رواية هشاشة قلب الفصل الحادي عشر 11 - بقلم هاجر قاسم

الـسـلامُ عـلـيكـم🌻🌼

هشاشة قلب
الـبـارت_10_
عبرات_العباديه

لا يضرنى أن ليس على رأسى تاج مادام فى يدى قلم ✒ مشروع كاتبة مبتدئة
حسيت صفطت يمنه سياره ظليت اتراجف وجسمي كله يرتعش ..

مااگدر ألتفت خاف يطلع شخص يريد يخطفنه النوب شأسوي وين ادگ وين الطم .

إلتفتت صفح باوعتلهه بس طرف عيني لمحت السيارع هاي سيارة أسماعيل يمه دخيل بختك نقذتني .. درت وجهي بأكمله ورحنا ع السياره بس شنو شصاير بيه .. وجهه صاير أحمر وعصبي وشرايينه بارزه مبين شافه .. رأساً اشرلنه ع السياره وطلع راسه من الجامه

نتر ؛-

- اصعدددن بسررررعه

صعدنا وهوَ التفت علينه وعاط

- شكال هذا؟؟؟

رأساً كتله :-

- ماگال شي

- ثُريا لاتخبلني كال شي بس شنو؟؟

- انتَ شلون شفته؟

- ولدد واعرف سوالف الولد

- ماادري شگال

- حسابي وياجن مروه وثُريا اوصل وشوفن شأسوي ظلن لاتحچن .

ظلينا نتراجف اني ومروه ووحده تباوع بوجه الثانيه احنه شعلينه اني مالابسه سمائي ولا مروه . بس فدك لابسه قميص سمائي مشطب

فدك نقضتنه من كالتله :-

- اسماعيل هوَ صچمني البنات ماعليهن واني ماعرفه ولد عابر بالشارع قابل كايلتله
- شگااااال؟؟

- مااگدر اگول شگال

إسماعيل...فددددك شگااااال؟؟؟؟

دنگت وكالتله

- هيج قلد على لبسي

اجت عينه بنفس المكان التصجمت بيه لان صدگ مضبوبه ضب وهيَ من راحت لابسه عبايه بس من رجعنا ذبتهه لان توصخت حسب كلامهه .

عاط بيهه

- هذذذاااا لبسسس هذذذا؟؟؟ حقه يصچم ولو ساحبج بالشارع ماألومه هسه هيَ البنت تنتبه للبسج ف كيف الولد ؟؟

فدك.. معليك بلبسي اهلي يعرفون بيه

- ماكو اهلج هسه انتِ بمسؤليتي اني جبتج واني ارجعج مو مال تطبقين عليه ذني السوالف مال اهلي وولي امري فهمتتتيي وبعدين ليش نازعه العبايه وتدرين بلبسج مضبوب وجسمج يجيب التايه ؟؟

ظل يرزل بيهه ونزل عليهه دوسه ونص ..
ظلت تبجي لان حست بغلطهه وإسماعيل كلش أنفعل وجهه صار احمر ومعصب حيل
فدك.. اني شدراني يذب حچي عليه وبعدين نزعت العبايه لان ضايقتني وماكدر امشي بيهه كلساع اتعثر

إسماعيل... هـه !! خوش حجه

- اني مامجبوره اجذب عليك لامسؤل عني لاابويه

- كاافي اسكتي مااسمع صوتج امسحي دموعج وهذا آنه إله والله أعلمه

اني رأساً گتله

- إسماعيل وين تعرفه؟؟

نتر بيه :-

- شعلييج

مروه تقربت يمي وحاصره الضحكه تستهزأ بيه الحقيره .. همستلي :-

مروه.. احسللج هيج؟؟

- وسم عود اني واسطتي قويه يمه عبالي يكلي بالحقيقه عود إلي خاطر وكذا تالي فشلني تعلم من ابو خاولي

- والله تخيلاتج واسعه حييل
- اششش اسكتي انهديتي البنيه تبجي ع الاقل سكتيهه يالعاقله

وصلنا للبيت وإسماعيل ظل مغندب وهاي الثانيه گضتهه بواچي شلون إسماعيل رزلهه وهيَ المدلله مال اهلهه عشتو . خالاتي كلهن مدرسات ووحده دكتوره وحالتهن عالي العال .

ظلت متكأبه اليوم كله وماتحچي وي أحد لما صار الليل دكت رجلهه الا تمشي بالليل ماتذكرت حضرتهه تريد اهلهه الا بالليل .

