رواية هذيانٌ بين جمرٍ وجليد ..(ارملة اخي المجنونة) الفصل الثالث وأربعون 43 - بقلم نورا ناصر

السلام عليكم
هذيان بين جمر وجليد ..
بارت ٣٩
نورا ناصر

****

هَـذيـان.. عَن أي هَـذيـان تتـكْلم عـزيِزي..
أنـا أمِرأة خُلـقَتّ مـن ضِـلع آدم الـخائِن
أنـا مـن.. أنتَ مـن..
أنـا فَـتاة عـاكَسـنِي قَـدرِي..
فـ وقعَـتُ نـداً لـك يـا آدم...
يصَفنـي البعـض بـ المجـنُونَةِ
وكـأنهـم لا يعلـمُون بسـبب مـن..
أعـلم أننـيِ أهْـذّي فِـي بعـضِ الاحْيـانِ
ولـكِـن لا أعـلم بمـن السـبب
بـهِ؟؟ أم بـهِم؟؟
أحـمِلُ طفـلكَ بيِـنَ أحشـائّي...
وأنـا هـاربِة مـن بـراثنـكم السـامِة..
أنـا رحَـلت مـن البَلـدة عـزيِزي
أتركـك تُـصارِع المُـوتّ..
أحببـتُك بـكل ذَرة لَعيـنةٍ بـ جسـدِي
أعتـّرف نعـم.. أحببـتُك
أحببـتُ حِرصـكَ، خـوفكَ، أنفـاسكَ، ثيـابكَ..
كُـل شـيء لَعيـن بـكَ..
أحببـتُه بكـل جـوارحـي..
بـعدَ تحـرري منـكَ أستعـدتُ أنفـاسِـي..
و ها أنـا أعُـودّ لِـ عُمرِ الأربعـةَ عَـشر عامـاً..
ها أنـا أعُـودّ لِـ طْـفولتي بتفكّـيريِ..
ها أنـا أعُـودّ لِـ مراهـقتيِ التـي اضْعتـها
انتقـلتُ مـو مرحْـلةِ الطُـفولة للشـبابِ
لـم أعـشّ مراهـقتيِ كـ الفتياتِ الاخـرياتِ
ها أنـا أعُـودّ لِـ بُرهةٍ مـنَ الزمـنِ
بتفكّـيريِ لِـ طْـفولتي ومراهـقتيِ
وأعُـودّ لـِ تفكّـيريِ البـائّسِ
بِأننـيِ لـم أعـشّ.. 🖤
بقلم Dima_omran1998

***

ريلام ...

فتحت عيني ع الدنيا ، عندي اخوة اثنين واخوات اثنين وحدتهم توأم اني وياهه .
مهيب ولهيب ورحاب وهيام توأمي..

ماما ام مهيب ربيت بحضنها اني ، ولمن توفت جان عمري ثمن سنوات .رغم انو مبقيت ويه ماما ام مهيب هوايه لان توفت
بس احس تغذيت من حنانها وطيبتها ..

جانت حيل طيبة وتحب خالو وتحترمه ، رغم انو جانت اكبر منه بس هالشي مجان مبين ابد ..

بيبي وماما يكولون هي مرضعتني من اني طفلة ، جان عدها بنت بنفس عمري وتوفت صغيرة خطية عمرها سنة وهي رضعتني من حليبها ، هذا الي سمعته منهن .

بس كلام مهيب كان يختلف ، كال هيه مرة وحدة رضعتني وخالو الشيخ علي الدر شافهه و نهاهه عن هالشي ومقبل بي
وهيه طاعته وتوقفت عن رضاعتي من ذيج اللحظة .

بيبي وماما كالوا حتى لو رضعتج مرة وحدة او لمجرد قطرات راحت بحلكج ومن ثم لمعدتج خلاص صاروا لهيب ومهيب اخوتج ، واني انزرعت ابالي هاي الفكرة وسيطرت عليه وصرت اشوف مهيب ولهيب اخواني .

لمن كبرت وبعمر ال ١٦ تحديداً
جنت اشوف نظرات مهيب اختلفت ، صارت تخوفني ، حسراته لمن اكوله اخويه وانزعاجه ، استبعدت انو يوكع فريسة للشيطان وينسى اني اخته ويصير الحرام الي اخاف منه .

لمن احتركت ايدي بهذا الموقف تأكدت من حبه الي لمن سمعته يهمس يم اذني احبج ، زادت مخاوفي ورفضته وصارت بيننا فجوة كبيرة .

