رواية حمائم تخشى الطيران الفصل الخامس وثلاثون 35 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

لتنسون تصويت + تعليقات بين الفقرات لطفا ..

حسابي واتباد FFATEMA__

نسيمة :- الحمدلله على سلامتچن خالة
تحضني وتبوسني حيل وترجع تلزمني تتفقدني
نسيمة :- اليوم فرح گلبي وكرت عيني بشوفتچ ليلو حبيبتي يممممة كون اضمچ بنص گلبي حتى ما يلوحچ شر

ليلى :- الله يسلمج خالة
نسيمة :- دخلن دخلن بسرعة

دخلنا للبيت سدت الباب نزعت من رجلي وفتت للبيت اباوعله بعيون تدمع هنا حور حرگت نفسها
هنا كعدنا هنا حجينة وضحكنة وسولفنا

دخلت وراي الشيهانة كعدت ع القنفة الخشب المحطوطة بالمطبخ ولهسه بنفس مكانها
هنا شكد كعدت وضحكت وبجيت وسولفت وتعاركت ويا صهيب

عيوني تتنقل بالمطبخ هنا ريحانة جانت تكعد ترسم وتدرس

نسيمة :- وين كاعدات امشن للاستقبال اريح
شيهانة :- لا عادي بعد كعدنا .. باوعت للبيت ورجعت باوعتلنا
:- هنا امان

نسيمة :- اي احنه اطراف بغداد امان الحمدلله

كعدت يم الشيهانة واني انزع حجابي من راسي
:- والله ما مصدگة روحي صرت حرة وطلعت من السجن
شيهانة :- خاف يرجعون يسجنونه

نسيمة :- لا بعد الاوراق القديمة احترگت وانتهى حكم صدام حسين

شيهانة :- سقط النظام .. تنهدت وكملت
هو يومية نظام ساقط يروح. ملك يجي زعيم ورا رئيس واحنه نمجد فلان وعلان

نسيمة :- يوو والله انتن شايلات هم الدنيا دفرحن تحررتن
هلهلت ضحكنا وباوعنا بوجوه بعض

ليلى :- هسة منين ابدي منين الم روحي احجيلي خالة شصار ماصار من جنتي تزوريني كلشي ماتحجين بس تبجين وترجعين

نسيمة :- شصار كلشي ع حطة ايدچ
ليلى :- ريحانة شلونها
نسيمة :- زينة رحتلها لصلاح الدين كم مرة شفتها عايشة يم ضرتها تربي الولد ومداريتها البنية خطية حاسبتها مثل بناتها

ليلى :- الحمدلله
سكتت جابت ماي شربنا وكالت
:- هادي ابن عمج واصل لايران مرتين لبيت ابو محمود وكايليله ليلى راجعة للعراق وعافت الولد يمنه
اجة هد عليه عباله انتي يمي كتله مو يمي ليلى بالشمال وما اندل عنوانها كلت انتي من تطلعين منج لابن عمج تتفاهمون

ليلى :- يبووووووي
لطمت رجلي خايفة :- بالله هذا المسودن شلون اذا كتله جنت مسجونة يكتلني والله
ضحكت وهزيت ايدي مسودن بس حنين هادي ياليت الزلم كلهم هادي

نسيمة :- اي مفلحم اجة ميت من وراچ يريد بس يعرف خبر عنج كتله مادري اذا اجت ادزها عليكم وانتم تفاهمو مرة طفر من السياج للبيت فتشه يدورچ

ضحكت وجريت نفس :- هوا لازم امرلهم واحجي وياهم واجيب ابني
خالة شوكت اكدر اروح لايران واجيب وليدي؟

نسيمة :- خل تهدأ الاوضاع ابنج زين حسب حجي هادي الناس مدارينه بس ما غاثني غير هذا ابن السادة عنده ولد ومايسأل عنه

شيهانة :- عذروني ع التدخل بس اكو شي ابالي يخص قضيتج ليلى
باوعنه الها ثنينه
شيهانة :- اتوقع اقارب قيس ما موصلة خبر حملج الهم والله الواضح من حجيج الناس زينين وما يذبون لحمهم ولا ينكرونه واقاربهم مبينين مكروهين رادو يعوفج وياخذ علوية من بناتهم

سكتت اباوعلها بتفكير ورجعت باوعت لخالتي محتارة :- وين اكو بشر يسوي هيج شكد ما كان عديم انسانية وميت ضمير هم ما يضم خبر حمل مرة عن رجلها لا كولي غيرها مستحيل

نسيمة :- وليش تستبعدين يا خالة هاي الناس نفسياتهم مادري شلونها اشكال والوان جاي نشوف هسة يلا طلعتي خل نشوف شلون تصفا ونجيب الولد يمچ وراها الف حلال يحلها

هزيت راسي تحسرت :- كلبي نار علي وباوعي لشيهانة حظها نفس حظي اذا اني واحد هي مفاركة بنات ثنين و ولد

نسيمة :- جدر ولگة غطا هسة انطيجن ملابس عندي مملبوسة ولو انتن عظام يمكن يخرطن منجن بس ميخالف مشن امورجن لحد ما اجيبلجن كم قطعة جديدة
سبحن وارتاحن

كامت تطلع ملابس باوعتلي الشيهانة وكالت باحراج
:- خاف اقلق راحتها لخالتج لو اسببلج احراج
ليلى :- ليسمع كلامج هذا مايكول جنت اسولفلج عليها كومة و ع وكفاتها ويا الناس

شيهانة :- اي بس يمكن المرة تغيرت ووتحب الخصوصية وماتريد وحدة غريبة كاعدة بنصهم
ليلى :- لا خالتي ماتتغير

شيهانة :- بس تهدأ الاوضاع اروح لعمار صديق جبران يساعدني
ليلى :- شتسوين؟
قوست شفايفها ورفعت اكتافها بمعنى ما تدري

ليلى :- يلا هوا هسه طلعنه يرادلنا هواي يلا نصفي امورنا وحساباتنا

شيهانة :- اني ماعندي حسابات اصفيها سلمت الامور كلها لرب العالمين اريد ادور اولادي واجيبهم المهم حولي واعيش وياهم باقي عمري براحة
ليلى تعبت تصفية الحسابات يعني راح اخسر الي بقو الي من عائلتي

ليلى :- موقصدي هيج
شيهانة :- انتي هم لا تسوين شي جيبي ابنج حطي ع كلبج وربي الدنيا ما تمشي عدل بس ويا الصلف والظالم واحنة مو هيچ الدنيا ماتمشي ويانه
لهذا خلينا احنة نمشي وياها ونجاريها

ليلى :- اي والله صدك اني هم اريد ابطل استعجال واحسب الف حساب للشغلة قبل لا اسويها

