رواية هشاشة قلب الفصل الثاني عشر 12 - بقلم هاجر قاسم

الـسـلامُ عـلـيـكـم🌻🌼

#هشاشة_قلب

#الـبـارت_11_

#الكاتبه_العباديه

#alabadyia_09

‏أنــا لا أريـد مُجـرد البقـاء حـيـاً .
                           أُريــد أن أعـيــش .

‏~~~~~~~~~~~~~~~~~~~~~~~~~~~~~~~~

ثُرىٰ

لحظات ووكفت وره سيارة ابو گزگوزه صفطت سيارته بس بشخط مبين مال واحد محترك ولزم بريك قوي بحيث صوته طلع

طلع راسه من الجامه وصاح :-

- تعاااااي تعاااااي

يمه متت من شفت شكله معصب وعروقه بارزه خو العيون يبوووو الله لايراوينياهن لو معميه بهاللحظه احسللي .

من الخوف تصنمت وبقيت واگفه بمكاني لااروح ولاارجع عبالك صنم هندي .

نتر بصوت شبه عالي :-

- ماتجيييين؟؟؟؟؟؟؟

رجليه وحدهن تتطاگگن سويه وركضن يمه وكفت مقابيل سيارته واني ارجف .. يرعبني حيل إذا يعصب .

بدون مايباوع بخلقتي الجميله گاللي :-

- إصعدي ع السريع

فتحت الباب وشمرت دقله بالسياره بحيث التنوره تلفلفت تلفلف صرت عبالك قرنابيطه .

گعدت واعصر بأصابعي وهوَ زايط ابو عكروز .. كلساع اخطف عيونه بنظره من المرايه الي بالوسط .. من شافني كلساع اخمطلي نظره طلع نظاره شمسيه ولبسهه !

شكد نذل حتى من هاي حرمني الحقير .

بس من طلعهه عبالك صنم صيني وهوَ يسوق إيده تسللت وطلعهه وچكهه على عيونه خفت هالعيون الزگل .

يسوق سريع ابو فنتيخه عود معصب .. واني شلون مااحب السريع مكيفه وطايره وأضحك .

ظليت اطگطگ بأصابعي لان گامن يوجعني .. كل إصبع اطگگه مرتين .

من سويت هيج تخبل .. رأساً نتر :-

- أصابعج !

سويت روحي غبيه گتله بفهاوه :

- ها؟؟ شبيهن؟

احسه گوه مقاوم مايلكمني ببوكس نتر:-

- لاتطگگين قلقتيني

عين وعماد لزمت إصبعين وطگگتهن .. إلتفت عليه وهوَ يسوق خزرني حيل ورجع إلتفت يسوق .. يمه هيَ لحظات بس غير متتت من الخوف .

ظليت مثل البزون الضام راسه مدنگه راسي وخزرته تتكرر ببالي .

هسه شعليه هوَ غير أصابعي يوجعني وطگگتهن بكلشي حاط خشمه .

همس بغضب :-

- ثُرىٰ انتِ تعانديني لو شنو؟؟

يمه هذا عن شنو يحجي بسرعه گتله :-

- اني؟؟ لا لا ابدد

- لعد شيسموهه من رحتي لمكتب احمد؟؟ ممكن اعرف؟؟

اجيت اگله مو ممكن بس خفت من الراشدي لايجيني طياري ثلاثي الأبعاد .

گتله :-

- اريده يوصلني لان بس هوَ عنده غيره

وگف السياره بقوته بحيث حسيتهه انشخطت بالگاع . دار وجهه عليه نزع النظاره وطلعن العيون ويلااااه .. والخزره بعيونه تجدح .

نتر بصوت عالي :-

- شنو قصدج اني ماعندي غيره؟؟؟

ظليت امتمت ومااعرف شنو احجي !

- لا والله لا بس ماادري شنو شعوري من كلكم واحد يذبني ع الثاني وعبالك هم ثقيل وگعد على گلوبكم

عصب ووجهه صار أحمر

- اني ردت اسويلج گرصة إذن من احمد تروحين ترجعيله ليششش؟؟

سكتتت.

