رواية حمائم تخشى الطيران الفصل الرابع وخمسون 54 - بقلم فاطمة العبادي

فاطمة العبادي ..

في #حمائم_تخشى_الطيران

قراءة ممتعة كيكاتي ..

وصلو البارت 1000 تصويت وتعليق بين الفقرات لطفا 🤎🤎🤎🤎🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤

.....

لطمت ع خدي ابجي واباوع خايفه من كل لحظة جاية
شفت واحد ثنى رجله خلاها ع ظهر جبران كعد علي وجبران صرخ متألم وبظهره دم مبين مضروب بشي حاد ع ظهره

والثاني جر ايد جبران خلاها ع الكاع وسحك ع ساعده برجله القذرة مد ايده للمصور ناوشه ساطورة مال تكسير واشوفه بكل قسوة وحقد رفع الساطورة وضل يضرب بكف جبران واصابعه تتكطع والدم ينفض صرخت باعلى صوتي متهسترة
وعيوني ثابته ع اللابتوب واشوفه ضل يكسر بكفوف جبران بالساطورة مردهن مرد
حسيت الدنيا طاحت ع راسي وانتهت روحي بهاي اللحظة ...

دخلو علي للغرفة لكوني متهسترة بكل سرعتي طلعت من الفيديو ما اريدهم يشوفون وينهارون وياي وتنفجع كلوبهم خصوصا عمتي يمكن تنجلط وتموت

ضليت اشهك بدون رد عمتي تطبطب ع وجهي ونزهة تركض تجيب ماي تغسلي

علياء :- ولج عمة كطعتي گلوبنا كطع شبيييج ولج جبران بي شي؟!! ماكو غير جبران صايرلة شي

انهارت بدون ما تعرف الصاير وضلت تضرب ع وجها وتصيح
:- ولج كووولي جبران شبييييي

هزيت راسي وعطت :- ماكو شي ماكووو جنت نايمة وتحلمت بشي قديم ضال براسي

سكتن صفنن علي واني دموعي تنزل وارجف
:- كابوس ضغطني وحرگ گلبي وموتني
كابوس ما يفاركني
عوفوني وطلعوووو عوفوووني

علياء: - ولج عمة وكفتي كلوبنا شبيج شجاج
نجمة :- عبالي بيج شي ماما!!
كالتها وهي تباوعلي مرعوبة

نترت واني ابجي :- عوووفوني عووفوووني راح اموت اريد اضل وحدي اطلعوووو منا

علياء :- شبيج تخبلتي يا عمة
جيبي لقران افتحه بوجها نزهة

راحت نزهة تركض واني غطيت وجهي بايديني ارجف
گلبي شبت بي نار حسيت بحرورة كلبي حركت روحي

عمتي تقرأ ع راسي واني اريد انفجر اصرخ ومنظره ينعاد كبال عيني اريد اشلع عيوني الشافته بهذا الوضع
تمنيت روحي عمية ولا شايفتهم يطبرون بأيدي
تمنيت الله ماخذ امانته ونايمة بالكبور ولا شفته هيج

فوك الربع ساعة هن فوك راسي واني ارجف اريدهن بس يطلعن تمددت وتغطيت وحجيت بهدوء متصنعه
:- اريد ارجع انام تعبت فدوة خلوني ارتاح

علياء :- ارتاحي عمة
نزهة :- دهر وكفتي كلبي اكلج حبيبة خاف رجعتلج مال گبل خليني اضل يمج بس لا تذبحيني

علياء :- نزهة هسة وكتها؟

نزهة :- جا انه احجي صدك ما اتشاقى ما تشوفينها رجعت تصرخ وتملخ بروحها

غمضت عيني مسوية نفسي نمت واسمعهن يتداهرن وطلعن
سدن الباب وراهن طفرت بسرعة من فراشي ايديني يرجفن ادور مبايلي كضيته طاح من ايدي واندفع جوة الجرباية

كعدت ع اركبي مديت ايدي احاول اجيبه وصارت عندي اوجاع مثل التقلصات تشنجت بمكاني ضليت ما اكدر اتنفس حسيت الالم صعد ع گلبي

ذبيت روحي بالكاع ع ظهري الهث رفعت المبايل اريد اطلع رقم جليل اتصل
كد ما ايدي ترجف رجع طاح ع وجهي ما يثبت
عيوني مغوشات من الدموع غيمة صارت عليهن

طلعت رقمه واتصلت خليته ع اذني يدك وما يجاوب

رجعت اتصلت دك هواي قبل لا يفصل جاوب
كال بهدوئ الو

ردت احجي لساني انشل وصار ثكيل ما يطلع مني صوت خليت ايدي ع الجرباية من يمي وحاولت اكعد وارتجي عليها عبالي لساني ثكيل بسبب الالم

جريت نفس ثكل بصدري ضليت افرك صدري واحاول احجي وهو يصيح الو
صوتي ما يطلع
غمضت عيني اشهگ وبس صوت شهكاتي ترس الغرفة وهو يصيح

