رواية حمائم تخشى الطيران الفصل الثاني وثلاثون 32 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

دنيا ..

صدمة ورا صدمة
مشكلة ورا مشكلة الامن اخذو اخواني حققو وياهم وضلو 3 ايام بالتوقيف حتى عذاب معذبينهم رادوهم يعترفون بأشياء هم ممسوينها
بس الحمدلله سوينا المستحيل وطلعناهم والبركة بواحد من اصدقاء والدي هو يصير من غير طائفة عنده اخو ضابط كبير ويعرفنا ويعرف احنه ما نتدخل بهيچ امور تخص احزاب ومشاكل وانقلابات

وبنفس الوقت صديقة ليلى اعترفت على كل شخص كان وياها وما جابت سيرة قيس او اي واحد من عدنا

وارادة الله وحمايته النه نقذتنا كلنا من ايدين الطاغية
لان بهذا الوقت بس يشكون ولو شك بسيط يضلون ياخذون اليطلع بوجوههم

والدي معصب من فعلة قيس لان قيس ورط روحه وبعد ما يگدر يجي للعراق بس يدخل ينحبس ويمكن ينعدم
لان بهروبة خلاهم يعتبرو مؤيد ومتعاون وياها

واحنه حتى صارت علينه مراقبة من قبل الامن حسرة علينا نتنفس من وراهم
بس شنسوي نضل هيج ماعلينا باحد رايحين بطريقنا جايين بطريقنا

تنهدت وكطع علي صفنتي صوت سكينة تحجي ويا حنان
سكينة ...هاشم البارحة يحجيلي عن غضب عمي شكد خفت دخيلك ياربي

دنيا ...شكو سكينة شنو حجة
باوعتلي وبنظراتها قلق ...عمي معصب كلش وشايل بگلبه على قيس وعمامي
كايللهم اني كلبي ما ترتاح ومنعته بس من شافكم مؤيدين استقوى بيكم

حنان ...ما مجذب عمي هو من شاف عمامي كلهم مؤيدين والولد يتوسلون بي علمود يقنعونه يتزوجها حس روحه صح وراح خذاها بدون علم احد

سكينة ...صدكيني حنان لو رافضين كلهم جان عاند اكثر
حنان ...بس ما جان راح وخطبها وتزوجها بدون علم احد

سكتت مقهور گلبها تعجن وحواجبها سود كثيفة معقودة
رجعت رفعت راسها وكالت بقهر

حنان ...واحد يحجي لله البنية زينة ما شفنا منها الا كل الخير بس غير طلعت ماشية بطريق اسود وكله شر واليدخله وحدة يطلع منه مدمى هو وعائلته كلها

دنيا ...الله سترنا
تنهدت سكينة كملت حچي ...وبعد عمي گايل شي يمكن يصدمجن
حنان ...شو مصطفى لف راسه ونام ما سولفلي شي؟ وعلي اليوم اهجم علي

سكينة ...هسة دسمعي

ضلت تتلفت بقلق وحجت بصوت ناصي كأنها خايفة من الجدران تسمعها
سكينة ...لمن اجت عمتي اول امس طلعت ما جاية هيچ زيارة عادية عمي داز عليها وگايللها اريد فاطمة لـ قيس راح يستقر هناك حالة حال اولاد عمامه ويتزوجها حتى يستقر وتصفى اموره

وعمتي ما رافضة گبل گايلتله كبع واخذ بس بشرط قيس مايجي للعراق خاف ياخذونه الحكومة وتنكسر فاطمة

حنان ...من عمت عين حظج يفطوم من ذاك اليوم لهذا اليوم كلها تصيح فاطمة لقيس وقيس لفاطمة
ما حسينا غير گال والله ماريدها اريد ليلى
راح تزوج والبنية ضاله هسة طلگ ليلى رجعو دارو على فاطمة المسكينة يقدمونها قربان حتى سيد قيس ينسى ليلى

تحسرت وافكر بحال فاطمة
حجيت مقهورة ...قيس يحب ليلى حتى لو طلگها ما ينساها ليش يورطون فاطمة ويا ترى خطية تعيش ويا بشر جسمه يمها وگلبه يم ثانية

حنان ...هم هيج لا يفكرون ببنية ولا شي اليشوفونه مناسب يقررونه واحنه نگول سمعََا وطاعة وننفذ الباقي من حلگ مسدود ..
تحجي منفعله شالت ايدها حركتها كبال حلكهة بحركة مثل سد السحاب ونزلت ايدها تكمل عجن مقهورة

سكينة ...لا اني كيفت من خطبني هاشم

ضحكت حنان وگالت ...وعلي حتى اني كيفت ركصت بچفية بعد ابن سيد رحمن خاطبني بس اختي خطية تورطت بواحد ماتريده وحشاجن مو ادمي

دنيا ...خطية
تگولن فاطمة هسة قابلة بقيس؟

سكينة ...اني اگول اي هيه كأنها عاشگته حنان تذكرين من سوينه العزيمة بيوم جية ليلى لهذا البيت فاطمة تباوعلها من راسلها لرجليها وعيونها حمر مدمعات مختنگة شوية وكالت عمتي فطوم مصخنة اخذتها لغرفة عمي ودخلت يمها

شوية وطلعت عمتي ضايجة وفاطمة متمددة بالكاع ومغطية حتى راسها بعبايتها

انكسر گلبي عليها احس بيها والله من زمان تحبه

حنان ...لا تظنين الظنون بيها دسكتي

حطيت ايدي ع حلگي مقهورة
سكينة كالت بثقة ...مو ظنون والله فطوم تحبه من جنت صغيرة مو اكمز واكعد يمهم وارجع يمها تسألني علي من تشوفه يحاجيني تكول شنو گلچ قيس شنو حچة وياج شنو جابلج وعيونها تضل معلگة باتجاه الباب من تشوفه يدخل تنخبص تضل تعدل بعبايتها وعينها تنزل وترجع تباوعلة خطف وتنزل راسها

دنيا ...يااا مراقبتها
سكينة ...جنت شاكة وساكته بس هسة بعد راح تصير مرته خلوني احجي

حنان ...سكينة عيب سكتي لا تحجين كدام احد والله هاشم لو يدري بيج هيج حجيتي الا يتخبل عليج شلتي غيبتها وذنبها

كامت حنان تلف العجين وتحجي ويانا
...لا تخلن واحد ياكل بطيخ يم العجين وعلي تعبت رايحة اسبح واخذلي غفوة بلكي تذكرن تكعدني بعد ساعة اقرالي جزء من القرآن قبل اذان المغرب

سكينة ...خوش نكعدج

راحت صعدت ضليت كاعدة بالمطبخ اباوع من الباب المفتوح وافكر بحال قيس ورا ما طلگ ليلى وارجع افكر بحال ليلى يمكن هسة بس تبجي وتنوح تحبه
وبعدين ياخذني عقلي لفاطمة مسكينة اني ملاحظتها من زمان بس ما مفكرة هسة سكينة فتحت عيوني

وضعها مثل وضعي تحب من طرف واحد الله يعلم بحالها وبحال گلبها وحتى لو تزوجت قيس مايفيد شي
قيس مثل بيت مهجور محد يكدر يكعد بي
فاطمة ماتكدر توصل لكلبه ولا تدخل لحياته وتخلي يحبها

يمكن يعاملها بما يرضي الله بس ما يحبها والمرة تعرف وتحس برجلها اذا گلبه مو الها وروحه يم انسانة ثانية

اجة عمي عبد الصمد بالليل كعدو عادي يحجون بالصالة واني اقري ابن مصطفى
وبالي يمهم
شوية واجت امي كعدت مسافة عنهم وشاركتهم الحديث

عبد الرحمن ...احسن شي يتزوج حتى يلتهي بحياته وينساها اذا ضل فارغ ماعنده شي يضل يفكر بيها لازم شغل روحه

عبد الصمد ...خوش حجي بس يا خوية قيس متعلگ بليلى ويحبها لدرجة ذب روحه بالنار علمودها وخذاها شرد بيها لأيران اباذر يگول مناك طالعين بالبلم بليل
والهور كله حياية وجاموس غير الامن