همس بصوت غاضب :-

- بسيطه

ظليت ارجف وسكتتت مااكدر احجي كلمه .
وصلني للبيت بس شنو سياقه مال واحد يريد ينتحر بيك .

بسرعه نزلت لااهلي اركض واصيح بگلبي

- هلي يامن ضيعوني

دخلت للبيت ألهث من الخوف .. بس الگعده وياه بنفس المكان توترني وتقلقني .

إسماعيل بعده ماجاي واني دخلت عطت بأخواني عشتو

- انتم زلم مشوربه شبيكم ماجيتوني ماكلتو هاي العجيز خطيه تظل وحدهه

حمزه.. والله اني عندي دراسه

موسى.. واني چنت بالشغل

حسن.. ماخابرتيني من دكتورة أسماء

- وين حافظه رقمك وبعدين منيلك موبايل

- ثريا انتِ مطفيه شبيج؟ صارلي شهر اشتريت صرصور بعينج

- ياا صدك جا ماتنطينياه العب حيه

- لا لا جذب مااشتريت اتشاقى وياج

- ديلا ميته على حيتك خل اروح ابدل وباجر انتَ توصلني

- اي صار

- اوف والله ياسمعو مكانك خالي وين خليتنه ورحت چني تايهه مثل العميه بلياك

- امشي ولج واحنه مو بعينج؟

- اي بعيني وهل اشوفكم وصلتوني ورجعتوني .. ذله بحياتي ماانساهه مدرس يشمرني على مدرس وانتم هنا مكركحين

- غير وصينه اسماء

- شعليهه بيه ابتلت واصلاً مو هيَ توصلني استاذ ماهر

- اي مادام ماهر هاي هيه صار گرايبنه بعد

- لا عمي مااريد انتَ تجيني باجر

- اي اي اني اجي بس اسماعيل يمكن يجي بالليل

- لا خطيه يجي تعبان ويروح يبتلي بيه

- بكيفه بعد

- يلا خوش

رحت للغرفه سولفنه شويه اني والبنات لما صارت الساعه بالـ2 ونص واني مانايمه صخام بويهج ثُررىٰ .. ركضت تدثرت بديباجي ونمت لان اذا أسهر مستحيل باجر اكعد للدوام.

نهى.. ولج ثريا تعاي بس هاي السالفه كمليهه عليج الله

- تگلبي من يمي وبعد لاتكولين ثريا اسمي ثُرىٰ الحاضر يعلم الغايب فهمتوو؟

- لا والله خاف متقبلين؟

- لا اقبل ولاتتبغددين مايلوكلج يلوك بس لاابو خاولي

- لا والله يلوكلي فدوه إلي

- متواضعه الله يحفظج

- خجلتيني

- دكومي كومي وينج وين الخجل شكلج ما خجل انتِ

- يلا انطمري رايحه اخابر ولودتي

- باع اسمه معقد مثل عمه حتى مايصيرله دلع

- اسكتي ثراوي (وتغمزلي)

عود لان إستاذ أحمد صاحلي ثراوي والنوب كلهن لزمنهه عليه كامن يصيحني ثراوي واني احب اسم ثُرىٰ .. ثُرىٰ وبس والباقي خس .

.
.
.

نايمه بعمق واتحلم چن گاعده بالكليه ع الستيج مالتي ووجهي مبتهج واضحك بصوت عالي وبلحظه دخل القاسي تقدم عليه وبإيده ورده وشكله مبتسم وعيونه تلمع من الفرح !!

وكفت متصنمه وصافنه بعيونه اريد اشبع عيوني شوف بيه واريد اضمه بگلبي على جماله ورجوليته الطاغيه .

كلما يتقدم خطوه گلبي دگاته تزيد وتبقى تتضارب ويه انفاسي المتسارعه ..

وصل يمي مبتسم وعيونه لامعه .. رفع حاجبه بمكر وأبتسامة خبث مرسومه على شفافه المشدوده ..

قدملي الورده الحمره وكال

- أحبچ ملكة گلبي !!

