رواية هذيانٌ بين جمرٍ وجليد ..(ارملة اخي المجنونة) الفصل الرابع 4 - بقلم نورا ناصر

السلام عليكم ..
هذيانٌ بين جمرٍ وجليد
الفصل الثاني
نورا ناصر

☆☆☆

! ارحميني يا لهفة الروح ، يا من اتخذتني اخاً ، واتخذتكِ القلب ونبضه ، ارحميني فوالله حبك قد ملئني فطفح وفاض ، دعي سيفك السفاك لدمائي وضمدي جراح فؤادي الملكوم بالهوى فهو على يديكِ يبرأ .
.بقلمي.

☆☆☆

خنكني حييل جان مخلي ايد على حلكي وايد خانكني بيها .. حسيت من كد الخوف والهلع راح افقد واخرب.

_ ولج اني انضرب راشدي بسببج ومن منو ؟ من علي وعلمودج يضربني علمودج للللج اله اله اطيح حظكم كلكم بسيطة

واولهم علي .

وهو ديحجي مديت ايدي وخرمشته ، وخر ايده الي خرمشتها عن حلكي ورفع ايده اللخ ديضربني راشدي
نزلت على الكاع بسرعة اجه الراشدي بالحايط

عيطت بحنجرة مجروحة بس طلع صوتي عالي من كد الخوف .
: علييييييييييي ... شششي خ

هو بسرعة كمز وطلع من المخزن ، سحلت روحي سحل ووطلعت يم باب المخزن وبقيت كاعدة واني اكح ، ابجي واعيط .

عيوني غوشت اطرافي بدت تنمل حسيت للحظة راح تجيني نوبة الاغماء بس الحمدلله تماسكت .

بقيت على هالحال اريد اجر نفسي حتى احس خشمي طك دم .. وبكف ايدي ظليت امسد ركبتي .

بقيت كاعدة يم باب المخزن ثواني وسمعت صوت علي الدر ، رفعت راسي باوعتله بخوف ورعب وبعدني مااكدر حتى احجي .

اجه يمشي باتجاهي  مستغرب واني اباوعله وانصي لازمة بلعومي واكح ، واحاول اتنفس ، وهو ديمشي كال هاي انت صيحتي ؟
انت صحتي عليه شبيج ؟ شصار بيج؟

بعدني الهث عبالك راكض وراي جلب مسعور وهو فعلا حسان جلب مسعور ، اجه الشيخ وكرفص كدامي

انكمشت على نفسي كدام ضخامته .. رجعت ليورة وظليت احشك جسمي بالحايط ..

وحجيت بنبرة مبحوحة : ح حسسان جان خنكني خ خ خنكني وجا جان يهدد بيه .

كام على حيله بصرامة صوت مصرور ...
_ وينه حسان هاا وينه ..

وطب للمخزن ظل يدور . رجع دنك عليه واني لازمه بلعومي وكوة اجر الهوا احس روحي بكبرر وانكطع عني الاوكسجين .. خنكني الحقير جيت امووت على ايده .

رجع سألني والخشونة بصوته تبين شدة غضبه : وينه حسان جاي اكلج ؟ ... ماتحجين شبيج ها وينه ؟ وانت شعندج تفترين هنانه بهالليل شعندج ؟ ابنج وين زوجج وين ؟

رفعت راسي باوعتله واشوف نظراته المشتعلة بنار العصبية .. اباوعله مفزوعة من حدة نبرته وجمر نظراته .

همست بلهاث متواصل : م مادري توة جان هنا توة
انت اكيد ماتصدكني .

گلت اخر تلث كلمات بنتر من دون وعي مني ومو قصدي اقلل احترامي بس فعلا راح اموت من الخوف ..
بسبب حالتي وانهياري ..

هو زاد جنونه وعصبيته صيح عليه بقسوة : گومي صعدي لغرفتج وصيحيلي زوجج.

كمت على حيلي بدون ما اجاوبه . وسندت نفسي على الحايط وهو يمي كلش قريب وموترني .

نزل شرار وطلعت الحجية وام رحاب من غرفهم وهم خايفين ويستفسرون

الشيخ كال لشرار اطلع شوف حسان بالحديقة بالكراج لو وينه ..

طلع شرار والحجية استلمتني صياح ورزالة حتى على صوتها طلع مهيب يستفسر شكو .

واني من الخوف والهبطة عبالك لساني انكص وانشمر للبزون ..

_ ولج كاعدة بنص الليل تتعاركين ويه حسان مخبلة انتي مخبلة ؟ ماتكولين خامدين نايمين .والله راح تسودنينه وياج .

ام رحاب كالت صدك جذب منج ناييمين بامان الله هيج تخرعين بينا عبالي صار لبناتي شي والله

اجه شرار واسمعه يكول للشيخ
_ حسان ماله اي اثر وحتى سيارته ماموجودة .

خالتي تكول للشيخ جذابة وينه حسان ماكو
هاي بس تريد تعارك حتى لو ويا الهوا وتجذب علينه .تريد بس تخبلنه

جاوبها الشيخ: حجية حالتها ووضعها مو مال تجذب بس شوف شنو صاير .
وظل يباوعلي بنظرات كلها شكوك ..

وكمل كلامه
: روحوا ناموا هسه والصبح نشوف الكاميرات يله تصبحون على خير خلصت الحفلة .

صعدت فوك ابجي وطبيت بغرفة البنات واني الهث وكوة اجر انفاسي واكح .

شفت داني عند ريلام ويبجي حبيبي وهي تسكت بي
وهيام كاعدة ومنعسة وتلغي وتدردم عليه .

