رواية حمائم تخشى الطيران الفصل الرابع والعشرون 24 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

ليلى ... صفت اموري ومشت ويا بيت السادة تمام التمام كلشي تكوله عمتي اسوي
انزل واكعد وياها هيَ ونسوان حمويني مرات تحجي بحديث ديني حلو ونصائح حلوة والحلو بيها كل موضوع تذكره تثبت صحة كلامها بآيات واحاديث واقوال للرسول محمد ولـ آل البيت عليهم السلام

كانت تتحدث بهذا اليوم تحديدًا عن حقوق الزوجين كل واحد شنو اله وشنو واجبه كذلك احسها متعمدة لان اني جديدة وتريد تزودني بكل شي بس بدون ما تجي وتكعد وياي وتگول هذا الحديث بوجهي حتى ما اخجل او احس روحي بيه قصور لو اشك بروحي

كملت كلامها وبعدها علمتنا گالت وهي تحط بنت مصطفى ثريا بحضنها
... من تشتغلن لا تصفنن لو تفكرن بأمور تضيك الخاطر وتكدر الصدر استبدلن هذا الشي بالتسبيح او التهليل ، حتى اللسان والقلب ينشغل بذكر الله والروح ترتاح

ضحكت سكينة ...عمة اني اسوي هيج بس مرات لساني ينطق وبالي بغير وادي استغفرالله بس تجي موبيدي

...مو داكولج يا امي اللسان والقلب حتى تتعودين
مو اللسان ينطق تسبيح والقلب يغني مايصير

ردينا ان شاءالله

گالت وهي تباوعلي ...من اجو عمامج گايلين لعمج احنه ما نقبل الجمعة هاي عدكم الجمعة الجاية معزومين يمنه ونزعل اذا ما اجيتو بس عمج تعذر كال مايكدر الجمعة وگللهم اشوف يوم ثاني بهاي الفترة بالحقيقة هو نيته من يرحون يجيبون مرتضى يسلمون على الشيخ زين العابدين ويتشكرون منه وفرد مرة يرحون العمامج تعرفين الطريق طويل
بس ماكدر يكول هيج كدام عمامج شوية يحسها عيب خاف يگولون احنه تعنينة من النجف لبغداد وهم لا جايين ياخذون ابنهم ومرو علينا ، مو تحجين كدامهم وتكولين جايين ناخذ حماي ويانه هم

صفنت ورديت مستغربة ...وين الگاهم اني؟
ردت ...ترحين ويا قيس وعمج گال حتى انتي روحي تعرفي على عماتها ونسوان عمامها بس مادري اشوف

ليلى ...هاي هيه ما اگول

...يلا بنياتي للمطبخ نكمل غدانا اليوم جمعة يصلون ويجون يتغدون من وقت

تحمحم قيس امه كالت تعاي ادخل يمه
دخل سلم باس راس امه وكعد يمها
...الله يرضا عليك وليدي ويلين گلب ابوك عليك

البنات كامن للمطبخ .
اجيت اكوم وياهن باوعتله يبوس بأيد امه ويگللها ربي يخليج الي ياالماكو بالدنيا بحنانج وطيبتج بس ريحة شيلتچ تسوة كلشي

ابتسمت باوعولي طفرت بسرعة ضحك كال اوكفي

وكفت باوعتله رفعت طرف حاجبي غمزلي ضربته على كتفه
العلوية ...ليش تغمز اخذها واصعد وغمز براحتك مو عيب عليك هنا

قيس ...اخذها واعوفچ؟
...يا يمة شنو اريد لعد غير انتم مرتاحين وكلب ع كلب وراسها يضل طول العمر بصف راسك ويمكم جهالكم

رفعت ايديها وكالت ...ياررب اكرمهم ب الذرية الصالحة التصير الهم سند ويلمون كبرتهم

گلنا امين .. بصوت واحد
ضحك وگال وهو يمسح على لحيته ويباوعلي بنظرات يحسسني اول مرة يشوفني مركز بوجهي مبتسم
قيس ...اني قبل لا اتزوجج عندي عادة كل جمعة ورا الزواج التهيت وكطعتها وهسه اريد ارجع احييها

حجيت بهدوء ...شنو هي؟ ان شاءالله مايكون شي ديني والهيتك عنه سيد

ضحك بصوت عالي وضرب رجله گال لامه ...هي بس كدامكم تحجي هيج والله

ضحكت وخزرته
...اسكت شنو تريد الوقار حتى بالغرفة

مسح وجهة وباوعلي بنفس النظرة انطيته رفعه حاجب ونظرة بمعنى حسابك فوگ

قيس ...شوية هيه الشغلة حلوة كل جمعة ورا الصلاة اتغدة واروح للامام ازور واصلي ركعتين اقرأ قرآن هناك وارجع العصر

ليلى ...اجهزلك ملابسك يعني؟
قيس ...لا جهزي روحچ

باوعتله مستغربه ...اروح وياك يعني؟ هز رأسه
ليلى ...وشوكت اجهز روحي؟
قيس ...حضري ملابسج ورا الغدة بدلي ونطلع
هزيت راسي
...وعمة ماتروح ويانه

قيس ...والله ياريت اشيلها على راسي واخذها
...الله يحفظكم يمه بس بعد تدري بيه كل جمعة الظهر اكعد ويا ابوك نقرا قرآن عادتنا من سنين ما تتغير

