رواية حمائم تخشى الطيران الفصل الحادي وثلاثون 31 - بقلم فاطمة العبادي

فاطمة العبادي

في ... #حمائم_تخشى_الطيران

قراءة ممتعة كيكاتي 🖤 ..

ياخذنا قطار العمر لمحطات بعيدة ..مرات تكون مزدحمة تشوف بيها وجوه كثيرة
يكون بيها حياة شغف حب بهجة
ومرات تكون مهجورة قاسية باردة ما بيها دفو
ما بيها غير صوت اغصان الاشجار اليحركها الهوى

هو بكيفه .. ينزلنا بالمحطة اليريدها ويفرض علينا النزول
لان احنه اختارينه الوجهة بدون قصد او تفكير واحيانًا نختارها بقصد وبرضانا بس كنا موهومين بعسل الحياة وبأغلفة وهمية واقنعة حلوة
ما كنا نعرف الحقيقة وراء هذا العسل المدسوس بي سم
والاغلفة وراها خوف و الاقنعة تخفي وراها وجوه وحوش بشرية مستعدة لافتراس ضحيتها بلمحة البصر

تمشي بينا السيارة كلنا ساكتين قيس باوعلي بعتب نصيت وكل ما تجي عيني بعينه الگي بيهن عتاب وألم
حتى وجهه متغير وكأنه بالايام السابقة كان يصارع الموت ويتلاوا وياه

خله عكسه ع الباب وقبض ايده
سند راسه ع قبضة ايده وغمض عينه حواجبة معقودات احسه متوجع بس مادري شنو اليوجعه
بعدين افتهمت وجعه جان روحي .. روحه جانت توجعه بسببي وگلبه مشلوع من وراي

اتمنى بهاي الساعة اموت ويرتاحون مني ومن همي
اتمنى اختفي من الوجود ومحد يشوفني
اتمنى اغمض عيني وافتح الگى روحي بحضن امي ما ميته واشيل راسي خايفة يگعد ابوي يسمي علي ويلمني لصدره يمسح على راسي ويگلي بحنية مثل ما جان يگولي من جنت صغيرة
"عدوچ الله علي بالدنيا وبالحلم"

گوم يابة اگعد عدوي نفسي
هيه الدمرتني ، وشكد صعب على البشر يكون عدو نفسه

طلعت مني نشغة لا ارادية مديت ايدي جريت عبايتي من يم صدري رفعتها مسحت بيها دموعي وغطيت حلگي موجها نظري للشارع ولازگة روحي بالباب

سمعت تنهيدة هادي ، تبعتها غصة قيس حسيته غص بنفسه چان مخنوگ
زادت دموعي مغطية حلگي بالعباية وعيوني تصب متحسرة على روحي وعلى عمري وشبابي

هادي تحسر و گال بصوت ناصي
...لا تبچين بعلي ما يوصلونچ لو على گص رگبتي يوذرونا كلنا وما ننطيچ
سمعي ليلة بيمن احلفلچ وتصدگين ما يتدنون صوبچ ماخلي واحد يجيس طرف ثوبچ

اجاني صوت قيس المخنوگ ...اذا رادو يوصلونچ لازم يتعدونه بالاول
واحنه مستعدين نتكتل وما ننطيچ

رفعت العباية غطيت وجهي كله بيها وضليت ابچي بصوت عالي بهضم على روحي وحياتي ومستقبلي التدمر بسبب رعونيتي وعدم تفكيري بمصيري

قيس ...عوفها تطلع نار گلبها بلكت تتوب وتضل تحسب الف حساب للشغلة قبل ما تسويها

سكتو هدات شوية بس ضلت دموعي تصب جريت ردن العباية غطيت بي ايدي وخليته على حلگي اخاف يطلع صوتي واني ابچي

هادي تحسر متضايق و گال ...حاتم شغلي المسجل هذا اريدن اسمع روحي تعلعلت وانسلبت

حاتم ...شتريد
هادي ...ما تعرفني شأريد چا انه لو ما صارلي سنين افتر بمسجلي يمك ومشغل فؤاد سالم شلون؟

حاتم ...بوية احنه ناقصنا ضيم وقهر اسكت خلينا سكتاوي احسن
هادي ...اكل تبن ما اگدر الدنيا وضيمها يردنه هذا العزيز

مد ايده شغل المسجل وطلع اغنية ......

جانت مو كلمات لا والله ملح على جروحي توصف حالي وضيمي و وحدتي
باوعت لقيس بعدة ساند راسه ع قبضة ايده ويباوع للطريق عيوونه حمر وكل شوية يرجف فكه ويبلع غصته
اشوف تفاحة ادم تصعد وتنزل مال واحد محترگ گلبه وصدره بي نار

رفع ايده الثانية فرك عيونه ونزلها بحضنه
درت وجهي للطريق بلعت غصتي

ضل هادي يعيد بالاغنية واني اسمعها وعيوني تصب
حسيت گلبي راح يوگف من كثر القهر

طال طريقنة وكان محمل بالحسرات والخوف
ايدي ترجف لاحظته عينه صارت على ايدي شگد تمنيت يمد ايده وياخذ ايدي بين ايدينه ويهدأني بس الظاهر السيد كرهني
واستاهل لان اني مو ادمية وخربت بيتي بأيدي وحياتي

لو ضاله على شغلة خالتي يمكن اكو امل يرجعني بس هاي السالفة قطعت كل خطوط الرجعة بيناتنا

وصلنا للبصرة يم بيت جبير كلش واگفين يمه زلم لابسين دشاديش نزلو هادي وحاتم وقيس
سلمو عليهم كان واحد منهم طويل كلش اسمراني عيونه بنيات وشعره ناصي
لابس دشداشة بيضة ولازم سبحة بأيده

اشر لهادي يلحگه راحو يم مكان بي جذوع نخل مغطياات بزوالي
من وراهن طلع تفگتين
بجيت ولطمت رجلي مقهورة ومتحسفة

شالهن هادي شمر وحدة لحاتم والثانية خلاها على كتفه
اباوع شو هذا ابو الدشداشة البيضة تحزم وشال سلاح وصعدو ويا شباب ثنين بسيارة

اجو الولد صعدو وخلو التفگ جوة الكشنات ضموهن وشغلو السيارات وطلعو
التفتت اشوفهم ذولاك طلعو ورانه بالسيارة تلاثتهم والنوب مسلحين