بس شافتني وهي نايمة كالت انتي وينج انتي؟ خليتي ابنج هنانه ورحتي ماتكولين يردون ينامون كعد يبجي وكعدنا ويا بصريخه؟

تجاهلتها رحت اخذت داني من ريلام وهيام شافتني حكرتها ...
زادت بجرعة السم مالتها : شعندج هنانه روحي نامي بغرفتج
مو عندج غرفة طول بعرض ..لازكة بينه شكو ههف .

جاوبتها ريلام : هيومة نزلي نامي يم ماما وبيبي وسكتي عنها .

كعدت على السرير وشمرت المخدة بالكاع
_ لااااا بالله وليش انام يمهم وهاي مو غرفتي لو اني متوهمة لو متيهة؟لو غارفة الخاتونة فرح واني غلطانة.

انوب انام يم  ماما و بيبي من تشخر صوتها يوصل لسابع جار راسي يصير هلكده وماانام للصبح.

اخذت دانيال ووكفت على حيلي حاجيت ريلام واحس حنجرتي مجروحة كوة احجي : ريلام امشي نامي يمي بالغرفة .

كامت مقابيلي وكفت تحجي وياي : ياا وين اروح وياج يمعودة ؟ خو ما انام بنصكم انتي وخالو حمدان ؟

_ خالج حمدان ماموجود ..

_ يا وين راح بهالليل ؟

_ طالع مدري وينه امشي احجيلج على سالفة

تقربت مني تحجي بهمس : اكولج صدك انت شبيج وشنو هالعياط جوه تعاركتوا رجع خالو ضربج مرة لخ وطلع من البيت ؟

همست بنبرة بكاء ضعيفة : بالغرفة احجيلج .

هيام جانت كل ملامحها مستنفرة و تريد بس
تسمع شنو نحجي .

دنريد نطلع من الغرفة صاحت بفزع
_ ريلام وين رايحة ريلام ؟

التفتت الها ريلام : عايفيلج الغرفة ورايحين شبعي بيها .

انتفضت وهتفت :  لا حبابة اخاف وحدي والله ..

نترت بيها ريلام :  انزلي نامي جوة يمهم .

_ ما .. ما .. فرح حقيرة نذلة اخذتي اختي توأمي
مني الله يلعن الساعة السودة الي جيتي بيها لهذا لبيت .

التفتت عليها بفتور وبنبرة مرهقة رديت عليها
: الله يلعنها مية الف مرة .

رحنه لغرفتي وسولفتلها حطت ايدها على حلكها مصدومة عزااا شبي خالو حسان تخبل ؟

_ ولج ريلام متت خوف متتت بلحظة حسيت نفسي راح اموت بين اديه خنكني حيل من حلات الي بروحي صرخت على علي بعلو صوتي .

_ اني سمعت صوت صريخ بس دانيال خطية بيدي وهيام الحقيرة كتلها انزلي شوفي شكو مقبلت .

هه خوش كعدتي خالو من النوم لمن صحتي عليه

_ هه لا هو اصلا جان كاعد لعد اني ليش صحت عليه لان ادري هو بمكتبه كاعد وبسرعة بس يسمع الصوت يجي .

_لعد شمدريج هو بمكتبه ؟

_ اخخخ ريلام هاي الليلة من اسوء الليالي بحياتي غير اقتحمت عليه خلوته بهالليل شمدريني عبالي حمدان بالمكتب طلع خالج الشيخ كاعد وديقرا واني سويت عليه هجوم مباغت.

_ ههه شصاير بيج فرح ، صايرة ملحمة ، اكولج صدك خاف خالو حسان شارب شي منا منا وهيج سوا وياج ؟

_ ولج مبين حاقد حيل مو بس عليه حتى على خالج علي والله ولج يهددني يموتني وغلط عليه غلط ماصاير ! لهسه الرجفة بيه .

مديت ايدي بالهوا بعدهه ترجف ميتة من الخوف بعدني ومتندمة مارديت الحجية من تهمتني جذب وصيحت عليه ولا دافعت عن نفسي واني اموت من هاي السالفة.

نام داني وريلام نامت بصفي ع الجرباية يمر الوقت  ونيراني بسعير متزايد ، مثل الي يتقلب على صفيح ملتهب من الجحيم ، تهديدات حسان باذني اسمعها كل شوي واختفاء حمدان المفاجئ بالليل يضرب براسي الف سؤال وسؤال .

للصبح اتكلب ومونايمة احس ممرتاحة ، مثل الي على صدره صخرة من جهنم ، تكتم نفسي وتخنكني وتجويني بنفس الوقت .

نمت يمكن بالخمسة بعد مااعيوني صارن يحركني . وكعدت الصبح الساعة بثمانية على صوت دانيال
، اخذته غيرتله حفاضه وانطيته ممه يريد يلعب واني ميتة من النعاس .

كعدت ريلام على صوته منعسة وتفرج بعيونهه
باوعتلي تتمطط وبنبرة كسولة
_ صباحووو .

جاوبتها بملامح مبتئسة : صباح النور .

نزلت من السرير تعدل بشعرهه : اروح انام بغرفتي خو متخافين بعد صار الصبح .

هزيت الها راسي بنفي واني صافنة ، طلعت وسدت الباب
وراها ..

واني ميتة نعس بس دانيال يريد يلعب واني روحي بخشمي ، للعشرة يله رجع نام وبعد مترهم اني ارجع انام لازم اكوم لاتكوم عليه القيامة جوه .

نزلت جوة الوجوه كلها مغيمة عليه الحجية وام رحاب وهيام اصبح عليهم ميردون اصلا .

صاحتني الحجية كالت بنبرة متعجرفة
تعاي لغرفتي اريدج ..

