رواية هذيانٌ بين جمرٍ وجليد ..(ارملة اخي المجنونة) الفصل الرابع وأربعون 44 - بقلم نورا ناصر

السلام عليكم
هذيان بين جمر وجليد ..
الفصل ٤٠
نورا ناصر

☆☆☆

ٲذكرها آخر شوفه ٲلك
من كَتلك شمالك علي ؟
ما جاوبت
چنّك ولا سامعني
من عدها فز كَلبي وخفت
سديت عيني وفتحت ، نفس الوجه
وجهك وجه بايعني
والله وكت
ٲندارلك من كل درب وعيونك تضيعني ،.
مشاركة من Wyaam1990

☆☆☆

الخوف تغلغل بيه ووصل لعظامي وحسيت بانقباضة رهيبة . بنص قلقنا وخوفنا ، نشوف الناس يفوتون سيارات كومة قبلنا واحنه منهاريين .

السايق كال بهدوء وبنبرة مُطمئِنة على كيفكم خويه لا تخافون نمر عادي حالنا حال هاي العالم بس انتوا صيروا طبيعيين ولا تبينون شي وغطوا وجوههكم زين.

مديت ايدي الترجف واني احاول اغطي وجهي بس ماكدر ، انتبهت عليه موج وغطتلي وجهي .

بلعت ريكي بخوف وفزع حقيقي ، هواجس مخيفة دارت بعقلي بهاي اللحظة الحرجة احس عاجزة مذعورة ومشتتة .

كعدنا بالسيارة عشرة دقايق تقريبا ووصل النا السره وفتنا من يمهم عبالك هالعشرة دقايق عشرة سنوات من عمرنا فاتوا .

ظليت ادعي الله يخلصنا من محنتنا هذه ونوصل لبر الامان .

واجت الاجابة سريعة فدواتك يا اللهي ، فتنا من يمهم الحمدلله ماصار النا شي ولا سوولنه شي ، تنهدنا بارتياح بالغ .
فرحانين حيل عبالك طلعنا من جوه المي ونجينا من الغرق . شي بين الممكن والخيال ..ممصدكين ابد ابد ..

جانت الدخولية هوسة هوسة وناس كومة دتفوووت
دخلنا لكركوك ونزلنا يم فندق بعد مانكدر نبقى اكثر بالسيارة تعبنا حيل لازم نرتاح .

ودانيال خبصني ضاج ويبجي ومحتاج اغيرله
وكلساع يضربني ومجلب بكلمة ازل ازل ((انزل))
يريد ينزل من السيارة .

نزلنا بالفندق كلنا بغرفة وحدة ، الغرفة بيها تلث اسرة وحمام ، استونا مخلينه جنطنه بالكاع وصارت هوسة وضرب ع الابواب مالة الغرف وصوت سيارات الشرطة .

اخذت دانيال من السرير وحضنته ، واخواتي خافن وختلن وره احمد .

اندفرت الباب وطبوا الشرطة واحنه كلنه صرنا بظهر احمد .

وكف كبال احمد وكاله هذن منو ؟
رد عليه احمد خواتي!
بنتر : جيبوا مستمسكاتكم اشوفها .

التفت علينه احمد وموج دنكت ترجف وانطته الجنطة الي بيها المستمسكات ، هو بدوره طلعهم وانطاهم للضابط .

ظل يجيكهم بس اني مستمسكاتي مو وياهم بقن ابيت علي الدر .

ظل يفر بيده الضابط ووجه كلامه لاحمد
شعندك جايب خواتك لفندق مشبوه ؟ اخذهم واطلع يله .

ظلينا وحدة تباوع للثانية واحمد بقى صافن ع الضابط ووجهه احتقن .

اخذنا وطلعنا من الفندق وهو يدردم الناس بالناس والكرعة تمشط بالراس داعش محتل نص العراق وهذوله يركضون وره الك***ب .

دنطوهم فرصة شبيكم يحظي خلوهم يتنفسون يستغلون الوضع ..

ظلينا نضحك هو هذا هم حظنا .
وكفنا بنص الشارع
كال هسه وين نروح وين نولي مايسوى السبعين الف الي راحت والله ع خالي بلاش واحنه بحسرة الفلس .

