رواية حمائم تخشى الطيران الفصل الثالث وخمسون 53 - بقلم فاطمة العبادي

فاطمة العبادي ..

في #حمائم_تخشى_الطيران

قراءة ممتعة كيكاتي ..

وصلو البارت 1000 تصويت وتعليق لطفا 🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎

ليلى ..

درت وجهي شايغة روحي اصواتهم علت بالمطبخ التفتت اشوفهم يلومون بحرب
گللهم ماكو زلمة منكم يقبل يجي واحد دايح يطعن بعرضو واذا تقبلون ف انتم ناقصين غيره وشرف

التفت ع البيت شافني اشرلي بايده وكال
:- لبسي وتعاي منتظرج تا نرجع لبغداد

دخلت ام دلال تحجي ويا واني انسحبت اخذتني حفصة زوجة اخو جوة شوية ورجعت ام دلال
تحجي
:- قافل الا ترجعون هساع بعد طبكت عندو وقفل
هساع لو معبرتها يا ليلى لاجل عين تكرم الف عين

كتلها مقهورة :- بس مو توصل بخالتج تطعن بشرفي واسكت؟ تقبلينها ع بنتج ام دلال

تحسرت وكالت :- لا والله بس اني ادافعلها واطيح حظو لليحجي بيها جان كلتيلي والله العب بيهن لعب

:- حتى لو تتعاركين وياهن ما يفيد حقي ما يجيبه غير زوجي بس هو يكدر يسكت حلوگهم

هزت راسها وكالت
لبسي بسرعه لا يتسودن علينا اندهرنا من ورا عزام سودة بوجهه

كمت نزعتي شالي ورجعت لبسته وبنت اخو جابت عبايتي وطلعت لكيته منتظرني يم باب المطبخ وامه بالصالة تبجي وتشكي لخواتها تكول
خذتو مني وكلبتو علي من اول يومين من سودة بوجها النجفية هاي

سكتت وعبرت اباوعله وجهه ما يكصة السيف حتى خفت احجي
اشرلي اصير ورا ومشيت
فتحلي الباب وصعدت صار وراي لان اكو زلم من ولدهم بظهري سد الباب

لزمة رجال كبير يحجي ويا مبين يعاتبه حرب سمعله للاخير ومن كمل سمعت حرب كاله بصوت عالي
:- هذا درس لكل واحد يفكر يجيب سيرة حرمتي بالشين وحك سبع الدجيل اذا هذي المرة عبرتها الو ف لان انت وكفت بعيني بس مرة الثانية اكص لسانو

:- حكك محد يلومك هو غلط بس مو هيج تعاقبو زعلتني منك عمي

:- من توصل يم الشرف ما يهمني زعل كائن من يكن
لو واحد يطعن بشرف بنتك تسكت؟ وتعبرها الو لو تكوم الدنيا ما تكعدها

ضل عمه يمتمت كله لا بس مو بهذا الشكل
حرب :- لا عمي هيج واكثر اودعناك ورانه طريق طويل

التفتت شفت ولد ثاني شاب يطلع بعمري اسمعه يكله عمي لخاطرنا ضلو اليوم لا تطلعون منا زعلانين

حرب مادري شنو گله والولد ضحك وبعدها اجة حرب صعد وطلعنا لبغداد بس اول ما صعد كال بغضب
:- العن ابو شرفهم ال***

ضليت ساكته مبهوته ..

شوية واندارلي
:- انتي شنو تغديتي لا؟

هزيت راسي لا
:- جنت اكل وصار المشامر وكمت بسرعه

:- يلعن شرفهم شلون ما تاكلين انتي مريضة وجهج مصفرج
:- شسوي لعد؟ انسدت نفسي بالزايد قهروني عشت طول عمري شايله ذنب مو ذنبي وافتر بي

تنهدت خليت ايدي جوة خدي مقهورة وباوعت للشارع
طبك يم مطعم كال نزلي

:-والله ولا اشتهي انسدت نفسي كلش

:-راح تتخربطين يمعثورة ورانه طريق طويل وتعب جثير نزلي نزلي

كلبت عيوني ما قابلة ونزلت
جنت دايخة كعدنا هو طلع جكارة ورثها وايده مخليها ع جبينه دايخ واني ساكته

كسرت حاجز الصمت بسؤال
:- ليش ورطت نفسك ويا بنية طالعة من بيت مو زين انتقامك هيج غالي يخليك ترخص سمعتك؟