عبد الرحمن ...شو ما داخله عقلي هوَ الهور غير ناشف؟
عبد الصمد ...لا مو كله بالحدود موجود صاير الهور طريق للهاربين وعلي مراقبة بس قيس ما مهتم ورايح وياها

معاتبة عمه صباح (ابن عم ابوي ومتزوج عمتي اخت ابوي)
گايله شلون تسوي هيچ شلون تجي ويا المرة ابن عمها وياها مطلعها عوفها ويا وارجع لبغداد ليش ورطت روحك

گايله قيس ...شلون اخليها تعبر وحدها؟ من صارت السالفة هيه على ذمتي واني غيرتي ما تسمحلي اعوفها بهيج ظرف وهاي اني كدامك سالم ما طار نصي

عبد الرحمن ...هوا حقه صعبة علي يعوفها بهيج وضع هسة عوفنه خوية البنية بعد راحت بحال سبيلها تطلگت الله يستر عليها وماعدنا شي يمها يربطنا بيها انتهت فد مرة

قيس ندمان و منهار وبأمس الحاجة لأيدين تلوحه وترمم المتهدم
دزيتله خبر بيد اباذر من رجع كتله اذا يريد رضاتي وترجع الماي المجاريها الصحيحة
يمشي بشوري وياخذ فاطمة ويستقر وياها

والله اباذر اتصل ههههه يگول اني قابل اتزوج فاطمة بعد احنه مانكدر نحجي بالخط العريض
هسة لازم نشوف انسب حل ونطلع فاطمة بأسرع وكت لايران حتى يتزوجون ويعيشون حياتهم

سميرة (ام مصطفى) ...سيد مو كأنك استغليت ضعفه؟ وراح تضلمه وتضلم فاطمة لانه ما يحبها يحب ليلى
والبت صدك غلطت بس الله نجاها وهسة هناك ما يطولها الشر
يمكن قيس يريد يرجعها ويستقر وياها

عبد الرحمن ...قيس ما يريدها بعد اني الاعرف طلعت من نفسه كلش واتوقع اكو مشاكل غير هاي المشكلة بس قيس ضمهن وما حجاهن

عبد الصمد ...اي بس ما يحب فاطمة خوية

ابوي رد متضايق ...انتم والله معضمين الشغلة يحبها وما يحبها ليش هيه الدنيا تمشي بالحب؟ عدنا عقل يحكمنا لازم البشر يسيطر بي على روحه ومشاعره ويشوف المناسب اله

الحب وحدة ما يبني بيت اساسه قوي ورصين ولا يبني عائلة

التكافئ التشابه التفاهم هو اليبني بيت وعائلة وفاطمة بنية مطيعة ومحبوبة وجميلة وقيس رغم سوايته بس اخذ درس وراح يعرف يدير اموره
ويستقرون

عبد الصمد ...بعد هاي هيه لتشوفه خوية هسة اسمعني جيتك اخذ شورك بسالفة ثانية تخص اباذر
هو قبل رادنا نخطبلة بنية بس بعد بطل فجأة وهسة شفنه الوقت مناسب حتى نزوجه گلناله نختارلك عروس على ذوقنا لو انتَ ببالك مرة معينه من عمامك

حسيت انسحبت روحي شفت ملك الموت واگف فوگ راسي امي باوعتلي وخزرتني واني جمدت فد مرة

كمل كلامه عمي بعد ما ابوي كله ...وشگال؟

عبد الصمد ...كال بكيفكم اني وامه اختارينه اله بنية خووش بنية خلق ودين واخلاق محتشمة وحافظة للقرآن وعمرها مناسب من عمره لان بصراحة اني و ولدي ما نفضل الزواج مال الصغار

اريد اكوم من يمهم رجليني ما تشيلني لان ماكو وحدة غيري بالعائلة جبيرة
امي رجعت باوعتلي تخزر لان حالي صار واضح حسيت روحي انخطفت

عبد الرحمن ... بنت منو؟

عبد الصمد ...بنت خالته ميساء الجبيرة متزوجة بايران كلت بما انك راح تزوج قيس وفاطمة نزوجهم سوية مناك گبلهم ونخليهم يستقرون

جريت نفس براحة وغمضت عيني كلهم التفتو علي لاحظو شلون ارتاحيت
عمي ضحك وامي عضت اصبعها لان فاهميني بس ابوي ماعرف كال شبيج يابة دنية
كتله ...لا مابية شي يابة

رجعو يحجون ويخططون واني احس صارت ونه بأذني كد ما جنت مختنگة احس هسة طلعت من الموت

ابن مصطفى ...يلا عمه كمليلي
خزرته ...مو جاي يحجون روح بعدين نكمل بعدين هيه مو عطلة صيفية خليها من تبدي السنة اقرا هسة استمتع بوقتك العب عيش طفولتك لاحگ على القراية

رد ما قابل ...لا عمة لازم اقرا واتثقف شلون اصير رجال اذا ما صرت مثقف؟

دنيا ... اي بس الثقافة مو بالقراية وحدها لازم بالاول تعيش طفولتك حتى تتعلم كل مرحلة والها الشي المناسب الها وكل وقت واله
وقت المدرسة دراسة و وقت العطلة تستمتع
حتى من تكبر تصير انسان متزن وتعرف تربي اطفالك لانك عشت التجربة صح وتعلمت

هز راسه سد كتابة ثنينه كمنا للمطبخ كعد ع الميز طلعلته من الثلاجة فاكها
كال ...عمة اذا عشت طفولتي وقريت بالمدرسة وقريت قرآن وصليت اصير مثقف لو بعد اكو اشياء ثانية

دنيا ...شوف حبيبي ما راح اطولها عليك واشرحلك ويصير كلام معقد
بس اكلك تخلق باخلاق الرسول وال البيت وحاول تاخذ صفاتهم وامشي على نهجهم هاي هيه صرت اثقف المثقفين

هز راسه مال بسم الله واكل فتحت الباب حتى يتغير جو المطبخ حسيته يخنگ
گال بتساؤول بريئ ...يعني ما اصير جذاب ولا بواگ ولا فتان وما انافق واحترم الناس واحبهم

هزيت راسي ...اي عاشت ايدك ان شاءالله ربي يثبت رجلك على هذا الطريق وما تضيع مثل ما ضاعو القبلك

تحسرت ودرت وجهي للباب اباوع للحديقة والجو حار يتعب حرورته تطحن الروح

سوو كل شي ضلو يشتغلون على الموضوع بس بهدوء وبعد فترة طلعو فاطمة عن طريق لبر لغير دولة ومناك سافرت لقيس

بعد احنه گوة توصل النه ريحة من اخبارهم
عرفت ورا ما واصلين بيومين عاقدين وبعد اسبوع مسوين عرس بسيط لاباذر وقيس تزوجو بنفس اليوم

ضليت واكفة وببالي الف تساؤول
شلون حالهم قيس .. ليلى .. فاطمة؟
شنو وضعهم هسة مشاعرهم

فاطمة فرحانة؟ لو شافت قيس يباوع بعينها وفكره يم غيرها وضاجت وانكسرت فرحتها بي

صعدت لغرفتي سبحت ومشطت شعري بسرعة خفت امي تعرف بيه سابحة بالليل ماتقبل تضل تحچي علي
خليت شعري على ظهري حتى ينشف زين

جنت تعبانة طفيت الاضوية وتمددت ومثل كل يوم عيني تروح على شباكه الما يفتحه
اخر مرة فتحه بعرس طوعة وبعدها ما صار يفتحه ولا شيل الستارة
بس اشوف اكو ضوة يعني موجود بالغرفة

غمضت عيني وغطيت وجهي بالفرشة خجلانة من روحي وكل ما اتذكر موقفي من اقتحمت غرفته واعترفتله اتمنى اخنگ روحي واموت

غمضت عيني جاي اغفى وسمعت صوت حجارة ضربت الشباك
كمت من مكاني متوترة ومشيت بتردد للشباك رجل اقدمها ورجل ارجعها