موج كلتله صديقتي متزوجة هنانه بكركوك بس مادري وين بالضبط اخابرها نروح يمها بس هالليلة .

التفت عليها كال لاء ديري بالج موج تليفونج ابد لاتفتحي توقعي من اوس كل شي .

مد ايده لراسه ظل يحك بشعره وكال بتفكير
اتذكر ابن خاله لابويه شسمه نسيته جان يجينه لبغداد واجه بالفاتحة همينه والله ماظل عندي عقل .

ردت موج : قصدك ابو حسين مو ؟

جاوبها احمد : اي هو هم بكركوك خلي هسه نروح نشوفلنه فندق محترم حتى لو بمليون الليلة بس كون نرتاح ومانبقى بالشارع ايدي ظلت توجعي فد نوووب .

موج : لعد امشي للمستشفى حباب لايصير بيك شي او مضاعفات .

غمض عيونه ورفع حواجبه بتعب وتكلم بالم وملامحه متقلصة ..
لالا مابيه شي هسه اصير زين بس محتاج ارتاح وابدل الضماد مالة الجرح يله امشن .

مشينه وراه اجرنا تكسي ، وكفنا عند صيدلية
اخذ علاجات اله وبعدها انطلقنا ندور فندق
بين ما لكينا فندق مناسب صاير المغرب .

واني دانيال لعب بيه لعب ، بس يبجي واني روحي بخشمي ، ومقهورة حيل ودماغي مشتغل بغير شي .
وبالي اصلا مو يمه ، ياخذوا موج واحمد يسكتوا هو يبجي يريد علي ويكول بابا علي .

واني افكر بعلي وبالطفل الي ابطني وبختام
وعلاقتهم ، احس نفسي مغموسة بلي حولي واحاول ادور منفذ بالمتاهة الي اني بيها .

صعدنا للفندق كلنا بغرفة وحدة احمد اصر ع هالشي للامان .

كعدت موج تنضف جرحه تعقمه وتلفه اله ، وانين طبت للحمام احسها تريد بس تنعزل عن الكل ومو طايقة حتى حالها .

واني خليت دانيال يمي ع السرير وتمددت بصفه
وهو كلساع وسألني .
وين بابا علي .. مسحت دمعتي وجاوبته
حبيبي بابا علي نايم هسه .

مد ايده واخذ ايدي وظل يسأل عنهم واحد ورة الثاني .
وين ليلي (ريلي) ..

وين بابا اتان (حسان )
حسان شكد ميغيب عن البيت هو مينساه عبالك يعرفه عمه من دم ولحم ابوه المرحوم . يحبه ويموت عليه .

وحتى مهيب هم سأل عنه رغم يضوجه بالشقة ويكرصه ودانيال مشبعه تفال بس هم افتقده .

وشرار هم حتى من يسافر دوم لمن يفتح كاميرا ويه امه يحجي ويا وويه ابنه ويسمي بابا الال .

ظل يكرر السؤال واني صافنة وهو يكرص بيه
ويحجي وين بابا الال ..
ويشمر عليه التليفون يريد يخابره ...

انتبه عليه احمد كال شنوو يريد ..
رديت بتذمر يريد شرار ..
التفتت عليه موج وبعيونها يلمع الحزن وبسرعة دارت وجهه .

كال احمد بتحذير ديري بالج تخابرين احد منهم لو تفتحين تليفونج فرح ماشي ؟ لمن نطلع خارج العراق كلش يله ننطيهم خبر .

هزيت راسي وافكر شلون راح يفتقدني علي
هو اخر شي كال يطلكني ياترى كان يعنيها ؟
لو بس بساعة عصبية!!

فززني صوت موج وهيه تطلب مني اروح اشوف انبن تأخرت بالحمام .
كمت من السرير انطيت فوني لدانيال بعد ماسويته طيران و طلعتله صوره وفديواته ويه عمامه حتى يسكت وكمت .

توجهت للحمام دكيته وظليت اصيح عليها من وره الباب ..
انين انييين ..

دقيقة وفتحتها عيونها حمرة دم شافتني شهكت ، اخذتها لحضني وظليت امسح على شعرها ، رفعت راسها تباوعلي برجاء وتهمس بنحيب
كوليلي مات لوو لا ؟

وخرتها من حضني اباوعلها باستغراب
شتقصدين منوو ؟

همست من بين اسنانها : حس حسسان ..