شال ايده وصفن بوجهي بحيرة هز رأسه وضحك تك خد
:- يستاهل ونص

:- شوكت تطلگني؟
انت ردت تتزوجني 5 ايام وبس

:- وانتي ردتي زواج عادي وطبيعي ودائم

:- شنو قصدك دائم

:- يعني ما تطلعين من ذمتي لحد ما تصيرين بذمة الگبر نقطة راس سطر

سكتت ما رديت رفع طرف حاجبه وجر نفس من الجكارة
:- انخلستي؟

:- لا بس ما اعرف شنو اجاوبك والله

:- احسن

نزل الاكل اكلته كله لان كان طيب وهو هم اكل من خلص كال
:- امشي للحمامات

هزيت راسي اي جاي اكوم سحكت طرف عبايتي وتبهذلت مد ايده يسدها واني ارفعها ع رأسي
حرب :- ثوبج حصررر ماعندج غيرو

ليلى :- غير جوة العباية منو شايفني غير النسوان

هز راسه مشينه دخلت للحمام مال النساء غسلت وطلعت لكيته منتظرني
حاسب وطلعنا شغل السيارة وطلع بحلگه حجي
يلوب يريد يذبه بس ما يعرف شلون

شوية وتحمحم جلى صوته وكال بهدوء
:- هاي من وكفتي بالباب مال المطبخ ودخلو ويلاد عمامي دحكو عليج بهذا الثوب لو بدلتي؟

:- ما باوعولي ترة!!

:- لا دحكو واكفة بالباب ما ضلو مغمضين

رفعت اكتافي ماادري وحجيت :- ما اعرف بس اي جنت لابسته ما غيرته
حرب :- اشتعلت صفحة الخلفج من دخلو غير تدخلين ليش ضليتي واكفة وهم يدحكون لطولج

باوعلي عقد حاجبه
:- ما اعرف خفت من شفتك معصب ردت اشوف شنو راح تسوي كل تفكيري جان وياك

انفكن حواجبه وابتسم :- زين طلعتي تخافين علي

ضحكت حيل وكتله :- غير زلمتي
ضل يضحك حيل اكتافه تهتز وكال
:- بسرعة ربطتي فيشة

:- ها لازم انت ما ربطت حرررمتي حرررمتي تحجون ع حرررمتي ع كولتك وريتهم ور

:- شنو شنو

:- وريتهم ور

ضل يضحك اكتافه تهتز
:- خليهم يولون صحيح ما احبج ولا اجرعج ومحمل عليج بكلبي جثير بس سمعتج مرتبطة بسمعتي ما اقبل واحد يحجي عليج اشكو لحلكه والله

:- صدك؟ زين انت شنو تشوفني موزينة؟ لو تشوفني زينة

:- تردين الصدك لو ابن عمه?
:- شسوي بأبن عمه اريد الصدك اني

كال بجدية :- خوش مرة انتي اصيلة وحوك ما رضختي ولا حدرتي راس وما قبلتي ع روحج العيبة
اني زلمة ما احب اهوجس جثير ولا اطولها وهي كصيرة
انطيجياها من الاخير من شفتج متمسكة بشرفج وابنج وما رضختي كبرتي بعيني وناري اتجاهج هودت

ليلى :- ليش تزوجتني لعد؟

حرب :- اخذج من الخذاج بوگة من اخوي وكسر گلبه وخلاه ينتحر

هزيت راسي وتنهدت سكتنا ثنيناتنه شوية وكتله
:- بعد هاي هي ما تنتقم مني

:- الاريده اخذتو ماعندي شي وياج بعد

:- هاا صحيح اذا جبرتني اتزوجك بعد شنو تريد اكثر من هيج

:- لا خاف تردين؟
هزيت راسي لا :- اكعد واسكت البيه مكفيني

سكت شوية وكال
:- بعد هذا الثوب ما تلبسينو بس بالبيت

:- ان شاءالله
ضحكت باوعلي مستغرب :- حجيتلج نكته ليش تتمضحكين

:- اذا هذا الثوب غثك لو تشوفني شنو جنت البس من جنت سافرة همزين الله هداني وتحجبت
جنة ما نعرف الحلال والحرام

:- شتلبسين؟

:- كله تنورة قصيرة والشعر نازل ع الظهر والكعب بسمار اطك بي
ومكياج ارسم روحي رسم اطلع من البيت عروس وما جنت هيج ضعيفه لا هسة من الضيم انسليت سل جنت شوية بيه لحمه شحلاتني ينضرب المثل بأناقتي وترتيبي وجمالي

:-وريتيني ور يمعثورة

:- اراويك صوري مال الكلية جنت شحلاتني

:- اشكهن فوك راسج

سكت شوية وكال بصوت مبهوت
:- صهيب جان يشوفج؟

:- احم .. اي مرات يلمحني ونتعارك
:- يغار ؟

:- لا بس يتحداني ياخذني لو يهددني وهيج حجي واني جنت رافضته اخاف منه

:- هساع انتي ما تخافين مني؟

:- شوية

:- هاا حلو عظيم

هزيت راسي اي ..

