رواية حمائم تخشى الطيران الفصل الخامس والعشرون 25 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

🚫وصلو البارت 500 تعليق وتصويت لطفًا 😊

ريحانة ..

خالي نصة حط راسه يم ذاني وكال ...هذا بعد صار زلمتج انتي يم زلمتج وامج يمنا احنه زلمها
بجيت بضعف واهز راسي لا لا لا

خزرني بقسوة ولزمني من زندي كرصني حيل ...نذبح امچ تردين امچ تموت؟ گولي لرجلچ لا
ريحانة ...شيسويلي هذا ما اعرف واخاف خاف يكتلني وما يشتريلي ككو ويمشط شعري

خزرني بقسوة اكبر دمغني على راسي وگال
...لا ماكو هيج شعرج تمطشينه انتي وككو ماكو بعد صرتي مرة متزوجة شنو ككو ما ككو عيب

ضليت ابجي رجع يهدد نذبح ونصلخ ماكو علي لسانهم غير الذبح والصلخ والضيم طلع خالي لازمني من زندي قدمني للرجال گله

...هاي مرتك وقبل لا تاخذها وقع

كريم ...ها قبل لا اوقع تضمنلي تضل يمي وما تروح هذني يشرد اني اخاف

هزله راسه لا ...صارت يمك بعد انتة زلمه وتبتلي بيها تحبسها تذبحها تكطعها ما ادري

ضليت اناشغ وابجي وقعو ورقة طلع مطلوب خالي وهذا طيحله دينه بالمقابل باعني اله كعروسه عروس عمرها عشر سنين ونص
تجهل معنى الزواج باوعتله لابس دشداشة بيضة وساعة ذهبيه يفر بسبحته مثل ما راح يفر بيه الدنيا فر

اخذني من خالي لزمني من زندي وخرت گذلتي خليتها ورا اذني ابجي وايده لازمه ايدي بقوة يخاف اشرد واني اخاف منه ومن خيالي من اشوفه تابعني

كريم ...ريحانة

باوعتله بعيون تبجي وكلت ها عمو
خزرني وكال بغضب ...مو عمج اني صرت زلمتج كولي كريم

هزيت راسي ابجي كتله اي اي بس لا تخزرني اخاف

ضليت امسح بدموعي صعدني بسيارة وخذاني تمشي بينه السيارة صاعد بالصدر ومخليني ورا
كتله بخوف واني افرك ايد بايد
...رجعني لامي اريد امي

خزرني وزمخ حيل ...امچ شنووو صرتي مرة وتصيحين امي سكتي لا احجي ويا خالچ اخلي يذبح امچ والله

ضليت اناشغ صاح حيل اشششش

خليت ايدي على حلگي حتى من البجي منعني حط بركبتي سلسلة وقيدني بظلمه

وصلني يم بيت حلو يشبه بيت ليلى من تزوجت قيس نظيف نزل طبگ السيارة ونزل يمشي كدامي اشرلي وكال لحگيني

مشيت ورا دخلنا للبيت ارجف واباوع بالوجوه شفت مرية كاعدة على الدرج تبجي من دخلت كامت كلتله بكل غضب
...هاا جبت مرتك واجيت سويتها وتزوجت علي وكسرتني وكسرت جهالك

كاللها بكل غضب ...سدي حلگچ شسويتلج وكسرتج هي مرة تكعد تاكلين حالج حالها وتنامين حالج حالها اعدل بيناتچن ، تعبت سمية اريد ولد يشيل اسمي

ضربت ظهر ايدها بباطن ايدها الثانيه و وكف متخصرة
...من هسة اعدل واعدل وبعدين من تحطلك ولد تاخذك وما يضل النه منك غير المشاكل وتصيح وراي ام البنات

باوعتلي بخزرة ورجع باوعتله ...ولا تگلي عدها بت وجايبها تعيش هم ويانه تزيد نفرات البيت ماكافي عندك 6 بنات تصرف عليهن جبت السابعة ويا مرتك الجديدة

باوعلي ورجع باوعلها بنص عين ...هاي البنية مرتي خذيتها بت اخت صاحبي

هي سمعته كال هيج و لو هيه ضلت تصرخ وتلطم على روحها
...عزة العزاك كريم هااي اصغر من هبيه ورواء هاي طفلة الله اكبببررر ما مصدكين طلعلها شوية جسم ركضتو عليها شكد عمررهااا هاااي

كريم بدون نفس ... 11 وغاسلة كافي بالغة

ضلت تضرب بروحها وتصرخ
سمية ...بالغة شنو عجل هيه بالبلوغ لو بالجسم هاااي طفله حرام ما تكدر اذا تنام وياها يتمزق رحمها تمووت تموت شتكول لربك عمي دعوفها اجيبلك وحدة عشرين وفوگ وهاي رجعها

باوعلها ما عاجبة ...لا صدك تحجين ذبيت فلوس بكد راسج مهرها
سمية ...مهريش جايبها بطرك الدشداشة اسمع كريم والله ما اخليك تتقرب لهاي البت شنو تريد تموتها

اجت اخذتني من ايدي ...اذا كاتلك المهر عمي عوفها تكبر شوية يشد جسمها وتصير جاهزة عود نام وياها وخلف محد يگلك لا
شنو ما بگلبك رحمة من شفتها اصغر من بناتك الكبار ما اهتز شاربك ما شالتك غيرتك

كريم ...لا تلوصين
سمية ...لا والله الوص ونص واطلع منا واشهرك واخزيك وابلغ عليك افضح سوالفك كلهن خليني بالعتها وساكته لخاطر هذني السته البركبتي

نتر ايدي منها وكال ...لا عوفيها تصعد لغرفتها
جرتني حيل خازرته ...والرسول محمد اصرخ والم عليك العشيرة اگللهم من تالي وكت ابو هبيه تخبل جايب بت عمرها 11 يريد ياخذها

بجيت وحجيت بخوف ...عمري مو 11 عشرة ونص

المرية عصبت ضلت تعارك رجلها عرفت من كلامها هيه مثل نسومة عدها ناس تعرفهم زينين اهلها يصيرون ورجلها يخاف منهم وهي سامحتله يتزوج علمود الولد عنده بس بنات