بس جنت اشتاقله حيل ، تعودت عليه وتعلقت بي هوايه ، والتعلق يغلب الحب او هو بالفعل نوع من انواع الحب و رغم قسوته بس جان هواي يهتم بيه .

والانثى بطبعها تحب الي يهتم بيها ..

حبنا رغم قوته وتللذنا بألمه وموضعه الغير
الصحيح .. لكن يبقى الحب مثل المرض والموت
مو باختيارنا ولا بادينا ..

حبنا أي حبنا صرت غصب عني مقتنعة بكلامه
اني وهو مو اخوة ، وحسمت امري وتمردت على ترددي وخوفي وانقلبت على ذاتي ..

اعلنت حبه بداخلي وكل مرة يقسى عليه اكرهها وابعد عنه واتجاهله ، بس لمن اشوفه ماعرف شنو يصير بيه
وما اسيطر على عيوني ونظراتي تجاهه ولا اكدر امنع نظرات الصلح الي تنبثق من بين اجفاني .

لمن انصابوا هو وخالو دخل بيتنا بحالة انذار وصدمة
اما اني كنت منهارة ، خالو الاب الي احتوانا كل هاي السنين ومهيب الي بدا حبه مشتعل بقلبي .

ماكدرت اسيطر على سيل الافكار المتدفقة الى دماغي صرت ابجي بحركة واني احاجي قلبي خاف يموت وميعرف اني احبه ، ويبقى حبه حسرة وغصة بروحي .

يوم الثاني من طلعت فرح من البيت ، كعدت الصبح وجهي يحركني خراميش هيام بالاحرى وراسي بسبب العركة ويه هيام على دانيال انقهرت اخذوه من امه مو من حقهم .

طبيت للمطبخ حتى كلية مجاي نداوم وبيتنا هوسة وخبصة فد نوب ، وكفت ع الطباخ دااصب جاي
راسي حينفجر مقهورة حيل من اول مقهورة على مهيب وخالو وهسه انقهرت على فرح خطية شسوت بيها ماما .

حتى سجاجين شالوا بوجهه ديخوفوهه وهيه مالهه احد ابد لو خالو هنا محد يتجرأ هيج يسوي بيها ابد .

دوم الها سند هو ، من عركتها ويه خالو حسان ومشاكلها ويه خالو حمدان الله يرحمه جان دوم ياخذلها حقها .

بس البارحة حيل تمنيته موجود يوكف بوجه الي يأذيها حتى كانت امي .
اتذكرتها البارحة شكد مكسورة ومتأذية حيل
قهرتني غصة بروحي شكبرها عليها .

فتحت قبق القوري وطلع البخار منه ، طفيت عليه
دااصب جاي ، دخلت رحاب اختي الكبيرة لازمة بطنها ولاعبة نفسها ، كعدت على الكرسي .

رحت كعدت يمها مسحت دمعتي بطرف رداني
باوعتلها ابتسمت : ها رجعتي ؟
_ ردت وايدها على بطنها : اي رجعت امي ظلت تحجي عليه رجعت البارحة ب ١١ بالليل وظلت تتحسر .

كتلها شبيج ؟
كالت : اووع لعبانة نفسي ولو هسه يمي علاء جان كلي لعبي وياهه .

ابتسمت كتلها شبيج ؟
ردت وهي تبلع ريك هو هاي اني هيجي لمن ما اولد يله تروح مني النساوة وسمي وموتي اول ما اكعد من النوم احس معدتي تريد تطلع من حلكي حتى لو مماكلة شي .

همست واني اباوع لكلاص الجاي ومحاوطته باديه
وحرارته تلسع باطن كفي .
_ الله يساعدج ويعينج ..

كالت عمري انتي شبيج من الصبح تبجين! وشبي وجهج مخرمش توة يالله انتبهت عليج .

تحسرت : تعاركت ويه هيام البارحة انكلبت الدنيا انت ماتدرين بعدج جنتي ماجايه .

بصدمة : ياا على شنوو صدك جذب ؟
_ ماتدرين شسون بفرح خطية متتت قهر عليها هدوا عليها بالسجاجين واخذوا دانيال منها والله لو يدرون خوالي بلي سوته ماما بيهن والله ولا تعدي على خير .

اني دا احجي لرحاب ، شفتها تباوع لورايه
التفتت شفت ماما وهيام طبن .

ماما خلت ايدها على كتفي بقسوة
وكالت وشمدريهم خوالج اذا موو انتي تكليلهن .

كمت ع حيلي مرتبكة واتلعثم بالكلامي
مدنكة واحجي : ءء اني معليه لا احجي ولا اكول واذا اني ماحجيت هم راح يكولون الهم على الي سويتي بيهم .