:- هم طلعتو سوية بموعد

:- اقوى موعد جان بمركز الشرطة لزموني وطلبت مساعدته

:- معثورة

:- ترى صدك ما جنت احب اخوك ولا بيناتنا شي بس هو الله يرحمه ضيعني وضيع نفسه

تحسرت ودرت وجهي
:- اذا ما تحبينو ليش جنتي تطلبين مساعدتو وما طردتي من حياتج كلها

:- ما جان عندي غيره والله وهو عارض خدماته علينا
يعني حتى عمامي ما جنت اعرفهم ولا اعرف هادي
بس صهيب جنت اشوفة اخ وكتله مليون مرة انت اخو مو اكثر وهو يدري ما اريده بس متأمل يجي يوم واحبه وما اجة هذا اليوم

سكت ولا رد عليه ضل صافن ويسوق وباله شارد

وصلنا للبيت تعبانين اني كبل بدلت ونمت وهو طلع الارگيله يعمرها

ضليت نايمة للعصر كعدت ع صوت التلفون يدك طلعت لكيته يجاوب ويحجي
الفهمته هذول السادة يسألون عني لان هادي ضال يبجي علي

كام غسل وجهه ودخل للغرفة غسلت اني وباوعت للساعة الدنيا ليل توضيت وصليت
دقايق واندك الباب طلع هو لابس تراكسود وفتح الباب دخل هادي اجة ركض حضني بوسته وسألته
ليش تبجي ماما هياتني رجعت

:- اشتاقيت الج لتعوفيني بعد

:- ما اعوفك يا روحي بوسته وحضنته حيل
يمه افيش يا ريحتك ترد روحي فدوة رحتلك اني

حرب :- هاا البطل يبجي ليششس

هادي :- اشتاقيت لماما

حرب :- والي ما اشتاكيت يولي؟

هادي :- اي بس لماما اكثر

باوعت لحرب وتمغطت :- شسوي عشا؟

حرب: -وين ادري شمعرفني بسوالف المطبخ
هادي :- جيب من المطعم

حرب :- يدور راحة امو ويخلص جيبي لوووتي

ضحكت وهادي سواله قلب بأيدينه
:- لان ماما قلب تستاهل

:- مو امس تكلي ماما احسن طباخة وكل شي ما شفنا من الطباخة

:- شبيك باجر اسويلكم برياني

هز راسه اي اخذ السويج وكال لهادي
:- تجي وياي

هادي هز رأسه وطلع ويا كمت جبت القرآن كعدت اقرا تقريبا نص ساعة ورجعو
جايبين مشاوي من شافوني اقرا قران دخلو للمطبخ كبل واسمع حرب يكول لهادي
تعال نطلع كلاصات للببسي ونحضر السفرة

كملت السورة يلا صدقت وكمت
لكيتهم يجهزن بالمطبخ باوعت لحرب مستغربة واحس كأنما غشاوة انشالت عن عيني

معقولة تصرفاته هاي اله بيهن غاية يريد يرجعها الي ويعلقني بي ويعوفني لان باعتقاده اني علقت صهيب بيه وتركته

ضليت صافنة والحيرة اكلت كلبي اكل اشوفة شلون يتشاقى ويا هادي ويحضرون السفرة
وتصرفاته وياي واهتمامه غريب

اجالي منتقم غاضب وفجأة تحول الى شخص حاب وهاوي

الف علامة استفهام صارت برأسي ونرسمت ع وجهي
صاحولي كال ليش صافنة تعالي

هزيت راسي وسحبت الكرسي وكعدت اكل وافكر بحيرة وعيوني تراقبه
حسيته يضحك ويا هادي ويحجي من گلبه بس اني گلبي لعب

اخذتني الحيرة ضليت افكر افتر بالبيت اشتغل وافكر
زين هو مو جان كارهني ليش يتصرف وياي بلطافة
معقولة حبني؟ لان حجي ريحانة مرة ضل براسي من كالت هذا يريدج ويدور حجة حتى ياخذج لان يدري بيج ترفضين اذا خطبج

هادي نعس ضليت اسولفله قصة وهو يسالني عن الشخصيات واني ما اعرفهم من رأسي مألفتها
نام غطيته وطلعت دخلت للغرفة لكيته متمدد بأيده كتاب يقرا من دخلت طبگه وخلا ع الميز