عكدت حواجبي اباوعلها مستغربة اهتمامها
هي فهمت نظراتي ..
كالت بتوسل فرح نقذ حياتي اني جنت دامووت اوس ديريد يقتلني .

خليت ايدي على حلكها اشش حبيبي اسم الله انتي مو كال احمد يعيش مااجتي الطلقة بي ؟

كالت احمد يكول هيج حتى يسكتني يكذب عليه ...

وخرت شعرها من وجهه وخليته وره اذنها واني احاجيها بمزيج من استنكار وحنية
لا عمري شلج بهالحجي ؟ يعيش ان شاءالله امشي تعاي يمي .

طلعنا من الحمام واخذتها للسرير وهي ترجف
ظلوا احمد وموج يباوعولها بحزن وهيه تباوع لأحمد برجاء .

هو تحسر وعدل كعدته ع السرير المقابيلها ..
واستمر يباوعلها ..

كلتله بتوسل ودموع : احمد الله يخليك خابر شوفه مات لو لا ؟

كام وراح كعد يمها حضنها من اكتافها وجرها لصدره
وظل يحجي قريب من اذنها
ويحلف الها حسان مو ميت متأكد .
طلبت منه يخابر ويتأكد وكلساع تكله نقذ حياتي..

رد عليها عمري شون اخابر هسه ؟ تردين اوس يطيح بينه ويجي يكتلنا كلنا؟ ماشفتي شسوا بيج ؟ شسوا بالشيخ وابنه ؟ منو يكدر له بعد ؟؟

ظلت تمسح دموعها وهو هم يمسح على خدها ويبعد شعرها وساعدها تتمدد ، باسها على كصتها وكام
كاللها راح اجيب عشه واجي شنو تردين اجيلج وياي؟

لزمته من كف ايده كالتله لا لتروح عفية الله يخليك خاف يشوفك اوس ويقتلك .

لزم كف ايدها الصغير بادينه الاثنين وظل يشد عليها
لا حبيبتي احنه هسه بعيدين عنه ع الاقل هالفترة
بس لتخافين .
هزت راسها وهو فات للحمام .

رحت يم دانيال خليته بحضني وابوس براسه ، شسوي هسه اني!! دانيال ابنهم والي ابطني هم مستحيل يعوفوني بحالي اذا طلعت!

زين اني شون ابعد ابني عن ابوه!!دانيال عن اهله!
معقولة حيكون عقلبي قاسي هالمرة اذا كعد علي من غيبوبته ؟ لان طلعت من بغداد ؟ وخاف يحرمني من جهالي اثنينهم ؟ خاف جانوا واحد صاروا اثنين .

بس اني ماطلعت اله لمن فقدت الامان بالقصر وببغداد كلها ومالي غير اهلي اطلع وياهم .

خليت دانيال السرير غفى حبيبي واخذت منه الممة وخليت راسي ع المخدة والافكار اقتحمت مخيلتي بغزارة وسوداوية .

بقينا يومين بالفندق هذا ، واحمد حصل عنوان ابن خال بابا ورحنا عليهم ، كاعدين بشقق ، دخلنا عليهم رحبوا بينا .

واحمد حجه الهم كل شي الصار ..
ابو حسين ماقبل على طلعتنا بهالطريقة وكال لاحمد
مايصير هالشي يا ابني هذا يسموه عدم احترام والرجال زوج اختك شيخ ومايقبل عليكم هيج تسوون اذا كام بالسلامة ان شاءالله .

دنك احمد ويعصر باديه ..
يا عمي والله الموضوع مو هيج اني ما أمن على اخواتي بعد ببغداد هذا اوس شراني ماوكف بعينه احد ضرب الشيخ وابنه الضابط واحنه نلنا كفايتنه من هالعائلة ومنهم كلهم .

اختي زواجها بالشيخ شبه منتهي لان هو قبل لينصاب جان ناوي يطلكها وياخذ ابنها وأختي الثانية مخطوبة لابنهم وخطوبتهم جانت كفيان شر بس مو اكثر الطلعة النا افضل حل عمي .

