رواية هذيانٌ بين جمرٍ وجليد ..(ارملة اخي المجنونة) الفصل الثاني والعشرون 22 - بقلم نورا ناصر

السلام عليكم
رواية هذيان بين جمر وجليد
الفصل السابع عشر
نورا ناصر

*******
وما تمردي الا لأني ذقتُ طعم الخذلان..
وأني أعاني حالة من الهذيان
لا أجد مستقراً لنفسي
وعقلي..
الا بنظراتك الحانية..
قليلاً ما أراها ..وأتمناها..
أن تغلفني
لأشعر بقليل من السكون
بداخلي والأطمئنان..
أنا مجرد لوحه لمتاهة عقل مصاب بالجنون..
لا يعرف جماليتها
الا أنت ..
أنت وحدك ..
لربما توصلني لبر من
الآمان ..
بقلم الكاتبة umjoodi123
متابعة لحساب الكاتبة لطفا 😍

*********

تقربت منه خطوات واسعة اباوعله بذهول وصدمة
وهو يباوعلي بملامح مستفسرة وحادة ودانيال بين اديه ..

وجهتله كلامي بعصبية ظاهرة وعيوني على ابني واديه بالهوا ممدودة اريد اخذه لحُضني ..

_ لحظة ، لحظة مهيب شدتسوي ؟ ومنين طلعتلي انتَ ، شنو مراقبيني انتوا ؟؟

جاوبني بحدة : امشي وياي فرح وبدون عناد ، ابوي ينتظرج بالسيارة عنده موضوع خطير يخص قبر عمي حمدان واكيد انتي مايخفى عنج هالموضوع .

رديت بصوت مرتج : جيب ابني مهيب ، وبعدين شسويتله عمك حمدان لا حركت جثته ولا شمرته بالشط طلعته من كبره ودفنته بغير مكان .

بنات عمتي جانن يباوعن لمهيب بأعجاب وانبهار ، من سمعن كلامي ظلن يباوعلي بصدمة ورهبة ..

كملت كلامي بهمة : هاي فوكاهه بعد سويت عنكم شغل يتعبكم جايين تاخذون ابني مني وتذلوني .

جاوبني بنبرة صادمة وضاغط على اسنانه وهو يبعد دانيال عني
:- كلي لابوي هالحجي وامشي وياي يله ....

بنتر رديت : ووين امشي وياك ووين ماروح مهيب جيب ابني جييبه ..

هو تجاهلني وطلع كبل وتحول بيب بيب وين اكدر اوصل اله خطوه هنا وخطوة هناك .

واني حتى مهتميت لبنات عمتي تركتهن ومشيت عنهن وتبعت مهيب الى ان وصل للسيارة .

شفت الشيخ واكف ومبين على هيئته الغضب والعصبية ، وكفت ثواني اتأمله بعناد وتحدي .

شفت ابن عمي 'سالم' نزل من السيارة يعدل بتراكه ومبتسم باحراج ويتجنب يباوع عليه ..

اتسعت عيوني بصدمة رفعت طرف الصاية
وركضت متوجهه اله بدووون وعي وقبل لا اوصله
عطت : تتتتتتف عليك ياعار يا خسيسسس .
هيج تنطي بيه هيج تخوني ياااسافل .
عسى الفلوس الاخذتها تصير زقوم ويموتك .

هو من بعيد رافع ايده و كال عذريني فرررح جبرووني وهددوني
والله وخلوا السلاح براسي!

داا اضربه لزمني علي الدر بقووة من ايدي
باوعتله بحقد واضغط على اسناني .. وهو يباوعلي بنظرات غضب مكتوم تعكس جهنم الملتهبة الي بداخله .

تراجعت عنه مبهورة الانفاس ، وشتبكت نظراتنه بلحظات عميقة غامضة ، وجبرت نفسي اباوعله ..

ورفع تك حاجبه وبلهجة استبدادية تكلم : ماتشوفين احنه بالشارع هسه مو بالبيت حتى تطلعين صلافتج رعونيتج وخبالج !

فوتي يله ... اشرلي بحاجبه وراسه باتجاه السيارة ..

بعدت نظراتي منه واحاول افك اسر ايدي الي اسرها
بقبضة كفه الحديدية .

تمتمت : ما اروح وياك لآي مكان اترك إيدي وجيب ابني وخليني ارجع لبيت عمتي .

ضغط على اسنانه بحدة ، حسيتهم حيتكسرون من شدة غضبه : لااء گتلج ماترحين غير وياي لاتخليني اجبرج واحنه بالشارع .

جانت عيونه تأمرني بطريقة غريبة وقاسية
باوعت على دانيال شايلة مهيب .
رجعت باوعت ع الشيخ وبنتر حاجيته
انطيني ابني بالاول .

بغطرسة رد : عوفي ابنج يم ابن عمه وصعدي كدامنه طريق طويل كلما نتأخر مو بصالحج تره .

حسيت گلبي غاص بمكانه والدم تجمد بعروگي ، صفنت بوجهه ثواني بذهن شارد ومادري بالنية الي ناويها عليه .

صعدت للسيارة وماكدرت اكمل اعتراضي واحتجاجي
... وهو ضرب سالم على كتفه
وكاله يله انته خلصت مهمتك وين تريد تروح روح .

جاوبه سالم : لا شيخ والله ماكو فلس بجيبي وصلوني لبيتنه لو انطيني كروة ع الاقل .

جاوبه بحده : حير بروحك ..

وصعد بالسيارة كدام ومهيب طب يمي كعد
دانيال شمر نفسه عليه ، حضنته وابوس براسه واباوع لجبل الجليد سابقا الجبل البركاني حاليا . محتل مكان الصدر بكل عظمة وجبروت .

وكأن جمري اذابَ جليدُه .. !!

انطلقت بينا السيارة وجان الكل ساكت .. ماعدا دانيال الي جان يتمتم بكلمات مو مفهومة وهو يأشر ع الجامة ويباوع للطريق وللسيارات ومايدري بلي يجول براس كل واحد منه !