شلت الغطة وكعدت بمكاني اباوعله
رفع حاجبه وكال
شكوو

هزيت راسي ماكو ورفعت رجليني تمددت
حرب :- شجاج يول انكلبت احوالج

:- لا ما بيه شي اريد انام نعسانة

:- غير كعدتي بالليل شنو تنامين

:- شلون ما انعس والله بلوة هسة شتريد
كعدت ع حيلي

:- سولفي وياي ضايج
:- مالي خلك اسولف

:- اذا ما تسولفين اشبگچ اكسر ضلوعچ بين ذرعاني وانتي بكيفج

كلت اهوو متضايقة وتمددت انطيته ظهري

كال بتوعد :- سهلة

حسيته تمدد و ضل هادئ شوية وحسيته صار وراي بهدوء مد ايده جوا خصري وجرني ولف الايد الثانية ع صدري من ورا ولزكني بصدره

:- يااا يااا شتسوي

:- حرمتي

:- وخررررر

:- تؤ

:- توخر لو اصرخ
:- صرخي

:- لا حول ولا قوة الا بالله
تنهدت ضايجة خليت ايدي فوك كف ايده بهدوء خليته يأمن ويرخيها وسحبتها لوجهي عضيت كف ايده حيل

صاح متوجع :- اااخ يمعثورة شعملتي شموكلج مشاوي مال جلاب

:- توخر لو اشبعك عض

حط راسه بشعري وهمس بذبول
:-عضضضيي

درت روحي علي حوط ظهري بأيدينه رفعت ايديني خليتهن ع صدره وباوعتله ضايجة
:- ما توخر شبيك ضايقتني والله

:- جذابة مكيفة ومرتاحة ع الحضن

:- النوب

رفع حواجبه رفعت ابهامي خليته ع شفته السفليه
مشيته عليها بخفه غمض عينه
كتله بهدوء :- شبيك؟
همس بذبول :- وريت

ليلى :- توخر لو اورك اكثر واخليك ع حالك بالضيم

رفعت حاجبي فتح عيونه شوية باوعلي سابلهن
حرب :- عادي وريني اكثر يول شحلاتها طلعت حسبالي تعور

:- ياا وخررر

دفعته من صدره جرني حيل ضل يمشي ايده ع زندي ويحجي
:- ورانه ورانه ليش ما نفضها اليوم

:- شنو هي الورانه حرب كتلك ما اقبل خلينا هيج

:- شنو مسلسل لو فلم خلينا هيج ماكو هيج حجي

:- لا والله

:- اي شلون عجل

:- بس اني ما اريد

:- اني اريد وحيل اريد

:- اووو وخر حرب

همس بذبول
:- شبيج والله وريت ليل

:- ما نرهم

:- نرهم وداعتچ

هزيت راسي لا .. خله ايده ع خصري يمشيها صعود ونزول وكال بنفس النبرة
:- شنو شرطج حتى تقبلين؟ وتمكنيني من نفسچ

سكتت لحظات بلعت ريكي وجاوبته
:- تحجيلي الصدك انت مو جاي تنتقم مني ليش هيج تتصرف وياي كأنك تحبني لان كلبي لاعب منك

:- ليش يول؟ اني ردت اكسر السادة وكسرتهم وانتهت

:- ماعندك شي يعني منا منا
حجيت بقلق

:- اتوقع اني ثبتتلچ
من قبلت شرطج واجيتج جايب عشيرتي وياي
شنو تردين اكثر من هيج
كافي خوف انتي هواي عشتي بخوف سلميني روحج وحياتج وخلينا نبدي صفحة جديدة

ليلى :- بس اني مااحبك
عقد حاجبه :- تكرهيني عجل؟

هزيت راسي لا :- لا ما احس روحي اكرهك ابد
حرب :- بعد شنو كره ما تكرهيني انطيني فرصة حتى تحبيني اذا ما تقبلين نبدي صفحة جديدة شلون تمشي حياتنا؟

بعدين يا ابوية يا ليل ملايين الناس جاي تتزوج زواج بدون وحب مشاعر و ورا الزواج صارو احلى حبايب
جعلنا بينكم مودة ورحمة
سبحان الله هذا الشي شفتو من عقدت عليج گبل مشاعري تحولت لاهتمام وخوف عليج اهجس صرتي بمسؤوليتي وبركبتي ولازم احميج واداريج

ليلى :- صحيح كلامك
بس اكو موقف يحز بكلبي من ساومتني ع شرفي

حرب :- والله وبالله ما اسويها ولا اوصل حرمة بالحرام جانت ساعة شيطان وموصليلي عنج صورة موحلوة اعتذر غلطان وحگچ علي وفصلچ انتي تحطينو افصلچ شنو تردين؟

:- اريد ارتاح وبس

:- ما راح اهوجس جثير قبلي وانطيني فرصة وافعالي راح تسولفلج جثيييير

تنهدت مخنوكة قرب وجهه من وجهي رفعت راسي
رفع حاجبه وهمس
:- هاا شگلتي؟

:- اخاف
:- براحتچ ابوية عندج الوكت كلو وان شاءالله فترة ونطلع هذا البيت ونطوي صفحة ونبدي صفحة جديدة