قيس ...براحتج علوية

ترخصت منهم ومشيت للمطبخ ضلت عمتي تحجي ويا مخليه راسها يم ذانه تحجي بصوت ناصي وهو يهز براسه

دنيا گالت وهي تجر ايدي ...فشلتينا شبيج تراقبينهم تلگياها تنصح بي وتعلمه شلون يرجع يكسب والدي

رديت فشلانة ...لا .. مو صايرة اخاف كلت بس لا اكو موضوع موزين سامعينا
تنهدت
دنيا ...لا تضلين عايشة بخوف هيج ذبي كل حمولج على الله وهو يتوكل بكل شي

تنهدت وهمست من كل كلبي ...حسبي الله ونعم الوكيل .. لا حول ولا قوة الا بالله

وفاء زوجة مرتضى گالت ...يكولون اليوم العلوية نرجس والعلوية عواطف يتعشن عدنا
العلوية نرجس ......قاطعنها دنيا وسكينه وحنان زوجة مصطفى ب لا لا

هي صفنت ضلن يضحكن ودنيا كالت ...راح تغتابين العلوية انتي ما تجيبين سيرتها اذا ما تغتابينها وتخلينا نشيل ذنب سكتي
كولي اللهم الهيني واشغلني بحياتي فقط تعوذي هم

ضحكت وهزت راسها لا
...ما اشيل غيبتها والله بس ردت اكول هيه ماجايه كاتله نفسها على شوفتنا تريد تشوف ليلى وتراقبها

البنات باوعلها بنظرة "انتي شسويتي هسه؟" وكلتلها حنان
...دخلتي بنيه المريه وخوفتي ليلى حتى وجها اصفر صار ليمونه

باوعلي متشنجة تنفست وكلت ...والله صدك خفت العلويه هاي عمتكم ليش تشوفني شعدها وياي وشافتني من اجيت كعدت يمي

دنيا ...يارب ما ينحسب علي ذنب بس هيه عمتي شوية تتدخل بهواي امور وكلش كانت رايده قيس يتزوج وحده من بنات اخواتها من عرفت متزوجج تخبلت غطت وجها بردان العباية وضلت تبجي شلون ما تزوج فاطمة شلون عاف العلوية ومقهورة
ف هسه نتوقع راح تكثر جياتها حتى بس تشوفج وتراقب تصرفاتج علمود تلگى بيج عذروب وتضل تحجي عليج ف نصيحتي الج لا تحجين وياها غير السلام والرد على اسألتها وافضل تلهين نفسج ب اي شي وتبتعدين عنها من تجي اليوم لو بعد سنة

تنهدت باوعتلهن بحيرة وبداخلي اكول اني شجابني شورطني محد رايدني ...
لا ليش محد رايدني هاي عمتج ودنيا وسكينة و وفاء زوجة مرتضى وحنان كلش لطيفات وزينات حجاياتهن حلوة ومايدخلن نفسهن بشي يخصني ولا يسألن عن حياتي قبل

بس عمي احسه ما يحبني وما رايدني بس مجبور بيه ولان خايف الله غاض النظر عن كل شي وناطيني فرصة

كملنا غدة خليناهن ع النار وسبحنا سبحة الجمعة وتجهزنا للصلاة صلينا احنة النسوان سوية وكل وحدة قرت ما تيسر من القران وبعدها كمنا جهزنه الغدة

تغدينا المواعين على دنيا وسكينه نظفت الطباخ و وفاء مسحت الكاونتر وحنان سوت جاي شربتهم وضلت ترتب بالمطبخ خلصت الطباخ وصعدت ركض بدلت ملابسي وحضرت ملابس قيس وضليت انتظره تأخر شوية دخل باوع بالباب مخلية الشحاطة ولابسة جواريبي ولازمة العباية بأيدي

باوعلي وضحك ...والله يالنسوان عدجن حماس للطلعات
ليلى ....هههههههه شلون لعد مو مثلكم كله برة البيت اذا اجة الدوام اشوف عالم تجي العطلة اصير سجينه

قيس ...حقج علي خاتون والله لو ما ركضتي ويا الولد حتى ارضي السيد جان ما خليت مكان يعتب علينا فريتج بغداد فر

ابتسمت برضا ...ما اريد اطلع ياعيني انتَ بس اكسب رضا والدك وخلي يرضا علينا وتصير بركة بزواجنا وهاي هيه كلشي ماريد بعد

قيس ...ويلوموني لان حبيتچ شوووف الحجي الحلو اروح فدوة للمتفهم
حضني حيل يبوس بخدي بشكل عشوائي ...الله لا يحرمني منچ ويخليج شمعة مضوية حياتي طول العمر
وتصيرين ام السادة

باوعتله بزعل ...شنو هاي شو ماحبلت لهسه شبيييك
ضحك صعد راسها ونزل خليت اصابعي برصعاته
وكتله بنبرة دلع ...شبيك استعجل اريد طفل عنده رصعات مثل رصعات ابو شد حيلك

مستمر يضحك حتى عيونه دمعن ضربته بقبضة ايدي على صدره لزم ايده وخزرني
...لتضربين
رفع ايدي باسها وعض اصابعي
...اكسرج تكسر اذا ضربتي بعد