اخذتني دخلتني لغرفه بيها بنات نايمات نومتني يمهن وكالت
...ضلي يمهن من يصيحلج كريم لا تطلعين ولا توكفين يمه ولا تحجين ويا يأذيج ترى العلي حذرتج مو تسوين شي من وراي مايرحمج وتتعورين مالي علاقة اني

هزيت راسي وضليت يم البنات نايمات غلبني النعاس ونمت غفيت من كعدت الدنيا صبح والبنات يركضن يشيلن فراشهن ويضحكن الا ثنين واكفات على صفحة يباوعلي بعيون مدمعه ويتشاورن

شفتهن يشيلن فراشهن شلت فراشي كوة ما اعرف وهنه صافنات علي طبت امهن سمية كالت
تعاي خاله طلعتلج ملابس من البنات طبي سبحي ولبسيهن

انطتني الملابس و وصلتني للحمام سبحت وغسلت هدومي بالطشت ما اعرف وطلعت كتلها غسلت هدومي خاله وين اشرهن
كالت عوفيهن واخذتني كعدتني يم بناتها كلتلهن

سمية ...هاي ريحانة من قرايبي جاية تعيش يمنه ديرن بالجن عليهن اعتبرنها اختجن اهلها مسافرين من يرجعون ياخذونها

هنه فرحن وضلن يباوعلي ويحجن وياي ثنين كبار اكبر. مني يباوعلي مقهورات ويرجعن يباوعن لامهن وثنين اعمارهن تطلع وحدة 12 و وحدة 10
وثنين صغار يمكن توم لان نفس الشكل ومبينات نفس العمر يطلع عمرهن بالـ7

تريگت وضليت كاعدة مكرفصة كلتلي وحدة ...نلعب؟
هزيت راسي لا ...اريد ماما ودوني لماما

سمية باوعتلي بعيون مدمعة وكالت ...بعدين نروحلها هبية مشطي الها

اجت بنيه من الكبار مشطت شعري وظفرته الي
ضليت بس ابجي ع امي ويكللي بعدين تجي
للعصر اجة الرجال كريم شردت كعدت يم بناته حجة ويا مرته وصعد لغرفته جان ضايج وهيه ضايجة

وبعد ضليت ما اشوفه ويومية يكلولي بعدين تجي امج والايام مرت اليوم صار يومين والاسبوع صار شهر والشهر صار 5 اشهر واني على وضعي كاعدة ويا البنات وخالة سمية تداريني ومن اسألها على امي تگول امج زينه سافرت بعدين تجي وتاخذچ

وحتى الخطار من يجون تكللهم هاي قرابتنا ضاله يمنه وراحت لاهلها مرة عافت البنات يمي وبسرعة رجعت تخاف علي من كريم رجلها

طلعت من الحمام شفته واكف ضل يباوعلي كصني كص ركضت للغرفه خايفه دخل وراي غطة بناته اني غطيت راسي وضليت ارجف وصل يمي مد ايده من جوة الغطه يتحسس رجلي جسمي كله يرجف بس صوت شهگاتي يطلع واني مسوية روحي نايمة حسبالي مصدكني غافية

كال بصوت ناصي ...ادري بيج كاعدة تعاي برة احجي وياج واخذج الامج حور تنتظرچ

ضليت كاتمة انفاسي ومغمضة بقوة خالة سمية گالت لا تصدكين بي ابد ولا تامنين بي

سمعت الباب انفتح واجة صوت سمية يرجف بغضب ...طفلة عوفها واطلع انتظرها تكبر وسوي التريده حرام عليك هسة عقلك قافل على هاي الطفلة

كام نتر بصوت ناصي ...طفلة شنو ما شايفتها شكبرها الطول والجسم كافي عمرها صار 11 واني صبرت بما فيه الكفاية اريد ولد

سمية ...اخذ غيرها واذا كاتلك المهر ذهبي كله الك اخذه مهر عرس بي بس عوف هاي الطفلة
شوفهااا طلعت حتى اصغر من مسرة ماعندك رحمة

طلعو برة يحجون وصوتهم عالي يكللها مو مثلهن شوفيها هاي جسمها جسم مرة
نترت ...هيه مو بالجسم ومنيلها المكرودة الله اكبر ما تصدكون تشوف البنيه كبرت معالمها كلتو جسم ومرة يا جسم ياا جسم منيلها والله بكد بناتك

ضل ساكت كلتله ...ابن اخوي لطيف يريد سرور حاجاني طلبها مني

نتر ...كل عقلج
...اي كل عقلي شبيها سرور عمرها صار 13 كبرت وعدها جسم نفس ريحانة

نتر ...لا تخبليني بهذا الليل
سمية ...لا اخبلك ولا تخبلني البنية كبرت وعدها جسم شنو المانع على الاقل ابن اخوي عمره 28 مو مثلك 36 وتريد وحده عمرها 11

ضل يصيح ويكفر كلتله شو ع ريحانة تصيح مرة حط روحك بمكان اهل الطفلة هاي التريد تاخذها مثل ما لابت روحك على بنيتك امها هسه هم لايبة روحها على بنيتها

كريم ... عمي ارجعها باجر
سمية ...رجلي على رجلك اشوف جنسية امها وبأيدي احطها بايدها ما اثق بيك انته ماعندك ضمير

ضل يصيح وشوية وسكتت الاصوات ، ورا يومين سمعته يكللها حللي اذا طلعتي حامل انتظر اشوف شنو بيج اذا طلع ولد اعوف هاي البنية

هيه فرحت اخذها وراحو للتحليل وبناتها يدعن هبة ورواء يعرفن اني زوجة ابوهن بس مقهورات عليه يعاملني مثل اختهن

رجعت امهن ضايجة وابوهن ينتر عرفت ماكو حمل والبيت صار نار يومين يرفس ويعارك ذبان وجهة

طلب مني اوديله جاي جان حار وطاح مني انكسر لكلاص كام علي لزمني شبعني كتل سمية تريد تفكه مني ماتكدر وبناتها يبجن ويصرخن