كالت امي بعصبية : امداج وامده بطني النكلتج اي والله .

هيام كالت اي والله كبر وبصفه نعال كون ميتة بالولادة ولا جاية ويايه مو اخت موو اخت عدوه بس العار ميموت حرامات .

رحاب بصدمة : يا عزا عابتلج اي والله هيج تحجين ويه اختج
_ ماما شون تخلينها هيج تحجي كدامج على ريلام ميصير والله .

ماما ردت : اي تعاي علميني الي يصير والي مايصيرر ست رحاب .

_ لا ماما مو قصدي ..
ريلام : والله ياست هيام كلنه نموت سواء عارات او لا.

رحاب : لا ولج مو هيج تجاوبيها اني اعلمج
كوليلها العار ميموت مووو ؟ اشوفج متي .

ردت هيام اسم الله والله الموت للفتانة الكلبة الحقيرة لاظال لهيب مامفتنة عليه يمه لا ظال مهيب والله البارحة فتنت عليه عند لهيب تكوله هي الي غلطت موو اني .

ريلام : اي مشفتي شون فات معصب وعيونه حمر اجه يضربني والله عباله اني غلطت واني الي لاسنته .

رحاب : اووي اني والله مايرهملي ابقى هنانه الجو متوتر حيل خاف تصير عندي ولادة مبكرة .

اروح لبيتنا اصلي ركعتين واقرا دعاء بمفاتيح لجنان وادعي الله يشفي خالو ومهيب احسن من بقائي هنانه بهالهوسه .

ماما : وهذا البيت كله مايكفيج شكبره شكده شوفيلج غرفة وكعدي صلي بيها وادعي لخالج خطية بين الحياة والموت لو اله تردين تحصلين حجايه من جديتج يله ترتاحين خليها تكول بمحنتنا ماوكفت ويانا وبس كارصة يم رجلها .

رحاب : ماما الله يخليك ياغرفة الي ادخللها يجن يوكفن على راسي يحشن ويقشبن بالعالم اشو ماخذاتها فلاحة ملاجة ابيتنا ويحجون علينا يافرح طلعت شعرها طالع ويا موج جايه بالبنطرون .

_ محاجين عليج حاجين عليهن انتي شكوو .

_ شكو ماما حاجين على نسوان خوالي ترة وهذا هم باعتبار بيتهن ترة اني ما سكتت الهن همين والله كطعت صلاتي ورزلتهن هذن بنات عليه ولا يحترمن شعدهن جايات هنا بس للاكل والغيبة .

ماما : لج عيب خطار اسكتي لايسمعوج اجن يوكفن ويانا بمحنتنا شتحجين انتي .

والله هيج وكفة متنراد ابيتنا وينهشن بلحمنا
وبعدين ماما انتي ملازم تنطينهن عين وتخليهن هيج يحجن ع نسوان خوالي .

بلقيس بحدة : عاد هنه محاجيات الحق اشو خالج خطبها حتى ماحجبها دار وجهه ومشى وفرح مخبلة واذا حجوا عليها يعني .

_ شيحجبها الخاطر الله ماما خلي يحجب الروسية بالاول ويدخلها للاسلام وبعدين موج هذا ستايلها والهداية من الله مدام ممأذية احد مو من حقهن يحجن عليها .

وفرح والله اني كلما اريد احاجيها اكوللها تبريني الذمة لأن جذبت عليها وكتلها خالو حمدان سوا الجنسية لبنتي استحي منها و خاف اموت بالولادة واني مجذبة هالجذبة .

وهيه حتى من عرفت خالو عنده بنيه من سحر خطية ماعاتبتني وكالت ليش جذبتي بس والله هو خالو حلفني ببنتي اديان واني خفت عليها ونفذت الي يريده .

ظلت ماما تفر بيدها والله يا الله عليج سوالف رحاب تريد فرح تبريهه الذمة هيه فرح مخبلة.

_ من كد متكولون مخبلة البنية تخبلت من صدُك.

هيام كالت اي والله روحي لبيتج احسنلج واخذي بنتج وياج مو تخلينها على كلبنا .

_ اخذها اخذها ما اخليها يمج شبيه مخبلة وانتي بعدين شدعوة هالحقد هذا كله على فرح وموج خلي قلبج طيب ونيتج صافية احسن هيج تتوفقين بحياتج .

ردت هيام بحدية : خلي يوولن اكرههن امووت منهم مووت فرح اول ماتزوجت صفكتني راشدي وبسبب موج خالو شرار بتر شعري وهسه ولا ديطوول .