نسيمة :- هاي ملابس للشيهانة تعالي اخذج للحمام خالة

هزت راسها وكامت وصلتها للحمام ورجعت كعدت يمي
نسيمة :- شسالفتها هاي البنية
ليلى :- يبوووي لو تسمعين مصيبتها مظلومة ومسكينة
شنو احجيلج عنها بس المسكينة مظلومة وانسجنت ظلم

نسيمة :- انطيني مختصر بعد اني هم اخاف عليج اريد اطمن
حجيت الها قصتها باختصار حطيت ايدها ع خدها وكالت مقهورة

:-عزة وطين شنو هاي اختها هم بشر وابن عمها! يبوووي من عزة بعينهم مضيعين عائلتين بسبب طمعهم

ليلى :- اي والتكتلج اختها تلعب ع اربع حبال مأملة واحد بالكويت ومتزوجة ابن عمها الصغير وتخونه ويا اخو الجبير وهي تحب الاخ الوسطاني
يعني عجيبة انسانة عجيييبة الله ينتقم منها ويوكعها بشر اعمالها هي وابن عمها الخسيس الخاين

نسيمة :- يييمة يمممة الناس تخوف كلش يومية نسمع سالفة تشيب العقل الله يسترررر من الجاي
الله يستر
ليلى :- خالة مشتاقتلج

خليت راسي بحضنها حضنتني تبجي وتمسح بدمعتها
:- سودة عليه خالة والله اني لو بيدي ولا اخليج تنسجنين يوم بس مابيدي شي شكد حاولت

ليلى :- الحمدلله انتهى الكابوس تحررنا

نسيمة :- الحمدلله اني اذا شفت الوضع مايطمن واكو خطر عليج اجيبلج ابنج واخذج ونطلع لغير دولة ماريد يمسج سوء من اليوم ورايح

ليلى :- بس خلي الايام هاي تمر ونشوف وضع العراق المضطرب شلون يصير

نسيمة :- ان شاءالله

طلعت الشيهانة رحت فتت وراها سبحت زين بس ايدي كانت ترجف مادري فرحة لو صدمة لو مامصدكة الجاي يصير وياي بس الرجفة لزمتني كلش

طلعت من الحمام انشف بشعري واشوف الشيهانة كاعدة كبال خالتي تمشط شعرها لامة رجليها لصدرها وتباوع بالفراغ

ضحكت وكلت بغيرة مصطنعة :- غرت خالة هاي شكو
نسيمة :- هههههه البنية ترجف مابيها تمشط
ليلى :- اني هم ارجف

نسيمة :- لو ما الغيرة ما حبلت الخنزيرة

ضليت اضحك كعدت يمهن انشف بشعري وعيوني تتفقد المكان احس اريد اروي ضمأ روحي
حتى هذا البيت الجنت اكرها صار احب شي لگلبي واتمنى اكعد بي ماطلع صرت اخاف من العالم الخارجي

الشيهانة كسرت الصمت بسؤوالها :- اني هم وراي ادور بالكويت عن ابني دام مشاري مات فطس هسة اكدر اروح وادور براحتي

ليلى :- مو عندج قرايب بالكويت دزي الهم خبر خل يسألون وين ترحين تدورين عن ابرة بكومة قش

شيهانة :- اول شي ادز الهم خبر يسألون اذا ما حصلو ابني اني اروح اريد احارب هاي الدنيا كلها بس حتى الم اطفالي بحضني راح يموتني فراگهم ذبحني ذبح

دمعت عيني اني وياها نفس الوجع بس وجعي ارحم ع الاقل اندل ابني اروح اجيبة واخلي بحضني الا هيه تحتاج تدور بالدول يلا تكدر تلم الشمل وتحصل اطفالها

سوتلنا خالتي اكل من هل قاسمة الله وفرشت النه بالاستقبال فراش نظيف
تمددنا واحس روحي بس غمضت غفيت مادري شنو السبب روحي تبنجت بعد كل شي مريت بي لو هذا هروب من الواقع ومخاوف الواقع للنوم العميق
ويمكن بسبب راحتي الاحس بيها

نجهل حتى سبب نومنا السريع بهذا اليوم ..

فزيت مخروعة على صرخة الشيهانة رفعت راسي لكيتها تلهث وتكوم وتطيح ع اركبها بنص الاستقبال
ركضت عليها رفعتها من اكتافها باوعتلي تبجي حضنتها لصدري لفت ايديها ع ظهري تبجي

شيهانة :- راح يعدمووني مخلين حبل ع ركبتي الحكومة راح تعدمنييييي

ليلى :- اسم الله كابوس هذا جاثوم فتحي عينج احنه طلعنا من السجن ماكو شي يهددنا بعد

شيهانة :- السجانة حطت حبل ... باوعت بارجاء المكان كمت بسرعة شبيت اللاله لان الكهرباء مقطوعة باوعت للمكان وضلت تتحسس رگبتها

دخلت خالتي تلف الروب ع جسمها وتحجي بخوف
:- شبيجن
ليلى :- ماكو شي كوابيس السجن الما راح نخلص منها طول العمر
صبيت ماي شربت وغسلت وجها بأيدي ميلت الشعرات النازلات ع كصتها وخليتهن ورا اذنها

ليلى :- هاا استوعبتي انتي هسة برة السجن وماكو خطر بعد

هزت راسها اي كالت بصوت يرجف مابي روح
وهي تباوع بالفراغ
:- استوعبت احنه برة السجن بس مجاي استوعب ماكو خطر بعد ورانه ورانه الخطر ليلى

ليلى :- لا ماكو بعد

غمضت عينها ساعدتها تگوم للفراش تمددت خلت ايدها ع گصتها وذبت ايدها الثانية ع الكاع بتعب
باوعت لخالتي بقهر

نسيمة :- ندبر حل لاي مشكلة انتن بس ضلن هنا ولا تطلعن لحد ما نأمن عليچن

راح النوم من عيوننا ويمكن شبعنه نوم لان نايمين من زمان ، مشيت للمطبخ سويت جاي الوضع جان شبه هادئ
بس اسمع صوت طيارات بالسما وما مخلين اي ضوة مفتوح ولا شمعة ولا لاله

مشيت للغرفة بالضلمة بأيدي كوبين جاي كعدت يم الشيهانة وكتلها
:- تشربين جاي

رفعت راسها وكعدت ارتجت ع الحايط اخذت من ايدي الكوب خاطته واخذت منه رشفة

ضلت تفكر بأهلها وناسها طبت خالتي مرة ثانية وهم صابة جاي لروحها كعدت يمنا كالت للشيهانة
انتي هسة اهلج وناسج هم يردونج ورا ما انسجنتي

