رواية هشاشة قلب الفصل العاشر 10 - بقلم هاجر قاسم

الـسـلامُ عـلـيـكـم🌻🌼

#هشاشة_قلب

#الـبــارت_9_

#الكاتبه_العباديه

وغرامُـكِ أَحـلـى مـعـركـةً
خـُضـتُ رحاها فَـهزمتينـي..

~~~~~~~~~~~~~~~~~~~~~~~~~~~~~

إنصدمت بالنتيجه !!

ناجحه ! يربي ناجحه مااصدگ !! ظليت ابجي من الفرح مامصدگه روحي ابد .

زين اني مو زينه بمادته شلون نجحت يربي !! يلا مو مهم المهم نجحت وبس .. النوب انهديت بالبچي يريدن يسكتني ماكو تأثرت بالمسلسلات .

ظليت أكمز من الفرحه مامصدگه وعيوني تتلألئ.. من الفرحه تلمع ببريق .

فرحت حيل ونرجس هم ناجحه ..

نرجس.. بس ولج ادري انهديتي هذا هم ماهر وتبجين كدامه ودموعج تكسر خاطره (وتغمزلي )

- ولج مامصدگه نجحني مامصدگه

- صدگي صدگي

- اريد اروحله

- عززااا شتسوين؟؟

- أتشكر منه چا شأسوي؟؟

- اگعدي لايفشلج

- ياا ليش يفشلني ؟

- ثريا اكعدي واسكتي

- لا والله رايحتله

رحت اركض لمكتبه ومكيفه اريد اتشكره لان صدگ ماحاله ولا حتى درجة نجاح اوصل بس منجحني . وهم استفسر منه غير گاللي راسبه .. وصلت لمكتبه دكيت الباب ودخلت بعد سماحه إلي طبعاً ..

لگيته گاعد ومقابيله أوراق هواي مدري شيسوي بيهن ولابس نظاره سوده يمه غير يچتل النوب صفنت عليه اريد اتذكر عليمن جايه ماادري..

عقلي تذكر لاتفشلني رحمه لااهلك .

هوَ يمكن إنتبه مركزه عليه رأساً رفع راسه عليه لگفني وهزلي راسي گال :-

- ها ثُرىٰ ؟؟

فهيت ومحتاره شأگول هذا ابو الرزايل صاير مايتقاوم .

أردف ويأشر بإيده مثل الينبهني

- ثُرىٰ وياي؟؟ خيرج يابه؟؟

ركزت ومتت من الفشله إبتسمت ببلاهه وگتله :-

- آآءء.. إستاذ أنتَ مو گتلي راسبه شلون نجحتني؟؟

بهدوء غمض عيونه حيل مثل اليصبر نفسه او متوقع هيج سؤال

- اي وشنو المطلوب هسه ترديني ارسبج؟؟

إنتفضت

- لا لا لا ترسبني شنو

- كل واحد حسب إجابته لا منجح ولا مرسب درجه مامنطي من جيبي تمام عيوني؟

يممممه متتت صار بيهه عيوني فديت عيونك انا.. كون هسه اروح وامطگهن ببوسه .

- ها بس اني ممجاوبه

زفر أنفاسه بعصبيه ونتر :-

- ثُرىٰ من الأخير تردين ارسبج؟؟

- لا لا آسفه آسفه بس شكراً

- ماكو داعي للشكر كل واحد درجته

- اي ميخالف شكراً

تأفأف بعصبيه ونتر من وره خشمه :-

- العفو

طلعت من يمه واني ارگص من الفرح .. الگاع ماشايلتني .. تفاجئت بإسماعيل واگفلي اليوم وراكب بسياره !

- شنو إسماعيل منين هاي السياره ؟

- مال صديقي

- وليش جايني بيهه

- كسرتي خاطري خاف رجليج تعبن وهم صديقي فارغ وانطانياهه مامحتاجهه هالأيام لگاله شغله

ماصدگت بيه لان نهى مچذبه واكيد سايرهه وهوَ مايكسر بخاطرهه .

غلست وگتله ؛-

- ديلا ماطلبتهه من زمان تصعدني بيهه احسن من الفورتات سكراب

خزرني

- ثرريا

- ها شنو شحچيت؟؟

- لاتحچين هيج گولي الحمد لله

- هسه اني شگايله يخوي

- اصعدي إصعدي انتِ النقاش وياج عقيم .