هادي ...لا تتلفتين

ليلى ...هذول منو ليش طلعو ورانه

هادي ...خوالي

سكتت من شفت اجوبته مختصرة تقدمت وخليت راسي على الكشن الكدامي الصاعد بي حاتم ضليت مخليه جبيني ومنصية

مد ايده قيس من يم صدري ورجعني ليورا
باوعتله خازرني
هادي ...نامي اذا تعبتي

تقرب قيس وگال بصوت ناصي ...نامي على چتفي

اني اجتلي من الله جنت محتاجة قربه ويمكن هو حس اخيرا وكال نامي على جتفي
تقرب كلش خليت راسي على زنده نصه روحه واستقر راسي على چتفه غمضت عيني اشتم عطره لاخر مرة
لاخر مرة انام وراسي على ايده

هادي ...دربنا طويل وظلمة الليل راح تسترنا وتسهل علينا

قيس ...متأكد من خوالك راح يگدرون يعبرونه

هادي ...يعبرونكم شني؟ انه اعبر ويا ليلة أأمنها عد ناس اعرفهم و ارد

قيس ...لا اني اعبر اعمامي نصهم بأيران
هادي ...جا احنه هم عدنا عرف بيت خال ابوي كبل جم سنة طلعو لايران هناك حطو هم سالفة احزاب ابنهم انكتل

قيس ...هادي
التفت هادي قيس وجهه اصفر مقهور
كال بنبرة بيها قهر ...ترة اني بطلعتي من بغداد وجيتي الكم خليت الحكومة تشك بيه

هادي ...هيه صاحبتها مو گايله رجلها ما يدري وماعنده شي؟

غمض عينه بقلة صبر ورد بصوت خافت مال واحد تعبان ...هادي!! اريد اعبر وياها

هادي بحدة ...استغفرالله واتوب اليه خاف تجيب المشاكل لاهلك
قيس ...ماتجي دلال گالت بس ليلى وياي وزوجها ما يدري ومايعرف بيها المشكلة مشكلة ليلى ما يوصلون لاهلي لا تخاف

دار وجهه على الشارع متضايق زفر نفس مد ايده طلع جگارة ورثها ونتر بحاتم
هادي ...شغلي النعل خل اسمع

قيس ...هادي احنه طالعين بنية وانته مشغل اغاني هاي بدال مانندعي الله يسترنا ويوصلنا سالمين

رد بدون نفس ...اذا ماتريد تسمع سد ذاناتك

قيس استغفر بصوت ناصي وحاتم رد متضايق ...شبيك هويدي غير حجية صدك بس انته خابصنة بحسين نعمة وجيب يا حريمة و ودي يا حريمة حتى طكني الفگر من وراه

هادي ...تغديله فدوة عندك صوته هسة انته
حاتم ...على اساس انته العندك
هادي ...اي والله عندي صوتي يخبل اغنيلك؟

حاتم ...سد حلگك السيد دايخ وتعبان وليلة نايمة شبيك ما تعرف تسد حلگك

هادي ...سكتت ها أها بس كون تعيدها وتكول سد حلگك الا افركه الك الخايس

مد ايده من الجامة بيها الجكارة مبينه بس جمرتها غمضت عيني كل شوية يتنهد وتنهيدته تخليني احترگ فتحت مديت ايدي لايدينه مخليهن بحضنه يسبح بالسبحة خليت ايدي بوحده من ايدينه حسيته تشنج ثواني ولانت حركته لزم ايدي خلاها على فخذه وخله ايده فوگها لازمها

ما ادري شلون وشگد مر وقت بس فزيت مرعوبة على صيحة هادي
...ابن النعل

دنگ شال سلاحه قيس لزم راسي ونزلني على رجلينا
حاتم ...ولك هذول مو امن لا ترمي هادي
هادي ...ياكلون نعل

مد سلاحه من الجامة وضل يرمي على الگاع حتى يخوفهم ويبعدهم عن طريقنا

انرعبت وخلست حسيت الدم يبس بعروگي

مسافة وطبگو السيارة نزلو خوال هادي تقدم واحد منهم ركزت بي شفته هذا الطويل المحزم
گال ...بس اليعبرون يجون وياي البقية يضلون
هادي .. انه اعبر وليلة وياي ما اهدها
...والسيد؟
قيس ...اعبر حجي

هادي ...مو بكيفك انته رد لاهلك وانه اعبر بت عمي
قيس ...واني ماعوف ليلى ما ارجع اعبرها بنفسي

هادي عقد حاجبة معصب ونتر بغضب
...شني هي عنااااد كتلك انه اعبرها نزلي ليلة ترحين وياي يعبرنه فؤاد
وانت رد لاهلك سالم

قيس رد بغضب ...وحگ ذاك ابن البدوية ما اعوف ليلى اخذها واعبرها لو اعرف اوصل لايران مگطع ما اعوفها

فؤاد ...هادي خالي لا تعاند انت ارجع وانه والسيد نعبر ليلة
يلا خالي والله البلم ما يشيلنا خاف يغط

هادي ...رجلي على رجليكم واليهدني ويعبر وحدة اعبر ورا احش رجلي

دفع الباب ونزل معصب قيس تنهد وفتح الباب ينزل ايده فوك ايدي لازمها جرني من ايدي نزلني ويا

نزلو الشباب الاثنين صعدو ويا حاتم فؤاد وگف يم رجال يحجي ويا اباوع هور وگصب كلش عالي والدنيا ظلمة ، كمل حديثه ويا وحجة ويا هادي وقيس وراها صعد يم حاتم والولد هادي ضل منزل راسه يحجون ويا ابتعد عن السيارة واشرلهم يطلعون ..
...رجعو يلا الله وياك ويحرسكم

رجعو هم واني وقيس وهادي صعدنا بالبلم ساعدني قيس
چانت اعصب ليلة تمر عليه بحياتي لدرجة ما اكدر احجيها عشت رعب وقهر وخوف وترقب كلشي بهاي الليلة

المهرب جان يعرف الطرقات ويعرف مجرى الماي وخلانه كلنه مدنكين حتى تسهل علينا
والاصوات كتمناها النفس نحسبله حساب قبل ما نجره ونذبه

ما نشوف شي من الگصب والبردي والهور يخوف ومراقب من قبل القوات الامنية وحتى جيتنه للمهرب جانت غلط بس ما باليد حيله
العرفته فؤاد يساعد الهاربين دائما ويوصلهم اله

ساعات واحنه الخوف كاتلنه مجلبة بزند قيس من الخوف احس گلبي راح يوگف وظلمة
مد ايده حطها ع صدري همس بصوت ناصي گوة سمعته
...لا تخافين
غمضت عيني وهزيت راسي ادري بي مايشوفني بس حس بيه

ضليت شايله هم هادي اكيد لازم يرجع بس شلون يرجع هم هيج والله صعبة ورطت هاي العالم وياي لو بيدي اذبح روحي وانتقم من روحي على هاي الفعلة الما محسبة الها حساب ..