يممممه بهاللحظه شصار بيه متت متت گلبي يدگ ودموعي نزلت فرح .. ركضت عليه حضنته وابوس بيه واصيح بعلو صوتي (أأأحببببك) ضحك من أعماقه ابتعد وبعدها ركض عليه شالني ويفتر بيه وآني فاتحه إيديه مثل الطير الحر ..!!

..

فزيت مرعوبه من حلمي على گلاص مـي نگعني ..

گعدت أرجف وأعيط وأنكث بملابسي بسرعه واشهگ من الفزه

- شبييييككككممم ؟؟؟؟

أُمي عاطت بيه

- ولج الساعه بـ8 راحت عليچ الكليه صخام الصخمچ

إنتبهت للساعه فكيت عيوني على وسعهن وطفرت أرجف وألبس بملابسي ومعصبه على امي وأعيط لان ماگعدتني .. گلبي انخمش اكيد راح اترزل والله متأكده .. أكيد هسه راح يدخل للمحاضره الوهواس داهم أفكاري وافقدني سيطرتي ..

ركضت بسرعه بسرعه بدلت بتنورتي الرصاصي وقميصي المشطب بالأبيض وماروني لازگه بيهن على طول السنه ..

ركضت للكليه ارجف وادعي كون بعده ماداخل للمحاضره .

صعدت بسرعه بالفورتات همزين وگفولي وارجف واركض حتى مالبست شالي عدل ..أصلاً زين من لحگت غسلت وجهي ..

گاعده بالسياره وكلساع وگـلت للسايق
(فـدوه استعجل)

لما عاط بيه گدام العبريه فشلني ابنل ابنل ..

ردت اغرد وارد عليه بس مااگدر لازم يوصلني

ذبني ع الشارع العام وركضت للكليه حتى حذائي ماأدري شلابسه ووجهي ماشفته اصلاً

دخلت للكليه هددوءء يمممه صخام اكيد بالمحاضره هاي هيه الله يرحمني

بقيت متردده ادخل لو لا . ؟؟

شفت وسام ابو الكافتيريا گـال

- ادخلي ادخلي اليوم هادئ ويضحك

- خويه هوَ من يشوفني يعصب والله خايفه

ضحك وهز إيده

- أدري شبح وتخافين منه يابه دخلي راح تروح عليج المحاضره وبعدين هوَ توه دخل ماصار دقايق

وكفت مقابيل الباب اصعد إيدي وأنزلهه خايفه لايطردني .. دائماً يطرد الطلاب بس إذا هادئ ويضحك يدّخل وهسه يگول وسام هادئ !

مديت إيدي ع الباب ونزلتهه ..

اخخ ياربي راح اموت من الخوف شو خل ادگ وشيصير خل يصير .

سحبت نفس وعدلت شكلي ووگفت بشموخ أتظاهر القوه وآني داخلي هـش . مديت إيدي بكل قوتي ودگيت الباب !!

ماكو صوت !!
عززااا !!
دگيت الباب مرة اللخ هم ماكو صوت !!

گلت شو خل ادخل .

فتحت الباب ومديت بس راسي !!

القاااعه هدددوءء وبس هوَ واكف چان يشرح المحاضره وتوقف من سمع الباب وشافني

طلعت جسمي كله من وره الباب وگتله بخوف

- آآءء ... أستاذ ادخل؟

رد بهدوء وجمود وأحسه گوه متمالك أعصابه علمود مايسمطني براشدي

گال ببرود

- من دگيتي الباب آني كلت تفضل؟

سكتت..//

- جاوبي

رديت بخوف وإيديه ترعش وشفتي ترجف

- آآءء .. لا ماگلت

گال ببرود وجمود واشر بأصبعه السبابه ع الباب

- إذن تفضلي برررره

تحولت نبرتي لتوسل لأن ادري ميفيد وياه هواي طارد طلاب گدامي بس ذولاك أغنياء يطلعون ويستنسخون المحاضره ويقروهه إذا آني الحرف يطير مني بعد استغبي وماعندي استنسخ

- إستاذ فـدوه خل ادخل والله اخذتني النومه والسياره مال اخويه عاطله اضطريت اجي مشي فـدوه استاذ بس هالمره