- ومايجيب اطفال هم

صعدت واضحك عليه إبتسم وگال :-

- ان شاء الله راح اشتغل واجمع لو انجبر اسوي سلفه

- هلو هلو راح تتزوج ايباا راح نركص وشلون ردح العماره

- ياعماره هاي اريد اعالجج اكيد عقلج ضارب

- ياااا شبيه اسم الله

- خيط خبال اشوف شيسوون ويشيلون هذا الخيط طلع محد يلومني من كتلهم مااوديج كليه ادري بعقلج زعطوطي

- ييمه اسم الله عليه وعلى عقلي

ظل يضحك واني اسولف وياه ثولته ثول .

وصلنه للبيت وتغدينه .. نهى گضتهه بس مخابرات واني افتر وراهه واصيح "إلك الله يالحديقه" وهيَ تضحك عليه .

أمي فرحتلي بنجاحي وكالت راح اطش عليج چكليت . فرحت حيل عبالك كالتلي راح اصبلج تمثال ذهب .

دزت چيس چكليت ابو الألف واني رحت لبست حرام مال الصلاه لونه أبيض سويته مثل الساري وسويت شعري ضفيره هنديه وطلعت

من طلعت كلهم صفنوا عليه

إسماعيل.. شنو هاي ولج؟

- غير اليطشون عليه جكليت لازم لابس ابيض

- معرس شنو؟

- لاا يابه هسه انتم من يطهروكم غير تلبسون ابيض؟

كلهم حصرتهم الضحكه والبنات يخزرن بيه

إسماعيل...شبيج انتِ تخبلتي؟

- دحجي تلبس ابيض لو لا؟

- اي

- اي اني هم مثلكم

نهى..ولج شجاب هاي على هاي

- ماعليكم اني اريد من يطشون عليه جكليت لابسه ابيض يلا اسكتوا

ساعتين منتظرين الچيس مال الچكليت وحسن يفرفر بالمحلات محد عنده بس كيلوات.

اخر شي جايبيلي هذا ابو عشره بربع بس بألف .. وطشته أمي على راسي احسه تزرف من گد ما الچكليته يابسه ومخزونه صارلهه سنه

- ولكم ماريد چكليتكم خلولي راسي سالم عليكم الله

النوب يلمون من الگاع ويشمرون عليه وميتين ضحك صارت الچكليته مثل الحصوه حطيت ايديه على راسي وافلت اخوي عامر

             ~~~~~~~~~~~~~~

ثاني يوم داومت وإستمر روتين يومي ابو الرزايل نفسيته مامتغير هوَ هوَ وكلما اصفن يفززني من صفنتي وصاير يخربط بإسمي هواي بحيث كل بنات القاعه صار إسمهن "ثُرىٰ"

ياهي يگومهه يگللهه ثُرىٰ واني اطفر عبالي عليه .

إجه إمتحان الشهر الاول واني خايفه لا يسوي بيه مثل بداية السنه .

الحمد لله إمتحنه وعدت على خير واسئلته صايره أصعب مو أسهل .. بس اني قاريه زين وكلهه جاوبتهه وتقريباً عرفت نمط أسئلته وهذا الشي الي يميزني.. امتحن شهر واحد عند المدرسين اعرف نمط اسئلتهم بعد .. بس هالمره مصره آخذ الهديه اكون أو لااگون .

ثاني يوم جاب الاوراق مصححهن كالعاده .. ظل يصيح بالأسماء اني إسمي قبل ساره .. صاح بإسمي گمت اخذت ورقتي وأنصدمت !!

النتيجه درجه كامله صح مجاوبه كله صح بس ماتوقعت يحطلي درجه كامله گلت هسه ينقصني على كلمه على حرف .

والله وطگيتي ياثُرىٰ واخذتي عند ابو خاولي درجه كامله

بس الصدمه ماكو هديه !!! ظليت لازمه الورقه ومنتظره اريد الهديه !

