رواية هذيانٌ بين جمرٍ وجليد ..(ارملة اخي المجنونة) الفصل الثالث عشر 13 - بقلم نورا ناصر

السلام عليكم
عظم الله اجوركم بذكرى استشهاد ابا الاحرار ذبيح كربلاء الامام الحسين (ع)
بهذه المناسبة توقف نشر القصة لمدة يومين
والان نستأنف النشر .

هذيان بين جمر وجليد
بارت ٩
نورا ناصر

انت واضحٌ أمامي ... حد الغموض
عاشقٌ حد الغرور ...
واثق  الخطوةِ ... حد الجبروت
اي رجلٌ أنتَ تحت اي مسمی أضع أسمك ؟؟؟
بقلم ( noora-1995  )

***

ابوي انصدم واحنه كلنا انصدمنا هاي العوجة راح تجي تصير من نسوانه لالا لا غير اهج من العراق كله وبعد مااوصل لهنا لو تنكلب الدنيا واذا ابوي قبل ياخذها منهم من باجر الم چويلاتي وارجع من حيثُ إجيت .

ابوي رفضها بالبداية بس ابو ام لسان كال
شيخ اني لو انطيك كنوز  الدنيا كلها ما اوفيلك والبنية ترة جمال واخلاق وهالوحدة عندي ماعندي غيرها بس هيه وهالوليد .

وانه افتخر انطيكم بنتي وين الكه مثلكم وبنتي هدوة تصير من نصيبكم ، شيوخ واوادم وتنحطون على الراس والله .

ضحكت بسخرية بقلبي : هه ابوها يكول اخلاق!!
منيلها اخلاق ام لسان زفر معقولة هاي راح تصير مرة ابوي ؟

سرحت بخيالي وابوي جان يتناقش وياهم حتى ماركزت على الكلام الي دار بينهم.

خليت النقاش محتد بينهم وطلعت من الديوان وتوجهت للبيت .

داامشي على كيفي حسيت بايد انحطت على كتفي
واجاني صوت شرار : هه شايف خير ومستاهلها الفين مبروووك لهوبي لايكين لبعض.

ظل يضحك وفات من يمي رحت لحكته ، لزمته من عكسه وجريته عليه : شتقصد ولك شرار ؟

وكف طلع جكارة وورثها خلاهه بحلكه كال : مبرووك عليك هداوة مدري هدوة مدري شسمها .

بصدمة جاوبته : خوووو ماكو شي وشمعنى اني بلله ؟

طلع الجكارة من حلكه ونفخ الدخان : يعني يا محفوظ السلامة ، الحجارة الماتفشخك تعجبك .

تخصرت باحتجاج : شنو معناته هذا الكلام وضحلي بالله بلا زحمة عليك يانص دكتور شرار  ؟

_ معناته يالاوربي هدى المعجبتك قوية وطيحت حظك والظاهر راح تصير من نصيبك وهم ترجع وتطيح حظ حظك وتمسح على شواربك بالقندرة .

_شحدها!!! وتعال بالله كلي هو اني قصرت وياها ؟ والله لو ما ابوي واكف وابوها جان جعصتها باصبعي .وخليتها في خبر كان .

_ المهم مبرووك ..

_شرار لاتظل تلغي خووش وفوت بالموضوع مباشرة شتقصد ؟

_ ههه راح يكربسونها براسك يوول .

بعصبية :  يكربسونها براسي شنو غير اطيح حظكم وحق الله .

مد كف ايده وظل يعدد : ابوك مااعتقد يتزوجها وصراحة اني متزوج ومهيب غركان مابقى اله انته يفشخونك بيها هالحجارة اقصد ينطوهه الك هالهدية .

ظليت اسبه واغلط عليه ولك تبن لاتحط هالفكرة ابال ابوي ترة وروح امي هسه اروح اجيب الكلاشنكوف واصفيهم عمامها واحد واحد واولهم ابوها .

حط ايدي على صدري دفعني حيل وكال بملل اكل *** بيك خير ماوصفوا شواربك بطانية ولحيتك دوشك ضغط عالي مال اثنين توهم متزوجين .

لك غير اذا صارت مرتي اوكلها تبن والله اعشيها بكتلة واغديها بكتلة اذا بس فتحت حلكها .

اي لعد هذا هو مبرووك .

شفت نظرات عيونه اتسعت وهو يباوع وراي شمر الجكارة الي بعدها مامخلصة شمرها بالكاع وداس عليها ومشى وعيونه عبالك تطارد فريسة .

التفتت باوعت ع الكراج شفت اخت فرح تمشي بثقة
باتجاه الباب الرئيسية وشعرها يطيره الهوا وهذا شرار عبالك صادله غزاله راحلها يركض .

ظليت افر بيدي ورحت باتجاه البستان اتمشى وكلام شرار يدور براسي .

                     ***    ***    ***

موج ..

كعدت الصبح فروحة بعدها نايمة وبصفها ابنها
خطية تقهرني بالليل تظل تلوب وتبجي
تبجي الم فراكه وخذلانه .

اما اني متعودة ابيتنه اكعد الصبح اتمشى للفرن
اجيب صمون وكيمر هنا احس تكسرت تكسر
ومحبوسة .

بس والله كوه راح اعوف فرح واروح مايهون عليه ابد شسوي حكم الشيخ هذا بعد ولا زم نطبقه

واني هم اخاف عليها لان الشيخ اكيد غايته يحميها مثل ما كال ابنه الها .

خابرت احمد جان نايم مية مرة خابرته يله جاوبني كتله تعال عليه .

كال صار اصحصح واسبح وابدل واجيج .

اي ادري على ما تصحصح صايرة الساعة بالوحدة وهم قبل لتطلع وصي انو على بابا وخالة  .

_ اي اتدللي دقايق واجيج

_ عود هاي الدقايق مو تسويها ساعات .

ضحك لا يابه شسالفة طيارة اجيج موجايه .

_ خلي نشوووف .

ختمت الاتصال ويا ولبست ملابسي الي جيت بيهم هنانه واخذت اغراضي ، انو جانت دازتلي كم قطعة ملابس بيد احمد هم اخذتهم ويايه .

وكعدت انتظر احمد ، وين يله خابرني
اول مافتحت خط اجاني صوته
:  اجيتج صرت قريب منج اطلعيلي .

رحت بست فرح على راسها وبست ابنها وهي كعدت تتمطط
كالت ها حبي رايحة ؟

رحت وكفت يم الباب ولزمت المسكة مالته
كتلها اي حبي رايحة اجه احمد ماوصيج على نفسج بعد ديري بالج وحاولي تتجنبينهم وتتجنبين المشاكل .

كالت وهي منعسة : تدرين صرعتي راسي بهاي نصايحج؟ ترى هواي تلحين منتبهة على نفسج انت لو لا ؟

_ حبي دا انطيج نصايح غير اختي واحبج واريد راحة بالج اني ياعيوني انتي اذا ماتسكتين عنهم سايسيهم بلسانج الحلو الجميل  الطويل وهم يظلون يحبوج صدكيني .

