رواية هذيانٌ بين جمرٍ وجليد ..(ارملة اخي المجنونة) الفصل الرابع عشر 14 - بقلم نورا ناصر

السلام عليكم
هذيان بيج جمر وجليد
نورا ناصر
الفصل العاشر

فلربما كان الجليد في قلبكَ
وبنظراتها وهذيانها..
يبدأ بالذوبان
فلربما تحتدم الصراعات
وتشتعل نيران الأنتقام..
ونكون في خضم نزاعاتنا
هناك نبض يخالفنا
يسير بما يشاء ..
يصر على أن يُضعف مانريد
ياترى ماذا تُريد هيّ..
وماذا يريد هوه..
صامت ..جامد ..قارىء
لعيونها ..
يشعر يوماً ما ..
بأنه سيصاب بعدوى
الهذيانُ بحبها..
بقلم الكاتبة ( umjoodi123)

فتحت عيوني منقرفة منه ومن صوته ووجوده كله
الكره الي بداخلي تجاهه يفووق حجم العالم كله
اكرها واموت منه ومحملته سبب قتل حمدان .

باوعتله خازرته وحتى نسيت وجود علي الدر يمي
كتله بنبرة كلها كره : اي ماتشوفه مستحيل اخليك
تشوف ابني وانته قاتل ابوه .

هو تقرب وصار يمنه كال : قاتل ابووه شنو ولج احتركي نفسج اني اقتل اخويه شلج بهالحجي هذا
ليش مو انتي السبب .

_ لا والله انته والكل يدري والكل ساكت . همين وابني تحلم تشوفه وتحلم تلزمه وبس يكبر اخلي ياخذ ثار ابوه منك يا.

صوت اخترق اسماعنا بوحشية : بسسس كافي مااسمعلكم حس جاي تتعاركون كدامي ولكم ليش تخلوني هسه اسمعكم حجي مايعجبكم .

سكتنه اثنينه وهو اردف : حسان فوت جوة بالاستقبال وانت فرح روحي جيبي الولد وتعاي بسرعة .

اريد اعترض حركت شفايفي ، باوعت لعيونه
نظراته اخترقت كل اعماقي وخلفت خوف
افترس كل خلايا جسمي .

دنكت اتهرب من نظراتي تمتمت : نايم هسه ماكعده من ينام اني خلي يروح حسان هسه عود غير مرة خل يجي ويدلل .

صدح بصوته القوي وبنبرة عنيفة
جذب لااا تجذبين ولج باوعي وشوفيني انا رجال وتعبر عليه سوالفج ؟؟ روحي جيبي الولد كتلج وهسه بسرعة خلي يشوفه عمه ويروح عدنه شغل لا تأخرينه .

باوعتله بنظرة باردة عكس الي بداخلي وبعدني واكفة ومعاندة .

رفع اصبعه السبابة باتجاهي : شوفي انه اكدر اصعد واجيب الطفل بطريقتي مو صعبة عليه ، بس انتي راح تجيبينه وتنفذين الي اكلج عليه وبسرعة يله .

ميخالف صح اني مامجبورة انفذ بس هم ميخالف كولي منو كتل حمدان وهسه ركض اروح اجيب دانيال واحطه بحضن حسان حتى لو هو كاتله .

لا انتي ما تتشرطين عليه وعندج تلث دقايق بس!!! ترحين وتجيبين الطفل للاستقبال بمكان ماكعد حسان خلي يشوفه ويروح .

اني امه واني من حقي اسمح لمن

بحديه وقسوة بتر كلامي : واحنه اهله ومسؤؤلين عنه حتى اكثر منج وانه متأكد اذا بيوم اخذتي وطلعتي من هذا البيت راح ترجعين ندمانة .

ليش انت واثق الهالدرجة ؟ هاي مجرد تكهنات مستحيل اني ارجع لهنا بعد مااخذ تذكرة حريتي واطلع مستحيل .

كال ببرود وملل من حواره البلا فايدة وياي
لا مو تكهنات هذا يقين انت ماعندج القدرة على تربية هذا الطفل بدون مساعدتنه احنه .

باوعتله باشمئزاز كززت على اسناني مغرووور متكبرررر هاي موو ثقة هذا غرور غروور اكرره غرورك اكره تسلطك اكررهك . تمنيت هالكلام يوصل لاسماعه .
ويمكن هو قرا كل الكلام الي كلته بقلبي والي نرسم على عيوني .

سمعت صوت دانيال بالاستقبال ركضت شفته بحضن حسان مطلعله لعبة ويلعب بيها شهكت اريد افوت اسحبه منه انجريت من ملابسي .