هزيت راسي رحت وراها هي تمشي مثل المحدبة وبيها عوجيتها بس احسها اقوى مني ، تبعتني ام رحاب لغرفة عمتي .. اول ماكعدت كرصتني عمتي كرصة برجلي وايدهه كلش قوية وهي بحقد كرصتني
على ألمها عطت ..

كالت وسم السمج ..

كمت على حيلي وكفت متألمة : خالة شجاج شبيج وياي ها شسويت اذا ع البارحة ترة اني

صاحت وهي تصفك بيدها وتغمني :  هو بس ع البارحة بس ع الصخام مالتج
كعدي كعدي البرنسيسة كعدي عندي حجي وياج يله .

ام رحاب كالت كعدي عدنه حجي وياج ..

كتلهم اي افتهمت بس شكو ؟ اذا مو على موضوع حسان .

الحجية : بعيد عن الفلم الي سويتي البارحة ، اكلج هاي شيسموهه بلله ؟ عازلة روحج عن رجلج
لعد ليش هو فشلنه ويه بيت عمه وكال اله اريد هاي وتأشر عليه .

_ خالة شوكت عزلت نفسي عنه هو بس البارحة كم ساعة ورجعت لغرفتي وهو اصلا ماموجود جان
و شي ثاني شغلة بيني وبينه نتصالح وارجع يمه ،
مالها داعي تتدخلون انتوا .

ام رحاب : شنو نتدخل حمدان نفسيته تعبانة كلش بسببج لا اكل لا شرب مثل الاوادم والسبب انتي مو اربعة وعشرين ساعة تصيحين احبه وتحجيلنه بقصة حبكم ؟ لعد شبيج هسه وياه .

_ ام رحاب هو ماضايج مني تره اكو شي ثاني مضوجه
وبعدين هو بس البارحة ترة تعاركنه ياجماعة على كيفكم ترة عصفورتكم وصلتلكم حجي مليان ملح وبهارات ديروا بالكم لايرتفع الضغط عندكم .

ام الشيخ ماعجبها كلامي فرت ايدها وغمتني
ظليت انفخ ودرت وجهي شحجي وياهه هسه مرة اكبر مني ياريت هي هم تصير امه هي اصلا مرة ابو وهيام ماتبطل من سوالفها راحت زودت كلام لان تركناهه البارحة وحدهه .

الحجية : هو بنفسه اجاني وشكالي منج ماتردينه نطلكج ونردج لاهلج وابنه ناخذه وروحه بلا ردة نرتاح منج .

_ لا شنو هالحجي ابني محد يحرمني منه خالة ميصير هيج تكولين ، تقنعيني انتي ابد ماصارت مشاكل بينج وبين عمو الله يرحمه ابد ؟

ليش تتدخلين بمشاكلنه ثاني شي شوكت اجاج حمدان وشكالج مني هو بس البارحة تعاركنه وراسا طلع ولهسه مااجه وبعدين هو مو ابنج شدعوة هيج عليه ؟

_ هم كالت لا تدخلين ولج انه امه وغصبا عليج اتدخل ولج امه ماتت وعمره تلث اشهر واني جان على ايدي شرار عمره ست اشهر ورضعوا سوا هو ابني بالرضاعة.

يالعايقة وبعدين شجابج عليه انتي وتقارنيني بيج
بس كليلي شجابج خايبة ماتلحكين نعالي يالمهتلفة .

وكفت على حيلي وصيحت بعلو صوتي
: ما اسمح الكم تتجاوزن عليه هيج اني ممسوية شي يأذيكم وحياتي وي زوجي لا احد يتدخل بيها اذا عدنا مشاكل احنه نحلها.

دنكت ام علي الدر ولاحت نعالها جوة السرير وشمرته عليه وظلت تحجي عليه وتسب بيه ..

_ طايحة الحظ ماعرفوا يربوج اهلج العوبة العايقة اذا انت ربيتي عند وحدة مخبلة وابوج لايحل ولايربط خابصة نفسج اله اخلي يحط على راسج مرة ولج انت بس حسيييين " حسان" دواج .

_ تخوفيني بحسان ، المامتربي مو ؟ ترة اني مو اسيرة عدكم ولا تايهة الكم تعاملوني هيج يعني هسه اني وبعد كلامج هذا متاكدة انت دازه حسان عليه .

زادت بالصياح مالتها :  ولج انت منين جابج علينه حمدان بس كليلي منين من يازبالة لفاج النه .

فتحت الباب وهي بعدها تغلط عليه من مكانها ع االجرباية .

كتلها سمعي اني مو عايقة ولا مهتلفة اني طالعة من احسن عائلة ومتربية خوش لو لا وما اسمح الج تحجين على بابا ولا على خالة .

طلعت للصالة تبعتني تغلط وام رحاب تهدي بيها وتأمرني اروح لغرفتي  .
وهي تكول : اي اي ربتج المخبلة مو وصرتي نفسها مخبلة وظلت تصيح علي شيييخ علي ودوهه خلي يكوونهه بالشماعية هاي مخبلة مو صااااحية 

طلع الشيخ بقيت واني بنص الصالة اباوعله ثواني وجهي محتقن وهو يخوزر ويريد يفتهم شكو ..

و شرار بصفه
كال شبيهه امي تصيح ؟ وبقى صافن

وهي بعدهه تغلط عليه وتفشر .

الشيخ باوعلي بنظرة باردة متوعدة
كال فرح صعدي لغرفتتتتج حالا وبعد لاتطلعين منها .

جاوبته ليش اصعد لغرفتي حتى تسمع منها اتهامات بحقي شي ممسويته وانت كلش.

عاد نفس الجملة الي كالها بس بنبرة استبدادية ونبرات متجمرة من الغضب

صعدت فوك لغرفتي واني الممنونة ..