صوت گلبي احسه صار مسموع شاردين من الموت وضايعين
ضليت ارعش بشكل واضح الجو رطب وحار والهور خطر

المهرب وگف و گال ...يلا هاي ايران هادي انته وصيه فؤاد ترجع وياي دامهم وصلو

هادي ...هسة هنا امان

المهرب ...اي بس سمعوني زين ترحون تمشون مناك قرية نائية قديمة اكو حوش وغرفة بالبداية يمهن شجرة كلش واضحات وبابهن مفتوح دايمن الهاربين مثلكم يكعدون بيهن ويحاولون يتواصلون ويا معارفهم قيس انته تعرف لهجتهم وتكدر تتواصل وياهم بسهولة روح لمختارهم يساعدك تتصل باقاربك الناس كلش متساعدين بهاي القرية

هادي ...ليلة تروح يم كرابتي

المهرب ...انطيهم العنوان بسرعة ثواني وخل نرجع لا ننكض جاي نخاطر بهاي وگفتنا

هادي شرح لقيس و قيس فهم لان يعرف وجاي لايران هواي وعدهم اصدقاء واقارب ..

نزلنا ضليت امشي ويا لازمني من ساعدي واتلفت اشوف هادي يباوع باتجاهنا مخنوگ
رجليني طمست بالوحل والريحة غريبة

مشينه بصعوبة وصعدنا لليابسة ايدينا ترجف وكلوبنا تريد توگف من كثر الخوف والرهبة

الدنيا فجر والجو رطب حار يخنگ مشينا هواي لحد ما وصلنه
جانت قرية قديمة تعبانة وبيوتها متباعدة ومثل ماكال المهرب لگينا المكان الوصفه النه اول ما وصلنا

حوش صغير متروك وغرفة مابيها بس زولية مفروشة كلها تراب ومبين المكان صارله هواي محد واصله متروك

كعدت خايفة وجسمي كله يرجف تمددت
راسي صار على الگاع همست بصوت خايف ...كل اليعبر هيج يتعلعل
قيس ...اي شلون لعد وبعد ورانه هووواي تعب ليلى كلش هواي الله يسهل النه

هزيت راسي وغمضت عيني رجعت فتحت ...هسة هنا الحكومة ما توصل الي
قيس ...لا مستحيل بعد

مشة يباوع لكه حنفيه فتحها توضأ وصلى مادري شلون يعرف القبلة او صلى بدون مايعرفها اني ما جنت اكدر اصلي رجليني ما يعينني من كثر الخوف ماكدر اكوم

سكتت ونمت بسرعة فزيت لكيت روحي نايمة صفح ومخلي كف ايده جوا راسي نايمة علي
يباوعلي عيونه حمر

من فتحت نظراته صارت كلها عتب
قيس ...ضيعتي روحج ليلى

ليلى ...غبية

سكت ما شلت راسي وهمست ...شيل ايدك تعبت
هز راسه لا
ضليت شايله راسي ومديت ايدي شلت ايده تنهد وكعد الشمس تسطر الجو كلش حار بس نايمين من كثر التعب انطاني ماي شربت وهو شرب اخذت شوية غسلت وجهي
...منين جبته
...من الحنفيه لكيت هاي الطاسة غسلتها زين

گام من يمي راح للبوري فتحه مايه ضعيف كلش توضأ منه

وگف صلى من كمل صلاته سجد وطول بسجودة عيوني غورگت اتذكر شگد جنة نصلي سوية ومن اخلص احط راسي على رجله وانام وهوا يقرا قرآن على راسي

كمل ورجع لنفس مكانه تمدد يباوعلي ويتنهد
ليلى ...ما تتخيل شگد ندمانة قيس لو بيدي اعض گلبي مو العشرة من كثر الندم

قيس ...الندم مايفيد اخذي عبرة من الصار وابدي صفحة جديدة
ليلى ...صفحة جديدة بدونك عساها ما انفتحت

ضل ساكت ...هسة شتسوي قيس واني جوعانة
قيس ...هسة اطلع انتي تضلين هنا
...وين تروح
...لجبير القرية احجي ويا حتى اتواصل ويا اقاربي هسة خلي اقاربي يساعدونه وراها يساعدونج نقدم لجوء والسبب مالنه قوي نكدر نحصله

سكتت جنت ارجف خايفة غمضت عيني مد ايده لزم خدي يمشي علي ابهامه
جر ايده وگام
...اني ضابط لغتهم وهاي القرية متعاونة بس اذا طحت بنات غير متعاونين نروح بيها يا ليلى وننتهي

ليلى ...ليش اجيت وياي جان رجعت ويا هادي وانطيتوني الارقام والعناوين
قيس. ..ليش هية بهاي السهولة شتحجين انتي سكتي بالله تعبتيني تحسسيني الدنيا سهلة وهي تريدلها حيل وتعب

سكتت طلع الباب جان متأكل وتعبان ونصه مزرف خفت بأي لحظة يدخل علي واحد دقايق ورجع دخل
قيس ...خاف الامن يجون يسويها الحظ امشي وياي احسن ثنينه سوية اليجرى عليج يجري علي

كمت شلت الجنطة ومشيت ويا القرية صغيرة وماكو هائة الدنيا ظهر والشمس تسطر
شافنه رجال نجار ذب من ايده و وكف يباوعلنا باستغراب

تقدم قيس بأتجاها سلم علي

قيس ...سَلام
... خوش آمديد (اهلا وسهلا)

قيس ...ريش سفيد دخ كيه؟
(من هو كبير القرية)

رد وهو يباوع علينا بأستغراب ...تو كى هستى؟ چرا مىخواى كدخدا رو ببينى؟

(انت من ولماذا تريد رؤية كدخدا؟)

قيس ...مسافر هستم گفتن كدخدا كمك مى كنه

(انا مسافر وقيل لي كدخدا يساعد الناس)