شلت طرف الستارة شوية وعيني صارت على شباكه من دون كل ذيج الايام مفتوح تنفست سريع حسيت كلبي يضرب جدار صدري بعنف
عيوني ضلت تلمع بالدموع
چان كاعد عادي ويقرأ مثل قبل ولا كأنه

معقولة هو شمر شي على شباكي؟ لا وين سيد مؤمن ثگيل ما عنده هيج سوالف مال مستخفين رفعت راسي وضحكت على عقلي من طار العصفور ورجع حط
واني العبالي هو شامر حجارة وين يهتملي اصلا مؤمن ما يريدني

ضليت اباوعله مبين علي مندمج كلش يمكن لو اطلع راسي من الشباك ما ينتبه لوجودي
وهذا الشي يقهرني اخ منك يا گلبي شگد ذليتني شگد اذيتني
ولك ليش وكعتني بواحد ما يهوى الدنية هاوي الاخرى؟

واحد منتظر يموت حتى يلتقي بمحبوبته هناك

ولچ كافي يروحي ما يجينة ولا يحبنا خلي نعوفه

دمعت عيوني وهي تباوعله عطشانة لشوفته لو اخلص الليل واكفة ما تروى عيني

ضليت اخاطبه وكل ظـني يسمعني
هم امر ضيفة بصفنتك؟
اني كل ليلة افكر بيك وانتَ ما تدري

عضيت صبعي مقهورة ...عمت عيني ليش تعلقت بيك

سديت الستارة ورجعت ضايجة تمددت بملل وعيوني جرن غميت عيني ...ابجي ولج ابجي ثگلن جروحي على گلبي ابچي

كعدت الفجر راسي ثكيل صليت ونزلت شربت جاي اريده يعدل راسي
امي دخلت للمطبخ باوعتلي
مانزلتي صليتي ويانه شنو معذورة
دنيا ...لا صليت فوك جنت تعبانة ونعسانة لان ماغفيت من وكت

هزت راسها كمت بديت اجهز الريوك دخلت حنان للمطبخ صبحت علي
حنان ..شو مانزلتي صليتي ويانه
دنيا ...تعبانة والله
حنان ...ماصليتي?
دنيا ...لا صليت والله

ارتاحت نظراتها وحضرت اكواب وبدت تنزل البيض بالصحون وتشكر الكلاصات
رتبنا السفرة صعدنا الجهال صاحولهم التمو
سكينة شايلة بنتها تفتر بيها تبجي
اخذاتها من ايدها بستها

...كريمة الحلوة ليش دتبجين عمة؟
هاشم ...تعودت على الشيل
شال كوبه بايده بدون ريوك كام اخذها حطها ع ايده وضل يفتر بيها ويشرب جاي
سكينه سوتله لفة وضلت تركض ورا بالصالة

سكينة ...بعد عيني اكل لتطلع جوعانة تنطحن روحك

وهو يخزرها وياشرلها بعينه علينه
تقرب اللفة من حلكة وتحجي ...عضها هاشم
هاشم ...ما اعض ما اريد

سكينة ..لا والله تعضها واذا ما تعضها ازعل

مصطفى ...شسالفة هاشم عضها كطعت كلبها لحد يباوع دورو وجوهكم خلو سكينة توكل هاشم

ضحك ابوي هز ايده ما عاجبة بعدين حمد ربه وشكره وشال ايده
باوعلي ابتسم ...دنيا صبيلي جاي يابة

شلت القوري جاي اصبله حچة بدون مقدمات
...عبد الصمد خطب دنية لمؤمن

طاح القوري من ايدي صرخت وطفرت ليورا وكلهم صاحو الله الله

وفاء طفرت جرت الوصلة واني كمت غسلت ايدي طفر عليها جاي التفتت شفت هاشم يضحك خزرته نصة راسه

مصطفى گال بأستغراب ...مؤمن مؤمن ما غيره
ابوي رد ...اي والله مؤمن حتى هوا گايللهم خطبولي دنية اريد اتزوج هم مو من كيفهم

درت وجهي اغسل وابتسمت بدون ما يشوفوني

مصطفى ...تفاجئت الاعرفه مؤمن حزين لهسه على مرته
سميرة ...الحزن يروح والجروح تطيب شنو يموت نفسه حتى الله ما يقبل

مرتضى ...يابة شنو گلت لعمي
...كتله الشور شور دنية اذا تقبل تعالو اخذوها بعبايتها

درت متفاجئة
ضحك ...شبيج قابل اخذوج بالعباية من صدگ

ابتسمت ونصيت راسي كلهم فكو حلوگهم مصدومين لان التمسو الرضا بعيوني وشافو ابتسامتي
امي قلصت عيونها بشك وضلت تباوعلي وتدرس شكلي

اني طلعت من المطبخ خزرت هاشم لان مستمر يضحك علي
مريت من يمه غمزلي شردت صعدت بسرعة
هاشم يتعمد يسوي بيه هيج حتى يخجلني ويخليني احمر من الخجل

سديت باب غرفتي وحطيت ايديني على گلبي احس بخفقانه واضحك بفرح
گلبي كأنه طير فرد جناحاته وطار حلق راحله

ضليت افتر وگلبي يغرد الضحكة شاكة وجهي وامي فتحت الباب ودخلت من الصدمة ذبيت روحي ع الجرباية وصحت
...اخ كلبي مادري شبي يوجعني

سديت الباب واجت طكتني على زندي
سميرة ...خطبوج لاباذر تخبلت هسة لمؤمن مكيفة وتركصين والضحكة شاگة الوجه

انخلست ضليت اباوعلها هزت ايدها ما عاجبها
...فشلتينا كدام الولد ضحكتي وعيونج دمعن الا شوية ليگول مامصدكة وعيونج تريد تدمع من الفرح

والله جنت شاكة بيج مو خالية بس سكتت خفت احجي وتصدميني وهمزين ما سألت اني لو جايتلي كايلتلي احب مؤمن لو تردينه جان لزمتج وكتلتچ لان مؤمن بيبان گلبه مسدوده

ابتسمت وحجيت براحة
...وانفتحن بيبان گلب المؤمن للدنية

..شوف تحجي بوجهي بدون ما تخجل
عضت اصبعها وكالت ...ان حجيتي اموتج سوي نفسج تفكرين وما مقتنعة كم يوم ومن يحاجيج ابوج كليله انطيني وكت افكر

هزيت راسي اي

طلعت ضليت اغمض عيوني ما مستوعبة الحچي السمعته ما مستوعبة مؤمن خطبني
غطيت وجهي وضليت ارفس بمكاني من الفرحة

طلع اباذر جان عائق بطريقه الي من تزوج ابا ذر خطبني مؤمن

للعصر ابوي دز علي گالي ها يابة موافقة بسيد مؤمن ابن عمچ لو ما رايدته لانه اكبر منج بهواي ؟

نصيت راسي خجلانة ضليت افرك ايد بأيد وكل كلام امي تبخر من راسي
كتله واني مدنگة مستحية ...الشور شورك يابة اذا تشوف مؤمن مناسب الي وتريد تنطيني اله اني ما اطلع عن كلمتك انتَ تفصل واني البس

هو فهمني مستحية لان ابتسامتي جانت تراسه وجهي گال ...هاي هيه يعني موافقة الله يرضا عليج بنيتي والله مؤمن ماكو منه ثنين
راح يسعدج ويحطچ بعينه

دنيا ...ان شاءالله
...بعد ابوج وعمره العاقلة سويلي استكان جاي خليني اشبع من جايج قبل لا ترحين من يمي

دنيا ...شسالفة يابة هاي اني وراكم اسوي القوري واجي

كمت للمطبخ واني احجي ويا ...هسة اسويلك اطيب چاي مهيل تشربه

عبد الرحمن ...اذا كل ما تفرحين تسويلنا جاي مهيل يعدل الراس بعد يومية نفرحچ

غطيت وجهي خجلانة ودخلت للمطبخ امي خازرتني
...شكتلج اني
...شنو شسويت

...كتلج شوية طولي يمه منچ يمه ما فهمتي غايتي
ما ردت ياخذون الموافقة بسرعة علمود ما يكولون دنية رايده مؤمن ولهذا السبب رفضت ابا ذر