طلعتني من جوة ايده زرگه و وجهي كله اثار ضرب واخذتني انطتني لهبة وراحت تتعارك ويا وشالت السماعة تخابر تشكي منه لاختها الجبيرة الظاهر حاجية الها عني
اسمعها تگللها ...يريد ياخذها واني من اشوفها تنمرد روحي طفله وين تتحمل اكله لو تاخذ غيرها لو تصبرلك بعد ماكو

سكتت ورجعت تكول ...وين هيه بكل الاحوال طفلة توها صارت 11 سنة شيصبره لحد ماتوصل 15 على الاقل شوية يقوة عودها ماكو عيونه تتلاصف عليها شكد كرهته كاسرات ظهري البنات والله جان تطلكت ولعنت خيره

سدت السماعة ضليت ابجي هبة كعدت يمي تلم شعري مكفوش وكالت
...اذا راد جاي بعد اني اخذه اله

هزيت راسي ابجي واشهك ...اريد امي اخذوني لأمي

وهنه يبجن وياي كلهن نومني واسمع الصغيرة طلعت تركض تكول لامها ماما خطية اخذوها الامها تا تبجي عليها هواي

ضلت امها تحجي وياها واني من كثر البجي خدرت روحي وغفيت منومة وياي دمعتي على خدي

جبران ...

في غرفة الضابط

عمار ...جبران انتي صديقي العزيز واني مدين الك بحياتي والك مني وعد راح تطلع منا بريء واذا نقلو عماد ارجعه لمكانه بس ركز وياي ركز

عصرت راسي وصحت ...غير انته اتخبلت

ضرب رجلة بقبضة ايده معصب
...اگلك سهير بنت عمك مبلغة عليييك هسة لازم سهير تگول منو انطاها الكتابات وشلون وصلتهن لغرفتك بما انك متاكد وتكول سهير مو بوعيها احد يمشيها خليها تكووول تحجي

...صعبة ابوي يكول هيه ما جاي تذكر حتى اسمها جاي يعالجونها علاج روحاني حتى الدكاترة عجزو منها

زم شفايفه بغضب وكال ...وهسة شلون نكعد ننتظر مو؟
اسمعني ما راح اطولها رايح للحجي اگلله لقنها بس لقنها يجي الضابط يحجي وياها تگول العدها وهاي هيه

جبران ...يلقنها خوش حجي ونبلي منو؟ غير لازم نعرف الناطيها الكتابات ورادها تبليني

نتر ...انتي ليش هيج واثق منها؟
جبران ...ما تسووويها بارادتها انت ماتعرف سهير الزمن طيحها هيج طيحة ياريت كل النسوان مثلها

عمار ...شاك باحد؟ انطينا اسم
هزيت راسي ب لا
صفن بتفكير وگال ...بشير معارض ولحد هسة ماعلب دليل اني لو بيدي هسه اذبحه نخلي سهير تعترف ضده وتورطه هم نوگعه ومايطلع منها وهم انت وسهير تطلعون منها مثل الشعرة من العجين

جبران ...عمار انته تعرفني انه ما اورط احد اذا بشير معارض دورو ورا الكولكم دليل وسجنو لا تخلي سهير تلفق علي وتبلي يمكن يطلع بريء وكلشي متوقعه انت شكوك

عمار ...والله خبلتني اسمعني اذا ابرئك اورط سهير لان الضابط كال هيه بلغت هسة اصابع الاتهام توجهت الها ليشش لان انت كتلهم اني مهدد وخليت زملائك يشهدون
انته جاي تثبت برائتك بس بنفس الوكت جاي تتهم سهير جاي تفهمني؟
الضابط يكول ممكن تطلع سهير ويا حزب الدعوة وجاي تبلي جبران لان نقذك و عنده ولاء للنظام

...اعترف على روحي باطل وانسجن انعدم قابل بس طلع سهير منها

عمار ...مو بكيفك زمال

هز رأسه وكال برضا ...الحل يمي اني اطلعك منها بهاي الفترة القصيرة ان شاءالله انتبه خوش انتبه كلش زين خاف يطكونك ابرة يموتونك

جبران ...يضربني مرض ضلت عليها

اخذني الشرطي رجعني حطيت ايدي على راسي مستنكر كلشي. هاي سهير مايطلع منها الا كل خير من تطلكت من مشاري تسودنت

بعمري ما صدگت واحد كال مسحور لو من انجاب طاري السحورة اقتنعت بس بعد الشفته بسهير عقلي حسيته وگف وراسي شيب وصرت خايف عليها من سحر الزنا رغم السيد سوالها جلسات وحتى وصيت عادل ياخذها مايعوفها بس بعدني خايف وهيه تزيد ما تنقص ومشاكلها وعقدها وجنونها جاي يتضاعف

ضليت يومين .. يوم الثالث اجاني خبر تبرئت من التهمة هاي وطلعت اجو اخذوني عمار وعماد وابوي فرحانين بطلعتي وماكو على بالي غير سؤال واحد
عمار شلون طلعني بدون ما يورط سهير

وصلنا للبيت تلكتني امي تطش جكليت حضنتني تبوس بيه دخلت للبيت وسط هلاهل خالاتي عبالك عدهن عرس مو جاي من المركز

اسلم عليهن وعيني تدور عليها بوسطهن

عمار ...جبررران تعال

مشيت اله فورا لزمني من زندي وشاورني ...محد يعرف سهير مبلغة غيرنا اني وابوك وعماد لا تحجي شي

هزيت راسي ومشيت دخلت جوة المطبخ لكيت هبة مرت عادل تصب عصير وبس شافتني هلهلت
هبة ...الحمدلله على سلامتك جبران
جبران ...الله يسلمك
طبت هدير للمطبخ ما عاجبها حتى ما كالت الحمدلله على السلامة

باوعت لهبة بتساؤول اختفت ضحكتها
جبران ...ها شكوو

هبة ...اذا عيونك تسأل على شيهانتك ما راح يسرك جوابي ، الشيهانة تعبانه ويمكن تخبلت وفقدت ذاكرتها

خنجر انغرز بنص گلبي بهت وجهي واحتقنت كملت على كلامها
اذا تريد تشوفها بالغرفة موجودة بس حالها راح يأذيك الزم روحك وقوي گلبك من تروحلها