:- شبيييييج انتي تبجين احجي ‏شكوووو
ام شعلان ولج ءهلا .. سمعيني اذا عرفتي الصار راح اكلج سكتي ولا تحجين كدام الاوادم الوياج بالبيت انه والامن كلنا طالعين للموقع المتوقع يكون بي
عدنا عيون جانت تراقب

كحيت ردت احجي لساني ما ينشال
:- والله وداعة نظر عيني نرجعه سالم بس خلي المبايل يمج بالهواي ساعة واتصل بيج اطمنج عنه

غمضت عيوني بألم ردت احجي ما يطلع صوتي
اهز راسي لا
سديته بوجهه وكتبتله رسالة
"دزولي مقطع فيديو وهم يطبرون بكفوف جبران"
"اني يمكن انشل لساني ماجاي اكدر احجي جليل بداعة كل عزيز عندك طمني عنه"

اتصل
جاوبته رد بسرعة
:- هسة قبل دقيقتين مو اكثر اتصلو الخاطفينه علي مو ع غيري طلبو مني اسحب نفسي وجبران من قضية عادل ما يدرون .... تنهد وسكت
لحظات ورد
:- وسمعت صوت جبران يمهم يصرخ جبران عدل ما ميت وهسة هذا اهم شي بالنسبة الي
ومثل ما طلعني من الموت وانه هسة بحيلي وصحتي بفضله
راح اطلعه من الموت لو الموضوع كلفني عمري

راح اسده انتي طلعي للمستشفى وشرط مو وحدج
هسة اخابر يدزولكم دورية يم البيت وانتي طلعي ويا قاسم وخلي يحضر سلاحه

سده خليت ايديني ع رأسي ابجي اشهك
ولساني ثكل فد نوب حسيت حلكي نزل بكبره
كمت اباوع لوجهي بالمراية غريب ولساني ميت

حاولت احجي ما اكدر صوتي اختفى
افكر بحجي جليل من كال صوته يصرخ
خليت ايديني ع كلبي
ودعيت ربي بسري
:-ياللهي رجعلي جبران لو بس الروح تصعد وتنزل اني اداري واشيله ع ظهري بس لا تحرمني منه والله بدونه اموت

حبيب عمري وروحي عيني بدونه ما تسوة عساها عمية وروحي بدون لا شيء
ربي اذا كاتب لجبران يموت بهاي الليلة لا تعبرها علي وطلع روحي ويا طلعة روحه لان ما اعيش من دونه ولا اسوة شي

كعدت ارجف جسمي كله يأذيني بدون شعور غمضت عيني وحسيت الكاع جواي تتحرك
فتحت عيني باوعت للمبايل انتظر اتصال من جليل

حسيت الدنيا ضلمة خليت راسي ع الفراش
وبعد ما حسيت بالدنيا شلون الواحد الطلعت روحه
فقدت كلش فد نوب

يعني من فتحت عيني حسيت روحي ما واعية ما اتذكر اني منو ولا مستوعبه الصار كله
اباوع للاجهزة ما اعرف هذني شنو محاوطاتني
ريكي ناشف ولساني احسه مثل الخشبة
اطراف ميته ما احس بجسمي
اباوع للسقف غريب والاجهزة اشكالها تخوف

غمضت عيني احاول استوعب الصار شوية شوية بديت استرجع ذاكرتي والشعور بالالم رجعلي
رجعت احس باطرافي بس بيهن وجع

كل ما افتح عيني احس الضوة البسيط يأذيني
ارجع اغمض
هذا مو بيتي وهاي مو اني .. هاي روحي الجاي تحس بالالم اني متت
مستحيل اكون عايشة .. حسيت وكأن الموت فات برجليني وروحي شوية شوية بدات تطلع
ايديني ماتن وصدري انعصر وصلت روحي لحلگي شهكت واذني ماصارت تسمع غير صريخ بناتي وعمتي ..

...

شمس ..

الاصعب من الذنب نفسه هو الندم علي
الندم شعور مؤلم ياذي الانسان لدرجة يخلي سجين بين الماضي والحاضر
و واكف ع اعتاب المستقبل بس ما يكدر يخطي خطوة بأتجاهه

بلحظات يتمنى يرجع للماضي ويصحح اغلاطه وبلحظات يعض اصابعه متالم وكأنه يعاقب نفسه ع سوء افعاله

يريد ينسى مرات ويعيش الحاضر ويمشي للمستقبل بس خيوط الندم تجره للماضي غصبا ما علي
وترجعه الف خطوة ليورا في حال هو خطى خطوة وحدة باتجاه المستقبل

سجن قضبانه و سقفه نار جحيم
تحرق كل جسم يحاول يعبرها ويتجه للامان ..
تحرق ارواح البشر .. تدمي قلوبهم وتأسر ارواحهم مرة ثانية وهم جثث محترقة
في حال كنت حمامة .. راح اخشى الطيران
خوفا على اجنحتي من الاحتراق