طبعاً چذب لاسياره ولاشي هوَ زين من عنده بايسكل هيَ مال صديقه واخذهه منه

گال بنفس نبرته

- تفضلييي برررره

الطلاب كلهه تباوع عليه وآني منظري ميسمح ابدد شكلي كله مخربط ولبسي مبهذل

- استاذ فـدوه والله اول مره وآخر مره .. إذا فوتت محاضره وحده ارسب فـدوه

بقيت أعصر بدموعي بلكي ابچي وسويت القاعه مسرح مال تمثيل .. زفر نفس بعصبيه وكال بنفاذ صبر ويه رفعة حواجبه

- ادخلي وهاي آخرررر مررره

- اي اي والله اخر مره

دخلت للستيج مالتي گعدت ونرجس گرصتني وهمست
- (ارتاحيتي على هالمسرحيه من الصبح)

- خايبه اسكتي عني كله من وراج

ضحكت عليه وهزت إيدهه كالت (اني شكو)

بقى يشرح وآني مركزه بنظراتي ويه حركات إيديه وتأشيراته للدرس والكلمات من تطلع من شفته ورزانته وثگله يخبلل وخبلني وياه

بقيت امشي بعيوني على جسمه المربوع وعضلات أكتافه وصعدت بنظراتي لرقبته البيضه المغطاة بياخة القميص مال الزي الرسمي .. ووجهه الضاوي بذقن مدبب ولحيته الخفيفه وشواربه الخفيفات سحرنّي .. وعيونه الواسعه وشمرة حاجبه وثخنه ..

تسريحة شعره المرفوعه وثخن شعره الفاحم ومصفوط بترتيب ويه عگده حاجبه من تتطبگ گصته ينزل شعره بإغراء عجيب  ..

نزلت على حذائه تللممع ويه خرطة بنطرونه

نزلت عيوني على حذائي يبوووو تفشل وعلي مال هسه اطم روحي على هاي الحذاء ..

تذكرت الحلم .. ابتهجت أساريري وضحك وجهي ويه صفنتي بيه وبجماله صار عبالك واقع ..

فزيت من صفنتي على إيد نرجس بخاصرتي همست من بين فتحات قليلات بشفتهه

- ولج إنتبهي راح يرزلچ

- اييييييي

ظليت فاغرة الفم بشكله وهوَ يداعب مُخيلتي حسيت نفسي طرت بالسماء بالاستمتاع بشكله الجذاب مثل القمر المتألق بسماء بغداد ..

تذكرت شكلي من طلعت الصبح يبوو يخززي .. اتذكر عندي مرايه بجنطتي اي همزين حاطتهه إحتياط شو خل اشوف چهرتي .

تسللت إيدي بهدوء للجنطه وكعدّت المرايه بوسط الجنطه ونزلت جسمي ووصلت وجهي يم المرايه وبقيت اعدل بشالي واروح منا ومنا على جهة المرايه لان صغيره حيل مال باودر وشالعتهه  ..

فزيت على صوته العصبي ورج القاعه رج خلى كل الطلاب يلتفتون عليه مصدومين نزلت كلماته بإطرائي على راسي مثل الزلزال

- ثُثثرررررررى

رفعت راسي بسرعه وعيوني مدمعه وابلع بريقي من الخوف .. بطني مباشرةً خبطت وشفتي رجفت من الخوف والرعب ..

إرتعدت اوصالي وبقيت ارمش بعيوني حابسه الدمعه !!

لا هاي هيَ خل اقره على روحـي السلام من هسه ..

شفته واگف ويباوع على جهتي وعيونه تريد تطلع من الغضب وصاك على اسنانه حيل ومقوي قبضة إيده ع القلم ويزأر عليه مثل الاسد !

نزلت راسي وودي اطمه بالطين على هالفشله ! صخام الصخمني اي والله .