باوعتله بعدم اقتناع ضحك ولبس ملابسه لبست عبايتي وشلت شحاطتي ونزلت البيت هدوء كل واحد ملتهي بروحه وبدينه خصوصا اليوم جمعة لاحظتهم يقدسون ليلة الجمعة ويوم الجمعة من الفجر كله اعمال وقرآن حتى قيس اني بس صليت وقريت شوية قرآن هو ضل ساعات ما گام من السجادة

اخذني للامام زرت عيني جانت تتجول بالمكان حلو وشكله مبهر والمكان بارد وبي نسمة رحمانية ترد الروح كعدت اقرا قران واخذني الوقت لحد ما حسيت ظهري شوي وجعني لان منصية صدقت وطبكت القران

رفعت راسي باوعت للساعة وكمت بهمه اخذني الوقت ما حسيت على روحي جو الايمان خلاني انسى روحي
والله جني طماطة يحطلي اغاني اسلهم يحطوني بجو الدين والايمان اندمج وانسحر ياخذوني لاحزاب معارضة اصير بالشجاعة عنتر ابن شداد بحيث ماخذة معلومات ومسافرة بيهن بالوقت اللي محد يتجرأ يطلع وهو سامعله حجاية ضد الرئيس

بس هذا الحزب ما اضل بي هاي هي اني جزت اريد اضل ويا قيس وابني حياتي واكون عائلة شو شما اشوف اليدخل لهذا الحزب لازم يكون مارايد روحه بس بعد اني وين انكدر انجعم يرادلي واحد لازمله حزام وكون كل ما اذكر الحزب بداخلي يسمطني بي يخليني ما اتجرأ حتى اجيبه براسي

طلعت اركض وعبايتي تطاير بالهوى لكيته واكف ومخلي شحاطتي يم رجلينه منتظرني
ضحك علي اجيته اركض لزمني من زندي
...راح تطيحين خاتون شسالفه منو راكض وراج

جريت نفس اداري بي روحي بس ماكو رديت الهث
...تاخرت عليك
...انتظرج شعندي لا تركضين بعد همزين ماطحتي
...مو ركض هذا مشي سريع
...اخو الركض بالرضاعة

...اخ كلبي راح يوكف
احجي والهث
ليلى ...الله عليك كل ماتجي جيبني وياك ترتاح روحي هنا يمن فدوة رحتلك مولاي الكعدة بضريحك ترد الروح الضايعة للجسد

ابتسم برضا وهز رأسه ...تدللين كل جمعة نجي سوية
لزم ايدي اخذني للبيت رجعني كال جان اخذتج فريتج وعشيتج بس راح يجن عماتي عيب منهن يكولن ماخذ مرته وشارد من عدنا

باوعتله بتفكير وكتله بخوف ...اني خايفه من عمتك نرجس مادري حسيتها ماحابتني وتريد تدور وراي وتلگى علي زله

قيس ...لا تنطيها لگمة وهاي هيه ليش تفكرين
يحجي بأريحيه

...لگمة شنو؟
قيس ...العلوية نرجس هسة مثل الصياد الجوعان يريد لگمة يشبع بيها جوعه ويرتاح بيها باله
هي تدور وراج زله حتى تكول قيس اختار مو خوش مرية وترتاح وكل شوية تگول العلوية فاطمة احسن قيس غلط ..قيس جاب وحدة مو ثوبنا ... ولب لب لب الى يوم يبعثون بعد ما تسكت

ليلى ...شكلها ليلتي طويلة

قيس ...طويله طويله بس مو يم العلوية ولا يهمچ اني انقذچ منها

ضحكت كرص خدي وباس اصابعه باوع للشارع گال همزين ماكو محد شاف

وصلت لكيت عماته جايات سلمت عليهن وصعدت بدلت ونزلت رحت كبل للمطبخ شارده ضليت يمهن ولا طلعت وبالعشا كعدنا سوية وعمته كل شوية تسأل سؤال وتريد تعرف من يا عشيرة ويا عمام وامي منين وخالتي متزوجة لولا
واغلب الاسئلة اجاوبها بهدوء واكو اسأله كتلها ماعرف بالعشاير وعمتي تجاوب عني

بس خلصت دخلت للمطبخ اطيح الاكل من المواعين علمود نبدي نغسل اجت حنان تركض اخذتهن من ايدي وكالت بهمس ...صعدي وسدي باب غرفتچ بحجة عروسة وتجهز روحها الزوجها قبل لا تجي تكعد هنا وتحجي وتشمر وتدور عليچ الزلة

غسلت ايديني بسرعة خايفة جاي اصعد من كبالها كالت
نرجس ...شنو وين صاعده ما تساعدين البنات خطية طبخن وحدهن وينظفن وحدهن وتعاي كعدي يمنه هم نشوفج نتعرف عليج

وفاء ...لا عمي ما يقبل ليلى تضل ورا العشا يمنه يكول البنية بس تتعشه خلنها تصعد
بعد فهمچ كفاية عمة

ضحكت وفاء مسوية نفسها خجلانه ومغطية حلگها عود موضوع مخجل
واني بعدني واكفة اريد عمتي تباوعلي واعرف اصعد لو لا واجة الرد الاقوى من عمتي

العلوية ...اييي يگول السيد ماريد سنتهم تدور اذا مو بحضن ليلى وقيس طفل لو بطنها متروسة منه
رفعت ايديها وگالت ...بجاهك ربي حقق رغبتنا وفرحنا بيهم وقر عيوني وعيون السيد بشوفة اولاد قيس وليلى