وصلنا لبيتهم وصدمني لمن كال للسايق
توكل ابو محمد روح انته تعبان من الصبح ويانه روح لبيتك ارتاح ..

نزل السايق وهو همين نزل .. باوعلي وبعدها لمهيب
وكاله : مهيب اخذ دانيال و انزل .

انطيت دانيال لمهيب وهو نايم حبيبي ، اخذه ونزل وداانزل اني همين هو كال لا انتي ابقي بالسيارة ما مسموحلج تنزلين ..

انتفضت وهتفت : شنوو ليش لعد شسوي باقية هنانه ..

زمجر بغضب : انتي راح ترحين وياي ..

دا اجاوبه توه حركت شفايفي وهو عاط بمهيب فووت جوه باردة الولد لايبرد ..

داانزل هو سد عليه الباب بضخامته وطوله الشاهق رعبني حسيت معدتي تحولت الى نار مأججة تحرق قلبي وكبدي وكل جوفي ..

سألته بنفاذ صبر غاضب : وين تريد توديني شتريد تسوي بيه ؟؟

لزمني من زندي ورجعني لنص السيارة بوحشية
بيده الضخمة القوية . وسد الباب بكل قووته .

صررخت ابني اريده ابببني ..

هو صعد بمكان السايق والتفت عليه
عيونه تشع ببريق انتقام وحقد
واردف بنبرة خطيرة وقاسية .. ويشدد على احرف كلماته ..
_ ابننننج يم اهله ومو زين عليه احنه رايحين للمقبرة هسه مو خليتي يم اهلج ورحتي ! اتركي يم عمته والبنات يهتمون بيه .

بانفعال صيحت : واني شسوي رايحة وياك للمقبرة شعندي رايحة ..

حرك السيارة وطلع بيها ، قربت منه احاجيه ..
جاوبني شسوي رايحة اني للمقبرة شسووي بعد ؟

جاوب بخبث وبرود واستهزاء وهو يباوعلي بالمراية
: تدليني على قبر اخوي المرحوم ما اندله مو انتي دفنتي ؟ بدون علمي ومن وراي اخذتي شلة تعبانة ووليتي ؟ هسه دليني .

_ اني كبر امي ما اندله رجعني ررررجعني ....

_ لا شون مو انتي عود صايرة سباعية و دفنتي حمدان بيدج شون ماتندلينه عبالج ماادري بسالفتج الي سويتيها ..

فلوس المؤخر مالتج انطيته الج رحتي توزعينه على العارات مو ؟ وتردين تربين ابنج بعيد عنه ؟ انت تطلبين المستحيل .

_ لا لهنا وبس كافي تحملت وتعذبت وياكم هوايه ولهنا وحدك ويايه وكبر اخووك انساااه مثل ما ضميت عني كتاااله اني هم مادليك القبر فلا تتعب نفسك ورجعلي ابني ووديني لبيت اهلي .

ابتسم بسخرية وهز راسه ووجه نظره للطريق ..
تكلم بغموض : فرحي روحج بهالحجي خوش ، سككتتلج هواي بس هاي الفعلة ابد ما اسكتلج عنها
انه ادري بهاي سوايتج ردتي تكسرين حجايتي وانه محد يكسر حجايتي مو تجين انتي وتتمردين عليه
مامسموحلج .

ظليت احجي واضرب على رجليه ...
_ ادري شسويت ماتكلي شسوويت ؟ انته جنت مسافر وحمدان حيروح كبره ورحت طلعته فوكاهه بعد .

_ اي فوكاهه مووو ؟ وتمنننين عليه بعد هو انتي منوو عاتب عليج ولج والله كون الله يمسخج ويسويج رجال حتى اعرف شون اتصرف وياج .

_ شون تتصرف وياي بعد شوون ؟ اكثر من الي دتسوي بيه اكثر من سجنك وحبسك الي اكثر من اذية اهلك وطعنهم وانته ما دتوكفهم عند حدهم بعد اكثر من هذا شنوو ؟

جاوب بوعيد : اصبري على رزقج لا تستعجلين وهسه تشوفين شنو الاكثر من هذا حتى مرة ثانية بعد لا تتجاوزين على حدودي .

باوعتله بالمراية وهو هم باوعلي رافع تك حاجبه
نظراته رهيبة ..

سكتت عنه احسن شي اسكت الجدال ويا مايجيب نتيجة ..

هو اني ممتعودة اسكت بس تعبانة حييل والنعاس غلبني ، فكرت بدانيال خطية حبيبي هسه يمكن يستغرب ويبجي عليه هو صار يفتهم عمره سنة وشهرين .

يله هو يحب ريلام ومتعود عليها حتى يغفى على ايدها ، تذكرت اخر مرة شون عصبت عليها وطردتها والله متستاهل احبها اني بس جنت مو بوعي احس العصبية مكان عقلي .

ماحسيت بنفسي لمن غفيت ، شعرت بنظرات قوية تخترقني فتحت عيوني ، اجت عينه بعيني ، ارتعبت وعدلت نفسي .

جان موكف السيارة بالمقبرة ونازل منها ويباوعلي من الجامة بنظرات الغضب والوعيد .

سويت نفسي مو خايفة وتمططت وتثائبت وخليت ايدي على حلكي .

فتح الباب الي يمي وكال بحدة نزلي يله ..
نزلت ببرود اباوع باتجاهات مختلفة واتجنب لوجهه ونظراته النارية خايفة تحركني..

الهدوء مخيم على المكان
الوكت عصر والشمس حتغرب بعد شويه
الجو بارد وهوا عالي ، طير طرف البشت مالته
مثل ما طارت الرحمة من قلبه .

حسيت برهبة استعمرت كل كياني .. واني مااعرف شراح يسوي بيه هالمتجبر المتغطرس ، لا والف لااا
اني اليوم ناوية اجننه ويايه ..