عشت كل هاي المشاعر حسيت روحي بأي لحظة افقد عقلي
جنت كارهة لامي وماخذه موقف واسوي سوالف حتى اغثها اطلع من البيت افتر وارجع
بس ما جنت اعرف اكو ثعالب متربصتلي وراح تسرق مني روحي وحياتي ويخلوني اكره روحي بالمرتبة الاولى

وزاد كرهي لنفسي من اتصل صديق عمو جبران بالبيت وكال لعمو
جبران مسوي حادث ومتأذي شوية وانطاه اسم المستشفى عمو ابو جبران انهار خايف
وكام يحاول يلبس بسرعه ويطلع ويتصل بقاسم
وبنفس الوكت ام جبران تبجي وتلبس بجواريبها وتصيح

نزهة صعدي للشيهانة كليلها خل تنزل بسرعة يمة سودة عليه وليدي عمت عيني عليك
اشوفها تتحلم احلام موزينة كلبها حاس

نزهة صعدت تركض صعدت وراها لان شفت ماما منهارة ، وخفت من تسمع الخبر تنهار اكثر
حسيت نفسي اني مسؤولة عن تعبها النفسي هذا لان اني جنت سبب بفقدان ابنها وعاشت موقف صعب بسببي

نزهة دكت الباب وفتحته وفاتت كبل

وكفت بالباب كتفت ايديني خايفة من رد فعلها
شفت نزهة تلكز بيها وتحاول تكعدها ع كيف بدون ما ترعبها بس ما تكعد

هزتها حيل وصرخت بخوف
نزهة :- يمممة المرة يابسة خشبة

التفتت باوعتلي عيونها مفتوحة ع وسعها ركضت بسرعة طفت ع السرير اهز بيها
خليت ايدي ع نبضها ما احس بشي اجاني احساس اكو نبض خفيف

وبنفس الوقت اكول لا ميتة واني جاي اوهم نفسي مو اكثر

وجها شاحب وحلكها ابيض
نزهة ضلت تصرخ ، وطلعت من الغرفة اسمعها تصيح
متخررربطة يابسة

ضلينا نرجف اني ونزهة وعيوني غوشن ردت ابجي
مسحت عيوني بسرعة اشوفهم ضلو يفزعون
واحتارو بيها اخير شي خلينها ع اللحاف وتگابلنا كلنا شلناها نزلناها حتى قاسم ساعدنا وصعدناها بالسيارة ميتة مو عدله

ضلينه نبجي نريد نروح وياها اني ولولوة
ولولوة ذبت نفسها بالكاع وضربت ايدها حيل بالكاع بعناد
:- والله اروح ويا ماما اريد اكون يمها بكل موقف و اوكف وياها

قاسم اشر ع صدره وكللها يقنعها
:- بس اوصلهم ارجع عليجن فوتن جوة يلا

جريتها كوة للبيت ابجي وياها منهارة خايفة
نجمة :- ميتة ميتة

نزهة كلتلها بغضب
:- جعمناچ بالله لا تفاولين ع امج مابيها شي عدله

نجمة :- ما شفتي وجها شاحب ابيض مابي روح وجسمها يابس كلش امي ماتت
عافتني واني ما لحكت اشبع من حضنها

كعدت بالكاع لمت رجليها لصدرها تبجي مثل الطفلة منهارة ..

كعدت ع بايات الدرج خليت ايديني ع رأسي ارجف
نزهة جابتلنا ماي تشربنا كالت بخوف
:- راح تموتن كلوبجن راح توكف شمالجن والله مابيها شي هسة ساعة زمان وترجع مابيها شي

هزيت راسي اي
بس منظرها مايروح من عيني التفتت شفت شعلان واكف بطرف الصالة مصدوم فاتح عيونه

لولوة باوعت ع المكان الاباوعله وشافته
فتحت ايديها وصاحتله
شعلان عمري تعال حبيبي

ركض عليها كعد بصفها حضنته خايف يرجف
سألها بخوف :- شفيهم؟

نجمة :- ما بيهم شي ماما مريضة شوية وتصير زينة وترجع
هز راسه اي بس جان مرعوب

ضلينا ع اعصابنا كاعدين نرجف نزهة كالت
كومن ذبن هدوم البيت لو شي خاف يرجع قاسم عليجن صدك وياخذجن

لولوة طفرت بغضب
:- يعني شنو يرجع صدك؟ كان يكذب علينا؟ ما يرجع والله اطلع واروحلها وحدي

نترت :- كااافي وين ترحين وحدج حتى يخطفوننننجج
نجمة :- واضل كاعدة وكلبي نار ع ماما وعمووووو

شمس :- قاسم اذا ما رجع نخابرله ويرجع ياخذنا بس ما تطلعين وحدج

كامت ضربت رجلها بغضب وصاحت
:- مو انتي تطلعين وحدج شنووو اختلف لو بس تردين تتحكمين بيه حتى من يتعلق الموضوع بماما؟
بس حقج عيني انتي كلبج ثلج تكرهينها ما جربتي تحبينها وتخافين عليها وكلبج يصير نار