إسماعيل عاند وكال مااوصلهه خل تركع راسهه بالحايط .

هيَ سمعت هيج وظلت تبجي وتصيح اريد اهلي

اني لزمتهه تحشيش

- اوكفي اوكفي خل اخابر خالتي اكلهه تسويلج حليب بمميه وتدزه الج

- ثريا مو وقتج مااتحمل اكعد لحظه وي هذا المعقد

- عمت عينج اذا اخييي معقد عمي انتِ ماتشوفين لبسج

- ثريا مو وقتج والله مو وقتج روحي طافره
- اوكفي خل اشوف حسن اذا يقبل ياخذج

همست :-

- لا أريد إسماعيل يوصلني

تخصرتلهه وباوعتلهه بشك

- ها شكو ليش إسماعيل؟؟ مو توه جان معقد

- لج لا مو بلكي يأنبه ضميره ويعتذرلي

- وشتستفادين من يعتذرلج؟

- يرجعلي قيمتي

- تره إسماعيل ماماكل قيمه من محرم .. ان شاء الله بس جيرانه يطبخون انه اگله يجيبلج

- اهووو عوفي القيمه روحيله خل يوصلني

- يلا رايحه لخاطر دمعاتج خطيه كسرتي خاطري

رحت لغرفة إسماعيل .. هوَ بيتنه اربع غرف وحده إلنه البنات واثنين للولد إسماعيل وحسن سويه.. وموسى وحمزه سويه وامي بغرفه .. الاستقبال احسن شي ببيتنه .
دكيت الباب على اسماعيل والبلوه هاي تتصنت علينه ساحله روحهه چنهه ثُرىٰ ام گصايب .

طلعلي اسماعيل وشكله كله معصب وعيونه بعدهن حمر حتى خفت منه ردت اشرد وارجع لااهيلتي بس بعد صرت بموقف ماانحسد عليه

كتله لبگ ع السرعه .

- اسماعيل فدك تريد تروح لااهلهه تعال وصلهه تبجي على امهه تريد مُلهي

خزرني يممه وعلي ردت اشرد بس مدري شخلاني صامده وواگفه مقابيله وادري بيه من يعصب دربه مايندله .

إسماعيل.. ثُريا روحي كليلهه مااوصلهه لو ترگع راسهه بأربع حيطان واذا طلعت من الباب اكسر رجليهه

- يح .. شبيك سمعو ؟؟

- ثررررررييااا روحييي راح اطلع حرگتي بيج

- اي اني هذا حظي ياهو اليجي يريد يذب حركته بيه

كلت كلمتي واطفر ..شردت للغرفه هيَ سمعته من كال هيج خلت وخنست بعد ماسمعت صوتهه والله وطلع اسماعيل خالسهه مثل ما ابو الرزايل خالسني .
تدثرت ونامت وظلت بدون عشا .. سوينه العشا وإلتمينا اول ماگعدنه إسماعيل باوعلنه كلنه كأنما يتفقد .. گال :-

- اكو شخص بعد ناقص وينه؟

اني مااگعد راحه رأساً كتله

- ها ابو السوس خو كول اسم الشخص (واغمزله)

- شنو هاي ابو السوس ؟؟ والله إذا صحتيلي بيه بعد الا أشرم إذاناتج اليشبهن إذانات الطنطل

- يمه يمه رايحه اصيحهه بس علمود احافظ على إذاني الصغيرونات فدوه رحتلهن

ظلو يضحكون واصلاً همه يحبون تحشيشاتي .. رحت كعدت بيهه ماقبلت ومطنگره

- ولج فدك كومي تعشي

- الا إسماعيل يجي

- هلو هلو ربحتي يثُرىٰ ولج انتِ حاطه عينج على اخيي؟؟افگسهه تره والله

- ولي گلتيهه انتِ اخوج مو حاطه عيني عليج ام گصايب ماخذ الشايب

- اي وام گصيبه ماخذه الشيبه
- ههههههاي

- كومي كومي سمعو ميقبل يتعشى الا انتٍ يمه منين طلعتيلنه عمي

- لا خل يتأدب حتى بعد مايرزلني

- شو ماتتگلبين .. قميصج مضبوب وترديه يسكت

- اسكتي لاتذكريني بس روحي كليله ماتشتهي وماعليج هسه هوَ يجي

- امممممم

- والله تنجح الخطه بس روحي

- خاف شو شتسوين بإخوي ولج

-دروحي شكد لزكه

- احم منو لازك لااخوي مثل لزكة الفار؟

- روحي شبيج

- رايحه رايحه

رحت كعدت وإسماعيل يباوع وراي يريد يشوفهه بس خابت ظنونه من تربعت ع السفره وظليت امل وسويت نفسي مندمجه .
صافن عليه مصدوم واني ميته عليه ضحك بگلبي ..