باوعتلي وگالت ...صعدي عمه تحضري الرجلچ بعده عريس شوية ويصعد وراچ خو ما يلگاچ بهدوم البيت

هزيت راسي وصعدت الحمدلله خلصت على خير كعدت كبال الميز خليت صبغ اظافر احمر وشوية مكياج رتبت شعري ولبست ثوب فوك الركبة اسود خليت لرگبتي بودرة جوليا ورشيت عطر

صرت جني وردة ... والله صدگ اني جني وردة وبعد احلى من الوردة هنيالك قيس والله صدتلك مرة حلوة

ضحكت على روحي وگعدت انتظره مليت شو هذا تأخر طلعت روايه وتمددت اقرأ بيها لحد ما حسيت روحي غفيت والرواية طايحة على وجهي وقيس ديشيلها

فتحت مرعوبة تنهدت ونزلت الثوب لكيته يضحك
...وعدتج بليلة طويلة وخليتج تتجهزين وخلفت اسف

باوعت للساعة الوقت متاخر تصنعت الزعل ودرت وجهي ...عفتني انتظرك وحيدة وخر عني سيد قيس ابن الملوح ماريد احجي وياك

معدتي كلبت بعدة مالحك يحجي ركضت لسلة زبالة صغيرة مخليتها ورا الباب تقيئت بيها
لزمني من امتوني ولم شعري
قيس ...اسم الله عليچ ليلاي اسم الله

شهكت مختنگة ...استلم الشهرية اجت والله
گال بخرعة ....لاااااا خربت

ضحكت وميلت راسي على ايده غمضت ...توقعت باجر غدرتني والله
قيس ...كومي ارتاحي لعد خليني اطلع السلة اذب البيها واغسلها حتى تضل نظيفة

هزيت راسي وكمت لبست عبايتي واخذت احتياجاتي ورحت للحمام طلعت لكيته صاعد جايب السلة ويغسلها بالتواليت الصاير فوگ لفيت روحي زين بالعباية وهمست
...انطيني اغسلها عنك

رافع كلابيته عاضها بحلگه ويغسل اشرلي براسه افوت للغرفه عفته ومشيت بهمة دخلت ذبيت عبايتي ونمت

كعدت الصبح شفته يحضر روحه يروح للشغل كعدت ولميت رجليني الصدري موجوعه

اجة يمي كال صباح الخير
...صباح النور
رديت بنبرة تعب

قيس ...ها لازم متأذية مثل كل مرة اخذج للمستشفى
هزيت راسي لا ...بس اريد علاج عندي الوصفة تكدر تجيبلي
قيس ...اجيبلج طبعا شلون اعوفج هيج متأذية هسة اكول لهاشم يسبقني واروح اشتريلج العلاج

فتحت الجرار دورت الوصفة بس روحي ممرودة متأذية
مشة للكنتور طلع ثوب مستور نزعني الثوب الاسود ولبسني الثاني لم الغرفه وگال

قيس ...راح انطي خبر للعلوية بمرضج هيه تعرف بالاعشاب وهاي الامور حتى تداريج
غطيت وجهي ...لا عييب قيسس
قيس ...شنو عيب هيه شهرية مابيها عيب حبيبتي

راح نزل ضليت متمددة شوية وصعدت حنان وياها دنيا جايبات ريوگ خجلت منهن كمت غسلت ورجعت كتلهن لا اني انزل كالن بعد احنه صعدناه الج

تريگت ورغم احس موجوعه كلش واريد بس ابجي وانام بس كلت عيب نزلت وياهن لكيت عمتي مفورتلي اعشاب شربتهن وبقيت كاعدة مكرفصة

وفاء كالت ...هاي انتي كل مرة هيج تصيرين صفرة وتتلوين؟
هزيت راسي اي ..
حنان ...راجعتي دكتورة؟

ليلى ...اي مرة رحت وانطتني علاج كله علي يلا شوية يخف الالم

العلوية ...وينه لعد مااخذتي منه
ليلى ...قيس راح يجيب مخلص

دنيا ...امشي صعدي تمددي اخليلج خاولي بماي دافي وحطي على بطنج
حنان ...لا خليلها ماي دافي ببطل احسن

صعدت جابتلي بطل ضليت اضحك رغم الوجع خليته على بطني ضلت يمي كاعدة تحجي وياي وباوعت بالغرفه كالت
حلوة ماشاءالله غرفتكم اني مادخلت الها بس مرة وحدة ماشفتها ورا الترتيب

...شسالفة
دنيا ...هههههه استحيت والعلوية نرجس كالت لا تصعدين خاف تصير نفسج بيها
حجت ونصت راسها مقهورة

استغربت ...ليش تصير نفسج بيها؟ شسالفة شفت عندج غرفة وحلوة عينج شبعانة والعينه شبعانه ماتصير نفسه وعينه ع نعمة غيره

تنهدت وردت ...اني جنت مخطوبة لابن خالتي بس فسخنا خطبتنا وسافر لايران وتزوج غيري باعتقادها ....سكتت وزمت شفايفها

ليلى ...فهمت بس ماكو هيج والله انتي بنيه مؤمنه وتعرفين الدنيا نصيب وراح الاول يجي يوم وتنخطبين وتتزوجين الاحسن ان شاءالله