جانت تصرخ بوجهي ختمت كلامها وصعدت عبرتني تركض خليت ايدي بحلكي عضيتها وشهكت مقهورة

نزهة كعدت يمي حصنتني وكالت
:- مقهورة مالج شغل بحجيها ساعة غضب

شمس :- اعرف بس انهضمت

نزهة :- كومي بدلي لبسي شي ينطلع بي نزعي تراك البيت هلبت يرد قاسم ياخذجن صدك
لان هاي اختج مسودنه اذا مارجع تسويها كربله

هزيت راسي اي وصعدت بسرعة نزعت وطلعت اي شي ينلبس برة البيت
تنورة عريضة وطويلة وتيشيرت ابد ماراهم وياها بس ما جان الي نفس

طلعت انتظر بالصالة نزلت لولوة مغيره رافعه شعرها كله باهمال ولابسه بنطلون عادي وقميص رصاصي طويل مغطي وركها
كعدت ورفعت رجلينها لمتهن لصدرها

اجيت يمها حضنتها حيل ضلت تشهك مقهورة
وشعلان كاعد يم نزهة صافن
شوية وصدك اندك الباب مال الاستقبال وطلع قاسم كال يلا اخذجن للمستشفى

طفرنه بسرعة صعدنا ويا ونزهة ضلت يم شعلان بالبيت بس قاسم وجهه مطعون وكأنما ماما ميته وجاي ياخذنا نودعها الوداع الاخير

حسيت بالغصة تاكل بحنجرتي مثل ماتاكل النار الحطب
خليت ايدي ع ركبتي متألمة ريكي ما اكدر ابلعه
ولولوة مدت روحها من ورا من الفتحة البيت الكشنات تستفسر

نجمة :-الله عليك قاسم شلونها شنو كالو بيها
قاسم :- جلطة ومتأذية گوة عبرتها حمدن ربجن الله كتبلها عمر جديد حتى الدكتور مستغرب شلون طلعت منها

لولوة شهكت وكالتله بصوت كله غصة
:- يعني عايشة صدك؟ احلف بروح كل غالي عندك

قاسم :- وداعة امي عايشة مابيها شي

:- زين وعمو وينه شلونه
تحسر وكال
:- بنفس المستشفى زين مابي شي حادث ومتأذيات ايدينه احم يمكن

شمس :- شنو اليمكن انت ليش تلف وتدور النوب وجهك اصفر مثل الضاملك شي
شنو عندك احجي لا تخلينا نوصل وننصدم

جر نفس ضرب ع الستيرن حيل مقهور
وكال :- استاذ جبران يمكن يبترون كفوفه متاذيات حيل

لولوة صرخت كان كاللها كفوفج راح نبترهن وغطت وجها متاذية

بهت وجهي :- لا حول ولا قوة الا بالله يعني الحادث قوي

هز راسه اي :- بس لا تخافون ما يفقد حياته لان كل اعضائه سليمة بس كفوفه متاذيه
الحمدلله ع كل حال الحمدلله ع النعم

ما ندري بيا ساعة نفقد ارواحنا لو نظرنا اعضاء من جسمنا كلشي ممكن يزول بلحظة

جر حسرة شكت كلبه وطلعت مقهور

ضليت اكل بروحي اكل احس كل شي صار بسببي اني يمكن اخوه اذاه
اخو مجرم .. غطيت وجهي مقهورة
بس اني ماعندي عداوة ويا اخو هم خطفوني وصوروني بدون ملابس حتى يلوون ذراع عمو وماما اني مالي ذنب اني ضحية حالي من حالهم
ويمكن اني ضحية وصرت وسيله لاخو يحارب بيها
بلحظات حسيت نفسي اداة للانتقام
للعب .. للترهيب
مو انسانة

وصلنا للمستشفى
كتله بتساؤول
:- عمو هم هنا
هز راسه وكال اي جبناها لنفس المستشفى حتى تصير يمنا ومانضل من مستشفى لمستشفى مشدوهين

...
نجمة ..

واكفة جامدة اشوفهم يركضون واسمع الدكتورة صاحت ماتت .. البنية ماتت

وكعت ع اركبي منهارة وخالة من سمعت ضلت تصرخ
وشمس انفجعت وانفجرت تصرخ مقهورة وتبجي بنحيب

ضليت اصرخ واناديها ع امل تكون عايشة وتسمعني وتطلع تحاجيني
فقدت عقلي اعيط ماما وينج لهسه ما شبعت من ريحتج ما صدكت اصيررر بحضنج
ماما فدوة رحتلج كوممميييي جاوبيني ورجعي وياي للبيت نوميني بحضنج
ااااخ مامااا سنين عشت بعيد عن حضنج وبس اجيتج عفتيني ورحتي ليش هيج ولجججج يمة
ولججج يمة روحي راحت يمممممة