درت وجهي مشيت بهمة لساني يكول لالا لا سهير مابيها شي وكلبي ينمرد دكيت الباب بهدوء وفتحته باوعت بأتجاها وعيوني صارن بهامتي اشوفها تباوع للباب بعيون مقهورة وكلها دموع وجها مشوه كله جروح ورابطين ايدها بالجرباية

من شافتني ضحكت وگالت بصوت مخنوگ وكله ضياع
...اجيت يا بعد روحي

ضعفت من نظراتها وحجاياتها حتى غضبي اختفه طبيت بهمة افتح بأيدها واحجي وياها اطمنها واهز براسي
جبران ...يا اجيتچ اجيتچ لا تبجين ولج شگايلج انه ليش تبجين والله اشلع عيونج

مسحت دموعها بأبهاماتي اضعف من اشوف وضعها هذا كلبي يتكطع وعيوني تصير نار
حطت ايديها على وجهي تباوعلي وعيونها تجري
وتكرر ...اجيت جبران رجعت يا بعد روحي روحك رجعت يا عين عيني

ضحكت وهزيت راسي مقهور ...اي رجعت يا عين عيني انتي

منو مسوي بيج هيج منو مضوجج احجيلي

هزت راسها مقهورة مبرطمة ...ماادري مااعرفهم زلم ثنين يصلخون جلدي يومية يأذوني

حضنت راسها لصدري ضلت تبجي بحركة والم شددت حضنتها وروحي تفور
همست اطمنها ...طلعت بعد ما اهدچ ابد واخذج للجلسات مال السيد حتى تتعالجين وتردين احسن من قبل

هزت راسها وكالت بخوف ...لا تخليهم يربطوني والله بعد ما اسوي شي ولا اشيل سجينة عليهم ايدي تعورني ضلت

شلت ايدها بيها اثر حبل بستها ومسحتها بأيدي اريد الاثر يختفي واهز راسي بوعيد
جبران ...مشاري انه كتاله وكل واحد سوا بيچ هيچ اشرب من دمه

شيهانة ... ما تروح بعد؟

هزيت راسي لا .. التفتت من حسيت بحركة وراي
هبة تباوع مقهورة نترت ...ليش رابطينها تردون تموتونها طلعتو انتم مسودنينها

هبة ردت مقهورة ...لا والله ابد بس شوف شوف وجها شوف رجلها سحبت سجين حمتها وكعدت تريد تصلخ رجلها وساعه تريد تنتحر وتذبح روحها كلش طلعت عن سيطرتنا والله حتى بيتي عفته واجيت علمودها

لزمت ايدي بقوة ماتريدني اعوفها و اوخر ضليت خايف عليها سألت هبة
...اخذتوها للسيد
هزت راسها هي مرة وحدة قبل يومين وكال بعد كم يوم نرجعها مطلع سحورة جديدة

جبران ...لا؟!

هبة ...اي والله يا جبران مطلع سحورة جديدة لا حول ولا قوة الا بالله اني متاكدة مشاري يسحرلها مثل ما شايفتك بس مو وحده يسعى لدمارها ويا احد ثاني

عكدت حاجبي اشرتلها تسكت
...گومي يلا عفيه تجين وياي

هزت راسها ب اي تبجي ...بس وين؟
...يم خالاتي كعدي هنه يحبنج ويردن يسولفن وياج

هزت راسها فرحانة كامت تمشي مجلبة بساعد ايدي خايفه وخرت شعرها خليته ورا اذانها من شافوها طلعت كلهم باوعولها بنظرة شفقة تكطعت روحي
كامت امي كلتلها تعالي يمي

كعدتها يمها وهمستلي ...خاف تعور روحها
جبران ...الحساب بعدين اكسر البيت على راس الرابطها اليوم
علياء ...يااا

عفتهم وطلعت يم عمار والناس الجاية تتحمدلي على سلامتي

سألت عمار شسويت وطلعتني
لزمني من كتفي ودارني تمشينه مسافة بالحديقة وگال
...اجيت حجيت ويا كل اهلك بحجة تحقيق وكل بشر وحده ، واكثر شي ويا سهير لقنتها خليتها تكول بشير انطاني الكتابات حتى اورط جبران لان راد يقتلني وانته انقذتني
فكيت عيني طبطب ع كتفي وكمل ...واعترف بشير بس لزمنا هددناه واعترف بكل نشاطاته وجرائمه لا تخاف ماطلع بريئ حتى ناس ابرياء قاتل

جبران ...متأكد؟ قلصت عيوني بشك
عمار ...وروح خالتي الحلوة

جبران ...وسالفة سهير اكيد ينكرها لانه ماله شغل بيها
عمار ...نكر هواي سوالف مسويهن صدگ مو بس هاي المامسويها مو مشكلة اني قمت بكل شي ضروري وطلعتك منها وما خليت شي يوصل لسهير وهم سهير حالتها تشفع الها

باوعلي كال ...لا يأنبك ضميرك والله طلع مجرم تريد اخذك اله بنفسك تتأكد منه

هزيت راسي لا لان اعرف عمار متأكد بشير ورا محاولة اغتياله وما راح يعوفه وبشير كذلك واضح علي ينتمي لاحزاب معارضة والكاع تصيح منه الغوث سوالفه بالضيم
الحجيت والسكتت بكل الاحوال ماراح يتغير شي

الشي القهرني استخدم سهير كورقة رابحة لمصلحته واستغل وضعها وخلاها تكول شي مو صحيح
صفنت شوية بتفكير ورجعت باوعت لعمار
...منو يكول انته مجرد لقنتها يمكن صدك بشير واصل الها وناطيها الكتابات صدك

عمار ...عندي هيج شك لان انته هواي تهددت
جبران ...وسهير تطلع دائما ما استبعد يكون وصل الها واستغل وضعها وخلاها تسوي هيج

عمار ...كتلك بشير ثعلب ماتصدكني المهم انته مالك شغل بهاي السوالف واني رجال تعبان وياك من الصبح رايح لبيتي ارتاح
...ماقصرت مشكور مردودة ان شاءالله
...لا هذا واجبي نسيت اني مدين الك بروحي جبران انته انقذتني من موت محتم