كامت على حيلها واجت يمي لزمتني من زندي ودارتني على الباب فتحت الباب وطلعتني وهيه تكول
يله ولي موج يله روحي فكيني من ملحتج الزايدة وكركتج .

ودفعتني بالممر وسدت الباب وقفلته
دكيت الباب وكتلها ولج جنطتي مااخذتها .

فتحت الباب وشمرت الجنطة ورجعت سدته
دنكت عليها واني اضحك على خبالها ومشيت
سمعت صوت باب غرفتها تنفتح ما التفتت
اله لمن سمعت صوتها تصيحلي باسمي .

_ مووج
باوعتلها جانت مبتسمة ابتسمت اني همين وهي انطتني بوسة بالهوا ظليت مبتسمة ورديتلها البوسة .
ونزلت جوه .

شفت الحجية بالصالة ويمها اقاربها الخطار ...
وكفت يمها كتلها خالة الله يجعلها ااخر الاحزان والله يصبركم على مصابكم ، اني رايحة ياريت ديرون بالكم على اختي مثل ماتعرفين الشيخ اصر تبقى هنا وهي مريضة وتعبانة والله واني ماكدر ابقى يمها بعد اكثر .

هي كالت اي ان شاءالله يمه لا تهتمين بس كون
وسكتت خلت ايدها على حلكها
عود تقصد على لسان فرح .

هزيت راسي وكتلها الله وياج خالة .
طلعت داامشي بالكراج وسمعت صوته ورايه
كلبت عيوني بضجر وتنفست بنفاذ صبر .

هو كال اووكفي ام عطوب.

التفتت عليه وبنبرة سريعة وبنفاذ صبر
: نعم اخويه تفضل تريد شي ؟ دا ارووح لبيتنه .

سكت لحظة بس عيونه كالت هواي شغلات
بعدت نظري منه اباوع ليفوك ولازمة جنطتي باثنين اديه ومخليتها يم رجليه من كدام  .

خزرني كال تخاويتي وي ابليس كون ان شاءالله
، انتظري اني وصلج .

خزرته وحجيت بملل : لا ميحتاج ... كلت هيج ودرت ظهري ، توجهت دااطلع بره البيت وجانت سيارات هواي واكفة يم الباب .

هو تبعني ويدردم : اكلج انت ليش هيج عنيدة جاي اكلج خلي اوصلج ماريد اخطفج .

التفتت عليه بعصبية : واني كتلك ميحتاج ترى ليش هلكد تلح ؟

ظل يفر بيده : انت على شنو خابصة نفسج لايكون انت الاميرة ديانا واحنه ماندري ؟

_ اي اني خابصة روحي انت شكو تحجي ويايه وتطلب توصلني ومدري شنو خليك بحالك احسن متسمع كلام ميعجبك .

_ منين اسمع كلام ميعجبني منج ؟
وظل يأشر عليه من فوك ليجوه باصبعه....

دااريد اجاوبه كمل كلامه والله اني هم صوجي .

_ اي صوجك احد داز عليك احد عاتب كايلك ؟
_ انت صدك ماتستحين .

خزرته اريد اجاوبه
بس وصل احمد بالسيارة مالته وصار يمي .
نزل من السيارة وسلم على شرار واجه يمي
باسني على راسي واني بسته بخده .

كال صعدي بالسيارة اروح اسلم ع الشيخ واشوف فرح واجيج .

هزيت راسي ورحت صعدت بالسيارة . راح احمد ورى ربع ساعة رجع وتوجهنا للبيت بالطريق سألته عن بابا
وهو كال لاتلحين كتلج زين .

كلهم يكلولي الح معقولة هلكد اني لحوحة .

وصلنا للبيت ركض رحت لبابا اطمنت عليه وطلعت من يمه .

دااطب لغرفتي ارتاح شفت انو تضحك
خزرتها شكو ولج تضحكين ، اشرتلي بحواجبها التفتت شفت خالة وبيدها بناطير عرفتهم بناطيري

شمرتهم عليه هاج ولج تعبت هلكت منهم عرفت بيج جايه خيطتهم الج يالعجوزة تتعاجزين تخيطين بناطيرج .

عطت واني اتصنع البجي لاااااااااااااا .

اخذتهم وفتت للغرفة اجيكهم اي والله صدك كلهم مخيطتهم خرررب .

سمعت فوني تجيني مسجات هسه يله اجا نت لان جنت ابيت فرح ممفعلة نت هسه ربط ع شبكة بيتنا .
فتحت اول مسج جان من شرار .

كاتبلي : لمن كتلج اوصلج ليش ماكلتي اخوج راح يجي عليج شنو هاللواكة شيسموها هاي بالله .

انوب حاظرني يعني فاتح الحظر وداز المسج وحاظرني مرة ثانية اريد افتهم ليش يحظرني ؟ راح اتحرش بي لو اهكره ؟ لو اهدده بصوره ؟ والله عجيب غريب هالانسان هذا !

فرح ..

وره ما طلعت موج مني خابرني احمد كال طلعي
دااسلم عليج واروح ، رحت سلمت عليه ورجعت لغرفتي ، دانيال حبيبي نايم ، طلعت صور حمدان وظليت ابجي واحاجيه .

بس كلي ابجي على فراكك على خذلانك على حظي على سجني والله ما دري
بس تعبت .

دقايق بقيت ابجي واحاول اجمع شتات روحي وانكساراتي . احاول احقن نفسي بجرعات النسيان
مو نسيانه لا وانما نسيان خذلانه . الحزن ماترك مكان بداخلي الا سكنه و استوطنه وتسلط عليه.

تذكرت ريلام فكرت اروح
اشوفها واطمئن عليها ، توجهت لغرفتها فتحت الباب ودخلت لكيتها دتبجي استغربت ورحت يمها .

وخرت شعرها من على وجهه ومسحت دموعها
سألتها شبيج حياتي ليش تبجين ؟ متوجعة ؟

هزت راسها ورفعته من ع المخدة وخلته على رجليه وظلت تبجي وايدها السليمة على حلكها تكتم شهكات ااالالم .

_ احجيلي ريلام لا تخوفيني عليج حبابة بلكي اكدر اساعدج !

ظلت تحجي : تدرين طلع صح مرتضى خاطبني من مهيب ومهيب رافض كايله ماعدنا بنات للزواج ، هسه رهف خابرتني تتحمد لي على السلامة وكلتلي انصدمت شوفي حتى ديخرب قسمتي .

_ انت شبيج ريلام شجاااج ولج لا تتأثرين بحجي بيبيتج وامج مهيب مو اخوج يابه مووو اخوج .