تكتف وظل يباوعلي ويأشرلي على الكبور
يله دليني وينه اخوي الي طلعتي من كبره ؟

حجيت باستهزاء : عوفه نايم بقبره ومرتاح انته شبيك متعصب ؟ هو قابل حركته قابل شمرته رجعت كبرته وهو اصلا مكبور بعد شكو .

تقرب مني واني درت وجهي منه
همس بفحيح : شوفي من بين كم قبر بالمقبرة اكدر اطلع اخوي بس انه ماريد غيرج يدليني وهسه .

التفتت اله بعناد وتحدي وكتفت اديه : مادليك على قبره وحدة بوحدة لانك ضميت عني تفاصيل مقتله وهاي تعادلنه ياشيخ .

سحب نفس بحنق وعيونه شبه مغمضات وضغط على اسنانه وبعدها نظرلي بنظرات مرعبة
وصار مايفصلني عنه غير انش واحد ..

وبتشديد جاوبني : ولج انتي شلج بهاي السوالف ؟ شنو غايتج ؟ .انتي تردين تسوين مشاكل انتي تردين تعيدين المأساة تردين حمدان كل ساعه ينلعن ؟

بصدمة جاوبته : ليش ينلعن هو شمسوي ؟ قاتل واحد مثلا ؟

جاوب باقناع : اي قاتل قاااتل ارتاحي ...

لطمت صدري وشهكت : عزاااا المن قتل هاا كولي المنو قتل ليش ماتحجي ليش ساكت هااا ليييش ؟

_ لا تدخلين نفسج بهاي القضية انتي حيري بروحج ربي ابنج وجري عدل ولا تأخرينه كليلي كبره وينه كلما تأخرنه كلما مو بصالحج تبقين بهالمقبرة بالليل .

انطيته ظهري وحجيت بعناد ...
ما ادليك عليه تريد تروح انته روح اندله اني لا ماكولك
والتفتت عليه بعصبية وهاي وحدة بوحدة انته ضميت عني تفاصيل قتله واني اضم عنك قبره .

خله ايده على كتفي ودارني عليه جان يحجي ببرود مخيف ؛: فرح!! انتِ ماتخافين ؟

جاوبته بسرعة : لا ماخاف ..

ها متأكدة ؟

هزيت راسي بأي ..

اخذني من ايدي ويجر بيه ، احاول افك ايدي منه ما اكدر ، يضغط على اصابعي بقوة حتى لا افلت منه ..
ولحد ماوصلنه للسرداب ، جنت اباوع لعيونه احاول اتصنع القوة بس هم خايفة وداخلي يرجف ، نظراته ماتبشر بخير ابد...

تقرب مني وكال تتمردين عليه فرح ؟ تكسرين حجايتي وتتعدين على مسؤؤلياتي ؟

صار يقربني على السرداب اكثر ، التفت اباوع للسرداب جانت بابه مفتوحة وداخله معتم ويخوف وتنبعث من داخله ريحة كريهة .

التفتت عليه لااا يربي هيه تلث مرات حبسني مرة بفاتحة حمدان بغرفة مهيب ومرة من جتي سحر بغرفة مكتبه ، هالمرة يريد يحبسني بالسرداب لالالاااااا .

كال انتي مايفيد وياج غير الحبس والليلة راح تبقين هنا حتى تعرفين ويامن اندكيتي .
دفعني وسد الباب وسمعت صوت السركي ينسحب
يعلن عن غلقه ، العتمة احتلت المكان مثل مااحتلت حياتي الريحة خنكتني .

اول لحظات قررت اكون قوية وماابين ضعفي بس لااا ااا خفت وانرعبت صرت حالي حال الموتى اندفنت واني عايشة لااا يااالله .انقبض قلبي وحسيت بغصة خوف فضيعة ورهيبة .

حسيت اني مو وحدي بالسرداب ...

اجاني نوع من التحذير الي يجيني قبل نوبة الصرع ، اطراف اصابعي نملت وصار صوت رنين بإذني .

وهذا الانذار يجي لمرضى الصرع ينطيهم الفرصة يبتعدون عن اماكن الخطر حتى يتجنبون السقوط
او الاذى اثناء النوبة .

زين اني شوون وشسووي هسه اذا ابقى واكفة هنا من تجيني النوبة راح اوكع جوه ويمكن اتأذى وانكسر
واخاف انزل جوة واستسلم للنوبة واصير يم الموتى اخااااف .

ظليت اضرب ع الباب بقبضة ايدي ..
واحجي منتهية من الخوووف وارجف ..
بروووح ابوووك طلعني بروووح موووتاك طلعني طللللعني اخاااااف والله اخااااف والله طلعني علييييييي !!!!

واني اصرخ سمعت صوت السركي انسحب .....
وشفت خيط ضوة دخل من الباب معناهه انفتح .

وبعدهااااا ماحسيت بشي ..

وعيت على حالي واني بمكان غريب اجهله ..

حدقت بالسكف لدقايق اريد استوعب اني وين!
نص جسمي ما احس بي ولساني ثكيل واحسه ماكدر احركه او احجي واسأل .

انتبهت على نفسي نايمة على سرير ، والظاهر اني بمستشفى ، وايدي بيه مغذي بس ما اكدر احركها .

صارت على راسي ممرضة ، طلت بوجهي واني بس بؤبؤ عيوني تتحرك ، جسمي كله ما احس بي .

حجت وياي بس ما افتهمت شكالت ..

ماجاوبتها ولا اكدر حتى احرك راسي احس مشلولة وحتى اذني بيها وشة ..

غمضت عيوني ، تذكرة ظلمة السرداب والرعب الي اقتحمني بي ، خفت حيل فتحت عيوني واحسها مبللة بالدمع الحزين . استسلمت للنوم او للاغماء مرة ثانية .

الساعات او الدقايق الي بعدها جنت بين الوهم واليقضة ، ما ادري بحالي شنو ، اجت وكفت على راسي ممرضة وخلتلي ابرة بالمغذي .

تحجي وياي شي اسمعه وشي لا ..
اخر كلامها كالتلي الشيخ الي بره شيصيرر منج زوجج ؟

بس اباوع بعيوني وما اكدر اجاوب ..