سلم وراح .. طبيت للبيت لكيتها متمددة ع القنفة راسها بحضن امي وماكو غير اهل البيت كلهم طشو
جبران ...منو رابطها؟

علياء ...اشش لا تهوس فوگ روسنا غير رادت تنتحر لو ما رابطين ايدها كان هسة احنه كاعدين بعزائها

رفست القنفة شياطين الدنيا ضلت تفتر فوگ راسي
...تربطوووونها؟ اشيييل السجاجين واراااقبها اداريهاا اخليها يمي مثل الظل ما اهدها موووو ربط انتم سودنتوها بالزايد

باوعتلي خايفة امي نترت ...احترم روحك وبعدين خوفت البنية بعدين نتفاهم

حميد ...تعال للاستقبال اشرحلك وضعها وبذيج الساعة كول انتم سودنتوها

مشيت ويا مفرفر كلبي شرحلي حالتها عرفت مسويلها اسحار جديدة وصارت بهذا الوضع الصعب واكثر من مرة رادت تنتحر وربطها هو الحل لو ما رابطينها جا هسة ميته
بداخلي افور ما اكدر اعذرهم جانت مربوطة بطريقة مهينة ما اقبلها عليها بس سكتت وبلعتها

كلت دام طلعت راح اهتم بيها انه وما اخليها عليهم حتى مايسوون بيها هيج مرة ثانية

ورا فترة من طلعتي اخذناها للسيد وتخربطت كلش شلتها طلعتها للسيارة
من رجعنا لبغداد ابوي ضل يفتر ويحجي ويا امي يتهامسون اخير شي دز علي

طبيت يمهم للاستقبال لكيتهم كاعدين صفة من كعدت كبالهم ابوي گال
...بنية عمك الحمدلله جاي تتشافى يوم ورا يوم ترجع احسن من الاول السيد گال ماعليها شي

هزيت راسي اي ...خوش حچي

باوع لامي وفر سبحته على ايده امي كملت
...البنية محتاجتك كلش احنه مانكدر الها وهيه هم تريدك اني وابوك گلنا يعني لو ... تعقد عليها بس علمود حلال تلزمها تشيلها تساعدها والله اني ونزهة مانكدر اذا اجتها الحالة تتخبل كلش

فكيت حلگي رفعت طرف حاجبي ما عاجبني
...وتردوني استغل حالها و وضعها واعقد؟

حميد ...مو استغلال بوية بس انته وصلت لمرحلة تطب لغرفتها تنام مناطرها وتشيلها وتشبكها من تفقد مايجوز هيج
جبران ...مررريضة
حميد ...ميخالف يا بوية مريضة صاحية هوا يضل تلامس وتنام بالغرفة كلشي يصير الشيطان شاطر

عقدت حاجبي وكمت معصب ...ترة الباب مفتوح ومخدتي حاطها بالباب علمودها انه شمسوي يمها واصللها

حميد ...ندري بس احنه نريدك تعقد دام هيه هسة شوية بدت تتحسن وتسمع بس منك وتقبل باليجي منك

علياء ...لمصلحتها ومصلحتك من تصير زينه اذا رفضت افسخ العقد هاي هيه وذيج هيه المن مصعبها والله اني اضمنها الك من تعرف كلشي صار راح تتشكر منك ولا تگول استغليتني ولا تكول شي

حميد ...اي والله يا بوية وانه خايف ولايبه روحي من شي ما حجيت بي بس هسة رايح احجي وبكيفك بعد

عقدت حاجبي وقلصت عيوني انتظره يحجي باوع لامي متوتر ورجع ذب الحجي بسرعة

حميد ...صار مرتين المح زلمة جنه مشاري ياخوفي يطلع مشاري ويخبلها ويرجع يغسل دماغها بسحورته وشره وترجعله

جبران ...تريد تقنعني لا تسلك هاي الدروب حجي
حميد ...لا يبا وروح عمك احجي صدك

هزيت راسي ، صفنت بتفكير الف فكرة اجت براسي باوعت لابوي كال
...استر علينا واربطها بيك بعقد والله السالفة تخوف

جبران ...خاف باطل العقد
حميد ...نستشرع .. للضرورة احكام وياما ناس حتى بدون عقل يتزوجون

جبران ...وين شفت مشاري؟ وين لمحته بله سولفلي

حميد ...مرة شفته براس الفرع بسيارة قديمه ملثم ضل يعاين علي مبين ذاك هو مشاري من عيونه
ونوبة ثانية لمحته بالسوگ كبل يومين

هزيت راسي رديت ...هاي هيه دام السالفة بيها مشاري يعني لا بد من هذا العقد حتى اكضها انه وما اخليها ترجعله لأي سبب كان مو علمود شي ثاني

حميد ...على بركة الله باجر احجي وياها قنعها انته ونجيب الشيخ ويعقد الكم

كمت ...سهلة سهلة رايح لبيت عادل

علياء ...شعندك؟
جبران ...شغلة يمة شغلة

طلعت من بيتنا دكيت باب بيت عادل طلعت هبة تركض فتحته كتلها مساج الله بالخير
هبة ...مساء الخيرات الحمدلله على سلامتكم
جبران ...الله يسلمج جايج انه عندي شوية حجي وياج عادل موجود؟

هبة ...لا ادخل نكعد بالحديقة يم هداوي جاي تلعب

هزيت راسي ودخلت بست هدى وكعدت بالگاع ردت الباب بدون ماتقفله واجت كعدت مسافة عني
هبة ...گول جبران مبين بحلگك حجي هواي

جبران ...راح اتخبل هبة ابوي شايف مشاري بس ماريدج تحجين حتى كدام عادل ابوي ما حاجي وانه من ارجع اوصي ما يحجي راح من بالي فكري كله صار يمج

هبة ...يمي؟
جبران ...اي ماكو غيرچ يحجيلي كلشي اريد اعرف شنو لاحظتي على هدير هدير مو غيرها هم اجت يم اختها كعدت وياها حجت وياها

هبة ...اووو سوت روحها حنينة عليها حتى مرات توكلها وتكول لعمتي انتم خبلتوها ويتعاركن