_ لا اخويه ولج حتى هيام تحرم عليه واني ادري بيها تحبه وتغار مني ومن اكوللها ترى مهيب اخونه هي تكول لا بس اخوج الج انت رضعتي من امه  واني احبه  واضوج من يهتم بيج ومايهتم بيه باعي حتى هيام منتبهة عليه واني لا .

اي وهيام خاتون مفتي الديار العراقية هي هاي شفهمها صخلة ماسرحها عند هيام ليش تحجيني هففف ياريلام وانت هسه ليش هالدمووع هايه ماتكليلي ؟

لأ بس مصدومة منه .... شون يخلي عينه عليه واني اخته .

كلامج كله مو منطقي انت مو اخته ومو بكيفج اصلا انتوا حيل لايكين لبعص وهسه دكومي اسويلنا ريوك نتريك اني وياج ناكل وننسى همومنا ترى والله من البارحة لليوم قلبي معصور عصر ومخنوكة فدوة كافي لاتضوجيني عليج والنبي ما اتحمل اشوفج هيج .

كامت من حضني كالت ماريد اكل اريد احجي ويه مهيب .

اووو اتركي شتكليله ؟

اكو ابالي حجي اريد اكوله انت معليج .

مهيب ..

بنفس الليلة صعدت دااشوف ريلام واطمئن عليها طلعت هيام من الغرفة وسدت الباب ولزمت المسكة مالته .

خزرتها شكو ولج ووخري خلي اشوف ريلام .

تخصرت بيد والايد الثانية لازمة الباب
لاء ريلام ماتريد تشوفك هيه كالت بنفسها هالكلام كالته لفرح .

قربت مني حجت بهمس وعيونها تراقب
_  وفرح هم كالتلها اي عفية يستاهل يولي .

لزمتها من ايدها ودفعتها قوي ، ورحت يم الباب
حجيت بصوت : ريلام راح افوت .
بس مااجاني اي رد ..

فتحت الباب وفتت باوعت لسريرها شفتها متغطية كلها طالعة بس ايدها مخليتها على راسها .

صحت ريلام انت صاحية ؟
مااجاني اي رد . طلعت من الغرفة ونزلت جوة
وبس افكر بيها .

دخلت لغرفتي اخذت التليفون دزيتلها مسج
ريلام بس تكعدين طمنيني عنج بالي يمج ..
وصل المسج لتليفونها واستلمته بس مافتحته .

واني اعرفها كلش زين من تريد تنام تطفي الشبكة
اعرف كل تفاصيلها وحافظها بس هسه معناهه بعدها كاعدة بس ماتريد تحجي وياي ومتجنبتني يمكن بسبب ردة فعلي بالمستشفى ياربي صبرني .

الليل كله اني افكر بيها نمت وحلمت بيها جايه تحجي وياي كعدت ضايج ومخنوك . بقيت بالغرفة وادري عدنه هوسة ماطلعت بعد .

اخذت تليفوني جيكته خاف دازه مسج هم ماكو .
طلعت جكاير وظليت ادخن ومستغرب منها شبيها وليش هالحجود هذا فجأة .

بقيت بالغرفة ادخن وافكر واني على هذا الحال
متمدد على السرير وعيوني ع السكف وانفخ الدخان ليفوك ، انفتحت الباب باوعت وشفته واكفة تباوعلي .

عدلت كعدتي همست ريلام ؟

كالت بحديه اريد احجي وياك  .

طيب تعالي فوتي ، واشرتلها براسي .

كالت بعصبية لأ ما ادخل راح انتظرك بالبستان ... وطلعت سدت الباب بدون متنتظر مني اجابة .

كمت مستغرب غسلت وجهي وغيرت ملابسي
اخذت جكايري وطلعت بالبستان شفتها واكفة
جوة الشجرة بالفي منطيتني ظهرها .

اقتربت منها اتأمل جمالها
الشمس تطخ بعيونها تحول لونها من البني الفاتح
للون العسل الصافي .

شوفتي الها خلت جبال الحزن على صدري تتبخر
جانت نظراتها مثل السهم الي دخل بقلبي .

وصلت يمها سألتها بفتور شلونج شلون صرتي ؟

كالت بعصبية اني شنو بالنسبة الك مهيب ؟

فركت وجهي بيدي ، تجنبت النظر الها ، رحت كعدت
على جذع نخلة طلعت جكارة وشعلتها ..

اجاني صوتها احجي مهيب سألتك سؤال من شوكت انته مخلي عينك عليه واني اختك ؟

باوعتلها خزرتها سألتج سؤال جاوبي ايدج شون صارت ؟

معليك بيه مهيب احجي شنو معنى كلامك البارحة وتصرفاتك ؟

غمضت عيوني ثواني وتنهدت باوعتلها بقهر ..وشحيت نظراتي منها .

_ مادري ريلام مادري سنة سنتين اشهر ماعرف كل شي صار فجأة تتذكرين جنت مافرق بينج وبين هيام
فجأة صرت احس بيج قريبة مني صرت احب اهتم بيج بتفاصيلج انوثتج تجذبني طيبة قلبج وحنيتج
وكل شي بيج .

شايفة كفاج الي امج ماتميزج عن اختج اني اميزج
كلبي ينبأني بنبضاته وخبالاته عليج

صوتج ليجاي من المطبخ من الغرفة من الهول من الصالة هم اميزه ومحد يميزه غيري ..

رفعت راسي اجت عيني بعينها
اقتحمت حصون التردد والحيرة ، نفضت غبار الصمت
ونطقت : احبج .

هي تعصبت وانتفضت هذا حب محرم حررااام ممنوووع وبعد لااريد اشوفك ولا اسمعك ولا تحجي ويايه

كمت على حيلي صرت يمها
معليج بيهم لج اني اتذكر كلش زين امي جانت تنطيج ممة واتذكر مرة شفتج بحضن امي وامي دترضعج وابوي حجه عليها وماقبل . جان عمري سبع سنين اكثر او اقل ماتذكر بس بهالحدود .

اي شفت يعني رضعتني بس شكد محد يعرف مهيب بس هي وهيه هسه ميتة وحتى لو اني اعتبرك اخويه دتفهم فتحت عيني عليك واني اعتبرك اخويه .

ماكووو هيج شي ريلام لا تخبليني .

انت خربت علاقتنا للاسف جانت حلوة .

غمضت عيوني احس نفسي عاجز شون راح افهمها هاي ، اتمنى اضربها واخليها تفهم بس مقهور عليها لان متأذية ايدها .

وبعدين تعال انت ليش مكتلي مرتضى خطبني منك ؟

فتحت عيوني بصدمة بس ماحجيت وياهه بداخلي فرحان لان حست بيه واملت نفسي ويه الوقت راح تفتهم وتعذرني الامل بهاي اللحظة صار مثل طوك مقيد قلبي ،  خليتها تطلع الي بقلبها كله وقررت اكون فقط مستمع الها ولترهاتها .

