رواية هذيانٌ بين جمرٍ وجليد ..(ارملة اخي المجنونة) الفصل الثالث 3 - بقلم نورا ناصر

السلام عليكم احبتي .. نشرت هسه وقبل الموعد بنصف ساعة لان ساعة 9:00 عندي بث بكروب الكاتبة مريم السعدي بالفيس .

رواية هذيان بين جمرٍ و جليد ...
الفصل الاول
نورا ناصر ..

°°°°°°°°°°°
تساؤل يحرق روحي ، هل انا في متاهةٍ الان ؟
نعم انا في متاهة اسمها "الحب" ورطني بها قلبي الساذج ، ولم اجني منها سوى خيبة قاتلة جعلتني أُركَن في زوايا التعساء ، وحيدة ، غريبة ، غربة تنهش روحي والقلب ، ارهقتني كثيرا ايها الحب ، جعلتني اتلوى وجعا وحيرةً ، ادميتَ قلبي حد الممات ، صرت اتمنى ان اكون قد ولدتُ بجناحين لأحلق بلا عودة ، تاركة خلفي كل خيباتي وقسوة من خذلني ، إلا من انسلخ من روحي ، لأهبط بعيدا عنهم ولأبقى بمسافة أمنة عن بغضهم حيث هم في مكان وانا في أخر ..

°°°°°°°°°°°°

مخليته على سيقاني وارفع بي ليفوك ..
وهو حاضن رجليني كلش قوي ، رغم عمره الصغير
المايتجاوز السنة ، الا انو عنده غريزة الخوف على نفسه ، وبنفس اللحظة مكيف ويضحك واصداء ضحكته البريئة مالية الغرفة ...

تتخلخل لقلبي وتسعدني وتنسيني كل همومي
العشتها والي دا اعيشها بهذا البيت ...

مرات على كد الالم اتمنى الم اغراضي ومنها ابني واطلع منانه بدون رجعة .

بس شماتي هواي ، خاصة من الموجودين بهذا البيت لهسه ترن بإذني كلماتهم
انت مو من ثوبنا ومراح تعيشين ويانه هواي
حدج سنة سنتين ونطلكج والايام تثبتلج .

بس اني اريد اثبتلهم العكس اني امراة قوية
اتحمل قراري الاخذته لمن قبلت اتزوج ابنهم .

اعرف وجودي بينهم يزعجهم صح مو كلهم
بس ديأذيني ازعاج البعض وما اعرف شون اتصرف
وياهم ومرات هواي افقد اعصابي واصيح
وانتهك قوانين وحرمة هذا البيت الي مخليها
الامير علي الدر..

ولم يوصل صوتي لاسماعه اعرف
هالشي يضوجه واحسه هواي
يكره تصرفاتي ، بس اني مالي لزمة على اعصابي
ابد ..

ولا حمدان الي يكدر ينصفني وياخذلي حقي
احسه ضعيف بين اهله وهالشي عرفته بعد الزواج
للاسف ....

هزيت راسي ابعد هالافكار عني وانتبهت لشريكنا بالغرفة الحاضر جسديا الغائب ذهنيا ..

على طول الدقايق الماضية هو يدخن بشراهة
جكارة ورة جكارة ، واني اباوعله متعصبة بداخلي
وتعبت من الحجي .

الى ان خلص حسيت الطفل
حيختنگ من الدخان القاتل ، اني ماتحملت هالسم شون هالطفل الرقيق يكدر يتحمله .

قررت اطلع من صمتي .

حجيت ويا بنرفزة ونتر : دخيلك كافي تدخن ،كااافي!! ماتحس بأبنك انتَ ماتحس؟ ترة راح يختنگ من وراك لو يتمرض ويصيرررر بي شي .

باوعلي بنظرات حقد ، عصر الجكارة بقبضته وهي مشتعلة ..

صرخت " عزاااا " وخليت داني ع السرير
وركضت باتجاهه .

هو بقى واكف متصلب ، لزمته من كتفه وايدي الخ اتفحص بيها راحة كفه .

بتوسل حاجيته واباوع بوجهه ؛ حياتي شجاك ليش هيج تتصرف انت كلك على بعضك مو عاجبني هالايام ليش دتأذي نفسك وتأذينه وياك .

غمض عيونه ونطق بصوت مصرور باسنانه
_ فررررح وخري عني!!!

عليت صوتي : لا ماوخر عنك انت شبيك ماتكولي شبيك ؟ من حقي اعرف شبيك .

تجاهلني بدون إجابة ، راح على ميز المراية
ثبت اديه عليها وجسمه متصلب ويتنفس بعمق

رحت يمه حاولت ارقق صوتي حتى لاينفجر بوجهي واحجي وياه بلطف .

_ حمود اني ملاحظتك ا من يوم الي اختفى صديقك سامر وانتَ حالك ووضعك متخربط عبالك عندك شي وخايف تگوله .

رفع راسه باوعلي تفجرت نظراته بوميض غاضب
وشر مسيطر عليه للحظات ..