بعدها دهل الطبيب ووياه علي الدر ، والتقت نظراتنا
نظراته رجعت مثل قبل لا اسوي المصيبة بس وياي شويه شفقة .

شفقة جنت كارهته وكارهتها وبعمري بعد ما اسامحه عليها . والي سواه بيه اليوم مدري البارحة ماعرف الوقت هسه شوكت !

اجه الدكتور فحص عيوني امرني افتح حلكي ماكدرت افتحه ، هو خله ايده على خدودي وعصرهن ، فتح حلكي وظل يضوي بحلكي بلايت صغير .

كالي رفعي ايدج ، مكدرت ارفعها ، هو اخذ ايدي ورفعها ، تركها وكعت من حالها .

علي الدر جان واكف وراه ومكتف اديه ، التفت اله الدكتور وكاله احتمال بداية سكتة دماغية لازم تاخذ الها رنين .

سأله الشيخ : ان شاءالله بس حالتها خو ما خطيرة ؟ يعني اكدر اخذها لبغداد وهيه بهالوضع هذا حتى نسويلها التحاليل هناك لو مانكدر ؟

جاوبه الدكتور : خلي ننتظر حالتها للصبح خليها تحت المراقبة هسه وضعها حرج شويه وبعدين نقرر .

هز راسه الشيخ بتفهم واني غمضت عيوني
معناهه اني مو ببغداد هسه لعد وين اني!

معقولة بعدنا بالنجف! ياربي اشتاقيت لابني اريده ياربي ، معقولة يصير بيه شي ويبقى دانيال يم اهل ابوه الظلام الوحوش .

لا يربي لااا اشفيني لخاطر ابني حتى لو مشلولة حتى معوقة بس ردني لأبني.

بس خلي يكبر ويصير رجال ويعتمد على نفسه وبعدين موتني واخذ امانتك .

حسيته اجه وصار فوك راسي مالتفتت اله بس عرفته من ريحته .

ضغطت اسناني حييل بكره وحقد وغمضت عيوني ، حسيت دموعي نزلت مثل الجمر على خدي تجويني..

حسيت طرف اصبعه السبابة جوه عيوني يمسح دمعة وكعت بألم وعذاب .

واجاني صوته الخشن بلوم وعتب
: ليش وصلتينه لهالحال ؟ ليش تعاندين وتأذين رووحج ؟ وتأذيني وتخليني اطلع من طوري .

تره انه ما ادري بيج هذا المرض وحتى من جبتج هنا عبالي من الخوف صار وياج هيج !

لمن خابرت شرار وكلي ، انه ليش ما ادري ولو ادري قسما بلي رفع السماء بلا عمد ما اسويها بيج .

وهسه لاتبجين ابنج محتاجج شدي حيلج صيري قوية وكومي وانه اوعدج وعد زلمة اخذج منه طيبة صاحية اردج لوين ماتردين .

تردين اردج لسلمان بيك بيت عمتج ميخالف ترحين لاهلج هم ميخالف

اردج لبيتنا بيت رجلج شوكت ما تجين انتي معززه مكرمه وخلي يكون عندج علم صدر البيت الج والعتبه النه بغض النظر عن افعالج انت حرة نفسج ما تردين هذا الشي راجع الج .

عذريني ام دانيال انه غضبي عليج اعمى بصري وبصيرتي ، لدرجة ماشفت اثار الضرب على وجهج اله لمن نبهني الدكتور .

كليلي منو السوا بيج هيج ؟ وهالمرة انتي اختاري طريقة العقاب الي راح اتخذها بحق الجاني .

... تمنيت ابتسم بسخرية واستهزأ بي بس شلل حلكي ما ساعدني ، غمضت عيوني ، شي بداخلي مرتاح لمن كال راح يطلق سراحي واخيرا .

فرحة بداخلي رغم الالم ، رغم عتمة السرداب الي لحد الان اشوفها مطبوعة على اجفاني!

حسيته رفع شال ونزله على مقدمة رأسي ..
بقيت مغمضة عيوني ما افتحتهم ..

حسيته وكف على حيل وسمعته كال ارتاحي ام دانيال انه بره ، ان شاءالله للصبح انتي زينة حتى نرجع لبغداد ..

مهيب ... اخذت دانيال ودخلت بالقصر ، جان غافي على جتفي ، شفت وحدة منهن كاعدة على النافورة ومبينة ضايجة .

لابسة تراك شتوي وردي فاتح ومخليه على راسها الكلاو مالته وبي اذان الارنب . ومشكلة ردن وحدة من اديها .

التفتت الي باوعت لوجهه عرفتها ريلام هاي ..
تقربت منها وهي هم كامت تباوعلي وتباوع لدانيال متعجبة .

صرنا قريبين من بعض سألتها شبيج كاعدة يم النافورة بهالبرد ماتخافين تتمرضين ؟

باوعت لوجهه عيونها حمرة ، عكدت حواجبي
سألتها شبيج منو وياج انت باجية ؟

فركت عيونها وحجت بغصة وهزت راسها
لا مهيب مابيه شي تعاركت ويه هيام وضوجتني ..

هيه هاي هيام شنوو من بشر شكد نذلة قالقة البيت كله بمشاكلها االي يوم اكل لابوي يوديها يم عمامج ونرتاح منها .

لاء مهيب انته ماتدري شصار خالو كص شعرهه واني انطيته المكص لان حاجية على موج .

هه السالفة بيها موج !! المهم زين تسوون عاشت ايدج وايده ..

يمعود مهيب عوفنه من هالسالفة وهذا وين امه ؟
وشيسوي عندك ..

سكتي امه سالفتها سالفة رايحة للنجف هيه وابن عمها ومطلعة عمي حمدان من الكبر ودافنته بغير مكان وبدون علم ولا واحد منه وابوي جن جنونه اخذها للنجف تدلي ع الكبر .

عزااا صدك تحجي مهيب شبيها فرح تخبلت خو ما تخبلت .