هزيت راسي اي وهمست الله كريم

نزل عيونه ع شفتي وتحسر
:- انولهن وداعة عيونج الحلوة وشعرج الحلو
وما انسى رهانة الف بوسة ع نحرج

غمضت عيوني ضل مخلي ايده جواي ولافها ع خصري والثانية رفعها يمسح ع شعري
جر حسرة وهمس
:- اتوسدو وانام ويا هنيال حرب بشعر ليله .. يا هنيالو مسعد

ضليت ساكته لحد ما غفينا ثنيناتنا كعدنه لصلاة الفجر صلينه رجعت تمددت وغفيت بسرعة

ورة فترة فزيت ع صوت تبخبخ رفعت راسي شفته واكف كبال المراية طاك القاط ويرش عطر
:- شنو وين

:- لدوامي

:- هاا خلصت اجازتك

:- اي والله

هزيت راسي ورجعت راسي كتله بصوت نعسان تريكت؟
:- اي سويت ريوك لنفسي
:- بالعافية جان كعدتني

:- ما هان علي اكسر نومتج رجعي نامي

باوعلي بالمراية وابتسم وجهه يضحك مبتسم
غمضت عيني ورفعت الغطا لصدري نمت

...

الشيهانة ..

دخلت للغرفة يم شمس نايمة ترجف بفراشها تلمست كصتها حارة مسخنة
باوعتلي بنظرات خايفه
:- كومي حبيبتي سبحي ع كيفج ولبسي اخذج للمستشفى
هزت راسها لا :- ما اريد اكوم

:- لا مو بكيفج كومي يلا كلهم لاحظو عليج متغيرة لا تخلين احد يشوف ضعفج وخوفج صيري سباعية يلا امي كومي وياي اذا تردين اساعدج تسبحين

هزت راسها لا وكعدت ع كيف
:- اسبح بس ما اريد اروح للمستشفى ما بيه شي اني بس خايفة ومتوترة

:- لا تخافين ولا هاي عمج جبران لازم القضية واليوم يحلها واني لو ما واثقة بي ما تشوفيني واكفة ع طولي كبالج

جنت احجي حتى اطمنها بس بداخلي ميته خوف نزلت من فراشها اخذت ملابسها كمت امشي اعدل بالغرفة صايرة خبصة شوية وطلعت تنشف بشعرها وترجف

كعدتها سحبت الشسوار اجفف شعرها الها صار منفوش ضحكت وكلتلها
:- انتي شمس وصدك شمس شنو هاي لج ماما عطوبج مكنكرات كون يشوفج هادي

ابتسمت بتعب وميلت راسها
:- شسويله شعري مفلفل ومنفوش كلش يتعبني من امشطة

:- بس حلو انتي بكبرج حلوة شنو هاي الشامة الحلوة

ابتسمت اكثر ونصت خجلانة رفعت ايديها خلتهن ع وجها وانفجرت تبجي
لزمتها وكتلها هاها مو متفقين ماكو خوف وبجي

جريت ايديها بستهن وحطيتهن ع صدري
كالتلي بخجل
:- اسفة انتي تحبيني واني اذيتج هواي

:- تدرين الام شما يسوون اولادها من اخطاء تضل تحبهم وتموت عليهم وتسامحهم
كلبي ما شايل عليج ولا حتى شوية امي انتي حبيبتي
مسحي دموعج ونزلي وياي اخذج للمستشفى

شمس :- والله ما احتاج مستشفى بس طمنيني من تنحل المشكلة احس كلبي ح يوكف

هزيت راسي ي
:- نزلي وياي زين يم لولوة وعمتي نكعد اريدج تشدين روحج ضعفج لا تبينينه ولا تخلين احد يشوفج مكسورة انتي بنت الشيهانة شمس

شمس :- ان شاءالله ما.. ما

ابتسمت الها كامت ع كيفها نزلت وياي فرحن من شافنها نزلت كعدت يمنه
بالي كله يم جبران وعيني ع الساعة راح يشوف عادل من ساعة ونص ومنتظرة رجعته

احس گلبي مقبوض ومختنكة عفتهن وطلعت امشي بالحديقة ومبايلي باذني انتظر مكالمة من عنده

كل ما يدك مبايلي عبالي هوا تالي يطلع من الشغل

الساعات صار مغرب عمتي كالتلي خابرتي رجلج شو تأخر شسالفة ما اله نيه يجي ع العشا

:- عنده شغل عمه يكمله ويرجع

هزت راسها اي ما تعرف شي كلبي يوجعني وصدري ضاك كلش ما مرتاحة غسلت وجهي وضليت افتر ع روحي الوب