ابتسمت ...اني متأكدة ربي العالمين كاتبلي العوض بس بعد هي هيج تفكيرها والله ولا احسدكم ولا شي وادعيلكم بالخير والراحة والاستقرار

ليلى ...گال قيس دنيه كلبها طيب ونيتها صافيه

ضحكت بخجل دخل قيس للغرفة جايبلي الدوة كعد من الصفحة الثانية ، خله الحبايه بحلگي وشربني ماي دنيا تباوعلنه خجلت رادت تروح كللها اذا ماعندج شي ضلي يمها و ضلت خطية كاعدة تباوعلنا مبتسمه بخجل

قيس ...رايح ورا الولد تاخرت
باوع لصبغ اظافري وما نزل الا بعد ما لزم اصابعي وشال الصبغ من اظافري بنفسه
همس ...ماريد تنزلين مصبغة

هزيت راسي سلم وراح ..

وراها صارت روحتنا للنجف الطريق طويل وجنت تعبانه اني وعمتي ورا وهاشم وقيس كدام وعمي وعم قيس عبد الصمد وابنه ابا ذر بغير سيارة

من وصلنا هاشم ضل يسولف ويكول هاي الديرة كلها الهم والعالم هنا من عمام وفلح وصيادة كلها تحت امرة حجي طاهر

باوعت للبساتين والخيرات كلها بخنگة عدهم كل هذا الحلال واني عشت محرومة من ابوي يشتغل من الصبح لليل حتى يطلع لگمتنه وفلوس لعلاجات امي الغالية

طعم الحرمان بحلگي مر ابوي دللني رغم بساطة رزقه ونسومة ماخلت شي بنفسي حرماني ما كان حرمان فلوس كان شي ثاني صعب التفسير

حزت بخاطري كلش وضليت مختنگة
كال هاشم بتساؤول ...مات ابوج قبل جدج
كتله لا ابوي مات قبل جدي

هاشم ...معناها ابوج ما ورث جدج
هزيت راسي لا وتنهدت ...هو بكل الاحوال حالف ابوي ما ياخذ من حلاله ولا دينار كتلكم كان بينهم خلاف وعمامي مابيدهم شي دام راعي الشأن حالف وموصي من اموت لا تنطون ابو ليلى شي

العلوية ...يا قساوة گلبه

وصلنا والله استقبال عمامي الزلم حافل سواء بوجه عيالي لو بظهرهم حتى عمي حجي طاهر وعمي حاكم دخلو جوا لكوني اغسل عمي طاهر حضني وباس راسي وضل يسألني عن حياتي وعمي حاكم ويا يسأل وشال فلوس وانطاني كلي هاي هدية عرسچ المبلغ كان حلو

بس النسوان مثل الشياطين يخزرن بيه ولا حاباتني من عماتي لنسوان عمامي لبناتهم

وقبل لا نطلع لبيت الشيخ نسلم ونتشكرهم وناخذ مرتضى جنت واكفة بالمطبخ البس جواريبي لان تبللن من غسلت وشريتهن والبنات كلهن يباوعلي لا وحدة ذبت الها سالفة لا شي ولا ابتسامة شكد انقهرت وحسيت روحي وحيدة ومالي احد وماعندي حبايب مثل نسوان حمويني ماشاءالله حبايبهن هواي وهنه ثنين منهن بنات عم قيس بس وحدة غريبة

كمت اعدل عبايتي وسمعت صوت واحد يتحمحم كال بصوت عالي يخوف اكو احد غريب؟
وحدة من البنات نرعصت رعص كبل طفرت تركض اي ليلة هنا شتريد؟

گللها بحدة ...هو جاي اعليها اريدن احجي وياها جم حجاية صيحيلها

التفتت كالت سمعتي؟

هزيت راسي كتلها هذا منو؟
...هادي ابن عمج طاهر الجبير

هزيت راسي اعرفه صاح
... راح اطب شغلتجن بطيه

دخل عدلت عبايتي على راسي سلم علي وتذكرت هاشم من گال
راح تشوفين ابن عمج هادي شلون هادي ماشاءالله
وهاي مو اول مرة اشوفه بس اول مرة الاحظه

شكله اسمر عيونه حادة حمر وحواجبة كثيفه ضخم گال وهو ياشرلي ...تعاي تدني يمي اسولف وياچ شوية

والله اني بلعت العافية لو تذبحوني قطرة دم ماتلگون بيه كلت راح يكتلني ويطبخني للعشا

وكفت مسافة عنه گال بنفس نبرة صوته الحادة
هادي ...زلمتج شلونه وياچ؟

هزيت راسي ...لا الحمدلله خوش رجال

هادي ... الحمدلله سمعي حجاية وحدة ما اثنيها انه والهنا كلها تعرفني ما احب حجايتي تنثني ولا احب واحد يرگع حچايتي بالحايط
انتي من ساعة ما عرفناچ صرتي بمسؤوليتنا وخالتج بعد مالها شغل بيج
تعتازين شي .. عيالج موزينين وياج .. رجلج يطگج انه اكتلنا بس رفعي السماعة وكولي هادي تعال

ليلى ...يا شسالفة خوية خوش ناس السادة
رفع ايده وگال ...انه احجي للبعيد البشر ما مضمون واذا بيوم ردتي تهدينا ما ترحين لخالتج تجين علينا وهاي البساتين كلها حدر امرتج بس اشري واختاري المو الي اشتريها من راعيها واحط سندها بيدج