صاح الإسم البعدي واجت اخذت ورقتهه واني واگفه مصفصفه .. باوعلي بإستغراب كال :-

- ها ليش واگفه هنا؟؟

- شنو ليش واگفه غير ماخذه درجه كامله

- اي وشنو؟

- غير تكرمني

- اها .. نسيت اعذريني عود هسه ألقي كلمة تكريمج

خلص الاوراق واني مشتوله وواگفه يمه ساعتين لما خلص والنوب يمطمط تمطمط .. يجر الكلمه جر وكل طالب ياخذ ورقته يظل يسولف وياه .. طبعاً هذا متعمد يغثني .

انطه الورقه لساره والصدمه راسبه .. يبوي غير لزمتني الضحكه اريد اسكت ماكو .. النوب اگرص بروحي اريد اسكت .. اضحك بس مدنگه راسي حيل محد يشوفني بس صوت القهقه مسموع .

إلتفت عليه نتر بصوت ممسموع :-

- إرفعي راسج

رفعت راسي كلت :-

- ها وياي؟

نتر بيه :-

- لاتضحكين قبل كم يوم چنتي مثلهه ضحكت عليج؟

- ماجاي اضحك عليهه اني .. اكو سالفه تذكرتهه وضحكت

- السوالف عوفيهم بالبيت مو هنا تتذكرين وتتمضحكين !

وانتَ شعليك ابنل ابنل اضحك مااضحك انتَ شكو؟؟؟

كمل الاوراق ومحد ماخذ درجه كامله غيري .. غير طرت من الفرح وردت احط جناحات عباس ابن فرناس واطير بس اخاف اچلب بالواير وانتل واتكربح وشيخلصني بعد .

إلتفت عليه وظل يلغي كلمات بالفصيح والنوب شصعباتهن بحيث ولا كلمه فهمت عبالك كاعدلي بعصر الجاهليه ومنتقي الكلمات انتقاء مضبوط .

كمل تقديم واني منتظره الهديه .. دار وجهه ع الميز عبالي راح يجيب الهديه بس الصدمه ماكو شي ع الميز .. كلت يمكن صغيره وضامهه بجيب سترته مثلاً محبس حلقه شو شني .

بس راح وكال :-

- راح اجمع الاوراق

اني واگفه بمكاني بعدني اباوع عليه وادور بعيوني ع الهديه .

كال :-

- ليش واگفه هنا؟ ماترجعين؟

- هاا .. مو ردت اجمع الاوراق من الطلاب

- لا معليج انتِ همه يجون قابل مكسرين

يمه لااول مره بحياتي الگفهه وهيَ طايره واطلع نفسي من فشله جبيره .. منين اجاني هذا العذر ايباا .. والله وتطورتي يثُرىٰ .

رجعت لمكاني واني اتذكر الهديه ماانطانياهه والله ظليت اغلي من الحرگه واتمنى هسه اكوم اشبعه جلاليق . رغم اني متحمسه اشوف ذوقه بالهدايا ابو الرزايل .

ساره ظلت تبجي وتذكرت من رسبت يبوو الله لايعيد ذيج الايام .

راحت يمه وبإيدهه ورقتهه دنكت ع الميز وظلت تسولف وياه فسرت كلامهه من يمي انو تكله هذا صح وهوَ يهز براسه ويأشرلهه ع الورقه عود خطأ .. ظلت تبجي وهوَ ولا إهتز .

تتوسل وهوَ عوج حلگه بمعنى لا او (چؤؤ) .. وسحب الورقه من إيدهه وگام .. عود مثل الدكاتره البقيه اذا يوزعون القاعه تصير هووووسه هسه هذا القاعه هدووووء الابره من تطيح نسمعها ..

گام والورقه بإيده تحرك خطوتين ومانحسلك إلا ساره ساحبته من زنده حيل .. نترته نتر وكالتله (اوووككككف) .. هنا وجهه شصار بيه بوووووويه كلهه مصدومه وهوَ نزل راسه على زنده وإيدهه المحطوطه عليه .

خزرها حيييل وعگد حواجبه هيَ رأساً سحبت إيدهه وخافت .. يمه اني من يمي ظليت ارجف من خزرته الخزرهه بيهه تكول صاروخ مو خزره إخترقتهه إختراق .