رديت : من سوالفج منتبهة على سوالفج انتي لوو لاء ؟؟

بلقيس : ولج ريلام لا تشدين ويه اختج لا والله اعرسج واخلص منج قبل شويه عليه خطبتج لابنها انطيج الهه ترة والله .

درت وجهي اني وهيام كالت بشماتة
اي والله ماما عرسيها الفتانة هاي عرسيها ..

ردت رحاب : يا عزا عرسيش وكليتها خطية هستوها بدت .

هيام : ختولي نمونة كليتها اصلا هي وعدت ماما تجيب طبية ومعدلها يادوب دخلها تربية .

ريلام : اي نشوفج طلعتي طبية يالشاطرة ..

حركت شعرها ورفعت راسها بتكبر
ع الاقل طلعت هندسة اعلى منها ....

رحاب : اشو المدرسين ديتعينون اكثر من المهندسين
هو وينه الاعمار الي بالبلد حتى حضرتج تتفاخرين .

دخلت عليه والكل سكت ، عليه تصير بنت عم ماما
ووياهه دخلت اختها وكعدت وظلت تحجي على فرح وتقارن بينها وبين ختام .

شون فرح تركت البيت ولا وكفت ويه رجلها بمحنته
وختام تروح تنام ببيتهم وتجي يم الحجية ..
وختمتها لو متزوج ختام احسن اله .

هيه تحجي وماتدري بالمفصل الي صار البارحة
وحقها ختام هم بنت عمهم ويسوولها مكان .

عفتهم وصعدت لغرفتي ، اتصلت على تليفون فرح
مغلق .. واني انطيته التليفون لموج لان شفته بالصالة قبل لتطلع فرح من البيت ..

يوم ثاني جيت من الكلية ، غيرت ملابسي
نزلت سالت ماما على خالو ومهيب كالت ماما مهيب اليوم عمليته الثانية وخالو بعده بالغيبوبة .

توضيت وصليت وكعدت دعيت الهم كوومة يصيرون زينين اشتاقينالهم هوايه البيت بعدهم احسه يخنك .

للمغرب انفتحت باب البيت وفات خالو شرار ، ركضت عليه حضنته وظليت ابجي وهو يبوس براسي .

رفعت عيوني عليه ولمستواه كتله واني ابجي وامسح
دموعي خالو انته وين كلش مخافي شكد خابرتك وانته ماكو .

خله ايده ع راسي كال اني قبلكم بدت المصايب وياي
هسه عوفج مني تعالي هاي منو عدنا البيت محتل لوو شنو منو هذول النسوان والجهال .

كتله خالو هاي اقارب بيبي اجوي وهماتين بيت عمكم
رد وهو يدور بالصالة هيه وينها امي
_ بغرفتها خالو .
توجه لغرفتها واني وراه ، فات ع الغرفة
كال سلام عليكم ودخل ..
والنسوان طلعن بسرعة ..

بيبي لمن شافته فتحت اديها اله وظلت تبجي ..
وتكول شرااار يمه ..
حتى متكدر تنزل من جربايتها و تتلكاه ..
وكعة خالو ومهيب حيل تعبتها .

هو راح الها حضنها وخله راسها على صدره ويبوس بي وباديها ..
ظلت تباوعله وتبجي
شفت يمه شصار باخيك الحيد وابنه السبع

رد بانكسار اي يمه شفت هسه هاي جيتي من يمهم بالمستشفى والله من المطار كبل رحت الهم شفتهم
لاتخافين عليهم ان شاءالله كل شي تمام يكومون ويصيرون زينين وتكحلين عيونج بشوفتهم .

ظلت تضرب بقبضة ايدها على صدرها وتبجي بنحيب
هو لزم ايدها وباسها وثبتها عن لاتضرب نفسها .

كلتله يمه هاي كلها من غوس مدري اوس مدري صخام الصخم وجهه والله ياشرار بعد هالعملة ام بنطرون بعد ماتبقى بذمتك طلكها وصخم وجها ماريدها الك .

ترك ايدها وعدل كعدته ومد ايده لشعره
وكال بتذمر : يمه الله يخليج البنية شعليها هو اوس ساقط وعديم رجولة يرادله جرة اذن بس سهلة يتدلل ولا ماراح افوتها اله .

ولك يمه شرار لا تخبلني كتلك كله من وراها
هو رايدها وميت عليها بس هيه تتعاير واخوك الشيخ طلكها منه وخطبها الك وهو تخبل والله اذا تزوجتها صدك لا اني امك ولا اعرفك وانعل بطني الجابتك .