...تسلم ما تقصر ، بس شوية سؤال ضال يمرد بگلبي دامكم هيج اهل نخوة وحمية وينكم من جان ابوي مكسور ظهره علمود يعالج امي وعشت محرومه من شوفته ماضلت شغلة ما اشتغلها
وينكم عني من ماتوا اهلي كبل سنين وضليت يتيمه وحدي وينكم من خفت .. من بجيت من جعت وينكم من لاوني الزمن وطكني

رفع ايده يقاطعني بغضب حتى ما خلاني اكمل
هادي تسكتين لا وحگ ذاك الكفل زينب اجر التفگه واطب عليهم للديوان اكتلهم من صغيرهم لجبيرهم

عمتي الجبيرة كالت يااا عمي اسكت اسكت شسالفة

هادي ...انتن اول ما ابدي بيجن ، احنة جنة صغار من اطلع ابوج جدي شيع علي مات ومات شمدرينا كبرنا ونشدنا جا وين كبره خلينه نزوره كالو الجلاب ماله گبر طلع وما رد بس وصلنا ميت
لحد كبل سنتين مو اكثر امج وابوج ميتين وشابعين موت واجانه خبر انتم كلكم متوا

وهاي صار سنتين هذا المطبخ والبساتين والديوان لو الهن لسنه يشهدن كسرت الدنيا على روسهم من زعم عرفت بعمي عدل وعايش كل هاي السنين بغربة ومات بغربة و وحيد وانه السويت الفاتحة والويلاد وياي

غصبا عن اكبر خشم وغصبا عن خشم جدتي الماتت خوب هية هسة ماصارلها سنه وعسى الله لا يرحمها خربت الاخوان وخلت جدي يخالف ابوچ

رجعت عمتي ام منذر نترت ...يااا تدعي على امنه ليش ولك انتة استگويت زايد طاهر ناطيك مجال

نتر وهو عيونه بهامته حمر دم ...و لو ينطيني بعد شوية ولا اخلي وحدة منجن تعتب هذا البيت ولا اشوف خلقة وحدة من كونجن شديتن حزام ضد عمي ويا امجن وخربتن ابوي وعمامي بشرچن

رجع باوعلي وكال ...مالج شغل بيهن بس تعتازيني رفعي السماعة واكتل المنزل دمعه من عينچ حتى لو طاكج بوردة ومعورچ

سلم وطلع وهن ضلن يتنادسن ويدردمن شكد سمعني حجي بس فرحت طلعت من المطبخ رافعة راسي من اجيت وهن يباوعلي بعين الصغيرة وهسة انكلبت واني الباوعت عليهن بنظرة استصغار لان ولا احترمهن ومسح بيهن الكاع ..

قبل لا نطلع مرت عمي جابت علبه وكالت هاي هدية عمج طاهر بيها كلادة ذهب انطتنياها كدام عمتي وطلعنا منهم محملين بالهداية من دهن الحر والزبد والروبة والكيمر وحليب الجاموس

رحنة سلمنا ع بيت الشيخ واخذنا سيد مرتضى ورجعنا وضلو عيالي اسبوع يمدحون بكرم عمامي وكل ما يحطون شي من الزبد والدهن وغيره يترحمون لابوي ويذكرون عمامي بالخير

....

الشيهانة ..

اخذو جبران من البيت عمتي تلطم وتبجي ضليت امشي وراهم مبتنجة جثيت على اركبي يم الباب ابجي واشوف جبران صعدوه بالسيارة واخذو مقيدينه

وعمي يريد بس يحجي وياهم ماكو اخير شي صعدو حتى عمي وعماد لان ضابط يمكن ما اخذو ولحگهم بسيارته

ضلينه بلضيم نبجي واكول ليش هيج سويت جبران ليش سويت بروحك هيج
وينك وين هاي السوالف انتَ انسان مسالم
الوم بي وابچي وجسمي كله يرجف دخلتنا نزهة للبيت اني وعمتي نبجي واشهگ من كل گلبي

من دخلنا للبيت وشفت الدرج صعدت لغرفته ابجي حضنت مخدته بيها ريحته
...شنو ورطك منين جبت هاي الورطة الروحك

هدير ...تقتلين القتيل وتمشين بجنازته

باوعت عليها بصفنه وحجيت مستغربة ...وياي؟
هدير ...لا ويا امي .. باوعت محد وراها وتقربت دفعتني من كتفي
...غير اجيتيلي ردتي هاي الكتابات حتى تنتقمين من جبران وتاخذين بثار اهلنا هسة راح يصعدونه اعدام وترتاح گلوبنا

صفنت بوجهة اباوعلها مستغربة رفعت طرف حاجبها
...شنو ما تتذكرين الصار ما تتذكرين منو خطط لسجن جبران او تردين الصدك انتي ما خططتي السجنه خططتي الاعدامه والله خطتج خبيثة بس عجبتيني نكدر نكول هسة انغسل الدم بالدم

ضغطت راسي حيل بأيديني اريد اذكر حسيت روحي بداومه ضحكت ولزمتني من زندي همست
...امشي وياي اخيتي امشي السباعية الاخذتي بثار اهلنا بس مو تحچين

شيهانة باستغراب ...ليش شبيهم اهلنا؟
هدير ...جبران حرگهم وهمه عدلين وانتي هسة اخذتي بثارهم وسلمتي جبران للعدالة وراح يصعد اعدام صدك التهمة تختلف بس النتيجة وحدة