انتي وياهه علاقتكم قوية ماحسيتي بيها ما كالت كدامج شي .

لا والله اصلا ماتحجي ويايه مدري شبيها وطردتني من غرفتها ..

ضحكت بسخرية : هاي شبيهم وياج ريلام مبينه صايرة ورين مشاكل بس لا صرتي مشكلجية مثل اختج وتخليتي عن براءتج المعهودة .

هههه لا والله مهيب هيه فرح تعبانة نفسيتها هالايام والله منا وجود سحر ومشاكلها وياها ومنا مشكلتها الاخيرة ويه هدى وتشوفنه صرنا صديقات عبالها تخليت عنها .

لا خطية ريلام هي صح عدها شطحات مثل مصيبتها مال اليوم بس جواهه قلب ابيض وماتأذي احد اله الي يعيل بيهه .

هزت راسها اي صح كلامك خطية خالو خو ما يأذيها .

تنهدت والله مادري بعد ظلت هو وقابيلة صبره
وهيه وعنادها بعد ..

المهم اخذي دانيال ودخلي جوه خطية نايم ..

مدت ايدها تريد تاخذه ، رعبني منظر ايدها
بيها تلث خطوط خراميش ومدمايه .

انصدمت لزمتها من ظاهر كفها ورفعتها لمستوى نظري اباوع عليها بذهول حزين ! وايدها ترجف بسبب قبضتي الها .

بعصبية : ولج هاي شنو ووو من سوي بيج هيج ؟ هاي اختج الادبسز مووو ؟ اذا شرار كص شعرها اليوم اله اكسر اصابعها .

سحبت ايدها مني وكفت سدت طريقي .
لا حباب مهيب اتركها هيج راح تزيد والله لازم نحتويهه مو نزيد عليها بالعقاب .

ولج من هيج جنتي كاعدة هنا تبجين! استغفر الله ..
زين عمتي وين عنها ؟ ما كلتيلها على سوالفها .

ماما تكولي صوجج ليش تنطين لشرار المكص جان كتيله ماعدنه هنا مكص . واني والله مجان قصدي بس هو يخوف جان ومعصب وحبسنه بالغرفة واني خفت وانطيته اله .

اي طبعا بنتها المددللة هيام امج ماتنطي بيها .. هاج اخذي الطفل وديري بالج لا يلجم ايدج ، لو خلي اني افوته جوه انتي خاف مابيج تشيلينه .

ابتسمت لا بيه عادي هسه انزل ردان التراك واشيله

انطيتها الها واني مقهور عليها تمنيت الجرح بيه ولا بيها ، ياربي شكد احس نفسي رخيص كدامها
دمي فدوة روحي وعمري وكل حياتي فدوة بس لا تتأذى هيه .

اخذته واني دا اطلع .. بس معصب وبداخلي اسب هيام واغلط عليها وادعي ..

سمعتها كلتلي اكللك ..

التفتت واني مبتسم : كولي .

هي هم ابتسمت ابتسامتها الطفولية الساحرة ودنكت خجلانة وحجت عود جيبله ممه وحليب خاف هنا ماعنده كلهم ماخذتهم وياهه .

عيوني بعيونها رديت : اتدللي وبعد ؟

ردت بتساؤؤل يمكن حفاضات هم ماعنده ..

مممم حليب وممة وحفاضات حسيت نفسي متزوج ولج .

ابتسمنا وعيونه بعيون بعض ، دانيال مخلي راسه على كتفها ونايم وطخ راسه بركبتها اكيد هسه يشم ريحتها ريتني دانيال هه .

خليت ايدي على الكبوس مالته وحركتها بحنية
وكتلها ديري بالج على وليدج الليلة .

باسته على راسه وكالت اي الليلة ينام يمي بس باجر الصبح شلون اني اروح للمدرسة هم شوكت يجون ؟

والله مادري بلكي بالليل ولج عيني فرح سحلتنه سحل طيحت حظنه من النجف لبغداد ومن بغداد لاطرافها بسلمان باك لبيت عمتها ظل بالي على ابوي اكيد هسه يتعب بالطريق .

ان شاءالله مابيهم شي ويرجعون سلامات ..
همست ان شاءالله ، يله فوتي خلي بفراشه .

كلت هيج وطلعت وبداخلي اكول يوم الي توصيني
على حليب وحفاضات لإبنه .

موج ...

خابرتني منال بنت عمتي .. ولج موجه لحكي اختج شردت ويه واحد طويل وضخم مربي شوارب وتعبان عليهم ، يوكلهم ويشربهم يعني ، حنطاوي على برونزي على حمار هيجي .

لطمت خدي عزااا بعينج منال صدك تحجين طااح حظج ام كرش غير تديرين بالج عليها .

اي ولج وشكله ضابط مدري مجرم من دنك واخذ دانيال من الارض شفت مخلي ببنطرونه مسدس .

لطمت خدي الثاني صخام الصخمج وهي مانطتني مجال كالت اني شعليه المهم اي اكملج لابس قمصلة جلد سودة وجواهه بدي هم اسود

بترت كلامها : ولج واني شعليه بملابسه ولج كوليلي شون اخذتي وابنها شلووون وهي منين تعرفه .

ولج هو اخذ دانيال وهيه تبعته تركض وتصيحله مهيب .. بس الصراحة شون مهيب هو بس لا يباوع لايزحف ثكيييل .

الله ياخذ كرشج ان شاءالله خوفتيني ..

مشكورة حبيبتي خوش دعوة حلوة والله امين...

ولج هذا ابن حماها مهيب ..

اي ماشاءالله عليه هو صغير وصاير مهيب ركن يعني عمره مبين نهاية العشرينات .

ولج هو ملازم واسمه مهيب ..

ها ها بس والله صاك الله يحفظه بربج موج كليلها خلي تخطبني اله ..

لج منال ادبسز انتي مخطوبة ناسية نفسج

هو من شفته نسيت نفسي ونسيت خطيبي
بس يله ميخالف كليلها خلي تخطب سارة اختي اله مو مشكلة ..

