويفهم قصدي من تسمية المولودة ليلى

مرت الايام بدت تبين وياي اعراض الولادة من تقلصات والام
قيس لبس العمامه السودة باوعتله بيها زادته جمال وهيبة و وقار وحسيته صار ملفت ويمكن تشوفه ليلى بأي لحظة وترجع تتمسك بي

هاي البنية صارت كابوسي المؤلم والغيرة منها تذبحني رغم بعدها عن حياتنا

اباوعله يوكف كبال المراية يعدل عمامته ويرجع يباوعلي فرحان
ويهمس الحمدلله ، بقت ولادتج وراها البيت وتكتمل حياتنا

ضحكت ومشيت بسته بزنده :- الله يسهل

وبليلتها اجت الطلگة وخالتي راحت تركض جابت القابلة
جان شهر الواحد بسنة 2001
الدنيا بيومها باردة وصوت شهگاتي وصرخاتي من الالم اختلطت بصوت الهوى العالي اليردتم باغصان الاشجار العالية

اجت القابلة تولدني بالبيت خالتي يمي ساعدتني
تمنيت امي تكون موجودة بس شسوي اني اختاريت البعد والغربة علمود قيس
اختاريت ابتعد عن اهلي واجي يمه بس حتى اصيرله زوجه واحصل ثمرة حب انزرع بداخلي من الطفولة

عضيت الشال متوجعه وعطت يااا علي يا ابو الحسن

ميقات :- تنفسي حيل خالة دفعي

فاطمة :- يااااعلي ، ياا عليي يالله

ميقات :- علي وياج خالة

غمضت عيني الهث وسمعت صوت الطفل يبجي بيد القابلة مغمضة عيني الهث واحجي بتعب
:- شنو جبت؟

ميقات :- بنية الحمدلله 

بجيت بوجع اشهگ خالتي لزمتني تفرك ايدي وتحجي
:- لا تبجين خلصت هل جبتي خليج قوية
فاطمة :- اريد ولد

ميقات :- كولي الحمدلله لا تتعافين الناس تبجي ع ريحة البنية والبطن الجابت بنية تجيب ولد

غمضت عيني ، ساعدتني القابلة
وخالتي بدلتلي ملابسي ورفعني ع الجرباية نومني
مسحن البنية ولبسنها وكمطنها وخلنها بسلة يمي

باوعتلها وبعيني دمعة حارة ، همست بصوت مكسور
:- جعله ما حبچ ولا رادچ الله لا يزرع ذرة حب بگلبه الچ

طلعن من الغرفة شوية وفات قيس ويا خالتي شالها مبتسم اذن بذانها وگال اسمها بأذنها "ليلى"

خالتي ردت معترضة :- ليش ليلى خلصت الاسامي

رديت من مكاني :- اني حالفة من تصير عندي بنية يكون اسمها ليلى

باوعتله ما قابلة وطلعت

قيس :- الحمدلله على سلامتچ علوية

باس راسي ، هزيت راسي وغمضت عيني انام

ورا نص ساعة واني احاول انام بس فشلت بسبب الالم
سمعته يحجي وياها وهي عمرها اقل الساعة

قيس :- ليلاي .. حبيبة ابوچ خاتونتي
الحمدلله قر عيني بشوفتچ ، علوية اني قيس ابوچ .. ليلاي

رفعت الغطا عضيته بحلگي اخفي شهگاتي ونمت اني وحسرتي ولوعتي ع نفس المخدة ..

شايلها ع گلبه وما يحب تنزل للگاع ومداريها

يدخل للبيت من الباب يصيح ليلى ورغم هي طفلة ما تفهم ولا تسمعه ولا تعرف
بس حبه الها واضح وعيونه تلمع كل ما يشوفها تناغي
لو تضحكله ، يشيلها يبوسها ويشم نحرها ويهمس بلهفة ليلاي.. ويخليها ع صدره

حسيت روحي صرت غريبة بنصهم
وجبت الروحي هم فوگ همي ، انتقلنا لبيت صغير خاص بينا
قررت اضغط ع نفسي واخلف طفل ثاني علمود اشوف حبه يتوزع بين الاثنين وابطل من هاي افكاري الرابطتهن بالاسم

صرت ما احس بليلى بنتي ومشاعري اتجاها ما واضحة محبة لو كره
اتعجب من نفسي اغار من طفلة عمرها شهور وكل ما تكبر كل ما تترس البيت بضحكتها وسوالفها