صاح بعلو صوته وآني ارجف من الخوف .. ايدي رجفت والمرايه وگعت مني وصدى صوتها رج بالقاعه كلهه  .. حسيته يريد ينتقم مني على عملة أمس وزودتها بهاي عملتي

كال بصوت مهزوز وغاضب

- إطلعيي بررره

- آآآ إستاذ ... (بعدني اريد احچي وقاطعني بعيطه هزت كياني)

- برررررررره ددددااااااگووووووول

ماكو مجال بعد اتوسل ولااحچي كلمه لان غلطت غلطه مينلبس عليهه ثوب !!
ومبين مايتفاهم اليوم خوش هادئ هـه

درت وجهي اخذت جنطتي من الستيج ودمعتي وگعت على إيدي .. هوَ بالتواسيل دخلني والنوب اسوي هالكارثه هاي واگفه..لو طامه روحي مو احسللي من هالفشله .

حاولت اوقف دموعي وهنَ ماصدگن عبالك نهر وانفتح ..
بقيت امشي بتثاقل من الفشله .. وواحد صاحلي بصوت شبه مسموع بس هوَ سمعه مايخفى عليه خافية ..

؟ - ديلا تحركي ادري تمشين على بيض !!
ويضحك

دموعي صبت .. وسرعت مشيتي صارت عبالك ركض.  
عبرت من يمه وهوَ واكف بجمود ومخنزر بنضراته مثل البركان المتحضر للانفجار ..

مشيت بسرعه وطلعت قبل لااسد الباب سمعته صاح بصوت عالي :-

- منوووووو حححححچچچچه؟

طلعت بالحديقه بقيت اشهگ وابچي دومه مفشلني بس ماتوصل بيه يطردني !!

يگعدني من صفنتي اي ،، يگومني وماعرف ويرزلني اي بس مو طرده ورزاله !!

بقيت گاعده ع المسطبه وابچي ووسام خطيه كام يباوع عليه متأسف عرفني انطردت !

هوَ آني الصوج بيه متوازيه الا اطلّع مرايه

ماتحملت ابقى بالكليه ،، يــع والطلاب هسه يطلعون يتنادسون عليه مثل مايوميه يضحكون ع الي يطرده .. لا ابد مااتحمل هوَ آني اقل موقف ودموعي صبن مو الا هيج يصير بيه خل انفذ بريشاتي احسن .

طلعت ركض ابچي ماكو فورتات بهيج وقت ف اضطريت ارجع مشي ..

وصلت للبيت بعد طريق طويل ومتعب كل مااتذكر اموت قهرر ..

دخلت بدون سلام مباشرةً رحت للغرفه لگيتهه صايره لخه من الهوسه .. ذني الحقيرات مبدلات ومخليات ملابسهن على فراشي ...والفراشات بعدهن ماملمومات .

تمددت بفراشي بعده على حطت إيدي بقيت ابجي واتگلب وكلما اتذكر الموقف ازيد بالبچي ..

دخلت عليه امي متفاجئه :-

- ثريا شبيج؟

- مابيه شي

- احجي ولج  مساع داومتي شوكت لحكتي تحلين

- ماما اني طلعت احس نفسي متخربطه

شطح بالهه غير شي رأساً گالتلي :-

- اسويلج أعشاب اجيبلج علاج؟

- لا لا ماكو داعي اني راح انام وارتاح

- يلا بكيفج

طلعت وطفت الاضويه احلى فقره سوتهه .. اتخبل اذا الضوه يبقه مفتوح .

شويه وأنفتح الگلوب يبووو اليوم فلا يخلوني أنام .

عطت من جوه الغطه

- خلوني أنام رحمه للميتين والعدلين

- ولج مامشتاقتلي

سمعت صوت إسماعيل رأساً شمرت الغطه وطفرت عليه حضنته شكد مشتاقتله يربي من شفته تذكرت الفشله ونزلت دمعتي

- شبيج؟ اوگفي اوگفي اطيني عطوه خلصي مكالمه واحجيلي شبيج بس هسه الموبايل يتصل هاي صديقتج

باوعت بالأسم مكتوب عليه نرجس مابيه اجاوبهه بس إسماعيل منا هسه شيگول
حطيت الموبايل على أذني وگوه احچي

- الـووو هـا نرجس؟

- هـلاو ثريا شونج ؟

- زينه

إسماعيل خله وطلع احلى شي بسرعه يحس بالشخص خاف يريد ياخذ راحته فد شي .