اردفت :  راح تظل اي واحد يجي يخطبني تصده وتخرب قسمتي ؟

هزيت راسي بكسل وملل :  اي .

_ لا مو من حقك انت لازم واحد يوكفك عند حدك اكول لخالو عليك والله .

رحت تقربت منها شنو تردين تتزوجين ولج ؟

معليك بيه اني اقرر شوكت ومنو الي اتزوجه انت لا تتدخل .

ياااربي صبرني تقربت منها اريد الزمها من ايدها متعود
لزمت ايدها المحروكة توجعت وصررخت متألمة مهييب ااااه .

واني عطت ريلام بس لاااا اذيتج

ضربتني على صدري وكالت اكرررهك مو عمرك اني وخر عني يله ..

بس لا لجمت ايدج خليني اشوف

صيحت : وخررر كتلك ... 

لزمتها من ايدها اللخ ..

اترك ايدي دتوجعني خليني اروح ما اتحمل ابقى يمك بعد ولا نص ثانية .

ماراح اتركج اذا ماكملت كلامي ووصلنه لحل .

الحل انت تبتعد عني وتحرم على نفسك شوفتي وتقتنع اني اختك وخلصناااا يمكن افكر بعدها اتقبلك احجي وياك او حتى اباوعلك .

جانت تحجي متألمة وقلبي المني عليها

احبببج احرررك روووحي حتى تحسين ؟

سكتت عنها وهي خرتني و راحت واني بقيت ضايج وبين داخلي مرتاح
نوعا ما ، ماجاي اكدر افسر احساسي ..

اتمنى اغير المشاعر والاحاسيس اتمنى افقد الذاكرة وانسى حبها اتمنى تنطفي نار حبها الشاعلة بقلبي احس حبي الها صعب ومحد راح يتقبله  .

ضجت من كلامها بقى يحفر بيه .

"هل يجبُ عليّ أن أشعل أصابعي العشر شموعاً ، حتى تدركين اني أُحبُكِ حد الاشتعال!"

احس نفسي مبعثر ومتشتت مااظن ابد راح تتقبل حبي الها ومستحيل تتغير ، توجهت لابوي هو الوحيد الي محتاجه بهاي اللحظة ، اريد اشكيله وبنفس الوقت اريد استفسر منه على هالموضوع.

توجهت للديوان شفت خطار جاي يطلعون منه وابوي جاي يوصّلهم للباب . انتظرته بالكراج لحد مااطلعوا الخطار وهو دخل توجهت اله : صباح الخير يابه .

باوع لساعته : يا صباح هسه تقنع روحك انته هسه الظهر حضرة الملازم .

_ ها والله يابه البارحة مانمت للصبح وهسه اخذتني نومة .

مشى قبلي وهز راسه ، مشيت وراه
_ عندي موضوع وياك اريد اسولف وياك اذا عندك مجال .

كال بهمة :  اي تعال امشي للديوان خوالي وولدهم على جية هسه علما يجون انت سولف شعندك .

مشى واني وراه افرك باديه محتار شلون افاتحه بالموضوع بس لا هم يگلي اختك .

والله طاح حظي وتمرمرت ساعة السودة البيها حبيت امداك يكلبي ماعرفت تحب اله ريلام ؟ بس واالله هي تنحب شسويلها .

دخلنه للديوان وكعدنا ابوي يباوعلي ويفر بالسبحة مالته واني ساكت
_ ماراح تحجي ؟ راح تظل ساكت هيج ؟ طلعها من كلبك فجرها وارتاح .

تحركت واني بمكاني وكلت احم يابه بالنسبة لريلام بنت عمتي بلقيس صدك تصير اختي بالرضاعة على حجي حبوبتي وعمتي ؟

_ ها هنا مربط الفرس ، رايدها للبنية انته مو ؟

سكتت وبعدت نظري منه محتار والله لايحير عبده خايف يكول من صدك اختي .

كبل لا اجاوبه اجاني صوته : شوف مهيب انه ادري بيك رايدها لا تتوقع انه ماعرفلك انه حافظ كل واحد بالبيت واعرف حتى شنو بداخلهم من نظرات عيونهم .

يابويه البنية مو اختك بالرضاعة خلي يطمأن كلبك بس هسه مو وكتها نفتح موضوعكم عمك توة ميت واحنه عدنه فاتحة خلي تعدي الاربعين ويصير خير .

_ لا يابه انه بس جيت اسألك .

و_هاي انه جاوبتك وان شاءالله جوابي يريح كلبك .

_ اي والله يابه كلش ارتاحيت هسه بس بالنسبة لحجي حبوبتي وعمتي بلقيس شلون هم مصرين تصير اختي .

/_ بويه مو بكيفهم هي مرة وحدة رضعتها وانه شفتها نهيتها عن هالشي وهي المرحومة امك ماجانت تعاندني ابد وانه اعرفها كلش زين تطيعني كدامي ووراي .

_ الله يرحمها والله مشتاقلها ام كلب الطيب .

_ الله يرحمها ..

_ يابه انه راح اغيب عن البيت هاي الجم يوم .

_ دير بالك على نفسك ابوي انته .

كمت بست راسه وكلت لايظل بالك .

طلعت من يمه اخذت اغراضي بجنطة وطلعت سلمت على حبوبتي وتوجهت لبيت عمي حسان
فتحت الباب بالمفتاح وفتت جوه دكيت الباب ماكو حس ، فتحته ودخلت خليت جنطتي بالهول ورحت للمطبخ اسويلي شي اكله جوعان ، حبيت ابتعد عن البيت وعن ريلام وافكر واتركها هي هم تفكر .

خليت بيضتين ع النار ينسلكون واخذت تليفوني
دزيتلها مسج : حاجيت ابوي عنج وكال انت مو اختي وهو ناهي امي عن رضاعتج افتهمتي انت مو اختي واني غصبا عليج احبج .

دزيت المسج وكملت بمسج ثاني : اني طالع من البيت واريدج بهاي المدة الي طلعت بيها تفكرين لوحدج تمام .

خليت التليفون ع الكاونتر وسويت جاي وحشدت حواسي كلها للتليفون خاف العوبة تجاوب  ، وبس اتمنى اهكرها واخترقها واعرف شتفكر هسه .

انفتحت الباب وطب عمي حسان لاف الغترة على ركبته ولابس اسود باوعلي انتبهت عيونه حمر .

كال هاي انته هنانه توقعت من شفت سيارتك بالكراج خير خو ماكو شي متعارك ويه ابوك والتحقت بيه ؟

ابتسمت لا بس اشتاقيتلك واجيت اريد ابقى يمك وين جنت ؟

نزع الغترة وشمرها على الكرسي : جنت بالنجف يم حمدان رحت ازوره .

وانت اخذ راحتك بالبيت اني طالع لايران هاليومين واجي قبل الخميس بالثواب مال حمدان .