تحبي ورا وتصيح ببا ببا وهو يفتح ايدي فرحان ويگللها ليلاي تعالي

ويشيلها يبوسها ويضمها ع صدره

واني اختنگ بعبرتي وغصتي

مرة من المرات شفته واگف كبال الشباك مخنوگ

كتله بتساؤول :- شبيك مو ع بعضك

كال مقهور :- افكر باهلي وناسي واتمنى هسة انگلب طير وارجع للعراق ازور الاهل والاحباب

تحسرت :- لو ما ليلى ما صار هذا وضعنا

باوعلي مستاء :- وشجاب البنية بالنص حتى ماندري بحالها ولا هي يمنه ولا بكاعنا

:- ع كيفك هسة شنو حجيت اني؟!
سكتت ودرت وجهي

فتح المسجل شغل قصيدة لباسم الكربلائي .. يالقاصد قبر حسين
ضل يقرا ويا الملا ودموعه تجري من آلم الغربة والبعد والشوق لزيارة كربلاء .. والمقدسات والصلاة بالامام الكاظم

ضل يقرا
يالقاصد قبر حسين اوكف وانحني ابابه
هل دمعك على الخدين و اسجد قبل اعتابه
يالزاير لون كبره يلوح العينك من ابعيد
سلم واعقد النية واقرا الحمد والتوحيد
واطلب من ابو السجاد كلما تطلب وشتريد
اصعب واكلف الحاجات عنده بكل وكت سهلات
وطبع الرزق بالنيات

اجهش بالبكاء ورفع ايدينه يدعي رب العالمين ويتوسل :- ياللهي بحق الحسين ابن علي وذاك ابو راس الحار ابن البدوية اكتبلي رجعه لارض العراق وارزقني زيارة الحسين

تحسرت ومسحت دموعي الغربة مؤذية وروحي اشتاقت لريحة العراق .. ولاهل العراق

كانت السنة 2002 .. واجة زاير من اهلنا بالعراق لايران وگال صدام حسين ناطي عفو عام بس ما يشمل السجناء السياسيين

...

ليلى ...ظنينا الحرية اجت وراح نفرد اجنحتنا ونحلق اخيرا
بس صدمنا قرار العفو العام ما يشمل السياسيين
اني والشيهانة مكتوب علينا نتعذب ونضل نصارع الموت والوحدة بداخل السجن

جنت ابجي بحرقه مقهورة كل ليلة وبكل لحظة اتذكر العفو العام ما يشملنا

الشيهانة توكف بطرف الزنزانه تبجي بحسرة وترفع راسها تغمض تنزل دمعتها وبعدها تتقرب لفراشها تنام ساعات طويلة بدون شعور

كأنها تهرب من الواقع للنوم حتى تنسى ان هي نهايتها راح تكون هنا .. والله وحده يعلم شوكت تجي هاي النهاية

مرت علينا ليالي سود وصعبة الالم صار مضاعف
نتحسر ع ريحة الحرية
نريد نشم هوى نقي برا السجن نريد نتنفس

وما طال الامر كلش بسنة 2003 وبعد سقوط بغداد
تم اقتحام السجون من قبل الاهالي او قوات مسلحة
وبعض الامن تركو السجون مفتوحة وانهزمو

واتاحو الفرصة لالاف المساجين بالفرار
واحنة من ضمنهم

عيوني تدمع وهي تشوف الشمس طلعونه قوات مسلحة ماندري هذول شنو ومنو مدنيين لو عساكر
ملثمين وشايلين اسلحة

طلعنا من السجن وجوه صفرا شاحبة
ضعف،  عظامنا بارزة
كأننا هياكل عظمية

اهالي تعزف وترقص وفرحانين ..

كنا نحس بضياع ايدينا بأيدين بعض
قلوبنا غريبة
عيوني تدمع من الضوة ممتعودة خليت ايدي ع عيوني

عرفنا هنا تم اسقاط النظام وماكو وجود لصدام حسين بعد ، تحررنا من قيود الطاغية
لم نكن نعلم ما ينتظرنا .. يسقط طاغي ويظهر طاغي اخر
ونحن مجرد دمى يحركها بخيوط ملتهبة تحرقنا وهو يضحك ..

فردنا جناحي الحرية .. سمح لنا بالتحليق اخيرًا

لكن .. اكتشفنا اننا حمائم ... تخشى الطيران
.............................بدأت الحكاية

رأيكم بالقصة يهمني 🖤

التنزيل بين يووم ويوم ... شاركو القصة وساعدوني بالنشر لطفًا ..