ولج ولي ولي خلي اخابر اشوف حل للمشكلة هايه ..

ولج تعاي اسمعي المصيبة اللخ لعد غير اختج مطلعة رجلها المرحوم من قبره وشامرته بالشط مدري حاركته مدري شمسويتله .

عزاا تصخمت وتلطمت اختي شيفكنا منهم شيفكنا من الشيخ هالمخبلة هاي ولا تكعد راحة عود هي مسؤؤلة عن قبر زوجها وكذا شعليج انتي عنده اخوان كله واحد بكد الصبة الي براس شارعنا ..

وكملت بانفعال طاغي : خو شرار الزاحف بي عشرة من احمد وعشرين من سالم راسه شكده كاعد لا شغلة ولا عملة مايكدر يحفر قبر ويطلع اخوه ويدفنه ؟

شرار الزاحف منو ؟ مبين زاحف عليج مووو ؟

يمكن اني نزلت ع ترابي شوية وطلعت كل الي بكلبي من كلام مكبوت .

اكولج منال شوكت صار هالحجي ؟
جاوبت الساعة تقريبا بالوحدة الظهر ، تعرفين الجو حلو واحنه رحنه تمشينه لطاك كسرى هو هناك اجه عليها واخذها .

وانت توج يله تكليلي الساعة تسعة هسه

والله التهيت شسوي ونسيت همينه
لا والله انت فاهية ولج بنت عمتج كدامج هيج يصير بيها توج يله تحجين .

خابرت احمد ماجاوبني ونسيت والله .

اوكي باي منولة حياتي اروح اشوف مصيبة اختي ..

سديته منها وخابرت احمد كالعادة ميجاوبني يمكن كاعد هسه بالكوفي والفون لو صامت لو بالسيارة .

طلعت الفيس رفعت الحظر من شرار وراسلته
اختي وين وشسويتوا بيها ؟

وره ثواني دزلي رقمه كال خابريني هسه احجيلج .

خفت كلش مبين الموضوع حييل خطير ..

خابرته بسرعة ، فصله وخابرني .. فصلته وخابرته ..

دزلي مسج ع الفيس راح نظل هيج للصبح ؟

دزيتله تره عندي رصيد ميحتاج تصير حنين ومسؤؤل احجيلي شسويتوا بأختي ؟

مجاوبني وظل يتصل على الرقم .. جاوبته واجاني صوته الي يستفز مشاعري ويجردني من كل احساس حولي ، اله الاحساس الغريب الي احس بي اتجاهه ، انقباض بعضلة القلب والمعدة واضطراب بالانفاس .

شلونج موج شخبارج عيوني بعدج رافضتنه غيرتي رأيج لا ؟

جاوبته بجدية : ترة اني ممخابرتك عمود هالسالفة لا وانما انتهت بوقتها وبعد لا تفتحها رجاءً وهسه دااحجيلي اختي وين شحسوون بيها ؟

شسالفة يابه هيج احنه كوو*** ونسويلها شي يعني كل ما بالموضوع اخذها الشيخ حتى تدلي على القبر ويرجعون .

انته متأكد انطيني رقم الشيخ اخابره واحجي ويا ..

شنو مالج ثقة بيه لج بابا كعدي وسكتي داكلج مابيها شي اختج الخبلة الي حطت روحها وراحت من كيفها ترة وهاي السوالف حتى المخبلة ماتسويها بس اختج تخطت كل الحدود .

الله يعلم شسويتوا بيها حتى هيج جنت وراحت سوت هالشي ترة هي من اجت جان وجهه مخرمش ومدمى ومبينه مضروبة منو ضربها ؟ الي اعرفه انته اربعة وعشرين ساعة بالبيت ماشفت من ضربها ؟

هاي شنو هالسمعة هاي عني ؟ شنو قصدج يعني اني حالي حال النسوان ؟ اربعة وعشرين ساعة بالبيت انتي ليش ماتحترمين نفسج ؟

عزااا شيسكته هسه انفتح بعد .

جاوبته بهدوء .. لا مو قصدي مو هيج بس ضايجة على اختي ..

ضايجة على اختج ماتطلعين حركتج بيه وتتجاوزين مفهووم ؟ ترة اني لا تشوفيني بلا شغل اني اشتغل اوون لاين انطي استشارات طبية ع التواصل .

وانته شون تنطيهم استشارات طبية وانته ممخلص دراستك ماتخاف عليهم يموتون .

طبهم طوووب من كللهم يثقون بيه وبعدين تعالي انتي رفضتيني لان ممخلص دراستي ؟

ترة اني ما انرفض لعلمج اني دكتور ثلاثيني اخويه شيخ وابن اخويه ضابط وابنه اللخ المطي مهندس .

ضحكت الكرعة تتباهه بش

بعدني ممكملة كال بشعر خالتج ...

كتله احترم نفسك شجاب خالتي بالنص ..

كال بجدية مصطنعة محترم نفسي ..

لا مامحترم نفسك ومرة ثانية سخيف وتافه لا تصير رزالة وكلام محلو متحصل .

ضحك وظل يحجي بالفصحى ويقلد مذيعين الاخبار
_ ومن هو قائل هذا القووول هل هي موت بنت أبي موج ؟

ضحكت بصووت عالي ..

كال بانفعال كاذب : لا تضحكين لاتضحكين احتركوا اهلج اشتعلت عشيرتج احترك عمي بكبره وخالي همين ، خو مانسيت احد ؟

روحك نسيت تحرك روحك ليش تحرك اهلي اهلك انته حر اهلي ليش ؟

هو سكت شويه وكال مو تدرين موج ضحكتج حيل حلوة ..

حسيت قطعة من قلبي انثلمت من صدوك تنفسي اضطرب حيل ..

خليت ايدي على حلكي لايسمعني ، ورفض بداخلي اسد التليفون بوجهه عندي رغبة بداخلي اكمل كلام وياه .