شيهانة :- اي چا شلون ما يردوني؟
يتمنون يوم طلعتي وجانوا يجون يزوروني للسجن بوقت الزيارات بس هم رجعو للبصرة صارو بعاد

نسيمة :- زين همه مو كعدو ع الحديدة من اختج وابن عمج خذو مالهم وحلالهم هسة وين كاعدين عدمن

باوعتلي الشيهانة ورجعت باوعت لخالتي
:- كعدو ببيت اهلي الي احترك ساعدوهم عمامنا ورممو وكاعدين بي الحمدلله والشكر

نسيمة :- ياا يعني عندج عم ثاني
شيهانة :- لا من اولاد اعمام ابوي هو بس عم واحد عندي بس تعرفين بعد الظفر مايطلع من اللحم و وكفتهم ويا عمي بهيج موقف تعتبر رد واجب لان ابوي وعمي ما قصرو ويا احد

بس مشكلتهم الله بلاهم بعادل وهدير طماعين انذال

نسيمة :- اي يطلع من الظهر العالم فاسد

شيهانة :- انتم تدرون اني هسه صرت واثقة اهلي ماتو محروگين ع ايد هدير وعادل رغم ما اعترفو ولا اكو دليل وحتى عمار من شايف طليقي مشاري كايله هدير تسحرني ورابعهم عادل يساعدهم بس ما كال حاركين بيت اهلي

ليلى :- هيه مبينه داده ما تحتاج تفكير السوو بعمج كل هاي العمايل ما تصعب عليهم يحرگون اهلج

نسيمة :- يبووي عزة بعيونهم هاي اختج شنو من گلب شايله توصل بيها تكتل اهلها علمود فلوس

شيهانة ردت متحسرة :- مو بس طمع حتى غيره هدير تغار مني ومن اخواني وخواتي
والاكثر مني
الغيرة الخلت اولاد نبي يلقون باخوهم بالبير ماتخلي هدير ضعيفه النفس والارادة توصل لهاي المراحل وتحرگ اهلها؟

ليلى :- اي اجتمعن الغيرة والحسد والطمع بوكت واحد والنتيجة بشعة الله يوكعها وينتقم منها

مرت هاي الليلة الطويلة رغم عدم استقرار الوضع الا ان احنه بعد نص ساعة من الكعدة دخلنا بحالة ضحك غريبة ضلينا نضحك ع اتفه الاسباب ونتذكر اسوء المواقف الي المفروض تبچينا بس! ضحكنا عليها بدون وعي

خالتي منعتنا من الطبة والطلعة لأي سبب كان لو مصيري كالت يهدأ الوضع كلش يلا نطلع وندور ونشوف شنو نسوي

ضلينا بهاي الفترة نتگلب ع جروحنا من الالم كل وحدة بينا عدها احباب تريد تروحلهم وتشوفهم لو تطمن عليهم

بعد ايام طلعت الشيهانة من يم خالتي جنت بالمطبخ امشط شفتها لابسة تنورة وقميص وشعرها رافعته ذيل حصان وشايله جنطة من خالتي
عقدت حاجبي مستغربة واني اباوعلها
كالت بدون ما اسألها :- يكولون الناس رجعو لبيوتهم اريد اروح لبيت عمار صديق جبران لازم اشوفه وسأله عن جبران وادور علي يمكن يكون سجين وطلع مثل ما طلعنا احنه

ليلى :- ترحين وحدج؟
شيهانة :- شعليه؟ الغرگان ما يخاف من المطر

ليلى :- انتظري البس ربطتي وعبايتي واجي وياج
شيهانة :- لا ضلي اني ما اتأخر وارجع

نسيمة :- تندلين؟
شيهانة :- اي جا شلون عمار حتى بالسجن يزورني ما كطع

هزت راسها خالتي طلعت باوعت وراها ورجعت باوعت لخالتي
:- لو تدرين شكد شايلة هم وقهر هاي البنية
نسيمة :- مبين محملة هواي

....
شيهانة ...طلعت من بيت الخالة نسيمة وشايله وياي كل توصياتها بسبب اضطراب الاوضاع جان عدها خوف
بس اني اصريت اطلع واروح لعمار عسى ولعل الگاه موجود وعنده خبر عن جبران

لاحظت اكو حذر بعيون المدنيين والتنقل كان بي خطورة القوات الامريكية تارسة الشوارع بالهمفي او المدرعات واكو تفتيش مستمر

الشوارع ما كانت امنه ، بس گلتها الغركان ما يخاف من المطر

وصلت بعد وقت طويل وصرف هواي وخوف لبيت عمار اكو حركة بشارعهم بي روح
نزلت اجر بخطواتي واتوجه للباب دگيته حيل بعد دقايق من الدگ اجاني صوته من ورا الباب يگول منو

غصيت بعبرتي وجاوبته بصوت مخنوگ :- الشيهانة زوجة جبران

فتح الباب بسرعة مالحكت اسلم مد ايده لزمني من ساعدي وجرني للبيت وسد الباب

يباوعلي بعيون مصدومه ويرزل بيه
عمار :- انتي وينج شلون تختفين اني عفت ديالى ورجعت لبغداد بالخطر علمود الگاچ وماكو اختفيتي
وين رحتي وين جنتي كل هاي الفترة سجنكم اقتحمو من زمان وكل الطلعو رجعو لأهاليهم

شيهانة :- اخذتني سجينة صارت صديقتي
يم خالتها باطراف بغداد بوكتها هناك امان اكثر منا وهم عرفنا انتم تركتو بيوتكم بسبب الخطر

غمض عينه فرك جبينه وكال :- الحمدلله ع سلامتج تعالي فوتي فوتي
شلونج شلون وضعج وليش جايه وحدچ خطر خطر انتي شنو من بشر

كلبت عيوني بضجر :- ماعندي شي اخسره بعد

فوتني للصالة امه وزوجته كاعدات القيت السلام امه عرفتني كامت بوستني وكعدتني يمهم
كعد كبالي شبك ايدينه وخلاهن كباله
:- اساعدج ترجعين للبصرة باسرع وقت هناك امان اكثر ومنها تصيرين يم بيت عمج

هزيت راسي لا
اني اريد ادور جبران والگا يمكن يكون سجين وطلع ويا الطلعو

عمار :- وليش عبالج اني مغلس علي دا ابحث عنه بشكل مستمر انتي مرية وعليج خطر روحي كعدي يم اهلج وناسج وجبران اذا سجين وطلع اني الگاه واوصله بأيدي للبصرة