كاللها بتوسل : يوم الله يخليج موو ووكتها هسه موو وكتها دخيلج وهو اوس عار موج مالهه علاقة .
كام على حيله .

ظلت تباوعله بعصبية وين مووولي زعلت من جلمة الحك ولك شرير .

ظلت يتمطط كاللها لا مازعل منج يالغالية بس اروح اسبح وابدل تعبان حيل اناملي جم ساعة واكعد لروح للمستشفى ماتشوفيني جني نعال .

كالت وهيه تمسح دموعها : لا يمه جنك قاط الريس بعد روحي والله ماتستاهلك الزريكة تولي ماوراهه غير المصايب واذا انته تريد تتزوج وحدة من ديرتنه انه اشوفلك وحدة .

ابتسم بهيام وكاللها يمه هي صح زركة بس والله شفايفها جنهن من السمه تذوب ذوب بالحلك .

كالتله بعصبية وانته على حجيك هذا ضايكهن شفايفهه طاحظك وحظها .

ضحك لا يمه ماضايك بس جاي اتخيل على كد ما ودي اضوك .

وروح ابووك الحيد اشوفلك وحدة تسوا راسها .

دنك على راسها باسه واخذ اديناتها بوسهم اثنينهم
محتاجة شي يالغالية اني اروح اسبح .
كالتله بزعل اي اي احكرني احكرني ادري بيك ماترؤد تعوفها ادري .

كرفص ع الكاع وباوع بوجهه
يمه انت ليش ماتحبيها ؟ ترة ماشوفها مسويه شي الكم بنيه تروح بدربها وتجي بدربها .

ولك يمه ماشفت اختها من دخلت جابت المصايب وياها ولك اخوك وابنه بسببهم نايمين هالنومة بالمستشفى .

يوم انت ليش دتعبين نفسج خلي كل شي للوقت الله يخليج اني اروح والله تعبان وبعدين عود امر عليج والله مشتاق انام بحضنج ومشتاق لريحتج .

هزت راسها وخلت ايدها على راسه وهو كام من يمها
صار يمي اخذني من كتفي ومشى بيه
كال وهو يمشي رحتي شفتي مهيب لو لا؟

رديت بحزن لا خالو محد اخذني ماما راحت شافته واخذت بيبي هماتين بالكرسي المتحرك بس ماقبلت تاخذني .

كال بتعب اني اخذج بس مو هسه باجر تمام ؟
هزيت راسي بفرح ولهفة وهو ابتسم لي

كتله خالو عفية انت شصاير وياك وين جنت بس لا حمودي جان مريض ؟

رد : لا تعاركت ويه ام حمودي وضربت اخوها واشتكوا عليه ودخلت سجن دفعت غرامة ٥٠ الف
روبل(عملة روسية)
يله طلعت اني الاكشن بدا ويايه قبلكم صدك لو كالوا لو رادت تلتم على بني ادم تلتم .

ابتسمت : خالو ليش ضربته اخوها..
_ جايب جماعته الساقطين للشقة واني منبهه ماريدهم يجون وهيه متاخذ حجي ..

ضحكت خالو شوكت تجيبه حمودي والله عاجبني اشوفه والعبه .
ابتسم وهو يكفش شعري اجيبه ان شاءالله بس خلي يتشافى بعده خطية .

همست الله يشفيه ..
كال امج وين مشفتها ؟
_ يمكن دتصلي ..
_ زين اني رايح اسبح وانام كعدين بعد ساعتين ماشي
مو تنسين ارجع للمستشفى لهيب وحده وحسان مختفي ماكو هو مدري وين مصخم وجهه .

رديت : البارحة جان هنا هو اجه شاف بيبي وتعشى وطلع ..

_ اي هسه ماكو وجهازه مغلق ، مثل مكتلج ريلوومه موتنسين متكعديني .

_ لا خالو ما انسى والله .
راح لغرفته واني ادور ماما شفتها دتصلي
بقيت يمها الى ان خلصت كتلها اجه خالو شرار
طوت سجادتها وراحت يمه للغرفة ..

يوم ثاني رجعت من الكلية اخذني ورحنا للمستشفى
ورحنه للردهة الي نايم بيها مهيب ..
وطلعن من عنده بنات اثنين ...

بقيت اباوعلهن وحدة حيل حلوة ومبينه من عمري او شوي اكبر ، حسيت بقلبي انعصر عصرة شكبرها وانقهرت .