سألتني نرجس

- ثريا وينج

رأساً بچيت

- يا يا شبيج لاتبچين قلقتيني وين انتِ هسه دورت الكليه كلهه ماكو؟

- اني هسه بالبيت

- يـا شرجعج للبيت؟

- المن باقيه للطلاب حتى يصنفون عليه ومنا اني شلوني تهي بهي

حسيتهه مرتبكه وكوه تحچي وتمطمط بالكلمه

- اگلج شبيج انتِ گوه تحجين؟

- هـا لا مو ذني ملازم محاضرة اليوم

- هوَ آني مااريد ملازم مال محاضرات بيه حيل مصاريف خيولن يختي

غلست وكالت :-

- إي إي الاستاذ وزعهم

- هــاا زين

- يلا اخليج براحتج

- تمام باي.

سديته منهه ورحت لاإسماعيل گعدت يمه وحط إيده على متوني .

سألني :-

- شبيج شكلج تعبان

- من وراك غير

- ههههه لا صدگ شبيج

- اي والله من وراك.. عفتني حال الظيم حالي واحد يشمرني ع الثاني وتفشلت بين الدكاتره

- شعجب اليوم مامداومه شنو؟

- لا داومت ورجعت لان تعبانه

- بيهه الخير .. بس اني وصيت دكتورة اسماء ليش ماوصلتج

- لا الخط مالتهه عنده بنات واذا يوصلني يتأخر ف دزتني وي استاذ ماهر واستاذ ماهر عنده شغل وظل واحد يذبني ع الثاني حصرتني البچيه والله .

- لا ماتوقعت هيج .. للأسف اني أمنتج يمهه لان مره وأثق بيهه بس تدزج وي الدكاتره شنعرف منهم احنه صحيح دكتور ماهر عم وليد بس يبقى غريب ومامعاشرينه ونعرفه شنو والاهم يبقى رجال .

- اي حتى بعد ماتعوفني

- مااعوفج راح أحطلج خط

- لا لا مااريد

- لا انتِ هم جاي تتعبين

- إسماعيل انتَ وصلني والله اتفائل وياك

- هههه فدوه رحت لااخيتي

اتفقنا بس بالأيام المشغول بيه اجي وي خط نرجس .

.
.
.
.

ثاني يوم داومت وفشلانه هم من الطلاب وهم من ابو خاولي وشلون اباوع بوجهه وهوَ طردني .. حقدت عليه حيل .

طلعنا اني وإسماعيل ووصلت للكليه من وكت .

دخلت اسحل بروحي سحل .. رحت لقاعتنا فارغه گعدت على أول ستيج صاير يم الحايط حطيت رجل على رجل خل اجرب الاحساس هذا .

طلعت مرايتي جديده البارحه شلعتهه من باودر نهى بدون ماتدري هسه بس تشوفهه ماموجوده تشنقني .. بس منتصرون رغم الألم .

طلعتهه اباوع على وجهي وادردم عليه واني صوتي مامسموع الله يحفظني .

- شكد حقير فشلني ابنل ابنل عبالك ماشايف مرايه يعني شبيهه طالبه حبابه مؤدبه طلعت مرايه تشوف چهرتهه تفشلهه ليـشش؟
عابت شگد غثيث ومكرررروووه الضخم ابو عكروز ابو خاولي .

شفت خيال من بعيد عبالك واگف وره الحايط اليم باب القاعه والنوب اني اول ستيج يمممه اكيد هوَ لان حتى بگدر الهريسه طالعلي .

ومثل ماتوقعت دخل ولازم جنطته ويمشي بكل فخر ايباا ..

رفع حاجبه بإستهزاء كال وهوَ يبتسم مستهزأ

- كملتي ست ثُرررىٰ؟

عيوني انفتحن على وسعهن وبقيت ابلع بريقي من الفشله غصت بملابسي تمنيت الگاع تنشگ وتبلعني اخ يابوي شصار بيه ..