طلعت الممرضة تهدأنا كالت
:- سوولها انعاش بيها نبض اهدو لا توترون الجو رجاءً

حطيت ايديني ع كلبي ثنينهن وصحت :- الحمدلله الحمدلله

ام جبران مسحت وجها بالعباية منهارة
كعدت طالعة روحها وباوعت ليفوك صاحت
ربي رحمتك ربي رحمتك
رحمتك يا ارحم الرحمين

سكتنا كمت تعبانة ضليت امشي وايدي ع الحايط احس راح اوكع شمس صاحت وين
:- للحمام
قاسم :- لحظة مو منا تعالي

التفتت مشيت ورا بس احس راح اوكع فتت للحمام غسلت وجهي باوعتله بصدمة صاير احمر كلش
وعيوني منفخة وخشمي مورم من البجي

رفعتي شعري الملطش ع وجهي وفتحته ورجعت رفعته كعكه بس شوية رتبتها وحكمتها حتى ما تنفل

رجعت غسلت وجهي وغمضت عيوني وكان المي فززني من حلم وخلا الواقع كبالي
اب قاسي يكرهنا
عم حنون مات
زوج ام طيب يصارع الموت
وام بقلب كبير يوسع العالم وحنية الدنيا كلها بحضنها يمكن من ارجع الكاها ميته

ليش هيج حياتي؟ ليش اني من دون. العالم اخسر كل الاحبهم؟ اريد اعيش وانسى شعور الخوف
الخوف من فقدان احبابي

فتحت عيني صارت ع ركبتي رفعت اصابعي تلمست عقد اللؤلؤ وتنهدت
هذا هدية من عمو سليم ورتب اللؤلؤ بي بأيده
شغل ايده هدية خاصة الي انصنعت بكل حب و ود
ولبسنياها بعيد ميلادي

ما توقعت يجي يوم واباوع لركبتي واشوفها وانعصر من الالم اتوجع

جريت حسرة وطلعت صار بوجهي قاسم
:- ها منتظرني
:- لازم الوضع يخوف

باوعتله منتظرني مشيت باتجاها عبرت من يمي شايله طفل يطلع عمره خمس سنوات وتتحارب ويا لان يبجي اجت توكعه ركضت بسرعه خليت ايدي ورا ظهره

ضل يهمش بينه وهي تكله
لك ماما بهذلتني طلعت شعري

:- انطيني عنج وضمي شعرج
اخذته منها خطية شعرها كله طلع
ضل يجرجر بشعري اجة قاسم يباوع للطفل غاض بصره عن المرة لان تعدل بحجابها.

يريد ياخذه مني سحبه حيل وهو خله ايده ع
العقد وسحبه ويا سحبه قاسم وانكطع شهكت وعيني صارت ع الكاع حبات اللؤلؤ تطشرت ع
عرض الممر

غوشت عيوني وبرطمت ضلت شفايفي ترجف
البنية كالت اعتذر هسة اجمعه

:- لا اخذي ابنج سكتي ماصار شي احنه نجمعه

اخذت ابنها من قاسم ورجعت اعتذرت ومشت ضلت عيني ع حبات اللؤلؤ جثيت ع اركبي اجمع بيهن ودموعي ما تنزل ع خدودي لا ضلت توكع ع الكاع
اهز راسي بحسرة لا واحجي ويا روحي
:- حتى اخر ذكرى من عمو فقدتها كلشي احبه افقده ليش ليشش

قاسم كعد بالكاع يجمعهن وياي رفع عينه صارت بعيني نصة بسرعة وكال
:- كومي اني المهن لا تضلين كاعدة الناس جاي تعبر ويباوعون عليج موحلوة كومي كعدي ع المقعد

هزيت راسي اي وكمت كعدت فتحت ايدي اباوع ع الي بايدي ابجي كتله بقهر
:- هذا هدية من عمو سليم وعمو مات متخيل
هذا ذكرى

مسحت دموعي بقبضة ايدي
قاسم :- هسة اجمعهن واخذه لواحد يعرف يسوي الج

هزيت راسي اي ضل يجمع بيهن واني منصية ابجي
مدلي ايده وكال
:- انطيني العندج
رفعت عيني شفته منتظر
خليتهن بايده ضمهن بجيبه

اشرلي براسه اكوم وكال يلا امشي

كمت مشيت ورا كلبي ع ايدي من شفتهم هادئين ارتاحيت

مر الوقت وضع ما استقر وعمو جبران طولت عمليته بس خلصت ع خير

الدكتور كال بأسف
خسر كفوف ايدينه ثنينهن للاسف بس الحمدلله انكتبله عمر جديد

امه فقدت ضلت تبجي بشكل هستيري
وابو يقوي بيها بس هو مبين بداخله منهار اكثر منها

قاسم عيونه حمر يدمعن ويمسحهن
واني بس ابجي دموعي ما تقبل توكف

جانت اصعب ليلى بكل حياتنا .. الخوف من فقدان عزيز الروح اصعب من خوف فقدان الروح نفسها