باوعت شفتها بلقيس خزرتها واني اسحب نفسي منها
كتلها منو سمحلج تجيبينه اني امه.

الشيخ كال بغموض صعدي لغرفتج احنه نجيبه الج ولاتسوينها قصة .

ظل يتأملني بسكون وكانه يحاول يستخدم قوة شخصيته حتى يجعلني طوع ايده .

مديت ايدي لخدي مسحت دمعة خانت صلابتي ونزلت

دخلت للاستقبال سحبت دانيال من حضن حسان وشمرت اللعبة من ايده وطلعت اركض وصعدت لغرفتي جسمي كله كله يرجف بعد شويه ويوكع مني دانيال ع الدرج كوة تماسكت .

((من قاموا بسرقة هدوئي ،، يتهموني بأني مجنون ))

مهيب ..

بقيت انتظر منها اتصال رسالة رد على رسائلي بس ماكو اي اجابة تريح كلبي وتطفي النار الشاعلة بيه .

كلما يرن التليفون انتفض وتنتفض كل حواسي
عبالي هيه ، ويخيب املي .

تخابرني عمتي وتستفسر ليش تركت البيت اطلع لها حجج وماا اجاوب السبب الرئيسي ماريد افتح عليه لأن اعرف موقف عمتي والحجية بخصوص هذا الموضوع قافلين .

اروح للبيت اسلم عليهم واشوف ابوي شيريد وشمحتاج وارجع وهو هم عاذرني ومخليني على راحتي .

من اروح للبيت ادري بيها تحبس نفسها بغرفتها وماتطلع ، واني اهيء كل حواسي حتى بس اسمع صوتها واذا صار وسمعته گلبي ينمرد .

صار الاربعين مالة عمي حمدان الله يرحمه ورحنه كلنه وشفتها ، وهي تتهرب من كل شي يخصني
تتهرب من نظراتي من قربي من الاصغاء لكلامي
لمن احجي وي احد وتشغل نفسها غصب .
تلعب داني تحجي ويه فرح تخابر اي شي المهم
ماتحس بوجودي المشكلة اني ادقق بحركة منها
واحس نفسي مفضوح مفضوح .

شفتها اخذت دانيال من فرح وتوجهت بي للسيارة
اني جنت اراقبها واترصد كل حركة تبدر منها وممهتم
اذا اي احد ينتبهلي .

تبعتها وصحت عليها : ريلام ريلام .

هي التفتت الي خزرتني وكملت طريقها ..

رحت وراها تريد تصعد بالسيارة قطعت عليها الطريق وكفت بباب السيارة ومخليتها تفووت .

كالت بزعل شكوو ؟

ابتسمت : شونج عمري شخبارج ايدج شلون صارت ؟

معليك بيه ولاتكول عمري بعد اني مو عمرك ..

ابتسمت ليش انت مو تكولين اخوج اني وعادي الاخ يكول لاخته عمري ترى ليش ضايجة انتي بلله .

بشبح ابتسامة ردت: يعني انت هسه مقتنع اني اختك ؟

هزيت راسي : لللللاء .

ادرفت بسرعة : لعد شيسموها هاي ؟

ميسموها بس اني مشتاقلج والله فوك متتصورين ومشتاق احجي وياج بس انت حيل خبيثة وحمارة.

شحت وجهه مني : بس اني كارهتك وضايجة منك حييل ومصدومة بنفس الوقت .

ريلام انت منو يقرا براسج عليه بس فهميني ؟

باوعت لعيوني وتأملتها بدوري بعمق
شنو هالكلام مهيب ترى محد يقرا براسي شلك بيها هاي بس اني ماكدر اعتبرك غير اخويه وهاي يمكن للمرة الالف داكولها الك .

اجت هيام قطعت حديثنا اني وخرت وخليتها تفوت للسيارة وتخلي دانيال نايم على الكشن .

هيام مبتسمة كالت مهيب شوكت ترجع للبيت .
جاوبتها بحدة : بعد مووو هسه .

ريلام كعدت يم دانيال بالسيارة وتلعب بشعره
صفنت عليها ثواني شفتها رفعت راسها تباوعلي
لمحت بنظرتها وميض دافي ريحني شوي
بس ماكدرت افسره هل هو شفقة او بداية حب ماعرف .
عفتهم ورجعت .

ورى مارجعنه بيومين خابروني من مركز شرطة
كالوا عمك شرار متعارك وشامرينه بالسجن .. هذا يمشي ويعارك .