ها شعندك بايران ؟

شغل عندي ..

تدري ابوك شكالي بالفاتحة .

شكال ؟

كال حدك تلث ايام الفاتحة بس تخف الوادم بعد لاتجي وانه بعدني مو راضي عليك ، هاي كلها علمود الگ*** فرح .

عمي حسان عيب هالحجي مايصير تكول عنها هالالفاظ هاي تبقى عرضك وام ابن اخوك .

ختووولي الادبسز شنو نسيت شسوت بيه ولك لو ادري ابوك ليش لازم سيف ويدافع عنها جان ارتاحيت .

ابوي مايدافع عنها ابوي يدافع عن الحق يا عمي وهسه عوف كل شي وتعال خل نتريك خوش ريوك سويت .

لك مهيب ليش تخليني اطلع من طوري اسبك واسب ابووك خليني محترمك انته خطار عندي .

اي سبني عادي بس ابوي لا مااسمحلك .

لك  ماتكلي ياحق هذا الي يدافع عنه مو خربت خطبتي بت الكلب .

انت المفروض تكون صريح من البداية وياهم خاصة ابوها انسان مثقف ودكتور جامعي اكيد راح يسأل عنك وراح يكشف كل شي يخصك سواء من فرح او من غيرها .

كلت هيج واني اصب الجاي بالكلاصات وخليتهن ع الميز .

هو سكت شويه كال ولك لا تدافع لابوك ترى ابوك عمره مايعرف الحق ابسط مثال خابرته كتله اريد اجي اشوف ابن حمدان .

كال مو هسه لمن اكلك يله تجي هاي كلها علمود مشاعرهه لبت الكلب فرررح .

جاوبته لا مو هيج اصلا فرح طول ايام الفاتحة ماتدري بالصغير وكله بيد ريلام جان .

من جبت سيرتها ، گلبي المخبل بحبها نغزني عبالك كل هالموضوع يخصها . مستحوذة على كل خلية بداخلي ماعرف شوكت وصلت هالمرحلة بحبها بس كل الي اعرفه اني جاي اتعذب .

هو جان يحجي واني سارح لمن انتبهت سمعته
كال خو محد يعرف الحق ، تهي بهي راح اغسل واجي احسن من اللغوة الزايدة ، عاد شون اني ناقص .

لهيب ...

مرة عشرة ايام على رجوع الطفل لاهله واسبوعين على وفاة عمي حمدان الله يرحمه ،، وهذا ابو ام لسان هديوه يوميه مخابر ابوي ويتلوك ويكله ننتظركم تجون تعقدون على بتنه .

ابوي كاله عدنا فاتحة هسه مايجوز ، بس هو مصر
كبر لفه ولف بته اخت ابليس بالرضاعة  ،، لا والله مو اخته التوأم مالته .

طبعا اكيد طمعوا بينا هم وين يلكون مثلنا ياخذون بتهم لا والله مو بس مثلنا اصلا محد يكلبهم ولا يكلب بتهم ومو بعيدة كلام مرة زكي صدك هي بايعة اخوها وقابضة الثمن .

بس والله متعجب عليه شلون يهدي بته وكأنها مجرد سلعة مو بشر من دم ولحم ، صح هي تستاهل بس عجيب من لحمك ودمك ترخصها بهالطريقة اتعجب على هيج انسان.

رحت يم ابوي جان شرار كاعد يمه
كتله يابه اني مبقى شي واطلع لروسيا .

ابو كال بحدية تطلع لروسيا شعندك بعد مو خلصت دراسة اكعد واسكت هنانه بس يطلع عمك من الاربعين حتى نعقدلك .

تعقدولي على منو ماافتهمت يابه منو سعيدة الحظ .

كال باصرار : البنية هدى ان شاءالله عندك مانع ، ابني الوادم قدرونه وانطونه بتهم وعيب نرفضها وانه قررت تصير من نصيبك .

كمت على حيلي معصب .. مثل الجبل يخفي بداخله بركان من السهل ان يصب حممه على كل من حوله .
عطت : والله لو تطلع براسهم نخلة مااخذها ياابه ارفضها اخت ابليس هاي ماريدها ماريدها .

صاااح بغضب محمووم : اكعد لك لاتطلعني من طوري وخليني اكمل كلامي .

كعدت احتراما اله ودنكت راسي ...

لشويه تلاشت غمامة الغضب وحلت محلها الهدوء والرقة .
اردف : تقبل اني اتزوج وحده اصغر من بناتي وبعدها بت تريد العالم تاكل وجهي .

واني مدنك جاوبته وبدا العرق يتصبب مني
_ ما اتزوجها لو يجي ابليس وبعدين هاي هديتيش مكيف ابوها عبالك هاديلي فراري

ونطق العتوي شرار .عمو حبيبي اقبل بيها ترى حرام عليك الرسول قبل الهديه  و ابوها معاند ترى و يكول اله تجيب عمامك وتاخذ عطوه من عمها لافروف يريد عراضه شيخ فرفور .

رفعت تك حاجبي : اخذها انته لا شغل ولا عمل واني اريد اكمل ماستر احسن منك كلية ماكملت .

ابوي وجه كلامه لشرار : شرار انته ماحليت مشاكلك ويه زوجتك .

ابتسم شرار :  ها شيخ ؟ تريد تكربسها براسي بس كول ابو مهيب  لا تستحي .

ابوي جاوبه بغرور : اذا اريد اكول مااستحي منك .

لهيب : زوجها لمهيب مايكول شي ع الاقل مايعرفها وماصار وياهه موقف مثلي اني كرهتها من اول ثانية شفتها بيها .

_ عوف مهيب وضعه خاص .

ولك بويه البت جان محترك كلبها على اخوها وانهارت كدامنا شبيك انت!!

كمل :  ترى  هم ماناقصها شي هيه ولا تحلم مثل شرار اخليك تتزوج وحدة ماينعرف اصلها من فصلها واجنبية شوفه هسه هذا كدامك  متندم وانه كتله راح تندم واكلها وظل مكابلني وكاعد  .

باوعت لشرار يضحك التافه واني نار وشاعلة بيه
انتهى النقاش اني قافل وابوي مُصر .

طلعت من يمهم وخابرت مهيب رأسا جاوبني عبالك دينتظر اتصال .

بس اجاني صوته اووو هم انته شكو شتريد ...

تعال تزوج هاي الهدية الي جابوهه النا اني ماريدها وانت اكبر مني واولى بيها .

دنجب شنو هاللغوة الزايدة ...

شرار اجه يمي كال هو محمل وشايل ..

مهيب : هذا شرار يمك

جاوبته : اي

كال كووله خلي يسد حلكه .

باوعت لشرار :  مهيب يكول سد حلكك ...

تقرب شرار مني وظل يصيح هاا الهااارب شردت موو لا ياجبان .