درت وجهي اكمل كلامي
_ كول اني قبل لا اكون حبيبتك ومرتك اني صديقتك وكاتمة اسرارك ، حاسة انت تعرف صديقك وين او الك ايد باختفائه ، صح حمد؟

واني مدنكة اجاني صواب على ركبتي ، باوعتله مصدومة وخليت ايدي على مكان الضربة

صرخت ليييييش تضربنيىيي ليششش

رفع ايده وضربني راشدي على وجهي.

لزمت خدي متوجعه شياطين الدنيا تجمعت براسي
اول مرة يسويها وهو باوعلي مصدوم من حاله.

صرخت بوجهه الله يااااااخذك...

هو ابتعد لحظات مصدوم مني لا ادري من نفسه ومن تصرفه  ..

فززني صوت داني يبجي ويريد ينزل من السرير ..

صوته بتر دعواتي وشتائمي لابوه ، ركضت عليه وحرارة الراشدي بعدهه مشتعلة بخدي .

اخذت الطفل واباوعله واصيح عليه
_ لك ليش تضربني شحجيت اني شحجيت هو كلام دااكوله كلاااام كلاااام تضربني ليش يا حقير .

نزلت داني للكاع ورحت اضربه على صدره حيل
هو متخصر ومدنك وبدون اي ردة فعل واني ابجي واصيح عليه .

حسيت بداني يزحف جوة رجليه ، عفت ابو واخذته
حضنته واشهك : والله اذا ماترجع طبيعي ياحمد وتغير هذا اسلوبك المدري شلونه ويايه باخر فترة ، ارووح وتحلم تشوفني هنانه بعد .

باوعلي بنظرة بيها ندم ، واخذ باكيت جكايره وسويج سيارته من ع الميز ، فتح باب الغرفة وطلع ..

واني كعدت كملت بجي ، محتارة حيل واباوع على التليفون ابالي اخابر موج او احمد يجون عليه .

بس اعرف اذا طلعت منا البعض حيركص لطلعتي بجفية والله يكرهوني كره الموت..

غلست وكمت طلعت العاب لداني يلعب بيهم ويلتهي ، ورحت للحمام غسلت وجهي .

اخخخ على حظي اخخخخ ، يمكن حظي كاصينه ويه الحبل السري بالولادة وشامرينه بزبالة المستشفى.

ااااأه ، وين الكاك يا حظي وين ادور عليك ؟

رجعت للغرفة شفت دانيال لازم بالباب مال الغرفة وواكف ، يرفع اطراف رجلينه حتى يلوح قبضة الباب.

قبل لا اوصله وكع وكعد ع الارض ، لان بعده مايوكف ولا يمشي اله يلزم بشي يله ، رحت اخذته ، ظل يأشر
على الباب  معناهه يريد يطلع منا .

اخخ شون اطلع وهسه اكيد سمعوا عركتنه
واكيد راح اسمع حجي يسم البدن ..

وبنفس الوقت احس الغرفة صارت خنكة من وره
دخان الجكاير ..

والجو حار حيل ، خاف افتح الشباك ويدخل حرر والسبلت مشتغل .

خلي انزل داني اودي يم ريلام.
وارجع اهوي الغرفة شوية .

طلعت من الغرفة شفت وحدة من التوم واكفة بالباب هنه نسخة نفس الشكل والصوت وحتى باللبس هم وحدة تلبس ملابس الثانية او يشترن نفس الشي .

مو يكولون الله خلق الانسان نصه شر ونصه خير
الله اخذ نص الشر من ريلام وخلاه كله بهيام .

كتلة من حقارة وخباثة ونذالة ..

ظلت تباوعلي : شبيكم صوتكم طالع ؟ وليش خدج احمر ؟

وكفت كبالها احسب الشامات ، لان ريلام عدهه شامات اثنين ،  بحنجهه وحدة ، وجوة شفتها وحدة .

وهيام عدهه بس وحدة بحنجهه ..
حتى قبل لا اخرط كل شي واجفص .

لان ارتاح لريلام وهيام ام الفواين ما اطيقها ..

حسبت شاماتها اثنين  معناهه هايه ريلام ، دخلت وياهه للغرفة كعدت ع السرير وخرطت الاول والتالي .

شويه وجان اشوف نسختها واكفة بباب الغرفة
تباوع علينه مصدومة ، خزرتها "شبيج ولج ؟"
انصدمت اكثر ..

انتبهت على حنجها عدد الشامات اثنين !!

باوعت على الي يمي اتسعت ابتسامتها تدريجيا
ولمعت عيونها بنشوة وانتصار ومكر ..

خلت ايدها على حنجها  ومسحته ..
صار اثر اسود خفيف على بشرتها .

عطت بيها ياحيالة ياغدارة ولج انتِ شنوو ؟

_ بعد ايدي خالو حمدان ضربج راشدي ؟ اخخخ الله تستاهلين هسه ارتاح گلبي اي والله رجال خالو رجال .