اني كلت اكعد ويا عمتج واكللها قنعت دنيه بمؤمن حتى مايصير عدهم شك

ضليت ساكتة خجلانة اني هم غبية استعجلت هسة يگول ما صدگت اخطبها واني صدگ ما صدگت ردت اطير من الشباك

ابوي حجة ويا عمي وقررو يوم العقد امي راحت للخياطة خيطتلي بدلة لونها تفاحي
وسكينة سوت شعري الي
وحنان خلتلي مكياج تذكرت ليلى وجريت حسرة
وفاء جانت تصبغ اظافري گالت

وفاء ...هم مثلي ذكرتن ليلى من چانت تمكيجنا
حنان ...اي الله يذكرها بالخير جانت طيبة

دنيا ...بس لو افهم شعري ليش سويتنه الي واني ماراح انزع الحجاب
حنان ...لنفترض گعدتو وحدكم وسولفتو وراد يشوف شعرج شلون غير يشوفه مرتب

دنيا ...وانزع شالي كدامه؟ ولا انزعه لو مااعرف شنو يصير

وفاء ...نزعي داده نزعي حتى تتعودين على النزع
حنان ...وفاء
خزرتها وهي لامه ضحكتها حسيت كلبي بدأ يخفق

سكينة ...اول مرة دخلت بيها على هاشم بالغلط وجنت بدون شال اني اخترعت وهو طلع من البيت يركض مستحي

حنان ...انتم فلم لحد هسة اذكر اجة لونه مخطوف كلتله عمتي شبيك يكللها شفتها بدون حجاب

ضلينا نتذكر مواقفهم ونضحك نزلن البنات حضرن الضيافة واني بدلت ولبست حجابي رتبته زين
لبست سوارات ومحابس
خليت عطر وضليت انتظر گاعده بمكاني خجلانة وگلبي يخفق

افكر شلون راح يكون اول لقاء بيناتنا واني على ذمته شنو راح نحجي
يحبني لو بس هيج خطبني حتى يكون عائلة وياي

دخلت حنان لبستني عبايتي ونزلت رفعت عيني شفته كاعد بالصالة ومفرغينها
مابيها بس ابوي وهوَ وزوج عمتي السيد اليعقد النه

حنان وصلتني للقنفة وشردت تركض

ضليت افرك ايد بأيد متوترة واحس صوت گلبي يدگ بذاناتي
تم العقد وطول هاي المدة ما شلت عيني من حضني
وايديني افرك بيهن متوترة

رفعت عيني بأتجاها بعد ما تم العقد بس ما باوعلي وشكله كان جدي ابتسامته صغيرة
سلم عليهم بوسهم وهم يباركوله
واني كمت بست ايديهم

على ما التفتت ما لگيته طالع هو وزوج عمتي

اصفريت وانخطف گلبي حسيت البيت انهد فوگ راسي
حسيته خطبني بدون ما يحبني وشفقة على حالي بس
يگلك اول وتالي اتزوج ثانية خليني اخذها اجبر بخاطرها واكون عائلة

ضجت ونگلبت فرحتي حزن
وانقهرت من روحي
مرات نلح بالدعاء نلح نلح الى درجة الله ينطينا الشي الدعينا حتى نحصله بس حتى يخلينا نشوف ان هو مناسب النه

وهو شايف امور احنه ما نشوفها

سلمت وصعدت عبالهم خجلانة بس بالحقيقة جنت مقهورة وضايجة

وحتى بالليل راقبته من الشباك ماكو والليلة الوراها شباكه مفتوح وهو يكتب بدون ما يرفع راسه حتى

اختنگت كلش وحسيت روحي شكد غبية ومن اعترفتله فرضت روحي علي لان حسسته ما اقبل بغيره ولا اريد غيره واريده بس هو مثل الجنت اكله تزوجني والا اضل

ضليت ابجي وگلبي متعلعل طول الليل ثاني يوم عزمونه بيت عمي وطوعة جانت جاية اني ما ردت اروح بس امي كالت عيب وشعدهم همه شو بس عمج ومؤمن حتى ما نكول اباذر هنا وتستحين منه

حسيت هذه العزيمة مدبرة من قبل العلويات حتى يسون فد شي
لبست ورحت وياها من وصلت نزعت عبايتي وكعدت بالمطبخ ما خلتني عمتي المس شي

وطوعة گالت مقهورة ...مؤمن مريض سودة علي حسدوه عليج دنيه
غمزتلي وضحكت

رجف كلبي وفزيت ...شبي؟

ام مؤمن ...مادري والله بس معدته تأذي واليوم الصبح بس شرب جاي وزاد علي الالم
طوعة ...لا اصبله سوب دافي يشربه بلكي الله يرتاح

ضلت عيوني تراقبهن وهن يحجن ويتحركن
طوعة حضرت كاسة صبت بيها وخلت خاشوگة بيها

طوعة. ..اني توني حامل ماكدر اصعد وانزل هواي دنية صعدي اله هم حتى تشوفينه وتتحمدين اله على السلامه وهم تكسرين حاجز الخجل مايصير زواجكم ما مطول لازم تتعودين علي

بلعت ريگي بصعوبة باوعت لامي وعمتي
امي ردت ...اي روحي لرجلج اخذيله السوب يشربه كعدي يمه سولفي ويا
ام مؤمن ...هسة يطيب بسرعة

هزيت راسي وكمت شلت الصينية وصعدت وصلت لغرفته دكيت الباب صاح تفضل

فتحت الباب ودخلت لگيته كاعد مغطي نص جسمه مرتجي ع الجرباية بفانيلة داخليه نص ردن لابسة نظارة وبأيده كتاب يقرأ
موتني هذني الكتب شكد يقرا؟!!

من دخلت طبگ الكتاب ونزع نظارته
تمشيت يمه خليت السوب على الميز وحجيت بخجل واني منصية راسي
...الحمدلله ع سلامتك سيد

ابتسم رد بهدوء ...الله يسلمچ

اني الجنت متحلفة واكول اصير قاسية واصده وماريده لان مايريدني شفته ابتسم وساحت روحي

تطشرت كرامتي بالگاع لميت روحي و جليت صوتي
...اشرب السوب هذا دافي حتى تتحسن صحتك
سبل عيونه كال بصوت متألم ...يمكن صخنت
غمض عيونه متألم

تقربت خليت ايدي ترجف على جبينه بيها شوية حرورة
دنيا ...شوية حار راح انزل اسويلك كمادات

درت وجهي بسرعة اريد انزل لزمني من ساعد ايدي بقوة جرني
مؤمن ...هاي هيه طبت
وهمست بصوت يرجف ...ليش لزمتني؟ خليني احطلك كمادات تروح لحرورة احسن

جرني من ايدي صرت قريبة من فراشة كلش سوالي مكان واشر بعينه
...كعدي دنيه
كعدت خليت ايديني بحضني يرجفن

مد ايده اخذ ايديني خلاهن بنص كفوفه درت روحي علي احس گلبي يرجف

مؤمن ...شبيج ترجفين وين جرئتج لعد مو اجيتي واقتحمتي غرفتي واعترفتيلي ذاك الاعتراف ليش هسة ترجفين

رفعت عيني مصدومة ...وشنو انت لازم الاعتراف علي مثل اللزمة وراح تضل تعيرني بي؟ ترى اني مو بس علمودي علمود الكل سويت هيج تخيل هسة بحضن اخوك وكلبي يمك

حط ايده ع حلگي عاقد حاجبة خزرني وگال ...اششش سكتي اشش شنو هذا الحچي لج انتي صرتي حليلتي

سكتت خجلانة وبعدت ايده ...اسفة ما انتبهت لهفوة لساني

هز راسه اي وارتخت ملامحه
مؤمن ...برد ما تشربيني؟ ميت جوع

اشر بحاجبة ع الماعون
دنيا ...لا وعلي اگلبه عليك ماتشوف ايديني يرجفن
بس اقربه الك وانت اشرب