من صعدت ظليت افكر شلون جانن يحجن ويايه ام الشيخ وام رحاب عبالك حاقدات عليه فد نوب ، مدري شمسويتلهن ، مستحيل حمدان يروح يمهن يشكي هاي سوالف هيام الخبيثة والا هن شمدريهن البارحة مانمت يمه .

لان الحجية ماتصعد فوك غرفتها جوه هي وام رحاب
ام رحاب اذا رادت شي تصيح من الدرج هم نادرا ماتصعد تكول ماريد اأذي رجلي  .

عضيت اصبعي اخخخخ هيام الكلبة الحقيرة السافلة كله منها مدري شبيهه وياي بس تروح تفتن ، اتذكر اول ماتزوجت ما اعرف طبعها وماافرق بينها وبين اختها
گلت گدامها هاي مدري شبيهه بيبيتج بس تخوزر بيه عبالك بايگه عشاهه .

هي راحت كالت كدامها ومزيدة بهارات وملح
ولزمتني الحجية طيحت حظي رزالة غسل ولبس .

اني رحت  لهيام دا اتناقش وياهه وهيه تعاند لزمتها صفكتها راشدي ... ماكدرت اسيطر على اعصابي .

الكل الي بالبيت ثاروا عليه ومقبلوا وبيومها صاح عليه الشيخ بالمكتب مالته رحت اني وحمدان وحجه وياي صح بأدب بس قسم بالله جانت رزالة مبطنة حتى ظليت ابلعم وجنت جديدة توي معرسة ومااعرف طبعهم .

گالي وهو گاعد وره مكتبه : البنات هذني انه ما اقبل عليهن ابد ، يتيمات وربن هنانه عدنه ، امهن اختي وابوهن جان ابن عمي و صديقي وكبل لايموت وصى عليهن مو من حقچ تمدين ايدج على وحدة منهن وتضربيها .

اي بس هي راحت حجت كلام خطأ اني ما كلته ..

وهذا مينطيج حق تضربيها احنه نتصرف ..

بس العفو  هي ممرباية ... كلت هيج بتلكأ وعيوني تدور داير مداير الغرفة

بعدني ممكملة كلامي هو عصب وانتفض صارت عيونه
تبث شر واستنكار بين على كل ملامحه ..

وبنبرة تعكس غضب مكتوم مسيطر عليه كوة
_ مو انت الي تربينهن اكو من يربيهن فاحترمي نفسج احسن ولا تتجاوزين حدودج .

صدمني كلامه حسيت بدمي يتحول الى سائل مغلي
وعيونه تراقبني واني احاول ابقى هادئة بس هيهات
ماتحملت غطرسته بالكلام لحظات بيها
انفقت كل مدخرات الصبر ..

وبتحدي جاوبته : اني محترمة نفسي بس مااتحمل هيج بشر يبوك لساني ويحجي يم غيري ويزيد بالكلام . وهيج حتتعود وتزيد المشاكل انت لازم تخليلها حد .

حمدان جان بصفي ، لزمني من عكسي حيل وسد حلكي والشيخ مصدوم مني ، ظل حمدان يتعذر
وطار بيه فووك لغرفتنا .

ومن يومها هيام تكرهني وتعتبرني دم سنونها واني هم ما احبها . وبقت ام رحاب شهر ماتحجي وياي والحجية اصبح على رزالتها وامسي وبعد فترة صار الي صار ويه حسان وقلب حياتي جحيم ولحد هاي اللحظة .

~~~~~~~~~~~~~~~~~~~~~~~~~~~~~~~~~

رجعت من ذكرياتي للواقع ، بقيت كاعدة بغرفتي للظهر مايمر يوم بدون ضيقة الخلك يربي .. خابرت اختي موج ماردت عليه .
ركعت الفون على السرير . من الصبح على لحم بطني وميتة جوع ، طلعت بسكت واكلت ..

للساعة بالثنتين اندكت الباب ودخلت ريلام ..
باوعتلها بتساؤل وهي تباوعلي بوجوم
_ فرح خالو علي الدر يريدج جوة بالمكتب مالته .

كمت على حيلي وبس ساكتة ..

كالت انطيني دانيال وروحي . انطيته الها ، اخذت شالي لفيته على راسي ودخلت شعري بملابسي ونزلت .

فتحت باب المكتب انتبهت حمدان كاعد بصف الباب على الكرسي ، دنكت عليه وصيحت : انت وينك من البارحة واني المصايب كلها على راسي ؟ لو تعلمت عليك متخاذل ومتدافع عني ها ؟

تقلصت ملامح وجهه بغضب مكتوم وخله اصبع السبابة على شفايفه يأمرني بالسكوت ، اجاني صوت الشيخ
_ فررررح مشاكلكم انتي ويا بالغرفة حلوهه خلينه بسالفة الي صار البارحة .

اعتدلت بوكفتي باوعتله بذهول واعصابي متوترة ومصدومة من وجوده نسيت موضوعه لمن شفت حمدان فقدت كولش وحتى نسيت هالمكتب اله.

وكفت مقابيله : موضوع البارحة لمن حسان حبسني بالمخزن تجاوز عليه وهددني وانت من كلامك ويه الحجية البارحة مصدكني وهسه بعد بقت يمك انت تعاقبه هاي اذا ردت تعاقبه.

ضاقت نظراته و عيونه صارت تحتويني بتكاسل
وبلهجة استبدادية استطرد : حسان يحلف يكول جان يم خواله البارحة وهسه جاي بالطريق ويكول مستعد يدك القران هو ماداخل للبيت من البارحة العصر والكاميرات هم اكدت كلامه.

بسخرية :  اي ماكو غير اني الجذابة الي اجيبلكم المصايب والبلاوي طلكوني من ابنكم وارتاحوا .

كام حمدان من مكانه واجاني : سكتي فرح واحجي باحترااام وبعدين ليش تتجاوزين على امي ها .

متجاوزت اني بس انتوا ماجاي تخلون حد لهيام مدلليها زيادة عن اللزوم تنقل حجي بكيفها وتزيد عليه ومحد واكع بيها غيري اني اليوم الغلط صار بفلس على ابويه وعلى خالتي.

لزمني حيل من ايدي وديطلعني بره وهو يحجي امشي اعتذري من امي يله .

وخرت ايدي منه وابتعدت عنه خطوات ..
وصيحت ما اعتذر ممسوية شي اني .

هي جانت كاعدة بالصالة والشيخ تبعنا

ظلت تنتر ماريدها لا تدنيهه يمي والله اذا اجت يمي لحط بيها راشدي انسيها اسمها والله .

مو تايهتلج اني مقطوعة من شجرة وت

بتر كلامي الشيخ بعصبية الي اجانه صوته من ورانا
مثل الصاعقة : حمدددان اخذ مرتك واصعد فوك يله كدامي ..