رديت بأستنكار ...لا اني ما اغدر من اريد اواجه مگابل مو غدر هذا مو ثوبي

راسها يم راسي وكانت تهمس كأنها الشيطان الرجيم
...لا انتي سويتيها سهير

نزلتني فتحت فرشتي تمددت باوعتلي مبتسمة نص ابتسامة
...عفية السباعية كبرتي بعيني خليج ضدهم حتى تكسبيني وتكسبين رضاي

اباوعلها مستنكرة ما اعرف شنو تحجي وشنو تگول ولا اذكر شي
ما اذكر اذا صدك اني غدرته لو غيري ما اذكر هو كاتل اهلي وهمه اهلي مو بالكويت بعد شلون مكتولين؟

ضليت صافنة طلعت وبالباب التفتت باوعتلي شفت بوجها شيطانه مو اختي غمضت عيني خايفة ومنا هذه اللحظة بدأ عذابي الحقيقي

صرت ما اذكر شي مغمضة عيني افتح وارجع اغمض مرت الايام بدون ما اعرف شنو صار بيه وشلون جاي تمشي شلون اكعد وشلون انام منو يهتم بيه بعز هاي المصيبة وجبران وين وشنو صار بي عمي وين
وين راحو .. منو الناس اليگعدون يمي ويحجون وياي؟ اني سهير لو غيري

وين بناتي وين مهيب .. وين كتبي وشوكت اروح للجامعة عندي امتحانات

عشت بكل الفترات كل شوية عقلي يرجعني لفتره
ساعة اكوم ادور كتبي .. وساعة ادور بناتي
وبعدها اختمها اسأل عن جبران واكتبله رساله حب يكون مصيرها سلة النفايات ..

صرت اشوفه گبالي يحجي وياي ويمسح على راسي ويشيلني حاضني ع صدره
يسولف يم اذني ويحط راسه ع الميز يم مخدتي وينام
مادري هاي ذكريات .. خيال .. اوهام لو صدگ

عيشوني بحلم واني واعية .. بكابوس واني امشي
صرت مثل اللعبة اليتحكمون بيها عن طريق خيوط من فوق المسرح
صرت بمكانها ..

ما كمت اعرف حقيقتي شنو وصلت بيه اسمي ما اتذكره عشت الجنون .. الأكتئاب .. المرض الوحدة

اسمع صوتي واني اصرخ مثل الصدى اشوف دم ماادري دمي لو دم غيري
اسمع اصواتهم من حولي ..

وترجع تفتر الدوامه وتفتر وتفتر
وترجعني كل يوم لنقطة الصفر ..

جبران ...

داخل غرفة التحقيق ..

گاعد الضابط گبالي شابك اصابعه يحجي وياي بعتب
...وهسة شنو عندك يا جبران الشفناه اكبر من كل شيء

جبران ...هاي هيه حولوني على المحكمة وصعدوني اعدام

فرك وجهة وگال ...امرك عجيب
جبران ...عجيب سيدي؟ وگف گبالك قائد شكبره من اصحاب الولاء للدولة وگلك يابة ترة جبران وياي من سنين وانقذني حتى من محاولة اغتيال
انه انقذته من حزب معارض وصارله سنين واثق بيه يحجي امور تخص الدولة كدامي وانه صم بكم عمي

ارجع اسأله عمري نقلت هاي المعلومات لحزب معارض؟

...بس احنه لگينا عندك اشياء تثبت العكس

...انه مهدد وعندي شهود راح اذكرهم الك بالاسم جيبهم حقق وياهم
...منو مهددك

...الحزب الي انقذت القائد منهم دزولي ورق تهديد وعندي شهود من ظمنهم زملائي بالمستشفى و واحد جيراني

...ليش الحزب يوصلون البيتك؟
...والله ضيوفنا هواي وبابنا ما ينسد كل شي اتوقع

...اذكرلي اسماء الشهود

ذكرتله اسمائهم ومعلوماتهم اخذوني خلوني بالزنزانه وعرفت حققو ويا عماد وفتحو عيونهم ع عائلتي

ضربت الكتايب بقوة مقهور وكعدت بالكاع منتهي والله هاي ايدي اكطعها اذا ماطلعت هدير ورا بلوتي هاي تريد تشتت شملنا وتقضي علينا بس مادري شلون اهلي كلهم عميان من يمها ودوم يشوفونها صح

شلت راسي تعبان باوعت للمساجين وياي بيهم المعتكف على نفسه مقهور ومتأذي وبيهم الوجهه مابي نور محمد

ما راح اطول هنا .. مو انه الانحبس ادلة برائتي موجودة
التهديدات والشهود موجودين راح يشهدون لصالحي واطلع بأسرع وقت ممكن

عندي صديقي من كبار القاده (من حزب البعث) قبل سنة انه انقذته من محاولة اغتيال
ودومه يلقي ببعض المعلومات كدامي ما تجرأت وحجيت كدام بشر مو خوف على روحي لا والله
بس انه اعرف الويا النظام والضدهم يخوفون ويهددون عائلتي واستقرارهم لهذا السبب مادخلت روحي بمعمعه الاحزاب

وهذا صديقي كال مرة انه مدين الك بروحي ودامه قائد جبير ويريد يرجعلي الدين راح يبرأني ويطلعني من هنا بأسرع وقت ممكن

....