ساعدنا الرجل دلانه وقيس حجة ويا كبير القرية وساعده بالاتصال بأقاربه ضلينه ننتظر فترة بعدها اجو علينا
وببيت كبير القرية اكلنا خبز وتمر منهم لان جنة ميتين من الجوع

اقارب قيس استغربو كلش ان قيس جاي لايران وبهذا الشكل بحيث ابن عمه كان ميت خوف علينا
وجايب النه ويا ماي واكل رجعنا اكلنا بالسيارة

وصلنا لاقاربهم بس بخوف كانو قريبين بالاهواز

ابن عم قيس حجة ...هسة تضلون يمنه بس لازم تسلمون نفسكم حتى نساعدكم ونكفلكم
وتقدمون على لجوء

قيس ...تكدرون تساعدونا بدون متضرون نفسكم
...اي سهلة ان شاءالله بس يمكن يحتجزوكم ايام
قيس ...ليش عود خاف ننسجن
...لا ماكو هيج شي يحتجزوكم مو عقوبة بس حتى يحققون بامركم وتسهل عليكم اجرائات اللجوء وبعدها تكدرون تضلون يمنه معززين مكرمين

صدك اخذونه لبيوتهم سبحنا وارتاحينا هو جان يم الزلم واني يم النسوان كلهن عراقيات والتعامل وياهن سهل ومريح

ضلينا يومين هو ما اشوفه يم ولدهم يدورون حل سهل واني يم النسوان
يوم ثالث يلا شفته جنت متوترة خايفة گبل كتله حاجيت اهلك

كال اي وصللهم خبري
عضيت شفتي باوعتله بتساؤول ضايج
...السيد عصب وغضب مو

هز راسه لا ...جنت ناوي من ننفصل اجي وهم مؤيدين الي بس ضوجتهم طريقة جيتي يلا مو مشكلة كلشي ينحل يجي يوم ويرضون

ليلى ...ان شاءالله زين احنه شنسوي؟
قيس ...اني اضل هنا وانتي تضلين يمي لحد ما نحصل لجوء وراها اطلكج وانتي الج مطلق الحرية تضلين هنا واني اساعدج واتكفل بكل شي يخصج
لو ترحين يم اقاربج

بلعت غصتي جنت متوقعة يكلي راح نضل سوية لان ضرفنا صعب
...لا اروح بس نقدم لجوء خلي عمامك يوصلوني لاقاربي اضل يمهم

هز راسه ساكت سلمنه نفسنه وراها حققو ويانه هواي واقارب قيس لان عدهم معارف كبار كدرو يسهلون كلشي علينا
قدمنا طلب لجوء وعمام قيس سألو وبحثو عن اقارب هادي لگوهم واخذوني الهم

بالطريق جنت مختنگة ولهسة قيس ما مطلگني شكد تمنيت ينسى لو اي شي المهم ما يطلگني

واصلا حتى لو طلكني عقد المحكمة يضل رابطنه
هو ماجاب حتى سيرته

وصلنا لاقارب هادي سلمو عليهم وعرفت هم صارلهم فترة بأنتظاري
اباوع واني بالسيارة نزلت من اشرلي قيس ولد عمه واگـفين ثنينهم اجة باتجاهي طلع جنطتي وحاچاهم
ثنينهم التفتو

باوعلي حط عينه بعيني مخنوگ
جر نفس و گال
قيس ...ليلى انتي طالق

اختنگت وحسيت الغصة تكسرت بصدري عيوني گبل طاحن باوعت لولد عمه مقهورين والله يدرون بي يحبني وهو يموت علي بس يعاند روحه وما يريد ينطيني فرصة

حجيت بتوسل ...مابيك امل قيس

قيس ...ابد ليلى راح اكمل بدونچ واضل مرتاح انتي تعبتيني كلش اريد انهيها واكطعها وياچ

هزيت راسي ومشيت وهنا دخلت يم بيت ابو محمود اقارب هادي ناس بسيطين ام محمود خوش مرية وزوجها معدل
ابنهم محمود مقتول بالعراق وعدهم بس بنية

داروني واهتمو بامري الله ينطيهم الصحة والعافية
بس اني روحي ما جانت مرتاحة كل ليلة احترگ بنار شوقي اله وحبي
اريده واريد قربه اريد ايده تمسد على شعري اريد حضنه ويرحته

ابجي كل ليلة لحد ما احس صدري يشب نار
ما جنت اظن يجي يوم ويصيحلي ليلى مو ليلاي
بسسس اخ من روحي ومن اخطائي وسوالفي

ضليت يمهم شهر وكل ما اتذكر الشهرية مانزلت اكول بلكي حامل واتذكر يم بيت عمي نزلت علي ضليت مختنگة لحد ماحجيت ويا ام محمود

كالت اخذج اعرف قابلة واني ماصدكت خبر شكد متفائلي وعندي امل اطلع حامل ويصير طلاگنا باطل وارجعله غصبا ماعلي

اخذتني فحصتني وحجيت الها اجتلي الدورة مرة
سألتني عن بعض التفاصيل وگالت لا ذيج مو دورة يمكن نزف بسيط

رفعت راسي وبأمل حجيت ...يعني شنو نزف اني حامل ونزفت

ردت ...اي حامل والله وحسب حسابج الج ثلاث اشهر

رجف كل جسمي من اكدتلي حملي دموعي جرن وضليت ارجف وابجي واضحك
...ام محمود طلاكي باطل طلعت حامل الحمدلله والشكر ربي رغم كلشي مريت بي ثبتت هذا الطفل برحمي وما وكعته

ام محمود ...الله يدري بيج بدونه تدمرين زرع ابطنج هذا الطفل حتى يصير سبب وترجعيله

ليلى ...الف حمد وشكر لله

دموع الفرح ضلت تنزل اخذتني ام محمود للبيت وبديت اخطط شلون احجيله واخلي يرجعني يمه بعد طلاكنا ماصار

جان ام محمود كالت خايفة ...اكلج ليش ماتغلسين فترة يلا تحجين خاف هسة يكلج نزلي شما كان هو طلكج علمود سالفة النسب مبين كلش يحسب حساب لهاي الامور

ليلى ...لا ما يگول نزلي هذا يخاف الحلال والحرام
رجلي واعرفه زين

ام محمود ...لا ما اتوقع تعرفينه جا هو الطلگچ علمود نسب يهتم بطفل؟ والله ياليلى لو تسكتين لحد ما يصير عليج خامس هيج يلا تحجين بكل الاحوال ما خسرانه شي وطلاكج منه باطل

