رواية حواديت مروان وجميلة الفصل الثالث 3 - بقلم وعد محمد

فجأة هدوء عم المكان مفيش نفس حرفيا..
انا لسه مستوعبتش اللي حصل ؟!
هو اللي دخل دا مروان بجد ؟
كل اللي كان موجود في القاعه قعد في مكانه وركزوا علي دخوله
وبالاخص البنات …نظرات الاعجاب كانت واضحه من عيونهم
وللحظه عيني جات في عينه ..اتلخبطت ، اتبرجلت ، حالي اتشقلب بمعني اصح
قلبي دق بسرعه رهيبه كإنه مدقش بقالوا سنين .
افتكر بيدق ازاي لما شافه .
واقف عند المايك ووزع نظره علي الموجودين ووقف بعينه عندي ثواني .
بالنسبالي مكانوش ثواني بس دا كانوا ساعات ايام اي حاجه غير ثواني بجد
بدأ يتكلم .
ـ ازيكم يا شباب انا مروان الدكتور الجديد اللي هيدرسلكم الماده السنادي .
اهدوا بس يجماعه ثانيه استوعب هو قال الدكتور اللي هيدرس الماده والا انا اللي معتش بسمع؟!
لقيت مريم بتهمس بالراحة
ـ استني هو مش دا مروان اللي كان معانا من واحنا عيال؟
رديت وانا لسه مش مستوعبه وتايها
_ اه هو.. هو مروان يمريم
_ يعني ايه هو الدكتور الجديد انا كده مش هركز في كلمه ..انا كده هسقط اكيد ..حد يلحقني !
لقيته رجع يكمل كلامه
ـ انهارده مش هيبقي فيه حاجه تتشرح هتعرف عليكوا بس
وبدأ يختار ناس عشوائي وفجأه لقيته بيبصلى ….
ـ وانت بقي بتحبي تعملي اي فوقتك الفاضي ؟
بصيت ورايا وجمبي اشوف بيكلم مين يمكن يقصد حد تاني اكيد ميقصدنيش انا..
لقيت العيون كلها بقت عليا اتمنيت لو الارض تنشق وتبلعني اي حاجه المهم مبقاش في الموقف دا يجماعه.
حسيت بخبط مريم في كتفي وبتقولي
ـ بيكلمك انتِ يا جميله ردي عليه .
_ ارد عليه ازاي بس انا لو كلمته كلمه واحده مش بعيد يغمي عليا يمريم الحقيني .
ـ معلش ردي وربنا يستر بقي
قاطعني وهو مستغرب من وشوشتنا
ـ معلش لو قاطعت كلامكوا بس لو تكرمتي يا انسه تردي عليا يعني .
_ اسفه لحضرتك جدا … ينفع السؤال تاني مخدتش بالي؟
ـ اي اللي بتعمليه فوقت فراغك
_ ساعات بقرأ روايات واحيانا برسم
ـ هايل
وكمل اسئله لبقيت الشباب في المدرج وانا لسه متخطتش اللي حصل دلوقتي .
ــــــــــــــــــــــــــــــــــــــــــــــــــــــــــــــــــــ
خرجنا نقعد في الكافتيريا بتاعت الجامعه وانا لسه واقفه عند حته واحده
هشوف مروان كل يوم؟!
قاعده مع صحابي ولقيتهم بيتكلموا عن الدكتور الجديد وعن جماله وحلاوته وقد اي شيك ووسيم..وانا حرفيا هفرقع بس هعمل اي يعني بسمع وانا ساكته
مريم خدت بالها اني اتدايقت من كلامهم عنه فقالت بصوت عالي عشان تجذب انتباههم.