ظل الرجال يأشر بيده وكال والله انته ادرى بعد الله كريم تفرج ان شاءالله اكو شقة هنانه بالعمارة فارغة اذا تحبون تأجروهه تبقون ويانا كيفكم نشيلكم على راسنا .

رد احمد عمي احنه باقيين فترة مؤقتة بينما اكمل الاجراءات وياريت تشوفلنه الشقة نكعد بيها ندري بيك انته متقصر.

_ اي تدلل ابني من باجر اخابر الحجي تحسين واشوفلكياها وانتوا ابقوا اليوم عدنا .

_ تسلم عمي راح نتعبك بس الي طلب يمك .
_ كول حمودي ابني تفضل .
_ عمي ماريد احد يعرف احنه يمك خاف عمي يخابر ويسأل .

كال اطمئن من هالناحية اصلا انه وعمك مو على صلح هو متنك عليه لان ما انطيته بنتي لابنه سلوم
هيه البنية رفضته واني ما اكدر اجبرها وحتى بفاتحة ابوك الله يرحمه رد من وره خشمه وخو سلوم اصلا ما سلم .

ابتسم احمد اعتذر عمي حقك عليه امسحها بيه ..
رد عليه : لا انته شعليك قابل ، المهم اخذوا راحتكم وخلي البنات هم ياخذن راحتهن بيتكم هذا وشتحتاجون اني حاضر .

بقينا يمهم اني واخواتي صفنه تجيبنه وصفنه تودينا
كعدنا وياهم بغرفة البنات واحمد بالاستقبال مالتهم .

جنه كاعدين وحدنا اني واخواتي باوعت لموج صافنة
كتلها موج اني حامل .

ظلت تباوعلي ممستغربة
كالت حسيت بيج بس من شوكت ؟

ماعرف بس هوايه من قبل فاتحة بابا يمكن جنت ادوخ واوكع ولعبان نفس بس عبالي من السكر منتبهت للشهرية .

لزمت ايدي كالت خلي نوديج للدكتورة احسن تكتبلج علاج .

هزيت راسي بس مو هسه مابيه تعبانة بس موج شلون اخذه واطلع وابوه شلون ؟ لازم يعرف ماكدر اخلي ورايه حتى لو بيننا مشاكل .

دنكت الله كريم خلي نشوف شون راح تصفى مو احمد كال نستقر برة يله نتواصل وياهم .

موج اني ماريد ارجع لعلي لان تعبت بس ماريده يموت اسمه بالدنيا كافي .
كلت هيج واني ابجي .

شهكت موج لا اسم الله علي قوي اكيد راح يتعدى هاي الازمة .

مسحت دموعي خاف يفقد الذاكرة وينساني خاف بعد ميشوف ميمشي ميحجي حيل حيل افكر بي شون بيه اني موج بهاي الاشهر القليلة اني تعلقت بي رغم عذابي وياه رغم غموضه رغم تجاهله الي بهواي امور .

حياتي ويا مثل الحية والدرج كلما اصعد اله تكرصني وترجعني للصفر وتضيع عمري واحلامي وفرحتي .

حضنتني صارت قصتنا مثل الناي فارغة ومجوفة وصوتها حزين ، ماكو شي حلو ماضي اليم مستقبل مجهول وتايهين بحاضرنا .

بعدها كعدنا بالشقة الي فوكهم وهم خطية مقصروا
انطونا فراش وزوألي وقناني للطباخ .

اجتني يمنا سوزان بنت عمو ابو حسين بنية حبابة
جابت النا دولمة وياها .

سألناهه على طبيبة نسائية
اراجع عدها كالت مادري اسأل ماما .

بطلعتها فات احمد للشقة اجه وكعد يمنا
كال هيه هاي الي خطبها سالم ؟

اثنينه منعرف قوسنا شفايفنا وهزينا اكتافنا ..
لان مو بس هاي عدهم بعد بنات اثنين .

هو ضحك كال الله يطيح حظك على هذا الذوق سويلم ..

كالتله موج : ياء احمد شبيها البنية ترة مناقصها شي وحبابة حيل .

رد وهو مدنك : الله يستر عليها بس وجهه هواي طويل .

موج جاوبته : وجهه طويل خو ماتكصه يا احمد .