شيهانة :- شنو هو الخطررر؟ سجن انسجنت كتل انكتلت عذاب تعذبت وماضل شي ما شفته بحياتي ماكو خطر عمار اني عشت كل شي وبعد ما اخاف هسة اريد اضل فترة ادور جبران ومن الكا ارجع للبصرة ويا وادز ناس ع ابني وشوف شلون تصفا

امه اشرت لزوجته كامن للمطبخ
صفن علي جر نفس وضرب رجله متضايق
صفن شوية ورجع كال
:- شنو مخططج هم تردين تاخذين الثار

هزيت راسي لا
:- اريد استقر ماريد ادخل بمعارك ويا ناس واخسر البقالي اني بس الگى جبران تنحل نص مشاكلي

وكل واحد ظلمني خليت الله علي هو ياخذ حقي اني ضعيفه كبال مكرهم وحيلتهم وخصوصا هسة بعد السقوط ماتوقع نكدر ناخذ منهم لا حق ولا باطل

عمار :- اي والله صحيح زين تسوين لا تورطين روحج هذول الانتقام منهم مايصير الا بالقتل وانتي ما تردين تنسجنين مرة ثانية

شيهانة :- ليش هو اكو نظام
عمار :- يصير وداعتج ويمشي عليج مايمشي ع غيرج لهذا السبب صيري عاقلة وعوفيهم هم ما موجودين اصلا

شيهانة :- ما تعرف وين بالضبط
عمار :- والله خارج العراق يتنعمون بالمال السرقو وصفو كل حساباتهم هنا
هذا العرفته

شيهانة :- عساهم ما تهنو بي ياليته هذا المال صار نار تحرگهم مثل ما حرگو گلوبنا بسببه

عمار :- امين ... سكت شوية ورجع گال
اتوقع جبران عايش وسجين اني والله جاي ادوره هذا اخوي بس المشكلة اني علي خطر خصوصا بعد سقوط النظام وماعتقد مطول بالعراق

هزيت راسي وكتله اعرف المثلك هسة صار بخطر امس سمعنه مغتالين شخص كان مثلك

عمار :- هسة انتي ضلي هنا يمي لازم اوصل خبرج لبيت عمج كلوبهم يمج
شيهانة :- وصللهم بس اني اريد ارجع يم ليلى خطية تموت خوف علي اذا مارجع

عمار :- نروحلهم تبلغيهم بخبرچ ونرجع

باوعتله بخوف وهزيت راسي لا
عمار معرض للخطر ما اريد يطلع وياي واكون سبب بأذيته

شيهانة :- اذا تريد تخليني مرتاحة ضل انته اني اروح يم ليلى وارجع اذا گدرت انت معرض للخطر عمار ماريد يمسك سوء والله اكتل روحي كافي هواي تأذو ناس من وراي

ماقبل بس اني لحيت واعترضت واخير شي طلعت من يمهم وحدي ورجعت لبيت خالة ليلى بعد ما اتفقنا نضل ع تواصل مستمر علمود نعرف اخبار جبران
وانطيته عنوان بيت خالة ليلى

رجعت وقت المغرب والشارع يخوف اباوع لابو السيارة شكله مريب وصلني وراح بسرعة واني ركضت دكيت الباب ودخلت الهم الهث

حطيت ايدي ع گلبي وحجيت براحة
:- يمة الدنيا تخوف برة

نسيمة :- عوفي الخوف ما عرفتي شي عن رجلج

هزيت راسي
بس عمار يدوره واني هم اريد اطلع باجر واحط اسمه بكل مكان وانشر بالجريدة اذا كدرت حتى اوصل اله لو اخلي يوصلني

نسيمة :- ها يعني ما استفاديتي شي من روحتچ

ليلى :- هسة استفادت ما استفادت المهم تحصل رجلها

شيهانة :- لا استفاديت عمار حجالي بالتفصيل كلام مشاري خلاني اعرف اختي وين واصلة بالانحطاط والظلم والغيرة والحسد وعرفت هم بالخارج متزوجين وعايشين حياتهم

شهگت ليلى وگالت باستنكار :- زواجهم باطل شلون واحد يتزوج وحدة زنا بيها وهي ع ذمة رجلها

شيهانة :- ليش المثلهم يهمهم باطل وحلال شبيچ انتي

خليت ايدي ع خاصرتي وافتريت بالمكان
عمار يخوف وضعه يمكن ينقتل لو يطلع برا العراق ماتوقع يضل هنا

نسيمة :- يا يابة شببي شكو
شيهانة :- كان ينتمي لحزب البعث وعنده اعداء هواي وناس كانو مساجين اعتقد هسة طلعو من ضمنهم "بشير" الي طلع يتعامل ويا هدير وعادل ومشاري ضدنا
وضد عمار

ليلى :- عرفته نفسه الدز كتابات خلوج تحطينهن لجبران وينسجن مرة
:- اي بس عمار قلب الطاولة ضدهم وسجن بشير هسة ع الاغلب بشير طلع وهذا بظهره ناس يابو ناس حسب كلام عمار راح يتشيخون علينا ويفرضون نفسهم بظل هاي الضروف الوضع متأزم كلش

نسيمة :- الله الستار تعالن هسة اكلن وبعدين نشوف

ليلى :- ملاحظات ماعدنا غير حجاية بعدين نشوف وشوكت تجي هاي البعدين ماندري

رفعت اكتافي مادري ودخلت غسلت واكلنا ، اليوم الثاني هم طلعت سألت وتركت رقم بيت خالة ليلى يم هواي ناس ورحت للمنطقة القديمة هم سألت وتركت الرقم حتى من يجي خبر يخص جبران ينقلو الي

ونشرت اسمه الكامل والرقم وضليت انتظر مكالمة تجي وتبرد گلبي

كدرت اتواصل ويا عمتي علياء بالبصرة كانت مكالمة مغلفة بالدموع والحزن وطلبت مني اترك بغداد وارجع للبصرة

بس رفضت رفض قاطع كتلها اذا مو وياي خبر اكيد عن جبران ما ارجع و وصيتها تتواصل ويا اقاربنا بالكويت حتى يسألون عن صگر وشعلان ابني وحتى عن مهيب وبناتي ..