ـ فاكره يا جميله لما مروان كان بيلعب معانا في المدرسه ومكنش بيرضي يلعب غير معاكي
واحده من بنات اللي قاعده اتكلمت بإستنكار
ـ انت بتتكلمي عن الدكتور الجديد ؟
ـ اه يا حبيبتي هو بعينه
كل دا بيحصل تحت نظراتي لمريم وانا ماسكه ضحكتي بالعافيه من طريقة كلامهاا معاهم
بجد بحبها اوي بردت ناري وانا قاعده مكاني من غير ما اعمل حاجه
مريم كانت دايما جمبي من واحنا عيال لحد دلوقتي وهيا معايا مسابتنيش لحظه
كانت جمبي في أسوأ ظروفي شافتني في كل حالاتي و استحملتني .. مش مستعده اتخلي عنها بأي شكل من الاشكال والله
لمحته من بعيد وهو رايح المكتب بتاعه او اللي بقي بتاعه يعني
قولت في نفسي لثانيه ..البنات عندهم حق يعجبوا بيه بجد شكله منظم ومهندم وبيعرف يتكلم واسلوبه حلو اي حد يتمني واحد زي مروان …..وانا منهم
بس الفكره مش هنا الفكره هل هو ممكن يفكر فيا زي منا بفكر فيه كده والا هبقي مجرد طالبه عنده فى الجامعه بيدرسلها ماده والسلام ؟!
ــــــــــــــــــــــــــــــــــــــــــــــــــــــــــــــــــــ
ماشيه في الطرقه راحه لقاعة المحاضرات ..دماغي مش معايا سرحانه فيه وفي اللي وصلتله دلوقتي.. فجأه خبطت في حاجه ..او حد
ـ ماشيه وانتِ مش مركزه ليه يا انسه جميله ؟
– كنت بفكر فيك …
قولتها بصوت واطي واعتقد سمعه
ـ افندم
بعد ما تداركت نفسي وخدت بالي من اللي قولته
–اسفه لحضرتك يدكتور مش هتتكرر تاني .
ـ روحي محاضراتك يلا
دخلت المدرج وقاعده جمب صحابي وبالاخص مريم
ـ في ايه يابنتي ..وشك مخطوف كده ليه
– سيبيني في حالي يستي كنت هطين الدنيا
ـ اتحفيني ياجميله
– كنت ماشيه وجايه على هنا خبطت فيه واتلبخت في الكلام
ـ الطبيعي منك يا جميله عادي يعني.. المهم ركزي في المحاضره عشان شكلها مش هتعدي علي خير
– حاضر
مروان دخل المدرج كله سكت كنت بحاول اتجنبه ببعد عيني عنه كل ماتيجي عليه وهو لاحظ دا
بدأ اسئله وكل شويه يسألني انا
ـ انسه جميله جاوبي علي السؤال
ـ كنت بقول اي من شويه يا انسه
ـ عيدي اللي كنت بقوله
وفضلنا علي الحال دا طول المحاضره كنت مستنياها تخلص بفارغ الصبر ..والحمدلله خلصت اخيرا معجزه مش كده !
كنت خارجه برا القاعه لقيت صوته بينده عليا ..منكرش ان صوته لخبطتني لمس قلبي حقيقي كان حلو اوي
ـ تعاليلي علي المكتب يا جميله
– حاضر يا دكتور
ماشيه وراه وانا موطيه راسي في الارض وعماله افكر ياترى عايزني في ايه ..طب انا عملت حاجه غلط في المحاضره
دماغي فضلت تودي وتجيب لحد ماوصلنا مكتبه ودخلت وراه
قاعد علي المكتب بتاعه وانا واقفه قصاده ..رعشه ايدي كانت ظاهره لعينه ..واعتقد دقات قلبي كان سامعها مش عارفه بيأثر عليا كده ليه
بس اللي بقيت متأكده منه ان حب العيال الصغيرين بيعيش ومبيتنسيش
ــــــ
لقيته بيسألني وباين علي صوته العصبيه
ـ ينفع اعرف سبب عدم تركيزك في المحاضره انهارده ..اي اللي مخليكي مش مركزه كده؟
– كنت سرحانه شويه ..بس دا مش هيأثر علي تركيزي.. وبأعتذر لحضرتك عن اللي حصل انهارده تاني
ـ تقدري تقوليلي مروان عادي واحنا لوحدنا
– حضرتك الوقتي الدكتور وليك احترامك
فجأه قام من مكانه وبقي قدامي
ـ قبل ما اكون الدكتور كنت الولد الصغير اللي بيخاف علي مصلحتك ياجميله .. فيه بحث المفروض يكون خلصان ويتسلم بكرا .. عايزه اعرف وصلتي فيه لفين؟
اسمي حلو اوي زي مايكون مسمعتوش بالجمال دا قبل كده ارتباكي زاد ..حسيت بصوابعي بتفرك في طرف الطرحه من كتر التوتر
نفسي بدأ يهرب مني كأني كنت بجري في سباق ..صوته وهو بينطق اسمي كان بيعمل زلزال جوايا
كل دا وانا لسه مش عارفه ارد عليه واقوله اي انا لسه لحد الان فعلا مبدأتش فيه ..