ظلت تشهگ وتبچي كسرت خاطري ردت اگوم ونرجس باوعتلي

- شكو وين رايحه؟

- اگله انطيهه من درجتي خطيه

- عزا العزا يثريا راح تمطسين روحج بمشاكل الهه اول ماالهه تالي اكعدي وانجبي

- ولج خطيه ماتشوفين شلون تبجي؟

- ثررريا ابقي بمكانج لا وعلي اموتج موت

- هوَ صار اقاربنه بعد خل ينجحهه لخاطري

- اكعدي واسكتي لايرزلج اشو ولاكأنما اقاربج نفسيته هوَ هوَ ماتغيرر النوب تريد تكله على شرشبيله وهيَ توهه لازمه زنده مقابيل الشباب وقللت من قيمته حتى يجلدجن اانتِ وياهه

- خايبه صدگتي اروحله شبيه مخبله اصلاً ولا اروح بعد ولااشوفه لو اموت النوب يفشلني حتى هديه ماانطاني ابو عكرز .

- اي يلا اسكتي لايرزلنه خل نكمل التمثيليه

اخذ الاوراق وطلع معصب صاير نااار .. وهاي سويران آنه إلهه شلون تلزمه هيج ومنو سمحلهه هوَ آني ثُرىٰ بمقامتي الجليله مالازمته هيج .

.
.

إمتحنه شهر ثاني ودرجتي ناجحه الحمد لله عود رحنا للمكتبه اني ونرجس اريد افصخ ملزمتي اسويهه كل فصل وحده .. اول مادخلنه لگيناه گاعد ع المكتب مال ابو المكتبه ويمه الكابسه .. ومقابيله إستاذ أحمد ابو گزگوزه .

- ولج نرجس هذا ابو گزگوزه شعنده هنا؟

- يا ثريا گزگوزه النوب ولج اسمهه سكسوكه

- لا ولج اشو سكسوكه كيوت بس گزگوزه إلهه هيبه .

- يلا خوش لقب خل نشوف ابو گزگوزه وابو الخاولي شعدهم وين مانروح يطلعولنه ادري لاطشين بينه لو مسويلنه جهاز تعقُب .

رحنا وگفنه مقابيل الميز الگاعدين عليه .. أبو گزگوزه باوعلي وگال :-

- ها ثُرىٰ؟؟

- إستاذ بس اريد افتح هاي الملزمه واكبسها

- جيبيها

انطيتهه إله والكابسه يم ابو الرزايل راد ياخذهه وابو خاولي حط إيده عليهه گاله :-

- انطيني آني استنسخهن إلهه

گاله

- لا ماهر مو إستنساخ بس كبس

- اي ميخالف اني اسويهن جيبهن

اخذهن من عنده وكبسهن ..إجه ابو المكتبه وشافه يكبسلي إنصدم وظل يضحك گال :-

- هاي الكابسه صارلهه شكد ماتشتغل شلون إشتغلت؟؟

ابو الرزايل جاوبه

- فكتهه عرضة ثُرىٰ وجهه خير علينا

يمه يمه منو هذا اليحجي معقوله نفسه ابو الرزايل؟

ظلوا يضحكون وهوَ كبسلياهن كلهن وانطانياهه ..

اخذتهه ورحت .. بس صاح عليه إستاذ احمد.. رجعت كاللي :-

- ثُرىٰ إذا أكرم الطلاب تساعديني بتجهيز الهدايا؟؟

- إي إستاذ حاضر بس كون كل الطلاب المتفوقين إلهم هدايا مو فلان إله وفلان ماإله لاتفرق بين الطلاب .

احچي واحسه يخزر بيه يدري بنفسه لان ماانطاني هديه اشمر حچي عليه

أحمد.. لا لا كل طالب متفوق إله هديه واولهم انتِ بس هديتج مااخليج إنتِ تلفيهه هديتج خاصه اني اسويهه

- هههههه شكراً إستاذ

هذا شصار بيه يمممه شعوط والله شعوط .. ظل يخزر بيه ويخزر بإبو گزگوزه .

گاللي رأساً

- ثُرىٰ بلا زحمه عليج روحي للقاعه صيحلي ساره

رفعت حاجبي متضايقه عود يردلهه إلي لو يصرفني ؟

- اي إستاذ ماكو أي زحمه

رحت صحتهه إله واني اغلي من الحرگه شكد حقير ابو عكروز ..