خابرني صديقي ضابط من المركز وخلاني احجي
ويه شرار .
حاجيته كالي لاتكول لابوك الشيخ بس تعال توسطلي وطلعني ..
ضحكت بصوت عالي واني شمتان بي
وكتله هسه جاي لك ... حركت السيارة وطلعت للمركز الي بي هو ، دخلت على الضابط ، سلمت عليه ، حجالي وضعه كال متعاركين هو وجم واحد ، كرفناهم وشمرناهم جوه بالحبس .

طلبت منه اشوف شرار كال بخدمتك تفضل .
كمت من يمه وتبعت الشرطي لحد المكان الي محبوس بي شرار .

باوعتله وضحكت بشماتة هو شافني ابتسم
كال تااااج راسي ..

رجعت ضحكت : تااج راسك مو ؟ هسه صرت تاج راسك لو بدت اللواكة .

ظل يهز راسه شفته مجروحة وطالع دم وميبس عليها
يم حاجبه دم ميبس همينه .

كتله شبيك شجاك عبالك الكاع مانخلقت بس الك ماكو احد غيرك على وجه الدنيا بس انته تمشي وتعارك بالوادم .

عالم متستحي وماتنطي صبر علما احرك السيارة واصفها بمكان بي خير لاع ايدهم والهورنات طوط اله ماطووط .

هه تعلمني بسوالفك .

لك فاتتك مهيب شون كتلتهم كتلة خليت واحدهم يطفر بالهوا مثل العتوي الطاكينه جلاق ..

اي اي صدكتك اشوف وجهك صاحي لا ضربة على عينك لا على حلكك لا على خشمك .
ولك خاف جنت تمشي ورى موج وكتلك واشتكت عليك وشمرتك بالسجن اني سامع من ريلام هي مدربة .

ضحك بعد عيني طلعت مدربة ام عطوب .. ديله طلعني منا .

عفن عفن هنا...
حوبتي هاي تحرگ بكلبي هسه صارت مصلحتك عندي

اشر على روحه بصدمه : انيي شوكت؟ وروح حبوبتي بالعكس دوم احمد بيك كدامها

_ لعد ليش تخبث عليه وتسوي عكسي

_ صدك جذب لك عمي رويله متصير غير الك غير اذا تزوجت غيرك اذبحها هي والعريس .

_ بحياتي ما شفت مثلك عم نذل هسه راح تصير الي ومتصير لغيري لعد وين قائمة العرسان الي تطلعها الها وين كل حجاية والثانية مهيب اخوج واحترمي ومن هالخريط مالتك .

_ واني بحياتي مشفت ضابط اثول مثلك روح اعترف بحبك لريلي وفضها ليش هالكد حاقد عليه .

يابه غير انته ماتدري اعترفتلها سوته حب محارم وخلصتها عليه اخويه واخويه كرهت حتى لهيب
من وراها وبعدين اذا انت هيج مستسهلها اعترف لموج بحبك .

بصدمة جاوب : منو كال احبها ام بنطرون المشكك بنطرونها كارطته الفاره انوب طلعت مدربة لا تبرز مواهبها عليه مالي خلك .

_ اكلك انت راح تخبلني يوم تحبها يوم تقلد عليها ارسيلك على بر .

جر نفس وباوع الأظافره...اي مو حب وانما اعجاب من تلبس بنطرونها يروح الإعجاب هههه

_ تحبها والله بس متريد تعترف الي مو لنفسك تخاف تتزوج وتفشل مثل زواجك من الروسية ، كبريائك
الي مانعك من الاعتراف عكسي اني احب ريلام بكل كبريائي واذا خسرتها اضييع

جاوب بضحك : عود نصيح باسمك بالجامع ونلگاک .

_ اضحك عود من تزوج موج ضل الطم وشغل اريد اكابل ملايه الطم وتلطم ويايه.

جاوب بجديه...لا صدك اني ما اعرف حياتي بين مد وجزر ساعه اكول هي موج الي ترتب حياتي ساعه اكول لا مجرد رغبه ما الي بيها شي

حطيت ايدي على كتفه وبمزح
_ اكلك عمي ننتحر مو احسن .

_ ما ننتحر وحدنه هنه ويانه لعد منو يونسنه بنار جهنم خو ما ابو لهب .
ضحكت كمل : راح تكضيها ضحك دتوسطلي يم صاحبك الضابط لو انطيتي جداحة وباكيت جكاير
خو مانظل هيج .

_ تؤ ، كتلك عفن هنا حتى بعد لا تستهزأ بيه وتكبر راس ريلام عليه وتحشي مخها بسوالف تافهة .