حتى شكد جنت متحمسة ومتلهفة اشوفه ضاعت اللهفة والدمعة تعلكت بطرف رمشي وافكار تسربت لعقلي خاف لمن رفضته حب وحدة غيري .

ما انتبهت لمن صاحني خالو شرار يله تعالي فوتي
فتت هو لزمني من ايدي وضمني وره ظهره ودخلني ع الغرفة الي بيها مهيب .

سمعته يكوله تاج راسي جنك تحسنت وصرت زين مبين تأثير الحاتات الي طلعن قبل شويه قوي .

مهيب ماجاوب يمكن مايكدر يحجي ..
وكمل خالو شرار لك انته تاج وباج وعلم دولة وعار همين وكل شي مايصير بيك .

بس اني جايبلك ويايه وحدة هسه متاكد تخليك تكوم مثل الزمال وتصير زين .

وسحبني خالو من وره ظهره وصار مهيب مقابيلي مبتسم والاوكسجين على خشمه ميكدر يحجي .

اول مادخلت شفته باوعلي بنظرات متفاجأ هالنظرات روت اشتياق روحي الجانت لايبة عليه .

نصيت واني ساكتة ، غصة شكبرها خنكتني والعبرة سيطرت عليه ..
حتى ماحجيت شي .. باوعتله وصارت الدموع على خدي وعيني بعينه .

هو مد ايده بعجز ووهن ووخر الاوكسجين من وجهه
وكال بانفاس لاهثة : شلوونج ريلام ..

بس هزيت راسي وابجي ، راحله خالو شرار
وهو يرجع الاوكسجين على خشمه
زينه ريلام زينة انته وانته هم تصير زين وتكوم بالسلامة ان شاءالله .

بقينا نتحاجى بس بالنظرات هو يرويلي شوقه الي وفرحته بشوفتي واني مابطلت عيوني دمع حتى خجلت حيل بس ماكدرت اسيطر ع نفسي وما ابجي .

طلعنا من يمه وكال انتظري اشوف منو يم خالج الشيخ حتى تفوتين تشوفينه ، لان قبل شويه جانوا يمه اطباء مكدرنا نفوت .

طلع الطبيب وظل يحجي ويه خالو
كاله دخلنا بفترة غيبوبة اصطناعية الى ان تتعافى جروحه ويستعيد عافيته .

وره مخلص كلامه ويه الطبيب دخلنا وشفت خالو حبيبي خطية نايم نومته العميقة ، تقربت منه وبجيت بسته على راسه .

وهمست يم اذنه خالو حبيبي عندك العافية مو الك هاي النومة فرح محتاجتك واني اسفة لان مكدرت اساعدها اكثر لان اني موو انته خالو بس انته تكدر تساعدها وان شاءالله تكوم وتاخذلها حقها فرح انظلمت من بعدك .

رفعت راسي باوعت خالو شرار يباوعلي
مسحت دموعي
كال ها يله نمشي ؟
هزيت راسي ومشيت وراه واني اتلفت لخالو وميتة قهر عليه .

رحنا للسيارة كال نروح لبيت اهل فرح صدك هيه فرح ليش ضاله يم اهلها شعجب حتى بالمستشفى ماشفتها ولا شفت احمد .

هزيت راسي ومحجيت شي خفت لاتصير مشكلة خلي يسمع من موج احسن .

هو كمل كلامه كال حتى موبايلاتهن هي وموج مغلقة شنو الصاير .

درت وجهي ع جامة .. لزمني من كتفي
كال اكو شي ضامة شي انتي ؟

لا خالو بس هنه تعاركن ويه ماما وطلعن زعلانات وانته تكدر تفهم من موج هيه تحجيلك .

ضرب ايده ع الستيرن بعصبية وحرك السيارة
وكلساع يتصل على خالو حسان وميحصله وظل يدردم عليه بس لا رجع لسوالفه العووجه والله ادفنه هالمرة لو بيدي اسلمه للشرطة .

لزمت قلبي وخفت شنو هيه السوالف العوجة !!

وصلنا لبيت اهل فرح مقفولة ، نزل خالو شرار شكد دك ع الباب ولا اكو احد فتحه ، راح سال الجيران محد يعرف عنهم ولا شي .

رجع للسسيارة معصب ، يطلع تليفونه يخابر ويرجع يشمره بالجكمجة .

وبعدها راح لبيت عمهم هم سالهم ولا واحد يعرف عنهم شي ، لزمت قلبي بيدي وين راحوا فص ملح وذاب!!

لمن دخل خالو كتله بيت عمتهم بسلمان باك خاف راحوا يمها .