مهيب كال كله خلي يسد حلگه مرة ثانية ..

_ صدك ليش طلعت من البيت وهاي صارلك جم يوم ماكو احجي شكو ويلمحون يكولون تحب وحدة منو هاي .

_ دخيلك لهيب روحي طالعة من خشمي وبعد لا تخابر حتى لو تحترك الدنيا ، اله على شي مهم مو شي تافه مثلك .

_ يعني اذا احتركت الدنيا هذا مو شي مهم ؟
مارد سده بوجهي المطي ، والله اني صدك جيتي فكر
بس قررت اجي مات عمي حمدان وهسه مهيب ترك البيت وماعرف بعد شراح يصير .

انوب ابوهه جابهه واجه باوعتلها كاعدة يم بيبيتي
لابسة اسود بأسود بدت اللواكة عود متضامنة ويانه

خزرتها هي هم خزرتني شكد صلفة مال اجيبها بوكس اعلمها متباوع هيج بعد .

ركزت على ملابسها ؛ لابسة قميص اسود وتنورة سودة وربطة ستايلها قديم كلش ..

كاعدة بصف الحجية وطايحتلها بوس ..
لا لا مااتحملها ابد احسن شي الم چولاتي واولي منا.

ورى ماطلعوا رحت دورت جواز سفري مالكيته ظليت ابحوش مخليت مكان ، فجأة طب شرار سألني شتدور ؟

جاوبته واني اشمر بالملابس من الكنتور على السرير حتى بلكي الكي :  الجواز مالتي  اختفى .

طكاهه ضحكه باوعتله مكتف اديه
كال ابوك اخذه هو ومستمسكاتك .

تفاجئت لااا ياالله ومنو انطاه اله اكيد انت ولك انته شنووو ماتبطل نذالة بس فهمني .

جاوب دطييير هااي فوكاهه اريد افرح بيك وازوجك صدك ماتستاهل .

كعدت على السرير واعصابي مشتعلة ناااار كل خلية بيه مجمرة .
تندمت لمن ابويه سألني تحب وحدة اكو ابالك وحدة بس كون مو اجنبية ، جاوبته لا ، لان ادري بس اجذب يكشفني مية بالمية .. ويزيد اصراره على ام لسان .

طلعت من الغرفة وتوجهت لابوي كعدت يمه جانوا اكو زلم يمه ردت فرصة احجي ويا بس ماكدرت
طلعت محتار وكلساع تجي صورتها ابالي وانقرف منها
ابد مو ستايلي ولا مودي مستحيل اني اقبل اتزوج هيج وحدة مستحيل بييييئة ومتنطاق وممرباية .

لليل يله فرغ ابوي وكدرت احجي ويا
يابه اريد مستمسكاتي بله زحمة عليك .

اعقد على خطيبتك وتدلل .

لاا ياربي شبسرعة صارت خطيبتي ...
صرت احس نفسي عبارة عن السنة لهب ومن الجحيم وابوي كبالي كاعد ورى مكتبة مثل الجليد
لابس نظراته الطبية ويخلط باوراق كدامه .

طلعت من يمه ماعرف شون اتصرف ابوي ماجاي يفهم عليه لا هذا هو ناويين يجلطوني .

زين اني ليش معصب هيج ومخليهم يتحكمون بيه
شكو بيها اعقد عليها اخذ مستمسكاتي واطير ويطبها طووب هيه شعليه بيها . اي والله تفكير شيطاني هذا.

رجعت يم ابوي احاول ابين اله اني مرتاح
يابه شوكت نعقد ؟

جاوبني شنو ابالك وشتريد تسوي ؟

ماكو شي بس اريد ارتاح تعبت من شد الاعصاب هذا بلكي اتعود عليها واحبها .

ابتسم بسخرية : لا ياابوووك انه ادري بشنو تفكر بس ترى تحلم تطييير بعد هذا هو خلصت دراستك اكعد واسكت هنانه .

_ يابه مو كتلك اريد اكمل ماستر هن

_ كمل هنانه ولا تصرع راسي وهاي البنية من نصيبك مدام انت ماابالك اي وحدة وارضى بيها وهيه بعدها صغيرة انت ربيها على ايدك وعلمها ع الصح من الغلط مثل ماتريد .

مادري منين طفر شرار كال خاف هيه تربي مو هو يربيها .

ابوي كال اي شكو بيها .. تربي ، يربيها المهم يتفقون ويتوالمون .

اني بركان وكاعد مو بس لهيب .. أخذت وعد من ابوي يرجعلي مستمسكاتي بس اعقد ع الفلك هدى ..

وهو كال ورى اربعين عمي حمدان ..

هدى .. رضيت بقدري ، ما اكدر اكول غير هيج
ولا مستغربة ابوي انطاني هدية ، بمجتمع يفضل الولد على البنت .

دخلت عليه مرة ابويه كالت حضري نفسج راح ترحين لبيت عيالج هههاي .

ظليت اباوعلها و نظراتي كفيلة تشرح كل اوجاعي
رجعت كالت لا تنسين تلبسين اسود لان عيالج حزنانين
انتي اذا تردين تكسبينهم جاريهم وتلوكي من هسه .

رحت يمها حسيت بغصة خوف وحرارة بعظامي
واني اعصر بأصابعي سألتها : ابوي ماكالج المن راح ينطيني لمنو منهم ؟

صفكت اديها : عشتووو ولج هم كلهم دنك ويخبلووون لج حتى ابوهم ابوهم بعده شاب وصغير اني حسبته اخوهم تعجبت من كال ابوج هذا الطويل ابنه . لج عيني انت لو تكعدين العمر كله ماتحصلين مثلهم .

_ اي بس مو اخذ ابوهم بكد ابويه هم الله مايرضاها .

_ دنجبي العوووبة اصلا ابوهم اصغر من ابوج ، ابوج كاتلة الضيم والقهر والوصخ ،  ابوهم منشنش وهييبة
الله ربه .

ابوج تزوج امج سبع سنين يله خلفتج الخلفة الزفرة وورة سبع سنين هم يله خلفت علاوي فدوة الروحه روحت .

ظليت افر بيدي وحجيت باستهزاء : يله شدي حيلج وخلفي انتي همين حتى لو بكايه  مو صارلج سنتين كلشي ماكو حتى البزونة احسن منج تخلف بالشهر مرتين تلاثة اربعة .

_ الطمج على حلكج هسه ؟ هو ابوج مايخلف شسوويله اني كوولشي مابيه ابوج الشويب مابي فروخ .

تخصرت : ايباااه لعد هاي اني وعلي منو خلفهم دادة لو استلمنه من الحصة لو حملنه من النت .

_ انجبي وسدي حلكج لا اسده الج بطريقتي ااالادبسز هذا لسانج بعد جم يوم خوش يكصوونه الج بيت  الشيوخ .

_ اسم الله عمري ماعاش ولا تنست بيه امه الي يكص لساني .