ردت اكوم لزم ايدي رجعني ...لا عوفي ما اشتهي شو مالي نفس شبعان

سكتت مد ايده ع طرف شالي ...امي تكول شعر دنيه يخبل اريد اشوفه
دنيا ...اكلك شو انته طلعت فاسد

حجيتها وكمت بسرعة عاقدة حواجبي
ضحك بصوت عالي واشرلي ...رجعي كعدي مو جاي احجي وياج

ضليت واگفه اباوعله رفع طرف حاجبه واشرلي على المكان
هزيت راسي لا ودرت وجهي اريد اطلع بعدني ما وصلت للباب حسيت بي جرني من زندي حيل وسد الباب بأيده الثانية
شهگت دفعني ع الباب وخله ايدينه منا ومنا حتى ما اكدر اطلع
رفعلي طرف حاجبة وگال ...مو گتلچ جوعان دنيه ليش تطلعين؟
دنيا ...شنو تريد اوكلك؟

هز رأسه لا نصة رأسه قرب وجهه من وجهي بشفته تحسس خدي غمضت عيوني خايفة وكلبي يرجف
ثبت شفايفه على خدي وباسني

ضل يمشي شفته ع خدي صعد خلاها فوگ عيني وباسني بجفني
حاولت ابعد راسي مستحية
ابتعد شوية عني جريت نفس ابتسم رفع ايده لزمني من حنجي رفع راسي

مؤمن ...حطي عينچ بعيني وگولي شنو بگلبچ
دنيا ...شنو اكول ماكو شي بگلبي

مؤمن ...لا اكو هواي حچي دنيه احچي ليش تراقبيني من شباكج ليلية وتضلين واكفة بالساعة؟

دنيا ...جذب ما اراقبك اني اجذب عليك

مؤمن ...ادري بيج وملاحظج من اول يوم بس غالطت روحي وكلت يمكن متوهم

ضليت ابعد عيوني عنه رجع تقرب مني اكثر وگال بصوت ناصي
...گولي دنيه احچي
...شنو أحچي؟

حط عينه بعيني غمضت ، نزل رأسه حسيت بي قريب مني لدرجة صرت احس بأنفاسه
باسني بين خدي وشفتي
حطيت ايدي ع صدرة دفعته خفيف وهمست
...سيد وخر فدوة

همس بصوت ذايب ...فتحي عينچ دنيه باوعيلي واحچي
هزيت راسي لا
مؤمن ...المايسمع الحچي يتعاقب ويفصل واني فصلي بوسة من شفايفچ

فتحت عيني مصدومة لگيته يباوعلي ويضحك
دفعته من صدره لزم ايدي خلاها على گلبه
همس ...تحسين بي؟ شلون تخربط نبضه گبالچ
دنيه عيونچ اخذني من روحي من اول نظرة
صرت ما اگدر اشوف عيون غير عيونچ
كل العيون مرت عابرة الا عيونچ سحرتني واخذت گلبي مني

دنيا ...سيد .... قاطعني
نصة اكثر صار وجهه بوجهي
مؤمن ...گولي مؤمن اريد اسمع اسمي بصوتچ

دنيا ...خوفتني عوفني
مؤمن ...گولي مؤمن واعوفچ

دنيا ...اني عمري ما صحتلك مؤمن ومن گتلك سيد تفاجئت خليتني اصيحلك عمو السيد
بعد شلون هسة تريدني اكول اسمك حاف استحي

رفع طرف حاجبة ...دنية
دنيا ...انتَ يمكن مو السيد متلبسك جني مادري المرض أثر بيك

سكت رفع طرف حاجبة اكثر وضحك تك خد
لزمني من خصري حيل قربني اكثر ورفعني صار صدري على صدره واكدر احس بنبض گلبه

مؤمن ...متوهمة اني المؤمن الاغرته عيون الدنيه وخلته ينحرف عن طريقه ويضل يهلوس بأسمها ويتعوذ بالله من عيونها
مو من الشيطان

دنيا ...هسة صرت ذنب
مؤمن ...يا حلاته من ذنب

دنيا ...خليني اطلع
مؤمن ...مو قبل ما ترضيني دنيه يلا گولي البگلبچ واذا صعبة كولي اسمي

ردت انطق احس لساني مربط
مد ايده فتح الحجاب ونزله من راسي
مد ايده ضل يتحسس الترجية بأصابعه ورفع ابهامة لشحمة اذني
ميلت راسي قرب شفايفه من اذني الثانية وهمس

مؤمن ...انتي دنية مؤمن ، گولي اني دنيتك مؤمن
...انتَ مؤمنـي
نصيت عيني خجلانه شمني وباسني جوة اذني

مؤمن ...اني مؤمنچ وانتِ دنيتي

لزمني من ايدي مشة كعد وكعدني كباله احس وجهي راح يطك
دنيا ...عيب اريد اطلع
مؤمن ...مو عيب انتي حلالي اني طلبت من عمي اجي اكعد يمج واتعرف عليچ وحتى طلبت منه نروح اني وياج نشتري ذهب سوية

نصيت افرك بايديني ...هو كالي حلالك وانتَ بكيفك اذا تريد تجي تكبعها وتاخذها تعال

ضحكت .. لزم ايدي يمسح على عروگي
مؤمن ...ليش هيج دنية صايرة جلد وعظم من شفتج مرة ماجانت هيج
دنيا ...شوكت شفتني
مؤمن ...من چنتي مصبغة وردي شفتيني وغطيتي حلكچ بأيدج مستحية

ضليت اضحك مصدومة ...ليش انتَ لاحظت
مد ايده يتحسس ركبتي ...اي لاحظت لمعة عيونج ولهفتچ وراها دموعچ من دخلتي
حجيتي وياي لحد هسة اذكر حچايتچ

"احلفك بـ الي اقتلع كلبي من صدري وزرعه بنص صدرك"
هيج تحبيني دنيه تحسين گلبچ الله القاه بصدري

هزيت راسي عيوني مدمعة حضني بحنيه حط راسي على صدره ثبته وباس راسي
...عسى دموعچ غسلني دنيتي الترست روحي فرح

ضل يسولف وياي شوية طوعة دكت الباب وصاحت دنية عمتي تصيحلج
ابتعدت منحرجة لزم ايدي

مؤمن ...تذكرت شي
صفنت بوجهه
مؤمن ..كتبتلچ كلام بيوم الكعدتي بالمطبخ وسولفت وياچ شوية
عقدت حاجبي
كام للميز باوعتله وابتسمت شكد راقبته وهو هنا كاعد يكتب

انطاني ورقة مكتوبة خلاها بأيدي وهو مبتسم
طلعت اركض من يمه وجهي احمر ضميت الورقة لحد مارجعنا للبيت
كعدت بالغرفة فتحتها وعيني تترقب الكلمات المكتوبة
شنو بيها شوق لهفة حب ..

كاتب ابيات ببداية الورقة

وطرُ مافيه من عيبٍ سوى
انهُ مر كلمحِ البصرِ
سددَ السهم وسمَى ورمى 
ففؤادي نُهبة المُفترسِ
والذي اجرى دُموعي عندما ..
عندما اعرضتَ من غيرِ سبب
ضَع على صدري يُمناك فَما
اجدر الماء بإطفاءِ اللَهبَ ...

وجواها كاتب ...اجرت دموعي عَندما .. عندما ذهبت تاركة خلفها قلبي يحترق
ومقلتي تتمزق ، و عقلي ينهش
وذاكرتي تلحن ألم بعدها

(#عَندما المقصود دماء
العندم هو نبات ذا سائل احمر يخرج من جذعه ..)