من كتر تفكيري نسيت ..نسيت ان لازم يتسلم بكرا وعليه اعمال سنه كمان
ـ دا نفس اللي كنتي بتفكري فيه لما خبطتيني الصبح؟
اتكسفت اوي وشي احمر كنت حاسه من كتر الاحراج اللي انا فيه اني هعيط بس تماسكت نفسي وقولت
– مش فاهمه قصد حضرتك ..ان شاء الله البحث يكون عند حضرتك بكرا …ينفع

اخرج
ـ ماشي ياجميله اتفضلي
خرجت برا المكتب ولقيت كريم قدامي
ـ اي يام لسان طويل عامله مصيبه والا ايه ؟
– كريم مش فايقالك ابعد عن وشي الوقتي .
ـ شكله هزقك جامد
لسه هرد عليه لقيت مروان خارج من مكتبه وخد باله اني متضايقه
ـ خير يابشمهندس كنت محتاج حاجه
ـ لا يادكتور كنت بشوف جميله
ـ اعتقد جميله مش صغيره عشان تيجي تشوفهاا .. وركز في البحث اللي لسه مسلمتوش واخر معاد بكرا
حرفيا كريم اتخرس ووشه في الارض مش عارف يرد .. مشي من سُكات .
الصراحه فرحت من جوايا اوي فكرة انو مخلهوش يضايقني دي حسستني بالامان للحظه .
– شكرا لحضرتك يا دكتور عن اذنك
ـــــــــــــــــــــــــــــــــــــــــــــــــــــــــــــ
سيبته ومشيت من غير ماسمع رده روحت علي بيتنا بأسرع ما فيا مش هستحمل حاجه تانيه تحصل انهارده كفايه كده بجد خلاص سِنه وهنهار
كالعاده ماما فاتحتلي .. بس المرادي حاسه انها مسوطه شويه عن كل يوم
ـ عامله اي ياجميله يا حبيبتي
رديت وانا مستغربه معاملتها الهاديه
– كويسه ياماما ..خير اللهم اجعله خير يعني .
ـ خير ياحبيبتي ..باباكي عازم عمك جمال صاحبه وابنه علي الغدا انهارده بمناسبة رجوعه من السفر عايزاكي تخشي تغيري هدومك وتعالي ساعديني في الاكل .
ـ حاضر ياماما
دخلت غيرت هدومي وصليت الضهر وخرجت اساعدها بقالي حوالي ساعه ونص في المطبخ حيلي اتهد خلاص ماما لاحظت اني تعبت قالتلي ادخلي انتِ غيري هدومك والبسي دريس جميل من دريساتك عايزاكي تبقي قمر النهارده
عايزاهم لما يشوفوكي ينبهروا.
قلقت من كلامها اشمعنا عايزاني ابقي حلوه انهارده يعني ايه الجديد اللي يخليها تطلب مني حاجه زي كده
بس طبعا مشغلتش دماغي عشان انا اتفه من كده
واقفه قدام الدولاب بختار دريس خفيف عشان اقضي بيه الغدا وسمعت صوت مسدج
مسكت الفون لقيتها رساله من رقم غريب مضمونها
“هتلبسي فستان لونه اي عشان اجيب الورد نفس اللون”