كال

:- وينها ؟

ظليت أكل باللگمه واسوي نفسي اكل

- ها منيه؟

- اني وين دزيتج؟

- رحت جبت ماي واجيت

- ثرررررييااا

- ها سوري سوري إستاذ بس فدوك ماتقبل تجي تگول مااشتهي

دنگ ووجهه إحتقن لاگام ولا راحلهه ههههاي والله كبسه بطعم البتيته .

ظل ياكل بهدوء ووجهه معصب مبين من عگدة حواجبه .

خلص وكام بهدوء وفدك متظاهره بالنوم يافشلة الفشله .

..
ظلت لثاني يوم واني رحت للكليه وهيَ ظلت بعد من رجعت مالگيتهه .

من داومت بالكليه ابو الرزايل اليوم متكركح بمكان العميد .. عنده اجازه ومسويله توكيل مدري شنو .

وضاب الكليه ضب بحيث كل الدكاتره اول مايصير وقت المحاضره ركضوا.

دخلنا للمحاضره مالته وهوَ بس مخنزر وعيونه طافره بگصته .. يمه خوفني چنه جني .

النوب يفتر وعادته مانبطلهه كل رحله يمر من يمهه يضربهه بالقلم وهاي الحاله توترني .

اليوم لااول مره بحياتنه مادرسنه بس ظل يفتر عود بمكان العميد وكشخه ايبااخ.

شويه وصاحتني ست اسماء كالت

- اسماعيل مايكدر يجيج اليوم

- ياااا جا ويامن اروح؟؟

- يكول طلعت لكربلاء راح ابقى يومين وهوَ موصيني بيج لخاطر الجوره بس اني تدرين بخطي عنده خط ف راح احاجي ماهر
امده حظي المنگع بماي خابط ماكو سالفه الا حطو بيهه ابو خاولي خبلني والله راح اشفط من وراه .

رحت كملت المحاضرات ولگيته منتظرني بباب القاعه .. ايباه والله كشخه .. اول ماطلعت من القاعه صاحني وكاللي :-

- يلا ثُرىٰ تمشين وياي اليوم مو؟؟

- اي وياك لان إسماعيل راح للزياره يمكن

- تدللين يابه بالخدمه اني ..
يلا امشي وراي للسياره .

ظل يمشي واني امشي وراه والطلاب كلهه تباوع ايبااه والله طگيتي يثُرىٰ ابو خاولي بهيبته تمشين بصفه الا مسافة شبرين .

هسه شيصير لو الشبرين صايرات بكد النمله اووي شوف وين وصلت بالتخيلات يلا خل اتخيل براحتي فدوه لگلبي .

وصلنه للسياره ودخلت .. اشو اباوع من المرايه الصفح مايباوعلي .. اباوع من المرايه الي بالوسط ماكو متجاهلني تماماً شمسويتلك ابو عكرز .

وصلني للبيت ونزلت ميته من الحركه اشو اليوم ولا عبالك ثُرىٰ مقابيله عبالك يمه قرد متيهته أمه .
رجعت للبيت والتحضيرات قايمه لزواج نهى ووليد .. اني هم عود اتحضر وارتب يوميه اسوي بشرتي ومعتنيه بيهه وذني ناصبات عليه عبالهن اني معرسه بس تباً للمستحيل .

النوب هيَ تخابر واني اتحرگن لان حديقه هسه شأسوي بالله .

داومت وابو گزگوزه لاطشلي الا تسوين وياي الهدايا .. اني اخاف من گزگوزته جنهه طير سابح بالدهن وماگاعد راحه .

إجاني بنفسه للقاعه وكاللي

- ثُرىٰ بلا زحمه عليج تجين وياي تسوين الهدايا بمكتبي !

ظليت مصفصفه مكتبه شنو ؟؟ النوب تطلع عليه سالفه !!