اجاني صوته الخشن : اشو سكتي تخجلين اتغزل بيج مو ؟

جاوبته : لا اصلا كلامك ما يحرك بداخلي شي ابد

كال شعجب ؟

رديت : لان سخيف وتافه ..

كال اخخخخ لو يمي انتي هسه

ايباااه وشتسوي ؟

جاوب ماسوي شي بس تره يصيرن ريوك وغده وعشه وتعلولة مال قبل النوم .

سألته بعصبية : انته شتقصد ؟

رد بسرعة : شفايفج ..

صيحت سخيييف سمعت جزء من ضحكته الصاخبة وسديتتته بوووجهه الحقير لا والله اني حقيرة وصوجي اطول وياه بالكلام .

بسرعة رحت حظرته من الفيس ..ومن الرقم ..

لزمت المخدة عضيتها حييل ، وكلساع صوته يررن بأذني واريد اضحك واكره نفسي . انوب تذكرت
كال اسمي صح هالمرة ولأول مرة يلفظ اسمي عدل .

وكلساع احسه يكولي موووج مووج مووج ، سديته إذني وغمضت عيوني .

دخلت انوو كالت شبيج ؟

فتحت عيوني ووكفت ارجف هزيت راسي ..
ورحت خابرت احمد واخيرا رد ..
عاتبته انتوا شلون تسوون هيج ؟ هاا؟ شون تطاوعوهه .

ولج موج جانت مصممه وبأعلى درجات جنونها ذاك اليوم هم ضاربيها خطية واني اذا ماطاوعتها ورفضت سالم جان راح يروح وياهه وما اكدر الزمه وامنعه انطته فلوس وهو دين ومذهبه الفلوس.
واني رحت وياهه لان جنت خايف عليها . مو قابل على تصرفها ، اختنا تعبانة موج متعبيها هواي واحنه مانكدر عليهم ..

تحسرت وكلت اووف ..

هو كال وهسه شنو موج ؟

هسه الشيخ اخذها للنجف تدلي على القبر

وليش مايروح للدفان يدلي ع القبر مو هو دفانهم ويندل .

ماعرف شنو غايته خايفة يأذيها ..

لا ما اعتقد الشيخ مثقف وواعي يمكن يريد ينطيها درس لان كسرت حجايته وهو شيخهم وجبيرهم وهي هم غلطانه تردين نروح لبيتهم هسه ؟

اذا مموجودة والشيخ هماتين مموجود شنسوي رايحيين احنه انتظر لباجر والله كريم .

مهيب ...

جبت الشغلات الي طلبتها محبوبة كلبي وجيت للبيت
صحت ريلام ، انتبهت يم المغسلة بس شافتني رفعت الكلاو على راسها .

تقربت منها شفتها ريلام ياالله نفس اللبس قبل شوي ريلام هم لابسة وردي .

شمرت العلاليك بالكاع وتقربت منها ، لزمت كف ايدها وعصرته ، رفعته لمستوى نظرها وخزرتها وهي تقلصت ملامحها بخوف .

ضغطت على اسناني : تكصيهن لا اكسر اصابعج والله ولج انت شنو من بشر شون هيج تخرمشين اختج وتدمينهه ؟

همست بحزن ووجع : شكت لك مني موو ؟ زين ليش هيج تدافعلها ، اني اني الي نكصت ضفيرتي شطولها وهسه انته مقهور عمود خرمشتها وهي السبب هيه انطت الخالو المكص .

نترت بيها : تستاهلين بسبب افعالج العوجة وتستاهلين اكثر بعد من هذا العقاب.

شهكت بالبجي وعيونها حمر ، تركتها ورحت ..

عفتها ورحت اخذت العلاليك وصعدت فوك ، صحت ريلام ، شفتها طلعت من غرفة فرح .
انطيتها الحاجات كلها وكتلها جبتلج وياهه لاصقات جروح خلي على الخراميش لا تبقى هيج تلتهب .

ابتسمت وتشكرت مني واني نزلت جوه ادور على شرار المطي يدافع لحبيبته وحبيبتي واكعة بيها .

شفته كاعد بالصالة كاعد ع القنفة وصافن والموبايل مالته مخلي على حنجه .

ضربته بقبضة ايدي على كتفه حيل هو فزز وباوعلي متعجب ..
_ اكول دكتور انته تدافع وتحامي لحبيبتك واحنه نبتلي!

رفع رجله وضربني على بطني وكعت ع القنفة متألم ولازم بطني . وهو ظل صافن .

دخلت حبوبتي كالت ولك يمه مهيب شنو صاير شو فريحة ماهي وهذا الوليد هنا وابوك هم طول ماجه للبيت اليوم طالع من الصبح .

جاوبتها : ها حبوبة ابوي راح للمقبرة بالنجف واخذ فرح ويا وكعدت احجيلها السالفة .

خلت اديها على راسها وكالت يبووو شنو هالجسارة شنو هالخبال هاي شجاي تسوي بعد وشنشوف منها ولكم خاف يكتلها ويدفنها ونبتلي بيها احنه ويجون اهلها يسوونها ماكو منها وبيها ستين حظ وهي مخبلة

كام على حيله شرار وكال هم صدك حجيج حجية اكوم اخابره خاف سوالها شي وتوها اختها خابرت خايفة عليها .

ضحكت ها يعني انته جنت تخابر اختها اشوفك جنت صافن لذاك الصوب .

حبوبة كلتله جنت تخابر اخت المخبلة يعني حجي هيام صدك ماجذبت البنية وانته حطيته وزينتها ليش ولك يمه .

شرار جاوبها بعصبية : يييمه لاتخليني انعل اب

سمعت صوت عمتي بلقيس تصيح
ولك شرار تنعل ابو هيام الميت علمود هاي ام البناطير ..

جاوبها بقهر ترة ام البناطير الها اسم واسمها موج وبنية شريفة لا تحكمين ع المظهر وبتج وللمرة الالف اكلج ربيها .

الحجية كلتله : ولك شرار صدك رايدها هاي ولك ماكافي اختها مخبلتنه انوب هاي جا والرويسية مدري السوريه ووليدك شنو هو لعب .