ضربت رجلي بقبضة ايدي ...هنا مربط الفرس
هبة ...مافهمت
جبران ...هدير تتعاون ويا مشاري ضد سهير

هبة ...يااا النوب
جبران ...والله شكيت من كلتولي السيد طلع سحورة جديدة ومن خذيناها حجة وياي كالي خليها على ايدين محددة كتله شلون
كال لا تاكل وتشرب ولا تلبس الا من ايدين امينه شوف منو تثق بي خلي يتقرب والماعندك ثقة بي بعده كل البعد عنها

كلت احجي وياج باجر بس بعد ما سولفت ويا ابوي توة كلت لا بد اجيج ونحجي

هبة ...ياااا عود تحطلها سحورة وتمرض بيها

هزيت راسي اي رديت بحدة ....مشاري اذا ما كتلته ازين شاربي ، واخلي يحفر گبره بأيده

هبة ...والله بلوة زين شلون هدير بالبيت تكدر توصلها بأي وقت
جبران ...راح اعقد عليها وبعد اشوف منو يوصلها

ضحكت وهزت راسها ...اجتلك للحلگ باردة مبردة

جبران ...لا انه علمودها وعلمود راحتها مو غير شي

ضحكت وغمزتلي ضلت تضحك خزرتها سكتت لامه ضحكتها گوة

رجعت للبيت حطيت مخدتي يم الباب وتمددت نايمة هية بسابع نومة من عطست فزت مخترعة تبجي
كتلها اطمنها ...هذا انه لا تخافين جبران جبران

شيهانة ...عبالي الزلم اجو
جبران ...لا راحو شحده ليوصل حذاچ اكطعه تكطع

مسحت وجها وتمددت ...جيبلي ماي عطشانة

باوعتلها هسة هاي مو مال اكضها اطك راسها بالحايط بس وكف بعيني حالها

كمت صبيت الها ماي وشربت باوعت لفراشي وكالت
...انته ما تستحي حاط فراشك بالباب شكد ساقط

هزيت راسي ...انعم الله عليچ

شيهانة ...روح اني اخاف تنام يمي خاف تتحرش بيه لو تنزعني هدومي

عقدت حاجبي احتقنت ...راح تنكتلين

...مو بكيفك تكتلني اخلي عمي يزين شاربك

...انه ازينه ما اتاني

شربت ماي هواي كتلها كافي خلت الماي بحلگها ما تقبل تبلعه تهز براسها لا وحلكها كله ماي
خزرتها ...بلعي لا اهفچ طراگ اخلي يطلع من خشمچ
ضحكت وبزته بوجهي غمضت عيني ومسحت وجهي بأيدي استغفرت ربي وهمست يا صبر ايوب

شمرت الكلاص علي شمر ونامت
....غطيني

اجيت اغطيها ايدي طخت رجلها رفست ايدي تصيح
...ما تستحي تكضكض بيه وتتلمس والله فاسد الا اكول لعمي يزين شاربك

جبران ...والعباس انه راح ازينه بس سكتي

رجعت نامت رحت للباب تمددت مخلي مخدتي بالباب رفعت راسها وكعدت على حيلها صافنة علي
طولت صفنتها كلت هسة راح تصرخ وتفضحنا
كالت ...غنيلي
جبران ...وما تردين اشد وصلة وارگصلچ وافر شعر؟
...الله اتووونس

خزرتها ...تنامين لا اگوملچ ادفنچ وما اخليهم يلگولچ أثر ناممييي

ضلت كاعدة شوية وحجت مبين من صوتها تبجي
...چا شبيك تصيح علي گوم روح شعندك نايم هنا تريد تغتصبني وتتحرش بيه

مسحت وجهي وگمت وكفت كبالها
...اكلچ خلينا نعقد علمود اغنيلچ وارگصلچ وما يصير عليه أثم

شيهانة ...شنو نعقد اتفاق
جبران ...لا عقد زواج علمود اصير حلالچ وارگصلچ واغني وتتونسين

شيهانة ...چا مايصير تركصلي هيچ الا اصير مرتك؟
جبران ...اي چا حرام عليه اثم تشوفين مفاتني وانه اتمايل

شيهانة ...چا خوش قابلة ويومية تغنيلي وتركصلي
جبران ...سهلة هاي مو تغيرين رأيچ خووش؟

هزت راسها لا كالت يلا عقدنا اركص وغني
غميت روحي ...لا ولج الا الشيخ يجي ويحجي وياج وتكليله قابله وهيج تصيرين مرتي وانه رجلج
باجر اجيبلج الشيخ العصر

هزت راسها وشمرت الغطا بعيد ، تمددت
...غطيني

غطيتها انطتني ظهرها ونامت ، وانه جريت مخدتي خليتها برة ع القنفة ونمت كعدت صليت وسويت ريوگ تريگت وصعدت بدلت هدومي نزلت لكيت ابوي كاعد كتله بوية العصر جيب الشيخ يعقد النه لا تنسى
حميد ...حجيت وياها؟
جبران ...اي قنعت والله كريم

رحت داومت وبالي كله يمها كل شوية تفتر الدنيا بعيني اغطي عيني احسها بدت تعمي
كملت ساعات العمل بشق الانفس ، طلعت للسيارة امشي بهمة هم ياله اوصل اسبح واجهز روحي للعقد
نرسم على وجهي طيف ابتسامة واني اتذكر سوالفها البارحة احسها هاي علامات الشفاء احسن ما تصرخ وتريد تذبح روحها

لكيت على سيارتي ورقة شلتها فتحتها بيها تهديد صريح باوعت بالمكان اكو ناس هواي شي طالعين وشي هسة جايين
شمرت الورقة ودستها برجلي وصعدت رجعت للبيت بدون ما اهتم كلت احجي ويا عمار انطي خبر وهاي هيه

وصلت للبيت جاي انزع حذائي واسمع نزهة تكول لامي هذا ماي السيد لازم تستمر تسبح بي دخلي وياج
علياء ...تريد تسبح وحدها خلي نترس الطاسة ونخليلها ماي منه