~~~~~~\~\~\~\~\~\~\~\~~~~~~

صعدنا فوك دفعني بالغرفة وظل يصيح
تخبلتي انت تخبلتي شجاااج ؟

لا والله شجاني ؟؟ حقك ماتدري انت وينك عني هااا
مية الف سالفة صارتلي من البارحة لليوم اخوك حسان الي من امك وابوك .

قاطعني :  انت شون تتجاوزين على امي هيج ولج كافي تعبت منج تعبببت فرح الله يخليج احط طلقة براسي واااخلص .

وراح كعد على السرير حط اديه على وجهه ويصفك بيهن .
رحت لزمت اديه وخرتهن ..
اسفة حمدان اسفة ..

دفعني عنه : انت شون متحملة نفسج ماتكوليلي شلووون ؟

حمدان اني كافية خيري شري والله بس حسان وامك وهيا

سكتي كافي سكتي ماريد اسمع منج اي كلمة

اعزلني عن اهلك خليلي بيت وحدي شكو بيها .
وخلصني من المشاكل شكوو بيها ؟

ابتسم باستهزاء : هه مخبل اني ائمنج على بيت مو كافي متحمل خبالج ولسانج الطويل ومررررضج انوب اخليلج بيت هه والله بطرانة .

مرضي ؟ مرررررضي حمدان مرررضي ؟ تعيرني بمرضي هسه ؟

تنكر انت جنت تتقربلي اثناء نوبة الاغماء لو ماتنكر ؟

ظل يفر بيده اي وشنو يعني هم تمنين عليه بيهن ذني اصلا ولا عبالك متقربلج وهمينه معدودات على كد اصابع الايد الوحدة .

غصة نار تكونت بحلكي ، وعجزتني عن الرد ، خلتني ابلع جمراتها واسكت ، صح هوايه تحملني تحمل مرضي ، نوبة الصرع والاغماءات
وهالشي الي يخليني احبه واموت بي اكول لو غيره واحد مستحيل يتحملني .

مرت تلث ليالي هو مايجي للبيت مادري وين يروح
واني الله منطيني برود ماكو مثله ، لا اسئله وين تروح ووين تجي ، ولا اخابره ، مشاعري متبلدة فد نوب عسى ما اسمع متزوج عليه هم يمكن ما اهتم .

ثالث يوم اجه سلم عليه وظل يلعب ابنه
كال اخذتي علاج ؟

هه طبعا اخذ اذا مااخذ وعلى هالمشاكل هاي اموت والله اني ادري محد يهتملي من اموت يمكن بس بابا واخواتي واخويه بس افكر بأبني ..

اجه يمي وبيده دانيال اخذني لحضنه
وباس راسي كال مشتاقلج .

ضعفت و بجيت !!

لاتبجين عمري ..

تعبت حمدان تعبت مااعرف شون اتصرف وياهم الكل يكرهني ومصدكين بجذب هيام .

هيام زعطوطة معليج منها .

زعطوطة اي بس دتأثر عليهم والله ..

ميخالف تهون ..

اعزلني عنهم حباب اريد ارتاح تعبت ..