رد : يله اهمشي الاخلاق .

...

مرت الايام ثقيلة مثل روح مذنبة .. اوكف كبال الشباك ولازمة بطني وافكر وبطني بدت تعلى وتكبر ..

افكر هسه يمكن كعد وديدور عليه ، يمكن يحفر الكاع هسه ، لا لا يمكن مو همه اني همه ابن اخوه وبس .

مشتاقتله معقولة بعد ماشوفه! احنه بعد ماعرفنا عنهم شي ابد لا فعلنا اراقمنا ولا فتحنا نت ، عايشين بس على اخبار احمد ، خايفين خايفين من اوس لذلك دنتبع اوامر احمد بحذافيرها .

اعرف بي عايش وادعيله بطولة العمر ، بس الي يألمني انو خاف ماشوفه بعد ابد لذلك بقيت اترقب ظهور طيفه . جان عزائي الوحيد لنفسي انو مصير الحي يتلاكى .

تمنيت اتزود بنظراته وارتوي بانفاسه ... مشتاقتله حيل مشتاقة لذيج العيون القاسية الي تتأملني بنظرات اعجز عن تفسيرها .شكد ماتعمقت بيها ابقى عاجزة .

ولهناك احس لكيت كل شي فقدته بعده الا نفسي .

....

اخذتنا مرة عمو ابو حسين وسوزان راحت ويانا لطبيبة نسائية قريبة بعد ما مرت شهرين واحنه هنانه
ماكدرنا نطلع ، ناقصنا مستمسكاتي احمد جان ديحاول يطلعنا .

رحت للطبيبة واخذتلي سونار كالت هسه بشهر بالخامس وبيه بنوتة .

نزلت دموعي ، تذكرت لمن كال يريد بنوتة هو
وبداخلي اكول هو جانت عنده بنيه وتوفت يمكن يريد يعوضها .

دوم احس هو مجرد جان رايدني ابد ما حبني هالاحساس يعذبني .

احاول انساه وما افكر بي
بس نبضات قلبي العاشقته تحبط كل محاولات النسيان ..

أنين ...

ماعرف شنو الي تغير بداخلي فجأة ، ايام مرت واني ولا انسى حسان ابد ، مسيطر على كل شي بيه .

احمد يكول هو زين وما ميت ، بس اني ماصدكه اريد بس اطمأن عليه بنفسي .

اخذت فوني ونزلت الدرج رحت كعدت كبال شقة عمو ابو حسين دافتح نت عليهم الظاهر مغيرين الرمز لان الشبكة تطلع بس ما اكدر اربط عليها .

هيه بنته مريم خلته الي البارحة و كتلها لتكولين لاحد لان احمد ميقبل نفتح نت ابد بس اني حيل ضايجة .

عصبت ضربت قبضة ايدي بالدرج ، ماانتبهت اله لمن ظهر كدامي ابنهم اسمه عمر مبتسم الظاهر شافني .

هو بكد احمد مدري اصغر هيج مبين عليه ، لمن شفته يباوعلي درت وجهي منه بانزعاج ، سمعت صوت ضحكته واجه يمي اخذ الفون من ايدي استغربت منه .

ظل يخلي ارقام الباسوورد ويحجي
كال اني غيرته عن مريم وغسان لان مايقرون وامي اشتكت منهم .

فعله وانطاه الي اخذته منه وهمست شكرا ..

كال انتي شكد عمرج ؟

رديت بعد ما جليت صوتي ١٧ سنة ..

كال انتي جبيرة وحلوة ليش ماتتحجبين ؟

فتحت عيوني مصدومة باوعتله جان رافع تك حاجبة
درتله ظهري وصعدت بسرعة لشقتنه .

بس ضجت منه هذا كلش مكروه ونظراته مدري شلونها
انوب متسلط حيل على اخواته واخو رغم هو مو اكبرهم ، الكبير حسين متزوج وشايل منهم .

وراها بكم يوم اجتني مريم اخته واخذتني جوة بشقتهم دااقريها انكليزي هيه رابع ، شكد انقهرت لان حتفوتني هالسنة وصارت امتحانات نص السنة واني حتى ممداومة .