وكفت اباوعلها مبرطمة وكلساع اخلي داني على جهة ..

بعدها مبتسمة : بس سمعت صوت هوسة بغرفتكم اجيت خليت شامة بالكحلة على حنجي لان ادري بيج راح تكتين الاول والتالي يم هاي العوبة " وتأشر على ريلام "

وتريد تروح تركض ، ادري بيها راح تروح تحجي  جوه ، وتكوللهم ضربني ، خليت داني على الكاع بسرعة  ..
واجرجر بيها ؛ لا تعاي حبابة لا تروحين من الله ياخذج ان شاءالله لاااااتروحين

بس هي لا شيوكفها ، راحت تركض ولا حتى سمعتني تموت على الفتن ونقل الحجي وتخلي فوكهم بهارات مدري شنو من تركيبة غريبة .

باوعت لريلام ، وبرطمت ، وهي اجت اخذت ابني
وكعدت تسكته ..

بنصح كالت : انتِ مالكيتي غير هيام الي تحبج وتموت عليج تكعدين تحجين الها ؟

كعدت على السرير وضربت على افخاذي ....
_ ولج شمدريني بيها عبالي انت ماشفتيها شمسويه بحنجها بالكحلة ؟

_ اي لج تعودي على سوالفها ولا تحجين شي الا تتأكدين انت تدرين بيهم يردون عليج الزلة حتى تصيرين علج بحلوكهم ولج هسه يوصلوها حتى لبيت جدي .

_ اي ادري بيها اختج هاي الجزيرة ما تلحكهه بنقل الاخبار ..

...اكلج والله احسن شي سويلج رصعة تجميلية بخدج حتى اكدر افرق بينكم الشامة ماتفيدني بعد .

ضحكت : انت بس لزمي لسانج و تعالي كعدي كليلي شصار وخالو حمدان طلع شايط كلش وجهه مايكصه السيف فد نوب .

_ اني منين اتلكاهه من حمدان من احسان من هيام من الحجية بس كليلي منين ..

_ صبري بعد شسوين الصبر مفتاح الفرج ..

كعدت يمها سولفتلها كل شي عن حمدان والي صار قبل شويه اخذت داني منها ونزلنه جوه ..

مبينين متجمعين بالصالة لان صوتهم جاي منها .

قبل لا نفوت عليهم اسمع صوت شرار يكول ؛ والله اذا سمعتج بعد تنقلين حجي اله ازين شعرج كرعة واطلعج بصخام الوجه .

تبادلنا النظرات اني وريلام اصلا نعرفها راحت حجت كل شي ..

دخلنه شفناهم كاعدين ، شرار كالعادة مخلي راسه بحضن امه ، واصابعها تعبث بشعره القصير
وهو مخلي كاحل رجله اليسار على ركبة رجله اليمين المثنية .

حسان وهيام كاعدين ع التخم والباقين ماكو .
هيام وجهه محتقن وتباوعلي بحقد بسبب رزالة شرار
.

داني بس شاف الحجية  ظل يهومش عليها هو يحبها وهي هم حنينة عليه ..

وهي رفعت اديها اله : يا بعد بيابيي تعال اخذك عندي .

اجانه صوت شرار الخشن : هاي شنو سعدية شهالخيانة هاي ؟ متشوفيني نايم بحضنج بس شفتي هذا المفعوص تردين تاخذينه حسي بيه وبمشاعري ع الاقل .

جاوبته هي : يمه ماتشوفه يهومش عليه يريدني ...

_ هو هم كلب ابن كلب يغار مني الحيوان لان شافني نايم بحضنج رادج لو مشايفني جان مجلب بامه وميقبل يجي .

كتله شرار ليش تغلط على ابني ؟ لتكول عليه كلب ..

_ شعليج انتي اخوي وابن اخوي واغلط عليهم براحتي ، تحطين خشمج ليش ؟

_ اي وابن اخوك ماعنده ام ماترضى عليه مو ؟

قاطعنا احسان كال : لك شرار كوم عن حضن امي ..

وكمل : اخذي يمه اخذي امه محصلتلها راشدي مابيها تشيله " وطكاهه ضحكة عالية بشماتة"

خزرته دار وجهه الكلب الحقير يكرهني ...

عمتي كالت : تعال وليدي جسووم تعال عند بيبيتك ..

_ عمه حبابة ليش تظلمينه بهالاسم ترا اسمه دانيال داني ، جسوم شنو ؟

_ بكيفي انه بيبيته وشريد اسمي احنه بيت شيوخ مسميته الي مدري شنو ..

هيام بحقد كالت : انت ماعندج علم جاسم معناهه قاسم وقاسم هو اسم ابن النبي لو انت مو مسلمة ؟

_ بعد سويني ملحدة فد نوب اشايفتني بالله ترا اسم دانيال هم اسم احد الانبياء خاف ماعندج معلومات؟

شرار : لا والمصيبة ابو اسمه حمدان الله يخليج فرح شون رهمتيهه وسميتي هالاسم .