من بابا يهددني بالقتل ما خفت هيج ولا حسيت بهاي المشاعر
هسة الخوف والحزن صارن مضاعفات الف مرة

خلصت الليلة والصبح رجعنا للبيت
وبيومها اتصلو بخوات عمو زهراء ورجاء والعصر اجن يبجن مقهورات وكأنما عمو مات

بس فعلا الصار بي مو شوية
ومر اليوم الثاني والثالث انصدمنا بماما تحجي لسانها ثكيل كلش ترتل وكوة تطلع الحجاية من حلكها

وعمو ضل اسبوع ع المهدئات لان جان يمر باسوء ايام ونفسيته تحت الصفر بحيث اهله ما يدخلون علي بس من يكون نايم

يفتح يسأل علينا كلنا ومايقبل احد يفوت علي يمنع الدكاتره

صديقه جليل وكف ويا وكفة مشرفة وكان يركض ركضة خطية من اول ليلة اجينا هو بالمستشفى
وحاله من حال اهل جبران

جنت بالمطبخ اسوي قهوة وسمعت التلفون دك
رديت كان المتصل قاسم
كال وين لولوة

كتله اني لولوة وياك
تحمحم وكال بخجل
:- عادي تجين يم الباب عندي شي يخصج

غميت كصتي ناسية لؤلؤي يمه
:- اي جايه لحظات

اخذت رشفة من كوبي واني اطلعله الجو بارد
والقهوة دافية دفت روحي
مد راسه يباوع شافني ودخل فورا
:- هلو قاسم

:- هلا بيج لولوة
احم .. هذا الج
مد ايده طلع العقد ابتسمت مرتاحة مديت ايدي اخذته اگلب بي مسوي بخيط صوف

قاسم :- مالحكت اخذه لصايغ لو لفد شخص يعرف يسوي بسلسله وضل يمي هواي الفجر سويته بايدي

ابتسمت وميلت راسي باوعتله بأمتنان
:- شكرا الك والله فرحتني راح البسه
واتوقع هذا الخيط قوي بعد ما ينكطع احسن من السلسلة

هز راسي اي ونصة
رفع راسه باوعلي وكال
وخليت بي كبر صح شكله شوية خرب لان الخيط طالع بس علمود يدخل براسج
ابتسمت اكلبه بايدي
:- مشكور ما قصرت ارجعها الك هاي الخدمة

هز رأسه لف لفافه ع ركبته زين مبين بردان
مديتله كوب القهوة
:- تفضل سويتها هسة دافية تفيدك بهذا الجو

هز راسه لا :- يمي قوري هسة اسوي جاي
:- ماتحب القهوة؟

هز راسه لا
:- بس طيبة جرب والله راح تحبها شوف بيها حليب ما تحس بطعم قهوة قوي
صفن علي واني مقدمتها اله ما شلت ايدي

ابتسم بهدوء واخذها
:- مشكورة فوتي جوة لا يجي احد

:- واذا شكو بيها?

شرب منها وكال
:- مايصير لولوة البشر لازم ينتبه لتصرفاتت ويحسب الف حساب لكل شي يطلع منه

هزيت راسي اي واني ما فاهمة شي
ضل يشرب وراح يتمشى ع صفحة
التفت كال
شوكت ترجعن تداومن
:- الاحد نرجع للدوام

هز راسه اي وتقرب مدلي الكوب كتله بزعل
:- ليش ما شربتها والله طيبة

مده الي زين باوعتله فارغ ضحكت متفشلة اخذته منه شكرني مرة لخ وطلع

واني رجعت للمطبخ سويت الي مرة ثانية ولبست العقد ارتاحت روحي وحسيت بالامان من رجع عقدي بركبتي مرة ثانية ..

وبهذا اليوم وصل خبر لاهل عمو جبران ان ابنهم عادل مختفي من ايام واليوم لاكين جثته مقتول ..

ويوم اختفائه نفسه يوم حادث عمو ..

....

ريحانة ..

كاعدة اعلج وادحك تلفزيون بس بالي مو يمو ابد
كل تفكيري بحياتي السودة
دخلت نسومة اخذت الكنترول وغيرت القناة طلعت قناة اغاني وشدت شالها ع خصرها

دحكت عليها مصدومة
:- خالة الج خلك

نسيمة :- ضايجة اريد اردح طكت مرارتي

خليت ايدي جوة خدي ادحك تركص خوش ركص
كالتلي كومي وياي ركصي تونسي شبيج

ريحانة:- الركص للعنده خلك اني ماعندي

ضحكت وهي تهز :- لج انتي بلوة ولطامة شبيج اكوم اردح وانسى الدنيا كلها
هي شنو بيها يونس شو ماكو شي

ضحكت وهزيت ايدي
شوية والله طلعت اغنية حلوة وسوتلي واهس تجرجر بيه واني متعلمة جنة نركص اني ورواء وهبيه