كعدت اقريها والغصة ببلعومي ، صاحت عليها امها وامي بقيت بالهول مالتهم ، فتحت نت سويت حساب فيس جديد طلب معلومات خليت المحافظة كركوك بس اسم مستعار .

ظليت اتصفح بالفيس فتت على حسابات خواتي القديمة ادور حساب حسان ، فتت ع هواية حسابات وادور بالاصدقاء .

شفت حساب فتت عليه بس مكتوب إحسان بالانكليزي صورة البروفايل الشخصية حمدان الله يرحمه وعليها صورة حداد .

وصورة الغلاف جان حسان وحمدان وشرار بمكان كله ثلج
وكلهم ضاحكين وحمدان بنصهم .

دزيت طلب صداقة ورجعت مريم يمي كمت حذفت الفيس وخليت التليفون بحضني .

رجعت للشقة ، وره كم يوم تحججت اروح يم مريم
فتحت الفون شفته ماقابل طلب الصداقة متت خوف خاف مات عزااا .

دزيتله ع الخاص انت عايش لو ميت ؟

وهم مارد عليه ، رجعت انتكست حالتي صرت اعصاب حتى دانيال ما اتحمله ولا فرح ، روحي بخشمي وفرح تدوس بالبطن وتدقني .

ظليت اتحجج انزل جوة بس الي يضوجني عمر ونظراته اكرهها .

نزلت المسنجر وفعلت الحساب ..
جايني مسج منه ..
كاتب ضحكة طويلة ..
هههههههههههههههههههههههه يعني واذا ميت شون اجاوبج مثلا؟

اتسعت ابتسامتي وقلبي نبضاته صارت الف ...

دزيتله انته حسان ؟؟
وبقيت انتظر رده ..
ياربي ليش يتأخر بالرد .. مشغول اكيد ماكو مو نشط .

البنات كالن ابقي يمنا ع العشه واني كيفت صعدت كلت لموج ونزلت يمهن بس انتظر رده .

خلصنا عشه وغسلت المواعين ويه البنات دااطلع من المطبخ واروح لغرفة البنات وحدي ، شفت عمر بس شافني انتبه عبالك بكل حواسه عليه ، عكدت حواجبي وركضت للغرفة .

جانن البنات بالمطبخ بعدهن يعزلن ..
ركضت لتليفوني شفته راد عليه ، كلبي طار من الفرح
كعدت ع السرير واني الوح بقبضات اديه بالهوا .

راد اي وهذا الي بالصورة اخويه متوفي لا عبالج اني ميت ومخلي صورتي.

كتبت اي اعرفه بس استغربت اسمك حسان ومكتوب إحسان !

كتب وره دقيقتين واني ع نار انتظره ..
للسهولة ..
مكلتي انتي منو ؟

رديت اني وحدة اعرفك ..
رد : نرجس؟؟

انقبض قلبي ، نرجس صديقة فرح حبيبته القديمة ، الي استقتل لحتى يتزوجها بس مصارت اله .

يعني بعده يحبها ! بعده متأمل تتواصل ويا رغم هيه تزوجت من زمان!

حظرته وحذفت الفيس وطلعت من الغرفة اركض وصعدت لشقتنا .

هدى ..

رحنا لبغداد من دربنا للمستشفى بقينا يومين والطبيب كتب النه خروج بس الطفلة رغم تعافيها بس تبجي
اخذناها للامام الكاظم عليه السلام .

اخذنا لهيب اني وعمة بلقيس ورحاب جانت متأخرة ولادتها ، تريد تتحرك حتى تولد الطبيبة كايلتلها تحركي

قبل لانفترق لحتى نفوت لقسم تفتيش النساء
سحبني من ايدي نبت اصابعه بزندي وظل يهمس يم اذني بصوت مصرور .

_:مو تصيرين فاهية ديري بالج على الطفلة لاتنضرب خوش!

باوعتله بنفاذ صبر هاي بعدنا مارجعنا للبيت ديحاول بكل قوته يأذيني ، اكتفيت بهزة من راسي وتبعت عمه بلقيس ورحاب .

بس فتت جوة وعبرت الباب الذهبي
تذكرت باسم الكربلائي عنده قصيده
يكول بيها هذا الغريب منين وين اهله راحوا وين ...