عفته يدردم وطلعت ورى يومين يله سويتله واسطة وطلعته من الحبس .

** ** **

لهيب ..

طلعت من الحمام بعد ما لفيت المنشفه على خصري والخاولي انشف بي شعري ...

والدنيا طالعه من عييني كرهت حتى ابووي من وره هديوه ام لسان وصخ .

لا والله جديات حتى لو اني غلطان بس ميصير هيج اني انسان دارس والي مركزي تجي هديوه الهمجيه تصير مرتي

والله ما اعترف بيها لو يطلعلها كرون وتضل تنطح ما ضل عليه بس هديوه

حتى مو مثل العالم لا حضرت ملابس ولا اي شي هم عوزها اكشخ لسحيله ام الخراگين

دخل شرار وشايل بيده قاط بعده بالتعلاكة وبالجيس

فراها بيده باوعتله مستغرب...شنو هذا المن هالقاااط

رد بسرعه : الك يا عموو حبيبي اني ناذر من تخطب قاطك عليه

احتدت ملامحي وعقدت حواجبي : انت ليش خبييث امووت واعرف حبوبتي تنست بيك لحم جلب ؟ لا والله تروح فدوه للجلب

جاوب بعدم اهتمام : انجب لك اتنست بلحم اسد ما تشوف بيه من صفات الاسد ابو غضنفر اني

هنيالكم عليه طيبه وجمال وادب واخلاق لو تدورون العراق كله ماكو عم مسحول وساحل ولد اخو مثلي .

خزرته ورجعت ارتب بملابسي واباوعله من بين لحظة للثانية بعدم رضى .

غمزلي وهو يحجي : اشوو من هسه نازع الملابس شنو تريد تهجم

نفخت بضيق وباوعتله بقهر : اهجم على امة محمد كلها اله هديوه لو تموت ما احقق حلمها هي وابوها الهمجي

ضربني على كتفي : لك شبيها حلوووه صح استايلها استايل السبعينات بس عادي انت جيبها وخليها بالالفينات .

فركت وجهي بتوتر واخذت القاط رحت بدلت بالحمام لبسته جان قميص ابيض وبنطرون اسود وستره سوده...

طلعت بره مجان اكوو ناس ولا احد يصفك ولا ركص ولا اي شي لان جنا حزنانين على عمي حمدان الله يرحمه

طلعنه زفه لاهل العروس عشتو عرس عليها جني ان شاء الله

واني جنت ما طايق روحي وشرار ومهيب كل شويه ودكوا عليه...ولهوبي رايد رايته وعايف بنات ولايته

ومنين جابوك يمشمش كربله ولهيب جكليت وهديوه نستله

ضجت منهم حيييل وذول اهل سحيله طريقهم طوويل عاد شسويت حطيت السماعات وشغلت لطميه وعليتها على اقوى شي.

....

هدى ...

اجييت من الصالون واني فرحانه بالبدله والمكياج والمع وام الصالون خلصتها عليه تخبلين وتجننين واني مصدكه...

جانت الملابس الداخليه الي لابستها لونه وردي طووخ ولبست البدله سمائيه طلع من البدله كالن غيري اني ما عندي بلون البدله كلت يالله المهم وجهي حلو

اجه خالي اخذني ومكيف مشغل اغاني بالسيارة

وصلنه للبيت وجهال المنطقه كلها تتراكض وتصيح اجت العروووس وخرت البرنص شويه شفت النسوان فاتحه البيبان ويباوعون عليه عبالك جايتهم شهد الشمري..

دخلت للبيت تلكتني زوجة ابويه تطشر جكليت عبالك حصو يااابس ...

كعدت على القنفه طالبيها من جيرانه وابوي يفتر ويصيح مدري شبي عايش الدور اول مره يصير عرس ابيته

وكل شويه وتعاركوا هو ومرته على الكيك والببسي تاليها ركعها بالقوطيه وهي ضلت تدعي عليه...

شويه واجت الزفه محد جاي بس نسوان كبار ويتبسبسن عليه

سمعت وحده منهن كالت...جااا لهيب ابن الشيخ من روسيا للحواسم هههه

عود منطقتنه حواسم مبينين يهتمون للطبقه والفروقات..

شويه ودخل ابوي فرحان كال : هلهلوا هلهلو وافق الشييخ وابنه

عاد هنه ضلن يصفكن ويركصن واهل العريس بس صافنات هم ماجايبن وياهم بس عجايز..
بس جيرانه واقاربي ذبن لحم ممصدكات...