بعد ايام قليلة رن التلفون ركضت سحبت السماعة خليتها ع اذني وكلبي يرجف
صوت رجل غريب اول ما سلم كال

:- ناشرين اسم شخص جبران حميد ، ومواصفاته
يمنه شخص بهذا الاسم جان مسجون بسجن ابو غريب وطلع بس الرجال ما يتذكر اهله وناسه بس اسمه ينطقه ويرجع يسكت

طاحن دموعي ع خدي شهگت وجثيت ع اركبي رجليني ضلت ما تشيلني
:- اني زوجته انطيني العنوان هسة اجي اشوفة ابحث عنه صار ايام

رد :- هاي هيه بس تجين هسة بالنهار مو بالليل
راح انطيج العنوان بالتفصيل حتى ما تضيعين

انطاني العنوان كتبته بورقه ونهيت المكالمة كمت اركض وعيوني تتسابق ع خدودي
وخالة ليلى تبدل حتى تجي وياي مارادت تخليني وحدي

طلعنا بهمه اخذنا سيارة للعنوان جانت گهوة بظهرها بيت رحنا نسأل عن الرجال فتحلنا باب الكهوة جانو بيها كم شخص
اشرلنا ع واحد اباوعله رجال حواجبة نازلة ع عيونه وشواربه ولحيته عالياات كلش وشعر راسه طويل

خصمت عيوني اريد اميز شكله مشى قبلي وكال
هذا الاسمه جبران حميد

مشيت ورا وخالة ليلى لازمتني من زندي تمشي وراي
وكفت كبال الرجال باوع بعيني واني باوعت بعينه رفعت عيني فوگ حاجبة الايمن شامة انهاريت اهتز حيلي وبجيت

:- مو هوا مو هوا هذا مو جبراني مو رجلي

الرجال رد مقهور :- يعني تشابه اسماء

ضليت اشهگ خليت راسي ع كتف نسيمة ابجي
وهي تطبطب ع ظهري
نسيمة :- اذا عدل تلگينه وين يروح يا امي

شيهانة :- تاملت عبالي لگيته تأملت كلت راح اشوف حبيبي
احس السما طاحت ع راسي خالة

الرجل :- كولي يالله اختي اذا رجلج سجين تلگينا واكو سجون لهسة ما مفتوحات وسمعت مستمرين بفتح سجون جوة الارض

باوعتله وبعيني لمعة امل
:- يعني اكو بعد سجون جاي تنفتح
هز راسه وهو يباوعلي مقهور

نسيمة :- امشي نرجع امي طريقنا طويل واذا الله كاتبلج لقاء ويا مو بعيده هسة من نطلع من هذا الباب نلگاه گبالنه واكف

الرجل :- اي والله بس خلي ثقتج برب العالمين حاشاه مايقصرر

طلعنا نجر ذيال الخيبة وكل واحد بينا شايل ع متنة جبال من الحزن ..

رجعت مثل ما رحت خالية اليدين ..

دخلت بنوبة حزن فضيعة واكتئاب ضليت ع تواصل ويا بيت عمي و ويا عمار وحتى هبة زوجة عادل العايشة ويا اهلها هم صرت اتواصل

والكل يبحث عن اثر لجبران ..

بدأت الاوضاع تسوء وتتأزم اكثر واحنة مانكدر نسوي شي لا ليلى تكدر ولا اني
اخير شي ليلى لمت جنطة صغيرة وقررت تروح لعمامها تشوفهم وتحجي لعمها وابن عمها الصار بيها وتطلب مساعدة هادي حتى تروح لايران وتجيب ابنها من بيت ابو محمود ..

راحت ليلى وحدها بدون خالتها رفضت اي احد يرافقها وكالت اني اعتمد ع نفسي وماريد ادخل وياي واحد بمشاكلي البيه مكفيني والبيكم مكفيكم ..

بعد يوم من رحيل ليلى طلعت من البيت العصر البرودة نازلة والجو بي هوى حلو
شايلة بأيدي فلوس ولابسة شحاطة خالة نسيمة الجبيرة اسحل بروحي سحل بيها ..

تسوكت ملابس الي لان ماعندي وجبت مسواك للبيت موصيتني علي نسيمة ورجعت

نزلت براس الفرع ودخلت امشي بين البساتين الخضرا والف فكرة اجت براسي
السايق ماقبل يدخلني شمرني فوگ والدنيا ضلمة ليل

كل ما اسمع حركة قريبة كلت هذول مجموعة مسلحة راح يقتحمون طريقي ويكتلوني
والله لو ادري السايق يدگ بيه هيج دگة ناقصة ولا اطلع من باب البيت

ضليت امشي بهمه وشفت سيارة مرت من يمي راحت تمشي لنهاية الفرع لافت ورجعت
لو يذبحوني ما يلگون بجسمي قطرة دم حبست انفاسي وتشاهدت
مرت من يمي بطئت حركتها بيها زلم اربعة ملثمين باوعولي كلهم ولاحظت اكو اسلحة متچينها داخل السيارة وبلحظة شخطوها وكملو طريقهم

رجليني ضلن يرجفن مادري شلون حافظت ع سرعتي وما تگرمت من الخوف والهبطة مرورة الموت صارت بلهاتي

دخلت لبيت خالة نسيمة وعيوني تريد تطلع من مكانها من الخوف
كعدت ع القنفة بالمطبخ وغمضت عيني خايفة واني استرجع منظرهم بعيني
واتذكر شكل الاسلحة بالسيارة .. ونظراتهم الي

نسيمة :- اسم الله شبيج امي

رفعت راسي باوعت للساعة كبالي مرت نص ساعة ع رجعتي وما حاسة
شيهانة :- مابيه شي بس السايق ذبني بالشارع واجيت مشي الطريق يخوف انرعبت

نسيمة :- صحيح والله يخوف لو مزيدتله الكروة
:- ولا قبل يكول الدنيا ليل وراي طريق طويل وراح

سمعنة صوت طلق نار قريب فزينا مفزوعات ثنيناتنا وختلنة بطرف المطبخ
نسيمة :- بردًا وسلامًا الله يدفع الشر

بجيت مخترعة وأنيت :- يييمة سودة عليه جبران هسة وينه يممممة بس كونه بين ايدين امينه ياربي

باوعتلي مقهورة دخلنا للبيت نتراعش والوضع كل يوم يصير اسوء وبعد اسبوع من انتظار ليلى وانتظار اخبار عن جبران اندگ الباب وفاتت ليلى شايلة ع كتفها ولد نايم وبظهرها زلمة اسمر طووويل عيوونه حادة وحواجبه معقودة

خالتها ركضت عليها بلهفة حضنتها تبوس بيها واخذت الطفل من ايدها تحضنه تبوسة
باوعلي الزلمة ونصة راسه

حجت ليلى وهي تسلم علي :- رجعنا بخير وسلامة الحمدلله
تفضل هادي تفضل ادخل خوية

نسيمة :- هلا خالة هلا ومية هلا ادخل جوة ارتاح

فسحتله المجال دخلته للاستقبال وليلى اخذت الطفل من ايدها نايم خلته ع الكرويته
باوعتله وعيوني تلمع عمره 4 سنين ويجنن فلقة من الكمر "سيد هادي" من مواليد عام 1999