ليلى ...غير كلبي نار علي واريد اشوفه واحضنه واحجي ويا
ام محمود ...ادري بيج فرحانة وماريد اضوجج بس منو يكول ماياخذ الطفل ويطلكج مبين مايريدج يليلى لا تتاملين وتبنين احلام
قللي توقعاتج وحطي احتمالات حتى ما تنكسرين

حجيها خوفني قررت اسكت طول طلب اللجوء شهرين ونص من تقدمينه لحد ما انطونه لجوء مؤقت شفته بس ما حجيت ويا ولا كتله اني حامل
لان بوكتها ما جان علي خامس وهم حجي ام محمود خوفني وضليت مترددة احجيله عن حملي خفت من اجيب ياخذه مني ويطلگني

من دخلت بالخامس ضليت متررددة وصار علي ست اشهر وما حجيتله ولا وصلتله بشهري السابع قررت اروحله واحجيله بس لزمني الخوف تجيلي ساعات اكول خليني اجيب واربي اخاف مثل ما عافني وحرمني من حبه وحنانه يحرمني من الطفل الشايل دمه وريحته

گلبي تعلق بي وهو بين احشائي مرات احاجي احسه قيس ويسمعني ومن كد وحدتي صرت اناشدة يكبر بسرعة ويضل يسمعني ويتفاعل وياي من احجي

وبشهري الثامن طگت مرارتي من الكتمان وقررت اروحله احجي ويا وشنو يريد يصير خله يصير بس الاعرفه مستحيل انطي ابني حتى لو گالي ورا الولادة يطلگني

اخذني ابو محمود خطية وصلني الهم نزلنا سويه دكيت الباب وطلعتلي مرت عمهم سلمت عليها ردت بثقل وبسرعة لاحظت بطني الجبيرة واصفر وجها

حتى ما گالت استريحو
كتلها اريد قيس رجليي

باوعتلي من فوگ ليجوة وگالت ...وين قيس رجع للعراق وتزوج

فكيت حلگي مصدومة وباوعت لابو محمود
رجعت حجت ...شنو انتي تزوجتي وحبلتي شمسرع
ليلى ...بالعقل والدين اذا اريد اتزوج لازم اكمل عدة ف وضعي مبين ومبين منو ابو الطفل الشايلته

حطت ايدها على حلگها ...اي صدك مبينه واصلة تردين اتصل بيهم بالعراق وابلغهم بخبر حملج

سكتت شوية وحجيت ...اي بلغيهم فدوة رحتلج اني علي ثامن اريد من اجيب يكون قيس يمي

...بعيوني تدللين بس اريد رقم احاجيكم منه وابلغج بردهم

ابو محمود انطاها الرقم ورجعت لبيتهم ابجي ومكسورة وكل امالي متحطمة

...طلع متزوج تخيلي شبسرعة نساني وگلبه رف على غيري واني لهسه اشتم عطره بهدومي احسه ما راح
لهسه اثر ايده بأيدي وعيوني ما نست اصغر شامه بوجهه

ام محمود ...مو اكلج هذول الزلم من فلك طرهم كون عدهم النسوان مثل الثوب ينزعون واحد يلبسون واحد

ليلى ...هسة شلون بيه شلون ام محمود راح اموت والله العظيم

ام محمود ...صبري بلكي يجيج اتصال منه

ليلى ...شعندي غير الصبر؟

ضليت صابرة انتظر ايام بعدها اتصلت مرت عمهم وگالت
"خابرتهم ما يردونج ولا يردون الشايلته ابطنج"

ام محمود ...شبيج انتي حاجي لاهله واذا خذو ابنج يضلون يكرهونه ويتعاملون ويا مو خوش گولتن هذا ابن الموزين ابن ام الاحزاب

جيبي وربي وداري خلي يكبر ويشيلج يصيرلج سند من بعد رب العالمين
قيس ماهو بعازتج لو انه يريدچ چا مادار الوجه وراح وتزوج

ليلى ...حقه يروح ويعوفني اني بكبري غلطة لو يدري بيه حامل ماجان راح

ام محمود ...وهسة درى شسوى؟ اجالچ؟ ودالچ مرسال يطمنچ ويگلچ انه الها الابن ابني وانتي حرمتي؟
كلشي ماكو
انه اگول خية جيبي وداري وحطي بنص عينچ يكبر يشيلچ

ليلى ...حسبنا الله ونعم الوكيل ليش هيج قسى علي واني اعترف غلطت وندمت شنو البشر مايغلط؟

ضليت ابجي طبطبت علي وباستني براسي
ضليت عدهم الى ان اجت ساعة المخاض ركضت ام محمود جابتلي القابلة
وضعت حملي كان صبي حسن الوجه كامل الخلقة سالم الصحة الحمدلله

گالت القابلة ...شني تسمينه؟

ليلى ...ما مفكرة بأسم ما جنت اعرف شنو بيه

...شنو بيج تمساح هو لو ولد لو بنية غير تختارين اسمين واليجي ولد تخليله اسم الولد والبنية اسم البنية

ضحكت وتمددت موجوعة افكر غمضت عيني اريد افكر بأسم
فتحت عيني و حچيت ...هادي وليدي اريد اسمه هادي على اسم خاله هادي

ام محمود ايدتني وعجبها اختياري للاسم
اخذته لابو محمود يم الباب اذن بأذنه وگال انتَ اسمك هادي

بعدين ضحك ...مو تطلع شافط واعصاب مثل خالك المسودن

ضحكت ام محمود ورجعته الي
نفستني ودارتني مثل ماتسوي لبنتها
وحطتني بنص عيونها ويوم بعد يوم يزيد تعلقي بـ هادي
صار جزء من روحي واني من حامل بي تعلقت بس بعد الولادة زاد التعلق

ام محمود وابو محمود كذلك تعلقو بي وصارو يدارونه وياي ما يخلونه ينزل للگاع بحيث وهو عمره 3 اشهر ترس البيت علينا وخلاهم يشوفون بي محمود ويحبونه

وابو محمود يكول هسة صارت روح بالبيت

بس اني ما جنت مرتاحة كلت لازم ارجع للعراق واشوف قيس واحجي ويا هادي ابنه واني مرته غصبا علي يتقبل هذا الشي يكعدني بشقة ابيت ويضل اسمه رجل فوگ راسي وابو لهادي حتى لو ما يريدني

عزمت على الروحه واصريت صارت نقاشات بيني وبينهم معترضين
يكولون حرام خاف هادي يصير بي شي بالطريق شلون
كتلهم ما علي شي اداري والروح الله انطاها والله ياخذها اذا صار شي نموت سوية

كلش جانو معترضين بس اني اخ مني اني اصريت ارجع تهريب واروح لبغداد اشوف قيس بنفسي واخلي يدبر النه حل
ويمكن اطلع للشمال هناك ما يكدرون يأذوني

واكيد ارجع متخفية حضرتلي بوشية وحضرت جنطة صغيرة بيها نفس المقتنيات الجبتهن وياي

وبليلة الروحة تراجعت وكلت لام محمود
...تكدرين تعوفينه يمچ اني ارجع لابو ماريد اخذه وياي اخاف علي

فرحت ورحبت بالفكرة خليت هادي امانة يمها وقررت ارجع للعراق ..