                 //  //  //  //  //  //

رجعن للبيت وروتين يومي قاتل .. مروه معطلين ماخذين عطلة مراجعه لزگتلي الا باچر تروح وياي وتشوف الكليه مالتنه عاد شلون كليه عاويه .

اني ماعارضت لان ادري بنفسيتهه صفر من وره السادس وضيمه ماره بهاي التجربه .

اخذتهه ثاني يوم وقطت نهى بملابس واتصلت ببنت خالتي تروح ويانه اسمهه فدك .

اجتنا من الليل وبقت عدنه ظليت الليل كله اسولفلهه على ابو الرزايل وهيَ متربعه وتتنصت بتركيز .. طفيت واريد اگوم وهيَ لاطشه مو بنت فلك أسود .. ثاني يوم كلنه اخذنه أسماعيل وذني البلاوي وياي .

وصلنا للكليه بسيارة صديقه استحليناهه واني مكيفه متصدره بالاول اني واسماعيل وهنه ورانه .

وصلنا للكليه وذني ظلن يفترن وعافني وحدي الحقيرات ..والنوب نرجس ماكو.

دخلت للمحاضرات وطلعت ريست شفت فدك من بعيد أشرتلهه تجي .. اول مااجت شفت ابو الرزايل واگف وراهه بهاللحظه طگني الجفاف والحنيه ركضت حضنتهه واني اهمس

- فدك وراج وراج اول ماتلتفين شوفيه بس لاتبينين شي

هوَ من شافني حاضنتهه ظل يدور براسه يمنى ويسرى يريد يشوف وجهه ومنو هاي الحاضنتهه .. اني عين وعماد ادور بيهه عكسه مااريده يشوفهه .

لما هيَ طگت روحهه وإلتفتت تريد تشوفه .. ظلت صافنه واني اندس بيهه

- فدك عينج افگسها وابو فاضل

- شنهاي؟؟ معقوله هذا هذا ماهر نفسه جذب ولج فلك اسود هذا خل يقرضني من خاولياته شويه

- فوتي انتٍ مو مال دكاتره واشوفج انتِ يفيدج ابو گزگوزه خل اخذج اله

- منين هذا ابو گزگوزه؟

- ولج هم استاذ بس غير كلساع يسحب شفته حتى تبين گزگوزته والبنات فاتحات حلوگهن وهوَ ماعندي لحيه چنه ديچ مهلوس

- ميخالف مو الا لحيه خل اشوف واحكم

- تذوقي بعد فد نوب على گولة وليد

- هههههه والله ضحكت من گال هيج

- حتى اني .

صعدنا لفوگ ونفرفر بالكليه.. الدرج اني اصعده ركض وانزله ركض هاي عاده وماكدر ابطلهه .

من نزلنه اني ومروه وفدك .. ذني نازوكيات وع الاساس انوثه وكذا .. اني گتلهن

- عليجن الله بقت بس درجه وحده خل نتلازم ايد بإيد ونطفرها كلنه

مروه.. لو اموت مااسويهه شبيه زعطوطه

- عليجن ابو فاضل

- ولج ثريا ليش تحلفيني مااكدر وبطلي هاي الكلمه حرام تحلفيني اذا تصرفج زعطوطي اني شنو ذنبي

- انتِ وابو فاضل بعد

اني اشوف شكولهن يتوسلن بيه واني ميته ضحك وكلساع وعلى عنادهن كلت"ابو فاضل" هاي التحلوفه مال ابو العربانه ماتروح من لساني تعودت عليهه بعد شيخلصني .

ولكوني ثُرىٰ وجدي شموخي ومحد يگدر عليه وافقن نگمز اخير درجه لان الكليه فارغه كلهه بالمحاضرات واني ضربتلي محاضره وظليت افرفر بيهن .. تلازمنا إيد بإيد تلاثتنه وصحنا

- واحد اثنين تلاثه

گمزنا وكلنا صحنا (هييييي)

دنگت ميته ضحك .. والله من انزل ع السريع افرح واظل اضحك هيَ هاي الدنيا شبيهه خل اعيشهه اضحك احسن مااموت مقهوره ومامحققه بطولاتي مال سبايدرمان .

رفعت راسي وابو الرزايل واگف مقابيلنه وخازرنه عيونه حسيتهن يريدن يطلعن ..