- آآءء.. إستاذ شسمه 

ضحك بإستهزاء واشر بأيده بحركات متتاليه گال :-

- كملي كملي ليش وگفتي؟

نصيت راسي خجلانه واريد اموت من الفشله . اخذت جنطتي بسرعه وطفرت من القاعه كلهه وهوَ يباوعلي وإبتسامه مرسومه على شفته ..

ضليت الطم على كصتي شكد غبييه من اول ماحسيتي بحركه المن تحجين؟

بقيت بالحديقه لما اجت نرجس سولفتلهه ضلت تلطم وياي وآني محتاره شلون ادخل للمحاضره من الفشله ..

اني السالفه ظلت تگرص بگلبي لما سألتهه :-

- اگلچ شبيج أمس تمطمطين بالحچي

ضربتني بخفه على متني

- خاب غير يمي ابو خاولي

وگفت مصدومه

- صددددددددددددددگگگگ

- اي والله

- شوصله الج؟

- خب اول ماطلعنا من المحاضره دز عليه لمكتبه رحتله انطاني الملزمه وگال هاي حصتكم انتِ وصديقتچ مال محاضرة اليوم لان راح يوزع للطلاب كلهه ..

- اول تالي منه من الشيطان؟
اي المهم كملي المن خابرتيني؟

- لج هوَ گاللي

- عززا اي كملي

- ووجع شأكمل اذا انتِ ماكلتني حاصل فاصل

- كملي كملي تره اطلعلج لقب

- لا لا كلشي ولا هاي السالفه راح اكمل

- يلا..

- اي كال خابريها خل تجي تاخذ ملزمتهه اني ماكدرت أگله ماعدهه موبايل خاف عباله اصرف بيه او فد شي ف خابرت على إسماعيل لان توقعت رايحه للبيت والمكالمه كلهه صارت مقابيله واني اريد اسمعه گتلج لتبجين وهوَ شصار بيه عگد حاجبه وخنزر بعصبيه خوفني حتى ولو هوَ دوم خالسني

صفنت وهيَ أشرتلي .. باوعتلهه وكتلهه

- اكول يلا تحجين وانتِ محترمه ومرققه صوتج اني هم مافكرت بيهه لان كل مره تاكليني حاصل فاصل

- ديلا على اساس انتٍ من تتصلين بيه صوتج رقيق تهي بهي

صار وقت محاضرته واني محتاره ادخل لو لا ؟

نرجس ذكرتني

- تتذكرين شصار بينه من وره عنادج لاتعيدين الموقف فوتي وعوفي العناد وصيري طالبه جيده ومؤدبه وخلوقه

- ياا صارتلي فيلسوفه براسي شكالولج اني مو ذني الصفات كلهن؟

- لا يابه والنعم منج كلهن بيج

- مااسمحلج تكولين يابه فهمتي؟

- اوي اوي هاي مالت ابو خاولي

- اي خط أحمر لاتتقربين افگس عيونج

- شطلعت هاي اذا كلهه تفگسين عيونهه شصرتي فاگوس

- اي فدوه الي

دخلنا للمحاضره ودخل هوَ واني اغلي من الحركه واتذكر امس شسوه بيه والطلاب كلهه تباوعلي من انطردت .. ماكسرت گلبه وشكلي چنه طلي مكتول .

ماباوعتله ابد .. تجاهلته وهوَ لطش يباوع بيه ويشرح ويريدني اباوعله تهي بهي تحلم يحبيبي تحلم هاي ثُرىٰ بنت شميخ .

كمل محاضرته واني متجاهلته نظره مانظرتله اصلاً ومتعجبه على نفسي شلون سويتهه .. بس ثُرىٰ على كلشي تكدر فديتها .

قبل لايطلع باوعلي وكال :-

- ثُرىٰ تعالي طالبج بمكتبي !!!

يمممه عزززا شيرييد مني بس لا يعاقبتي لان حجيت عليه صخام بويهج يثُرى رحتي بيهه !!

يتبع..

              عـبــرات الـعـبــادي🌻🌼
alabadyia_08