اخذوني خلونه ابيت كصب مال صيادين وياي مرية ورجلها يردون يدخلون للعراق شكلهم مريب وجانو خايفين ويتراجفون لبست البوشية وكعدت انتظر اجت ساعة الروحه وصعدنا بالبلم وطلع بينه بظلام الليل

خوف وترقب وكل ما نسمع صوت حركه نحس گلوبنه وكعت بأيدينا
ظلمة الليل شكد ما تخوف بس جانت ساترتنا

صوت الكصب من يتحرك يخوف وصادفنا دواب صار عائق بطريقنا حتى المهرب اصفر وجها گلت معناها اكو ناس قريبين وراح ننلزم وننسجن

بس الحمدلله كدرنا نعبر ونكمل الليل كله بالقارب ساعات طويله ..

السنة تحديدًا 2000
سنة فگر سنة أذية سنة موت وعذاب وآلم

بعدنا بالهور والشمس بدات تطلع
احس روحي جاي اسمع دگات گلبي

فجأة وعيني شافت الامن وجفلني صوت طلق النار ..

من هنا تنتهي حريتي

وسقطت ..

..........

سهير ..

اخذو عماد گبالنا نبجي خايفين مرعوبين عمي طاح وعمتي صارت حالها من حال الميت

ماندري شلون ويمته وصلنا لهنا
شلون وصلنا للمستشفى ماندري الدنيا ظلمه بعيني وكل شوية تغوش عيني واركض بنص الممر اطلب مساعدة الطبيب

بملابس البيت امشي بنصهم وعيني على عمي الكل العلامات تبين هو مجلوط

كعدت على المقعد القريب نصيت راسي دموعي تنزل وجسمي كله يرجف احس رجليني ما يشيلني بعد ما اكدر اكوم عليهن من كد الصدمة
وكلبي يخفق بقوة

عادل وصلنا للمستشفى وراح ورا عماد للمركز هبة خايفة مخليه ايديها على وجها وتبچي
هبة ...ثنينهم وكعو ياربي لا تفجعنا بواحد منهم

شيهانة ...هبة تدمرنا كلنا تدمرنا عمي وعمتي عمود البيت اذا وگع واحد منهم ينهدم فوگ روسنا

هبة ...لا يمه اسم الله الزهرة مابيهم شي مابيهم شي

تحجي بهدوء وهي صوتها يرجف
شيهانة ...شمسوي عماد
هبة ...وين ادري بس عماد فقير ماعنده شي والله خايف الله وزين لا يكتل لا يسلب لا يبوگ

شيهانة ...اكو واحد ابن چلبة يفتر وراهم وبالدليل جبران اول شي وهسة عماد

كمت ضليت افتر متوترة وعقلي يودي ويجيب عمي ضربته جلطة الدكتور كال علي زين بس لازم يضل تحت المراقبة
وعمتي زينة بس ضغطها صعد هي حتى من جبناها شوية شالت روحها

ضربت عندي شوية باوعت لهبة وكتلها
راجعة للبيت ضلي هنا يمهم ما اتأخر عليچ
هبة. ..لا شعندي روحي هم بدلي جايبة بملابس البيت عيب
شيهانة ...اي ابدل واجيب ملابس لعمي خاف يضل هنا

هبة. ..وصي نزهة ع هدى خليها تداريها زين

هزيت راسي اخذت منها فلوس كروة ورجعت للبيت اول مادخلت البيت خنسة نزهة كاعدة ويمها هدى نايمة

من طبيت فتحت عيونها وبسرعة نهضت
...شلونهم
...زينين وينهم نزهة منو هنا؟

...محد عادل وياجن راح وهدير تبعت عماد اول ما اخذو تبچي

هزيت راسي اي ومشيت بدلت ملابسي اخذت جنطتي وطلعت امشي بهمه صعدت بتكسي وصلني لبيت عمار قريب
دكيت الباب طلعتلي مرية جبيرة سلمت عليها وكتلها
خاله وين عمار
كالت نايم وعقدت حاجبها مستغربة تباوعلي

شيهانة ...محتاجته بسرعة اني زوجة جبران

فتحت عيونها ورجعت سلمت واخذتني بالاحضان
تفضلي حبيبة فوتي كعدي على ما اگعدة

دخلت للحديقة وكتلها استعجلها ...موضوع ما يتحمل استعجال بسرعة خالة

...خو ما صاير شي

...والله صاير شي جبير

مشت بهمه وهي تعاتب لان ماقبل ادخل ضليت افتر على روحي دقايق وطلع عمار يدكم بقمصة عيونه حمر من النوم

كال ...شنو اكو خبر عن جبران

امه تمشي ورا
...لا ماكو امشي وياي للمركز نشوف عماد اخذو الشرطة
فك عيونه بصدمة وصاح شلووون شلون؟ شعنده شكو
رفعت اكتافي ومديت شفتي ما ادري

كال وهو يأشر على السيارة
...صعدي بسرعة

صعدت يمه شغلها وامه فتحت الباب طلع السيارة بسرعة بس طلع حجيت بانفعال

شيهانة ...سبب سجنه اذا نفس السبب السجنت بي جبران اذا تذكر يعني اكو حيلة وراها هدير

عمار ...هو شنو السبب
شيهانة ...مادري بس اني ذكرت اشياء هي جانت تحجي براسي وتنطيني كتابات خلتني اخليهن بغرفة جبران واروح ابلغ علي حتى ينعدم