دخلت لكيتهن مطلعات بخورات السيد والماي

امي بخرت وخلن ماي لسهير بالحمام حتى تسبح ، باوعتلهم متحضرين وابوي لابس دشداشته وكاعد وعادل متحضر وهبة كاشخة
ضحكت وهزيت ايدي ، اريد اصعد طلعت سهير من الغرفة كاضة هدومها وشعرها مكوش كلش باوعتلهم بعدم اهتمام وباوعتلي

عقدت حاجبها ونترت ...وغسل شبيك تتمضحك شايف فزاعة

لميت ضحكتي وكتلها ...لا عذريني بس من شدة جمالي

هبة عضت صبعها وكالت ...لج عيب انتي عروس

باوعت لهبة وكالت ...اي ادري جبران گلي نعقد علمود يركصلي ويغني وماعلي اثم

ضحكو كلهم بصوت عالي اريد اسكتها ماكو كلتلهم
...ليش تضحكون والله البارحة ماقبل يركصلي كال نعقد يلا اركصلچ بالحلال

هزيت ايدي اضحك وصعدت والله شافطة فد نوب بس اهون من الصريخ والاجرام

سبحت وبدلت نزلت كعدت يم ابوي وعادل بالاستقبال شوية واجانة الشيخ امي جابت سهير واجت كعدت عاقلة ولا كأنها نفسها ام التجفيص بس وجها كله اثار كد ما مأذية روحها

وعقد النا الشيخ وصارت سهير مرتي ...

.....

ليلى ...حياتي استقرت واموري مشت تمام
بس خالتي امرها غريب ماتقبل اتصل عليها هواي ولا تقبل اروحلها وهيه مرة وحدة اجتلي لبيت عيالي سلمت وكعدت ساعة وراحت للبيت ضليت محتارة وراها وافكر ليش هيج اتصرف كلت يمكن محملتني مسؤولية انتحار صهيب وزعلانات مني عفتهن براحتهن اني شنو ذنبي ما صدگت استقر وارتاح بحياتي

بدأ دوام الجامعة بدلت الصبح ولبست عبايتي ونزلت طلع قيس يمشي كدامي تلاكينا ويا عمي صبحنا علي هز راسه لقيس ورد علي
باوعت لقيس مقهورة بعده لليوم يدفع الثمن وابو زعلان منه وهذا الشي يعذب قيس بس يكابر وما يحجي

وگفت گباله بكل حشمتي وكتله ...عمو اريد احجي وياك كم كلمة

هز راسه قيس كال رايح اشغل السيارة
تنهد باوعلي مقهور وبعينه تساؤولات ما يعرف شنو اريد مني عمي

عمي كعد وكال ...يالله العمر حوبته حوبة
باوعلي وكال ها عمي شعندج وياي خير ان شاءالله؟

هزيت راسي ولميت عبايتي من يم صدري لافة روحي بيها
ليلى ...عمو اليوم اول يوم اطلع بي من بيتك للجامعة واني اعرف انته حتى ولدك مانعهم وما قابللهم يدخلون جامعات ف شوية خايفة تكون ما راضي علي
والله اذا ما راضي حتى الجامعة اعوفها

باوعلي وابتسم برضا ...لا ابد روحي ودرسي وتخرجي حققي حلم ابوج ومن تتخرجين اخذي شهادتج وروحي زوري وخلي يعرف انتي سباعية وگدها

ضحكت ...وانتَ هم ابوي ، راضي؟

هز راسه ...راضي يابة راضي شعندي وياج وما ارضا ما تگليلي روحي لا تتاخرين قيس ينتظرج

ليلى ...مشكور عمي نصيت بست ايده وطرت بسرعة لقيس اضحك صعدت يمه باوعلي بنص عينه وكال
...وياج شحلاته و وياي جهنم

ليلى ...شتسوي حبيبي مشيها عمتي كالت يجي يوم ويرضا على قيس
قيس ...الله كريم

ليلى ...بعد عيني اتعبك الطريق طويل
قيس ...اذا ما اتعبلج المن اتعب

ليلى ...رحم الله والديك

ضحك باوعتله مستغربة ...صرتي كلشش قبل مخلصتها يمي تتمايعين وحبيبي وقيسسس تمطين بالحجاية هسة اقوى شي عندج رحم الله والديك

ضحكت وغطيت شفايفي خجلانة
مد ايده لزم كف ايدي المخليته ع رجلي وهمس
...يا فرحتي بيچ ، الحشمة زادتچ وقار ورونق وانطتج هيبة لو تدرين عمي عبد الصمد ذاك اليوم شنو يگلي؟
يگلي من طلعت مرتك صلاوات على محمد هيبتها تصفن اكبر واحد شخصية واخلاق عينها ما تشيلها

ليلى ...انتَ سويتني هيج
قيس ...مو اني سويتج ليلى انتي جنتي رايده تتغيرين بس تنتظرين واحد يمدلچ حبل النجاة والله خلاني بطريقج وخلاج بطريقي
وصرتي ليلاي

ابتسمت شعور عندي غريب فرح وقبطة احس عيوني تطلع منها دموع باردة ، ضل لازم ايدي لحد ما وصلني للجامعة وراح

دخلت امشي للقسم مريت من يم شباب ثنين وياي واحد منهم ضحك وگال لصديقه
...سبحان مغير الاحوال من حال الى حال
...غير خذت سيد قيس بس خوش يختار والله ، و هنياله

سلمت على دلال بوستها وكعدت يمها عاتبتني لان ما رحتلها بعد ورا موت خالها خليت الحجة بقيس كتلها مايقبل
وهو لو كايلتله جان تخبل علي ماتدري خالها قبل لا يموت شنو سوا

جانت ضايجة باوعتلها وكتلها بحسرة
...اريد اكلج شي دلال
دلال ...اني هم عندي شي

خفت تكون عرفت خالها جان يحبني واني سببتله بعض المشاكل تنهدت وكتلها احجي انتي
هزت راسها لا
دلال ...سالفتي طويلة احجي بالاول

هزيت راسي وباوعت محد كتلها ...راح اعوف الحزب دلال اريد احجي ويا استاذ فاروق

كامت من مكانها بصدمة ...والله هاي سالفتي هم
عقدت حاجبي ...ليش؟ اني علمود رجلي وعيالي والله لو ما احب قيس جان تلكيني مستمرة وبدون زواج لان روحي ما تهمني بس قيس مااكدر اعوفه وهوا عندي اهم من هاي السالفة