مرت ساعات تعشو كلتلهم انتظر جبران اتعشا ويا
ضليت انتظره هواي واخابر ما يجاوبني
حسيت الدنيا كلها ضاكت عليه صارت جنها كبر
والف فكرة سيئة اجت براسي

اخابر غفار هم ما يجاوبني اول شي خطر ع بالي هسة عادل مكتلهم
لان ما من المعقولة لهسة ما خلصت سالفتهم

رجعت اتصلت بجبران صار مغلق رحت لدفتر الارقام طلعت رقم جليل وخابرته
جاوبني سلمت علي وعرفته علي
رحب بيه واكلني بالسلام

كتله اريد اسألك ع جبران راح بشغله ولهسة ما رجع اني متعودة من يتاخر يكون يمك
وهسة كلبي نار علي

جليل :- اليوم كله ما شفته والله هسة اخابره

:- خابرته جا قابل اتصل بيك اكلك مختفي بدون ما اخابره؟ كومة خابرت مايرد ولا غفار يرد

:- زين هو وين راح ما بلغج

:- يواجه عادل عنده مشكلة ويا

نتر :- كل عقله يروح هيج وما يبلغني شنو كلتله روحه

:- هسة شسوي خايفة ومن العصر لهسه مختفي خاف صار بي شي لا عادل اذاهم

:- تعرفين وين راح يشوفه

:- لا والله

:- استغفرالله هسة هاي هم سالفة جبران ديلا سدي اني راح اشوف من يمي

:- تمام باي
:- هلا بيج
سديته مستغربة اسلوبه غريب بالكلام يحجي وياي وكأنه يعرفني من سنين وماخذ علي كلش ما حبيت ولا راح احب هذا الاسلوب بس من هادي

ضليت انتظر منه لو من جبران اتصال
ما اكو شي دك علي قاسم رفعته

اجاني صوته يرجف
:-ست اجاني شي شمرو علي وراحو ..راح اجي يم باب المطبخ تعالي اخذي مني

:- جايتك ..

طلعت من الغرفة نزلت وتوجهت لباب المطبخ بدون ما اعرف بالمصيبة المنتظرتني والشي الراح يكسرني ويكسر ظهري ويخليني اتوجع طول عمري ..

...

فاطمة ..

ضليت عند اهلي زعلانة اسبوعين ورا زواج ليلى واجو خوالي يرجعوني

كلتلهم ما ارجع اني اريد اتطلگ كلش طفح الكيل و وصلت حدها ويا قيس
امي لطمت ع رجليها مقهورة وكالت بقهر

:- ولج كافي البنية تزوجت وبعد ماكو بينهم خط رجعة لا تصيرين غبية هاي فرصتج

:- يا فرصة ما تكليلي ليش هو قيس ناسيها لو راح ينساها؟ ماكو ضاله بنفسه وما يقبل يطلعها من كلبه ولا يتأقلم

:- انتي شبيج فطيم مردتي كلبي؟ قبل اكو فرصة للرجوع طبيعي ما ينسى متامل هسة الوضع اختلف خيط الامل انكطع وبعد ليلى صارت ماضي

يعني انتي من جان يحبها ويريد يرجعها ضليتي ويا من انتهت تردين تتطلكين

سكتت درت وجهي مقهورة
نترت بيه :- والله ترجعين ورجلج فوك راسج البنية تزوجت ومالها رجعة وصار بس الج شبعي بي بعد المن هاي العيارة

لا تكليلي يحبها وعاشكها وكرامتي وكرامتي تدرين كلش زين بي يحبها من تزوجتي تتحملين النتائج انتي ما تخلين الحسن وخاتون ضحايا بيناتكم

شوفي النسوان عاضات الدنيا بسنونهن علمود اطفالهن شوفي ليلى شسوت علمود ابنها وشنو عملت طبعا يحبها ومتمسك بيها البنية شخصية مو مثلج

:- شنو بيه والله احلى منها اني

:- هي مو بالحلى بالشخصية اذا ما تصيرين شخصية ومعدلة كدام قيس يضل طول عمره عاشك ليلى وما يريدج ولج خلي كرامتج كدامه رجعي كليله رجعتلك علمود الاطفال وحسسي انتي ما تردينه وصيري قوية لا تنهزين كدامه لا تبجين ولا تدكين وتنكين براسه ليلى وليلى خلي يشوفج ما تردينه
وبنفس الوكت يشوفج قوية علمود يجلب بيج مثل ما جلب بليلى يمكن ما يحبج نفس ما حبها

بس بعقله يشوفج مرة معدلة ما يكدر يخسرج

باوعتلها بتفكير وهزيت راسي اي
:- وراح اطبق كلامج من هسة اني مرة قوية وعندي كرامة وراح اتحمل فراكه وفراك اولادي لحد ما يجي هو بنفسه يرجعني ما ارجع ويا احد غيره