يافشلتي يافشلتي تعالو طموني ولكم مااريد لااضحك ولادنيا بس طموني بهذا الموقف .

مصدوم وعيونه متوسعه بذهول . ويخزر بيه كأنما يگلي "شنو هذا عقل عندج لو ريشة زرزور" ؟

باوعت منا ومنا لا فدك ولا مروه ايا خاينات ياحقيرات .

يعني بس اني خازرني خل اسوي انسحاب تكتيكي احسللي ..

دنكت راسي بالكاع وإفلت .

اخ منك ياابو الرزايل شلون قاومت وماكدرت ترزلني بهذا الموقف .

شردت واول مالگيتهن انهديت بيهن

- حقيرات الله لايوفقجن عفتني وشردتن

مروه.. الله ياخذج شفتي نظراته هسه شيكول؟ انتِ بله يدري بيج مخبله بس احنه شيگول علينه

- اني مخبله؟ اصلاً بس اني الصاحيه منكم كلكم

- كافي ثريا شبيج انتِ زعطوطه والله ماينلام اسماعيل من راد يبطلج ماتشوفين تصرفاتج هاي شلون لهسه مافاصلينج؟

- انتِ ليش هيج تسوين اني بشنو ضارتج؟

- ضارتني لان انتِ اختي هسه يكولون هاي اخت ثريا المخبله

هيَ كالت هيج واني دموعي ظلت تنزل ولزمتني الشهگه .. ظل اشهك وابجي بصوت عالي وهيَ انصدمت اجت عليه

- ثريا شبيج اتشاقى

- وخري عني .. صدك اني مخبله وتستنكفين مني وخررري عني

- ثريا اني انصحج هسه مايكولون على فطرتهه يكولون خفيفه

- خفيفه ! اني مسويه هيج مقابيل الطلاب؟ غير شفتي الكليه فارغه ومحد بيهه وردت اونسجن كلت خطيه سادس ونفسيه تعبانه خل اضحكهن وناصبه عليجن من الصبح لهسه اضحك بيجن علمود تطلعن من جو الدراسه ومن شفت الكليه محد بيهه سويت هيج بس هذا دومه جني ووين مااروح يطلعلي واني هم طلعت مخبله انعم الله عليج

انهديت ماادري شأحچي وشأگول؟

مسحت دموعي ووگفت اريد اروح ودگيت الا نرجع مشي .

مروه.. خل ننتظر اسماعيل

- يتأخر واني اريد ارجع لااهلي والتوبه اذا بعد جبت وحده وياي

- اني التوبه مو انتِ خبلتيني وياج

- يلا يلا امشي واسكتي

مشينا بالشارع ووحده ماتحجي وي الثانيه اني عاكده حواجبي ووجهي احمر من العصبيه وهنه هم مايحجن وياي .

احنه متعودين جنه نروح للمدرسه مشي ف عادي اذا اجينه مشي محد يحجي . وإسماعيل خاف يتأخر واني ماكدر ابقى بالكليه من الفشله كل موقف اريد اتونس بيه يطلعلي بيه ابو الرزايل .

ظلينا نمشي بالشارع وهاي فدك لابسه قميص  حصر وهيَ جسمهه بارز كلش .. جاي نمشي ومانحس الا ولد مر من يمنه ظل يباوعلهه ويضحك رأساً صچمهه كال :-

- احح شهالصدر ابو السمائي

فتحنا عيونه ووحده إلتفتت ع الثانيه مصدومين .. رأسن صحت بيهن

- دنگن لحد ترفع راسهه الراس الينرفع اكسره والله

إنخبصت وظليت ارجف اني اخاف من هيج مواقف وخصوصاً الشباب بهالوقت .

ثواني وصفت يمنه سياره ظليت ارجف وجسمي كله يرتعش برعب فضييع !!

يتبع..

             عـبـرات الـعـبـادي🌻🌼

يعني ماتكدرون تقدرون تعبي بتفاعلكم؟؟ بس اني اتعب وياكم ؟ والله مليت اذا تبقون هيج اوقف القصه وعود لاتعلقون ولاشي ابقوا هيج يعني قصص اقراها مامتعوب عليهه وواصله مليون وهي والاخطاء الاملائيه ماليه القصه اني هسه اسحگ إي بس اخطاء املائيه اعيد البارت كم مره اتأكد الا انزل !!!!!