دمعت عيني طلع يحبني مثل ما احبه
ومن اوكف واني احترك بحسرتي هو هم يحترك وياي
جعل عينك سالمة وكلبك بارد مؤمن جعل روحك مرتاحة

بسرعة بسرعة اجهز لعرسي لان خطوبتنا ماتطول حتى اسبوعين
ضليت اجهز بروحي وامي طلعت للسوك تسوكتلي ملابس
ضل الذهب سيد مؤمن يريد نشتري سوية

قبل العرس بيومين روحتنا للسوگ ومؤمن ما شفته من ذاك اليوم
لبست عبايتي وجواريبي ووكفت انتظر امي
اجت تمشي بصعوبة تعبانة من فقراتها
طلعنا لكيناهم بالسيارة منتظرينا يم الباب
نزل مؤمن سلم وفتح الباب لامي صعدت
درت صعدت من الباب الثاني طلع بينا للصايغ
رفعت عيني اباوعله بالمراية ولا كأنه يعرفني وزوجي يحجي ويا امي وعمتي بجدية وباله مو يمي ابد

ضجت ودرت وجهي للشارع احس روحي اريده بس الي ولسانه مايطلخ ع لسان غيري
ماتوقعت روحي هيج انانيه بالحب بس هذا اكيد ما يخليني ابعده عن امه واخته وباقي معارفه

وصلنا للصايغ مزاجي ماتغير ضليت ضايجة هو گال ...شنو يابة دنية ما عجبج شي؟
رفعت عيني باوعتله رفع ايده مسح بالمنديل قطرات عرك منتشرة ع جبينة جوة عمامته
عدل عبايته البيجية
رفعت طرف حاجبي وانتبهت هو فاك حزنه وما لابس اسود

رفعلي حاجبة ورجع دار لامي وعمتي
...شوفن انتن اريد احجي وياها ع جهة اشوف يمكن اكو شي ببالهة مستحية تحجي كدامجن

امي من جوة البوشية كالت ...ياا تستحي مني لو من عمتها شسالفة
ام مؤمن ...خليهم بيناتهم احسن

اشرلي مشيت كدامه وكفت ع صفحة بالمحل
مؤمن ...شبيج ما عجبج الذهب هاي افضل واحسن واجمل الموديلات
دنيا ...لا انتَ الماعجبتني

نصيت راسي رفع حاجبة وابتسم ...ها اغير العباية؟ لو ارتب لحيتي اكثر علمود تعجبج

رفعت عيوني اله ضايجة حجيت مقهورة ...لا ما سلمت عليه حتى شسالفة
اسألني شلونچ؟ اسألني اذا قابلة ع موعد العرس
اذا ملحكة اذا مضغوطة من التجهيزات
ليش تحجي بس وياهم ولا كأنك تشوفني؟ حسستني اني ما موجودة يمكم

ضل مبتسم وعيونه تتاملني
...لا يابة والله گلبي وروحي يمچ بس اني گدام اهلي واهلچ ما اكدر ابين

دنيا ...هاي هيه
حجيت بانزعاج
مؤمن ...لا بعدج ضايجة خاف لان العرس قريب؟ دنية العرس اذا اتأخر اكثر ينشف ريگي والحسن

دنيا ...على اساس هيج مهتم وميت عليه لو مشتاقلي
ضحك ...شلون لعد؟ البارحة الروح الج حنت حيل دنيه وذكرتچ وعيني من الشوگ دمعت

دنيا ...اي صير شاعر واضحك علي بس هسة والله اذا ماتحجي وياي وتسولف وياي بعد ازعل وما ارضى

هز راسه برضا اشترينا الذهب واتغدينة ورجعنا للبيت ..

اجة يوم عرسي احس نفسي مضغوطة ومتوترة كلش اريد بس حجة ابجي عليها
وكأني مسافرة مو متزوجة ورا بيت اهلي

طول ما يجهزوني عيني تدمع
حنان ...كافي بواجي كلنا هيج خفنا تالي ماطلع اكو شي يخوف ولا يضوج بالعكس استقرار عاطفي
يصير عندج حضن يلمج من تحسين روحج وحيدة
انسان يلمس جروحج ويداويج
والله من يلفج بحضنه وينام بالليل تسوة الدنيا وما بيها

وفاء ...اني اكول ليش ترحين تنامين من وكت طلعتي علمود حضن مصطفى

ضلت تضحك وتخزر بيها

اخذونه للمصورة صورتنا صور سوية
بعبايته لفني من طلعنه ورجعنا للبيت
خلصو صعدوني للغرفة مبدلها جايب جديدة والميز صابغة ومعدلة

لكيتهم مخلين عشا واني روحي ما اشتهيها اريد اتقيء
بس طلعن نزعت الحجاب بصعوبة ونزعت البدلة
اخذت ملابس وفتت للحمام غسلت وتعطرت وطلعت لبست روب لفيت روحي بي زين طويل وردي

ومشطت شعري رتبتة
باوعت للاكل ضايجة احس من نزعت البدلة اشتهيت اكل
بس هو ما موجود والاكل برد
اخاف اكل وحدي يكول مفجوعة واخاف اضل انتظره يطلع متعشي واستحي اكل يمه من يجي

بعدني افكر ودك الباب ركضت فتحته دخل للغرفة باوعلي برضا
مبتسم ...ماشاءالله عليچ

سديت الباب ضليت لازمة الروب
باوعلي وگال ...صليتي؟
هزيت راسي اي
مؤمن ...الحمدلله

نزع عمامته والعباية علگها رجع باوعلي ...ليش واكفة يابة ماتكعدين ؟
دنيا ...متعشي؟

مؤمن ...لا والله ومعدتي تهددني اذا ما اكل هسة تسوي بيه سالفة ماتتسولف

دنيا ...نتعشى سوية؟
مؤمن ...تردين انزل وتضلين تتعشين وحدچ تاخذين راحتچ

هزيت راسي لا
مؤمن ...هاي هيه يابة بس نصلي ركعتين وناكل
هزيت راسي

راح يغسل ويتوضأ اني توضيت من غسلت حضرت احرامي والسجادات وانتظرته يطلع

ايدينا ينكطن ماي ووجهه مبلل ارتخت ملامحي واني اباوعله الطمانينة والراحة كلها بوجهه

ضل يباوعلي وهو مبتسم نزل رداناته
مؤمن ...بارك الله بيج

صلينه سوية رفع ايدينه للدعاء وخصني بكل دعوة ضليت اباوعله مبتسمة واخيرا صرت من ضمن دعواتك
وصرت من اهلك القريبين واكدر اشم عطرك والزم ايدك واكون بهذا القريب منك

.

....

ليلى ...

اخذتني الدنيا ضليت بكل خطوة اعض العشرة ندم
تم اعتقالي ، ومن مكان لمكان وصلت لبغداد

لكيت نفسي بين ايدين ضابط اشبه بالمجرم عذبني اشد انواع العذاب بس حتى اعترف على روحي
وضليت ناكرة كل التهم الي توجهت الي الحقيقي منها والزائف

وصل خبري لخالتي عن طريق صديقها ابو خلدون وبعد ما اجة للمركز يلا شوية خف عذابي وصارو يتعاملون وياي بطريقة شوية احسن

گال انتي صدك كنتي وياها
نكرت حتى گدامه وگلت بريئة هيه صديقتي وبس

ضليت ثابتة على موقفي وخالتي تبجي وتريد بس تنقذني من حبل المشنقة
واني ابجي على ابني وميتة بحسرتي
بلغت خالتي كلتلها خالة صار عندي ولد عفته يم اقارب بايران ماكدر انطيج كل التفاصيل

هي فهمتني وجانت تبجي ...الله كريم خالة ان شاءالله ابو خلدون يثبت براءتج وتطلعين منا سالمة غانمة

لزمت ايدها ...لا تحجين للسادة همة اصلا مارادوني ولا رادو ابني خلي يم العالم بلكي اطلع وارجعله اعيش ويا اربي ويصيرلي سند

نسيمة ...ولا احجي ما اكللهم لو حتى صادفت واحد منهم وسأل عنج اكللهم ماعندي اخبارها
ليلى ...اي النوب يعرفون ام ابنهم بالسجن يصيرون حنونين ومن وصللهم خبر حملي كلهم تبرؤ مني واولهم قيس اخخ شكد كارهته اخ
عضيت اصبعي ندم

نسيمة ...لا تنقهرين هسة بلكت الله تطلعين
ليلى ...خالة خاف مااطلع دوري ابني بس لا تاخذينه خلي يم العالم اعرفهم زين راح يدارونه ويحجونه بعيونهم زينين

هزت راسها تبجي ومسحت دموعها
راحت واني رجعت لمكاني خايفة ارجف وعيوني تدمع المكان هذا جبتي نفسي اله
اني ورطت روحي ودمرت نفسي
وهسة جيب اليطلعني اذا خف حكمي شوية ممكن انسجن مؤبد مو اعدام ..