ولد وحيد وضل سنين وحيد وشاء الله ولم شمله بأمه

نصت تبوسة وهي تدمع ودموعها تبلل وجه الطفل

ليلى :- نام وليدي عدوك الله علي بالدنيا وبالحلم نام يا نظر عين امك وعمرها

شيهانة :- الحمدلله ع سلامتج الحمدلله الف مرة
شلون بيت ابو محمود شگلولج ما كلولج

ليلى :- بعدين اسولفلج خليني اشوف هادي ابن عمي وارجعلج

راحت للاستقبال وطلعت وجها اصفر جان نقاش حاد بين خالتها وهادي ضلت تبجي يم الباب وطلع هادي متعصب باوع الليلى وصرخ

هادي :- سمعي ولج ليلة انه ماخليج بهذا البيت لو تثالث الدنيا تمشين وياي غاد للنجف وتكعدين ابيتي انه عزلت

ضلت تبجي وتمسح بعيونها
ليلى :- خوية ما رايديني نسوانكم شادات عليه حزام والله طبيتلكم يومين وبعينك شفت الصار بيه الا شوية جان حرگني خليني يم خالتي فترة بس تصفى الامور واروح لبيتي اني عندي نص بيت باسمي والنص الثاني باسم قيس وضال اكعد بي ويا دار ما يلوحچ شر

هادي :- ماكو هيچ حچي رجلج ع رجلي انه من جبتج لهنا حتى تلمين هدومج وتنطين خالتج خبر مو حتى اشورج لو انتظر تدخلها

حجاها وباوع لنسيمة مشمئز
وهي انفجرت صفگتله الايدين وهزت المتن
:- وشبيهااااااا هاي التخوزر بيها عيوني وشبيها يمة مرة بالف زلمة وبيه حيل وقوة احمي ليلى من جيوش

نتر :- وسمعتچ انتي تأثرين ع بنيتنا

نسيمة :- ههههءءء يمة سمعتهاا هسة صارت تهمكم سنين البت مشمورة جوة جنحي وماكو واحد منكم اجة ودك الباب وسأل عنها ولا تكلي مادري انت ماتدري الاكبر واقدم منك يدرون

هادي :- كلتيها مادري وهسة صرت ادري ما اعوفها يمج

ليلى :- هادي خوية فدوة رحتلك بس خليني هنا فترة واروح لبيتي ومنها امر ع السادة واصفي اموري بعد اني ام ابنهم ما يعوفوني بهيج وضع

هادي :- خوش حجي وهاي ضلتي يمج بأيدي اخذج للسادة واخذج احطج ابيتج واامن عليج واسأل ع جيرانج

بجت مهضومة وكالت :- موتوني جاي تضغطون علي اني ضيم الدنيا كله فوگ راسي وانتم تفكرون بسمعة وسمعه
هو شنو ضل بسمعتي شو اسمي صار خريجة سجون واذا ع بيت السادة ماريد اروحلهم هسة الوضع مايساعد شوفة عينك

رفع طرف حاجبة ما راضي وكللها باستهزاء
:- سمعتچ ما تهمچ مو؟ سكتت
رد نتر ما تهمچ سمتعجججج ليلةةةةة!؟

ليلى :- تهمني .. بس نسوانكم مايردني يشوفني خطر عليهن وكارهاتني عوفني هنا فترة فدوة رحتلك ، لا تزيد همومي وتثگل الحمل ع اكتافي

دفر الباب برجله وكال :- خوش ضلي هنا انه كل فترة امر عليج اشوف وضعج اريدج هسة ترتاحين وتفكرين عدل حتى ارمملج حياتج واشوفلج حل علمود تستقرين

نسيمة :- اي انطيها صبر هيه طالعة من ازمة

خزرها وطلع من يمنه يبرد ويصيح يا شر اشتر
خفت وانزويت يم الباب مر من يمي و وكف
اشر علي وكال هاي منووو؟

شيهانة :- هاي بعينك اني بنية بصراوية بنت عائلة وحسب ونسب بس كاعدة هنا مؤقتا ادور ع رجلي مسجون

خزرني وطلع يهز بأيده ماقابل ..

ليلى ركضت ورا تبجي :- هادي لا تروح ضل هسة ارتاح انت تعبان
نتر :- مالج شغل يضربني طوب

ليلى :- مو اخاف عليك لا يصير بيك شي جاي ليل
هادي :- لو يهمج امري مشيتي وياي مو انه ابن عمج توكفين بوجهي ليلة؟ وتردين كلمتي

ليلى :- الك الاحترام كله كلمتك تاج ع راسي بس هيه هم خالتي وربتني انتم ليش تردون توكعوني بين نارين وتخلوني ما اندل دربي ؟

بعدين انت تشوفها ترهم اجي وياك للنجف؟ وعيالي هنا وبيتي هنا
خليني والله فترة قصيرة اروح اخذ مفتاح بيتي واكعد بي وماعليه شي الله يحميني التحافظ ع روحها لو تكعد بجول هم تكدر
والتريد تسلك درب موزين لو فوگها الف زلمة تعبرهم وتسلكه

هادي :- اي انه واثق بيج ترة ثقتي بيج عمية بس محيطج ما واثق بي

ختم كلامه وباوع لنسيمة وباوعلي
خزرته :- شبيك تباوعلي هيج شو انت ماتعرف تحجي ولا تتحكم بردات فعلك

خزرني ورفع اصبعه :- والله اذا لاح بت عمي شر من وراج اشلع عيونج
غير هاي الجانت مسجونة وياج
هزت راسها

رفعت حاجبي وهزيت ايدي :- ما ضل علي غير المخابيل مثلك

هو انصعق وراد يهد علي وكفت ليلى دفعته من صدره
هادي :- ولج اناااا مخبل انا هادي تكولين علي مخبل اليوم افرسج فرس

نسيمة :- يبووووي يا طلابة الماتفض خالة روح هسة وراك درب طويل لا تكتلك وحدة من عدنا حتى الطفل فز مخترع من صوتك جنة صافرة حرب

هادي :- انتي سكتي

ليلى :- عيب خالتي وصديقتي احترمهن عيب هادي شبيك شايل عليهن شسولك هسة المسكينات

خزرنا وطلع معصب عيونه تجدح ..