اذا اعتقلو عماد لنفس السبب معناها هي ورا السالفة واكص ايدي اذا ماطلعت هي وراها

صفن شوية وكال ...مشاري كال وياها واحد بوجه حمل وخلفه ثعلب ومن هذا الحچي
صفنت وحجيت بصدمة ...مشاري؟ شمدريك وين شفته

انتبه لزلة لسانه وكال مرتبك ...مو مرة صار اتصال بينه وبين جبران وتعارك ويا.... قاطعته
شيهانة ...جذب لا تجذب عمار
عمار ...مشكورة اني جذاب
شيهانة ...اي مبين من ارتباكك احجي الصدك

بلع ريگه متوتر راد يلوفها ماخليته انجبر حجالي كل شي
كتله ...شو وصفه ينطبق على عماد شلون هسة عماد انسجن
عمار ...مادري يمكن مسوي مصيبة مشاري اذا سحار ولو ما اؤمن كلش بس معناها جان مسخرلهم الدنيا والبيها اكيد ورا ما فطس ماعدهم احد يرجع يسويلهم هاي السوالف

صفنت حطيت عكسي على الباب وخليت ايدي على فكي مستغربة وعندي الف سؤال براسي

شيهانة ...واذا طلعنا جاي نظلم عماد وبريء
عمار ...اني ليش ما سويت شي؟ لان مادري منو بالضبط وياهم ولليوم اني ادور وابحث عن الحقائق بس ماكو اختچ والوياها مجرمين مايخلون وراهم دليل وما ينطون على روحهم لزمة توصلنا للصدگ

شيهانة ...جبران اختفى ورا موت مشاري معناها هدير والوياها اكيد حسو لو شكو بجبران الا ايد بموته

عمار ...محد يدري بي ميت
شيهانة ...بس اكيد يدرون بس مختفي واختفائه مؤشر موزين بالنسبة الهم
وما يشكون غير بجبران لان يعرفونه يحبني وما يقبل احد يأذيني وعنده ثار ويا مشاري

عمار ...صحيح اني هم شكيت ليش ضليت ادور بس ما لگيت شي

سكت شوية وكال ...كلشي بيدي اني اكدر ادخل هدير للسجن بدون سبب بس اخاف يكون مشاري جذاب واظلمها ماعندي دليل ضدها وماشايف امور تخصها بعيني

شيهانة ...بس اني ادري ومتاكدة هي انطتني
عمار ...ما جنتي بكامل وعيج سهير اخاف نظلمها وهيه بنية شلون؟ يصير دمها برگبتي

هزيت راسي ...صحيح وياك حگ
صفنت مستغربة ورجعت حجيت ...شلون تحب جبران وهي جانت تدز رسائل لصگر معقولة لان تدري بجبران ماياخذها

عمار ...هسة هاي نمشيها نگول مأيسة منه وشافت بصگر رجال مناسب الها وضلت تتراسل ويا بس المصيبة السودة اذا طلعت هي ورا اختفاء جبران

اكو هواي اسباب

شيهانة ...شنو
عمار ...يمكن بسبب هوسها الخلاها تسحرج وتخبلج رادت تكملها وتبعده عنچ حتى تحس روحها انتصرت

شيهانة ...اي هيه تغار مني كلش من اجيت اكتشفت غيرتها شكد جبيرة لو بيدها تذبحني
وحاولت تنغص علي كل شي وتحرمني من كل شي حلو
بس مستحيل يكون هذا السبب ورا اختفاء جبران
حتى لو الها ايد اكو اسباب ثانية

عمار ...سبب ثاني وهو اختفاء مشاري
اذا نجيب حبها وهوسها بجبران وغيرتها منج ومحاولتها بتدمير حياتج واختفاء مشاري وموته يصيرن 3 اسباب يخلنها تذب جبران بداهية

شيهانة ...جا وعماد شكو

عمار ...جائز يكون غلطان شمدرينا هاي وصلنا وهسة نشوف

طبگ السيارة ونزلنا ما لگينه احد وعماد موقفينه لا هدير ولا عادل
عمار عرف نفسه استقبله الضابط بكل ترحيب بسبب مكانته
سأله عن عماد كله التهمة هي خيانة للبلد عماد ويا حزب الدعوة وعدنا كل الادلة

ضل يحجي واني اربط نفس السوته بيه بس الفرق بدوامه شيوصلها لهناك؟ اكيد وياها واحد مساعدها
يعني الشخص القصده مشاري مو عماد واحد غيره

هدير لعبت لعب وياها شخص جاي يدمرنا بس ماعدنا دليل ولا اعتراف ضدها

سألت الضابط ...سيدي زوجته واخو كانو هنا مو؟
رد ...لا والله محد اجة ورا

باوعت لعمار واشرتله براسي نطلع كام سلم علي وطلعنا
شيهانة ...هدير على اساس لحكتهم وعادل ذبنا بالمستشفى وطار كال رايح لعماد

عمار ...والضابط كال ماكو
شيهانة ...دخيلك ياعلي معقولة عادل وهدير همه الخططو سوية و وكعو عماد والله يعلم وين ودو جبران؟

صفن عمار ضرب الستيرن بقوة وصيح
...عادل عادل مرة احجي ويا وزل لسانه كال جبران بعد مايرجع كتله لا تفاول
كل ظني يكولها من حركة كلبه لو شاك بجبران عنده شي وانسجن وضاع ذكره

ولج انتي صدك سباعية الف رحمة على روحه السماج شيهانه لكفتيها بسرعة وربطتي

شيهانة ...شلون نتأكد

عمار ...اني اعرف عادل عنده شقة يمكن يلتقون بمشاري بيها وبالعالم اليساعدونهم

شيهانة ...شنو غايتهم؟ هسة لو متفقة ويا جبران نكول تحبه بس ويا عادل ؟
عمار. ..تطلع عدهم فد مصلحة شنو يعني الا حب يا ما اخوان تعاونو على الشر واصحاب وام وابنها مو شرط الا ثنين يحبون

هزيت راسي اي
عماد ...نخاطر ونروح للشقة
شيهانة ...ياا واني اروح وياك اليشوفني وياك شيكول وبعدين شعدهم يلتقون بهذا اليوم حتى اذا وياهم ناس مساعدينهم هسة يبعدونهم حتى محد يشك بيهم

عمار ...لا وداعتج اذا اكو ثمن لازم يدفعونه هسه للشخص الي مساعدهم وشقة عادل انسب مكان والله لو تأيديني ضلي جوة واني اصعد

شيهانة ...امشي يلا بس والله ماراهمه
عمار ...لا وداعتج راهمه ثنينهم مختفين يعني ثنينهم سوية