لطمت رجلها وزمت شفايفها بقهر وصاحت: -ااااخ ياااابوية ولج يكول هي طلعت وحدها ترجع وحدها بس خوالج ما رادو يكسرونج واجو ليش تكبرين راس

:- اكبر راس ليش حتى ما اكبر راس ليلى هم راحت بارادتها وتطلكت بأرادتها وضل يركض وراها بدون كرامة ويبجي عليها من اجت يم فاطمة صارت عنده كرامه ويستنگف يجي يحجي حجايتين زينات ويرجعني

ضربت ع الميز بقهر وكتلها باصرار:- اني تغيرت وبعد ما انهز وكلمتي ما اغيرها يجي هو يطلبني ارجع ويبرر موقفه ويتعذر مني يلا ارجع غير هيج ماكووو لان هو هاني هواي و اني وصلت عندي حدهااا

:- طبج حمس ضلي بعنادج ضلي
كامت من يمي معصبة راحت تصلي محروك دمها مني

ضليت اغلي واحس كلبي يدك سريع قررت بعد ما اهتز واذا مو هو يجي بنفسه ويحجي وياي ويطلب مني ارجع اضل عند اهلي عسى ما سنة هم ما ارجع

ثاني يوم اتصلت خالتي حجيت ويا امي شوية وكلتلها قيس يريد يحجي ويا فاطمة حسيت كلبي انتفض ورفرف الحقير ماذيني ومطير كرامتي بسبب خفته كبال قيس

ردت اركض ركض اخذ السماعة واحجي ويا بس دسته دوس وكتلها
:- ماعندي حجي ويا لا يتصل

وعفتها ودخلت للغرفة شنو يريد يحاجيني من ورا السماعة والله يعلم يمكن لاحين علي ومخلي يطلب يحاجيني

وين بيتنا بدار مله حتى ما يجي ويكعد ويا زوجته ام اطفاله يحجي وياها وياخذ من خاطرها ويراضيها

هزيت ايدي ما قابلة والله لو ما احبه جان تطلكت من زمان بس گلبي هو الي ذلني وطشر كرامتي كباله

ورا ساعة تقريبا امي دخلت كالت سيد قيس بالاستقبال يريد يشوفج

هزيت راسي اي وطفرت وكلبي طفر قبلي وكفت كبال المراية اشوف شكلي يحتاج تعديل مثل حمرة خفيفه وكحلة وغيرها بس ما خليت حتى ما يكول تسوي هيج حتى احتاجها وارجعها

واني ما اريده يرجعني علمود رغبه اريده يرجعني لان فعلا يريد يبدي وياي صفحة جديدة

طلعتلته سلمت بثقل رد بهدوء وكعدت قريب علي دايرة جسمي و وجهي علي عدل كعدته وصار مقابيلي

باوعتله وجهه شاحب صاير جلد ع عظم
كال بهدوء :- يا قساوة گلبج علوية اسابيع عايفة اطفالج ليش هيج يابة؟ هسة لو علمودي اني ما استاهل يضربني مرض لخاطرهم

:- مو اول اطفال يعيشون ويا ابوهم بس
هواي اكو اطفال اهلهم منفصلين
وعايشين عيشة حلوة

عقد حاجبه :- شنو قصدج؟
:- تفهم قصدي زين قيس هنتني وبينت انت مجبور علي كدام اهلك كلهم اني سهلتها عليك ترة واجيت لاهلي من جانت ليلى ع ذمتك وكتلك طلك انت رجعتني بنفسك ما ضربتك ع ايدك اني
ليش هسة طلعت مجبور ع عشرتي

قيس :-فاطمة انتي ما تفهمين اليدور براسي

:- ولا اريد افهم سيد طلگني وعندك الك والعندي الي اني جزعت كلش وطلعت من روحي ونفسي

بعدين خليك متفائل يمكن تنفصل وترجعلك وانت تهوس بجفية والله يعلم يمكن حتى تندعي علمود يعوفها الخذاها

:- اني وليلى انتهينا كلش حتى لو ترجع الي برجليها هم ما اريدها

:- اي؟

:- اريد ننسى الماضي ونرجع عائله ونلتفت لديننا ونفسنا واطفالنه هواي ابتعدنا عن هذول الثلاثة فاطمة وهسة لازم نصلح اغلاطنا لان كافي كبرنا

:- وهيج تريدني ارجع

:- ليش عندج شروط

هزيت راسي اي :-اول شي اريد منكم اعتذار كدام العائلة كلها لان هنتني هواي من كلت انتم تلحون علي فاطمة وفاطمة وبينت انت مجبور
عقد حاجبه كملت
الاعتذار ما ينزل من مقامك بالعكس يرفعك بعيني واني ما اخفي عليك انت هواي نزلت و وكعت تحتاج ترفع روحك بعيني حتى اكدر ارجع وياك بنفس العطاء وما اهجرك