شلت ابن ليلى يبجي مارادني اجت اخذته مني تسكت بي وخالتها تدردم ع هادي وتحجي علي وتدعي بعدين تكول يا اسم الله اسم الله الله يحفظه زل لساني

كعدت ليلى بالكاع مخليه الطفل بحضنها وتبجي بهضم

ليلى :- هسة وين اروح وين انطي وجهي
كالت اخر كلماتها بحيرة

شيهانة :- انتي مو عندج بيت خل نروحله اني وياج اكعد وياج وادفع اجاري لان اني ما ارتاح اكعد يم ناس واكل واشرب ابلاش
هم تساعديني واساعدج منها اني اضل هنا ادور جبران وانتي ترضين هذا المسودن

نسيمة :- مو خوش حجي اني ادورلجن بيت قريب عليه للايجار كعدن بي واشوفة يفتح حلگه الا اشگه اله احنه عالم عدنا ضيم وازمات هاي البت تدور رجلها وانتي ياليلى ماتدرين شنو مصيرچ وشنو تاليتچ يرادلج وكت حتى تستقرين

كعدنا هلكانات ومقهورات ليلى تمسح دموعها وتحجي
:- سألت ام محمود كتلها هم اجة مر سأل عني

تكول خاله اجة مرتين سألنا عنج اول مرة كناله البنية ما تريد تشوفك وثاني مرة متعصب علي ابو محمود كايله شتريد من البنية ومن يا باب جاي تسأل عليها وهي هسة طليقتك؟

قيس كايله من باب بيناتنا عشرة وهي عزيزة ع الگلب شما بعدت وسوت

يكول ابو محمود انقهرت كتله انت الماردتها روح وبعد لا تجي مرة الثانية حتى السلام ما ارده عليك
وبهاي الاثناء طالع هادي يلعب ولامحه قيس مبتسمله

ابو محمود يكول خفت يعرفه ابنه وانتي ماموجودة وياخذه وهو الطفل امانه
شايله وكايله هذا ابن بنتي ما كايله ابنك

شيهانة :- اي زين يسوي تخيلي لو عارف هذا ابنه وانتي ما موجودة والله ياخذه گبل وبعد وين تلگينه

ليلى :- بس الحيرني شي واحد من شافه ما رف گلبه مو هذا ابنه دمه ولحمة

باوعنا لنسيمة ايدها جوة خدها تفكر قوست شفايفها وكالت وهي ما عاجبها
:- يمكن هاي كرايبة جذابة ما موصلة خبر حملج الهم

شيهانة :- والله مبينه لو يدري بيج حامل جان بس شاف الطفل عرفه ابنه ومو بس هيج بالله انتي مايريدج ع الاقل جان تردد ع بيت ابو محمود علمود هادي
يكللهم اريد اشوف ابني بس الظاهر اقاربهم جذابة وقيس مايدري بيج مخلفة منه ولد ولا اهله يدرون

ليلى :- وهسة شسوي
نسيمة :- انتي لازم تتواجهين ويا قيس هوا وينه
ليلى :- ابو محمود كال بايران بس منتقلين لبيت عمته يعني يم اقارب غير الي رحنالهم وهناك متزوج حسب حجي ابو محمود

نسيمة :- بينت جذبة كرايبة الكالتلج قيس رجع للعراق
شو طلع بايران يعني المرية هاي جذابة رادت تبعدج عن بيت السادة

لطمت فخذها تبجي وتنحب وتندب حظها
ليلى :- امداني وامدا حظي ماعندي حظ ماعندي راحة

شيهانة :- شوفي احسن شي هسة ترحين لبيت السادة تجسين النبض
من باب تكليلهم تردين مفتاح البيت حتى تعيشين بي ومن باب تسألين عن قيس وحياته وتشوفين رد فعلهم تصرفاتهم اكيد عن طريق الكلام راح يبينون اذا يعرفون بيج مخلفة من ابنهم لو لا

نسيمة :- ذاك البيت بعيد ماتكعدن بي اني اشوفلجن هنا
ليلى :- البنية تقصد حجة مو اكثر

هزت راسها قابلة كتلها باجر لبسي عبايتج واني اروح وياج ونشوف الوضع اخذيني وياج خاف انتي تشوفينهم وتتبنجين وبطريقنا نمر ع منطقة بيت عمي القديمة نسأل عن جبران بلكي اكو اثر لو خبر عنه ونرجع

ليلى :- هاي هيه
باوعت لهادي وابتسمت :- بيت ابو محمود مدارينه ومخلينه بعيونهم وكلش تاذو من اخذته وحتى ماقبلو ياخذون الذهب النطيته الهم كمقابل لتربيتهم اله وتعبهم علي

شيهانة :- الله يجازيهم اجرهم عند الله جبير

باليوم الثاني تجهزنا اني وياها ورحنة لبيت السادة گبل جانت خايفة وترجف وعيونها تدمع ترفع طرف عبايتها تمسح عينها وتدنك تفرك بأيديها

من وصلنا الهم حسيت هاي الدنيا كلها صارت فوگ راس ليلى تبجي وتمسح بعيونها وتقدم خطوة وتأخر خطوتين

حسيت ارتباكها انتقل الي بشكل تلقائي

ماكدرت حتى ترفع ايدها وتدك الباب اني دكيته بمكانها
ضلت واكفة وعيونها تتنقل بين الباب والشارع وكأنها تدرس كل شبر بالمكان وتتذكر العاشته هنا

انفتح الباب صارت عيني بعين شاب نصة راسه وفز من كالتله ملهوفة

ليلى :- خوووية هاشم

ابتسم وعيونه لمعت وكللها بلهفة :- ليلى!!!

فتح الباب وفسح النه المجال وضل يهلي ويرحب ويسلم ع ليلى وهي تسلم علي
ومشة كدامنا بخطوات سريعة وهمة وهو يصيح
علوووية يوووم علوووية اجت ليلى ..

اباوع للباب مال المطبخ مفتوح يمه اطفال يلعبون ويباوعون ع ليلى مستغربين وطلعت بنية شابة تجي بعمري حطت ايدها فوك عيونها وتباوع باتجاهنا وكالت بلهفة

وفاء :- ياا هاي ليلى

طلعت من المطبخ بهمه راحت عليها ليلى حضنتها واكلن بعض بالسلام اكل وثنينهن مدمعات
وطلعن مرة جبيرة وبنات ثنين شابات

سلمت العلوية ع ليلى وضلت تحضن بيها وتبوس بيها وتكللها شلونج ولج كطعتي كلبي شلون حالج
وتبوس بوجه ليلى وليلى الله ذب عليها بجي

وراها بنية سلمت ليلى حضنتها كلتلها شلونج سكينة
وتباوسن والعيون مدمعة

سلمت عليهم من بعيد

فتحو الاستقبال ورحبو بينا وكان سلامهم الها واستقبالهم حار كلش

كعدت ليلى بالاستقبال ذبت عبايتها من ع راسها وسألت العلوية بفضول
عمي السيد شلونه الولد شلونهم

العلوية تحسرت وكالت :- كلهم زينين الحمداله ..
انتي شلونج وين جنتي وشوكت رجعتي من ايران؟