دلال ...يحيى خطبني
شهكت ...الحلو المعجبة بي
دلال. ..اي حبينه بعض وخطبني من خطبني صارحته بموضوع الحزب ضحك علي وكال انتي وغيرج درج يصعدون علي حتى يوصلون لمبتغاهم ويتنصبون حكام على ظهوركم

گال ماكو واحد يصير تحت قبة الحكم بريئ وشريف وايده ما ملطخة بدماء هواي ناس ظمنهم ناس ابرياء

هواي حجي ليلى اكتشفت كلامه صحيح ، ولاحظت شوية شوية جاي يجرونه لاشياء كبيرة وبعدين يمكن توصل بيهم يورطونا ويا ناس كبار ونخسر كلشي اني هم راح اعوف كل شي

ضحكت باستهزاء ...ليش كل ظنج يعوفونا بكل سهولة
دلال ...ما اعرف ورطنا نفسنا ويا ناس ماكان لازم حتى نحجي وياهم بالله اريد اشوفهم من يوصلون ويلزمونها هم ينفذون وعودهم لو يطلع كله كلام فارغ

ليلى ...شوفي اني وجهة نظري تختلف ومؤيدة الهم عكسج انتي بالله يحيى مقنعج ، كل هذا ما يهمني المهم النتيجة الي نريدها وحدة

صارلي ايام افكر وببالي خطة اذا تاخذيني الاستاذ فاروق اعتقد راح تنجح

دلال ...شنو هيه
شرحت الها كل شي ايدتني وكالت نمشي للمستشفى ونحجي ويا

هزيت راسي موافقة اريد ادك الحديد وهوا حامي لان الخوف موتني حتى بعد ما تضل عندي سالفة تخوفني غير سالفة خالتي وما احسها ذيج الاهمية لان خالتي كالت من يعرفون شغلي كولي قبل الزواج مو هيج وطلعي منها واني هم صار مرجعي العمامي يعني الوضع زين وامان

رحناله طلبنا نحجي ويا واخذنا لغرفته ، حجيت ويا اني كتله شوف استاذ بصراحة انتمائي للحزب راح يدمر عائلتي واني اريد اعوف كل شي ودلال كذلك
احنه نريد ننهيها

ضل يسأل اذا احد من البعث وصل النه لو لا
كتله ...ابد ولا احد شك بينا ولا شي كلشي تمام بس احنه نريد نعيش براحة بالنا

ضحك تك خد وكال ...يا راحة وينها الراحة بهذا الوضع
ليلى ...احنه نرتاح من نبتعد عن الخطر استاذ

هز راسه ...هاي هيه الله وياجن

ضحكت تك خد ورجعت باوعتله ...انتم هسة راح تشوفونه خطر احنه نعرف وفاهمينكم استاذ
رفع حاجبه كملت. ..تذكر مرة كتلي انتي ذكية وسباعية وتكدرين تدمرين كلشي وتبنين بنفس الوكت

عقد حاجبه مستغرب
ليلى ...اني بأيدي راح ادمر مجموعتكم التبدي من العقيد جليل وتنتهي بأصغر عضو بالحزب ، مجموعتكم المسمينها الثورة انهيها وادمرها من اتأذة اني لو يتأذة اي واحد يخصني ونفس الحجي عن دلال

اني نقلت معلوماتكم بأخر سفرة الي لصديقة لو تدورون بعد سنين ماراح توصلون الها لان كنت ادري بروحي راح اطلع ومحسبة حساب لهاي الخطوة
كل معلوماتكم واسمائكم واماكن اجتماعاتكم صارن يمها تنلمس شعرة مني ورا ساعات يسوون بيكم مقابر جماعية

ضرب الميز بغضب ونتر ...تهددين؟

هزيت راسي وكملت بهدوء ...لا ما اهدد واني لليوم وياكم مو ضدكم بس اعرف انتم راح تشوفوني خطر ويمكن هسة عبالكم اني ودلال خاينات وراح تسعون حتى تدمرونا وتشيلونه من طريقكم
بس اني سبقتكم وخططت لكل شي

دلال ...كل النريده تعتبرون نفسكم متعرفون دلال وليلى

ليلى ...بالمقابل تضلون تمارسون نشاطاتكم بسلام وسرية بس اذا حبيتو تلون ذراعي اكصها واحطها بأيدك استاذ بس مو هنا لا بالسجن ويمكن على منصة الاعدام

فرك وجها وكام يفتر ...شنو يضمن سكوتچن او ماراح تسون شي يضر بالحزب
ليلى ...ابتعادكم عنا وعدم التعرض النه او للناس الي يخصونا وبس ماعدنا شي زايد

كامت دلال ...اتوقع هيج فهم الاستاذ يلا ليلى مانريد نجيب الشكوك النه لو للاستاذ

ليلى ...امشي يلا

كمت صرت مواجها ويا وجه بوجه يباوعلي بعتب وندم
گتله واني ابتسم ...فرصة سعيدة استاذ

هز راسه ورجع كعد عفناه وطلعنا من الغرفة

دلال ...حسيت روحي طير حر
تنفست براحة وغمضت عينها

ليلى ...والله اني ارتاحيت حتى اكثر منج يمكن فضت انتهت

دلال ...نرجع للجامعة تأخرنا وخاف يحيى يحس بتأخيري

هزيت راسي ورجعنا لكينا حبيب القلب منتظرها عيونه عليها يباوعلها ومن وگف يحجي وياها هي خجلانه وتتمايل من كد الحب
وهو عيونه تلتهمها بحب
تذكرت بداياتنا اني وقيس شكد كانت حلوة والنهايات احلى

تنهدت مرتاحة وكعدت قريب منهم اباوعلهم وما حسيت غير المسلحين بزيهم الزيتوني فوگ راسي ........للحكاية بقية

رأيكم بالقصة يهمني 🖤

بنات كلكم اريدكم بقصة (القرنية)  لا تفشلوووني

هذا حساب الكاتبة ghadeer_ala_