_ لا اسمك الحلو الي يخبل .

_ اني ابني امه روسية وسميته محمد

_ اي اني شعليه بيك كلمن وحريته ..

حسان : هذا اسم ابنج حتى المخابيل مايسموونه

_ اي اني مخبلة وسميته شتريد هسه ؟

ريلام .. اسكتوا خلونه نلطف الجو على طاري الاسماء
ليش كل اسماء خوالي بيها هدوء وطمئنينه اله خالو شرار ..

جاوبت : اسمه ملمحة كلكامش ويعيب على اسم ابني ..

شرار وهو يتصنع الصدمة ويباوعلنا : هااه هاي اني ؟ ولج ريلام يرادلج بوكسي خوش لطفتي الجو .

ريلام : اخخخ عمووو توجعت ... بس حجيتها فكني من بوكسياتك ..

انتفضت بحماس : لا لا حرب صفين معركة احد ...هذا اسمك مو ملحمة كلكامش ظلمت ملحمة كلكامش اصلا
ملحمة شعريه مو ملحمه خباليه مثل اسمك .

كام من حضن عمتي ومد اديه : جيبي ابنج الساقط خل اطبطبه شويه .

حضنته بقووة : لا يمه عوفه دخيلك انت تجعص بخدوده وتأذيه ..

... واجعص بيهن قابل راح ينفجرن كل خد بكد الركية جيبي .

... صلي على محمد شجاك ..

.. اللهم صل على محمد وآل محمد ...

خله كفوف ادي جوه بيطان داني واخذه مني
وهو يضحك لعمه وشرار متولي غلط وفشار
ويلكف بي ويسويله حركات بوجهه ويمد اله لسانه..

كام حسان على حيله يعدل بملابسه ويدندن ويريد يطلع ، خليته وصل للكليدور تبعته .

صحت عليه حسان واتلفت وراي .. خاف احد يشوفني

التفتت عليه مخنزر : شتردين ولج ؟

_ احترم نفسك ولا تكول ولج

_ دولي ما احترمج ..

_ ولا اني هم احترمك

.. بس من يوم الي طلعتوا بالليل ومااجيتوا اله وجه الصبح انت وحمدان وهو متغير مدري شبي وخاصة من ذيج الليلة واختفى سامر

قاطعني بنبرة متعجرفة : اي وهسه شتردين ؟

_ شبي حمدان ؟

_ مادري ويله ولي ..

_ انت واحد ماتستحي وقليل ادب وممتربي

_ تردين تاخذيلج راشدي ثاني ؟ كولي لاتستحين ماقصر وياج اني

_ شوف لاعبالك اخاف انت غلطان تفشر افشر تغلط اغلط ..

_ ايباااه صايرة سبعة

_ غصبا عليك سبعة ..

_ اشوف هالسبعه م̷ـــِْن جاي تحجي وياي ترجف .

_ لَيــِـِْش. يمه لآزٍمٍ عليه لزمه وارجف منك ؟

رفع اصبعه السبابة بتهديد وهو يقرب مني واني ابتعد منه للخلف وبخوف ..

وعيونه تنبض حقد : قريبا راح الزم عليج لزمة واكسحج من هذا البيت يله ولي ..

_ حساااااااااااااااااااااان .

التفتنه لمصدر الصوت ، كانت ملامحه كفيله بمنع اي شخص من الكلام ، والظاهر سمع كلامنا من دنحجي او دنتعارك بالاحرى .

لابس دشداشة بيضة وبيده سبحته الكهرب الي متوكع من ايده ، ملامحه الصارمة ونظرات عيونه الي تفجر منها الغضب قبل شوية .

حسان دنك راسه وجاوبه بتوتر : نعم شيخ .

بنبرة غاضبة ومسيطرة ومشدد على احرف كلماته
: فوت جوه .

_ صار شيخ ..

فات حسان جوة بغرفة المكتب الي طلع منها الشيخ "علي الدر" قبل شوية ..

ظل يباوعلي لحظات ، بلعت ريك ، تهزمني ملامحه الصارمة واضعف بوجهه ، رغم هذا بقيت اباوع بعيونه اتصنع القوة .

ومن اعماقي متأكدة هالقوة الزائفة ماتعبر على هالداهية ، بحيث من نظراته اعرف يفهم دواخل
كل شخص بهذا البيت .

دااريد انهزم من نظراته الغاضبة وافوت بس متوقعته حيوكفني بنبرة اشد صرامة من النبرة الي وكف بيها حسان : ابقي مكانج ولتتحركين .

تمتمت : ء ااا اني اءء ..

_ گتلج ابقي هنا عندي حچي وياچ .

هزيت راسي موافقة ، هو طبك الباب حيل وتوارى خلفه .

نزعت نعالي "تكرمون" ومشيت على اطراف اصابعي حرارة الارض لسعت رجليه ، تسللت بخفة بره وطليت من شباك الغرفة الي فاتو بيها توهم .