باوعلي ورد شيسوون يروحون وشمعنى بهالوقت هذا ؟ زين ليش كلهم موبايلاتهم مغلقة ؟؟ وحساان اخويه ووينه وووينه ؟؟ ليش مختفي وياهم واثنينهم بنفس الوقت شغلة غريبة وتحيير واني ابد ممرتاح الها.

غمضت عيوني واني هم مستغربة حيل وقلبي لازمته بأيدي .

رجعنا للبيت بالليل نزلني وراح بس جان حيل معصب ..

بنفس الليلة عرفنا هدى صاير عدها بنية
انصدمنا شلون ماكو محد يعرف ولهيب يوم ثاني اجه اخذ ماما وطلع للسماوة يجيبون البنية ونسمع لهيب معصب وبيبي وبلقيس يهدون بي وهو مصمم اله ياخذ الطفلة منها .

الظهر دخل خالو شرار يصيح بلقيس بلقيييس ووينج ؟

طلعتله اني وويايه هيام
كتله خالو ماما ماموجودة راحت ويا لهيب للسماوة يج

صك سنونه وكال احجيلي شنوو صار بالتفاصيل ولج موج وفرح ماكو فص ملح وذاب ولا الهن اثر .

نطت هيام خالو اني احجيلك ..

عاط بيها ماريد اسمع منج انتي اششش ولا كلمة ..
احجي ريلام ..

رديت خالو ءءان

وررن موبايله باوع ع الشاشة مالته
وعاط هااااا حسااان لك وينك انته يا اخي هااا وووينك رجعت لسوالفك العوووجة ادفنك والله ترة اني حافر كبر لاوس لا تخليني احفر كبرين .

سكت شويه وكال موج وفرح شبيهن احجي ؟؟

هدى ...

وصلنا للمستشفى فتح لي الباب ارجف من البرد والخوف مااحزر لهيب شيسوي بيه بعده مبين معصب حيل نظرات عيونه تخوف .

هو ماانتظرني انزلي سحبني من ايدي ونزلني بس احسه حاقد عليه هوايه .

صعدنا للردهة الي بيها بنتي اخذتها من ايد عمة بلقيس ممصدكة حترجعلي ، كلساع اتذكر لمن شمرني بالطرمة مالة بيت اهلي وراد يتركني .

عبالك مثل الحلم دااحلم رجعت لي بنتي
حضنتها ابوس بيها وهي صوتها ناصي حيل تبجي .

تقرب مني كال صاك سنونه رضعيها دنروح يله ..
كعدت ع السرير مال المستشفى ورضعتها .

بعدها شبعت ونامت ونزلنا هو صعد ويايه بسيارة الاسعاف وعمه بلقيس رجعت ويه السايق .

كعد بصفي وويانا مسعف ، اني ظليت ارجف لان ملابسي الجوه الجبة مبللة لمن وكعت بالطرمة مال اهلي .

هو حس بيه كاعد بصفي وزنودي تطخ بي واديه
نزع سترته ومدهه الي كال لبسيها .

باوعتله بقهر واخذتها وهو نظراته ابرد من برد كانون .

لبستها همس باذني مو علمود عمود بنتي انتي ترضعيها لا تتمرضين وتعديها .

باوعتله بعتب وقهر ونصيت ...
همسلي ١٥ يوم ساكتة هدى ١٥!!!! شسووي بيج هسه شسووي ترة انتي راح تندمين ع جيتج وياي هايه .

حاجيته بقهر وتوسل والله والله عمو اتصل بابوك ورة ماولدت بتلث ايام بس جهازه مغلق .

كال ترة ابويه مصارله خمس ايام من انصاب وكلاواتج موو عليه الج غاية بيها هاي ولازم اعرفها .

رديت والله عمو كال اتصل بي مغلق وممحصلة والله انته لهيب متعرف شنو الظروف الي مريت بيها .

كال سكتييي كافي نرجع ويصير خير ...
سكتت امري لالله واباوع لبنتي بحضني .

فرح ..

التفتت ورايه وظليت اباوع ، عبالك راح اودع الحياة
واباوع للطريق كدامي احسه صار مثل بوابة الخروج من عمري ..

صوت انين يمي تنوح وتبجي على حسان وتتوسل باحمد يرجع ينقذه لانه انقذ حياتها ..

رد عليها ميموووت ميموووت سكتيها موووج سكتيهاااااا ولللج انين والله ماكتلته والله هو ضغط ع زناد المسدس هوو مووو اني والرصاصة ماطبت بي والله .