سكتت طاوعته ومشة من وصل للعمارة خفت انزل كال ضلي بس من شفته واثق حسيته شاك من زمان وهسة اتأكد
نزلت اركض ورا التفت باوعلي وبطئ حركته انتظرني حجة ويا البواب كله اني خطار عادل حميد وجاي قبل مرتين لهنا
الحارس عرفه وگله ...عادل موجود

باوعتله وهمست ...شعندك جاي قبل
عمار ...امي طردتني وبتت بيها
عقدت حاجبي مستغربة شنو امي طردتني وبتت بيها

صعد ضليت امشي ورا كلبي يرجف واحس منتظرني شي صعب وجبير

من وصلنا يم باب الشقة قرب راسه من يم راسي وهمس
...مرة شفت عماد وهدير صدفة وسلمت عليهم هدير لابسة محبس ذهب شكله لفتني لان شذرته جبيرة وهيه كل شوية ترفع ايدها تغطي وجها وتضحك
ضل شكله براسي ورا ايام اجيت تعاركت ويا امي وطلعت من البيت طلبت من عادل ابات هنا لان جنت مقهور واريد ارتاح وحدي واخذ راحتي

اجيت لكيت بغرفة النوم محبس هدير ..

سكتت مبهوته دگ الباب وصار على صفحة ضليت ساكته ارجف وعيني على الباب اتمنى الشي المفكر بي عادل مو صحيح

انفتح الباب وطلع عادل لابس بس بنطلون
وشكله غريب مثل المو صاحي من حجة عرفته سكران
عادل دفعه خفت اتحرك وادخل اختل توازن عادل وطاح ويا طيحته انفتح الباب على وسعه واجة صوت شهگة هدير
رفعت راسي وركضت بسرعة دخلت لكيتها بالصالة بهدوم نوم وحالها اصخم من حال عادل سكرانة

ضليت الطم واضرب بيها وهي طينة سكرانة

حسيت الدنيا كلها ضاكت علي بعمري ما تخيلت وحدة من بناتنا توصل لهذا الحال زنا ويا حماها وشرب
وبهيج يوووم صعب وكانهم يحتفلون على انتصاراتهم بتدمير العائلة

دمرونا وجايين يزنون ويسكرون

ضليت اضرب بيها ما تصحى صايرة طينه طلعت اركص وعمار واكف بالباب كاض عادل وذاك الثاني بلضيم
نترت عوفه وامشي

صفن شوية كال. ..تدللين
دفع عادل وركض وراي صعدت بالسيارة وضليت ادك على راسي وابجي

شنو من بشر هذول شنو من بشر الحيوانات مو مثلهم
الطم على روحي وابجي الطريق كله من وصلنا يم المستشفى كال تمالكي اعصابج هسة العرف ملتمين

مسحت وجهي ارجف دخلنا للمستشفى اخذني قاسو ضغطي صاعد ماقبلت ارتاح گبل رحت يم هبة حضنتها وضليت ابجي اشهگ من كل گلبي

ولج لو تدرين هذول سجنو عماد حتى يخلالهم الجو ولج رجلج يزني بزوجة اخو
ولج هبة احنه تدمرنا وانهجم البيت على روسنا وانتي ماتدرين

اجة عمار وخرت عن هبة سلم ع ثنين من معارفنا الي هنا جايين

وخرت عنهم شوية واتقرب مني حجة بصوت ناصي
...بلغت عليهم وانطيت عنوان الشقة هذا بغاء مادري شيسوون بس راح يتعاقبون وينفضحون والله

واذا ما انفضحو شاربي مو عليه اذا ما سجنتهم بأي تهمه المهم تصعدهم اعدام

ضليت الوب وبطني خابطة كل شوية اباوع لعمار الساعات مرت وماكو اي حركة وماندري اذا اعتقلوهم لو شنو صار

صار الليل نزلنا جوة كلنا نشم هوى وهبة طلعت عمتي تمشيها ترتاح ماتقبل ترجع للبيت

كال اقاربنا وحدة منجن ترجع البيت مايصير يضل تايه
باوع لهبة وكمل ...رجلج وين

هبة ...راح لعماد تلگاه ملتهي هناك يريد يشوف جارة

عكد حاجبة وكال ...قبل جيتي رحت لعماد ماكو والله ما شفته هناك
هبة ..خاف طلع يدورله عرف واسطة شي

باوعتلي مرتبكة عرفت نظراتها خايفة يكونون اعتقلو
درت وجهي عنها عيوني دمعت
اقترح يوصلني للبيت بس عمار كال لا اني اوصلها

جريت عمتي صعدتها حتى ترتاح بالبيت هو عمي هيج هيج باجر يطلع

وصلنا للبيت ويا وصلتنا سيارات الامن فاتن للشارع

عمار طلع جكارته من حلگه مستغرب وباوعلي ورجع باوع للسيارات

دخلت عمتي للبيت حسيت بصوت السيارات شكد قريب كلبي رجف كعدت عمتي بالمطبخ اجت نزهة تركض التفتت على صوت صياح عمار

دخلو الامن جافتين علينا وراهم عمار يركض معصب ويصيح
باوعت لعمتي ورجعت باوعت للبيت عرفت هذول جايين ع عادل

بس صدموني من نطقو اسمي وجروني بدون ما احس حتى كلبجو ايديني واخذوني للسجن

واذا كانت لليلى نهاية فـ لي ايضًا نهاية ... من هنا سقطت.......للحكاية بقية

هواي اشياء بهاي البارت ضلت مبهمة او محيرة بالبارت القادم تتوضح

هروب قيس وليلى ما وصلني بشكل دقيق اعتمدت بي ع نفسي يمكن بي اخطاء اعذروني

اسفة ع التأخير اهل الفيس بعضهم يعرفون لان نشرت بكروب مريم السعدي
من اول البارحة اعاني من اوجاع وامس رحت للمستشفى كل ظني التهاب الزائدة الدودية خفت النوب اسوي عمليه
بس الحمدلله ما طلع هيج 🙏🏽
واليوم رحت للدكتور لان طلع عندي حصوة وامس نازلة ولحد هسة متأذية بسببها وكلياتي كلش يوجعني اسم الله عليكم حتى گوة كملت اخر مشهد من اول البارحة واصلة لحد روحتهم للشقة مال عادل

اعذروني على كل الاغلاط بالبارت 🙏🏽