_ الله وكون ينطوج لهذا ابو شوارب يوكر عليهن الصگر حتى يعلمج الله حق وينتقم منج لان تعاركتي ويا بذيج الليلة ومديتي له لسانج الزفر .

_ خلي يولي ابو بابا يحلم حلللم هالمايع يلمس شعره مني والله اطرده من الغرفة واقفل الباب .

_ هاي اذا ماشمرج من الشباج هه تطرده هيه .

سكتت احس ضايعة شسوي ياربي ، اتمنى ماينطوني اله لالا اني لازم احجي ويا ابويه خلي لاينطيني الهك قابل متعاجز من لكمتي والله مستعدة مااكل واشتغل ويا بالبستان هم ميخالف بس لاينطيني الهم خوفني كلام فردوس مرة ابوي اخخخ بدل ما تهدي بيه تهيج النار بعروكي .

اجه علاوي يمي اخذته لحضني وبسته ، هيه اجت جرته وخلته بحضنها  وظلت تحجي ويا : اي هسه تعرس هديوه ونخلص منها وتظل انته ابني حبيبي .

هو بحضنها يباوعلي مبتسم ابتسمتله ابتسامة مهزومة وقبلها حسرة واحس نار تجوي ضلوعي .

دخل ابويه باوعلي وباوعتله جان تعبان حيل وينهد
ووجهه عركان كال كومي بت الكلب ناوشيني كلاص ماي ماتشوفيني هلكان .

كمت للمطبخ ترست دولكة مي وثلج واخذت كلاص ووديتها اله ، شفته مخلي بحضنه علاوي ويبووس بي .
ويلعبه ويدغدغه وهو يضحك .

تمنيت اني ولد ويهتمون بيه هيج ، مو غيرة من علاوي احبه اموت عليه ريحة امي بي بس هم انهضم على روحي وانقهر .

انطيت الماي لابويه هو شرب الكلاص كله ورجع انطاه الي كال صبي بعد گلبي حار صاير نار نار .
صبيت اله كلاص ثاني شربه على النص
وقربه من علاوي وشربه
رجع باوعلي خازرني : ولج ليش الولد عطشان غير تشربينه ماي تتفگدينه شبيج ؟

سكتت ماجاوبته ورحت وديت الدولكة هو علاوي جبير من يعطش اكول ماي وننطي بس هو ابويه هواي يحب يسوي من الحبة كبة .

سمعته صاحني هديوة هدى وينج ولج .

رحت للهول جاوبته ها بويه ..

حضري نفسج نروح لبيت عيالج نعزيهم .

يابه صدك جذب منك رخصني بعد رخصني ترى والله عيب غير هم يجون المفرووض لو احنه ندحس بيهم ونروح والله روحتي مالها داعي اصلا عيب وفشلة .

انجبي وسدي حلكج والي اكوله يتنفذ امشي وياي العصر ولبسيلج اسود لان همه حزنانين سمعتي لولا .

يابه زين منو راح ياخذني منهم .

لهيببب هذا سألت عليه كالوا مهندس ودارس مدري بيا دولة نسيت اسمها .

لالالا يابه حباب هذا مبين حقنه ومينطاق ، شايل خشمه وميتحاجه ومبين حيشوفني الويل ، والله اني يابه مستعدة اسوي كل شي اشتغل وياك بالبستان والله اكرف كرف السليمة والزمال اشتغل باديه ورجليه بس لا تنطين لهذا الغضب الله يخليك .

وخر علاوي من حضنه وسحب العكال من راسه
هالمرة ماشردت ولا رحت لمكان لازم اوجه ابويه
هذا مصيري ومستقبلي ، مالازم يرخصني بهالشكل
هذا لان راح ابقى طول عمري رخيصة بنظرهم متأكدة مية بالمية ، خاصة هذا الي راح يزوجني اله مبين خشم وانفة وميتحاجه .

اني احلم اكمل دراستي واتزوج شخص من مستواي ويحبني ، احلام بسيطة كلش ليش صعب تتحقق .

صح اني لهسه بالثاني متوسط رغم عمري ١٦ سنة
بس والله ذكية وافتهم وشاطرة ولا مرة رسبت
بس يبطلوني جم مرة اوصل لنص السنة ويكعدوني
واروح لخوالي اتوسل الهم يجون يحجون ويه بويه
يرجعني .

بس ابويه ميفهم هالكلام ديشوف بيت الشيخ وكعوله من السمه ..

تقرب مني وخازرني واني ارجف بمكاني
كال ولج اشوو تصيحين انتي منو مكلبج انتي ؟

اي هم مايردوني لو ما انته وعمامي تلح عليهم يابه الله يخليك لاترخصني .

حجيت هيج اجاني صواب بالعكال على زندي
خليت كفي ع مكان الضربة متوجعة
هم شال العكال وضربني اجت ع كف ايدي .

اجت مرة ابوي زادت النار حطب وتحجي من يمها
اي ليش تلاسنين ابوج يريد مصلحتج عووبة صخلة

ظل علاوي يجرجر بدشداشة ابوي ويبجي وابوي لخاطره تركني واخذه يبوس بي .

تعبت وتعب جسمي من الكتل العصر وكف على راسي اله ابدل واروح ويا هو وعمي لبيت الشيخ .
خفت لايكتلني استسلمت وقررت اروح وياه .
لبست قميص احمر وتنورة سودة ، طلعت كدامه هيج كلب الدنيا عليه .

ماتستحين ماخذج لابسة احمر رايحين عرس ولج عدهه عزا عزا من كون احضر عزاج ان شاءالله .

همست امين واخلص من هالدنيا ..
عاط ولي لبسي اسود لا اكطع النعال والعكال ويا على راسج .

رفعت راسي اله يابه انت هم متذكر مرة مشتريلي ملابس سود ؟

صفن .. كملت اي ماعندي اسود منين اجيب اشو البس من بنات خالاتي وخوالي اليعتك عليهن والي تروح المودة مالته جاي البسه وهنه مايلبسن اسود .

غماني وطلع ومن رجع جايبلي ويا قميص اسود
صح جديد بس مبين ملبوس مدري طلبه من الجيران
مدري منين لبسته امري لله بس يلعب النفس موديله لو ضاله ع الاحمر احسنلي .

اخذني ورحنه لبيتهم ، الطريق جان كلش طويل واني دخت وتعبت ولعبت نفسي . من نزلنه يم بيتهم
باوعت لوجهي اخترعت صرت صفرة وجهي شاحب العب النفس .

باوعت على بيتهم انبهرت فتحت حلكي وعيوني
اني ما اباوع للعالي ابد ولا تهمني الفلوس والمظاهر
واحب البساطة ومؤمنة انو السعادة مو بالمال ، بس من صدك انصدمت .