ريحانة ...تعصف بينا رياح الحياة وتاخذنا على متن التعب وتلقينا ببحار الهم والغم والأذية ..

وياكم ريحانة بنت حور
ريحانة بنت المظلومة ..ريحانة بنت المسكينة الما شافت من دنيتها يوم راحة ..

بدأت قصتي من هاي الليلة .. كان عمري بيها عشر سنوات ونص بس نايمة ليلي بصف امي حور مغطيتني ولامتني على صدرها تخاف علي حتى وهي غافيه تخاف لا رياح الدنيا تقتلعني
لان اني بمنظورهم وردة صايرة وسط صحراء قاحلة وهي السور الحاميني من بعد رب العالمين والضابط صهيب الله يرحمه

راح صهيب قبل فترة .. والسور راح ينهدم بهاي الليلة

اندفر علينا الباب زلم مسلحة رافعين اسلحتهم باتجاهنا تقدم واحد منهم وگال
...حور جيبي بنتج وتعاي لا اگلب الغرفة دم

ما خوفهم عياط نسيمة وسكتوها برفع السلاح اتجاه راسها

اخذونه اني وامي مخليتني جوة عبايتها تبجي وتهمس
...رجعن الكوابيس رجع التعب راح الجان حامينا وصايرلنا سد بس عدنا رب الماينام هو اليحمينا

ريحانة بخوف ...هذول خوالي
حور ...اي هذول الما يتسمون هذول الجلاب

حسيت بخوف والالم انتشر بكل جسمي ضليت ارعش وامي مغطيتني تبجي بطني شبت نار وحسيت بدفو بين رجليني ضليت ابجي بصمت خايفة من الجاي خايفة من الايام المقبلة
مبينه سودة بسواد هذا الليل
وقاسية

وصلنا للبيت الغادرته ويا امي واحنه شاردات طفلة عبالها عافت كوابيسها وبعد ما ترجع تشوف هذا الباب المتأكل الكئيب
دخلت للبيت ويا امي ارجف ريحة رطوبة الجدران ترست خشمي ورجعت وياها كل ذكرى كئيبة عشتها بهذا البيت

اباوعلهم مثل الوحوش التمو على امي يضربونها واني احضن بيها ونص الضرب يجي على جسمي
ابجي وابعد بأيديهم وخالي يصيح

...ساااا** شردتتتي رحتي تك*** ابغداد السافلة اليوم احط ظهرج على عوة ونصوة وافصمه

امي تبجي ماتكدر حتى تدافع عن روحها خلتني جوة جناحها تبجي

وخالي يصيح ... تاليتج رجعتي النه هذا مصيررج تضلين خدامه جوة رجلين نسوانه وتجدين بالشوارع تكودين بالشوارعم المهم تجيبين فلوس تغفرلچ ذنبچ السويتي

امي تبجي واني دفعت ايده بقوة جان يدمغ بيها ضربني راشدي بكل قوته شمرني بالكاع طك راسي بالعتبه فرفحت روحي
باوع وضحك وفر ايده
...وهاي كبرت صارت مرة واجتها الدورة خوش صارن ثنين بيها الخير

ما فهمت كلشي طلع منه شنو صرت مرة ما اعرف اني بعدني صغيرة امي اخذتني لمتني بحضنها فتحو باب الغرفة القديمة ودخلنا الها
كرفصت على روحي ابجي خايفة همست بخوف
...ماما اريد ارجع يم خالة نسومة هذول يخوفون

حضنتني وكالت ...دخلنا وكر الثعالب اذا طلعنا مرة ثانية نطلع جثث

خفت من كلمتها من كالت نطلع جثث حسبالي الا نموت ما جنت ادري الموضوع يختلف ومرات نطلع جثث تشتم الهوى وتمشي على رجليها

حبسونه يوم بهذا البيت وراها حولونه لغير مكان مهجور اكثر ويخوف اكثر
ناكل ماي وخبز وماعدنا حتى ملابس نبدل بيهن بلكوة جابولي دشداشة جبيرة ماعرف مالتمن لبستها

امي كل ليلة تحط راسي بحضنها نوم ما تنام تخاف تغمض عينها ويسوون بيه شي وصلت بيها تنزع حجابها وتربط ايدي بأيدها حيل ما فهمت ليش كل هذا

لحد ما دخلو واخذوني منها وسط صريخي وصريخها
خالي الجبير يضرب بيها والثاني يجرني وياخذون من جنطتها جنسيتي

مثل الوحوش دارو علينا افترسو ارواحنا قبل اجسادنا

سحلوني بقوتهم وضربوني على حلگي حتى ابطل صريخ ، وصلنا لبيت صغير تعبان دخلوني
حطوني كبال رجال جبير عمره بال35 وكعد خالي يمي كال شنو يكلج الشيخ كولي نعم

وبكل خوف وبدون علم ولا معرفة كلت للشيخ نعم وزوجني رجل اسمه كريم وسلم ركبتي اله واني عمري عشر سنوات ونص حتى الكافر ما سوا سوايتهم بيه ........للحكاية بقية

اسفة كلششش بس فقرة ليلى كتبتها ع كيفي باقي البارت سردته ركض ركض يمكن الصبح اعدله بس لان شوية تمرضت من العصر اسم الله عليكم
اكرر اعتذاري 🖤