قيس :- سهلة اعتذر حقج
حجة بدون رضا مجبور واني ابتسمت براحة اريده هيج يتعذب وينجبر يضغط ع نفسه حتى يكسبني ويرجعني مو كله اني راكضة ورا

:- وبعد شي روح ارجع لبيت خالي واخذلك اسبوع راجع نفسك زين وشوف اذا بعدك تريدها لو لا
اذا تشوف نفسك ما تكدر بدونها وهي مسيطرة ع كل تفكيرك وحياتك لا ترجعلي وحدك تعال وياك واحد من السادة حتى نتطلك

ما اقبل اعيش وياك ع الهامش لو تريدني الكل بالكل زوجة وحبيبة وام بيتك واطفالك لو لا تريدني
اني ما ناقصني شي الف من يتمناني

اذا تشوف نفسك ماتكدر طلكني ويجيلي نصيب زين واتزوج واعيش ويا واحد يحسبلي الف حساب ويخليني الكل بالكل

ضل عاقد حاجبه وكال بغضب
سكتي كافي اني مراجع نفسي زين قبل لا اجي

:- لا اني اريدك بعد تفكر وغير هذا الحجي ماعندي هسة من رخصتك رايحة انام نعسانة

كمت من يمه طلعت بدون ما التفت ولا اباوع بوجهه حتى ما انطي مجال يحجي ويغير رأيي وتنكسر حجايتي كباله

صدك راح اخذله اسبوع ورجع جايب خوالي واخذني رجعني و ع العشا حجة رحب برجعتي وتعذر كدامهم
كال ساعة غضب وفاطمة ام بيتي والها مكان جبير بكلبي

حضنت اطفالي وابتسمت برضا ..

...

الشيهانة ..

طلعت امشي شفت قاسم باوعتله وعقدت حواجبي
:- شنوو وكفت كلبي قاسم

مدلي شي باوعتله وعقدت حاجبي
:- طبك علي واحد انطانياه كال هذا بي شي يخص استاذ جيران وصله لمرته

ضليت عاقدة حواجبي مستغربة اخذته من ايده اكلبه: -هسة اخلي باللابتوب واشوف شنو بي
زين شلونه الشخص شنو مواصفاته

:- اسمر كصير واول مرة اشوفة بحياتي بس كلبي ما متطمن يكلي بي شي يخص سبب تأخيره

رفعت عيني بسرعه متفاجئة
:- راح اشوووف ارجع لمكانك قاسم

اخذته وصعدت بسرعة طلعت اللابتوت وايديني يرعشن وكلبي صار يخفق بقوة

حسيت حرورة بحنجرتي كانما سجاجين حارة تطعن بيه
فتحت طلعلي فيديو عقدت حواجبي اباوع

اول شي الفيديو مغوش مابي صورة شوية و وضحت واحد لازم كامرة ويمشي يصور

طلع وجه جبران كبالي وشهكت كله دم مضروب
خله الكامرة ع جبران وحجة بس صوته غريب ما سامعته

:- هذا التصوير لعائلتك راح تمووووت ودعهم بي

جبران يهادد يريد يفك روحه من الكرسي ويهجم علي
خليت ايديني ع صدري ارجف واباوع للفيديو ثنين ملثمين بشماغات فتحو جبران ولزمو خلو ايدينه ورا ظهره ومطلو ع الكاع

صرت احترك وابجي
اشوف جبران متأذي وكله دم والمصور يكله
:- راح تموت ونمتع عيوننا بشوفه دمك احنه نحب الدم

لطمت ع خدي ابجي واباوع خايفه من كل لحظة جاية
شفت واحد ثنى رجله خلاها ع ظهر جبران كعد علي وجبران صرخ متألم وبظهره دم مبين مضروب بشي حاد ع ظهره

والثاني جر ايد جبران خلاها ع الكاع وسحك ع ساعده برجله القذرة مد ايده للمصور ناوشه ساطورة مال تكسير واشوفه بكل قسوة وحقد رفع الساطورة وضل يضرب بكف جبران واصابعه تتكطع والدم ينفض صرخت باعلى صوتي متهسترة
وعيوني ثابته ع اللابتوب واشوفه ضل يكسر بكفوف جبران بالساطورة مردهن مرد
حسيت الدنيا طاحت ع راسي وانتهت روحي بهاي اللحظة ......للحكاية بقية

رأيكم بالقصة يهمني 🖤

انطيتكم غش كتلكم اكو شخصية تكرهونها راح نفقدها للابد ما صار مجال لهذا الحدث ع البارت الجاي