كال بفتور : ان شاءالله وهسه يله ودي داني يم ريلي  وتعالي مشتاقلج .

~~~~~~~~~~~~~~~~~~~~~~

مرت يومين رجع الوضع طبيعي بالبيت .. حسان يحلف انو ماسوالي شي ودك القران يم الشيخ ، جنت متأكدة الشيخ مصدكني متأكدة مية بالمية .

واني احاول اتناسى تهديداته شسوي اريد اعيش واحاول اتأقلم . خاصة انو الشيخ طلب منه يقلل جياته للبيت وميجي اله لمن يتصل وبوجود الشيخ بالبيت .

حسان عنده بيت وحده ، هو قبل ليموت ابوهم طالب بحصته من الورث وفعلا اخذ حصته وسوا معاملة تأكد بانه استلم حصته وما اله شي بعد يمهم .

بس الي اعرفه ملف المعاملة بعده مو كامل متوقف على توقيع شرار جان بوقتها مسافر وظلت المعاملة معلكة وممكمليها ما اعرف ليش .

ظليت الح على حمدان اريد ارجع ادوام كلية هالسنة
ومن اجه كتله وظليت الح وهو رافض .

بنفاذ صبر وايده تفرك جوانب راسه : فرح لا تلحين كتلج ماكو دوام

شنو ماكو دوام هذا شرطي اكمل دراستي وبعدين نسيت بابا حتى انطاك قسط الكلية وكالك خليها تداوم وانت اخذت الفلوس وبابا خطية كوة جمعهن تداين وخله راتب على الراتب واخذ من موج ومن احمد بس حتى يقنعك وهسه متخليني .

الفلوس اني خليتهن بحسابي بالبنك يفيدوكم بعد جم يوم وابوج اني اسدده

بابا مايريدك تسدده يريدك تخليني اداوم ...

فرح نسيتي الي سويتي السنة الفاتت بالكلية لو لا ؟

اي بس اني

كافي فرح سدي الموضوع ودوام ماكو افتهمتي ...!!

ضجت حيييل وعفته وطلعت رحت لغرفة البنات شفت ريلام دتبدل تريد تروح لصديقتها . عفتها براحتها تبدل وطلعت..

داافكر اريد طريقة اقنع حمدان يخليني اداوم..

☆☆☆

مهيب ...

طبت للصالة بصدمة مصطنعة كالت هذا منو هنا ؟
مهيب شوكت جيت ؟

جاوبتها بملل وعيوني تتفحصها بكسل : من زمان .

خفت ضحكتها بين كفوفها دنكت راسي لان احس راح انفضح وينفضح عشقي الطافح من كل جوانبي .

كعدت يمي ع القنفة كالت الحمدلله على سلامتك يا احلى ملازم ببغداد .

رفعت راسي ادري بيها جاي تتلوك تريد شي
... اي اي كولي شعندج ؟

.. ها هه اريد اروح لصديقتي اخت صديقك مرتضى انته تعرفها ودوم توديني عليها .

مهيب بقلبي : هذا مرتضى مرة طلبها مني ورفضت كتله صغيرة وتريد تكمل واني ماريدها تروح عليهم لا يباوعلها مو بيدي اغار عليها .

كتلها خصم الحجي ريلام ماوديج طاكة روحي وتعبان والله .

عفية مهيب حباب حباب وديني اليوم عيد ميلادها واني اريد اروح الها ومشترية هدية ومحد موجود هنا يوديني .

جنت اريد استسلم كدام توسلاتها حتى اوديها ما اتحمل ااذي كلبها الصغير .

بس هي كالت كلام احس اقتحم كلبي برمح ..
كالت بتوسل هسه ماتوديني؟؟ مو اني احبك وانت اخويه الوحيد .

اخويه اخويه اخوووووويه هالكلمة اكرهها من لسانها اكرهاااا تخليني تنطيني شعور تجاههه كره بلذة عشق وهذا اقوى شعور ممكن يحس بي الانسان .

خزرتها رفعت ايدي اريد اضربها بس لزمت نفسي واكتفيت بالصياح عليها سكتيييي ريلام لا تلحين هيج تصيرين مكروووهة كلش .

هي خافت ونشغت وارتجفت شفايفها
_ شبيك مهيب ليش تريد تضربني شسويتلك اني ؟

وبسرعة كامت من يمي وراحت كعدت يم حبوبتي اخذتها لحضنها ..

غمضت عيوني واستغفرت ربي ، وحبوبتي ظلت تحجي عليه
شجاك مهيب شدعوة هالعصبية على كيفك ويه بنت عمتك مو هيج يتيمة ماعدهه غيركم منو الها بالله .

لا حبوبة مو هيج بس ماريدها تتعلم تلح مو حلو هالاسلوب تصير مكروهه

ظلت تبجي وتحجي : اني اكرهك اكرهك من تعصب عبالك مو انت مهيب لا واحد ثاني ومبدليك عبالك لهيب اجه من روسيا واخذ مكانك .

وبعد ماريد منك شي ولا اطلب منك شي ابد ولا حتى راح اعتبرك اخوية ..انت غريب عني وما اعرفك .

كلت بكسل اي أهون والله ..

هي كالت ببلاهة شنو ؟

بكلبي كلت ياريت ماتعتبريني اخوج وتريحيني
تنهدت بتعب فركت كصتي بسبابتي والوسطى
حجيت باكراه .. ماكو شي ، كومي ريلام خليني اوصلج بس ها بشرط تسوين الي اكولج عليه .

ما ما ... كولشي ماريد منك ...

لاتصيرين مكروههة فد نوب تره اكرهج كومي خلي اوصلج وفكيني ..

ماريد منك شي ، اخلي خالو شرار هسه يوصلني ولا منيتك .

طب عمي شرار يحجي بملل وكسل هاي منو يريدني اوصله لمدري وين ؟ هو اني روحي ضايج منها واريد واحد يوصلها .

شافها بحضن حبوبتي كاللها وخري شكبرج وشكدج نايمة بحضن بيبيتج حاجزة مكاني عبالك جاهلة  وخري يله خليني انام بحضن امي تعبان ورراسي يوجعني .

كامت هي تضحك ولا عبالك قبل شوي جانت تبجي
مبتسمة و تمسح بدموعها وتحجي ويه عمي .