يمه رجاءً محد اله علاقة بيه انه رجال بالغ وراشد واعرف كلش زين شجاي اسوي انتوا لا تتدخلون .

ظل معصب وعمتي بلقيس خلت وراحت والحجية استلمتني ولك مهيب انته شلون تخلي ابوك ياخذهه ويروح وحده جان رحت وياه جان جيت عليه رحت وياهم ولك الوادم هسه يشوفونها ويا وحيدهم شيكولون ؟

جاوبتها متعصب : يسدون حلوكهم وياكلون تبن شحده اليحجي على ابوي وشرفه .

ردت منفعلة : ولك وانته شتريد تسوي ؟ خو ماتسد حلوك العالم ..

جاوبت : اترس حلكهم رصاص مو بس اسد حلوكهم .

جاوب شرار : اسكت اسكت غير يكعد راحة رامبو رماي الجلاب . وكوم شوف اخوك المطي همينه من البارحة وهو ماكو .

_ ما ادري بي مااسرح بي اني وكايم انام لحد يكعدني باجر ورايه كعدة من صبح الله .

ولك يمه تعشى ونام لاتنام جوعان ..

جاوبتها لا حبوبة مو جوعان اكلت قبل لا اجي
بست راسها وتوجهت لغرفتي ، سبحت وبدلت ملابسي
وتمددت على السرير وغفيت ، وعيت على صوت تليفوني ، كعدت اسب واغلط منو يتصل بهالوقت
اخذت الفون باوعت للساعة بالوحدة .

جاوبت اجاني صوت عمي حسان يضحك
مبين من صوت شارب كال تعال اخذ اخوك من يم الباب اني ماكدر افوت لبيتكم تدري بيه .

فزيت : شبي لهيب ؟؟

جاوب مابي شي بس مثكل بالشرب شويه ..

بعصبية جاوبته : مثكل بالشرب شنو هو مايشرررب عمي ليش تمشي بهالدروب هايه ؟

لك انجب وانزل اخذه لا اشمره يم الباب ويسوويلكم سالفة ويفضحكم والناس تحجي عليكم ابن الشيخ سكران .

سده بوجهي ، اول تالي لهيب يشرب ، خاف ممرتاح ويه مرته! شمرت البطانية ونزلت اركض اخذته من يم الباب وهو يهذي ويلغي ومدري شنو يكول اجيت احطه اشبعه كتل على هالعملة هاي بس هاي اكيد سوالف عمي حسان هو الي خلاه يشرب احنه ماعدنه هالسوالف ولا واحد منه يشرب .

......

هدى ...

كاعدة بغرفتي اجتي ريلام فاتت وبيدها دانيال .
كالت هداوي اخذي خلي يمج اني غيرتله وانطيته ممته بس شويه لعبي اريد اقره .

توة دااخذه منها ، طبت هيام متعصبة ، دفعتها على ظهرها وكعت على السرير هي وداني وهو خطيه ظل يبجي قهرني وفرح هم ماكو واحس عيونه حزينه وتدور امه بين الوجوه .

اخذته منها وريلام لزمت ظهرها وكفت تباوعلها ..
هي انفجرت بوجههه حقيرة غيووورة تشكيني لمهيب كلبة اكرررهج مووو اخت انتي موو اخت سم وزقنبوت .

ريلام سكتتت وبس تباوعلها بقهر وشفافها تتحرك وترجف .. ودانيال خاف وظل يبجي .

طلعت هيام بعد ما غلطت وسبت وشتمت ريلام واني واكفة مصدووومة منها .

ورى مطلعت التفتت ريلام وظلت تتفحص دانيال
وتبجي وتسكت بي واخذته مني وتسأله بطريقه طفولية : حبيبي خو ما تأذيت ؟

كتلها لاتخافين عليه انطينيا روحي اقري يبقى يمي هسه العبه .

هزت راسها ومسحت دمعتها : لا خاف يستغرب منج اخترع هسه بعد مايسكت .. وبعد مالي نفس اقرا ..

سألتها : امه وين وليش بس هو هنا اخذتوا منها خطية !-

كعدت تحجيلي على فرح والي سووته واني هم سولفت الها شصار البارحة الصبح من دخلت عليها وشفت متخربطة .

ريلام كالت يااعزاا شبيها هيه بس من تتأذى تجيها النوبة ومحد يدري بيها صرع بس اني وخالو حمدان الله يرحمه وخالو شرار هم عرف بالفاتحة .

بقينا نسكت بالطفل وهو خطية يشهك ويكول مممه
ويبجي كووة سكت ونام ، اخذت ريلام وطلعت واني بقيت بالغرفة ..

لهيب تأخر ما اجه مدري وين راح ! اني من انام البس تراك صيفي لان استحي من لهيب وخاف اتكشف
لبست بدي ربع وبجاما ونمت ..

وعيتني دكات على باب الغرفة .. كمت من السرير مخروعة منو يدك عليه الباب بهالووقت ؟
كلت منو ؟ جاوبني مهيب اني هدى افتحي الباب هذا رجلج يبجي عليج ..

استغربت من كلامه واني منعسة !-
لبست شال وفتحتها ، شفت مهيب لازم لهيب
وهذا الثاني منتهي فد نوب .. مدري شبي !

مهيب ضربه على ظهره وكال وصلت الامانة ..
لزمته من ايده وهو يغني ويهذي ومدري شيكول ..

كعدته على الجرباية جان وجهه وراسه مبلل
وكفت كباله اباوعله ، باوعلي وسحبني من ايدي
قوي ، سفطني على السرير وصار فوكايه

ذب كل ثقله عليه ، اريد اتخلص منه ماكو ، ظل يباوع لوجهي ، عيونه حمر وتخووف ، ارتعش كل جسمي من الخوف ..
ابتسم وكال بثمالة : تعاي نشاقة ونجيب جهال !

يتبع

فضلا وليس امرا ، متابعة لحساب الكاتبات
Shahrazad___1995

Ruba-AL-Jarah