يقصد بيها الامام الكاظم الي استشهد مسموم بسجن
هارون الرشيد ...

دمعت عيوني وكعت على خدي ..
صرت اخاطب الامام بقلبي ..

يا مولاي اني نفسك غريبة ، ومحد ينصفني ابتليت بذنب مو ذنبي مظلومة اني يتيمة ما الي احد .

يارب بجاه الامام الكاظم اشفيلي بنتي واثبتلي براءتي انته اعرف بحالي ارحمني يارب .

بعدها خلصنا زيارة تعشينه وطلعنا للسيارة ، عمة بلقيس كعدت كدام واني ورحاب ورة .

جان يضحك ويسولف ويه عمته وويه بلقيس واني كلما تصد عيني بعينه يخزرني ، اخر شي دنكت بعد مارفعت عيوني ولا باوعتله عيني على بنتي الي بحضني وبس .

وده رحاب لبيتهم ولمن نزلت هيه وبنتها
كاللها من الجامة مالة السيارة
والله اذا ماجبتي الليلة اخلي علاء يطلكج شلعتي كلبي ياجايبج ويا موديج .

ضحكت كلتله اتطلك اجي اكعد على كلبكم ...

كاللها لا شعليه بيج اني راح اعزل بيت وحدي ..

استغربت وصفنت ، باوعتله بالمراية مستغربة وهو رافعلي تك حاجبه .

طبت رحاب لبيتها وعمة بلقيس ظلت تستفسر منه
ليش يريد يعزل هو اكتفى بكلمة احسن وعينه ع الطريق .

بس اني خفت من نيته هايه ليش وعلى شنو ناوي!

وصلنا للبيت ، اخذتها ورحت للحجية وهو ورايه يمشي

جانت تعبانة حتى كوة تتنفس بس حيل شايلة عليه وكالت طحتي من عيني هديوه.

ظليت ابوس اديها وابجي وابوس راسها
كالت لبلقيس سنديني وخلي الفرخة بحضني اريد اشوفها .

اجتي عمه سندتها وكعدتها وانطيتها الطفلة الي ابوها سماهه ديما ..

خلتها بحضنها على رجليها وهي بيبي اديها ترجف خطية .

باوعت للهيب كاعد يمها كالتله انته تدري بيها حامل وماكلت .

باوعلي بحقد ورد اي حبوبة ادري

ردت بعصبية جا ليش ماحجيت .

رفعلي تك حاجبه نخاف من الحسد ..

غمته : امداكم اي والله الي يسمعكم مامخلفين احنه من كبل لو هايه بتكم نازلة بزبيل ؟

ظليت اعصر باصابعي وهو رد بتذمر
بعد صارت حبوبة صارت ..

ظلت تباوعلها كالت هاي مضرورة الفرخة وينج بلقيس دزي ع العلوية ام حسين خلي تسويلها حجاب تحصين شي خاف العتوي ضرها .

باوعتلها بتوسل وبعبرة حجيت يعني بيبي تموت بنتي .

غمتني كالت اسم الله فال الله ولا فالج ولج بومة .

سكتت واستحيت طبن البنات ريلام وهيام ونفس السؤال يسالوني ... ليش ماكتيلنا حامل واني بنفس جوابي الصمت .

واباوع للهيب رافع تك حاجبه .. وكام وكف تمطط عدل بلوزته وهو يسحبها من جوة وطلع من غرفة الحجية .

واني ترخصت ورحت للغرفة فوك دخلتلها ابتسمت حييل شكد مر وقت هووايه كلش .

بس الغرفة نظيفة ومرتبة واكو سرير للطفلة بيها حلو وردي وبي تول والعاب ليفوك .

رحت كعدت على السرير وظليت ارضعها
واباوع ع الغرفة وافكر بلهيب وابويه خطية وعلاوي.

انفتحت الباب بسرعة وصار كدامي لهيب شطوله
انصدمت بي يباوعلي بتركيز وحقد ، عين عليه وعين على بنته .

بسرعة ضميت صدري وغطيت روحي .
هو كال بنبرة امر كومي ودي الطفلة يم عمتي لو يم البنات وتعالي نحجي.

حجيت بخوف وتوسل : عفية لهيب كل الي عندي حجيته الله يخليك كافي .

شرار ...