_ خالو انت عمرك طك بالثلاثين وبعدك تخلي راسك بحضن بيبي واني توي يله عمري ١٧ وتحجي عليه .

ضحكت بسخرية : غير هو اخر العنگود بعد مشبعان من هذا الشعور .

... انت اسكت ولا ترد على كلامي مزاعلتك .

فتحت عيوني بغضب وتوجهت صوبها
بعصبية قربت منها : اسكت شنو ولج لا تتجاوزين لا اكسر راسج هسه .

هي خافت مني على نفس كعدتها ميلت روحها و ختلت يم عمي شرار وخلت وجهه على كتفه وايدها على صدره ولزمت بتتشيرته حيل مثل طفلة صغيرة خايفة من غريب.

عمي شرار وهو نايم بحضن حبوبتي كال
_ هاي شنو ؟ البلازم اليوم فول عبصية .

حجيت بعصبية : لعد ماتشوفها صارلها ساعة تتجاوز وساكت عنها .

هي رفعت راسها بصدمة : شوكت ؟ يمته تجاوزت ليش تجذب ؟

خزرتها و بصوت مصرور حاجيتها : ريلااااام اعرفي شون تحجين ويايه عدل انت مو جاهلة .

دنكت من الخوف بسبب نظراتي الها ..

شرار لزمها من شعرها الي مسوته ذيل حصان
... ريلووو عيب تتجاوزين وعيب تكولين اسكت هذا اخوج الجبير

باوعتله بعتب وكرهته بهاللحظة
حجيت بقلبي شكد اكره نذالتك من تعزف ع الوتر الحساس 

كمل كلامه ولج ريلام اعتذري من مهيب هسه لا اطيح حظج ..

فتحت حلكها تريد تحجي وجهت كلامي لعمي شرار
بعصبية ...ما اريد تعتذر شرار لا تدخل
.
.... لا يا مطي ياطايح الحظ ولج يولي ريلام لا تعتذرين منه اطيح حظج اذا اعتذرتي .

كام وعدل كعدته...لو مو صوجك صوجي اني المطي الاريدها تعتذر منك ، هو انت مدري شلون صرت بلازم والزعاطيط ساحلينك.

ويباوع لريلام ويقصدها بالحجي ...

حبوبتي كالت لا شرار خلي تعتذر من اخوها عيب لا تعلمها على هيج انته .

ضربها على ظهرها من خوفها ورقتها مالت ليكدام
وهو كال اعلمها ؟ اشو صارت بكد المطي هي تتعلم من وحدها .

كالت خل اكوم راح اشبع كتل من خالو .. ي هسه مهيب بدل لايوديني لرهف يوديني لمستشفى لكسور .

وكفت يمي طول بطول وباوعت لعيوني ابتسمت
لا تزعل مني ...

جنت اتمنى تفهم نظراتي .. معقولة ماتحس بيه احبها ؟

لا والله تحس وتدري بيه احبها وامووووت عليها بس مثل اختي هيج مفكرة هي وكل الي بهذا البيت يدرون بيه احبها والله يدرون بس عبالهم اخت اليه اخت مو حبيبة .

ابتسمت ابتسامة سخرية جانبية وقبل لا اطلع
كتلها دقايق والكاج جاهزة حتى اوديج .

وطلعت من الصالة فتت بالممر دااصعد الدرج ..

هي اجت وراي تطكطك باصابعها  وبنبرة زعل
_ لا تسلم ماروح ماريد اتعبك .

ريلام كتلج لبسي خل اوديج لاتعاندين تدرين بيه اكرهج من تعاندين

مكروهه واكرهج واكرهج ومكروهه صرت اشك بيك تكرهني والله على كد متكولي هالكلمة .

درت وجهي وغمضت عيوني وزفرت
اي والله اكرهج........
اكرهج من تكولين اخويه انته اكرهج من ماتحسين بحبي اكرهج من ماتفهمين عشگي من توهان نظراتي بيج
اكرهج من من ماترحميني من اغار عليج
اكرهج اكرهج اكرهج حد العشگ.

طفلة وشسويتي بيه ولج نظراتج تردلي روحي
اي والله تردلي روحي لان ميت بعشكج اني.

......

فرح ..

بعد تفكير توصلت لحل ماكو غير اروح للشيخ احجيله واخلي يقنع حمدان يخليني اداوم هالسنة .
نومت دانيال وخلصت شغلي ..

توجهت لغرفة مكتب الشيخ "علي الدر "
بدون ما ادك الباب واعلن استأذاني ، مديت ايدي
لوكرة الباب وفتحتها معلنة عن اقتحامي للغرفة
بدون سابق انذار .

طالعتني زوج من الاعين وظلت تباوعلي بترقب !!!

...عزااا هاي "ختام" هنا شكد عيببببب انوب اني لاطخيت الباب لا استأذنت شكد فشلة!!!

باللحظة الي فتحت الباب جانوا كاعدين على الكراسي الي تكون بجوانب المكتب ، جانت ختام تباوعله ومبتسمة ، نظراتها باتجاهه مبينه حب واعجاب ، بينما جانت نظراته مخفية عني لان منطيني ظهره من اول مافتحت الباب ..

ولمن حس بيه دار وجهه عليه يباوعلي غير متفاجأ من تصرفي بالاقتحام متعود عليه دائما افوت عليه لغرفة المكتب بدون ما ادُك الباب يعني اتصرف بعفوية ومرات احصل رزالة منه ومرات لا حسب مزاجيته للشيخ .

بقيت واكفة بمكاني وابتسمت بخجل واني اباوع عليهم ؛ ءءء اسفة .

كامت ختام على حيلها وبين قوامها لابسة
كوستم اسود متكون من سترة سودة قاتمة لماعة بشي خفيف وبدي بنفسجي طوخ كلش جواها وبنطرون عريض وكعب بنفسجي طوخ بلون البدي وشال مشجر اسود وبنفسجي ، هندامها كله يعرض اناقتها ورقي ذوقها وقوة شخصيتها .

كالت بعدم رضى وبابتسامة متلاشية ونظرات نفاذة شلونج فرح ؟

بابتسامة وبنبرة ترحيب وحماس ؛ تمام الحمدلله وانت شلونج ؟