صاحت هيه بنحيب لاء لاااء احمد شفته لاتجذب عليه شششفته غركان بدمه والله .

رد عليها متألم : والله جتي شطح الطلقة وهو ضربها موو اني حبيبتي انين هسه ينقذونه بس احنه لازم نطلع من بغداد ماكو شي غير الموت ينتظرنا بيها .

حضنتها موج وظلت شهكاتها مكتومة على صدرها
واني صدري يهبط ويعلو وكاني قاب قوسين من الموت
والخوف يرجف اطرافي .

محتارة شون اسكت دانيال وشون اوكف الرجفة باديه وشون اصبر على الغثيان والرغبة بالتقيء .

لو شون انسى منظر علي وهو نايم على سدية المستشفى صورته ترتبط بذهني فورا بالالم والحزن ..
لو شون اذا يموت شوون اذا يصحى ويعرف اني انهزمت ووو كوومة كووومة شغلات افكر بيها كوومة .

واحنه نسير بالطريق الموحش والاظلم .. وكدامنا المخاطر هوايه واولها سيطرة التنظيم داعش على المحافظات ..

بذيج الفترة جان مسيطر على تكريت ، الموصل ، اجزاء من الرمادي وديالى وكركوك .

واحنه رايحين نبحث عن خارطة العودة لانفسنا الي فقدناهه . نتجرع البعد ونتقاسم المسافات ونسهر الليل والويل سوى .

التفكير بالامور السيئة شي متعب لابعد حد ..
توجهت لرب العالمين واني اردد .
"ياحي ياقيوم برحمتك استغيث اصلح لي شأني كله ولا تكلني الى نفسي طرفة عين"

سمعت موج سألت احمد وين رايحين احنا وين مودينا ؟؟

رد عليها للشمال موج للشمال ..

احمد داعش مسيطر ع اغلب المحافظات شون حنفووت ؟

نفووت هسه راح ارهن سيارتي لواحد واخذ منه فلوس ومناك نصعد ويه واحد هو راح يتكفل يوصلنا للشمال .

ردت عليه اني هم جبت مهري ويايه اخذه تصرف بي .

كاللها خلي عندج هسه ..

احمد عفيه خلي نروح للجنوب والله الوضع يخوف والله .

موج سكتي بالله اريد اطلعجن من العراق كله لمكان مابي اوس ترة ناوي على نية كشرة ولج راح يكتلنا كلنا والله اليعلم شيسوي بيننا

بس مو نروح برجلينا للدواعش ..

ماكو فرق اوس والدواعش نفس الشي واني سالت وكالوا نكدر نفوت وهذا السايق يندل ويعرف شون يوصلنا للشمال بأمان .

سكتت موج وبقينا كلنا ساكتين بس صوت تنفسنا المضطرب .

للفجر وصلنا لمكان بي بساتين ماعرف وين بالضبط
نزل احمد وظل يخابر وراها اجوي شباب بسيارة ظل بالربع ساعة يحج وياهم والظاهر يعرفهم معرفة وثيقة .

اجانه كال انزلوا من السيارة ونزلوا الاغراض وحولوا للسيارة الثانية .

سوينه مثل مكال وهو اجه اخذ دانيال مني وجان بس نايم بس اخذه كعد وظل يبجي ، دخلت للسيارة وانطانيا وكوة سكت ورجعته على نومته .

بعدها صعد السايق ومشت بينا السيارة ، ترقب وخوف وقلق ومصير مجهول ، بوقت جان الموت بكل مكان .

وصلنا لسيطرة ماعرف بأي محافظة ، سيطرة جانت للجيش رجعونا وماكدرنا نفوت ارض عمليات .

اخذنا السايق لغير طريق ومشت بينا السيارة ، الموت كدامنا وورانا وبكل مكان .

ولهناك وكال السايق هاي سيطرة مال دواعش!

هلع وفزع وخووووف .

ظلينا نبجي ونتوسل بأحمد واني حاضنه ابني بقووةة

موج كلتله بنحيب الله يخليك احمد خلي نرجع الله يخليك الله يخليك هسه يكتلوك انته ع الهوية واحنه ياخذونا احمد فدوووةة ...

يتبع ...

الفديو تصميم hubosa عاشت ايدج يعمري كلش عجبني اختيارج للكلام من داخل القصة 🥺🥺🥺

التحليل جميل 😍

البارت اهداء ل Maal_12 ام المسواك نمبر 2 😁

الفائزين بمسابقة اجمل تصميم Zozaalnasery
و noora-1995

النشر بين يوم ويوم 😬⚘