شفت حسان يتلقى ضربة قاسية على وجهه من ايد علي الدر الضخمة .

من يمي متت خوف وارتجاج قلبي بين اضلاعي آلمني كلش ، وصوت الصياح خوفني .

مشيت بسرعة وتوي داالبس نعالي ، انفتحت الباب ووكفني صوته شديد اللهجة .

_ مو كتلج اوكفي وين رايحة ؟

التفتت اله بلعت ريكي بخوف ؛ ها ءء اروح لداني ديبجي عليه

_ وينه ؟ مخليته وحده ؟

_ لالا مو وحده يمهم بس وقت رضاعته هسه ااروح له

تقرب خطوات مني ووكف ، مد ايدده اللحيته السودة الكثيفة المخضبة بشعيرات رمادية .. وسد عليه طريق الهروب .

: ادري بيج تردين تشردين روحي لطفلج هسه وبعدين مري عليه احجي وياج .

شردت بدون ما اجاوبه زوج اني وابقى حتى ترزلني كافي الراشدي الي اخذته من اخوك اليوم الصبح .

ولو اموت ما امر عليك . ما اتحمل رزالة وحجي بعد .

صح هو رزالته مرتبة ومثقفة وبيها نصائح بس والله ماتحمل .

مشيت طليت على الصالة ، شفت الحجية مخلية داني بحضنها وتلوليله ، تريد تنومه ، جيت اخذه منها بس تذكرت الغرفة كلها جكاير ، خلي تنومه واني اروح اهوي الغرفة وارجع اجيبه .

دااطلع على الدرج سمعت صوت ريلام ورايه  ، لزمتني من كتفي
_ ها شكو جنت يم غرفة خالو صوت طالع عالي وصياح حتى خفت وانهزمت للمطبخ شصار ؟

اخذتها فوك وصعدنا بسرعة ..
حجيت الها كل شي ...
_ وانت مالكيتي غير خالوو حسان ترحين تحجين ويا وانت تدرين بي كلش زين شكد يكرهج ولازم تخلين ابالج حسان يطلبج ثار لو منج ابتعد عنه مية متر اذا مو اكثر.

_ هو اني مبتعدة عنه تره ومغلسة عن تجاوزاته عليه وكدامكم كلكم بس رحت اسأله عن حمدان .

_ خو سألي خالوو حمدان احسن ليش ترحين لخالو حسان وتحصليلج رزالة وحجي مو حلو .

_ اذا حمدان مايحجي شسووي أني شسسوي تعبني حيل تعبني نهار كله صافن وساكت ويدخن وهالحالة اجته من بعد ما طلع هو وحسان ورجعوا الصبح ووراهه كالوا سامر اختفى .

_ اكولج فرح بلله لاتصيريلي المحقق كونان ، وتكعدين تألفين افلام واكشن ومدري شنو ..

_ اكولج اشو صايرة اخس من اختج الحيالة ولسانج طولان نسيتي اني مرة خالج واكبر منج ..

ضحكت : شكد اكبر مني سنتين و بس ترى دااوضحلج  الولد سامر صديقهم يعني شيسووله وبعدين سامر عنده اهل يدورون عليه ويلكونه انت لا تعبين نفسج .

هزيت راسي بتفهم وبداخلي حيرة متنوصف .
_ قابل داا ادور عليه اني بس داريد اعرف شبيهم خوالج .

_ مابيهم شي والشرطة اخذت اقوالهم ماعدهم شي هم ..

هزيت راسي وكمت من يمها ، رحت لغرفتي بسرعة هويتها وطلعت منها
خطية داني هسه يتكسر بحضن الحجية
خل انزل اجيبه .

نزلت واشوف الشيخ كاعد يم امه ويسألها عن داني ..
... شوكت نام ؟

عزاا هسه منها يعرف مارضعته ..

دا اريد ارجع اشرد فوك ، صاحتني ..
_ تعاي عيني البرنسيسة وين رايحة اخذي الولد تكسرت رجليه من الكعدة .

بلعت ريك ونزلت بعد مابيها مجال اشرد . مو كل مرة تسلم الجرة واشرد .

باوعت على الشيخ هو هم باوع بعيوني
عرفت من نظراته يكولي بمزاجي غلست عنج.

لان يعرف اني شردت من الرزالة الي جنت على وشك احصلها ، جان خوش بعد راشدي من حمدان وتجاوز من حسان ورزالة من الشيخ تكمل السبحة لو ادخل مستشفى مجانين احسلي.

جان "مهيب" كاعد على التخم و بعده بملابسه العسكرية .

واني من الارتباك حتى نسيت اسلم عليه وهو توة نازل من دوامه .

هو كال بابتسامة وبنبرة لطيفة : شونج مرة عمي ..

جاوبته بنبرة فتور هلو مهيب شونك حمدلله على سلامتك .

همس الله يسلمج ...

اخذت داني من حضن الحجية ..