مرت الايام مهيب طلع من المستشفى بس علي الدر بعده بالغيبوبة .

وبهاي الفترة احنه ندور عليهم وهم فص ملح وذاب
حسان ماكال ولا حچه اله بعد اختفاؤهم بتلث ايام
مرة يكول ردت الكاهم واطمطم الموضوع ومرة يكول جنت مصاب ، اخر شي اعترف انو هو صاحب فكرة هروبهم .

واكدلي انو اثناء ماجان يمنع موج وفرح من انو ياخذهم احمد ويطلع انصاب بالغلط .

خابرني واني اسوق السيارة جاوبته
كال انته وين ؟
رديت جاي من سلمان باك جنت يم بيت عمتهم اسال عليهم اذا اكو خبر او لا .

وكملت كلامي هاا صدك بلغه لهذا لخالك مو يومية وجايب جماعته وجاي ويريد يشترينه بافلوس ويبرء ابنه

احنه فلوس مانريد اوس غريمنه ووين مانشوفه ندكه لا تخليني اخذ الشباب وادكهم دكه معدلة اخليهم مايلحكون يلبسون لبا***

والله اني ساكت لخاطر جدك رجال خير بس وربي ناويله على نية اوس اله ازوعه حليب امه صار معلوم ؟

رد افتهمنا بس اني مخابر دا اسألك ماسامع من مرتك عدهم اقارب بكركوك ؟؟

جاوبته بعصبية : هو اني حاجي وياها مرتي حتى اعرف ..

_ هاي جم شهر انته خاطبها ماحجيت وياها جاي تقنعني ؟ انت شرار الفاسق الساقط تفوتها ؟

اي حتى لو احجي شسوي باقاربها احجي بيهم ؟؟ اذا اريد احجي وياهاا تعرفني شنو احجي .

بس ليش تسأل وشمعنى كركوك ؟

شاك بيهم بكركوك بس ماعرف شون اوصللهم ..

شلون يعني ومنين اجاك هالشك ؟ مستر حسان ؟

حاول حاول تروح لبيت عمهم وتسأل اذا عدهم اقارب هناك وحصلي العنوان والباقي عليه .

زين هسه اروح لبيت عمهم بس شصار على اوس لكيته لا ؟

للاسف لا اني جان عدمته هذيج المرة لمن لكيته بس وكفت بعيني البنية خطية تصير بيناتنا والا اني ميهمني روحي .

سهلة وين يروووح يطيررررر؟؟ اطيرر وراااه ..

ختمت المكالمة ويه حسان وتوجهت لبيت عمهم
سألته اذا اكو خبر منهم جوابه كان النفي ..

كتله اذا عدكم اقارب بكركوك رد اي وانطاني المنطقة الي ساكنين بيها كتله يتكتم ع الموضوع
هو بلغني انو ماعنده علاقة باقاربه الي بكركوك وهالشي طمأني .

دزيت اسم المنطقة لحسان وتوجهت للمستشفى ..

بعدهه بساعات الاطباء جانوا يم علي الدر وهم ...
بقيت انتظرهم ، اجه حسان يمي ..

كال دزيت جماعة لكركوك يراقبون الوضع ويتأكدون ان شاءالله خلال ايام يجيبون خبرهم .

باوعتله بشك رافع حاجبي : شلون عرفت عدهم اقارب بكركوك .

التفت وظل يضحك بشي من الخجل ..

ضربته بقبضة ايدي على زنده
وحجيت بتهديد احجي شعندك ولك .

بهالاثناء طلعوا الاطباء من الغرفة المتواجد بيها علي الدر مبتسمين كالوا الحمدلله على سلامته تفضلوا يمه .

دخلنا بسرعة اني وحسان متلهفين ومتشوقين لشوفته وهو كاعد .

اني رحت ابوس براسه وحسان لزم ايده يبوس بيها ..

ونباوع له وهو يحاول يحجي ويريد يكول شي
بس مديكدر .

قربت اذني يم حلكه اريد اسمعه شيكول
خايف يسأل عنها وشراح اجاوبه!!

يتبع ..

خوش قفلة مو 🙈

النشر بين يوم ويوم احمبائي ☻

اذا ممكن متابعة للكاتبة Baneen_Star