دخلنا لبيتهم طلع الشيخ استقبلنا وابوي دغني وكال بهمس اعتذري منه وبوسي ايده .
تقربت واعتذرت جيت اخذ ايده ابوسها مقبل
كال استغفر الله بويه ماصار شي .

كعدت يم الحجية ام الشيخ ، اني بطبعي اجتماعية
اخذ وانطي بالكلام ومااستحي او اخجل انو اندمج وي احد  واحب اضحك  والظاهر هي حبتني
وظلت تسولف وياي .

دخل ابو خنزورة وظل  يباوعلي ويخزر بيه
واني هم خزرته شعباله لعد 'قليلة شر' اني .
عباله ميتة عليه وحطير من الفرح  مايدري كارهته ومجبورة عليه.

فرح .. وصار اربعين حمدان ، رحت للقبر واني احمل ويايه مشاعر تهزني من اعماقي ، وااالالم ينخر روحي
الخذلان ااااخخ اكثر المشاعر المسيطرة عليه
خذلني بحياته وبعد مماته شي يألمني حيل
ومقهورة على ابني ، صار يتيم بلا اب
اب ماحفظ حقوقه . سكوتهم عن القاتل يثير بيه شكوك واستغراب لهسه ماكدر افسر تصرفهم الغامض
مستحت دموعي جيتي جانت تحمل العتاب اكثر من اي شي ثاني .

قربت دانيال يم القبر واحجي ..
كوله بابا اني بهاي الفترة صرت احجي كلمات اكثر
وصرت امشي بس مسافة صغيرة كم خطوة يعني واوكع واني راح ابقى احبك وما انساك
ماما رح تذكرني بيك بسوالفك تسولفلي عنك
راح متحجي الشغلات الموزينة حتى لا اكوم مااحبك
الله يرحمك .. حجيت بغصة ومو داريه بلي يمي ابد .

رجعنا من الاربعين ورى ايام داابحوش بالكنتور
لكيت غترة بالخانة الفوك سحبتها وظليت اتأملها
اريد اتذكر شجابها هنا مايحضرني شي .

فكرت اسأل موج بعدين هي رتبت كنتوري اخر مرة
قربتها من انفاسي ، استنشقت عطرها حيل
ترس ريتي بس هذا مو عطر حمدان ولا ريحته
الخاصة بيها المن يربي وشجابها يمي .

شمرتها على الجرباية ، انفتحت الباب وفاتت هيام
كالت   تعالي اخذي دانيال نام بغرفتنا وريلام نزلت جوة تنظف واني اريد اخابر خاف يكعد على صوتي .

هزيت راسي الها وطلعت بسرعة خليتها وراي ..
رحت جبت دانيال ورجعت للغرفة ، تفاجئت شفتها بعدها واكفة يم السرير وبيدها الغترة تباوعلها وتتفحصها .

خليت دانيال بسريره ورحت يمها جريتها منها
هي ضحكت بمكر : الغترة مالة خالو علي شجابها لعندج ؟

خزرتها : شمدريج هاي لخالج علي ؟

موجود اسمه عليها بخط خفيف الظاهر هدية احد مهم جايبها اله مخصوص ومطرز اسمه عليها .

باوعت للغترة باطرافها فعلا مكتوب اسمه بخط خفيف كوة يبين تفاجئت . باوعت لهيام بعدها تباوعلي وتضحك .

كالت خالو علي شنو يسوي بغرفتج هو يجيج .

انصدمت من كلامها خزرتها وبحديه : شتقصدين ولج ؟

_ مو قصدي شي بس شسوي الغترة يمج لازم اكو سر .

_ تربية سز اطلعي بره وديري بالج تندكين بيه هيام ترى خالج علي انطاني الضوء الاخضر بالتعامل وياج
وكلي عرفي شون تتعاملين وياهه واني عرفت شون اتعامل وياج .

_ جذابة خالو مينطي بيه اصلا هو ربانه .

فريت ايدي : اي شون تربية سز ..

كالت بحماس : هاا تقصدين على خالو ربانه تربية سزز
اله اكوله عليج .

_ لا عيني انت خالج مارباج لو مربيج جان صرتي نفسي ريلي ومهيب ولهيب بس انت تربية امج وبيبيتج .

_ بسيطة فرررح هالكلام راح يوصل الهم

_ دطيييري ولتنسين لمن توصلي الهم خلي عليه ملح وبهار صارت سوالفج معروووفة .

مجاوبت وطلعت تمشي وتتلفتلي وتبتسم .

اخذت الغترة وخليتها بصدري وخليت فوكاهه الشال
خلي اروح اوديها لعلي الدر .

طلعت من الغرفة وداافوت من غرفة ريلام
شفت هيام بيدها الموبايل ودتخابر
وسمعتها كالت هلو خالو شلونك بعده مهيب يمك ؟
هاا ، اكولك خالو اني مخابرة دااكولك فد شي خطير .

نزلت جوة وبعد ما اهتميت الها

واني جوة ومااحس اله شي نبت بظهري .

التافيت شفت الحجية ومنبته عوجيتها عليه .

وكعت الغترة مني على الكاع ..

كالت يلماتستحين شعندج تفترين هنانه عيب عليج صعدي لغرفتج حموينج بالبيت وولد حموينج مو رجلج بعد كبره اخضر .

دنكت اخذ الغترة هي خلت عوجيتها عليها
كالت شنوو هاي وليش ضامتها شعندج ولج ؟

وخرت عصتها واخذت الغترة ووكفت
كتلها انت مو تكليلي مخبلة لا ع المجنون حرج .
عفتها تدردم ورحت ادور الشيخ بس ملكيته موجود .

للعصر سمعت بي اجه اخذت غترته ونزلت شفته بالطرمة ، جان يتمشى ظهره عليه ومخلي اديه
وره ظهره ويحرك بخرزات السبحة ، التفت وصار كبالي باوعلي ودار وجهه .

تمشيت وصرت يمه ، قربت الغترة اله بدون ما احجي
باوع للغترة وكال شنوو هاي ؟

اكتفيت بكلمة وحدة : مالتك ..

اخذها من ايدي واني اريد افوت للبيت احس هم وانزاح مني ، بس هو اجاني صوته صاح فرح
التفتت عليه واني واكفة بباب الاستقبال .

باوعتله كال حضري الولد يريد يجي عمه يشوفه .
فتحت عيوني مصدومة : عمه ؟ ياااعم منهم ؟

بتعجرف كال :  حسان ..

احس انفجارات صارت بداخلي من العصبية
والي زاد عصبيتي ظهور حسان المفاجئ وجان بيده
تليفونه ، ويباوعلي ويباوع للغترة الي بيد الشيخ والي انطيتها اله قبل شويه .
باوعلي بحقارة وكال : اي اريد اشووف ابن اخوي خو ما عندج مانع ؟

للحكاية بقية ..

تهديد اذا ماشفت تفاعل ع البارت باجر مانشر 😐😂