مجاوبتني وتجاهلتني والتفتت للشيخ
بابتسامة ؛ اني اروح اكيد اخرتك عن شغلك ابن عمي ؟
ووجهت نظراتها الي ..

حجيت بقلبي منين اجاج ابن عمج ؟ هو ابن عم امج مدري ابوج "اووو" شلي بهالدوخة شعليه بيهم ابن عمها وله مو ابن عمها .

مدت ايدها انطت الاوراق للشيخ وهو بدوره خلاهم على سطح المكتب بهدوء ..

" هاي القضية راح تبقى يمك وانتظر رأيك بيها كُلش يهمني "

هز راسه ؛ يصير خير ان شاءالله .

طلعت من باب المكتب الي يودي للحديقة وهو طلع وراها ولا اعتبرني موجودة ولا سألني شتردين..

ما اهتميت ، متعودة على جموده بالتعامل وياي ..
من ناحية جليد وناحية ثانية جمر ونار وجحيم ..

مشيت لنص غرفة المكتب ، وكفت على اطراف اصابعي ، وباوعت عليهم شفته ديمشي بصفها ورايحين باتجاه الباب الرئيسي للقصر
يمشون ويسولفون .

رجعت لمكاني اتنهدت بعصبية وايدي على خصري
وادردم وانفخ بلله هسه هذا شوكت يجي ؟ قابل عندي اليوم بطوله انتظره علما هو يوصل الخاتونة .

ميتزوجها ويفضون الموضوع كل يومية جايه هنانه مدري شعدها " اوووو" شعليه بيهم تزوجوا ماتزوجوا شعليه ليش احشر خشمي ..

بس والله اني اكرهها واكره اخواتها لان المفعوصة اختها رنا جانت محجوزة  لحمدان حميدان الخبيث اخخخ وعضيت اصبعي . وهواي جانت تسمعني كلام مرة همست بأذني : الله لايوفقج كلها جانت تعرف اني اله وهو اخذج وهسه بعد محد يريدني .

بس اني شنو ذنبي والله ما جنت اعرف وحمدان ماكالي .

ظليت انفخ بعصبية واباوع للكتب الي داير مداير الغرفة تحملها مكتبة عملاقة بيها هواي كتب بمختلف المجالات وبالاخص بالقانون لان الشيخ ماجستير قانون .

وهاي ختام همينه دتحضر للماجستير وبنفس الوقت عدهم شركة محاماة .

دقايق اجه ودخل من الباب الي يطلع على الكراج .
ظل يمشي باتجاه مكتبه ومتجاهلني تماماً ، مبين ضايج مني باوعلي بنظرة وضحتلي كل شي .

فهمت منها انو هو مل مني ومن الكلام الي اكوله
وممستعد حتى يسمع الي .

راح وكعد وره المكتب وتوه هاي ختام مكابلها وكاعد واني عود مرة اخوه ، قابل شنو كلنا اولاد تسعة
لو هاي لان حتاخذ الماجستير؟ يحترمها وكاعد كبالها واني حتى مكالي كعدي

اني هم ان شاءالله اكمل دراستي وهم اقدم ع الماجستير قابل شناقصني قابل !! ذكية وعقلي يوزن بلد معليه من خالتي من تكولي مخبلة .

حاولت ابادر اني واحجي بلطف: اني اسفة

بعد ممكملة بتر كلامي ارتجى على الكرسي
ومدد ايده على المكتب وكال بنبرة جليدية وسريعة
_ اي شنو عندج ؟

ضجت منه حيل واني جايه عمود اطلب مساعدته
ترددت وهزيت راسي بمعنى ماكو شي ودااطلع .

صاح عليه تعاي فرح شعندج احجي ..

التفتت عليه وكلت غيرت رأيّ...

شنو هو لعب ؟ صاحية انتِ ؟ راضية على نفسج بس جاوبيني .

جاوبت بعناد : اي راضية على نفسي قابل شبيها نفسي وما ارضى عليها ؟ ممأذية احد اني . بالعكس هواي متحملة وصابرة

وكف على حيله وظل يمشي ببطئ باتجاهي .

راضية على نفسج لمن توكفين ويه حسان طول بطول وتكوليله تغلط اغلط تسب اسب ؟

اي هو تجا

قاطعني بحزم : اني شنو كتلج العام ؟

هزيت راسي بتساؤل : شنو ؟

_ كتلج من بعد هاي المشكلة تبتعدين عن حسان تشوفينه بمكان تطلعين منه يحجي وياج تصدينه كلت لو ما كلت .

ترى اني مجايتك حت

جاوبي كلت لو ماكلت ؟

نبرة صوته الصارمة تفزززني ، كرهت نظرات الثقة المنبثقة من عيونه والي تأكدلي انو واثق من عجزي عن الاستمرار بمقاومته .

مشيت باتجاه الباب لزمت المقبض مالته
وانداريت عليه بتحدي : اي كلت صحيح اعترف وهسه من رخصتك .

اريد اطلع .. كال بنفاذ صبر : كولي على شنو جنتي جايه تحاجيني ؟

ابتسمت بسخرية : لا شكرا جنت غلطانة متوهمة مجاية على شي .

فررررررح .... اذا طلعتي بدون متحجين على شنو جايه راح تخسرين مساندتي الج بهذا البيت .

بابتسامة هازئة : مساندتك!!!!

اي مثل ما جاي اگلچ...

يباوعلي بتركيز حسيت انو اني بالنسبة اله لغز مايكدر يفك رموزه
شكد كرهت غروره وعنجهيته وتسلطه
اتمنى يبتلي بمراة تخلي يركع الها على رجلينه ..

كمل كلامه واني اباوعله بنظرات تحدي ..
اي تخسرين مساندتي وللابد وراح ؟؟؟ !!!!

يتبع ..

وانتوا كملوا شنو راح 😂وتوقعوا .

هذا التعليق فاز بمسابقة الفيس وصاحبة التعليق هي تختار هديتها  .

الهدية ع الخاص انت اختاريها ☻تعاليلي .

شكرا ديم هي تسوكت التعليقات Dima_omran1998

تثبيت حقوق مهيب محجوز ل  smsma89 😂

وعلي الدر لديم 😂

وصاير دك ملاطم على الابطال بالفيس 🤭

❤احبكوووم 😘