شديت الشال ع خصري وركصت وياها
خلصت الاغنية ذبيت روحي ع الكاع فحطانة
هزت ايدها وغمتني
:- مابيج خير اغنية وهلكتي لو شايفة البنات لاجيبهن الليل كله ركص ويكولن الصبح ما تونسنا

ريحانة :- ذني كيوليات اني مو مثلهن اقوة شي اركص كدام ام رواء وهي تصفك متونسه نطفر كدامها مثل الشواذي

اندك الباب نصت التلفزيون وطلعت تفتحه صاحت صاحت ريحانة .. ريحانة وينج
اني عبالي اجت ليلى طلعت بسرعة بدون حجاب شعري مفلول وشادة الشال جوة خصري

بس طلعت باب الغرفة صار بوجهي هادي صفنت علي وصفن علي نزلت عيونو ع الشال
مشدوس هز ايدو والتفت لخالة نسيمة ماقابل

:- هو هذا تعلومج كاضة الفرخة تعلمينها تركص

نصيت افتح بالشال خجلانه وضليت الم بشعري
نسيمة :- شبيك يوم ضجنا طكت ارواحنا كلنا نركص النه شوية نتونس
والله ما اعلمها هي وينها وين التعلوم ركصة وحدة وذبت روحها فحطانه تكول راكض وراها جلب

يدحك بوجها عاقد حاجبو ويرجع يدحك بوجهي ما قابل من سكتت كال
وهو يرفع اصبعو بوجهي بتهديد
:- والله اذا تركصين افرسج فرس ماعندي مرة ركاصة انه النوب ياخذج الواهس وتخربين

رفعت طرف حاجبي ماقابلة نتر
نزلي عيونج لا افكسهن نزليييهن

نزلت عيوني بسرعة نسيمة كلتله
: هسة انت جاي تعاركنا لو تشوفنا تفضل تفضل ادخل ارتاح دربك طويل

هز راسو ودخل كعد هي كالتلي جيبي الماي وسوي جاي لهادي
خزرتها عضتلي اصبعها

مشيت للمطبخ لبست شالي زين واخذتلو الماي اخذو من ايدي بدون ما يدحك
ملتهي يحجي ويا خالة
طلعت سويت جاي واخذت كليجة خليتها الو كلت هساع يطلع جوعان

خليت الصينية كدامو وكعدت ع صفحة
وهو يسولف وياها يكللها
سمعت بالشيهانة ورجلها وجاي اشوفكم وامر عليهم اتحمدلهم ع السلامة
ليلى خابرتلي كلتلي بس غير روحي انسحنت سحن

نسيمة :- اي خطية امس مرينا عليهم اني وريحانة غير البنية تفطر باب الكلب لسانها ثكيل كوة تحجي ورجلها باترين جفوفه خطية
حتى بجي بجيت عليهم اني

:- ما يستاهلون والله

رفع عينو دحك علي ودرجع دحك ع خالة
ولا كانو بشر كاعد احسو ما يشوفني

فترة وخالة راحت للمطبخ عدل كعدتو وكال
شلونج ؟ الجلاب خو ما رجعو

هزيت راسي لا وهمست :- اني زينه

:- الحمدلله خو ما محتاجة شي من تحتاجين شي خابري علي خوش
هزيت راسي اي

ضل يحوس بحلكه حجي شوية وكال
بتحذير
:- ركص ما تتمركصين بعلي الفحل اموتج موت
وقد اعذر من انذر لا تستلهسين ماعندي مرة تركص انه

:- ترى افتهمت

خزرني :- احجي عدل
اشر ع الصينية كدامو وكال بنتر معصب
:- تعالي شيليها

هزيت راسي اي وكالبه وجهي ما قابلة من وصلت نصيت اشيلها كضب ايدي حيل من معصمي
خليت عيني بعينو خازرني
كال من بين اسنانو بغضب

:- اذا شفتج مرة ثانية شادة شالج ع خصرج وتركصين رجلينج احشهن حش
وافصم ظهرج لا تتعلمين ع درب الكاوليات
ولا تخليني اعيد النظر بموضوعچ وافرض عليج شي انتي ماقابلة علي وفهمج كفاية جري عدل احسنلچ

بلعت ريكي بخوف جريت ايدي حيل وهمست
:- ان شاءالله وعفت المكان وطلعت

ليلى ..