اخذوني اعقد بالغرفه الثانيه وشويه ودخل هو وابو وشيخ يعقد اني من شفته خفت لزمت ايد ابويه كتله _ بويه فدوه غيره هذا ما اريده اريد غيره...

خزرني بقوه كال : انجبي ولج شنهي ماخذ للسوك مشتريتلج نعال واغير بكيفي انه ما صدكت قبلوا

جان يحجي بهمس بس الظاهر دخان مدري عطاب مدري لهيب سمعني ضل يخوزر بيه...

عقدنه وكملنه وطلعنه بره بعد ما انطوني البياض

كعدنه وهو كعد بصفي بس ولا اهتم اليه عبالك ماسحه مكسور العود مالتها ومشموره...

عاد اني هم ما اهتميت على شنو يتعيقل فوك ما رضيت بي شو الكل يتمناني...

تقرب مني وهمس ..اكو وحده تلبس الست***
مو بلون البدله

انصدمت وحطيت ايدي على صدري والله عيب كله من مرة ابوي العووبه شسوت بيه

رجع همسلي كال...اكول مدام جنج ما راضيه بيه

رديت عود كلت خطيه ما افشله واجرح احساسه ومشاعره...
_لا الحمد لله على كل حال انت احسن من غيرك

جر نفس كال : ساعة السودة الاجيت بيها الكم وسويت عمل خيري ويني وين الاعمال الخيريه

جاوبته بعصبية ؛ شقصدك ابتليت بيه موو ؟؟

رد باندفاع : الحمد لله طلعتي تفتهميين

همست بداخلي : مو غبيه مثلك ...

يا ربي هذا مبين متعجرف ومغرور ومتغطرس امداني قبلت بي كله من ابوووي .. شهالورطة هاي من صدك مقهورة على حالي ...

.....

موج .. كل يومية واني بطريقي للجم اشوف اوس
مرة وكف يم السيارة وظل يشمر حجي وغير عن هذا يراسلني من حسابات مختلفة ويدز صوت عبالك واحد سكران ويحجي يتغزل مرات يفشر واحظره وهم مايفيد .

قررت اسوي حساب ثاني بس وهمي مااخلي لا اسمي ولا صورتي لان تعبت حيل منه وفعلا سويت حساب
وضافني كل البنات الي ادربهم بالجم وسوينه كروب جديد .

فد يوم كملت تدريب ورجعت للكراج ، دااخذ سيارة بابا واروح للبيت ، اني اطلع بيها ومرات احمد يوصلني اذا ماعنده شي مرات اني اروح .

لمن دااخذ السيارة تفاجئت بسيارة اوس اعرفها اني كلش زين ، صايرة ورى سيارتي بحيث ابد ماكدر احرك السيارة واطلعها .
ضجت حييل ورحت للولد كتله وخر هاي السيارة خلي اطلع سيارتي .

كال عذريني ماعندي السويج مالتها يم صاحبها .

انت شون تخلي يصفها هيج ماتكلي ؟

عيني على كيفج لاتعصبين ترة الكراج كله الهم وهذول جماعة مسنودين ويخوفون اكدر احجي اني ؟ تردين روحي للمدير كاعد هناك بذيج الغرفة احجي ويا .

ياااربي من صدك عصبت ...... طلعت تليفوني خابرت احمد شكد رررن مايجاوبني ابد ..

خابرت انو سألتها عن احمد اذا بالبيت كالت لا مموجود ..

شون اني ابقى محبوسة هنا بالكراج حتى خفت وصارت الدنيا ليل ، خليت وطلعت على الشارع ..

خابرت سالم ابن عمي كال والله اني خارج المحافظة اني وابويه ..

من صدك نسدت بوجهي من كل الجهات .. ظليت اكل بأصابعي ..

اخذ تكسي واروح للبيت ؟ المشكلة عندي فوبيا من التكسي ..

اني اندل المطعم مالتهم لان مرات بطريقي للجم واني امشي يفوت عليه ...

قررت اروح افوت وافشله كدام الكل اكوله كوم وخر سيارتك منا يله .. وظليت احضر الكلام الي راح اكوله
طول الطريق .

صعدت وظليت ادور بين الطاولات على اوس النذل الحقير شكد انقرف منه ...

حتى ركبتي انكسرت واني اباوع للعوائل وحتى فشلة ..

وجان اشوفه كاعد على وحدة من الطاولات بس مو وحده يمه الطنطل شرار وحسان المغيث .

يتبع ...

البارت قصير اعرف ومو بالمستوى واني جيت اقفل بمصيبة بس مالحكت ابد العصر كله اني مموجودة بالبيت . باجر استراحة وبعده نكمل .