الشيخ كام وكال مهيب اذا ارتاحيت شويه تعال للمكتب رايدك بموضوع .

هو كام باحترام وكال صار يابه ..

طب الشيخ للمكتب مالته ..

مهيب باس راس بيبيته: حبوبة رايح يم ابوي من رخصتج مامحتاجة شي ؟

_ لا يمه بعد عمري هالنجمة الي على جتافك يوم الي اشوف بعد بصفها نجمة ونسر .

هو ضحك وباس راسها مرة ثانية
_ الله لايحرمني من دعواتج الغالية الطيبة عود ادعيلي الي ابالي يصير .

اني صعدت وهي ظلت تدعيله ...

رحت وديت داني للغرفة نومته بفراشه

....

طلعت من الغرفة بعد هواي لاذان المغرب
رحت يم ريلام كعدنا نسولف ، احبها ريلام
رغم عمرها الصغير بس فاهمة واحسها جبيرة
وتفتهم .

طبت هيام متحمسة : ولج اجه اجه مهيب مهيب مهيب شفتي يبووووووي .

هي من شافتني انصدمت عوجت حلكها شعندج هنا ؟

كمت ووكفت خليت كفي على خصري
ارفع بحواجبي وانزلها : مهيب مو ؟

جاوبتني بانفعال : انجبي وماعليج .

بنذالة جاوبتها : انجب !!! ؟ اذا ما كلت لامج عليج بسيطة .

توترت وظلت فاتحة عيونها وهي تحجي تهز براسها
_ ششش شتكولين لامي قصدج على مهيب لو لان كتلج انجبي ؟

_ بكيفي شماريد اكول اكول ويله وخري عن طريقي ...

ظلت تجر بيه : تعاي تعاي وين موليه ريلام احجيلج شي فدوة شوفيها شتريد تسوي ؟

ريلام رفعت اكتافها وقوست شفافها بحركة لا مبالية ...

فجأة تركتني هيام ودفعتني بحقد : دروحي ولي قابل شكلت اني كلت مهيب اجه شحجيت بلله .

التفتت عليها بعصبية : اندري كولي لرووووحج هالحجي بس الي بعبه صخل يمعمع وانت الصخلة بذات نفسها .

مديت الها لساني فتحت الباب وداا اطلع .
تذكرت كلام ورجعت وكفت بالباب واوجه الها كلامي
_ والله اني انتظر تسوين الاضرب حتى اشهرج شهيرة واردلج الدين .

طلعت داافر بيدي مخليه شالي على اكتافي واشوف الشيخ علي الدر توه دايصعد الدرج بس مبين من وجهه سمع كلامي لان جان قريب عليه .

احتاريت شسوي خليت الشال على راسي بسرعة وانطيته ظهري ووكفت بمكاني احتاريت اطب بغرفة البنات لو اروح اركض لغرفتي .

طلعت هيام تريد تهد بس من شافته سكتتت ...

هو فات من يمنه بدون مايعلق .. بس استغفر بزفرة حارة وتعدى راح باتجاه غرفته..

واني ظليت متصنمة وواكفة بمكاني واتذكر نظراته باتجاهي وافسرها على انو يحسبلي عدد زلاتي حتى ينفجر بوجهي على ساعة .

عرفته بس يريد يحسسني بخطأي لان هددت بنت اخته اليتيمة .

بس مارزلني كدامهم ، يحسب حساب لافعاله وبدقة واتعجب عليه شلون يسيطر على غضبه
رغم نظراته الي تبوح عن نصف مايغلي بداخله .

تندمت بس شيفيد الندم ..

مشيت منزلة راسي وافكر اذا هيام مخبلة اني شعليه بيها ، شكو دا اوكف واهددها !!

هي صح حقيرة وياي كلش بس ابقى اني اكبر منها وهي صغيرة اخذها على كد عقلها الي اصغر من حبة الحمص احسن شي واجنب نفسي هالمشاكل .

ولو اعرف ميفيد وياهه تبقى تحوم عليه .. وتسويلي مشكلة يله ترتاح .

بعد ما هو راح وطب لغرفته ، مشيت بسرعة البرق ورحت لغرفتي شفته حبيبي العنون نايم ، موخر الغطى منه ومخلي رجل على رجل ، سحبت الغطى على كيف من جواه وغطيته عدل .

صار وقت الاذان ، توضيت وصليت صلاة االمغرب
وصيت ريلام على داني خاف يكعد ونزلت جوا ساعدت ام رحاب بالعشه .

خلصنه العشه وحضرناه كله بالصالة ، احنه نكعد كلنا ناكل سوى ، حمدان وحسان ماكو ما اجوي لحد هسه
واني هم ماخابرت حمدان ولا حاجيته ، كارهته بهاللحظة لان ضربني .

طلعت من المطبخ بيدي قارورة مي ، شفت مهيب
كتله من رخصتك بس وديهه ع السفرة خلي اصيح
لريلام تجي ..