مر شهر ع زواجنا واحنة نفتر بنفس النقطة
ما صار اي تطور بس ما انكر حرب رد علينا الوحشة
وصارت روح بالبيت خصوصا ويا هادي
يلعب ويا وياخذه يطلعه حتى اذا اني ما طلعت وياهم ويرجعون محملين بالاغراض والحلويات
ومن كل عقله يكعد يفرشهن ويقسمهن بالنص بيني وبين هادي

ليلى :- هاي النستلة ما احبها اخذها انت اكلها

حرب :- مشكورة يول الخير والكرم من صفاتج
ليلى :- شو تستهزأ

حرب :- عجل الطلع منج نستله شكد بخيله اني زلمتچ وهيج بخيلة وياي لو غريب يمكن تكطعين عني الهوى تكولين اطلع هذا هواي

باوعتله بنص عين وانطيته جبس
هادي انطاه ككو ونستله ثانية
ليلى :- شوف اني وابني كريمين

تحسر وباوعلي بطرف عينه :- ابنج كريم بس انتي بخيلة

باوع لهادي وكال تعال يول خل عمك يحضنك ويبوسك يمعثور
تقرب هادي لف ايدينه ع ركبة حرب وباسه
باوعلي وغمزلي :- مو كتلج ابنج كريم دحكي زين تا تتعلمين

باوعتله بنص عين ودرت وجهي اكل ككو
حرب ضل يشاقي هادي يبززه بشواربه وهادي يكش ويتمرغل بحضن حرب فحطان ضحك ويصرخ

كوة عافه فتح الجبس ضلينا كلنا نباوع لافلام كارتون ويا هادي وناكل حلويات وهذا حرب مدهور بسرعة خلص حلوياته كسر خاطري
انطيته ككو
:- شنو ما جايب لروحك

:- والله جبتلكم ونسيت روحي ما اعرف شجاني

:- اكل اكل

:- بس تردين تسدين حلكي
فتحه اكله كال منبهر :- والله طيب هذا جربتي
هزيت راسي لا

مده لحلكي باوعتله بنص عين كال وهو يضحك
:- شبيج جربي
خليت ايدي فوك ايده واكلت منه صدك طيب خمطته من ايده بسرعه

ليلى :- جيبه طيب واخذ هذني

ضحك ومد ايده ع خدي كرصه باصابعه

:- هساع اجيبلج منو كارتون كامل

:- خليها بعدين من نطلع نشتري منه خوب احنه بس ناكل ونتعارك شلون حياة

:- شتردين عجل؟ حجاها وغمزلي بوكاحة

مديت ايدي ع زنده كرصته وخزرته
:- اشش

:- لشلاشة تلشلشچ

گام وكف جر تيشيرته لبسه فوك فانيلته الداخليه واخذ السويج
كتله مستغربة وين رايح؟

:- اشتري جكاير خلص باكيتي

هزيت راسي اي .. راح طلع تمددت ويا هادي اباوع شوية ودخل جايب علاكة شمرها بحضني
وبايده باكيت جكاير

فتحتها وكعدت عدل اضحك :- عزززة وطين طلعت حتى تجيبلي ككو
ليش تعبت نفسك حرب لو مأجلها

حرب :- ميت عليج اطلع بالخطر اجيبلج؟ وبالليل
بس غير جكاير ماعندي كلت فد مرة بطريقي

ليلى :- هاا يلا ع كلا مشكور

رجعت تمددت اباوع مندمجة خليت العلاكة يم راسي وكتله
اذا تريد اكل بس مو تخلصه
حرب :- بس وحدة انطيني

فتحتها انطيته وحدة ورجعت اباوع لحد ما غفيت بمكاني
سمعته يمشي طفة التلفزيون وكال يالله
فتحت عيني شفته شايل هادي رجعت غمضت وغفيت

اجة يلكزني يكعدني
درت وجهي ماقابله وكتله بنعس عوفني هنا بس جيبيلي غطا

حرب :- باردة هينه تتمرضين ابوية الفراش دافي
ليلى :- ممم بس الفراش دافي
حرب :-حضني ادفئ

فتحت طرف عيني شفته منصي صاير قريب مني ضربته بخفه ايدي ع زنده
:- قصدي اكو صوبة جانت مشتغله ومدفيه الغرفة

ضحك وبعدها صار وجهه جدي وكال
تكووومين لو شلون؟

رفعت طرف حاجبي :- ما اكوم غطيني باردة والله ما اكوم امشي

خله ايدينه جواي بسرعة وشالني عطت وضحكت بسرعة جلبت بركبته
:- ليششش هيج لا اوووكع

حرب :- ما تكعين دام حرب هو الشايلچ ما توصلين الكع ابد

ليلى :- ممم
نزلني ع الفراش غطاني وطفة الضوة ورجع شمر نفسه
كال بهدوء جربي حضني والله دافي

ضحكت ودرت وجهي عنه :- لااااااا

حضني من ورا مخلي وجهه براسي درت علي ادفع بي وهو يحضن بيه يضحك متعمد يضوجني

بدون شعور دفعته من صدره حيل وعطت واني اضحك
:- وخرررررر قيييس ضوووجتني
ما حسيت غير تحول من واحد يضحك لبركان هايج ما استوعبت شنو گلت ولا استوعبت الصار بعدها ويا هذا الرجل الي تحول وحش.........للحكاية بقية

رايكم بالقصة يهمني 🖤

مقطع القفلة بشنو ذكركم؟ 🥹
من يكون القلب يم شخص ثاني والعقل يحاول يتقبل العايشة ويا

يا ترى ليلى راح تضل تحاول ويا حرب بعقلها؟
لو تنطي مجال بكلبها?