وحرجني مقابيل الطلاب .. كمت ورحت وياه ظل يمشي بالممر واني وراه كتله

- استاذ مو الا بمكتبك خلي نسويهن بالقاعه

- واني اجهز هدايا مقابيل الطلاب؟
يابه امشي امشي شتحجين انتِ

سكتت ومشيت دخلت لمكتبه بس ارجف .. ظليت ألف ع الهدايا ع السريع وخايفه منه هسه اليشوفنه سويه بالمكتب شيكول؟؟ الله يعثرك كون ابو گزگوزه على هالسالفه منين طلعتلي النوب ؟
جاي ألفله الهديه وانطيهه إله يخلهه على جهه يم الكرسي .. مديتله الهديه وتعمد يطخ أصابعه بأصابعي .. اني شفته هيج سوه غير لعبت نفسي منه .. رأساً وگفت منتفضه واريد بس اشرد شيطلعني منا .

گال :-

- وين رايحه بعدنه مامكملين لف الهدايا؟

- مااگدر بعد عندي محاضره اسفه استاذ

- لا بس ذني بقن كملي جودتج

- لا لا استاذ مااكدر والله

عفته يريد يلغي واني إفلت .. شردت بريشاتي .. ركضت أهف بتنورتي وجسمي مدري شصار بيه .. صار بيه رجفه بجسمي من ايده لامستني ويع شنو هالاحساس الحقير لعبت نفسي منه هسه لو ابو الرزايل بيهه مجال بس مو ابو گزگوزه .

رحت كملت المحاضرات البقيه .. وشويه واجتني طالبه كالتلي :-

- دكتور ماهر طالبج بمكتبه

- اني؟؟؟؟؟؟

- اي انتِ ثُرىٰ مو؟؟

- اي اني بس شيريد مني؟
- يريدج مااعرف شيريد

يمه إجاك الموت ياتارك الصلاه اكيد شافني بمكتب ابو گزگوزه .

دكيت الباب واني مستعده على أتم وجه للرزاله .

سمعت صوته معصب من كالت تفضل .. دخلت بس اختلست . يمه ويهه مايبشر بالخير

اول مادخلت كاللي بنتر؛-

- ثُرىٰ سؤال واحد جاوبينياه؟

- اي استاذ تفضل

- شتسوين بمكتب استاذ احمد

هوَ ده المتوقع .. يعني توقعته يسأل هالسؤال ومحضره نفسي الحمد لله

- أستاذ لفيت الهدايا وياه

- ليش ماكو غيرج مثلاً؟؟؟

- مااعرف

- اكو مية طالب يروح ويساعدونه والشباب اصحاب نخوه وانتِ شلون تدخلين بمكتبه هيج بدون علم احد؟؟ هسه شيكولون عليج؟؟
ظليت ساكته ومدنگه مااعرف لساني تلّيم اخ لو مخليني مجاوبته وبس ساكت ومنطيني مجال الا اغردله تغرد

رأساً نتر :-

- ماتحجين انخرستي؟؟

يمه هذا شنو كاعد بأفكاري اعوذ بالله .. اشو كلما افكر بشي يطبقه شنو الموضوع راح يخبلني

- لا إستاذ ان شاء الله ماتتكرر

- ثُرىٰ حالياً صرتي اقاربي وبيناتنه صلة قرابه ف اني احذرج من هالباب تريدين تاخذين نصيحتي ك دكتورج او ك قريبج .. إستاذ احمد ابتعدي عنه

هزيت راسي بقبول ..

أردف

- فهمتيني؟؟

- اي اي فهمتك إستاذ

- تمام يلا هسه روحي وبعد لاتدخلين لأي مكتب حتى لمكتبي

- اي
هذا طردني بس بنزاكه عود يكلي لاتجيني بعد ايا نذل ..