باوعتلي ليلى ورجعت باوعت لام قيس وگالت
:- رجعت من زمان ولزموني الامن وانسجنت وطلعت

شهگت العلوية مصدومة ولطمت صدرها
:- يمة الزهرة يمة الزهرة عود صدك انسجنتي؟

ليلى :- اي والله بعد شگول ماكدر اضم اكثر والماضي صعب ينضم اني رجعت بال2000 وانسجنت وطلعت بالسقوط الحمدلله والشكر ع كل حال

العلوية ضلت تلوب وتباوع لجناينها بحلكها حجي وهن مستغربات ومقهورات يباوعن ع ليلى

العلوية :- يلا الحمدلله من طلعتي

ليلى :- الحمدلله اجيت اشوفكم اسلم عليكم وهم عندي شغلة يمكم
العلوية :- هلا بيج حبيبة هلا ومليون هلا وشغلتج التردينها تاخذينها من وسط عيني

ليلى :- سالمة عينج والله ردت مفتاح البيت تعرفين اني الي حصة بي واريد اكعد بي لان ماعندي مكان وبيت خالتي بعيد

العلوية :- اي تاخذينه حقج هذا واحنة شايلين همه وكلنا المفتاح شوكت ماتريده تجي تاخذه

ليلى :- الله يحفظكم الله يخليكم

ضلت ليلى تلوب والعلوية تلوب
رجعت ليلى سألتها بخجل
:- سيد قيس شلونه ضل بأيران رجع للعراق؟

العلوية :- لا بعد هوا من طلع مارجع ضل هناك استقر
وتزوج العلوية فاطمة تعرفينها انتي بنية عمته وخلف الحمدلله

باوعت لوجه ليلى انطعن صار احمر دم
كالت بصوت مخنوگ :- ماشاءالله الله يستر علي ويحفظله اهل بيته

العلوية هزت راسها ولمت شفتها مقهورة
العلوية :- بعد من صارت السالفة والمشاكل السيد دزله خبر وكله اذا تريد رضاي ندزلك فاطمة عروس تتزوجها وتستقر هناك ماترجع للعراق

بعد تدرين صارت علي علامة ولو راجع للعراق جان انسجن

ليلى :- اي صحيح
ردت مخنوگة كلش وضلت مثل الواكفة جمرة بحنجرتها حسيتها تحترگ

گالت بغصة :- علوية تكدرين تنطيني المفتاح هسة احنة طريقنا طويل مانكدر نكعد اكثر والوضع يخوف

العلوية :- صار بعيوني هسة ادخل احجي ويا عمج السيد واشوفه

كامت العلوية وهي مبينه تتهرب من ليلى مقهورة تقربت بنية كعدت يم ليلى عرفتها بعدين هاي حنان جنتهم الجبيرة

ليلى كلتلها بتساؤول
اكلج حنان عود قيس صدك هيج استقر

حنان :- اي والله استقر وكمل حياته هم فرضو علي يتزوج فاطمة حتى يرضون عنه وهو جان يريد رضا السيد وافق وكمل حياته

ليلى لو حتى ماتقبلين علي بس زواجج منه صار ع اساس غلط وجان مبين هذا الزواج ما يستمر ولا يكمل

تحسرت ليلى وقوست شفايفها مقهورة
:- شبيدي داده غير حبه عماني

حنان :- انصحج نصيحة من اختج الجبيرة تردين تمشين بيها بكيفج ماتردين تمشين بيها هم بكيفج
اذا هاي جيتج وراها تفكير قيس يرجعج ع ذمته ف كطعي الامل

الولد تزوج واستقر وحياته مشت صلاوات وما يبيع استقراره علمودچ والله ولا يفرط باهله مرة ثانية مثل ما فرط بيهم قبل
والله مو كره بيج احجي من حبي الج وخوفي عليج ماريدلج تنكسرين مرة ثانية

ليلى :- لا وين بعد خصوصا ورا زواجة مالي مكان اجت التاخذ مكاني

حنان :- روحي عيشي حياتج شوفي دراستج كمليها احسلج وانفعلج بألف مرة
خصوصا هسة بعد انتي طالعة من السجن والله ياليلى لو تبجين دم اباب هذا البيت ما ترف گلوبهم عليچ تدرين بيهم شنو يدورون وشكد تهمهم السمعة الزينة

ليلى هزت راسها مقهورة كلش حتى حجي ماكدرت تحجي
اجت العلوية وكالت عمج يريد يسلم عليج ودخل الرجال طويل القامة لحيته بيضاء لابس عمامه سودة وبأيده عكازة

سلم ع ليلى ذاك السلام وهي بس تحجي كلمة وتهز راسها مختنگة
وگللها اي شي تحتاجينه احنة بالخدمة لا يردج شي

اتعجب عليهم عدهم نخوة ومستعدين يساعدونها ويوكفون وياها بس مايردونها جنة بسبب السمعة

طلعنا من البيت وهي تبجي وبايدها مفتاح البيت طاح بسبب رعشتها دنكت اخذته واجرت سيارة كبل للبيت لان وضعها ابد مايساعد نروح لمنطقة بيت عمي نسأل عن جبران

انهارت وضلت تشهگ وتعض بعبايتها حتى تكتم شهگاتها
كطعت كلبي وسلبت روحي حاولت اهدأها بس ماكو حل تبجي تشهگ وعيونها حمر ويجرن دموع

حسيت بكل شهگه منها روحها تطلع وترجع

ضليت اباوع للطريق بخوف واكول هسة تتخربط وين انطي الوجه وشلون اشيلها

حد ما وصلنا للبيت نزلت كطعت روحها حتى لطم ع روحها لطمت وصريخ صرخت مثل الميت الها عزيز

خليناها تبجي براحتها وتطلع نار گلبها وتعاتب حظها الى ان تعبت وبادت روحها تمددت بمكانها ونامت
متغطية بعبايتها السودة

نسيمة بصوت ناصي :- گلتلهم ع هادي

شيهانة :- لا
نسيمة :- احسن خليها تربي وتكبره يصيرلها سند وظهر بالمستقبل
شيهانة :- اي وعلي مايفيدها شي غير وليدها

سكتنا مقهورات خليناها تنام ترتاح ..

وباليوم الثاني دك التلفون جاوبته نسومة وكالت شخص ع الخط يريدج

جاوبته سلم وكان يعرف عمامي وجبران ، گلي كلام خلاني اهتز وجمد الدم بعروگي
و اوگع مغمي علي لا احرك ايد ولا رجل ..... للحكاية بقية

رأيكم بالقصة يهمني ...

ممكن متابعة لرواية (رائحة الارض المفقودة) للكاتب المبدع @

FarouqAli