ضليت حوالي شهر موضوعي يوصل للحل ويرجع ينسد وكأن اكو واحد مايريدني ارتاح ويريد يعدمني گوة

حسيت فاروق وجماعة الحزب ورا السالفة
بس ماكدرت احجي شي ضليت انكر

الى ان اجة يوم المحكمة ، كانت اطرافي ترجف وعيوني تجري
اباوع لخالتي وگلبي يريد يوگف اذا احجي حرف احس روحي راح تطلع والغصة تجرح بلعومي

حسيت بيبان الدنيا كلها انسدت بوجهي
عيني تترقب القاضي منتظره يحكم
ضليت منصية ومغمضة عيني واهز براسي اتوسل ربي يطلعني منها سالمة لخاطر ابني مو علمودي اني يضربني مرض استاهل كلشي يصير بيه

جمدت اطرافي وانشلت حركتي من حكمني القاضي سجن 10 سنوات
باوعت لابو خلدون هز راسه بمعنى هذا الأگدر علي

ضليت ابجي انهاريت نصيت منهارة ورجعت رفعت راسي ابو خلدون يباوعلي مقهورة ويحرك شفايفه "الحمدلله بس 10 سنين"

شنو بس عشر سنين ابني يضل بدوني عشر سنين؟!

ساعة السودة الرجعت بيها للعراق ذبيت نفسي للموت بأيدي

انهاريت وكل قوتي انتهت الضابط من معارف ابو خلدون كال حمدي ربج انحكمتي 10 سنين
وتطلعين وراها ترجعين تكملين حياتج غيرج ينعدمون

ما اقتنعت بكلامه ودخلت بكأبة
كاعدة بنص السجينات واسمع حجيهن وسوالفهن
بيهن القاتلة وبيهن العاهرة
زين اني مو مثلجن اني حتى تبت ليش هذا مكاني مو لازم اطلع منا مو لازم يعفوني

وصيت خالتي ما تحجي واذا وصل خبري لعمامي لا تكللهم اني مسجونه تكللهم مادري بيها
فوك كلشي عشته فوك ضليمتي تلزك بيه سالفة السجن! والله من اطلع اصير منبوذة اضعاف

سهير ...المضحك المبكي
اني وياچ نفس التهمة بس اني بريئة وعمري ما دخلت ويا احزاب ولا اعرف شي عنهم؟
اختي هدير وعادل لفقو كلشي ورشو الضباط
وزورو اعتراف عماد
ماعرف عذبو وجبروه يعترف بشي كذب! علمود ادخل السجن وانعدم

ليلى ...عزة بعين اختج صدك ساقطة
...ما انسى ذاك اليوم من دخلو واخذوني من بيت عمي والتهمة شنو؟ خيانة البلد
عماد اعترف انتي ويا بنفس الحزب!
واني وحق علي ولا اعرف الاحزاب ولا واصلة الهم

اذكر عمتي علياء ضلت تلطم وعمار تعارك وياهم والضابط جان كبير راد يعتقل عمار (صديق جيران)

اخذوني للتوقيف وبدل ما يستجوبوني ضلو يعذبون بيه اشكال العذاب
حتى كهرباء كهربوني بس حتى اعترف على نفسي
يردوني اقبل والبس روحي التهمة

صرت مثل الجثة حتى عمار بمكانته ونفوذة ماكدر يخلصني منهم

لهسة اذكر هبة اجت كوة خلوها تشوفني تبجي منهار خدودها مزلغة
وعمار وراها منهار اكثر منها واني جنت مو اني
وجهي ازرك من الضرب وعيوني مورمة ماشوف بيهن زين
وجسمي يأذيني بسبب الكهرباء

هبة ...دمرونا وهجمو بيوتنا هدير وعادل انهزمو ومالهم اثر
باوعت لعمار مصدومة ...انت بيومها مو اشتكيت
عمار ...ما لاكين شي بالشقة اذكياء ما ينغلبون وهم بأسوء حتلاتهم
هبة ...من عدها واختفو ما لگينالهم اثر صار اسابيع ندور وعماد باجر محكمته بس الله يستر

شيهانة ...شنو ذنبنا عماررر شنو ذنبنا ليش ننحكم واحنه ابرياء
ضليت ابجي بضعف وقلة حيلة

عمار ...هجموكم هجم
جبران راح وبعد مارجع ما اله اثر الله يعلم شنو صار بي ميت عدل مسجون
وعماد باجر يتحاكم وانتي .... اخ اركض ركض وهاي هبة تشهد كلشي ضدج الضباط العالم بكل نفوذها ضدج هسة جاي اسوي المستحيل حتى ما تنحكمين اعدام وما تتصادر املاكج

شيهانة ...اذا ما انحكمت اعدام اطلع
عمار ...لا مؤبد ويمكن سنين طويلة
شيهانة ...وشنو فايدة املاكي جا؟ واني مسجونة كلشي ماريد بس طلعوني

عمار ...احنة نحاول والباقي يم القاضي تفائلي يمكن يجي عفو وتطلعين ماريدج تأيسين من الدنيا

رديت واني ابجي ...انت الي مأيس
جانن عيونه حمر دار وجهه
هبة منهارة عيونها يصبن كالت ...عادل وهدير وراهم ظهر قوي ثنينهم طلعو ينتمون لحزب البعث مادري يا حزب والهم مكانة بس محد يدري بيهم هسة بدينا نكتشف
ضيعو عماد وراح يضيعونج واني خايفة لا يجي يومي مثلكم بنتي هداوي وين تروح؟

شيهانة ...الله ينتقم منهم الله يهلكهم جلاب حتى جبران همه الضيعوووه

عمار ...كافي هسة كافي تنحل ان شاءالله
يحجي مأيس عرفت هنا اكبر نفوذ و واسطة ماراح تفيدنا
...شنو غايتهم هدير وعادل شيردووون اني شسويت الهم؟

هبة ...طمع عادل طلع موقع عمي وماخذ الفوگاه والجواه عمت عين الفلوس العمتهم عمت عين الفلوس الخلتهم يلعبون بينه لعب ويوكفونه ع تك رجل

طحت بالكاع ابجي واضرب راسي مقهورة
هبة تبجي وتكول ...انهجم بيتنا اتدمرنا والله اجانة المختار يكول عادل بايع البيت الكم مهلة شهرين لازم يتسلم للمشتري

شيهانة ...شلوون شوكتتت
عمار ...توقعت مزور بس بعدين اكتشفت كلشي اصولي السالفة جديدة عمج يكول مادري دائما اوقع اوراق تخص الشغل واني مغمض حتى ما اقرا لان هذا ابني!!

شيهانة ...وابنه اخذ الفوگه والجواه وخلاكم حتى بدون بيت
عمار ...سهير كافي تدمرتي اني مستمر بقضيتج ما اريد يصادرون املاكج وفلوسج

هزيت راسي كمت وكتله ...هاي هيه اذا ما صادروهن انته تصرف دير بالكم عليهم عمي وعمتي وهبة والبنات
كلشي يخصني تحت امرهم

هز راسه
شيهانة ...الحكومة ما لاحظت غيابهم لو بس علينا
هز راسه لا
عمار ...عادل حسب البحث مسافر لخارج العراق رحلة علاج
وهدير مالها اثر وكل ما تنفتح قضيتها تنسد
التزوير والجذب يمشي بدمهم
وعدهم نفوذ قوي ومعارف اقوى ساندين ظهورهم

ضليت بس ابجي واحس روحي انسلبت
ماكدر اغمض عيني واتخيل الدمار الاحنه بي
ماكدر اتخيل الجاي نعيشه شكد مؤلم
جبران وين؟ عماد شنو مصيره؟ اني شنو نهايتي؟ ليش الطمع عمى عيونهم ودمرونه؟
هي مو تحب جبران ليش متزوجة عماد وتخونه ويا عادل؟!! يعني تلعب ع الحبلين وكلبها يم الثالث!
كثرت الاسئلة براسي ومالها اي جواب

اباوع للمكان اظلم ورطب وروحي ترجف من الرهبة والخوف كل شريط حياتي يمر كبال عيني ليلية
ابجي لحد ما ينشف دمعي وانام وعيوني ناشفة

تمنيت اموت وارتاح من هذا العذاب
ما شفت راحة بحياتي
من ساعة مادخل مهيب حياتي واشتغلت غيرة هدير فتنت و وهمتهم اني احبه وخلتهم يزوجوني اله واني ما ارتاحيت

ولا شفت راحة .. ياليت الموت اخذج يا هدير من جنتي برحم امي
انتي مرض انتي ابتلاء
انتي مرض خبيث خطير مؤذي
سرطان دخل بيناتنا وهلك كل واحد موجود بطريقه
حتى الطفل الرضيع ماسلم منج!!