هو ابتسم ودياخذ مني القارورة ..
_ هاي هيه ريلام اجت ماتسمعين صوتها ع الدرج ؟

باوعت ع الدرج بعدها مانازلة بس صوتها تحجي ويه شرار ..

كتله شمدريك يمكن هاي هيام مو ريلام ..

هه لالا ريلام هاي اعرفهه من صوتها ..

ظل هو صافن ع الدرج نزل شرار وحده ماكو ريلام ويا ، مهيب من شافه هيج فات بالصالة .

واني صعدت فوك ، شفت ريلام لازمه دانيال وكاعدة على سريرها تسكت بي ومسويتله ممه ..

سألتها هاي انت جنتي ع الدرج تحجين وي شرار ؟

كالت اي وسمعت صوت داني ورحت اخذته ..

لعد هيام وين ؟

بالحمام تدرين بيها وكت العشه تطب تسبح وتخلي ماما تصيح ..

وكفت صفنت عليها وافكر " لعد مهيب شون گدر يميز صوتها عن صوت هيام "

فززني صوتها : شبيج صافنة روحي تعشي واني الزم داني وبعدين نتعشى اني وهيام .

توجهت للباب وكلساع اتلفت عليها وهي مستغربة مرة تباوعلي مرة تباوع لدندون .

نزلت جوه .. فتت للصالة شفت علي الدر كاعد على السفرة..

هو جانت عينه على الباب لمن دخلت
اجت عيني بعينه ، بلعت ريك ودنكت اباوع على السفرة اشوفلي مكان اكعد .

شكد مستحية وخجلانة لان سمعني اهدد هيام
حتى مراح اشتهي اكل بس اتظاهر اني ممهتمة ..

سألتني ام رحاب عن بناتها ..
جاوبتها هيام دتسبح وريلام كالت تبقي يمها داني بين ما اتعشى وبعدين هي تتعشه ويه هيام .

كعدنا ناكل واني اكلت لكمتين واريد اكوم
كام قبلي مهيب .. سألته بيبيته اشو ما اكلت يمه ؟

جاوبها مااشتهي تعبان اريد اروح انام ..

هو كام واني هم كمت اخذت المواعين الي جانت كدامه وكدامي وديتهن للمطبخ ..

رحت للمغسلة شفت مهيب ديغسل ..

كتله هاي طلعت صدك جانت ريلام على الدرج

ضحك وهو مخلي الصابونة بين ادي ويفرك بيها ..
هه مو كتلج ...

_ اي بس شون كدرت تميز صوت ريلام عن هيام
اني اربعة وعشرين ساعة وياهن ماكدر ..

استمر يضحك ...

هسه ماراح تكولي شلون ميزت صوت ريلام ؟

اكدر اميز ولا تسأليني ليش لان ما راح اكلج ..

خوش انوب استعين بيك

هه بشنو بالله ؟

بتمييزهن عن بعض لان هاي الحقيرة هيام مرات تغشني تخلي كحل على حنجهه عود الشامة مالة ريلام .

ههه اني بالخدمة ام جاسم

اوووو هم انت عليه

والله لعد شكولج مترهم اصيحج باسمج زحمة مرة عمي ولا اكولج عمة اني اكبر منج وام داني واكفة ترة احسن شي اكلج ام جاسم .

اووو بطلت لا تكلي شي ...

اخذ المنشفة وهو يضحك واني رحت للمغسلة غسلت اديه واني دا اغسل اجه الشيخ .

وهنا عدهم نظام اذا اجه هو يريد يغسل لو منو واكف ع المغسلة يوخر حتى لو الحجية  الي هي امه ..

وطبعا فرح مخالفة كل الانظمة غسلت بسرعة يله وخرت .

صعدت اخذت داني ورحت لغرفتي انتظر حمدان ما اجه اطلبه تفسير ..

كعدت العب داني خابرت موج اختي وحجيت ويه انو واحمد وبابا وحتى خالتي ، يومية اخابرهم ميفوت يوم اذا منحجي ونفتح كاميرا ويشوفون داني .

صارت ساعة ب ١١ وداني نام خليته بسريره ..
ونزلت غسلت اله مماته ورجعت صعدت ..

تمددت على السرير ، بقيت لازمة كتاب واقرا بي ..

وانفتحت الباب ودخل حمدان ، باوعتله ودرت وجهي .

اجه تمدد يمي و باسني على راسي ، نفضت روحي منه ووخرته عني ..

هو تقرب مرة ثانية كال اسف عمري اسف والله ما ادري شجاني وضربت وعد ماتتكرر  .

التفتت عليه هو كعد على السرير واني مقابيله
اباوعله بنظرات مؤنبة

بنظرة عتاب ونبرة زعل حاجيته
_انت تدري شكد احبك اني ، ورغم جان زواجنا مستحيل لان ع الاساس بنت عمك الك وحبينا بعضنا بالكلية وتعلقت بيك وكومة مشاكل صارت يله تزوجنا.

ليش تصدمني بيك بعد الزواج ليش حمدان متوقعت تمد ايدك عليه وتضربني متوقعت ابد .