نرجس.. ها شيريد

- نذل .. صدگ نذل والله إنك نذل

- يا شبيج شكلتي

- امشينا للكافتيريا اريد اشرب عصير .. عصير اريد اشرب .. اريد اشرب عصير

- يا يا شبيج مشكله اليوم يمه اسم الله البنيه تخبلت

- امشي ولج

رحنا للكافتيريا وظلينا نسولف لما تصير وقت طلعتنا اني واستاذ ماهر .. ايباه والله فخامة الاسم تكفي .

~~~~~~~~~~~~~~~~~~~~~~~~~~~~~~

ماهر

إسمي ماهر دكتور بجماعة ذي قار قسم العلوم الفيزيائيه .. من اني صغير احلم اصير دكتور واهلي ساندوني وحققت حلمي .. بس صار تعييني بالناصريه ف اضطرينه ننتقل من بغداد للناصريه علمود احقق هدفي .
اول سنه عدت على خير .. بس ثاني سنه من شفت طالبه ملامحهه طفوليه وحتى تصرفاتهه كلش استفزتني ومرات ينكسر خاطري عليهه وعلى فطرتهه .. ارزل بيهه لايفيد .. افشلهه لايفيد .. قصدي كله بهاي الرزايل بلكي شويه تستعدل وتمشي عدل بس ياحيف والله ولامشت عدل ظلت نفسهه نفسهه .

وجهه دائري أنف نحيف يعتلي عينان واسعتين .. شفاه بارزه .. وأسنان صغيره متلألأه وجذابه .. بشرتهه بيضه وبيهه ملامح طفوليه وخصوصاً ضحكتهه . ماادري ليش ميزتهه عن كل طالباتي واحب احجي وياهه تضحكني رغم ضحكتي مثل الهلال مره بالشهر تنشاف ..

حبيت اغير من شخصيتهه واخليهه شويه قاسيه حتى تكدر تعيش .. بهاي فطرتهه ماتعيش وي هالذئاب لو تأذن بالجامع

~~~~~~~~~~~~~~~~~~~~~~~~~~~~~

ثُرىٰ

قبل وقت الطلعه رحت للاداره علمود ابو الزرايل داز عليه. لكيته بالاداره واكف عبالك منتظرني .. اول مادخلت كال :-

- ها شنو اوصلكم لو لكيتوا خط؟

- لا والله إستاذ معتمدين على الله وعليك
اني كلت هيج وهذا ظل يضحك من اعماقه ومصدك يضحك .. هسه اني شگلت ابنل ابنل .

باوعلي مبتسم وكال

- لعد شلون؟ اني عندي شغل كلش مهم ولازم اطلع بسرعه لان العميد اليوم موكلني مكانه تعرفين .

عرفته جاي يخبث وياي لان شافني بمكتب ابو گزگوزه والله ويريدني ارجع وحدي ابو خاولي

- لا استاذ اروح وحدي عادي

- لا يابه شنو وحدج بس هسه اشوفلج دكتور يوصلج

ظل يفتر عليهم كلهم وكلهم مشغولين ويطلعون مية عذر .. بهاي الحاله حصرتني البجيه حسيت نفسي انذليت واحد يذنبي ع الثاني استاذ قاسم يصيح (والله حالف اي طالبه مااوصل) واستاذ عزيز يصيح (خل يوصلهه استاذ عصام) .. كام واحد يشمرني ع الثاني .. كله من وراك اسماعيل ليش ذليتني ..

اخر شي طلعت من الاداره صاح وراي

- ها وين رايحه؟

- اخابر اخويه حسن يجيبلي تكسي ويجي
- لا اني اخابره

- لا لا اني هسه اتصل عليه

جذب اني متوجهه لمكتب إستاذ احمد ماكو عندي حل غيره .

بعده بمكتبه لان دائماً يتأخر ..

دكيت الباب وسمحلي بالدخول ..

دخلت وهذا وكف مكيف وطاير ويرحب بيه اني لعبانه نفسي منه بس على عناد ابو الرزايل والله لااخليه يتشعوط

ك

ال؛-

- ها ثراوي خيرج؟

عزززا صرت ثراوي يمه من شوكت هاي ؟!!

- استاذ والله اخويه سافر لغير محافظه وولا استاذ يقبل يوصلني لااهلي بلا زحمه عليك اذا ماعندك شي وصلني بطريقك
- تدللين عيوني الج بس يصير الوقت تعاليلي واني اوصلج

- تمام .. شكراً استاذ ماانسى معروفك

- لا لا هذا واجبي

طلعت من مكتبه واني شعور خوف داخلي .. ماادري شسويت ومادري شجاي ألوص بدل مااكحلهه عميتهه .

صار وقت الطلعه واني رحت لمكتب استاذ احمد لكيته يقفل بالدولايب .. رأساً ضحك واشرلي ع الباب وكال

- جاي جاي اطلعي كدامي سيارتي تلكيهه بباب الكليه اوكفي يمهه ودقايق واجي

رحت وكفت يم سيارته ومنتظرته شوكت يجي ..

لحظات ووكفت وره سيارة ابو گزگوزه صفطت سيارته بس بشخط مبين مال واحد محترك ولزم بريك قوي بحيث صوته طلع

طلع راسه من الجامه وصاح :-

- تعاااااي تعاااااي

يتبع...

عـبـرات الـعـبـادي🌻🌼

واعذروني اليوم البارت قصير .. لان اجيت من العياده مباشرةً كتبت رغم الدكتور نصحني ماالمس الموبايل يومين بس لخاطركم .. وطلع درجة القصر عندي 4،5 من 6 .