اطفال ماتو محتركين ويا اهلي جهال اختي واخوي
ماتو محروكين وانتي ورا حرگهم
انتي وعادل فنيتو بيت اهلي وهسة بيت عمي
جعلكم ما تتهنون بفلس ولا ترتاحون بحياتكم
ونفوذكم وقوتكم ما تدوم
بجاه الحبيب المصطفى

هبة ...

نترقب وننتظر بخوف ، الساعة نحسها ما تمشي
عمي مريض وعمتي من الصدمة ما تحجي
كاعدة يمهم بالبيت نزهة ايدها ع خدها بباب المطبخ
واني بالصالة ابجي ع حظي ونصيبي
واتمنى يدخل من ذاك الباب ويكلي كلشي حلم كعدي اني الج ويمج الج انتي وبنتج
اني ما خنتج ويا زوجة اخوي وهدير ماعندي وياها شي

مسحت دموعي وباوعت لعمتي تبجي وخايفة
هزيت راسي متحسرة ولميت شفايفي بأسى
اني الجنت اكول عادل ما يحط عينه ع بنية يحبها اخوي
طلع مصاحب وحدة راسها كل ليلة بحضن اخو الصغير!! اخو اليموت عليها ويعشك طاريها

رجاء وزهراء نزلن من الدرج سوية يحجن بصوت ناصي
من شافنة سكتن وراحن للمطبخ
بعدين رجاء طلعت تحجي
رجاء ...ننتظر خبر عماد وراها ترجعون ويانه للبصرة اذا تضلون هنا يموتكم القهر والاذية

عمي نطق بصعوبة ...ما اعوف عماد انه
رجاء ..بوية اذا اضل ابغداد تروح روحك كل ماتتذكر المك ومصيبتك نرجع للبصرة سوية واحنة نشوف حل لعماد
حتى لو ننطي عمار يوفرلة كلشي وكل فترة واحد من عدنه يجي يزوره بالسجن

باوعتلهن مقهورة متفائلات ينحكم مؤبد
ما يدرن عماد راح بيها لفقو اله تهمه وحطوله ادله مثل ما يكولون وشهدو ناس ضده وضد سهير كله باطل
كله باتفاق ورشاوي حتى الضابط ضدهم الله يعلم شنو من مبالغ دافعين حتى يدمروهم

ضليت اسأل روحي متعجبة
معقولة الطمع والحقد والغيرة توصل الانسان لهذا الحد؟
ادري بيهم يغارون هدير تغار من سهير تكرها تموت منها
وعدها طمع وحقد وعادل بأخر فترة بين غيرته من جبران شكد حسيته فرحان من اختفى وما اله اثر

ومكيف بالفلوس كلي جملة "الورث يتوزع بيناتنة ثنينة اني وعماد والبنات ننطيهن نسبة بسيطة مانخلي فلوسنا للغرب" شكد عادها علي باخر فترة

بس ما توقعت طمعه يوصله لهاي المواصيل

بيوم محكمة عماد ما كدرنا نروح عمي طريح الفراش بس واحد من عمامهم وعمار موجودين
اجو منهارين
غسلو بالمغسلة البرا ودخلو سلمو ع عمي وعمتي وكعدو يمهم

عمي سألهم بصعوبة ...شنو انحكم؟
عمار ...ما انحكم تاجلت

حجاها ونزل راسه وسجاد ابن عم عمي حميد ضل منصي يهز راسه مقهور وايده ع رجله يهزها
لزم سبحته وكام
...اترخص رايح انام شوية ارتاح تعبان

انسحب وراح للاستقبال تمدد ع القنفات
حسيته شارد من شي وبحلگه حجي صعب يحجي

عمار گال لرجاء ... هو شوية سالفته صعبة يمكن ما ينحكم مؤبد
رجاء ...جا شنو ينحكم لا تكلي اعدام

عمي انهار حتى حلگه ضرب شرجي من سمع حجي رجاء وعمتي ضلت ترعش وتبجي
تراكضو لعمي وسجاد طلع يركض شالوه للمستشفى

رجاء كعدت بالگاع تلطم ...الله ياخذني شنو حجاني لو ساكته احسن
هبة ...خليهم يتهيئون ترة عماد سالفته صعبة مبين ماشفتي الوجوه

زهراء شهكت ...صخام الصخم عيني عمية عليك عيني ياخوية عمية عليك
رجاء ...ضعنا تدمرنا من الله ياخذكم ياهدير وعادل وينتقم منكم عسى اشوف بيكم يوم متدمرييين

هبة ...هاي هيه انهجم البيت على رؤسنا

حجيت بخيبة امل
زهراء كالت بمعرفه ...طبعا عماد ينعدم والله ينعدم علمود يتزوجون
رجاء ...ليش همه يهمهم حلال حرام اذا سهير وعمار يكولون لكيناهم سكارى بالشقة
هذول حتى من الله ماعدهم مخافة يعيشون بالحرام اصلا بس هو يلوگ الهم

زهراء غطت وجها تبجي
عمي انضرب جلطة وضل بالمستشفى خطية عمار وكف النه وكفة واكيد عمامه ما قصرو
اكو بيهم اجو من البصرة يصيرون ولد عم حميد واكو بيهم اولاد عماته
لان ماعنده اخو غير راضي الله يرحمه هذول حسبو اخوهم وشالو شيل

مر اسبوع واحنه شايطين ونخاف تجي ساعة موت عمي وتكسرنا
احنه مستقوين بي حتى لو بس النفس يصعد وينزل نشوفه خيمة فوك رؤسنا

اني حتى لاهلي مارحت ماريد اعوفهم بهيج ظروف وهم بعدني ع ذمة عادل

جان يوم كئيب غيم الجو يخنگ
طلعت وگفت بالطارمة مختنكة رفعت عيني للسما وگلبي مقبوض طلعت رجاء حالها اسوء من حالي وكعدت يمي

حطت ايدها ع خدها واخذتها الصفنة الله يعلم وين
سافرت بتفكيرها لالف محطة مؤذية لنفسيتها
عاشت كل مشاعر الحزن بدقايق

اندگ باب البيت شالت ايدها مخترعة ردت اگوم گالت لا ضلي اني گايمة
راحت فتحت الباب، ودخلت مرية لابسة عباية بدون حجاب تبجي وتعيط

ام عمار ...عماد انعدم عدمو بالرصاص ........للحكاية بقية

يبقى السؤال ... ما حال ريحانة؟

اين جبران؟

هدير وعادل اين ذهبوا؟

ما هو وضع سيد قيس مع العلوية فاطمة؟

هل سيعلم ان له ولد في ايران؟ وهل له لقاء اخر مع ليلى؟

هل ستجتمع الشيهانة بابنائها الثلاث؟

سنعرف كل اجابات كل هذه الاسئلة في الجزء الثاني
ينزل بعد شهر من تاريخ اليوم 🖤

شكر من القلب لصديقتي (ريم علي) لانها كملت هذا البارت 🖤

كتبو ملاحظاتكم في حال اكو اغلاط بالبارت اني من اتحسن اصححها وارتب واعيد سرد الحدث الخطأ

متابعة لقصة ( ملاك بيد القسوة ) للكاتبة mays_18a

mays_18a

mays_18a