_ الله يخليج فرح روحي بخشمي صيريلي عون لاتصيرين فرعون خوش ؟ وتحمليني هالفترة تعبان
وهسه تعالي ننام والله مشتاقلج .

_ لا يابه ههه مااريدك والله كارهتك اليوم كره مو طبيعي اصلا راح اخذ ابني وانام بغرفة البنات .

هو هم حتى ماكلف نفسه وتوسل بيه وكال ظلي ابقي صخام ما اهتم ابد ..

اخذت داني ورحت نمت يم ريلام .. ومهتميت لشماتة هيام بيه ابد معليه بيها رغم اعرف حتنزل باجر وتكول كل شي كدام خالة وامها .

نامن البنات واني ظليت اتقلب بالفراش ..
مااجاني نوم ماانكر مشتاقتله بس كلش ضوجني لمن ضربني .

ظليت افكر هو مو طبيعي ابد ومستحيل يسويها ويضربني يحبني بس اني هم ماسويت شي
جنت دااحجي ويا عمود صديقه هو ردة فعله جانت كلش قوية ..

كمت من مكاني وطلعت من الغرفة ، دااريد اروح للحمام ، اخذتني رجليني لغرفتي ، دااشوف حمدان
شديسوي ..

فتحت باب الغرفة على كيف مشفته بيها والغرفة على حالها من لمن تركتها قبل كم ساعة وحتى الضوة ممطفي ، فكرت خاف بالحمام!!

رحت للحمام هم مشفته ماكو ، يربي وين راح ؟
طلعت من الغرفة توجهت للبالكون ، فتحتها وطليت على الگراج كل السيارات موجودة الا سيارته هو !!

هذا وين راح بهالليل ؟ يربي حيخبلني ..

تذكرت لمن جنت حامل واضوج منه ومن ريحة الغرفة اروح انام يم البنات هم هيجي اكعد بالليل ما اشوفه بالغرفة

ولمن اسأله يكول ها جنت يم علي الدر بغرفة المكتب دز عليه عمود شغل ورحت يمه وظليت للصبح .

ما انكر انو الغموض يحيط بحمدان من كل جانب
وهالشي يخليني ممرتاحة ابد ، وما ادري شضامتلي الايام مادري!!

اخذتني رجليه ونزلت جوة محتارة ماادري اروح لغرفة المكتب مالة علي الدر!! خاف فشلة بهالليل!

بس هو اعتقد هسه نايم فوك بغرفته ، الساعة عبرت الوحدة .

مشيت باتجاه المكتب ، فتحت الباب على كيفي
ومديت راسي وطليت جوه ..

واشوف الشيخ كاعد وره مكتبه لابس نظاراته الطبية  وكدامه كتاب ضخم مفتوح وديقرا بي ..

عزااا شكد استحيت ، هو حس بيه رفع راسه وباوعلي مستغرب ..

تصنعت الابتسامة بتوتر وظليت اباوعله ..

نزع النظارة ورفع تك حاجبه كال تردين شي ؟

هزيت راسي بلاء .. وسديت الباب بسرعة ..

بس لا عباله جايتله نص الليل عمود هو الصبح كالي تعالي !!

عزااا شكد عيب وفشلة .. هسه يكول عليه جنيه مخبلة افتر بنص الليالي وافتح بالبيبان .. شون مواقف يا الله .

هسه اني شكد مطية لو كايلتله على حمدان وسائلته عنه بس توترت حيل كلش لمن شفته كاعد يقرا عبالي صعد فوك ونام ...

واني داامشي بسرررعة بس اريد اوصل للدرج ..
لحتى انهزم خاف الشيخ يجي وراي ويحقق وياي .

حسيت انسحبت بقووة من وره وايد كممت حلكي
وظل يسحب بيه قووووي ودفعني بالمخزن ..

وكعت على الكاع ، توجعت حييل...وابجي
... دااكوم متألمة
انسحبت مرة لخ وانصفيت على الحايط
ايده على حلگي ما اگدر اصرخ .

ظل يباوع بوجهي عيونه حمرة تخوف ..

وبفحيح شيطاني مرعب اخترق اسماعي
_ ولللج اني تندكين بيه ؟ لج بسيطة اذا مااخليج تبجين دم مااطلع ابن خشن...

لالا ليش اخليج تبجين دم اخليهم هم يبجون عليج دم اذا ماخلي الناس تترحم على روحج ماطالع من ظهر ابوية اني ، الا اخليهم  يكولون اسمج وياهه الله يرحمها جانت خوش گ**** اطلع گ..و...د .

يتبع ...

ريلام : معناهه صغير  الغزال 😍

خاطرة المقدمة  بقلمي ❤

النشر بين يوم ويوم ..

احبكم 😍

متابعة للحسابات .. اكون ممنونة منكم ..

__9zdi

amonsha_98

Naya-Iraq

HafsaHafsa710

Sedra_ALMuntaha

zan_eb15